Category: Uncategorized

Kuri uyu munsi nta muntu witabye Imana azize Marburg, ibituma umubare wabo uguma kuri 13 mu gihe abari kuvurwa bagera kuri 30.

Abagera kuri 346 bamaze guhabwa urukingo, mu gihe abamaze kwandura muri rusange ari 58.

Minisiteri y'Ubuzima itanga icyizere ko iyi ndwara itari yakwira mu gihugu muri rusange ndetse ikavuga ko abayigaragaweho n'abo bahuye bose bamaze gushyirwa mu kato kugira ngo bakurikiranwe mu buryo bw'umwihariko.

Ibimenyetso by'iyi ndwara ni ukugira umutwe ukabije, umuriro mwinshi, kubabara imikaya, umunaniro, kuruka no gucibwamo.

Uburyo bwo kuyirinda bukubiye mu kugira isuku, binyuze mu gukaraba intoki inshuro nyinshi no kwirinda kwegerana cyangwa gusuhuzanya n'umuntu ufite ibimenyetso by'iyi ndwara.

Mu gihe ufite ibi bimenyetso, cyangwa se ukeka ko hari umuntu ubifite, wahamagara 114 ugahabwa ubufasha bwisumbuye.

Uyu muhanda wa kaburimbo imirimo yo kuwubaka irarimbanyije, aho byitezwe ko uzarangira muri uyu mwaka w'ingengo y'imari ya 2023/2024. Uzaba ureshya na kilometero 1,8, ukazuzura utwaye miliyari 1,9 Frw.

Umuyobozi w'Akarere ka Rwamagana wungirije ushinzwe Iterambere ry'Ubukungu, Kagabo Richard, yabwiye IGIHE ko bamaze gusinyana amasezerano n'abazubaka uyu muhanda witezweho kwagura uyu Mujyi.

Yagize ati 'Byamaze kwemezwa mu Mujyi wa Rwamagana muri iyi ngengo y'imari tuzubakamo umuhanda wa kaburimbo uzanyura mu Kagari ka Nyagasenyi uzaca kuri St Aloys, uzenguruke ku Kigega umanuke hasi muri Nyagasenyi ugende uhure n'undi uva ku Gakiriro, uzaba ureshya na kilometero 1,8.'

Yavuze ko uyu muhanda uzarimbisha Rwamagana, utumwe umujyi waguka kandi byoroshye urujya n'uruza.

Visi Meya Kagabo yavuze ko rwiyemezamirimo uzawukora yamaze guhabwa amasezerano ndetse n'abazamugenzura nabo bahawe amasezerano.

Yavuze ko kuri ubu Akarere kari kwishyura ibikorwa by'abaturage bizangizwa n'ikorwa ryawo aho bazishyura miliyoni 23 Frw.

Uyu muyobozi yasabye abaturage kuzabungabunga uyu muhanda no kuwurimbisha nko gutera ibiti bisanzwe n'iby'imitako kugira ngo aho batuye hakomeze gusa neza.

Akarere ka Rwamagana gasanzwe gafite mihanda ya kaburimbi ireshya na kilometero 28 ubariyemo n'iyubatswe kera.

Hagiye kubakwa umuhanda mushya wa kaburimbo mu mujyi wa Rwamagana

Mu myaka yashize abatoza bakuze ni bo bari barigaruriye umupira w’amaguru aho ibikombe bari barabitwaye kakahava ariko uko iminsi yicuma bikaba bigaragara ko hari kuvumbuka ikiragano gishya kirimo abatoza bato kandi b’abahanga.

Mu myaka yatambutse, abakambwe nka Carlo Ancelotti wamamaye muri Real Madrid, José Mourinho wamamaye muri Manchester United, Stephano Pioli wamenyekanye muri AC Milan, Maximiliano Allegri wamamaye muri Juventus, Ruis Van Gaal n’abandi, ni bamwe mu bagacishijeho ariko bakuze mu myaka.

Amwe mu makipe yizereraga mu batoza bakuze, yamaze gutandukana nabo ayoboka abato kubera ubuhanga aba batoza bato bari kugaragaza. Twafata urugero kuri Bayern Munich yatandukanye na Thomas Tuchel ikagura Vincent Kompany, Chelsea yatandukanye na Mauricio Pochettino izana Enzo Maresca, ndetse na Arsenal nyuma y’uko yatandukanye na Unai Emery ikayoboka Mikel Arteta, uba ubona ko ikipe yagiye ku murongo.

Ikiragano cy’abatoza bato twatangira kubara guhera ku myaka 45 kumanura, naho kuva ku myaka 50 kuzamura bakabarirwa mu batoza bashaje, naho kuva kuri 45-50 ni abatoza batabarwa mu bato kandi batabarwa mu bakuru. 

Carlo Ancelotti umwe mu batoza bari mu kiragano gikuze 
 
ABATOZA BATO BARI KUBICA BIGACIKA KU MUGABANE W’UBURAYI

1. Mikel Arteta wa Arsenal

Umunya Esipagne Mikel Arteta utoza Arsenal kugeza ubu afite imyaka 42 y’amavuko. Ni umwe mu batoza bafite igihe kirekire muri aka kazi kuko ashobora kumara indi myaka 30 atoza umupira w’amaguru kuko iyo myaka yarangira afite imyaka 72.

