Category: Uncategorized

Bwa mbere Nizereyimana Mirafa wakiniye amakipe atandukanye mu Rwanda no hanze ya rwo, yavuze ko amarozi ndetse no gusabwa kugira abo aha kuri duke yakoreye mu mupira ari bimwe byatumye asezera umupira imburagihe.

Uyu mukinnyi wakinaga mu kibuga hagati ubu akaba afite imyaka 28, kuva mu mpera za 2022 nta kipe afite kuva ubwo yatandukanaga na Kabwe Warriors yo muri Zambia.

Kuva icyo igihe umupira yakigendeye kure aho yahise ajya mu bindi bitandukanye n’umupira w’amaguru, ubu asigaye yibera i Burayi.

Mu kiganiro yagiranye na B&B FM, Mirafa yavuze ko yanyuze muri byinshi cyane byatumye asezera umupira, ndetse akaba ashengurwa no kuba awusoje atageze ku byo ababyeyi be bamusabye.

Ati 'Ntabwo ari ibintu biba byoroshye, gusa byantwaye igihe, byantwaye igihe no kubitekerezaho. Hari ibintu byinshi mba nibuka nanyuzemo mu rugendo rwanjye rwa ruhago, nkareba ibyo nari nariyemeje gukora nkaba nsoje umupira w’amaguru ntabigezeho, ni ikintu gikomeye ku muntu w’umugabo ufite ahazaza kandi wifuza kugera kuri byinshi, hakaba hari ibyo ababyeyi bansabye bikaba bitagenze nk’uko babinsabye gusa bazumva impamvu.'

Yakomeje avuga ko kimwe mu bintu byamubabaje cyane ari ukuba yaragendaga akeneyeho abantu ubufasha aho kumufasha ahubwo ugasanga intego ni ukurya na duke akura mu mupira.

Ati 'Impavu inteye gusezera nk’iri muto nk’uko abantu bakomeje kubivuga, ni ikibazo gikomeye, ni ibijyanye n’ubufasha mu mupira w’amaguru hamwe ukenera umuntu ko agufasha bitewe n’ibyo umukeneyeho, aho kugira ngo agufashe na we akakwereka kugira ngo agufashe hari icyo umugomba, icyo gito urimo gukura mu mupira mukigabane, ni ikintu cyambabaje.'

Ikindi yavuze akaba ari amarozi ari mu mupira w’amaguru muri rusange, yabonaga ko atabishobora ahitamo guhagarika gukina kuko ngo gukina si ko kazi konyine yanatungwa n’ibyo yize.

Ati 'Nkareba ibijyanye n’amarozi biba mu mupira w’amaguru bigatuma mvuga ngo uzi n’ibindi reka mbihagarike kuko kubaho neza ntabwo ari ugukina umupira gusa kuko ndacyari umunyeshuri nize amashanyarazi kandi nzi ko hari icyo bizamfasha ariko nsoje urugendo rwanjye rwa ruhago, gusa sinifuzaga kubirangiza ariko ku bantu babizi urwego nari ngezeho ukenera ubufasha, uba ukeneye abantu batari indyarya, badakeneye kurya kuri duke urimo kubona ahubwo ukenye abantu b’intungane biri mu bintu bitumye nsezera ruhago nkiri muto.'

Nizeyimana Mirafa yakiniye amakipe atandukanye mu Rwanda arimo Etincelles, Police FC, APR FC, Rayon Sports zo mu Rwanda, Zanaco FC na Kabwe Warriors zo muri Zambia.

Aheruka muri Kabwe Warriors

Yakiniye Zanaco FC muri Zambia

Police FC ni imwe mu makipe yagiriyemo ibihe byiza

Nizeyimana Mirafa yanyuze muri APR FC nubwo atahiriwe

Yanakiniye Rayon Sports

Rutahizamu w’umunya-Brazil wabiciye muri ruhago, Ronaldo Luiz Nazario, ku giti cye abona Lionel Messi ari we mukinnyi mwiza Isi yagize muri ruhago.

Impaka z’umukinnyi uhiga abandi ku Isi mu mupira w’amaguru hagati y’Umunya-Portugal, Cristiano Ronaldo ndetse n’Umunya-Argentine, Lionel Messi.

Ronaldo mu kiganiro aheruka kugirana na Daily Mail, ntabwo yari kubacika batamubajije kuri izi mpaka, nta kuzuyaza avuga ko kuri we ari Lionel Messi.

