Category: Uncategorized

Abarwanya u Rwanda muri ibi bihe bifashisha ikoranabuhanga bakaruvugaho ibinyoma, abandi bagakwirakwiza ibitekerezo bibiba urwango n'ingengabitekerezo ya Jenoside.

Barimo abakiri mu mashyamba ya Repubulika Iharanira Demokarasi ya Congo bari mu mutwe w'iterabwoba wa FDLR, n'abandi bari mu mahanga bigisha inyigisho z'urwango, bakanarahira ko bazasubira mu Rwanda bagashyiraho ubutegetsi bw'Abahutu.

Ambasaderi Dr Charles Muligande ubwo yari mu kiganiro Dusangire Ijambo kuri uyu wa 1 Nzeri 2024, yagaragaje ko ari ngombwa ko abantu bahora biteguye guhangana n'abarwanya u Rwanda, hamwe n'ababashyigikiye.

Ati 'Ibyo ni ngombwa ko duhora twiteguye kubirwanya. Turamutse turangaye tukabyihorera baroga kuko ni uburozi baba barimo batanga mu gihugu. Bashobora kugenda baroga bake bake amaherezo ugasanga n'ibyo twagezeho nubwo bishikamye, bikomeye, turangaye ntihabura ababihungabanya.'

'Ni ngombwa rero ko duhora turi maso, ibyo bavuga babeshya tukabibeshyuza, aba bantu bigisha ingengabitekerezo ya Jenoside, abantu bahora bapfobya Jenoside yabaye, abantu bahora banenga ubutegetsi bwacu n'icyiza dukoze cyose bakakinenga bakavuga ngo buriya hari ikindi kibyihishe inyuma, bya bindi ubura icyo unenga inka ukayinenga igicebe cyayo.'

Amb Dr Muligande yagaragaje ko abaturage bose by'umwihariko urubyiruko, bakwiriye gusobanurirwa gahunda zitandukanye z'igihugu kugira ngo na bo bashobore kurwanya abashaka gutanya Abanyarwanda.

Ati 'Urubyiruko dufite ni ngombwa ko rusobanurirwa neza, rugasobanukirwa 'Ndi Umunyarwanda', rugasobanukirwa amateka y'u Rwanda, ibyo u Rwanda rukora, Politike z'u Rwanda ku buryo bo kubera batuye mu Isi y'ikoranabuhanga, ni bo bazarwana urwo rugamba, byaba ngombwa bakegera abasaza bakabaganiriza noneho bakabona amasasu yo gukoresha.'

Amb Dr Muligande avuga ko no mu nzego za dipolomasi harimo abantu baba bifatanyije n'abarwanya u Rwanda ku buryo abadipolomate b'u Rwanda bagomba guhora bari maso 'ntitujye tugubwa gitumo na za raporo zishobora kudusubiza inyuma.'

Amb Dr Charles Muligande yavuze ko abarwanya u Rwanda baba bavuga ibirimo uburozi bishobora kwangiza bitarwanyijwe

Nyuma y’iminsi mike yumvikanye n’ikipe ya Zemamra Renaissance yo muri Maroc, Ishimwe Christian yamaze kugaruka muri Police FC.

Ishimwe Christian yavuye mu Rwanda mu ntangiriro za Kanama agiye muri Maroc kurangizanya n’iyi kipe ikina mu cyiciro cya mbere.

Uyu musore ukina ku ruhande rw’ibumoso yugarira wari umaze iminsi mike asinyiye Police FC byagenze neza ikizami cy’ubuzima aragitsinda ndetse yumvikana na Zemamra Renaissance.

Kuri ubu uyu mukinnyi uri kumwe n’ikipe y’igihugu Amavubi yagiye muri Libya gukina na Libya mu gushaka itike y’igikombe cy’Afurika cya 2025, amakuru ISIMBI yamenye ni uko atazasubira muri Maroc agomba kugaruka mu Rwanda muri Police.

Amakuru avuga ko habayeho kutumvikana hagati ya Police FC na Zemamra Renaissance ku bijyanye n’ibyo iyi kipe y’abashinzwe umutekano igomba kwishyurwa.

Ishimwe Christian yakiniye amakipe atandukanye arimo Marines FC, AS Kigali, APR FC na Police FC.

