Category: Uncategorized

Kuri uyu wa 26 Kamena mu 2024 nibwo Assange yasubiye muri iki gihugu cye cy'amavuko, nyuma y'imyaka yari ishize afungiye mu Bwongereza.

Uyu mugabo asubiye iwe nyuma y'uko yagaragaye mu cyumba cy'urukiko rwo ku kirwa cya Saipan kugira ngo ashyire mu bikorwa amasezerano, yemera ku mugaragaro icyaha cyo kuba yaracuze umugambi wo gushaka no gukwirakwiza amakuru y'amateka y'igisirikare cya Amerika mu buryo butemewe n'amategeko.

Igihe uyu mugabo yarekurwaga, umwunganizi we mu mategeko, Barry Pollack yavugiye hanze y'Urukiko ko Julian yazize gushyira hanze ukuri kandi agakorerwa ibyo atagakwiye kuba yarakorewe.

Assange geze hafi y'umugore we, Stella wari wuzuye ibinezaneza ku maso nyuma y'uko aba bombi bataherukanaga bamaze umwanya bahoberana.

Stella yaboneyeho gusaba abanyamakuru kureka umugabo we bakaba bamuhaye agahenge ko kuruhuka kuko ibyo yanyuzemo bitari byoroshye.
Assange yatawe muri yombi muri Mata 2019 nyuma yo gutangaza amakuru y'umusesenguzi wahoze mu rwego rw'ubutasi rw'igisirikare cya Leta Zunze Ubumwe za Amerika, Chelsea Manning, arimo amashusho y'ingabo za Amerika zirasa muri Baghdad, Afganistan na Iraq.

Mu gihe yari afungiwe muri gereza ya Belmarsh yo mu Bwongereza kuva mu 2019, Amerika yasabye ko yakoherezwa i Washington kugira ngo imuburanishe ku byaha birimo kwinjira muri mudasobwa y'undi mu buryo butemewe n'amategeko ndetse n'ubugambanyi.

Mu 2021, urukiko rwo mu Bwongereza rwafashe icyemezo cy'uko Assange atakoherezwa muri Amerika, ariko abanyamategeko ba Amerika bahise bajurire, urw'ubujurire rwemeza ko yoherezwa.

Assange w'imyaka 52 yafunguwe nyuma y'uko Amerika yemeranyije n'u Bwongereza ko arekurwa, ariko yazagera muri Amerika akazemera ko yakoze ibyaha akanabisabira imbabazi.

---

Yabigarutseho ubwo yari akomereje ibikorwa bye byo kwiyamamaza ku mwanya w'Umukuru w'Igihugu mu matora ateganyijwe muri Nyakanga 2024 muri ako Karere.

Dr Frank Habineza yagaragarije abaturage bari bitabiriye ibikorwa byo kwiyamamaza ko ibyo bavuze babiharanira bityo ko n'ibyo abizeza gukora bizagerwaho nibamutorera kuba Perezida wa Repubulika.

Yakomeje ati 'Iyo tuvuze biraba ntabwo tubeshya kandi icyo tuvuze tugihagararaho n'iyo imvura yagwa tugihagararaho n'izuba ryava tukagihagararaho.'

Yagejeje ku baturage ibyagezweho mu myaka itanu ishize bari mu Nteko ishinga Amategeko bigizwemo uruhare n'Ishyaka rya Green Party.

Dr Frank Habineza yagaragaje ko mu byagezweho harimo kugabanya umusoro w'ubutaka aho wavuye ku mafaranga 300 Frw kuri metero kare ukagera kuri 80 Frw.

Dr Habineza yagaragaje ko yakoze umushinga w'itegeko ugaragaza uko umusoro ku butaka wagabanywa n'ubwo benshi batabyumvaga ariko ko byabashije kugerwaho.

Ati 'Twarabivuze baradutaranga mu Nteko, ngo wowe ibintu uzanye hano bazakwirukana mu nteko, uzatakaza umugati, ndababwira nti sinaje gushaka umugati hano mu Nteko, mbere y'uko nza nari nitunze, uwo mugati wari uhari, imodoka nari nyifite n'inzu yanjye ndayifite. Naje kuvuganira abanyarwanda niba mushaka kunyirukanira ko natanze ibitekerezo muzanyirukane.'

Yabwiye abaturage ko ibintu byose agiye kuvuga habanza kubaho ubushishozi kugira ngo harebwe ibitekerezo bizima bigirira abaturage akamaro.

Yasabye abaturage kumugirira icyizere cyo gutora Dr Frank Habineza ku mwanya w'Umukuru w'Igihugu ndetse no kuzatora abadepite benshi b'iryo shyaka kugira ngo ibyo basezeranya abaturage bazajye babasha kubikora aho kubisaba abandi.

Ati 'Kugira ngo tuzajye tubikora tutiriwe kujya mu biganiro, gusaba Minisiteri y'Imari ngo mudufashe oya, tubyikorere dufite natwe ubwiganze bw'Abadepite.'

Yagaragarije abaturage ko yifuza kuzashyiraho uburyo bwo gufasha abanyarwanda kwihaza mu biribwa ku buryo buri muturage abasha gufata ifunguro nibura gatatu ku munsi.

Yavuze ko nibamugirira icyizere bakamutora azongerera ubushobozi mituweri uyifite akabasha kwivuza no kugura imiti aho ari ho hose.

Ku birebana n'ibigo bifungirwamo abantu by'igihe gito 'transit center' Dr Frank Habineza yavuze ko bigomba kuvaho mu gihe yaba amaze gutorwa ndetse akanaca ibintu byo gufungwa iminsi 30 y'agateganyo.