Ronaldo Nazario kandi uzahora yibukwa mu bakinnyi beza isi yagize, yanatoranyije ikipe y’abakinnyi 11 beza b’ibihe byose kuri we.

Uyu rutahizamu wakiniye amakipe nka Real Madrid na FC Barcelona zo muri Spain, Inter Milan yo mu Butaliyani watsinze ibitego 298 ndetse n’ibitego 62 mu ikipe y’Igihugu, iyi kipe ye yagaragayemo Critsiano Ronaldo na Lionel Messi.

Iyi kipe kandi igaragaramo amazina menshi y’abakinnyi bazwi biganjemo abakina basatira izamu.

11 beza kuri Ronaldo

Umunyezamu: Gianluigi Buffon (Italy)

Ba Myugariro: Paolo Maldini (Italy), Fabio Canavaro (Italy), Cafu (Brazil) na Roberto Carlos (razil)

Abakina Hagati}: Zinedine Zidane (France), Diego Maradona (Argentine) na Pele (Brazil)

Ba Rutahizamu: Lionel Messi (Argentine), Cristiano Ronaldo (Portugal) na Ronaldo Luiz Nazario (Brazil)

Ronaldo yagaragaje 11 beza b’ibihe byose kuri we

Ronaldo yavuze ko abona Messi ari mukinnyi mwiza w’ibihe byose

Imyidagaduro ni igikorwa cyagutse kiva ku muziki, imideli, kubyina bikagera no mu bindi bikorwa bitandukanye bihuza abantu benshi bitewe n'impamvu runaka  cyane mu gihe ari ibintu bituma babasha kwishima.

Kuri uyu munsi aho umwaka ugeze wa 2024 hari abakobwa bakomeje kuza imbere mu bari gukora ibintu bigarukwaho n'abatari bake cyangwa bigira ingaruka nziza muri rusange mu rugand rw'ubuhanzi.

Tukaba twabegeranirije abagezweho muri aya mezi y'intangiriro z'uyu mwaka.

Umukundwa Cadette

Muri iyi minsi yaba mu bitabazwa mu bikorwa byo kwamamaza ibikorwa bitandukanye, mu mashusho y'indirimbo ndetse no muri ba rwiyemezamirimo bato mu bishingiye ku mideli, izina Cadette riri hejuru.

Si aho gusa kuko ari no mu bakobwa bamaze kugira ibikorwa bifatika ku rubuga rwa YouTube aho agenda anyuza ibintu bitandukanye byiganjemo ibyerekeranye n'ubuzima bwe.

Uyu mukobwa kandi akaba atari muto muri iki gisata kuko yatangiye kwamamara muri 2019 ubwo yitabiraga irushanwa ry'ubwiza rya Miss Rwanda.

Ibi byamuciriye inzira zo kwinjira neza mu kibuga cy'imyidagaduro binyuranye n'abandi, abasha kuyibyaza umusaruro arema ibintu bishobora kuba byamufasha mu gihe kirekire.

Lynda Priya

Winjiye kuri ubu ku buzima burebana na sinema ndetse no mu birebana n'itangazamakuru, ukanajya mu bakobwa bari kubyaza umusaruro urubuga rwa YouTube, ari mu baza imbere.

Ubwamamare bw'uyu mukobwa bukaba bwaratangiye ubwo yitabiraga ubugira Kabiri irushanwa rya Miss Rwanda akanabasha kugenda yitwara neza kuko ari mu bakobwa babashije inshuro zose kugera mu mwiherero.

Inkuru z'urukundo rw'uyu mwari na Zaba Missedcall nabyo bikaba biri mu byarushijeho gutumbagiza izina rye n'umwuga akora wo gukuna filimi.

Judy

Mu bakobwa bafite ubuhanzi bwihariye bushingiye ku ikoranabuhanga ndetse imibare y'ababakurikira iba itumbagira ubutitsa, ari mu b'imbere kubera ubuhanga agira mu byo agenda asangiza abamukurikira ku mbuga zitandukanye.

Akaza kandi mu b'imbere bari kwitabazwa mu kwamamaza kompanyi zitandukanye, ibihangano by'abahanzi ndetse aheruka no kugaragara mu ndirimbo ya Shemi na Juno Kizigenza aho nk’uko byatangajwe yishyuwe ari hagati y'ibihumbi 400Frw na 700Frw.

Ari kandi mu bakinnyi ba filimi bishimirwa akanagira ibiganiro agenda yakiramo abantu banyuranye ku ngingo zitandukanye.

