Category: Uncategorized

Ni umushinga wandidiye kuko nta kinini cyakozwe kuva mu 2013 ubwo igitekerezo cyatangizwaga, gusa kera kabaye uyu mushinga watangiye gufata umurongo, nyuma y'uko abaminisitiri bawushinzwe bagiranye amasezerano agamije gutanga umurongo uzakurikizwa.

Ni amasezerano yasinyiwe i Mombasa muri Kenya ahari hateraniye ba Minisitiri batatu bahagarariye ibihugu uwo muhanda uzanyuramo, barimo Dr. Jimmy Gasore w'u Rwanda, Umunyamabanga ushinzwe Imihanda n'Ubwikorezi muri Kenya, Kipchumba Murkomen, Umunyamabanga wa Leta ushinzwe Ubwikorezi muri Uganda, Fred Byamukama na Roger Te Biasu wari uhagarariye Minisitiri w'Ubwikorezi wa Repubulika Iharanira Demokarasi ya Congo.

Muri iyi nama, impande zombi zemeranyije uburyo bwo kuzashaka amikora azatuma uyu mushinga ushyirwa mu bikorwa, uyu muhanda ukazaturuka Naivasha muri Kenya ukomereza muri Uganda, ukazaca muri Sudan y'Epfo, u Rwanda ndetse na Congo.

Aba baminisitiri kandi bemeranyije gushyiraho uburyo buzabafasha gukurikirana ishyirwa mu bikorwa ry'uyu mushinga, ku buryo n'imbogamizi zose zavuka zashakirwa ibisubizo hakiri kare.

Murkomen uhagarariye Kenya yavuze ko ibi bihugu bifite gahunda yo gukorana n'inzego z'abikorera mu rwego rwo gushyira mu bikorwa uyu mushinga, ati “Turifuza gufatanya n'inzego z'abikorera kugira ngo twagure uyu muhanda wa gari ya moshi, mu rwego rwo kugira ngo byoroshye urujya n'uruza rw'abantu n'ibintu, ndetse Kenya igeze kure umushinga wo guhindura amategeko kugira ngo twemerere inzego z'abikorera kurushaho gushora imari mu rwego rwa gari ya moshi, hashingiye ku bushobozi buke bwa Leta.”

Uyu muyobozi yavuze ko bateganya gushyiraho uburyo bwo guteza imbere aho iyi mihanda izajya inyura mu rwego rwo guteza imbere ibikorwa by'ubucuruzi mu Karere, ati “Dufite intego yo kurema ibyanya bikorerwamo ubucuruzi mu nzira uyu muhanda uzanyuramo, ibyo bigatuma ibyo bice bihinduka ibicumbi by'ubukungu.”

Uyu muyobozi kandi yavuze ko mu bizakorwa byose hazibandwa ku bijyanye no kurengera ibidukikije, na cyane ko urwego rw'ubwikorezi ari rumwe mu nzego zigira uruhare runini mu kohereza imyuka yangiza ikirere myinshi, ibituma ingaruka z'iyangirika ry'ikirere ziyongera muri rusange.

Yagize ati “Urwego rw'ubwikorezi ni rumwe mu nzego zohereza imyuka yangiza ikirere myinshi kurusha ibindi bintu. Turifuza ko mu iyubakwa ry'uyu muhanda, tuzagabanya imyuka yangiza ikirere, tukagabanya igiciro n'ibyago byo kwangirika k'umuhanda ndetse n'ibyago by'impanuka.”

Ibi byose ngo bizatuma 'amahirwe y'Akarere ka Afurika y'Uburasirazuba ndetse n'amahirwe gafite ugereranyije n'indi miryango y'ubukungu muri Afurika aziyongera, mu gihe uyu muhanda wa gari ya moshi uzaba umaze kuzura, ibizagira ingaruka nziza ku baturage b'aka Karere uyu munsi ndetse no mu bihe biri imbere.'

Umuhanda wa gari ya moshi w’umuhora wa ruguru ugiye gutangira kubakwa, ndetse ukazagera mu Rwanda

Minisitiri w’Ibikorwaremezo mu Rwanda, Dr. Jimmy Gasore ahana umukono n’Umunyamabanga ushinzwe Imihanda n’Ubwikorezi muri Kenya, Kipchumba Murkomen

Umuhanda wa gari ya moshi ugiye gutangirwa kubakwa mu minsi iri imbere

U Rwanda, Uganda na Kenya byasinye kuri aya masezerano

Murkomen uhagarariye Kenya yavuze ko ibi bihugu bifite gahunda yo gukorana n’inzego z’abikorera mu rwego rwo gushyira mu bikorwa uyu mushinga

Baa Minisitiri bahagarariye u Rwanda, Uganda na Kenya basinye aya masezerano

Ni igikorwa cyabaye ku wa 30 Mata 2024 gihuriza hamwe Ecobank, ibindi bigo bitanga serivise z'imari ndetse n'abanyeshuri biga mu Ishuri Nyafurika ry'Imibare na Siyanse (AIMS) Ishami ry'u Rwanda.

Umukozi mu ishami rishinzwe abakozi muri Ecobank, Pauline Nakato yavuze ko 'career fair' yabaye bayiboneyemo abanyeshuri bafite ibitekerezo byiza ku buryo bakwishimira gukorana na bo ari nayo mpamvu bakiriye ubusabe bwabo nk'abashaka akazi.