Yavuze ko hazashyirwaho ikigega cy'indishyi z'akababaro ku buryo umuntu wafugiwe ubusa azajya ahabwa indishyi z'amafaranga.

Ati 'Tuzaca akarengane kose, amategeko yubahirizwe. Ntabwo tuvuze ko dushyigikiye abanyabyaha.'

Yongeye gushimangira ko muri buri Murenge wo mu Rwanda azawubakamo uruganda rutunganya umusaruro w'ibikomoka muri wo.

Yijeje uruganda rukora ibyuma by'imirasire y'izuba

Dr Frank Habineza yagaragaje ko yifuza ko abaturage bose bagira umuriro w'amashanyarazi ndetse yemeza ko hazashyirwaho uruganda rukora ibyuma by'imirasire y'izuba kugira ngo ahatagera insinga z'amashanyarazi bakoreshe ukomoka ku mirasire y'izuba.

Ati 'Dufite gahunda yo kuzana uruganda rukora ibyumba by'imirasire y'izuba kuko biva hanze. Bimwe biva mu Budage no mu Bushinwa bikagera mu Rwanda bihenze. Twumva ko twazana uruganda bishobotse tukarushyira i Kigali rukora ibintu bijyanye n'imirasire y'izuba ku buryo ibintu bizajya bitugeraho hano mu cyaro bitahenze.'

Yakomeje ati 'Ku buryo aha hantu hose umuntu yagira imirasire y'izuba, ya yindi ushobora gushyiraho imashini yogosha abasore bacu bakabona akazi, cyangwa ushobora gushyiraho ibyuma bisya bigakora atari kakandi bazana k'itara gusa n'akaradiyo gato.'

Yagaragaje ko kuba u Rwanda rwarabashije kugira uruganda rutunganya imodoka rwa Volkswagen bitarunanira kubaka urwo rukora ibyuma by'imirasire y'izuba.

---

Mu kiganiro yagiranye na IGIHE ku murongo wa telephone kuri uyu wa 26 Kamena 2024, Kamugisha Marie Goreth wari ukiri kwa muganga mu Bitaro bya Kabgayi ari kumwe na nyina umubyara, yavuze ko n'ubwo yari akuriwe yumvise atacikanwa no kureba Perezida Kagame amaso ku maso.

Inzu y'ababyeyi y'Ibitaro bya Kabgayi aho yabyariye, ni kimwe mu bikorwa by'ingenzi byagezweho mu myaka irindwi ishize abaturage ba Muhanga bashimiye Perezida Kagame uwo munsi ubwo yiyamamazaga aho i Muhanga.

Umubyeyi wa Kamugisha ari na we babana, yabwiye IGIHE ko we yazindutse saa Cyenda z'ijoro ajya ahabera ibikorwa byo kwiyamamaza agasiga umukobwa we aryamye, bemeranyijwe ko we atari bugeyo kuko yari akuriwe.

Kamugisha we ngo byamwanze mu nda yumva ashaka kubona Perezida Kagame bwa mbere amaso ku maso, yirengagiza ko akuriwe kandi haba hari abantu benshi, aremera aragenda, ati 'Nari mfite amatsiko yo kumubona kuko nari ntaramubona.'

Umubyeyi we yavuze ko byababereye ibitangaza kuko aho i Muhanga ari ho Perezida Kagame yavugiye ijambo agira ati 'Mubyare, mugwize,' bityo umukobwa we agahita abyara kuri uwo munsi.

Ati 'Byamubereye umugisha, kuko yaravuze ati 'ababyeyi nibababyare' koko bahita babyara.'

Yavuze ko ibise byamufashe ahagana saa kumi n'umwe z'umugoroba, yitabaza abajyanama b'ubuzima bari bari kuri site, nabo bitabaza abaganga bamushyira muri ambulance imujyana ku Bitaro bya Kabgayi aho yaje kubyarira mu ma saa saba z'ijoro.

Kamugisha yavuze ko umwana we w'umuhungu yamwise Mwizerwa Ian Kagame, kuko yamubyaye yagiye kureba Perezida Kagame, kandi amukunda cyane.

Ati 'Icyo namubwira ni ukumushimira kuko yazanye umugisha, igisigaye ni ukuzamutora.'

Kamugisha Marie Goreth na nyina babana, batuye mu murenge wa Nyamabuye, Akagari Gahogo, umudugudu Kavumu, mu Karere ka Muhanga.

Nyuma yo kumenya iyo nkuru, bamwe mu Banyamuryango ba FPR-Inkotanyi muri Muhanga barangajwe imbere na Chairman ku rwego rw'Akarere, Kayitare Jacqueline, bamusuye bamushyiriye igikoma.

---

Ni igikorwa cyabaye kuri uyu wa Gatatu tariki 26 Kamena, kibera mu karere ka Gicumbi umurenge wa Bukure akagari ka Karenge ari naho iki kigo giherereye. Muri gahunda ya “30 Days of Y’ello Care” MTN yahisemo gufasha bimwe mu bigo byo mu Rwanda gukemura zimwe mu nzitizi bihura nazo mu buzima bwa buri minsi ubwo baba bari guha uburere abana b'u Rwanda.

Ni muri urwo rwego rero MTN yerekeje mu karere ka Gicumbi ibasaba kuba bagirana ubufatanye bagahabwa ikigo cy'ishuri gishobora kuba gifite igikoni kitagezweho bakaba bacyubakira igikoni cyiza kigezweho ndetse byafasha kuzamura ireme ry'abana bahiga. Akarere ka Gicumbi kaje guhitamo ikigo cya G.S.Bukure ndetse MTN ihita itangira igikorwa cyo kubaka icyo gikoni kizatahwa mu munsi ya vuba.

