Category: Uncategorized

Akarere ka Nyagatare kihariye kugira ubuso bunini buhingwa kandi bwera, ndetse umudugudu n'akagari byako biragutse cyane ugereranyije n'utundi two hirya no hino mu gihugu.

Mu rugendo rw'isaha n'iminota mike uvuye mu Mujyi wa Nyagatare mu modoka, uba ugeze mu Murenge wa Karangazi, Akagari ka Ndama, ahubatswe Umudugudu w'Icyitegererezo wa Rwabiharamba.

Uyu mudugudu watujwemo imiryango 120 yimuwe mu mudugudu w'Akayange ahateganyirijwe gukorerwa umushinga ugezweho w'ubuhinzi n'ubworozi buteye imbere.

Ni umushinga wa 'Gabiro Agribusiness Hub', byitezwe ko uzakorerwa ku buso bwa hegitari ibihumbi 16 mu Mirenge ya Karangazi na Rwimiyaga mu Karere ka Nyagatare.

Muri iyi gahunda kandi hubatswe umudugudu wa Akayange ugizwe n'inzu 120, n'uwitwa 'Shimwa Paul' wubatswemo inzu 72.

Ni inzu zubatse mu buryo bukomeye kandi bugezweho, enye zikoze inzu imwe bizwi nka [Four in One]. Buri muryango wahawe inzu y'ibyumba bitatu n'uruganiriro, irimo ubwiherero n'ubwogero mu nzu, igikoni, ubwiherero bwo hanze, amazi n'amashanyarazi.

Iyi midugudu yose yubatswe mu bice byegereye ibikorwa remezo by'ibanze bikenerwa mu buzima bwa buri munsi nk'amashuri, ivuriro n'ibindi.

Furaha Godfrey, umukuru w'umuryango urimo abana icyenda wahawe inzu muri uyu mudugudu yabwiye IGIHE ko ahantu batujwe ari mu bisubizo gusa kuko ibyo bahasanze babyumvaga ahandi batazi ko na bo byabageraho.

Avuga ko mu buzima batabonaga amazi yo kunywa n'ayo kumesa umwenda wo kwambara, amashuri akaba kure ku buryo umwana yajyaga kwiga ari uko nibura yujuje imyaka irindwi kandi atize amashuri y'inshuke kuko nta ryaharangwaga.

Ati 'Twararyaga tugahaga ariko iterambere ry'ejo hazaza ntabwo twari turifite. N'imiturire umuntu avuze ko tutari ahantu heza ntabwo yaba aciye igikuba. Twari ahantu haciriritse, umuntu acana agatadowa akumva ni ubwo buzima.'

'Twari tubayeho umuntu akumva araboshye. Ngeze aha nashimye Imana. Tugezemo hano ducanye amatara yaka, dufata ijoro rya hariya n'amanywa, dufata imvura ya hano n'iya hariya, kuko imvura yaragwaga ukibaza uti noneho irayisiga? Yayisiga ukavuga uti iy'ubutaha ntawe ubizi.'

Uyu muryango kimwe n'indi ihatuye ivuga ko umudugudu wa Rwabiharamba wegereye amashuri arimo aya Leta n'ayigenga, afite ireme ry'uburezi riri ku rwego rwo hejuru, ivuriro, amazi n'amashanyarazi byose babifite mu nzu zabo.

Furaha yatangaje ko mu bana be, harimo uri mu mwaka wa mbere w'amashuri yisumbuye, akiri mu mashuri abanza byasabaga kumucumbikishiriza mu bantu baturiye ishuri yigagaho kugira ngo abashe gukurikira amasomo kuko ikigo cyari kure cyane.

Furaha Godfrey wo mu mudugudu wa Rwabiharamba yagaragaje ko aho bari batuye batabonaga amazi meza

Mbabazi Jane we yabwiye IGIHE ko amazi bakoreshaga ari ayo mu bidamu [amazi yafatiwe hamwe ajya kuba ikiyaga gihangano], igihe kimwe yabaga ari meza ubundi ari mabi, ariko ubu ngo ubuzima bwarahindutse cyane.

Ati 'Amazi twari dufite yari ayo mu bidamu, igihe kimwe akaba ari meza ubundi yabaye ibyondo, tukabyihanganira kuko ari yo twari dufite. Ariko tugeze aha ngaha ni ukuri twageze mu bisubizo kuko amazi ari ku miryango yacu, amavuriro ngaya iruhande rwacu, mbega ku byerekeye iterambere, ni ukuri Perezida Paul Kagame ntako atatugize.'

Ibi abihurizaho na Bataringaya Didace, utuye mu Mudugudu w'Icyitegererezo w'Akayange. Na we avuga ko bahoze baba mu nzu zitameze neza, zitarimo sima, harimo ibintu byinshi bishaje. Akavuga ko ubuzima babagamo butari bushimishije kuko nta bikorwa remezo by'ibanze nk'imihanda myiza byageraga aho bari batuye.

Imidugudu bubakiwe irimo ibintu by’ibanze byose, kandi yegereye amashuri n’amavuriro

Bataringaya yabwiye IGIHE ko umunsi bamubwira ko agiye kuza gufata imfunguzo z'inzu nshya, igezweho yabanje kutizera ko iyo nzu yaba ari iye, kugeza ubwo ayirayemo nta n'umukeka kubera ibyishimo gusa.

Ati 'Baratubwiye bati 'buri muntu najye ku nzu ye', ndafungura ndaza ndyama aha mu ruganiriro, ndagarama ndavuga nti ariko iyi nzu ni iyanjye koko? Mbona nyirayemo umunsi wa mbere, uwa kabiri kugeza n'ubu mfite n'ibikoresho byose kandi ndumva mu mutima wanjye hameze neza.'

