Category: Uncategorized

Ikipe y’igihugu Amavubi atangiye urugendo rwo gushaka itike y’igikombe cy’Afurika cya 2025 anganyiriza na Libya iwayo 1-1 mu mukino wabereye kuri Stade du 11 Juin.

Amavubi yatangiye ubona ashaka igitego ndetse inarema uburyo butandukanye ariko Jojea Kwizera na Nshuti Innocent ntibayabyaza umusaruro.

Amavubi yaje gutsindwa igitego cya mbere ku munota wa 16 cyatsinzwe na Al Dawi ku mupira yaturukanye mu kibuga hagati.

Amavubi yakomeje amahirwe aho nka Djihad yahushije amahirwe ku mupira yari ahawe na Niyomugabo Claude. Ndetse yaje no gukora impinduka ku munota wa 40 Jojea Kwizera aha umwanya Samuel Gueulette. Igice cya mbere cyarangiye ari 1-0.

Amavubi yagarutse mu gice cya kabiri ashaka igitego cyo kwishyura ndetse ku munota wa 47 ahita akibona ku mupira wari uhinduwe na Bizimana Djihad.

Ku munota wa 65, umutoza w’ikipe y’igihugu yongeye gukora impinduka ku munota wa 65 Mugisha Bonheur Casemiro yasimbuye Rubanguka Steve.

Ku munota wa 67 Nshuti Innocent yahushije ubundi buryo ku mupira wari uhinduwe na Niyomugabo Claude.

Ku munota wa 80 Amavubi yakoze impinduka za nyuma Nshuti Innocent na Mugisha Gilbert bavuyemo hinjiramo Ruboneka Bosco na Mugisha Didier.

Iminota ya nyuma Libya yashyizemo imbaraga ishaka igitego cy’intsinzi ariko biranga umukino urangira ari 1-1.

Amavubi yanganyije na Libya

Nubwo isoko ry’igura n’igurishwa ry’abakinnyi ryafunzwe Kiyovu Sports itabashije kwandikisha abakinnyi ba yo bashya, iracyafite icyizere ko bizakunda FIFA igaca inkoni izamba.

Isoko ry’abakinnyi mu Rwanda ryafunzwe tariki ya 30 Kanama 2024, rikaba ryasize Kiyovu Sports itarabasha kwandikisha abakinnyi ba yo mpuzamahanga (abaturutse muri shampiyona zo hanze y’u Rwanda).

FIFA yari yamenyesheje Kiyovu Sports ko mu gihe itishyuye abakinnyi bayireze muri FIFA bakayitsinda ko itazemererwa kwandikisha abakinnyi bashya.

Yagerageje kumvikana n’abo ifitiye imyenda bamwe barabishyura abandi bababwira uburyo bazishyurwamo ari na bwo FIFA yabakomoreraga.

Gusa nk’uko umwe mu bantu bo muri Kiyovu Sports yabibwiye ISIMBI ni uko hari indi baruwa yaje ibamenyesha ko nta mukinnyi mpuzamahanga bemerewe kwandikisha, iyi ngo ni nayo batinze kubona bayibona baramaze kujya ku Isoko.

Ibi bijyanye n’uko iyo ikipe ifite ibirego birenze 4 mu mwaka umwe muri FIFA yakwishyura itakwishyura iba igomba guhagarikwa umwaka itandikisha abakinnyi bashya, Kiyovu Sports rero yo yari ifitemo ibirego 8.

Iyi kipe kandi ivuga ko hari ibirego itamenye kuko hari ibyaje email y’ikipe ikigenzurwa na Komite yababanjirije, komite nshya ngo ibyo yabonye ni 3 ibindi byaje bisa n’ibibatunguye.

Urucaca rukaba rwarandikiye FIFA rusobanura uko ibibazo byose byagenze, bizeye ko iyi Mpuzamashyurahamwe y’umupira w’amaguru ku Isi izaca inkoni izamba.

