Category: Uncategorized

Ni ibihembo byari bitanzwe ku nshuro ya mbere kuva mu 2018, ubwo AZAM TV yari ikibitanga. Tariki 7 Ukuboza umwaka ushize, ni bwo ubuyobozi bwa shampiyona y’icyiciro cya mbere mu mupira w’amaguru mu Rwanda, bwasinyanye amasezerano na Sosiyete y’imikino y’amahirwe ya Gorilla Games arimo kuzajya ihemba abakinnyi bitwaye neza mu kwezi ndetse n’umwaka.

Ni amasezerano azamara imyaka itatu ibi bikorwa, aho bazajya bahemba umukinnyi mwiza w’ukwezi umutoza mwiza w’ukwezi ndetse n’umunyezamu mwiza w’ukwezi. Umukinnyi mwiza azajya ahabwa Miliyoni 1 Frw, naho umunyezamu n’umutoza bahabwe ibihumbi 300 Frw.

Iyi gahunda yo guhemba abitwaye neza, ni umushinga mwiza kuko ibihugu hafi ya byose ku Isi bigira uyu muhango usibye mu Rwanda wari umaze imyaka utabaho. Gorilla Games yafashe iya mbere mu gutanga ibihembo, ku bwanjye mbona yaragize huti huti kuko umushinga wayo ntunoze.

Aba nibo begukanye ibihembo ku nshuro ya mbere bihatanirwa 

Ubwo habaga umuhango wo gusinya amasezerano, ubuyobozi bwa Gorilla Games uburyo bwasobanuyemo uko umukinnyi mwiza, umutoza mwiza bazajya batorwa, byahise bigaragaza ko bishobora kuzateza ibibazo mu minsi iri imbere.

Uko amatora yagenze

Uko abegukanye ibihembo bakurikiranye mu bakinnyi

Victor Mboama yagize amanota 31.5, Nzinga Luvumbu agira amanota 25.8 naho Hakizimana Muhadjri agira amanota 23.6.

Igitego cyiza

Igitego cya Kategaya Elie cyagize amanota 33.1, igitego cya Hakizimana Muhadjri kigira amanota 28, igitego cya cya Sharif Bayo kigira amanota 19.5.

Umutoza mwiza

Mashami Vincent yagize amanota 30.2, anganya na Thierry Froger Afhmia Lotfi afite amanota 21.9

Save nziza

Nzeyurwanda Djihad yagize amanota 27.5, Sebwato Nicholas agira amanota 27.3, Tamale Simon agira amanota 24.5

Ibyagenderwagaho hatorwa umukinnyi mwiza

Kugira ngo umukinnyi ahige abandi, harebwe ibintu bigera kuri 4, Inshuro yagaragaye mu kibuga, ibitego yatsinze, imipira yatanze ivamo ibitego umwanya ikipe iriho, ndetse no kwihanganirana (Fair Play).

Ibyagendeweho hatorwa umutoza mwiza

Imikino yatsinze, imikino yatakaje, imikino yanganyije, umwanya ikipe ihagazeho, ndetse no kwihanganirana.

Tukiri kuri ibi byagendeweho, twavuga ko ku mukinnyi mwiza, usibye umwanya ikipe ya APR FC irusha Police FC, nta kintu na kimwe Victor Mboama arusha Hakizimana Muhadjri cyari gutuma amutwara igikombe.

Aba bakinnyi bombi bakinnye imikino 4, Hakizimana Muhadjri atsinda ibitego 5 atanga imipira 3 ivamo ibitego, mu gihe Victor Mboama yatsinze ibitego 4 gusa ntiyagira umupira uvamo igitego atanga.

Ubundi umukinnyi w’ukwezi bigenda gute ngo aboneke?

Nk’uko byagenze ku nshuro ya mbere, abateguye ibi bihembo, batoranyije ibitangazamakuru bisanzwe bikurikira shampiyona ndetse basaba ko babaha umukinnyi mwiza w’ukwezi, umutoza mwiza igitego byiza, ndetse na Save nziza. Ntabwo ari aba gusa kuko n’amakipe akina icyiciro cya mbere umutoza na Kapiteni bagombaga gutanga ibyo byiciro twavuze haruguru.

