Category: Uncategorized

Kuwa 09 Kamena 2024 ni bwo habaye igitaramo gisoza Iwacu Summer Comedy Festival yari yatumiwemo na Doctall Kingsley umwe mu banyarwenya bakomeye muri Afurika muri iki gihe.

Mu kiganiro yagiranye na inyaRwanda Tv, Doctall yatangiye asobanura aho izina Doctall rikomoka, avuga ko yarihawe ku ishuri ubwo yigaga muri Nigeria kuko yari afite intego yo kuzaba Doctor.

Ati: 'Numvaga nzaba dogiteri, ariko ubwo nageraga hanze Nigeria yarambwiye ngo ugomba kuba umunyarwenya.'

Agaragaza ko muri Nigeria ubuzima bwaho bugoye ku buryo kuba warotora inzozi urota bigoye.

Atanga urugero mu Rwanda, avuga ko iyo uvuze ngo ‘winywa cyane ngo utware ikinyabiziga’, abantu barabyumva ariko muri Nigeria ubivuze ngo bahita banywa bakanatwara kurushaho.

Uyu musore yavuze ko yishimye cyane ati: 'Mfashwe neza ndi mu rugo ndimo kandi kugira inzozi nziza nta bintu biteye ubwoba ndi kurota nk’uko bijya bimbaho iyo ndi muri Nigeria, nakomeje kurota Perezida ndota inzozi nziza mpabwa impano.'

Uyu munyarwenya wo muri Nigeria, yagarutse ku nkuru y’uko yahisemo kwiyita ‘Ntakirutimana’, avuga ko bifitanye isano no kuba abanyarwanda barakomeje kumugaragariza urukundo.

Avuga ko yaje gusanga benshi mu bamukurikira ari abanyarwanda bakunda ibyo abasangiza birimo nka 'This Life no Balance', bikaba byaratumye atangira kujya akora ibyerekeranye n'u Rwanda.

Yavuze ko yaje gusobanukirwa kurushaho u Rwanda bitewe na Perezida Kagame. Yagize ati: 'Sinari nzi neza u Rwanda kugeza ntangiye kumukurikirana, natangiye rero kubona ukuntu abantu bishimiye ibintu nakoraga ku Rwanda ni aho byavuye.'

Yavuze uko yamenye Perezida Kagame, ati: 'Namubonye kuri YouTube, ndumva nari nkurikiranye Inama y'Abakuru b'ibihugu by'Afurika niba ntibeshye yaberaga mu Bwongereza.

Noneho nakunze uburyo avuga arasa ku ntego, mbega mu buryo buboneye kandi bukwiriye umuyobozi. Ibyo byatumye ntangira kumukurikirana, nsanga abantu mu nyunganizi [comments] bavuga ukuntu ari umuntu mwiza.'

Impamvu ituma akunda u Rwanda, ayisobanura mu byiciro bitatu. Doctall Kingsley aragira ati: 'Perezida mwiza, uburyo abantu bashyize hamwe n'abakobwa beza.'

Doctall agaragaza ko kugeza ubu uruganda rw'urwenya rumaze gutera imbere muri Afurika kandi no kuba atumirwa mu Rwanda bibishimangira bikanerekana ubumwe bw’abarugize.

Yagarutse ku bintu by'ingenzi byafasha umuntu ushaka gutera imbere mu rwenya, ati: 'Ntabwo bisaba gusa kuba ufite impano, bisaba kuba ufite ikinyabupfura, uhozaho kandi udatezuka.'

Ku birebana no kuba Nigeria ikomeje kuza imbere mu buhanzi, yagize ati: 'Ntekereza ko harimo kuba igihugu cyacu ari kinini tunafite n'abaturage benshi.'

Icyakora agaragaza ko harimo no kuba abanya-Nigeria bakunda igihugu cyabo bakanashyigikira abahanzi babo, ibyo avuga ko abanyarwanda nabo bakwiriye kugira.

KANDA HANO UREBE IKIGANIRO CYOSE 

 

Umuhanzi Jose Chameleone ukomoka muri Uganda, Jose Chameleone yatumijweho na polisi y’iki gihugu aho ashinjwa guhohotera mugenzi we Sencere.

