Category: Uncategorized

Nyuma y’uko Moteri nshya Kigali Pelé Stadium ihagejejwe, n’imirimo yo kuyubakira yahise itangira kugira ngo itangire gucanira iki kibuga vuba.

Ni nyuma y’uko itari isanzwemo itari igifite ubushobozi bwo kwatsa amatara yose ya Kigali Pelé Stadium ku buryo haberamo umukino.

Ni moteri yagejejwe muri Kigali Pelé Stadium tariki ya 2 Nzeri 2024, ifite imbaraga zo kuba yacana amatara yose ya stade kandi igihe icyo ari cyo cyose kuko ifite ubushobozi bwa Kva 1000, mu gihe iyari isanzwe yari Kva 400.

Ubu imirimo yo kuyubakira irarimbanyije ku buryo yatangira gukoreshwa mu gihe cya vuba.

Abazi kuri Kigali Pelé Stadium, iyi moteri irimo kubakirwa ku muryango wo hepfo urebana na tapis rouge cyangwa aho bigishiriza imodoka, bakaba bayishyize iburyo bw’umuryango ni mu gihe ihasanzwe iri ibumoso.

Ikibazo cy’iyi moteri cyari kimaze igihe kinini kuko uretse kudatanga urumuri ruhagije hari n’igihe yazimaga umukino uri kuba.

Impaka zijyanye na moteri yo kuri Kigali Pelé Stadium zagarutsweho ubwo Umujyi wa Kigali wamenyeshaga Ishyirahamwe ry’Umupira w’Amaguru mu Rwanda, Ferwafa, ko imikino ya nijoro idashobora kuhakinirwa kubera ikibazo cya moteri kitarakemuka.

Ibi ni ibyabaye mu gihe Rayon Sports yagombaga kwakirira Amagaju FC kuri iyo stade mu mukino w’Umunsi wa Kabiri wa Shampiyona ku wa Gatanu, tariki 23 Kanama 2024, saa kumi n’Ebyiri z’umugoroba.

Nyuma y’ibi byose, Perezida Kagame yanyujije ku rubuga rwa X ku mugoroba asubiza Umujyi wa Kigali wari wanditse uvuga ko icyo kibazo kiri gushakirwa umuti urambye, ati 'Ibi ni ibintu bitagakwiye kuba byarabayeho na mbere hose'.

Umujyi wa Kigali wahise utumiza moteri ifite ubushobozi busabwa yari kuzagera mu Rwanda mu mezi atatu ari imbere, gusa mu buryo bwihuse yahise iboneka mu minsi 10 gusa.

Ubwo moteri nshya yahageraga

Imirimo yo kuyubakira irarimbanyije

Moteri ishaje

Minisitiri wa Siporo, Nyirishema Richard, yavuze ko ibyo kuzana abanyamahanga ngo bakinire ikipe y’igihugu bizakorwa ariko ikaba ari gahunda y’igihe gito.

Ufashe urugero usanga nko muri Basketball bahabwa ubwenegihugu ngo bakinire ikipe y’igihugu, mu mupira w’amaguru ari n’aho benshi babyifuza ntabwo birakorwa neza kuko kuva muri 2014 u Rwanda rwahanwa kubera gukinisha Daddy Birori wari ufite imyirondoro itabdukanye babicitseho.

Muri iki gihe bisa n’ibyongeye aho nka Gerard Bi Goua Gohou yabuhawe ariko aheruka mu mikino ya gicuti (gusa amakuru avuga ko byarangiye byanze), Ani Elijah na we byarageragejwe biranga.

Mu kiganiro Kick Off cyo kuri uyu wa Gatandatu gitambuka kuri Televiziyo Rwanda, Minisitiri wa Siporo, Nyirishema Richard, yabajijwe niba abantu bazakomeza kubona abakinnyi bahabwa ubwenegihugu ngo bakinire u Rwanda nta nkomoko bahafite, yavuze ko mu gihe u Rwanda rurimo gutegura abakinnyi bakiri bato bizakorwa ariko atari gahunda iryambye.

Ati 'Ntabwo nshaka ko tuyifata nka gahunda y’igihe kirekire ahubwo ni iy’igihe gito mu gutegereza ko abato bacu bazamuka. Ni yo mpamvu no muri gahunda zacu itarimo nka Minisitiri ya Siporo kuko nta gahunda yo guha abantu ubwenegihugu ihari.'

'Icyo dushaka ni uko abana bacu bazamuka bagahabwa ubushobozi n’ibikenewe byose ahubwo natwe andi makipe akabiyambaza. Icyo gushyiramo imbaraga ni ukumenya ko aho buri mu Nyarwanda wese ufite impano yaba ari imbere mu gihugu cyangwa hanze yaba yaragezweho.'