Nyuma yo kubona ibi, abateguye ibihembo bahise batoranyamo abahatana 4 bigendanye n’abatowe cyane. Nyuma haje kujyaho amatora rusange harimo ay’abafana yabereye ku mbuga nkoranyambaga ndetse hatoranywa abanyamakuru 2 mu muryango w’abanyamakuru ba siporo, abantu babiri baba mu muryango w’abakanyujijeho mu Rwanda, ndetse n’akanama kashyizweho n’abateguye ibi bihembo. Aba bose uruhare bagize ni rwo rwavuyemo ababonye ibihembo kuri uyu wa Kabiri.

Duhereye ku bitangazamakuru byasabwe gukora ijonjora rya mbere, abateguye ibihembo gukusanya ibihembo byarabananiye bitabaza inzira y’ubusamo. Ntabwo umuntu utegura ibihembo yakabaye adafite ubushobozi bwo kuzenguruka ahantu hose habereye imikino ngo uvuge ko ibyo bihembo bizaza bifite ubuziranenge.

Nibura Gorilla Games na Rwanda Premier League bakabaye bafite abakozi 8 bajya kuri buri mukino wabaye ubundi bagakusanya amakuru, y’imikino yabaye mu kwezi ubundi bakayashyira hanze, abanyamakuru bagatora bigendeye ku buryo babibonye. 

Kubwira umunyamakuru wenda warebye imikino yose yo mu mujyi wa Kigali ngo ashake Save nziza ntiyayibura ariko ushobora gusanga hari iyakorewe i Ngoma ipfuye ubusa kandi ariyo yari ikaze.

Bamwe mu bakozi bategura ibihembo, ntibazi iyo biva n’iyo bijya

Ntabwo wakumvisha abantu uburyo kimwe mu bitego byiza byari gutoranywamo igitego cy’ukwezi bafashe ifoto ya Gerard Ndayogenje bakayishyira ku gitego cya Samuel Pimpong kandi bikaguma uko abantu bakituriza.  

Luvumbu Nzinga yashyizwe mu bakinnyi beza nta gitego ndetse nta n’umupira uvamo igitego. Mu kwezi k’Ukuboza, ikipe ya Rayon Sports yakinnye imikino 4, umukino wa mbere ikaba yaratsinze Bugesera FC igitego 1-0 cyatsinzwe na Bugingo Hakim ahawe umupira na Mvuyekure Emmanuel. Umukino wa kabiri Rayon Sports yatsinze Muhazi United ibitego 2-0, harimo igitego cya kufura ya Muhire Kevin, n’igitego cya Musa Esenu ku mupira yahawe na Tuyisenge Arsene. 

Umukino wa gatutu, Rayon Sports yatsinzwe na AS Kigali ibitego 2-1, igitego cya Muhire Kevin ku mupira wa Youssef Rharb. Umukino wa 4, Rayon yanganyije na Kiyovu Sports igitego 1-1, igitego cyatsinzwe na Ngendahimana Eric ku mupira yahawe na Ojera Joachim.

Luvumbu yagiye mu bakinnyi bitwaye neza nta gitego na kimwe yatsinze, ndetse nta n’umupira uvamo igitego 

Biragoye kumva uburyo akanama gategura amatora katabonye iri kosa, yewe n’iyo abanyamakuru cyangwa abandi batora bamushyiramo kuko ibyo nta cyaha kirimo kubera ko haba harimo n’abafana be, cyereka niba akanama gafata umwanzuro nako kari kabaye umufana wa Luvumbu.

Amajwi y’abafana ashatse yakurwamo

Abashinzwe gutegura ibi bihembo bahaye abafana uruhare rwa 20%, gusa mbona 20% abafana bashatse bayamburwa. Hari abashobora kunyumva nabi, ariko kugira ngo ubone umukinnyi mwiza bisaba kuba ushyize amarangamutima ku ruhande mu buryo bwa burundu.

Reka twibaze ku mufana wagiye kuri Instagram gutora nk’uko bizwi, APR FC na Rayon Sports nizo kipe zifite abafana benshi mu Rwanda mu gihe rero uhaye uruhare abafana mu matora, bivuze ko abafana b’aya makipe bazabogamira ku bakinnyi n’abatoza babo. Bizagorana kubona umukinnyi mwiza mu ikipe y’Amagaju FC (Ni urugero), yatsinze umukinnyi wa Rayon Sports kubera iyo mpamvu.

