Category: Uncategorized

Ni imibare yatangajwe ku wa 04 Nzeri 2024 mu bihe ku mbuga nkoranyambaga hamaze ibisa n'amakimbirane cyane mu bakora ibijyanye n'imyidagaduro mu Rwanda.

Umwe mu bakunze gukoresha imbuga nkoranyambaga cyane mu gutambutsa ibitekerezo by'uko yumva ibintu ku ngingo runaka witwa Nsanga Sylvie, ari mu bakunze kwibasirwa kuri izo mbuga agatukwa akandagazwa nk'uko abishimangira.

Mu kiganiro na RBA ati 'Nk'igihe uvuze ikintu abantu batacyumva aho kugira ngo babaze ugasanga baragututse, bakwise amazina, aho kumva ibitekerezo byawe ahubwo bakabishakira indi nyito kandi mu by'ukuri watanze igitekerezo ku buryo unakinenga yakabaye anenga igitekerezo aho kunenga umuntu.'

Nsanga asaba ko hakwiriye kongerwa ubukangurambaga bwigisha uko abantu bagomba kwitwara mu gihe bakoresha imbuga nkoranyambaga ariko bikanajyana no guhana abinangira.

Ati 'Iyo abakora icyo cyaha mu nzego zitandukanye badahanwe bigaragaza ko icyakozwe atari icyaha. Abantu baravuga bati na runaka yasangije abandi amashusho y'urukozasoni kuki njye ntabikora.'

Icyakora uko gukoresha imbuga nkoranyambaga mu buryo bunyuranyije n'amategeko bivamo ibyaha ni ibintu RIB ikurikirana na cyane imaze kwakira ibirego by'abagaragaje ko bahozwa ku nkeke hifashishijwe mudasobwa cyangwa uruhererekane rwayo 113.

Umuvugizi wa RIB, Dr. Murangira B. Thierry ati 'Itegeko ryavuze ko RIB itemerewe kuba yakurikirana icyo cyaha ibyibwirije. Tugiye mu mibare mu myaka itanu ishize hakurikiranywe ibirego 113 birimo abakekwa 136.'

Dr Murangira yavuze ko nubwo imbuga nkoranyambaga zaje kugira ngo abantu bisanzure mu gutanga ibitekerezo ariko bagomba kumenya ko izo mbuga ari inkota y'amugi abiri ha handi uyikoresheje nabi imukeba yayikoresha neza akisanzura.

Ati 'Muri make abantu ntibitiranye imbuga nkoranyambaga nk'ahantu bagomba gukorera amafuti yose cyangwa gukorera ibyaha. Imbuga nkoranyambaga ntizikwiye kuba igikoresho cyo gukora ibyaha. Ubikoze arahanwa.'

Itegeko ryo ku wa 22 Kanama 2018 ryerekeye gukumira no guhana ibyaha bikoreshejwe ikoranabuhanga rigaragaza uburyo uhabanyije na ryo abigambiriye ahanwa.

Rivuga ko umuntu wese ubigambiriye, ukoresha mudasobwa cyangwa urusobe rwa mudasobwa ubuza amahwemo cyangwa ushyira ibikangisho ku muntu cyangwa ku wundi muntu bigatuma agira umutima uhagaze cyangwa ubwoba aba akoze icyaha.

Icyo gihe uwo muntu wakoze icyaha aba yerekanye, akwirakwije cyangwa ashyize ahagaragara inyandiko, amajwi, amashusho cyangwa amafirime by'urukozasoni.

Ikindi ni uko ku bw'inabi aba yafashe amashusho, firime cyangwa amajwi by'undi muntu atabyemeye cyangwa atabizi, agaragaje cyangwa akwirakwije amakuru ashobora gutuma undi muntu akorerwa ubugizi bwa nabi cyangwa ihohoterwa.

Iyo abihamijwe n'urukiko, ahanishwa igifungo kitari munsi y'amezi atandatu ariko kitarenze imyaka ibiri n'ihazabu ya miliyoni imwe 1 Frw ariko itarenze miliyoni 2 Frw.

Umuvugizi wa RIB, Dr. Murangira B. Thierry yatangaje ko bamaze gukurikirana abantu 139 bakekwaho guhoza abandi ku nkeke hifashishijwe mudasobwa cyangwa urusobe rwayo

Abize n'abatize bazi neza amashuri yisumbuye yamaze kubaka izina mu burezi bw'u Rwanda.

Ibi bituma umunyeshuri wiyumvamo ubuhanga aba ashaka kwerekeza nko muri College St Andre, GS St Joseph Kabgayi, Collège Christ-Roi de Nyanza, TTC Save, Groupe Scholaire Officiel de Butare (Indatwa), Groupe Scholaire St Aloys Rwamagana, TTC De La Salle Byumba, n'ahandi.

Minisiteri y'Uburezi yo igaragaza ko imyanya y'abinjira mu mwaka wa mbere w'ayisumbuye mu bigo bicumbikira abanyeshuri ari ibihumbi 17, mu gihe abavuye mu cyiciro rusange bimukira mu mwaka wa kane bo bateganyirijwe imyanya ibihumbi 64 mu mashuri biga babamo.

Abandi bajya mu mashuri y'uburezi bw'ibanze bw'imyaka icyenda na 12, hakaba n'abagana amashuri yigenga.

Umunyamabanga wa Leta muri Minisiteri y'Uburezi, Claudette Irere, ubwo yari mu kiganiro Zinduka kuri uyu wa 4 Nzeri 2024 yavuze ko hari ibigo bike usanga abanyeshuri bibandaho basaba nyamara bifite imyanya mike cyane yo gushyiramo abashya.

Ati 'Imyanya bose baba bashaka ntabwo irenze 7000, kandi ayo ni yo bose barwanira. Twaritegereje tureba mu mashuri 20 bose basaba. Nk'urugero ishuri Collège St Andre risabwa n'abanyeshuri barenga ibihumbi 14966, imyanya rifite ni 159.'

Iyi mibare igaragaza ko nibura abanyeshuri 2% mu basabye iri shuri ari bo bashobora kuryoherezwaho.

Abanyeshuri basaba kujya kwiga muri Scholaire Officiel de Butare (Indatwa) isabwa n'abanyeshuri 11300, mu gihe imyanya ihari yakira abashya ari 120 gusa.

Ikigo cyasabwe n'abanyeshuri benshi ni Groupe Scholaire St Aloys Rwamagana, bagera kuri 22988 basabye ishuri rimwe nyamara rifite imyanya 120 gusa.

Ati 'Ntabwo abantu ibihumbi 22 basaba ngo bose tubajyane mu ishuri bakwirwe mu myanya 120.'

Mu batsinze ibizamiri bisoza amashuri abanza bahawe ibigo bifuzaga ni 7.4% mu marenga ibihumbi 200 bagomba gutangira umwaka wa mbere w'amashuri yisumbuye, mu gihe abandi 92.6% bahawe ibigo batasabye.

Abakoze ibizamini bya Leta ni 202.021 barimo abakobwa 111.249 bangana na 55,1% n'abahungu 90.772 bangana na 44,9%.