DJ CrushMu bakobwa basoje 2023 bakaninjirana amavuta muri 2024, DJ Crush ari muri abo aho yinjiye mu mwuga wo kuvanga umuziki abantu bakishimira ari benshi uko abikora.

Byanakurikiwe no gutangira kugirirwa icyizere mu birori n'ibitaramo bitandukanye aho atangaza ko yishimira uko bakuru be bakora akazi agaruka kuri DJ Sonia na DJ Ira ko aribo afatiraho urugero.

Saddie Vybez

Umwaka wa 2022 ni wo wasize u Rwanda rwungutse impano nshya mu gisata cyo kubyina, uwo akaba ari Saddie wasoreje amashuri mu Bushinwa mu ishami rya 'Mechanical Engineering'.

Kuva icyo gihe yatangiye kujya yitabazwa mu birori n'ibitaramo bitandukanye ndetse byumwihariko ibikomeye byose yagiye abibyinamo ndetse anatangira gufasha bagenzi be.

Bimwe mu bitaramo amaze kugaragaramo harimo Move Afrika aho ari mu bafashishije Kendrick Lamar ku rubyiniro.

France Mpundu

Yatangiye kwamamara mu bihe by'amarushanwa 'I'm The Future' rimwe mu irushanwa ryanyuzemo abanyempano bakomeye mu muziki akaba yaregukanye iya 2018.

Kuva icyo, gihe yinjiye mu mubare w'abahanzikazi bahanzwe amaso, ahita anagirana amasezerano na Future Record.

Mu ndirimbo uyu mukobwa amaze gushyira hanze harimo Darlin yakoranye na Yvan Buravan ndetse aheruka gushyira hanze iyitwa 'Nzagutegereza'.

Imikoranire ya Juno Kizigenza na France Mpundu basigaye bakunda kuba bari kumwe ahantu hatandukanye ikaba yarazamuye izina ry'uyu mukobwa.

Divine Uwa

Biragoye muri iyi minsi kuba wavuga abakobwa bari kubica mu myidagaduro kandi bagezweho muri 2024 ngo wirengagize Divine Uwa.

Uyu mukobwa yagize umwuga ibirebana no kubyina kimwe no kuyobora ababyinnyi yaba ku rubyiniro ndetse no mu ndirimbo.

Niba wararembeye iyitwa Confirm ya Danny Nanone anagaragaramo ari mu bayoboye imbyino zidasanzwe ziyigaragaramo.

Muri iyi minsi kandi akaba arimo yitabazwa mu bikorwa byo kwamamaza, anafite abana ari gufasha mu birebana n'umwuga wo kubyina.

Shema Sugar

Ari mu bakobwa bamaze kugwiza ibigwi mu banyamideli bifashishwa mu ndirimbo aho nyinshi mu z'abahanzi bakomeye mu Rwanda zigezweho azigaragaramo.

Shema wiga muri Kaminuza mu ishami ry’Itangazamakuru akaba agaragara mu ndirimbo z'abarimo Davis D mu yitwa Truth or Dare kimwe no mu Igitangaza ya Juno Kizigenza, Kenny Sol na Bruce Melodie.

Kuva yakwinjira mu kibuga cy'imyidagaduro mu ruhande rw'abakobwa bagaragara mu ndirimbo, akomeje kugenda yigwizaho igikundiro aho ari na we wegukanye Best Video Vixen muri Video Vixen Awards 2023.

 

Nyuma y’ibitaramo bibiri amaze gukorera muri Dove Hotel, umuramyi Jado Sinza yateye intambwe ikomeye akorera igitaramo muri Camp Kigali cyitabiriwe n’ibyamamare bitandukanye by’umwihariko abamenyekanye mu kuramya no guhimbaza Imana hano mu Rwanda harimo Aline Gahongayire, Tonzi, Gaby Kamanzi n’abandi.

Ni igitaramo Jado Sinza yakoze nyuma y’iminsi myinshi acyitegura ndetse anafatiramo amwe mu mashusho y’indirimbo ze ateganya gusohora mu minsi ya vuba aha. Muri iki gitaramo, Jado Sinza yagaragaje album ye yise “Inkuru y’agakiza” ndetse Umushumba Mukuru w’itorero rya ADEPR, Rev Isaie Nayizeye, ayiha umugisha.

True Promises nibo binjije abantu mu mwuka wo kuramya no guhimbaza Imana baririmba zimwe mu ndirimbo zabo zakunzwe cyane byumwihariko aha mu Rwanda harimo Ni umukiza, Umwami ni mwiza pe ndetse n’izindi nyinshi zitandukanye.

