Category: Uncategorized

Uyu mugore w'ikimero uzwi cyane mu gihugu cya Kenya, yagombaga kugera i Kigali saa sita z'ijoro ryo kuri uyu wa Gatatu tariki 19 Kamena 2024, rishyira kuri uyu wa Kane tariki 20 Kamena 2024, ariko abari bagiye kumwakira bategereje baraheba.

Ni ibintu byatunguye benshi ahanini bitewe n'uko ibyo yasabye byose kugira ngo azabashe gutaramira i Kigali yabihawe. Ategerejwe mu bitaramo byiswe 'Tanasha Donna- Music Show&Pool Party' bizaba ku wa Gatanu tariki 21 Kamena 2024 no ku wa Gatandatu tariki 22 Kamena 2024.

Mu butumwa yandikiranye n'abamutumiye gutaramira i Kigali muri ibi bitaramo azahuriramo na Dj Toxxyk, Tanasha yagaragaje ko habayeho kwibeshya 'amasaha y'igihe yagombaga kugerera i Kigali'.

Kuri we, yumvaga ko agera i Kigali saa sita z'ijoro ryo kuri uyu wa Kane tariki 21 Kamena 2024. Yanditse agira ati 'Nonese ntabwo urugendo rwanjye ari muri iri joro, muri iri joro ahagana saa sita z'ijoro?'

Umwe mu bari gutegura iki gitaramo, yavuze ko bakomeje ibiganiro na Tanasha, kandi bagiye kumufasha kongera gushaka itike y'indege kugira ngo agere i Kigali mu ijoro ryo kuri uyu wa Kane.

Byari biteganyijwe ko Tanasha agera i Kigali mu ijoro ryo kuri uyu wa Gatatu, hanyuma saa tanu z'amanywa kuri uyu wa Kane akaganira ikiganiro n'itangazamakuru.

Igitaramo cya mbere Tanasha azagikora ku wa Gatanu tariki 21 Kamena 2024, azagihuriramo na Dj Toxxy guhera saa kumi n’ebyiri z’umugoroba i Nyamirambo kuri B Lounge. Aho kwinjira ari ukwishyura ibihumbi 300 ku meza y’abantu batandatu ugahabwa n’ibyo kunywa bibiri.

Mu myanya isanzwe (Regular) ni ukwishyura ibihumbi 20 Frw ugahabwa n’icyo kunywa. Ku matike ya VIP ni ukwishyura ibihumbi 50 Frw ugahabwa n’icyo kunywa.

Ni mu gihe, ku wa Gatandatu tariki 22 Kamena 2024, igitaramo azakora bisaba kuzishyura ibihumbi 250 Frw ku meza n’abantu batanu, ugahabwa n’amacupa abiri y’ibyo kunywa (Wine).

Ibi bitaramo byombi azabihuriramo na Dj Toxxyk mu gihe cy'iminsi ibiri. Ni ubwa mbere bombi bazaba bahuriye ku rubyiniro.

Tanasha ni umunyamideli w'umunya-Kenya ubarizwa muri Tanzania wabiciye bigacika mu myaka itanu ishize, yanabaye umunyamakuru w'igihe kirekire wa NRG Radio yo muri Tanzania.

Yavukiye muri Kenya, ku wa 7 Nyakanga 1995 kuri Nyina w'umunya-Kenya na Se w'Umutaliyani. Ubwana bwe yabumaze igihe kinini muri Kenya mbere y'uko yimukira mu Bubiligi, afite imyaka 11 ubwo yajyaga kubana na Se wabo.  

Yigeze kuvuga ko gukurira mu Bubiligi byatumye yiyumvamo kumurika imideli ndetse n'umuziki. Uyu mugore kandi ari ku rutonde rw'abakobwa bahataniye ikamba rya Miss World Kenya.

Muri Nzeri 2022, yagaragaye muri filime 'Symphony' yatumye ahangwa ijisho na benshi. Yavuzwe mu rukundo cyane na Mutuma baje gutandukana muri Nzeri 2017, nyuma y'amezi arindwi yari ashize bakundana.