Abatsinze ni 195.463 barimo abakobwa 107.834 n'abahungu 87.629, mu gihe abatsinzwe ari 6492 barimo abakobwa 3375 n'abahungu 3227.

Mu cyiciro rusange cy'amashuri yisumbuye hakoze abanyeshuri abanyeshuri 143227, barimo abakobwa 79.933 n'abahungu 63.294. Abahungu batsinze ku kigero cya 95.8%, mu gihe abakobwa batsinze ku kigero cya 92%, na ho abatsinzwe ni 8912, abakobwa bakaba 6241 bangana na 70% by'abatsinzwe, abahungu bo ni 2671 bangana na 30%.

Imyanya y’abanyeshuri binjira mu mwaka wa mbere w’ayisumbuye ni ibihumbi 17 gusa

Hari iby'ingenzi bigenderwaho iyo abanyeshuri bakoze ibizamini bya Leta bashyirwa mu bigo by'amashuri byose bigakorwa hifashishijwe ikoranabuhanga ryabugenewe rya SDMS.

Icya mbere ni amanota abanyeshuri baba bagize mu bizamini bya Leta, amahitamo y'abanyeshuri baba barakoze mu gihe cyo kwiyandikishiriza gukora ibizamini bya Leta ndetse n'imyanya iba iri mu mashuri Leta yoherezamo abanyeshuri.

Mbere y'uko sisiteme ishyira abanyeshuri mu myanya, ibanza gutondeka abakandida bose ikurikije amanota [aggregates] bagize hanyuma igatondeka amanota y'ibanze bagize [ni ukuvuga igiteranyo cy'amanota yose baba baragize] kugira ngo abarushije abandi mu manota y'ibanze bashyirwe imbere.

Ku bagiye mu mwaka wa mbere w'amashuri yisumbuye sisiteme ifata abafite amanota [aggregates] 30 ikabatondeka yarangiza ikagenda ibaha imyanya mu mashuri batoye ihereye ku barushije abandi mu manota y'ibanze.

Urugero kuko bakora amasomo atanu amanota y'ibanze muri rusange ni 500 kuko buri somo rikorerwa ku ijana. Ubwo rero sisiteme ibatondeka hakurikijwe uwarushije abandi urugero uwagize 490 aba uwa mbere uwagiye 475 akaba uwa kabiri gutyo gutyo.

Nyuma sisteme ifata abasigaye bafite aggregate ya 30 ariko batabonye imyanya mu mashuri basabye, ikabashakira imyanya mu mashuri bigaragara ko yatowe n'abanyeshuri benshi agifite imyanya.

Icyo cyiciro cyarangira sisiteme igafata abanyeshuri bafite kuva kuri aggregates 29 kugeza ku inota ryafatiweho ikagenda ibaha imyanya mu mashuri bahisemo ihereye ku rya mbere ikageza ku rya kane bitewe n'imyanya iri muri iryo shuri.

Ibyo byasozwa sisiteme ifata abanyeshuri basigaye batabonye imyanya mu mashuri basabye, ikagenda ibashyira mu mashuri ari mu turere bakomokamo agifite imyanya hanyuma abasigaye batabonye imyanya mu turere batuyemo, ikabashakira imyanya mu ntara batuyemo.

Abandi basigaye batsinze ariko bafite amanota atabemerera guhabwa imyanya mu mashuri bigamo bacumbikirwa, sisiteme ibashakira imyanya mu mashuri abegereye bigamo bataha.

No ku banyeshuri bajya mu mashuri y'umwaka wa kane w'ayisumbuye bigenda gutyo usibye ko ho haba umwihariko ushingiye ku mahitamo y'icyo buri munyeshuri ashaka kwiga.

Benshi banyotewe no kubona ikipe y’igihugu itsinda umusubirizo, gusa muri iyi minsi bisa n’aho yatangiye kwiyunga n’abanyarwanda nyuma y’igihe kinini ibababaza. Uyu munsi tugiye gusubiza amaso inyuma turebe bimwe mu bihe by’ingenzi by’ikipe y’igihugu ndetse n’aho izina ‘Amavubi’ ryakomotse.

Igihugu cyabonye Ubwigenge tariki ya 1 Nyakanga 1962. Ishiyirahamwe ry’umupira w’amaguru mu Rwanda 'FERWAFA’ ryashyizwe mu 1972. Ryaje kwemezwa nk’umunyamuryango w’Impuzamashyirahamwe y’Umupira w’Amaguru ku Isi 'FIFA’ ndetse n’Impuzamashyirahamwe y’Umupira w’Amaguru muri Afurika 'CAF’ mu 1976.

Umukino wa mbere uzwi n’aya mashyirahamwe u Rwanda rwawukinnye tariki ya 29 Kamena 1976 aho rwatsinzwe n’u Burundi 6-2 mu mukino wabereye muri Gabon.

Ntabwo byoroshye kuba wabona amateka y’ikipe y’igihugu Amavubi, muri iyi nkuru ISIMBI yagerageje guhuza bimwe mu byanditswe biri mu bubiko ndetse inavugana n’umwe mu bakiniye ikipe y’igihugu bwa mbere, tugiye kubagezaho amavu n’amavuko y’Amavubi ndetse na bimwe mu bigwi byayo.

Bwa mbere ikipe y’igihugu ihamagarwa byari mu 1964 ariko byari ugukora imyitozo gusa, harimo abakinnyi nka Butare, Hardi, Kamatari, Rutanga Pierre, Nshimyumurwa Denis.

Yongeye guhamagarwa mu 1970, irimo abakinnyi nka Runyinya, Mbaraga, Nshimyumurwa, Donat, Kamatari, Ngezi, nabwo byari ugukora imyitozo gusa.

Nk’ibisanzwe usanga amakipe y’ibihugu aba afite andi mazina azwiho(nicknames), akenshi agenda yisanisha n’imyamaswa z’inkazi mu kugaragaza ubukana bw’ikipe yabo, inyamaswa zifite icyo zisobanuye mu muco wabo cyangwa ikindi kintu gifite ubusobanuro cyane kuri icyo gihugu, nka Uganda yitwa 'Uganda Cranes(Imisambi ya Uganda)’ iyo urebye mu ibendera ry’iki gihugu harimo umusambi, Tanzania ni 'Taifa Stars(Inyenyeri z’igihugu)’ Cote d’Ivoire yitwa 'Les Éléphants
(Inzovu)’ n’andi menshi.

U Rwanda rwahisemo kwitwa Amavubi, agakoko gato k’inigwa habiri ariko kagira ubukana, akenshi ubwumva iyo kakudwinze.

Iyo ubajije abantu ntabwo bakubwira umwaka nyirizina, ikipe y’igihugu yahawe akabyiniriro k’Amavubi, izina ryafashe kugeza n’uyu munsi.

Kanamugire Aloys wakiniye ikipe y’igihugu yahamagawe bwa mbere igiye gukina amarushanwa mu 1976, yabwiye ISIMBI ko nabo batazi aho icyo gitekerezo cyavuye ariko icyo gihe babwiwe na Minisiteri ko batanze itangazo mu baturage ngo batange izina ryakwitwa ikipe y’igihugu, bagatoranyamo Amavubi.

