Category: Uncategorized

Banki Nkuru y'Igihugu yazamuye urwunguko rwayo ruva kuri 6,75% rwari rwashyizweho mu mezi atatu ashize, rushyirwa kuri 7,25% mu guhangana n'izamuka ry'ibiciro ku masoko kugira ngo bigume mu mbago za BNR ziri hagati ya 2% na 8%.

Korali Shalom Choir ikorera umurimo w’ivugabutumwa muri ADEPR Nyarugenge yashyize ahagaragara indirimbo nshya yise 'Yaranguraniye', ivuga ku murimo w’agakiza Yesu Kristo yarangije ku musaraba.

Shalom Choir bati: “Ijambo 'Yaranguraniye' risobanura ko igihano cy’ibyaha twari dukwiriye, ari cyo rupfu, Yesu yagishyize ku bitugu bye, aracyishyura ku musaraba. Bibiliya ivuga iti: 'Ibihembo by’ibyaha ni urupfu' (Abaroma 6:23), ariko kubera urukundo rwe, Yesu arabihindura, atuvana mu rupfu aduha ubugingo buhoraho.

Nk’uko yabivuze muri Yohana 19:30 ati: 'Birarangiye.' Yarangije kwishyura igiciro cyacu. Twari abo gupfa, ariko we arabihindura aduha ubugingo. Twari abo kubaho mu rubanza, ariko aduha ubuntu n’agakiza. Si ibyo gusa, indirimbo irerekana ko 'Yaranguraniye' atari ku byerekeye ubuzima bw’iteka gusa, ahubwo no ku buzima bwa buri munsi: Hari abari mu kwiheba, ariko Yesu abaha ibyiringiro.

Hari imfubyi n’abapfakazi bumvaga bonyine, ariko muri Kristo babona Umubyeyi utajya ubatererana (Zaburi 68:5). Hari abafite umubabaro n’imitwaro iremereye, ariko Yesu arabahumuriza akabaha amahoro (Matayo 11:28)”.

Korali Shalom ivuga ko iyo umuntu amaze kwakira Yesu, ahindura amateka ye: amarira akayagira ibyishimo, umubabaro akawugira umunezero, kwiheba akaguhindura ibyiringiro. Ni yo mpamvu iyi ndirimbo ari indirimbo yo gushima no guhamya ihinduka Kristo akorera mu buzima bw’abamwakiriye.

Umuyobozi w’indirimbo muri Korali Shalom, Tuyisenge Innocent, yagize ati “Iyo tumaze kubona Yesu n’agakiza, ahindura amateka yacu, agahindura amarira akayagira ibyishimo, umubabaro akawugira umunezero. Ni yo mpamvu tumushima, kuko yaduhinduriye ubuzima, aduha ubugingo n’amahoro.”

Shalom Choir isobanura ko umwihariko wa 'Yaranguraniye' ari uko ishyira mu mucyo ihinduka ribonerwa muri Kristo: Ihinduka riva mu rupfu rijya mu bugingo; Ihinduka riva mu kwiheba rijya mu byiringiro; Ihinduka riva mu mubabaro rijya mu munezero n’amahoro.

Aba baririmbyi b’i Nyarugenge bavuze ko “Yaranguraniye” atari indirimbo yibutsa gusa ibyabaye ku musaraba, ahubwo “ni indirimbo ihamya n’ibyo Kristo akomeje gukora mu buzima bwa buri munsi. Igaragaza ko agakiza atari inkuru ya kera gusa, ahubwo ari imbaraga zikora no muri iki gihe.”

Nyuma y’igitaramo gikomeye bakoze muri BK Arena n’ikindi bakoreye muri ADEPR Nyarugenge, Shalom Choir yatangarije inyaRwanda ko mu mwaka wa 2026 bafite intego yo gukomeza kwamamaza ubutumwa bw’ihinduka ribonerwa muri Kristo.

Mu bikorwa bateganya harimo: Gutegura ibitaramo byo kuramya no guhimbaza Imana bizafasha benshi guhura n’Imana mu buryo bwimbitse; Gukomeza gusohora indirimbo zishingiye ku Ijambo ry’Imana, zifite ubutumwa bwubaka kandi buhumuriza imitima; Kwegera abantu banyuze mu bihe bikomeye, babereka ko muri Kristo hari ihinduka nyaryo.

