Webrwanda Backend

Author: webrwanda

  • Chorale de Kigali yatumiye abakunzi b'umuziki mu gitaramo cyiswe 'Christmas Carols' muri BK Arena #rwanda #RwOT

    Chorale de Kigali, imwe mu makorali akomeye kandi akunzwe cyane mu Rwanda, yatangaje igitaramo cy'amateka kizaba ku wa 22 Ukuboza 2024, muri BK Arena. Iki gitaramo cyiswe christmas Carols gitegerejwe n'abakunzi b'umuziki w'umwimerere, kikaba giteganyijwe kuba kimwe mu birori binini byo kwizihiza Noheli muri uyu mwaka.

    Chorale de Kigali ifite izina rikomeye mu muziki w'indirimbo zihimbaza Imana, iziririmbwa mu buryo bw'umwimerere bwa korali (choral music), ndetse ikaba izwiho ubuhanga budasanzwe mu guhuza amajwi.

    Mu gitaramo cya Christmas Carols, bazaririmba indirimbo za Noheli zirimo izo abakunzi bayo basanzwe bazi, ndetse n'izindi nshya ziteguriwe gususurutsa abazasohokera muri BK Arena.

    Abifuza kwitabira iki gitaramo bafite amahitamo atandukanye y'amatike, bitewe n'icyiciro bifuza kwicaramo. Amatike ya Regular agura 5,000 Frw, Bronze ni 10,000 Frw, Silver ni 15,000 Frw, Gold/CIP ni 20,000 Frw, naho Diamond ni 25,000 Frw.

    Hari kandi amahirwe ku bantu bifuza kwicara ku meza (Table), aho itike igura 250,000 Frw aha ho bakazanabona serivisi yo guhabwa icyo kunywa ndetse n'icyo kurya.

    Iki gitaramo kizaba ari uburyo bwiza bwo kwinjira mu bihe by'umunezero wa Noheli, aho umuryango, inshuti, ndetse n'abakunda umuziki muri rusange bazagira umwanya wo kuruhuka no kwishimira umuziki uhanitse wateguwe na Chorale de Kigali.

    Abifuza kwitabira barakangurirwa kugura amatike hakiri kare kuko ibyicaro bizaba ari bike ugereranyije n'uburyo igitaramo cyateguwe. Iki ni igitaramo cyitezweho gusiga amateka mu rugendo rw'ubuhanzi bwa Chorale de Kigali no mu bikorwa by'umuziki wa gikirisitu mu Rwanda.

    Ntuzacikwe n'iki gitaramo, kuko bizaba ari umwanya udasanzwe wo kwishimira ibihe by'ubusabane, umuziki mwiza, no gusangira umunezero wa Noheli.

    Source : https://kasukumedia.com/chorale-de-kigali-itumiye-abakunzi-bayo-mu-gitaramo-cyiswe-christmas-carols-muri-bk-arena/

  • Jay Z yagezwe intorezo imwe n’iya P Diddy uri… – #rwanda #RwOT

    Ikinyamakuru NCB cyatangaje ko mu Ukwakira, umuraperi Jay Z yarezwe mu rubanza mbonezamubano aho yaregwaga gufata ku ngufu umwana w'imyaka 13 mu mwaka wa 2000 akaba yaramufashe ku ngufu ari kumwe na P Diddy.

    Ni ikirego cyatanzwe n'uwitwa Jane Doe avuga ko yafashwe ku ngufu mu mwaka wa 2000 nyuma yo kujyanwa mu birori biherekeza itangwa ry'ibihembo bya MTV Video Music Awards.

    Mu Ukwakira, ni bwo hari hatanzwe iki kirego bavugamo ko kirimo P Diddy ariko hari n'ikindi cyamamare kiri muri urwo rubanza ari ho kuri iki cyumweru byamenyekanye ko ari Shawn Carter wamamaye mu muziki nka Jay Z.

    Uyu mugore yareze avuga ko mu birori byakurikiye itangwa ry'ibihembo bya MTV bamujyanye banywa ibiyobyabwenge hanyuma baramuhohotera kandi hakaba hari ikindi cyamamarekazi cyari gihari kiri kwitegereza uko P Diddy na Jay Z basimburanaga kuri uwo mukobwa.

    Nyuma yo kumva ibyo ashinjwa, Jay Z yanyomoje aya makuru avuga ko ibyo atari ukuri ahubwo ari umuntu ushaka ko amuha amafaranga ndetse avuga ko adashyigikira ihohotera na gato bityo ko n'umuntu wese uhohotera mugenzi we akwiye guhanwa yihanukiriye.

