Author: webrwanda

Ibi yabigarutseho mu biganiro nyungurana bitekerezo byari bigamije kurebera hamwe uko hakurwaho inzitizi zidashingiye ku misoro, mu rwego rwo kwagura ubucuruzi mu Rwanda. Byateguwe n'Urugaga rw'Abikorera ku bufatanye na Minisiteri y'Ubucuruzi n'Inganda.

Umuyobozi w'ishyirahamwe rishinzwe ubwikorezi bw'ibintu, Mazimpaka Mohammed, yavuze ko 'Twari dufite ikibazo cy'uko nta makamyo ahagije yari ahari ,gusa aho tubikemuriye tukayabona nonone havutse ikindi kibazo cy'uko nta hantu ho guparika hahari kuko ahasanzwe Leta yarahadukuye itubwira ko bitemewe gukorera indi mirimo mu bishanga'.

Minisitiri Prudence Sebahizi mu gusubiza, yavuze ko icyo atari ikibazo cyo guhagurutsa Leta ko ubwabo bagakwiye kugishakira umuti.

Ati 'Igiciro cya parikingi gishobora kuba ari gito ugereranyije no kugura ikamyo imwe, rero abashoramari batanu bifatanyije bakegera ubuyobozi bakabagezaho igitekerezo bafite ntabwo Leta yabura ubutaka bwo kubaha bagakoramo parikingi y'amakamyo yabo'.

Yavuze ko gukura amakamyo mu mujyi ari umwanzuro wari ukwiye kandi watanze igisubizo cyane cyane mu kugabanya impanuka mu muhanda ndetse n'akavuyo kagaragaraga bitewe n'imodoka za rukururana zabaga zuzuye mu mihanda.

Yavuze ko kuba waba ufite iduka muri Matewusi bitavuzeko ikamyo ihetse kontineri izaza igapakururira mu mujyi, ko ahubwo igomba kujya guparika ahabugenewe hanyuma ibicuruzwa bikazanwa mu modoka nto idashobora guteza ibibazo mu mujyi.

Yasoje avuga ko bazakorana n'Akarere ka Rwamagana mu kubashakira ubutaka buhagije bwo gukoramo parikingi.

Minisitiri w'Ubucuruzi n'Inganda, Prudence Sebahizi, yashyize umucyo ku kibazo cya parikingi y'amakamyo cyagaragajwe n'abacuruzi

Iyi ndwara idasanzwe mu buhinzi bw'icyayi yatangiye kumenyekana mu myaka ibiri ishize, ariko abantu ntibahita bayisobanukwa, aho babonaga icyayi cyuma bitazwi icyabiteye.

Nyuma byaje kugaragara ko biterwa n'udukoko tumeze nk'ibishorobwa, ndetse bimenyekana ko buturuka ku kuba ubutaka bufite ubusharire bwo hejuru.

Umwe mu bahinzi b'icyayi ufite igice cya hegitari, waganiriye na IGIHE, yavuze ko iyo ndwara y'igishorobwa yabagoye kuko iyo yateye mu murima bitangira icyayi kipfunyika amababi, umusaruro ukabura, bikageza n'aho cyuma burundu bigasaba kukirandura.

Ati 'Iyo bijemo icyayi kiripfunyika amababi, ndetse kikanuma. Iyo urimbuye igiti usanga harimo ibishorobwa mu mizi, ubu usanga turi kubitoragura. Twabuze imiti yakirwanya, ubona ko uwabitera nk'umuti wa DDT n'uko itakibaho, cyangwa se simikombe byapfa, ariko batubwiye ko bitaba ari byo kuko byakwangiza n'amababi yo gusarura.''

Yakomeje avuga ko byabahombeje kuko byatubije umusaruro babonaga, ndetse hakabaho no kurandura ibiti byeraga, ibyo baheraho basaba ubuyobozi kubafasha gutera ikindi aho cyaranduwe.

Umuyobozi wa KOBACYAMU, Mukanzirabatinyi Marthe, ibumbye hamwe abahinzi 6100 bo mu mirenge ya Uwinkingi na Kitabi bahinga icyayi kuri hegitari 800, nawe yavuze ko iyi ndwara yadutse mu cyayi cyabo babona kiba umuhondo, kigahunguka amababi, ndetse bikanuma, imirima igasigara ari ibitaru.

Ngo nyuma hakozwe ubushakashatsi, babona ko ari ibishorobwa biza mu butaka bikarya imizi y'icyayi kikageza ubwo cyuma, aho hegitari 300 muri 800 zifitwe n'abaturage, zarwaye.

Ati 'Twagiye mu mirima, ducukuye dusanga mu butaka byandagayemo, turabicukura, tunatekereza kubitera imiti yica udukoko, ariko abahanga mu buhinzi batubwira ko byakwica n'utundi dufite umumaro, twigira inama yo kujya tubitoragura.''