Uyu mutoza ubwo yatandukanaga na Manchester City nk’umutoza wungirije, yerekeje muri Arsenal yakiniye, ajya kuba Umutoza mukuru.

Kuva Mikel Arteta yagera muri Arsenal, ikipe yayishyize ku murongo igaruka mu makipe arwanira ibikombe. Yageze muri Arsenal mu gusimbura Unai Emery wari umaze kwirukanwa.

Mu gihe amaze atoza Arsenal, Arteta yayigaruye mu mikino ya UEFA Champions League aho Arsenal yari imaze imyaka irindwi itayitabira, ayigeza muri kimwe cya Kane aho ikipe yari imaze imyaka 10 itahagera.

Muri Shampiyona y’u Bwongereza, Arteta yagaragaje ko ashoboye gukinisha abakinnyi b’amazina ataremereye cyane bakagera ku bihambaye. 

Mu mwaka w’imikino wa 2022-2023 ndetse na 2023-2024 uyu mutoza yafashije Arsenal kuba iya kabiri muri Shampiyona y’u Bwongereza kandi aracyahangamura amakipe no muri uyu mwaka w’imikino.

 

Mikel Arteta agaragaza ubuhanga bwo hejuru mu gutoza ruhago

2. Xabi Alonso wa Bayer Leverkusen

Umunya Esipagne Xabi Alonso nawe ni undi mutoza uri kubica bigacika muri Shampiyona yo mu Budage “Bundesliga” no ku mugabane w’iburayi.

Mu gihe mwene wabo Mikel Arteta ari kubica bigacika mu Bwongereza, na Xabi Alonso arabica bigacika muri Shampiyona y’u Budage.

Xabi yageze muri Bayer Leverkusen muri 2022. Ubwo yayigeragamo yasanze imaze imyaka 120 ifite ibikombe bibiri gusa.

Ku myaka  42 y’amavuko Xabi Alonso yageze muri Shampiyona yo mu Budage amakipe arayarimbagura, afasha Bayer Leverkusen kwegukana ibindi bikombe bibiri mu mwaka umwe, byiyongera kuri bibiri yari yaratwaye mu mateka yayo iba igize ibikombe bine mu mateka.

Ibikombe Xabi Alonso yahaye Bayer Leverkusen ni igikombe cya Shampiyona y’u Budage “Bundesliga” ndetse n’igikombe cy’igihugu DFB-Pokal.

Ku rwego rwo ku mugabane w’iburayi, Xabi Alonso watozaga Bayer Leverkusen yayigejeje ku mukino wa nyuma wa Europa League ubwo yatsindwaga na Atlanta ibitego bitatu ku busa.

 

Umunya Espagne Xabi Alonso akomeje kurimbagura amakipe atandukanye yo mu Budage

3. Vincent Kompany wa Bayern Munich

Ububiligi w’imyaka 39 y’amavuko Vincent Kompany nawe ni umutoza muto watangiye guhangamura amakipe yo mu Budage ndetse no ku mugabane w’iburayi muri UEFA Champions League.

Vincent Kompany yabanje kunengwa ko nta buhanga bwo gutoza afite kuko mu mwaka w’imikino ushize yamanuye ikipe ya Burnley yo mu Bwongereza mu cyiciro cya kabiri.

Akimara kumanura Burnley yo mu Bwongereza, Bayern Munich yo mu Budage iba ihatanira ibikombe bikakaye yatunguye benshi ubwo yirengagizaga amazina akomeye y’abatoza igahitamo Vincent Kompany wari ufite ikinegu cyo kumanura Burnley mu cyiciro cya kabiri.

Kuva yatangira gutoza Bayern Munich, Vincent Kompany yahise aca amarenga ko amakipe azayahangamura kuko kugeza ubu Bayern Munich ni yo iyoboye Shampiyona y’u Budage n’amanota 14 ndetse izigamye ibitego 23. 

Gusa muri UEFA Champions League Vincent Kompany aherutse kuva imbere ya Aston Villa yimyiza imoso nyuma yo kumutambika igitego kimwe ku busa.

Vincent Kompany utoza Bayern Munich akomeje guhangamura amakipe atandukanye

4. Julian Nagelsmann utoza u Budage

Umudage w’imyaka 37 y’amavuko Julian Nagelsmann nawe ari ku rutonde rw’abatoza bato beza bitezweho kuzatanga umusaruro mwiza mu myaka izaza. Nyuma yo kubona ibyo gukina umupira w’amaguru atazabishobora, yahise ayoboka ibyo gutoza afite imyaka 29 muri 2016.

Ubwo yatangiraga gutoza, Julian Nagelsmann yabitangiriye mu ikipe ya TSG Hoffenheim aza kuyivamo muri 2019 ajya muri RB Leipzig yatoje kugera muri 2021. Ubunararibonye bwa Julian Nagelsmann bwanatumye yegukana igikombe cya Shampiyona mu Budage “Bundesliga”.

