Category: Uncategorized

Ni igikorwa cyabaye ku wa 20 Mata 2024, cyitabirwa n'abahagarariye ibihugu byabo muri Tanzania n'abanyarwanda batuye n'abakorera muri icyo gihugu.

Amb. Harerimana yashimiwe imikoranire yamuranze mu gihe gito yari amaze muri Tanzania ndetse anashimira umuryango w'Abanyarwanda batuye n'abakorera muri icyo gihugu ku rukundo bakunda u Rwanda.

Yashimye kandi Guverinoma y'u Rwanda ikomeje kumugirira icyizere mu nshingano zo kubaka igihugu.

Yongeye kwibutsa umuryango w'Abanyarwanda batuye muri iki gihugu, ko hari amatora y'Umukuru w'Igihugu n'ay'Abadepite ategerejwe muri Nyakanga 2024, abasaba kwitegura no kuyagiramo uruhare, imigendekere yayo ikazaba myiza.

Mbere y'igikorwa cyo kumusezeraho muri Tanzania, Ambasaderi Harerimana yahuye n'abahagarariye ibihugu bya Afurika abasezeraho anabashimira uko bamufashije kwisanga muri bo mu gihe gito.

Yanabashimiye kandi ko bifatanyije n'Abanyarwanda mu bikorwa byo kwibuka ku nshuro ya 30 Jenoside yakorewe Abatutsi, anizeza ko imikoranire myiza n'ubwo bushuti bagiranye bizakomeza.

Inama y'Abaminisitiri yateranye ku wa 27 Gashyantare 2024 iyobowe na Perezida Paul Kagame, yagennye Gen Patrick Nyamvumba, nka Ambasaderi w'u Rwanda muri Tanzania usimbura Fatou Harerimana wari muri uwo mwanya.

Kuri uwo munsi kandi nibwo Ambasaderi Fatou Harerimana yegenwe nk'uhagararira u Rwanda muri Pakistan.

Ambasaderi Harerimana yavuye muri Tanzania nyuma y'amezi make kuko yashyikirije Perezida Samia Suluhu Hassan impapuro zimwemerera guhagararira u Rwanda muri icyo gihugu muri Nzeri 2023 asimbuye John Mirenge.

Harerimana afite uburambe bw'imyaka irenga 20 mu Nteko Ishinga Amategeko, Yabaye Umusenateri ndetse yanabaye Komiseri muri Komisiyo y'Igihugu y'Amatora.

Ambasaderi Fatou Harerimana yashimiwe n’abo bakoranaga

Ambasaderi Harerimana yasabye abanyarwanda baba muri Tanzania gukomeza kugira uruhare mu bikorwa biteza imbere u Rwanda

Yahawe impano zinyuranye ashimirwa akazi keza yakoze

Muri Nzeri 2023 nibwo yashyikirije Perezida Suluhu impapuro zimwemerera guhagararira u Rwanda

Umuhanzi ukomoka muri Uganda, Jose Chameleone yavuze ko guhanika ibiciro mu gitaramo afite muri Kanama 2024 impamvu nta yindi ari uko bijyanye n’ibigwi afite mu muziki.

Iki gitaramo kizaba tariki ya 31 Kanama 2024, nta gihindutse kikaba kizabera mu Mujyi wa Kampala muri Serena Hotel.

Yatunguye benshi ubwo itike ya cyo ya make yayishyiraga ku madorali 100 ni ukuvuga agera ku bihumbi 130 by’amafarana y’u Rwanda, ni mu gihe itike ya menshi (ya VVIP) ari ibihumbi 3 by’amadorali, hafi miliyoni 4 z’amafaranga y’u Rwanda.

Uyu muhanzi umaze kubaka izina mu muziki, yavuze ko abafana b’umuziki baba bifuza kubona nk’ibyo babona mu bitaramo bya Davido ariko bishyuye amashilingi ibihumbi 20, ngo bagomba kwishyura menshi kugira ngo babone byiza.

Ati “abantu baribaza impamvu naciye amadorali 100? Murashaka kubona ibintu nk’ibyo mubona mu gitaramo cya Davido mu gihe mwishyuye amashilingi ibihumbi 20. Nk’umufana ugomba kwishyura mesnhi kugira ngo umuhanzi na we akore ibyiza.”