Cynthia Nagawa uzwi nka Sencere yatanze ikirego ko uyu muhanzi yamuhohoteye tariki ya 9 Kamena 2024, aho yamuciye ibisebe mu maso no ku maboko ndetse agerageza no kumuniga.

Umuvugizi wa polisi muri Kampala, Luke Owoyesigire yavuze ko Chameleone yatumijweho akaba agomba kuza agahatwa ibibazo.

Ati “avuga ko uyu muhanzi yagerageje kumuniga ubwo bari mu kabari muri Casablanca mu gace ka Kololo mu ijoro ryo ku wa 9 rishyira tariki ya 10 Kamena 2024.”

“Turimo gukora iperereza kuri ibyo bibazo byose, twahamagaje Chameleone ngo aze agire ibyo abazwa.”

Jose Chameleone si ubwa mbere avuzweho guhohotera igitsina gore, ni mu gihe n’umugore we Daniella yamutaye aho amushinja kumuhohotera.

Cynthia Nagawa arashinja Chameleone kumuhohotera

Chameleone yatumijweho ngo yisobanure

Nyuma y’imyaka irenga ibiri ivugururwa, Satde Amahoro iratahwa kuri uyu Gatandatu aho umukino uyifungura uzahuza Rayon Sports na APR FC.

Mu ntangiriro za 2022 nibwo iyi Stade yakiraga ibihumbi 25, sosiyete y’ubwubatsi y’abanya-Turikiya, SUMMA yatangiye kuyivugurura ikazajya yakira abantu ibihumbi 45.

Ubu imirimo yo kuyivugurura yararangiye ndetse ikaba igomba gutahwa tariki ya 15 Kamena 2024.

Umukino uzakinirwamo bwa mbere ukaba ari umukino ugomba guhuza amakipe abiri y’amakeba mu Rwanda, Rayon Sports na APR FC.

Iyi Stade kandi byitezwe ko izakira ibirori byo kwizihiza imyaka 30 u Rwanda rumaze rwibohoye.

Ni naho byitezwe ko ari ho Perezida wa Repubulika y’u Rwanda azarahirira, ni nyuma y’amatora azaba muri Nyakanga 2024.

Stade Amahoro kandi ikaba izakira igikombe cy’Isi cy’abahoze bakina ruhago kizabera mu Rwanda muri Nzeri uyu mwaka.

Iyi Stade yazamuwe hejuru aho hongeweho ikindi gice, ni inyubako isakaye hose ahicarwa n’abantu usibye mu kibuga gusa kuko ari byo amategeko ya FIFA agena ko ubwatsi bugomba kubona izuba kugira ngo butangirika.

Nk’ibisanzwe nk’uko byari bimeze mbere ni ikibuga cy’ibyatsi ariko ubu babuvanze na tapis bizwi nka “Hybrid”

Ni umushinga ugizwe n’ibindi bice birimo Petit Stade na Paralympique; zombi zamaze kuvugururwa ku buryo ziri ku rwego mpuzamahanga. Inyuma ya Stade Amahoro hakaba harubatswe ikibuga cy’imyitozo.

Stade Amahoro isakaye hose

Ni ubwatsi buvanze na tapis

Ikibuga cy’imyitozo kiri inyuma

APR na Rayon Sports ni zo zizayifungura

Uyu mukino uteganyijwe kuzaba tariki 15 Kamena 2024 ukazabera kuri sitade Amahoro yakira abantu ibihumbi 45. Sitade Amahoro yari imaze umwaka umwe n’igice itaberaho umukino kubera ibikorwa byo kuyubaka mu buryo bugezweho.

Kuri uyu mukino witiriwe Umuhuro mu Mahoro, ishyirahamwe ry’umupira w’amaguru mu Rwanda, FERWAFA, ryahisemo ikipe ya APR FC na Rayon Sports kuba ari zo kipe zihurira muri uyu mukino. Hafashwe ikipe ya mbere n’iya kabiri ku rutonde rwa shampiyona ruheruka.

FERWAFA yemeje ko aya makipe zakoresha abakinnyi ashaka yaba abafite amasezerano cyangwa se abatayafite ndetse bizaba umwanya mwiza wo kureba abakinnyi bashya ndetse no kureba imyaka ikenewe. 