Nyuna yo kuva muri Bayern Munich, uyu mutoza Julian Nagelsmann yahise ahabwa akazi ko gutoza ikipe y’igihugu y’u Budage, ubwo aheruka muri Euro yayigejeje muri kimwe cya kane.

Julian Nagelsmann w’imyaka 37 y’amavuko yitezweho kuzageza kure ikipe y’igihugu y’u Budage ndetse akanatanga umusanzu mu bandi batoza akabafasha gutera imbere.

 

Julian Naglesmann ni umwe mu batoza b’ibihugu bafite imyaka mike

6. Fabian Hürzeler wa Brighton and Hove Alibions

Umudage Fabian Hürzeler nawe ni umutoza uri guca amarenga yo kuzahangamura amakipe ku myaka 31 y’amavuko.

Muri uyu mwaka w’imikino yaciye amarenga ko azaba umutoza ukomeye cyane nyuma yo gufata Brighton idakomeye yarangiza akarimbagura amakipe yo mu Bwongereza harimo na Manchester United.

Ku ikubitiro Fabian Hürzeler yatambitse Manchester United ibitego bibiri kuri kimwe, agwa miswi na Arsenal igitego kimwe kuri kimwe.

Kugeza ubu Brighton and Hove Alibions itozwa na Fabian Hürzeler. Mu Bwongereza, uyu mutoza amaze gutsinda imikino ine mu mikino irindwi amaze gukina muri English Premier League.

Mu makipe yatsinze harimo na Manchester United. Kugeza ubu Brighton atoza ni iya karindwi n’amanota 14 iri imbere yamakipe y’ibigugu nka Newcastle United, Tottenham Hotspur Manchester United n’ayandi.

Fabian Hurzeler utoza Brighiton ku myaka 31 y’amavuko ari guca amarenga ko azaba umutoza ukomeye

Uretse abo batoza bavuzwe haruguru abandi batoza bakiri bato mu myaka kandi b’abahanga nka Will Still utoza Reims afite imyaka 31 y’amavuko, Roberto Dezerbi afite imyaka 45, Thiago Motta afite imyaka 42, Arne Slot afite imyaka 45 ndetse n’abandi.

Imyaka 10 iruzuye Padiri Uwimana Jean Francois atangiye gukora umuziki nk'umunyamwuga ariko akaba ari nyuma y'uko yinjiye mu muhamagaro we wo kuvuga no kwigisha ijambo ry'Imana muri Kiliziya gatorika.

Uwimana Jean Francois amaze kumenyekana mu ndirimbo nyinshi zitanga ubutumwa ariko akifashisha injyana zikunzwe cyane mu rubyiruko kugira ngo ubutumwa yifuza kugenera urubyiruko byorohe ko bubageraho.

Nk'uko akorera umuziki cyane cyane ashaka kubwira urubyiruko, Padiri Uwimana Jean Francois yinjiye mu gukora umuziki kubera urubyiruko yumvanye indirimbo zidakwiye umukirisitu kandi zitarimo inyigisho zikwiye urubyiruko.

Mu kiganiro na InyaRwanda Tv, Padiri Uwimana Jean Francois yagize ati 'Naririmbaga muri Petit Seminari hanyuma kubera ko nari nzi umuziki bambwira ko ngomba kuririmba mu nama y'ababyeyi bikomeza uko. Ibindi rero maze kuba Padiri, ni abana bavuye mu misa bajya kuririmba ngo ‘nimbura n'itabi nzashyingurwa’, hanyuma numva birakabije.

Nahise ngenda kubareba ndababaza nti ni ibiki muri kuririmba? Barambwiye ngo indirimbo twumvishe mu Kiliziya zari zikonje. Nafashe iyo ndirimbo baririmbaga hanyuma mpindura amagambo nshyiramo ijambo ry'Imana.'

Agaruka ku buryo impano ye mu muziki yakiriwe, Uwimana Jean Francois yavuze ko abantu batangiye kujya bavuga ko ashobora guhagarikwa kubera ko nta mupadiri wo kurapa ariko we yari abiziranyeho na Musenyeri yaranamuganirije ko uburyo bwiza bwo kwigisha urubyiruko ari ukurusanga mu byo barimo hanyuma ukabibaheramo ubuhamya.

Yagize ati 'Byatangiye bisakuza ariko nari narahuye na Musenyeri ambwira ngo ibintu urubyiruko rurimo byasaba ko ubasanga mu byo barimo ukabigishirizamo aho gufata ibyo uvanye mu ishuri ngo abe aribyo ubashyiramo. Ubwo rero kubera ko yari abizi kandi mu bapadiri iyo wumvikana na Musenyeri ntacyo biba bitwaye.'

Yavuze kandi ko akora umuziki mu rwego rwo kunyuzamo inyigisho ze ndetse no kuruhuka mu mutwe nyuma y’akazi ke ndetse n’amasomo cyane ko amaze imyaka 5 mu Budage ari gukurikirana amasomo.

