Category: Uncategorized

Umuhanzi Chriss Eazy yavuze ko amafoto yakwirakwiye ku mbuga nkoranyambaga aterewe n’umugabo abantu bakamukekera ko yaba aryamana n’abo bahuje igitsina atari byo ahubwo ari mukuru we uba mu Bubiligi wari waje mu Rwanda bakaba bari bari mu biruhuko.

Kuva mu mpera z’ukwezi gushize k’Ugushyingo, ku mbuga nkoranyambaga hakomeje gukwirakwira amafato y’umuhanzi Rukundo Christian uzwi nka Chriss Eazy mu muziki ateruwe n’undi mugabo bishyira benshi mu rujijo.

Akimara kujya hanze yagiye ahererekanywa ku mbuga nkoranyambaga, abantu bagenda bayatangaho ibitekerezo bitandukanye ariko bose wasangaga baganisha ku kuba batunguwe no kuba Chris Eazy yaba yarinjiye muri uru rukundo rutavugwaho rumwe na benshi.

Umuhanzi Chriss Eazy akaba yabwiye ikinyamakuru ISIMBI ko ariya mafoto yafashwe mu ntangiriro z’Ukwezi gushize akaba yarafatiwe ku Kibuye aho bari bagiye mu kiruhuko nk’umuryango aza gusohoka ashyizwe hanze na mukuru we Nsengimana Thierry asubiye mu Bubiligi asanzwe atuye.

Ati 'Uriya ni mukuru wanjye tuvukana mu nda aba mu Bubiligi, urabizi ko abantu baba hanze ari abantu batagira icyintu na kimwe kibashyushya, baba bafungutse cyane mu mutwe ni ko navuga, kuyashyira hanze nta kibazo na kimwe abibonamo nta nubwo ibyo abantu bavuga aba abyitayeho. Yari yaje mu kiruhuko mu Rwanda tujya ku Kibuye, twari turi hariya nk’umuryango turishima ni ko gufata ariya mafoto. Hashize ibyemweru nka 3 bibaye.'

Thierry yayashyize ku rukuta rwe rwa Instagram ahoreshaho amazina ya 'Prince Tity’ avuga ko yishimiye ibihe byiza yagiranye n’umuvandimwe we ubwo yari mu Rwanda.

Chriss Eazy akimara kubibona, yavuze ko nta kintu na kimwe byigeze bimuhungabanyaho kuko aba ari umuntu uhora yiteguye ikintu icyiza cyangwa ikibi kizamubaho, cyane cyane ko yari anazi ko atari ukuri ntibyamutwariye umwanya.

Ati 'urumva njyewe ndi umuntu uhora yiteguye ikintu kibi cyangwa cyiza kizaba, ariko iyo ikintu nka kiriya kije nzi neza ko nta kintu kibi kirimo cyangwa nakoze, njye nta kintu bintwara kereka wenda umuntu wanjye ari we byangije, ariko njye nta kibazo, wenda ntibyabura nko kujya kubona ukabona aga-comment karaje ngo ibi n’ibi, nkeka ko kandi kuvugwa ari ibintu bibaho ahubwo nyuma ndavuga nti nimpuguka ngomba gusobanurira abantu banjye bakamenya amakuru y’ukuri.'

Ku kijyanye no kuba yari amashusho y’indirimbo yafataga, yagize ati 'Oya! Uwo sinjye na none wafata amashusho kuriya, ari yo nabivuga ariko ntaho bihuriye, nta ndirimbo mfite yakenerwamo amashusho ameze kuriya.'

Akomeza avuga ko aya makuru na mukuru we yamugezeho ariko nyine na we nta kibazo yabigizeho uretse kubiteramo urwenya.

Ati 'arabizi, ariko nk’uko nabikubwiye, bariya bantu baba hanze usanga nyine bafungutse mu mutwe, nta kintu kibatera stress ahubwo usanga turimo tubiteramo urwenya nti 'ndebera kabaye’ na we ni muri urwo rwego yabifashemo, yarumiwe ariko nta birenze birimo.'