Bafite kandi umushinga wiswe Shalom Charity, uzibanda ku ivugabutumwa rinyuze mu bikorwa by’urukundo no gufasha abatishoboye, hagamijwe gusangira ibyishimo no kwerekana urukundo rwa Kristo mu bikorwa bifatika.

Icyifuzo cya Shalom Choir ni uko abazumva indirimbo zabo batazazumva nk’umuziki gusa, ahubwo bazasobanukirwa ubutumwa bwihishe inyuma yazo. Bifuza ko abantu bamenya ko Yesu yabahinduriye amateka, kandi ko mu buzima bwabo ashobora guhindura byose.

Umukinnyi wa filime nyarwanda Kayitesi Alice, wamenyekanye cyane nka Linda yashyize hanze filime nshya yise 'Inyenyeri y’Ibanga’ igaruka ku nkuru ishingiye ku rukundo ruvanze n’inyungu n’ingaruka zishobora guterwa no kubaka umubano udashingiye ku kuri.

Mu kiganiro yagiranye na ISIMBI, Linda yavuze ko iyi filime yibanda ku nkuru z’abashakana cyangwa babana n’abandi bafite imigambi itari iy’urukundo nyakuri, ahubwo bagamije inyungu zituruka ku mitungo.

Yagaragaje ko ari inkuru ishingiye ku buzima busanzwe, aho hari abinjira mu rushako bagamije kugera ku mitungo cyangwa imibereho myiza, aho kuba ari urukundo rubahuza.

Ati 'Ni inkuru igaragaza ibintu bibaho koko. Hari abashaka abo babana bagamije inyungu, ariko bikarangira bibagizeho ingaruka zitari nziza.'

Yakomeje avuga ko intego nyamukuru y’iyi filime ari ugutanga ubutumwa bwigisha abantu kugira ubushishozi mu rukundo no mu mubano, ndetse no kumenya agaciro kabo. Yibanze cyane ku gushishikariza abagore n’abakobwa kwigira no kudategereza kubeshwaho n’abandi kugeza kubiguranisha amarangamutima yabo.

Yagize ati 'Ni ngombwa ko umuntu amenya gushaka no kurengera ibyo atunze, aho gutegereza ko hari uzabimugenera.'

Linda yavuze kandi ko iyi filime ari igice cy’umusanzu we mu guteza imbere sinema nyarwanda, cyane cyane binyuze mu nkuru zifite isomo rifatika ku buzima bwa buri munsi.

Yongeyeho ko yitaye cyane ku buryo inkuru itunganijwe, abakinnyi batoranywa n’uburyo amashusho yafashwe, kugira ngo filime igire ireme kandi ishobore kugera ku rwego mpuzamahanga ndetse ko abakunzi ba sinema bazayibonamo inkuru zibashishikariza gutekereza no gufata imyanzuro iboneye mu buzima bwabo.

Filime Inyenyeri y’Ibanga yamaze gutangira gushyirwa hanze ku rubuga rwa YouTube kuri shene ye yitwa Linda Media TV, aho hamaze gusohoka igice cya mbere.

Iki gice kigaragaramo abakinnyi bazwi cyane barimo Tukowote, Fabiola, Brenda na Keza bakinanye muri Umuturanyi, ndetse na Roxanne, Roxa, Steven n’abandi benshi.

Linda yasohoye filime ye bwite

Shampiyona y’icyiciro cya mbere mu Rwanda umwaka w’imikino wa 2025-26 irakomeza guhera ku munsi w’ejo hakinwa umunsi wa 21.

Uyu munsi wa 21, hateganyijwemo imikino ikomeye ishobora kugira ingaruka ku makipe ahataniye igikombe cya Shampiyona aho ikipe izakora ikosa ishobora gusigara mu gihe ushobora no gusiga ibintu bisubiye irudubi.

Al Hilal na Al Merreikh tube tuzishyize ku ruhande kuko zitazatwara igikombe, turebe ku makipe yo mu Rwanda.