Padiri Uwimana Jean Francois amaze gukora indirimbo nyinshi harimo “Loved you”, “Yaratsinze”, “Nyirigira”, “Amahirwe” ari nayo aheruka gushyira hanze ndetse n'izindi zitandukanye.

Padiri Uwimana Jean Francois yiyeguriye umuziki by’umwihariko injyana ya HipHop mu rwego rwo gufasha urubyiruko

Impano yo kuririmba, Padiri Uwimana yayitangiye akiri umwana

Padiri Jean francois yatangaje ko nta gitutu na gito agira kubera abantu bamunenga kubwo guhuza umuziki n’inshingano zo gushumba itorero

Reba ikiganiro kirambuye InyaRwanda yagiranye na Padiri Uwimana Jean Francois 

“>

Imibare igaragaza ko u Rwanda rutakinnye na Benin imikino myinshi cyane, gusa muri mike ibi bihugu byombi byakinnye Benin niyo yatsinze imikino myinshi kurusha ikipe y'igihugu y'u Rwanda ‘Amavubi’.

Mu myaka ya vuba ibi bihugu byombi ni bwo byakinnye imikino isa n'aho yegeranye cyane, gusa mu mikino itatu yabahuje muri iyi myakla ibiri, nta mukino n'umwe u Rwanda rwatsinzwe kuko Rwanganyije umukino umwe, ruterwa mpaga imwe ndetse rutsindwa umukino umwe.

Umukino uherutse guhuza ibi bihugu byombi wabaye ku itariki ya 6 Kamena 2024 kuri Stade Félix Houphouët Boigny akaba ari na cyo kibuga amakipe yombi arongera gukiniraho kuri uyu wa Gatanu.

Uyu mukino wari umukino wa gatatu mu gushaka itike y'igikombe cy'isi kizabera muri USA, Canada na Mexico muri 2026. Ni umukino warangiye Benin itsinze u Rwanda irukoma mu nkokora muri gahunda rwiyemeje yo kujya mu gikombe cy'isi cya 2026.

Ni umukino warangiye ikipe y’igihugu ya Benin itsize u Rwanda igitego kimwe ku busa. Icyo gihe igitego cya Benin cyabonetse ku munota wa 37 gitsinzwe na Dodo Dokou ku mupira yahawe na Jodel Dossou.

Ku itariki 29 Werurwe nabwo ibi bihugu byombi byarakinnye. Ni umukino wakiniwe kuri Kigali Pele Stadium nyuma y'impaka zari zimaze iminsi ikipe y'igihugu ya Benin igaragaza ko u Rwanda nta kibuga cyemewe rufite.

Ni umukino u Rwanda rwemerewe kwakirira mu rugo ariko nta bafana bahari kubera ko Kigali Pele Stadium itari ifite ububasha bwo kwakira abafana. Uwo mukino warangiye u Rwanda runganyije na Benin igitego 1-1.

Nyuma yo kunganya uyu mukino, mu minsi mike u Rwanda rwakiriye ubutumwa budashimishije ko rwahanishijwe mpaga kuri uyu mukino, kuko rwakinishije Muhire Kevin wari ufite amakarita abiri y'umuhondo. Ayo makarika yari yayabonye mu mukino wa Senegal n’uwa Benin muri Benin.

Ku itariki 22 Werurwe 2023 kandi nabwo ibi bihugu byombi byarakinnye. Ni umukino ikipe y'igihugu ya Benin yari yakiriyemo u Rwanda kuri Stade del'Amitié, mu gihugu cya Benin.

Icyo gihe u Rwanda ni rwo rwatangiye rufungura amazamu kuko ku munota wa 11 rwabonye igitego gitsinzwe na Mugisha Gilbert, benshi batangira gutekereza ko ruza gukura intsinzi mu gihugu cya Benin.

Ibyo abanyarwanda bibwiraga si ko byagenze kuko umukino warangiye ibihugu byombi binganya igitego kimwe kuri kimwe kuko ku munota wa 66 Steve Moune yatsize igitego cyo kwishyura.

Muri 2013 nabwo u Rwanda rwacakiranye na Benin mu mikino yo kwishyura, icyo gihe amakipe yombi yashakaga itike y'igikombe cy'isi cyabereye muri Brazil 2014. Ni umukino warangiye Benin itsinze u Rwanda ibitego bibiri ku busa mu mukino wabereye muri Benin.

Mbere yaho gato muri 2012 u Rwanda rwari rwakinnye na Benin mu gushaka itike y'igikombe cy'isi cyo muri Brazil, uwo mukino wabereye kuri Stade Amahoro warangiye u Rwanda na Benin biguye miswi igitego kimwe kuri kimwe. 

Icyo gihe Amavubi yatsindiwe na Bokota Labama kuri penaliti ku ikosa ryari rikorewe Karekezi Olivier. Umukinnyi Adénon yaje kubona ikarita y'umutuku ku munota wa 86.