Ku bijyanye no kwinjira, amatike azagurishwa mu buryo bw’ikoranabuhanga. Itike ya make izaba igura amafaranga 1,000 cy’amanyarwanda mu gihe itike ya menshi izaba igura amafaranga ibihumbi icumi (10,000 Frw) ariko ikazaba ari iy’icyubahiro. 

Uyu mukino wateguwe kugira ngo abanyarwanda bahabwe ikaze muri sitade Amahoro ubundi tariki ya kane Nyakanga bazagaruke muri sitade bisanga

Abafana bahawe amahirwe yo gusogongera kuri sitade Amahoro izaba iri mu zigezweho muri Afurika 

Amahoro Stadium izaba yakira abantu ibihumbi 45 bicaye neza

Mu ijoro ryo kuri iki rishyira kuri uyu wa Mbere tariki 10 Kamena 2024 ahagana saa saba z'ijoro, ni bwo Junior Giti na Chriss Eazy bagiye mu rugo rwa Christopher ku Kimironko mu rwego rwo kurangiza umushinga w'indirimbo 'Sekoma' hagamijwe kuyinogereza mu mashusho (Colour Coreections).

J’Chrétien Munezero, Murumuna wa Christopher ni we wari umaze igihe ari gukora kuri iyi ndirimbo 'Sekoma' ya Chrissy Eazy. Uyu musore amaze igihe akorera indirimbo abahanzi banyuranye, cyane cyane mu bijyanye no kuzinogereza mu mashusho, ndetse yakoze ku ndirimbo z'abahanzi babarizwa muri MI Empire.

Junior Giti ureberera inyungu za Chriss Eazy, yabwiye InyaRwanda ko ubwo bari bavuye muri 'Saloon' bagiye gufata amafunguro ari bwo abantu bataramenyekana binjiye mu nzu batwara machine ebyiri, ndetse na telefoni ya Chriss Eazy.

Yavuze ko muri ayo masaha bahise bajya gutanga ikirego ku rwego rw'Igihugu rw'ubugenzacyaha ku Kimihurura. Ati 'Twari mu bikorwa byo gushyira akadomo ku mashusho y'indirimbo 'Sekoma' ya Chriss Eazy, turi mu rugo rwa Christopher. Ubwo twari tugiye gufata amafunguro, twagarutse muri 'Saloon' dusanga machine ebyiri na telefoni zibwe'.

Yavuze ko nta muntu n'umwe mu bo bari bari kumwe wigeze wumva abo binjira, kugeza no ku mukozi. Machine ya J’Chrétien Munezero yari ifite agaciro ka Miliyoni 3.5 Frw [Yari amaze amezi abiri ayiguze], Machine ya Chriss Eazy ifite agaciro ka Miliyoni 1.5 cyo kimwe na telefoni ye yo mu bwoko bwa iphone.

Junior ati 'Nyuma yo gutanga ikirego rero, twasubiye ku Kimihurura kugirango dukurikirane aho ikirego kigeze.' Mu byaburiye muri ziriya machine, harimo n'imishinga y'indirimbo ya Christopher.

Junior Giti avuga ko bari bamaze igihe bakora ku mashusho y'iyi ndirimbo 'Sekoma' ku buryo izi machine bitabonetse 'byaba ari akazi gakomeye kugirango twongere gusubira mu ifatwa ry'amashusho y'iyi ndirimbo'.

J’Chrétien Munezero uri gukora ku ndirimbo 'Sekoma' ya Chriss Eazy, niwe wakoze amashusho y'indirimbo 'Munda' ya Kevin Kade, 'Vole' ya Mukuru we Christopher, yagize uruhare kandi mu gutunganya umushinga wa Kigali Universe ubwo yerekanaga abahanzi babarizwamo.

Ni nawe wakoze indirimbo 'Hashtag' ya Christopher. Uyu musore mu 2018, yatsinze mu irushanwa rya ArtRwanda-Ubuhanzi mu cyiciro 'Cinematography and Photography'.

