Category: Uncategorized

Chairman wa APR FC, Col Richard Karasira yavuze ko intego bahaye umutoza mushya Darko Novic ari ukubaka ikipe iryana muri Afurika.

Yabigarutseho ubwo yagarukaga ku ntego bahaye umutoza w’umunya-Serbia, Darko Novic wasinye imyaka itatu.

Chairman wa APR FC, Col Richard Karasira akaba yavuze ko intego bahaye uyu mutoza ari ukubafasha kongera kubaka APR FC itinyitse ku ruhando rwo mu Karere ka Afurika y’Iburasirazuba ndetse no muri Afurika yose muri rusange.

Ati 'Intego ni ugukora umupira tukagera kure hashoboka, tukaba turi ikipe iryana turi ikipe yubashywe yaba mu Karere ndetse no muri Afurika. Inzira zose tunyuramo ni cyo tuba tugamije, kuba turi ikipe yongeye kubahwa, yongeye kumenyekana ni cyo ahanini tuba tugamije nk’ayandi makipe yose.'

Guhera mu mwaka w’imikino wa 2023-24, nyuma y’imyaka 10 ikinisha abakinnyi b’abanyarwanda gusa, yongeye gusubira kuri gahunda yo gukinisha abanyamahanga, gusa ku mwaka wa mbere ntabwo byagenze kuko batarenze umutaru ku ruhando Nyafurika.

Kuri iyi nshuro APR FC irimo kwiyubaka, amakuru avuga ko izahendwa ariko akaba ari abakinnyi bazayifasha bakaba bagera mu matsinda ya CAF Champions League.

Chairman wa APR FC yavuze ko basabye umutoza kongera kubaka ikipe iryana kandi itinyitse muri Afurika

Ejo hashize ku wa Kabiri, wari umunsi w’amateka k’umuhanzi w’umunya-Nigeria, David Adeleke uzwi nka Davido n’umugore we Chioma Rowland Ejiofor bakoze ubukwe nyuma y’igihe babana.

Ni ubukwe bwatigishije imbuga nkoranyambaga aho abantu bahererekanya amashusho n’amafoto ya bwo ari nako babifuriza urugo ruhire.

Davido akaba yageze ahabereye ubukwe ubona ko yambaye bijyanye n’umuco gakondo wa bo n’umugore we niko yagaragaraga.

Ni ubukwe bwari bwitabiriwe n’inshuti, abavandimwe ndetse n’abo mu muryango w’aba bombi.

Ubu bukwe kandi bukaba bwagaragayemo ibyamamare bitandukanye muri Nigeria nka Ebuka Obi Uchendu usanzwe ari umunyamakuru ukomeye muri Nigeria.

Hari kandi itsinda ry’abahanzi P-Square (Peter&Paul) ryanditse izina muri iki gihugu ndetse no hanze yacyo. Mu mashusho Paul Okoye (Rudeboy) yashyize ku mbuga nkoranyambaga ze, yagaragaje ibihe byiza bagiriye mu bukwe bwa Davido.

Umukinnyi ukomeye wa filime muri Nigeria, Ini Edo ni umwe mu bitabiriye ubu bukwe ndetse ntiyazuyaje kujya asangiza abamukurikira ku mbuga nkoranyambaga ze uko kwa Davido byifashe.

Umuhanzi umaze kwandika izina mu njyana ya 'Afrobeats’, Patoranking na we yari yabukereye muri ubu bukwe bwa mugenzi we aho yari yaje kumushyigikira, yaje no gufatana agafoto na Davido kuri uyu munsi w’amateka.

Undi wahagaragaye ni umuhanzi na we ukunzwe muri iyi minsi muri Nigeria, Nasboi aho yari yabukereye yanga ko iyi nkuru yazayibarirwa.