    Jay Z kandi yihanije uwamureze ndetse n'umunyamategeko we amushinja kuba yarifashe nk'aho ibyamamare byose ari bimwe byahohotera hanyuma akamushinja ibyaha bidafite ishingiro. Jay Z yongeyeho ko ari umugabo w'indangagaciro kandi wiyubaha utakora ayo mahano ashinjwa.


    Jay Z na P Diddy bashinjwe gufata ku ngufu umwana w’imyaka 13 


    Jay Z yamaganiye kure ibi birego ashinjwa avuga ko ari abishakira amafaranga


    Bisa nk’aho P Diddy amaze kumenyera ibi birego kuko uyu mugore si uwa mbere si n’uwa nyuma


    P Diddy na Jay Z bigeze kuwubana

    Source : https://inyarwanda.com/inkuru/149376/jay-z-yagezwe-intorezo-imwe-niya-p-diddy-uri-mu-buroko-149376.html

  • Harimo itike ya Miliyoni n’igice! The Ben agi… – #rwanda #RwOT

    Ushingiye ku bitaramo byagiye bibera muri iyi nyubako mu bihe bitandukanye, bigaragara ko The Ben ariwe muhanzi wa Kabiri ugiye kuhataramira, ufitemo itike yihagazeho mu bijyanye n'ibiciro byo kuhinjira.

    The Ben agaragaza ko mu matike ye harimo imyanya yise 'Business Suite', igura Miliyoni 1,500,000 Frw. InyaRwanda yahawe amakuru avuga ko iyi myanya igenewe kwicarwamo n'abantu 25, bagahabwa n'icyo kunywa. Bivuze ko ubariye ku muntu umwe, ni ukwishyura ibihumbi 60,000 Frw.

    Mu matike yashyize ku isoko harimo n'amatike y'ahazwi nka 'Ground Floor', aho abafana bazaba begereye urubyiniro, ndetse babasha kuvugisha The Ben, no kwifotozanya na The Ben uko bashaka, ni ukwishyura ibihumbi 15 Frw.

    Muri aya matike kadi harimo, itike ya 'Corporate Corner' yagenewe abaterankunga, abaganira ibijyanye n'ubushabitsi n'abandi- Aba bazaba bitegeye neza 'Stage' y'aho The Ben azaba ari kuririmbira.

    Ubwo Kendrick Lamar yataramiraga kandi i Kigali mu bitaramo bya 'Move Afrika', ku wa 6 Ukuboza 2024, itike ya macye yari ibihumbi 50 Frw, ni mu gihe iya menshi yari ibihumbi 100 Frw, ndetse harimo n'itike y'ibihumbi 85 Frw.

    Mu Ukwakira 2023, ubwo itsinda rya Boyz II Men ryataramiraga i Kigali, naryo ryari rifitemo amatike yakoshaga, kuko mu myanya ya 'Silver' itike yaguraga ibihumbi 50 Frw, ni mu gihe iya Gold yaguraga ibihumbi 75 Frw naho iza Diamond zikagura ibihumbi 100.

    Mu kiganiro cyihariye na InyaRwanda, The Ben yumvikanishije ko iki gitaramo yagihuje no kumurika Album ye nshya, kubera ko idasanzwe mu rugendo rwe rw'umuziki, kandi ni nk'urufatiro rw'urugendo rwe mu muziki.

    Ati “Ni Album ifite ubusobanuro bukomeye ku buzima bwanjye. Nibaza ko ari no ku muziki nyarwanda, kuko nzanahatangariza ibintu bikomeye cyane. Nibaza ko nkeneye abantu bose, ko bahagaruka, tugafatanya, tugashyigikirana ku buryo abatuye Akarere k'Afurika y'Iburasirazuba babona ko hari ibintu bikomeye biri gutegurwa.'   

    Ibyamamare bishobora gutungurana muri iki gitaramo cye

    The Ben birashoboka ko ariwe muhanzi wa mbere wo mu Rwanda ufitanye indirimbo nyinshi na bagenzi be, kuko iyo usubije inyuma amaso usanga arusha indirimbo n'abahanzi bo hambere bamamaye mu mateka. Imibare ya hafi igaragaza ko afite indirimbo zirenga 38 yakoranye n'abandi bahanzi.

    Afite indirimbo 'Uzaba uzaba' yakoranye na Roger, 'Sinarinkuzi', 'Sibeza' na 'Thank you my God' yakoranye na Tom Close, 'Karibu sana' na 'Inzu y'ibitabo' yakoranye na Diplomat, 'Impfubyi' yakoranye na Bull Dogg, 'Rahira' yakoranye na Liza Kamikazi;

    Lose Control, Ndi uw'ikigali na Jambo yakoranye na Meddy, 'For Real' yakoranye na Igor Mabano, Ngufite k'umutima na Muruturuturu yakoranye n'umuraperi Bushali, 'Kwicuma' yakoranye na Jay Polly na Green P,

    'Nkwite nde' yakoranye na Adrien Misigaro, 'Zoubeda' yakoranye na Kamichi, 'Tugumane' yakoranye na Uncle Austin, Ijambo nyamukuru, Ndi uw'ikigali na Africa Mama Land yakoranye n'umuraperi K8 Kavuyo, 'Inkuba Remix' yakoranye na Riderman.

