Webrwanda Backend

Category: Uncategorized

  • Kamonyi:'Operasiyo' ya Polisi itaye muri yombi abakekwaho bose kwica Niyonsenga Fabien aka' Njyamani' #rwanda #RwOT

    Mu gihe kitageze ku masaha 20, Hatangimana Fidèle na Dushimimana Emmanuel aka'NUSUROBO cg KANUSU' batawe muri yombi na Polisi ikorera mu karere ka Kamonyi. Bombi, bafatiwe mu Murenge wa Runda aho bari bahungiye mu masaha atandukanye bahunga Rukoma bikekwa ko biciyemo umuntu. Uretse aba, umukobwa wacuruzaga akabari byavuzwe ko ariwe wabaye intandaro ya Nyakwigendera nawe yishyikirije Polisi na RIB i rukoma.

    Ku ikubitiro, mu masaha ya mugitondo cyo kuri iki cyumweru Tariki ya 17 Werurwe 2024, hatawe muri yombi Dushiminana Emmanuel bakunze kwita 'NUSUROBO cg KANUSU', aho yabundabundaga yihisha mu kagari ka Kagina, Umurenge wa Runda.

    Nyuma y'amasaha make ku gicamunsi, Polisi ku bufatanye na RF, RIB, DASSO, Inzego z'ibanze hamwe n'Abaturage, bataye muri yombi Hatangimana Fidèle uzwi nka 'HATANGA' ari nawe uvugwaho gutera icyuma Nyakwigendera.

    Mu mayeri yakoreshejwe n'abamubonye(HATANGA), yisanze agejejwe kuri Sitasiyo ya Polisi ya Runda aho yari azanywe mu buryo gucika abari bamufashe byari kumugora. Yahise afungirwa i Runda, hategerejwe ko yoherezwa i Rukoma, aho bikekwa ko yakoreye icyaha kugira ngo Dosiye ye itunganywe.

    Mbere y'uko uyu ufatwa nk'uwishe Nyakwigendera afatwa, umunyamakuru wa intyoza.com yabashije kubona Nomero za Terefone za Iradukunda Joseline ufatwa nka Nyirabayazana w'iyicwa rya Niyonsenga Fabien aka 'NJYAMANI', baravugana ndetse amujyira inama yo kwihutira kwishyikiriza Polisi na RIB, ibyo nawe yavuze ko yarimo atekereza kuko yashakaga gutanga amakuru ariko akabanza kuzitirwa n'ubwoba.

    Iradukunda Joseline, yabwiye umunyamakuru ko aba bakekwa kwica Niyonsenga Fabien baje bamusanga mu kabari ke aho yapimaga Urwagwa. Avuga ko baje basa n'abaruhaze kuko bari banafite icupa ryarwo mu ntoki, baza begera Nyakwigendera( akiri muzima), bitangira abona atazi ibyo barimo, baterana imitwe.

    Ati' Bari baje aho nari ndi gukorera, harimo uwo wapfuye ari kunyweramo inzoga( urwagwa). Baba baraje mbona baramufashe. Babanje kumera nk'abantu bari gukina, ntabwo bari bameze nk'abashaka kurwana. Uwo Manudi(Emmanuel) ni we waje arabanza aramufata kuko yari yasangiye n'uwo wundi. Ntabwo bari banywereye iwanjye kuko bo bari baje bahaze'.

    Yakomeje avuga ko uwo Dushimimana Emmanuel akimufata, mugenzi we Hatangimana Fidèle uzwi nka' HATANGA' yahise aza nawe amera nk'umufata amuhobera'ariko bishoboka ko hari ibyo yamubwiye', nibwo uyu Nyakwigendera yahise amukubita umutwe undi nawe amutera uwundi, bahita bafatana hanyuma Manudi ahita afata akaguru k'uwo Njyamani, bose bahita batangira kurwana abantu barabakiza ariko bahita basohoka bajya hanze ari naho bamutereye icyuma mu gatuza ahegereye ku mutima.

    Iradukunda Joseline, avuga ko ibyo bikiba yahise asohora abari mu kabari bose, ahamagara Gitifu aramubura, ahamagara Mudugudu aramubura ahita akinga ajya kwa Mudugudu ku mushaka amubwira ibibaye baragarukana ari nabwo' NJYAMANI ' wari hasi yahururijwe ajyanwa kwa muganga ku kigo nderabuzima, ahakurwa ajyanwa ku bitaro bya Remera Rukoma ari naho yaguye.

    Niyonsenga Fabien aka 'NJYAMANI', yakuwe aho yaterewe icyuma, atwawe cyangwa se ahetswe n'abamutabaye, bamujyana mu ngobyi ya Kinyarwanda bamugeza ku kigo nderabuzima cya Rukoma aho atatinze kuko yahise yoherezwa ku bitaro( biregeranye).