View this post on Instagram

A post shared by Rudeboy (@iamkingrudy)

View this post on Instagram

A post shared by Patoranking (@patorankingfire)

Davido yakoze ubukwe na Chioma

Bwari ubukwe bubereye ijisho

Ibi babivugiye i Kigali ubwo bahabwaga ibyemezo ku itariki 25 Kamena 2024. Abagera kuri 75 bafite ibigo byongerera agaciro ibikomoka ku ibumba no ku mabuye ni bo bazihawe nyuma yo guhugurwa no guhabwa ubujyanama mu bucuruzi bw'ibyo bakora (BDS) ndetse batanu muri bo batsindira no guhabwa ibikoresho abandi bajya mu ngendo shuri mu Bubiligi no mu Butaliyani.

Byazaïre Kizito Adrien, ufite uruganda rwitwa Comisag Ltd mu Karere ka Musanze rutunganya amabuye akavamo ibikoresho byo kubakisha, yavuze ko mbere bakoraga ibintu bitazaramba bishakira amafaranga yihuse, ariko ubu bakaba barize uburyo bwo kongera ubwiza bw'umusaruro.

Ati 'Ndetse bamwe twanagiriye urugendoshuri mu Bubiligi. Mbere y'amahugurwa nagurishaga ikamyo imwe y'ibikoresho muri RDC ariko ubu zabaye eshanu mu kwezi kandi n'abandi dukora bimwe bacuruzayo. Ubu dusigaye dutekereza gukora ku rwego rw'Akarere atari mu Rwanda gusa.'

Murekeyisoni Eulerie uyobora uruganda rwitwa Optima Clays Ltd rukora ibikoresho by'ubwubatsi mu ibumba mu Karere ka Muhanga yahawe amahugurwa ndetse anatsindira imashini ibumba amatafari.

Yagize ati 'Umusaruro wange wiyongeye hejuru ya 70% kuko mbere twabumbaga amatafari 3,000 ku munsi n'intoki ariko nyuma yo kubona imashini ayo matafari tuyambumba mu isaha imwe gusa. Ayo matafari kandi afite ubwiza, yujuje ubuziranenge kandi n'isoko rirahari. Ntago ndatangira kuyohereza hanze y'Igihugu ariko ni yo ntego kuko yabasha guhatana n'ayo mu bindi bihugu'.

Umuyobozi wa BPN mu Rwanda, Nkulikiyinka Alice, yavuze ko kimwe mu byo bahuguye ba rwiyemezamirimo ari ugukora imishinga ibafasha kohereza ibicuruzwa hanze y'Igihugu kandi mu buryo buhoraho ndetse bitanga umusaruro aho abagera kuri 15% by'abahuguwe ubu batangiye kohereza hanze ibyo bakora.

Gusa yavuze ko hagikenewe ubuvugizi ku mikoranire yabo n'inzego z'ibanze z'aho bakorera kugira ngo baborohereze bitume imishinga yabo igenda neza.

Umuyobozi Mukuru wa NIRDA, Dr Sekomo Birame Christian yavuze ko aya mahugurwa yahawe inganda zifite mishinga myiza ndetse abahuguwe abamara impungenge ku kijyanye n'amasoko.

Ati 'Turabamara impungenge [y'amasoko] kuko Leta ifite gahunda yo gushyigikira ibikorerwa iwacu. Bivuze ko mu masoko ya Leta Made in Rwanda ari yo izaza imbere […] N'amasoko ya Leta azajya atangwa ni ukubanza kugira iby'iwacu mbere y'uko tujya gufata ibyo hanze'.

Yongeyeho kandi ko amahugurwa nk'ayo akomeje binyuze muri gahunda ya 'Open Call' aho inganda zipiganirwa guhabwa ibikoresho n'ubundi bufasha zikazamuka.

Ubuyobozi bwa Enabel mu Rwanda bwateye inkunga aya mahugurwa, buvuga ko yatwaye agera kuri miliyari 3Rwf kuva mu 2021 yatangira gutangwa.

