Category: Uncategorized

Abahanzi nyarwanda bahuye na Kendrick Lamar barimo, Riderman, Dice Kid, Sema Sole, Devydenko, Andersonne, Maestro Bommin, Danny Nanone, Logan Joe, Pro Zed, Kivumbi, Bruce The 1st na Angel Mutoni.

Byabaye ku mugoroba wo kuri uyu wa Gatatu tariki ya Gatandatu 06 Ukuboza 2023, kuri Marriott Hotel mbere y’uko uyu muraperi yerekeza mu nzu mberabyombi isanzwe iberamo imikino n’imyidagaduro izwi nka BK Arena, mu gitaramo “Move Afrika:Rwanda”

Aba bahanzi bahuye banagirana ibiganiro bitandukanye ariko bifite intumbero iganisha ku muziki, ku iterambere ryawo. Banagarutse cyane  ku njyana ya Rap muri rusange.

InyaRwanda.com ifite amakuru avuga ko umusore Danny Nanone uhagaze neza mu njyana ya Rap mu Rwanda ndetse uri no kwitegura kumurika Album ye yise ‘Iminsi myinshi’, yagize gutya yibariza uyu muhanzi (Lamar) uko umuhanzi ufite igitaramo cye bwite akwiye kwitwara kugira ngo ashimishe abantu be.

Lamar nk’umuhanzi w’inararibonye muri uyu muziki, yamusubije ko rwose umuhanzi ufite igitaramo aba agomba gutanga byose afite ariko agashimisha abakunzi be.

Kendrick Lamar yahuye n’abaraperi bagenzi be bo mu Rwanda

Bagiranye ibiganiro biganisha ku njyana ya Rap

Kuri uyu wa Gatatu hakomeje imikino yo ku munsi wa 14 wa shampiyona y’icyiciro cya mbere mu Bwongereza. Saa yine z’ijoro kuri Old Trafford Manchester United yari yakiriye Chelsea.

Ikipe ya Manchester United yatangiye umukino iri hejuru kuko mu minota 3 ya mbere abakinnyi barimo Rasmus Hoejlund na Bruno Fernandes bari bamaze kugerageza kurekura amashoti aremereye gusa anyura impande y’izamu.

Ku munota wa 7 gusa iyi kipe y’amashitani atukura yabonye penariti ku ikosa Enzo Fernández yakoreye Antony ariko itewe na Bruno Fernandes ayishyira mu biganza by’umunyezamu wa Chelsea.

Umukino wakomeje gukinwa wihuta cyane ku makipe yombi. Ku munota wa 13 ikipe ya Chelsea nayo yabonye uburyo buremereye imbere y’izamu aho Mykhaylo Mudryk yirukankanye umupira yinjira mu rubuga rw’amahina arekura ishoti ariko umuzamu wa Manchester United aratabara.

Manchester United yafunguye amazamu ku munota wa 20 ku gitego cyatsinzwe na Mc Tominay. 

Nyuma yo gutsinda igitego ikipe ya Manchester United yakomeje kwiharira umupira ikina neza cyane inarekura amashoti aremereye ariko Roberto Sanchez akaba ibamba.

Chelsea yabonye igitego cyo kwishyura ku munota wa 45 ku gitego cya Cole Palmer wacenze ba myugariro ba Manchester United ku mupira yahawe na Mykhaylo Mudryk.

Mu gice cya kabiri ikipe ya Manchester United yaje ikiri hejuru ari nako ishaka igitego cya 2, abakinnyi nka Antony na Bruno Fernandes barekura amashoti ariko ntiyerekeze mu izamu neza.

Ku munota wa 70 Mc Tominay yatsinze igitego cya 2 cya Manchester United akoresheje umutwe ku mupira wazamuwe na Garnacho.

Ikipe ya Chelsea yagerageje gushaka uko yakwishyura gusa abakinnyi bayo bakina imbere bagahusha uburyo buremereye nk’aho Rahim Sterling yahinduye umupira ashaka Enzo Fernández ariko gutsinda bikamunanira.