Yagize ati 'Twaje gushaka abantu biga ibintu bitandukanye kuko turi hano ngo dushake abafite impano dukeneye nka bank. Ecobank ni banki mpuzamahanga ikorera mu bihugu 36 bitandukanye kandi twahuye n'abanyeshuri batandukanye harimo abo mu Rwnda, Ghana, Uganda Afurika y'Epfo na Mozambique.

Guhura n'abantu batandukanye kandi bafite impano zitandukanye nizera ko bifasha Ecobank nka banki mpuzamahanga kubona abafite impano zikenewe'.

Yakomeje ati 'Harimo abiga imibare ndetse n'abiga siyanse kandi twizera ko bahwanye n'abakozi dukeneye. Ni abanyeshuri bafite ibitekerezo byiza kuko twakiriye imyirondoro y'abasaba akazi (CVs) y'abagera kuri 30 kandi naganirirye na bo numva baje muri Ecobank batubera abakozi beza'.

Nakato yavuze kandi ko abona hagati y'imyaka itanu n'icumi iri imbere urwego rw'imari mu Rwanda ruzaba rumaze kugera kure ashingiye ku ishoramari riri gukorwamo uyu munsi.

Abanyeshuri ba AIMS Rwanda bitabiriye iki gikorwa bavuze ko bahungukira cyane mu guhura n'ibigo bitanga akazi kuko bibafasha gusobanukirwa ibikenewe ku isoko ry'umurimo bakabihuza n'ubumeyi bafite. Binabafasha kandi kumenyana n'abatanga akazi bakora mu ngeri zinyuranye zijyanye n'ibyo biga.

Uwitonze Denyse yagize ati 'Aya ni amahirwe twabonye yo guhura n'abatanga akazi nk'abanyeshuri bitegura gusoza amasomo. Ubumenyi dukura mu ishuri byadufashije kumenya icyo tugiye kubukoresha mu muryango mugari. Twamenye ibibazo bihari tubihuza n'ubumenyi dufite tumenya uko ibyo babyitwaramo mu kazi'.

Ukurikiyeyezu Anaclet wiga imibare muri AIMS Rwanda na we yavuze ko Ecobank yamufashije gusobanukirwa uko ku isoko ry'umurimo bimeze.

Ati 'Nabashije kuganira na Ecobank bambwira akazi ababasesengura imibare baba bafite, ibiri ku isoko bikenewe kwitabwaho cyangwa se akazi gahari. Ikindi nungutse ni ukugira address z'abatanga akzi ku buryo bizamfasha kwisanga ku isoko ry'umurimo nyuma yo gusoza amasomo'.

Ecobank ni banki mpuzamahanga ikorera mu bihugu 36 harimo n'u Rwanda yafunguyemo ishami mu 2007. Muri Afurika y'Iburasirazuba ikorera mu bihugu bya Uganda, u Burundi, Kenya, RDC na Tanzania. Ahandi muri Afurika ikorera ni muri Guinée-Bissau, Sierra Leone, Liberia, Côte d'Ivoire, Burkina Faso, Ghana, Togo, Bénin, Niger, Nigeria, Cameroun, Chad, Guinée équatoriale na Sao Tomé-et-Principe.

Hari kandi Gabon, Congo Brazzaville, Sanatarafurika, Sudani y'Epfo, Sénégal, Zambia, Malawi, Zimbabwe, Cape Vert, Guinea, Mali, Gambia na Mozambique n'ibindi.

Ecobank inafite ibiro biyihagarariye muri Ethiopia (Addis Ababa), Afurika y'Epfo ( Johannesburg) , u Bushinwa ( Beijiing), u Bufaransa (Paris), u Bwongereza (London) no muri Leta Zunze Ubumwe z'Abarabu ( Dubai).

Pauline Nakato yavuze ko abanyeshuri baganiriye yasanzze bafite ibitekerezo byiza bikenewe mu kazi

Ecobank yasobanuriye abanyeshuri uko isoko ry’umurimo rihagaze

AIMS Rwanda yashimiye Ecobank ubufatanye bwayo mu gufasha abanyeshuri bayo

Iki gikorwa cyanitabiriwe n’ibindi bigo bitanga serivise z’imari

Abanyeshuri ba AIMS Rwanda bahujwe n’abatanga akazi

Bigoranye, APR BBC yatangiye ijonjora rya BAL itsinda US Monastir yo muri Tunisia amanota 89-84.

Kuri uyu wa Gatandatu tariki ya 4 Gicurasi 2024 ni bwo hatangiye imikino y’ijonjora rya BAL mu itsinda rya Sahara (Sahara Conference), bahatanira itike y’imikino ya nyuma ya BAL izabera i Kigali muri Kigali Arena mu mpera z’uku kwezi.

Iri tsinda ririmo gukinira muri Senegal muri Dakar Arena, APR BBC yakinaga na Monastir mu mukino utari woroshye.

Abakinnyi barimo Axel Mpoyo, Adonis bagize agace ka mbere keza batumye APR BBC ikarangiza inganya na Monastir amanota 20-20.

APR BBC yagize ingangiriro nziza z’agace ka kabiri, aho yagendaga imbere ya US Monastir, gusa iyi kipe yo muri Tunisia yaje kujya imbere ya APR ubwo hari hasigaye iminota 5. Amakipe yagiye kuruhuka Monastir ifite 40-39 ya APR BBC.