Abahawe ibyemezo ni abafite inganda zitunganya ibikomoka ku ibumba n’amabuye

Nkulikiyinka Alice, yavuze ko kimwe mu byo bahuguye ba rwiyemezamirimo ari ugukora imishinga ibasha kohereza ibicuruzwa hanze y'Igihugu kandi mu buryo buhoraho

Ubuyobozi bwa Enabel mu Rwanda bwari bwitabiriye iki gikorwa

Dr Sekomo Birame Christian yavuze mahugurwa yahawe inganda zifite mishinga myiza ndetse abahuguwe abamara impungenge ku kijyanye n'amasoko

Bunguranye ibitekerezo ku iterambere ry’inganda

Perezida Kagame yiyamamarije mu Karere ka Nyarugenge kuri Site ya Rugarama i Nyamirambo imbere y’abanyamuryango ba FPR-Inkotanyi barenga ibihumbi 300 baturutse mu Karere ka Nyarugenge no mu bindi bice by’Umujyi wa Kigali. Ni ibirori byari bimeze nk’igitaramo dore ko byitabiriwe n’abahanzi 19 b’amazina akomeye mu gihugu.

Iki gikorwa cyo kwamamaza Paul Kagame, cyitabiriwe mu buryo buhambaye, kiririmbamo abahanzi b’ibyamamare mu muziki w’u Rwanda yaba abawurambyemo n’ab’ikiragano gishya barimo: King James, Bruce Melodie, Bwiza, Dr Claude, Nsengiyumva Francois ‘Igisupusupu’, Butera Knowless, Intore Tuyisenge, Bushali na Chriss Eazy.

Ruti Joel, Jules Sentore, Andy Bumuntu, Icyogere mu bahungu, Ndahiro Patrick, Gatore Yannick, Semanza, Murayire, Nziramuhindo na Ndahiro, nabo bataramiye Perezida Kagame ubwo babyinaga gitore indirimbo yitwa ‘Uwangabiye’ ya Lionel Sentore ubarizwa mu Bubiligi.

Ni igikorwa cyaranzwe n’udukoryo twinshi tw’abanyamujyi aho hanagaragaye kajugujugu yakoresherejwe mu kwamamaza Paul Kagame n’Abakandida Depite ba FPR-Inkotanyi. Byari nk’igitaramo cy’akataraboneka dore ko iki gikorwa cyanayobowe na ba kizigenza mu myidagaduro ari bo Lucky Nzeyimana wa RBA na Sandrine Isheja wa Kiss Fm.

Mu mbwirwaruhame ye, Perezida Kagame yasabye Abanyamujyi kuba Intare, ndetse abibutsa ko Intare zibyara intare. Ati 'Ariko twe twarabirenze FPR n'abanyarwanda twagize Ingabo z'Intare ziyobowe n'Intare, nsobanuye neza ibyo nabanje kuvuga ku rugero rwa mbere Ingabo z'Intare n'ubundi nizo zijya ku rugamba kurwana nk'Intare.”

Yavuze ko bigoye cyane gutsinda urugamba mu gihe uyobowe n’Intama, kandi wowe uri intare. Ati “Rero nta nubwo uba ukeneye cyane ukuyobora w'Intama kandi iyo uri Intare ukagira Ingabo z'Intama nta rugamba watsinda, ndahera kuri ibyo mbashimira mwese Abanyarwanda uruhare rwanyu mu rugamba twarwanye'.

Yavuze ko u Rwanda ruba rwarasibwe ku ikarita y’isi iyo hataboneka abiyemeza kurwana urugamba rwo kubohora igihugu no guhagarika Jenoside yakorewe Abatutsi. Ati “Ibyo tunyuzemo mu myaka 30 ishize, birimo ya mateka yose batubwiye;

Urugamba twarwanye rwari rukomeye koko ariko uzi gutereranwa, warangiza ugateranirwaho n'amahanga. Urumva mbyombi biri hamwe?. Ubundi uru Rwanda ntabwo rwari rukwiye kuba ruriho bitewe nuko rwatereranywe rukanateranirwaho iteka bigahora ari induru ku Rwanda'.