Yaba Bataringaya, Furaha, Mbabazi n'abandi batuye mu Midugudu y'Icyitegererezo ya Rwabiharamba, Akayange na Shimwa Paul bashimira ubuyobozi bw'igihugu bwatekereje kubimurira mu nzu zigezweho kandi zegereye ibikorwa remezo.

Mbabazi Jane yishimira ko ubu afite amazi meza mu rugo rwe nyamara bakiba aho bari batuye barakoreshaga amazi mabi

Umuyobozi w'Akarere ka Nyagatare Gasana Stephen yabwiye IGIHE ko hari igihe abaturage bagiye batura bakurikiye ubutaka bwera, ariko kubera uburyo bari batatanye biba ikibazo kubagezaho ibikorwaremezo, ari na yo mpamvu bagiye bimurwa bakajyanwa mu midugudu.

Ati 'Ku bijyanye n'uyu mushinga [Gabiro Agribusiness Hub] hamaze kwimurwa imiryango 312, n'abo twimuye mbere kimwe na nyuma yaho, ni ibintu bifite akamaro, mu by'ukuri nubwo tuvuga uyu mushinga ariko ni na bwo buryo bwo gutuza abantu kubera akamaro bifite.'

Meya Gasana avuga ko ahantu aba baturage batujwe hari ibikorwa remezo n'andi mahirwe bakwiye kwihatira kubyaza umusaruro.

Umuyobozi Ushinzwe Ishami ryo guteza imbere imyubakire y'Inzu rusange n'izihendutse, mu Kigo cy'u Rwanda gishinzwe guteza imbere Imiturire, RHA, Emmanuel Ahabwe yabwiye IGIHE ko uburyo abantu biyongera n'uburyo bagenda batura hasigaye 10% gusa by'ubutaka buteganyirijwe guturwaho mu gihugu hose ugereranyije n'igishushanyo mbonera kigeza mu 2050.

Ati 'Imidugudu y'icyitegererezo ya Rwabiharamba, Akayange na Shimwa Paul yagiyeho kugira ngo abantu batuzwe neza kubera ko hari icyanya cyuhirwa cyatunganyijwe hariya kugira ngo gihingwe mu buryo bugezweho abantu bashobore kwihaza mu biribwa ndetse banasagurire amasoko yaba aya hano ndetse n'ayo mu mahanga. Ni ubwo buryo byakozwe abantu bakagenda batura bakurikije ahari hafi y'aho bari batuye.'

Ahabwe avuga ko aba baturage bazaba bafite ibikorwa muri icyo cyanya cyuhirwa, kandi ngo bishobotse no mu bindi bice by'igihugu byajya bikorwa muri ubwo buryo.

Ati 'Hadakozwe ibishoboka byose wazasanga na bwa butaka bwari bwaragenewe ibindi bikorwa cyane cyane ibitunga abaturage nk'ubuhinzi, ubworozi n'ibindi na bwo abantu babwadukira bakabuturaho.'

Ikigo cy'u Rwanda gishinzwe guteza imbere imiturire, RHA, gisaba abatujwe muri iyo midugudu gufata neza inzu barimo kuko ari izabo, bakamenya gukoresha ibikorwa remezo bizigize neza no kubibungabunga.

Muri rusange hamaze kubakwa imidugudu 253, yose hamwe ituyemo imiryango irenga ibihumbi 30, aho imiryango 7,283 ituye mu midugudu yubatswe ku rwego rw'igihugu n'uturere, na ho imiryango irenga ibihumbi 22 ikaba ituye mu midugudu yagiye yikora.

Ubutaka bimutseho buri gukoreshwa mu buhinzi bugezweho

Umudugudu w’Akayange watujwemo abavuye ahari gukorerwa ubuhinzi buteye imbere

Bubakiwe ibigega by’amazi binini ku buryo batagikora ingendo bagiye kuvoma amazi mabi

Ahubakwa imidugudu hashyirwaho n’inzira zikoze neza zijya mu rugo

Hagiye gukorerwa ubuhinzi bukoresheje ikoranabuhanga

Amafoto: Kwizera Remy Moses

Rev. Kayumba Fraterne ni umuhanzi akaba n'umupasiteri wasengewe mu mwaka wa 2005. Ni Umuyobozi Mukuru w'Umuryango Jehovah Tsdikenu Ministries ukorera ivugabutumwa kuri interineri aho asengera abantu batandukanye biganjemo ab'ibyamamare. Bamwe muri bo babyitangiyemo ubuhamya ko bakiriye agakiza binyuze mu kuba yarabegereye akababwiriza.

Mu myaka yashize, Miss Rwanda 2009 Grace Bahati yatangarije itangazamakuru ko yakiriye agakiza nyuma yo gusengerwa na Rev Kayumba Fraterne wibona mu ndorerwamo ya Pastor John Huge, Rev Natasha wo muri Kenya na Rev Dr. Antoine Rutayisire. Rev Kayumba akunda abahanzi bose ariko cyane cyane Meddy, Pastor Bugembe, Lecrae na Priscilla.

Mu muziki, Rev Kayumba amaze gukora indirimbo zitandukanye zirimo “Mureke Ibiyobyabwenge” Ft P Fla & Jack B, “Umukunzi” Ft Diana Kamugisha, “Tora Paul Kagame”, “Holy People”, “Love”, “Ntimugire ubwoba”, “Waratoranyijwe”, “Imbuto” [Ebibala], “Afrika yakoranye na Inspector, Lilian, Ratio Gates & Linda” na “Worship God in hiphop”.

