Category: Uncategorized

Rayon Sports itegereje rutahizamu w’umunya-Senegal wakiniraga FK Příbram yo muri Czech Republic, Fall Ngagne.

Uyu rutahizamu w’imyaka 24 yari asoje amasezerano ye muri FK Příbram yo mu cyiciro cya kabiri muri Czech Republic akaba ategerejwe mu Rwanda mu ijoro ryo kuri uyu wa Mbere rishyira ku wa Kabiri.

Fall Ngane akaba yarakiniye amakipe atandukanye nka AF Darou Salam na Génération Foot zo muri Senegal, Ittihad Tanger yo muri Maroc ndetse na Viagem Pribram na FK Příbram zo muri Czech Republic.

Si we wenyine Rayon Sports itegereje kuko inategereje myugariro na we ukomoka muri Senegal w’imyaka 27 Youssou Diagne wakiniye amakipe nka ASC Jaraaf 2017-2019, Génération Foot 2019-2021 zo muri Senegal na Ittihad Zemmouri de Khemisset 2021-2024 yo muri Maroc.

Ritahizamu Fall Ngagne yamaze kumvikana na Rayon Sports

Myugariro Youssou Diagne na we utegerejwe mu Rwanda

Nyiransengiyumva Valentine wamenyekanye nka Vava Dorimbogo mu muziki yashyinguwe.

Uyu mukobwa yitabye ku wa Gatandatu tariki 27 Nyakanga 2024 azize uburwayi aguye mu bitaro bya Kibuye.

Kuri uyu wa Mbere tariki ya 29 Nyakanga 2024 ni bwo yasezeweho bwa nyuma ndetse aranashyingurwa iwabo muri Nyamasheke mu Murenge wa Kanjongo akagari ka Kibogora mu mudugudu wa munini.

Umuhango wo guherekeza Vava ukaba witabiriwe n’inshuti n’abavandimwe be bashenguwe cyane n’urupfu rwe rwababaje benshi.

Yari amaze igihe arwaye indwara zifata imyanya y’ubuhumekero. Mu minsi ishize yari arwariye mu Bitaro bya Kibogora i Nyamasheke, ahava bamuhaye 'Transfer' yo kujya kwivuriza mu Bitaro bya Kibuye.

Nyiransengiyumva yahageze kuri uyu wa 27 Nyakanga 2024 ameze nabi cyane, abaganga bagerageza kumwitaho ariko birangira yitabye Imana.

Ubwo yari mu bitaro bya Kibogora, hari amajwi ye yagiye hanze avuga ko yabanje kwivuriza mu Mujyi wa Kigali ariko akabona bihenze cyane, biba ngombwa ko asubira mu rugo i Nyamasheke kuhivuriza.

Icyo gihe yagize ati 'Nintagaruka i Kigali muzansabire imbabazi abo nahemukiye, kandi nintagaruka muzansezere neza.'

Inkuru y’incamugogo y’urupfu rwa Dorimbogo yatangiye kuvugwa mu ma saa kumi nebyiri zo kuri uyu wa Gatandatu tariki 27 Nyakanga 2024.

Dorimbogo yasezeweho bwa nyuma

Tariki 26 Gicurasi 2024 nibwo ikipe ya Kiyovu Sports yatoye komite nshya igomba kuyobora iyi kipe mu gihe cy’imyaka 3 gusa kugeza ubu usibye umuhango wo gutora iyi komite, inshingano yari yarahawe nta n’imwe barakemura. Komite yatowe iyobowe na Nkurunziza David uba muri Canada, Perezida wungirije Mbarushimana Ally na Perezida wa kabiri Karangwa Joseph.

Ubwo iyi komite yatorwagwa, Perezida Nkurunziza David yatangaje ko bagiye kongere guhuza imbaraga kugira ngo ibe yakwegukana igikombe kimwe mu bikinirwa mu Rwanda.Yakomeje avuga ko abafana bagiye kongera kwishima nyuma y’igihe kinini bari mu gahinda.

Ibi byose Perezida yavuze nta na kimwe kiri hafi y’ukuri kuba cyabaho.