Yagize ati 'mu by’ukuri kuvuga ngo iryo zina ryavuye he kuko icyo gihe nanjye nari nk’iri umukinnyi, ariko ibyo nagiye numva ntangiye gukora muri iyo Minisiteri, ni itangazo ryatanzwe mu baturage bavuga ngo buri wese arebe izina yakwita ikipe y’igihugu, batanze amazina menshi ariko nyuma yaho bemeza ko ikipe izitwa Amavubi, bambwiye ko uwaritanze impamvu yarihisemo ari uko Amavubi adwinga ntashireyo, aradwinga agashira ariko ejo hakaza andi nayo akadwinga. Icyo nicyo gisobanuro bampaye.'

Amavubi 1978: Abahagaze uhereye ibumoso, Dusange Jean Pierre, Mugemana, Kassim, Dr Ndagijimana Emmanuel, Bayingana, Ntacyabukura Sabbit, Rugirangoga na Runuya. Abicaye ni; Kirenga Louis, Minani, Habantake, Alfred, Kamali, Enos Gatari, Kanamugire Aloys na Baruwani Suedi

Bwa mbere ikipe y’igihugu yahamagawe igiye gukina amarushanwa hari mu 1976, yari igiye gukina amarushanwa yo muri Afurika yo hagati(central African football competition) ryabereye muri Gabon, yatozwaga n’umudage Otto Pifster, bamwe mu bakinnyi bahamagawe icyo barimo Bapfakurera Alfred, Kamatali, Ndiramiye Gabon, Antoine wa Nyanza, Karenzi, Aloys Kanamugire, Deo Kanamugire, Nshimyumurwa, Rutanga, Nyinyoli, Donat, Mike, Jumapili, Barabwiriza Runyinya n’abandi.

Iri rushanwa ni naryo rigaruka mu bihe bibi u Rwanda rwatsinzwemo ibitego byinshi mu mateka yayo, uretse kuba baratsinzwe n’u Burundi 6-2 mu mukino wabo wa mbere, batsinzwe na Cameroun 5 — 0, tariki ya 7 Nyakanga 1976, rutsindwa na DR Congo icyo gihe yari Zaire, hari tariki ya 12 Nyakanga 1976.

Ibi byiyongera ku bitego 5-0 Amavubi yatsinzwe na Tunisia tariki ya 10 Mata 1983 mu gushaka itike y’igikombe cy’AfurikaTunisia.

Kubera Jenoside yakorewe Abatutsi muri Mata 1994, u Rwanda rwisanze mu bihe bitatumaga rwashyira umutima kuri ruhago, ndetse na nyuma ya Jenoside byafashe imyaka kugira ngo rwisuganye ari nacyo gihe Imisambi ya Uganda yayadonze inshuro 5 zose nta rubori rw’Ivubi rwabashije kuyihamya, hari tariki ya 1 Kanama 1998.

Mu gushaka itike y’igikombe cy’Isi cyo mu 1998 u Rwanda rwakuwemo na Tunisia mu ijonjora rya mbere, icya 2002 rwakuwemo Cote d’Ivoire mu ijonjora rya mbere.

Bimwe mu bihe byiza bitibagirana u Rwanda rwagize, harimo kuba Rwanda B yaregukanye irushanwa rihuza ibihugu byo ku karere ka Afurika y’Iburasirazuba n’iyo hagati(CECAFA) mu 1999, hari nyuma yo gutsinda ku mukino wa nyuma Kenya ibitego 3-1 bya Ndindiri Mugaruka, Nshizirungu Hubert Bebe na Ndizeye ni mu gihe Kenya yatsindiwe na Kimuyu.

Icyo gihe u Rwanda rwari rufitemo amakipe 2, Rwanda A na Rwanda B, impamvu ni uko igihugu cyabaga cyakiriye cyahabwaga amahirwe yo kugiramo amakipe 2.

Rwanda B yegukanye CECAFA: Uhereye iburyo abahagaze, umunyezamu Ishimwe Claude, Batu Jean, Ndindiri Mugaruka na Gishweka Faustin, abapfukamye ni; Sibo Abdul, Munyaneza Djuma, Habimana Sostene, abicaye; Rusanganwa Fredy Ntare, Mupimbi Yves, Nshizirungu Hubert Bebe na Muronda Jean Pierre

Igitego cy’umutwe cya Jimmy Gatete ku mupira wari uvuye kuri Ntaganda Elias, cyahesheje u Rwanda intsinzi imbere ya Ghana kuri Stade Amahoro tariki ya 6 Nyakanta 2003 ndetse ruhita rubona itike y’igikombe cy’Afurika cya 2004 cyabereye muri Tunisia, akaba ari nacyo gikombe rukumbi u Rwanda rwitabiriye, ndetse benshi bakurikirana umupira w’amaguru bemeza ko ari byo byishimo bikomeye cyangwa intsinzi ikomeye Amavubi yagize.

Muri iki gikombe cy’Afurika ntabwo u Rwanda rwabashije kurenga itsinda A rwari rwisanzemo, rwasoje ku mwanya wa 3 n’amanota 5, nyuma ya Guinea ya kabiri yari ifite 5, Tunisia yari ifite 7 ni mu gihe DR Congo yasoje n’ubusa iri ku mwanya wa nyuma.

U Rwanda rwatangiye rutsindwa na Tunisia 2-1 Ziad Jaziri ku munota wa 27 na Francileudo dos Santos ku munota wa 57 nibo batsindiye Tunisia ni mu gihe u Rwanda rwatsindiwe na Joao Rafael Elias ku munota wa 32.

Umukino wa kabiri rwanganyije na Guinea 1-1, Karim Kamanzi ni we watsindiye Amavubi ku munota wa 93 yishyura igitego cya Aboubacar Titi Camara wari watsinze ku munota wa 49.

Amavubi yasoje itsinda atsinda DR Congo igitego 1-0 cya Said Abed Makasi ku munota wa 74.

Mu gushaka itike y’igikombe cy’Isi cya 2006, Amavubi yatsinze Namibia mu ijonjora rya mbere ariko isoza ku mwanya wa nyuma mu cyiciro cya 2 inyuma ya Angola, Nigeria, Gabon, Zimbabwe na Algeria.

Ibitego byinshi Amavubi yatsinze mu mateka yayo hari tariki ya 13 Ukuboza 2007 Dar es Salaam muri CECAFA ubwo batsindaga Djibouti 9-0, Karekezi Olivier yatsinzemo 2, Ahmed Abdi yitsinze igitego, Kamana Bokota Labama atsinda 3, Roger Tuyisenge atsinda 1, Elias Uzamukunda atsindamo kimwe na Hegman Ngomirakiza na we yatsinze 1.

Tariki ya 10 Nzeri 2019 Amavubi yatsinze Seychelles 7-0 mu mu ijonjora ry’ibanze ryo guashaka itike y’igikombe cy’Isi cya 2022, Jacques Tuyisenge na Meddie Kagere buri umwe yatsinze 2, Djihad Bizimana, Yannick Mukunzi na Hakizimana Muhadjiri buri umwe atsinda 1.