Yashimangiye ko ibyavuzwe binakwirakwira ku mbuga nkoranyambaga atari byo kuko afite umukunzi kandi umukunzi we asanzwe azi n’uriya muvandimwe we, rero na we ngo nta kibazo yabigizeho.

Ati 'njyewe mfite umukunzi ariko ntabwo igihe cyo kumutangaza kiragera. Ni we muntu wa mbere navuga ngo wabisetse kurusha abandi, gusa nyine nta kibazo na kimwe yigeze agira kuko anzi, na mukuru wanjye amuzi uretse kubiteramo urwenya nta kindi kibazo yigeze abigiraho, ahubwo yari azi ko ari njye byababaje ariko asanga meze neza.'

Chris Eazy yavuze ko kandi atiteze ko ibyabaye bishobora kugira ingaruka ku kazi ke akora nko kuba yabura nk’ibiraka kuko nta hantu na hamwe bihuriye n’akazi akora.

Ibi bibaye mu gihe Chris Eazy ari mu myiteguro y’igitaramo agomba gukorera mu Burundi cya 'People Party’ kizaba tariki ya 31 Ukuboza 2023 kikazabera muri Source du Nil aho kwinjira ari ibihumbi 20 na 50 by’Amafaranga y’i Burundi.

Amafoto ya Chriss Eazy yateje urujijo

Chriss Eazy avuga ko uyu ari mukuru bavukana uba mu Bubiligi witwa Nsengimana Thierry

Afite igitaramo i Burundi mu mpera z’uku kwezi

Ku gicamunsi cyo kuri uyu wa Gatanu, nibwo ikipe ya Kiyovu Sports yakoze imyitozo ya nyuma, yitegura umukino izahuramo na APR FC kuri uyu wa Gatandatu tariki 2 Ukuboza, umukino uzabera kuri Kigali Pele Stadium.

Ubwo iyi myitozo yari irangiye, abakinnyi begereye umutoza bamubwira ko batazigera bakina umukino bafitanye na APR FC ndetse ko batari bujye no mu mwoherero, mu gihe badahawe  amafaranga.

Ubwo Kiyovu Sports yasinyishaga umutoza mushya Bipfubusa Joslin ubuyobizi bw’iyi kipe bwabwiye abakinnyi ko bari gukemura ibibazo by’imishahara babafitiye, ndetse nyuma bababwira ko bazajya gukina umukino wa APR FC barabahaye amafaranga.

Muri iki cyumweru  turi gusoza, umutoza Bipfubusa Joslin yasabye abakinnyi ko bakora imyitozo nta n’umwe uri kuvuga ikibazo cy’amafaranga, ndetse abakinnyi barabyemera bakora imyitozo neza kugera kuri uyu wa Gatanu.

Abakinnyi ba Kiyovu Sports barasaba ko nibura mu birarane by’amezi atatu baberewemo, bahabwa ukwezi kumwe ubundi bagakina na APR FC ariko hari akantu nasize mu rugo.

Mu gihe aba bakinnyi batagira amafaranga bahabwa, babwiye umutoza ko atazigera abategereza ku mukino wo kuri uyu wa Gatandatu. Imyitozo irangiye, Kiyovu Sports yagombaga kujya mu mwoherero utegura match, ariko abakinnyi bafashe inzira baritahira buri wese ajya mu rugo iwe . 

Abakinnyi na Kiyovu Sports bavuze ko nibaramuka badahawe nibura ukwezi kumwe k’umushahara, hatazagira umuntu ubategereza i Nyamirambo kuri uyu wa 6 

Perezida wungirije wa Kiyovu Sports, Mbonyumuvunyi Abdul Karim niwe wari wabwiye abakinnyi ko bazajya guhura na APR FC bahawe amafanga

Guhera muri 2021 ikipe ya Rayon Sports yamamaza Canal+ mu buryo bunyuranye harimo no kuyambara ku makabutura yayo. 