Kuri ubu yongeye gukora mu nganzo, avuga ibigwi Perezida Kagame anashishikariza Abanyarwanda kuzamutora ku bwinshi ashingiye ku bwa byinshi yabagejejeho. Ati “Tumubuze ntitwatuza, kumubura ni ukwihombya”. Akomeza avuga ko Perezida Kagame yagejeje ku banyarwanda uburezi n’iterambere bityo nabo bakwiriye kumwitura.

Si abapasiteri benshi bakora nk’ibyo Rev Kayumba yakoze aho yavuze ibigwi Perezida Kagame mu ndirimbo nshya yise “Tora Paul Kagame”. Ibi byatumye tumubaza uko abona Politiki n’Iyobokamana, ndetse n’isano bifitanye mu mboni ze. Rev Kayumba yagize ati “Bifitanye isano cyane kuko ubuyobozi bwose bushyirwaho n’Imana”.

Byakorana gute? Ati “Turakorana kandi tugafashanya kuko icyo duharanira twese ni ukugira umuntu utekanye kandi ufite amahoro. Ikindi twese turi ibiremwa Imana yarenye kandi iduha umurimo wo kuyobora neza abantu Imana yiremeye.

Umupasiteri ni umushumba kandi mu bo dushumba harimo n’abanyapoliki kuko nabo bubaha Imana. Kandi n’abanyapolitiki, mu bantu bayobora harimo n’abanyamadini. Twese duhuriye ku guhindura isi n’abayiriho bakabaho mu mudendezo bishimye.”

Mu kiganiro na InyaRwanda, Rev Kayamba yavuze ko yanditse indirimbo ye “Tora Paul Kagame” ku bw’urukundo akunda cyane Perezida Kagame. Yagize ati: “Perezida Kagame twese turamukunda, kandi ni impano Imana yahaye u Rwanda. Nifuza ko yakomeza kuruyobora. Njye mubona nka Yoshuwa w’abanyarwanda.”

Umuramyi akaba n’umupasiteri Kayumba Fraterne, yavuze ko ikintu ashimira cyane Perezida Kagame yakoze muri manda ye irangiye ni ‘umutekano w’abanyarwanda’ ndetse n’ibindi byinshi. Ku bijyanye n’icyo yamusaba yagize ati: “Ni ugukomeza ingamba zo gushyigikira ubusugire bw’igihugu cyacu ndetse n’ubumwe bw’abanyarwanda.”

Rev Kayumba Fraterne avuga ko ibyo ashimira Perezida Kagame ni byinshi “ariko ibiri ku isonga ni umutekano igihugu gifite ari wo utuma twese dukora ibyo dushinzwe n'ivugabutumwa ririmo” Ati “Tutamufite, ntitwatekana, abana ntibakwiga, amavuriro n'ibitaro ntibyakomeza kwiyongera, ubuhinzi ntibwasagurira amasoko”.

Rev Kayumba yavuze ibintu 10 ashimira cyane Perezida Kagame ndetse akaba ari byo ashingiraho amwita ‘Rudasumbwa’ n’Intore Izirusha intambwe, bityo kutamutora ari akaba ukwihombya. Ati: “Yavanye u Rwanda mu icuraburindi, akunda u Rwanda n’abayarwanda, yaciye akarengane, yateje u Rwanda imbere arusubiza ijambo imbere y’amahanga;

Yatanze uburezi kuri bose, yaciye ubuhunzi acyura impunzi, yimakaje indangagaciro ya ‘Ndi Umunyarwanda’, aca icyatanya abanyarwanda, yashyizeho ubuvuzi kuri bose, yaciye irondakarere n’irondakoko, yahaye amadini ubwisanzure twese dutahiriza umugozi umwe”.

Perezida Kagame ari mu bakandida batatu bahataniye umwanya wa Perezida wa Repubulika y’u Rwanda mu matora y’umukuru w’igihugu azaba tariki 14 Nyakanga 2024 ku banyarwanda baba hanze y’igihugu, na tariki 15 Nyakanga 2024 ku banyarwanda baba mu Rwanda.

Rev Kayumba Fraterne avuga ko Politiki n’Iyobokamana byuzuzanya cyane

Rev. Kayumba yakoze indirimbo igaruka ku bigwi bya Perezida Kagame

Jack B ni we uririmba inyikirizo y’indirimbo “Tora Paul Kagame” ya Rev Kayumba

REBA INDIRIMBO “TORA PAUL KAGAME” YA REV. KAYUMVA FRATERNE FT JACK B

Umuherwekazi ukomoka muri Uganda, Zari Hassan yavuze ko adakunda kubana mu nzu imwe n’umugabo we Shakib Lutaaya kubera ko bituma amuhararukwa vuba.

Mu Kwakira 2023 ni bwo Zari Hassan yakoze ubukwe na Shakib Lutaaya nyuma y’igihe kitari kinini bakundana.

Nyuma y’ubukwe ntabwo bahise babana ahubwo Shakib yagumye muri Uganda aho afite akazi na Zari asubira muri Afurika y’Epfo akorera akazi ke ka buri munsi, iyo bakumburanye umwe ajya kureba undi.

Aba bombi baheruka gukora ikiganiro cyagarutse ku buryo bashobora kubana bategeranye, batari mu gihugu kimwe kandi ntibiteze ikibazo, aho Lutaaya yavuze ko ari ibintu byiza ku bantu barimo gukora kuko iyo umwe akumbuye undi ajya kumureba.