    Ku makuru y'abaturage bavugaga ko Iradukunda Joseline yaba ariwe wabaye intandaro ya Nyakwigendera, ubwe yagize ati' Ibyo ng'ibyo rwose baba bambeshyera. Kuhanywera ko bahanyweraga ariko ntabwo twagiranaga imishyikirano cyane, bose ntawe twagiranaga imishyikirano'.

    Kanda hano usome inkuru yabanje;Kamonyi-Rukoma: Yapfiriye kwa muganga nyuma yo guterwa icyuma azizwa umukobwa ucuruza akabari

    Iradukunda Joseline, ahamya ko gufunga akabari bitari uguhunga ibibaye, ahubwo byari mu mpamvu zo kujya gushaka abayobozi kuko yabahamagaye kuri terefone akababura. Avuga kandi ko gutinda kujya kuri Polisi na RIB byari impamvu y'ubwoba yabanje kugira ariko kandi ko yatekerezaga ko Mudugudu yagiye guhuruza yatanze amakuru akenewe.

    Munyaneza Théogène 

    Source : https://www.intyoza.com/2024/03/17/kamonyioperasiyo-ya-polisi-itaye-muri-yombi-abakekwaho-bose-kwica-niyonsenga-fabien-aka-njyamani/

  • Sude: Teta Diana na Jules Sentore bongeye gu… – #rwanda #RwOT

    Aba bombi bataramiye Abanyarwanda n'abandi mu gitaramo cyabereye mu Mujyi wa Stockholm muri Suède cyabaye mu ijoro ryo ku wa Gatandatu tariki 16 Werurwe 2024. Cyabaye mu rwego rwo kwizihiza Umunsi Mpuzamahanga w’Umugore.

    Iki gitaramo kandi bagihuriyemo n'umuhanzikazi w'icyamamare muri Suede, Caroline Af Ugglas wamenyekanye mu ndirimbo zirimo 'Hora mama ihorere none'. Buri mwaka ategura ibitaramo, aho inyungu ivuye igera kuri bamwe mu bana yahisemo yahurije hamwe babarizwa i Kigali.

    Nyuma y'iki gitaramo, Ambasaderi w'u Rwanda muri Suede yanditse ku rukuta rwa X agira ati 'Minisitere y'Ububanyi n'Amahanga ya Sweden, abafatanyabikorwa n'abahanzi Teta Diana na Jules Sentore n'icyamamare Caroline Af Ugglas bifatanyije n'abanyarwanda baba muri Sweden n'inshuti zabo basaga 400 kwishimira iyimakazwa ry'ihame ry'uburinganire muri Sweden no mu Rwanda.'

    Teta Diana yabwiye InyaRwanda, ko yakozwe ku mutima no kongera gutaramira abavukarwanda. Ati “Abanyarwanda ni beza, basa neza inyuma no ku mutima kandi iyo bahuye bigahebuza.”

    Yungamo ati “Nishimye cyane, abantu bitabiriye cyane, ‘salle’ yari yuzuye. Abanyarwanda baba hanze batewe ishema cyane n’aho bakomoka!” Imibare igaragaza ko iki gitaramo kitabiriwe n’abantu barenga 400.

    We na Jules Sentore babanjirijwe ku rubyiniro n’amatorero atandukanye, mu rwego ‘rwo gutoza umuco abato’. Teta avuga ko guhurira ku rubyiniro na Jules Sentore bifite igisobanuro kinini kuri we.

    Baherukaga guhurira ku rubyiniro, mu gitaramo uyu muhanzikazi yakoze mu 2022, agikoreye kuri Institut Français.

    Akomeza ati” Nishimiye cyane kwongera guhurira n’umuvandimwe wanjye Jules Sentore, nk’ibisanzwe twatanze ibyishimo kandi byinshi.

    Teta Diana yataramiye mu mu buryo bwa 'Live' mu gihe cy'isaha n'iminota 10'.  Ndetse, yafatanyije na Jules Sentore kuririmba indirimbo bakoranye bise 'Umpe akanya' yakunzwe na benshi mu bihe bitandukanye.

    Yanaririmbye indirimbo ye yise 'Agahinge' iri kuri Extended Play (EP) ye yise 'Umugwegwe'. Ati 'Performance' yayo yagenze neza cyane kandi irimo ubutumwa bureba twese abari mu Rwanda no mu mahanga.'

    'Nyamuneka mukunde umuco, muwutoze abato munawukundishe abandi. “Ni ngombwa ko abana b’abanyarwanda bakurira mu mahanga bumva neza aho bavuka.'