Ikipe y'igihugu y'u Rwanda ubwo yigeze gutsinda ikipe y'igihigu ya Benin hari muri 2011 mu mukino wo gushaka itike y'igikombe cya Africa. Mu mukino wo kwishyura wari wabereye muri Benin, u Rwanda rwatsinze Benin igitego kimwe ku busa.

Nubwo u Rwanda rwatsinze Benin igitego kimwe ku busa muri Benin ntacyo byamariye u Rwanda kuko mu mukino wari wabanje muri 2010 Benin yari yatsindiye u Rwanda i Kigali ibitego bitatu ku busa.

Ikipe y’igihugu ya Benin yakunze kugora u Rwanda mu nshuro bahuye 

Kuri uyu wa Gatanu ikipe ya Benin irakirira Amavubi muri Cote d’Ivoire

U Rwanda ntabwo rwahiriwe no gukina na Benin  

Byagarutsweho ku wa 09 Ukwakira 2024, mu kiganiro bahawe n'Umuyobozi Mukuru w'Ishuri Rikuru ryo Kwigisha no Guteza Imbere Amategeko mu Rwanda(ILPD), Dr Aime Muyoboke Karimunda ,ubwo yabaganirizaga ku musanzu bakeneweho mu mwuga w'amategeko n'akamaro ko kwiga muri ILPD.

Dr Muyoboke yagize ati 'Uyu munsi, turi kubona abantu basohoka mu mashuri barize amategeko mpanabyaha, amategeko y'umuryango, amategeko y'izungura. Ibi ni byiza, ariko uwabyize ategereza ko hari ikibazo kivuka nk'icyaha cyakozwe, umuturage ushaka gatanya, umuturage witabye Imana kugira ngo afashe gukemura icyo kibazo cy'izungura.'

Yakomeje agira ati ' Ese kiramutse kitavukiye igihe yabitekerezaga byagenda bite? Nyamara wa munyamategeko yashoboraga kurema ubumenyi, ibyo ni byo bigezweho ubu kuko kurema ubumenyi ni byo bibeshejeho abanyamategeko benshi kurusha gutegereza gukemura ibibazo.'

Yakomeje agira ati' Hari ingero z'ibikenewemo kurema ubumenyi kandi bishobora kwinjiriza abanyamategeko: nk'abantu bita ku masezerano mu bya siporo, amasezerano mu bijyanye n'ibidukikije, amategeko areba iby'ingufu, amategeko areba iby'ikirere n'isanzure, ishoramari mpuzamahanga, ibinyanye n'ubuvuzi n'imiti, n'ibindi kandi ni mwe bo kuzabikora.'

Dr Muyoboke yavuze ko abantu bize amategeko bakeneweho umusanzu ukomeye cyane mu gutanga ubutabera bufite ireme kandi bwihuse ndetse no guteza imbere amategeko.

Yagarutse ku nshingano abanyamategeko bafite zo guherekeza igihugu muri gahunda zose z'iterambere rya politiki, ubukungu ndetse n'imibereho myiza y'abaturage.

Yasabye kandi aba banyeshuri kurangwa n'indangagaciro za kinyamwuga kuko ari ingenzi, aho yasobanuye ko kugira ubumenyi ari byiza ariko ko bitihagije.

Yavuze ko u Rwanda rukeneye abanyamategeko bashobora guhangana n'abandi ku isoko mpuzamahanga ry'umurimo kandi ko ibyo bisaba ko hejuru y'ubumenyi, ubufite aba arangwa indangagaciro za kinyamwuga nko kubahiriza igihe, kugaragara neza, kumenya uko witwara bitewe n'urwego urimo, uko witwara ku bakiliya n'ibindi.

Uyu muyobozi yeretse aba banyeshuri ko ILPD ihari nka kimwe mu bisubizo bizafasha abanyeshuri kurushaho gutyaza ubwenge, kugira ngo bahinduke abanyamategeko igihugu na Afurika bifuza, ndetse abifuriza ikaze mu gihe bazaba bashoje kaminuza baje kwihugura muri ILPD, kuko ariyo nzira Umushingamategeko yateganyije yo kwinjira mu myuga itandukanye y'amategeko.

Umuyobozi muri Kaminuza y'u Rwanda, mu Ishuri ry'Amategeko, Shenge Laurent, yabwiye IGIHE ko ibiganiro nk'ibi biba ari ingenzi cyane ku banyeshuri ndetse n'abarimu kuko bituma biyungura ubumenyi bwisumbuyeho ku masomo baba baraboneye mu ishuri.

Ati 'Iyo haje umuntu nk'uyu ufite ubumenyi mu bijyanye no gushyira mu bikorwa amategeko, birafasha cyane kuko abasangiza inararibonye, bakabihuza n'ibyo bize, ugasanga bibagiriye akamaro gakomeye cyane.''

Yakomeje avuga ko na Kimunuza y'u Rwanda iticaye ubusa mu kujyanisha amasomo y'amategeko ajyanye n'igihe isi igezemo, avuga ko bashyize imbere ibigezweho birimo amategeko ajyanye n'ubuganga, amategeko y'isanzure, agenga siporo n'andi.