Ati 'mba muri Uganda wowe ukaba muri Afurika y’Epfo ariko igihe cyose nkukeneye ndakubona, na we ushobora gufata indege ukaza muri Uganda igihe cyose ushaka kumbona. Ni ibintu byiza. Ntabwo ari bibi ku bantu bakora.'

Yakomeje avuga ko kutabana bituma urukundo rwa bo ruhora rutoshye. Ati 'Buri gihe iyo usubiye muri Afurika y’Epfo ndagukumbura. Twarashyingiranywe, iyo twatonganye hanyuma ugahita usubirayo, bituma nkukumbura kurushaho, bigatuma nza kukureba vuba.'

Zari we yavuze kubana na Lutaaya byatuma amurambirwa kubera guhora amubona iruhande rwe buri munsi.

Ati 'Tubaye tubana, wazandambira. Nazarambirwa guhora nkubona buri munsi. Ni byiza ko mpora numva nshaka kukubona.'

Yakomeje kandi avuga ko kubana batandukanye bimufasha mu kazi ka buri munsi kubera ko ubuzima bwe abayeho ari umuntu uhuze kubera akazi, Shakib Lutaaya kwiyongeraho byamugora.

Ati 'Narambirwa. Ntabwo twabana ukwezi. Mpora mpuze. Nkora video nyinshi zo kwamamaza, ndagenda mu bihugu bitandukanye, abana, gukurikirana ubushabitsi (business), hari njye hakaba n’ubuzima bwanjye bwo ku mbuga nkoranyambaga. Kuri njye ibyo byose kubihuza, nkongeraho wowe, umugabo byaba birenze ubushobozi bwanjye.'

'80% ni byiza. Duhora dukumburanye, turakundana, umuriro uhora waka. 20% ni igihe uba ukumbuye umuntu mu buryo bwo gukora imibonano mpuzabitsina.'

Gusa bavuze ko atari ko bizahora hari igihe kizagera bikaba ngombwa ko bazabana bakaba bakora na Kompanyi y’umuryango babana, gusa ni ibintu bavuga ko bazakora mu myaka iri imbere nyuma y’uko Lutaaya azuzuza imyaka 40 cyane ko ubu afite 32.

Bavuze ko kuba batabana mu nzu imwe bibafasha

Umuvugizi wa RIB, Dr. Murangira B. Thierry, yavuze ko amafaranga yasubijwe Ishimwe Fridia ari ayo basanze uwari wamwibye asigaranye.

Ati 'Uwari umuzamu w'iduka rya Fridia yacurishije urufunguzo, batashye yinjiramo yiba miliyoni esheshatu bari basizemo ajya kuyahisha kwa Se mu Karere ka Gasabo, Umurenge wa Jali, afatwa asigaranye miliyoni eshanu n'igice.'

Yakomeje avuga ko uregwa akurikiranyweho icyaha cy'ubujura buciye icyuho gihanwa n'ingingo ya 167 ivuga ku mpamvu nkomezacyaha ku cyaha cyo kwiba, aho ibihano byikuba kabiri iyo uwibye yakoresheje guca icyuho, kurira cyangwa yakoresheje igikoresho icyo ari cyo cyose gifungura aho atemerewe kwinjira.

Nyuma yo gusubizwa amafaranga yari yibwe, Ishimwe yashimiye RIB, avuga ko bahise bayitabaza kugira ngo ibafashe kuko bajyaga babona hari abo yafashije gusubirana ibyo bibwe.

Ati 'Tumaze kwibwa twatanze ikirego ariko twari twatakaje icyezere cyo kuyabona, kuko mu myumvire yacu twari tuzi ko kugira ngo ushakirwe amafaranga mu buryo bwihuse bikorerwa abanyamahanga kuko twakundaga kubyumva abantu bamwe babivuga ku mbuga nkoranyambaga. Gusa ubu tubaye abahamya ko RIB iha serivisi umuntu wese mu bubasha bwayo.'

Ishimwe yakomeje avuga ko 'Ibyatubayeho twakuyemo isomo ry'uko dukwiye kutararana amafaranga, ahubwo ni ukujya tuyabitsa kuri banki cyangwa Momo kugira ngo twirinde no gushyira mu kigeragezo abo dukoresha.'

Uregwa afungiye kuri sitasiyo ya RIB ya Rwezamenyo mu gihe dosiye ye iri gutunganywa kugira ngo ishyikirizwe ubushinjacyaha .

RIB yaherukaga gusubiza undi mucuruzi $8000 n'ibihumbi 746 Frw yari yibwe n'uwari umukozi we, isubiza kandi undi mugore wa Kimironko amafaranga asaga miliyoni 5 Frw yari yibwe n'abakozi be bo mu rugo ubwo yarimo atunganya ubusitani.

Ingingo ya 166 mu gitabo cy'amategeko mpanabyaha mu Rwanda, ivuga ko umuntu wese uhamijwe n'urukiko icyaha cyo kwiba, ahanishwa igifungo kuva ku mwaka umwe ariko kitarenze imyaka ibiri, ihazabu y'amafaranga y'u Rwanda kuva kuri miliyoni 1 Frw ariko atarenze miliyoni 2 Frw, imirimo y'inyungu rusange mu gihe cy'amezi atandatu cyangwa kimwe gusa muri ibyo bihano.

Ingingo ya 167 ivuga ku mpamvu nkomezacyaha ku cyaha cyo kwiba aho ibihano ku cyaha cyo kwiba byikuba kabiri iyo; uwibye yakoresheje guca icyuho, kurira cyangwa yakoresheje igikoresho icyo ari cyo cyose gifungura aho utemerewe kwinjira.