Ishimwe Christian agomba kugaruka muri Police FC

Ishimwe Christian yari yatangiye akazi muri Zemamra Renaissance

Ku wa 31 Kanama 2024 ibitaramo bya MTN Iwacu Muzika Festival byanatewe inkunga kandi n'ikinyobwa cya Primus byatangiriye i Musanze.

Aho abantu bitabiriye ku bwinshi ndetse abahanzi nabo bari biteguye kandi batanga ibyishimo bisendereye.

Ni ibitaramo byatangijwe n'umuziki uvanze neza na DJ Trick.

Abashyushyarugamba bashoboye aribo Bianca na Buryohe.

Buryohe na Bianca bongeye guhuriza imbaraga ku rubyiniro rwa Musanze, DJ Trick ariyerekana 

Ku rubyiniro habanjeho Kenny Sol watumiwe muri ibi bitaramo ku nshuro ya mbere. Yatanze ibyishimo mu ndirimbo zitandukanye abifashwamo n'umubyinnyi Uwase Bianca ubihuza no kugaragara mu ndirimbo zitandukanye (umu-video vixen).

Kenny Sol kandi yatunguranye aririmba indirimbo 'Ku musenyi' ya Jay Polly.Mu kiganiro n'itangazamakuru, yatangaje ko amwubaha ariko byumwihariko iyo ndirimbo ariyo yakuyeho inganzo y'indirimbo 'Haso'.

Kenny Sol yatunguranye mu ndirimbo ya Jay Polly ubundi afatanya kuwubyina na Bianca 

Bwiza umuhanzikazi rukumbi uri mu bazazenguruka muri ibi bitaramo, yagaragaje koko akwiye kuba Brand Ambassador wa MTN, atungurana aririmba yigize ucuruza amayinite y'iki kigo cy'itumanaho cyamaze kuba ubukombe.Yatanze ibyishimo mu bihangano bitandukanye akora agashya mu kwamamaza MTN

Nk’uko byari byitezwe, Bushali yahaye ibyishimo bisendereye abakunzi bitabiriye ibi bitaramo, uyu mugabo amaze gushinga imizi mu kugira igikundiro ku rubyiniro mu ndirimbo ze zikoze mu njyana ya 'Kinya-trap'.

Bushali uheruka gutangaza ko yiteguye gutanga ibyishimo n’udushya dutandukanye, yongeye gushimangira ko ari Umwami wa Kinyatrap

Danny Nanone utaherukaga mu bitaramo bigari bizenguruka igihugu ariko waheruka gutangaza ko yiteguye nyuma y’uko yize umuziki kandi akaba anafite ibihangano bitandukanye bigezweho, yaserutse mu buryo bwihariye.

Danya Nanone wari umaze igihe atagaragara ku rubyiniro yahurije impano n’ubumenyi ku rubyiniro

Chriss Eazy uri mu basore bagezweho muri iki gihe mu muziki ni we wabanje ku rubyiniro mbere y’uko hajyaho Bruce Melodie waririmbye iminota itari micye ari nako afashwa n'ababyinnyi bazwi nka Theee Baddest.

Ibi bitaramo bikaba biri gukorwa mu buryo bwa 'Live' aho amatsinda y'abacuranzi arimo Symphony na Sonic Band yagaragaye afasha abahanzi.

Ibi bitaramo bizakomereza i Gicumbi tariki ya 07 Nzeri 2024, i Nyagatare 14 Nzeri 2024, i Ngoma 21 Nzeri 2024, i Bugesera 28 Nzeri 2024, i Huye 05 Ukwakira 2024, i Rusizi ku wa 12 Ukwakira 2024 bisorezwe i Rubavu 19 Ukwakira 2024.

Chriss Eazy uheruka gutangaza ko ibyo ageraho ari ubuntu bw’Imana, yishimiwe mu bihangano bitandukanye Bruce Melodie yashimangiye ko ari Igitangaza abifashishwemo n’itsinda ry’ababyinyi rya Theee Baddest

Ku mugoroba wa tariki ya 31 Kanama 2024 muri BK Arena hari hateraniye abakunzi ba Massamba Intore wizihizaga imyaka 40 amaze atangiye umuziki.

