Category: Uncategorized

Umuhanzi wo muri Kenya, Bien Aimé Baraza yongeye kugaragaza icyubahiro afitiye umuhanzi ukomoka muri Uganda, Joshua Baraka, ubwo yashimangiraga ko ari umuhanzi wo kwitega muri Afurika y’Iburasirazuba no ku rwego mpuzamahanga.

Ibi yabivugiye mu kiganiro Mic Cheque podcast, aho yagarutse ku buryo Baraka amaze kwagura imbibi z’umuziki we kugeza ku isoko ryo hanze ya Uganda.

Bien yavuze ko ikintu gitandukanya Joshua na benshi mu bahanzi bo muri Afurika y’Iburasirazuba ari uko adatinya kwishyira mu bihe bitamworoheye, kugira ngo abone uko yinjirira amasoko atandukanye y’umuziki.

Bien yemeza ko iyo myitwarire ari yo imufasha gukura vuba no gutera izindi ntambwe ku rwego mpuzamahanga mu rugendo rwe rw’umuziki.

Ati 'Atembera nk’umugabo w’agaciro, yishyira mu bibazo kugira ngo akure ndetse atere imbere. Aho ni ho ahera amenyekana.'

Uyu muhanzi wahoze mu itsinda rya Sauti Sol yasabye abandi bahanzi bo mu karere, cyane cyane Abanyakenya, kwigira kuri Baraka bakareka kwirara kuko bamaze kumenyekana mu bihugu byabo.

Yongeraho ko ari ngombwa ko umuhanzi akoresha amafaranga ye mu kwagura imipaka no gushakisha uburyo abona umwanya w’ibihangano bye ku masoko mpuzamahanga y’umuziki, aho kubaho arangamiye mu gihugu cye gusa.

Baraka aheruka i Kigali tariki 15 Kanama 2025, aho yagenzwaga n’igitaramo yakoreye muri Kigali Universe ku wa Gatandatu tariki 16 Kanama 2025, icyo gihe yahuriye ku rubyiniro na Dj Pius wizihizaga imyaka 15 ari mu bavanga imiziki, Alyn Sano, Ruti Joel, Mike Kayihura, Dj Marnaud, Jules Sentore n’abandi.

Usibye 'Wrong Places’ ;Joshua Baraka yanamenyekanye cyane nyuma yo gusohora indirimbo “Nana” mu 2023, ubu akaba ari umwe mu bahanzi bo mu karere bafite ababakurikira benshi kuri Spotify.

Bien Aime yake Baraka avuga ko ari umuhanzi mwiza uzi icyo ashaka

Source : http://isimbi.rw/bien-aime-yakeje-joshua-baraka.html

Ikipe ya Al Hilal SC yo muri Sudan yamaze kwandikira Impuzamashyirahamwe y'Umupira w'Amaguru muri Afurika (CAF) isaba ko imikino yayo y'amarushanwa ya CAF Champions League yakwakirirwa muri Libya, mu gihe byari bisanzwe biteganyijwe ko izakinira mu Rwanda.

Iyi kipe isanzwe ifite abafana benshi kandi ikunze kwitabira amarushanwa makuru ya CAF, yari imaze igihe ibarizwa mu bibazo bituma itabasha kwakirira imikino yayo imbere y'abafana bayo kubera umutekano muke mu gihugu cya Sudan. Ni muri urwo rwego CAF yari yemeye ko Al Hilal yakirira imikino yayo i Kigali, aho u Rwanda rwari rwemeye gutanga stade zujuje ibisabwa.

Gusa amakuru mashya yemeza ko Al Hilal yandikiye CAF isaba guhindura igihugu cyakwakira imikino yayo igahitamo Libya, aho ngo hari ibikorwaremezo bihagije kandi hafi y'Akarere ka Afurika y'Amajyaruguru, bikaba byanayorohera mu ngendo n'imitegurire y'imikino yayo.

Nubwo iyi baruwa isaba impinduka itaratangazwa mu buryo bwemewe na CAF, abafana n'inzobere muri ruhago batangiye kwibaza impamvu Al Hilal ishaka kuva mu Rwanda, kandi u Rwanda rumaze imyaka rwerekana ubushobozi mu kwakira amarushanwa akomeye.