RIB yibukije abantu bose cyane cyane abacuruzi kujya birinda gusiga amafaranga aho bakorera ahubwo bajya bagana ibigo by'imari bikayababikira mu rwego rwo kwirinda ko bakwibwa.

RIB yashyikirije Ishimwe Fridia miliyoni 5,5 Frw muri miliyoni 6 Frw yibiwe aho acururiza

Umuzamu w’aho Ishimwe Fridia acururiza ni we ukekwaho kwiba aya mafaranga yagiye kubitsa Se, RIB isanga asigaranye miliyoni 5,5 Frw

Mu busanzwe bahugurirwaga mu Ishuri rya Polisi rya Gishari ryo mu Ntara y'Iburasirazuba mu Karere ka Rwamagana, cyangwa mu Ishuri rya gisirikare ry'i Gako, Rwanda Military Academy.

Ibi birori byabaye ku wa Kabiri tariki ya 18 Kamena 2024, byitabiriwe na Minisitiri w'Intebe, Dr Edouard Ngirente, wanakiriye indahiro z'aba bofisiye bato bashya.

Byari byitabiriwe kandi na Minisitiri w'Umutekano w'imbere mu gihugu, Dr Vincent Biruta, Minisitiri w'Ubutegetsi bw'Igihugu, Musabyimana Jean Claude, Guverineri w'Intara y'Iburasirazuba, Pudence Rubingisa, n'abandi banyacyubahiro batandukanye.

Aba bofisiye bato 166, basoje amasomo yabo, barimo ab'igitsinagore 27, bakaba bari bamaze amezi 15 bahabwa amahugurwa.

Muri aba , 66 bari basanzwe mu kazi, abandi 100 bakaba baraturutse mu buzima busanzwe. Harimo 10 bagiye gukorera amahugurwa mu Ishuri Rikuru rya Gisirikare i Gako, Rwanda Military Academy.

Mu gihe aba bofisiye bamaze bahugurwa, bahawe ubumenyi mu micungire y'amagororero y'igihugu n'iy'abagororwa, ubumenyi mu bijyanye n'umutekano, ubumenyi mu bijyanye no kuyobora abandi no kuba abanyamwuga kandi bakarangwa n'ikinyabupfura.

Bakoze imyitozo ibafasha gusobanukirwa neza ibyo bize mu ishuri n'uko bishyirwa mu bikorwa, n'indi ituma bagira umubiri uzira umuze ndetse banahabwa umwanya wo kwimenyereza umwuga.

Reba amafoto yaranze uyu muhango

Ubwo Minisitiri w'Intebe, Dr Edouard Ngirente, yari asesekaye ahari hagiye kubera ibi birori

Umuyobozi Mukuru w'Ishuri ry'amahugurwa rya RCS, ACP Emmanuel Nshozamihigo Rutayisire, yashimiye abafatanyabikorwa bose ba RCS

Uwego rw'u Rwanda rushinzwe Igorora, RCS, ni rumwe mu nzego zishinzwe umutekano mu Rwanda

Ubwo uwari umuyobozi akarasisi yajugunyaga inkota mu bicu

Ubwo abacungagereza bamurikaga ibirango by’Igihugu cy’u Rwanda

Nyuma yo guhumuza kw’ibirori habayeho gucinya akadiho

Ni ibirori byari byitabiriwe n’abanyacyubahiro batandukanye

Mu bahawe ipeti, harimo abofisiye bato b’igitsinagore 27

Minisitiri w'Umutekano imbere mu gihugu, Dr Vincent Biruta, na we yari yitabiriye

Minisitiri w'Ubutegetsi bw'Igihugu, Musabyimana Jean Claude, yari ahari

Minisitiri w'Intebe, Dr Edouard Ngirente, yahanuye aba bofisiye bashya abasaba kuba abanyamwuga mu mirimo yabo

Minisitiri w'Intebe, Dr Edouard Ngirente, asobanurirwa amasibo na Supt Gerard Munyangeyo wari uyoboye akarasisi

Minisitiri w'Intebe, Dr Edouard Ngirente, akihagera hahise haririmbwa indirimbo yubahiriza Igihugu

Minisitiri w'Intebe, Dr Edouard Ngirente, aganira n'Umuyobozi Mukuru w'Ishuri ry'amahugurwa rya RCS, ACP Emmanuel Nshozamihigo Rutayisire

Minisitiri w'Intebe, Dr Edouard Ngirente, afata ifoto y’urwibutso n’itsinda rimwe ry’abahawe ipeti

Kirabo Alice wabaye uwa gatatu, yahembwe

Byari akanyamuneza ku masura y’abari aho bose

Iyi ni isibo yari iherekeje ba ofisiye bato bahawe ipeti

Iyi foto yafashwe ubwo aba bofisiye bato bari bamaze kurahirira kuzuzuza neza inshingano zabo

Imwe mu masibo ane yari agizwe n’abofisiye bato bashya bahawe ipeti rya AIP

Imihagararire yabo nta kindi yerekana uretse ubunyamwuga

Iki ni ikibuga cyo mu Ishuri ry'amahugurwa ry'Urwego rw'u Rwanda rushinzwe Igorora, RCS, riherereye i Rwamagana mu Ntara y'Iburasirazuba cyakorewemo akarasisi

Iki gikorwa ni ubwa mbere kibaye, abanyeshuri bahuguriwe mu ishuri ry’amahugurwa rya RCS