Kiyovu Sports ntabwo yandikishije abakinnyi ba yo bashya

Rimwe na rimwe hari ibitangazamakuru bitangaza inkuru z’ibinyoma ziganjemo izivuga ibyamamare byapfuye, ibi bigakorwa mu rwego rwo gucuruza no gutwika nk’uko abenshi babivuga mu Rwanda. Icyakoze ibi usanga ababigenderamo ari ibyo byamamare byabitswe bikiri bizima hamwe n’abafana babo aho usanga bizeye aya makuru bikarangira anyomojwe.

Inaha ni kenshi hagiye havugwa inkuru z’ibinyoma ku bahanzi bavugwagaho gupfa yewe bamwe bakaniyama n’itangazamakuru ryabitangaje. Ibi ntabwo biba muri Showbiz yo mu Rwanda gusa kuko n’i mahanga bikunze kugaragarayo.

Dore ibyamamare 15 byagiye bivugwaho gupfa nyamara bakiri bazima:

1. Drake

Abafana b'umuraperi w' umunya-Canada babaye nk'abahungabana ndetse bahinda umushyitsi abandi ubwoba burabataha ubwo ku itariki 14 Ugushyingo mu 2020 babonaga Hashtag ivuga ngo #RIPDrake ikwirakwira kuri Twitter ariko nk’uko inkuru yari imaze kuba kimomo, uyu muraperi yabaye inzirakarengane y'iyi nkuru mpimbano.

Abafana ndetse n'abandi bantu bakurikiranira hafi amakuru y'imyidagaduro ubwo bakubitaga amaso ku mutwe w'inkuru/Title w'ikinyamakuru cya L.A Times wavugaga mu magambo y'ururimi rw'icyongereza, tugenekereje mu Kinyarwanda akaba yaravugaga ngo: 'Umuraperi w'umunya Canada ndetse akanaba n'umwanditsi w'indirimbo Drake, yapfuye afite imyaka 34'.

Iyi nkuru yabaye incamugongo ku mbaga y'abafana, abakunzi be ndetse n'abakunda showbiz muri rusange ariko n’ubundi kubera ko byaje kugaragara ko yari inkuru mpimbano ntabwo byamaze igihe kirekire hasohotse inkuru ziyivuguruza ko rwose uyu muraperi ari muzima.

 2. Britney Spears na Justin Timberlake

Mu buryo bwo gutebya no gutera urwenya, aba DJ babiri bakomeye bo muri Dallas, batangaje ko imodoka yakoze impanuka yahitanye ubuzima bw'abasitari baririmba mu njyana ya Pop ndetse ko bari bamaze igihe barimo gukundana/guteretana.

Mu mwaka wa 2001, Umuririmbyi Timberlake yabwiye ABC News ati:'Ikintu cya mbere nahise nkora, ni uguhamagara Britney'.'Kuva mu ntangiriro, ubwo abantu bamenyaga iby'urukundo rwacu, hahoraga hari ibintu byavugwaga ndetse rwose ugasanga nta kuri kurimo ariko ibi byo byarenze ukwemera kuko byatumye ikibazo kigera ku rundi rwego'.

 Aya ni amagambo yavuzwe n'uyu muririmbyi aho yabwiraga itangazamakuru ku cyo avuga ku makuru yavuzwe ko we na Britney baguye mu mpanuka ariko n’ubundi bikaza kugaragara ko byari igihuha kugira ngo ababiri inyuma bacuruze ndetse babone abasomyi benshi.

3. Avril Lavigne

Ibihuha byatangiye gukwirakwira hirya no hino ku Isi muri Mata ya 2003 ko umuririmbyi ufite akazina k'akabyiniriro ka 'Complicated singer' bisobanuye umuririmbyi ugoye, ko yiyishe/yiyahuye nyuma y'urupfu rwa sekuru. Ikindi ni uko mu mwaka wa 2017, Twitter yabaye nk’ikongeza umuriro aho wasangaga abantu batabarika bakomeza kugaruka kuri iyi nkuru ko rwose uyu muhanzi yapfuye ariko n’ubundi bikaza kugaragara ko ari igihuha.