Umukino warangiye, Manchester United itahanye amanota 3 ku intsinzi y’ibitego 2-1.

Undi mukino ukomeye wabaga kuri izi saha ni uwo ikipe ya Manchester City yatsinzwemo na Aston villa igitego 1-0. 

Nyuma yo gutakaza, kuri ubu ikipe ya Manchester City iri ku mwanya wa 4 n’amanota 30.

Ni ibintu bikomehe guha amahirwe Arsenal iyoboye urutonde rwa shampiyona n’amanota 36 na Liverpool iri ku mwanya wa 2 n’amanota 34 ndetse ikaba yanatsinze Sheffield United 2-0 uyu munsi.

Igitego 1 cya Chelsea cyatsinzwe na Cole Palmer 

Scott Mc Tominay atsinda igitego cya 2 cy’umutwe

Manchester United yatanze ibyishimo 

Amasaha y'ijoro agaragara nk'amasaha meza yo gukoresha telefone, gusa tuzirikane ko imeli (Email), ubutumwa bundi, ibyo inshuti zacu zavuze ku mbuga nkoranyambaga, n'ibindi tuba tureba, byagaragaye ko bifite uruhare mu kwangiza ubuzima bwacu. Ese duhare amagara hejuru yo gukoresha telefone mu gihe kidakwiye

Mu Rwanda rwo hambere, wasangaga abantu baraye inkera y'imihigo, batarama, baganira. Ibyo, nta yindi mpamvu byakorwaga uretse ko babaga bagambiriye guhana uburere, umuco, kwiga ku bibazo bibugarije, guhemba intwari no kugaya ibagwari ndetse n'ibindi. Byabaga bifite umumaro ku buryo byatumaga bashobora no gukesha, izuba rikarasa bagitarama, ntawutaka agatotsi.

Uyu muco, wo kurara mu nkera, ntabwo twavuga ko wacitse, ahubwo umuntu yavuga ko wacyendereye kubera impamvu zitandukanye. Impamvu ishobora kugaragara muri izo, ni iterambere ry'ikoranabuhanga cyane cyane mu itumanaho. Iri tumanaho rero, reka turirebera mu gice cya telefone. 

Izi, abantu bazikoresha muri byinshi ndetse amanywa n'ijoro. Gusa, impuguke mu birebana n'ubuzima bwa muntu, ntizihwema kugaragaza ko ikoreshwa ry'amatelefone rigira byinshi rihungabanya ku buzima gatozi bwa nyiri kuyikorasha cyane cyane mu bihe by'ijoro, ndetse n'igicuku. 

Sobanukirwa  ingaruka 4 zikomeye ushobora guhura nazo bitewe no gukoresha telefone n’ijoro kenshi:

1. Gukoresha telefone mu ijoro byangiza amaso

Urumuri rw'ubururu (blue light) rusohorwa n'igikoresho uba urimo ukoresha nka: telefone, televisiyo, mudasobwa, ndetse tablet rwangiza amaso. Uru rumuri turuhoraho mu gihe cy'izuba, hanyuma wajya no kuryama ukihatamo urundi ruturuka muri ibyo bikoresho. 

Byagaragaye ko byangiza uburyo umuntu abona (vison). Ubushakashatsi bugaragaza ko kureba muri uru rumuri rw'ubururu bitera iyangirika ry'imboni. Ikigo The American Macular Degeneration Foundation kivuga ko iyo imboni yangiritse, umuntu aba atakaje ububasha bwo kureba neza ibiri imbere ye.

2. Bishobora kandi kwangiza uburyo bwo gusinzira

Uru rumuri rwa telefone rw'ubururu, rutuma umuntu utabona ibitotsi. Biterwa n'uko iyo urimo ureba muri kimwe mu bikoresho twavuze, habaho ko ubwonko butabasha kurekura imisemburo ihagije itanga ibitotsi izwi nka melatonin. 