Niba Gorilla Games na Rwanda Premier League bashaka gukuza imbuga nkoranyambaga zabo nibashyireho ibintu byinshi, ariko uruhare rw’abafana rugabanuke.

Umushinga wo gutanga ibihembo ni mwiza ariko uburyo bwo gushaka intoranwa bukwiriye kuba bufite umurongo ugezweho ndetse bikaba byashorwamo amafaranga aho kubyegeka kuri rubanda. 

Ku munsi wo gusinya amasezerano, ubuyobozi bwa Gorilla Games na Rwanda Premier League bwavuze ko buri muntu wese yemerewe kuzana amashusho azifashishwa mu gutanga ibihembo, ibintu umuntu yakwibazaho kuko abo bantu bavuze ni rubanda nta n’umwe bafitanye amasezerano y’imikoranire.

Ese umunsi i Rusizi cya ngwa i Rubavu hazabera igitego cyiza cyangwa Save nziza, ntihagire ufata iryo shusho ngo arizane, ntihazaba hari amakuru atagezweho, bikaba byateza itangwa ry’ibiyembo bitujuje ireme?

Aho guha umukinnyi Miliyoni ku bintu bitakusanyirijwe amakuru ku buryo buhagije, byaruta ukamuha ibihumbi 500 Frw, ubundi andi ibihumbi 500 Frw, ukayashora mu bakozi batuma akazi koroha kandi kagatanga amakuru yizewe.

Samuel ukinira Mukura ntabwo ifoto ye ariyo yakoreshejwe ahubwo bakoresheje iya mugenzi we Ndayogenje, ndetse babirekera uko

Iyi nkuru y’isinya rya Shavy Babicka muri Toulouse, yabaye kimomo mu ijoro ryo ku itariki 18 Mutarama. Ni inkuru yasamiwe hejuru n’ibinyamakiru byo mu Bufaransa, byavuze ko Shavy Babicka ari imbaraga zikomeye Toulouse yongereye mu kibuga hagati.

Shavy Babicka yamenyekanye muri Kiyovu yo mu Rwanda kuva muri 2018 kugera muri 2021. Uyu mukinnyi azwiho gukina bidasanzwe mu kibuga hagati, akaba yarafashije Kiyovu kugera ku mukino wa nyuma mu gikombe cy’Amahoro cya 2020, bagakurwamo na AS Kigali.

Akiva muri Kiyovu, Shavy Babicka yongeye kumvikana mu ikipe ya Aris Limassol nayo ikina icyiciro cya mbere mu gihugu cya Cyprus.

Toulouse yishyuye Aris Limassol Miliyoni 2.7€, kugira ngo yegukane umunya Gabon Shavy Warren Babicka wakiniye ku bibuga bitandukanye byo mu Rwanda.

Shavy Warren Babicka wambitswe nimero 80 mu mugongo, abaye umunya Gabon wa Kane ugiye gukinira Toulouse, abandi banya Gabon bayikiniye, ni Pierre-Emerick Aubameyang, Mario Lemina na Denis Bouanga.

Babicka wanyuze muri Kiyovu, mu mwaka w’imikino wa 2022-23, yafashije ikipe ya Aris Limassol gutwara Super Cup yo muri Cyprus.

Shavy Babicka wakiniye Kiyovu yo mu Rwanda, ubu yasinyiye Toulouse yo mu Bufaransa

Shavy Babicka muri Kiyovu na Bagenzi be

Muri 2022 tariki 22 Ugushyingu ni bwo umuhanzi Bruce Melodie yashyize hanze indirimbo 'Funga Macho' iri mu ndirimbo zakunzwe cyane ndetse yanegukanye igihembo cy'indirimbo nziza mu bihembo bya The Choice Awards 2022.

Iyi ndirimbo yari yarakozwe na Producer Prince Kiiz wabarizwaga muri kompanyi '1:55 am y'umushoramari Karomba Gael umaze kwamamara ku izina rya Coach Gael.