    'Karara' yakoranye na Neg g the general, 'Ntacyadutanya' na Priscilla, 'Why' na Diamond, 'Can't get enough' na Otile Brown, Sheebah (Binkolera), Butera Knowless (Mbahafi), Rema Namakula (This is Love), B2C (No You No Life),

    Ben Kayiranga (Only U), Christo Panda (Ashit), Mucoma (Umutoso), ⁠Babu (GoLo), ⁠Yvan Buravan ndetse na Mike Kayihura (Ihogoza), ⁠Kid Gaju (Kami), Bac T (Ice Cream), Ally Soudi (Umwiza wanjye), 'Imvune z'abahanzi, ⁠Ommy Dempoz (I got you) n'izindi.

    InyaRwanda yabonye amakuru avuga ko mu kwitegura igitaramo cye, bamwe mu bahanzi bakoranye indirimbo mu bihe bitandukanye bashobora kuzatumirwa kuririmba.

    Ariko kandi andi makuru avuga ko hari abahanzi bakoranye indirimbo kuri Album ye, bashobora kuzaririmba muri iki gitaramo. Biranashoboka cyane, ko hari abahanzi bakoranye mu bihe bitandukanye, bagahurira mu ndirimbo bazitabira iki gitaramo.

    Ikindi, ni uko hari amakuru avuga ko hari indirimbo yakoranye n'abahanzi bakomeye mu Rwanda ndetse n'abo mu Karere, bashobora kuzagaragara bwa mbere bayiririmbana imbona nkubone mu gitaramo azakorera muri BK Arena.


    The Ben yagaragaje ibiciro byo kwinjira mu gitaramo cye, harimo imyanya y'abantu 25 yishyurwa Miliyoni 1.5 Frw (Muri iyi myanya, umuntu umwe yishyura umuntu yishyura ibihumbi 60 Frw)  

    Mu Ukuboza 2023, Kendrick Lamar ataramira i Kigali, mu gitaramo cye harimo itike y'ibihumbi 100 Frw 

    KANDA HANO UREBE AMASHUSHO Y’INDIRIMBO ‘PLENTY’ YA THE BEN

    “>

    Source : https://inyarwanda.com/inkuru/149379/harimo-itike-ya-miliyoni-nigice-the-ben-agiye-gukorera-muri-bk-arena-igitaramo-gikosha-149379.html

  • Inzovu zirenga 350 zarapfuye mu buryo budasobanutse mu majyaruguru ya Botswana #rwanda #RwOT

    Mu mwaka wa 2020, inzovu zirenga 350 zarapfuye mu buryo budasobanutse mu majyaruguru ya Botswana, ahanini mu karere ka Okavango Delta.

    Nyuma y'ubushakashatsi bwimbitse, byagaragaye ko impamvu nyamukuru yari amazi yandujwe n'ubwoko bw'ibihumyo byitwa cyanobacteria cyangwa alijeyiti (toxic algae), byakuriye mu byuzi inzovu zahahiraga.

    Ibi byago byatewe n'ihindagurika ry'ikirere, aho umwaka w'amapfa akomeye (2019) wakurikiwe n'umwaka w'imvura nyinshi (2020), bigateza ukwiyongera gukabije k'ibi bihumyo mu byuzi.

    Aya mahindagurika y'ikirere yatumye amazi asanzwe ahari ahura n'ibinyabutabire n'ibindi bisigisigi byo hasi, bikabyara aho ibi bihumyo bibasha gukura neza. Ubushakashatsi bwerekanye ko ibi bihumyo byakwirakwiriye cyane mu mazi yegeranye n'ahabonetse ibisigazwa by'inzovu.

    Icyo gikorwa cyerekana uburyo ihindagurika ry'ikirere ryagize uruhare mu kwangiza ubuzima bw'inyamaswa n'ibidukikije, kandi rigaragaza akamaro k'uburyo bwo gukurikirana ireme ry'amazi hakoreshejwe ikoranabuhanga, nk'amasatellite, kugira ngo hirindwe ingaruka nk'izi mu gihe kizaza.

