Category: Uncategorized

MINEMA yagaragaje ko Ibiza byagaragaye cyane birimo inkongi z'umuriro zabaye inshuro 29, imyuzure yabaye inshuro 19, kuriduka kw'amazu 89, inkangu 35, inkuba inshuro 37, kuriduka kw'ibirombe 10, imvura nyinshi inshuro zirindwi ndetse n'inkubi y'umuyaga inshuro 62.

Uturere twibasiwe n'ibiza cyane muri izi ntangiriro za 2024 turimo Akarere ka Gakenke kahuye n'ibiza inshuro 27, hakurikiraho Gasabo na Ngororero zombi zibasiwe n'ibiza inshuro 19, naho Nyarugenge yahuye n'ibiza inshuro 17.

Ibi MINEMA ibitangaje mu gihe kigo cy'Igihugu cy'Iteganyagihe, Meteo Rwanda, giherutse gutangaza ko hateganyijwe imvura idasanzwe mu ntangiriro za Gicurasi 2024, ndetse abaturiye imigezi bakaburirwa ko hitezwe imyuzure ishobora kwibasira imigezi imwe n'imwe, bagasabwa kwitwararika.

Ni mu gihe kandi Minisiteri ishinzwe ibikorwa by'ubutabazi, MINEMA, yari yatangaje ko yakoze ubusesenguzi hirya no hino mu gihugu, igasanga ahantu hagera kuri 326 hashobora kwibasirwa n'ibiza bituruka ku mvura iteganyijwe muri ibi bihe by'Itumba.

Umuyobozi Mukuru ushinzwe igenamigambi no gukumira ibiza muri MINEMA, Adalbert Rukebanuka, yatangarije kuri televiziyo y'igihugu ko hari ingamba zatangiye gushyirwa mu bikorwa mu rwego rwo kurinda ubuzima bw'abaturage, zirimo no kubimura.

Uyu muyobozi yasobanuye ko nyuma y'ibyavuye muri ubu busesenguzi, imiryango irenga 4800 yari ituye muri utu duce yamaze kwimuka.

Umuyobozi ushinzwe ishami ry'iteganyagihe muri Meteo Rwanda, Anthony Twahirwa, yasobanuye ko iyo ubushyuhe bwo mu nyanja y'u Buhinde ari bwinshi, akarere u Rwanda ruherereyemo kaba gafite ibyago byo kwibasirwa n'imvura nyinshi.

Yagize ati 'Ibyo mu rurimi rw'Icyongereza tubyita El Nino. Iyo dufite El Nino, ni cya gihe dufite ubushyuhe bwo mu nyanja bwiyongereye, amazi akayayuka, akajya mu kirere, ubuhehere bw'umwuka mwinshi noneho bukagusha ya mvura nyinshi.'

Rukebanuka yasabye abantu batuye mu maregeka kudategereza ko inzu zabo zibagwaho, ahubwo ko bakwiye kwimuka. Abubakishije ibikoresho bitaramba bo basabwe gusaba uruhushya rwo kuzivugurura, zigakomera.

Yagize ati 'Witegereza ko iyo nzu ikugwaho, ahubwo saba uruhushya uyivugurure, uyikomeze. Ibyo biratuma biguhe icyizere ko yaryama agasinzira.'

Umwaka ugiye gushira Uburengerazuba, Amajyaruguru n'Amajyepfo y'igihugu byibasiwe n'ibiza byatewe n'imvura nyinshi, byatwaye ubuzima bw'abarenga 130. Mu 4800 bamaze kwimuka, harimo abavuye muri ibi bice.

U Rwanda rwibasiwe n’ibiza inshuro 288 kuva umwaka wa 2024 watangira

Mu Ugushyingo 2021, REB yasinyanye amasezerano na ba rwimeyezamirimo bane yo kugemura mudasobwa, projecteur n'indangururamajwi mu mashuri atandukanye.

Muri aya masoko harimo aho bagiye bagiye birengagiza amasezerano ya RISA ajyanye no kugura ibikoresho by'ikoranabuhanga byagombaga kujyanwa mu mashuri.

Kuri uyu wa 2 Gicurasi 2024 ubwo REB yisobanuraga ku makosa yagaragaye mu mitangire y'amasoko, Umuyobozi w'Ishami rishinzwe gushyira mu bikorwa imishinga muri REB, Shyaka Emmanuel yagaragaje ko iri soko ryari riri mu yagombaga kugengwa n'amasezerano y'umuterankunga ku buryo batari gukoresha amasezerano ya RISA.

Ati 'Twagize isoko ryari riremereye ryari rifite agaciro kari hejuru ya miliyari 6 Frw noneho mu kuritegura umuterankunga ari we banki y'Isi atugira inama yo kurigabanya mu byiciro bitewe n'igice cy'ishuri cyane ko twari dufitemo amashuri y'icyitegererezo, amashuri nderabarezi, amashuri y'inshuke 3864, dufitemo n'igice cy'amashuri ya siyansi [STEM].'

Abadepite bagaragaje ko iri soko ry'ibikoresho by'ikoranabuhanga ryagombaga gutangwa hakurikijwe amasezerano ya RISA ariko biza kurangira ritanzwe batayagendeyeho.