Nko mu mupira w’amaguru ubu hashyizwe imbaraga cyane mu gushaka abakinnyi bafite inkomoko mu Rwanda bakuriye hanze ya rwo akaba ari bo bifashishwa aho bimaze gutanga umusaruro hari nka Hakim Sahabo, Rafael York, Jojea Kwizera, Samuel Gueulette n’abandi.

Minisitiri wa Siporo yavuze ko ari iby’igihe gito

Gerard Bi Goua Gohou ni umwe mu baheruka guhabwa ubwenegihugu

Umukuru w’Igihugu yagaragaje ko ubuhinzi bufite uruhare rukomeye mu bukungu ndetse n’imibereho myiza y’abaturage, ashimangira ko kongera umusaruro w’ubuhinzi bifite uruhare mu guhangana n’izamuka rikabije ry’ibiciro.

Ati:'Kongera umusaruro ukomoka ku buhinzi binasobanuye igabanuka ry'ibiciro by'ibiribwa ku baturage, nabyo bikagira ingaruka z'ako kanya mu [kugabanya] ubukene ndetse n'izamuka ry'ibiciro ku masoko.'

Perezida Kagame avuze ko umusaruro ukomoka ku buhinzi ari umusingi w'iterambere ry'ibihugu bya Afurika, dore ko byinshi usanga bishingira ubukungu bwabyo ku musaruro w'ubuhinzi utanga akazi ku barenga 60% by'abakora mu bihugu byinshi bya Afurika.

Yagize ati 'Umusaruro ukomoka ku buhinzi ni umusingi w'ubukungu bwacu ndetse n'ubuzima. Muri Afurika, abantu benshi bakora mu rwego rw'ubuhinzi ndetse n'ubucuruzi bushingiye ku bikomoka ku buhinzi.'

Yagaragaje ko hari byinshi bimaze kugerwaho mu guteza imbere urwego rw'ubuhinzi ku Mugabane wa Afurika, aho yagize ati: 'Hari byinshi byagezweho mu myaka ishize mu rwego rwo gutuma uruhererekane rw'ibiribwa rurushaho kubaka ubudahangarwa ndetse bugatanga umusaruro kurushaho.'

Umukuru w'igihugu yashimiye AGRA igira uruhare mu gutegura iyi Nama, anashimira abayitabiriye barimo ba rwiyemezamirimo bakora mu rwego rw'ubuhinzi, abashakashatsi, abahanga n'abandi bose bayigizemo uruhare, barimo n'abaterankunga batumye ikorwa neza.

Iyi Nama yaganiriwemo ibikwiriye gukorwa kugira ngo ubuhinzi bwa Afurika butere imbere, birimo kongera umusaruro w'abahinzi ndetse no gukoresha ikoranabuhanga rifasha abahinzi guhangana n'ibibazo bahura nabyo mu mwuga wabo, birimo ihindagurika ry'ikirere.

Perezida Paul Kagame yagaragaje ko kuzamura umusaruro w’ibikomoka ku buhinzi ari igisubizo ku kibazo cy’izamuka ry’ibiciro ku isoko 

Knowless yabigarutseho mu kiganiro cyihariye yagiranye na InyaRwanda, kuri uyu wa Gatanu tariki 6 Nzeri 2024, nyuma yo kwitabira umuhango wo gutanga impamyabushobozi ku basaga 400 basoje amasomo yabo mu ishuri Action College, mu muhango wabereye kuri Sar Motor i Remera mu Mujyi wa Kigali.

Atangaje ibi mu gihe Ariel Wayz amaze igihe ari gukora kuri Album ye nshya, ndetse yamaze kugaragaza ko igeze kure igisigaye ari ukuyishyira hanze. Uyu mwari, kandi yagiye yumvikanisha ko iyi ndirimbo yakoranye na Knowless idasanzwe mu rugendo rwe rw’umuziki.

Knowless yabwiye InyaRwanda ko yari amaze igihe kinini yifuza gukorana na Ariel Wayz, ariko ko mu gihe yiteguraga kubimubwira, uyu mukobwa yamutunguye amubwira ko yifuza gukorana nawe.

Yavuze ati “Narabishakaga cyane ko dukorana ariko yarantanze! Yanyegereye mbere y’uko mwegera, hanyuma yorosora uwabyukaga. Turakora, kandi dukora neza kandi.”

Uyu muhanzikazi wamamaye mu ndirimbo zirimo nka 'Nyigisha', yavuze ko amajwi y'iyi ndirimbo yamaze gukorwa, ndetse n'amashusho yayo yarakozwe.

Akavuga ko igomba kujya hanze mu gihe kiri imbere, ndetse bari gutegura uburyo bazahuza imbaraga mu kuyimenyekanisha.

Ni ubwa mbere Ariel Wayz akoranye indirimbo na Knowless nyuma y'imyaka itatu ishize atangiye urugendo rw'umuziki. Mu bihe bitandukanye, Knowless ubarizwa muri Kina Music yakunze kugaragaza ko yishimira ko hari abakobwa bari gutera ikirenge mu cye mu rugendo rw'umuziki.