    Source : https://kasukumedia.com/inzovu-zirenga-350-zarapfuye-mu-buryo-budasobanutse-mu-majyaruguru-ya-botswana/

  • Nzafashwanayo Jean Claude na Ingabire Diane irushanwa ryiswe Human Rights Race ryabereye I Rubavu #rwanda #RwOT

    Kuri uyu wa Gatandatu mu karere ka Rubavu habereye isiganwa ryiswe 'Human Rights Race' ryateguwe ku bufatanye bw'ishyirahamwe ry'umukino wo gusiganwa ku magare, FERWACY na Komisiyo y'igihugu y'uburenganzira bwa muntu.

    Ni Isiganwa ryakinwe rizenguruka mu mujyi wa Rubavu (circuit) ryitabirwa n'ibyiciro by'abagabo n'abagore, abari munsi y'imyaka 23 mu ngimbi n'abangavu.

    Ni ku nshuro ya kabiri iri siganwa rikinwa kuko  irindi ryaherukaga muri 2022 rikinwa n'ingimbi n'abangavu gusa rikegukanwa na Mwamikazi Djazilla na Uhiriwe Espoir ribera i Gisagara.

    Mu kiciro cy'abagabo regukanywe na Nzafashwanayo Jean Claude wa Benediction Club akurikirwa na Bigirimana Jean Nepo wa May Stars naho umwanya wa Gatatu wegukanwa na Uwiduhaye wa Benediction Club.

    Mu bagore Ingabire Diane ukinira Canyon SRAM Generation yasoje ayoboye, akurikirwa na Nirere Xaverine wa Team Amani na Nzayisenga Valentine wa Benediction Club asoza ku mwanya wa Gatatu.

    Abasore bari munsi y'imyaka 23, bari bayobowe na Bigirimana Jean Nepo ukinira May Stars, uwa kabiri ni Masengesho Vainqueur akurikirwa na Uhiriwe Espoir bose bakinana muri Benediction Club.

    Ingimbi zitwaye neza ni Nshimiyimana Phocas wa Benediction Club, Byusa Pacifique wa Les Amis Sportifs na Niyonkuru Yassin bakinana.

    Abangavu basoje bayoboye ni Umutoni Sandrine Bugesera CT, Muhoracyeye Clarisse Sina Cycling) na Nyiribambe Acquerine wa Bugesera CT.

    The post Nzafashwanayo Jean Claude na Ingabire Diane irushanwa ryiswe Human Rights Race ryabereye I Rubavu appeared first on RUSHYASHYA.

    Source : https://rushyashya.net/nzafashwanayo-jean-claude-na-ingabire-diane-irushanwa-ryiswe-human-rights-race-ryabereye-i-rubavu/?utm_source=rss&utm_medium=rss&utm_campaign=nzafashwanayo-jean-claude-na-ingabire-diane-irushanwa-ryiswe-human-rights-race-ryabereye-i-rubavu

  • Abarenga 300 ni bo bamaze kungukira muri Lift Her Up, yubakira abagore ubushobozi – #rwanda #RwOT

    Hahugurwa abagore bari mu kazi, bagafashwa guhatanira imyanya y'ubuyobozi, hagategurwa abarangije kaminuza guhatana ku isoko ry'umurimo n'abikorera bafite imishinga mito bakerekwa uko bayagura.

    Lift Her Up yatangijwe mu 2022 na Salma Habib Nkusi usanzwe ari Umuyobozi wa Gate Consulting Group, ikigo gitanga ubujyanama mu bucuruzi n'ubuyobozi.

    Nkusi ati 'Umugore agira inshingano nyinshi zituma atekereza ko bigoye kuzamuka mu buyobozi nk'uko umugabo yazamuka. Ibyo ubibona no mu bana bakiva ku ishuri, aho icyizere umwana w'umukobwa aba yifitiye ari gike kabone nubwo aba asoje kwiga.'

    Muri gahunda ya Lift Her Up, bagira igice gitegura uwo mwana w' umukobwa usoje kaminuza guhatana ku isoko ry'umurimo, icya kabiri gifasha umugore cyangwa umukobwa ushaka kwihangira umurimo kugira ngo abijyemo yiteguye, hakabamo n'icya gatatu cy'abari n'abategarugori bari mu kazi ariko bashaka kuzamuka mu ntera mu mirimo bakora.

    Buri mwaka bategura abagore n'abakobwa bagera ku 100.

    Gate Consulting Group ibanza gusesengura ikareba ibyuho biri mu iterambere ry'abari n'abategarugori n'ibyo abo bantu bifuza kumenya, hanyuma buri kwezi bagahuzwa bakigishwa.

    Hazanwa abagore bamaze gutera imbere bari mu myanya ifata ibyemezo, na bo bakereka bagenzi babo inzira banyuzemo n'ibyo bagomba kwitwararikaho ngo batere imbere.