Umuyobozi mukuru wa MTN Rwanda Mapula Modibe arimo gukoresha imbaraga karemano mu kubaka igikoni cya G.S.Bukure 

Alain Numa ushinzwe imikoranire n’izindi nzego muri MTN, yavuze ko MTN Y'ello Care ari gahunda ngarukamwaka kandi itanga inyungu ku muryango nyarwanda.Ati' Iyi ni gahunda ya MTN yitwa MTN Y'ello Care, ikaba gahunda iba buri mwaka ikaba gahunda ituma buri mukozi wese wa MTN hari icyo atanga ku muryango nyarwanda. Ntabwo ari igikorwa MTN ikora mu buryo bwo gufasha nk'ibisanzwe ahubwo aha buri mukozi wese wa MTN Rwanda guhera ku muyobozi mukuru kugera ku muto agomba kugiramo uruhare.  

Ubusanzwe iki gikorwa kimara iminsi 21 ariko uyu mwaka twakoze iminsi 30 tubihuza n'uko ari gahunda ya MTN yizihiza imyaka 30 imaze mu bucuruzi.'

Alain Numa abajijwe impamvu ndetse n'amahitamo y'ibi bikorwa, yavuze ko ari ukuza gukemura bimwe mu bibazo biba byugarije amashuri.Ati'Ntabwo twaza kongera ibyishimo mu bindi ahubwo dukora ibi kugira ngo turebe niba ikibazo cyari gihari twabasha kugikemura. Ntabwo dukemura byose ariko ndahamya ko nko kuri iki kigo ikibazo cy'igikoni bari bafite kirangiye”.

Butera Patrice umuyobozi wa G.S.Bukure yabwiye itangazamakuru ko bishimiye igikoni bahawe kuko icyo bari bafite kitari kigezweho.Ati” Twari dufite igikoni kitagezweho igikoni cyangiza ibidukikije ndetse twateguraga amafunguro make kubera ingano. Ndashimira MTN cyane kuba yaraduhisemo mu bigo byose biri mu Rwanda kugira ngo itwubakire. Ubu ndizera ko abana bagiye kujya bahabwa amafunguro meza kandi menshi ndetse akabonekera ku gihe.”

Butera Patrice umuyobozi w’ikigo yashimiye cyane MTN Rwanda avuga ko igikoni bahawe bazakibungabunga ku buryo bushoboka 

Ikigo cya G.S.Bugure cyashinzwe mu 1946, kikaba gifite amashuri y’inshuke, amashuri abanza ndetse n’ayisumbuye. Ni ikigo gifite abanyeshuri basanga 1500 ndetse n’abarimu 51.

Tariki 14 Kamena kandi nabwo MTN Rwanda yahaye ikigo cya G.S.Gateko ingufu z’umuriro ukomoka ku mirasire y’izuba ndetse nabyo bikaba byari muri gahunda ya MTN Y’ello Care.

Mbonyitwari JMV, umuyobozi w’akarere ka Gicumbi wungirije ushinzwe imibereho myiza y’abaturage, yashimiye MTN Rwanda ku ruhare ikomeje kugira mu kubaka umuryango Nyarwanda

Habayeho umwanya wo gusangira n’abana ndetse no kubafasha gutunganya amafunguro 

Abanyeshuri bahagarariye abandi batangaje ko uburyo igikoni bubakiwe kingana bizeye ko imbogamizi bahuraga nazo mu gufata amafunguro zizakemuka
Abanyeshuri basigaye banezerewe cyane

Muri iyi gahunda ya MTN Y’ello Care buri mukozi aba agomba gutanga amasaha 8 ku munsi akora ibikorwa byo gufasha umuryango mugari 

Biteganyijwe ko iki gikoni kizuzura tariki 5 Nyakanya uyu mwaka, bivuze ko ari ku wa 5 w’icyumweru gitaha

Abanyeshuri basusurukije abari bitabiriye iki gikorwa 

AMAFOTO: Ngabo Serge InyaRwanda

Ibi yabigarutseho kuri uyu wa Gatanu tariki ya 25 Kamena 2024 ubwo Ishyaka PDI ryari mu gikorwa cyo kwamamaza Umukandida w'Umuryango FPR-Inkotanyi bahisemo gushyigikira mu matora y'Umukuru w'Igihugu, ndetse no kwamamaza abakandida-Depite b'iri shyaka.

Ibikorwa byo kwamamaza babitangirije mu Karere ka Rwamagana mu Murenge wa Kigabiro ahahurijwe hamwe abanyamuryango b'iri shyaka mu Ntara y'Iburasirazuba.

Perezida wa PDI, Sheikh Harerimana yavuze ko bahisemo gushyigikira Umukandida Paul Kagame wa FPR-Inkotanyi ku mwanya w'Umukuru w'Igihugu, kuko asanzwe ari umuyobozi mwiza wafashije igihugu kwiyubaka nyuma y'ibihe bibi bya Jenoside yakorewe Abatutsi.

Sheikh Harerimana yavuze ko Paul Kagame ari Intare iyobora izindi ntare, agaragaza ko ari na yo mpamvu na bo biyemeje kwiyamamaza mu matora y'Abadepite kugira ngo bajye kumushyigikira mu rugendo rwo gukomeza guteza imbere igihugu.