Ubwonko rero, ntabwo bwatanga amabwiriza yo kurekura iyo misemburo kuko buba bikibona hameze nk'aho hakiri ku manywa, bitewe n'urwo rumuri rusa nk'urw' izuba. Iyo imisemburo itaboneka ihagije rero, umuntu ahura n'ibindi bibazo by'ubuzima, harimo: indwara z'umutima, kugira umubyibuho ukabije, kugira agahinda no kwiheba bikabije (depression), ndetse n'ibindi.

Birumvikana rero ko, iyo umubiri utabona imisemburo yo gusinzira ngo uruhuke umuntu ahura n'ibibazo by'umunaniro udashira, kutabanguka mu kubona, kumva ndetse n' ibindi. Ikindi, ni uko gukoresha amatelefone mu buriri (mu masaha yo kuryama), bituma umuntu aryama atinze ntageze ku masaha impuguke zigaragaza ko ari ingenzi kuryama ukayageza, akaba ari amasaha byibuze 8.

3.Gukoresha telefone mu masaha yo kuryama byangiza isaha y'umubiri (circadian rhythm/body clock/biological clock)

Healthline itangaza ko ubusanzwe, iyi ni isaha itagize ahantu ifashe cyangwa se ngo yanditse. Ibwiriza umubiri icyo gukora bitewe n' igihe. Urugero, niba amasaha yo kubyuka ageze, wowe uzabona urimo utera isengesho ryo gushima ko wabyutse amahoro, ariko mu kuri ntawagukanguye. 

Iyo, ni isaha y' umubiri (body clock). Rero, kamere y' ingengabihe umubiri wafashe, ishobora guhura n' imbogamizi ziterwa n'urumuri rw' ubururu (blue light) ruturuka muri za telefone ndetse n' ibindi bikoresho birukoresha. 

Uko bigenda, ni iyo ubwonko butakibasha guhuza neza amakuru y'aho ibihe bigeze ngo umubiri ukore ibijyanye n' icyo gihe nk' uko bisanzwe. Urugero rworoshye, ni igihe wakomeje ureba muri telefone yawe, ukageza mu rukerera nk' aho kuryama bitakibaho, nyamara ubusanzwe izo saha zikaba zageraga utazi aho uri pe.

4. Kureba mu rumuri rw'ubururu n’ijoro byongera ingaruka zo kurwara kanseri (cancer)

Imisemburo twavuzeho itera umuntu gusinzira yitwa melatonin, ifite uruhare runini mu kurwanya ibyitwa 'Oxidation'. Ubwo, bukaba uburyo karemano bwo kurwanya kanseri mu mubiri w'umuntu hifashishijwe iyo misemburo. Iyo rero iyo misemburo idakorera ku rwego isanzwe ikoreraho, byongerera ingaruka umuntu kuba yafatwa na kanseri ndetse n'ubundi burwayi ubwo aribwo bwose.

Kuba iyi misemburo ya melatonin yabangamirwa mu ijoro rimwe, ntabwo wavuga ko igikuba cyacitse. Ikibazo, ni kuri babandi baba barabaswe no kurara bakoresha amatelefone, mudasobwa, tablet ndetse na televiziyo, mu masaha yo kuryama. 

Gukomeza gukora gutya, ntubicikeho, ni nako wiyongerera ibyago byo kurwara kanseri, kugabanuka ku ubwirinzi bw' umubiri, iyangirika ry' tw' ubwonko, ndetse no gufatwa n'izindi ndwara.

Inama zitangwa n'impuguke:

· Koresha telefone, mudasobwa, televiziyo na tablet byibuza mbere y'amasaha abiri ngo uryame

· Bigushobokeye, wajya urara uzimije telefone n'ibyo bikoresho bindi bigendanwa bikoresha urumuri rw'ubururu

· Koresha telefone yawe muri ayo masaha igihe koko wumva ko ari ingenzi cyane.

Ibitego bibiri ku busa bya Rayon Sports imbere ya Muhazi United byayifashije gufata umwanya wa kabiri ku rutonde rwa shampiyona aho irushwa na APR FC inota rimwe.
Wari umukino usoza indi y’umunsi wa 13 aho Rayon Sports kuwutsinda yari gufata umwanya wa kabiri igasigara irushanwa inota rimwe na APR FC iyoboye urutonde rwa shampiyona.