Ndetse, hari amakuru avuga ko amaze iminsi ari gutekereza gufasha umwe mu bahanzikazi bashya mu rwego rwo gushyira itafari rye ku muziki w'u Rwanda.

Ariel Wayz na Butera Knowless hagati ya Nyakanga na Kanana 2024 bamaze ibyumweru bitatu baririmba mu bikorwa byo kwamamaza Paul Kagame wongeye gutorerwa kuyobora u Rwanda byabereye mu Ntara zitandukanye z'u Rwanda.

Mu ndirimbo bakoranye hari aho baririmba bagira bati 'Niba ntarakubonye nkiri hasi. Sinzakubone ngeze ibicu. Uwo tutasangiye akavumbi, sinamuha n’agahumbi.'

Ariel Wayz yigeze kuvuga ko impano ye y'umuziki atekereza ko ayikomora ku babyeyi be, ku mubyeyi we (Mama) na we wabaye umuririmbyi wa 'Orchestre Ingeri'.

Ubwo yari mu kiganiro Ally Soudy On Air yagize ati 'Njyewe nkiri muto nakundaga kuririmba ariko ntabwo amakuru ye menshi nari nyafite, nkunda kuririmba aho naciriye akenge nagiye mbimubaza nsanga bifitanye isano kuko nawe yaririmbaga mbere, muri Orchestre Ingeri kera sinzi uko byagenze bagenda batandakana nziko yaririmbanye na ba Samputu.'

'Urumva byatangiye nkiri muto ndirimba kubera uruhare rw'umubyeyi wanjye, nkura nkunda kuririmba gutyo. Nibwo batangiye kubona ko mbikunda noneho mu rugo haba habaye ibirori bakambwira ngo ndirimbire abashyitsi.'

Yagaragaje ko yinjiye mu muziki afatira urugero kuri Bruno Mars, umwongerezakazi Ella Mai, Kamaliza ndetse na Butera Knowless. Mu 2020, uyu mukobwa yitabiriye irushanwa “The voice Afrique Francophone” muri Afurika y'Epfo.

Ku wa 14 Gashyantare 2024, ubwo yakoraga igitaramo cyahariwe kwizihiza Umunsi w'abakundana 'A Valentine’s Night to Remember', mu ndirimbo yaririmbye, ku mwanya wa mbere yahashyize indirimbo 'Nzabarampari' ya Butera Knowless.

Yanaririmbye indirimbo ‘Bood Up’ ya Ella Mai, ‘If I Ain’t Got You’ ya Alicia Keys, ‘A Natural Woman’ ya Aretha Franklin n'izindi. Icyo gihe yumvikanishije ko yahisemo kuririmba indirimbo z'aba bahanzikazi kubera ko anyurwa n'ingabo yabo.

Muri Werurwe 2024, Knowless Butera yabwiye Isango Star ko Ariel Wayz ari inshuti ye, kandi ko indirimbo bakoranye yamaze kurangira. Ati “Indirimbo irahari. ‘Audio’ yararangiye’. Afite imbaraga ze, nanjye nkagira izanjye, tugahuza abakunzi noneho indirimbo ikagera kure.”

Butera Knowless yatangaje ko gukorana indirimbo na Ariel Wayz byabaye amata yabyaye amavuta

Ariel Wayz aherutse kugaragaza ko yarangije ikorwa ry'indirimbo yahuriyemo na Butera Knowless 

KANDA HANO UREBE IKIGANIRO CYIHARIYE TWAGIRANYE NA KNOWLESS

KANDA HANO UREBE AMASHUSHO Y’INDIRIMBO ‘UZITABE’ YA BUTERA KNOWLESS

“>

KANDA HANO UREBE AMASHUSHO Y'INDIRIMBO ‘WOWE GUSA’ YA ARIEL WAYZ

Iki gikorwa ni ngaruka mwaka gitegurwa hagamijwe kwizihiza ubudaheranwa bw'abarokotse Jenoside yakorewe Abatutsi mu 1994. Gitegurwa hangamijwe abakomeje gushyigikira umuryango 'Memory Keepers Association' yo muri Edmonton, ku bw'uruhare rwayo mu guhindura ubuzima bw'abarokotse Jenoside.

Abateguye iki gikorwa, basobanura ko bizaba ari umwanya mwiza wo kongera kuganira no kurebera hamwe ibikibangamiye iterambere ry'abarokotse, mu rugendo rwo kubafasha gukomeza kwiyubaha, haharanirwa iterambere ry'ejo hazaza.

Iki gikorwa cyateguwe n’umuryango Memory Keepers Association ifatanyije na Prime Luminisce Rwanda, kizaba mu cyumweru gitaha, ku wa Gatandatu tariki 14 Nzeri 2024

Massamba niwe mushyitsi Mukuru muri iki gitaramo, ni mu gihe Alpha Rwirangira ari umusangwa kuko asanzwe abarizwa muri kiriya gihugu. Si ubwa mbere bombi bagiye guhurira ku rubyiniro, nyuma y’imyaka irenga 15 buri umwe ari mu muziki. Bagiye bahurira mu bitaramo birimo ibya Rwanda Day.