Hagaragayemo ibiciro bitandukanye ku bikoresho bimwe byaguzwe mu masoko y'ibyiciro bitandukanye, ahari nka projecteurs zaguzwe harimo ikinyuranyo cy'ibihumbi 700 Frw.

Perezida wa PAC, Muhakwa Valens yagaragaje ko buri cyiciro cy'isoko cyihariye kandi cyigenga ariko ibiciro ku bintu bimwe byagakwiye kuba bisa.

Ati 'Ibikoresho ni bimwe mu byiciro by'isoko bitandukanye, kuki ibiciro bitandukanye.'

Shyaka yasubije ko bagiye barebera ku biciro byatanzwe n'abahataniye amasoko bakareba uwatanze ibiciro biri munsi y'iby'abandi kuri buri cyiciro.

Ati 'Amafaranga ari mu isoko rya mbere yatanzwe bitewe n'abapiganira isoko.'

Depite Muhakwa yagaragaje ko abatanga amasoko ari bo bakwiye kubanza kugena ibiciro, urihatanira yatanga ibye hakabaho kugereranya n'uko isoko rihagaze.

Shyaka yakomeje gutsimbarara ahamya ko mu gihe batangaga isoko bari barasuzumye ibiciro ku masoko.

Depite Uwineza Beline yagragaje ko hagendewe ku byakozwe ibikoresho byaguzwe REB ihenzwe, ndetse byatumye habaho kutazigamira leta arenga miliyari 1 Frw.

Ati 'Igenzura ry'isoko ritarebaga ibiciro ryarebaga ibiki? Kuvuga ngo nta biciro twashyiragamo, ubwo se kwari ukugenzura isoko mu buryo buvuze iki? Ko hakwiye kubamo ibiciro ku bintu runaka bikagaragara?'

Muri aya masoko hari aho projecteurs zaguzwe ku giciro cyo hasi ariko bigeze ku zindi 600 zagombaga kujya mu mashuri ya siyansi hitabazwa amasezerano ya RISA yateganyaga ibiciro biri hejuru ugereranyije n'amasezerano asanzwe.

Umuyobozi ushinzwe imirimo rusange muri REB, Nkurikiyinka Janvier yavuze ko batari baritaye ku gukoresha amasezerano ya RISA, ndetse ngo kuko bakurikizaga amasezerano n'umuterankunga bumvaga nta kibazo kirimo.

Ati 'Mbere kuko twakoraga uko umuterankunga yasabaga twumvaga turimo dukora ibikwiriye. Ariko nyuma yo kumva inama z'umugenzuzi Mukuru w'Imari ya Leta ni bwo twabibwiye umuterankunga bakorana n'amasezerano kugira ngo RISA ibe mu bashyira mu bikorwa amasezerano aho kugira ngo niba bigeze ku gaciro runaka bari barashyizeho ngo dukurikize amabwiriza ya banki, ngo hanyuma niba biri munsi dukurikize amategeko y'imbere mu gihugu.'

REB yatangaje ko mu masoko yo kugura ibikoresho mu mushinga baterwamo inkunga na Banki y'Isi ubu bazajya bakurikiza amasezerano ya RISA.

Ubuyobozi bw'Iki kigo bwiyemeje ko bugiye gutunganya imitangire y'amasoko haba mu kugura ibikoresho by'ikoranabuhanga ariko no mu byerekeye ibitabo.

Perezida wa PAC Muhakwa Valens yavuze ko bitumvikana ukuntu ibiciro by’ibikoresho bimwe biba bitandukanye mu masoko yatanzwe mu gihe kimwe

Shyaka Emmanuel ushinzwe gushyira mu bikorwa imishinga yasobanuye ko bakurikizaga amabwiriza y’umuterankunga

Ibi bitaramo byabereye ku nshuro ya mbere i Kigali, ku wa 6 Ukuboza 2023 muri BK Arena. 'Move Afrika' ni umushinga uzamara igihe kirekire, ukubiyemo kuzenguruka ku Mugabane wa Afurika n’abahanzi mpuzamahanga.

Uyu mushinga ugizwe n'ubukangurambaga buyobowe n’abaturage bugamije gukangurira abayobozi gufata ingamba ku bibazo bikomeye bikigaragara ku Mugabane wa Afurika. Bimwe mu bibazo by’ingenzi birimo:

Kongera inkunga mu kigega cyita ku buzima, hibandwa cyane cyane ku bagore n'abakobwa; gukemura ikibazo cyo kwangiza ibidukikije n’ingaruka zabyo ku kwihaza mu biribwa; gukemura ikibazo cyo kutabona amahirwe y’ubukungu ku bisekuruza bizaza; no gushishikariza abaturage kugira uruhare mu bibakorerwa.

Kuri uyu wa Kane tariki 2 Gicurasi 2024, Perezida Kagame yifashishije ikoranabuhanga yaganirije abitabiriye Inama yiswe 'Global Citizen Now' igamije kwiga ku ngamba zo kurwanya ubukene bukabije.