Nk’uko byari biteganyijwe, Bosco Nshuti yataramiye abitabiriye iki gitaramo ndetse anahishura ko mbere y’uko Jado Sinza yinjira mu mwuga wo kuririmba ariwe wamugiriye inama yo kuririmba icyo gihe akaba yari umucuranzi w’ingoma ariko ubwo Bosco Nshuti yateraga indirimbo akumva uburyo Jado Sinza ayiririmbye, yahise amugira inama yo kureka gucuranga ingoma akerekeza mu kuririmba.

Nyuma yo kuririmba ndetse agafata amashusho ya zimwe mu ndirimbo ze harimo n’iyo yakoranye na Zoravo, Umuramyi Jado Sinza yabererekeye Zoravo hanyuma ashyira mu bikorwa iryo yavugiye muri Dove Hotel ko aje yiteguye kwandikira amateka mu Rwanda.

Zoravo akigera ku rubyiniro, abantu benshi bahise begera imbere hanyuma batangira kubyinana n’uyu muhanzi wagaragaje imbaraga zidasanzwe ndetse ahita ahindura isura y’igitaramo n’ubwo cyari kigeze mu masaha akuze ariko byabaye byiza kuko abantu batahanye umugisha nk’uko Zoravo yari yarabitangaje.

Igitaramo “Redemption Live Concert” cy’umuramyi Jado Sinza cyagenze neza

Jado Sinza na Zoravo bahuriye mu gitaramo cy’amateka muri Camp Kigali

Jado Sinza yafatiyemo amashusho ya zimwe mu ndirimbo ze

Bosco Nshuti wagiriye inama Jado Sinza yo kuririmba, yaje kumufasha mu gitaramo “Redemption Live Concer”

Zoravo ukomoka mu gihugu cya Tanzania yatanze icyigwa ku bahanzi bo mu Rwanda

Zoravo yagaragaje imbaraga zidasanzwe ku rubyiniro

Zoravo yeretswe urukundo ruhambaye

Umushumba wa ADEPR Rwanda yasabiye umugisha Jado Sinza

Ibyamamare bitandukanye byitabiriye igitaramo “Redemption Live Concert”

Rev Isaie Ndayizeye yahaye umugisha album ya Jado Sinza

Ubwitabire bwari ku rwego rushimishije

Aline Gahongayire na Tonzi bitabiriye iki gitaramo cya Jado Sinza

Reba amashusho y’uko igitaramo “Redemption Live Concert” cyagenze.

“>

“>

AMAFOTO+VIDEO: Freddy Rwigema

Nk’uko byemejwe mu nama y’Inyeko Rusange ya Handball yabaye tariki ya 9 Werurwe 2024, shampiyona ya Handball mu bagabo izatangira mu mpera z’iki cyumweru.

Hazaba hakinwa umunsi wa mbere ndetse n’uwa kabiri, ni imikino izaba ku wa Gatandatu ndetse no ku Cyumweru.

Ni shampiyona izitabirwa n’amakipe 9; Gicumbi HT, Police HC, APR HC, ES Kigoma HC, ADEGI GITUGA HC, UR-Huye HC, UR-Rukara, Gorilla HC na Nyakabanda HC.

Tariki ya 23 Werurwe i Kigoma saa 9h00′, ES Kigoma izakina na UR Rukara, saa 10h30′ UR Rukara ikine na Police HC, saa 12h00′ Police HC izakina na ES Kigoma.

Muri ADEGI GITUZA, saa 9h00′ Adegi Gituza izakina na UR Huye, saa 10h30′ UR Huye ikine na APR HC mu gihe saa 12h00′ APR izakina na Adegi.

Kimisagara, saa 9h00′ Gorillas HC izakina Gicumbi, saa 10h30′ Nyakabanda HC ikine na Gorillas HC ni mu gihe saa 12h00′ Gicumbi izakina na Nyakabanda.

Bukeye bwa ho ku Cyumweru tariki ya 24 Werurwe 2024, i Kigoma guhera saa 9h00′ ES Kigoma izahura na UR Huye, saa 10h30′ UR Huye ikine na Nyakabanda ni mu gihe saa 12h00′ Nyakabanda izakina na ES Kigoma.

Muri Adegi Gituza, saa 9h00′ Adeigi izakina na Gicumbi, saa 10h30′ Gicumbi izacakirana na Police ni mu gihe saa 12h00′ Police izakina na Adegi.