Muri iki gikorwa kandi, abazacyitabira bazasusurutswa na Dj Smith. Abagiteguye baragaje ko uriya munsi uzarangwa n’ibikorwa bizatangira kuva saa tatu za mu gitondo bibera ahitwa Rundle Park, ni mu gihe igitaramo cy’aba bahanzi kizaba guhera saa kumi n’ebyiri z’umugoroba ahitwa Canadian Druze Center.

Kwinjira byashyizwe ku madorali 50 ku bantu bari hejuru y’imyaka 18, n’amadorali 20 ku bantu bari hejuru y’imyaka 13.

Ni cyo gitaramo cya mbere Massamba Intore agiye gukorera hanze y’u Rwanda, nyuma y’uko akoreye muri BK Arena igitaramo yizihirijemo imyaka 40 ishize ari mu muziki, n’imyaka 30 y’urugendo rw’iterambere rw’u Rwanda.  

Cyabaye ku wa 31 Kanama 2024, kandi yari ashyigikiwe n’abahanzi barimo Ruti Joel, Teta Diana, Jules Sentore, Nziza Francis n’abandi banyuranye.

Mu kiganiro yagiranye na InyaRwanda, Massamba yagaragaje ko yakozwe ku mutima n’uburyo abantu bamushyigikiye muri iki gitaramo, kandi yagikoze yiteguye kujya muri Canada.

Massamba Intore yagaragaje ko yiteguye gutaramira Abanyarwanda muri iki gikorwa

Mbere yo gutaramira abakunzi be mu bitaramo byo guhimbaza Imana, Rwirangira ategerejwe mu Mujyi wa Edmonton, ku wa 14 Nzeri 2024
 

Iki gikorwa cyateguwe hagamijwe kwishimira urugendo rw'iterambere rw'u Rwanda nyuma y'imyaka 30 

KANDA HANO UREBE AMASHUSHO Y’INDIRIMBO ‘TSINDA’ YA MASSAMBA INTORE

“>

KANDA HANO UREBE AMASHUSHO Y’INDIRIMBO ‘I’ M FREE’ YA ALPHA RWIRANGIRA

 “>

Selena Marie Gomez wamamaye mu muziki nka Selena Gomez, yinjiye ku rutonde rw'abahanzi bakomeye muri Amerika batunze Miliyari y'amadolari. Ibi, bimugira umwe mu baherwe birwanyeho bakishakira ubutunzi bwabo muri Amerika bakiri bato, kuko kuri ubu umutungo we ubarirwa muri miliyari 1,3$.

Ubukungu bw'uyu muhanzikazi yabukuye mu kuririmba, gukorana na bimwe mu bigo bikomeye ndetse no gukora ibijyanye n'ibirungo by'ubwiza. 

Iki kinyamakuru cya Bloomberg cyatangaje ko ariko cyane cyane Rare Beauty, imaze imyaka itanu itangiye gukora ibijyanye na 'make up', ari yo yatumbagije ubutunzi bwa Selema Gomez mu buryo bwihuse mu myaka mike yashize.

Hari kandi umutungo waturutse rubuga yatangije rwitwa Wondermind rufasha abantu bafite ibibazo by'ubuzima bwabo bwo mu mutwe ndetse n'amafaranga akorera iyo yamamarije ibigo bitandukanye kuri Instagram ye ikurikirwa n'abagera kuri miliyoni 425.

Ni mu gihe umubare w'abakurikira uyu mukobwa urutaho miliyoni 100 abaturage bose batuye Leta Zunze Ubumwe za Amerika ndetse ni uwa kane mu bakurikirwa cyane ku Isi kuri uru rubuga, bikaba ari kimwe mu bishitura ibigo byinshi bikamuhundagazaho akayabo bishaka ko bakorana.

Mu bandi bahanzi batunze miliyari y'amadolari, barangajwe imbere n'Umuraperi Jay-Z ufite miliyari 2.5$, Rihanna ufite miliyari 1,4$ na Taylor Swift uheruka kwinjira kuri uru rutonde muri Mata uyu mwaka, akaba atunze miliyari 1,3$.

Selena Gomez yinjiye ku rutonde rw’ibyamamare bitunze miliyari y’amadolari

Nyuma yo kwima ingoma mu 1897, Umwami Musinga yateranyije abiru ngo bamuhitiremo ahazajya umurwa mukuru w'ubwami bwe maze hemezwa Nyanza, ni uko nyuma y'imyaka ibiri atangira kuwubaka ku gasozi ka Gakenyeri, mu Murenge wa Busasamana.

Amateka avuga ko Umwami Musinga yahise ahashyira amazu 32 y'ibikorwa byose by'ubwami bwe.