Amavubi yakinnye igikombe cy’Afurika cya 2004, iyi yakinnye umukino ufungura na Tunisia. Uhereye ibumoso abahagaze ni; Nkunzingoma Ramazan (goalkeeper), Bizagwira Leandre, Ndikumana Kataut, Said Abed, Karekezi Olivier na Nshimiyimana Eric. Abicaye ni; Ntaganda Elias, Nshimiyimana Canisius, Mbonabucya Desire, Manamana na Sibomana Abdul

Uretse igikombe cya CECAFA cyo mu 1999 Rwanda B yegukanye, Amavubi amaze kugera ku mukino wa nyuma wa CECAFA inshuro 5 zose ariko ntarabasha kwegukana iki gikombe, aho muri 2003 igikombe cyabereye muri Sudani, Amavubi yatsinzwe na Uganda ku mukino wa nyuma 2-0, 2005 cyabereye mu Rwanda, Amavubi atsindwa na Ethiopia ku mukino wa nyuma 1-0, 2007 cyabereye muri Tanzania maze u Rwanda rutsindwa na Ethiopia ku mukino wa nyuma kuri penaliti 4-2, ni nyuma y’uko bari banganyije 2-2.

2009 Amavubi yongeye gutsindirwa ku mukino wa nyuma na Uganda 2-0, igikombe cyabereye muri Kenya, 2011 ku nshuro ya 3 Uganda yatsindiye Amavubi ku mukino wa nyuma wa CECAFA, amakipe yombi yanganyije 2-2 aho ibitego by’Amavubi byombi byatsinzwe na Kagere Meddie, bageze muri penaliti Uganda itsinda 3-2, yari yabereye muri Tanzania, 2015 yabereye Ethiopia, Uganda n’Amavubi nizo zageze ku mukino wa nyuma nabwo Uganda itwara igikombe itsinze 1-0.

Umusaruro w’ikipe y’igihugu Amavubi ntabwo ari mwiza ugereranyije n’ibihugu by’ibituranyi nka DR Congo yegukanye igikombe cy’Afurika cyo mu 1974 ndetse kujya muri iki gikombe yabigize akamenyerero.

Uganda yasoje ku mwanya wa kabiri mu gikombe cy’Afurika cyo mu 1978 ndetse kwitabira igikombe cy’Afurika kuri yo si inkuru, biba inkuru iyo itagiyeyo. Hari u Burundi, Tanzania ndetse na Kenya nazo zisa nk’aho zirimo kugenda zisiga u Rwanda.

Ibi akenshi iyo urebye usanga bishingira ku kuba nta gahunda ihamye ihari yo gutegura ndetse no kwimakaza umuco w’iterambere rya ruhago rishingiye ku bana cyane ko igihe bateguwe batanze umusaruro nk’aho 2011 bitabiriye igikombe cy’Isi cy’abatarengeje imyaka 17 muri Mexique.

Muri 2014 u Rwanda rubuze itike y’igikombe cy’Afurika cya 2015 nyuma yo gutsinda Congo Brazaville ariko bagasanga Daddy Birori hari andi mazina akiniraho muri Congo, u Rwanda rwacitse ku muco wo guha abakinnyi baturuka mu bindi bihugu ubwenegihugu ngo bakinire u Rwanda, aho n’umukuru w’igihugu, Perezida Kagame yigeze kubigarukaho avuga ko kugura abakinnyi ubazana mu ikipe y’igihugu uretse no mu Rwanda nta n’ahandi byigeze biba igisubizo bityo ko bikwiye guhinduka ahubwo hagashyirwa imbaraga mu gutegura.

Perezida Kagame ni kenshi yagiye agaragaza ko ashyigikiye y’igihugu Amavubi ariko yo ikamutenguha, kugeza aho yanasabye ko gukina babireka bakajya bakurikirana iby’aho babizi.

Kuva mu 1930 igikombe cy’Isi kibaye bwa mbere kugeza mu 1994 Amavubi ntabwo yigeze yitabira iki gikombe, 1998, 2002 na 2006 yaviriyemo mu ijonjora ry’ibanze, 2010 yageze mu ijonjora rya nyuma ariko ntiyahirwa, 2014 yarenze ijonjora ry’ibanze gusa, 2018 ntiyakinnye ijonjora ry’ibanze ariko yaviriyemo mu cyiciro gikurikiyeho ikuwemo na Libya ku bitego 4-1.

Mu gikombe cy’Afurika cyatangiye mu 1957, Amavubi yatangiye gushaka itike yacyo mu 1982 aho yaviriyemo mu ijonjora kimwe no mu 1984. Yongeye kugaruka mu 2000 aviramo nabwo mu ijonjora kimwe no mu 2002. 2004 Amavubi yabonye itike y’igikombe cy’Afurika, kimwe rukumbi yitabiriye, kuva icyo gihe kugeza ku gikombe cy’Afurika cya 2021 kizakinwa muri Mutarama 2022 ntabwo Amavubi arongera kubona itike yacyo, uretse icya 2015 yari yabonye itike ariko agakurwamo kubera umukinnyi(Daddy Birori) wakiniraga ku byangombwa bitandukanye.

Amateka agaragaza ko Haruna Niyonzima ari we mu mukinnyi umaze gukinira ikipe y’igihugu y’u Rwanda imikino myinshi y’amarushanwa nta ya gishuti irimo, aho kuva muri 2006 ahamagawe bwa mbere kugeza uyu munsi amaze gukina imikino 105, muri yo mikino ari kumwe n’Amavubi batsinze imikino 33, banganya 25 batsindwa 47, binjije ibitego 102 binjizwa 125, muri ibyo bitego afitemo 6 aho aheruka gutsinda igitego tariki ya 26 Ugushyingo 2012 muri CECAFA yabereye Uganda, u Rwanda rutsinda Malawi 2-0, harimo igitego cye, akaba ari ku mpuzandengo ya 43.33%.

Hagiyemo n’imikino ya gishuti Karekezi Olivier ni we ufite imikino myinshi aho afite 134 mu gihe Haruna ari 133 nk’uko ububiko bw’umwe mu banyamakuru b’imikino mu Rwanda, Nkusi Denis uzwi nka Mtangazaji bubigagaragaza

Ububiko bw’uyu munyamakuru kandi bugaragaza ko, Karekezi ari we watsindiye Amavubi ibitego aho yayitsindiye ibitego byinshi ni Olivier Karekezi watsinze ibitego 38 mu mikino 134 yayikiniye.

Haruna Niyonzima ni we umaze gukinira Amavubi imikino myinshi

Olivier Karekezi ni we watsindiye Amavubi ibitego byinshi

Umusaruro w’Amavubi muri iyi minsi ntumeze neza

Impuzamashyirahamwe y’umupira w’amaguru muri Afurika, CAF, yemeje ko amafaranga yagenerwaga abayobozi b’amafederasiyo muri Afurika azamurwaho 150% agera ku bihumbi 50 by’amadorali.

Ni ukuvuga ko perezida wa FERWAFA, Munyantwali Alphonse azajya abona miliyoni 65 z’amafaranga y’u Rwanda ku mwaka.