Cyari igitaramo kandi cyo gukomeza kubara inkuru y'imyaka 30 yo Kwibohora no kwiyubaka ku Rwanda.

Ni igitaramo cyitabiriwe n'abantu barimo n'abafite amazina azwi mu ruganda rw'imyidagaduro. Umwe mu bari babukereye akaba ari Isimbi Model.

Uyu mubyeyi ntabwo ariko yabashije kugera ku byishimo ngo yizihirwe n'iki gitaramo kubera serivise mbi yatangaje ko yahawe.

Ati'Massamba Intore turagukunda ukwiriye n'icyubahiro ariko abajyanama n'abantu mukorana nabo ntabwo basobanutse.'

Yongeraho ati'Ibaze kugura itike 12 zo mu myanya y'icyubahiro [VVIP] ngo wicare ahantu heza wahagera ngo hicaye abatumirwa.'

Uyu mugore yavuze ko imitegurirwe y'ibitaramo by'abanyarwanda ikiri hasi bituma abantu usanga badakunda gushaka kubijyamo atari uko babanze.

Ati'Wanasobanuza ukabura ugufasha ngo fata aho ubonye cyangwa utahe, ibi birenze agasuzuguro. Iki nicyo gituma tutitabira ibitaramo by'abanyarwanda.'

Isimbi Model ari mu bitabazwa mu bikorwa byo kwamamaza ibikorwa bitandukanye yaba yifashishwa mu gufata amashusho, amafoto n'ibindi.

Hari kandi indirimbo yitabajwemo nk'iyitwa Closer ya Meddy, Uncle Austin na Yvan Buravan.

Muri Mata 2023 ari mu bizungerezi kandi byatangiranye na Kigali Boss Babes, itsinda ryatangijwe n'abarimo Gashema Sylvie, Queen Douce, Camille Yvette, Isimbi Model na Alliah Cool.

Atangaza uko yavuye muri iri tsinda, yavuze ko bishingiye ku kuba nta mwanya akigira.

Uyu mugore yaherukaga kugaragaza ko yishimira imyaka 3 arushinze na Shaul Hatzir bashyiranwe muri Kanama 2021.

Ubutumwa bwa Isimbi Model agaragaza ko atiyumvisha ikibazo abategura ibitaramo by’abanyarwanda babura Isimbi aheruka kugaragaza ko ashima Imana yamukuye kure ikamuha urugo rwiza aho amaze imyaka 3 arushinze Ari mu bagore bamaze gushinga imizi mu birebana n’imideli aho yitabazwa na kompanyi zitandukanye mu kwamamaza ibyo bakora 

Ni inama ibaye ku nshuro ya kabiri, izamara iminsi itatu yatangiye kuri uyu wa 1 Nzeri 2024. Abandi bakuru b'Ibihugu bya Afurika bemeje ko bayitabira barimo Emerson Mnangagwa wa Zimbabwe, Nana Akufo-Addo wa Ghana, Joseph Boakai wa Liberia, Umwami Mswati III wa Eswatini na Perezida wa Zanzibar, Hussein Ali Mwinyi wanahagarariye umukuru w'igihugu wa Tanzania.

Iyi nama igamije gushimangira umubano hagati ya Afurika na Indonesia iribanda cyane ku ngingo zirimo guteza imbere ingufu, ubuzima, kwihaza mu biribwa n'ubucukuzi bw'amabuye y'agaciro.

Hari kandi n'abaminisitiri 11 bo mu bihugu bitandukanye bemeje ko bazayitabira, bose bakazagira umwanya wo kugira ijambo bageza ku barenga 855 bateganyijwe kuyitabira.

Leta ya Indonesia ivuga ko hari byinshi ihuje na Afurika by'umwihariko muri gahunda z'iterambere rirambye, ibyerekeye amabuye y'agaciro n'ibyerekeye abaturage impande zombi zifite ku buryo bashobora gusangira uburyo bwo kubyaza umusaruro amahirwe aboneka ku mpande zombi.

Biteganyijwe ko kandi ko haba indi nama yo ku rwego rwo hejuru ihuza Indonesia n'abafatanyabikorwa bayo ibera rimwe na Indonesia-Africa Forum, hakazasinyirwamo amasezerano afite agaciro ka miliyari 3.5$.