Kuri ubu bongereye amasezerano azamara umwaka akaba yatangiye kubahirizwa kuri uyu wa Gatanu taliki 1 Ukuboza 2023 kuzageza taliki 30 Ukwakira 2024. 

Umuyobozi wa Canal+ Rwanda, Sophie Tchatchoua yavuze ko bishimiye imikoranire na Rayon Sports ndetse ko bifuza ko yaba igihe kirekire.  

Uwayezu Jean Fideli uyobora Rayon Sports we yavuze ko bishimiye gukorana n’ikigo gikomeye nka Canal+ anavuga ko bafite intego yo kubaka ikipe yinjiza amafaranga yayifasha kwitunga binyuze mu gusinyana amasezerano n'abafatanyabikorwa.

Icyo Canal+ ikorera iyi kipe ifite abafana benshi mu Rwanda ya Rayon Sports ni ukuyiha amafaranga no guha ibikoresho n'ifatabuguzi abakinnyi n'abatoza bayo.

Rayon Sports yongereye amasezerano na Canal+ azamara umwaka umwe 

Rayon Sports igiye kwakira Bugesera FC ibura abakinnyi babatu b’inkingi za mwamba kubera imvune n’amakarita.

Ni umukino w’umunsi wa 12 wa shampiyona ya 2023-24 uri bube uyu munsi ku wa Gatanu tariki ya 1 Ukuboza 2023, Rayon iri bwakirire Bugesera FC kuri Kigali Pele Stadium ku isaha ya saa 18h00′.

Rayon Sports ikaba ibura abakinnyi 3 b’inkingi za mwamba bayobowe imbere na kapiteni w’iyi kipe, Rwatubyaye Abdul na Luvumbu badahari kubera ko bujuje amakarita ndetse na Aruna Moussa Majaliwa kubera imvune.

Iyi kipe ikaba isanzwe idafite myugariro Nsabimana Aimable umaze iminsi yaravunitse, andi makuru akavuga ko iri bube yagaruye muri 11 Youssef Rharb byavugwaga ko ashobora gutandukana n’iyi kipe.

Kugeza ubu Rayon Sports iri ku mwanya wa 4 n’amanota 20, APR FC ya mbere ifite 25, Musanze FC 23 na Police FC ifite 22.

Aruna Moussa Majaliwa

Kapiteni Rwatubyaye Abdul yujuje amakarita 3

Luvumbu na we yujuje amakarita atatu

Nyuma yo gusezera umupira w’amaguru, Iradukunda Jean Bertrand wakiniye amakipe atandukanye ubu akaba yibera muri Canada, yavuze ko mu mupira w’amaguru yahuriyemo n’imbogamizi nyinshi hari n’izo atekereza umutima ukamurya.

Nyuma y’imyaka 14 atangiye urugendo rwe rwo gukina umupira w’amaguru mu gitondo cyo kuri uyu wa Gatanu tariki ya 1 Ukuboza ni bwo yatangaje ko yasezeye gukina umupira w’amaguru.

Mu mashusho yashyize ku mbuga nkoranyambaga ze, Iradukunda Jean Bertrand yavuze ko ikintu cya musimishije cyane hari muri 2009 ubwo yatangazwaga mu bakinnyi 29 batsindiye kujya mu irerero rya APR FC, ni ho yahise yumva ko inzozi zibaye impamo.

Ati 'Umupira w’amaguru ni urugendo rurerure buri muntu ahurira n’ibintu byinshi, mu by’ukuri ikintu cyanshimishije bwa mbere ni umunsi bantangazaga ko ninjiye mu Irerero rya APR FC hari muri 2009 ndabyibuka twari muri Stade Regional ibyo ni byo byishimo bya mbere nagize muri ruhago, aho ni ho amateka yanjye yahindukiye ni bwo nakurikiye umwuga nakunze kuva nkiri muto.'

Yakomeje kandi avuga ko yishimira kuba yaragize amahirwe yo gukinira ikipe y’igihugu Amavubi kandi ibyiciro byose no kuba umupira w’amaguru yarawukuyemo umuryango.