Mu kiganiro BBS TV, Chameleone yavuze ko ibi biciro bijyanye n’izina afite mu muziki.

Ati “turashaka ko ibi bizaba ari ukwishimira ibyo nakoze muri uru ruganda. Hari abantu bumva ko nakabaye mbyishimira nkiriho. Ririya joro nzaba nishimira itafari nashyize mu ruganda rw’umuziki.”

Yakomeje agira ati “turahenze kurusha n’ibyo bicioro.”

Jose Chameleone uzuzuza imyaka 45 mu kwezi gutaha, azakora iki gitaramo mu rwego rwo kwizihiza isabukuru ye ndetse no kwishimira ibyo yagezeho mu muziki.

Jose Chameleone yahanitse ibiciro by’igitaramo cye

Myugariro wa APR FC, Niyigena Clement yavuze ko kuba abafana baragiye bagaragaza kutishimira umutoza Thierry Froger bo nk’abakinnyi babona ari umutoza mwiza wabafashije kwegukana shampiyona.

Ni nyuma yo kwegukana igikombe cya shampiyona ya 2023-24 ku wa Gatandatu w’icyumweru gishize bamaze gutsinda Kiyovu Sports 1-0.

Nubwo iyi kipe y’Ingabo z’Igihugu yegukanye igikombe, gusa abafana b’iyi kipe bagiye bagaragaza kutishimira imikinire y’umutoza w’umufaransa uyitoza, Thierry Froger, ni kenshi bagiye baza ku kibuga bamuririmba.

Niyigena Clement yabwiye ikinyamakuru ISIMBI ko kuba abafana batakwishimira umutoza ari ibintu bisanzwe cyane.

Ati “Umutoza kuba abafana batari bamwishimiye, buri wese aba agomba gukora akazi ke kagenda neza agashimira Imana kuko ibyo byose ni ibintu biba mu mupira kandi n’abatoza ntabwo batungurwa nabyo, kuba abafana batamwishimira nta gitangaza cyaba kirimo.”

Yakomeje avuga ko nk’abakinnyi nta kibazo bafitanye n’umutoza kuko ari umutoza mwiza n’ikimenyi menyi abafashije kwegukana igikombe.

Ati “Hagati yacu nk’abakinnyi n’umutoza nta kibazo cyari gihari. Umutoza yaradufashije cyane none se ntubona ko atwaye igikombe.”

Agaruka ku cyabafashije kwegukana igikombe cya shampiyona, yavuze ko ari ugushyira hamwe bakinjira mu mukino bashaka amanota 3.

Ati “Icyadufashije nta kindi uko buri mukino wose twawugiyemo twumva ko dushaka amanota 3 nubwo hari imikino itagiye igenda nk’uko twabiteguye, ariko iyo wagiye ufite umutima ushaka byose birangira ubigezeho.”

Gusa na none yahamije ko ari umwaka w’imikino bagowe cyane no kubura abafana ku kibuga kuko batumvaga uburyo bayoboye urutonde rwa shampiyona ariko abafana ntibaze.

Ati “Urebye kutitabira rimwe na rimwe kw’abafana ku kibuga kandi rimwe na rimwe ugasanga ni twe turi ku mwanya wa mbere, ntabwo uba ubyiyumvisha, ni yo mwaba muri mu bihe bibi ariko muri ikipe ya mbere rimwe na rimwe hari igihe byacaga abakinnyi intege, mukavuga ngo niba tugeze mu bihe bibi abafana bakaba bataza kubashyigikira ngo ni byo bihe bibi birangire, ntabwo byari sawa.”

Iki gikombe APR FC yegukanye cyabaye igikombe cya 5 yegukanye yikurikiranya, kiba igikombe cya 22 cya shampiyona y’u Rwanda yegukanye mu mateka ya yo.

Niyigena Clement yavuze ko abakinnyi nta kibazo bafitanye n’umutoza

Isimbi avuga ko umugabo yasabye Imana ari we yamuhaye kuko Shaul Hatzir yujuje 98% by'ibigize umugabo yahoraga asaba Imana.

Aba bombi bavuga ko bahuye bwa mbere tariki 15 Mutarama 2018 kuri Radisson Blu Hotel & Kigali Convention Centre aho Isimbi yari ari ategereje taxi imutwara nyuma y'uko inama yari avuyemo irangiye.