    Asanga igikorwa nk’iki gihuriza hamwe Abanyarwanda gikwiye gushyirwamo imbaraga. Kuko ari imwe mu nzira nziza yo gutoza abakiri bato umuco Nyarwanda. Ati “Muri make ndishimye cyane. Ni igikorwa cyiza gikwiye no gukomeza kandi kikaguka. Dufatanyije twese twabishobora.”

    Ku rubyiniro, Teta Diana yari kumwe n’ikipe ye imucurangira. Kandi avuga ko bishimiye rwose kubona urugwiro ruba muri community y’abanyarwanda.”

    Uyu muhanzikazi yavuze ko umusaruro w’igitaramo ari ukugaragaza ‘ibituranga bishingiye ku muco’. Ati “Ni ngombwa ko abana b’abanyarwanda bakurira mu mahanga bumva neza aho bavuka, bagatozwa imbyino n’ururimi gakondo bakarukurana.”

    Akomeza ati “Mboneraho gushimira Ambasade y'u Rwanda muri Suede, muri ndetse na 'Association' ihakorera izwi nka RWAS, barakora byiza cyane mu gusigasira umuco no kuwutoza.'

    “Kandi uko dukomeza gukorana twese ndetse n’abatuye mu bindi bihugu bya Scandinavia, ibi bintu tubikomeje byakwagura imbibi bikanashinga imizi. Ku giti cyanjye rwose nishimye kandi urugwiro ruba mu banyarwanda ubanza nta handi ruba.' Jules Sentore yisunze indirimbo ze zinyuranye yongeye gutaramira Abanyarwanda batuye muri Suede

    Umuhanzikazi Teta Diana yatangaje ko iki gitaramo cyari icy’akataraboneka ashingiye ku bwitabire ndetse n’uko cyagenze

     

    Abanyarwandakazi babarizwa muri Suede bigaragaje mu mideli inyuranye yahanzwe

     

    Ambasaderi Diane Gashumba [Uri iburyo] yagaragaje ko bishimiye uko iki gitaramo gishingiye ku muco cyagenze

      

    Itorero ribyinna Kinyarwanda ryasusurukije abantu muri iki gitaramo cyahujwe no kwishimira ubufatanye bw’u Rwanda na Suede 



    Teta Diana yagaragajwe urugwiro muri iki gitaramo nyuma yo gutanga ibyishimo

     

    Umuhanzikazi Carolyne uri mu bakomeye muri Suede yataramiye abanyarwanda mrui iki gitaramo


     

    Hatanzwe ibiganiro byagarutse ku ihame ry’uburinganire 


    Abarenga 400 bitabiriye iki gitaramo cyaririmbyemo Jules Sentore na Teta Diana




    Source : https://inyarwanda.com/inkuru/140882/suede-teta-diana-na-jules-sentore-bongeye-guhurira-ku-rubyiniro-mu-gitaramo-cyihariye-amaf-140882.html

  • Nyuma yo gusaba, Budandi Nice yasezeranye mu… – #rwanda #RwOT

    Aba bombi bahamije isezerano ry’abo ku wa Gatanu tariki 15 Werurwe 2024, mu Murenge wa Nyarugenge mu Mujyi wa Kigali.

    Bamaze igihe kinini bari mu munyenga w’urukundo. Ndetse, Ku wa Kane tariki 8 Werurwe 2024, Budandi Nice yasabe anakwa umukunzi we mu muhango witabiriwe n’abantu banyuranye, byabereye ‘Nature Kigali’ i Nyarutarama.

    Budandi Nice n’umukunzi we bazakora ubukwe, tariki 30 Werurwe 2024 nk’uko bigaragara ku mpapuro z’ubutumire.

    Nkusi Arthur niwe “Parrain”

    Aba bombi ni inshuti z’igihe kirekire. Umubano wabo wakomeye cyane nyuma y’uko bahuje imbaraga bashinga Kompani ya ‘Arthur Nation’.

    Binyuze muri iyi Kompanyi bazanye i Kigali ibyamamare mu ngeri zinyuranye z’umuziki, Cinema, urwenya n’ibindi.

    Nibo bagize uruhare mu gutumira itsinda rya Cassava i Kigali. Buri mwaka bakora ibitaramo by’urwenya bya ‘Seka Live’. Abakunzi b’abyo babitegereje muri Gicurasi 2024, kuko buri mwaka ari bwo bitangira.

    Ni ibitaramo byatumye abanyarwenya bafatwaga nk’inzozi bataramira i Kigali. Abarimo Anne Kansiime, Partrick Salvador, Eric Omondi, Dr Hillary Okello n’abandi bataramiye i Kigali.

