Webrwanda Backend

Category: Uncategorized

  • Perezida wa Rayon Sports yasabye imbabazi Aba… – #rwanda #RwOT

    Mu kiganiro n’itangazamakuru kiri kubera ku cyicaro cy’umuryango wa Rayon Sports, Perezida w’uyu muryango yasabye imbabazi avuga ko umukino batsinzwe nabo wabababaje.

    Yagize Ati”Duhereye ku ikipe y’abagabo, twatangiye imikino yo kwishyura, gusa twitwara nabi kuko twaratsinzwe.

    Nk’ikipe nkuru ishaka igikombe duhora dushaka gutsinda, ariko ntabwo byaduhiriye.Ndasaba imbabazi abafana kuko ntibishimye, kandi natwe ntabwo Twishimiye.

    Turacyarwana kuko igikombe ni isiganwa. Turi gucyemura ibitameze neza, gusa nongera kubasaba imbabazi  kandi ntibazacike intege.”

    Uwayezu Jean Fidele yemeje ko batarava ku gikombe cya shampiyona 

    Source : https://inyarwanda.com/inkuru/138611/perezida-wa-rayon-sports-yasabye-imbabazi-abafana-138611.html

  • Godfrey Legend yacyeje The Ben wamwinjije mu… – #rwanda #RwOT

    Godfrey Legend wabaye n’umunyamakuru mu bijyanye n’Iyobokamana, akamara imyaka 7 atumvikana mu muziki, ariko ubu akaba awugarukanyemo imbaraga aho yateguje indirimbo nyinshyi ziri mu Cyongereza, ahamya ko agarutse ndetse akaba ari igihe cye cyo gukorera Imana mu muziki.

    Yavuze ko indirimbo ye nshya “Don’t cry” ari ‘amashimwe akomeye kuri njye n’umuryango wanjye’. Kuba atangiye umwaka wa 2024 ashyira hanze indirimbo nshya, ibintu bimaze gukorwa n’abahanzi mbarwa mu Rwanda, Godfrey Legend yavuze icyo bisobanuye ku muziki we.

    Ati “Indirimbo yanjye nyituye imfura yanjye yitwa Joshua, bivuze ko ntangiranye umwaka n’indirimbo nshya mu mutima wanjye; ngirango iryo jambo turisanga cyane muri bibiliya yera mu gitabo cya zaburi rigira riti: “Muririmbire Uwiteka indirimbo nshya naza neberu n’inanga’.

    Uyu muramyi w’umuhanga wo guhangwa amaso, avuga ko mu kuyandika yisunze icyanditswe kiri muri Yesaya: 40:1 aho kivuga kiti “Muhumurize abantu banjye”; bityo asobanura muri iyi minsi ya none nta handi umuntu yaruhukira atari muri Yesu.

    Ati “Niwe utanga umunezero mu mutima amafaranga n’ibindi by’agaciro dushaka kugira ngo tubeho bidatanga umunezero usibye Yesu wenyine uturemamo icyizere agatanga n’ ihumure mu mutima”.

    Yabajiwe umwihariko w’iyi ndirimbo ye asubiza ko “urebye nta mwihariko udasanzwe indirimbo yanjye ifite imeze nk’izindi ndirimbo musanzwe mwumva; gusa ngira ngo uranzi kuva cyera ndi umuramyi nkunda indirimbo zituje kuko ziramfasha cyane”.

    Godfrey Legend yashimye Producer Santana Souce wamukoreye iyi ndirimbo, ati “Arashoboye, niwe wantunganyirije iyi ndirimbo mu buryo bw’amajwi, kandi Imana nica inzira ndateganya gukorana nawe igihe kirekire naramukunze ni umwana mwiza azi ibyakora”.

    Avuga ko nubwo asohoye amajwi gusa, azi neza ko amashusho nayo ari ngombwa, akaba ateganya gushyira hanze video yayo vuba aha, ati “Ndizera ko izabera benshi umugisha”. Yanahishuye ko mu 2024 afite imishinga myinshi cyane ateganya gukora.