Icyo gihe Shaul Hatzir nawe yahageze ari mu nama itandukanye n'iyo Isimbi yari avuyemo.

Ubwo uyu mugabo yari mu biganiro yabonye ku ruhande umukobwa usa neza arangazwa n'ubwiza bw'uyu munyarwandakazi abanza kugira ngo akomoka muri Ethiopia.

Shaul Hatzir wari umaze ibyumweru bibiri mu Rwanda, uko yakomezaga kwitegereza Isimbi rimwe na rimwe bagahuza amaso, ibitekerezo byamubanye byinshi muri we yibaza uko aramuvugisha dore ko muri we yatekerezaga ko atazi n'Icyongereza.

Ati ' Duhura hari mu 2018 nari mu kazi , nari mfite inama muri Kigali Convention Centre ubwo inama yari irangiye nibwo namubonye yicaye hafi ubwo yari arangije inama , naravuze nti uyu mukobwa arasa neza , numvise avuga Icyongereza ndabyishimira kuko ni ubwa mbere nari mbibonye mu Rwanda umukobwa mwiza uzi Icyongereza.'

'Naravuze nti icyo ngomba gukora ni ukwirekura nkajya kumuvugisha, ni uko byagenze ndagenda mubaza izina, natekerezaga ko ari Umunya-Ethiopia kubera ukuntu ajya gusa nabo.'

Nyuma bakomeje kuganira , ahita amusaba niba bazasangira ibya nimugoroba ku munsi ukurikiyeho.

Isimbi yavuze ko yatunguwe no kumenya ko umugabo uje amugana akomoka muri Israel.

Ati 'Inama nari ndimo yari yarangiye kare nicaye ntegereje Taxi nyuma nkabona umugabo uri kunyitegereza tugahuza amaso , nyuma aza kumvugisha ambaza niba ndi umunyarwandakazi , mubajije aho akomoka ambwira ko ari muri Israel ndikanga nti 'Yee , Yesu!, ni uko twakuhuye.'

Nyuma yo guhuza urugwiro bamaze no kumenyana aba bombi bahisemo kubana mu nzu imwe iri muri Vision City, tariki 4 Kanama 2018 bategura gahunda zo kurushinga.

Mu 2019 nibwo Shaul Hatzir yambitse impeta Isimbi Model , nyuma yaho mu Ugushyingo uyu mugabo yajyanye umukunzi we muri Israel bajya gusura umuryango we no kumutembereza ahantu hatandukanye hanze y'u Rwanda.

Mu 2021 nibwo baguze inzu yabo bwite banasezerana mu mategeko , nyuma yaho tariki 20 Gashyantare 2022 bakora ubukwe bwabereye muri Kigali Convention Centre.

Shaul Hatzir avuga ko kuba yarasanze Isimbi afite umwana w'umuhungu ntacyo bimutwaye ndetse uwo mwana amufata nk'uwe kandi ajya avugana na se w'uwo mwana babanye neza.

Ati 'Ni umusore mwiza, twarahuye turaganira , nta kibazo dufitanye kuko ni iby'agaciro cyane ku mwana kumenya se wamubyaye , ni byiza mu buzima kandi turabyishimira, uko bakomeza kuvugana ni ko natwe bitugendekera neza, nishimira ko ari mu buzimwa bwe.'

Isimbi avuga ko akivugana n'umusore babyaranye ndetse iyo adahari umugabo we amuhamagara uri hafi akajya gufata umwana ku ishuri kandi ko bose babanye neza.

Kugeza ubu Shaul Hatzir na Isimbi nta mwana bafitanye gusa bizera ko urubyaro rutangwa n'Imana ndetse ubu batangiye urugendo rwo gushaka uko byarana abana babiri bifuza.

Shaul Hatzir avuga ko yakuruwe n'ubwiza bwa Isimbi ndetse bamaze kumenyana yakunze uburyo ari umugore ukomeye, uzi icyo ashaka, akunda uburyo azi kwirwanaho n'uburyo ahora ashishikajwe no kwiga ibintu bishya.

Akomeza avuga ko ibi bituma bahuza cyane ndetse yizera ko ari we mukunzi yateguriwe n'Imana.

Isimbi avuga ko umugabo we ari umuntu utuje cyane ukunda kuzamura ibiganiro bya by'ubucuruzi cyane 99% by'ubuzima bwe ni byo aba yibereyemo.