Ati 'Ikindi ni uko nagize amahirwe yo gukina mu ikipe y’igihugu nta rwego na rumwe nsimbutse, nahereye mu batarengeje imyaka 12, nkinira abatarengeje imyaka 20, njya mu batarengeje imyaka 23, nkinira n’ikipe y’iihugu nkuru. Inkindi nshimira Imana ko nakiniye amakipe atandukanye mu Rwanda, natojwe n’abatoza beza bagiye bangeza kuri byinshi bazamuye urwego rw’imikinire yanjye ndetse nakinanye n’abakinnyi benshi beza bazi gukina, bamwe twahujwe n’akazi ariko baje kuba umuryango.'

Agaruka ku mbogamizi yahuye na zo, yavuze ko ari nyinshi rimwe na rimwe iyo azibutse umutima umurya, gusa kimwe mu bintu byamuzengereje ari imvune yagiye ahura na zo.

Ati 'Mu by’ukuri imbogamizi nahuye na zo, ni imbogamizi nyinshi zitandukanye rimwe na rimwe iyo umuntu azibutse yumva umutima umuriye, akumva ikiniga kimufashe, umupira w’amaguru ni umukino w’amarangamutima, uratsinda, ugatsindwa ndetse ukananganya. Rimwe na rimwe kwakira ko watsinzwe biragora ndetse no kunganya.'

'Tuvuye muri ibyo ku giti cyanjye nahuye n’imbogamizi zo kuvunika, nagize imvune nyinshi zitandukanye abazi iby’umupira w’amaguru barabizi, navunitse amavi, navunitse utugombambari, mvunika umugongo, impanuka zo mu kibuga ariko imbogamizi ya mbere nahuye na yo ni iyo kuvunika.'

Yakomeje kandi avuga ko ikindi kintu yahuye na cyo cyamugoye ni abantu batari abizerwa nk’ubuyobozi bw’amakipe aho butubahiriza ibyo bumvikanye mu masezerano, yagerageza no guhamagara ababaza ugasanga ahindutse umukinnyi ufite ikinyabupfura gike kuko yishyuza ibyo yakoreye.

Inkuru ye muri ruhago y’u Rwanda itangira 2009 ubwo yajyaga mu ishuri ryigisha umupira rya APR FC, 2012 yaje kujya mu Isonga ayivamo 2014 ubwo yasubiraga muri APR FC yamureze ariko bwo ajya mu ikipe nkuru.

Yayikiniye kugeza 2016 (muri iyo myaka 2 batwaranye ibikombe 2 bya shampiyona 2014-15 na 2015-16).

Yahise ajya mu ikipe ya Bugesera FC yakiniye umwaka umwe agahita yerekeza muri Police FC yakiniye na yo umwaka 1 ahita ajya mu ikipe ya Mukura VS, hari hamaze kuba 2018 yayikiniye imyaka 2 ahita ajya muri Gasogi United na yo ayikinira umwaka umwe.

Mu Kwakira 2021 yerekeje muri Botswana mu ikipe ya Township Rollers atatinze aho muri Gicurasi 2022 bahise batandukana aza mu Rwanda akinira Kiyovu Sports umwaka umwe, mbere y’uko umwaka w’imikino wa 2023-24 yasinyiye Musanze FC ariko baza gutandukana kuko yahise abona Visa ya Canada.

Yahamagawe bwa mbere mu Ikipe y’Igihugu y’Abatarengeje imyaka 17 mu 2012, akomereza mu batarengeje imyaka 20, U23 n’Ikipe y’Igihugu Nkuru guhera mu 2014.

Iradukunda Jean Bertrand yavuze imbogamizi yahuye na zo

Shampiyona y’icyiciro cya mbere mu Rwanda umwaka w’imikino wa 2023-24 irakomeza hakinwa imikino y’umunsi wa 12 aho abakinnyi 7 barimo babiri ba Rayon Sports batemerewe gukina kubera ko bafite amakarita ataberemera gukina iyi mikino.