    Ubwo hasozwa icyiciro cya gatatu cya Lift Her Up cyari kimaze amezi icyenda, hari hazanywe, Umuyobozi wa Banki y'Amajyambere y'u Rwanda, BRD, Kampeta Sayinzoga Pitchette n'Umuyobozi wa Canal+ Rwanda, Sophie Tchatchoua baganiriza abitabiriye ku ngendo zabo kugeza babaye mu myanya ifata ibyemezo.

    Ingabire Marie Aimée ukora muri Bralirwa, umaze amezi icyenda ahabwa amahugurwa ati 'Nahawe ubumenyi butandukanye, burimo ubunkuza ubwanjye, mu mwuga no kuba umuyobozi. Ni gahunda nziza twifuza ko yakomeza kwaguka, abagore benshi bakabuhabwa. Urimenya, ukamenya abo ubana na bo, ugakorera ku ntego n'ibindi.'

    U Rwanda rurakataje mu guteza imbere umugore mu buryo zose. Nk'ubu Inteko Ishinga Amategeko Umutwe w'Abadepite irimo abagore bangana na 63,75% mu gihe abagore muri Sena bangana na 53,8% ndetse u Rwanda rwahariye 30% by'imyanya y'Inteko Ishinga Amategeko abagore kandi bakanemererwa guhanganira indi isigaye, bikaba uko no mu nzego za leta.

    Nkusi ati 'Dushaka guteza imbere iyo ngingo,abagore bakiyongera mu nzego zose. Ikindi niba habonetse amahirwe umugore ahatane bitari ukumuha akazi kuko ari umugore ahubwo bibe kuko agashoboye. Ni urugendo ariko tururimo neza.'

    Mu cyiciro cya mbere cy'abana baba basoje kwiga, Gate Consulting Group ikorana na za kaminuza zikabaha abahasoje, mu gihe ku bashaka kwikorera bashyiraho uburyo bwo gusaba, ushaka guhabwa amahugurwa akiyandikisha, na ho abari mu kazi iki kigo kigakorana n'ibigo bakoreramo, ubundi Gate Consulting Group na yo igashaka ababahugura.

    Umuyobozi wa Canal+ Rwanda, Sophie Tchatchoua (ubanza iburyo) n’Umuyobozi wa Banki y'Amajyambere y'u Rwanda, BRD, Kampeta Sayinzoga Pitchette, ni bo baganirije abari n’abategarugori mu gusoza icyiciro cya gatatu cya Lift Her Up

    Salma Habib Nkusi usanzwe ari Umuyobozi wa Gate Consulting Group, wanatangije gahunda ya Lift Her Up (ibumoso), ari kumwe n’Umuyobozi Mukuru wa MTN Rwanda, Mapula Bodibe na we wagize uruhare mu gutanga amahugurwa yo gushishikariza abagore gutinyuka

    Muri gahunda ya Lift Her Up hagiye hazanwa abayobozi b’abagore bakomeye, bakereka bagenzi babo ingero z’ibishoboka ku bijyanye n’uko umwari n’umutegarugori ashoboye

    Salma Habib Nkusi usanzwe ari Umuyobozi wa Gate Consulting Group, yakira abashyitsi batandukanye mu gikorwa cyo gusoza Lift Her Up igamije kubakira abagore ubushobozi

    Salma Habib Nkusi usanzwe ari Umuyobozi wa Gate Consulting Group yatangaje ko bamaze guhugura abari n’abategarugori 300 ku bijyanye no gutinyuka bakiteza imbere mu buryo bunyuranye

    Hatanzwe n’ibihembo ku bagize uruhare muri gahunda ya Lift Her Up igamije kubakira abari n’abategarugori ubushobozi mu bijyanye n’ubumenyi

    Umuhanzi Boukouru ni we wasusurukije abari mu gikorwa cyo gusoza icyiciro cya gatatu cya gahunda ya Lift Her Up igamije guhugura abari n’abategarugori

    Lift Her Up ni umwanya mwiza ku bari n’abategarugori bataragera mu myanya yo hejuru ifata ibyemezo, bakaganira n’abagezeyo

    Umuyobozi wa Gate Consulting Group, Salma Habib Nkusi yavuze ko bamaze guhugura abarenga 300 muri Lift Her Up, anatangaza ko gahunda izakomeza no mu bihe bizaza

    Abari n'abategerugori bari bamaze amezi icyenda bahugurwa muri gahunda ya Lift Her Up bagaragaje ibyo bungutse bigiye kubafasha mu buzima bwabo bwa buri munsi

    Source : http://igihe.com/amakuru/u-rwanda/article/abarenga-300-ni-bo-bamaze-kungukira-muri-lift-her-up-yubakira-abagore

  • Kamonyi-Runda: Hagaragaye Umurambo w'umuntu ugaragara nk'umusore #rwanda #RwOT

    Ahagana mu rukerera rw'uyu wa mbere tariki 09 Ukuboza 2024 mu Mudugudu wa Rubuye, Akagari ka Kabagesera, Umurenge wa Runda hafi n'aho ugabanira n'uwa Rukoma, habonywe umurambo w'umuntu ugaragara nk'umusore. Imvano y'urupfu rwe ntabwo iramenyekana.