Ati 'Nka PDI rero icyo tubizeza ntabwo dukeneye kujya muri iriya Nteko ngo tube intama, turabasaba amajwi yo kugira ngo tujyemo turi intare. Dukore amategeko asobanutse, tugenzure ibikorwa bya Guverinoma tudadiye tudatitira. Nimudutore kugira ngo muzabone ko turi intumwa zitumika.'

Sheikh Harerimana yavuze ko bahisemo kutifatanya na FPR-Inkotanyi ku mwanya w'Abakandida Depite kuko babonaga bakuze kuburyo bajya ku ruhande nabo bagatorwa n'abanyamuryango babo ndetse n'abandi baturage muri rusange.

Ishimwe Grace ukuriye urubyiruko rwa PDI mu Ntara y'Iburasirazuba, yavuze ko urubyiruko rwose rwiteguye gushyigikira Umukandida wa FPR-Inkotanyi, Paul Kagame, bahisemo gushyigikira. Yijeje ko kandi ku mwanya w'Abadepite naho bafite icyizere ko PDI izatisinda amatora kuko ari ishyaka rirangwa n'ubumwe kandi abaturage benshi bishimiye.

Mugenzi Issa wo mu Karere ka Rwamagana we yavuze ko bafite icyizere cy'uko ishyaka ryabo rizatsinda amatora y'Abadepite. Yavuze ko kuri ubu nk'urubyiruko biteguye kandi bamaze kwamamaza Abakandida babo ahantu hose.

---

Miss Uwase Hirwa Honorine wamenyekanye nka Miss Igisabo mu irushanwa rya Miss Rwanda 2017, agiye gukora ubukwe na Nsengiyumva Mugisha Christian bari bamaze igihe barasezeranye imbere y’amategeko.

Miss Gisabo yegukanye ikamba ry’umukobwa wakunzwe kurusha abandi muri Miss Rwanda 2017 (Miss Popularity 2017).

Aba bombi basezeranye imbere y’amategeko bemeranya kubana nk’umugore n’umugabo tariki 23 Gashyantare 2023, ubwo bahamyaga isezerano rya bo mu Murenge wa Nyarugenge.

Biteganyijwe ko Miss Hirwa Honorine azasezerana n’umukunzi we imbere y’Imana mu birori bizaba ku wa 24 Kanama 2024, mu gihe ibi birori bizabanzirizwa n’umuhango wo gusaba no gukwa uzaba ku wa 16 Kanama 2024.

Miss Uwase Hirwa Honorine ‘Miss Gisabo’ na Nsengiyumva Mugisha Christian bamaze imyaka irenga itatu bakundana, cyane ko inkuru z’urukundo rwabo zatangiye kuvugwa mu itangazamakuru mu 2022.

Miss Uwase Hirwa Honorine yamamaye cyane mu 2017 ubwo yitabiraga irishanwa ry’ubwiza rya Miss Rwanda, yaje kuba ikimenywa na bose ubwo yari abajijwe ikigaragaza umukobwa mwiza w’umunyarwandakazi, akavuga ko ari uwuba ateye nk’Igisabo. Ni naho yahise akura izina Gisabo.

Hirwa Honorine yitabiriye irushanwa rya Miss Rwanda mu 2027 ahagarariye Intara y’Iburengerazuba, akaba yari umwe mu bakobwa bahabwaga amahirwe yo kwegukana ikamba, gusa ntiyaje guhirwa kuko ryegukanywe na Miss Iradukunda Elsa.

N’ubwo ategukanye ikamba rikuru ntiyaviriyemo aho kuko we yegukanye ikamba rya Nyampinga wakunzwe cyane 'Miss Popularity’. Uyu mukobwa uretse Miss Rwanda, yanitabariye irushanwa rya Miss Earth World 2017 gusa ataha nta kamba yegukanye.

RUKUNDO Sulaiman / ISIMBI.RW

Ku isaha ya saa kumi n’imwe, nibwo Dr Frank Habineza n’umuryango we bari bageze Rwagitima mu karere ka Gatsibo, umurenge wa Rugarama, mu bikorwa byo kwiyamamaza bavuye mu karere ka Nyagatare.

Mu kugera Rwagitima, Dr Frank Habineza yakiriwe n'umubare munini w’abaturage bo mu karere ka Gastibo dore ko hafi aho hari haremye isoko ryo muri uyu murenge wa Rugarama.

Nk’uko bikunze kugenda, Secretaire Generale w’ishyaka Green Party, niwe wahaye ikaze abashyitsi ndetse asobanurira abaturage ba Rwagitima ikibagenza muri aka gace.

Nyuma y’akanya gato, Dr Frank Habineza nibwo yafashe umwanya aganira n’abaturage bo muri Rwagitima hanyuma asobanura uburyo ibyo ishyaka Green Party ryari ryiyemeje mu mwaka wa 2017 babashije kubigeraho 70% bityo niba bashaka ko bigera ku 100% bagomba kumutora.

Dr Frank Habineza yabwiye abaturage biganjemo urubyiruko ko nibaramuka bamutoye nta muntu uzongera kubura akazi kuko afite gahunda yo guhuza abakozi n’abakoresha ku rwego rw’umurenge.

Dr Frank Habineza yagize ati “Hari ababyeyi binubira kuba bishyura amashuri ariko basoza kwiga bakabura akazi. Nimuramuka muntoye, nzashyiraho ibigo bizahuza abakozi n’abakoresha ku buryo umukozi hirya no hino azajya abasha kubona umukozi kandi ushaka akazi akabona umuha akazi.”

Dr Frank Habineza yongeye gusaba abaturage bo mu karere ka Gatsibo mu murenge wa Rugarama mu Centre ya Rwagitima ko nta muntu uzongera gufungwa azira ubusa kandi ko uzajya aba umwere azajya ahabwa indishyi.