Uyu murwa yawubanyemo n'umugabekazi Nyirayuhi V Kanjogera bayoboranaga, maze bakomeza kuwagura.

Mbere yo gutura mu Gakenyeri, Umwami Musinga yagize indi mirwa nka Runda na Gihara mu Nduga, Kamonyi muri Rukoma, Gitwiko cya Nyamabuye mu Nduga, Mukingo mu Busanza bwa ruguru ,i Bweramvura mu Kabagali, na Mwima hafi y'i Mushirarungu.

Kuva icyo gihe, uyu murwa wa Nyanza ni wo abami b'u Rwanda bakomeje guturamo mu myaka hafi 60 yakurikiyeho nubwo habayemo ibibazo byinshi kubera ibihe by'ubukoloni.

Musinga yirukanwe mu murwa yishingiye asimburwa n'Umwami Yezu

Umwami Musinga wanze kuyoboka abazungu b'abakoloni bari bamaze kugera mu Rwanda, yanze kubatizwa ngo abe umukirisitu, bituma abazungu bamwijundika.

Ubusanzwe, umwami w'u Rwanda yafatwaga nk'uhagarariye Imana mu Rwanda, bityo rero Umwami Musinga ntiyumvaga ukuntu yayoboka iyo Mana y'abazungu.

Padiri Niyomugabo Egide uba muri Paruwasi Gatolika ya Nyanza, yabwiye IGIHE ko mu bihe byo hambere, umwami yabaga ahagarariye Imana mu bantu, kumwumvisha indi mana bitari gukunda ari na yo mpamvu bitashobotse.

Ati 'Umwami Musinga ntiyari yarize amashuri asanzwe, kandi mu itorero ibwami, icyo babigishaga ni uko umwami ahagarariye Imana mu bantu. Kumvumvisha indi byaranze, ni na yo mpamvu Musinga, kuyoboka undi mwami byamugoye.''

Ibi biri mu byatumye adahuza n'abakoloni maze ashwana na bo, bamwambura ingoma bamucira i Cyangugu, bamusimbuza Mutara III Rudahigwa wari ufite imyaka 20 gusa, ndetse nyuma aza gutangira i Moba mu gihugu cy'abaturanyi cya Repubulika Iharanira Demokarasi ya Congo.

Avuga kuri iyi ngingo, Meya Ntazinda Erasme uyobora Akarere ka Nyanza, yagize ati 'Umwami Musinga w'u Rwanda yarazimangatanye asimbuzwa undi mwami Kirisitu, ari na we [Yezu] nyuma gato waje guturwa u Rwanda rwose. Ibi ni ibintu bibabaje ku mateka y'u Rwanda.''

Umwami Rudahigwa wamusimbuye ni na we mwami wa mbere wabatijwe, aho yiswe Charles Léon Pierre.

Nyuma yo gucibwa kwa Musinga, Umwami mushya Rudahigwa, yahisemo kuyoboka abakoloni ndetse abegurira ahari ingoro y'ubwami bwa Se.

Amateka agaragaza ko ahari umurwa wa Musinga mu Gakenyeri hatangiye kubakwa ibikorwa bya Kiliziya, kuko mu mwaka wa 1935 ari bwo hatangiye kubakwa Kiliziya Gatolika yitiriwe Kirisitu Umwami i Nyanza, ubu ni Paruwasi iri muri Diyosezi Gatolika ya Butare.

Ni na bwo hatangiye kubakwa amashuri atandukanye arimo Collège Christ-Roi, Groupe Scolaire Mater Dei, Ecole des Sciences Saint Louis de Monfort n'andi menshi ariko yatangiye ari ibibeho aho yafashaga abantu kwiga gusoma, kwandika no kubara, ndetse na gatigisimu mbere yo kubatizwa.

Mu myaka yakurikiyeho, nyuma y'Impinduramatwara yo muri 1959, ubwami bukuweho, uyu Mujyi wa Nyanza wagiye utotezwa mu iterambere kuri Repubulika ya Mbere y'iya Kabiri, bituma ugwingira mu mikurire kuko wagiye wimwa n'ibikorwaremezo n'ubutegetsi bwariho.

Mu muhango wo kwibuka ku nshuro ya 30 Jenoside yakorewe Abatutsi mu 1994 mu Ishuri Rikuru ryo Kwigisha no Guteza Imbere Amategeko mu Rwanda (ILPD), Hon. Mupenzi Georges, yavuze ko uyu mujyi nyuma y'ikiswe Impinduramatwara yo mu 1959, abategetsi bariho icyo gihe bawuciyemo ibice aho kimwe cyometswe ku cyari Perefegitura ya Gitarama, ikindi cyomekwa ku yari Perefegitura ya Butare, bagamije guca intege amatwara ya cyami.

Kuwuteza imbere na byo byakomeje kugenda biguru ntege, ku buryo n'umuhanda wa kaburimbo wagombaga kwinjiramo nubwo wari mugufi kuko wari gufatira ku munini wa Huye-Kigali, wari warakomeje kudindizwa.

