Category: Uncategorized

Mu Murenge wa Miyove, mu Karere ka Gicumbi, haravugwa inkuru y'umugore uri gusaba kurenganurwa nyuma y'uko inzu ye isenywe n'umugore basangiye umugabo, bapfa imitungo bavuga ko bayisangiye.

Uyu mugore uvuga ko ari nyir'inzu, atangaza ko yayubatse afatanyije n'umugabo we, ariko nyuma y'igihe undi mugore waje mu rugo nk'umugore wa kabiri, hatangira kutumvikana ku micungire n'ikoreshwa ry'iyo mitungo. Ibyo byatumye amakimbirane akura, kugeza ubwo umwe muri bo afashe icyemezo cyo gusenya inzu yari ituwemo n'uwo mugore.

Abaturanyi bavuga ko aya makimbirane yari amaze iminsi agaragara, ariko bakibaza impamvu byageze ku rwego rwo gusenya inzu, aho kuba abayobozi b'inzego z'ibanze barahamagariwe gukemura ikibazo mbere y'uko gifata indi ntera.

Uwasenyewe inzu ashimangira ko yahohotewe kandi ko akeneye ubutabera, asaba ko ubuyobozi bwamufasha gusubizwa uburenganzira bwe, ndetse uwamuteje icyo cyago akabiryozwa. Avuga ko ubu ari mu buzima bugoye kuko asigaye adafite aho akinga umusaya.

Ku rundi ruhande, amakuru aturuka mu baturage avuga ko ikibazo kiri gukurikiranwa n'inzego zibishinzwe kugira ngo harebwe ukuri kwabyo n'uko amategeko yakurikizwa.

Iyi nkuru irongera kwerekana ibibazo bikunze guterwa n'amakimbirane ashingiye ku mitungo mu miryango ifite abagore barenze umwe, aho benshi basaba ko hajya habaho ibiganiro n'ubujyanama mbere yo kugera ku makimbirane akomeye nk'aya.

Abaturage batuye mu Murenge wa Butaro, mu Karere ka Burera, bavuga ko bakomeje guhura n'imbogamizi zo kubura inzoga basanzwe banywa, nyuma y'aho ubuyobozi bubafatiye icyemezo cyo guhagarika icuruzwa n'ikorwa ry'inzoga gakondo zirimo urwagwa, ikigage n'ubushera muri ako gace. Iki cyemezo cyafashwe hagamijwe gukumira ingaruka mbi zaterwaga n'izo nzoga, zirimo ubusinzi bukabije n'amakimbirane mu miryango.

Nubwo bimeze bityo, bamwe mu baturage bavuga ko batanyuzwe n'icyo cyemezo, kuko bavuga ko izo nzoga zari zisanzwe ari igice cy'umuco wabo ndetse zikabafasha mu mibereho ya buri munsi. Ibi byatumye hari abahitamo kujya mu gihugu cya Uganda gihana imbibi n'Akarere ka Burera, aho bavuga ko babasha kubona inzoga ya Kanyanga ku buryo bworoshye kandi ku giciro gito.

Umwe mu baturage utashatse ko amazina ye atangazwa yagize ati: 'Tujyayo kuko hano batubujije ibyo twari tumenyereye. Nubwo ari kure gato, turagenda tukabona ibyo dushaka.' Ibi ariko bitera impungenge bamwe mu bayobozi n'abaturage, kuko Kanyanga izwiho kuba ishobora guteza ibibazo by'ubuzima ndetse n'umutekano muke.

Ubuyobozi bw'Akarere ka Burera bukomeje gushishikariza abaturage kwirinda kunywa inzoga zitujuje ubuziranenge no gushaka ibindi bikorwa bibafasha kwiteza imbere. Bunasaba inzego z'umutekano gukomeza gukaza ingamba zo kurwanya iyinjizwa rya bene izo nzoga mu buryo butemewe, mu rwego rwo kurinda ubuzima bw'abaturage no kubungabunga ituze rusange.

Zari Hassan yahakanye amakuru amaze iminsi acicikana ku mbuga nkoranyambaga avuga ko urugo rwe n’umugabo we Shakib Cham ruri mu mwiryane udasanzwe.

Aya makuru yatangiye gukwirakwira nyuma y’ifoto [Screenshot] igaragaza inyandiko bivugwa ko yashyizwe kuri paje ya Facebook ya Zari, igaragaza amagambo asa n’ashinja umugabo we kumuca inyuma.