4.  Taylor Swift

Ikigaragara cyo ni uko umwaka wa 2009 utabaye umwaka mwiza kuri Taylor Swift. Yavuzweho ko yaguye mu mpanuka ikomeye nyuma baza gusanga ayo makuru yari igihuha. Hashize amezi make bivugwa ko yapfuye azize kunywa ibinini bituma umuntu asinzira akabona ibitotsi. Aya makuru yakwirakwijwe hiryo no hino ku mbuga nkoranyambaga na cyane kuri Facebook na Youtube. 

Muri Nyakanga umwaka wa 2016, yongeye gutangazwa ko yapfuye, bitewe n'umuhanzi w'umunya Australia wabitangaje ndetse bigasamirwa hejuru n'itangazamakuru, akaba yarabyanditse mu magambo y'icyongereza, aho tuyashyize mu Kinyarwanda yari ashatse kuvuga:' Tuzahora tukwibuka Taylor Swift 1989-2016'. Aya makuru ntabwo haciyeho igihe kinini atanyomojwe, nyuma baza gusanga yari igihuha, bituma habaho kwitana ba mwana ku batangaje aya makuru.

 5. Jackie Chan

Kugeza ubu Jackie Chan araho kandi ameze neza. Hari amakuru yagiye hanze ko umukinnyi ukina filime z’imikino njyarugamba (Action) yapfuye muri Werurwe umwaka wa 2011 nk’uko byasakajwe kuri Facebook. Amakuru yagiye hanze icyo gihe yavugaga ko uyu mukinnyi wa filime yapfuye azize indwara y'umutima yari imaze igihe imuzahaje.

Ibi bikaba byarakwirakwijwe ku mbuga nkoranyambaga zitabarika ndetse no mu bitangazamakuru bikorera kuri murandasi ariko nu’bundi byaje kurangira bigaragaye ko aya makuru yari igihuha.

 6. Barack Obama

Ku itariki 4 Nyakanga umwaka wa 2011, urubuga rwa Twitter rwa Fox News rwaribwe ikizwi nko guhakingwa/Hacked, rwibwa n'itsinda ryitwa The Script Kiddies barangije bapostingaho ko Perezida Obama yiciwe mu muhango/Event wa Lowa, bidatinze ukuri kwaje kujya hanze basanga aya makuru yari igihuha.

7. Justin Bieber

Justin Bieber byatangajwe ko yapfuye inshuro  nyinshi zirenze izo ushobora kubara. Hari amakuru y'igihuha yagiye hanze ko uyu muhanzi yiyahuye mu mwaka wa 2009 ndetse aya makuru yongera kugaragara mu mwaka wa 2010. Hari andi makuru yatangajwe ko iki cyamamare cyarasiwe mu kabyiniro (Night Club) abandi bavuga ko yishwe no kunywa inzoga zirengeje  urugero (Overdose). 

Mu kanya nk’ako guhumbya, kuri Twitter hahise hakwirakwira ubutumwa bumwifuriza iruhuko ridashira muri Hashtag igita iti:'#RIPJustinBieber', iyi HashTag ikaba yarasakajwe kuri Twitter muri Werurwe umwaka wa 2012 ariko n’ubundi nyuma basanga cyari igihuha.

8. Celine Dion

Amakuru y'ibihuha atajya arangira ku rupfu rw'umuhanzi Celine Dion, ndetse ibi bigakwirakwizwa ku mbuga nkoranyambaga. Iyo aya makuru y'urupfu rwe yajyaga hanze kandi ari igihuha, icyo we yahitaga akora,yihutiraga guhita ahamagara nyina umubyara Therese Dion kuri ubu witabye Imana muri Mutarama umwaka wa 2020, kugira ngo amuhumurize ko umukobwa we atapfuye ko ahubwo ari muzima nk’uko na we ubwe abigarukaho mu magambo yatangarije Digital Spy:'Ikintu kintera impungenge'. 