Yagarutse ku ngingo zinyuranye zirimo urugendo rw'imyaka 30 rwo kwiyubaka k'u Rwanda nyuma ya Jenoside yakorewe Abatutsi, ibitaramo bya 'Move Afrika' byabereye i Kigali mu Ukuboza 2023 n'ibindi binyuranye bigaragaza ukwishakamo ibisubizo k'u Rwanda n'Abanyarwanda.

Umukuru w'Igihugu yavuze ko tariki 7 Mata 2024, hatangiye ibikorwa byo kwibuka ku nshuro ya 30 Jenoside yakorewe Abatutsi mu 1994, yatwaye ubuzima bw’abarenga Miliyoni.

Perezida Kagame yavuze ko n’ubwo imyaka 30 ishize Jenoside yakorewe Abatutsi ihagaritswe ‘ibikomere biracyari byose’. Yashimye abakuru b’Ibihugu na za Guverinoma, inshuti, abafatanyabikorwa n'abandi bifatanyije n’u Rwanda mu gutangiza ibikorwa byo kwibuka ku nshuro ya 30.  

Yavuze ko nyuma y’icuraburindi rya Jenoside, u Rwanda rwahisemo kuba umwe, amahoro, ubumwe n’ubwiyunge, kandi ko amateka asharira abanyarwanda banyuzemo atari yo abasobanura 'ubu nk’abantu'.

Yavuze ko amateka u Rwanda rwanyuzemo ntacyo yigishije amahanga, kuko abagize uruhare muri ayo mahano ndetse n'ababashyigikiye bakomeje kugerageza kwandika amateka mabi nk’aya Jenoside yakorewe Abatutsi mu 1994. Ni ibikorwa avuga ko bigaragara cyane ku mbuga nkoranyambaga.

Ati “Uyu munsi abayikoze [Jenoside] n'ababashyigikira bari kugerageza gushaka kongera kwandika bushya amateka yacu. Kubera imbuga nkoranyambaga, ibi biri kurushaho kuba bibi cyane.”

Umukuru w’Igihugu yavuze ko ibyabaye mu Rwanda ‘bishobora no kuba ahandi’; agaragaza ibihugu by'amahanga bitaratera intambwe bigaragaza ko ntacyabaye, ariko kandi avuga ko u Rwanda ruzakomeza gukora ibishoboka byose kugira ngo Jenoside itazongera kubaho ukundi.

Yavuze ko Jenoside yakorewe Abatutsi yashobotse kubera Politiki mbi y’ivangura, ari nayo mpamvu nyuma ya Jenoside, hashyizweho Leta y’ubumwe mu murongo wo guharanira inyungu za buri munyarwanda. Yavuze ko hubakiwe ku ‘bumwe’ kugira ngo u Rwanda rube rugeze aho ruri ubu, kandi hubatswe inzego zifasha abaturage.

Yavuze ko Abanyarwanda biteguye kurwanira kubaho kwabo “kuko nta n’umwe bacyesha ubuzima”. Umukuru w’Igihugu, yagaragaje ko umurongo Guverinoma yafashe watanze umusanzu ugaragara, kandi bafite icyizere cy’uko abayobozi b’ejo hazaza hazakora ‘ibyiza kurusha aha’.

Umukuru w’Igihugu yanagarutse ku mbaraga zashyizwe mu kubaka ibikorwaremezo, yaba mu nzego z’ubuzima, uburezi n’ibindi. Ariko kandi Abanyarwanda bashyize imbere kwishakamo ibisubizo mu gutegura ejo hazaza heza.

Iyi nama yitabiriye yifashishije ikoranabuhanga yateguwe na Global Citizen isanzwe itegura ibitaramo bya Move Africa. Umukuru w'Igihugu, yavuze ko u Rwanda rwishimiye kwakira ibitaramo bya 'Move Africa' bitegurwa n’umuryango Global Citizen, byabereye muri BK Arena, ku wa 6 Ukuboza 2023.

Ati “Reka ntangire mvuga ko u Rwanda rwishimiye cyane kwakira ku nshuro ya mbere igitaramo cya Move Africa mu Ukuboza 2023, kandi twiteguye gukomeza imikoranire na Global Citizen mu gihe cy’imyaka ine iri imbere.”

Umukuru w’Igihugu, yavuze ko ibi bitaramo bifite akamaro kanini cyane mu buryo bubiri. Ubwa mbere ni mu kubaka ubumenyi bukenewe mu 'bitaramo binini', ubwa kabiri ni ukugaragaza uruhare rw’abanyafurika mu kubaka Inganda Ndangamuco zifite agaciro kanini mu mafaranga, bishobora kugire uruhare mu kubaka ubukungu bw’umugabane wa Afurika n’uko urubyiruko rufata uyu mugabane.

Yanavuze ko Move Afrika ifite uruhare cyane mu kuganira ku bibazo byugarije sosiyete, aho nk’umwaka ushize haganiriwe ku rwego rw’ubuzima cyane cyane hitawe ku ruhare rw'abajyanama b’ubuzima.

Ubwo yari mu gitaramo cya Move Afrika, Perezida Kagame yashimye abajyanama n'ubuzima agira ati 'Ndashaka gushimira Abajyanama b'Ubuzima batuma dukomeza kugira ubuzima bwiza, butekanye. Kandi Afurika yubakiye ku buzima n'abaturage bize.'