Ati 'Kaminuza ihora ivugurura inyigisho itanga byibura buri myaka 5, ubu hari kurebwa amasomo mashya yinjizwamo, nk'ubu dufite umwarimu uri gukorera impamyabumenyi y'ikirenga mu itegeko ry'ingufu(energy law),nagaruka hari icyo azamarira ishuri n'abanyeshuri.”

Abanyeshuri bitabiriye iki kiganiro nabo bavuze ko bungukiyemo byinshi bizabayobora mu gihe bazaba bageze hanze ya Kaminuza, basaba ko byajya biba kenshi bakarushaho kongera ubumenyi.

Baboneyeho no gusaba ubuyobozi bwa Kaminuza y'u Rwanda na ILPD kubakorera ubuvugizi kuri Leta kugira ngo bajye boroherezwa kwiga muri ILPD ku nguzanyo ya Leta isanzwe kuko ngo hari benshi basoza kaminuza bakabura uko bajya kwihugura muri ILPD, kubera kubura amikoro.

Kuri ubu, Ishuri ry'Amategeko rya Kaminuza y'u Rwanda ribarirwamo abanyeshuri basaga 400 bari mashami atatu, irya UR-Huye,irya Polisi (National Police College) riri i Musanze, ndetse n'irindi ryo mu ishuri rya Gisirikare rya Gako (Gako Military Academy).

Iki kiganiro cyari cyitabiriwe n’abanyeshuri benshi biga amategeko muri UR-Huye kandi bose banyuzwe n’ibyavugiwemo

Kezeneza Sierra wiga mu Ishuri ry’Amategeko muri UR-Huye, yasabye ko ibiganiro nk’ibi byakwiyongera bakarushaho kwaguka mu bumenyi

Dr Kalimu kandi, yasabye abanyeshuri biga amategeko kwigirira icyizere bagakora cyane, ababwira ko aho bicaye na we yari ahari mu 1995-1999 yiga mu yahoze ari Kaminuza Nkuru y’u Rwanda(UNR)

Dr Kalimunda Muyoboke Aime, uyobora ILPD, yibukije abanyeshuri biga amategeko imyambarire ikwiye umunyamategeko

Dr Kalimunda Muyoboke Aime, uyobora ILPD(uri hagati) yakanguriye abiga amategeko kwibuka kumenya ibigezweho muri iki gihe, bakihugura mu mategeko ajyanye n’igihe anakenewe cyane ku isoko ry’umurimo

Hafashwe ifoto y’urwibutso

Kwihanga Frederic, wiga muwa Kane mu mategeko muri UR-Huye, yavuze ko iki kiganiro kimukanguye ubwonko, akaba agiye kwihatira kuzihugura mu mategeko arebana n'ishoramari mpuzamahanga

Umuyobozi muri Kaminuza y'u Rwanda, mu Ishuri ry'Amategeko, Shenge Laurent, yavuze ko ibiganiiro nk’ibi bitanzwe n’impuguke bigirira akamaro abanyeshuri ndetse n’abarimu

Ni amakuru IGIHE yahamirijwe n'Umuvugizi w'Urwego rw'Igihugu rw'Igihugu rw'Ubugenzacyaha RIB, Dr. Murangira B. Thierry, wavuze ko uyu mugabo n'umugore we batawe muri yombi ku wa 9 Ukwakira 2024.

Dr Murangira B. Thierry, Umuvugizi wa RIB yagize ati 'Nibyo koko aba bombi batawe muri yombi bakurikiranyweho icyaha cyo kwihesha ikintu cy'undi hakoreshejwe uburiganya n'icyo gukangisha gusebanya hakoreshejwe amafoto y'urukozasoni bakaba bafungiye kuri Sitasiyo ya RIB ya Kimihurura mu gihe iperereza rikomeje hanakorwa dosiye ngo ishyikirizwe Ubushinjacyaha.'

Amakuru ahari avuga ko iperereza ry'ibanze ryagaragaje ko umwe mu bantu basengeraga muri 'Zeraphat Holy Church' ari we watanze ikirego arega umuyobozi waryo ko yamusabye miliyoni 10Frw, amwizeza kumusengera indwara yaramaranye igihe kirekire igakira.

Umuvugizi wa RIB yirinze kugira icyo avuga ku bijyanye n'icyaha cyo gukangisha gusebanya hakoreshejwe amafoto y'urukozasoni.

Yagize ati “Iperereza rirakomeje ngo hamenyekane uburyo bakoze icyaha cyo gukangisha gusebanya hakoreshejwe amafoto y'urukozasoni ndetse n'uko ayo mafoto yabonetse.”

Umuntu wese ukurikiranyweho icyaha cyo kwihesha ikintu cy'undi hakoreshejwe uburiganya, iyo abihamijwe n'Urukiko ahanishwa igifungo kitari munsi y'imyaka ibiri ariko kitarenze itatu, n'ihazabu itari munsi ya miliyoni 3Frw ariko zitarenze miliyoni 5Frw.

Iki ni igihano giteganywa n'ingingo ya 174 y'itegeko riteganya ibyaha n'ibahano muri rusange.