    Amakuru intyoza.com ikesha bamwe mu baturage b'Akagari ka Kabagesera akanemezwa n'ubuyobozi bw'Umurenge wa Runda ni uko uyu murambo wagaragaye ubonywe n'abaturage bahanyuze, ariko nta makuru y'icyaba cyateye uru rupfu aramenyekana, ndetse n'imyirondoro ya nyakwigendera ntiramenyekana.

    Aganira n'umunyamakuru, Gitifu Ndayisaba Jean Pierre Egide uyobora Umurenge wa Runda yemeje amakuru y'urupfu rw'uyu muntu ariko avuga ko hataramenyekana icyamwishe, uko yageze aho yasanzwe. Avuga kandi ko bataramenya uwo ariwe kuko nta myirondoro ye iramenyekana.

    Yagize ati' Amakuru twayamenye mu gitondo ahagana saa kumi n'igice tuyahawe n'abaturage, kugeza ubu ntabwo aramenyekana, nta myirondoro turamenya ariko turi gukorana n'inzego dukorana kugira ngo hamenyekane amakuru y'ibanze, nta yandi makuru dufite'.

    Kugeza ubwo twakoraga iyi nkuru ahagana ku i saa yine z'uyu wa mbere, inzego zitandukanye zirimo Urwego rw'Igihugu rw'Ubugenzacyaha-RIB ndetse na Polisi bari bakiri ahabonetse uyu murambo.

    intyoza

    Source : https://www.intyoza.com/2024/12/09/kamonyi-runda-hagaragaye-umurambo-wumuntu-ugaragara-nkumusore/

  • Nyamasheke: Umusore w'imyaka 32 akurikiranyweho ingengabitekerezo ya Jenoside – #rwanda #RwOT

    Uyu musore yafatiwe muri gare ya Tyazo, mu Mudugudu wa Nyagacaca, Akagari ka Kibogora, Umurenge wa Kanjongo mu karere ka Nyamasheke ku wa 7 Ukuboza 2024.

    Uyu musore akimara kuvuga aya magambo yahise afatwa n'abasore bakorera muri gare ya Tyazo kuko yanateraga amahane ashaka gukubita uwo yabwiye aya magambo.

    Umuyobozi w'Akarere ka Nyamasheke, Mupenzi Narcisse yabwiye IGIHE ko uyu musore yahise atabwa muri yombi, ndetse banakorana inama n'abaturage aho byabereye babaha ubutumwa bwo kwirinda iki cyaha kibangamiye ubumwe n'ubudaheranwa bw'Abanyarwanda.

    Ati “Nubwo haba habonetse umuntu umwe nk'uriya ni ikintu kiba gikomeye kuko kiganisha ku ngengabitekerezo ya Jenoside, no kugusenya ubumwe bw'Abanyarwanda kandi kubwubaka aribyo bitugejeje kuri iri terambere”.

    Uwagaragayeho iyo ngengabitekerezo ya Jenoside afite imyaka 32.

    Meya Mupenzi yavuze ko kuba umuntu wari ufite imyaka ibiri Jenoside iba yagaragaraho ingengabitegerezo yayo bisobanuye ko ashobora kuba yarayikuye ku babyeyi be, ku bamureze cyangwa akaba yarayikuye ku bayikwirakwiza bifashishije imbuga nkoranyambaga.

    Ati “Iyo umuntu avuze amagambo y'ingengabitekerezo ya Jenoside biba bigaragaza ko atayobotse ubuyobozi bukuru bw'igihugu cyacu, kandi iyo atabuyobotse aba afite abandi ayobotse. Niyo mpamvu twahagurukanye n'inzego z'umutekano tuza kubwira abaturage ngo ntimuzemere umuntu wese washaka kudusubiza inyuma”.

    Imibare ya Minisiteri y'ubumwe bw'Abanyarwanda n'inshingano mboneragihugu igaragaza ko muri uyu mwaka wa 30 Jenoside yakorewe Abatutsi ihagaritswe, ibyaha by'ingengabitekerezo ya Jenoside byongeye kwiyongera kuko mu mezi atatu hishwe abarokotse Jenoside yakorewe Abatutsi batanu mu buryo bugaragaramo ingengabitekerezo ya Jenoside.