Chriss Eazy yabuze umushinga w'indirimbo ye 'Sekoma' yari muri machine ya Munezero

Christopher ari mu bahanzi bari bafite indirimbo ziri muri machine yabuze

Junior Giti yatangaje ko batanze ikirego kuri RIB nyuma y'uko bibwe 

Chriss Eazy amaze iminsi ateguza abakunzi be indirimbo ye yise ‘Sekoma’

KANDAHANO UREBE AMASHUSHO Y'INDIRIMBO YA CHRISS EAZY

“>

KANDAHANO UREBE AMASHUSHO Y'INDIRIMBO YA CHRISTOPHER

“>

Muri uyu mwaka imbuto Foundation yahembye abana 951 batsinze mu byiciro bitandukanye by'amashuri, bari kwiga mu mashuri atandukanye mu gihugu.

Ubusanzwe muri iyi gahunda Imbuto Foundation ihemba abakobwa batsinze neza mu kizamini gisoza amashuri abanza, hagahebwa umwana umwe wahize abandi mu murenge, bigakorwa mu mirenge 416 igize igihugu.

Hahembwa kandi umwana wahize abandi muri buri karere uba urangije icyiciro rusange cy'amashuri yisumbuye mu turere mirongo itatu tugize igihugu.

Hagahembwa n'abana b'abakobwa batanu bahize abandi kuri buri ntara n'Umujyi wa Kigali, ibyumvikana ko bangana na 25.

Kuri uyu mwaka iki gikorwa cyatangijwe na Madamu Jeannette Kagame ubwo yahembaga abana b'abakobwa 216 batsinze neza ku rwego rw'igihugu mu gikorwa cyabereye ku ishuri rya Maranyundo Girls School, riherereye mu Karere ka Bugesera.

Abandi 735 basigaye bahembewe mumashuri bagiye kwigamo, aho kuri wa 04 Kamena 2024 iki gikorwa cyasojwe n'Umuyobozi wa Imbuto Foundation, Elodie Shami.

Ni igikorwa cyabereye mu Kigo cy'amashuri cya Groupe Scolaire Notre dame du bon Conseil Byumba cyigamo abarenga 796, hahembwa abakobwa 18 batsinze neza mu mashuri abanza.

Aba bana bahawe ibikoresho bitandukanye bibafasha mugukomeza kunoza imyigire yabo. Bahawe na certificat yasinyweho na Madamu Jeannette Kagame n'ibindi.

Ubwo yabashyikirizaga ibyo bihembo, Umuyobozi Mukuru wa Imbuto Foundation Elodie Shami yabashyikirije intashyo za Madamu Jeannette Kagame nk'Umuyobozi Mukuru wa Imbuto Foundation.

Yashimiye Inkubito z'Icyeza, ku bwo gutsinda neza, yaba mu myigirire n'imyifatire myiza bakomeje kugaragaza, haba aho biga n'aho batuye, abasaba kuzakomeza kuba 'Ishema ry'Abakobwa.'

Ati 'Ibi rero bikorwa kugira ngo twibutse umwana w'umukobwa ko ashoboye kimwe na mugenzi we w'umuhungu kandi ko yifitemo imbaraga n'ubushobozi byo kugera ku nzozi afite, iyo abikoranye umwete.'

Yabasabye kutazasubira inyuma ahubwo bagakomeza kubera abandi urugero rwiza, ashimangira ko bizabafasha gutegura ejo heza habo, bizane impinduka mu buzima bwabo, mu miryango bakomokamo ndetse no guteza imbere igihugu muri rusange.

Yanashimiye abarezi ku ruhare rwabo bakomeje kugaragaza mu myigire y'abana b'abakobwa.

Icyakora yibukije ko hakiri imbogamizi mu myigire y'umwana w'umukobwa zirimo nk'inda ziterwa abangavu, guhohoterwa, gucikiriza amashuri kubera impamvu zitandukanye n'ibindi.

Ati 'Nk'Inkubito z'Icyeza rero mugomba gutangira gutekereza uko twabona ibisubizo by'ibi bibazo, kuko ari mwe mufite ibisubizo biboneye umuryango nyarwanda.'

Umuyobozi wa Groupe Scolaire Notre dame du bon Conseil Byumba, Soeur Philomene Mukamanzi yashimiye Imbuto Foundation ihora izirikana umwana w'umukobwa.