CAF iteze gushyira hanze imyanzuro ku busabe bw'iyi kipe mu minsi ya vuba, kugira ngo imikino ya CAF Champions League itangire nta nkomyi.

Source : https://kasukumedia.com/al-hilal-yandikiye-caf-isaba-kwimurira-imikino-yayo-muri-libya-aho-kuyikinira-mu-rwanda/

Mu Karere ka Rutsiro, Umurenge wa Boneza, haravugwa iby'uruhererekane rw'amahano rwabaye mu ijoro ryo ku wa Kabiri, ubwo umupolisi yarasaga umuturage ndetse n'umukozi wa DASSO, bombi bagakomereka bikomeye, hanyuma na we akihutira kwirasa agahita apfa.

Amakuru y'ibanze yemeza ko umupolisi wari uri mu kazi ari we watangije ubu bwicanyi ubwo yafataga imbunda arasa umuturage n'umukozi wa DASSO bari hafi aho, impamvu yamuteye gukora ibyo ikaba itarahise imenyekana ako kanya. Abatangabuhamya bavuga ko ibyo byabaye mu buryo butunguranye, bigatera urujijo n'impungenge mu baturage b'aho hantu.

Nyuma yo kurasa abo bantu bombi, bivugwa ko uwo mupolisi yahise yikubita amasasu we ubwe, agahita apfa aguye aho. Uwahise ugera ku kibuga cya mbere ni inzego z'umutekano zakomeje kubungabunga ahabereye icyaha, mu gihe inkomere zoherejwe kwa muganga kugira ngo zitabweho n'abaganga.

Ubuyobozi bw'Akarere ka Rutsiro n'inzego z'umutekano bwemeje ko iperereza ryatangiye kugira ngo hamenyekane icyabiteye n'uko byagenze kuva intandaro kugeza ku musozo w'ibi bikorwa bidasanzwe. Abaturage bo muri Boneza basabye ko hakorwa iperereza ryimbitse kugira ngo ukuri kugaragare, hanashyirweho ingamba zikumira ibyahungabanya umutekano wabo.

Ibyo byose bikomeje kuba mu gihe inzego zibishinzwe zikomeje gusuzuma icyatumye umupolisi ukekwaho kuba yaranyuze mu gihunga cyangwa ikibazo cy'akazi agafata umwanzuro ukomeye wo kurasa bo bantu, hanyuma akirasa. Ibyavuye mu iperereza biracyategerejwe.

Source : https://kasukumedia.com/rutsiro-umupolisi-yarashe-umugabo-numukozi-wa-dasso/

Umunya-Burkina Faso ukina hagati mu kibuga mu ikipe ya Wydad Athletic Casablanca, Stéphane Aziz Ki, yongeye kugaragariza isi ikigero cy’urukundo rudasanzwe akunda umugore we Hamisa Mobetto ubwo yamwifurizaga isabukuru y’amavuko.

Mu butumwa yanyujije ku rukuta rwe rwa Instagram kuri uyu wa 10 Ukuboza, Aziz Ki yashimangiye uburyo Mobetto yamubereye nk’isoko y’imbaraga, ituze n’ihumure mu buzima bwe bwa buri munsi.

Ati 'Rukundo rwanjye [Mobetto], kuri uyu munsi w’amateka ndagira ngo nkwibutse uko uri uw’ingirakamaro. Umwaka wose turi kumwe uba impano y’agaciro igice cyuzuyemo ibyishimo, urukundo n’ibihe bitazibagirana.”

'Uri imbaraga zanjye, amahoro yanjye, isoko ry’ihumure n’ishyaka rinyubaka. Wanyigishije kuba umugabo mwiza kurushaho, kandi buri mwanya turi kumwe unyibutsa uko nahiriwe no kugukunda.'

Uyu mukinnyi yakomeje ashimangira ko uyu munsi umufasha we yavukiyeho atishimira isabukuru y’umukunzi we gusa, ahubwo yishimira umunsi wavutseho umugore w’intwari, ufite umutima wuje ubuntu, inseko itanga icyizere n’umucyo ugaragara hose aho ageze.