Shaul Hatzir ahora ashaka kumenya ikinyarwanda kugira ngo abone uko avugana na Nyirakuru wa Isimbi kuko ari umubyeyi yishimiye cyane, amwita 'Mukeceru cyangwa Nyogokuru.'

Uko Imiryango yakiriye urukundo rwabo

Shaul avuga ko abavandimwe be babiri asigaranye bishimiye Isimbi cyane ku buryo bashyigikiye urukundo rwabo ndetse bamukunda cyane.

Ati 'Umuryango wanjye warabyishimiye , umuryango nsigaranye ni abavandimwe babiri , umwe yageze hano yaramukunze cyane , bose ariko baramukunda , twarabasuye muri Israel , Isimbi ni umwe mu bagize umuryango, ku ruhande rwanjye byari byiza.'

Isimbi we avuga ko umuryango we utatunguwe no kubona agiye kubana n'umugabo w'umunyamahanga.

Ati'Ku ruhande rwanjye ntabwo batunguwe no kubona ko umugabo wanjye ari umunyamahanga , ikintu cyabatunguye ni uko bamenye ko akomoka muri Israel.'

'Umuryango wanjye wari uziko nyuma yo kubyara umwana ntazashyingiranwa n'umugabo w'imbere mu gihugu rero ntabwo byabatunguye, icyabatunguye ni uko ari uwo muri Israel igihugu bavuga ko ariho Yesu akomoka.'

Gusa Nyirakuru wa Isimbi ntiyishimiye uko Isimbi yari agiye kubana na Shaul Hatzir mbere y'uko bakora ubukwe yibwiraga ko umugabo amubeshya gusa nyuma yaje kubyakira.

Isimbi na Shaul Hatzir bafitanye imishinga itandukanye bakora mu Rwanda ndetse hari n'iyo bateganya gukorera mu mijyi irimo Monaco na Dubai.

Isimbi ni umwe mu banyamideli bakomeye mu Rwanda, yitabiriye ibitaramo byo kumurika imideli binyuranye ndetse ni n'umwe mu bagaragaye mu ndirimbo 'Closer' yahuriyemo Meddy, Uncle Austin na Yvan Buravan.

Isimbi avuga ko ubwo hafatwaga amashusho y'iyi ndirimbo, umugabo we yari hafi aho ndetse adateze kwibagirwa uko yahoraga amwitegereza akamusekera ndetse amwereka ko bari kumwe muri icyo gikorwa cyamaze hafi umunsi wose.

Shaul Hatzir avuga ishusho ahora yibuka kuri Isimbi ari uburyo yari ameze ubwo bari basohokanye ku nshuro ya mbere, nyuma y'umunsi umwe bahuye.

Shaul Hatzir avuga ko akunda kurya cyane isombe yatekewe n’umugore we Isimbi

Isimbi avuga ko adateze kwibagirwa igihe umugabo we yirengagije urugendo yari afite rwihutirwa akabanza kujya kumureba ubwo yari mu ifatwa ry’amashusho y’indirimbo ‘Closer’

Shaul Hatzir na Isimbi Vestine bahuye mu 2018, bashyingiranwa mu ntangiriro ya 2022

Isimbi na Shaul Hatzir bahuye bwa mbere mu 2018 bahuriye Radisson Blu Hotel & Kigali Convention Centre aho Isimbi yari ari avuye mu nama

Shaul Hatzir avuga ko akibona Isimbi bwa mbere yaketse ko akomoka muri Ethiopia

Shaul Hatzir anezezwa n’umubano afitanye n’umuhungu wa Isimbi ndetse n’umugabo babyaranye

Isimbi avuga ko umugabo yasabye Imana ari we yamuhaye kuko Shaul Hatzir yujuje 98% by’ibigize umugabo yahoraga asengera

Impera z’icyumweru gishize, zasize Yannick Mukunzi nyuma y’imvune yari amaranye amezi 2 yagarutse mu kibuga ndetse n’ikipe ye ya Sandvikens IF mu cyiciro cya kabiri muri Sweden ibona intsinzi, gusa hari bamwe mu bakinnyi bakina hanze y’u Rwanda bitagenze neza.

Muri iyi nkuru tugiye kurebera hamwe uko abakinnyi b’abanyarwanda bitwaye mu mpera z’icyumweru gishize.

