Category: Uncategorized

Muri Leta Zunze Ubumwe z'Amerika, inama ikomeye y'ishyaka ry'Abademokarate yatangiye imirimo yayo mu mujyi wa gatatu mu bunini mu gihugu, Chicago, muri leta ya Illinois.

Ikoraniro ryafunguwe n'umuyobozi wa Komite yateguye iyi nama Minyon Moore. Hakurikiyeho umuyobozi wa Komite nyobozi y'ishyaka ku rwego rw'igihugu, Jaime Harrison.

Izindi ntumwa zitabiriye iyi nama zikavuga ijambo harimo na Jill Biden,umugore wa Perezida Joe Biden hamwe na Hillary Clinton, wabaye kandida wa mbere na mbere mu mateka w'umugore wa rimwe mu mashyaka abiri akomeye, iry'Abademokarate ku mwanya wa perezida wa Repubulika mu 2016, ariko ntiyatorwa.

Mu ijambo rye Hillary yashimiye cyane Perezida Biden n'urukundo rutagereranywa afitiye igihugu. Yibukije inzira ikomeye abagore banyuzemo kugirango babone uburenganzira bwo gutora, kugera aho abereye kandida mu 2016. Ati: 'None turimo turandika andi mateka mashya.'

Yakomeje agira ati “Ejo hazaza ngaha turahageze. Nakwifuje ko mama wanjye na mama wa Kamala baba batureba ubu. Amateka yanjye n'amateka y'igihugu cyacu atwereka ko kujya imbere birashoboka ariko ntibyikora. Tugomba kubiharanira. Kandi tudacika intege na gato. Kamala afite ubushishozi n'ubunararibonye bwo kutuyobora mu nzira itujyana imbere.'

Si ubwa mbere Hillary Clinton yakwerekanako ashyigikiye Kamala Harris kuko ubwo byamaraga gutangazwa ko ariwe wasimbuye Biden mu matora, yahise atangaza ko abyishimiye anahamagarira abanyamerika kumushyigikira ndetse avuga ko abona Kamala afite amahirwe yo kuba umugore wa mbere waba Perezida wa USA.

Mu nama y'Abademokarate, Hillary Clinton yashishikarije abagore gushyigikira Kamala Harris

Hillary yavuze ko Kamala afite ubushobozi n'amahirwe yo kuba 'umugore wa mbere wayobora USA'

Umutoza wa Police FC, Mashami Vincent yifatiye ku gahanga abasifuzi basifuye umukino batsinzwemo na CS Constantine muri CAF Confederation Cup aho yabashinje kubogama.

Police FC yatsinzwe umukino ubanza w’ijonjora rya mbere rya CAF Confederation Cup na CS Constantine 2-0, ni mu mukino wabereye muri Algeria ku wa Gatandatu w’icyumweru gishize.

Nyuma y’uyu mukino, umutoza wa Police FC, Mashami Vincent yanenze cyane abasifuzi basifuye uyu mukino kuko bagaragaje kubogama cyane.

Ati 'Abasifuzi bakwiye kwishima kuko bakoze neza, icyo bashakaga bakigezeho guhera umukino utangiye ntibatworoheye. Ndihanganisha ikipe yanjye kuko ntabwo yari ikwiye abasifuzi nk’aba.'

Yakomeje avuga ko gutsindwa ntaho bitaba ariko gutsindwa bigizwemo uruhare n’abasifuzi avuga ko bakoze ibintu by’ubucucu, ari ibintu bibabaje cyane.

Ati 'Wenda ushobora gutsindwa kuko ari umunsi mubi, dushobora gutsindwa ariko iyo ubonye ibintu by’ubucucu abasifuzi bakora ndakeka atari byo, ni yo mpamvu rimwe na rimwe umupira wa Afurika buri gihe ntaho ugera, ntabwo tuzi icyo dushaka kubera imisifurire mibi, ushobora gutsinda no gutsindwa ariko reka umukino ugende uko wakagenze, wikwerekana uruhande uriho.'

'Njyewe ndashimira abasore banjye kuko twakinnye n’abasifuzi, dukina n’ikipe nziza nka CS Constantine, ndi kumwe n’abasore kuko ibyabaye byari bigoye ko twatsinda bitewe n’aba basifuzi.'

Abajijwe niba yizeye ko ashobora kuzayikuriramo mu Rwanda, yavuze ko byose bishoboka kuko hakiri indi minota 90 yo gukina.