Ni mugihe icyaha cyo gukangisha gusebanya cyo ugihamijwe n'Urukiko ahanishwa igifungo kitari munsi y'umwaka umwe ariko itarenze itatu n'ihazabu y'ibihumbi 100Frw ariko itarenze ibihumbi 300Frw.

Umuvugizi w'Urwego rw'Ubugenzacyaha RIB, Dr. Murangira B. Thierry yasabye abantu bose kugendera kure ibikorwa byose biganisha mu gukora ibyaha.

Ati 'Buri muntu wese asabwa kubahiriza amategeko y'Igihugu. Ku buryo bw'umwihariko Abavugabutumwa barasabwa kwirinda ibintu byose biganisha ku gukora ibyaha n'ibindi bikorwa byose bigayisha umurimo bakora. Nibabe intangarugero mubyo bakora byose.'

Umushumba wa 'Zeraphat Holy Church' n'umugore we batawe muri yombi

Aba bagore nyuma yo gukurwa mu muhanda, bibumbiye mu matsinda atatu ariyo Inkingi Rugando, Tugane heza na Terimbere Mutegarugori, mu rwego rwo kwiteza imbere kuko icyo gihe kubera kwizigama biyubakiye isoko rito riherereye mu Rugando.

Ku wa Gatatu tariki 9 Ukwakira 2024, Rotary Club Kigali Seniors yashyikirije inkunga ya miliyoni 2,8 Frw aba bagore kugira ngo bakomeze ibikorwa by'iterambere.

Umuyobozi wa Rotary Club Kigali Seniors, Rumongi Aimable yavuze ko bahisemo gushyigikira aba bagore nyuma yo kumva igitekerezo cyabo cyiza.

Yagize ati 'Iki gikorwa twagitekereje nyuma yo kumenya ko hari itsinda ry'abagore bashaka kuva mu muhanda. Icyo gihe twatekereje kubarihira ubwisungane mu kwivuza ariko nyuma twifuza kubatera inkunga kugira ngo bakore imishinga iciriritse bityo bazamuke n'izo mutuelle bajye bazigurira bidasabye ko hari umuntu wo hanze uzibagurira.'

Yakomeje agira ati ' Ni ukubashyigikira mu bucuruzi bwabo kuko basanzwe bacuruza imbuto, imboga n'amakara kandi bafite n'inzozi zo kuzajya barangura i Dubai. Ikindi tuzababa hafi ku buryo tuzabafasha gucunga no gukoresha neza iyi nkunga.'

Ayinkamiye Judithe uyobora amatsinda abiri y'aba bagore avuga ko inkunga bahawe igiye kubafasha kongera igishoro bityo ubucuruzi bwabo butere imbere.

Yagize ati ' Iyi nkunga igiye kudufasha kuko mu matsinda yacu, umunyamuryango yaguzaga agahabwa amafaranga make kuko twabaga tuyashaka turi benshi. Ariko ubu, azajya aguza ahabwe afatika yongere mu bucuruzi bwe bityo twiteze imbere.'

Aba bagore bahoze bacururiza mu muhanda, mu Rugando nyuma bafashwa kuwuvamo ndetse baniyubakira isoko rito ryabatwaye miliyoni 7 Frw.

Bavuga ko icyorezo cya Covid-19 cyabakomye mu nkokora, bagashirirwa bityo inkunga bahawe igiye kongera kufasha kuzahura ubucuruzi bwabo.

Umuyobozi Nshingwabikorwa w'Akarere ka Gasabo, Bayasese Bernard yashimye Rotary Club ku gushyigikira aba bagore.

Ati 'Ndashimira Rotary yafashije aba babyeyi kuko burya gutera imbere ni ukuzamurana ndetse no gushyira mu bikorwa gahunda ya Leta yo kwishakamo ibisubizo.'

Yasabye kandi aba babyeyi gukomeza kwibumbira mu matsinda kuko aribwo buryo bwiza kandi bwizewe bunorohereza ushaka kugira icyo abafasha kubona aho abasanga.

Rotary y'u Rwanda igizwe na clubs 12 zirimo Rotary Club Kigali, Rotary Club Butare, Rotary Club Kigali Mont Jali, Rotary Club Kigali Virunga na Rotary Club Kigali Gasabo.

Hari kandi Rotary Club Musanze Murera, Rotary Club Bugoyi Ibirunga, Rotary Club Kivu Lake, Rotary Club Kigali Senior, Rotary Club Kigali Karisimbi na Rotary Cosmopolitan.

Rotary Club ni umuryango udaharanira inyungu ukora ibikorwa by'ubugiraneza birimo gufasha abatishoboye, gutanga amazi meza ku baturage, kurwanya indwara z'ibyorezo zirimo nk'imbasa no gutanga umusanzu mu bikorwa byose bigamije guteza imbere sosiyete.