Umwaka wa 2018 wabaye rurangiza kuri we! Yakundanye by'igihe kirekire na Diamond kugeza ubwo banabyaranye umwana bise Naseeb Junior. Ibi byanatumye Tanasha abasha gukorana indirimbo na Diamond bise 'Gere'.

Mu 2020, bombi barashwanye, buri umwe atangira urugendo rw'ubuzima bwe. Ariko kandi buri umwe yagiye ashinja mugenzi we kuba impamvu yo gutandukana. Kuva icyo gihe ntiyogeye kuvugwa mu rukundo.

Tanasha Donna yatangaje ko habayeho kwibagirwa amasaha y'igihe yari kugerera i Kigali

Tanasha yagaragaje ko yiyumvishaga ko agera i Kigali mu ijoro ryo kuri uyu wa Kane

Abatumiye Tanasha batangiye kumufasha kubona indi tike y'indege ituma aza i Kigali

KANDA HANO UREBE AMASHUSHO Y'INDIRIMBO 'LA VIE’ YA TANASHA DONNA NA MBOSSO

  

Gahunda ya guverinoma y'imyaka rindwi yo kwihutisha ubukungu, NST1, yateganyaga ko ubuso bwuhirwa buzagera kuri hegitari 102,284 mu mwaka wa 2024, gusa iyi ntego yagezweho ku kigero cya 70%.

Umuyobozi Mukuru wungirije Ushinzwe Ubuhinzi muri, RAB, Florence Uwamahoro, yabwiye IGIHE ko nubwo iyi ntego itagezweho 100% ibikorwa byo kuhira byagize uruhare kongera umusaruro ku bahinzi binabaha amafaranga.

Ati 'Ku gihingwa cy'ibigori aho gikunze guhingwa cyane cyane mu byanya byuhirwa i musozi, usanga aho batuhira beza toni zitagera kuri 2.5 kuri hegitari mu gihe aho buhira beza ikigereranyo cya toni zirenga 4.5 kuri hegitari, hakaba ndetse aho bamaze kugera ku musaruro urenga toni 8 kuri hegitari ku gihingwa cy'ibigori mu ma koperative nka NAICO i Nasho muri Kirehe.'

Abahinzi benshi kandi bahinga umuceri bagaragaza ko aho ibikorwaremezo byo kuhira bihagereye umusaruro wagiye wiyongera uvuye kuri toni ziri munsi ya 2 kuri hegitari ugera kuri toni 5.8 kuri hegitari nk'impuzandengo.

Uwamahoro ati 'Kandi bikomeza kuzamuka bijyanye n'uko abahinzi bagenda bakoresha uburyo bwiza bw'imihingire ndetse n'ikoreshwa ry'imbuto z'indobanure ndetse n'izindi nyongeramusaruro.'

Mu mishinga yo kuhira imusozi yakozwe muri iyi myaka harimo LWH (Land Husbandry, Water harvesting and Hillside irrigation Project) watunganyije ibyanya byuhirwa i musozi ku buso bungana na hegitari 2555, Rural Sector Support Project (RSSP) wibanze ku gutunganya ibishanga bihingwa higanjemo ibihingwamo umuceri.

Hari kandi Gabiro Agribusiness Hub Project (GAHP) ukaba ufite intego yo guteza imbere uruhererekane nyongeragaciro rw'ubuhinzi bugezweho bugamije ubucuruzi kuri hegitari zigera ku 15.600 z'ubutaka bwuhirwa mu Karere ka Nyagatare, ariko ubu hegitari 5600 ni zo zihinzeho ibigori, soya n'ibindi bihingwa bihenze ku isoko, aha ubuhinzi bukazajya bukorwa ibihingwa byuhirwa ku buryo buhoraho.

Abakoresha uburyo bwo kuhira babyungukiramo

Ubusanzwe kuhira bikorwa mu buryo butatu, burimo kuhira mu gishanga, kuhira imusozi, amazi avanwa muri 'dam' akajyanwa kugira i musozi anyuze mu miyoboro yabugenewe, hamwe no gukoresha imashini ikogota amazi iyavana mu mugezi cyangwa ikiyaga kayageza ahari ibihingwa byuhirwa.