Mu kiganiro cyayobowe na Aisha Sesay, Umukuru w’Igihugu yavuze ko umuziki uhuza abantu, kandi ko guhura kw’abo bikwiye kwifashishwa nk’intwaro ikomeye.

Move Afrika yabereye i Kigali, ku wa 6 Ukuboza 2023 yashyizweho akadomo n'Umuraperi Kendrick Lamar ashyigikiwe n'umuhanzikazi wo muri Tanzania, Zuchu, Bruce Melodie, Ariel Wayz ndetse n'umubyinnyi wabigize umwuga, Sherrie Silver.

Umuyobozi ushinzwe iyamamazabikorwa mu kigo cy'Igihugu gishinzwe guteza imbere ubukerarugendo bushingiye ku nama (RCB), Frank Murangwa, aherutse gutangaza ko u Rwanda rwinjije miliyoni 91$ binyuze mu nama n'ibikorwa by'imyidagaduro rwakiriye mu mwaka wa 2023.

Mu 2023, uRwanda rwakiriye inama zitandukanye zirimo Inama y'Inteko Rusange ya FIFA, Women Deliver, Mobile World Congress, Trace Awards & Festival, Giants of Africa Festival, Move Afrika n'izindi. Mu kiganiro na RBA, Murangwa ati 'Ibi byerekana ko ibyo twashoye twabyinjije.'

Imibare igaragaza ko inama n'ibitaramo u Rwanda rwakiriye mu 2023 ari 157. Hakiriwe abashyitsi mpuzamahanga barenga ibihumbi 65 bavuye mu bihugu 157 byo mu mpande z'Isi yose.

Move Africa yubakiye ku bukangurambaga n'ibikorwa bya Global Citizen byayibanjirije ku Mugabane wa Afurika birimo: Global Citizen: Mandela 100, yazanye Beyoncé, Jay-Z, Ed Sheeran, Usher, Eddie Vedder na Chris Martin wo muri Coldplay i Johannesburg, South Africa mu 2018; 

Global Citizen Live: Lagos yagaragayemo Davido, Femi Kuti, na Tiwa Savage muri Fela Kuti's New Africa Shrine mu 2021; n’Iserukiramuco Global Citizen Festival: Accra, ryazanye Usher, SZA, Stormzy, na TEMS muri Black Star Square mu 2022.

Mu bufatanye n'Urwego rw'Igihugu rw'Iterambere mu Rwanda (RDB), u Rwanda ruzakira Move Afrika buri mwaka mu myaka itanu iri imbere. Buri mwaka, ibindi bihugu bizajya byiyongera ku ngengabihe y'aho izagera, hagamijwe kwagura ibikorwa bikagera mu bihugu bitanu bitarenze umwaka wa 2025.

Mu kugeza ubunararibonye budasanzwe ku bafana n'abahanzi, Move Afrika izashyiraho ibikorwa bishya by'imyidagaduro bigera ahantu hatandukanye, yongere abahanzi mpuzamahanga n'abo mu karere bashaka kuzenguruka mu bihugu bitandukanye byo mu karere, kandi hubakwe ubushobozi mu mijyi itandukanye yo ku Mugabane wa Afurika aho ibi bitaramo bizajya bibera.

Perezida Kagame yitabiriye Inama yiswe Global Citizen Now igamije kwiga ku ngamba zo kurwanya ubukene bukabije
 

Perezida Kagame yashimye Global Citizen yahisemo gutangiriza mu Rwanda umushinga wa Move Afrika

 

Perezida Kagame yavuze ko Global Citizen ari umufatanyabikorwa mwiza w’u Rwanda ndetse na Afurika

REBA KU ISAHA N’IMINOTA 38’ IKIGANIRO PEREZIDA KAGAME YATANZE MU NAMA YA GLOBAL CITIZEN

Ku mugoroba wa tariki ya 01 Gicurasi ku munsi w'umurimo ni bwo Element yerekanye ko igihe kigeze ngo amurikire Isi ibikorwa amaze iminsi ahugiyemo  aribyo  Afro Gako.

Bidatinze ku mbuga nkoranyambaga za 1:55AM bahise batangaza ko igihe kigeze ngo bacutse Element Eleeeh bari bamaze igihe kitari gito bakorana.

Coach Gael na we yahise amwifuriza amahirwe masa, ikibazo cyari gisigaye kwari ukwibaza niba iyi nzu itunganya umuziki akanareberera inyungu z'abahanzi igiye kubaho idafite producer.

Gusa mu kiganiro cyo ku wa 23 Werurwe 2024, Coach Gael yari yatangaje ko bafite umusore muto bitegura kwereka abanyarwanda ufite ubuhanga bukomeye.

Amakuru yizewe agera ku InyaRwanda akaba ari uko uwitwa Kompressor ari we yavugaga ndetse ubu imyitozo wavuga ko yahabwaga na Element utari wasezera nubwo ibirari bimaze iminsi.

Ndetse n'ubutumwa bumwifuriza amahirwe mu bo bakoranaga bwamaze kugera hanze.