Kuva iyi komite yatorwa igikorwa gikomeye cyabaye abakunzi b’ikipe baheruka ni amafoto yafashwe ubwo bari bakimara kurahira naho nyuma yaho buri wese ari kureba undi mu maso bakituriza.

Nkurunziza David umaze amezi 2 ayobora Kiyovu Sports avuga ko atiteguye kugaruka mu Rwanda 

David nyuma yo kuba Perezida wa Kiyovu Sports yahise yisubirira muri Canada, ari naho akorera ibikorwa bye bya minsi yose. Uyu muyobozi ibibazo byose yaje bimutegereje we na komite ye, nta nakimwe yakemuye kuko kugeza  ubu iyi kipe itarahabwa uburenganzira na FIFA bwo kwandikisha abakinnyi.

Ubuyobozi bwa Kiyovu Sports bwatereye agati mu ryinyo

Kuva David yatorerwa kuyobora Kiyovu Sports yabaye umuntu udashaka kugira icyo avuga ku mafaranga yakemura ibibazo by’ikipe ndetse buri wese umubajije avuga ko amafaranga afite ariyo n’abandi bafite ko bayazana bagahuriza hamwe bakubaka ikipe. Uyu muyobozi asa naho atazagaruka mu Rwanda vuba kandi iki aricyo gihe ikipe iba ikeneye umuyobozi mukuru

Mu gihe habura ibyumweru bibiri gusa ngo shampiyona itangire, Kiyovu Sports ifite abakinnyi 9 gusa

Urebye uburyo Kiyovu Sports ihagaze nk’ikipe ibura ibyumweru 2 ngo itangire shampiyona, ubona bihabanye cyane.

Mu cyumweru twaraye dushoje bamwe mu bagize komite ya Kiyovu Sports baganiriye n’abakinnyi 9 bagifite amasezerano babasaba kuba baza mu myitozo, aba bakinnyi bababwira ko bitashoboka ko baza  batarahabwa amafaranga yabo. Umutoza wa Kiyovu Sports akomeje gukoresha imyitozo abakinnyi bashya barimo n’abavuye mu irerero ry’iyi kipe, ariko abakinnyi b’ikipe ya mbere yateye agatebe banze kugaruka mu myitozo.

Abagize komite ya Kiyovu Sports barakennye ku buryo batabasha kwishyura umusifuzi

Ku wa 5 w’icyumweru gishize Kiyovu Sports yateguye umukino wa gicuti yatsinzwemo na Vision FC ibitego 2, nk’ikipe yari yakiriye umukino yagombaga gushaka abasifuzi, gusa umukino ujya gutangira amakipe  yombi yasanza nta basifuzi bahari ndetse byatumye umukino ukererwaho imikino isaga 30.

Kiyovu Sports isigaranye abakinnyi 9 gusa bafite amasezerano ariko nabo ntibiteguye kugaruka mu myitozo mu gihe baba batarahabwa amafaranga ikipe ibabereyemo 

Kiyovu Sports yatumyeho umusifuzi imubwira ko iri bumwishyure, gusa yasifuye iminota 45 gusa ubundi ahita yitahira kuko yabonaga Kiyovu Sports iri kumubeshya birangira umukino usifuwe n’umuganga wa Vision FC.

Bamwe mu bafana ba Kiyovu Sports barasaba ko Juvenal yagaruka

Bamwe mu bafana ba Kiyovu Sports bemeza ko aho kugira ngo ikipe yabo igume mu biganza bya komite iyobowe na David, ikipe yasubirana Juvenal ko aribwo bakongera kwishima.  Abafana bavuga ko niba ari isomo baribonye ndetse babona nta muntu wakongera gutanga ibyishimo muri iyi kipe atari Juvenal.

Abafana ba Kiyovu Sports bakumbuye Mvukiyehe Juvenal uheruka kubaha agatwenge 

Karangwa Joseph,Perezida wungirije asa naho ikipe yamusumbye nawe ayireba nk’abandi bose

Mbarushimana Ally, Perezida wa 2 wungirije, nawe ubwe ntafite icyo gukora 

Abafana ba Kiyovu Sports barasaba ko komite yegura ariko ikajyana na Board kuko nayo ntacyo ikora

Rayon Sports yemeje ko uyu munsi yakira abakinnyi babatu bashya barimo ba rutahizamu babiri ndetse n’umwe ukina mu bwugarizi.