Ku kibiga cya Kimisagara cya saa 9h00′ Gorillas na UR Rukara, saa 10h30′ UR Rukara izakina na APR ni mu gihe saa 12h00′ APR HC izakina na Gorillas.

Shampiyona iratangira mu mpera z’iki cyumweru

Sibomana Patrick Papy usanzwe ukinira ikipe ya Gor Mahia yo muri Kenya, ni umwe mu bakinnyi 13 umutoza w’Ikipe y’Igihugu Frank Spittler yasize atajyanye muri Madagascar.

Uyu mutoza w’Umudage muri rusange yari yahamagaye abakinnyi 38 azifashisha mu mikino ibiri ya gicuti uwa Madagascar tariki ya 22 Werurwe na Botswana tariki ya 25 Werurwe 2024 imikino yose izabera muri Madagascar.

Muri aba bakinnyi yahamagaye akaba yahisemo kuzifashisha abakinnyi 25 abandi 13 arabasezerera.

Muri abo bakinnyi yahamagaye 14 bakina hanze y’u Rwanda, akaba muri bo yahisemo gusiga Sibomana Patrick Papy wa Gor Mahia muri Kenya.

Mu ijoro ryakeye ni bwo Amavubi yahagurutse mu Rwanda anyura Addis Ababa muri Ethiopia aho yahuriye n’abakinnyi nka Mutsinzi Ange Jimmy ukina muri Norway, Byiringiro Lague ukina muri Sweden na Mugisha Bonheur ukina muri Tunisia bakaba bahugurukanye muri Ethiopia berekeza muri Madagascar.

Abandi bakinnyi nka Djihad Bizimana ukina muri Ukraine, Imanishimwe Emmanuel ukina muri Maroc, Nshuti Innocent ukina muri America, Sahabo Hakim na Maxime Wenssens bakina mu Bubiligi bazahurira na bagenzi ba bo muri Madagascar.

Uretse Sibomana Patrick Papy wa Gor Mahia abandi bakinnyi umutoza yasize barimo umunyeza Hakizimana Adolphe na myugariro Akayezu Jean Bosco ba AS Kigali.

Kanamugire Roger, Nsabimana Aimable na Bugingo Hakim ba Rayon Sports, Ruboneka Bosco, Niyomugabo Claude, Kwitonda Alain Bacca na Niyibizi Ramadhan ba APR FC.

Mugenzi Bienvenue wa Police FC, Nsengiyumva Samuel na Iradukunda Simeon ba Gorilla FC.

Kwitonda Alain Bacca wa APR FC yasezerewe

Nsengiyumva Samuel wa Gorilla FC

Niyibizi Ramadhan wa APR FC

Umunyezamu Hakizimana Adolphe wa AS Kigali ari mu basigaye

Iradkunda Simeon wa Gorilla FC

Sibomana Patrick Papy wa Gor Mahia na Niyomugabo Claude wa APR FC na bo basezerewe

Mugenzi Bienvenue wa Police FC

Ruboneka Bosco na we kuri iyi nshuro ntiyahiriwe

Bugingo Hakim wa Rayon Sports na we yeretswe umuryango

Akayezu Jean Bosco wari uhamagawe bwa mbere na we yasigaye

Iki giraramo cyabereye ahitwa 'Centro Franco-Moçambicano' cyabaye mu rwego rwo kwizihiza Umunsi Mpuzamahanga w'Ururimi rw'Igifaransa nk'uko byatangajwe na Ambasade y'u Rwanda muri Mozambique.

Umuryango w’Ibihugu bikoresha ururimi rw’Igifaransa (Francophonie) ugizwe n’ibihugu 88. U Rwanda rwawinjiyemo ugishingwa mu 1970. Kuri ubu umunyarwanda Louise Mushikiwabo ni we Munyamabanga Mukuru w’uyu muryango.

Imibare igaragaza ko ururimi rw’igifaransa magingo aya rukoreshwa n’abasaga Miliyoni 300 ku isi.

Iki gitaramo cy'iri serukiramuco cyaranzwe no kugaragaza umuco w'ibihugu bitandukanye, kandi Nirere Shanel yagihuriyemo ku rubyiniro n'itorero ribyina Kinyarwanda 'Ikirezi', ndetse n'abahanzi barimo Wazimbo wo muri Mozambique na Mélanie Pérès wo mu Birwa bya Maurice.

Muri Kamena 2019 ni bwo u Rwanda rwafunguye ku mugaragaro Ambasade yarwo muri Mozambique, igihugu kibamo Abanyarwanda benshi. Mozambique yo yafunguye Ambasade yayo mu Rwanda muri Mata 2022.