Nk’uko perezida wa CAF Patrice Motsepe yabibwiye SABC TV yo muri Afurika y’Epfo ko ari icyemezo cyafashwe nyuma yo gusanga aba baperezida bakennye.

Ati 'Bamwe mu ba perezida banyu ntaho baba bafite ho gukura kandi bagomba kuyobora amashyirahamwe. Twafashe icyemezo cyo kugira icyo tubaha nubwo bidahagije ariko byibura duhe agaciro ubushake n’ubwitange bagaragaza.'

Uyu mwanzuro ukaba uzemerezwa mu Nteko Rusange ya CAF izaba tariki ya 10 Ukwakira 2024 muri DR Congo.

Ubusanzwe aba baperezida bakaba bagenerwaga ibihumbi 20 by’amadorali, ubu byamaze kugera ku bihumbi 50$.

CAF ifashe uyu mwanzuro nyuma y’uko mu minsi ishize yemeje ko amakipe akina amajonjora y’ibanze mu mikino Nyafurika azajya ahabwa ibihumbi 50$.

Munyantwali Alphonse agiye kujya abona miliyoni 65 Frw ku mwaka

m

Ni amasomo azafasha igihugu kunguka inzobere zigifasha gukora iperereza ku misoro inyerezwa cyangwa idatangwa mu buryo bukwiriye bitewe n'impamvu zitandukanye.

Yigirwaga mu mahanga bityo bigatwara ingengo y'imari ya RRA iri hejuru cyane kandi igahabwa abanyeshuri bake cyane.

Ku ikubitiro hatangiriwe ku bakozi ba RRA 18 bazamara amezi icyenda biga umunsi ku wundi.

Bazahabwa amasomo atandukanye abafasha gucukumbura no gusesengura amadosiye n'ibimenyetso byose bishobora gutuma umusoro wanyerejwe ugaruzwa.

Umuyobozi muri RRA ushinzwe amahugurwa ahabwa abakozi, Uwineza Sonia, yavuze ko abanyeshuri bazajya biga ibyumweru bibiri, basubire mu kazi mu bindi byumweru bibiri bakomeze gutyo kugeza amasomo arangiye.

Ati 'Twari dusanzwe duhaha ubwo bumenyi mu mahanga. Ni ibintu byaduhendaga cyane kuko iyo umukozi agiye ntabwo aba ari mu kazi ndetse tukamutangaho n'ibindi. Ubu abakozi bazajya bigira mu Rwanda babone impamyabushobozi zemewe bidaduhenze nk'uko byari bimeze.'

Uwineza yavuze ko abo bakozi 18 ba RRA nibarangiza kwiga, iyo porogaramu izafungurwa kuri bose, ubwo bumenyi buhabwe abantu bose babyifuza.

Uwihanganye Israel asanzwe ari umukozi wa RRA, ikigo amazemo imyaka icyenda. Akorera mu ishami rishinzwe imikorere myiza y'ikigo n'imyitwarire y'abakozi. Ni umwe mu batoranyijwe bagiye guhabwa ayo masomo.

Uwihanganye wagizwe umuyobozi wa bagenzi be bazigana, yavuze ko ari amahirwe akomeye bagize, kubona ikigo kibishyurira amasomo ndetse bakiga bakora, akavuga ko batazayapfusha ubusa.

Ati 'Benshi ntabwo twari dusobanukiwe ibijyanye no gukora iryo perereza bya kinyamwuga na cyane ko hari n'abatarize imisoro nkanjye wize amategeko. Ubu nidusoza tuzaba turi inzobere, tuzi gukusanya ibimenyetso byose bijyanye no kugaruza umusoro wanyerejwe. Urumva ko n'umusoro uziyongera.'

Umuyobozi Mukuru Wungirije Ushinzwe Amasomo n'Ubushakashatsi muri ILPD, Dr Sezirahiga Yves yavuze ko amasomo azatangwa muri iyo porogaramu yemewe n'Inama y'Amashuri Makuru na za Kaminuza mu Rwanda (HEC).

Ati 'Ikigamijwe ni ukubakira ubushobozi abakora mu misoro kugira ngo u Rwanda rubone abantu bashoboye barufasha gukora iperereza ku misoro yaba iyanyerejwe n'indi itatanzwe.'

Dr Sezirahiga Yves yavuze ko uwiga ayo masomo aba asabwa kuba afite impamyabumenyi y'icyiciro cya kabiri cya kaminuza mu masomo yose afite aho ahuriye n'imari, icungamutungo n'amategeko.

Yashimiye ubufatanye bwa ILPD na RRA, anaboneraho gusaba n'ibindi bigo byaba ibya leta n'iby'abikorera kugana ILPD kugira ngo hategurwe n'andi masomo afite aho ahurira n'amategeko asubiza ibibazo ibyo bigo byaba bifite mu byo bikora.

Mu mishinga yindi mishya ILPD iri gutegura harimo n'uwo iri gufatanyamo na Minisiteri y'Ibidukikije wo gutegura amasomo arebana n'amategeko n'ibidukikije.

ILPD kandi iteganya gukorana na Kaminuza y'u Rwanda, cyane cyane Ishami ry'ubucukuzi bw'amabuye y'agaciro mu gushyiraho amasomo yigisha amategeko agenga ubucukuzi (Law and Mining).

Ayo masomo akurikira andi 13 ILPD isanzwe itanga arimo ayatangiye umwaka ushize ku bufatanye na UNICEEF Rwanda, arebana n'ubutabera burengera abana.

Umuyobozi muri RRA ushinzwe amahugurwa ahabwa abakozi, Uwineza Sonia asobanurira abakozi ba RRA bagiye kwiga ibijyanye n’ipererereza ku misoro uko amasomo azigwa

Abakozi ba RRA 18 bagiye kwiga ibijyanye n’imisoro basabwe kubyaza ayo mahirwe babonye umusaruro

Umuyobozi muri RRA ushinzwe amahugurwa ahabwa abakozi, Uwineza Sonia (uwa kabiri uhereye i buryo) yabwiye abakozi ba RRA ko amasomo ajyanye n’iperereza ku misoro bagiye kwiga yose bazayishyurirwa n’icyo kigo bakorera

Umuyobozi Mukuru Wungirije Ushinzwe Amasomo n'Ubushakashatsi muri ILPD, Dr Sezirahiga Yves yavuze ko impamyabumenyi abazajya basoza amasomo ajyanye n’iperereza ku misoro bazahabwa zizaba zemewe na HEC

APR BBC na Patriots BBC ni yo makipe agomba guhurira ku mukino wa nyuma wa kamarampaka muri Basketball, ni nyuma y’uko yitwaye neza muri 1/2.

Ejo ni bwo hakinwe umukino wa 3 wa 1/2 cya kamarampaka muri Basketball aho Patriots na APR zari zatsinze imikino 2 ya mbere zasabwaga gutsinda umukino wa 3 ngo zigere ku mukino wa nyuma cyane ko amakipe yasabwaga gutanguranwa imikino 3 muri 5.

Umukino wabanje ni uwa Patriots BBC yaje kongera gutsinda Kepler amanota 89-66 (27-13, 18-19, 25-16 na 19-18).