Ibi umuyobozi wa Rayon Sports, Uwayezu Jean Fidele yabigarutseho avuga ko bagerageje kubaka ikipe ikomeye.

Ati “Abakinnyi baje mwarababonye, byibuze tumaze gukina imikino 3 ya gicuti hari icyo mwabonye.”

Yakomeje avuga ko uyu munsi ku wa Mbere bari buze kwakira abandi bakinnyi babatu barimo ba rutahizamu babiri.

Ati “Ku wa Mbere (uyu munsi) hazaza abandi 3. Haraza ba rutahizamu babiri ndetse hanze na myugariro umwe.”

Yakomeje avuga ko abo ari bo bakinnyi basigaje kugurwa, gusa ngo nyuma y’uko umutoza akoresheje imyitozo akagaragaza ko hari imyanya irimo igihanga bashobora gusubira ku isoko.

Rayon Sports imaze gukina imikino 3 ya gicuti bananyije na Gorilla FC batsinda Musanze FC na Amagaju FC, ku wa Gatatu bakaba bazakina umukino wa gicuti na Muhazi United.

Rayon Sports irakira abakinnyi babatu uyu munsi

Rutahizamu Mugunga Yves uheruka gutandukana na Kiyovu Sports aho yari intizanyo ya APR FC, yasinye amasezerano y’umwaka umwe muri Gorilla FC.

Mu gitondo cyo kuri uyu wa Mbere tariki ya 29 Nyakanga 2024 ni bwo uyu rutahizamu yasinyiye Gorilla FC.

Uyu mukinnyi ugomba guhita akomezanya y’iyi kipe mu mwiherero i Rubavu, umwaka ushize w’imikino APR FC yari yamutije Kiyovu Sports ariko baje gushwana bituma badakomezanya kubera ibirarane by’imishahara bari bamufitiye.

Mugunga Yves wasoje amasezerano ya APR FC, agiye muri Gorilla FC yiyongera ku bandi bashya baguzwe nka Nduwimana Franck, Karenzo Alexis, Muhawenayo Gad, Manzi Patrick, Uwimana Kevin, Shyaka Jean Derrick, Ntwari Evode na Moussa Omar.

Mugunga Yves yerekeje muri Gorilla FC

Ni ibiganiro Perezida Kagame na Minisitiri w'Intebe Starmer bagiranye ku wa 27 Nyakanga 2024 aho bari bahuriye i Paris mu Bufaransa, mu muhango wo gutangiza imikino ya Olempike.

Muri ibi biganiro, Minisitiri w'Intebe, Keir Starmer yabanje gushima Perezida Kagame ku ntsinzi aherutse kwegukana mu matora y'Umukuru w'Igihugu mu Rwanda. Ibiganiro byabo bikomereza ku bibazo byugarije Isi birimo imihandagurikire y'ibihe n'ibindi.

Indi ngingo baganiriyeho ni ijyanye n'ikibazo cy'abimukira.

Ibiro bya Minisitiri w'Intebe byatangaje ko abayobozi bombi 'bemeranyije ko ari ikibazo cyugarije Isi, baganira ku ntego bahuriyeho yo gukomeza gukorana mu gukemura iki kibazo cy'abimukira, bashimangira ko guca ubucuruzi bw'abanyabyaha bakura inyungu muri aka kababaro k'ikimweramuntu, bikwiriye kuza imbere.'

Ibi biganiro bibayeho nyuma y'igihe gito Minisitiri w'Intebe w'u Bwongereza, Starmer atangaje ko ahagaritse ubufatanye igihugu cye cyari gifitanye n'u Rwanda mu bijyanye no gukemura iki kibazo cy'abimukira.

Mu 2022 ni bwo u Rwanda n'u Bwongereza byasinyanye amasezerano yo kurwoherezamo abimukira babwinjiramo bitemewe n'amategeko, hakoreshejwe ubwato buto.

Nyuma y'uko u Bwongereza bugaragaje ko butazakomeza amasezerano bwagiranye n'u Rwanda ku bijyanye n'ababwinjiramo binyuranyije n'amategeko, u Rwanda rwagaragaje ko rwamenye uwo mwanzuro, ariko rwiteguye gukomeza gufasha igihe cyose byaba ngombwa.