    Uyu musore w'imyaka 32 watawe muri yombi akekwaho icyaha cy'ingengabitekerezo ya Jenoside afungiye kuri sitasiyo ya RIB ya Kanjongo, mu gihe iperereza rikomeje.

    Source : http://igihe.com/amakuru/u-rwanda/article/nyamasheke-umusore-w-imyaka-32-akurikiranyweho-ingengabitekerezo-ya-jenoside

  • Imiryango IBUKA, AERG na GAERG-AHEZA yihuje – #rwanda #RwOT

    Ni icyemezo cyatangajwe kuri iki Cyumweru tariki 8 Ukuboza 2024 n'Umuryango IBUKA. Kiri mu rwego rwo gushyira hamwe hagamijwe kongera imbaraga no guhuza ibikorwa mu mikorere y'imiryango y'abarokotse Jenoside yakorewe Abatutsi mu 1994.

    Amakuru IGIHE ifite ni uko hari hashize imyaka irenga itanu iby'izi mpinduka biganirwaho, ndetse inama iheruka guhuza abayobozi b'iyi miryango ibifataho umwanzuro.

    Mu itangazo ryashyizwe hanze, IBUKA yatangaje ko izakomeza guharanira ko amateka ya Jenoside yakorewe Abatutsi atibagirana.

    Iti 'Nyuma y'imyaka 30 Jenoside imaze ihagaritswe, haracyagaragara ingaruka za Jenoside mu Rwanda ndetse no mu mahanga. Umuryango IBUKA ukaba ukomeje Gufata ingamba zo guhangana nazo no kuzikemura. Umuryango IBUKA ufatanyije n'Abanyarwanda muri rusange ndetse n'inshuti z'u Rwanda uzaharanira ko amateka ya Jenoside yakorewe Abatutsi atazibagirana, uzakomeza kuvuguruza abahakana n'abapfobya Jenoside yakorewe Abatutsi.'

    Yakomeje ivuga ko 'Umuryango IBUKA kandi uzakomeza gufatanya na Leta y'u Rwanda muri gahunda nziza y'ubumwe n'ubudaheranwa nk'imwe mu nzira zo kubaka u Rwanda ruzira ivangura iryo ariryo ryose.'

    Nyuma y'icyemezo cyo guhuza iyi miryango Inteko rusange yatoye abayobozi b'Umuryango IBUKA, aho Dr Philbert Gakwenzire yagizwe Perezida, Christine Muhongayire agirwa Visi Perezida wa mbere, Blaise Ndizihiwe agirwa Visi Perezida wa kabiri, Louis de Montfort Mujyambere agirwa Umunyamabanga Mukuru.

    Hatowe kandi Aline Mpinganzima nka Komiseri ushinzwe Urubyiruko, Uburezi n'Umuco, Me Janvier Bayingana yagizwe Komiseri ushinzwe kwibuka, ubudaheranwa, ubutabera no kubaka amahoro arambye.

    Monique Gahongayire yagizwe Komiseri ushinzwe ubuzima, Imibereho myiza no kwimakaza uburinganire. Evode Ndatsikira we yagizwe Komiseri ushinzwe ubushakashatsi, iterambere, kubaka ubushobozi n'ishoramari.

    IBUKA yashinzwe mu 1995 mu rwego rwo guharanira inyungu z'abarokotse Jenoside yakorewe Abatutsi, kubika amateka yayo no guharanira ko itazasubira ukundi. Ikorera mu Rwanda ndetse no hanze y'igihugu.

    Aya mavugurura areba IBUKA yo mu Rwanda kuko imiryango IBUKA yo mu bindi bihugu izakomeza gukora uko byari bisanzwe ariko itahiriza umugozi umwe n'iyi yo mu Rwanda.

    AERG yo yashinzwe n'abanyeshuri 12, bigaga mu cyahoze ari Kaminuza Nkuru y'u Rwanda mu 1996, nyuma iza kugenda yaguka.

    GAERG yo yaje kuvuka mu 2003, ifite intego yo kongerera ubushobozi imiryango y'abarokotse Jenoside yakorewe Abatutsi, gufatanya n'abandi Banyarwanda kurwanya Jenoside n'andi makimbirane hubakwa iterambere ry'u Rwanda.

