Category: Uncategorized

Ishyirahamwe ry’Umupira w’Amaguru mu Rwanda, FERWAFA, ryamaze gutangaza ko umukino w’igikombe kiruta ibindi mu gihugu “FERWAFA SUPER CUP” uzaba tariki ya 10 Mutarama 2026.

Uyu munsi ku wa Mbere tariki ya 8 Ukuboza 2025 ni bwo FERWAFA yandikiye amakipe azahatanira iki gikombe (mu bagabo n’abagore) abamenyesha igihe umukino uzabera.

Mu busanzwe uyu mukino uhuza ikipe yatwaye Shampiyona n’igikombe cy’Amahoro ubundi usanzwe uba mbere y’uko Shampiyona itangira kuri iyi nshuro si ko byagenze.

Muri iyi baruwa yasinyweho n’Umunyamabanga mukuru wa FERWAFA iragira iti 'Mu rwego rwo kwitegura umukino w’igikombe kiruta ibindi mu Rwanda ‘FERWAFA Super Cup 2024-2025’, tubandikiye tubamenyesha ko uwo mukino uzakinwa tariki ya 10 Mutarama 2026.”

'Amabwiriza agenga uwo mukino, isaha n’aho uzabera muzabimenyeshwa mu gihe cya vuba.'

Mu bagabo iki gikombe kizahuza APR FC yegukanye ibikombe byombi na Rayon Sports yabaye iya kabiri. Mu bagore uzahuza Rayon Sports WFC yegukanye Shampiyona na Indahangarwa yegukanye Igikombe cy’Amahoro.

Nyuma y’umukino APR FC yanyagiyemo Rayon Sports 3-0 mu mukino w’umunsi wa 7 wa sha mu Gushyingo 2025, amakipe yombi agiye kuzahura yuzuye.

Mu gihe aya makipe atahura n’izindi mvune, APR FC izaba ifite Cheikh Djibril Ouatara na Memel Dao abakinnyi ngenderwaho batakinnye umukino uheruka ni mu gihe Rayon Sports izaba ifite ba rutahizamu Ndikumana Asman na Fall Ngagne batakinnye uyu mukino kubera imvune.

APR FC na Rayon Sports zigiye gucakirana muri Super Cup

APR FC ishobora gutandukana n’abakinnyi babiri bakomoka muri Uganda muri Mutarama 2026, bakaba bajya kwishakira ahandi bakina.

Bivugwa ko abakinnyi babiri basatira banyura ku mpande, Denis Omedi na Hakim Kiwanuka bombi bakomoka muri Uganda, ikipe y’Ingabo z’Igihugu irimo gutekereza kwicarana nabo bakaba basesa amasezerano bari basigaranye.

Aba bombi basinye amasezerano y’imyaka 2 muri Mutaranama 2025, mu kwa Mbere kwa 2026 bazaba basoje umwaka umwe.

Iyi kipe ikaba itarashimye umusaruro wabo ndetse bakaba babona mu ntumbero bafite mu mwaka w’imikino utaha wa 2026-27 ntabwo bababona mu ikipe bifuza kubaka.

Uretse aba bakinnyi kandi hari n’abandi bakinnyi bashobora kutazakomezanya na APR FC barimo Aliou Souane na we utekerezwa kuba yarekurwa na we muri Mutarama ariko bakagira ikibazo cy’uko mu gihe Clement na Yunusu umwe yagira ikibazo batabona umusimbura kuko Alex yagaragaje urwego rwo hasi cyane.

Mu rwego rwo kwitegura umwaka w’imikino wa 2026-27 APR FC izakora impinduka zikomeye aho izubaka ikipe ikomeye ndetse izi mpinduka zikaba zizatangirana n’umwaka utaha.

Hakim Kiwanuka na Omedi bashobora gutandukana na APR FC

Ibysihimo ni byose kuri Miss Kalimpinya Queen wegukanye Shampiyona y’u Rwanda yo gusiganwa ku mamodoka 'Rallye des Mille Collines', gusa avuga ko rwari urugendo rutoroshye na gato.

Mu mpera z’icyumweru gishize ku wa Gatandatu ni bwo Shampiyona y’u Rwanda yo gusiganwa mu Madoka yasojwe aho umunsi wa nyuma wakiniwe i Rwamagana maze mu cyiciro cy’imodoka zikururira hose zizwi nka 'Four by four cyangwa four-wheel drive (4WD)', Kalimpinya Queen ni we wegukanye shampiyona.

Mu kiganiro Queen yahaye ikinyamakuru ISIMBI, yavuze ko ari ibyishimo bikomeye cyane kuri we kwegukana iyi shampiyona yari amaze imyaka 3 ashaka.

Ati 'Nishimye cyane, ni ibintu ntazi uko navuga, twari tumaze imyaka 3 dushaka kwegukana Shampiyona, kuba twabigezeho ni ibintu twishimiye cyane. Ndashimira umwuganizi umfasha (Co-pirote) n’ikipe yose idufasha gutegura irushanwa.'