Mozambique ibarizwamo Abanyarwanda benshi barimo abakora ubucuruzi, abanyeshuri bigaga 'Master's' mu bijyanye no gucukura no gutunganya ibikomoka kuri gaz na petroli n'abandi.

Ku wa Gatanu tariki 02 Gashyantare 2024, nibwo Amb. Col (Rtd) Donat Ndamage, yashyikirije Perezida w'igihugu cya Mozambique, Filipe Jacinto Nyusi, inyandiko zimwemerera guhagararira u Rwanda muri icyo gihugu. Amb. Col (Rdt) Donat Ndamage, yahawe izi nshingano tariki 14 Ukuboza 2023.

U Rwanda na Mozambique bifitanye umubano mwiza, unashingiye ku masezerano ibihugu byombi byashyizeho umukono, arimo ajyanye n'umutekano no kurwanya ibyihebe, ubuhinzi, ubuhahirane, mu Butabera n'ibindi.

Ibihugu byombi byanasinye amasezerano akuraho 'Visa' ku bafite impapuro z'inzira (passports) z'ibihugu byombi. Ibi byakozwe mu rwego rwo koroshya urujya n'uruza rw'abantu.

Ku wa 23 Gashyantare 2024, Minisiteri y'Ingabo z'u Rwanda yatangaje ko Perezida Filipe Nyusi yasuye Ingabo z'u Rwanda zikorera mu karere ka Ancuabe mu Majyepfo y'intara ya Cabo Delgado iri mu Majyaruguru ashyira uburasirazuba bwa Mozambique.

Perezida Nyusi yashimiye ingabo z'u Rwanda n'ingabo za Mozambique ku 'kugarura amahoro muri ako karere no gukaza umurego mu guhagarika ibikorwa by'abakora iterabwoba bagana mu majyepfo' y'icyo gihugu.

Nirere Shanel yaririmbye muri iri serukiramuco ryabereye muri Mozambique, nyuma y'uko atanze ikiganiro, ku wa 8 Werurwe 2024 cyari gishamikiye ku Nama ya “Forbes Leading Women Summit 2024” Africa cyabereye muri hoteli Emperor's Palace i Johannesburg muri Afurika y'Epfo.

Inama yahujwe n'umuhango wo gutanga ibihembo, aho Umunyarwandakazi Clare Akamanzi uyobora NBA Africa yahawe igihembo cya Africa Investment Catalyst na Forbes ashimirwa uruhare yagize mu ishoramari ku Mugabane wa Afurika.

Ahageze imbere y’ibihumbi by’abantu bitabiriye iyi nama, Nirere Shanel yisunze urumi rw’Icyongereza yumvikanishije ihohoterwa yakorewe na Se.

Yavuze ko atabasha kwibuka neza ‘inshuro Data yatumye ndara hanze'. Ni urugendo atekereza rwatangiye ubwo yari afite imyaka 12 y’amavuko cyangwa se munsi y’aho akiri umwangavu. Ati “Ntabwo mbasha kubikurura neza.”

Umuhanzikazi Nirere Shanel yataramiye ku nshuro ye ya mbere muri Mozambique mu iserukiramuco ryari ribaye ku nshuro ya kane
Ambasade y’u Rwanda muri Mozambique yatangaje ko iki gitaramo cyahuje abantu mu ngeri zinyuranye hizihizwa Umunsi Mpuzamahanga w’Ururimi rw’Igifaransa
Iki gitaramo cyahujwe no kugaragaza umwihariko w’amafunguro anyuranye ategurirwa muri iki gihugu

Kurangwa n’amagambo y’urudaca bikunze kugaragara kuri bamwe bagahinduka ikibazo kuri rubanda baba baganira mu ruhame, baba batanga ibitekerezo ku byanditswe cyangwa igihe bashaka kugaragaza imbamutima zabo, benshi bakabatahana mu mitwe.

Abahanga bavuga ko kuvuga cyane bigabanya ibikorwa, n’intekerezo zari kwifashishwa umuntu agenzura ibyo akwiye n’ibyo adakwiye kuvuga. Ibi bigaragarira ku bahubuka mu mvugo bakomeretsa abandi kuko batahaye agahenge ubwonko ngo buhitemo igikwiye.

Byatangajwe ko abantu bagira amagambo menshi bazitira ubushobozi bw’ubwonko bubayobora igihe bavuga,  bakajya bavuga ibibonetse byose birimo ibyiza bicye.