Abasore ba APR BBC ntabwo bahiriwe n’agace ka gatatu kuko wabonaga ubwugarizi bwa yo budakora neza, batsindwa amanota 3 inshuro nyinshi ni mu gihe bo abarimo Adonis Filer yari yabangiye. Agace ka gatatu karangiye US Monastir ikiyoboye n’amanota 55-52.

Abasore ba APR BBC bagarutse mu gace ka nyuma ari ugupfa no gukira. Bageze aho bafata US Monastir ariko iza kongera kubasiga kugeza ubwo hari hasigaye amasegonda 4 ari 78-75.

Aha ni ho Umunyamerika, Noel Obadiah yarokoye APR BBC ubwo yahitaga atsinda amanota 3 maze iminota isanzwe y’umukino irangira ari 78-78. Hitabajwe iminota y’inyongera maze APR BBC icyura umukino ku manota 89-84.

APR BBC izasubira mu kibuga ku Cyumweru, tariki ya 5 Gicurasi saa Kumi n’Igice, ihura na Rivers Hoopers yo muri Nigeria.

Uyu musore wize umuziki ku ishuri rya muzika rya Nyundo, yabwiye InyaRwanda ko ukwezi kwari gushize amasezerano ye y'umwaka arangiye. Ariko ko atifuza gukomeza gukorana na Country Records, kuko yamaze gushinga 'Studio' ye bwite.

Ni studio avuga ko iri ku rwego rwiza, izagira uruhare mu kuvugurura umuziki w'u Rwanda, kandi mu gihe kiri imbere azayimurikira Abanyarwanda n'abandi.

Yavuze ko yahisemo gutangira kwikorera mu rwego rwo gukuza umwuga we. Ati 'Ni byiza ko nangira kugerageza ibintu byanjye. Gukorera abandi nabyo ni byiza ariko kwikorera ntako bisa. Ntekereza ko ari studio izaba iri ku rwego rwiza, kandi yamaze gutunganywa, hasigaye imirimo ya nyuma.'

Uyu musore wakoze indirimbo nka 'When She's Around' ya Bruce Melodie na Shaggy, yavuze ko ashinguye ikirenge muri Country Records akoreyemo indirimbo 100, zirimo indirimbo 40 zagiye hanze, yaba mu buryo bw'amajwi no mu buryo bw'amashusho.

Ati 'Nizere ko nagerageje gukora ibyo nasabwaga mu gihe cy'umwaka umwe. Imibare mfite ya hafi mbona ko nakoreyemo indirimbo 40 zamaze gusohoka, ariko hari imishinga y'izindi ndirimbo 60 zitarajya hanze, nazo zizakomeza gukorwa.'

Uyu musore avuga ko afite Album z'abahanzi banyuranye, kandi hari n'indirimbo ebyiri yakoranye na Bahati wo muri Kenya ubwo yari kumwe na Bruce Melodie.

Uyu musore yagize izina rikomeye mu batunganya indirimbo mu Rwanda, nyuma y’uko arambitse ikiganza ku ndirimbo ‘Funga Macho’ ya Bruce Melodie.

Yabaye ikimenyabose, nyuma y'uko Shaggy wamamaye ku Isi ahuje imbaraga na Bruce Melodie basubiramo iyi ndirimbo 'When she's around', ndetse baje no kuyishyira mu rurimi rw'Igifaransa mu rwego rwo kwagura imbago z'ayo. 

Iyi ndirimbo yatumye Bruce Melodie ataramira ku nshuro ye ya mbere muri Leta Zunze Ubumwe za Amerika, ndetse agaragara mu biganiro bikomeye muri kiriya gihugu nka 'Good Morning'.

Yanamushyize ku rundi rwego abasha kuba umuhanzi wa mbere w'umunyarwanda wagize indirimbo yashyizwe ku rutonde rwa Billboard.

Mu kiganiro cyihariye na InyaRwanda, Prince Kiiiz yavuze ko n’ubwo hari abavuga ko akiri umwana, ariko ibikorwa bye byagaragaye kuri Billboard.

Ati “Ndumva nshaka gukomeza kuba umwana nkora utwo tuntu twihariye…Nanjye narabibonye kuri ya shene yabo [Ya 1:55 Am bavuga ko ari umwana], bagereranya, ariko njye nta kintu bimpinduraho, akazi ni akazi.”

Muri uyu mwaka, uyu musore amaze gukora indirimbo eshatu z’abahanzi banyuranye ariko kandi yanagize uruhare mu gukora indirimbo ebyiri ziri kuri Album ya Papa Cyangwe.

Kandi yumvikanisha ko mu mpeshyi y’uyu mwaka wa 2024, afite indirimbo nyinshi ari gukoraho zirimo na Album ya Bruce Melodie ‘iriho indirimbo nyinshi’.

Muri Werurwe 2024, yajyanye na Bruce Melodie ndetse na Kenny muri Kenya mu bikorwa byari bishamikiye ku kumurika ibihangano by'uyu muhanzi.

Mu ndirimbo Prince Kiiiz akora, ahanini zumvikanamo umwihariko n'ibicurangisho bidasanzwe byumvikana mu ndirimbo zo mu Rwanda ari nacyo ashimangira ko gifasha ibikorwa bye kutisanisha n'ibyakozwe n'abandi. 