Rotary Club Kigali Seniors yashyikirije inkunga ya miliyoni 2,8 Frw abacuruzi bo mu Rugando

Umuyobozi wa Rotary Club Kigali Seniors, Rumongi Aimable yavuze ko bazakomeza gushyigikira aba babyeyi bityo bahindure ubuzima

Umuyobozi Nshingwabikorwa w'Akarere ka Gasabo, Bayasese Bernard yashimye Rotary Club ku bikorwa by’ubugiraneza ikora

Ayinkamiye Judithe uyobora amatsinda abiri y'aba bagore avuga ko inkunga bahawe igiye kubafasha kongera igishoro mu bucuruzi bwabo

Nyuma y’iki gikorwa hafashwe ifoto y’urwibutso

Ni inyubako yatangiye kubakwa mu 2017, mu mushinga mugari wa miliyoni 40$ watewe inkunga na Koreya.

Wari ukubiyemo kubaka icyo cyicaro gikuru, amacumbi y'abanyeshuri ba UR Ishami rya Nyarugenge n'Ishuri ry'Ubucukuzi n'iry'Ubumenyi bw'Isi.

Inyubako zagombaga kubakwa muri uwo mushinga zari kuzura mu bihe bitandukanye, aho nk'iyo inyubako igiye kwimukiramo iicyicaro cya UR yagombaga gutahwa mu 2021 ariko hagenda habaho inzitizi zatumye bitagenda uko byateganyijwe.

Umuyobozi Mukuru wa UR, Dr. Kayihura Muganga Didas, yabwiye IGIHE ati 'Ibyinshi byararangiye tuzayimukiramo mbere y'uko uyu mwaka urangira. Ntibizarenga mu Ukuboza 2024'.

Asobanura ku nzitizi zatumye imirimo yo kuyubaka itinda, yagize ati 'Icyabaye ni uko amasezerano na rwiyemezamirimo yaje kurangira itaruzura hakajya habaho kuyavugurura kuko akenshi iyo inyubako yatangiye hari ibyo bagenda bahinduraho nyuma.'

'Kubera ko yari ikomatanyije n'izindi nyubako habaga harimo ibintu byinshi rero yaje guhagarara bavugurura amasezerano. Ikindi cyayitindije ni uko wari umushinga uhuriweho n'inzego nyinshi zirimo Leta y'u Rwanda, Abanya-Koreya, rwiyemezamirimo wubaka, abagenzura na banki itanga mafaranga'.

Yongeyeho ko ibyo byose byakozwe bikarangira kuri ubu iyo nyubako ikaba yaramaze no gushyirwamo ibikoresho byose imbere. Icyakoze ngo hari imirimo mike isigaye hanze yayo ari iyo izatwara amezi ari imbere.

Ati 'Ubu bari kunoza ibijyanye na parking no kwimura amarembo kuko aho twari twateganyije ari hariya hasakaye ku mahema ya Camp Kigli ariko tuza kubona ari imbogamizi mu gihe habereye inama zikomeye hajya haba umubyigano. Twasanze ibyo byajya bituma abakozi bacu bajya guca mu yandi marembo yegeranye n'ishuri ryisumbuye rihari kandi ni kure dusaba ko irembo ryashyirwa hepfo y'iyo nyubako hateganye n'umuhanda ujya mu Biryogo rikaba iryayo yonyine.'

Dr. Kayihura yavuze ko impamvu iyo kaminuza igiye kwimura ikicaro ari ko aho cyari kiri atari cyo hari hagenewe.

Kaminuza y'u Rwanda yari ifite icyicaro mu Ishami rya Gikondo kuva mu 2013. Ubuyobozi busobanura ko aho ikorera hari hagenewe amashuri n'ibiro by'abarimu.

Kaminuza y’u Rwanda igiye kwimukira mu nyubako yuzuye muri Camp Kigali

Uyu mupadiri uyobora iri shuri ryo mu Karere ka Kirehe, yatawe muri yombi ku wa 9 Ukwakira 2024

Umuvugizi wa RIB, Dr. Murangira B.Thierry wagize ati ' Arakekwaho icyaha cyo gusambanya umwana w'umukobwa w'imyaka 15 wiga muri icyo cyigo cy'ishuri, kuri ubu afungiye kuri Sitasiyo ya RIB ya Kacyiru mu gihe iperereza rikomeje ngo hakorwe dosiye ye ishyikirizwe Ubushinjacyaha.'

Mu gihe Urukiko rwamuhamha iki cyaha, yahanishwa igifungo kitari munsi y'imyaka 20 ariko kitarenze imyaka 25, nk'uko biteganywa n'ngingo ya 14 y'itegeko riteganya ibyaha n'ibihano muri rusange.

Dr Murangira yavuze ko uru rwego rusaba abarezi kuzuza neza inshingano zabo zo kurera, bubaha kandi barinda abo barera.

Ati 'Biragayitse cyane kuba umuntu w'umurezi yakekwaho icyaha nk'icyi cyo gusambanya umwana. Ibyaha nk'ibi ntabwo bizihanganirwa, uzabikora wese amenye ko amategeko azamuhana kandi bazirikane ko iki ari icyaha kidasaza.'

Umupadiri watawe muri yombi akurikiranyweho gusambanya umwana w'umukobwa w'imyaka 15