Ibi bivuze ko mu gihe haba nta gihindutse Kompressor yaba agiye kujya ku ibere akicara mu mwanya wa Element wamukarishyaga mu masomo n'imyitozo.

Amakuru yari yatangiye gucicikana ko Murirooo uheruka gutunganya indirimbo '2 in 1' ya Kenny Sol yaba ari we wasimbura Element isaha ku isaha byaba ngombwa.

Aya siyo kuko umwe mu bo twaganiriye yadutangarije ko cyari ikiraka gisanzwe ntaho bihuriye no kuba agiye kuba umukozi uhoraho wa 1:55AM.

Amakuru ya Kompressor si menshi azwi, gusa hari abasore yagiye atunganyiriza indirimbo bakizamuka ndetse n'izisubiyemo.

 Turacyagerageza kumenya byinshi byisumbuye kuri iyi nkuru. Element Eleeeh nubwo ataratanga ibarurwa isesa amasezerano cyangwa isezera ariko aragana mu nzira yo gutangira kwikoreraMurirooo wakoze ‘2 in 1’ ya Kenny Sol byari byatangiye kwibazwa niba ari we musimbura wa Element gusa sibyo

Kompressor umusore ukiri muto uri kuri piano byitezweho ko ari we ugiye gusimbura Element wamutozaga 

Ishyirahamwe ry’umupira w’amaguru mu Rwanda ryavuze ko Igikombe cy’Amahoro yari yahaye Rayon Sports y’abagore ikakiyisubiza, byatewe na buro imwe yari igifunze yafungutse ariko byamaze gukemuka, bakiyisubije.

Rayon Sports yegukanye Igikombe cy’Amahoro itsinze Indahangarwa ibitego 4-0 mu mukino wa nyuma w’igikombe cy’Amahoro wabaye ku wa Kabiri tariki ya 30 Mata 2024 kuri Kigali Pele Stadium.

Nk’ibisanzwe ikipe yashyikirijwe igikombe, batangira kukishimira, abakinnyi bakifotorezaho.

Muri uku kukishimira ni bwo cyatangiye kwangirika.
Amakuru ISIMBI yamenye ni uko abakinnyi n’abatoza bahise babyereka ubuyobozi bw’ikipe ya bo, bababwira ko bitewe n’uko kimeze byagorana ko banakigeza ku biro by’iyi kipe biri Kicukiro.

Aha ni ho Rayon Sports yahise ibyereka Ishyirahamwe ry’Umupira w’Amaguru mu Rwanda, FERWAFA, maze ribasaba gusubiza icyo gikombe bakazagifata nyuma ya konji (konji y’abakozi yabaye ejo hashize).

Perezida wa FERWAFA, Munyantwali Alphonse yavuze ko iki gikombe cyari cyagize ikibazo cya buro yari igifunze ifatanya igice cyo hasi n’icyo hejuru yari yafungutse, gusa barayifunze barakiyisubiza.

Ati “Hari iburo yafungutse, urabona kiriya gice cyo hasi n’icyo hejuru hari iburo iba ifunze igiteranya, bagitereye hejuru kandi ni byo igikombe kiba kigomba guterwa hejuru bakishimira, ni yo yafungutse rero barongeye barayifunga barakibasubiza.”

FERWAFA kandi yavuze ko iri mu mushinga wo gukora ibikombe byihariye bidahinduka, shampiyona ikaba ifite igikombe cya yo kidahinduka ndetse no mu gikombe cy’Amahoro bikaba bimeze gutyo.

Ni nyuma y’uko iri shyirahamwe ryagiye rishinjwa kutagira igikombe kimwe kidahinduka, aho buri mwaka batanga ibikombe bitandukanye.

Igikombe cy’Amahoro Rayon Sports yahawe

Perezida wa FERWAFA, yavuze ko iki gikombe cyagize ikibazo cya buro yafungutse ariko yafunzwe barakiyisubiza

Urugaga rw'Abenjeniyeri mu Rwanda (Institution of Engineers Rwanda- IER) ruri guhugura icyiciro cya mbere cy'abenjeniyeri 50 biganjemo abamaze igihe gito ku isoko ry'umurimo, mu rwego rwo kubategurira kuba abanyamwuga bakanagira ubumenyi bubafasha kwigobotora ibibazo bahurira na byo muri uwo mwuga.

Aya mahugurwa yatangijwe n'Umunyamabanga Nshingwabikorwa w'uru Rugaga, Steven Sabiti, wagarutse ku nshingano rufite, zirimo kwandika no kungenzura abakora umwuga, gutegura amahugurwa, ndetse n'ubuvugiza.

Yakanguriye abitabiriye amahugurwa kuhavana ubumenyi buzabafasha kunoza umwuga wabo, cyane cyane gusobanura neza ibyo bakora mu kazi kabo ka buri munsi.

Ni amahugurwa y'iminsi itanu ari kubera mu Mujyi wa Kigali, yatangijwe kuri uyu wa 02 Gicurasi 2024. Ari gukorwa mu mushinga 'Africa Catalyst' uterwa inkunga n'Ikigo cy'Abongereza 'Royal Academy of Engineering' kuva mu 2017, ugashyirwa mu bikorwa ku bufatanye n'Ikigo 'Engineers Against Poverty'.