Icyakora Prince Kiiz yahise ava muri iyi nzu ahubwo abisikana na mugenzi we Element wajyaga muri 1:55 am avuye muri Country Records ari nabwo uyu Kiiz yerekezaga i Nyamirambo muri iyi Country Records.

Nyuma y'igihe kigera ku mwaka, Bruce Melodie yakeneye gusubiramo ya ndirimbo hamwe n'umunya Jamaica Shaggy, birangira bitabaje Prince Kiiz ngo ayibakorere mu buryo bw'amajwi nk'uko yari yakoze iya mbere.

Benshi bibajije impamvu Bruce Melodie yagiye gushaka Producer ahandi kandi muri kompanyi akoreramo bafite Element.

Mu kiganiro Prince Kiiz yagiranye na InyaRwanda, yasobanuye uko yakoranye na Bruce Melodie na Shaggy.

Umunyamakuru yamubajije niba hatarabayeho gutekereza Element ngo babe bamusaba ko abaha iby'ibanze [data] ngo abyange cyangwa abyemere.

Kiiz yagize ati 'Ibyo biba mu Banyarwanda aho umuntu bamukura mu kintu cye ntanamenye uko byagenze. Ariko kuri iyi nshuro hari harimo umunya America. Iyo biramuka bibaye byari kuba bitemewe n'amategeko kandi byari gusaba ko mbasinyira'.

Prince Kiiz yabajijwe niba iyo asabwa kuyitanga atari kuyitanga. Kiiz yagize ati 'Ntekereza ko ukuntu yari ikoze byari bihagije ku buryo iyo hajyamo ibindi bitekerezo bitari gukunda. Uko yari ikoze yari ihagije'.

Ni amagambo yasamiwe hejuru n'abakoresha imbuga nkoranyambaga, bavuga ko uyu musore yaba arimo kwishyira ku rwego atariho kuko ngo Element ari mukuru we mu mwuga.

Prince Kiiz ubarizwa muri Country Records niwe wabaye Producer w’umwaka muri IMA Awards 2023

Element amaze kubaka izina mu gutunganya amajwi y’indirimbo no kuziririmba

Bruce Melodie yahisemo gukorana na Prince Kiiz atera umugongo Element

Kanda hano urebe ibitekerezo abantu banyuranye batanze ku byo Kiiz yatangaje

Reba ikiganiro twagiranye na Producer Prince Kiiz

Reba When She’s Around ya Bruce Melodie na Shaggy

“>

Umwuga wo kuvanga umuziki ukomeje gukura ari na ko abawukora ubahindurira ubuzima yaba abakobwa n'abahungu.

Dj Brin, umwana muto w'imyaka 15 kuko yabonye izuba kuwa 26 Kamena ni umwe mu bakomeje kwigaragaza.

Niba umaze iminsi ubona amashusho atandukanye abahanzi banyuranye basuye Sherrie Silver Foundation ukabona uburyo abantu bizihiwe, yaba baririmba cyangwa babyina, DJ Brin ari mu babigizemo uruhare binyuze mu buryo bwo kuvangavanga umuziki.

DJ Brin mu kiganiro yagiranye na inyaRwanda yagize ati: 'Mu myaka ibiri maze ntangiye umwuga wo kuvanga umuziki maze kumenyana n'abantu benshi.'

Avuga kandi ko yatewe ibyishimo no kubona ari kuvanga umuziki ahantu hari The Ben, Bruce Melodie na Element.

Akomoza ku kiganiro yagiranye na Element babashije kuganira ati'Yambwiye ko ibyo nkora ari byiza kandi ejo ari heza.'

Kuri ubu DJ Brin yiga mu mashuri yisumbuye mu mwaka wa Kabiri i Nyamata ariko ibirebana no kuvanga umuziki akaba yarabyize muri Innovation DJ Academy.

Umwuga we akaba awuhuza n'amasomo asanzwe mu buryo bwiza aho amasaha menshi ayaharira kwiga cyane mu minsi y'imibyizi ubundi mu mpera z'icyumweru akaba ari bwo akora iby’akazi ko kuvanga umuziki.