Umutoza Mohammed Wade utari ufite Aruna Moussa Madjaliwa kubera imvune yari yahisemo kwicaza Mitima Isaac akinisha Ngendahimana Eric akinana na Rwatubyaye Abdul mu mutima w’ubwugarizi.

Rayon Sports yabonye amahirwe ya mbere ku munota wa 5 ubwo Ojera yageragezaga guterera mu rubuga rw’amahina ariko umunyezamu akawufata.

Ku munota wa 14, Serumogo Ali yagerageje ishoti rikomeye yateye asa n’uhindura imbere y’izamu ariko ugana mu izamu maze umunyezamu Iniace Nzama Ebini awukuramo.

Bugingo Hakim ku munota wa 28, yagerageje ishoti rikomeye ariko umupira unyura hanze y’izamu.

Nyuma yo gukinana neza na Youssef Rharb, Luvumbu yagerageje ishoti rikomeye ku munota wa 29 ariko rinyura hanze gato y’izamu.

Muhire Kevin yaje gutsindira Rayon Sports igitego cya mbere ku munota wa 34 kuri kufura ku ikosa ryari rikorewe Joackiam Ojera. Igice cya mbere cyarangiye ari 1-0.

Iminota ya mbere y’igice cya kabiri nta mahirwe afatika yabonetse ku mpande zombi.

Ku munota wa 68, Tuyisenge Arsene yasimbuye Youssef Rharb.

Izi mpinduka zagiriye akamaro Rayon Sports kuko ku munota wa 72, Tuyisenge Arsene yahinduye umupira mwiza maze Esenu atsindira Rayon Sports igitego cya kabiri.

Nyuma y’iminota 2, Luvumbu yagerageje ishoti yatereye inyuma y’urubuga rw’amahina ariko unyura hanze gato y’izamu. Umukino warangiye ari 2-0.

Indi mikino y’umunsi wa 13 yabaye uyu munsi, Mukura VS yatsinze Kiyovu Sports 4-1, Etincelles FC itsinda AS Kigali 4-2.

Iyabaye ejo hashize, APR FC yanganyije na Gasogi United 0-0, Police FC yatsinzwe na Bugesera FC 4-2, Gorilla FC itsindwa na Sunrise FC 2-0, Marines FC yatsinze Etoile del’Est 3-2 ni mu gihe Amagaju yatsinzwe na Musanze FC 2-0.

APR FC yasoje umunsi wa 13 iyoboye urutonde rwa shampiyona n’amanota 27, Rayon Sports ya kabiri ifite 26 inganya na Musanze FC ya gatatu, Police FC ifite 25.

Mu gihe habura iminsi 26 gusa ngo umwaka wa 2023 ushyirweho akadomo, imbuga nyinshi zicuruza umuziki zikomeje kugenda zigaragaza uko uyu mwaka wagenze mu bahanzi bahiriwe nawo. Kuri ubu YouTube yamaze kwerekana abahanzi nyafurika barebwe cyane bayobowe na Burna Boy.

Burna Boy yabaye umuhanzi nyafurika wa mbere warebwe n’abantu benshi kuri YouTube mu 2023

Burna Boy umuhanzi ukomeye ukomoka muri Nigeria, niwe wafashe intebe y’ubwami bwa YouTube mu 2023 nyuma yo kurebwa n’abantu miliyari 2.52. Umunya-Tanzania Diamond Platnumz uherutse gutwara igihembo cya Trace Award nk’umuhanzi mwiza wo muri East Africa, yaje ku mwanya wa kabiri n’abantu miliyari 2.37.

Diamond Platnumz yabaye umuhanzi wa kabiri warebwe cyane kuri YouTube mu 2023

Wizkid utarahiriwe n’umwaka wa 2023 nyuma yo kuwupfushirizamo umubyeyi we, ndetse ntanasohore ibihangano bishya, ntibyamubujije kuza ku mwanya wa gatatu ku bahanzi nyafurika barebwe cyane kuri YoutTube muri uyu mwaka. Abantu miliyari 1.83 nibo barebye ndetse banumva indirimbo za Wizkid kuri Youtube.