Ati 'birashoboka kuko ntabwo turi ikipe mbi kandi iyo urebye uko twitwaye n’uko twakinnye n’ibihe bitari bitatworoheye, turi ikipe nziza, turacyafite iminota 90 reka dutegereze tuzarebe ni iki kizaba.'

Umukino wo kwishyura uteganyijwe kuzabera kuri Kigali Pele Stadium ku Cyumweru tariki ya 25 Kanama 2024, ni umukino isabwa gutsinda ku kinyuranyo cy’ibitego 3.

Mashami Vincent yanenze abasifuzi ku buryo bukomeye

Myugariro Mitima Isaac wakiniraga Rayon Sports, yamaze gusinyira ikipe ya Al-Zulfi yo mu Cyiciro cya Kabiri muri Saudi Arabia.

Uyu mukinnyi utaragaragaye mu muri Rayon Sports kuva yatangira kwitegura umwaka w’imikino wa 2024-25, yasinyiye iyi kipe amasezerano y’umwaka umwe.

Impamvu uyu myugariro ukina mu mutima w’ubwugarizi wari usigaranye umwaka umwe muri Rayon Sports yatangaga, ni uko hari ibirarane iyi kipe yari imufitiye itaramwishyura.

Yamaze kwerekeza muri Al-Zulfi SFC yashinzwe mu 1969 yitwa Markh Club ikaza guhindurirwa izina muri 2006.

Mitima Isaac yari mu ikipe y’Intare FC yegukanye shampiyona y’icyiciro cya kabiri, yavuyemo ajya muri Police FC ariko imvune ntizamubanira ayivamo ajya muri Kenya muri Sofapaka yavuyemo 2021 aza muri Rayon Sports yakiniraga kugeza uyu munsi.

Mitima Isaac yabonye ikipe nshya

Ikipe y’igihugu y’u Rwanda mu bagore yatangiye neza ijonjora ry’ibanze mu gushaka itike y’igikombe cy’Isi itsinda Lebanon amanota 80-62.

Guhera ejo hashize tariki ya 19 Kanama 2024 kugeza tariki 25 Kanama 2024, mu Rwanda na Mexico hazaba habera ijonjora ry’ibanze ryo gushaka itike y’igikombe cy’Isi muri Basketball (FIBA Women’s Basketball World Cup 2026 Pre-Qualifying).

Mu Rwanda harimo gukinira amatsinda abiri, itsinda C ririmo Senegal yatangiye itsinda Hungary ihabwa amahirwe amanota 63-61 ndetse na Brazil yatangiye itsinda Philippines amanota 77-73.

Itsinda D, Argentine yatangiye neza itsinda Ubwami bw’Abongereza amanota 53-43.

Umukino ufungura irushanwa ukaba wabaye saa mbili z’ijoro nyuma y’ibirori bifungura aho wahuje u Rwanda na Lebanon.

Ni umukino utagoye inkumi z’u Rwanda kuko zayoboye umukino uduce 4 twose tw’umukino, agace ka mbere bagatsinze amanota 24-17.

Lebanon mu gace kabiri yagerageje kwihagararaho ariko n’ubundi nako birangira igatakaje ku manota 21-19. Amakipe yagiye kuruhuka ari 45-36.

Ikipe y’igihugu y’u Rwanda mu gace ka gatatu ibifashijwemo n’abarimo Philoxy Destiney akaba na kapiteni w’iyi kipe, Bella Murekatete, Keish Hampton baje gutsinda aka gace amanota 20-12 ni mu gihe agace ka nyuma bagatsinze 15-14.

Bella Murekatete w’ikipe y’igihugu y’u Rwanda ni we watsinze amanota menshi aho yatsinze amanota 24.

Ibi Dr. Musafiri yabitangarije kuri Televiziyo y'Igihugu, kuri uyu wa 19 Kanama 2024, ubwo yagarukaga ku kibazo cyari kimaze iminsi kivugwa cy'umuceri wabuze abaguzi n'umuti cyavugutiwe.

Dr. Musafiri yabanje gushimira abo bahinzi ko bakurikije amabwiriza ya Minisiteri y'Ubuhinzi n'Ubworozi, bagahinga neza kandi bakeza umusaruro ushimishije, nubwo nyuma hari ibitaragenze neza, hakagira umusaruro utabona abaguzi.