Uwamahoro yagaragaje ko abafite uburyo bwo kuhira ari bo bagena igihe cyo guhinga aho gucunganwa n'uko imvura iguye gusa, bityo bakinjiza amafaranga menshi.

Ati 'igihe izuba ryavuye igihe kirekire, abahinzi bahinga bagendeye ku mvura ntibabasha guhinga kubera ko nta buhehere buba buri mu butaka cyangwa nta mazi babona yameza imyaka, mu gihe abahinga bakoresha uburyo bwo kuhira imyaka bo baba bafite amahirwe yo guhinga igihe cyose batitaye ku gihe imvura izabonekera.'

Yongeyeho ko 'Abahinzi bahinga buhira baba bafite ubushobozi bwo kugena igihe bahingira (igihe imyaka bazahinga izera ifite isoko ryiza) mu gihe abahingira imvura usanga batabona igiciro gishimishije kubera ko umusaruro wabo uhurira ku isoko ari mwinshi. Ibi rero bituma abahinzi bahinga buhira babona umusaruro mwinshi ndetse n'amafaranga menshi ugereranyije n'abahinga bagendanye n' imvura.'

Inyigo yakozwe mu 2010 (Irrigation master plan) yagaragaje ko mu Rwanda ubuso bugera kuri hegitari 596,810 bushobora gukorerwaho ibikorwa byo kuhira imyaka.

Mu mushinga wo guteza imbere ubuhinzi bugamije ubucuruzi no kugabanya ibibubangamira (CDAT), biteganyijwe ko hegitari 9680 zizashyirwaho uburyo bwo kuhira ndetse hanatunganywe ibishanga bifite bingana na hegitari 7993 bisanzwe byuhirwa, ku buryo ubuso bwose buzatunganywa bwuhirwa buzagera kuri hegitari 17.673.

Leta yashoye imari mu kuhira i Musozi

RAB igaragaza ko hari ibyanya 299 hirya no hino mu gihuhu byatunganyirijwe kuhira, by'umwihariko birindwi ahakorerwa ibikorwa byo kuhira i musozi biri mu turere twa Karongi, Nyanza, Kayonza, Gatsibo na Rwamagana.

Hari n'aho abaturage bakora ibikorwa byo kuhira ku buso buto, bahabwa nkunganire mu bikoresho bibafasha kuhira bakishyura 50% by'ikiguzi cyabyo.

Uwamahoro ati 'Iyi gahunda yafashije abahinzi mu bice bitandukanye by'igihugu kongera umusaruro w'ibikomoka ku buhinzi, bihaza mu biribwa kandi banasagurira amasoko. Ubu buryo buzwi cyane ku bahinzi bahinga imboga aho dufashe urugero nko ku gihingwa cy'inyanya usanga abakoresha ubu buryo bageze kuri toni hagati ya 7 na 8 kuri hegitari mu gihe abadakoresha uburyo bwo kuhira batabona na toni 2 kuri hegitari.'

Dieudonné Niyodushima ukorera ubuhinzi mu Karere ka Bugesera, akifashisha uburyo bwo kuhira ku buso buto yabwiye IGIHE ko nta muntu washobora guhinga mu gihembwe cy'ihinga C adakoresha uburyo bwo kuhira, ariko ngo bunafasha no mu bindi bihembwe iyo imvura yaguye nabi.

Ati 'Iyo ufite uburyo bwo kuhira imyaka wizera guhinga igihe cyose. Kuko nk'ubu muri Kamena abafite imyaka mu murima ni abantu buhira ariko noneho n'ibihembwe bya A na B na byo imvura isigaye igwa nabi. Ntabwo bitangaje ko uyu munsi wavuga ngo uhinze muri Nzeri wizeye imvura, ikagwa bikamera, byamara kumera ikabura. Hari igihe abahinzi bahomba bakagera no ku rwego rwa 100% cyane cyane iyo nta buryo bwo kuhira afite.'

Yagaragaje ko gahunda zifasha abaturage kubona moteri bakuhira ku buso buto zibafasha gukora ubuhinzi buhoraho.