    Ati “Ndashaka gukorera Imana kurusha mbere kuko aya ni amahirwe yandi mpawe benshi tungana ntabwo bakiriho, abandi b’urugano rwanjye ndimo ndabasengera ngo baze kwa Yesu Kristo kuko araryoshye erega ibibengerana byose si zahabu”.

    Avuga ko Gospel igeze ahantu hashimishije kuko “yateye imbere ugereranyije na cyera ku buryo bamwe mu bahanzi hano iwacu bakora Gospel music batunzwe n’impano zabo, ibi tugomba kubishimira igihugu cyacu kuko gifite Good Leadership”.

    Uyu mugabo wabayeho umunyamakuru wa Rc Nyagatare, yabajijwe niba yarabivuyemo burundu. Ati “Nigeze kubaho umunyamakuru igihe kimwe, ni byo nza kubihagarika njya mu zindi nshingano, ariko igihe nikinyemerera nzabisubiramo kuko ndabikunda cyane”.

    Godfrey Legend yashyize hanze indirimbo nshya yanditse yisunze Yesaya 40:1-2

    Godfrey Legend yanagarutse ku muhanzi Mugisha Benjamin [The Ben] biganye mu mashuri yisumbuye mu Karere ka Kayonza mu ishuri ryitwa Groupe Scolaire de Gahini, ahishura byinshi abantu batari bazi kuri uyu muhanzi w’icyamamare mu Rwanda na Africa.

    Nk’umuntu biganye mu kigo kimwe, agatangira umuziki amureba n’amaso ye, bagasengana, bakarara mu nyubako imwe (Dortoire), avuga ko hari byinshi azi kuri The Ben ndetse akaba ashima Imana ku rwego rwiza amaze kugeraho yaba mu muziki no mu buzima busanzwe burimo no gushinga urugo.

    Yavuze ko The Ben ari umuntu ugira ubuntu bwinshi, akaba yitonda bidasanzwe ndetse akaba akunda no gufasha. Avuga ko ari inshuti ye cyane “kuko mu gihe twiganaga namukuyeho ‘inspiration’ zijyanye n’umuziki wo kuramya Imana”. Yahishuye ko hari ubwo yajyaga ashima Imana, agasaba The Ben ko baririmbana indirimbo y’Imana.

    Abazi The Ben kuva kera, bazi ko yatangiriye muzika muri Gospel. Nawe ubwe akunze kubigarukaho akavuga ko igihe kimwe azakorera Imana. Ni ibintu Godfrey Legend ashimangira mu kwizera kwe, akavuga ko The Ben azakorera Imana, akaba ari ibintu avuga atarya indimi dore ko ari na The Ben wamwigishije amajwi.

    Nzaramba Godfrey ari we Godfrey Legend anavuga ko kuba The Ben akunze kuganzwa n’amagaramutima agasuka amarira yaba mu rusengero n’igihe ari mu ruhame, abibona nk’umuhamagaro [wo kuririmbira Imana] uba urimo kumugurumanamo. Ati “Ni umuhamagaro uba urimo kumwataka. Umwanya arimo ntabwo ari wo yakabaye arimo”.

    Yavuze ko “twagiranye ibihe byiza byo gukorera Imana igihe twiganaga” ndetse yigeze no kumugabira inka. Yasoje amwifuriza ishya n’ihirwe mu rugo rwe rushya dore ko aherutse kurushinga na Miss Pamella Uwicyeza, anamuhamagarira kugaruka mu murimo w’Imana kuko “gukorera Yesu ntako bisa”.