Bizimana Djihad – Kryvbas FC

Bizimana Djihad yakinnye iminota 90 mu mukino w’umunsi wa 25 wa shampiyona y’icyiciro cya mbere muri Ukraine Chornomorets Odesa 2-1 Ku wa Gatandatu w’icyumweru gishize. Iyi kipe iri ku mwanya wa 3 n’amanota 51, Shakhtar Donetsk ya mbere ifite 55.

Hakim Sahabo – Standard Liege

Hakim Sahabo yakinnye iminota 64 ku wa Gatandatu w’icyumweru gishize tariki ya 20 Mata 2024 mu mukino wa shampiyona ikipe ye ya Standard de Liège yanganyijemo na Westerlo 3-3.

Muri iyi shampiyona y’amakipe arwana no kuguma mu cyiciro cya mbere mu Bubiligi, Standard de Liège iri ku mwanya wa 5 mu makipe 6 n’amanota 20.

Maxime Wenssens – Royale Union Saint-Gilloise

Ntabwo umunyezamu w’umunyarwanda, Maxime Wenssens yari muri 18 bifashishijwe n’ikipe ya Union Saint-Gilloise mu mukino w’icyiciro cya mbere mu Bubiligi iyi kipe yaraye itsinzwemo na Club Brugge 2-0. Mu itsinda ry’amakipe ahatanira igikombe, iyi kipe iri ku mwanya wa 3 n’amanota 35, Anderlecht ya mbere ifite 38.

Gitego Arthur – AFC Leopards

Gitego Arthur ejo hashize ntabwo yari mu bakinnyi bifashishijwe ku mukino batsinzwemo 1-0 na Gor Mahia ya Sibomana Patrick Papy winjiye mu kibuga asimbura na Emery Bayisenge utari mu bakinnyi bifashishijwe. AFC Leopards iri ku mwanya wa 8 n’amanota 38 ni mu gihe Gor Mahia ya mbere ifite 57.

Mugisha Bonheur Casemiro – AS Marsa

Ku wa Gatanu w’icyumweru gishize, AS Marsa ya Mugisha Bonheur Casemiro yasezereye CS Sfaxien muri 1/16 cy’igikombe cy’Igihugu (Tunisian Cup), ni nyuma yo kuyitsinda 1-0.

Imanishimwe Emmanuel Mangwende – FAR Rabat

Ejo hashize ku Cyumweru tariki ya 21 Mata 2023, Imanishimwe Emmanuel Mangwende yabanje ku ntebe y’abasimbura mu mukino ikipe ye ya FAR Rabat mu cyiciro cya mbere muri Maroc yasuyemo inatsinda 3-1 Maghreb Association Sportive de Fès. Iyi kipe ubu ni yo iyoboye urutonde n’amanota 64.

Meddie Kagere – Namungo FC

Hari ku wa Gatatu w’icyumweru gishize ubwo Namungo ya Meddie Kagere mu cyiciro cya mbere muri Tanzania yatsindaga Coastal Union 1-0. Meddie Kagere yabanje ku ntebe y’abasimbura.

Nyuma y’umunsi wa 20, Namungo FC iri ku mwanya wa 8 n’amanota 26, Yanga ya mbere ifite 58.

Ntwali Fiacre – TS Galaxy

Umunyezamu mpuzamahanga w’Umunyarwanda ukinira ikipe ya TS Galaxy yo muri Afurika y’Epfo mu cyiciro cya mbere, Ntwari Fiacre yari yabanje mu kibuga mu mukino wa shampiyona baraye batsinzwemo na Stellenbosch 2-1. Iyi kipe iri ku mwanya wa 6 n’amanota 34 ku rutonde ruyobowe na Mamelodi na 53.

Rwatubyaye Abdul – FC Shkupi

Rwatubyaye Abdul yabanje mu kibuga mu mukino w’umunsi wa 28 wa shampiyona y’icyiciro cya mbere muri Macedonia aho ikipe ye ejo hashize ku Cyumweru banganyije ubusa ku busa Sileks. Ubu iyi kipe ni iya kabiri n’amanota 55, Struga ya mbere ifite 58.