Hamisa Mobetto na Aziz Ki bakoze ubukwe ku wa 16 Gashyantare 2025, nyuma y’igihe gito bari bamaze bemeje ko bakundana mu ruhame.

Hamisa Mobetto nk’umunyamideri, umushoramari ndetse n’umuririmbyi wari ufite izina rinini mu myidagaduro ya Tanzania, yakunze kuvugwa cyane mu bitangazamakuru byo mu karere kubera ubuzima bwe bw’urukundo butajyaga buburamo agashya.

Mu myaka ishize yagiye avugwa mu rukundo n’ibyamamare bitandukanye, birimo Francis Ciza (Majizzo) na Diamond Platnumz, aho muri 2017 banabyaranye umwana w’umuhungu.
Yagiye anavugwaho gukundana n’umuraperi Rick Ross mu mpera za 2021, ndetse nyuma yaho akagira umubano n’uwitwa Kevin Sowax, nk’uko byakunze kugarukwaho mu bitangazamakuru byo muri Tanzania.

Nyuma yo gutandukana na Kevin Sowax, Hamisa yatangiye urukundo n’uyu mukinnyi w’umupira w’amaguru wo muri Burkina Faso, Stephane Aziz Ki, icyo gihe wakiniraga ikipe ya Young Africans SC ndetse muri Mutarama 2025 bemeza ko bakundana.

Aziz Ki yatomagije we Hamisa Mobetto

Source : http://isimbi.rw/aziz-ki-yatomagije-umugore-we-hamisa-mobetto.html

Liverpool FC, nyuma yo gutsinda Inter Milan i San Siro, umutoza wa Liverpool Arne Slot yongeye gutanga imvugo ikomeje gukurura impaka nyinshi ku kibazo kiri hagati ye na rutahizamu Mohamed Salah, uherutse gusigwa hanze y'urugendo rw'iyo mikino itoroshye. Slot yavuze ko ikibazo atari icy'umutoza gusa cyangwa icy'ikipe, ahubwo ko na Salah ubwe agomba gutekereza ku ruhare rwe mu byabaye.

Mu magambo ye bwite, Arne Slot yagize ati: 'Buri muntu agira amakosa mu buzima, ariko ikibazo cya mbere ni iki: ese umukinnyi na we atekereza ko yaba yarakoze ikosa?'. Iyi mvugo yahise yongera ubushyamirane burimo guhangayikisha abafana, cyane cyane abo muri Afurika bahora bashyigikira Mo Salah.

Slot yakomeje avuga ko ikibazo gikurikira gikomeye kurushaho: 'Ese ubuyobozi cyangwa umutoza ni bo bagomba gutangira intambwe yo kubana neza, cyangwa Salah ni we ugomba gufata iya mbere? Icyo na cyo ni ikindi kibazo gikomeye tugomba kwibonera ibisubizo.'

Nubwo hari abatekerezaga ko umubano w'aba bombi ushobora kuba wararangiriye aho, Slot yahise asobanura ko bitarajya ku rwego rwo kutavugana na Salah burundu. Ati: 'Sinigeze mvuga ko ntazongera kuvugana na Mohamed Salah. Oya, ibyo ntabwo nabivuze kandi sibyo.'

Iyi mvugo yahise isiga urujijo, ariko inatanga icyizere ko hari inzira yo kugarura amahoro hagati y'umukinnyi n'umutoza, hagamijwe gukomeza imbaraga za Liverpool FC mu gihe cy'imikino isigaye.

Source : https://kasukumedia.com/arne-slot-yasabye-salah-gufata-intambwe-ya-mbere-mu-kwiyunga-nawe/

Akanyamuneza ni kose kuri Irasubiza Alliance, wabaye Miss Popularity 2020, n'umugabo we Matthew Ferris, kuko bari kwitegura kwibaruka imfura yabo muri 2026. Uyu muryango ukiri muto wahamagariye inshuti n'abakunzi babo kwifatanya nabo muri uru rugendo rushya rw'ubuzima bategerezanyije amatsiko menshi.