Rwagaragaje ko na n'ubu nta cyahindutse rukirajwe ishinga no kugira uruhare mu gukemura ibibazo by'abimukira bibangamiye Isi ariko hitabwa ku mutekano wabo, na cyane ko nk'igihugu cyanyuze mu bibi byinshi ruzi icyo ubuhunzi buvuze.

Rwakomeje rugaragaza ko 'ruzirikana inshingano zarwo ku ruhande rw'amasezerano arureba, harimo n'ibijyanye n'imari ndetse rukaba rukirajwe ishinga no gushaka ibisubizo ku bibazo by'abimukira. Birimo kurindira umutekano, kuha amahirwe nk'abandi baturage bose, abimukira bose baza mu Rwanda.'

Uretse ibijyanye n'abimukira n'imihindagurikire y'ibihe, abo bayobozi bombi biyemeje kuzamura umubano w'u Rwanda n'u Bwongereza ukagera ku rundi rwego, bashimangira ko nta kabuza ubufatanye mu nzego zitandukanye bugomba gukomeza guhabwa ingufu.

Perezida Kagame yagariye na Minisitiri w’Intebe w’u Bwongereza, Keir Starmer ku mishinga itandukanye irimo no guhangana n’ibibazo by’abimukira binjira mu buryo butemewe n’amategeko

Kuva mu 1980 ni bwo leta y'u Rwanda yatangiye gutanga inguzanyo yo kwiga, mu 2016 BRD ihabwa inshingano zo gukomeza gutanga inguzanyo no kwishyuza abari bakirimo umwenda wa miliyari 70.9 Frw bazihawe mbere. Aya iyo uyateranyije n'ayo BRD imaze gutanga usanga hamaze gutangwa inguzanyo ya 376,900,000,000Frw

Kuva BRD yahabwa izi nshingano imaze kugaruza asaga miliyari 31 Frw.

Hari abigiye kuri iyi nguzanyo bagaragaza ko mu gihe cyo kwishyuzwa bagiye basabwa kwishyura amafaranga y'umurengera ugereranyije n'ayo bagombaga kwishyura.

Hari n'abamaze kwishyura ariko bagakomeza kwibona ku rutonde rw'abakirimo umwenda ndetse abafite akazi bagakomeza gukatwa amafaranga ku mishahara, hakaba n'abibonye ku rutonde rw'abishyuzwa batarasabye iyi nguzanyo.

Umuyobozi w'Ishami rishinzwe inguzanyo na buruse zihabwa abanyeshuri bo mu mashuri makuru na Kaminuza muri BRD, Wilson Rurangwa, yabwiye IGIHE ko mu bugenzuzi bakoze byagaragaye ko hari abakoresha bakata imishahara y'abakozi bigiye ku nguzanyo ya Leta, ayo mafaranga bakayirira ntibayageze muri BRD.

Ati ''Barahari. Ugakata umukozi kubera ko bakugaragarije ko yigiye ku nguzanyo ya leta, amafaranga aho kuyaha BRD ukayagumana. Ukwezi kwa mbere, ukwa kabiri, ukwa gatatu, ukwa Kane, hari abo twabonye rwose bimeze gutyo.''

Rurangwa yavuze ko ku bakigaragara ku rutonde kandi baramaze kwishyura hari ubwo hashobora kubamo kwibeshya ku buryo bakwiye kugana BRD, bagasubizwa amafaranga yabo mu gihe inyandiko zagaragaza ko bishyuye menshi.

Yahamije ko hari ibigo bikata abakozi amafaranga ku mishahara y'abakozi bigiye ku nguzanyo ya Leta ariko ntibiyamenyekanishe kuri BRD, ngo binatange ibisobanuro bijyanye n'uwishyura. Ibi bituma akomeza kubarwaho umwenda nyamara amafaranga ye yarageze kuri konti za BRD.

Rurangwa ati ''BRD ntabwo izamenya ngo 'Ese ko mbona amafaranga yageze kuri konti yishyuriraga nde?' Ni yo mpamvu itegeko riteganya ko igihe cyose umukoresha akase abakozi amafaranga y'iriya nguzanyo amenyekanisha ubwishyu yakoze kuri BRD.''