Mu magambo ari muri iyi nyandiko yavugaga ko uyu munyamiderikazi akaba n’umucuruzi ukomoka muri Uganda yamufatiye mu buriri ari kumwe n’undi mugore, ibintu byahise bikurura impaka mu bakoresha imbuga nkoranyambaga.

Mu butumwa bw’amashusho Zari yashyize hanze, yahakanye ayo makuru ayita ibinyoma byahimbwe, anashimangira ko atigeze ayandika cyangwa ngo ayashyire ku rubuga rwe.

Yagaragaje ko hari abantu bashyira imbere gukurura ukuvugwa kw’ababakurikira ku mbuga nkoranyambaga, bakoresheje ubuzima bw’abandi.

Yagize ati 'Turimo kubaho mu Isi yuzuyemo agahinda, aho abantu bishimira kwinjira mu buzima bw’abandi. Kuki mushaka kubona abandi bababaye? Nimureke gukurikirana ubuzima bw’abandi mushaka 'likes’ n’inyungu.'

Yakomeje anenga uwakoze iyo nyandiko, avuga ko ibyo bikorwa bigaragaza imyitwarire mibi y’uwayihimbye kurusha uko byagira icyo bivuga ku buzima bwe bwite.

Nubwo aya makuru yakwirakwiriye cyane, Shakib Cham we ntiyigeze atanga ibisobanuro birambuye, ariko yashyize ku mbuga nkoranyambaga ze amashusho ari kumwe na Zari, bigaragaza ko bombi bakiri mu mubano mwiza.

Itsinda Maranatha Family Choir rikomeje urugendo rwo kugeza ubutumwa bwiza ku bakunzi b’umuziki wa Gospel, ryashyize hanze amashusho y’indirimbo nshya yise 'Ubunini', igaruka ku mbaraga z’ukwizera mu bihe by’ingorane.

Iyi ndirimbo ifite ubutumwa bukora ku mitima ya benshi, cyane cyane abahura n’ibibazo bikomeye ariko bakabihisha inyuma y’ibyishimo bagaragaza hanze. 'Ubunini' yibutsa abantu ko nubwo hari ibihe bitoroshye umuntu anyuramo, Imana ihora iri kumwe na we, kandi ububasha bwayo buruta kure ingano y’ibibazo byose ashobora guhura na byo.

Mu busobanuro bw’iyi ndirimbo, Perezida w’iri tsinda, Selemani Munyazikwiye yavuze ko banditse iyi ndirimbo bashingiye ku gitekerezo cy’uko kwizera guhindura uko umuntu abona ubuzima. Aho guhanga amaso ku buremere bw’ibibazo, umuntu ahitamo kureba ku bukomeye bw’Imana. Iyo umuntu ateze amatwi ijwi ry’Umwungere Mwiza, aruhuka umutima, agasubizwamo imbaraga ndetse ubuzima bwe bukuzura ibyishimo.

Indirimbo 'Ubunini' si nshya mu buryo bw’ihimbwa, kuko yanditswe mu myaka ishize na Clement Ishimwe, wari uri no mu bahimbyi b’iri tsinda icyo gihe. Nubwo bayigerageje mu buryo butandukanye mu bihe byatandukanye, bavuga ko batigeze banyurwa n’uko yakorwaga, bituma hari n’ibihe bahisemo kudashyira hanze ibyo babaga bakozeho. Kugeza ubu ni bwo bayihaye isura nshya bumva ijyanye n’ubutumwa bwifuzwaga gutangwa.

Mu gutunganya iyi ndirimbo, Bolingo Paccy ni we wakoze amajwi, anagira uruhare rukomeye mu kuyigeza ku rwego iriho ubu. Hari kandi Mickal Uwihirwe bayiririmbanye, bose bakaba bashimiwe uruhare bagize kugira ngo iyi ndirimbo ibe igihangano gifite ireme. Amashusho yayo yakozwe na Vista, bayishyiramo ubuhanga bujyanye n’ubutumwa bwayo.

Maranatha Family Choir igaragaza ko umwaka wa 2025 wababereye mwiza cyane, kuko wabahaye uburambe mu murimo, bagahura n’abantu batandukanye babafashije gukomeza gutera imbere. Ni umwaka kandi baririmbyemo henshi, banasohora indirimbo zitandukanye. Nubwo hari ibyishimo byinshi bawubonyeho, ntibabura no kwibuka ibihe bikomeye birimo kubura umwe mu baririmbyi babo, ndetse n’ibyishimo byo kwakira ubuzima bushya mu miryango yabo.