Hahise hakurikiraho umukino wa APR BBC na REG BBC yari yaje ikubita agatoki ku kandi ishaka gutsinda uyu mukino.

APR ntiyaje kuyorohera kuko yayitsinze uduce tubiri twa mbere 16-15 na 20-11, REG yatsinze agace ka 3 19-12 ni mu gihe APR yatsinze agace ka nyuma 18-16 yegukana umukino ku manota 65-61.

Byari bivuze ko ihise igera ku mukino wa nyuma aho izahura na Patriots BBC. Imikino ya nyuma ya kamarampaka izatangira tariki ya 11 Nzeri aho amakipe azatanguranwa imikino 4 muri 7.

Iki cyiciro cya gatatu kirimo abanyeshuri 26, batoranyijwe mu barenga 2500 bari babisabye baka bagiye guhabwa amahugurwa y'amezi atatu.

Baba baturutse muri Kaminuza zitandukanye zirimo Kaminuza y'u Rwanda, iya Kigali, iy'Abadivantisiti b'Umunsi wa Karindwi muri Afurika yo hagati (AUCA), African Leadership University n'izindi.

Umuyobozi ushinzwe Imibereho myiza y'Abakozi muri Banki ya Kigali, Joseph Gondwe yavuze ko impamvu y'aya mahugurwa ari uko bashaka kwinjiza abakiri bato mu mwuga, ariko bakibanda ku bafite ubushake n'imbaraga zo guhindura ibintu no kuzana udushya mu rwego rw'Imari.

Ati “Ni uburyo bwiza kuri twe bwo gushaka abantu bafite impano b'abakozi beza b'ejo hazaza n'abayobozi b'iki gihugu. Twizera neza ko iyo uvuye muri Kaminuza uba ufite ubumenyi bw'ibanze gusa igikenewe ni ukurushaho kubwongera aho rero ni ho iyi gahunda iziramo.'

Yagaragaje ko iyi gahunda yatangijwe mu rwego rwo gufasha abakiri bato bafite umuhate wo kumenya ibijyanye n'imari n'imikorere y'amabanki no kubategura kuvamo abayobozi beza muri urwo rwego rw'imari.

Ati 'Inshingano zacu ni ukugira ngo twongere imbaraga mu gukoresha ubushobozi bwanyu mushaka kugera ku bo mwifuza kuba bo, ikintu gishimishije ni uko turi kubaka ikiragano gishya cy'abayobozi bacu birenze kuba ari aba banki ya Kigali gusa.'

Iyo bajya kubahitamo babanyuza mu byiciro bitandukanye bishingira ku bumenyi, ubuhanga n'imyitwarire bafite, nyuma bagakora ikizamini cyo kuvuga ku buryo baba bizewe ko bazatanga umusaruro usabwa basoje amasomo.

Abagira amanota menshi kurusha abandi Banki ya Kigali ibaha akazi mu byiciro bitandukanye, mu gukomeza inshingano iyi banki yihaye yo guteza abayigana imbere nta rwego rusigaye.

Larissa Nyiribambe uri mu batoranyijwe kwiga muri iki cyiciro yagaragaje ko ari amahirwe akomeye kuri we kandi ko yizeye kunguka byinshi bizamufasha.

Ati 'Nizeye ko iyi ari intangiriro y'umwuga wanjye muri banki kuko mu byo batubwiye tuziga harimo ibijyanye n'urwego rw'imari, ngo tube twashobora gufata ibyemezo cyangwa dukore akazi kacu ka buri munsi nk'uko bigomba.'

Mucyo Emmanuel na we yagaragaje ko nubwo yize amasomo anyuranye n'ibijyanye n'imari n'amabanki yiteguye kuvoma ubumenyi bujyanye nabyo muri ayo mahugurwa bagiye guhabwa.

Biteganyijwe ko hatangwa amasomo arimo ibijyanye no guhangana n'ibihombo, umutekano mu by'ikoranabuhanga, gucunga umutungo, iyamamazabikorwa, kwita ku mishinga mito n'iciriritse n'andi masomo azatuma bafasha banki n'igihugu gutera imbere.

Muri Kanama 2022 ni bwo Banki ya Kigali yafunguye ku mugaragaro BK Academy ifasha mu gutanga amahugurwa ku bumenyi bw'ibikorerwa muri banki buhabwa abakozi ba BK n'abandi.

Umuyobozi Ushinzwe Imibereho myiza y’Abakozi muri BK, Joseph Gondwe, yavuze ko iyi gahunda igamije kubakira urubyiruko ubushobozi

Umuyobozi Ushinzwe ibikorwa muri Banki ya Kigali, Rose Ngabire yishimiye kwakira abo banyeshuri bashya

Umuyobozi Ushinzwe ibijyanye no kwishyura muri BK, Ndayambaje Raoul, yagaragaje ibanga ryo gutsinda

Michel Habineza uyobora iDebate Rwanda na we ari mu bitabiriye iki gikorwa

Umulisa Francine ushinzwe abakiliya yagaragaje ko gufata neza abakugana muri banki ari ryo banga

Joseph Gondwe yabasabye gushyira imbaraga mu masomo bagiye guhabwa

Kazeneza Gentil na Mutoneshwa batanze ubuhamya bw’uko BK Academy yabafashije

Gicundiro Mujiji Audrey, ni umwe mu barangije mu cyiciro cya mbere yishimira ubumenyi bahawe

Abagera kuri 26 batoranyijwe muri 2500 ni bo bagize icyiciro cya gatatu

Abanyeshuri bagiye kumara amezi atatu bigishwa

Aba banyeshuri batangiye kwiga amasomo azabafasha

Tariki ya 01 Nzeri 2024 ni umunsi utazibagirana mu mateka y’umuhanzikazi Gikundiro Rehema dore ko ari bwo yahawe impano idasanzwe y’imodoka nshya yo mu bwoko bwa Chrysler 300 C. Iyi modoka yasohotse umwaka ushize wa 2023, igura asaga ibihumbi 50 by’Amadorali y’Amerika, akaba arenga Miliyoni 67 Frw [ 67,689,000 Frw].

Ni impano yahawe n’umugabo we akaba n’Umujyanama we, Ishimwe Claude, bamaranye imyaka 6 kuko bakoze ubukwe mu 2018. Impano y’imodoka Gikundiro yahawe n’umugabo we babana muri Leta Zunze Ubumwe za Amerika hamwe n’umuryango wabo, ije ikurikira indi ihebuje ya Studio yo mu rugo yahawe kuwa 10 Gicurasi 2024 ku isabukuru ye y’amavuko.

Mu kiganiro na InyaRwanda, Ishimwe Claude yavuze ko yageneye umugore we impano ihebuje mu rwego rwo gushima Imana yamumuhaye nk’umufasha we bazabana ubuzima bwabo bwose. Bihura n’Icyanditswe cyo muri Bibiliya mu Imigani 18:22 havuga ngo “Ubonye umugore mwiza aba abonye ikintu cyiza, Akaba agize umugisha ahawe n’Uwiteka”.