Mu gihugu hose abahinzi barenga ibihumbi 36 bamaze kubona ibikoresho byo kuhira ku buso buto binyuze muri nkunganire ya Leta (Subsidy Program) ndetse n'inkunga nyunganizi (Matching Grants) binyuze mu mishinga itandukanye.

Abahinzi bavuga ko utabasha guhinga mu gihembwe cya C udafite uburyo bwo kuhira

Ibikorwa byo kugira bikorwa mu bishanga ahahinze imyaka itandukanye

Nyuma y’uko yemeye ubusabe bwa Sharaf Eldin Shiboub Ali Abdelrahman bwo gutandukana na we, ubu iri mu biganiro n’umugande Taddeo Lwanga ngo barebe niba yakwemera gusesa amasezerano.

Umunya-Sudani, Sharaf Eldin Shiboub wari usigaje amasezerano y’umwaka umwe muri APR FC, yasabye iyi kipe ko yamurekura akajya gukina muri Libya kuko yabonye ikipe imwifuza ndetse yiteguye no kumwimurira umuryango ukajya guturayo kuko muri Sudani hariyo intambara.

Ubu iyi kipe yatangiye ibiganiro n’umukinnyi ukomoka muri Uganda, Taddeo Lwanga ngo na we abe yatandukana na yo.

Lwanga na we yari asigaranye umwaka umwe, ntabwo APR FC yashimishijwe n’umusaruro we ku buryo bateganya kumurekura bakaba bamusimbuza.

Ikipe y’Ingabo z’Igihugu ikaba irimo gushaka uburyo iganira na Lwanga bakaba batandukana ku bwumvikane.

Amakuru ISIMBI yamenye iva mu bantu ba hafi ba Taddeo Lwanga ni uko umukinnyi we yumva yahaguma agasoza amasezerano.

Taddeo Lwanga, APR FC irifuza gutandukana na we

Shiboub yasabye gutandukana na APR FC ndetse irabyemera

Kugeza uyu munsi tariki ya 20 Kamena 2024 nandika iyi nkuru, nta mufana wa APR FC na Rayon Sports wakifata ngo aseke mugenzi we, byose bishingiye ku cyizere kandi bishobora no guhinduka.

Ubu amakipe yombi akunzwe mu Rwanda ari mu myiteguro yo kwitegura umwaka w’imikino wa 2024-25, aho yatangiye gusezerera abakinnyi ndetse irambagiza n’abandi.

Ubu abakunzi ba Rayon Sports batangiye kwiheba bitewe n’ibimenyetso iyi kipe igenda yerekana ku isoko.

Ni ikipe yicaranye n’abakinnyi beza mu Rwanda, baraganira ndetse bagira n’ibyo bemeranywa ariko birangira bigendeye.

Hakizimana Muhadjiri, Omborenga Fitina na Ishimwe Christian ni abakinnyi Rayon Sports yegereye bagirana ibiganiro ndetse barumvikana bemera gusinyira iyi kipe.

Ni inkuru yahise ikwira i Kigali ko bamaze gusinya, mu gihe abakunzi ba Rayon Sports bari bakiri mu byishimo ko Umujyi bawutitije, nibwo byamenyekanye ko nta n’umwe wasinye ahubwo iyi kipe yabuze amafaranga yo kubishyura.

Nyuma Muhadjiri yahise yongera amasezerano muri Police FC, Ishimwe Christian na we yumvikanye na Police FC ni mu gihe isigaye ihanze amaso kuri Omborenga Fitina bumvikanye akaba ariko atarasinya.

N’iyo uteye icyumvirizo usanga nta mukinnyi n’umwe urasinya nubwo iri mu biganiro na Seif ndetse na Richard Ndayishimiye wa Muhazi United wari wemeje abakunzi ba Rayon Sports ariko bikaba bivugwa ko ibiganiro byajemo kidobya aho atumvikana na Muhazi amafaranga izamuha ku yo Rayon Sports izamugura.

Ubu umukinnyi bizeye bazagumana ni Muhire Kevin usoje amasezerano ariko akaba yaremeye kuyongera aho barimo gukusanya amafaranga yo kumuha.