Mu gihe cya Jenoside naho, abenshi mu bari bawutuyemo barishwe, bari biganjemo abikorera b'abacuruzi, ariko ntiwaheranywe n'ayo mateka mabi kuko ubu ukomeje gutera imbere ndetse ukaba utuwe n'abasaga ibihumbi 50, ari na ko uzamura urwego rw'ibikorwarezo, ndetse ubu ni na wo murwa mukuru w'Intara y'Amajyepfo.

Uyu mujyi urimo byinshi bigaragaza amateka y'ubwami abantu bashishikarizwa gusura muri iki gihe wizihiza imyaka 125 ubayeho, harimo iriba ry'inka n'ibigabiro by'Umwami Yuhi V Musinga, ingoro y'abami mu Rukari, urukiko rw'Umwami Rwabugiri, Kiliziya ya Kirisitu Umwami, Umwami Rudahigwa yatuye Umwami Yezu n'ibindi.

Muri gahunda yo kwizihiza isabukuru y’imyaka 125 Umujyi wa Nyanza ushinzwe, abahagenda bashyiriweho gahunda yo gusura ibyiza bya Nyanza

Meya Ntazinda Erasme (uri hagati) yavuze ko kuba Umwami Musinga yaritangirije umujyi ariko akawusohorwamo n’abakoloni ndetse ukaza kwegurirwa undi mwami ari we Yezu bitabaye ikintu cyiza ku Rwanda

Isura y’agasozi ka Gakenyeri, kabyaye umujyi wa Nyanza.

Ku kibuga cy’umupira cyakinirwagaho n’ikipe y’umwami yitwaga ‘Amaregura’ mu 1935, yaje yasenyuka mu 1959. Ni na ho Rayon Sports yavukiye.

Ntiwavuga amateka ya Nyanza ngo wibagirwe kuvuga ishuri ryareze benshi ryitwa Christ Roi ryubatswe na Rudahigwa. Amateka avuga ko ryareze benshi

Urukiko rw’umwami rwatashywe n’Umwami Rudahigwa, rwubatswe mu gihe cy’ubukoloni

Paruwasi Gatolika ya Nyanza yatangiye kubakwa mu 1935 bitangijwe n’Umwami Rudahigwa, maze mu 1946 ayitura Kirisitu Umwami

Iyi shusho ya Kirisitu Umwami yatashwe ku mugaragaro ku wa 27 Ukwakira 1946, ubwo Umwami Rudahigwa yaturaga u Rwanda Kirisitu Umwami

Imbere mu Kiriziya ya Kirisitu Umwami aho Rudahigwa yaturiye u Rwanda Kirisitu

Padiri Egide Niyomugabo,ubwo yaganirizaga umunyamakuru wa IGIHE amateka y’agasozi ka Gakenyeri katangiriyeho Umujyi wa Nyanza

Imwe mu mafoto yo mu gihe cya cyami ubwo Umwami Mutara III Rudahigwa yarimo aca urubanza mu rukiko rwe i Nyanza

Iki giti mureba ni umuvumu wagandaye, ari byo Bigabiro bya Musinga mu Gakenyeri

Amateka avuga ko hano hari ku bikingi by’amarembo byinjiraga ibwami

Abatamberaga Umujyi wa Nyanza banasuye ahari umusezero w’umwami i Mwima

Aha muri iri cumbi ry’abapadiri ba Paruwasi ya Nyanza, ni ho hari urugo nyir’izina rw’umwami Musinga

Ku iriba ry’inka za Musinga, riri mu ibanga ry’agasozi ahuntu humutse ariko ntihatajya hakama. Ni munsi y’urugo rwe, ahareba i Nyamagana

Abasura iri riba batangazwa no kubona ridakama kandi riri ku gasozi, noneho no mu mpeshyi

Iyi gahunda yashingiraga ku masezerano y'ubufatanye mu gukemura ibibazo by'abimukira no mu mu iterambere ry'ubukungu, yashyizweho umukono na guverinoma yayoborwaga na Boris n'iy'u Rwanda muri Mata 2022.

Bitewe n'inzitizi zagaragajwe n'inkiko zo mu Bwongereza, guverinoma z'ibihugu byombi zavuguruye aya masezerano mu Ukuboza 2023. Icyo gihe hari icyizere ko abimukira batangira koherezwa i Kigali vuba.

Kuva ubwo aya masezerano yasinywaga bwa mbere no mu gihe yavuguruwe, ishyaka ry'Abakozi (Labour Party) riyobowe na Starmer ryarwanyaga iyi gahunda, rigaragaza ko idashobora gukumira abimukira binjira mu Bwongereza.

Iyi gahunda yahagaritswe na Stamer ubwo yabaga Minisitiri w'Intebe muri Nyakanga 2024, nyuma y'aho ishyaka rye ribonye ubwiganze busesuye mu matora y'Inteko Ishinga Amategeko y'iki gihugu.