Yannick Mukunzi & Byiringiro Lague- Sandvikens IF

Nyuma y’imvune yari amaranye iminsi, Yannick Mukunzi yari yagarutse mu bakinnyi Sandvikens IF yifashishije ku wa Gatandatu w’icyumweru gishize tariki ya 20 Mata 2024 mu mukino w’umunsi wa 4 wa shampiyona y’icyiciro cya kabiri muri Sweden batsinzemo Östers IF 1-0. Yannick Mukunzi yinjiye mu kibuga ku munota wa 86, Byiringiro Lague bakinana ntari mu bakinnyi bifashishijwe. Nyuma y’umunsi wa 4 iyi kipe iri ku mwanya wa 8 n’amanota 6, Landskruna ya mbere ifite 8.

Rafael York – Gefle IF

Ntabwo York Rafael yari mu bakinnyi ba Gefle IF baraye batsinzwe na Oddevold 2-1 mu mukino w’umunsi wa 4 w’icyiciro cya kabiri muri Sweden. Iyi kipe iri ku mwanya wa 14 n’amanota 2, Landskruna ya mbere ifite 8.

Manzi Thierry – Al Ahli Tripoli

Manzi Thierry ntabwo yakinnye umukino w’umunsi wa 17 wa shampiyona y’icyiciro cya mbere muri Libya mu itsinda rya B aho ikipe ye ya Al Ahli Tripoli yatsinzwe na Al Madina 1-0 ku wa Gatandatu w’icyumweru gishize.

Haruna Niyonzima – Al Ta’awon

Haruna Niyonzima ejo yabanje mu kibuga akina iminota 45 mu mukino wa shampiyona y’icyiciro cya mbere mu itsinda A muri Libya ikipe ya Al Ta’awon ikipe ye yanganyijemo na Al Akhdar 1-1. Ubu iyi kipe iri ku mwanya wa 4 n’amanota 25, Al Nasr ya mbere ifite 34.

Mutsinzi Ange Jimmy – FK Jerv

Mutsinzi Ange Jimmy, myugariro mpuzamahanga w’umunyarwanda ejo hashize ku Cyumweru yabanje mu kibuga akina iminota yose mu mukino ikipe ya FK Jerv mu cyiciro cya gatatu muri Norway yatsinzemo Hødd 2-1. Nyuma y’umunsi wa 3 w’iyi shampiyona, FK Jerv iri ku mwanya 4 n’amanota 6 inganya na Brattvåg IL ya mbere.

Nyuma y’amezi 2 Yannick Mukunzi yari yagarutse mu kibuga

Papy na Gor Mahia batsinze AFC Leopards ya Gitego Arthur

Djihad Bizimana n’ikipe ye bacyuye amanota 3

Hakim Sahabo na Standard de Liège ntibyagenze neza

Gikongoro hiciwe Abatutsi bwa mbere mu Ukuboza 1963, bivugwa bwa mbere n'abanyamahanga bakoraga mu Rwanda, abamisiyoneri bari ku Cyanika, Kaduha no ku Kigeme.

Ibinyamakuru birenga 20 byo mu Bufaransa, u Bwongereza, u Bubiligi, Vatican, ba Ambasaderi b'u Bubiligi n'u Bufransa bari mu Rwanda, Umuryango Mpuzamahanga utabara Imbabare (CICR) n'abandi na bo icyo gihe bahamije ko ubwo bwicanyi ari Jenoside yakorewe Abatutsi.

Minisitiri Dr Bizimana Jean Damasce kuri uyu wa 21 Mata 2024 ubwo yari yifatanyije n'ab'i Nyamagabe mu Kwibuka ku nshuro ya 30 Jenoside yakorewe Abatutsi yatangaje ko mu 1963 abagabo, abagore n'abana b'Abatutsi bishwe batemwe, batwikirwa mu nzu, batabwa mu nzuzi za Rukarara na Mwogo n'ubundi bugome.

Nyuma y'aho ngo Guverinoma n'Inteko Ishinga Amategeko batangiye guhakana no gupfobya iyo jenoside.

Ati 'Ipfobya n'ihakana rya Jenoside rifite inkomoko mu yahoze ari Gikongoro. Guverinoma n'Inteko Ishinga Amategeko yari iyobowe na Makuza Anastase uvuka ku Gikongoro na Minisitiri w'Ububanyi n'Amahanga Lazaro Mpakaniye, ku mabwiriza ya Perezida Kayibanda batangiye gahunda ndende yo kuyobora ibikorwa by'ipfobya n'ihakana ry'iyi Jenoside yo hambere.'