Muri Kamena 2024, u Rwanda na Indonesia byasinye amasezerano arimo ay'imikoranire hagati y'ibihugu byombi yo gusangizanya ubunararibonye mu bya politiki no gukuraho visa ku badipolomate n'abafite pasiporo za serivisi.

U Rwanda rwanafunguye ku mugaragaro Ambasade yarwo muri Indonesia mu gushimangira umubano uhuriweho n'ibihugu byombi.

Inama ya mbere yahuje Indonesia na Afurika yabaye tariki 10-11 Mata 2018, ibera muri Nusa Dua Convention Center, i Bali.

Mu 2022 ni bwo Perezida Paul Kagame yasuye Indonesia aho yari yitabiriye Inama y'Abakuru b'Ibihugu 20 bikize ku Isi, G20.

Umukuru w'Igihugu yabonanye na mugenzi we wa Indonesia bagirana ibiganiro byibanze ku hazaza h'ubutwererane bw'impande zombi n'uburyo bwo gushimangira umubano mu bya dipolomasi hagati y'u Rwanda na Indonesia.

Indonesia itera inkunga u Rwanda mu nzego zitandukanye harimo ingufu z'amashanyarazi, ubuhinzi, ubukerarugendo, uburezi n'ibindi. Yohereza mu Rwanda ibicuruzwa bitandukanye birimo amavuta yo guteka.

Perezida Kagame yitabiriye inama ihuza Indonesia na Afurika i Bali

Perezida Kagame yakiriwe mu cyubahiro gihabwa abakuru b’ibihugu

Amafoto: Village Urugwiro

Ababonye iyi mpanuka bavuze ko yatewe n'umuvuduko uri hejuru abashoferi ku mpande zombi bari bafite kandi batwaye mu mwijima, bikarangira bagonganye.

Iyi mpanuka yabaye mu ma saha ya saa munani z'ijoro, aho iyi bisi yavaga i Kampala yerekeza i Kigali, mu gihe Fuso yavaga i Masaka yerekeza i Kampala.

Iyi bisi ngo yibiranduye inshuro nyinshi mbere y'uko igwa munsi y'umuhanda, ibikorwa by'ubutabazi bihita bitangira. Ntiharamenyekana neza niba mu bitabye Imana harimo Abanyarwanda. Iyi bisi yari ifite ikirango cya UBP 964T.

Abantu 40 bakomeretse bahise berekezwa ku Bitaro bya Masaka, aho harimo n'abakomeretse cyane.

Umuyobozi wa Polisi muri ako gace, Twaha Kasirye, yavuze ko uretse umuvuduko ukabije, mu byateye iyi mpanuka hashobora kuba harimo ko abashoferi bombi batabonaga neza imbere yabo, kubera ko hari umwijima kandi agace barimo kagakunda kurangwamo ibihu.

Uyu muyobozi yavuze ko bagira inama abatwara ibinyabiziga yo kwirinda gukoresha umuvuduko ukabije kuko ushobora gushyira ubuzima bw'abagenzi mu kaga.

Imihanda ya Uganda ikunze kugaragaramo umuvuduko ukabije, ibigira uruhare mu kongera umubare w'abitaba Imana. Nk'ubu hagati ya tariki 11 na 17, abantu 76 baguye mu mpanuka zo mu muhanda, abandi barenga 360 barakomereka bikomeye.

Uburyo iyi modoka yari imeze nyuma gato y’impanuka

Iyi mpanuka yatewe n’umuvuduko ukabije ndetse n’umwijima watumye abashoferi batabasha kubona imbere yabo neza

Abitabye Imana bakurwa muri bisi ya ‘Jaguar’ yerekezaga i Kigali

Ibikorwa by’ubutabazi byakomeje kugera mu gitondo

Amafoto: Nile Post

Ibi ni ibyatangajwe n'Umubuybozi wa Karere ka Muhanga, Kayitare Jacqueline, ubwo yari yifatanyije n'abaturage bo mu Murenge wa Nyamabuye, Akagari ka Gifumba mu muganda usoza ukwezi kwa Kanama wari ugamije gusiza ahateganyijwe kubakwa inzu z'abatishoboye.