Yongeye kwitsa kandi ku kibazo cy’ibura ry’amazi mu karere ka Gatsibo ndetse n’Intara y’lburasirazuba muri rusange avuga ko buri muntu wese azajya ahabwa amazi ahagije buri munsi kandi atishyurwa.

Dr Frank Habineza yakiriwe n’abantu benshi mu Centre ya Rwagitima 

Dr Frank Habineza yari yaherekejwe n’umugore we 

Frank Habineza yasezeranyije abaturage ba Gatsibo guhashya ubushomeri

Urugendo rwo kwiyamamaza yarutangiriye mu Karere ka Musanze, ku wa Gatandatu tariki 22 Kamena 2024, akomereza mu Karere ka Rubavu ku wa 23 Kamena 2024; ku wa 24 Kamena 2024 yiyamamarije mu Karere ka Ngororero no mu Karere ka Muhanga mu Majyepfo y'u Rwanda.

Ni mu gihe kuri uyu wa Kabiri tariki 25 Kamena 2024 yiyamamarije mu Karere ka Nyarugenge mu Mujyi wa Kigali, ahari hakoraniye abarenga ibihumbi 300.

Kuri uyu wa Kane tariki 27 Kamena 2024 ategerejwe mu Karere ka Huye na Nyamasheke. Azakomeza i Nyamagabe na Rusizi ku wa 28 Kamena. Aziyamamariza i Karongi ku wa 29 Kamena, ku wa 2 Nyakanga azaba ari muri Ngoma na Kirehe.

Ku wa 3 Nyakanga aziyamamariza mu Karere ka Bugesera, ku wa 6 Nyakanga yiyamamarize i Gicumbi, hanyuma Kayonza na Nyagatare azahiyamamariza ku wa 7 Nyakanga, mu gihe Gakenke azahiyamamariza ku wa 9 Nyakanga, ku wa 12 Nyakanga aziyamamarize muri Gasabo, azasoreze muri Kicukiro mu Mujyi wa Kigali, ku wa Gatanu tariki 13 Nyakanga 2024.

Ni urugendo aherekejweho n'abahanzi baririmba indirimbo zigaruka ku bigwi bye mu myaka 30 ishize ndetse no ku matora muri rusange.

Barangajwe imbere na Bruce Melodie na Bwiza bakoranye indirimbo bise 'Ogera', Nsabimana Leonard wahanze indirimbo yise 'Ndandambara', Butera Knowless, Nel Ngabo, King James, Senderi Hit, Alyn Sano, Ariel Wayz, 'Igisupusupu', Dr Claude n'abandi.

Ibi bikorwa biri kwitabirwa n'ibihumbi by'abantu barimo n'ibyamamare mu ngeri zinyuranye, nk'abazwi ku mbuga nkoranyambaga, abitabiriye amarushanwa y'ubwiza, abakinnyi ba filime, abahangamideli, abafite ibikorwa bakoze byatumye bisanga mu itangazamakuru, n’abandi.

InyaRwanda yakusanyije amafoto ya bamwe muri bo yafashwe mu bihe bitandukanye bashyigikiye Paul Kagame mu matora ateganyijwe muri Nyakanga uyu mwaka.

Nishimwe Naomie wabaye Nyampinga w’u Rwanda 2020 ari kumwe n’umukunzi we Micheal Tesfaye

Nshuti Divine Muheto wabaye Miss Rwanda 2022 [Uri iburyo] ari kumwe na Kelia Ruzindana

Abo mu muryango wa Mäckenzie ndetse na Micheal Tesfaye witegura kurushinga na Miss Namoie

King James na Bushali ku rubyiniro i Rubavu na Ngororero bakuriwe ingofero

Abarimo Madederi wamamaye muri Filime Papa Sava (Uwa kabiri uvuye iburyo), Sandra wamamaye muri City Maid (Uwa Gatatu uvuye ibumoso)

Brenda ari kumwe na Kathia Kamali babarizwa mu itsinda rya Mäckenzie

Umuhanzikazi Alyn Sano

Umuraperi Gatsinzi Emery [Riderman]

Umuhanzikazi Ariel Wayz

Dj Brianne yatanze ibyishimo ku baturage ba Ngorero na Musanze, ivumbi riratumuka

Perezida Kagame ari kumwe na Madamu Jeannette

Kata Bashabe ari kumwe na Minisitiri wa Siporo, Aurore Mimosa Munyangaju 

Uwase Raissa Vanessa wabaye igisonga cya kabiri cya mbere cya Miss Rwanda 2015

Ruzindana Kelia wegukanye ikamba rya Miss Heritage muri Miss Rwanda 2022

Umukinnyi wa filime akaba n’umunyarwenya Rusine Patrick usanzwe ukorera Kiss Fm

Umuhanzi Chriss Eazy ugezweho muri iki gihe binyuze mu ndirimbo zirimo ‘Sekoma’

Umuhanzikazi Bwiza ari kumwe na Bruce Melodie bakoranye indirimbo bise ‘Ogera’

Umunyamideli wamamaye nka Isimbi Model [Uri imbere]- Inyuma ye hari No Brainer wamamaye ku rubuga rwa x ndetse na Noella Shyak uzwi nka ‘Agapeti Gakonje’

Umuhangamideli uzwi nka The Trainer [Uwa kabiri uvuye imbere]- Inyuma ye hari abakinnyi ba filime bamamaye muri filime ‘Maya’ ndetse na ‘Behind’