Minisitiri Dr Bizimana yagaragaje ko Gikongoro [ubu yavuyemo uturere twa Nyamagabe na Nyaruguru] ari hamwe mu bice byiciwemo Abatutsi benshi mu 1994.

Akarere ka Nyamagabe kari ku mwanya wa kabiri mu turimo imiryango myinshi yazimye mu gihe aka Nyaruguru kari ku mwanya wa gatandatu.

Yasobanuye akamaro ko kuba Urwibutso rwa Murambi rushyinguyemo Abatutsi barenga ibihumbi 50 rwarinjijwe mu Murage w'Isi wa UNESCO, byerekana ko Isi yashyize imbaraga mu kubungabunga amateka ya Jenoside yakorewe Abatutsi.

Yasabye abaturage gufata neza urwibutso rwabo, kurusura no kwigisha abato amateka baharanira ko icyasenye ubumwe bw'Abanyarwanda kigatera Jenoside gicika burundu mu Rwanda.

Abayobozi batandukanye n’abaturage b’i Nyamagabe bunamiye Abatutsi barenga ibihumbi 50 bashyinguye mu Rwibutso rwa Jenoside rwa Murambi

Dr Bizimana Jean Damascene yavuze ko ipfobya n’ihakana rya Jenoside bikomoka ku Gikongoro

Iyi nzu yayishyikirijwe kuri uyu wa Gatandatu tariki ya 20 Mata 2024. Yayubakiwe mu mafaranga yakusanyijwe n'abanyeshuri ba IPRC Gishari kongeraho ayakusanyijwe mu bakozi bayikoramo, bagamije gukora ibikorwa byo gufasha muri ibi bihe byo kwibuka Jenoside yakorewe Abatutsi mu 1994.

Inzu yahawe yubatswe n'abanyeshuri, ishyirwamo bikoresho birimo intebe, ibitanda, matola, igikoni kirimo amakaro na televiziyo. Yubakiwe kandi ikiraro n'ibindi byinshi byatwaye asaga miliyoni 15 Frw.

Mukagasana yavuze ko yishimiye inzu yubakiwe nyuma yo kumara imyaka myinshi aba mu nzu mbi yavaga cyane.

yavuze ko uretse inzu yubakiwe yari asanzwe anafite inka yahawe muri gahunda ya Girinka imufasha kubona amata ndetse ikanamumara irungu.

Ati 'Ubu ngiye kuba mu nzu nziza nkinga nkakingura, nkanagira intebe nziza n'igitanda, mbese nta kibazo mfite meze neza ndashimira ubuyobozi bwacu.'

Muzungu Théoneste wari uhagarariye Ibuka mu Murenge wa Mwulire, yavuze ko uyu mukecuru yabaga mu buzima bubi bikiyongeraho ko nta mwana n'umwe afite bose bishwe muri Jenoside yakorewe abatutsi.

Yavuze ko bishimiye uburyo yubakiwe inzu nziza ikomeye izamufasha kuba ahantu heza hajyanye n'igihe.

Umuyobozi wa IPRC Gishari, Dr Mwitende Gervais, yavuze ko bahisemo kubakira uyu mukecuru kuko ari incike.

Yavuze ko bakusanyije amafaranga mu banyeshuri n'abakozi ba IPRC Gishari bahitamo kumwubakira bakoresheje abanyeshuri babo biga ubwubatsi.

Ati 'Uru ni urugero rw'ibishoboka ko n'abandi bantu, ibindi bigo byose si ngombwa gutegereza Leta yadushyizeho ngo tuyihagararire tuyifashe kubakira no gufata mu mugongo abababaye. Uku niko kwibuka twiyubaka.'

Umuyobozi w'Akarere ka Rwamagana wungirije ushinzwe imibereho myiza y'abaturage, Mutoni Jeanne, yashimiye abakozi n'abanyeshuri ba IPRC Gishari ku bikorwa byiza bakoze byo kuremera uwarokotse Jenoside yakorewe abatutsi.

Yavuze ko Akarere gafite abantu benshi gakeneye gufasha ariko ko iyo habonetse abafatanyabikorwa bituma hafashwa abantu benshi mu gihe gito.

Uyu muyobozi yasabye uwubakiwe inzu kimwe n'abandi benshi bagenda bashyikirizwa inzu bubakirwa kuzifata neza.