Muri make rero abakunzi b’iyi kipe kugeza ubu nta shusho y’ikipe ya bo bafite umwaka utaha w’imikino.

No muri APR FC ni cyo kimwe

Abakunzi bishimiye ko myugariro wa bo ngenderwaho, Niyigena Clement yaraye yongereye amasezerano y’imyaka ibiri. Ni nako na Nshimiyimana Yunusu utaremeza abakunzi b’iyi kipe na we yongereye amasezerano y’imyaka ibiri.

Ibi ariko ntibibibagiza ko uwari nimero ya mbere ku ruhande rw’iburyo wugarira, Omborenga Fitina unabanzamo mu ikipe y’igihugu yaraye ashimiwe akaba atazakomezanya n’iyi kipe mu mwaka utaha w’imikino.

Uyu akaba yiyongera kuri Ishimwe Christian mu myaka ibiri yari ayimazemo yari nimero ya mbere ku ruhade rw’ubumoso wugarira, na we akaba yashimiwe akaba atazakomezanya na APR FC umwaka utaha aho bivugwa ko yumvikanye na Police FC.

Mu gihe batarakira kugenda kwaba basore, batunguwe n’abakinnyi bane b’abanyarwanda baguzwe, umuntu atanabiciye ku ruhande nta gihindutse bose bazaba ari abasimbura.

Hari umunyezamu Muhawenayo Gad wa Musanze utakwicaza Pavelh Ndzila, Mugiraneza Frodauard wavuye muri Kiyovu Sports utari ku rwego wavuga ko yanakwicaza Taddeo Lwanga ikipe yifuza kurekura ikazana undi.

Hari abakinnyi babiri banyura ku ruhande basatira, Tuyisenge Arsene wavuye muri Rayon Sports na Dushimimana Olivier wavuye muri Bugesera batari ku rwego rwa Bacca na Gilbert basanze kuri iyo myanya.

Icyizere cy’abakunzi ba APR FC gisigaye mu bakinnyi b’abanyamahanga iyi kipe izagura nubwo na yo ku isoko byatangiye kuyigora.

Amakuru avuga ko bamwe mu bakinnyi yagezeho banze kuyisinyira bitewe n’uko itanga amafaranga make ikindi ikaba imaze igihe itagaragara ku ruhando mpuzamahanga.

Urugero ni umukinnyi Etane Junior Aimé Tendeng ukomoka muri Senegal wari wavuganye na APR FC yizeye no kumusinyisha ariko birangira yerekeje mu ikipe ya Al Hilal Ondurman yo muri Sudani.

Si uyu gusa kuko bivugwa ko hari n’abandi yabuze muri ubu buryo. Gusa ikomeje kurambagiza abakinnyi batandukanye b’abanyamahanga aho bijeje abakunzi ba yo ko bazaba bakomeye.

Christian abakunzi ba APR FC babonaga agikenewe, muri Rayon Sports bakibaza impamvu yacitse ubuyobozi atabusinyiye

Kurekura Omborenga muri APR FC abakunzi ba yo ntibabyishimiye, muri Rayon baribaza impamvu adasinya

Aba-Rayon ntibumva ukuntu Muhadjiri yabacitse

Richard Ndayishimiye na we ngo hashobora kuba harajemo akabazo

Seif ashobora kongera gusinyira Rayon Sports

Mu ijoro ryo ku wa 19-20 Kamena, abanyamakuru n’abandi bantu batandukanye bari bagiye kwakira Tanasha Donna, batashye bababaye nyuma yo kumutegereza hafi amasaha ane ku Kibuga cy’Indege cya Kigali kiri i Kanombe, bikarangira batamubonye.

Byari byitezwe ko Tanasha Donna agera i Kigali saa sita z’ijoro zo ku wa 20 Kamena 2024.

Abagombaga kumwakira barimo inkumi zo muri Kigali Protocol, uwagombaga kumutwara n’aba-bouncers kimwe n’abanyamakuru bahageze nibura abura isaha imwe ngo agere i Kigali.