Yongeyeho  aya magambo ati:'Bijya binsaza ndetse bikantesha umutwe ukuntu, Mama wanjye afite imyaka 86 y'amavuko ndetse iyo ntari kuri telephone ngo mubwire ko meze neza, amasegonda ane nyuma y’uko inkuru nk'izo zisohotse mu kinyamakuru…Ntacyo biba bimbwiye ibyo bavuga byose gusa ingaruka bigira ku muryango wawe ni cyo kibazo'.

9.  Dwayne Johnson

Umukinnyi wa Filime wamamaye ku izina rya The Rock ntabwo yapfuye ubwo barimo bafata amashusho y'agace ka filime  yitwa'Fast & Furious' nk’uko byatangajwe muri Mata umwaka wa 2014 kuri posts zakwirakwijwe ku bwinshi kuri Facebook.

Uyu mukinnyi ukina filime, akibikubita amaso, yahise ajya kuri Facebook ye ahita yandika ubutumwa bunyomoza ibyari byamuvuzweho, ubwo butumwa bukaba bwari mu rurimi rw'icyongereza, akaba yaranditse ngo:'Ibibuha by'urupfu rwanjye ni ibinyoma ndacyakora akazi amasaha 24 ku munsi, Iminsi 7 mu cyumweru, iminsi 365 mu mwaka hanabariwemo n'umwaka dusimbutse'! 

Ibyo uyu mukinnyi yanditse kuri Facebook byakomereje no kuri Twitter abyandika mu rurimi rw'icyongereza, mu Kinyarwanda akaba yaragize ati:'Ndashaka guhura n'umuntu watangije ibihuha by'urupfu rwanjye'. Abantu bamwe batekereje ko iyo aza guhura n'uwo muntu yari kumukubita cyangwa se bakarwana!

10. Arnold Schwarzenegger

Arnold Schwarzenegger byigeze kuvugwa ko yishwe n’indwara y’umutima.

Ku itariki 28 Kanama mu  2015 kuri MSMBC.co(Ntubyitiranye na MSNBC.com) hatangajwe amakuru ko uwahoze ari Guverineri wa California akaba n’umukinnyi wa filime ukomeye, yapfuye azize indwara y'umutima, gusa nyuma byatangajwe ko aya makuru yari igihuha.

11. Hillary Clinton

Ibyakurikiye uburyo Hillary Clinton yagaragaye ku itariki 11 Nzeri mu muhango wo kwibuka abantu baguye mu gitero cy'ubwiyahuzi ku miturirwa ya World Trade Center, aha bakaba baribukaga muri Nzeri umwaka wa 2016 agaragara ari mu modoka yo mu bwoko bw' I Van atameze neza, igitangaje nuko umunyamakuru (News Anchor/Presenter) wa ABC News wakoraga muri Weekend witwa Joe Torres mu makuru ya nimugoroba yavuze aya magambo mu rurimi rw'icyongereza ubwo yari atangiye amakuru, tuyashyize mu Kinyarwanda akaba yaravuze ngo:'Amakuru yacu, tuyatangiriye ku makuru mashya/Breaking News  yerekeye urupfu rwa Hillary Clinton'.

Uyu munyamakuru yagombaga kuvuga ngo (health) bisobanuye ubuzima arangije aribeshya avuga (death) bisobanuye urupfu. Nubwo bwose imbaga y'abantu batabarika bihutiye kubisakaza no kubikwirakwiza ku mbuga nkoranyambaga nyuma byaje kunyomozwa,bahita batangaza indi nkuru inyomoza/ivuguruza iya mbere ko uyu mugore ari muzima.

12. Miley Cyrus

Umuhanzikazi akaba n’umukinnyi wa filime, Miley Cyrus, umukobwa w’icyamamare Billy Ray Cyrus, yabaye nk'uwigarurira imbuga nkoranyambaga zose aho wasangaga aho ariho hose ari we ugarukwaho , ndetse ibi byabaye inshuro zirenze imwe. Mu mwaka wa 2008 amakuru yagiye hanze ko yishwe n'imodoka yari irimo umushoferi wamugonze agahita ahunga.  