Ubuyobozi bwa IPRC Gishari buvuga ko bubaze amafaranga yubatse iyi nzu, ibikoresho byo mu nzu baguze ndetse n'imbaraga z'abanyeshuri bayubatse bifite agaciro ka miliyoni 15 Frw.

Inzu yubakiwe n'abarimu abanyeshuri ba IPRC Gishari ifite ibyumba bitatu ikanagira igikoni

Abayobozi barimo uwa IPRC Gishari ndetse n'Umuyobozi w'Akarere ka Rwamagana wungirije ushinzwe imibereho myiza nibo batashye iyi nzu

Mukagasana avuga ko nubwo yiciwe abana be bose kuri ubu yishimira ko ari mu gihugu kirimo amahoro kandi kimwitayeho

Mukagasana yahawe intebe nziza, avuga ko yajyaga abura aho yicaza abashyitsi

Mukagasana yahawe ibitanda biriho na matola

Umutungo uzagurishwa ugizwe n'inyubako yubatswe ku butaka bufite UPI:1/01/09/03620 bubaruye kuri Assinapol Rwigara na Mukagendamanyi Adeline uherereye mu Mudugudu w'Ishema, Akagali ka Kiyovu, Umurenge wa Nyarugenge mu Karere ka Nyarugenge.

Ni ubutaka bufite ubuso bungana na metero kare 1.867 bwagenewe agaciro ka 1.478.000.000 Frw.

Uyu mutungo utimukanwa uzatezwa cyamunara ni umwe muri ine umuryango wa Rwigara ufite mu Kiyovu.

Itangazo rya cyamunara rigaragaza ko uyu mutungo utimukanwa ugiye kugurisha ngo hashyirwe mu bikorwa icyemezo cy'urukiko rw'ubucuruzi cyo mu Ugushyingo 2021.

Rikomeza rigaragaza ko bigiye gukorwa mu kwishyura umwenda Equity Bank Plc (yaguze Cogebanque) iberewemo nyuma yo gutsinda urwo rubanza.

Umuhesha w'Inkiko w'umwuga, Me Habimana Vedaste yamenyesheje abantu bose ko guhera tariki ya 19 Mata 2024, Saa yine za mu gitondo kugeza ku wa 26 Mata 2024 aribwo cyamunara izaba.

Iki cyemezo cya cyamunara gishingiye ku mwenda iyahoze ari Cogebanque iberewemo n'umuryango wa Rwigara ariko wo ukabitera utwatsi.

Iyo banki yavugaga ko mu 2014, uruganda rw'itabi rwa Premier Tobacco Company Ltd (PTC) rwa Rwigara rwatse inguzanyo muri ruza gusigaramo umwenda ungana na miliyoni zisaga 349 Frw.

Umugore wa Rwigara Assinapol, Mukangemanyi Adeline yakunze kwamagana iby’iyi cyamunara

Byabereye mu Mudugudu wa Nyundo, Akagari ka Karambi, Umurenge wa Kivumu mu Karere ka Rutsiro ku wa 21 Mata 2024.

Nyakwigendera yari yavuye mu rugo agiye kuvoma amazi yo guha inka, agezeyo ajya kwiga koga ahita arohama.

Salom Niyonkuru, Umunyamabanga Nshingwabikorwa w'agateganyo mu Murenge wa Kivumu yabwiye IGIHE ko aya makuru bayamenye ahagana saa Tanu z'amanywa.

Ati 'Twamenyesheje Polisi y'u Rwanda, ishami rishinzwe umutekano wo mu mazi (Marine) ihita itabara umurambo wabonetse 13h30 ukuwemo na marine. Urwego rw'Igihugu rw'Ubugenzacyaha RIB narwo rwahise ruhagera, rusuzuma umurambo kugira ngo hamenyekanye icyateye urupfu mbere y'uko umurambo ushyingurwa.'

Bikorimana avuka mu Murenge wa Ruhango. Yakoraga akazi k'ubushumba.

Umuvugizi wa Polisi y'U Rwanda mu Ntara y'Iburengerazuba, asaba abaturage kwirinda koga batambaye umwambaro ubarinda kurohama (life jacket) akavuga ko n'iyo waba usanzwe uzi koga imbwa zishobora kugufatira mu mazi ukaba warohama.