Yagize ati “Icyadusunikiye kubikora ntaho gitandukaniye n’ikidusunikira buri munsi gushimira iyamuduhaye. Mu murima w'Umugisha nanjye Data yampaye havuyemo ibiribwa byinshi by'umugisha ariko uwo muzingo w’ibyitwa umugisha byose byabaye we, gusa ndamukunda nshimira Yesu ku manywa na nijoro we wampaye kwakira imbuto yanjye kandi y’umugisha”.

Arakomeza ati “Uyu munsi ni umwe mu yindi myinshi numva nta kindi natekereza usibye kumwitaho no gukora inshingano iyamumpaye yangeneye. Ndabizi neza igihe kimwe ibirenze ibi bizakomeza kuva mu maboko y'iyamumpaye ku bw’ubuntu bwayo. Gusa byose ni ibiva mu biganza by'Imana yanjye kandi yacu, gusa nta mbaraga nta maboko yandi abikora ni Data wa twese wenyine”.

Gikundiro Rehema yahawe impano y’imodoka nshya kandi ihenze cyane

Gikundiro Rehema, yasazwe n’ibyishimo ku bw’iki gikorwa cy’urukundo yakorewe n’umugabo we nk’uko yanabisangije abamukurikira ku mbuga nkoranyambaga. Kugaragaza umunezero kuri we abikora igihe cyose “Umuremyi wacu adutekerejeho, Imana yatubereye nziza”. Iyo abonye ibibaye, ashimira Imana ifite amaboko akomeye yo mugiraneza wibuka bose atarobanuye.

Uyu muhanzikazi wamamaye mu ndirimbo “Sion” bamwe bahimbye ‘Ururembo Siyoni’, yashimiye cyane umugabo we wamunejeje mu buryo bukomeye. Yanditse kuri Instagram ati “Imana iguhe imigisha Papa Marvin ku bwo gushyira ibyishimo ku maso hanjye. Imana ikunezeze, sinzi icyo navuga gusa ndishimye. Urakoze cyane.”

Tariki 3 Werurwe 2018 ni bwo Gikundiro Rehema yarushinze na Claude Ishimwe, bahita bajya kuba muri Leta Zunze Ubumwe za Amerika. Tariki 7 Ukuboza 2018 ni bwo aba bombi bibarutse imfura yabo y'umuhungu bahaye izina rya Marvin Wesley Ishimwe. Kuwa 12 Mutarama 2021 bibarutse ubuheta bise Aviella Chloe Ishimwe.

Gikundiro ni umwe mu mpano zikomeye mu muziki nyarwanda. Ni umwanditsi w'umuhanga cyane mu muziki wo kuramya no guhimbaza Imana, akaba n’umuhanzikazi ufite ijwi ryiza cyane. Amaze kwandika indirimbo nyinshi zirenga 200 aho inyinshi muri zo yazihaye amakorali anyuranye yo mu Rwanda no hanze yarwo.

Umuhanzi yigiraho byinshi, ni Tasha Cobbs umunyamerikakazi uri mu bahanzi b'ibyamamare ku isi mu muziki wo kuramya no guhimbaza Imana. Gikundiro, indirimbo ye bwite azwiho cyane ni 'Sion' bamwe bahimbye 'Ururembo Siyoni'. Izindi ndirimbo ze bwite twavugamo; Turishimye, Turakomeje, Ineza, Urarinzwe Ft Romulus Rushimisha n'izindi.

Zimwe mu ndirimbo yanditse zikamamara cyane harimo; 'Ikidendezi' ya Korali Ukuboko kw'Iburyo ya ADEPR Gatenga; 'Nzirata Umusaraba' ya Shalom Choir ya ADEPR Nyarugenge; 'Ibyiringiro by'ubuzima' na 'Kuro' za Ukuboko kw’Iburyo, Walio moyo Safi ya Shalom choir, indirimbo ‘Dawidi’ ya Holy Nation choir irimo amagambo avuga ngo 'Dusubije Amaso Inyuma'; 'Gideon' ya Evangelique Choir n'izindi nyinshi.

Gikundiro na Ishimwe bamaze imyaka 6 babana nk’umugabo n’umugore

Rehema abara inkuru y’urugendo rwe mu muziki agira ati “Nabitangiye mfite imyaka umunani ni bwo nibuka ko nabaga muri Chorale y'abana bato muri Eglise bakunda kwita ‘Ecodimu’. Njyewe ntekereza ko namenye ko nakorera Imana mu buryo bwo kuririmba mfite imyaka 15 nari ndi muri Chorale bishoboka ko byamfashije kugenda mbimenya kubera ko bo bari bakuru bashobora kuguha n'indirimbo ukayitera bitangira kuza gutyo kugeza n'ubu.”

Avuga ko inzozi ze mu muziki ari ukuba igikoresho cy’Imana. Ati: “Buri munsi nifuza kuba igikoresho cy’Imana ndifuza kuba umuyoboro Imana ikoresha kugira ngo igeze amakuru ku bana bayo ku bantu yaremye. Ndifuza kuba intumwa kandi intumwa itumika. Kandi buri munsi iyo nsenze mbwira Imana ngo ntihabe njyewe hajye hagaragara wowe.

Nifuza kugaragaza Imana mu mibereho yanjye yose mu gihe ndimo kuyikorera na nyuma yaho ndumva nkeneye ko Data wa twese imirimo ye yamamara mu bantu. Nifuza kandi kuba igikoresho Imana igiye gukoresha kugira ngo imenyeshe abantu bayo umwaka w'imbabazi, umwaka w'ineza, umwaka wo gukizwa no kuva mu byaha bakamenya Imana.

Intego yanjye ni ugutumwa ku mitima ibabaye ishenjaguritse, imitima yihebye nkayitangariza inkuru nziza y'uko Yesu ariho kandi ari muzima, uko yari ari kera n'uyu munsi ari ko ari kandi ari nako azahora. Ndumva ari ibyo nubwo mfite inzozi nyinshi”.

Avuga ko icyatumye arushinga na Claude Ishimwe ukomeje kumubera umugisha buri munsi kugera aho abura aho ahera amushimira ni uko “ameze nk'uko umutima wanjye ushaka. Ntaramubona nari narabuze koko urukundo nyarukundo, yaraje aba urukundo rwajye ariko yabanje kumfasha anyerekera mubonamo umurimo munini uri muri we”.

Rehema avuga ko umugabo we amukunda, akamwitaho akamusengera akanamuha inama “zinyubaka zikubaka n'ubwami bw’Imana.” Ati: “Muri njye nabonye ari we naremewe kuzabona no kuzabana nawe, nawe yarandemewe tukabana tukabyara tugaheka ndumva byaba ari ibyo. […] We anzi kuva mu 2008 ariko njyewe muzi kuva 2012 kandi ibi bihe twabanye mubonamo umugabo w'umukozi w’Imana kandi ndamuzi ‘bihagije’”.