Perezida Kagame yashimye Abanyarwanda bakomeje kunga Ubumwe, nawe avuga ko atigeze ahinduka. Ati: 'Nk'uko mutahindutse mukiri ba bandi muri Intare, ntabwo ndahinduka nanjye, ikiza cyabyo rero Intare zibyara Intare, ubu dufite Intare ntoya zibyiruka, abakobwa n'abahungu muzakomeze ntituzahindure isura;

Ntituzahindure umuco, Intare ikomeza kuba ari Intare, mwebwe batoya rero mugomba gukomeza kurwana urugamba. Urugamba izo Ntare zirwana rukubiyemo byinshi ni urugamba rwa Politiki, rw'Ubukungu, rw'Ubumwe, n'Iterambere ndetse n'ibindi byinshi bitandukanye'.

Minisitiri w'Urubyiruko n'Iterambere ry'Ubuhanzi, Dr. Utumatwishima Abdallah na Komiseri ushinzwe imyitwarire muri FPR-Inkotanyi, Nathalie Munyampenda, bashimiye Perezida Kagame wahaye abanyarwanda ibikorwaremezo bitandukanye.

Bamushimiye ko yabahaye ibikorwa bya siporo birimo Nyarugenge Pele Stadium, Club Rafiki ihuza urubyiruko rushaka gukina Basketball n’inyubako ya BK Arena ikomeje kuba ku isonga mu guteza imbere imyidaguro na siporo nyarwanda.

Munyampenda yagize ati: “BK Arena ituma tubasha kuzana BAL hano mu Rwanda, kandi umwaka utaha hazaza Shampiyona y’Isi y’Amagare. Ntabwo bisanzwe, kuko duhora turi aba mbere muri Afurika, ni ubwa mbere iyo shampiyona y’amagare izaba ije muri Afurika kandi muhora mutuzanira ibyo kuba aba mbere.”

AMAFOTO YO KWIYAMAMAZA KWA PEREZIDA KAGAME I NYARUGENGE

Ibikorwa byo kwiyamamaza ku mwanya w’Umukuru w’Igihugu ndetse n’Abadepite byatangiye ku wa Gatandatu tariki 22 Kamena 2024, aho bizasozwa tariki 13 Nyakanga 2024.

Biri kugera mu turere dutandukanye tw’u Rwanda, aho abiyamamaza bagenda bagaragariza abaturage ibyo bazabakorera nibabatora bakabafasha gutsinda. Buri mukandida aragerageza kwigwizaho amajwi, no kumvisha abaturage ko ariwe ukwiye gutsinda.

Ni ibikorwa biri kwitabirwa n’ibihumbi by’abantu baba banyotewe no kwirebera abakandida. Muri uru rugendo, abahanzi bifashishwa mu gususurutsa abaturage mbere na nyuma y’ibikorwa byo kwiyamamaza kw’abakandida.

Mico The Best ndetse na Confy bataramiye ibihumbi by’abantu bari bakoraniye ku kibuga cya Rwinkavu muri Kabarondo mu Karere ka Kayonza. Aba bahanzi bombi bifashishije indirimbo z’abo zakunzwe mu bihe bitandukanye batanga ibyishimo.

Nka Confy yaririmbye indirimbo ye yise ‘Igikwe’ yakoranye na Gabiro Guitar. Iyi ndirimbo uyu musore aherutse kuyivugurura ayihuza no kwamamaza Paul Kagame. Ni ubwa mbere agaragaye aririmba mu ruhame, nyuma y'uburwayi bwibasiye isura ye.