Mu Rwanda hari abahanzi bakomeye batarakorana nawe. Ariko bake bakoranye nawe bagaragaza ko afite ahazaza heza.

Atangira urugendo rwa 'Production' yahereye ku gutunganya indirimbo nyinshi zitandukanye ariko iyakunzwe cyane ni ''Funga Macho'' ya Bruce Melodie yakoze mu 2022. 

Yanakoze indirimbo ya Alyn Sano yitwa 'Boo and Bae' aho yagize uruhare runini mu myandikire yayo ndetse no kuyirangiza. Hari kandi 'Addicted' ya Kenny Sol n'iya Calvin Mbanda yitwa 'Joliki'.

Prince Kiiiz avuga ko afite intego yo 'gushyira umusanzu ku ruganda rw'umuziki nyarwanda no guhindura imikorere imwe n’imwe ku bijyanye no kwandika indirimbo ndetse na mix na mastering aho byari bisanzwe bizwi ko zirangirizwa ahandi, njye nkagerageza kujya mbikora byose; mbigira nk’umwihariko wanjye.'

Prince Kiiiz yasezeye muri Country Records nyuma y'umwaka wari ushize ari umukozi wayo 

Prince Kiiiz yatangaje ko avuye muri Country Records akoreyemo indirimbo 100

Prince Kiiiz yavuze ko yishimira igihe yari amaze akorana na Noopja, ariko ko igihe kigeze kugira ngo agire studio ye 

Ubutumwa bwa Kiiiz asezera muri Country Records

KANDA HANO UREBE AMASHUSHO Y'INDIRIMBO 'WHEN SHE'S AROUND'

Uruhererekane rw'abacuzi b'umuziki bagiye batanga umusanzu wo hejuru ugiye kuruvuga ntiwabona amahitamo kuko biragoye ariko hari abo twabahitiyemo babaye ibishyitsi bikomeye mu gutunganya umuziki, ariko abenshi bakanatanga umusanzu mu kurema impano nshya.

Harimo kandi abafite umurishyo wagiye uyobokwa byo ku rwego rwo hejuru, bamwe bakaba bakinakora kugera n'ubu. Harimo n'abari kugerageza kongerera ibirungo umuziki nyarwanda bifashishije injyana gakondo zo mu Rwanda.

Mu muziki nyarwanda, iyo uvuze ku bawutunganya by'umwihariko bagize igikundiro kiri hejuru yaba mu kuyobokwa ndetse n’abo bakorera no mu bakunzi b'umuziki nyarwanda, hari abaza ku isonga:

1.  Lick Lick

Uru ruhererekane ruhera kuri Lick Lick wabaye ikimenyabose agashyira ukuboko kuri nyinshi mu ndirimbo zakunzwe kugeza n'ubu.

Amakuru ahari ni uko umubano we na Meddy waje gukomera kubera ko bahuje ku buryo hari nyinshi mu ndirimbo yakoreye uyu muhanzi atamwishyuje.

Yaje kwerekeza muri Leta Zunze Ubumwe za Amerika agira uruhare rukomeye mu gufasha abahanzi bakomeye nka Meddy, The Ben, K8 Kavuyo, Princess Priscillah n'abandi.

2.  Fazzo

Ubwo byari bigeze mu myaka ya 2010, Lick Lick amaze kujya muri Amerika, Fayzo ari mu bahise batangira kwiyerekana.

Yaje kumurika impano nshya n'ubu iri ku ruhembe rwo hejuru, Bruce Melodie, aho yamukoreye nyinshi mu ndirimbo zakunzwe nka “Uzandabure”, “Indorerwamo”, “Ndakwanga” n'izindi.

Uyu mugabo kuri ubu ukiri mu mwuga yakoreye muri Unlimited, Touch Records, Infinity, Ibisumizi na Feliz Music Empire. Yakoze indirimbo zirimo “Ku Musenyi” ya Jay Polly, “Kelele” ya Urban Boyz na “Nkwiye Igihano” ya Riderman.

3.  Pastor P

Ndanga Bugingo Patrick [Pastor P] winjiye mu byo gutunganya umuziki muri 2005, na we ari mu bashyize itafari rikomeye kuri uru ruganda aho ari mu batangije ‘Narrow Road Music’.

Uyu mugabo wahoze ari umukinnyi wa Basketball yaje kwisanga mu muziki, benshi baramuyoboka nka Miss Shanel yakoreye “Ndarota”, Tom Close “Sinarinkuzi”, Miss Jojo “Beletilida”.

Yakoranye bya hafi na King James guhera kuri “Narashize” n'izindi nyinshi. Si uwo muhanzi gusa, ahubwo yanakoreye abandi banyuranye barimo abo yasangaga hanze n’abo yakoreraga mu Rwanda.

Kuri ubu akomeje guharanira kubona ikintu cyatanga igisubizo kirambye ku muziki nyarwanda, areba niba yashyira injyana gakondo nyarwanda mu nzira ijyanye n’aho isi igeze.

4.  Zizou Al Pacino

Yamamaye cyane mu gutunganya umuziki aho imyaka irenga icumi ishize abikora kandi neza, gusa izina rye ryaje kuzamuka kurushaho kubera ibihangano yahurijemo abahanzi benshi.

Wabaye umwihariko we ndetse biramuhira kugeza n'ubu aracyabikora. Umurishyo we watumye akorera mu nzu zitandukanye zitunganya umuziki.