Ubugenzuzi BRD yakoze mu bigo 28 bikomeye bikorera mu Rwanda, bwagaragaje ko byose bitujuje amabwiriza agenderwaho mu kwishyuza ababikorera bigiye ku nguzanyo ya leta, bikaba intandaro y'amakosa agaragara muri iyo gahunda.

Umuzi w'iki kibazo ni uwuhe?

Kuva inguzanyo yo kwiga itangira gutangwa mu 1980 yatangwaga na Minisiteri y'Uburezi, bigenda bihunduka kugeza ubwo mu 2008 izo nshingano zimuriwe mu Kigo cy'Igihugu cyari gishinzwe gutanga inguzanyo (SFAR).

Mu 2013 hamaze guhuzwa ibigo byari biri muri Minisiteri hagasigara Urwego rw'Igihugu Rushinzwe Uburezi bw'Ibanze (REB), SFAR yinjijwemo nk'ishami rishinzwe gutanga inguzanyo ku banyeshuri.

Mu bafite ibibazo byo kwishyuzwa amafaranga menshi harimo n'abahawe inguzanyo mu myaka isaga 20 ishize, barimo n'abo BRD itigeze ihabwa ibimenyetso by'uburyo bishyuye iyo nguzanyo kuko byakozwe n'ibindi bigo ntibitange raporo.

BRD ihamya ko igenda inyura mu bigo bitandukanye isaba raporo y'uburyo bagiye bishyurira abahakoze mu myaka yashize kugira ngo amakuru ahuzwe, abakibarwaho imyenda bayihanagurweho.

Wilson Rurangwa kandi agira inama abasabye n'abasaba inguzanyo muri BRD gufunguza konti muri BRD Minuza, kugira ngo babashe kujya bakurikirana amakuru yerekeye amafaranga abakoresha babo babakata ku mushahara niba agera muri BRD, kuko bagenda babona impinduka hakurikijwe igikorwa cyakozwe.

Rurangwa yatangaje ko iyo basanze umuntu wigiye ku nguzanyo ya leta yarakaswe amafaranga menshi mu gihe cyo kwishyuzwa ayasubizwa. Magingo miliyoni 300 Frw zimaze gusubizwa abakaswe amafaranga menshi.

Ati ''Iyo bigaragaye ko umuntu yarengeje amafaranga ye, rwose turayamusubiza. Tumaze gusubiza amafaranga atari munsi ya miliyoni 300 Frw, dusubiza abantu bagiye barenza kwishyura.''

BRD isobanura ko abafite ikibazo ku buryo bishyuzwa inguzanyo yo kwiga bahawe na BRD, bashobora no gusaba ibisobanuro n'ubundi bufasha bwisumbuyeho muri BRD bahamagaye kuri 3288.

Abantu bamwe basoje kaminuza basoje kwishyura ariko baracyabarwaho umwenda

Ni bimwe mu bikubiye mu butumwa Ndayisaba aherutse gutangira mu gikorwa cyo guhugura abaforomo n'ababyaza, ku bijyanye n'uburyo bashobora gutanga serivisi kwa muganga hagahejwe abantu bafite ubumuga.

Umunyamabanga Nshingwabikorwa wa NCPD, Emmanuel Ndayisaba, yavuze ko mu gihe ayo mafaranga yaba yongewe yahabwa cyane cyane amatsinda abarizwamo abantu bafite ubumuga, mu kwihutisha iterambere ryabo hanazamurwa uburyo bakorana n'ibigo by'imari.

Ati ''Turimo turasha kuyongera kuko n'abadepite barabyifuje, twumva dushaka kuba twayakuba gatatu. Kuko urumva nka koperative niba twarazishyizeho zikaba ari nyinshi cyane zimaze kugera hafi mu 1800, ni ukuvuga ngo iyo bagiye nko mu karere kugira ngo babagabanye nka miliyoni 4 Frw usanga hari imara imyaka nk'ine cyangwa itanu batarayigeraho, kandi yakagombye kuba iri gutera imbere.''