Yashimangiye ko 'kuba umubyeyi wacu (Madamu Jeannette Kagame) adutekerezaho biduha imbaraga zo gukomeza gufatanya na leta guteza imbere umwari ubereye u Rwanda.'

Umuyobozi w'Akarere Wungirije Ushinzwe Iterambere ry'Ubukungu, Uwera Parfaite nawe yashimiye Imbuto Foundation ku 'mugira mu gufatanya natwe mu gutanga uburezi bufite ireme, uburenganzira ku burezi bukagera kuri bose.'

Umuyobozi w'Umuryango Imbuto Foundation, Elodie Shami kandi yasuye Ikirezi Primary School, ishuri riherereye mu Murenge wa Miyove mu Karere ka Gicumbi, ryubatswe n'uyu muryango ku bufatanye n'akarere.

Ni ishuri ryuzuye mu 2020 ari na bwo ryatangiye kwigirwamo, ritwara asaga miliyari y'Amafaranga y'u Rwanda. Ryigamo abana 356 bo mu mashuri y'inshuke n'abanza baturiye ibyo bice.

Uyu muyobozi kandi yasuye urugo mbonezamikurire rwa Miyove rurererwamo abana 151 na none rwubatatswe na Imbuto Foundation mu 2014 rwuzura rutwaye arenga miliyoni 120 Frw.

Umuyobozi Mukuru wa Imbuto Foundation Elodie Shami aganiriza Inkubito z’Icyeza ziga muri Groupe Scolaire Notre dame du bon Conseil Byumba uyu muryango wahembye

Umuyobozi Mukuru wa Imbuto Foundation Elodie Shami yifotozanyije n’Inkubito z’Icyeza ziga muri Groupe Scolaire Notre dame du bon Conseil Byumba uyu muryango wahembye

Umuyobozi Mukuru wa Imbuto Foundation Elodie Shami (uwa kabiri uhereye ibumoso) na we yafatanyije n’abanyeshuri bo muri Groupe Scolaire Notre dame du bon Conseil Byumba gucinya akadiho

Muri muri Groupe Scolaire Notre dame du bon Conseil Byumba higa abana b’abakobwa barenga 796

Umuyobozi wa Imbuto Foundation, Elodie Shami yasabye Inkubito z’Icyeza gukomeza guhatana bakazanahiga abandi mu byiciro biri imbere

Umuyobozi w’Akarere Wungirije Ushinzwe Iterambere ry’Ubukungu, Uwera Parfaite ahemba Inkubito z’Icyeza zitwaye neza mu bizamini bya leta

Umuyobozi wa Imbuto Foundation ashyikiriza Inkubito z’Icyeza, impamyabushobozi zasinyweho na Madamu Jeannette Kagame

Umuyobozi wa Groupe Scolaire Notre dame du bon Conseil Byumba, Soeur Philomene Mukamanzi yavuze ko kubona Madamu Jeannette Kagame ashyigikira abana b’abakobwa mu kubona uburezi bufite ireme na bo nk’abarezi batazamutenguha

Umuyobozi w’Akarere Wungirije Ushinzwe Iterambere ry’Ubukungu, Uwera Parfaite yasabye abanyeshuri bo muri Groupe Scolaire Notre dame du bon Conseil kubyaza amahirwe igihugu kibaha

Urugo mbonezamikurire rwa Miyove rurererwamo abana 151. Rwubatatswe na Imbuto Foundation mu 2014 rwuzura rutwaye arenga miliyoni 120 Frw

Umuyobozi w imbuto Foundation, Elodie Shami aganiriza ababyeyi barera mu Urugo mbonezamikurire rwa Miyove rurererwamo abana 151

Umuyobozi w imbuto Foundation, Elodie Shami aha abana bo mu Rugo mbonezamikurire rwa Miyove ibinini by’inzoka

Ubuyobozi bw’Akarere ka Gicumbi n’ubwa Imbuto Foundation bwasuye na Ikirezi Primary School, ishuri riherereye mu Murenge wa Miyove ryubatswe na Imbuto Foundation ku bufatanye n’akarere ritwaye asaga miliyari 1Frw

Ubuyobozi bw’Akarere ka Gicumbi n’ubwa Imbuto Foundation bweretswe ikibuga abana bo muri Ikirezi Primary School bakiniramo imikino itandukanye