Ni umuganda wanitabiriwe n'Umuyobozi wa Kaminuza ya Diyoseze ya Kabgayi (ICK), Padiri Prof. Fidèle Dushimimana, n'abanyeshuri bo muri iyi Kaminuza aho banishyuriye ubwisungane mu kwivuza abatishoboye 150 bo mu Kagari ka Gifumba.

Umuyobozi w'Akarere ka Muhanga yavuze ko iri shuri kuba riri muri aka Karere ari amahirwe kuri bo kuko rigira uruhare runini mu kuzamura iterambere n'ubukungu bwa Muhanga kandi ko abanyeshuri bahiga bagira uruhare mu bikorwa bitandukanye bigamije kubaka igihugu.

Ati 'kuba iri shuri riri hano ni amahirwe kuri twe kuko rigira uruhare mu kuzamura ubukungu hano iwacu, iyo abantu bageze ku bihumbi 5000 baje mu karere kacu byanga byakunda ubukungu buriyongera kubera imibereho yabo ndetse bikanongera iterambere.'

Yakomeje avuga ko iyi kaminuza yacyemuye ikibazo cy'uburezi mu karere ka Muhanga kandi ko abanyeshuri bahiga bagira uruhare mu bikorwa byo gufasha abaturage.

Ati 'Kaminuza ya ICK itanga ubumenyi butanga impinduka kuko abigamo bakora ubushakashatsi ku bintu bitandukanye harimo kumenya ibibazo bihari ariko bakanamenya uburyo byacyemukamo.'

Yasoje avuga ko abanyeshuri biga muri ICK batanga umusanzu mu bikorwa bya Leta bifitiye abaturage akamaro ndetse ko banafasha Akarere mu gukora ubukangurambaga ku baturage mu bikorwa bitandukanye.

Umuyobozi wa Institute Catholique de Kabgayi (ICK), Padiri Prof. Dushimimana Fidèle, yavuze ko mu ntego za Kaminuza harimo no kugira uruhare mu iterambere ry'abantu batuye aho iherereye.

Ati 'Ntabwo ibya Kaminuza bigarukira mu kwigisha mu ishuri gusa cyangwa mu bushakashatsi ahubwo n'iterambere ry'abaturage riratureba, niyo mpamvu dukora ibikorwa bitandukanye bifitiye abaturage akamaro.'

Yakomeje ashimira abanyeshuri biga muri ICK umuhate n'umurava bagira mu bikorwa byo gufasha abaturage bakora bitandukanye byumwihariko abashimira ku gikorwa bakoze cyo kwishyurira abaturage Mituelle ndetse abasaba ko bakomerezaho.

Umunyeshuri uhagarariye abandi muri ICK, Niyonkuru Cedric, yavuze ko bifuje kwereka abaturage b'aho iri shuri riherereye ko abanyeshuri bahiga hari icyo babamariye.

Ati 'Twarebye ikintu twakora kugira ngo abaturage bo mu karere ka Muhanga ishuri ryacu riherereyemo babone ko hari icyo tubamariye, ni muri urwo rwego twahisemo kuba twakusanya inkunga buri munyeshuri agatanga uko yifite tukishyurira abatishoboye Mituelle.'

Yongeyeho ko uruhare rw'abanyeshuri biga muri ICK mu gufasha abaturage ba Muhanga kugira imibereho myiza ruzakomeza bakazanakora ibindi bikorwa byinshi biteza imbere igihugu.

Umuyobozi w’Akarere ka Muhanga, Kayitare Jacqueline yavuze ko ICK iri mu bizamura iterambere n’ubukungu bw’aka karere

Kaminuza ya Diyoseze ya Kabgayi (ICK) ikomeje kugira uruhare mu kuzamura iterambere ry’Akarere ka Muhanga

Umuyobozi wa ICK, Padiri Prof. Dushimimana Fidèle yavuze ko iterambere ry’abaturage bo mu Karere ka Muhanga riri mu nshingano za ICK

Abanyeshuri biga muri ICK bishyuriye ubwisungane bwo kwivuza abatishoboye 150 bo mu Kagari ka Gifumba

Umuyobozi w’Akarere ka Muhanga n’Umuyobozi wa Kaminuza ya Diyoseze ya Kabgayi bifatanyije n’abaturage bo mu Kagari ka Gifumba gukora umuganda

Niyonkuru Cedric, Umuyobozi uhagarariye abanyeshuri muri ICK

Ishyirahamwe ry’umupira w’amaguru mu Rwanda, FERWAFA, ryamaze kongera umubare w’abanyamahanga aho bageze ku icumi ariko mu kibuga baguma ari 6.