    Byatumye impano z’abarimo Fally Merci, Rusine Patrick, Muhinde n’abandi zikomera ku buryo zihanzwe amaso muri iki gihe.

    Budandi Nice yasezeranye imbere y’amategeko n’umukunzi we Laurette Mbaguta uwabatesi
      

    Budandi yahuje imbaraga na Nkusi Arthur bashinga kompanyi bise ‘Arthur Nation’ itegura ibitaramo birimo na Seka Live

    Nkusi Arthur yashimiye mugenzi we Budandi ku bw’intambwe ikomeye yateye mu buzima bwe
    Budandi yahisemo Nkusi Arthur ‘Parrain’ we kubera ubushuti bw’igihe kirekire bubatse 

    Nkusi Arthur ari kumwe n’umugore we Fiona Ntarindwa ukorera CNBC

    Uhereye ibumoso: Nkusi Arthur, Budandi Nice, Laurette Uwabatesi ndetse na Fiona Muthoni
     

    Laurette Mbaguta uwabatesi witegura kurushinga n’umukunzi we Budandi Nice

    Aba bombi bahamije isezerano ry’abo ku wa Gatanu tariki 15 Werurwe 2024 mu Murenge wa Nyarugenge
    Budandi na Laurette baritegura gukora ubukwe tariki 30 Werurwe 2024 


    Ku wa 8 Werurwe 2024, Budandi Nice yasabye anakwa umukunzi we Laurette

    Imiryango ku mpande zombi yashyigikiye intambwe bateye 


    Source : https://inyarwanda.com/inkuru/140880/nyuma-yo-gusaba-budandi-nice-yasezeranye-mu-mategeko-numukunzi-we-nkusi-arthur-amubera-par-140880.html

  • FA Cup: Manchester United yakatishije itike y… – #rwanda #RwOT

    Ni umukino wabaye kuri iki Cyumweru Saa Kumi n’imwe n’iminota 30 ubera ku kibuga cya Manchester United,Old Trafford.

    Umukino watangiye Manchester United iri hejuru maze ku munota wa 2 gusa Aaron Wan Bissaka abona uburyo bwashoboraga kuvamo igitego ariko abapfusha ubusa.

    Ikipe y’amashitani atukura yakomeje kuyobora umukino ariko na Liverpool ikanyuzamo ikagera imbere y’izamu nkaho Mohammed Salah yahinduye umupira ariko uragenda unyura impande y’izamu gato cyane.

    Ku munota wa 8 gusa Manchester United yabonye igitego gitsinzwe na Scott Mc Tominay nyuma y’uko Alejandro Garnacho yari arekuye ishoti ariko Kelleher agerageje kurikuramo umupira wanga kuva imbere y’izamu.

    Nyuma yo gutsindwa ibintu byakomeje kuba bibi kuri Liverpool kubera ko kugera imbere y’izamu rya Manchester United ngo ibe yabona igitego cyo kwishyura byakomeje kugorana.

    Ku munota wa 38 Liverpool yabonye igitego gitsinzwe na Wataru Endo ariko umusifuzi asifura ko Mohammed Salah amuhaye umupira yari yaraririye.

    Mbere y’uko igice cya mbere kirangira Liverpool yakoze ibintu bidasanzwe itsinda ibitego 2 bitsinzwe na Alex Mac Allister ku mupira yarahawe na Darwin Nunez ndetse na Mohammed Salah ku ishoti rikomeye ryari rirekuwe na Darwin Nunez ariko Andre Onana arikuramo rihita rimusanga aho yarahagaze.

    Mu gice cya Kabiri Manchester United yaje ishaka uko yakwishyura gusa ikarushwa mu kibuga hagati bigatuma n’ubundi Liverpool iyirusha.

    Ku munota wa 58 Liverpool yabonye kufura yariteretse ahantu heza ku ikosa Bruno Fernandes yarakoreye ariko Alex Mac Allister ayiteye inyura hejuru y’izamu gato cyane.

    Ku munota wa 85 Manchester United yabonye igitego cyo kwishyura gitsinzwe na Antony wari winjiye mu kibuga asimbuye.

    Iminota 90 yarangiye amakipe yombi anganya ibitego 2-2 bituma hitabazwa iminota 30 y’inyongera kugira ngo hamenyekane ikipe ikomeza muri 1/2.

    Ku munota wa 105 Harvey Elliott wa Liverpool yatsinze igitego cya 3 ariko ku wa  112 Marcus Rashford ahita akishyura ahawe umupira na Scott Mc Tominay.

    Umukino ubura amasegonda make ngo urangire, Manchester United yabonye igitego cya 4 gitsinzwe na Amad Diallo ku mupira yarahawe na Alejandro Garnacho bihita binarangira ariyo ikomeje muri 1/2 cya FA Cup itsinze ibitego 4-3.