Isaha yaje kugera ndetse indege yagombaga kugeza i Kigali Tanasha irahagera, abagenzi bagiye bavamo umwe ku wundi Tanasha Donna arategerezwa abantu baraheba.

Uko iminota yicumaga abari bategereje kumwakira bavugaga ko wenda yagize ikibazo akabura ibikapu bye ari nayo mpamvu yatinze gusohoka.

Ku rundi ruhande amakuru yavaga imbere mu bamutumiye ni uko telefone ya Tanasha itacagamo bagakeka ko yaba yahageze ikamuzimana.

Amasaha yakomeje kwicuma ariko n’abantu bategereje kugeza saa munani z’ijoro, bigaragara ko abagenzi bashize ku kibuga cy’indege.

Abari bagiye kumwakira bigiriye inama yo kubaza ushinzwe umutekano niba imbere mu kibuga Tanasha Donna yaba arimo, undi nawe nyuma yo kwinyabyamo akareba, agarukana inkuru y’incamugongo ko nta mugenzi usigayemo imbere.

Ibyo byashimangiraga ko Tanasha Donna atageze i Kigali, buri wese yikubura ukwe arataha.

Kugeza ubwo twandikaga iyi nkuru, twari tutarabasha kuvugisha abatumiye Tanasha Donna ngo tumenye niba yabamenyesheje ikibazo yahuye nacyo n’igihe nyacyo azagerera i Kigali.

Uyu mugore ategerejwe gutaramira i Kigali ku wa 21-22 Kamena 2024, aho ndetse kugeza ubu amatike yo kwinjira mu bitaramo bye yamaze gushyirwa ku isoko.

Byitezwe ko ku wa 21 Kamena 2023 Tanasha Donna azataramira muri 'The B Lounge’ i Nyamirambo, aho kwinjira bizaba ari ibihumbi 20 Frw n’ibihumbi 50 Frw mu myanya y’icyubahiro, mu gihe ushaka ameza ateye mu myanya y’icyubahiro we azishyura ibihumbi 300 Frw agahabwa amacupa abiri y’umuvinyo.

Bukeye bwaho, ku wa 22 Kamena 2024, uyu mugore azakira abantu mu birori bizabera kuri 'Piscine’ ya The B Hotel i Nyarutarama, aho kwinjira ku bantu batanu bari kumwe bizaba ari ibihumbi 250 Frw bagahabwa amacupa abiri y’umuvinyo.

Amakuru ava imbere mu ikipe ya Tanasha Donna ahamya ko uyu muhanzikazi mu ndirimbo azaririmba mu ijoro ryo ku wa 21 Kamena 2024 muri 'The B Lounge’ hazaba higanjemo iziri kuri album ye nshya ateganya gusohora muri Nyakanga 2024.

Tanasha Donna yari ategerejwe i Kigali

Bari bitwaje indabo zo kwamwakira ariko ntiyahahinguka

Tanasha Donna bamutegereje baraheba

Mu bihe bitandukanye Uncle Austin yafashije impano z'abahanzi bakomeye muri iki gihe barimo nka Marina, ndetse yisunze ibitangazamakuru yagiye akorera yagize uruhare mu gutuma ibihangano by'abarimo Bruce Melodie, Meddy, The Ben n'abandi byumvikana igihe kinini. Ni nawe wamuritse impano ya nyakwigendera Yvan Buravan.

Phil Emon yabwiye InyaRwanda ko mu 2021 yifashishije konti ye ya Instagram yandikiye Uncle Austin amusaba kumva indirimbo ze yari amaze iminsi micye ashyize hanze, ariko ntiyasubijwe bituma akomeza kugerageza kwirwanaho mu muziki.

Yavuze ko kuva ubwo yakomeje gukora indirimbo nk'ibisanzwe, ariko yisunze konti ye ya Tik Tok yafashe amajwi y'agace k'indirimbo ye yise 'Amasomo' agasangiza abantu, ubundi karakundwa cyane bituma yiyemeza no kubishyira kuri Youtube ye.