Ni mu gihe Mico The Best yaririmbye indirimbo ‘RPF dufite Papa’ yitegura gushyira hanze, ‘Igare’ ndetse n’izindi ze zakunzwe. Yabwiye InyaRwanda, ko bakiriwe neza n’abaturage bo muri Kayonza mu mwanya bari bahawe.

Ati “Abaturage batwakiriye neza cyane, bishimiye uko twabataramiye nubwo umwanya wari muto ariko twakoresheje igihe cyacu neza. Nyuma ya Kayonza, tugomba gukomereza mu Karere ka Bugesera n’ahandi.”

Ubwo Mico The Best na Confy bataramiraga mu Karere ka Kayonza, umuhanzi Senderi Hit na Kevin Kade baririmbiraga mu karere ka Gatsibo

Senderi yisunze indirimbo ze zirimo ‘Twaribohoye’, ‘Tuzarinda Igihugu’, ‘Kagame ntacyo twamuburanye’, ‘Nzabivuga’ n’izindi yongeye gushimangira ko ari ‘umuhanzi w’abaturage’ kuko yabyinanye nabo biratinda.

Yabwiye InyaRwanda ko yishimiye kongera gutaramira muri Gatsibo, Akarere gahana imbibi n’aho akomoka. Ati “Banyakiriye neza bidasanzwe, mbese byari ibihe by’urwibutso kuri njye. Nk’umuhanzi wari umwanya mwiza wo kwamamza abakandida Depite b’umuryango FPR Inkotanyi.”

Senderi yaherukaga kuririmba mu bikorwa byo Perezida Kagame byabereye i Muhanga mu Majyepfo y’u Rwanda, kuri uyu wa Mbere tariki 25 Kamena 2024. Icyo gihe yavuye ku rubyiniro atanze ibyishimo abisikana n’abarimo Butera Knowless, King James n’abandi.

Umuhanzi Kevin Kade uherutse muri Kenya mu bikorwa byo kurangiza indirimbo ye na Omario yigaragaje abo muri Gatsibo. Uyu musore yisunze indirimbo zirimo ‘Jugumila’ yakoranye na Chriss Eazy na Dj Phil Peter, ivumbi riratumuka muri Gatsibo.

Yanaririmbye indirimbo ze nka ‘Munda’, ‘Umuana’ n’izindi. Yabwiye InyaRwanda, ko byari ibyishimo bikomeye kuri we, kuba yongeye gutaramira muri Ntara. Ati “Mu ijambo rimwe navuga ko byari ibyishimo cyane. Nakunze uburyo abo muri Gatsibo banyakiriye.”

Umuraperi Danny Nanone we yataramiye mu Karere ka Rwamagana. Yisunze indirimbo ze zikunzwe muri iki gihe nka 'Confirm', 'My Type', 'Tubiziranyeho', 'Ikirori' ndetse na 'Soldier' yatanze ibyishimo ku bihumbi by'abantu bari bategereje kumva imihigo y'abakandida b'umuryango FPR Inkotanyi.

Abakandida-Depite biyamamarije iyi myanya mu Karere ka Rwamagana bari batatu, barimo Nabahire Anastase, Uwineza Beline na Mpinganzima Aline Benigne. Mu kwiyamamaza bagize bati ''Buri wese azatore yibuka neza ko Perezida mwiza akora neza afite Intore nkamwe, Inteko Ishinga Amategeko irimo abantu be, basobanukiwe ko inzego zikora neza'

Kevin Kade na Mico bahuje imbaraga bataramiye abari bakoraniye muri Gatsibo mu kwamamaza akandida-Depite

Mico The Best yatangaje ko banyuzwe no gutaramira mu Karere ka Kayonza mu rugendo rwo kwamamaza Abakandida-Depite

Confy yongeye gutaramira abakunzi be nyuma y’igihe kirekire- Aha yahuriye ku rubyiniro na Mico The Best
 

Mico The Best afatanyije na Confy basusurukije ibihumbi by’abantu mu Karere ka Kayonza