Umuyobozi wa Imbuto Foundation, Elodie Shami yanasuye isomero rya Ikirezi Primary School

Umuyobozi wa Imbuto Foundation, Elodie Shami ubwo yari akurikiye ubusobanuro butomoye kuri Ikirezi Primary School bujyanye n’uko abana babaho

Abakunzi b'umuziki bakomeje gushyirwa igorora n'abahanzi Nyafurika, biyemeje kutadohoka ku nshingano yo guha umuziki mwiza kandi unogeye amatwi abakunzi b'umuziki Nyafurika muri rusange n'abafana babo by'umwihariko.

Mu ndirimbo amagana zigezweho muri Afurika kugeza ubu, InyaRwanda yaguhitiyemo indirimbo 10 gusa zakwinjiza neza mu cyumweru cya kabiri cy'ukwezi kwa Kamena mu 2024.

1.     Komasava (Comment Ça Va) – Diamond Platnumz ft Khalil Harisson & Chley

Mu kwezi kumwe gusa igiye ahagaragara, indirimbo ‘Komasava’ yahuje Diamond Platnumz, Khalil Harrison na Chley iyoboye urutonde rw’indirimbo zigezweho kandi zikunzwe cyane muri Afurika muri iki gihe. Ku rubuga rwa YouTube imaze kurebwa n’abarenga kure miliyoni 2.

2.     Tshwala Bam — Burna Boy ft Omah Lay, Victony, TitoM & Yuppe

Nyuma y’amezi arenga atatu igiye hanze, indirimbo ‘Tshwala Bam’ yongeye gusubirwamo n’abarimo Burna Boy, TitoM, Yuppe n’abandi. Kubera igikundiro ifite ku mbuga ziganjemo TikTok, iyi ndirimbo imaze ibyumweru bitatu gusa isubiwemo imaze n’abasaga miliyoni 6 kuri YouTube.

3.     DIGII III — Mr. Tee ft Tenorboy & PROD.CHACHA 

Indirimbo ‘DIGI III’ y’umuhanzi Mr. Tee ufite inkomoko muri Malawi iri mu zikunzwe cyane nyuma y’uko isubiwemo na nyirayo afatanije na Tenorboy. Nyuma y’ukwezi kumwe isubiwemo, imaze kurebwa n’abasaga miliyoni 2 ku rubuga rwa YouTube, kandi iri mu zikunzwe cyane ku mbuga nkoranyambaga.

4.     Wahala – CKay ft. Olamide

‘Wahala’ yahuje CKay na Olamide iri mu zikunzwe cyane muri Afurika muri iki gihe, hamwe n’abarenga miliyoni bamaze kuyireba ku rubuga rwa YouTube mu byumweru bitatu gusa imaze isohotse.

5.     Borrow Me Your Baby — Simi

Umuhanzikazi Simi aherutse gushyira hanze indirimbo yise ‘Borrow Me Your Baby.’ Iyi ndirimbo imaze iminsi ibiri gusa igiye hanze, imaze gukundwa cyane ndetse yarebwe n’abarenga ibihumbi 10 kuri YouTube.

6.     Shake Shake – Rayvanny ft DreamDoll

Nyuma y’iminsi micye asohoye iyo yise ‘Mi Amor’ igateza urunturuntu mu banyarwanda bavugaga ko yumvikanamo umurishyo wa ‘Fou De Toi’ y’abahanzi nyarwanda, umuhanzi Rayvanny yashyize hanze indirimbo yise ‘shake Shake’ ikunzwe n’abatari bacye. Imaze kurebwa n’abasaga miliyoni mu gihe cy’ibyumweru bitatu imaze hanze.

7.     Disconnect – Harmonize Ft Marioo

Indirimbo ‘Disconnect’ ya Harmonize afatanyije na Marioo yo imaze gufata urundi rwego mu miti y’abakunzi b’injyana y’Amapiano. Imaze ibyumweru bitatu gusa kuri YouTube ariko imaze kurebwa n’abarenga miliyoni 2.