    Source : https://inyarwanda.com/inkuru/140881/fa-cup-manchester-united-yakatishije-itike-ya-12-itsinze-liverpool-mu-mvura-yibitego-140881.html

  • Junior Giti yaba yakurikije Chriss Eazy – #rwanda #RwOT

    Abakurikirana Junior Giti kuva mu mwaka ushize wa 2023, bakunze kumubonana n’umusore witwa Freddy Chiboo usanzwe ari umuhanzi. Akenshi aho ubonye ikipe ya Giti Business Group, Junior Giti na Chriss Eazy, uhabona n’uyu musore witwa Freddy Chiboo. Hari amakuru ko baba bamaze igihe bagerageza gukorana.

    Muri 2023 ubwo Junior Giti yari yagiye mu kiganiro Sunday Choice cya ISIBO TV, yajyanye n’uyu musore, abajijwe uwo ariwe avuga ko ari umuhanzi mwiza wo kwitega nubwo atigeze yerura. Ubwo yabazwaga niba yaba agiye kumukurikiza Chriss Eazy, ntiyemeye cyangwa ngo ahakane.

    Kuri uyu wa 17 Werurwe 2023 babinyujije ku mbuga nkoranyambaga zabo bashyize hanze amashusho bombi bafatanyije ibizwi nka ‘Collaboration’ bigezweho muri iyo minsi.

    Ni amashusho y’indirimbo iri hafi kujya hanze y’uyu Freddy Chiboo yise ‘Abatwin’.

    Umuhanzi Chriss Eazy ni umwe mu babaye aba mbere mu kwamamaza iyi ndirimbo, ibintu byazamuye ibitekerezo hibazwa niba uyu musore yarasinye muri Giti Business Group isanzwe ibarizwamo Chriss Eazy.

    Umunyamakuru wa InyaRwanda yagerageje kuvugisha aba bombi ngo hamenyekane icyihishe inyuma y’iyi mikoranire.


    Ubwo twahamagaraga Junior Giti ku murongo wa telefone ntibyakunze ko tumufatisha, icyakora tuganira na Freddy Chiboo.


    Mu kiganiro uyu musore yagiranye na InyaRwanda yahakanye amakuru avuga ko yamaze gusinya muri Giti Business Group avuga ko ari inshuti ze za hafi.

    Freddy Chiboo yagize ati “Oya ntabwo nasinye muri Giti Business Group ahubwo yaba Junior Giti na Chriss Eazy bose ni inshuti zanjye za hafi. Abantu benshi bakunze kubivuga ko nasinye muri iyi nzu ariko siko bimeze rwose, ni abantu banjye ariko ibyo gusinya byo nanjye mbyumva ku mihanda”.

    Freddy Chiboo abajijwe niba ibiganiro byarigeze kubaho, yariye indimi, ibintu bica amarenga ko ibiganiro byaba byarabayeho cyangwa se n’ubu bikaba bigikomeje.

    Yagize ati “Ibyo kuba ibiganiro byarabayeho cyangwa bitarabayeho byo ntabwoo ndibubivugeho kuko bibaye twazabitangaza, gusa icyo navuga ni uko turi inshuti kandi bamfasha igishoboka”.


    Amakuru agera ku InyaRwanda avuga ko aba bombi bamaze igihe baganira ku mikoranire ariko bakagorwa n’uko Junior Giti yifuza kubanza kugeza kure Chriss Eazy akaba atekereza ko abafatanyije ari babiri byatuma imbaraga zigabanuka.

    Freddy Chiboo yahakanye amakuru amujyana muri Giti Business Group ya Junior Giti

    Freddy Chiboo ari mu bahanzi batanga icyizere muri muzika Nyarwanda 

    Freddy Chiboo akunze kuba ari kumwe na Chriss Eazy ubarizwa muri Giti Business Group

    Chriss Eazy na Freddy Chiboo baba bari kumwe agatoki ku kandi 

    Junior Giti ashobora kuzasinyisha Chiboo 

    Source : https://inyarwanda.com/inkuru/140877/junior-giti-yaba-yakurikije-chriss-eazy-140877.html

  • Amafoto – Perezida Paul Kagame na Madamu Jeannette Kagame bifatanyije n'abatuye Umujyi wa Kigali gukora Siporo rusange izwi nka 'Car Free Day' #rwanda #RwOT

    Kuri iki cyumweru tariki ya 17 Werurwe 2024 nibwo Nyakubahwa  Perezida wa Repubulika Paul Kagame na Madamu Jeannette Kagame bifatanyije n'abatuye umujyi wa Kigali muri siporo ngaruka kwezi, izwi nka 'Car Free Day'.