Zimwe mu ndirimbo uyu mugabo atazibagiranamo harimo “Bagupfusha ubusa” yavugishije benshi hibazwa ku butumwa itanga cyane ko abantu bari batarumva neza igisobanuro cy'umuziki. Hari kandi “Niko Nabaye” na “Vuba Vuba”.

Uretse umuziki, Zizou afite ukuboko mu ruganda rwa sinema kimwe n'ibirebana no kuvanga umuziki.

5.  Bob Pro

Imyaka irenga 15 irashize uyu mugabo yinjiye mu muziki nk'uwutunganya, ibyo akora akaba yarabyize mu Bubiligi. 

Uretse kuba yaragize uruhare rukomeye mu muziki wa nyakwigendera Yvan Buravan, uyu mugabo yatunganyije indirimbo zirimo “Suzanna” ya Sauti Sol. Umwihariko we ni ukuyungurura no kunononsora amajwi y'indirimbo (Mastering).

Bob Pro afasha izindi nzu zitunganya umuziki yaba Country Records, 1:55AM na Kina Music mu kunononsora indirimbo baba bakoze.

6.  Piano

Yanyuze muri Studio zikomeye nka Bridge Records na Super Level, akorana n'abahanzi bakomeye kuva mu myaka irenga 10 ishize.

Mu ndirimbo zamamaye yakoze harimo “Ndumiwe” ya Bruce Melodie, “Iyaminiye” ya K8 Kavuyo, “Ihangane” ya Uncle Austin, “Soroma Nsorome” ya Urban Boy n'izindi.

7.  Ishimwe Clement

Biragoye kuvuga ku rugendo rw'uyu mugabo ukiri muto ariko wakomeje gukoresha ubuhanga afite mu gutunganya umuziki akabihuza n'ubucuruzi ndetse bikamukundira.

Uyu ni we nyiri Kina Music, akaba yarayitangiye mu myaka igera kuri 15 yatambutse. Iyi nzu itunganya umuziki ikanareberera abahanzi, yanyuzemo abahanzi batari bacye kuva yatangira.

Kugeza ubu Clement ari muri bacye wavuga ko bahiriwe n'umuziki aho yawukuyemo agatubutse ndetse n'umufasha Butera Knowless.

8.  Madebeats

Mu mwaka wa 2016 uyu musore yinjiye mu ruganda rw'umuziki mu Rwanda azana udushya mu kuwutunganya. Yaje gutangira gukorera Monster Records.

Nyuma yuko yari amaze kugira abahanzi bizerera mu mpano ye, yaje gutangira kwikorera ku giti cye, ubwo hari mu 2018.

Yatunganije indirimbo nka “Loose Control” ya Meddy na The Ben, “Superstar” ya Social Mulla, “Igikomere” ya Tom Close na Bull Dogg, “Like a Queen” ya Lil G, “In a Million” ya Safi na Harmonize.

9.  Element Eleeeh

Yinjiye by'umwuga mu gutunganya umuziki ubwo yari afite imyaka 20, icyo gihe yahereye ku ndirimbo ya Bruce Melodie yitwa “Henzapu” hari muri Werurwe 2020.

Kuva icyo gihe izina rye ryatangiye kugira igisobanura gikomeye ku muziki nyarwanda yakoreraga muri Country Records. Kuva icyo gihe ubaruye indirimbo yakoze byasaba igihe.

Igitangaje ni uko umushinga wose ashyizeho akaboko ugera kure. Bidatinze, kuva atangiye gukora na 1:55AM yaje gushyira hanze indirimbo yakomotse ku nkuru ye bwite y'urukundo.

Kuva ubwo yatangiye gufatanya gutunganya umuziki no kuririmba ku giti cye ndetse muri iki gihe arimo kwitegura gutangira kwikorera ku giti cye nka Producer n’Umuhanzi wigenga.

10.              Prince Kiiiz

Ubwo Eleeeh yavaga muri Country Records byari bigoye kumvisha umuntu ko hari uwamukorera mu ngata, nyamara byafashe igihe gito cyane.

Kiiiz yazanye ubundi buryo bwihariye bwatumye benshi batangira kwishimira ibikorwa bye, atangira kujya anegukana ibihembo.

Indirimbo “Funga Macho” yamushyize mu bo isi yerekejeho amaso kuko yabereye umugisha Bruce Melodie igatuma ahuza na Shaggy bakayisubiranamo, Kiiiz akaba ari we wongera kubahuriza amajwi yayo.

Kuri ubu mu ba Producers bagezweho, Kiiiz aza imbere, ibyo akora akaba yarabyize mu ishuri ry'umuziki rizwi nka Nyundo.

Zizou Al Pacino azwiho umuvuno wo guhuriza abahanzi mu ndirimboClement Ishimwe yahuje ubuhanga mu byo gutunganya umuziki n’ubushabitsi biramuhiraElement amaze kugwiza ibigwi kuva muri 2020, indirimbo nyinshi akozeho zigera kure Prince Kiiiz yabaye umusimbura udasanzwe muri Country Records 

Ibi byabaye tariki ya 3 Gicurasi 2024 mu rwego rwo kwifatanya n'abandi Banyarwanda kwibuka ku nshuro ya 30 Jenoside yakorewe Abatutsi mu 1994.