Umuhanzi wamamaye mu Karere ka Ngororero, Justin yahawe umwanya agaragaza impano ye

Umuhanzi Intore Tuyisenge uzwi cyane mu ndirimbo z’uburere mboneragihugu yataramiye i Nyarugenge

Dj Sonia uri mu bagezweho mu kuvanga imiziki muri iki gihe

Couple ya Anto Migno [Iyamuremye Antoine na Mignone Aurore] yavuzwe cyane mu itangazamakuru mu 2018

Umunyamideli Kate Bashabe washinze ‘Kabash House’ yagaragaye i Nyarugenge yishimiye kwitabira ibikorwa byo kwamamaza Paul Kagame

Umunyamuziki Nsengiyumva Francois wamamaye nka Igisupusup yatanze ibyishimo binyuze mu ndirimbo ye yise ‘Ikipe itsinda’ yakoranye na Agnes

Umushyushyarugamba wamenyekanye nka MC Brian yagaragaje ko yanogewe no kuyobora ibirori i Nyarugenge

Perezida Kagame ari kumwe n’abasore babarizwa mu Itorero Ibihame by’Imana bacinya akadiho mu ndirimbo ‘Uwangabiye’ ya Lionel Sentore imaze imyaka 6 isohots

Umuhanzi Senderi Hit yataramiye i Muhanga mu Majyepfo y’u Rwanda mu kwamamaza Perezida Kagame

Kimenyi Tito uzwi ku rubuga rwa Tiktok (Uri iburyo) ndetse na Sol Nishimwe uzwi ku rubuga rwa Twitter (uri hagati)

Umunyamakuru w’Ikigo cy’Igihugu cy’Itangazamakuru (RBA), Luckman Nzeyimanaari kumwe n’umunyamakuru wa Kiss Fm, Sandrine Isheja bayoboye igikorwacyo kwiyamamaza i Nyarugenge mu Mujyi wa Kigali

Abanyamuziki barangajwe imbere na Jules Sentore, Ruti Joel, Andy Bumuntubataramiye imbere y’Umukuru w’Igihugu

Nel Ngabo wamamaye mu ndirimbo ‘NywePK24′ ndetse na Dr Claude wamamaye mu ndirimbo’Contre Succes’ bahuriye ku rubyiniro i Nyarugenge

Umubyinnyi wamamaye nka Titi Brown ari kumwe na bagenzi be babyinnye indirimbo’Ogera’ ya Bruce Melodie na Bwiza yamamaza Perezida Kagame

Umuhanzikazi Butera Knowless ku rubyiniro- Inyuma ye ni Dj Sonia ugezweho mu bavangaimiziki

Ruti Joel ari kumwe n’abasore b’intore bahuriye mu Itorero Ibihame by’Imana banyuranye umucyo i Nyarugenge

Umukinnyi wa filime Benimana Ramadhan wamamaye nka ‘Bamenya’ yagaragaje ko ashyigikiye Umukandida wa FPR Inkotanyi

Munyakazi Sadate wamenyekanye cyane ubwo yayoboraga ikipe ya Rayon Sports ni umwe mu bari kwitabira ibikorwa byo kwiyamamaza kwa Paul Kagame

Inshuti z’igihe kirekire zahuriye ku mukandida! David Bayingana wa B&B FM Kigali ndetse na Muyoboke Alex wabaye umujyamama w’abahanzi bakomeye mu Rwanda- Niwe washinze ‘Decent Entertainment’

Muyango Claudine wegukanye ikamba rya Miss Photogenic muri Miss Rwansa 2019 ari kumwe na Minisitiri wa Siporo, Munyangaju Aurore Mimosa

Abarimo Jules Sentore, Ruti Joel, Cyogere na Yvan Ngenzi mu bitabiriye igikorwa cyabereye i Nyarugenge

Umuhanzi Nsabimana Leonard wamamaye mu ndirimbo ‘Ndandambara’ yamamaza Paul Kagame

Umushumba mu Itorero Blessing Miracles Church, Pastor Akim Hulleman [Uri hagati] ari kumwe n’abahanzi barimo Ruti Joel na Jule Sentore

Senateri Evode Uwizeyimana [Uri gufata ifoto]

Dj Bisoso [Uri iburyo] afatanya na Dj Brianne kuvanga imiziki

Zuba uzwi cyane mu kuyobora ibirori- Aherutse kuyobora imikino ya BAL yabereye muri BK Arena

AMAFOTO: The New Times/ RPF Inkotanyi/ Village Urugwiro

Impapuro z'ubutumire zagiye hanze IGIHE yabashije kubona, zigaragaza ko Hirwa Honorine azasezerana n'umukunzi we imbere y'Imana mu birori bizaba ku wa 24 Kanama 2024, mu gihe ibi birori bizabanzirizwa n'ibyo gusaba no gukwa biteganyijwe ku wa 16 Kanama.

Tariki 23 Gashyantare 2023, Miss Honorine yari yasezeranye imbere y'amategeko na Nsengiyumva Mugisha Christian, mu Murenge wa Nyarugenge.

Aba bombi bivugwa ko bari bamaze igihe kitari gito bakundana ndetse bagiye babyereka ababakurikira ku mbuga nkoranyambaga, ko baryohewe n'urukundo guhera mu 2022.

Miss Uwase Hirwa Honorine yitabiriye irushanwa rya Miss Rwanda 2017 ahagarariye Intara y'Iburengerazuba. Yaje kumenyekana cyane kubera ijambo yavuze ubwo bari mu majonjora yo muri iyi ntara, avuga ko umukobwa w'umunyarwanda ari uteye nk'igisabo, bituma ahabwa izina rya Miss Gisabo.