    Iyi Siporo rusange imaze kumenyerwa n'abatari bake aho ikorwa ku cyumweru ikaba isanzwe ikorerwa mu bice bitandukanye by'uyu mujyi.

    Muri iyi Siporo ya none kandi yitabiriwe n'abandi banyacyubahiro batandukanye  barimo Umunyamabanga Uhoraho muri Miniteri ya Siporo, Niyonkuru Zephanie n'Umuyobozi w'Umujyi wa Kigali, Dusengiyumva Samuel.

    Ubwo iyi Siporo rusange izwi nka Car Free Day yatangizwaga muri Gicurasi 2016, byavuzwe ko igamije gushishikariza abatuye Umujyi wa Kigali gukunda no gukora siporo kuko bitanga ubuzima bwiza.

    Nubwo yatangiriye mu Mujyi wa Kigali, iyi siporo imaze kuba umuco ugenda ukura, cyane ko n'izindi ntara zigenda zitabira gukora iki gikorwa.

    The post Amafoto — Perezida Paul Kagame na Madamu Jeannette Kagame bifatanyije n'abatuye Umujyi wa Kigali gukora Siporo rusange izwi nka 'Car Free Day' appeared first on RUSHYASHYA.

    Source : https://rushyashya.net/amafoto-perezida-paul-kagame-na-madamu-jeannette-kagame-bifatanyije-nabatuye-umujyi-wa-kigali-gukora-siporo-rusange-izwi-nka-car-free-day/?utm_source=rss&utm_medium=rss&utm_campaign=amafoto-perezida-paul-kagame-na-madamu-jeannette-kagame-bifatanyije-nabatuye-umujyi-wa-kigali-gukora-siporo-rusange-izwi-nka-car-free-day

  • Ingabo zose za America zirukanywe igitaraganya ku butaka bwa Niger #rwanda #RwOT

    Umuvugizi wa Leta ya Niamey kuri uyu wa gatandatu yatangaje ko Niger isheshe amasezerano y'ubufatanye mu bya gisirikare yari ifitanye na America kandi ibi 'bihita byubahirizwa aka kanya'. Yasomye itangazo kuri televiziyo y'igihugu hashize umunsi umwe gusa itsinda rikomeye ry'intumwa za Amerika rivuye muri Niger.

    Iryo tsinda ryaje mu ruzinduko rw'iminsi itatu rigamije kuvugurura imikoranire n'agatsiko k'abasirikare kakoze 'coup d'état' ubu kari gukorana bya hafi n'Uburusiya. Iryo tangazo rivuga ko Leta yafashe umwanzuro wo 'gusesa aka kanya' amasezerano ajyanye n'ingabo za Amerika n'abakozi b'abasivile ba minisiteri y'ingabo za Amerika bari muri Niger.

    Umuvugizi wa Minisiteri y'ingabo za Amerika Matthew Miller yavuze ko Washington yamenye iby'iryo tangazo, kandi ryaje nyuma 'y'ibiganiro bibwizanya ukuri…ku mpungenge zacu' ku 'cyerekezo' cy'ako gatsiko kayoboye Niger.

    Abasirikare ba Amerika bagiye muri Niger mu butumwa bwo gufasha kurwanya imitwe y'abahezanguni yiyitirira Islam mu bihugu byo mu karere ka Sahel, cyane cyane Mali.

    Ingabo za Amerika zageze muri Niger kuva mu 2013 gufasha iz'Ubufaransa zahageze mu mwaka wari wabanje zije kurwanya iyo mitwe muri Mali.

    Amerika isanzwe ifite abasirikare bagera ku 1,000 muri Niger ku kigo cy'indege za drones kiri mu butayu cyubatswe ku gaciro ka miliyoni 100$, nk'uko bitangazwa n'ibiro ntaramakuru AFP.

    Ingendo zijya muri Niger kuri Amerika zabaye nke kuva muri Nyakanga(7) 2023 ubwo agatsiko ka gisirikare kafataga ubutegetsi ku nguru, kandi Washington yagabanyije inkunga yageneraga Niamey.

    Umwaka ushize nkuko BBC dukesha iyi nkuru ibivuga, Antony Blinken ukuriye ububanyi n'amahanga bwa Amerika yakoze urugendo muri Niger ngo agerageze guha imbaraga Perezida Mohamed Bazoum, wafashaga ibihugu by'iburengerazuba kurwanya imitwe y'abahezanguni yiyitirira Islam.

    Hashize amezi macye nyuma y'urugendo rwe, agatsiko k'abasirikare bakuriwe na General Tchiani kahise gahirika Bazoum ndetse kamufungira iwe mu rugo.