Mu mwaka wa 2009 uwitwa Peaches Geldolf yanditse ku rukuta rwa Twitter mu magambo y'icyongereza ariko tuyashyize mu Kinyarwanda yaranditse ati:'Inshuti yo muri uru ruganda rw'imyidagaduro yamwandikiye ko Cyrus yapfuye'.

Ijambo ry' urupfu rwe ryongeye kuzamuka muri Nzeri mu mwaka wa 2016, ubwo igitangazamakuru Now8News cyatangazaga ko Miley Cyrus bamusanze mu bwogero bwe (Douche) yapfuye, nyuma yo kunywa ibinini yandikiwe na muganga akarenza urugero rw'ibyo yagombaga gufata. Gusa bidateye kabiri hasohotse amakuru avuguruza iyari yatangajwe  nubwo yari yamaze gukwirakwira ahantu hose ko yapfuye ariko birangira ibaye igihuha.

13.  Beyonce

Imitako(Jewlry) ishobora kukwica cywangwa se nibura umuntu yavuga ko iyi ari imvugo y'igihuha yatangiye gukwirakwizwa hanze nyuma y’uko  Beyonce ubwo yari ku rubyiniro (stage) mu buryo butunguranye amaherena ye yacomotse ku gutwi maze uko aririmba akabari na ko agenda agerageza kuyasubizamo ariko noneho icyamuteye ubwoba ni ukuntu hatonyagangamo amaraso akagerageza kuyahanagura no kubihisha ariko yirengagiza ko amaso yose ari we bayahanze. Bigeza aho amaraso agera no mu maso. Ibi bikaba byarabaye ubwo yari mu gitaramo (concert) I Brooklyn mu Ukwakira umwaka wa 2016.

Mu kanya nk’ako guhumbya, amakuru yahise acicikana ku mbuga nkoranyambaga nka Facebook ko Beyonce yapfuye kubera ko atashakaga kwita no guha agaciro kujya kwivuza kwa muganga. Hagati aho itsinda ryitwa 'The BeyHive' aba ni abafana bakomeye ba Beyonce, ntabwo bishimiye iby'aya makuru y'amahimbano/y'igihuha.

14. Sean Kingston

Ikinyamakuru cy'abongereza 'BBC News'  cyahungabanyije abakunzi ba muzika aho bari hirya no hino ku Isi muri Kamena umwaka wa 2018 ubwo cyatangazaga ko umuririmbyi w' umunya Jamaica kandi ufite ubwenegihugu bw’Amerika, Sean Kingston ko yapfiriye iwe mu rugo. Mu byumweru byakurikiye igihe yagongeshaga Jet Ski (Igikoresho cya moteri bagenderaho mu mazi menshi kiba cyenda kumera nka moto) ye ku kiraro cya Miami (Miami Bridge). Aya makuru baje gusanga yari igihuha

15. Jet Li

Icyamamare muri filime z’imirwano, Jet Li, nawe ari mu bavuzweho gupfa inshuro zirenze ebyiri. Byatangiye mu 2015 ubwo Daily Mail yatangazaga ko Jet Li yitabye Imana azize uburwayi. Ibi byaranyomojwe gusa mu 2020 nabwo ubwo icyorezo cya Covid-19 cyari kibasiye Isi, hanavuzwe urupfu rwa Jet Li. Byatumye mu 2022 ubwo yasohoraga igitabo kivuga ku mateka y’ubuzima bwe abigarukaho aho yavuze ko inkuru zivuga ku rupfu rwe zamugizeho ingaruka.

Nyuma y’uko Kayitaba Emmanuel wamamaye nka Nyagahene muri Sinema Nyarwanda avuze ko yakennye ndetse nta n’urwara rwo kwishima afite, Killaman yasabye abantu kumuhuza na we akamuhindurira ubuzima.