Umukino wa mbere witezwe ni uwo Police FC izakiramo APR FC ejo saa cyenda kuri Kigali Pele Stadium.

Ubu APR FC ni yo kipe yo mu Rwanda iri imbere aho ifite amanota 38, Police FC ni yo iyikurikira ifite amanota 34 bivuze ko iramutse itsinze APR FC yahita igira amanota 37 hagasigaramo inota rimwe aho inafite umukino w’ikirarane.

Gutsinda kwa APR FC byaba bivuze ko bisa n’ibyarangiye kuri Police FC kuko kuzakuramo amanota 7 kuri APR FC ni ibintu byazagorana.

Undi mukino witezwe ni umukino wo ku Cyumweru, Rayon Sports ya 6 ku rutonde n’amanota 32 (ifite umukino umwe w’ikirarane) izakiramo Mukura VS ya 7 n’amanota 31.

Gutsinda uyu mukino kuri Rayon Sports yahita igira amanota 35 bivuze ko yaba yagiye mu makipe ahatanira igikombe ariko kuwutakaza byaba bivuze ko nayo irimo igenda ibura amahirwe ku gikombe.

Ingengabihe y’umunsi wa 21

Uko urutonde rwa shampiyona ruhagaze nyuma y’umunsi wa 20

Urukiko rw’Ibanze rwa Kicukiro rwanzuye ko urubanza ruregwamo abarimo Nizeyimana Didier uzwi nka Muchoma na Barafinda Sekikubo Fred rushyirwa mu muhezo ku bw’inyungu z’urukiko n’umutekano w’Igihugu.

Kuri uyu wa Kane tariki ya 19 Gashyantare 2026, ku rukiko rw’ibanze rwa Kicukiro habereye urubanza nshinjabyaha ruregwamo abarimo Barafinda, Muchoma, Patrick, Jutsin na Japhet bacyekwaho icyaha cyo gukwirakwiza amakuru y’ibihuha ashobora guteza imvururu cyangwa imidugararo muri rubanda, babinyujije ku miyoboro ya YouTube.

Mu cyumba cy’iburanisha, umucamanza yabajije Muchoma niba yiteguye kuburana akaniburanira kuko nta mwunganizi we wari uhari, avuga ko yiburanira kuko umwunganira akiri mu nzira kimwe na Barafinda wavuze ko na we yiburanira.

Ubushinjacyaha bwisunze ingingo y’131 y’imanza nshinjabyaha, aho umucamanza afite ubushobozi bwo gushyira urubanza mu muhezo, bwasabye ko uru rubanza rwabera mu muhezo kuko ibyaha bakurikiranyweho ari mbonezabupfura bishobora guteza umutekano mucye.

Umucamanza yabajije ababurana niba bemera ko rwabera mu muhezo, bavuga ko bifuza ko rwabera mu ruhame aho Muchoma we yavuze ko afite abantu baje bavuye muri Ambasade baje kumva urubanza rwe.

Nyuma yo kugenzura ubu busabe bwose, Umucamanza yafashe umwanzuro ko ku bw’Inyungu z’Urukiko n’Umutekano w’Igihugu rubera mu muhezo.

Urubanza rwa Muchoma rwashyizwe mu muhezo

Barafinda yashakaga ko urubanza rwe rujya mu muhezo

Urwego rw’Igihugu rw’Abanyamakuru bigenzura (RMC), rwahuye na bamwe mu bayobozi b’ibitangazamakuru, abayobozi b’ibiganiro bya siporo ndetse n’abanyamakuru bashakira hamwe umuti w’ibibazo bimaze iminsi muri iki gisata.

Iyi nama nyunguranabitekerezo yabaye ejo hashize ku wa Gatatu tariki ya 18 Gashyantare 2026 ibera ku cyicaro cya RMC aho yayobowe n’Umuyobozi w’uru rwego, Mutesi Scovia.

Mu banyamakuru bari bitabiriye iyi nama barimo Jado Castar wa B&B Kigali FM, Sam Karenzi, Musangamfura Lorenzo, Ishimwe Ricard ba SK FM, Claude Hitimana na Ngabo Roben ba Radio&TV10 n’abandi.