Iki ni igisobanuro cy’ibyishimo

Hahembwe batatu bitwaye neza muri aya mahugurwa

Guverinoma y’u Rwanda yasezeranyije ko muri iki kigo hazakomeza gutangirwa amahugurwa kandi n’umubare w’abayahabwa ukiyongera

Bamwe mu bofisiye bakuru b’Urwego rw'u Rwanda rushinzwe Igorora, RCS, bari baje kwifatanya n’abandi

Bamwe mu bacungagereza bihera ijisho uko bagenzi babo bakora akarasisi

Akarasisi kari kayobowe na Supt Gerard Munyangeyo

Akarasisi kakozwe n’amasibo atandatu arimo abiri yari aherekeje abofisiye bahawe ipeti rya AIP

Aha Minisitiri w'Intebe, Dr Edouard Ngirente, yari ari gusobanurirwa aya masibo y’abofisiye bato bashya

Abofisiye bato barahiriye kuzuza neza inshingano zabo

Abo mu nzego z’umutekano ni uku babigenza iyo haririmbwa indirimbo y’ubahiriza Igihugu

Abofisiye bato barahiriye kuzuza neza inshingano bahabwa n’igihugu

Abayobozi mu nzego zinyuranye z’umutekano mu Rwanda bari babukereye muri ibi birori

Ababyeyi bari batindiwe no guhumuza kw’ibirori kugira ngo bagaragarize abana babo urukundo

Aba ni bamwe mu bacungagereza ubwo bari baje kwifatanya na bagenzi babo

Aba bofisiye bato bahawe ipeti rya 'Assistant Inspector of Prison- AIP’

Minisitiri w'Intebe, Dr Edouard Ngirente, afata ifoto y’urwibutso n’itsinda rimwe ry’abahawe ipeti

Amafoto: Kwizera Hervé

Ikipe ya Rayon Sports y’abagore yamaze gutandukana n’abakinnyi 7, umutoza umwe ndetse n’umuganga.

Iyi kipe yatwaye igikombe cya shampiyona y’icyiciro cya mbere n’igikombe cy’Amahoro ku mwaka wa yo wa mbere, irashaka kwiyubaka birenze uko yari imeze umwaka ushize.

Rayon Sports izahagararira u Rwanda mu mikino ya CECAFA izaba muri Kanama 2024 muri Ethiopia aho bazaba bashaka itike yo kuzakina Champions League.

Ikaba rero yagombaga gukora impinduka ikagira abo isezerera ikagura abashya baje kuyongerera imbaraga kugira ngo ibe yakwitwara neza ku ruhando mpuzamahanga.

Iyi kipe rero yamaze gusezerera abakinnyi barindwi barimo abanyezamu babiri, Itangishaka Claudine na Niyonsaba Jeanne.

Ba myugariro Uwanyirigira Sifa na Judith Otieno ukomoka muri Kenya, hari kandi Uwamariya Diane ukina mu kibuga hagati. Kankindi Fatuma Micky na Uwiringiyimana Rosine [Mbappe] bakina bataha izamu.

Rayon Sports kandi ikaba yarekuye umutoza w’abanyezamu, Nzeyimana Ramadhan n’umuganga Uwimana Illumine.

Rayon Sports yasezereye abakinnyi 8

Umuhanzikazi Marina uherutse gushyira hanze indirimbo yise 'Avec Toi' yasobanuye byinshi ku muziki we, ibijyanye n’uri kumufasha muri iyi minsi, ibyo gukora indirimbo ntizakirwe nk’uko yabyifuzaga n’ibindi mu kiganiro kirambuye yagiranye na MIE Empire.

Marina yavuze ko ikintu cya mbere kimubabaza ari ugukora indirimbo ntirebwe cyane nk’uko yabitekerezaga, ugasanga abantu ntibayishimiye kandi mu by’ukuri ari umuhanzi ubimazemo igihe wagakwiye kuba akora ibintu bikakiranwa yombi.

Yagize ati: “Njyewe igihe cyose iyo nkoze indirimbo ntijye ku rugero nifuzaga cyangwa basi ntijye muri kimwe cya kabiri cy’ibintu nifuzaga kuko buriya njyewe nifuza ibintu birenze cyane, numva mbabaye, numva narakoze ubusa kuko indirimbo ziravuna pe.”

Ibi Marina yabihuje no kuba mu minsi yashize ubwo yari akibarizwa muri The Mane yarakoraga indirimbo zigakundwa cyane ku buryo bugaragarira buri wese, avuga ko iyo wigeze gukora ikintu kigakundwa cyane bigorana kwakira ko noneho ushobora gukora ikindi nticyakirwe uko wabishakaga.

Ku bijyanye n’amakuru yavuzwe ku mihanda y’uko Marina yaba asigaye afashwa na ‘Manager w’ibihe byose’ Muyoboke Alex, uyu muhanzikazi yavuze ko Muyoboke amufata nk’umwunganizi we kuko bitandukanye imikoranire yabo itandukanye n’iyi yari afitanye na The Mane bijyanye n’uko bo bashoraga mu bikorwa bye mu gihe Muyoboke we amufasha gusa.

Yasobanuye ko bamaze iminsi bakorana kuko ari nawe wamufashije ku ndirimbo yakoranye n’umuhanzi wo muri Uganda Ykee Benda bise ‘Ndokose,’ ari nayo yakiriwe ku rwego atabitekerezaho ikarebwa n’abantu babarirwa mu bihumbi bine gusa ku rubuga rwa YouTube.