Fally Ipupa yaje ku mwanya wa kane mu bahanzi nyafurika barebwe cyane kuri YouTube mu 2023

Icyamamare mu muziki Fally Ipupa, ukomoka muri Congo, yaje ku mwanya wa kane n’abantu miliyari 1.61, mu gihe Davido uhataniye ibihembo bya Grammy Awards mu byiciro 3, yaje ku mwanya wa gatanu n’abantu miliyari 1.50 barembye ibihangano bye kuri YouTube mu 2023.

Davido niwe uri ku mwanya wa 5 mu bahanzi nyafurika barebwe cyane kuri YouTube mu 2023

YouTube yatangaje ko aba bahanzi aribo Burna Boy, Diamond Platnumz, Wizkid, Fally Ipupa hamwe na Davido aribo bahanzi nyafurika 5 ba mbere bahiriwe n’uru rubuga mu mwaka wa 2023.

Abarimo Burna Boy, Diamond Platnumz,Wizkid na Davido bari mu bahanzi nyafurika bahiriwe na YouTube mu 2023

Ku muntu ubirebera kure byamutangaza umusobanuriye uburyo abafana ba APR FC batishimiye umusaruro w’ikipe yabo, kandi ariyo ya mbere ku rutonde rwa shampiyona. Imikino ibaye ibiri ibyo abafana ba APR FC bavugaga rwihishwa, batinyaga gushyira ahagaragara, kuri ubu bari kubivuga byeruye ndetse bababaye cyane.

Umusaruro wa APR FC uhagaze gute muri Shampiyona ugereranyije n’umwaka ushize?

Kuri ubu APR FC iri ku mwanya wa 1 n’amanota 27. Umwaka ushize ku munsi nk’uyu wa 13, APR FC yari ku mwanya wa 3 n’amanota 24, bivuze ko iyi kipe yari inyuma ho amanota 3 ndetse ikaba iri inyuma ho imyanya 2. Mbere y’uko tujya ku bindi, urumva ko ubu APR FC ihagaze neza ugereranyije n’umwaka ushize.

Mu mikino 13 APR FC imaze gukina yatsinzemo 7 inganya 6 ntiratsindwa umukino n’umwe. Kuri ubu APR imaze gutsinda ibitego 16, itsindwa 7 izigannye ibitego 9. Umwaka ushize APR FC ku munsi wa 13, yari imaze gutsinda 6 inganya 6 itsindwa 1. APR FC umunsi nk’uyu yari imaze gutsinda ibitego 19 itsindwa 10 izigamye 7.

APR FC kuri ubu ihagaze neza kuruta uko yari imeze umwaka ushize 

Umwaka ushize w’imikino, kuva ku munsi wa 9 APR FC yatsinze Sunrise FC ibitego 3-2 ndetse wari umukino ukomeye cyane warangiye abafana ba APR FC nta nkuru, ariko ntabwo batonganye. Umunsi wa 10 APR FC yanganyije na Kiyovu Sports ibitego 2-2, abafana batashye bishimye kuko umukino wagiye kuba bazi ko Kiyovu Sports batayiva mu nzara.

Bidatinze ku munsi wa 11 APR FC yasuye Mukura banganya ubusa ku busa, ariko nta mukinnyi wasakuje ngo bijye hejuru APR FC yaje i Kigali yakirwa na Gasogi United banganya 0-0, ariko nta mufana wasakuje ngo bigere hanze nk’uko byagenze nijoro ubwo bari bamaze kunganya na Gasogi United nanone 0-0.

Ku munsi wa 13 nibwo APR FC yiyandayanze itsinda Rutsiro FC ibitego 2-0 nyuma y’imikino 3 idatsinda. Kuri ubu mu mikino 6 iheruka, APR FC yatsinzemo 2 Muhazi United na Sunrise FC inganya 4 na Rayon Sports, As Kigali na Kiyovu Sports na Gasogi United.