''Turashaka rero ko yakongerwa kugira ngo bose abagereho, hanyuma nitubona batangiye gutera imbere bibaye na ngombwa dushobora no gushyiraho n'uburyo bajya banyuzamo na bo bakayagarura.''

Kuri iyi ngingo yo kugira amafaranga basubiza, Ndayisaba yasobanuye ko hashobora no kuzashyirwaho uburyo leta iha amafaranga amatsinda y'abantu bafite ubumuga akanyuzwa mu bigo by'imari, ariko bakazishyura nka kimwe cya kabiri cyayo.

Ni mu rwego rwo kugira ngo bamenyere ko amafaranga bahabwa atari ayo kwikoreshereza ibitabyara inyungu, na bo bakamenyera gukomeza gukorana n'ibigo by'imari kubera kwibuka ko banafite inshingano zo kugira ayo basubiza.

Buri mwaka, leta itanga ingengo y'imari ya miliyoni 120 Frw yo gufasha koperative zatangijwe n'abantu bafite ubumuga. Itanga kandi asaga miliyoni 90 Frw yo gufasha ibigo byita ku bantu bafite ubumuga, n'andi atangwa muri gahunda zitandukanye zirimo no guha amahugurwa abantu bafite ubumuga, ku bikorwa bitandukanye byabateza imbere.

Leta irateganya gukuba gatatu ingengo y'imari igenerwa abantu bafite ubumuga

Amakuru IGIHE ifite ni uko uyu mugore ufite uburambe mu by'amabanki n'imari yamaze kwemezwa kuri uyu mwanya. Azatangira inshingano muri Kanama 2024.

NCBA Group Lina agiye gukorera muri Kenya ni ikigo cy'ishoramari gifite NCBA Bank, banki ikorera mu Rwanda, Uganda, Kenya na Tanzania.

Guhabwa inshingano kwa Lina Higiro biri mu murongo wa NCBA Group wo guhuza imikorere mu mabanki yayo yose, haba ku bakozi ndetse n'abakiliya b'iki kigo. Bivuze ko umukozi ashobora kuva ku ishami rimwe akajya gukorera ku rindi cyangwa ku cyicaro gikuru, ariko ibi byose bijyanye n'ubushobozi n'ubumenyi afite.

Kuva mu 2018 NCBA Bank Rwanda iyobowe na Lina Higiro yagiye itera imbere mu buryo bwihuse haba ku mari rusange no mu nguzanyo yahaye abakiliya bayigana.

Higiro yatangiye kuyobora NCBA iri mu bihe bitoroshye. Yayisanze mu bihombo bya miliyari 2,5 Frw ariko nyuma y'imyaka itatu byari bimaze kurangira batangira urugendo rushya rw'inyungu.

Imibare igaragaza ko kuva mu 2019 umutungo wa NCBA Bank Rwanda wiyongereye uva kuri kuri miliyari 35 Frw ugera kuri miliyari 205 Frw mu 2023.

Inguzanyo zahawe abakiliya mu 2019 zari miliyari 19 Frw na ho mu 2023 zarazamutse cyane zigera kuri miliyari 103 Frw. Ni mu gihe ubwizigame bw'abakiliya bwo bwavuye kuri miliyari 21 Frw mu 2019 bugera kuri miliyari 140 Frw mu 2023.

Muri Werurwe 2023 ubwo hagaragazwaga umusaruro w'Iki Kigo gihuriza hamwe amabanki mu bihugu bitandukanye, Umuyobozi Mukuru Ushinzwe Imari muri NCBA Group,David Abwoga yatangaje ko banki bafite itera imbere mu buryo bwihuse ari iyo mu Rwand .

Yagize ati 'Ikigo dufite gitera imbere mu buryo bwihuse ni icyo mu Rwanda, gifite umutungo rusange wiyongereyeho 56%.'

Lina Higiro yagize uruhare rukomeye muri iri terambere biturutse ku miyoborere ye yibanze mu gushyigikira iterambere rya NCBA Bank Rwanda Plc binyuze mu kwimakaza ikoranabuhanga no gushyiraho uburyo bw'imikorere bufasha abakozi bayo bose gutanga umusaruro.