DJ Brin yasabye abantu gukomeza kumushyigikira anagaragaza ibyishimo yatewe no gucurangira abarimo The Ben na Bruce MelodieYakomoje ku mpanuro yahawe na Element anashimira Sherrie Silver ukomeje kumufasha umunsi ku wundi

Gatanya, ni umwe mu myanzuro abantu benshi batavugaho rumwe kuko hari abavuga ko ari ubugwari, abandi bakavuga ko aho kugira ngo abantu bagere aho bahitamo kwicana kuko bananiwe kumvikana bakwiye guhana gatanya mu mahoro buri wese agaca inzira ye.

Muri uyu mwaka ukiri mu ntangiriro, hari ibyamamare hirya no hino ku isi byamaze gufata uyu mwanzuro, ndetse bamaze no kuva mu nkiko nyuma, banabitangariza abafana babo ku mugaragaro.

Mu ngo nyinshi z'ibyamamare zamaze gushyirwaho iherezo rugikubita mu 2024, InyaRwanda yaguhitiyemo 10 gusa zarangije kuba amateka:

1. Rachel Lindsay & Bryan Abasolo

Aba bombi basabye gatanya ku ya 02 Mutarama 2024 nyuma y'imyaka ine babana nk'umugabo n'umugore, bavuga ko kudahuza bidasubirwaho ariyo mpamvu yo gutandukana kwabo.

2. Prince Leka & Princess Elia

Nyuma y'imyaka isaga umunani igikomangoma Leka II n'igikomangomakazi Elia bo muri Albania, biyemeje gutandukana ariko bagakomeza kurerana umwana wabo w'umukobwa, Geraldine, ufite imyaka itatu y'amavuko.

Tariki 15 Mutarama 2024, nibwo Igikomangoma Leka yatangaje ko we na Elia bafashe umwanzuro wo gutandukana, avuga ko 'hashingiwe ku kuba urushako rwabo rutagikurikiza inshingano, bombi bahisemo kubikemura mu bwumvikane, babinyujije mu nzira zemewe n'amategeko.'

3. AJ & Rochelle McLean

Nyuma yo gutandukana bakongera gusubirana, aba bombi baje gushyingiranwa mu 2011, ariko uyu mwaka ugitangira bahise batangaza ko basabye gatanya.

Babinyujije ku mbuga zabo za Instagram ku ya 01 Mutarama 2024, batangaje ko mu by'ukuri bari bamaze umwaka wose batabana, ariko ko noneho bahisemo gushyira akadomo ku rushako rwabo ku mugaragaro.

Aba bombi bavuze ko intego yabo nyamukuru ari ukurerera hamwe abana babyaranye, Elliott w’imyaka 11 na Lyric w’imyaka 6.

4. Austin & Catherine McBroom

Iyi 'couple' y'ibyamamare yakurikirwaga n'abatari bacye ku muyoboro bari bahuriyeho wa Youtube bise “The ACE Family,” batangaje ko bafashe icyemezo cyo kurangiza urugendo rw'urushako bari bamazemo imyaka 11 ku ya 11 Mutarama 2024.

Austin yanditse kuri Instagram ati: “Twese twemeranijwe gutandukana ariko tuzakomeza gufatanya nk'ikipe ku bijyanye n’abana bacu.”

5. Sam Feher & Kory Keefer

Sam Feher yemeje muri uku kwezi kwa Mutarama 2024 ko yatandukanye na Kory Keefer nyuma yo gukundana umwaka n’igice.

6. Anderson Paak & Jaylyn Chang

Anderson Paak yasabye ubutane n'umugore we, Jaylyn Chang, nyuma yimyaka irenga 13 bashakanye. Aba bombi, biyemeje gukomeza kurerera hamwe abahungu babo babiri, Soul Rasheed na Shine Tariq.

7. Lisa Bonet & Jason Momoa

Nyuma y'imyaka ibiri batabana nk'umugabo n'umugore, Lisa Bonet na Jason Momoa biyemeje gutandukana ku mugaragaro. Ku ya 8 Mutarama, nibwo Bonet yatanze ikirego mu rukiko rw’intara ya Los Angeles kugira ngo arangize isezerano yagiranye n’umugabo we Momoa.