Urukundo rwa Alliance na Ferris rwabaye urugendo rufite amateka yihariye. Matthew Ferris yasabye anakwa Irasubiza Alliance ku itariki 18 Ukuboza 2024, mu birori byuzuye ibyishimo n'amarangamutima menshi. Bukeye bwaho, ku wa 19 Ukuboza 2024, bombi basezeraniye imbere y'Imana muri Leta Zunze Ubumwe za Amerika, bahamiriza inshuti n'imiryango ko biteguye kubaka urugo rushingiye ku rukundo n'ubudahemuka.

Ibi birori byakurikiranye n'isonga ry'urugendo rwabo, kuko mbere y'ibyo byose bari barabanje gukora ibirori byo kwambikana impeta byabaye muri Kanama 2024, bikaba byaratangije urugendo rushya rw'ubuzima bwabo nk'abakundana bafashe inzira yo kubana by'iteka.

Kuri ubu, kuva bategereje umwana wabo w'imfura byabazaniye ibyishimo bidasanzwe. Inshuti n'abakunzi babo bakomeje kubifuriza kubaho neza no gukomeza kwitegura kwakira uwo bazirana amatsiko n'urukundo rwinshi.

Source : https://kasukumedia.com/irasubiza-alliance-na-matthew-ferris-baritegura-kwibaruka-imfura-yabo/

Abarengera inyungu z'umuhanzikazi Marina baramagana ibivugwa ko yaba yibye indirimbo iri kuvugisha benshi ku mbuga nkoranyambaga. Ahubwo bo bavuga ko umuhungu uvuga ko ari iye ashobora kuba ari we wayitiriye Marina, ayisubiramo nyuma yo kuyibona mu buryo butazwi.

Marina yagize ati: 'None se indirimbo maranye imyaka ine nayiba gute? Nyikoze kera, nkiri gukorana na Passy Kizito, twatangiriye kuyikorera kwa Element. Simbizi ukuntu yagira ngo ni iye.'

Yongeyeho ko nta na rimwe yigeze amenya uwo musore uvuga ko indirimbo ari iye, kuko n'igihe bamubajije yatangaje ko ngo yayikorewe na Element, nyuma bigasobanuka ko atari byo. Dutekereza ko yaba yarayibonye mu buryo bwo gusangiza indirimbo ku bantu, hanyuma akayisubiramo,' Marina akomeza asobanura.

Eric ureberera inyungu za Marina we yemeza ko ikibazo cyamenyekanye kere, ndetse ko mbere y'uko basohora indirimbo yabo bari bafite amakuru ko hari undi muhanzi watangiye kuyiyitirira, anashyira verisiyo ye kuri YouTube.

Yagize ati: 'Twari tubizi. Tumaze gusohora iyacu twasabishije iya YouTube kuko ari iyacu. Uwo musore yigeze no kumpamagara ambwira ngo tuyimufashe asohore kuko yayikorewe na Element, ndetse ansaba ibihumbi 200 Frw. Nyuma yo kubaza Element na Passy Kizito twemeje ko batamuzi rwose, duhitamo gushyira hanze iyacu.'

Kugeza ubu uruhande rwa Marina ruvuga ko nta gushidikanya indirimbo ari iyabo ndetse ko imyaka ine bayimazeho ari gihamya ifatika ko nta bujura bukirimo.

Source : https://kasukumedia.com/indirimbo-ivugwaho-ubujura-marina-nubuyobozi-bwe-basobanura-uko-byagenze-mu-myaka-ine-bayimaranye/

Umunyamabanga Mukuru wa CNDD-FDD, Révérien Ndikuriyo, yeguye ku mwanya muri Sena y'u Burundi mu gihe iri shyaka riri ku butegetsi rivugwamo umwuka mubi.

Ndikuriyo yatsindiye umwanya wo kuba Umusenateri tariki ya 23 Nyakanga 2025. Ni inshingano yabangikanyije n'iyo kuba Umunyamabanga Mukuru wa CNDD-FDD.

Muri iki gihe, abanyamuryango bakuru muri iri shyaka ntibari kumvikana ku mukandida uzarihagararira mu matora y'Umukuru w'Igihugu ateganyijwe mu 2027.