    Dr Philbert Gakwenzire niwe Perezida wa IBUKA

    Imiryango IBUKA, AERG na GAERG-AHEZA yihuje

    Source : http://igihe.com/amakuru/u-rwanda/Imiryango-IBUKA-AERG-na-GAERG-AHEZA-yihuje

  • Amateka ya Adolf Hitler #rwanda #RwOT

    Adolf Hitler, wavukiye i Braunau am Inn muri Austria ku ya 20 Mata 1889, yabaye umuyobozi ukomeye wa politiki wateye Isi akaga kadasanzwe. Yabaye umuyobozi w'ishyaka ry'Abanazi (Nationalsozialistische Deutsche Arbeiterpartei — NSDAP) n'Umuyobozi Mukuru w'u Budage kuva mu 1933 kugeza mu 1945. Hitler azwi cyane ku buyobozi bwe bw'igitugu, politiki y'ivangura rishingiye ku moko, no guteza intambara y'Isi ya Kabiri (1939-1945).

    Inzira ye ku Buyobozi
    Nyuma y'Intambara y'Isi ya Mbere, aho yari umusirikare w'u Budage, Hitler yafashe umugambi wo kwinjira muri politiki, abikora abitewe no kwinubira amategeko y'i Versailles (Versailles Treaty) n'ingaruka zayo ku Budage. Mu 1923, yagerageje guhirika ubutegetsi mu bikorwa bizwi nka 'Beer Hall Putsch,' ariko biranga aratabwa muri gereza. Muri icyo gihe, yanditse igitabo Mein Kampf, aho yagaragaje amahame ye y'ubutagondwa n'ivangura rishingiye ku moko.

    Nyuma yo kurekurwa, Hitler yakoze ibikorwa bikomeye byo gukangurira abaturage, akoresheje amayeri y'ubuvugizi bushyushye no kwamamaza ibikorwa bye mu buryo bwihariye. Yashinze ishyaka rye ku mahame ya politiki yo guharanira inyungu z'Abadage gusa, ashyiraho gahunda yo kwigarurira ubutaka bwo gukoreraho (Lebensraum) mu Burayi bw'i Burasirazuba, kandi asaba ishyirwaho ry'ubutegetsi bw'igitugu bushingiye ku mwami umwe (Führerprinzip).

    Mu 1933, yatorewe kuba Chancellor w'u Budage, nyuma yaho ashyiraho ubutegetsi bw'igitugu bukuraho demokarasi yose mu gihugu. Yatangije ibikorwa byo kwigarurira ubukungu bw'igihugu no kongera igisirikare, bigamije gutegura intambara nini.

    Amayeri Menshi N'Ubucakura
    Hitler yakoresheje ubucakura n'amayeri menshi mu buryo bw'ubuyobozi no mu ntambara. Mu bijyanye n'intambara, yaranzwe no gukoresha umuvuduko mwinshi mu bikorwa bya gisirikare, bizwi nka Blitzkrieg (intambara y'inkuba), aho ibitero byakozwe mu buryo bwihuse cyane. Ubu buryo bwatumye yigarurira ibihugu byinshi mu gihe gito, birimo Pologne (1939), Ubufaransa (1940), n'ibindi bice by'u Burayi.

    Mu rwego rwa dipolomasi, Hitler yashyizeho amasezerano menshi y'ubufatanye n'ibihugu by'ubutegetsi bw'igitugu nka Ubutaliyani bwa Benito Mussolini n'Ubuyapani, agerageza kandi kwirinda ibitero bivuye ku Burusiya binyuze ku masezerano y'ubufatanye azwi nka Molotov-Ribbentrop Pact. Gusa, nyuma y'igihe gito, yishe ayo masezerano agaba igitero ku Burusiya mu 1941, cyiswe Operation Barbarossa.

    Hitler kandi yakoze ubucakura mu kubiba urwango mu baturage no kubashishikariza kwitandukanya n'amoko atari ayo yashakaga. Yashinze gahunda y'ivangura ry'amoko, ikaba yarateye Jenoside yakorewe Abayahudi izwi nka Holocaust, aho abantu basaga miliyoni 6 bishwe mu buryo bwa kinyamaswa.

    Ubugambanyi N'Iherezo rye
    Intambara y'Isi ya Kabiri yaje kurangira nabi ku Budage bitewe no gutakaza ingufu za gisirikare, igitero cyinshi cyagabwe n'Abanyamerika, Abongereza, n'Abasoviyeti. Mu 1945, ubwo Abasoviyeti bari bageze i Berlin, Hitler yiyahuye ku ya 30 Mata, asiga isi mu bibazo byinshi.

    Inyigisho
    Amateka ya Hitler ni isomo rikomeye ku ngaruka z'ubutegetsi bw'igitugu, ivangura, no guha icyuho urwango. Ni amateka agaragaza ko amayeri n'ubucakura bishobora kwigarurira imitima y'abaturage, ariko ntibihoraho ubuziraherezo. Amahoro n'ubwumvikane ni byo bikwiye gushyirwa imbere kugira ngo isi ibone iterambere rirambye.

    Source : https://kasukumedia.com/amateka-ya-adolf-hitler/