Umuyobozi w'Umushinga Africa Catalyst, Eng. Cecile Uwimana akaba n'umunyamuryango wa IER, yavuze ko aya mahugurwa ari gutangwa mu rwego rwo kongerera ubumenyi abo benjeniyeri, ndetse no kubafasha kwitinyuka.

Ati ''Kuri icyo kigendanye n'umwuga wacu, usanga wita cyane ku mibare, siyansi, ariko ibindi by'itumanaho ugasanga dufite icyuho mu bumenyi bw'itumanaho. Ugasanga twita cyane ku mibare kandi tukabitsinda neza na siyansi n'ubugenge (physics) n'ibindi tukabitsinda neza, ariko wagera mu itumanaho ugasanga aho hantu ntabwo tuhagera. […] turifuza ko bagira icyo kintu cyo kwitinyuka.''

Eng. Cecile Uwimana yavuze ko IER ifite intego ko abenjeniyeri 50 bari guhugurwa bazatahana ubumenyi ku itumanaho ku buryo bahabwa n'ikizamini cy'akazi cyo kuvuga bakabasha gusobanura ibyo bazi, kuba uwageze mu kazi yabasha gutegura ibyo akora akanabisobanura neza, ndetse no kubasha gukora raporo y'ibyo yakoze akayisobanura neza.

Umutoni Brandine ni umwe mu benjeniyeri 50 bahuguwe akaba amaze imyaka ibiri asoje amasomo muri kaminuza, ndetse akaba akora akazi k'ibijyanye na 'Engineering' cyane cyane mu ikorwa ry'imihanda.

Yavuze ko ubumenyi bari guhabwa buzabafasha kwimurika ku isoko ry'umurimo, kugira ngo babashe gushyira mu bikorwa ubundi bumenyi bakuye mu ishuri.

Ati ''Usanga umuntu agenda akiga akarangiza afite ubumenyi bw'imibare, za 'physiques', uburyo wakoramo ibintu nk'imashini n'ibindi, ariko ugasanga bagushyize imbere y'abantu ngo wivuge uvuge uti 'Ndi umuntu uyu n'uyu nkora ibi n'ibi', ugasanga ari ibintu utashobora kandi ari ibintu bikenewe cyane.''

''Ubwo rero nkurikije ibyo batubwiye n'umurongo w'ibyigwa muri aya mahugurwa, ntekereza ko ari ibintu bikomeye cyane tugiye kwigiramo kuko bizadufasha kwishyira ku isoko ry'umurimo neza ukaba wabasha kwizamura.''

Ni ubutumwa kandi ahuriyeho na Martin Mutabazi na we uri mu bahuguwe umaze imyaka 10 arangije amasomo y'ubwenjeniyeri muri kaminuza, uvuga ko amahugurwa nk'aya azabafasha kwitinyuka ku buryo bagize amahirwe yo guhura n'abantu bagira uruhare mu iterambere ry'umwuga wabo, bayabyaza umusaruro bakabasaba amakuru y'icyo bakora mu kuwunoza.

Perezida w'Ihuriro ry'Ingaga rw'Abenjiyeri muri Afurika (Federation of Africa Engineering Organisations), Kazawadi Papias, akaba amaze imyaka isaga 25 muri uyu mwuga, yibukije abitabiriye aya mahugurwa ko kugira ngo bagere kure mu mwuga wabo bakwiye kwimika umuco wo gukorera hamwe, ku buryo icyo umwe atazi acyungukira kuri bagenzi be, na bo bakaba bafite ibyo bamwigiraho.

Kazawadi Papias yamze imyaka 25 muri uyu mwuga, yavuze ko ari ngombwa guhora bongera ubumenyi

Umutoni Brandine yavuze ko amahugurwa bari guhabwa azabafasha kwigaragaza neza ku isoko ry’umurimo

Byitezwe ko aya mahugurwa azabafasha kubaho ubuzima bufite intego

Aya mahugurwa yitezweho gufasha ba enjeniyeri kongera ubumenyi

Abari guhugurwa basabwe kwitinyuka muri rusange

Mu bari guhugurwa higanjemo urubyiruko

Amafoto: Yuhi Augustin

Ni igikorwa cyabereye mu Karere ka Rwamagana ku itariki ya 1 Gicurasi mu 2024 ku Munsi w'Umurimo. Ubuyobozi bwa Prime Insurance buvuga ko iki gikorwa ari ngarukamwaka mu rwego rwo kwishimira ibyagezweho ndetse no kwita ku bakozi bacyo muri rusange.

Ibi birori byaranzwe no gusabana, gusangira, kwishimira ibyagezweho no kwakira abakozi bashya mu muryango mugari wa Prime Insurance. Wabaye kandi n'umwanya mwiza wo guhemba abakozi bitwaye neza harimo n'abamaranye n'iki kigo imyaka irenga 10, ndetse banungurana ibitekerezo ku iterambere ry'ikigo bakorera kugira ngo kirusheho guha Abanyarwanda serivise zinoze.