Hagiye hanze amashusho umukinnyi wakunze na benshi muri Sinema Nyarwanda by’umwihariko muri filime ‘Zirara Zishya’ na ‘Haranira Kubaho’, Nyagahene arimo atabaza asaba ubufasha.

Nyagahene aherutse kumvikana avuga ko amerewe nabi nta n’urwara rwo kwishima agira ahora mu ipantalo imwe n’umupira ko umugiraneza yamufasha.

Nyuma yo kubona aya mashusho, Niyonshuti Yannick uzwi nka Killaman na we umaze kwandika izina muri Sinema, yasabye ko bamuhuza na we akamuhindurira ubuzima.

Ati “mumunshakire amateka ahinduke, ntibyagakwiye nk’umuntu twakuze dufana.”

Killaman kandi yagaragaje ko yifuza kugarura muri Sinema abakinnyi bakunzwe kera nka Mukarujanga, Nzovu, Nyirankende n’abandi.

Killaman yiyemeje guhindurira ubuzima Nyagahene

Ikibazo cy'abanyeshuri bagize amanota make mu masomo ya siyansi bikarangira ari yo bahawe cyavugishije benshi ku mbuga nkoranyambaga ndetse birangira Minisiteri y'Uburezi ishyizeho itsinda ry'abantu ku karere rigomba gufasha abanyeshuri bahawe amasomo badashoboye bagahabwa ibindi bigo.

Umunyamabanga wa Leta muri Minisiteri y'Uburezi, Claudette Irere, ubwo yari mu kiganiro Zinduka kuri uyu wa 4 Nzeri 2024, yavuze ko hari uduce tumwe turimo amashuri make kandi afite amasomo (combinations) y'amasiyansi gusa ku buryo umunyeshuri waho wemerewe gukomeza mu kindi cyiciro, kandi agomba guhabwa ishuri rimwegereye ari ho yoherezwa.

Ati 'Ikibazo gihari ni uko rimwe na rimwe umuntu abura n'aho ashyira aba bana. Nk'urugero i Musanze hari amashuri atatu, irya mbere ryitwa GS Kabaya, Irindi ryitwa GS Muhoza I na GS Muhoza II. Aya ni amashuri yigisha gusa siyansi, kuko impuzo (Combination) zonyine afite ni siyansi. Bivuze ngo umwana utuye muri ako gace muri Musanze, muri Muhoza, nta handi hantu afite ho kujya.'

'Nutamushyira aho uramwimura umuvane muri uwo Murenge umujyane mu wundi rimwe na rimwe n'urwo rugendo rumubane rurerure bimunanire kujyayo, bimuviremo guta ishuri.'

Minisitiri Irere yavuze ko hari aho bagorwa no kuba nta shuri ry'imyuga n'ubumenyingiro rihari, nta n'andi masomo atari siyansi ahaboneka ku buryo nta n'ikindi gisubizo cyaboneka hafi gituma umunyeshuri yoroherwa no kujya kwiga, bityo nyuma yo gusohora amanota, abayobozi b'amashuri y'uburezi bw'ibanze bw'imyaka 12 bahita bahura bagashaka uko buri wese yahabwa ibimworohereza.

Minisitiri Irere yahamije ko amashuri yigisha amasomo ya siyansi mu Rwanda ari yo menshi cyane kandi ahenshi usanga ari mu bice bimwe ku buryo bikeneye impinduka.

Ati 'Ubu tugomba nanone kongera gusubira inyuma tukongera tukareba uburyo aya masomo akwirakwijwe hirya no hino mu gihugu. Niba iri shuri ririho siyansi ni ibiki bindi biri aho hafi ku buryo abanyeshuri bandi biga bataha kandi ni na bo benshi kubera ko ntabwo dufite imyanya ihagije y'abana biga baba ku mashuri. Ni ibiki bindi dushobora kubajyanamo bitari siyansi?'