    Godfrey Legend yatuye imfura ye indirimbo nshya yise “Don’t cry”

    REBA INDIRIMBO “DON’T CRY” YA GODFREY LEGEND WINJIJWE MU MUZIKI NA THE BEN

    REBA INDIRIMBO Y’IMANA “THANK YOU” THE BEN YAKORANYE NA TOM CLOSE

    Source : https://inyarwanda.com/inkuru/138600/godfrey-legend-yacyeje-the-ben-wamwinjije-mu-muziki-anagaruka-kuri-dont-cry-yatuye-imfura–138600.html

  • Ubwo buterahamwe bugarutse … Unkubise wahava ujya muri ‘morgue’ – Perezida wa Rayon Sports #rwanda #RwOT

    Perezida wa Rayon Sports, Uwayezu Jean Fidele yavuze ko abantu bagerageje gukubita umunyamabanga wa Rayon Sports, Patrick Namenye ari we bibayeho uwabikoze na we yahava ari umurambo.

    Ni mu kiganiro n’itangazamakuru cyagarukaga ku buzima bwa buri munsi iyi kipe irimo kunyuramo.

    Yavuze ko hari abantu batishimiye uburyo ikipe iyobowemo kuko batakibona aho bamenera ngo bayiryemo amafaranga mu nzira zitari nziza.

    Abo ngo ni bo birirwa bakora amanama hirya no hino muri Kigali bacura umugambi wo kumukubita n’umunyamabanga we, Patrick Namenye.

    Ati “Amanama arabera La Galette, amanama arabera kwa Kamari Tamu Tamu, amanama arabera he… yo gushaka kuza gukubita perezida Jean Fidele wa Rayon Sports na Patrick ngo ni uko dutsinzwe mu kibuga? 1994 murayibuka? Ngo indege yaraguye bica Abatutsi barenga miliyoni, none ngo turatsinzwe bakazamuka Jean Fidele na SG badukubite? Muri Stade muri VIP?”

    Yakomeje avuga ko abaheruka kubigerageza ari we babikoze uwabikoze yahava ajya muri Morgue (uburuhukiro bw’abapfuye).

    Ati “iyo bahansanga ngo bankubite, nava aho njya muri Polisi kuvuga ngo nakoze ibi kubera nitabaraga cyangwa banyendereje ariko unkubise wahava ujya muri morgue, morgue murayizi?”

    “Ubwo buterahamwe bugarutse muri Stade ngo uje gukubita abantu kubera ko ikipe itsinzwe? Mu Rwanda ubuyobozi bwarahindutse.”

    Atangaje ibi nyuma y’uko nyuma y’umukino w’umunsi wa 16 wa shampiyona y’icyiciro cya mbere mu Rwanda wabaye tariki ya 12 Mutarama 2024, Rayon Sports yatsinzwe na Gasogi United 2-1, bivugwa ko hari umufana wa Rayon washatse gukubita umunyamabanga wa Rayon Sports, Patrick Namenye nubwo hari andi makuru avuga ko yanamukubise.

    Perezida wa Rayon Sports yavuze ko hagize umukubita yahava ari umurambo

    Source : http://isimbi.rw/siporo/article/ubwo-buterahamwe-bugarutse-unkubise-wahava-ujya-muri-morgue-perezida-wa-rayon-sports

  • Kamonyi-Musambira: Abaturage batangatanze Umugabo ukekwaho kwica anize uwo bashakanye #rwanda #RwOT

    Umugabo Hakizimana Celestin w'imyaka 45 y'amavuko utuye mu Kagari ka Cyambwe, Umurenge wa Musambira, Akarere ka Kamonyi, ahagana ku i saa sita n'igice z'ijoro ryakeye yatawe muri yombi n'abaturage ndetse n'irondo bamushyikiriza RIB. Bamushinja kwica anize umugore we witwa Nyiranteziyaremye Donatha bari bafitanye abana batandatu.

    Amakuru intyoza.com ikesha bamwe mu baturage b'Akagari ka Cyambwe by'umwihariko bamwe mu baturanyi b'uyu muryango, bavuga ko uyu mugabo yari umuntu utapfa kumenya ibye n'umugore. Gusa ngo uyu mugabo ntabwo yajyaga akunda kuba mu rugo cyane bitewe ahanini n'uko iyo yabaga yatwaye imyaka cyangwa se itungo akagurisha, yagendaga akazagaruka haciye igihe.