    Aka gatsiko k'abasirikare kahise gafata umurongo ukarishye wo kwitandukanya n'Ubufaransa bwahoze bukoroniza Niger, bituma ingabo z'Ubufaransa ziva muri iki gihugu zari zimazemo imyaka igera ku 10.

    Mu gihe cyashize Niger yakoranaga bya hafi na Amerika. Ariko kuba abafashe ubutegetsi ubu bakorana bya hafi n'Uburusiya, Moscow igakorana kandi bya hafi n'abasirikare bafashe ubutegetsi mu bihugu bituranyi bya Mali na Burkina Faso, byatumye ibihugu by'iburengerazuba bitakaza ijambo hano.

    intyoza

    Source : https://www.intyoza.com/2024/03/17/ingabo-zose-za-america-zirukanywe-igitaraganya-ku-butaka-bwa-niger/

  • Kamonyi-Rukoma: Yapfiriye kwa muganga nyuma yo guterwa icyuma azizwa umukobwa ucuruza akabari #rwanda #RwOT

    Ahagana ku i saa tatu z'ijoro ryo kuri uyu wa Gatandatu tariki 16 Werurwe 2024 mu Mudugudu wa Rushikiri, Akagari ka Murehe, Umurenge wa Rukoma, Akarere ka Kamonyi, uwitwa Niyonsenga Fabien w'imyaka 26 y'amavuko, yatewe icyuma na Hatangimana Fidèle w'imyaka 24, afatanije na Dushimimana Emmanuel bahimba'Kanusu' w'imyaka 19 y'amavuko. Uwatewe icyuma yajyanywe kwa muganga biranga biba iby'ubusa, agwa yo.

    Amakuru mpamo agera ku intyoza.com avuga ko imvano yo guterwa icyuma ari umukobwa witwa Iradukunda Joseline nyiri akabari banyweragamo, baramutonganira, bituma Niyonsenga Fabien asohorwa ku ngufu na Dushiminana Emmanuel aka'KANUSU', aramuterura amukubita hasi aribwo Hatangimana Fidèle yafataga icyuma bivugwa ko yagendanaga, akimutera mu gituza mu nsi y'iberi ahari umutima.

    Uyu mukobwa nyirabayazana, akibona ibibaye yahise asohora abari mu kabari ashyiraho ingufuri akizwa n'amaguru, na n'ubu twandika iyi nkuru aracyashakishwa kimwe na Hatangimana Fidèle. Ni mu gihe amakuru agera ku intyoza.com ahamya ko ku bufatanye bw'inzego za Polisi, DASSO, Inkeragutabara( RF) hamwe n'inzego z'ibanze, uyu Dushiminana Emmanuel aka'KANUSU' muri iki gitondo yafatiwe mu kagari ka Kagina, Umurenge wa Runda, aho yahise ashyikirizwa Polisi.

    Ubwo Niyonsenga Fabien yaterwaga icyuma, mu gihe yari agitaka atabaza yajyanywe kwa muganga ku kigo nderabuzima cya Rukoma, babonye batabasha ku muvura bahita bamwohereza ku bitaro bya Remera Rukoma binafatanye n'iki kigo nderabuzima ngo yitabweho ariko biranga, agwa yo.

    Umunyamabanga Nshingwabikorwa w'Umurenge waRukoma, Innocent Mandera yahamirije intyoza.com iby'uru rugomo rwaje kuvamo urupfu. Avuga ko ababigizemo uruhare bose bagishakishwa ku gira ngo bashyikirizwe RIB.

    Gitifu Mandera, yibutsa buri wese by'umwihariko abaturage ba Rukoma ko kwihanira bitemewe, ko atari byo. Asaba ko n'iyo haba hari impamvu ituma umwe cyangwa babiri bagirana ikibazo, ntawe ukwiye kujya mu mwanya wo kwihanira. Avuga ko kenshi bitangira ari intonganya bikarangira bivuyemo urugomo rukomeretsa kugera no kuvutsanya ubuzima. Yibutsa buri wese ugiranye ikibazo na mugenzi we kwegera inzego z'ubuyobozi zikabafasha gushaka igisubizo.