8. Kim Marlowe & Fabrice Morvan

Kim niwe wasabye gatanya ku wa 08 Mutarama 2024. Nubwo itariki basezeraniyeho itazwi neza, Fabrice yigeze gutangaza ko yari amaze igihe kini abana n'umugore we ndetse n'abana babo bane.

9. YG & Saweetie

Ku ya 15 Mutarama 2024, nibwo aba baraperi bombi batangaje ko bahisemo gutandukana mu kinyabupfura nyuma y'igihe kitageze ku mwaka bakundana.

10. Armie Hammer & Marina Gris

Gris yatangaje ko isezerano yagiranye n’uyu mukinnyi wa filime ryo kumubera umugore ryarangiye ku ya 11 Mutarama.

Mu butumwa burebure yashyize kuri Instagram yaragize ati: 'Icyemezo twafashe cyo gushyingirwa hamwe na gahunda z’ejo hazaza twari dufitanye byose byari bishingiye ku mbaraga, gushyigikirana, no kwita ku bandi. 

Icyemezo cyo gutandukana, nubwo kitoroshye cyafashwe mu bugwaneza no kubahana, ibyo bikaba byerekana ko urugendo rwacu rwarangiye neza.'

Twaguteguriye urutonde rw'abakinnyi ba filime bakunzwe, bafite ubwiza karemano, ndetse badakunze kwisiga ibintu bibongerera ubwiza bizwi nka 'Make Up' bihindura isura y'umuntu.

   1.     Scarlet Johansson

Uretse ubwiza ni umuhanga mu gukina filime nk’uko byagarutsweho cyane

Scarlet Ingrid Johansson ni umukinnyi wa filime yavukiye muri Leta Zunze Ubumwe za America mu gace ka Manhattan gaherereye mu mujyi wa New York. Uyu mukinnyi wa filime ufite uburanga karemano, ni umwe mu bagore bakurura igitsinagabo, akaba yaravutse tariki 22 Ugushyingo 1984.

Johansson watandukanye n'abagabo batatu, yakunzwe muri filime zirimo The Avengers, Lucy, Lost in Translation, Black Widow, Rough Night, The Prestige n'izindi nyinshi. Mu mwaka wa 2018 na 2019 yashyizwe ku rutonde rw'abakinnyi bahembwaga agatubutse.

     2.      Margot Robbie

Margot Robbie akunzwe muri filime Barbie ikinamo umunyarwanda witwa Ncuti Gatwa

Margot Elise Robbies ni umukinnyi wa filime ukomoka muri Australia akaba n'umuhanga mu gutunganya filime. Ubwiza bw'uyu mugore bwavuzweho n'abatari bacye, batangaza ko mu bice bye arinda cyane harimo igice cyo mu maso. Bimwe akora harimo kwirinda izuba ko rimwangiriza uruhu, gututubikana n'ibindi.

Yabonye izuba tariki 2 Nyakanga 1990, avukira ahitwa Dalby muri Australia, akundwa muri filime zirimo Barbie, Mary Queen of Scots, Suicide Squard, Focus, About Time, Babylon n'izindi. Uyu mugore utegerejwe muri filime yitwa “My Big Ass” afite ubwiza karemano butangaje.

     3.     Jennifer aniston

Amaze gukura ariko akomeza kuba mwiza kubera kwiyitaho

Anniston Jennifer wamamaye muri filime y'uruhererekane ya 'Friends' aracyafite ubwiza bukurura abantu ku myaka 54. Yavukiye muri Los Angeles, Califonia, muri Leta Zunze Ubumwe za America.

Anniston yakunzwe muri filime zirimo Murder Mystery 2, Life of Crime, The Switch, Unity, Five n'izindi. Yigeze atangaza ko yakora buri kimwe mu kwita ku bwiza bwe kugira ngo ahore asa neza kugeza apfuye.

     4.     Úrsula Corberó ” Tokyo”

Yakunzwe muri filime zirimo Lacasa del Papel “Money Heist” n’izindi

Uyu mugore wamenyekanye nka Tokyo muri filime y'uruhererekane yiswe Lacasa del Papel, ni umwe mu bagaragaye ko ari beza kandi bafite ubwiza karemano, budakenera kwisiga ibirungo ku mubiri.