Amakuru aturuka muri CNDD-FDD avuga ko hari itsinda ryiyise 'Bene Samurarwa' ririmo abayobozi bakomeye barimo Minisitiri w'Ingabo, bamwe mu badepite n'abandi, bahuriye mu nama yabereye muri Ruvubu Park Hôtel, biyemeza gushyigikira kandidatire ya Perezida Ndayishimiye. Ndikuriyo, Gervais Ndirakobuca uyobora Sena na Gélase Daniel Ndabirabe uyobora abadepite, bo ntibashaka ko Ndayishimiye ari we uzahagararira ishyaka mu matora ari na yo mpamvu hagati yabo harimo kutumvikana gukomeye.

Mu bihe bitandukanye, Ndikuriyo yavuzweho gutangaza amagambo ashyigikira FDLR ndetse akanashinja u Rwanda kubeshya ku birebana n'uyu mutwe. Mu magambo ye yababaje Abanyarwanda, yigeze kuvuga ko ibivugwa kuri FDLR ari 'ubushotoranyi bwa Kigali', avuga ko u Rwanda rumaze imyaka 30 ruvuga ko rurwanya FDLR ariko rutayirandura. Mu yindi nama yabereye i Makamba, yumvikanye avuga amagambo asebya Jenoside yakorewe Abatutsi, avuga ko 'u Burundi butita ku byo u Rwanda ruca intege ku gacurabwenge ka Jenoside', ibintu byafashwe n'impuguke nk'uburyo bwo gushyigikira ibitekerezo bya FDLR, uyu mutwe ukunze gupfobya Jenoside no guhungabanya umutekano mu karere.

Mu zindi nkuru zatangajwe n'ibinyamakuru bitandukanye, Ndikuriyo yagaragaye asaba ko urubyiruko rwa CNDD-FDD (Imbonerakure) rwinjizwa ku bwinshi mu gisirikare, ibintu byateye impungenge ko ashaka kubaka umutwe w'ingabo ushobora gufatanya n'imitwe iri muri Congo irimo n'ifitanye isano na FDLR Kandi koko byarakozwe k'uburyo Imbonerakure zahawe amabwiriza yo guhungabanya umutekano w'u Rwanda nyuma yaho bakubitiwe inshuro muri Kongo kwa Munywanyi wabo Tshisekedi.

Amagambo ye akunze kujyana no gushinja u Rwanda ubushotoranyi n'uko ari rwo rutera ibibazo mu karere, mu gihe atagaragaza ubushake bwo kwamagana imitwe y'iterabwoba nka FDLR ikomeje guhungabanya umutekano mu Burasirazuba bwa Congo. Aya magambo aremerera umubano w'ibihugu byombi, ndetse anashyira u Burundi mu mwanya wo kugaragara nk'igihugu kidashyira imbere kurwanya imitwe y'abicanyi imaze imyaka myinshi ihiga Abatutsi b'Abanye-Congo no guhungabanya amahoro mu karere.

Ku rundi ruhande, iyi mvururu muri CNDD-FDD yongeye kugaragaza ko umutekano wa politiki mu Burundi ukiri mucye, kandi ko amagambo ya Ndikuriyo ku Rwanda na FDLR ashobora kuba afitanye isano n'ibi bibazo by'imbere mu ishyaka biganisha ku gucikamo ibice no gushaka kwigarurira inzego z'ingabo ndetse n'umutwe w'urubyiruko wa Imbonerakure.

Source : https://rushyashya.net/umwambari-wa-fdlr-ndikuriyo-yeguye-muri-sena-yabarundi/

Umukinnyi wa Sinema wa Nyarwanda, Micky yatangaje ko igitekerezo cyo gukora filime ye nshya yise 'Icyumba Cyanjye’ cyaturutse ku bugome n’uburyarya umuntu ashobora gukorerwa n’inshuti ze hafi akunze ku kubwira amabanga ye yose.

Mu kiganiro yagiranye na ISIMBI, Umukinnyi wa filime Mukobwajana Asifiwe, wamamaye ku izina rya Micky yasobanuye uko umuntu uri hafi yawe ashobora kugusenya mu buryo bworoshye bijyanye n’uko ari we ubitsa amabanga yawe yose.