    Ibijyanye n'icyo uyu mugabo yaba yajijije umugore we, abaturage babivuga kwinshi. Hari abavuga ko baba bapfuye Igifenesi, abandi bakavuga ko baba bapfuye ingurube kuko uyu nyakwigendera ngo yari amaze kuremererwa ndetse no kurambirwa ibyo umugabo yakoraga asahura urugo, ibyakarutunze akabimara abyishimishamo wenyine.

    Christine Nyirandayisabye, Umunyamabanga Nshingwabikorwa w'Umurenge wa Musambira yabwiye intyoza.com ko uyu muryango batari bawufite mu miryango bari baziho kubamo amakimbirane. Avuga ko nta wabivugaga, baba bo ubwabo nk'umugabo n'umugore, yemwe n'abaturanyi bose ngo ntawatangaga amakuru.

    Ku bijyanye n'imibanire y'uyu muryango nk'umugabo n'umugore, Gitifu yagize ati' Mu by'ukuri mu bantu twari dufite b'abanyarugomo cyangwa se umuryango urangwamo amakimbirane twebwe ntabo twari dufite. Ariko impamvu ahari tutari tumufite ni uko ngo yagendaga akamara igihe adahari, yaza yatwara nk'ikintu umugore ngo akicecekera'.

    Gitifu Nyirandayisabye, avuga ko yababajwe n'ibi byago byatewe n'uyu mugabo wambuye umuzima umugore we bashakanye bakanabyarana, ariko kandi ngo nibura ashima ko abaturage bamutangatanze bakamufata atarahunga, bakamwizanira kuri RIB.

    Gitifu Christine Nyirandayisabye, asaba abaturage b'Umurenge wa Musambira gutangira amakuru ku gihe hagamijwe gukumira ibyaha no kugira ngo bafashe ubuyobozi koroherwa no gukurikirana imiryango ibana mu makimbirane. Ahamya ko imiryango nk'iyo iba igomba kuganirizwa kuko batamenyekanye kubitaho bigoye. Asaba kandi ko ababana bakabona badashobokanye, bananiranywe ko aho kuvutsanya ubuzima cyangwa gukorerana ibyangwa n'amategeko batandukana mu mahoro.

    intyoza

    Source : https://www.intyoza.com/2024/01/15/kamonyi-musambira-abaturage-batangatanze-umugabo-ukekwaho-kwica-anize-uwo-bashakanye/

  • Ariko abategetsi b'u Burundi bita Perezida Kagame 'umwanzi ', bajya bibuka ko biteranya n'amateka? #rwanda #RwOT

    Nta gihugu kigira akaga nk'ikiyoborwa n'abategetsi batazirikana ko'akahise gategura akazoza(umugani w'ikirundi), ngo bibuke ko amagambo n'ibikorwa byabo bizabashora mu rubanza n'amateka. Nguko uko iyo Perezida w'uBurundi, Evariste Ndayishimiye (Jenerali NEVA) aza kwibaza, akisubiza mbere yo gutsindwa na kamere, byari kumufasha kwigengesera mu mvugo no mu ngiro, ntiyiteranye n'ejo hazaza.

    Iyo aza kwiha umwitozo woroshye, akibaza tumwe muri utu tubazo, byari gutuma atekereza kabiri, ntabe 'bavugirije'.

    1. Igihe kajugujugu y'u Rwanda yajyaga kuzimya isoko rikuru rya Bujumbura, rwari urwango Perezida Kagame yari afitiye Abarundi, cyangwa umwanzi yari CNDD-FDD yatwitse iryo soko nkana, igamije gutikiza imitungo y'Abatutsi n'abandi batari abayoboke bayo, nk'uko amaperereza mpuzamahanga yigenga yaje kubigaragaza?

    2. Ubwo Perezida Kagame n'abayobozi bakuru hafi ya bose mu Rwanda bitabiraga imikino inyuranye yabereye i Bujumbura nyuma gato y'aho CNDD-FDD igiriye ku ngoma, burya rwari urwango, cyangwa yari agamije gushimangira umubano mwiza hagati y'abaturanyi, no gufasha uBurundi kwereka amahanga ko nabwo bufite icyerekezo cy' ubutegetsi buhamye?(Nubwo kwari ukwibeshya).