Gusa ntiyaje kwegukana ikamba rya Miss Rwanda, ahubwo yabaye umwe mu bamenyekanye cyane ahabwa ikamba rya 'Miss Popularity'. Uyu mukobwa uretse Miss Rwanda, yanitabariye irushanwa rya Miss Earth World 2017 gusa ataha nta kamba yegukanye.

---

Muri iyi nkuru turagutungira urumuri ku mpamvu biba byiza gufata akaruhuko mu rukundo niba ufite uwo mukundana igihe cyose mwumva mushaka kubivamo kandi mwakundanaga by'ukuri.

Ikiruhuko mu rukundo cyumvikana nabi. Ikibazo cyacyo ni uko hari benshi bacyumva nko guhagarika urukundo burundu. Ikosa kandi riba mu rwibutso rw'ubugimbi bwacu: mu mashuri yisumbuye na kaminuza, kenshi twagiraga igihe cy'ibiruhuko uko byagenda kose, ubu rero twumva ko kuba twagira akaruhuko mu rukundo ari iby'abo twakundanye mbere, bitari abo dukundana ubu.

Oya: ibi si byo na gato rwose, akaruhuko k'urukundo si ikintu cya kera, kiracyagezweho cyane kandi gifite agaciro cyane cyane ku bakundana babona ibyabo bitagenda neza.

Icya mbere wamenya ni uko, ikiruhuko mu rukundo gishobora kuzahura urukundo rwari mu marembera, kandi ababiri bakundana (couple) kikabasubizamo intege cyane, kidutera umurava wo gutangira bundi bushya duhereye ku musingi mwiza, tugakemura amakimbirane. Uragerageza kubikurura, si byo?.

Reka turebere hamwe impamvu nziza zo gutinyuka gufata akaruhuko mu rukundo, noneho n'ibyo dukwiye kwitondera kugira ngo aka karuhuko gakize ubuzima, kugira ngo niba mukundana muzatangire ikiruhuko mufite ubumenyi bwose ku byo mukora, kandi mufungurirane imitima mugirane ikiganiro n'uwo mukundana kuri iyi ngingo.

1. Ikiruhuko mu rukundo si ugutana, ni amahirwe

Iyo abakundana bisanze mu muraba n'umuyaga mu rukundo, batumva ibintu kimwe bashwana buri munsi, icya mbere dutekereza ni ugutandukana kandi ibyo ni ibisanzwe, birumvikana. Aha dutekereza niba koko ari byiza ko twagumana. 

Iki kibazo kandi kirakwiye rwose, ni ikimenyetso ko tuzi uburyo bwo kwibaza ubwacu no kwitekerezaho ndetse no gusoma neza uko umutima wacu utera. Gusa rimwe na rimwe dutekereza ko gutandukana muri iyi mimerere twaba twihuse, kandi ko byaba biteye isoni gutana. Hagati aho ariko, ntitugambirira gukomereza mu nzira ibintu bihagazemo.

Aha rero ikiruhuko ni cyo gisubizo cyo mu gihe nk'icyo gisa n'urungabangabo. Byumve utya: Igihe cyose wumva umutima uguhata kureka uwo wakundaga by'ukuri nyamara undi ukaguhata kumugumaho, icyo ukeneye ni ugufata ikiruhuko.

Ikiruhuko gifasha abakundana kwiha andi mahirwe. Birumvikana yego, kuba wenda dukundana tutabana cyangwa tudaturanye cyane, bidufasha kuba tutegeranye n'uwo dukunda by'igihe gito tutanahura. Aha twiha ubwacu amahirwe yo kubana nk'abatanye ariko amateka yacu tutayibagiwe. 

Aha rwose, tuzumva neza ko mu mitekerereze n'ineza yacu, bitugirira umumaro: tuba tubizi neza ko tutatandukanye n'uwo dukunda, turarira tukanababara nyamara bidakabije kandi tukareka umubano wacu kubaho gato tutawushenye, bidufasha hanyuma kuwubyutsa noneho bitworoheye kurushaho.

2. Ikiruhuko gitanga umwanya mwiza wo kwitekerezaho

Imwe mu nyungu zikomeye z'ikuruhuko cy'urukundo ni uko gitanga agahe ko kwitekerezaho. Ubundi ni yo ntego nyamukuru yacyo: Kiduha igihe wo kwigenzura ubwacu tukisubiramo: Ni iki twifuza ubwacu n'icyo twifuriza 'couple' yacu? 

Birumvikanaikiruhuko si impuzanyito y'icyitwa 'période à ressasser'' [igihe cyo kugaruka, gusubiramo], kuko na cyo ubwacyo kiduha amahirwe yo gusukura intekerezo zacu, kureka ubuzima bugakomeza no kugira amahirwe yo kubaho ubuzima bwa buri munsi umukunzi wacu ataburimo kugira ngo ibizakivamo bizatugirire akamaro.

Bityo rero, twishingikiriza ku mpamvu ebyiri zo kubaho kw'ikirihuko: turatekereza ariko bidahoraho, cyangwa ntidutekereze na gato. Urugero, mufashe ikiruhuko cy'icyumweru, ibyumweru bibiri cyangwa ukwezi, ufata igihe cyawe ukakigabanyamo kabiri, icyo kwitekerezaho no kuruhuka.

Dutekereza iyo twumva ari ngombwa , bitabaye ko ibyo bitekerezo bidutesha umutwe, kandi tukareka ibitekerezo bikagenda nk'ibyoga mu Nyanja uko iminsi ihita. Nta gitutu tugira aha, nta mutwe uturya, mu gihe ababiri bakundana buri munsi, twiburira umwanya n'uw'uku kwitekerezaho bya ngombwa ko twishima. 