Ati “Ubundi umuceri iyo usaruwe uba ugomba kujya ku ruganda ugatonorwa, ukagurishwa abantu bakawurya, icyabayeho rero ni uko muri ino minsi twaje kubona ko muri toni zasaruwe zose hari izatarabashije kugurishwa.”

Yavuze ko hari toni zigera ku bihumbi 26 zasigaye zidafite abaguzi, biturutse ku kuba abatonora umuceri banawugurusha barahisemo kugura uturuka hanze bavuga ko ushobora kuba ari wo uhendutse, “inyungu bumvaga bashaka kubonamo bumvaga idahagije n'ubwo irimo, batinda kuwugura cyangwa se bawugura gake.”

Minisitiri w'Ubuhinzi n'Ubworozi yavuze kandi yavuze ko muri izo toni zitabonye abaguzi, izigera ku 5000 zitari zifite n'aho zibikwa, umuceri uri ku mbuga aho bawusaruriye.

Ati “Tumaze kubona icyo kibazo, kandi abacuruzi bifuza ko abahinzi bajya munsi ya 500 Frw ni yo mafaranga tugura ku kiro cy'umuceri udatonoye, ariko kubera ko tuba twabaze byose, imirimo yakoze, amafumbire yashyizemo n'imiti yateye, twumva agiye munsi ya 500 Frw yaba ahumbye,”

“Twafashe umwanzuro w'uko Leta y'u Rwanda ibinyujije mu kigo EAX ishaka amafaranga uwo muceri wose ukagurwa, ndetse tukawutonora tukazawuha amashuri, ndetse ku mafaranga make kuruta uwo abacuruzi bari kubaheraho.”

Ubusanzwe ibigo by'amashuri byaguraga umuceri ku 150 Frw ku kilo, ariko Minisitiri Dr. Musafiri yavuze ko uwo muceri nugurwa, ugatonorwa, ugatunganywa, uzagurishwa ibigo by'amashuri ku giciro gito, ku buryo uzaba uhenze utazarenza 800 Frw ku kilo.

Minisitiri Dr. Musafiri yavuze ko gahunda yo kugura umuceri wose wabuze abaguzi yatangiye ku wa 18 Kanama 2024, ihera mu Karere ka Rusizi, ikazakomereza no mu tundi turere ahari umusaruro w'umuceri wabuze abaguzi.

Minisitiri w'Ubuhinzi n'Ubworozi kandi yavuze ko hari no gushakwa igisubizo kirambye aho hateganywa gushyiraho ikigo cya Leta cyajya kigura umusaruro wose wabuze w'ibinyamepeke wabuze isoko, Leta ikawubika, ikazawusubiza ku isoko mu gihe cy'igabanuka ryawo.

Iki kibazo cy'umusaruro w'umuceri wari warabuze abaguzi, cyagarutsweho na Perezida Kagame, ku wa 14 Kanama 2024, ubwo yakiraga indahiro z'Abadepite na Minisitiri w'Intebe.

Yavuze ko mu gihe yasomaga amakuru ku mbuga nkoranyambaga yabonye abaturage bo mu Ntara y'Iburengerazuba binubira ko bafite toni nyinshi z'umuceri zarababoreyeho kubera kubura umuguzi.

Perezida Kagame yasobanuye ko yahise abaza mu nzego zose asanga uwari Minisitiri w'Ubuhinzi n'Ubworozi, uwari Minisitriri w'Ubucuruzi n'Inganda barabizi, uwari Minisitiri w'Ubutegetsi bw'Igihugu we asanga bisa n'aho ari hagati na hagati.

Yagaragaje ko uko abayobozi bakangurira abaturage guhinga, bagomba no kubafasha kubona umuti w'ikibazo cy'umusaruro mwinshi bejeje mu gihe wabuze isoko.

Ati 'Ni abantu bafite ibibazo, guhinga, kweza batanze imbaraga zabo, bakoresheje amafaranga yabo, baritanze kandi bakora ibyo tubatoza gukora, ibyo tubasaba buri munsi. Ariko birangiye, ubu ni nko kutubwira ngo ariko ubundi muzagaruka aha mutubwira kongera guhinga umuceri? Cyangwa muzagaruka aha mwongera kutubwira guhinga? Ibyo wababwiye barabikoze bikabaviramo ikibazo?'