Nti twakwirengagiza imvugo ivuga ko ibikorwa biruta amagambo  cyangwa ya yindi ivuga ko ibikorwa byivugira.

Bivuze ko ushobora kuvugisha ibikorwa. Ibi nanone bishobora gukorwa mu buryo bwiza cyangwa bubi kuko ibikorwa bishobora kuba byiza cyangwa bibi.

Uwavuze ko kuvuga bikwiye gukorwa mbere yo gutekereza ku bigiye gusohoka mu kanwa, yacaga amarenga aburira abantu kwita ku ngaruka ziterwa n’ibyo tuvuga.

Bavuga ko kuvuga vuba vuba nta kuruhuka bituma umuntu akora amakosa menshi ndetse agatakaza ibyishimo bitangwa n’ibiganiro.

Aba bantu barangwa no gukomeretsa abandi kenshi bakagenda batakaza ubumuntu ku buryo no mu ruhame badatinya kuvuga ibibi ku bandi babangiriza ibyishimo.

Ubumuntu ntibugaragazwa no kuvuga ibibi ku bandi ahubwo ubumuntu ni ukubabazwa nabyo ukabiceceka kubwo kugira impuhwe zabo ukabahishira.

Ikinyamakuru Healthline kivuga ko kwihutira kuvuga bitera kwibagirwa ingingo nyamukuru ivugwaho ukaba wavuga ibidakenewe. Bamwe bakunze kugira ibitekerezo bifatika igihe babinyujije mu nyandiko kuko kwandika bikorana n’intekerezo cyane.

Bavuga ko kuvugana ubwitonzi byongerera ubwonko gukora neza umuntu akareba kure mu byo avuga, agasohora ijambo rikenewe.

Ijambo ribi ryasohotse ntirigaruka ahubwo rigusiga icyasha rigatuma abantu bakugirira urwango, cyangwa bakagufata nk’umuntu utagira ibitekerezo byakubaka abandi.

Abashakashatsi bavuze ku biranga aba bantu bagira amagambo menshi:

.Kumva ko nta mpamvu yo guceceka

. Kugorwa no kubika ibanga cyangwa andi magambo atagenewe imbwirwaruhame

.guhakana ko bagira amagambo 

.Kuba nyambere mu gutanga ibitekerezo no ku byo badasobanukiwe ndetse n’ibindi.

Ingaruka igera kuri bamwe barangwa n’amagambo menshi zirimo kugira agahinda gakabije gaterwa no guhindurwa igicibwa mu bandi bahunga ibibavamo bibasharirira. Abashakashatsi bakomoka muri Kaminuza ya Michigan batangaje ko kuvuga vuba vuba cyangwa kurangwa n’amagambo menshi bitera umubyibuho ukabije ku bangavu n’ingimbi kuva ku myaka 13 kugeza ku myaka 16.

Bamwe batekereza ko gusohora ibibarimo no kuvuga ubushobozi bifitemo bituma bakundwa bakubahwa mu bandi, nyamara kwivugira make ugakora cyane bituma uhugira mu bifite akamaro.

Kuvuga amagambo menshi bituma ubwonko budakora akazi kabwo neza ngo bukuyobore kuko bwo bukora neza igihe umuntu atuje akaganira nabwo

Impera z’icyumweru zagendekeye neza bamwe mu banyarwanda bakina hanze ya rwo aho nk’igitego cya Djihad Bizimana cyafashije ikipe ye kwegukana amanota 3 igumya gukubana ishaka umwanya wa mbere.

Bamwe mu bakinnyi bakina hanze bahamagawe mu Mavubi, hari n’abamaze kuhagera, gusa hari abari bataraza, muri iyi nkuru tugiye kurebera hamwe uko abakinnyi b’abanyarwanda bakina hanze bitwaye mu mpera z’icyumweru gishize.

Bizimana Djihad – Kryvbas FC

Igitego kimwe rukumbi cya Bizimana Djihad ku munota wa 90, cyahesheje intsinzi ikipe ye ya Kryvbas FC mu cyiciro cya mbere muri Ukraine ku wa Gatandatu w’icyumweru gishize ubwo batsindaga Kolos. Ubu iyi kipe iri ku mwanya wa 2 n’amanota 43 inganya na Shakhtar Donetsk ya mbere.

Mutsinzi Ange Jimmy – FK Jerv

Mutsinzi Ange Jimmy yabanje mu kibuga ku wa Gatanu w’icyumweru gishize mu mukino wa gicuti ikipe ye ya FK Jerv mu cyiciro cya gatatu muri Norway yatsinzwemo na Bryne 4-3.