8.     Rodo — Adekunle Gold

‘Rodo’ y’umuhanzi Adekunle Gold ukubutse mu Rwanda mu bitaramo byo gutangiza imikino ya BAL yaberaga i Kigali, iri mu zikunzwe cyane ndetse mu minsi ishize yanasubiwemo n’abana babarizwa muri Sherrie Silver Foundation. 

9.     Last Heartbreak Song — Ayra Starr ft Giveon

Umuhanzikazi Ayra Starr uri mu bakunzwe muri Afurika aherutse guhuza imbaraga na Giveon bakora indirimbo nziza y’urukundo bise ‘Last Heartbreak Song’ iri mu zikunzwe cyane.

10. Jump — Tyla ft Gunna, Skillibeng

Tyla, umuhanzikazi w’umuhanga kandi ukiri muto ukomoka muri Afurika y’Epfo, aherutse gukorana indirimbo yise ‘Jump’ n’abandi bahanzi barimo Gunna na Skillibeng ikora ku mitima ya benshi.

Ibikorwa bya Rwanda Gospel Stars Live byatangijwe n'ibitaramo byahuje abahanzi bakomeye muri Gospel. Muri iki gihe, bateguraga irushanwa rigamije guhitamo abanyempano mu muziki w'indirimbo zo kuramya no guhimbaza Imana byabereye mu Ntara zitandukanye.

Ni irushanwa rigomba kuzasorezwa mu Mujyi wa Kigali. Umuvugizi w’Urwego rw’Igihugu rw’Ubugenzacyaha, RIB, Dr. Murangira B. Thierry yabwiye InyaRwanda ko Nzizera Aimable yafunzwe tariki 5 Kamena 2024.

Yavuze ko akurikiranyweho ibyaha bibiri birimo: 'Gukoresha inyandiko itavugisha ukuri' ndetse no 'Kwihesha ikintu cy'undi hakoreshejwe uburiganya'.

Yavuze ko ibi byaha Nzizera Aimable akurikiranyweho bifitanye isano n'imitangire y'amasoko ya kompanyi ya 'Amarebe Investiment Ltd'. Ni ibyaha yakoze mu Ukwakira 2023.

Icyaha cyo guhimba, guhindura inyandiko cyangwa gukoresha inyandiko mpimbano giteganwa n'ingingo ya 276 y'Itegeko No 68/2018 ryo kuwa 30/08/2018 riteganya ibyaha n'ibihano muri rusange.

Iki cyaha gihanishwa igifungo kuva ku myaka 5 ariko kitarenze n'ihazabu y'amafaranga y'u Rwanda kuva kuri Miliyoni eshatu (3,000,000 Frw) ariko atarenga 5,000,000 Frw cyangwa kimwe gusa muri ibyo bihano.

Icyaha cyo kwihesha ikintu cy'undi hakoreshejwe uburiganya gihanwa n'ingingo ya 174 y'itegeko N0 68/2018 ryo ku wa 30/08/2018 riteganya ibyaha n'ibihano muri rusange.

Iki cyaha gihanishwa igifungo kuva ku myaka 2 ariko kitarenze 3 n'ihazabu y’amafaranga y'u Rwanda kuva kuri 3,000,000 Frw ariko atarenze 5,000,000 Frw.

Umuvugizi w’Urwego rw’Igihugu rw’Ubugenzacyaha RIB, Dr. Murangira B. Thierry yasabye Abaturarwanda kwirinda ibyaha ibyo ari byo byose.

Ati 'Ukora ibyaha wese, akoresha amayeri yose akeka ko atazatahurwa aribeshya. Urwego rw’Ubugenzacyaha, RIB, Abagenzacyaha, bafite ubushake, ubumenyi, ubushobozi ndetse n’ubufatanye n’abaturage bwo gutahura no kugenza ibyaha ababikora bakeka ko bitazamenyeka.”

“Inama twabagira ni iyo guca ukubiri n’icyaha, naho ubundi bazafatwa bashyikirizwe Ubutabera.”

 

Nzizera Aimable watangije Rwanda Gospel Stars Live yatawe muri yombi, ku wa 5 Kamena 2024

 

Nzizera Aimable [Uri iburyo] ubwo yatangaga ibihembo kuri Israel Mbonyi wahize abandi muri Rwanda Gospel Stars Live