Ubuyobozi bwa Old Mutual Insurance Rwanda ndetse n'abakozi biganjemo urubyiruko, babanje gukora urugendo rwo kwibuka, nyuma basura ibice binyuranye by'Urwibutso rwa Kibuza, bashyira indabo kuri uru rwibutso ndetse bunamira inzirakarengane zirushyinguyemo.

Ubuyobozi bw'uru rwibutso bufatanyije na IBUKA mu Murenge wa Musambira, bwasobanuye uburyo Jenoside muri icyo gice yakoranywe ubugome bukabije aho ikahatwara ubuzima bw'abarenga 47.000 barushyinguyemo, bari batuye mu zahoze ari Komini Runda, Musambira, Taba ndetse n'ahandi.

Ku isonga ry'abagize uruhare rukomeye muri Jenoside muri icyo gice, harimo Akayesu Jean Paul wari Burugumesitiri wa Komini Taba watumije inama y'abaturage maze aza gufata umugore n'umugabo b'Abatutsi, abicira imbere y'abandi bari bitabiriye inama kugira ngo abatinyure gutangira Jenoside.

Hasobanuwe kandi uburyo umugore wamenyekanye ku izina rya Mukangango yiyambuye ububyeyi akajya yica abana b'abahungu abasekuye mu masekuru, abandi akabahuza n'ababica babatabye mu byobo ari bazima. Hari kandi abicishwaga ubuhiri ndetse n'abakubitwaga ku biti birimo imisumari aho yagize uruhare mu rupfu rw'abagera ku 100 harimo n'abo yiyiciye.

Nyuma yo gusura uru rwibutso, abakozi n'abayobozi ba Old Mutual berekeje ahari hateraniye abarokotse mu Mudugudu wa Mbari, hari n'ubuyobozi bw'ibanze, bafatanya mu gikorwa cyo kwibuka. Banaremeye ibyiganjemo ibyo kurya imiryango 12 y'abarokotse Jenoside yakorewe Abatutsi batujwe muri uyu Mudugudu wa Mbari.

Aba baremewe biganjemo ababyeyi bageze mu zabukuru, bishimiye cyane iyi nkunga bahawe kuko imibereho isanzwe ya buri munsi rimwe na rimwe ibagora bitewe n'intege nke.

Niyonsenga Rosette yagize ati 'Twishimiye igikorwa badukoreye cyo kuza kudufata mu mugongo, byadufashije kudaheranwa n'agahinda gaterwa n'icuraburindi twanyuzemo.Tugira ibihe bitugoye hano muri uyu mudugugu tubamo kuko amasambu yacu aba kure, imibereho ikatugora. Harimo abakecuru n'abandi bamugaye batabasha gukora n'abagiye gukora hababera kure kandi imbaraga aba ari nke. Ibi bigenda biduhumuriza iyo tubonye abadusura.”

Bizimungu Étienne na we uhatuye ndetse wagizwe imfubyi na Jenoside, yavuze ko nk'imfubyi banezezwa no kubona hari ababitayeho ndetse ko byose bikomoka ku buyobozi bwiza bwongeye guha Abanyarwanda uburenganzira bungana mu Gihugu cyabo.

Muhamadi Nshimiyimana wari uhagarariye Umuyobozi Mukuru wa Old Mutual Insurance Rwanda, yavuze ko kwibuka Jenoside yakorewe Abatutsi binaha Abanyarwanda inshingano zo kwita ku bayirokotse.

Ati “Kwibuka inzirakarengane zazize Jenoside yakorewe Abatutsi mu 1994 ndetse no gukomeza imitima y'abarokotse biduhamagarira kubafasha mu isanamitima ndetse n'umubiri. Bamwe mu barokotse baracyahangana n'ibikomere by'umubiri, ihungabana, agahinda ko kubura ababo ari na ko kandi bakeneye ubufasha mu buvuzi, uburezi ndetse no kwiteza imbere mu buzima busanzwe.'

Yakomeje ati 'Ni inshingano zacu twese hamwe ndetse na bo muri rusange ko dufatanya gutanga inkunga mu rwego rwo kubafasha gukomera ndetse no kumererwa neza.'

Nshimiyimana yashimiye kandi iyi miryango basuye uburyo itaheranwe n'amateka ahubwo igaharanira kubaho mu rugendo rutari rworoshye yanyuzemo rwuzuye ibikomere yasigiwe na Jenoside yakorewe Abatutsi.

Old Mutual Insurance Rwanda ni ishami ry'ikigo mpuzamahanga cya Old Mutual Group gitanga serivisi z'imari n'iz'ubwishingizi mu bihugu 14 byiganjemo ibya Afurika nka Afurika y'Epfo, Botswana, Eswatini, Ghana, Kenya, Malawi, Namibie, Nigerie, u Rwanda, Sudani y'Epfo, Tanzanie, Uganda, Zimbabwe no mu Bushinwa.