Abanyamakuru ba Siporo bemeye ko mu itangazamakuru harimo ikibazo (crise) gituma aho gushyigikirana ahubwo abantu batakana hagati yabo.

RMC yabibukije ko bagomba gukora kinyamwuga, kwirinda kubangikanya indi mirimo yo mu ikipe n’itangazamakuru, kwirinda amagambo asesereza kuri micro n’ibindi.

Biyemeje ko bigiye guhagarara ubikoze akazabihanirwa harimo guhagarikwa amezi 3, kwamburwa ikirita y’itangazamakuru, guhagarikwa burundu mu mwuga n’ibindi.

Abanyamakuru bavuga cyangwa bataka abandi batari bagenzi babo nk’abayobozi b’amakipe, abayobozi runaka, basabye bagenzi babo kwirinda kubyijandikamo ko uwavuzwe najya atanga ikirego bazajya bahana uwamuvuze.

Jado Castar yasabye RMC ko yabemerera nk’abanyamakuru ba siporo bazicarana bakishakamo andi mabwiriza abagenga yiyongera kuyo RMC yaberetse, arabyemererwa.

Mutesi Scovia ni we wayoboye iyi nama

Sam Karenzi na we yari muri iyi nama nyunguranabitekerezo

Jado Castar yari ahari

Kayitesi Alice, wamamaye muri sinema nyarwanda nka Linda, yasabye abakobwa ku kujya bareba ku ntumbero y’ubushobozi bw’umusore mbere yo gufata umwanzuro wo gushakana na we kuruta gushingira ku kuba bakundana gusa.

Uyu mukinnyi wa filime muri filime y’uruhererekane 'Umuturanyi’ nka Linda avuga ko ashingiye ku buryo ibintu byifashe kuri ubu byaba ari uguhubuka gukomeye ku mukobwa mu gihe yaba afashe umwanzuro wo gukundana n’umusore ashingiye ku ngingo yo kuba bakundana gusa akirengagiza ibijyanye n’aho ibizabatunga bizava mu gihe bazaba bamaze kubana.

Mu kiganiro na ISIMBI, Linda yemeje ko ingingo yo ugukururana n’ukwiyumvanamo kw’amarangamutima hagati y’umukobwa n’umusore nayo ari ingenzi ariko ko itakabaye ihabwa intebe mbere yo kubanza kureba niba umusore afite ubushobozi bwo gutunga umugore.

Ati 'Ako kantu ko kuba wumva wakunze umusore ni ngombwa pe ariko nshingiye ku buryo inzara iryana hamwe ikurya uri kumwe n’uwo mukunzi wawe wakundiye urukundo ugahita ubona isura irahindutse. Urugo rurimo inzara bararyana.'

Linda yashimangiye ko abakobwa bakwiye kujya bahitamo uwo bagomba kubana bazirikana kureba niba hari intambwe azatuma biyongeraho ku buzima bari basanzwe babayemo kurusha gushakana n’abazatuma basubira inyuma.

Ati 'Aho kugira ngo mbane n’umuntu ansubize inyuma kurenza aho nari ndi mbere y’uko duhura namureka pe. Ntabwo ndi kubwira abakobwa bakurikire amafaranga mu buryo bwose bayabonamo niyo bwaba budaciye mu nzira nziza ariko ni ngombwa gutekereza kuko bazabaho.'

Uyu mugore avuga ko iyi myumvire ari n’aho yavanye igitekerezo cyo gukora filime ye nshya yise 'Inyenyeri’, yibanda ku nkuru z’abantu bashakana cyangwa babana n’abandi ariko bamwe muri bo bagaheranwa n’ibitekerezo byo kuzegukana imitungo.

Uretse kuba yaramenyekanye cyane muri filime 'Umuturanyi’, izina rye ryongeye kuvugwa cyane mu 2021 nyuma yo kurokoka ibitero bya FLN mu ishyamba rya Nyungwe tariki 15 Ukuboza 2018.

Linda yavuze ko urugo rurimo inzara abantu baryana