Bityo, biciye mu kiruhuko, twibohora ingoyi y'imihangayiko iva ku rukundo mu gihe twiga neza niba rudukwiriye. Ikiruhuko ni igihe cyiza cyane cyo kureba neza noneho inkuru y'urukundo rwacu.

3. Akaruhuko kamurikira amarangamutima yacu

Iyo dufashe akaruhuko, turatekereza, tukaruhuka, tukajya hanze, tukajya ku murimo, muri make, tuyobora ubuzima bwacu tutibagiwe couple yacu. Hagati aho, turongera tukamenya neza ubuzima bwacu butarimo umukunzi wacu. 

Ni byiza kuko ubona ubwisanzure n'ubwigenge kandi ubwo bwisanzure bugufasha kumva ususurutse. Icyakora ubu bwisanzure butanga impano yo kutwereka icyuho kibaho tudafite uwo dukunda, kikaba icyuho kimurikira umubano wacu nyuma kuko twumva igihombo twagira tutari kumwe mu rukundo n'uwo dukunda.

Ni ngombwa kuvuga ko mu buzima bwa buri munsi, tugira amahirwe n'umwanya muto cyane wo kwikumbura ubwacu. Usanga twita cyane ku bibi. Mu gihe cy'ikuruhuko, kuko tuba tutegeranye, ibitekerezo ku wo dukunda bihindurwa bishya.

Tubona cyane noneho ibyiza bye, tugasubiza amaso inyuma turora uko byatangiye, tukibuka ibihe byiza twagiranye. Muri make, hari icyiza dukuramo. Gutandukana na byo byazana ibitekerezo nk'ibi, birumvikana, ariko kuko tuba tutaratandukana, kandi intego yacu ari ugutabara couple yacu, ibitekerezo byiza tugira ku wo dukunda bigira uruhare runini rwa nyarwo: ntibituriza, biraza bikadufasha kubaka umukunzi wacu w'ahazaza.

Icyakora, iyo twumvise nta cyuho uwo dukunda asize kandi ibitekerezo byacu bigakomeza kuba bibi, aha tumenya ko noneho ko ikiruhuko kiba ari icyiciro kibanziriza gutana. Hari icyo byangiza? Yego cyangwa oya, kuko ni cyo ikiruhuko kimaze: kutumurikira ku kibazo turimo no kudufasha mu mwanzuro tugiye gufata.

4. Ikiruhuko kitwibutsa ko ari twe twakoze amateka y'urukundo rwacu

Tutavuze ko gutandukana bikubabaza, ikiruhuko kiguhamagarira kuzamura umutwe wawe ukumva ko ugenzura neza umubano wanyu, ko ntawe ushinzwe urukundo rwanyu kukurusha. Kuko dufatira hamwe umwanzuro wo gufata ikiruhuko. 

Mu kiruhuko ariko ntidutegereza turi aho gusa ngo ubuzima bukore ibyarwo bube ari bwo budufatira umwanzuro. Kujya mu kiruhuko bivuga gushyira urukundo rwanyu ku mutima kandi ukagira icyo ubikoraho.

Gufata ikiruhuko bivuga kwishyira mu mwanya nk'uw'abakinnyi b'imena bakina mu nkuru yanyu. Ni ugufata umwanzuro ku mubano wanyu. Si bibi cyangwa iby'ubwenge buke kuko ikiruhuko kiduha amahirwe yo gushyira couple yacu imbere, noneho nibura twabaho, mu gihe cy' ukwezi ngo turebe icyo twakora ku rukundo rwacu nta wundi tubitegerejeho kuko ubu umuntu aba ari wenyine.

Bitubuza kandi kuba nk'abafana gusa b'inkuru irangira cyangwa itandukana riryana. Tuba turi kumwe ku murongo w'imbere dufatanije kuyobora ubwato tubanamo. Ubundi, ikiruhuko cy'urukundo ni umushinga w'abakundana bombi, kandi niba hari ibanga rituma couple irambana, ni ugukorana imishinga mukaba magirirane; ibiruhuko ku mazi cyangwa ahandi, kujyana muri resitora, kugurana imitung0. Iyo dukorana, dukora neza kandi tukitoza kurebana ejo hazaza heza.

5. Ikiruhuko kiduha intangiriro nshya ariko ya nyayo

Iyo dufashe ikiruhuko mu rukundo, umutima wacu utera utuje: wibaza ku hazaza, kandi ukahashakira igisubizo, wumva hari icyo kandi ukwiyumva nk'ufite uruhare mu mukino. Ni ibintu byinshi byiza! Ibintu byiza umutima utekereza ni byo byongerera umutima umurava wo kubona ibyiza: tumenya ibikomereye couple yacu, ikibazo nyamukuru ifite cyangwa ibibazo, imihate twashyiraho ngo twirinde gutandukana burundu, ndetse noneho n'imishinga twifuza gutangira.

Aha rero, iyo ikiruhuko kirangiye tukongera guhura nk'abagize couple, tuba twiteguye kuganira. Wiyumvise ute? Ni iki wiyumvisemo? Ni iki twakora ngo dukomeze tujye mbere, kandi dukize inkuru yacu? Ese iki gihe cy'akaruhuko hari ibintu katumye bikubamo? Niba twumva dutinya gutandukana, ikiruhuko cyadutinyura, twakumva twongereye ikigero twakundanagaho, tukumva twiyemeje kugumana by'iteka cyangwa gutandukana burundu.