    3. Igihe u Rwanda rwashyigikiraga ko u Burundi buba kimwe mu bihugu bigize Umuryango w'Afrika y'Uburasirazuba, ndetse RUKANABWISHYURIRA IMISANZU, Jenerali NEVA yabibonyemo urwango rwa Perezida Kagame, cyangwa kwari ukubukura mu bwigunge, nabwo bugasusiruka mu ruhando rw'amahanga? Kwibagirwa cyangwa kwirengagiza ineza wagiriwe, ugeze ahakomeye, nta bupfura bubirimo, ariko nta n'igitangaje, burya ngo 'ugirirwa ineza n'uwo yigiriye aba agra Imana'.

    4. Ese ubwo ingabo z'u Rwanda zatabaraga abasoda b'u Burundi bari muri Santarafrika bamaze guterwa n'inyeshyamba, ndetse zimaze kubicamo 3, Jenerali NEVA abibonamo ubuhemu? Uwatekereza giswa yakwicuza ubwo butwari, ariko nta musirikari wa RDF warangwa n'ubugwari bwo gutererana abari mu kaga

    5. Ese, ubwo muri Nyakanga 2021, uRwanda rwashyikirizaga uBurundi abarwanyi 19 ba RED-TABARA rwari rwafatiye ku butaka bwarwo, Jenerali NEVA na CNDD-FDD ye, babibonyemo urwango cyangwa ubugwari? Kongo yabaye indiri y'abamutera ntacyo NEVA ayishinja, ahubwo niyo'somambike'.

    6. Ko hari Abarundi, barimo n'ibikomerezwa mu butegetsi, bagize uruhare muri Jenoside yakorewe Abatutsi, mu Burundi hakaba interahamwe, ibigarasha, abajenosideri ba FDLR, za FLN n'abandi bagizi ba nabi bakingiwe ikibaba n'uBurundi, Jenerali NEVA yari yumva na rimwe Perezida Kagame amwita umugambanyi, ko ahubwo uRwanda rurinda imbibi zarwo, rugahora rwiteguye ko uzarenga wa murongo utukura azabera abandi akarorero?

    Perezida Ndayishimiye rero, irinde guhotorana, ahubwo wubake dipolomasi ihamye, na politiki ikemura ibizazo uhereye mu mizi, aho gushaka uwo ubyegekaho.

    Kubahana nibyo bizagufasha guhangana n'ingorane udacishijwemo, ngo buri wese abone ko ukiri inyigaguhuma aho rwahinanye.

    Irinde guhubuka mu mvugo no mu bikorwa, dore watangiye kunyuranyaa mu mashyi no mu mudiho. Jya wibuka ko amagambo yawe y'uyu munsi, ariyo azakubera urubanza ejo n'ejobundi.

    Reka kugendera kuri politiki ya hutu-pawa. N'abo uyigana ntiyabaguye neza, dore isi bayimarishije ibirenge bahunga, nka Gahini amaze kwica Abeli. Ubwinshi bw'ibitekerezo byiza, byuzuzanya kandi bidashingiye ku bwoko, nibyo byatumye abandi batera imbere.

    Reka politiki ya cyana , ya munyangire. Wikwiyahura mu myumvire ipfuye ya Tshisekedi, wirengagije ko 'wisunga umugabo-mbwa mugakubitirwa hamwe'.

    The post Ariko abategetsi b'u Burundi bita Perezida Kagame 'umwanzi ', bajya bibuka ko biteranya n'amateka? appeared first on RUSHYASHYA.

    Source : https://rushyashya.net/ariko-abategetsi-bu-burundi-bita-perezida-kagame-umwanzi-bajya-bibuka-ko-biteranya-namateka/?utm_source=rss&utm_medium=rss&utm_campaign=ariko-abategetsi-bu-burundi-bita-perezida-kagame-umwanzi-bajya-bibuka-ko-biteranya-namateka

  • Izindi mbogamizi z’ingutu ziravugwa mu mugambi wo kohereza mu Rwanda abimukira bava mu Bwongereza #rwanda #RwOT

    Ni nyuma y’uko Guverinoma y’u Rwanda n’iy’u Bwongereza zivuguruye amasezerano agamije iyi gahunda yo kohereza abimukira.