Abakozi ba Old Mutual Insurance Rwanda bashyize indabo ku rwibutso rwa Jenoside yakorewe Abatutsi ruri muri aka gace

Abakozi ba Old Mutual Insurance Rwanda basobanuriwe amateka ya Jenoside yakorewe Abatutsi muri aka gace

Hatanzwe ubuhamya busobanura amateka ya Jenoside yakorewe Abatutsi muri aka gace

Mu byatanzwe harimo n’ibiribwa

Iki gikorwa cyabimburiwe n’urugendo rwo kwibuka

Nshimiyimana yavuze ko kwibuka Jenoside yakorewe Abatutsi ari inshingano za buri Munyarwanda

Ubuyobozi bw’Umurenge wa Musambira bwashimiye Old Mutual Insurance Rwanda

Hakozwe n’urugendo mu rwego rwo kwibuka abavukijwe ubuzima bazira Jenoside yakorewe Abatutsi mu 1994

Abakozi ba Old Mutual Insurance Rwanda bunamiye abazize Jenoside yakorewe Abatutsi bashyinguye muri uru rwibutso

Ni ibikubiye mu butumwa yatangiye mu muhango w'ihererekanyabubasha ku buyobozi bucyuye igihe bw'Urwego rutunganya imikorere y'abagenagaciro ku mitungo itimukanwa mu Rwanda ndetse n'ubushya bwashyizweho n'iteka rya Minisitiri w'Intebe no 012/03 ryo ku wa 25/03/2024.

Muri uyu muhango wabaye ku wa Gatanu, tariki ya 3 Gicurasi 2024, Umunyamabanga wa Leta muri Minisiteri y'Ibidukikije, Dr Uwera Claudine, yibukije abagenagaciro bitabiriye iki gikorwa ndetse n'ubuyobozi bwabo, ko Leta y'u Rwanda yashyizeho itegeko rigenga umwuga w'igenagaciro ku mutungo utimukanwa mu rwego rwo kugena imikorere y'uyu mwuga, mu kugabanya ibibazo byawugaragaragamo, bityo ko bakwiye kuziba icyuho cy'aho bitaranozwa neza.

Ati ''Nk'uko mwese mubizi, Leta y'u Rwanda yashyizeho itegeko rigenga umwuga w'igenagaciro ku mutungo utimukanwa mu rwego rwo kugena imikorere y'umwuga no kuwuha umurongo mu mwaka wa 2010. […] icyo gihe icyari kigamijwe ni ukugira ngo ibibazo byagaragaraga mu kugena agaciro k'imitungo bishobore kuba byabonerwa igisubizo.''

Yongeyeho ati “Twagiye twumva aho ibiciro byagendaga bigenwa nabi ingaruka zose zagiye zihaba, ntibigira ingaruka gusa ku bagombaga kugenerwa agaciro (bene umutungo), bigira ingaruka ku bukungu bwose bw'igihugu […] turasaba ubuyobozi bushya ko bwashyiraho uburyo bwo kureba ahakiri icyuho hose nk'uko nari maze kubivuga, ndetse n'imikorere itari iya kinyamwuga ikaba yahagarara.''

Umuyobozi w'Urugaga rw'Abakora Umwuga w'Igenagaciro (IRPV), Mugisha John, yashimiye abagize komite icyuye igihe kuko bakoze byinshi mu iterambere ry'uru rugaga, dore ko habayeho n'ubwiyongere bw'abagenagaciro b'umwuga bakaba bageze kuri 243, mu gihe mu 2010 bari 46.

Mu bindi byakozwe na komite icyuye igihe ni uko mu myaka yo hambere uru rugaga rugitangira hari hariho ikibazo cy'abiyitiriraga kuba abagenagaciro b'umwuga, ariko ubu hakaba harubatswe sisitemu igaragaza igenagaciro ryakozwe, ku buryo utari umugenagaciro w'umwuga adashobora kuyigiraho uburenganzira.

Hanashyizweho kandi ubwisungane mu kwivuza mu kwita ku mibereho myiza y'abagenagaciro b'umwuga, aho urugaga rugira uruhare runini kugira ngo abanyamuryango barwo ndetse n'abo mu miryango yabo babashe kwivuza neza.

Hashyizweho kandi ubufatanye bwa IRPV n'izindi ngaga zirimo n'izo mu mahanga nko muri Kenya, Afurika y'Epfo, Uganda n'ahandi, ndetse ku rwego rwa Afurika, IRPV yinjira mu Muryango African Real Estate Society.

IRPV kandi yakoze inyigo ku bibazo bizibandwaho mu kubikemura mu 2024, ku ikubitiro hakaba hazibandwa ku gukemura ibyakunze kuvugwa muri cyamunara zo mu Rwanda, aho nk'ugiye guterezwa umutungo usanga uteshwa agaciro nk'iyo ashaka kwishyura ikigo cy'imari nka banki, ku buryo umutungo we ugurishwa hitawe gusa ku mafaranga abereyemo banki, hatitawe ku gaciro gakwiye k'umutungo ugurishwa.

Hanashyizweho kandi amahugurwa ku bagenagaciro b'umwuga kugira ngo babashe no kujya bagena agaciro k'imitungo yimukanwa mu gihe bibaye ngombwa, kuko na bo mu bihe bitandukanye bagiye basabwa gutanga iyo servisi kandi itari isanzwe mu zo bibandaho.

Haracyari imbogamizi

Urugaga rw'Abakora Umwuga w'Igenagaciro (IRPV) rwagaragarije Minisiteri y'Ibidukikije ko hakiri imbogamizi mu mikorere yarwo, rukifuza ko ku bufatanye bw'iyi Minisiteri ndetse na komite nshya igiyeho, bagira uruhare mu kuzikuraho kugira ngo hanozwe ikorwa ry'uwo mwuga.

Zirimo kuba uru rugaga rwarahawe inshingano zo gutegura ibiciro fatizo mu kunoza uwo mwuga, ariko bikaba bisaba ingengo y'imari nini rudafite ku buryo kubitegura bitinda.