Umuceri wari umaze ibyumweru birenga bibiri ku mbuga aho wasaruriwe warabuze abaguzi

Minisitiri Dr. Musafiri yavuze ko ugiye guhabwa ibigo by’amashuri ku giciro gito

Si ibyo gusa kuko no mu mihanda y'i Kigali biragoye kubona umuntu agenda adafite telefoni kandi ya yindi igezweho. Abanyarwanda basobanukiwe neza icyo iterambere ari cyo.

Wabona utarumva neza icyo ndi gushaka kugaragaza ariko ngufashije; aha ndi gushaka kukwereka ko muri iki Gihugu abantu basigaye badatunze telefoni ari mbarwa.

Ibyavuye mu ibarura rusange rya 2022 bigaragaza ko Abaturarwanda barengaga miliyoni 13, mu gihe abari bafite telefoni zigezweho bari 1.126.276.

Muri rusange abantu bafite imyaka 10 kuzamura bafite telefoni zigendanwa barenga 4.631.510. Ni mu gihe ingo 78.1% nibura zirimo umuntu ufite telefoni igendanwa. Kuva iri barura ryakorwa iyi mibare ishobora kuba yarazamutse.

Uko bwije n'uko bukeye telefoni zinjira mu Rwanda. Hari umwe mu bazicuruza hano mu Mujyi wa Kigali, ambwira ko byibuze ku munsi uwacuruje neza atataha atagurishije telefoni.

Twifashishije imibare y'Ikigo Statcounter iboneka nyuma yo gukora isesengura rizwi nka 'Mobile Vendor Market Share' ry'isoko rya telefoni zigendanwa ku Isi, tugiye kugaruka kuri telefoni zigaragara cyane ku isoko mu Rwanda kurusha izindi.

Iri sesengura rigaragaza uko telefoni zitandukanye ziganje mu gice runaka, n'uko zigenda ziharira isoko uko ibihe bigenda bihita.

Samsung

Bitandukanye n'uko benshi babitekereza, telefoni za Samsung ni zo ziza ku isonga mu kwiharira igice kinini cy'isoko rya telefoni mu Rwanda, aho kuva muri Nyakanga 2023 kugeza muri Kanama 2024 izi telefoni zari zihariye 23,57% by'isoko ryose mu Rwanda.

Izi telefoni zikunzwe ahanini kuko zigira amoko menshi cyane, bikorohera buri wese kugira aho yisanga mu bijyanye n'igiciro. Ikindi ni uko abantu benshi bazikunda cyane kubera gukomera, kurambya umuriro na application zitandukanye zifasha mu bintu byinshi.

Kuri ubu telefoni ya Samsung igura amafaranga make ni Galaxy A03s, iboneka guhera kuri $159.99 mu gihe izigezweho zo mu kiragano cya gatandatu muri telefoni za Galaxy Z za Galaxy Z Flip 6 na Galaxy Z Fold 6 zishobora kuboneka hagati ya $1,800 na $2,000.

Tecno

Telefoni za Tecno ni zo ziza ku mwanya wa kabiri mu kwiharira isoko rya telefoni mu Rwanda aho aho 21,46% by'izihaboneka zose aba ari iza Tecno z'uruganda rwo mu Bushinwa rumaze kubaka izina rwa Transsion Holdings.

Izi telefoni na zo zikundirwa kurambya umuriro kwazo no kuba zidahendutse cyane.

Ubu telefoni za Tecno Camon 30S Pro, Tecno Spark 20 Pro 5G ndetse na Tecno Camon 30 Premier 5G ni zo zigezweho ku isoko.

Apple/iPhone

Benshi bashobora kuba bari batangiye kwibaza ngo telefoni za iPhone ziri he, ariko ziza ku mwanya wa kane mu kwiganza ku isoko ryo mu Rwanda kuko ziboneka ku rugero rwa 12,55%.

Mu bacuruza izi telefoni twaganiriye bagaragaje ko abanya-Kigali ari bo bakunda kugura telefoni nyinshi za iPhone, dore ko badatinya kumanuza na iPhone 15 igezweho ubu iboneka guhera ku $799.

Biteganyijwe ko mu minsi mike iri imbere ubwo iPhone 16 izaba igiye hanze, na bwo nta kabuza ab'inkwakuzi bazahita bazitumiza.