Uyu muhanzi avuga ko mu bakunze iriya ndirimbo barimo na Uncle Austin, wahise amwandikira amusaba ko bayikorana bayisubiyemo, inzozi ziba impamo kuri we kuko yari amaze igihe kinini yifuza gushyigikirwa n'uyu muhanzi usanzwe ari n'umunyamakuru wa Kiss Fm.

Ati 'Indirimbo 'Amasomo' yavuye ku mashusho mato nifashe nkashyira kuri 'Tiktok' abantu baragakunda ari benshi mpitamo kuyikorera 'Record' ariko nkayigira ngufi ni cyo cyari igitekerezo cyayo.

Akomeza ati 'Austin rero yaje kubona ubutumwa nari naramwandikiye muri 2021 musaba kumva umuziki wanjye aba ari bwo aboneraho no kumva indirimbo nshya, yaje kunyaka numero yanjye kuri instagram arampamagara ampa igitekerezo cy'uko twayisubiranamo.' 

Phil Emon avuga ko kuba Uncle Austin yaramusabye ko basubiranamo iyi ndirimbo, byamuhaye icyizere cy'uko urugendo rwe rw'umuziki rushoboka.

Yavuze ko imyaka itatu yari ishize ari mu muziki, ariko ibihangano bye bitamenyekana, ku buryo gukorana na Uncle Austin byabaye amata abyaye amavuta.

Ati 'Impamvu nayisubiranyemo na Austin, ni umuhanzi w’umuhanga kandi iyo wumvise iriya ndirimbo neza wumva ko koko ijwi rye ari amahitamo meza ku gihangano. Austin ni umuhanzi mfata nk’umunyabigwi mu muziki nyarwanda. Namwigiyeho gushyira ubumuntu imbere mu byo ukora byose.'

Uyu musore yavukiye mu karere ka Nyanza mu Majyepfo y'u Rwanda ari naho yigiye amashuri ye yisumbuye, mbere y'uko we n'umuryango we bimukira i Kigali.

Avuga ko yakuze yiyumvamo umuziki, ku buryo yakunze kuririmbira abantu batandukanye no kwandika indirimbo bigatuma abantu bamubwira ko afite impano. Ati 'Nahisemo gukora umuziki kuko nakuze ari byo bintu nkunda kandi mbonamo icyerecyezo cyanjye.'

Yasobanuye ko imyaka itatu yari ishize atarafatisha mu kibuga cy'umuziki, ahanini bitewe n'uko yabanje gushyira imbaraga mu bijyanye n'amajwi (Audio) 'bigatuma indirimbo zitagera ku bantu benshi kubera ko ntazihaga amashusho, uzumvise wese akazikunda ariko ntizijye ahabona cyane.'

Mu ntego afite, harimo gukora umuziki uzatuma ahagararira u Rwanda ndetse n'Afurika muri rusange. Kandi yumvikanisha ko afite benshi afatiraho urugero.

Mu myaka itatu ishize ni bwo uyu muhanzi yashyize hanze indirimbo ye ya mbere yise ‘Ring’ akomereza ku ndirimbo ‘Woow’, ‘Oooh’, ‘Love’, ‘Listen’, ‘You’ ndetse na ‘I’m Good’.

Iyi ndirimbo 'Amasomo' yasubiyemo afatanyije na Uncle Austin imaze iminsi itambuka ku bitangazamakuru bitandukanye, ibintu Phil Emon asobanura ko gukorana nawe byamuciriye inzira mu rugendo rwe rw'umuziki yifuza kugeza kure.

 

Phil Emon yatangaje ko gukorana indirimbo na Uncle Austin byongeye kumwubakamo icyizere cy'urugendo rwe mu muziki

Uncle Austin yatangaje ko yiyemeje gushyigikira impano ya Phil Emon kubera ibihangano bye yumvise

Phil Emon yatangaje ko mu 2021 yari yandikiye Uncle Austin amusaba ko bakorana ariko ntibyakunda

KANDA HANO WUMVE INDIRIMBO 'AMASOMO' YA UNCLE AUSTIN NA PHILEMON

KANDA HANO WUMVE INDIRIMBO ‘LISTEN’ YA PHIL EMON

“>
KANDA HANO WUMVE INDIRIMBO ‘RING’ YA PHIL EMON

“>

Yabigarutseho mu kiganiro cyihariye yagiranye na InyaRwanda, nyuma y’uko yari agarutse i Kigali avuye mu gitaramo gikomeye yakoreye mu gihugu cy’u Bubiligi ku nshuro ye ya Kabiri.