Ati 'Igitekerezo cyaturutse nyuma yo kwitegereza uburyo umwanzi wawe ari umuntu uba ukuzi imbere n’inyuma, umubitsa amabanga yawe ari nabyo bimworohera kugushyira hanze byoroshye.'

Uyu mugore wamamaye ku mbuga nkoranyambaga yavuze ko iyi filime imaze umunsi umwe ishyizwe ahagaragara ikubiyemo urugendo rw’umugore ushatse V
vuba ariko agashyirwa mu mwijima w’amakuru ajyanye n’umubano umugabo we yigeze kugirana na murumuna we.

Iyi nkuru ibumbatiye iyi filime ikomeza igaragaza uburyo uyu murumuna w’uyu mugore aza guhigira kwigarurira uyu mugabo abinyijije mu kuza kuba mu rugo rwabo akagerageza kumureshya kugeza asenyeye mukuru we.

Micky yanerekanye ko inganzo ye mu kwandika amafilime yaba arangira cyangwa ay’uruhererekane akora, ahanini ayikomora mu kumva ikinamico zitambuka kuri radio, kureba amafilime y’abanyamahanga ndetse n’ibyo acamo mu buzima bwe buri munsi.

Ati 'Njyewe mu busanzwe mba mfite inkuru nyinshi nshobora guhangaho filime kubera ko njyewe ndi umuntu wumva ikinamico, amafilime cyangwa ibindi bintu nkabikuramo isomo ari nabyo nyuma nanjye numva nakandikaho.'

Ku itariki ya 18 Ugushyingo nibwo Micky yasezeranye imbere y’amategeko na AG Promoter bari bamaze igihe kugera ku mwaka babana mu nzu nk’umugore n’umugabo.

Urukundo rwabo rwatangiye mu 2024 ariko bombi bakabigira ibanga mu itangazamakuru no ku mbuga nkoranyambaga kugeza igihe bageze ku cyemezo cyo kurushinga.

Iby’urukundo rwabo byari byarateje impaka kuri bamwe, bitewe n’uko Micky yari aherutse gutandukana na Captain Regis, bari banasanzwe bakinana muri filime.

Micky yavuze ko inshuta yawe ya hafi ari yo ikugambanira

Source : http://isimbi.rw/inshuti-yawe-yafi-ni-nayo-yavamo-umwanzi-wawe-micky-video.html

Nyuma yo guhangana n'ihuriro ry'ingabo za Repubulika Iharanira Demokarasi ya Congo, iz'u Burundi, Wazalendo, FDLR, abarwanyi ba AFC/M23 bamaze kwinjira mu Mujyi wa Uvira.

Ingabo z'u Burundi biravugwa ko zataye Urugamba zikayabangira ingata, Gusa hari amakuru avuga ko FARDC n'abo bafatanyije barimo gupanga kuza kurashisha indege Muri Uvira.

Akaba ariyo mpamvu yahavanye ingabo hafi ya zose nabaturage bamwe biriwe babwirwa kuva mumujyi vuba na bwangu.

Ingamba z'ubwirinzi bw'ikirere bwa M23 nabwo ngo bwiteguye ko drone indege niziza zihanurwa.

Minisitiri w'Ingabo muri DR.Congo, Umuvugizi wa Guverinoma ya Congo, Patrick Muyaya, bahuye na Minisitiri w'Intebe, Judith Suminwa Tuluka, biga ku bibera mu cyerekezo cya Kamanyola — Uvira.

Patrick Muyaya ati 'Ibibera Uvira turimo kubikurikiranira hafi'

Ku rundi ruhande nanone M23 iti ' Ntiturota gutura i Burundi turi aba kongoman, dufite iyo tuvuka, dufite iyo tunjya, kandi aho tujya Bujumbura ntiharimo. Abasilikare buburundi nibatahe bubake igihugu cyabo , M23 ntikeneye Burundi'

Cyokora ikintu M23 yijeje Abarundi nuko nibibeshya bagahirahira guhungabanya umutekano wabanyagihugu ba Congo bazamusubiza Kandi ngo babikorane umujinya mwinshi

Source : https://rushyashya.net/patrick-muyaya-ati-ibibera-uvira-turimo-kubikurikiranira-hafi/