Mu migambi ya 2026, iri tsinda rivuga ko rifite intego yo kurushaho gusakaza ibikorwa byaryo ku rwego rwo hejuru, kugira ngo ubutumwa bwiza bugere ku bantu benshi kurushaho, binyuze mu ndirimbo n’ibindi bikorwa byo kuramya no guhimbaza Imana.

Basabye abakunzi babo gukomeza kubashyigikira no gufatanya na bo muri uru rugendo, bagira uruhare mu gusangiza abandi ubutumwa bwiza. Bashimangira ko abafana babo ari abafatanyabikorwa b’ingenzi, kuko ari bo batuma ibyo bakora bigera kure.

Maranatha Family Choir ni itsinda ry’abaramyi rifite intego yo kwamamaza ubwiza bw’Imana aho rishoboye hose, kugira ngo abantu babashe kubaho mu munezero no mu mahoro aturuka ku kwizera. Bamaze kumenyekana mu ndirimbo zitandukanye zirimo 'Nzajya nkusingiza Yesu', 'Tuma umuntu aseka', 'Nyigisha' bakoranye na Butera Knowless, ndetse na 'Narahindutse' bakoranye na Nel Ngabo n’izindi nyinshi zakunzwe.

Umuvugizi w’Umujyi wa Kigali, Emma Claudine yavuze ko kugeza ubu nta kipe uyu Mujyi ufite uretse amakipe atatu ufasha ya AS Kigali, Gasogi United na Kiyovu Sports kandi bakaziha amafaranga angana.

Ibi yabitangaje nyuma y’uko mu minsi yashize hagiye hanze ibaruwa y’Umujyi wa Kigali usaba aya makipe uko ari 3 kwihuza agakora ikipe imwe kugira ngo ibyo Umujyi wa Kigali wayahaga bijye bigenda ku ikipe imwe.

AS Kigali, Kiyovu Sports na Gasogi United akaba yahawe kugeza tariki 30 Werurwe 2025 kuba yamenyesheje Umujyi wa Kigali umwanzuro yafashe.

Gusa amakuru ISIMBI yamenye ni uko yaba Gasogi United yo ibyo kwihuza n’aya makipe itabyemera ni mu gihe Kiyovu Sports na AS Kigali zo zitarafata umwanzuro.

Mu kiganiro ISIMBI yagiranye n’Umuvugizi w’Umujyi wa Kigali, Emma Claudine abajijwe impamvu barimo bashaka guhuza aya makipe ngo babone ikipe bafasha 100% kandi hari AS Kigali, yavuze ko AS Kigali atari ikipe y’Umujyi wa Kigali ubu yigenga.

Ati 'Hari ibyo abantu baba bazi ariko hari ukundi kuri cyangwa mu mategeko bifite ukundi bimeze, nibyo ikipe ya AS Kigali yatangijwe n’Umujyi wa Kigali ariko nyuma Umujyi waje kuyirekura iba ikipe yigenga, usigara uyitera inkunga.'

'Uyu munsi nituvuga ngo dufate ikipe imwe, ikipe dufasha tugashyiramo akaboko ntabwo dufata AS Kigali kuko yari yarabaye ikipe yigenga, nta nubwo turi buvugire Gasogi United cyangwa Kiyovu Sports ngo ntizibishaka, ni yo mpamvu tugomba gutegereza icyemezo kiva muri buri kipe noneho tukamenya icyo dukora dukurikije icyo amakipe yifuje.'

Emma Claudine yashimangiye ko mu gihe aya makipe atakwemera kwihuza ngo akore ikipe imwe, Umujyi wa Kigali uzahita urekera kuyatera inkunga ahubwo ushinge ikipe yawo, iyiteho umunsi ku munsi nk’uko yashakaga kubikorera aya makipe yihuje, amafaranga bahaga aya makipe niyo bazajya bakoresha mu ikipe yabo.

Umunyamakuru akaba na Team Manager wa Gasogi United, Kabera Fidele, yifatiye ku gahanga abasifuzi baraye basifuye umukino APR FC yabasezereyemo mu gikombe cy’Amahoro ko ari bo bayifashije.

Wari umukino wo kwishyura wa 1/4 cy’Igikombe cy’Amahoro wabaye ejo hashize ku wa Kabiri tariki ya 17 Werurwe 2026 kuri Kigali Pele Stadium aho APR FC yatsinze Gasogi United 4-0 iyisezerera ku giteranyo cy’ibitego 4-1 kuko umukino ubanza Gasogi United yari yatsinze 1-0.