Politike y'Uburezi yo mu bihe byahise yashyize imbaraga muri siyansi bituma amashuri ayigisha haba mu mashuri yisumbuye y'icyitegererezo n'ay'uburezi bw'ibanze bw'imyaka 12 (12YBE) ari zo yiganje cyane mu gihugu.

Minisitiri Irere yavuze ko nta kosa ryabayeho ariko bikwiriye gukosorwa ku buryo muri buri gace umunyeshuri aba ashobora kubona ibyo yiga bitandukanye.

Muri rusange impuzo (combinations) mu masomo ya siyansi zubakiye ku mibare n'ubugenge hakiyongeraho andi masomo abiri.

Abanyeshuri bose baba batsinze mu mashuri yisumbuye bahatanira kwinjira mu myanya ibihumbi 64 y'ibigo biga bacumbikiwe, abasigaye bakoherezwa mu y'uburezi bw'ibanze bw'imyaka 12, na ho mu mashuri abanza ho baba bahataniye imyanya ibihumbi 17, abasigaye bakoherezwa mu mashuri y'uburezi bw'ibanze bw'imyaka icyenda.

Umunyamabanga wa Leta muri Mineduc, Claudette Irere yavuze ku banyeshuri bahawe kwiga amasomo ya siyansi kansi barayatsinzwe

Itegekaharinde yabwiye BTN ko kuva mu 2018 adafite aho ahinga ngo akure amaramuko kandi ari umubyeyi w'abana babiri akaba agorwa no kubitaho nyuma yo kwamburwa isambu ye na sosiyete y'ubucukuzi bw'amabuye y'agaciro ya Wolfram Mining.

Avuga ko yasiragiye mu buyobozi bw'umurenge atuyemo ariko bikaba nta cyo byakemuye.

Ati 'Wolfram Mining yabonye amabuye mu murima wanjye imbwira ko ntakomeza kuhahinga bahakorera na nanjye mbabwira ko ntawuviramo aho banyohereza kujya kubibaza mu buyobozi. Nagiye ku kagari banyohereza ku murenge, ngezeyo mbibwira gitifu mu gihe agitangira kubikirikirana baba baramwimuye'.

'Haje undi na we njya kumusobanurira ikibazo ambwira kujya kubaza kuri Wolfram Mining na bo bamwira ko aho hantu hagenewe gucukurwa amabuye nta kintu bamfasha. Bambwiye ko ahubwo bazajya bampa 1/10 by'ibyahavuye kandi bakantiza n'umurima mba mpinga mu gihe bakihakorera. Nyuma nagiye kubwira gitifu ibyo bambwiye anyizeza kumfasha kwemeza ibyo iyo sosiyete yari yansezeranyije mu magambo ariko nsubiyeyo yifashe nk'aho icyo kibazo atakizi'.

Ubuyobozi bw'Akarere ka Kayonza buvuga ko iki kibazo bwakimenye ndetse bunagiha umurongo ariko amakuru y'uko ibyo muturage yemerewe bitakurikijwe yo atigeze ayabumenyesha.

Buti 'Uyu muturage koko yagejeje ikibazo cye ku Murenge wa Rwinkwavu mu 2018. Umurenge umufasha gusubizwa ubutaka bwe. Nyuma yaho Wolfram Mining yongeye gucukuru muri ubu butaka binyuranyije n'amategeko batanamuhaye ingurane, ntiyongeye kumenyesha ikibazo inzego bireba'.

Ubuyobozi bw'Akarere ka Kayonza bwongeyeho ko bwavuganye na sosiyete yitwa Bugambira Mines yasimbuye iya Wolfram Mining bameranya ko icyo kibazo kigiye gucyemurwa vuba hakurikijwe ibiteganywa n'amategeko.

Mu butumwa Minisiteri y'Ubutegetsi bw'Igihugu yanyujije ku rubuga rwa X yatangaje ko nayo iri gukurikirana iki kibazo kugira ngo gikemuke kandi mu gihe gito.

Itegekaharinde Solina avuga ko kuva mu 2018 adafite aho ahinga kubera ko yambuwe isambu