Umuyobozi Mukuru wa Prime, Col (Rtd) Eugène Murashi Haguma yavuze ko ubudakemwa bw'umukozi bushingira ku bumenyi afite buzamura ikigo.

Ati 'Nitujya duhura mu birori nk'ibi ngarukamwaka, ujye wisuzuma nk'umukozi urebe uti 'ese uyu mwaka ushize hari ubumenyi niyunguye bashobora gufasha Prime kugira ngo irusheho gukora neza'.'

Yavuze kandi ko gukorera hamwe n'abandi nk'itsinda ari ingenzi kuko ubufatanye ari bwo bwa mbere butuma abantu batera imbere.

Ati 'Ni nayo mpamvu tuza hano kandi turi benshi. Tuba tuje no kwsihimira gukorera hamwe; ni ukuvuga ibyo twagezeho twese, ibyo umwe yakoze n'iby'undi yakoze bikaba byaratumye duhuza kugira ngo dushobore kugera ku ntego twari twihaye cyangwa tunayirenze'.

Col (Rtd) Haguma yanibukije abakozi ba Prime Insurance ko umukozi mwiza arangwa no kuzuza inshingano ze hatabayeho gukorera ku jisho ndetse ko ibyo bishoboka iyo afite imyitwarire myiza n'ikinyabupfura mu kazi.

Prime Insurance ni ikigo kimaze kuba ubukombe mu gutanga ubwishingizi kuko cyatangiye gukora mu 1995 cyitwa COGEAR, kiza guhindura izina mu 2012 ari na bwo cyahise kivamo ibigo bibiri kimwe gitanga ubwishingizi bw'igihe gito, 'Prime General Insurance', n'ikindi gitanga ubw'igihe kirekire, 'Prime Life Insurance'.

Ubuyobozi bwa Prime Insurance buvuga ko iki kigo gihagaze neza mu bitanga ubwishingizi kuko ari kimwe mu bigo icyenda bitanga ubwishingizi bw'igihe gito mu Rwanda, kikaba cyarabaye icya gatatu mu kwinjiza amafaranga menshi mu mwaka wa 2023.

Ni ikigo kandi gifite abakozi basaga 100 biganjemo urubyiruko. Mu bwishingizi gitanga harimo ubw'ibinyabiziga, ubwo kwivuza, ubw'inkongi y'umuriro, n'ubundi butandukanye.

Col (Rtd) Eugène Murashi Haguma yavuze ko ubudakemwa bw’umukozi bushingira ku bumenyi afite buzamura ikigo

Habarurema Innocent uyobora Prime Life Insuarance na we yari yitabiriye ibi birori

Abakozi ba Prime Insurance bishimiye uyu munsi

Abakozi bamaze imyaka itanu muri Prime bashimiwe

Abakozi bashya bahawe ikaze

Abakozi bashya bakiriwe mu muryango mugari wa Prime Insurance

Basabanye mu buryo bunyuranye

Ibirori byaranzwe n’ibice binyuranye bifasha kuruhuka no kwishima

Ikimpaye Noella ni we wahawe igihembo cy’umwaka nk’umukozi wahize abandi bose mu gukora neza muri uyu mwaka

Itorero Inkindi n’Amariza ryasusurukije abitabiriye ibi birori

Uhereye ibumoso, Niyongabo Eric ushinzwe ikoranabuhanga no guhanga udushya muri Prime na Mazuru Antoine ushinzwe kwakira abasaba ibyo bemerewe n’ubwishingizi muri Prime

Wari n’umwanya wo kungurana ibitekerezo

Amafoto: Shumbusho Djasiri

Uyu musore wari umwarimu yarohamye kuwa Gatatu tariki ya 1 Gicurasi 2024 ahagana saa kumi n'imwe z'umugoroba mu Mudugudu w'Akabeza mu Kagari k'Urugarama, mu Murenge wa Gahini ku nkengero z'ikiyaga cya Muhazi.

Umuvugizi wa Polisi mu Ntara y'Iburasirazuba, SP Twizeyimana Hamduni, yabwiye IGIHE ko uyu mwarimu yarohamye ubwo yajyaga koga mu kiyaga cya Muhazi kugeza muri iki gitondo ishami rya polisi yo mu mazi bakaba bari bagishakisha umurambo we.

Yagize ati ' Yagiye koga bisanzwe muri Muhazi ariko ntituzi icyamuteye kurohama. Twaraye dushakishije umurambo we dufatanyije n'abaturage ntitwawubona, ubu muri iki gitondo bongeye kuwushakisha ngo turebe niba twawubona.'

SP Twizeyimana yasabye abaturage kwirinda kogera ahantu hatemewe bakajya bagana ahantu habugenewe hari n'abantu bashobora gufasha mu gihe bagiye mu mazi bakagiriramo ibibazo.

Ikiyaga cya Muhazi nicyo uyu mwarimu yaguyemo

Ubwo jenoside yari igeze hagati impunzi ziganjemo Abatutsi benshi zari zahungiye muri Hotel des 1000 collines aho Paul Rusesabagina yabacaga amafranga yose bafite kugira ngo yemere ko bahaba.