Mu kiganiro cy’incamake z’imikino kuri Radio1 mu gitondo cyo kuri uyu wa Gatatu cyakozwe na Kabera Fidele akaba na Team Manager wa Gasogi United, yavuze ko ari igisebo kuri APR FC kuba itabasha gutsinda Gasogi idafashijwe n’abasifuzi.

Ati “Ni igisebo ku mupira w’amaguru wo mu Rwanda, ni isoni ku ikipe nka APR FC, ikomeye mu nguni zose, ikomeye ku bakinnyi, ku batoza, ikomeye mu mibereho ariko ikaba idashobora gutsinda Gasogi United hatajemo akaboko k’umusifuzi, ni yo mpamvu tujya tuvuga ngo iyi kipe dukomeze tuyizere?”

Yakomeje avuga ko wagira ngo abasifuzi bari barimo bashyira mu bikorwa amabwiriza bahawe maze umukino ugenda uko wateguwe.

Ati 'Abasifuzi bari bahawe amabwiriza, ngira ngo ahari byari ugufasha APR FC gutsinda Gasogi United FC ibitego biri hejuru ya bine ni ko navuga. Navuga ko ubutumwa bahawe babukoze neza cyangwa se ibyo bifuzaga byagezweho.'

'Biteye isoni n’agahinda kubona umukino Ugirashebuja Ibrahim yasifuye ku munsi w’ejo, akandamiza Gasogi United, ayirwanya, ayishotora, amakarita y’umuhondo menshi hakiri kare cyane, atanabaho. Hari ukwima amahirwe Gasogi akayaha APR, byari bibi kuri Ugirashebuja Ibrahim. Na we arabizi aho ari, yaba yabikoze abishaka […]. Wabonaga wagira ngo ni ubushake.'

Yanagarutse k’umusifuzi wo ku ruhande, Ndayisaba Saidi avuga ko akunze kubogama inshuro nyinshi iyo yasifuriye Gasogi United FC.

Ati 'Abasifuzi bo ku mpande barimo Ndayisaba Saidi wari umaze imyaka ine cyangwa itanu adasifurira Gasogi United, yagarutse asubiramo ibyo yari yarakoze mbere, byo kwiba ku bushake Gasogi United.'

Nyuma yo gutsinda Gasogi United, APR FC ikaba yageze muri 1/2 aho igomba guhura n’izakomeza hagati ya Etincelles na Bugesera FC.

Minisitiri w’Urubyiruko n’Iterambere ry’Ubuhanzi, Dr. Utumatwishima Jean-Népo Abdallah, yavuze ko abantu bagomba kumenya ko buri muhanzi yambara bijyanye n’ibihangano bye uzashaka kwigana Doja Cat azaba ataratojwe.

Ni nyuma y’impaka ndende zavutse kubera imyambarire y’umuhanzikazi ukomoka muri Leta Zunze Ubumwe za Amerika, Doja Cat waraye ataramiye i Kigali agashimisha benshi ariko imyambarire ye ntiyavugwaho rumwe.

Uyu muraperikazi wakunzwe mu ndirimbo nka 'B*tch I’am Cow’, 'Paint the Town Red’ yanahereyeho, uko yari yambaye byagaragazaga bimwe mu bice by’umubiri we, abatabyishimiye bavuga ko atari umuco wo kwigisha Abanyarwanda

Umwe mu bakoresha imbuga nkoranyambaga yashyize ubutumwa kuri X abaza Minisitiri Utumatwishima niba umunsi umwe umunyarwandakazi yambaye nka Doja Cat, RIB itazamuhamagaza.

Minisitiri Utumatwishima yavuze ko abantu bagomba kumenya ko ku rubyiniro atari mu rusengero cyangwa mu nteko y’Umuco.

Ati 'Ku rubyiniro, umuhanzi atarama bijyanye n’ubuhanzi bwe. Urubyiniro rw’umuziki si ku rusengero, si ku Nteko y’Umuco, si mu ishuri, si mu rugo. Dutoze umuco wo kubaha ikintu mu mwanya wacyo.'

Gusa yasoje avuga ko uzigana Doja azaba ataratojwe. Ati “Uzabyigana atari Doja ku rubyiniro azaba ataratojwe.”

Tuzamure imyumvire:

(1)- Kuri stage, Umuhanzi akora performance ijyanye n’ubuhanzi bwe.

(2)- Music Stage si ku rusengero, si ku nteko y’umuco, si mu ishuri, si no mu rugo.

(3)- Dutoze umuco wo kubaha ikintu mu mwanya wacyo

Uzabyigana atari #Doja kuri stage azaba ataratojwe

— UTUMATWISHIMA (@jnabdallah) March 18, 2026