Ni nyuma y’uko Shampiyona y’icyiciro cya mbere mu Rwanda (Rwanda Premier League), yoherereje FERWAFA amabwiriza azagenga umwaka w’imikino wa 2024-25 harimo ko abanyamahanga bazamurwa, bayisaba kubyemeza.

Yasabaga ko baba 12 ku rupapuro rw’umukino ariko mu kibuga hakaba harimo abakinnyi 8 gusa.

Mbere y’uko umwaka w’imikino wa 2024-25, FERWAFA yavuze ko mu gihe ikirimo kubisuzuma abanyamahanga 6 ari bo bazaguma gukina.

Tariki ya 29 Kanama 2024, RPL yongeye kwibutsa FERWAFA ko igomba kubasubiza mbere y’uko isoko ry’abakinnyi rifungwa, ryafunzwe tariki ya 30 Kanama 2024.

Ku ibaruwa FERWAFA yandikiye amakipe yayamenyesheje ko abakinnyi b’abanyamahanga bagomba kutarenga 10 ku rupapuro rw’umukino ni mu gihe mu kibuga hagomba kurimo 6 gusa nk’ibisanzwe.

Ati “amakipe yo mu cyiciro cya mbere yemerewe gushyira ku rupapuro rw’umukino abakinnyi batarenze 10 no gukinisha abakinnyi batarenze 6 mu kibuga.”

Bivuze ko ubwo shampiyona izaba isubukuwe mu mpera z’uku abakinnyi b’abanyamahanga baziyongera.

Abanyamahanga bazamuwe

Itangazo ryashyizwe hanze n'ingabo z'u Rwanda rigaragaza ko abashyizwe ku ipeti rya Brigadierl General ari COL. Justus Majyambere na Col. Louis Kanobayire.

Majyambere wazamuwe mu ntera asanzwe ari Umuyobozi wa Diviziyo ya Gatanu mu ngabo z'u Rwanda naho Kanobayire ni Umuyobozi w'Ishuri rya RDF ryigisha ingabo zirwanira mu kirere.

Abazamuwe ku ipeti rya Colonel ni Lt Col Francis Nyagatare, Lt Col Jessica Mukamurenzi, Lt Col Mulinzi Mucyo, Lt Col Alexis Kayisire , Lt Col Emmanuel Rutebuka, Lt Col Jacques Nzitonda, Lt Col Ephraim Ngoga, Lt Col Emmanuel Rukundo, Lt Col Silver Munyaneza Akarimugicu, Lt Col Tanzi Mutabaruka, Lt Col Prosper Rutabayiru, Lt Col Hubert Nyakana, Lt Col Joseph Kabanda na Lt Col Danny Gatsinzi.

Perezida Kagame kandi yazamuye mu ntera abasirikare 30 abashyira ku ipeti rya Lieutenat Colonel, abasirikare 280 bashyizwe ku ipeti rya Major, abasirikare 40 bashyirwa ku ipeti rya Lieutenant, 270 bashyirwa ku ipeti rya Lieutenant n'abandi icyenda basanzwe ari abaganga bashyizwe ku ipeti rya Lieutenant.

Izamurwa mu ntera ry'abasirikare ryaherukaga muri Kamena uyu mwaka ubwo Minisitiri w'Ingabo yazamuraga mu ntera abasirikare bato basaga 4000.

Justus Majyambere yazamuwe ashyirwa ku ipeti rya Brigadier General

Iki gitabo cyitwa 'Scar Tissue Armor' kigizwe n'imivugo 114 igaruka ku ngingo nyinshi zigaruka ku gahinda k'abantu, gukomereka imitima, ubuzima bwo mu mutwe, kwiyahura mu bantu, urukundo n'izindi zinyuranye. Buri paji ifite inkuru yayo yihariye.