Ku itariki 2 Gicurasi 1994 ubwo Jenoside yari irimbanyije hirya no hino mu gihugu, Leta yashatse kubica bibuzwa n'uko itangazamakuru mpuzamahanga na Dr Bernard Kouchner bari babimenyekanishije mu Bufransa byanditswe mu binyamakuru.

Byatumye Francois Mitterrand wayoboraga u Bufaransa agira inama Guverinoma y'abatabazi yo kutica abo bantu.

Umunyamakuru Vincent Hugueux wo mu kinyamakuru L'Express ku wa 02 Kamena 1994, yanditse ko ku itariki 2 gicurasi 1994 umuyobozi mukuru muri Perezidansi ya Repubulica y'u Bufaransa wari ushinzwe Afurika witwa Bruno Delaye ari we wahawe misiyo yo kubwira Gen Augustin Bizimungu wayoboraga ingabo z'abajenosideri, ko nibica impunzi zo muri Hotel des Mille Collines biri butange isura mbi cyane mu mahanga, bikarushya u Bufaransa gukomeza guha ubufasha leta y'u Rwanda.

Ikindi kinyamakuru Billets d'Afrique cyandikwa n'Umuryango Survie cyo mu Bufransa, cyemeje ayo makuru muri nimero 31 yasohotse muri Gashyantare 1996.

Ikindi kinyamakuru cyo mu Bufransa cyitwa Liberation cyo ku wa 25 Gicurasi 1994 nacyo cyanditse ayo makuru gisobanura ko leta y'abicanyi yari yashyize ba maneko benshi muri Hotel des 1000 Collines, ngo bajye batanga amakuru ku bantu bari bayihungiyemo.

Mu bicanyi bagiye bajya kuri Hotel des 1000 Collines gushaka uko Abatutsi bicwa, harimo ruharwa Padri Wenceslas Munyeshyaka.

Nubwo perezida wa Rayon Sports, Uwayezu Jean Fidele yavuze ko umwaka w’imikino wa 2023-24 wagenze neza, Aimable Nsabimana we abona bidahagije kuko bari gukora ibirenze.

Rayon Sports ni ikipe isoje umwaka w’imikino idatwaye igikombe kiyemera guhagarira u Rwanda mu mikino Nyafurika ya CAF Champions League na CAF Confederation Cup, ni nyuma y’uko ibuze igikombe cy’Amahoro n’icya Shampiyona.

Mu kiganiro yahaye ikinyamakuru ISIMBI, Nsabimana Aimable yavuze ko uyu mwaka wabakomereye kubera ibintu bitandukanye birimo kwishyiramo kujya mu matsinda ya CAF Confederation Cup bigapfa, guhinduranya abatoza no kugenda kw’abakinnyi.

Ati “Kutajya mu matsinda biri mu bintu byadukozeho kuko twari twabyishyize mu mutwe, ikindi urebye ukuntu shampiyona yagiye igenda turi mu bantu bagiye bahinduranya abatoza, turi mu bantu bagiye abakinnyi bagenda, urumva izo mbogamizi zose ni ibintu byagiye bidukoraho, gusa ni kuriya shampiyona yari imeze.”

Avuga ko kuba perezida w’ikipe yaravuze ko umwaka wagenze neza ari byo kuko hari ibikombe ikipe yegukanye ariko nk’umukinnyi ku giti cye yifuzaga ibirenzeho.

Ati “Nk’uko perezida abivuga hari ibikombe twajyanye, gusa kuri njye nk’intego yanjye iyo ndi mu ikipe mba nifuza kujyana buri gikombe cyose gikinirwa hano mu Rwanda, rero kuba narakinnye umwanya wa 3 ntabwo ari ibintu binshimishije, kuba ntaratawaye igikombe cya shampiyona cyangwa icy’Amahoro ntabwo ari ibintu binshimishije.”

Uyu mukinnyi uri ku mpera z’amasezerano ye muri Rayon Sports, yavuze ko nta biganiro baragirana ariko imwegereye bavugana, gusa ngo yifuza gusubira gukina hanze y’u Rwanda.

Ati “Nta biganiro ndagirana na Rayon Sports, amasezerano yanjye ararangira ejobundi shampiyona nirangira, nta kintu na kimwe kiragenda ariko njye mba mfite amahitamo menshi no hanze y’u Rwanda, ni ukureba ko byakunda.”

“Njyewe ndi umukozi, Rayon Sports ni ikipe nagiriyemo ibihe byiza cyane cyane imikino yo kwishyura iramutse, inyegereye nta kibazo twavugana.”

Yunzemo ati “Muri njye ntabwo mbyifuza, sinifuza gukina undi mwaka hano mu Rwanda, ndashaka kujya hanze, nkongera nkasubira hanze ni byo nifuza kereka bidakunze ariko nibukunda nzagenda.”

Nsabimana Aimable yinjiye muri Rayon Sports mu mpeshyi ya 2023 avuye muri Kiyovu Sports aho yasinyiye Rayon Sports amasezerano y’umwaka umwe urimo urangira. Batwaranye ibikombe 2, icya Super Cup ndetse n’icya RNIT Iterambere Fund.

Nsabimana Aimable yavuze ko nta biganiro byo kongera amasezerano biraba