    Ibi byakozwe nyuma y’uko Urukiko rw’Ikirenga mu Bwongereza rutesheje agaciro amasezerano ya mbere ariko Guverinoma y’iki Gihugu ikavuga ko igiye gukora ibishoboka byose ku buryo ntakindi kintu kizakoma mu nkokora uyu mugambi.

    Nubwo habarwa abimukira ibihumbi 17 binjiye mu Bwongereza mu buryo bunyuranyije n’amategeko ariko ubu habarwa abari hagati ya 700 n’ibihumbi bitanu, bazwi aho baherereye mu gihe abandi bitazwi aho bari.

    Minisitiri w’Intebe w’u Bwongereza, Rishi Sunak, yakunze kuvuga ko aya masezerano agiye gushyirwa ku rwego rwo kuba ntacyayanyeganyeza ku buryo hari hari icyizere ko abimukira ba mbere bazoherezwa mu mezi macye ari imbere.

    Gusa mu Cyumweru gishize, Abadepite 50 mu Nteko y’u Bwongereza bamaganye uyu mushinga, bavuga ko utasesenguranywe ubushishozi.

    Izindi mbogamizi zivugwa muri iyi gahunda, ni ikibazo cyo kuzakura abimukira mu bigo bacumbikiwemo ngo bagere aho bagomba gufatira indege izabageza mu Rwanda, aho bivugwa ko iyi gahunda ishobora kuzakomwa mu nkokora n’imyigaragambyo ya bamwe muri bo.

    Nanone kandi hifuzwaga ko hakoreshwa indege za Gisirikare kugira ngo abo bimukira babashe koherezwa, arimo igisirikare cy’u Bwongereza, kikaba cyaravuze ko kitabyinjiramo.

    Hanavugwa indi mbogamizi yo kuba u Rwanda rutararangiza kwitegura bihagiye nko gushaka abanyamategeko bazunganira abashaka ubuhungiro muri dosiye zabo.

    Mu masezerano aherutse gusinywa kandi, harimo ko hagiye gushyirwaho urwego rwihariye ruzakurikirana ibibazo by’aba bimukira n’inzira zo gushaka ubuhungiro.

    Source : http://www.ukwezi.rw/Mu-mahanga/article/Izindi-mbogamizi-z-ingutu-ziravugwa-mu-mugambi-wo-kohereza-mu-Rwanda-abimukira-bava-mu-Bwongereza

  • Kamonyi : Uherutse kugaragaza umujinya w’umuranduranzuzi byarangiye yishe umugore we #rwanda #RwOT

    Uyu mugabo witwa Celestin w’imyaka 45 akekwaho kwica umugore we na we w’imyaka 45 babanaga mu Mudugudu wa Giheta mu Kagari ka Cyambwe mu Murenge wa Musambira.

    Uyu mugabo yahise atabwa muri yombi, akaba afungiye kuri sitasiyo ya RIB ya Musambira, mu gihe umurambo wa nyakwigendera wo wajyanywe ku Bitaro bya Kacyiru gukorerwa isuzuma.

    Umuyobozi w’Akarere ka Kamonyi, Dr Nahayo Sylvère yavuze ko ubuyobozi nabwo bwatunguwe n’iki gikorwa cyakozwe n’uyu mugabo kuko uyu muryango utari uzwiho amakimbirane.

    Yagize ati 'Ntabwo bari basanganywe amakimbirane, kuko no ku rutonde rw’abo dufite abo bataruriho.'

    Ni mu gihe bamwe mu baturage bo muri aka gace, bavuga ko uyu muryango wo wahoraga mu ntonganya, ndetse ko uyu mugabo mu cyumweru gishize yatashye afite umujinya mwinshi asakuza kugira ngo asembure umugore we barwane, ariko umugore akamwihorera, bikarangira atemye amateke.