Uyu muhanzikazi yasobanuye ko yamaze igihe kinini ataragarara mu biganiro ahanini ibitambuka kuri YouTube nyuma y’uko yigaragaje uko ari ariko abanyarwanda bakamufata mu buryo bubi hanyuma agatangira kwifata uko atari kugira ngo arebe ko aribwo byarushaho kugenda neza. Gusa, yatangaje ko nyuma yo kuyoberwa icyo bakunda yahisemo kuba we wa nyawe ndetse ubu yamaze kugaruka mu isura ye.

Marina yasobanuye ko kuba mu minsi yatambutse yarakundaga kugaragara mu bikorwa byinshi by’umuziki haba mu bitaramo, za collabo n’abandi bahanzi n’ibindi none kuri ubu bikaba byaragenjeje macye, byose bigenwa na ‘Management.’

Yagize ati: “Biriya bintu byose ntabwo ari njye wabikoraga byari Management nari ndimo. Kuko iyo uri muri Management ntabwo ari wowe ufata imyanzuro igihe cyose, aba ari itsinda rigari. Kiriya gihe ngo nta nkuru ziri gusohoka, utambona kuri YouTube, nta foto zitwika, ndaho ncecetse yari amategeko yo muri Management.”

Umuhanzikazi Marina yavuze yafashe icyemezo cyo gukora umuziki we atari mu maboko y’abandi, atangaza ko nta Label akeneye muri iki gihe

Muyoboke Alex ni we uri gufasha Marina mu bikorwa bitandukanye by’umuziki

Kanda hano urebe indirimbo nshya ya Marina yise ‘Avec Toi’

Uyu muhanzi wamamaye mu ndirimbo zirimo 'Nina Siri' yageze ku kibuga cy'indege Mpuzamahanga cya Kigali i Kanombe, ahagana saa kumi n'ebyiri zo kuri uyu wa Gatatu tariki 19 Kamena 2024, nyuma yo gutanga ibyishimo mu Bubiligi.

Ni ku nshuro ya kabiri yari ataramiye muri kiriya gihugu, ariko kuri iyi nshuro yabihuje no kubamurikira Album ye nshya yise 'Nk'umusirikare' iriho indirimbo yise 'Nina Siri' iherutse kuzuza Miliyoni 50 ku rukuta rwe rwa Youtube.

Ni indirimbo idasanzwe mu rugendo rw'uyu munyamuziki, ku buryo avuga ko mu gihe kiri imbere azatangaza imvano yo kuba yarayihimbye ikamucira inzira.

Mu kiganiro cyihariye na InyaRwanda, Israel Mbonyi yavuze ko afite ishimwe ku mutima ku bw'ibikorwa Imana ihorera imukorera, ashingiye ku byo amaze kubona.

Ati 'Ndashima Imana cyane! Bitari ibanga Imana ihora ingirira neza cyane cyane mu gihugu cy'u Bubiligi nahagiriye umugisha. Nahahuriwe n'abantu beza, abantu baho bafite urukundo, bitabira ibitaramo. Twabonye Imana mu gitaramo, Imana yakijije indwara, abantu baje baremerewe bararuhuka, byari ibyishimo, mbese ni byiza.'

Israel Mbonyi yavuze ko gutaramira ku nshuro ye ya kabiri mu Bubiligi, ari igisobanuro cy'urukundo yerekwa n'abantu bahatuye, kandi yizeza ko ashobora kuzasubirayo. Yavuze ko mu Bubiligi yamaze kuhafata nko mu rugo, ari nayo mpamvu yiyumva neza iyo ahataramira.

Ati 'Mu Bubiligi rero ni nk'i Kigali, abantu bahari rero bizihirwa nk'abantu ba hano. Ni ahantu nkunda, ni kindi gihe cyose bazantumira ngomba kujyayo.'

 

Yagarukanye igikombe

Muri iki gitaramo yakoreye mu Bubiligi, uyu muhanzi wamamaye mu ndirimbo zirimo nka 'Umukunzi', yahahererwe igikombe nk'umuhanzi wo muri Afurika y'Iburasirazuba ukunzwe i Burayi.

Iki gikombe yashyikirijwe na Burugumesitiri wa Bruxelles witwa Philippe Close, akaba yarakigenewe na Team Production yamutumiye gutamira mu Bubiligi.

Mbonyi yavuze ko yatunguwe no guhabwa iki gikombe, kuko atari ikintu yari yiteze, ariko kandi abishimira Imana kuba abantu bayo barashimye imirimo akora.

Ati 'Naratunguwe! Kuko ntabwo ari ikintu nari niteguye kwakira, ni ibintu gusa byabayeho, aribo babitegura, kandi ndabishima rwose. Rero, ahubwo icyantunguye ni uburyo babikozemo, ntabwo ntari nzi, umuyobozi wakimpaye ni umuyobozi ukomeye hariya, ni umuyobozi wa Brussels, byari ibintu bidasanzwe.'

Uyu muhanzi yagaragaje ko igitaramo yakoreye i Burayi cyabaye urwibutso rudasaza kuri we, kuko yaririmbye, abantu bakakira agakiza, mbese yabonye Imana ikora.

Yavuze ko yabonye ubuhamya bw'abantu bakize indwara kubera iki gitaramo cye, kandi ubuyobozi bw'Umujyi wa Brussels bwamusabye kuhafata nko mu rugo.

Ageze i Kigali mu gihe yitegura ibitaramo muri Uganda na Kenya:

Israel Mbonyi agomba gukorera ibitaramo muri Uganda, ku wa 23 Kanama 2024 ndetse na tariki 25 Kanama 2024, ni mu gihe mu Mujyi wa Nairobi muri Kenya azahatamira muri tariki 10 Kanama 2024.