Imivugo iri muri iki gitabo ni iyo Gakunde Prayer yagiye yandika mu bihe binyuranye.

Kuri uyu wa Gatanu tariki ya 30 Kanama 2024, nibwo uyu musizi yamuritse ku mugaragaro iki gitabo, mu gikorwa cyabereye kuri Park Inn Hotel, cyitabirwa n'incuti n'abavandimwe.

Gakunde yabwiye IGIHE ko yari afite imivugo myinshi agatekereza uko yayishyira hamwe yose hakavamo ikintu umuntu ashobora gufata kugira ngo asome bitari ukuyishyira ku mbuga nkoranyambaga cyangwa kugenda amurika umwe kuri umwe.

Muri iki gitabo hari umuvugo umwe uri mu Kinyarwanda [indi iri mu Cyongereza]. Gakunde yavuze ko ari wo yishimira cyane kurusha indi.

Ati 'Ni umuntu uba uri kuganira n'umubyeyi we w'umugore amuganyira ku kibazo cy'ubuzima bwo mu mutwe afite kugira ngo na we ajye agerageza amwumve. Ndifuza ko nibagisoma buri wese azagira icyo akuramo cyangwa kumva ko akwiye kumva. Uburyo cyanditse cyangwa amarangamutima arimo ni ibintu bisanzwe abantu banyuramo ariko ntibabigaragaze.'

'Icyo nifuza kubabwira n'uko bumvwa, buri kintu cyose uri kunyuramo uyu munsi hari undi na we wakinyuzemo. Kumvwa bijye bituma twumva tutari twenyine mu buzima.'

Gakunde yavuze ko hari inshuti ze z'inkoramutima yari yarahaye isezerano ryo gusohora igitabo ariko zigatabaruka atarabigeraho, iyi akaba ri intambwe ishimishije kandi ifite icyo ivuze kuri we.

Ati 'Inshuti zanjye ebyiri nagize ibyago byo kubura tukiri bato [Grace na Steven] bari inkoramutima zanjye kandi nari nabasezeranyije ko nzandika igitabo, rero naracyanditse n'ubwo badahari cyo kirahari. Ndacyibatuye bo n'abandi bakunda ubusizi.'

N'ubwo ari igitabo cye cya mbere amuritse ariko Gakunde yatangiye ubusizi kera kuko umuvugo wa mbere yawanditse yiga mu mwaka wa kane w'amashuri abanza.

Ati 'Wari umukoro bihera uko. Ababyeyi bambwira ko Abasinga ari abasizi n'abasizikazi ariko sinavuga ko hari umuntu umwe nshobora kuba narabirebeyeho bishobora kuba biri mu maraso. Mu mivugo iri muri iki gitabo uwa mbere nawanditse mu 2019.'

Yagaragaje ko kandi afite inzozi zo gukomeza kwandika ibindi bitabo, 'Kugeza ubu ntekereza ko nzakomeza kwandika imivugo impano nikura nandike n'ibindi.'

Iki gitabo kiri ku isoko aho kiboneka ku 15,000 Frw, uwacyifuza akaba yanyura ku mbuga nkoranyambaga z'uyu musizi kugira ngo agishyikirizwe.

Abakunzii b’ubusizi bwa Gakunde bari baje kumushyigikira

Iki gitabo cyitwa 'Scar Tissue Armor' kigizwe n'imivugo 114

Iki gitabo cyitwa 'Scar Tissue Armor' kigizwe n'imivugo 114 igaruka ku ngingo nyinshi zigaruka ku gahinda k'abantu, gukomereka imitima, ubuzima bwo mu mutwe, kwiyahura mu bantu, urukundo n'izindi

Iki gitabo kiri ku isoko aho kiboneka ku 15,000 Frw

Abakunzii b’ubusizi bwa Gakunde bari baje kumushyigikira

Andy Bumuntu ni umwe mu bari baje gushyigikira Gakunde Prayer

Bamwe mu bari aho batahanye kopi z’iki gitabo

Gakunde Prayer ukoresha izina ry'ubusizi rya Kunda Cooks, yavuze ko umuntu wese uzasoma iki gitabo atagomba guheranwa n’agahinda

Gakunde Prayer yasohoye igitabo cya mbere agitura incuti ze zatabarutse