Confy aherutse gushyira ku isoko Extended Play (EP) ye yise iriho indirimbo nka ‘Dimension’
Umuraperi Danny Nanone uherutse gusohora amashusho y’indirimbo ‘Amanota’ yataramiye mu Karere ka Rwamagana/Ifoto: KT

AMAFOTO: The New Times

RIB, yavuze ko uwo mushoferi, yari yahawe ayo mafaranga yose ngo ayajyane kuri banki kuyabitsa nk'uko byari bisanzwe bigenda. Icyo gihe amaze guhabwa ayo mafaranga yahise agenda ntiyagaruka ndetse anakura telefoni ye ku murongo.

Uwibwe yahise atanga ikirego RIB itangira gushakisha uwibye ayo mafaranga, nyuma yaje gufatwa ku bufatanye n'inzego z'umutekano.

Mu butumwa yanyujije ku rukuta rwe rwa X ku gicamunsi cyo kuri uyu wa Kabiri tariki ya 25 Kamena 2024, Hem Raj, yavuze ko ashimiye cyane uru rwego kubera umuhate bakorana akazi kabo kandi kakagenda neza.

Yagize ati 'Nanditse ubu butumwa kugira ngo ngaragaze ko nshimiye RIB mbikuye ku mutima k'ubw'akazi katoroshye n'uburyo bagakoramo. Ubushake n'umuhate bya RIB ntibyagize ingaruka gusa ku bandi ahubwo binahesha ishema igihugu cyose.'

Uregwa akurikiranweho icyaha cy'ubuhemu, akaba afungiye kuri Sitasiyo ya Nyamirambo mu gihe dosiye ye iri gutunganywa ngo ishyikirizwe Ubushinjacyaha.

Icyaha cy'ubuhemu gihanwa n'ingingo ya 176 y'itegeko Nº68/2018 ryo ku wa 30/08/2018 riteganya ibyaha n'ibihano muri rusange.

Mu gihe uregwa ahamijwe iki cyaha, ahanishwa igifungo kitari munsi y'imyaka itatu ariko kitarenze imyaka itanu n'ihazabu y'amafaranga y'u Rwanda atari munsi y'ibihumbi magana atanu [500.000 FRW] ariko atarenze miliyoni imwe [1.000.000 FRW].

RIB irasaba abacuruzi kugira amakenga ku bo baha akazi ndetse no kwihutira gutanga ikirego kuri sitasiyo ya RIB ibari hafi mu gihe bibwe kugirango abajura bafatwe banahanwe.

RIB yasubije Hem Raj nyiri Sosiyete ya Alpine Travels, 4,093,000 Frw, n'andi $3,400 USD yari yibwe na Ndahayo Prudence, wari umushoferi we

Iyi sitasiyo yafunguwe ku wa 24 Kamena 2024 kuri Century Park Hotel & Residences iherereye i Nyarutarama, binyuze mu bufatanye iyi hoteli yagiranye na IZI mu kurushaho gushyigikira ikoreshwa ry'imodoka z'amashanyarazi mu Rwanda.

Iyi sitasiyo ni yo ya mbere ifunguwe mu Rwanda ifite ubushobozi bwo gushyira umuriro mu modoka zikoresha amashanyarazi mu buryo bwihuse (faster charge), kuko ifite ubushobozi bungana na kilowati 120 ari byo biyifasha kuzuza imodoka mu gihe kiri hagati y' iminota 30 na 40.

Mu Rwanda hari hasanzwe hari sitasiyo zifashishwa mu kongera umuriro mu modoka z'amashanyarazi ariko zifite kilowati 40, bityo bigafata umuntu hagati y'isaha imwe n'igice n'abiri kugira ngo yuzuze imodoka ye.

Mu kurushaho korohereza abafite imodoka zikoresha amashanyarazi, IZI Electric Rwanda Ltd yahisemo kuzana iyi sitasiyo ifite ubushobozi bwo kuzuza imodoka vuba kandi ku giciro gito kuko kilowatt imwe ari 400 Frw, bikaba bihendutse ugereranyije n'ibiciro bya lisansi.