    Nyakwigendera, Niyonsenga Fabien akomoka mu karere ka Ngororero. Bivugwa ko yari umucumbitsi wishabikira, ndetse ngo akaba yari afite umugore babanaga bitemewe n'amategeko aho bari bamaranye amezi agera muri atanu.

    intyoza

    Source : https://www.intyoza.com/2024/03/17/kamonyi-rukoma-yapfiriye-kwa-muganga-nyuma-yo-guterwa-icyuma-azizwa-umukobwa-ucuruza-akabari/

  • Ni nde uhomba ? Bruce Melodie mu mayeri yo gu… – #rwanda #RwOT

    Niba ukurikirana imyidagaduro nyarwanda, ntabwo kuvuga ko Bruce Melodie ariwe muhanzi ugarukwaho cyane mu itangazamakuru byakugora. Bruce Melodie yagaragaje ko afite ubushobozi bwo kumara umwaka ari imbere mu binyamakuru.Ibi ubanza aribyo byamuteye gutera umugongo itangazamakuru muri rusange ahubwo agashinga irye.

    Kuri ubu umuhanzi Bruce Melodie abifashijwemo na 1:55 Am abarizwamo batangiye gushyira mu bikorwa byo kutavugisha itangazamakuru Nyarwanda ahubwo bashinga umuyoboro wa YouTube aho bazajya bibaza bakisubiza.

    Ibi byatangiye gushyirwa mu bikorwa mu ijoro ryo ku wa 15 Werurwe 2024 ubwo Bruce Melodie yahagarukaga mu Rwanda yerekeje muri Leta Zunze Ubumwe za Amerika aho kugirango aganirize itangazamakuru nk’uko byari bisanzwe ahubwo agakora ikiganiro kigashyirwa ku muyoboro wiswe 1:55 Am media.


    Ibi benshi batekereje ko nta kibazo kirimo wenda ko Bruce Melodie arakomeza nk’uko bisanzwe akazavugisha itangazamakuru ariko siko biri kuko uyu muhanzi yifuza ko bimukundiye atazongera gutangariza amakuru ye ahandi usibye mu bitaramo ndetse naho byamukundira akazajya akwepa itangazamakuru.


    Bruce Melodie ajya guhamya ibi, yabitangarije ku mbuga nkoranyambaga ze aho yagize ati “Ibishya byose n’amakuru yanjye yose, azajya aba ari aha honyine ‘1:55 Am media’”.


    Umunyamakuru wa InyaRwanda yagerageje kumenya koko niba Bruce Melodie atazongera kuganiriza itangazamakuru muri rusange.


    Umwe mu bantu babarizwa muri 1:55 AM utifuje ko dutangaza amazina ye yagize ati”Urumva Bruce Melodie aba afite amakuru menshi, rero abakire batekereje ko babibyaza umusaruro, azajya avugira kuri iriya shene yonyine  nawe barabimubwiye”.


    Yavuze ko kandi no mu bitaramo azajya ashaka uko akwepa.

    Ati”Ahantu honyine Bruce Melodie azongera kuvugira ni nko mu bitaramo kandi nabwo bikunze yajya ahunga kabisa. Coach Gael ashaka kubaka ibintu bya 1:55 AM ku buryo nta serivisi azajya apfa gusaba ahandi. Amakuru yose ni ukuzajya muyasanga kuri iriya channel, babonye Bruce Melodie agira amakuru menshi, bashaka kuyabyaza umusaruro”.


    Uyu yadutangarije ko atari na Bruce Melodie wenyine ahubwo n’abandi bahanzi bo muri 1:55 AM igihe bafite inkuru nini bazajya bazishyira kuri iriya shene.

    Ati “Erega si Bruce Melodie gusa kuko hari na Element, Ross Kana na Kenny Sol. Aba nabo igihe bazajya baba  bafite inkuru nini ni hano zizajya zicishwa “.

    Bruce Melodie werekeje muri Leta Zunze Ubumwe za Amerika yasize avuze ko The Ben atari umunyamwete, ibi akaba yarabitangarije kuri 1:55 AM Media

    Uyu niwo muyoboro wa 1:55 AM Bruce Melodie azajya avugiraho ibyo yifuza gutangaza

    Bruce Melodie ntagishaka kuvugisha itangazamakuru 

    Source : https://inyarwanda.com/inkuru/140866/ni-nde-uhomba-bruce-melodie-mu-mayeri-yo-gutera-umugongo-itangazamakuru-140866.html

  • Rayon Sports yatangaje urutonde rw’abantu bagize uruhare mu bujura bw’amatike ku mukino iyi kipe yakiriyemo APR FC – YEGOB #rwanda #RwOT

    Ikipe ya Rayon Sports yatangaje urutonde rw'abantu bagize uruhare mu bujura bw'amatike ku mukino iyi kipe yakiriyemo APR FC.

    Yatangaje ko aba bantu batawe muri yombi ariko bakarekurwa n'umukozi wa RIB station ya Rwezamenyo.

    Source : https://yegob.rw/rayon-sports-yatangaje-urutonde-rwabantu-bagize-uruhare-mu-bujura-bwamatike-ku-mukino-iyi-kipe-yakiriyemo-apr-fc/