Hakim Sahabo – Standard Liege

Hakim Sahabo ku wa Gatandatu yinjiye mu kibuga asimbura mu mukino wa shampiyona y’icyiciro cya mbere mu Bubiligi ikipe ye ya Standard de Liège yanyagiyemo Eupen 4-0.

Nyuma y’umunsi wa 30 iyi kipe iri ku mwanya wa 10 n’amanota 34, Union Saint-Gilloise ya mbere ifite 70.

Maxime Wenssens – Royale Union Saint-Gilloise

Ntabwo umunyezamu w’umunyarwanda, Maxime Wenssens yari muri 18 bifashishijwe n’ikipe ya Union Saint-Gilloise mu mukino w’icyiciro cya mbere mu Bubiligi iyi kipe yaraye inganyijemo na Antwerp 1-1. Iyi kipe iyoboye urutonde n’amanota 70 nyuma y’umunsi wa 30.

Byiringiro Lague – Sandvikens IF

Ejo hashize ku Cyumweru, Sandvikens IF ya Byiringiro Lague na Yannick Mukunzi , yatsinze na Sollentuna 4-3 mu mukino wa gicuti bitegura shampiyona y’icyiciro cya kabiri muri Sweden. Byiringiro Lague yabanje mu kibuga. Yannick ntiyari muri 18.

Kwizera Olivier – Al Kawkab

Kwizera Olivier yahindukiye inshuro 4 zose mu mukino wa shampiyona y’icyiciro cya 3 muri Saudi Arabia ubwo ikipe ya Al Kawkab yatsindwaga ba Najran 4-1 ku wa Gatanu w’icyumweru gishize. Al Kawkab ni iya 10 n’amanota 34, Neom ya mbere ifite 62.

Meddie Kagere – Namungo FC

Ntabwo Meddie Kagere yari muri 18 bakoreshejwe na Namungo FC ku wa Gatanu w’icyumweru gishize muri shampiyona y’icyiciro cya mbere muri Tanzania batsinzwemo na Singida Fountain Gate 1-0. Ubu iyi kipe ni iya 9 n’amanota 23, Young Africans ya mbere ifite 52.

Nshuti Innocent – One Knoxville

Nshuti Innocent yabanje mu kibuga ejo hashize akina iminota 71 mu mukino w’umunsi wa mbere wa shampiyona y’icyiciro cya 3 muri Amerika ikipe ye ya One Knoxville yatsinzemo Charlotte Independence 2-1. Ubu iyi kipe iri ku mwanya wa 3 Lexington ya mbere ifite 4.

Haruna Niyonzima – Al Ta’awon

Ntabwo ku wa Kane w’icyumweru gishize tariki ya 14 Werurwe 2024 byagendekeye neza Haruna Niyonzima na Al Ta’awon mu cyiciro cya mbere muri Libya aho batsinzwe na Al Nasr 1-0. Al Nasr ubu ni yo ya mbere n’amanota 34, Al Ta’awon ni iya 5 n’amanota 24.

Imanishimwe Emmanuel Mangwende – FAR Rabat

Ejo hashize ku Cyumweru, Imanishimwe Emmanuel Mangwende yari ku ntebe y’abasimbura mu mukino ikipe ye ya FAR Rabat mu cyiciro cya mbere muri Maroc yatsinzemo OC Safi 1-0 . Iyi kipe ubu ni yo iyoboye urutonde n’amanota 58 nyuma y’umunsi wa 24.

Rwatubyaye Abdul – FC Shkupi

Ku wa Gatandatu w’icyumweru gishize tariki ya 16 Werurwe 2024, Rwatubyaye Abdul yabanje mu kibuga mu mukino w’umunsi wa 24 wa shampiyona y’icyiciro cya mbere muri Macedonia aho ikipe ye yanganyije ubusa ku busa na Voska Sport. Ubu iyi kipe ni iya 2 n’amanota 48. Struga ya mbere ifite 51.

Rafael York – Gefle IF

Rafael York yari yabanje mu kibuga mu mukino wa gicuti bitegura shampiyona y’icyiciro cya kabiri muri Sweden ikipe ye ya Gefle IF yatsinzwemo na Östersunds 1-0 ku wa Gatandatu w’icyumweru gishize.

Kwizera Olivier ntiyahiriwe n’impera z’icyumweru

Djihad yatsinze igitego cy’ingenzi