Tokyo uri gukina muri filime 'Lift' yahuriyemo n'abarimo Kevin Hart, akunze kwigaragaza yitwara nk'igitsinagabo, ariko ubwiza bwe bukomeza gukurura igitsinagabo.

Uyu mukinnyi ukomoka muri Espagne, yabaye ibyishimo bya benshi binyuze muri filime zirimo Snake Eye, Lacasa del Papel, Lift n'izindi.

     5.     Jennifer lowrence

Ni umwe mu bagore basaruye agatubutse mu mwuga wa sinema

Jennifer Shrader lowrence w'imyaka 33 yavukiye muri Kentucky muri America, yamamara mu mwuga wo gukina filime no kugira filime ze bwite zamwinjirije agatubutse.

Ubwiza bwa Jennifer butuma benshi bifuza kuba inshuti ye, ndetse abagabo bakamukunda.

Yakunzwe muri filime zirimo The Hunter Games, Passengers, American Hustler, Bad Blood n'izindi. Bitangazwa ko ubwiza bwe bwiyongera bitewe no kwiyitaho no kumenya uburyo bwiza yiyitaho atiyangije.

  

Rutahizamu wakiniraga Rayon Sports, Musa Esenu yamaze gusubira mu ikipe y’iwabo muri Uganda, ni nyuma y’uko kujya muri Iraq byanze.

Musa Esenu wari usoje amasezerano ye y’imyaka ibiri, yari yamaze kumvikana na Masafi Al-Junoob SC yo mu cyiciro cya kabiri muri Iraq.

Uyu rutahizamu wagombaga kuyisinyira amezi 6, byaje kurangira abuze ibyangombwa.

Musa Esenu akaba yamaze gusinyira Bull FC y’iwabo muri amasezerano y’imyaka ibiri.

Si ubwa mbere agiye gukinira iyi kipe kuko na 2022 ubwo yazaga muri Rayon Sports ni yo yakiniraga, yari ayimazemo imyaka 3.

Wari umukino usoza imikino ibanza y’igikombe cy’Amahoro, ukaba umukino wari uteganyijwe kuba tariki 16 Mutarama ariko uza kwimurwa. Ku munota wa mbere Gasogi United yabonye kufura ku ikosa ryari rikorewe Lisele Cedric Lisombo Malipangou Christian Theodore ayitera neza cyane umupira uruhukira mu izamu.

Abakinnyi 11 Muhazi United yabanje mu kibuga

TWAGIRAVEZU Amani (GK)
NOUWIMANA Louis Romeo (C)
SIACA Conte
KARANZII Joseph
MBANZA Caled
NDAVISHIMIVE Richard

JOSEPH Sackey

MUTIJIMA Janvier
MUHAMED Kyune
TWIZERIMANA Onesme
DUSHIMIMANA Jean

Ku munota wa 26 Muhazi United yarimo izamuka neza yaje kubona uburyo bw’igitego ku mupira wazamukanwe na Twizerimana Onesme awuhereza Mutima Janvier ateye mu izamu umusifuzi yemeza ko yaraririye. 

Ku munota wa 38 nabwo, Muhazi United nabwo yabonye uburyo bw’igitego ku mupira wari uvuye muri koroneri Twizerimana Onesme ateretseho umutwe ari wenyine, umupira ucakuruhande gato.

Abakinnyi 11 Gasogi United yabanje mu kibuga

DAUDA Ibrahima Bareli
NIYITEGEKA Idrissa
UDAHEMUKA J.de Dieu
NSHIMIYIMANA Marc Govin
MUDERI Akbar
Lisele Cedric Lisombo
HAKIZIMANA Adolphe
Malipangou Yawanendji Theodore Christian
KABANDA Serge
Henock Yao
MUGISHA RAMA Joseph

Ku munota wa 42″ Kabanda Serge yatsindiye Gasogi United igitego cya kabiri ku mupira waturutse mu kibuga hagati ugana mu izamu rya Muhazi United awutanga Amani ahita atereka mu izamu.

Igice cya mbere cyarangiye Gasogi United iyoboye n’ibitego 2 amakipe yombi ajya kuruhuka. Mu gice cya kabiri Muhazi United yagitangiranye imbaraga nyinshi ndetse ishaka igitego nibura kimwe.