Imikino y’umunsi wa 12 iratangira uyu munsi ku wa Gatanu tariki ya 1 Ukuboza 2023, hateganyijwe umukino umwe gusa wo Rayon Sports igomba kuza kwakiramo Bugesera FC saa 18h00′ kuri Kigali Péle Stadium.

Undi mukino utegerejwe na benshi ni uwo Kiyovu Sports izakiramo APR FC ejo ku wa Gatandatu saa 18h00′ kuri Kigali Péle Stadium.

Abakinnyi 7 ni bo batemerewe gukina umunsi wa 12 kubera ko bujuje amakarita 3 y’imihondo, barimo Rwatubyaye Abdul na Nzinga Heritier Kuvumbu ba Rayon Sports, Mukoghotya Robert wa Sunrise FC, Ishingizwe Rodrigue wa Bugesera FC, Nziengwe Nicodeme wa Etoile del’Est, Zaudibumba Jordan wa Etincelles FC na Ishimwe Saleh wa AS Kigali wahawe ikarita itukura ku mukino uheruka.

Gahunda y’umunsi wa 12

Ku wa Gatanu tariki ya 1 Ukuboza 2023

Rayon Sports vs Buesera FC

Ku wa Gatandatu tariki ya 2 Ukuboza

Musanze FC vs Gorilla FC
Police FC marines FC
Kiyovu Sports vs APR FC
Sunrise FC vs Gasogi United
Etoile del’Est vs Amagaju

Ku Cyumweru tariki ya 3 Ukuboza 2023

AS Kiali vs Mukura VS
Muhazi United vs Etincelles FC

Rwatubyaye ari mu bakinnyi batemerewe gukina umunsi wa 12

Ikipe y’igihugu y’u Rwanda y’abatarengeje imyaka 18 yanyagiye Sudani ibitego 3-0 mu mikino ya CECAFA irimo kubera muri Kenya ihita igera muri 1/2.

Uyu munsi ni bwo hakinwe umunsi wa nyuma w’itsinda A rya CECAFA U18 irimo kubera muri Kenya aho u Rwanda rwasabwaga gutsinda kugira ngo rugere muri 1/2.

U Rwanda rwatangiye umukino ubona ko rurema amahirwe menshi ariko runanirwa kuyabyaza umusaruro aho harimo nk’amahirwe yo kumunota wa 32 Iradukunda Pascal yananiwe kubyaza umusaruro.

Nyuma yo guhererekanya neza, abakinnyi b’u Rwanda baje kubona igitego cya mbere ku munota wa 37 cyatsinzwe na Ndayishimiye Didier. Bagiye kuruhuka ari 1-0.

Abasore b’u Rwanda bakomeje gushaka ikindi gitego baza no kukibona ku munota wa 63 cyatsinzwe na kapiteni Hoziyana Kennedy nyuma y’ikosa ryari rimaze gukorerwa Ndaysihimiye Didier.

Nyuma y’uko ku munota wa 74 ateye mu izamu ariko umupira ugakubita umutambiko w’izamu, Irakoze Jean Paul wari winjiye mu kibuga asimbura Sibomana Sultan Bobo, yaje gutsindira Amavubi igitego cy’agashinguracumu ku munota wa 84. Umukino warangiye ari 3-0.

Undi mukino wo muri iri tsinda, Kenya yatsinze Somalia 4-1. Kenya yazamutse iyoboye itsinda n’amanota 9, Amavubi amanota 6, Somalia 3 na Sudani yasoje n’ubusa.

Muri 1/2 Kenya yabaye iya mbere izahura n’iya kabiri mu itsinda B rizakina ejo ni mu gihe u Rwanda ruzahura n’iya mbere mu itsinda A.

Irakoze Jean Paul (wegeranye n’umusifuzi) yatsinze igitego cya 3

Hoziyana Kennedy (19) watsinze igitego cya kabiri

Amavubi U18 yageze mur 1/2 cya CECAFA irimo kubera muri Kenya