Yagiye muri kiriya gihugu nyuma y’uko, ku wa 26 Gicurasi 2024 ashyize hanze indirimbo “Nkurikira” yakoranye na Adrien Misigaro ubarizwa muri Leta Zunze Ubumwe za Amerika.

Aba bahanzi bombi bagiye bagaragaza ubushuti bwabo ku mbuga nkoranyambaga, kandi bagiye bashyigikirana cyane mu bikorwa bitandukanye bagiye bahuriramo. 

Byinshi mu bitaramo Adrien Misigaro yakoreye i Kigali, Israel Mbonyi yarabyitabiriye, ndetse bombi bagiye basohora amafoto bari kumwe.

Israel Mbonyi yabwiye InyaRwanda, ko we na Adrien Misigaro bari bamaze igihe batekereza gukorana indirimbo ariko byafashe igihe kinini, bitewe na gahunda za buri umwe.

Ati “Buriya twabitangiye cyera tubivugaho ngo tuzakora indirimbo ariko bikarangira twese tubuze umwanya, cyangwa nkahuga cyangwa se (we) agahuga, rero twagize umugisha turahuza numva nshimye Imana kandi iriya ndirimbo ni indirimbo ivuye ku mutima, ni indirimbo twese twagizemo uruhare, indirimbo nziza.”

Uyu muhanzi yavuze ko umubano we na Adrien Misigaro urenze ubushuti, mu y’andi magambo amufata nk’umuvandimwe we. Ati “Adrien ni inshuti yanjye, itari inshuti gusa isanzwe.”

Ubwo bari mu ifatwa ry’amashusho y’indirimbo ‘Nkurikira’, The Ben yarabatunguye aho bari ku rusengero rwa Christian Life Assembly mu rwego rwo kwifuriza isabukuru y’amavuko Israel Mbonyi.

Yakoze ibi mu gihe hari hashize igihe gito abwiye itangazamakuru ko yatangiye urugendo rwo gukorana na Israel Mbonyi indirimbo ebyiri.

Israel Mbonyi yabwiye InyaRwanda ko indirimbo imwe yamaze kurangiza, kandi ko bari gukora ku ndirimbo ya kabiri. 

Ati “Indirimbo yanjye na The Ben, mu by’ukuri imwe yararangiye, indi nayo irimo irakorwa ariko reka ndeke kuvuga amakuru menshi kuriyo, ndagirango abantu wenda bategereze bazayakira neza ndabizi.”

Uyu muhanzi avuga ko The Ben ari inshuti ye, ku buryo abatamuzi bamubarirwa. Ati “Ben ni umuhanzi mwiza! Buriya iyo utazi umuntu hari igihe umubarirwa ukumva ntubyumva neza ariko igihe nahuraga nawe nasanze ari umuntu wihariye, umuntu ufite umutima mwiza, munini, wagutse kandi ni umuntu w’umunyempano.”

Israel Mbonyi yatangaje ko The Ben na Adrien Misigaro ari inshuti z'akadasohoka ze, byatumye gukorana indirimbo bishoboka

Israel Mbonyi yavuze ko umunsi ahura na The Ben yamubonyemo umuvandimwe, inshuti, umuhanzi w'impano idasanzwe- inshuti yishimiye kunguka

Israel Mbonyi yavuze ko imibanire ye na Adrien Misigaro yarenze ubushuti bafitanye 

Israel Mbonyi yagiye ashyigikira Adrien Misigaro mu bitaramo binyuranye yakoreye i Kigali

KANDA HANO UREBE IKIGANIRO CYIHARIYE TWAGIRANYE NA ISRAEL MBONYI

“> 

KANDA HANO UREBE AMASHUSHO Y'INDIRIMBO 'NKURIKIRA' YA ISRAEL MBONYI NA ADRIEN MISIGARO

“>