Yavuze ko kubigeraho bitari byoshye kuko bahuye n’imbogamizi zitandukanye zirimo gukora impanuka, imodoka gupfa moteri n’ibindi.

Ati 'Uyu mwaka ni umwaka utari woroshye, ni umwaka twagiye tugiramo ibibazo byinshi, hari aho twageze imodoka ikava mu muhanda (sortie) tugakora niba nabyita impanuka, hari ibibazo twagiye duhura nabyo.'

'Ikindi kibazo twahuye nacyo, kubera imodoka ishaje twamennye moteri, biba ngombwa ko tugura indi, twiyambaza iyindi mu gihe gito kandi isiganwa ryari ryegereje ntabwo byari byoroshye gushyiramo moteri nshya ugahita ukina, ntabwo byari byoroshye.'

Nyuma yo kwegukana Shampiyona y’u Rwanda ubu barimo gutekereza no kujya guhatana no hanze y’u Rwanda.

Ati 'Umwaka utaha turateganya kwitabira Shampiyona y’u Rwanda ariko tukitabira na shampiyona mpuzamahanga, turashaka kujya muri Kenya, Uganda n’ibindi bihugu byo muri Afurika, turashaka gukina 'Africa Rally Championship’'.

Yanagiriye inama abari n’abategarugore ko batagomba kwitinya ahubwo bashyiramo umuhate mu byo bakora kuko iyo ushatse ikintu byanze bikunze ubigeraho.

Ati 'Bashyiremo umuhate mu byo bakora, yego hari igihe bifata umwaka, bifata imyaka ibiri cyangwa itatu kugira ngo umuntu agere ku nzozi ze ariko byatinda ugeraho ukabigeraho, nabatera imbaraga zo kwitinyuka no kugerageza bagashyira imbaraga mu bintu byose bakora, icyo ukunze kiragukundira, icyo ushaka kikagushaka.'

Kalimpinya Queen wabaye igisonga cya 3 cya Nyampinga w’u Rwanda 2017, yagiye gukina umunsi wa nyuma n’ubundi ahabwa amahirwe kuko yari imbere mu manota, mu duce dutandatu twakiniwe mu mihanda ya Munyaga, Musha, Rwamagana, na Cyaruhogo, Kalimpinya Queen wakinanaga na Ngabo Olivier bakoresheje isaha imwe, iminota 53 n’amasegonda 14, barusha iminota 31 n’amasegonda 31 Rutuku Mike wakinanaga na Gasarabwe Alain mu gihe ku mwanya wa gatatu hasoreje Dusingizimana Salvator wakinanaga na Kubwimana Emmanuel.

Mu modoka esheshatu zakinnye iri rushanwa, ebyiri zari zitwawe na Murengezi Bryan wari kumwe na Mpano Avy-Michel na Hakizimana Jacques wakinanaga na Ish-Kevin ni zo zitasoje isiganwa.

Kalimpinya yegukanye Shampiyona y’Igihugu nyuma y’imyaka itatu atangiye gukina amasiganwa y’imodoka nk’umupilote.

Uyu mukobwa winjiye mu mukino wo gusiganwa mu modoka mu 2019 nk’umupilote wungirije, ni we mupilote rukumbi wakinnye amasiganwa atanu yabaye muri Shampiyona y’Igihugu ya 2025 yose akayasoza.

Ayo ni '1st Sprint Musha Rally- GMT’ yegukanye muri Gicurasi, Rwanda Mountain Gorilla Rally yabayemo uwa cyenda muri Nyakanga, '2nd Sprint Nyirangarama Rally’ yabayemo uwa kane muri Nzeri, Huye Rally yabayemo uwa gatatu mu Ukwakira na Rallye des Mille Colline yegukanye.

Mugenzi we bakinana, Ngabo Olivier ni we wasoje umwaka ari we 'co-pilote’ w’umwaka muri Shampiyona y’u Rwanda yo gusiganwa mu modoka.

Mu cyiciro cy’abakinisha imodoka zikururira imbere, uwegukanye irushanwa ni Rutabingwa Gratien naho mu bapilote bungirije uwa mbere yabaye Munyaneza Irénée bakinana.

Kalimpinya yavuze ko uyu mukino w’Amamodoka ari umukino uhenda cyane rero akaba yashimiye abafatanyabikorwa babo barimo ATECAR Garage yabafashije gutegura imodoka, BPR, Car Baba n’abandi bose bafatanyije muri iri siganwa.

Kalimpinya yegukanye Shampiyona nyuma y’imyaka 3 ayishaka

Ngabo Olivier ugenda umufasha yabaye umupilote wungirije wahize abandi mu 2025

Yavuze ko uyu mwaka bagowe n’ibibazo birimo n’imodoka ishaje

Umuhanzi Davido yatangaje ko amagambo y’urukundo yaririmbye mu ndirimbo ye ya mbere yayakuye mu bahanzi bakomeye bo muri Hip Hop na R&B yo muri Leta Zunze Ubumwe za Amerika barimo Nelly na 50 Cent.