    Umuyobozi w’Akarere ka Kamonyi yasabye abaturage ko buri wese aba ijisho rya mugenzi we ku buryo igihe hagize ubona igishobora kuvamo ibibazo nk’ibi bagomba kwihutira kubimenyesha inzego.

    Source : http://www.ukwezi.rw/Mu-rwanda/article/Kamonyi-Uherutse-kugaragaza-umujinya-w-umuranduranzuzi-byarangiye-yishe-umugore-we

  • Umugore wa Sadio Mane yatangaje ko amafaranga… – #rwanda #RwOT

    Taliki 07 z’uku kwezi ni bwo umukinnyi w’ikipe y’igihugu ya Senegal na Al Nassr yo muri Arabia Saudite yatunguranye aba ashatse uyu mugore ukiri muto wo mu byaro byegeranye n’aho yavukiye, Bambali muri Senegal.

    Nyuma y’uko Aisha Tamba akoze ubukwe na Sadio Mane, yaganiriye n’ikinyamakuru Daily Mail avuga ko kuba yarashakanye n’umugabo uzwi ndetse ufite amafaranga bitazigera bimuhindura.

    Yagize ati “Ndimo kureba imbere ubuzima bwanjye bushya kandi nzi ko buzaba butandukanye cyane. Ariko nta gitutu numva mfite kubera ko ubwamamare n’amafaranga bya Sadio Mane ntabwo bizampindura. Ibi ntabwo ari byo binshishikaje. Nzakomeza kuba umuntu wicisha bugufi nkurikije ukuri kwanjye.

    Ntabwo menyereye kwitabwaho cyane kuko turi umuryango ubaho ubuzima bw’ibanga cyane. Ntabwo dukunda kwiyerekana no kuvuga ku buzima bwacu bwite. Ndi hasi cyane ku isi, uku ni ko narezwe, kandi nta kintu kizahinduka kubera ko nakoze ubukwe. Ariko ubu ndishimye cyane kuba ndi Madamu Sadio Mane Mane”.

    Abajijwe ku byo kuba azi umugore wa Cristiano Ronaldo ukinana na Sadio Mane muri Al Nassr, Georgina Rodriguez bashobora kuzajya bahura cyane namara gusanga umugabo we, yavuze ko ari ubwa mbere amwumvise bitewe nuko atajya akoresha imbuga nkoranyambaga.

    Kuri ubu Aisha Tamba ari ku ishuri aho yagiye gukora ibizamini ariko nabirangiza biteganyijwe ko azahita asubira iwabo kwitegura ubundi Sadio Mane yava mu mikino y’igikombe cy’Afurika bagahita bajyana muri Arabia Saudite.

    Ikipe y’igihugu ya Senegal ifite igikombe cy’Afurika giheruka cya 2021 irakina umukino wayo uyu munsi saa kumi na Gambia mu itsinda C.

    Umugore wa Sadio Mane yavuze ko atazahindurwa n’ubwamamare bw’umugabo we

    Sadio Mane yatangiye neza umwaka wa 2024 akora ubukwe

    Source : https://inyarwanda.com/inkuru/138586/umugore-wa-sadio-mane-yatangaje-ko-amafaranga-atazamuhindura-anemeza-ko-atazi-umugore-wa-c-138586.html

  • Biravugwa ko Abanyarwanda mu Burundi bari guhigwa hasi hejuru ndetse hari n’ababuriwe irengero #rwanda #RwOT

    Aya makuru aturuka i Burundi avuga ko hari Abanyarwanda benshi bari mu Burundi bamaze gutabwa muri yombi nyuma y’uko iki Gihugu barimo gifashe icyemezo gikarishye.

    Ikinyamakuru SOS Media Burundi gikorera mu Burundi, gitangaza ko bamwe mu bafashwe bajyanywe gufungwa n’Urwgeo rw’Igihugu rushinzwe iperereza mu Burundi.