Ubundi bwoko

Telefoni za infinix ziboneka ku isoko ku rugero rwa 12,12% mu gihe iza Huawei zo zihariye 2,26% by'isoko mu Rwanda kuva muri Nyakanga 2023 kugeza muri Kanama 2024.

Telefoni za Xiaomi zihariye 2,05% iza Itel zikaba zingana na 2,06%, iza Sony zikaboneka ku rugero rwa 1,46%, iza Google zikangana na 5,16% mu gihe izagaragajwe nk'izitazwi ubwoko bwazo zingana na 12,84%, mu gihe izashyizwe mu cyiciro cy'izindi zingana na 4,29%.

Tecno Camon 30 Premier 5G igezweho mu za Tecno

iPhone 15 ifitwe na benshi muri Kigali

Infinix Zero 20 yageze ku isoko mu 2022

Uko telefoni zihariye isoko mu bihe binyuranye guhera muri Nyakanga 2023 kugeza muri Kanama 2024 mu Rwanda

Ni imibare Batamuliza yatangarije mu nama ihurije hamwe abarenga 350, yateguwe n'Ikigo cy'igihugu gishinzwe imikurire no kurengera umwana, NCDA, n'abafatanyabikorwa bayo nka Imbuto Foundation n'abandi.

Igamije kureba uburyo imikurire y'umwana yatezwa imbere binyuze mu kubakira ubushobozi ingo mbonezamikurire, na cyane ko zagaragaye nk'ingero z'ibishoboka.

Mu 2011 ni bwo u Rwanda rwafashe icyemezo cyo gutangiza gahunda Mbonezamikurire y'Abana Bato mu kugabanya imirire mibi n'ibibazo bijyanye n'igwingira ry'abana.

Abana bararerwa ariko bakanakangurwa ubwonko ku buryo hakoreshejwe integanyanyigisho yagenwe n'Ikigo cy'igihugu gishinzwe imikurire no kurengera umwana, NCDA.

Muri ECD kandi hatangwamo serivisi nk'imirire myiza y'umwana n'umugore utwite cyangwa uwonsa no kwita ku buzima bwabo, isuku n'isukura, uburere bwiza, umutekano w'umwana arindwa ihohoterwa iryo ari ryo ryose n'ibindi.

Kuva mu 2016 u Rwanda rwari rufite 17% by'abana bajyanwa mu ngo mbonezamikurire, ubu bageze 78%. Hajyayo abana bari hagati y'imyaka itatu n'itanu.

Abana bagana ECD bavuye ku 256.677 mu 2018 bagera kuri 1.149.699 muri Kamena 2024.

Muri zo izirenga ibihumbi 25 zibarizwa mu ngo zitandukanye z'abantu, barerwa n'abantu barenga ibihumbi 100.

Ubwo yafunguraga iyo inama ku mugaragaro Batamuliza yavuze ko nubwo gahunda ya ECD yatangijwe ndetse ikaba imaze gutanga umusaruro, hakiri ibibazo nk'ibyo kuyigeza ku bana benshi n'ibiri mu zihari, agasaba ko byakemurwa inzego zitandukanye zifatanyije.

Ati 'Nta mwana ukwiriye gusigazwa inyuma cyangwa ngo yimwe uburenganzira bwe bwo kubona izo serivisi. Turacyafite abana bagera kuri 22% batagerwaho n'izo serivisi. Dufatanyije abo bose bagomba kugerwaho.'

Gusa raporo y'umugenzuzi Mukuru w'Imari ya Leta ya 2022/2023 igaragaza ko ingo mbonezamikurire 90 basuye, basanze zitarasuzumwe ngo zihabwe ibyangombwa bizemerera gukora, hari ikibazo cyo kutabona amazi meza yo kunywa, 90% zidafite ubwiherero, ndetse n'abarezi bake cyane.

Icyakora Batamuliza yavuze ko muri buri karere hari ECD y'icyitegererezo ikora neza, bityo ko ari ngombwa ko ubumenyi zifite bwasangirwa bukagera no ku ngo mbonezamikurire zo mu miryango, na cyane ko ari zo zihuzwa.

Yakomeje ati 'hari kandi ingo mbonezamikurire zidafite iby'ibanze, nk'amazi ahagije kubera imiterere y'uturere bakoreramo ariko turi gukora ku buryo icyo kibazo tugikemura abana bakarerwa neza isuku n'isukura byubahirijwe. Ntidukangwa n'ibibazo kuko ni byo byaduhurije aha ngaha ngo tubikemure. Tugomba no kwibanda no ku dushya, akari aha kagasangizwa abandi.'