IRPV igaragaza ko ikora ibiciro fatizo hagendewe ku midugudu, ku buryo gufata imidugudu 14.837 yo mu gihugu ugafata nibura ibiciro fatizo 10 byo kwifashisha muri buri mudugudu wenda igiciro kikaba 5000 Frw kuri buri giciro fatizo, byasaba hafi miliyoni 800 Frw kugira ngo bikorwe.

Umuyobozi w'Urugaga rw'Abakora Umwuga w'Igenagaciro (IRPV), Mugisha John, yanakomoje ku kuba hakenewe imikoranire n'ibigo by'imari mu gukumira ruswa yagaragara hagenwa agaciro k'ibirimo imitungo itimukanwa.

Ati ''Hakenewe kunozwa imikoranire hagati y'abagenagaciro n'abafatanyabikorwa cyane cyane za banki n'ibigo by'imari, kugira ngo habe hajyaho amategeko n'amabwiriza aziba ibyuho bishobora kuvuka, bya ruswa mu mikoranire.''

Ikindi kandi ni uko IRPV yifuza kubika amakuru cyane cyane ku mitungo itimukanwa, ku buryo byafasha abashoramari dore ko bakenera amakuru atandukanye kugira ngo bashore imari ahantu runaka.

Muhire Jean Claude ahagarariye komite nshya y'Urwego rushinzwe gutunganya imikorere y'abagenagaciro (Regulatory council), yashimiye bagenzi be bo muri komite icyuye igihe ko bakoze ibishoboka byose mu guteza imbere uru rugaga, anabizeza ko we na bagenzi be bagiye gufatanya mu nshingano bazagira uruhare mu gukemura ibibazo bikibangamiye abagenagaciro b'umwuga mu Rwanda.

Abandi bagize iyi komite nshya:

• Nishimwe Marie Grace: Umuyobozi w'Urwego rushinzwe gutunganya imikorere y'abagenagaciro akaba ahagarariye ikigo cy'ubutaka
• Muhire Jean Claude: Umuyobozi Wungirije, ahagarariye abagenagaciro
• Batamuriza Faith: Ugize urwego, ahagarariye Banki Nkuru y'u Rwanda
• Ndacyayisenga Esther: Ugize Urwego, Ahagarariye Minisiteri Ifite ibikorwa remezo mu nshingano
• Uwimana Naicolas: Ahagarariye Ishyirahamwe ry'Amabanki mu Rwanda
• Kwizera Alphonse: Ahagarariye Urugaga rw'Abikorera- PSF
• Dr. Iyandemye Samuel: Ahagarariye abagenagaciro

Umuyobozi w’Urugaga rw'Abakora Umwuga w'Igenagaciro (IRPV), Mugisha John, yanakomoje ku kuba hakenewe imikoranire n'ibigo by'imari mu gukumira ruswa yagaragara hagenwa agaciro k'ibirimo imitungo itimukanwa

Habayeho ihererekanyabubasha kuri komite nshya na komite icyuye igihe

Iki gikorwa kitabiriwe na benshi mu bagenagaciro b’umwuga

Abagize imikorere myiza na IRVP bagenewe ibihembo by’ishimwe

Iyi site izajya ikorerwaho ibizamini byo gutwara ibinyabiziga hifashishijwe ikoranabuhanga yafunguwe ku mugaragaro na Polisi y'u Rwanda ku bufatanye n'ikigo Irembo kuri uyu wa 3 Gicurasi 2024.

Mu rwego rwo korohereza abashaka gukora ibi bizamini hifashishijwe ikoranabuhanga, muri serivisi za Polisi ziba ku rubuga rwa Irembo, hongerewemo iyo gusaba gukorera ikizamini kuri iyi site.

Ibizamini bizajya bikorerwa kuri iyi site biri mu byiciro bitanu by'impushya: A, B, C, D na D1, kandi ukenera iyi serivisi guhera kuri uyu wa 3 Gicurasi azajya yishyurira rimwe ku rubuga Irembo gusa ibiciro birahinduka bitewe n'icyiciro.

ACP Rutikanga yasobanuye ko igiciro cyo kwiyandikisha ku bantu bashaka gukora ibizamini byo gutwara ibinyabiziga ari ibisanzwe, gusa ibyo kwishyura imodoka yo gukoresha muri iki kizamini bizajya munsi y'ibisanzwe.

Yagize ati 'Itegeko rigena ibiciro ntiryahindutse. Ikizahinduka ni igiciro cy'imodoka ukoresha. Uko abantu bazajya buzuza imyirondoro yabo mu Irembo basaba, bazajya babona ibiciro. Gusa icyo navuga aha ngaha ni uko biri munsi y'ibisanzwe.'

Ubusanzwe, abakora ikizamini cyo gutwara imodoka ntoya (icyiciro B) bishyuraga amafaranga ibihumbi 50 Frw by'imodoka bakoresha. Agenda yiyongera ku byiciro biri hejuru y'iki.

Site nshya ya Busanza yamaze gufungurwa

Abifuza uruhushya rwo mu cyiciro A bari mu bemerewe gukorera kuri site ya Busanza

Abakorera i Busanza bazajya bishyura imodoka zo mu cyiciro B amafaranga ari munsi y’asanzwe

Ibiciro by’imodoka bitandukana hashingiwe ku busumbane bw’ibyiciro