    Iki kinyamakuru kivuga kandi ko abandi Banyarwanda bafungiye muri Kasho za Polisi muri Komini ebyiri ari zo iya Mugina n’iya Rugombo iri ku mupaka.

    Abanyarwanda 38 bamaze gufatwa na Polisi yo muri Komini Mugina, bakuwe mu bice binyuranye byayo kuva ku wa Kane w’icyumweru gishize ubwo hanafungwaga imipaka.

    Naho muri Komini ya Rugombo ikora ku mupaka, hamaze gufatwa abanyarwanda 58 bafashwe hagati yo ku wa Kane no ku wa Gatanu, ariko ubuyobozi bwo bukemeza ko hafashwe 46 barimo 20 bafashwe ku wa Kane na 26 bafashwe ku wa Gatanu, ngo bakaba barafashwe kuko badafite ibyagombwa.

    Ifatwa ry’aba Banyarwanda rije rikurikira icyemezo cy’u Burundi cyo gufunga imipaka ibuhuza n’u Rwanda, ndetse no gusaba Abanyarwanda bari muri iki Gihugu gutaha.

    Ni icyemezo cyanenzwe na Guverinoma y’u Rwanda, yavuze ko kidakwiye kuko kibangamiye urujya n’uruza rw’abantu n’ibintu ndetse kikaba gihonyora amasezerano wo kwishyira hamwe mu Muryango wa Afurika y’Iburasirazuba.

    UKWEZI.RW

    Source : http://www.ukwezi.rw/Mu-mahanga/article/Biravugwa-ko-Abanyarwanda-mu-Burundi-bari-guhigwa-hasi-hejuru-ndetse-hari-n-ababuriwe-irengero

  • RDC : Umunyapolitiki wakunze kwikoma Abatutsi anabatuka ibyabashenguye yatsindiye kuba Umudepite #rwanda #RwOT

    Ni nyuma y’amatora y’Umukuru w’Igihugu n’ay’Abadepite yabaye tariki 20 Ukuboza 2023, aho Komisiyo y’Igihugu y’Amatora muri Congo, yatangaje ibyavuye mu matora y’Abadepite.

    Ishyaka UDPS rya Perezida Felix Tshisekedi watsinze amatora ya Perezida, ni na ryo ryagize imyanya myinshi mu Nteko Ihshinga Amategeko.

    Umunyapolitiki Justin Bitakwira Bihona-Hayi ari mu babonye imyanya mu Nteko, mu gihe uyu mugabo azwiho kuvuga imvugo ziremereye ku Banyekongo bo mu bwoko bw’Abatutsi.

    Ni kenshi yagiye yumvikana avuga ko Abatutsi badakwiye kuba muri Congo, ahubwo ko bakwiye kwirukanwa bakajya kuba mu Gihugu cyabo.

    Nyuma y’amatora yo mu kwezi k’Ukuboza, Bitakwira yagize ati ' 'Ntekereza ko uwabaremye ari we waremye dayimoni. Ntabwo nigeze mbona ubwoko bubi nka bwo.'

    Uyu munyapolitiki ushyigikiye cyane Perezida Tshisekedi, yabaye Minisitiri w’iterambere ry’Icyaro ndetse akaba yarabaye n’Umudepite.

    Imvugo z’u Rwanda yakunze kuvuga, zatumye anafatirwa ibihano n’Umuryango w’Ubumwe bw’u Buryayi, byo kudakorera ingendo mu Bihugu bigize uyu muryango.

    Gusa ibi bihano yafatiwe mu kwezi k’Ukuboza 2022, ntacyo byamukosoyeho, kuko ubwo yaniyamamazaga mu matora aheruka, na bwo atahwemye kuvuga nabi Abanyekongo b’Abatsutsi by’umwihariko Abanyamulenge.

    UKWEZI.RW

    Source : http://www.ukwezi.rw/Mu-mahanga/article/RDC-Umunyapolitiki-wakunze-kwikoma-Abatutsi-anabatuka-ibyabashenguye-yatsindiye-kuba-Umudepite