Yavuze ko ibi bitaramo ari binini mu rugendo rwe rw'umuziki, kandi byateguwe mu rwego rwo kwiyegereza abafana be muri Uganda ndetse no muri Kenya.

Ni ubwa mbere azaba ataramiye muri ibi bihugu byombi, ndetse avuga ko muri rusange ashaka gukorera ibitaramo mu bihugu bitandukanye byo mu Karere k'Afurika y'Iburasirazuba, ku buryo ari gutekereza no kuzataramira muri Tanzania. Ati 'Naho ni hafi.'

Yavuze ko agiye kujya muri biriya bihugu mu gihe ari no gutegura igitaramo asanzwe akorera abanyarwanda cyo gusoza umwaka, akora buri tariki 25 Ukuboza mu rwego rwo gufasha Abakristu kwizihiza Umunsi wa Noheli.

Yatangiye kwigira impamyabumenyi y'ikirenga ya PhD

Muri Nyakanga 2023, ni bwo Israel Mbonyi yatangaje ko yatangiye kwigira Impamyabumenyi y'Ikirenga mu buzima 'Public Health', akazabifatanya no gukorera Imana binyuze mu bihangano binyuranye azagenda ashyira hanze.

Uyu muhanzi asanzwe afite Impamyabumenyi y'Icyiciro cya Gatatu cya Kaminuza 'Master's Degree' mu by'imiti (Pharmacy) yakuye muri Kaminuza yo mu Buhinde.

Israel Mbonyi yabwiye InyaRwanda ko amaze igihe atangiye amasomo ye muri Kaminuza yo muri Canada, kandi avuga ko mu gihe kiri imbere azabigarukaho mu buryo burambuye.

Uyu muhanzi yigeze kuvuga ko amashuri ari ikintu cyangombwa kandi akunda, kandi ko iki ari igihe cyiza cyo gukomeza amashuri mu gihe akibishoboye abifitiye n'umwanya.

Ati 'Gushaka gukomeza kwiga ni ukubera ko yego sinajya mu ishuri ngo nicare nige ariko amasomo y'ikoranabuhanga arahari ya 'Online'. Ni mu rwego rwo kugira ngo mu gihe nkiri gukora umuziki reka mbe nshaka n'ibindi nkora ku ruhande binyongera ubwenge n'ubumenyi.'

Israel Mbonyi abaye umuhanzi wa kabiri utangaje ko agiye kwiga 'PhD' nyuma ya Butera Knowless uherutse gutangariza InyaRwanda ko ageze kure amasomo ya 'PhD'.

Umuhamagaro wa Israel Mbonyi

Israel Mbonyi yahamagawe n'Imana ubwo yigaga mu mashuri yisumbuye, kuva ubwo atangira kuyikorera mu mashyi no mu mudiho. Icyo gihe cyabaye intangiriro ye yo guhanga indirimbo zihimbaza kandi zigaha ikuzo Imana.

Uyu musore w'imyaka 31 y'amavuko, yari asanzwe ari umukinnyi wa Karate, kandi yabonaga ariho impano ye izerekeza ariko yaje kwegurira ubuzima bwe Kristu.

Israel Mbonyi asobanura 'umuhamagaro w'Imana' nk'ikintu Imana igushyira ku mutima' kandi waba utaragikora ukajya wumva ari nk'umutwaro wikoreye.

Yari asanzwe yandika indirimbo akaziha korali. Ariko akimara guhamagarwa n'Imana, yanamuhaye indirimbo yitwa 'Yankuyeho urubanza' ari nayo yabaye iya mbere yahereyeho.

Kuva yahamagarwa n'Imana, yahise yumva urukundo rudasanzwe rw'umuziki no gucuranga muri we.

Icyo gihe yari umukinnyi wa Karate, ariko ibyo byose yabishyize ku ruhande. Ati 'Numva nsigaranye gusa umutima wo kuririmba.'

Israel Mbonyi avuga ko yakundaga gukina karate, ariko kuva yatangira kuririmbira Imana yabiburiye umwanya, igice kinini gitwarwa n'umuziki gusa.

Asobanura ko imbuga zicuririzwaho umuziki zabaye urubuga rwiza rwo gushyigikira umurimo w'Imana, kandi umuntu akabikora yibwirije.

Ati 'Numva ari uburyo bwiza Imana yadukoreye bwo gusangiza abantu ibihangano byacu, kandi natwe bikatugirira umumaro.'

Israel yigeze kubwira BBC ko hari inyungu ziva mu bihangano umuhanzi ashyira ku mbuga zinyuranye zicururizwaho umuziki, bityo bigafasha umuhanzi gukomeza gukora.Israel Mbonyi yagarutse i Kigali nyuma yo gukorera igitaramo gikomeye mu Bubiligi

Israel Mbonyi yatangaje ko yatunguwe n'igikombe yaherewe mu Bubiligi nk'umuhanzi wo muri Afurika y'Iburasirazuba ukunzwe i Burayi

Israel Mbonyi yavuze ko yiteguye gutanga ibyishimo mu bitaramo azakorera muri Uganda, Kenya ndetse no muri Tanzania 

Israel Mbonyi ari kwitegura gukorera ibitaramo bibiri muri Uganda 

Israel Mbonyi yatangaje ko yiteguye gutaramira abanya-Kenya

Kanda hano urebe amafoto menshi ubwo Israel Mbonyi yari ageze i Kigali

VIDEO: Dox Visual- InyaRwanda.com