Umuyobozi Mukuru wa NCDA, Ingabire Assumpta yavuze ko kwita ku mwana hakiri kare ari ingenzi kuko 80% by'ubushobozi bw'umwana bukura cyangwa bugateza imbere mu myaka itatu ya mbere, bityo ko ari ingenzi gukemura ibibazo biri muri iyo gahunda bafatanyije.

Ati 'Iyo myaka itatu irangwa n'ibintu byinshi cyane cyane aho umwana akurira bigira uruhare mu buzima bwe bwose. Kwita ku mwana hakiri kare rero bituma akurana ubuzima bwiza, akagira ubushobozi buri hejuru mu ishuri, ibituma iyo akuze yiteza imbere n'igihugu muri rusange, tukagira umuryango utekanye.'

Ubu mu Rwanda buri mudugudu washyizwemo ECD eshatu. Ingo mbonezamikurire mu gihugu hose zigeze ku bihumbi 31638. Muri zo izirenga ibihumbi 25 zibarizwa mu ngo zitandukanye z'abantu. Ni umurimo ukomeye wakozwe kuko zavuye ku 4019 mu 2018.

ECD kandi zagize uruhare rukomeye mu burezi bwabo kuko mu bushakashatsi bwakozwe na NCDA bwagaragaje ko abana banyuze muri ECD mu 2013 na 2014 ubu bageze mu mwaka wa kabiri n'uwa gatatu wisumbuye, byagaragaye ko nta wigeze asibira cyangwa ngo ajye munsi y'amanota 70%.

Mu gukomeza kurwanya imirire mibi n'igwingira mu bana bari munsi y'imyaka itanu, mu ngengo y'imari ya 2024/2025, u Rwanda rwategenyije miliyari 357.8 Frw.

Abana bari kumwe n’abayobozi babo bagaragaje umusaruro wa ECD mu Rwanda

Hamuritswe na zimwe mu mfashanyigisho zifasha mu ngo mbonezamikurire zitandukanye ziri mu Rwanda

Abana basabanye n’ababyeyi, abarezi n’abayobozi bagira uruhare mu mikurire yabo

Umuyobozi wa NCDA, Ingabire Assumpta yishimanye n’abana bamugaragariza ko imbaraga ikigo ayoboye gishyira mu bikorwa biteza imbere imikurire yabo zitapfuye ubusa

Abana ni bo basusurukije abitabiriye inama yo kwigira hamwe uburyo imikurire yabo yarushaho kunozwa

Abihaye Imana ni bamwe mu bafatanyabikorwa b’imbere mu bikorwa biteza imbere imikurire y’abana

Umuyobozi wa NCDA, Ingabire Assumpta (iburyo) ari kumwe n’Umunyamabanga Uhoraho muri Minisiteri y'Uburinganire n'Iterambere ry'Umuryango (MIGEPROF), Batamuliza Mireille

Inzego z’umutekano na zo zitabiriye inama yiga uburyo imikurire y’umwana yakomeza gusugira igasagamba

Umuyobozi Mukuru Wungirije wa NCDA, Gilbert Munyemana yavuze ko baherutse gukora isuzuma mu marerero, hemezwa ko hari ayaba ahagaritswe mu gihe ataruzuza ibisabwa

Umunyamabanga Uhoraho muri Minisiteri y'Uburinganire n'Iterambere ry'Umuryango (MIGEPROF), Batamuliza Mireille yavuze ko hari abana bangana na 22% bataragerwaho na serivisi za ECD

Umuyobozi wa NCDA, Ingabire Assumpta yasabye ubufatanye buhuriweho mu gukomeza kubaka u Rwanda rw’ejo hakiri kare

Umwana ni uw’Isi yose. Ni yo mpamvu muri gahunda zo guteza imbere imikurire ye, n’abanyamahanga babigiramo uruhare rukomeye

Kugira ngo ubwonko bw’umwana bukangurwe bisaba imfashanyigisho zitandukanye, ni yo mpamvu mu nama yo guteza imbere imikurire y’abana n’izo mfashanyigisho zamurikwaga

Amafoto: Nezerwa Salomon