Imiyoborere ya Higiro yaharaniye kugira abakozi bishimiye, aho nk'umubyeyi wabyaye ahabwa ikiruhuko kandi yanagaruka mu kazi akoroherezwa uburyo bwo gukora.

Ni yo banki ya mbere yagize irerero ry'abana bato n'icyumba cy'umubyeyi kimufasha konsa umwana we atuje, nyuma agakomeza akazi.

Abagabo babyaye na bo bahawe amahirwe adasanzwe yo kuruhuka iminsi 14 aho kuba irindwi iteganywa n'amategeko. Benshi mu bahakora bahamya ko bituma bita ku muryango neza kandi bikongera umusaruro mu kazi.

Yatangije gahunda ya 'Man Enough' ihamagarira abagabo bakora muri iyi banki kwimakaza ihame ry'uburinganire bw'ibitsina byombi, NCBA Bank Rwanda Plc iba iya mbere ibyinjiyemo.

Higiro uzi neza agaciro k'ubuzima bwiza bw'umukozi, bikajyanishwa no gutanga umusaruro kwe, yanatangije gahunda yo gufasha abakozi ba NCBA Bank Rwanda Plc mu byerekeye ubuzima bwo mu mutwe, serivisi itangirwa ubuntu kandi bakanahuzwa n'abajyanama mu by'imitekerereze igihe bikenewe.

Muri Werurwe 2023, NCBA Bank yahawe igihembo cyo kwimakaza ihame ry'uburinganire n'ubwuzuzanye mu bakozi.

Muri Nyakanga 2023 kandi Higiro yagaragaje ko abagore aho bakora hose bakwiye gushyirirwaho gahunda zibafasha mu byerekeye ubuzima bwo mu mutwe kubera ibibazo bahura na byo birimo ihohiterwa rishingiye ku gitsina, kwirukanwa mu kazi kubera gutwita n'ibindi.

Lina Higiro yashinze Umuryango Women In Finance Rwanda, ndetse ubu ni Umuyoobozi Mukuru wawo.

Amasezerano ya mbere ya WIFR yayasinye mu 2023 n'Ikigo cyo mu Bwongereza gitanga ubumenyi muri uru rwego kizwi nka 'Chartered Institute for Securities & Investment- CISI', yatumye abarenga 50 bahita bahabwa buruse.

Women in Finance Rwanda yasinyanye amasezerano y'imikoranire n'Ikigo cya Uganda cy'Amabanki na serivisi z'Imari, UIBFS akubiyemo ibyo guhugura abagore bakora muri serivisi z'imari mu Rwanda, muri Kamena 2024.

Icyo gihe Higiro yavuze ko aya masezerano azagirira akamaro abagore barenga ibihumbi 13 bari mu rwego rw'imari bakabona ubumenyi bw'ibanze.

Mu 2021 yari mu bagore batatu ba mbere bahataniye ibihembo bihabwa abagore bagaragaza impinduka n'ubuhanga mu miyoborere ya banki na serivisi z'imari bizwi nka 'Angaza Award'.

Lina Higiro afite ubunararibonye mu bijyanye n'imikorere y'amabanki. Mbere y'izi nshingano, yakoze nk'Umuyobozi Ushinzwe Ibikorwa muri AB Bank Rwanda, umwanya yagezemo avuye muri I&M Bank aho yakoraga nk'Umuyobozi ushinzwe Igenamigambi n'Imenyekanishabikorwa.

Kuva mu 2007 kugera mu 2011 yakoraga muri Guaranty Trust, icyo gihe yari icyitwa Fina Bank nk'Umuyobozi Ushinzwe Serivisi za Banki zireba ibigo bito n'ibiciriritse.

Higiro afite impamyabumenyi y'icyiciro cya gatatu cya Kaminuza mu by'Imiyoborere y'Ubucuruzi, yakuye muri Kaminuza ya Liverpool mu Bwongereza n'iy'icyiciro cya kabiri cya kaminuza yakuye muri North-West University yo muri Afurika y'Epfo.

Yize kandi muri Kaminuza ya Ryerson muri Canada aho yakuye impamyabushobozi mu bucuruzi n'itumanaho.

Lina Higiro yagizwe Umuyobozi Mukuru muri NCBA Group ushizwe ibikorwa by'ubucuruzi