INKURU WASOMA: Ikiganiro na Gikundiro Rehema umaze kwandika indirimbo zirenga 200 zirimo 'Ikidendezi' n'izindi zamamaye yandikiye amakorali

Gikundiro Rehema yasazwe n’ibyishimo ku bw’impano ihebuje yahawe n’umugabo we

Ishimwe Claude yatunguye umugore we Gikundiro amuha impano y’agatangaza

Claude & Rehema bahora mu Ijuru Rito nyuma yo kumenya ko buri umwe yaremewe mugenzi we

Ni imodoka ihenze cyane kuko igura arenga Miliyoni 67 Frw

Claude Ishimwe na Gikundiro Rehema buri umwe afite ishimwe ribyibushye ku Mana yabahuje

REBA INDIRIMBO “TURARINZWE” YA GIKUNDIRO REHEMA FT ROMULUS RUSHIMISHA

REBA “NGUWO ARAJE” IMWE MU NDIRIMBO NSHYA ZA GIKUNDIRO REHEMA

Perezida Kagame yakiriye Jin Liqun kuri uyu wa 04 Nzeri 2024, aho bose bari i Beijing mu Bushinwa aho bitabiriye inama iri guhuza abayobozi b'ibihugu bya Afurika n'u Bushinwa (FOCAC).

Itangazo Ibiro by'Umukuru w'Igihugu byanyujije kuri X rivuga ko Perezida Kagame na Jin Liqun baganiriye ku mishinga u Rwanda ruri gufatanyamo na AIIB n'indi iteganyijwe mu minsi iri imbere.

Ibyo biganiro bya Perezida Kagame na Jin Liqun bije bikurikira ibyaherukaga muri Gicurasi 2024, byibanze ku mahirwe yo kurushaho gukorana hagati y'iyi banki n'u Rwanda.

Icyo gihe bombi bari bahuriye muri Kenya aho bari bitabiriye inama yateguwe na Banki Nyafurika y'Iterambere (AfDB) yaberaga mu Mujyi wa Nairobi.

AIIB yashinzwe mu 2015 ku gitekerezo cyazanywe n'u Bushinwa. Intego yayo ni ugutera inkunga ibikorwa remezo hirya no hino ku Isi hagamijwe kwihutisha iterambere muri Aziya no hanze yayo.

Muri Nyakanga 2019 ni bwo u Rwanda rwabaye umunyamuryango wa AIIB. Ubu impande zombi zifatanya mu mishinga yo mu nzego zitandukanye.

Irimo nko guteza imbere imishinga ishingiye ku ikoranabuhanga, ijyanye no kugeza ku baturage serivisi z'imari hagamijwe kuzahura imishinga yagizweho ingaruka n'ibibazo bitandukanye.

Impande zombi kandi zifatanya mu bikorwa bitandukanye byo guteza imbere ikoreshwa ry'ingufu zitangiza n'ibindi.

Nk'ubu mu 2021 Guverinoma y'u Rwanda yasinyanye amasezerano y'inguzanyo ya miliyoni 100 $ na AIIB agamije gushyira mu bikorwa umushinga wo guteza imbere ikoranabuhanga.

Ni umushinga byavugwaga ko wagombaga gushorwamo miliyoni 200$, igice cya mbere cya miliyoni 100$ icyo gihe cyari cyaratanzwe na Banki y'Isi.

Kugeza muri Werurwa 2024, AIIB yari imaze gutanga inguzanyo ku bafatanyabikorwa batandukanye irenga miliyari 50$.

Iyo banki ikomeye mu Isi yatangiranye n'abanyamuryango 57 ariko mu mpera za 2020 yari imaze kugira abanyamuryango 103 bihariye 79% by'abaturage bose batuye Isi na 65% by'umusaruro mbumbe w'Isi.

Perezida Paul Kagame ari mu Bushinwa aho yitabiriye Inama ihuje Abayobozi b'ibihugu bya Afurika n'u Bushinwa (FOCAC)

Ni itangazo Polisi y'u Rwanda yanyujije kuri X ku mugoroba wo kuri uyu wa 04 Nzeri 2024. Rivuga ko ibyo bizamini bizakorerwa ku bibuga bya Busanza na Gahanga byo mu Karere ka Kicukiro, icya Nyarugenge n'icya Musanze.

Itangazo rirakomeza riti 'Abakeneye iyo serivisi bazatangira kwiyandikisha kuva ku wa 06 Nzeri 2024 ku cyiciro cyo ku rwego rwa B (AT) gusa.'

Icyakora rigaragaza ko abifuza gukorera ibindi byiciro ku binyabiziga bya 'automatique' bazabimenyeshwa mu bihe biri imbere.

Muri Nyakanga mu 2023 ni bwo Guverinoma y'u Rwanda yari yatangaje ko iri mu myiteguro ya nyuma yo gutangira gutanga ibizamini byihariye ku bashaka impushya zo gutwara imodoka za 'automatique'.

Nyuma ku wa 25 Mata mu 2024 mu Nama y'Abaminisitiri yayobowe na Perezida Paul Kagame, hemeremezwamo iteka ririmo gahunda yo gutangira gukorera impushya za burundu zo gutwara ibinyabiziga hakoreshejwe imodoka za 'automatique'.

Nyuma muri Nyakanga 2024 hasohotse iteka rishya rya Perezida riha impushya z'imodoka za 'automatique' umwihariko mu Rwanda.

Ni iteka nimero 066/01 ryo ku wa 19 Nyakanga 2024 rihindura iteka rya perezida nimero 85/01 ryo ku wa 02 Nzeri 2002 na ryo rishyiraho amabwiriza rusange agenga imihanda n'uburyo bwo kuyigendamo.

Rigaragaza ko uzajya utsinda ikizamini cyo gushaka uruhushya rwa burundu rwo gutwara ibinyabiziga hakoreshejwe ikinyabiziga cya 'automatique', ku ruhushya rwe hazajya hongerwaho inyuguti 'AT', bivuga “Automatic Transmission”.

Ryemeza kandi ko izo nyuguti za 'AT' zizajya zishyirwa kuri buri cyiciro cy'uruhushya rwo gutwara imodoka rwa burundu, uretse impushya za A1 na B1 zidahinduka kuko zagenewe abafite ubumuga.

Ni ukuvuga ko izo nyuguti zizajya zishyirwa ku mpushya za A, B, C, D, D1, E na F kuko impushya za A1 na B1 zagenewe abafite ubumuga.

Iri teka rya perezida rishya rigaragaza kandi ko umuntu wahawe uruhushya rwo gutwara ibinyabiziga rwa burundu akoresheje ikinyabiziga cya “automatique' mu kizamini, yemerewe gutwara ibinyabiziga bya 'automatique' gusa byo mu rwego afitiye uruhushya.

Icyakora ryongera kuvuga ko uwahawe uruhushya rwo gutwara ibinyabiziga akoresheje ikinyabiziga cya 'manuel' mu kizamini, yemerewe gutwara ibinyabiziga bya 'automatique' n'ibya 'manuel' ariko byo mu rwego afitiye uruhushya.

Mu bizamini by'uruhushya rwa burundu rwo gutwara imodoka za 'automatique' hatazajya hakorwa ikizamini cya 'démarrage' gisanzwe gikorwa ku modoka za 'manuel' kuko imodoka ya 'automatique' iyo igeze ahazamuka ihita yishyiriramo 'vitesse'.

Gukorera impushya zo gutwara imodoka za ‘automatique’ bizatangira ku wa 09 Nzeri 2024