Mu mukino 5 APR FC yakinnye umwaka ushize yikurikiranya kugira ku munsi wa 13, bakuyemo amanota 9 kuri 15 bakiniraga angana neza nayo bafite mu mikino 5 baheruka gukina ya shampiyona.

None abafana ba APR FC umujinya bari kuwuterwa n’iki?

Ku bwanjye nk’umuntu ukurikirana hafi shampiyona y’u Rwanda ndetse n’umupira w’amaguru muri rusange, navuga ko impamvu impamvu abafana bari kwitonganya ziri mu byiciro 3.

1. Ntabwo abafana bishimiye  uko  umutoza akinisha abakinnyi 

Iyo wumvise abafana ba APR FC bavuga ko umutoza wabo batamushaka ndetse ariwe utuma ikipe ye ibura umusaruro. Abafana bavuga ko Thierry Froger akinisha APR FC nabi kandi ifite abakinnyi.

Abafana ba APR FC umukino ujya kurangira nta mahoro bafite baba batsinze cyangwa batsinzwe 

Ku bwanjye hari aho abafana wabumva nubwo bidakuraho umusaruro n’amahitamo y’abatoza. Hari igihe umutoza afata ibyemezo n’impinduka mu bakinnyi bigatungura benshi harimo nko gukinisha Niyomugabo Claude nka nimero 10, umwanya yatangiye akinishaho Niyibizi Ramadhan ariko akaza kugira ikibazo cy’imvune.

Niyomugabo Claude usanzwe ukina inyuma ibumoso, amaze imikino 3 akina nka nimero 10, abafana ntabwo bumva impamvu yabyo. Sharaf Edin Shaiboub, ntabwo abafana bumva impamvu abanza hanze y’ikibuga ndetse rimwe na rimwe ntaboneke no mu bakinnyi bifashishwa ku mukino.

Uyu musore wo muri Sudani abafana bari bikundiye na nubu ntabwo bazi amakuru y’ukuri atuma uyu mukinnyi adakina kandi babona yabafasha.   Abafana ku mugoroba bibazaga impamvu Bizimana Yannick adakandagira mu kibuga kandi Bacca yari yarushye.

Niyomugabo Bosco yaraye avuye mu kibuga yababaye, biteye ikibazo ko ashobora kudakina umukino  utaha 

Umukinnyi Yunussu, ntabwo abafana bemera ko yakabaye  abanza mu kibuga, mu gihe myugariro Benjem Bienvenue abanza hanze kandi baba bifuza ko ajya mu kibuga.

Thierry Froger abajijwe ku mpamvu Yunussu abanza mu kibuga imbere y’abandi ba myugariro afite, yavuzeko ari we myugariro mwiza afite udakunze gukora amakosa.

2. Abafana ba APR FC bashobora kuba bakeka ko beguriwe ikipe

Ntabwo byari bisanzwe ko abafana ba APR FC birekura cyane bakivayo mu kuvuga banenga ikipe yabo. Gusa kuva ubuyobizi bwahinduka ikipe igatangira gushyirwamo n’abayobozi basanzwe, abafana bashobora kuba barizeye ko ikipe yabegerejwe byeruye.

3. Kugarura abanyamahanga abafana bumvaga ibindi

Abafana ba APR FC bacyumva ko ikipe yazanye abakinnyi b’abanyamahanga, bumvaga ko bagiye kujya bakubita umuhisi n’umugenzi gusa na n’ubu bakubise umuhisi ariko umugenzi byaranze. Abafana ntabwo baribagirwa uburyo bavuyemo mu mikino nyafurika, kandi bari bizeye abanyamahanga, basa naho bashaka gutangirira hafi kugira ngo bitaba no mu gikombe cya shampiyona. 

Umutoza Thierry ntabwo bemera uburyo akoresha abakinnyi ndetse n’uburyo asimbuzamo 

Shaiboub abafana bakomeje gutaka batakamba ngo ahabwe umwanya uhagije wo gukina