Twizerimana Onesme yaje kuva mu kibuga nyuma yo guhusha ibitego byinshi, ariko Gasogi United impinduka zosa yakoraga ntacyo byayifashaga. Mu minota 10 ya nyuma Gasogi United yongeye kwigaranzura Muhazi United.

Ku munota wa 86″ Gasogi United yahushije igitego cyari cyabazwe nyuma yaho Marc Govin yazamukanye umupira mu ruhande rw’iburyo, acenga umunyezamu, ahereza Lisele Cedric wari usigaranye izamu wenyine, ashatse gushota adahagaritse umupira ujya hanze.

Iminota 90 y’umukino irangiye, umusifuzi yongeyeho iminota 3, Gasogi United yahushijemo ibitego 2, umukino urangira nta mpinduka zibaye. Uyu wari umukino usoza imikino ibanza y’igikombe cy’Amahoro, mu mpera z’iki cyumweru hakaba hari bugaruke imikino ya shampiyona.

Ikipe ya Gasogi United na Muhazi United bagomba gukina imikino 3 yikurikiranya kuko ku cyumweru Muhazi United izakira Gasogi United mu mukino wa shampiyona, naho mu cyumweru hagati, nabwo Muhazi United yakire Gasogi United mu mukino wo kwishyura w’igikombe cy’Amahoro. 

Alain Kirasa atsinze umukino wa kabiri wikurikiranya nyuma yo gutsinda Rayon Sports ayirusha cyane 

Ruremesha Emmauel ntabwo umukino wamworoheye, akaba ategereje umukino wo kwishyura 

Twagirimana Amani ntabwo umukino wamworoheye n’uko yabikekaga 

Malipangou yongeye kwerekana ko ari umwe muri ba nimero 10 bahagaze neza mu Rwanda 

Mudaheranwa Hadji aganira na KNC perezida wa Gasogi United 

Abafana bari bicaye mu gice kimwe kubera imvura yagwaga 

Kabanda Serge yagoye cyane ikipe ya Muhazi United cyane nk’uko yabikoze ku mukino wa Rayon Sports uheruka, ubu akaba afite ibitego 3 mu mikino 2 aheruka gukina 

Perezi wa Muhazi United byageze aho biramucanga arumirwa 

KANDA HANO UREBE AMAFOTO MENSHI

AMAFOTO: Ngabo Serge

VIDEO: Munyantore Eric

Uyu munyapolitiki Robert Kyagulanyi Ssentamu wamamaye nka Bobi Wine wanabaye umuhanzi, ni kenshi yagiye afungirwa iwe ubwo yabaga yateguye imyigaragambyo ariko inzego zikaburizamo imyigaragambyo ye.

Byari biteganyijwe ko kuri uyu wa Kane tariki 18 Mutarama 2024, Bobi Wine n’abayoboke be ndetse n’abandi banyapolitiki batavuga rumwe n’ubutegetsi muri Uganda, baramukira mu myigaragambyo.

Gusa Bobi Wine we ntibyamuhiriye kuko igisirikare n’igipolisi, byaramukiye iwe, bikagota urugo rwe bikamubuza gusohoka.

Mu butumwa yatanze ku mbuga nkoranyambaga ze, Bobi Wine yavuze ko asa nk’wafungiwe iwe.

Yagize ati 'Uruhuri rwAbasirikare n’abapolisi bagose urugo rwanjye basa nk’abamfungiye mu nzu.'

Gusa Bobi Wine yakomeje avuga ko nubwo we atabashije kujya mu Myigaragambyo 'ariko imyigaragambyo yo irarimbanyije.'

Yaboneyeho guhita atanga ubutumwa ku butegetsi bwa Uganda, ati Musane imihanda yacu ! Murekure imfungwa za Politiki ! Mureke Uganda yibohore !'

Bobi Wine, usanzwe ari umunyapolitiki wagiye agaragaza ingufu, kubera uburyo ashyigikiwe, yakunze gufungirwa iwe mu rugo inshuro nyinshi, by’umwihariko ubwo yiyamamazaga mu matora y’Umukuru w’Igihugu ya 2021.

UKWEZI.RW