Stamer yateguje ko azashyiraho urwego rugizwe n'abarimo inzobere mu mutekano no mu butasi, bazifatanya n'izindi nzego zikorera ku mipaka kugira ngo zikumire abimukira bagerageza kwinjira mu Bwongereza bakoresheje ubwato buto.

Abasesengura ikibazo cy'abimukira binjira mu Bwongereza banyuze mu muyoboro utandukanya iki gihugu n'u Bufaransa, bemeza ko kuva Sunak yaba Minisitiri w'Intebe, abinjira biyongereye cyane bitewe ahanini n'uko bari bafite icyizere cy'uko batazoherezwa mu kindi gihugu.

Mu cyumweru gishize, abimukira barenga 2000 binjiye mu Bwongereza bakoresheje ubwato buto. Aba barimo abarenga 600 bari mu bwato 10 binjiye tariki ya 28 Kanama. Hari abandi 351 binjiye tariki ya 2 Nzeri, bari mu bwato butandatu, nk'uko BBC ibyemeza.

Uko abimukira benshi bajya mu Bwongereza bakoresheje ubwato buto, ni ko ibyago byo kuba bakora impanuka byiyongera. Urugero rwa hafi ni iyahitanye 12 tariki ya 3 Nzeri 2024, barimo abana batandatu n'umugore utwite.

Boris yagaragaje ko impfu nk'iz'abana barohamye ubwo ubu bwato bwari butwaye abagera 70 bari barenze ubushobozi bwabwo zatewe n'uko guverinoma ya Stamer yakuyeho gahunda yo kohereza abimukira mu Rwanda.

Yagize ati 'Ntewe ubwoba n'uko tutazi amazina yabo, icyo ni ikibazo rusange abantu bahuje. Ntabwo tuzi inkuru zabo cyangwa se aho baturutse. Icyo tuzi ni uko ari batandatu bapfuye bari mu bwato cyangwa barindwi mbariyemo n'umwana umubyeyi yari atwite.'

Boris yatangaje ko gahunda yo kohereza abimukira mu Rwanda ari yo yonyine ishobora kurinda ubuzima bwabo, asaba Starmer kuyisubizaho, cyangwa se agashinjwa impfu z'abana bapfira mu nyanja.

Yagize ati 'Igihe kirageze ngo Stamer asubizeho gahunda y'u Rwanda cyangwa se ashinjwe uruhare mu mpfu z'abana bapfira mu nyanja.'

Kuva muri Mutarama kugeza tariki ya 2 Nzeri 2024, abimukira 21.403 bari bamaze kwinjira mu Bwongereza bakoresheje ubwato buto. Mu mwaka wa 2023 wose, abinjiye muri iki gihugu bari 29.437.

Starmer yahagaritse iyi gahunda, asobanura ko idakumira abimukira

Abimukira binjira mu Bwongereza bariyongereye cyane kuva Starmer yaba Minisitiri w’Intebe

Mu gusoza Inama yiga ku buhinzi n'ibiribwa imaze iminsi itanu iri kubera muri Kigali Convention Centre, Perezida Kagame yageneye ubutumwa abarenga ibihumbi bitanu bayitabiriye, baturutse mu bihugu bya Afurika ndetse n'ahandi hirya no hino ku Isi.

Umukuru w'Igihugu yavuze ko umusaruro ukomoka ku buhinzi ari umusingi w'iterambere ry'ibihugu bya Afurika, dore ko byinshi usanga bishingira ubukungu bwabyo ku musaruro w'ubuhinzi utanga akazi ku barenga 60% by'abakora mu bihugu byinshi bya Afurika.

Yagize ati 'Umusaruro ukomoka ku buhinzi ni umusingi w'ubukungu bwacu ndetse n'ubuzima. Muri Afurika, abantu benshi bakora mu rwego rw'ubuhinzi ndetse n'ubucuruzi bushingiye ku bikomoka ku buhinzi.'

Perezida Kagame yagaragaje ko hari byinshi bimaze kugerwaho mu guteza imbere urwego rw'ubuhinzi ku Mugabane wa Afurika.

Ati 'Hari byinshi byagezweho mu myaka ishize mu rwego rwo gutuma uruhererekane rw'ibiribwa rurushaho kubaka ubudahangarwa ndetse bugatanga umusaruro kurushaho.'

Icyakora Umukuru w'Igihugu yavuze ko hari byinshi bikwiriye gushyirwamo imbaraga kugira ngo ubuhinzi burusheho guteza imbere ababukora, ati 'ari byinshi bishobora gukorwa kugira ngo abahinzi bacu barusheho batange umusaruro mwinshi ndetse barusheho kugira imibereho myiza.'

Perezida Kagame yasobanuye ko impamvu yo guteza imbere ubuhinzi ari uko uru rwego rugira uruhare rufatika mu kugabanya ubukene ndetse no kugabanya izamuka ridasanzwe ry'ibiciro ku masoko.