Umuyobozi wa IZI Electric mu Rwanda, Vincent Mukimbiri, yavuze ko bahisemo gushyiraho iyi sitasiyo kugira ngo barusheho korohereza abantu ku giti cyabo bafite imodoka zikoresha amashanyarazi.

Ati 'Uko tugenda twagura ibikorwa byacu mu Rwanda ni nako tuzagenda twongera sitasiyo zishyira umuriro mu modoka z'amashanyarazi mu buryo bwihuse. Murabizi ko umuntu ufite imodoka y'amashanyarazi hari ingendo zimwe na zimwe yirinda gukora avuga ati ninjya aha ntabwo ndibuhasange sitasiyo, nze kubura uko mpava.''

Yakomeje agira ati ''Niyo mpamvu dushaka kuzishyira ahantu hose mu byerekezo by'imodoka zacu hirya no hino mu gihugu, ariko zizajya ziba zifunguye ku bafite imodoka z'amashanyarazi ku giti cyabo kugira ngo boroherwe no kubona aho bongereramo umuriro.'

Yakomeje ashishikariza Abanyarwanda gutinyuka gukoresha imodoka z'amashanyarazi kuko ziborohereza cyane mu buryo bw'ubushobozi. Yagaragaje ko ufite imodoka ikoresha amashanyarazi ahendukirwa ku kigero cya 40% ugereranyije n'ukoresha imodoka ikoresha lisansi cyangwa mazutu.

Ku ruhande rw'Umuyobozi w'Inama y'Ubutegetsi ya Century Park Hotel and Residences, Cheung Yiu Tung Billy, yavuze ko binjiye muri ubu bufatanye kugira ngo bafashe abakiliya bayo bafite imodoka z'amashanyarazi ndetse no gushyigikira gahunda ya Leta yo kubungabunga ibidukikije.

Ati ''U Rwanda ni kimwe mu bihugu bya Afurika biteza imbere gahunda yo gukoresha ingufu zirengera ibidukikije. Urugero rwashyizeho gahunda yo kugabanya imisoro ku modoka zikoresha umuriro w'amashanyarazi mu myaka mike ishize, ni ibihugu bike muri Afurika nka Ghana, Ethiopia, na Kenya biyiteganya […] kuri njye iki ni ikintu cyiza cyo gukora kuko dukwiye gukurikira Isi aho igeze.''

Ikigo IZI Electric Rwanda Ltd cyatangiye gukorera mu Rwanda mu 2023, gifite bisi eshanu zikoresha amashanyarazi zikorera mu Mujyi wa Kigali. Kirateganya ko mu mezi 18 kizaba cyazanye izindi 160, ndetse kigiye gukomeza kubaka za sitasiyo z'amashanyarazi hirya no hino mu ntara zitandukanye.

Iyi station iri i Nyarutarama kuri Century Park Hotel and Residences

Imodoka zikoresha umuriro w’amashanyarazi zifite umwihariko wo gukoresha umuriro w’amafaranga make ugereranyije no gukoresha izishyirwamo lisansi

Mu minota itarenze 40, uwashyiriye umuriro mu modoka kuri ‘station’ ya IZI Electric iba yuzuye

Tung wa Century Park Hotel and Residences yavuze ko bahisemo gufatanya na IZI Electric, kuko bashaka gushyigikira ikoreshwa ry'imodoka z'amashanyarazi mu Rwanda

Umuyobozi wa IZI Electric mu Rwanda, Vincent Mukimbiri, yavuze ko iyi 'station' ifite umwihariko wo kuzuza imodoka vuba

U Rwanda ruri guteza imbere ikoreshwa ry’imodoka z’amashanyarazi muri gahunda yo kugabanya imyuka ihumanya ikirere