Ibi yabitangarije mu kiganiro yagiranye n’ingoro y’ubushakashatsi bw’Ubuhanzi n’Umuco ya Grammy Museum, aho yasobanuye aho yakuye inganzo yumvikana mu ndirimbo zo mu bwana bwe ziri mu zamuharuriye inzira.

Davido yavuze ko mu rugo rwabo hacurangwaga cyane umuziki w’abanyamerika, kandi akumva awukunda cyane akiri umwana.

Yibuka uburyo yakururwaga n’imbaraga n’udushya twa 50 Cent, imiririmbire iryoshye ya Nelly, ubuhanga bwa Ludacris, ndetse n’amajwi aryoshye ya Usher.

Album ya Usher yitwa '8701′ yavuze ko yamufashije gutekereza umuziki nk’igisobanuro cy’ubuzima bwe.

Yagize ati 'Hari benshi bangize uko ndi. Buri wese mu buryo bwe yampaye umurongo wo gukurikira.'

Davido yanavuze ko afata indirimbo ye yitwa 'Aye’ yasohoye mu 2014 nk’iyamushimishije kurusha izindi mu rugendo rwe rw’umuziki.

Yayisobanuye nk’indirimbo ihagarariye umuco nyafurika mu majwi n’imicurangire, ndetse ikaba ikomeje kuba indirimbo yitabirwa cyane n’abafana mu bitaramo bye nubwo hashize imyaka isaga icumi.

Mu ijoro ryo ku wa Gatanu tariki ya 5 Ukuboza 2025 ni bwo Davido yakoreye igitaramo cy’amateka muri BK Arena yafatanijemo n’abahanzi bo mu Rwanda barimo Kid From Kigali, Juno Kizigenza n’abandi.

Davido yavuze ko inganzo ayikomora ku bahanzi nka 50 Cent

Wamuniga ukomeje kwigarurira imbuga nkoranyambaga nyuma yo kogosha Davido mbere yo gutaramira muri BK Arena yagaragaje ibitandukanye n’uburyo uyu muhanzi afatwa muri rubanda ndetse n’ubukana bw’imicungire y’umutekano we.

Mu kiganiro yagiranye na ISIMBI, Nsabimana Didier uzwi nka Wamuniga, yasobanuye uburyo yatunguwe no kubona yandikiwe asabwa kujya kogosha umuhanzi Davido witeguraga gutaramira muri BK Arena ndetse anabanza kubicira inyeri akeka ko baba ari abatubuzi bo muri andasi bashaka kumucucura utwe.

Yagize ati 'Mbere umuntu yanyandikiye kuri Instagram ariko kubera ko mba mfite abakiriya benshi bo kogosha sinabyitaho naho mbiboneye ntangira gukeka ko baba ari abatubuzi bo ku mbuga nkoranyamba. Nyuma yaho nimero yo mu muhanga yampagaye kuri whatsap imbwira ko ishaka ko njya kogosha Davido.'

Wamunigga yanagarutse ku buryo umutekano w’uyu muhanzi ukomoka muri Nigeria urinzwe ku rwego rudasanzwe kugera ku rwego rw’uko afungirwa imishumi y’inkweto ndetse n’umukandara habanje kurebwa niba nta cyamuhungabaniriza umutekano kirimo.

Ati 'Nkigerayo nabanje kwikanga nari ndi kumwe n’umuntu nari navuze ko andeberera inyungu ariko dukomeje kwinjira mu nyubako Davido yari arimo abashinzwe umutekano we bamusabye guhagarara akaba ari njyewe ukomeza. Ngezeyo nsanga afite abantu bamurinda kugeza ku mwambika umukandara n’abamufungira lace.'

Uyu mwogoshi wabigize umwuga yanavuze ko yatunguwe no kubona uburyo Davido yicisha bugufi bidasanzwe kugera n’aho yamwemereye ko bafatana amashusho nyuma y’uko yari amusabye ko bafata ifoto imwe gusa, ibi anemeza ko binyuranye n’uko abantu benshi basanzwe bamufata.

Ati 'Njyewe nari nziko ari umuntu udapfa kuvuga uko abonye ariko akimbona yansuhuje nk’umuntu basanzwe baziranye noneho icyatunguye ni uburyo yemeye ko twafatana video kandi njyewe nari musabye agafoto kamwe.'

Akomoza ku mafaranga yamwishyuye yavuze ko atari menshi nk’uko abantu babivuga ariko na none atari make kuko ni we muntu wamwishyuye amafaranga menshi kuva yatangira kogosha.

Mu nyubuko ya BK Arena mu ijoro ryo ku wa Gatanu tariki ya 5 Ukuboza 2025 nibwo Davido yasururukije imbaga yarimo na Madame wa Nyakubahwa Perezida wa Repubulika , Jeanette Kagame .

Wamuniga yavuze uko byagenze ngo yogoshe Davido