Ati 'Kongera umusaruro ukomoka ku buhinzi binasobanuye igabanuka ry'ibiciro by'ibiribwa ku baturage, nabyo bikagira ingaruka z'ako kanya mu [kugabanya] ubukene ndetse n'izamuka ry'ibiciro ku masoko.'

Yagaragaje ko iyi nama yigiwemo byinshi bizarushaho gufasha Umugabane wa Afurika guteza imbere urwego rw'ubuhinzi, cyane cyane binyuze mu kwifashisha ikoranabuhanga mu buhinzi ndetse no gukurura abashoramari.

Yashimye AGRA igira uruhare mu gutegura iyi Nama, anashimira abayitabiriye barimo ba rwiyemezamirimo bakora mu rwego rw'ubuhinzi, abashakashatsi, abahanga n'abandi bose bayigizemo uruhare, barimo n'abaterankunga batumye ikorwa neza.

Iyi Nama yaganiriwemo ibikwiriye gukorwa kugira ngo ubuhinzi bwa Afurika butere imbere, birimo kongera umusaruro w'abahinzi ndetse no gukoresha ikoranabuhanga rifasha abahinzi guhangana n'ibibazo bahura nabyo mu mwuga wabo, birimo ihindagurika ry'ikirere.

Hasinywe amasezerano atandukanye agamije gufasha ibihugu, ibigo n'imiryango yayitabiriye, guteza imbere ubuhinzi. Iyi Nama yanabaye umwanya mwiza wo guhuza abahinzi n'abashoramari, ndetse bamwe muri ba rwiyemezamirimo bayitabiriye bavuze ko bayibonyemo amasoko y'ibicuruzwa byabo.

Ku rundi ruhande, iyi Nama yerekaniwemo ibicuruzwa byakozwe bikomoka ku musaruro w'ubuhinzi n'ubworozi, bikomoka mu bihugu birimo u Rwanda n'ibindi bihugu bya Afurika.

Video ikubiyemo ubutumwa Perezida Kagame yageneye abitabiriye Inama yiga ku buhinzi n'ibiribwa muri Afurika, AFS Forum 2024

Video igaragaza bimwe mu bicuruzwa bikomoka ku musaruro w'ubuhinzi byerekanwe muri iyi Nama

Ikuzwe Calixte ufite ubumuga bwo kutabona, yize muri Kaminuza y'u Rwanda (UR) akaba amaze imyaka irindwi yandika ibitabo akanashyira ibyanditswe mu rurimi abafite ubumuga bumva.

Amaze kwandika ibitabo bye 12 ndetse no gushyira iby'abandi banditse mu rurimi rwumvwa n'abafite ubumuga birenga igihumbi.

Tariki 5 Nzeri 2024 hatangijwe Ukwezi kwahariwe gusoma. Muri iki gikorwa, Ikuzwe yagaragaje ko abanditsi b'ibitabo batazirikana abafite ubumuga ngo bashyire mu nyandiko nabo babasha gusoma.

Yagize ati 'Turacyafite urugendo rwo kumvisha abantu ko niba ugiye kwandika igitabo ukwiriye no kugikora ku buryo umwana ufite ubumuga bwo kutabona azabasha kugisoma. Abandika ibitabo bakwiye kwibuka y'uko bigomba kuba birimo inyandiko y'abafite ubumuga bwo kutabona.'

Ikuzwe uterwa inkunga n'Ikigega cy'abanya-Amerika gishinzwe Iterambere Mpuzamahanga (USAID) avuga ko uretse kuba ibitabo by'abafite ubumuga bikiri bike n'ababyeyi bamwe batarasobanukirwa ngo bafashe abana babagurire ibitabo babatoze gusoma.

Ati 'Ababyeyi bafite abana bafite ubumuga ntabwo barasobanukirwa kubagurira ibitabo. Niba umwana akeneye gusoma umwandiko runaka ngo bamukoreshereze icyo gitabo cyawo.'

Ukwezi kwa Nzeri kwahariwe gusoma ibitabo, kuri iyo mpamvu byanatumye abanditsi babyo kubufatanye na USAID bategura ibikorwa bizenguruka igihugu bikangurira abantu guteza imbere umuco wo gusoma ariko bibanda ku bana n'urubyiruko.

Ibi bikorwa bizazenguruka mu turere tumwe na twumwe tw'igihugu nka Rulindo, Rubavu, Huye, Nyagatare bisorezwe mu karere ka Rusizi bafasha abana gusoma ibitabo.

Ikuzwe Calixte yandika ibitabo by’abafite ubumuga bwo kutabona n’abakoresha amarenga

Ababyeyi bashishikarizwa gutoza abana gusoma ibitabo bitandukanye muri uku kwezi kwahariwe gusoma

Abana batangiye basoma ibitabo bitandukanye

Kimwe mu bitabo bitandukanye byanditswe na Ikuzwe Calixte