Mukanzirabatinyi yakomeje avuga ko byaje kugaragara ko umuti urambye w'iki kibazo ari ukurwanya ubusharire bw'ubutaka haterwamo ishwagara, gusa ariko ikaba ihenze itapfa kugurwa mu bushobozi bwa koperative, aho ahera asaba ubufasha bw'akarere kugira ngo babe bayihabwa kuri nkunganire ya Leta, maze babashe kuyinyanyagiza ahari ibyo bishorobwa.

Umuyobozi w'Akarere ka Nyamagabe wungirije ushinzwe ubukungu, Habimana Thaddée, yabwiye IGIHE ko iki kibazo bakimenye kandi bari gukorana n'inzego zibishinzwe kugira ngo zitange iyo shwagara ikenewe, ndetse ikazanaterwa mu mirima hisunzwe imiganda kugira ngo igikorwa cyihute.

Ati 'Twasanze ari ikibazo giterwa n'ubutaka burimo ubusharire bwinshi. Tunamenya ko inshwagara yabikuraho, kandi turanayifite, tuzakora ku buryo iterwa vuba ku muganda ubuso bwose bwarwaye.''

Ubusanzwe Akarere ka Nyamagabe karangwamo ubutaka busharira, aho byibura buri mwaka haterwa ishwagara isaga toni 4000 mu rwego rwo kuburwanya, ariko bikaba ari ubwa mbere igiye guterwa harwanywa ibyo bishorobwa.

Ubwo hizihizwaga Umunsi Mukuru w'Umuhinzi w'Icyayi mu ruganda rw'icyayi rwa Kitabi, ku wa 19 Ukuboza 2024, hatangajwe ko umusaruro ari witezwe wagabanutseho 11% kuko ubu uri kuri 89%, aho mu byateye iryo gabanuka harimo n'icyonnyi cy'bishorobwa.

Kugeza ubu ariko, Icyayi cyo mu ruganda rwa Kitabi gikomeje kwesa imihigo mu bwiza, kuko cyabaye icya mbere mu Karere k'Ibiyaga Bigari(EAC), gihize izindi zirenga 256.

Uruganda rw'icyayi rwa Kitabi, rufite ubuso buhingwaho bungana na hegitari 1600, kimwe cya kabiri cyabwo ari icy'abaturage bari muri koperative.

Uruhare w'icyayi mu iteramberery'igihugu rurigaragaza, dore ko mu mwaka wa 2023/2024 mu Rwanda hinjiye amadevize hafi miliyoni 115$ agikomokaho.

Mu myaka itanu iri imbere(NST2) hari gahunda yo gukuba kabiri umusaruro w'icyayi, binyuze mu kongera ubuso gihingwaho no kongera uboneka kuri hegitari, aho hifuzwa ko hegitari imwe yakagombye kwerahp toni 12, mu gihe kugeza ubu hagisarurwaho toni ziri hagati y'eshatu n'esheshatu gusa.

Icyayi cy’uruganda rwa Kitabi giherutse kuba icya mbere ku isoko rya Mombasa muri Kenya, gihize icy’izindi nganda 256 zo muri EAC

Abahinzi babanje kujya bajya mu mirima yabo, bagatoramo ibishorobwa bakabita ku ruhande ariko bikanga ntibishiremo

Abayobozi batandukanye barimo Kabeja Alain, Umuyobozi Mukuru wa Rwanda Mountain Tea ibumbiye hamwe inganda icyenda z’icyayi mu Rwanda bari bitabiriye ibirori

Kuri uyu Munsi Mukuru w’Umuhinzi w’icyayi, hagaragajwe uruhare rw’umuhinzi n’umusoromyi w’icyayi mu iterambere ry’ubwiza n’ubwinshi bw’icyayi kijya ku isoko mpuzamahanga

Visi Meya ushinzwe ubukungu muri Nyamagabe, Habimana yavuze ko hagiye kwifashishwa imiganda, hagaterwa ishwagara ahageze ibishorobwa hose

Umuyobozi wa KOBACYAMU igemura icyayi mu ruganda rwa Kitabi, Mukanzirabatinyi Marthe, yavuze ko uburwayi bw’icyayi bagize ari ubwa mbere bari babubonye

Hari mu birori ngarukamwaka by'umunsi mukuru w'umuhinzi w'icyayi byabereye ku ruganda ku wa 19 Ukuboza 2024 ku nsanganyamatsiko igira iti 'Ubwiza n'ubwinshi bw'umusaruro w'icyayi, isoko y'imibereho myiza y'umuhinzi n'iterambere rirambye ry'ubukungu bw'igihugu cyacu'.

Uruganda rw'Icyayi rwa Gatare rwatangiye mu 2017 ruza ari igisubizo ku bahinzi b'icyayi bo mu Karere ka Nyamasheke bagorwaga no kukijyana ku ruganda rwa Gisovu mu Karere ka Karongi.

Eric Bugingo, uri mu bagize inama y'ubutegegetsi RMT, wanayihagarariye muri ibi birori by'umunsi mukuru w'umuhinzi w'icyayi i Nyamasheke yasabye abahinzi b'icyayi kucyongera mu bwiza no mu bwinshi kuko bizatuma n'amafaranga binjiza yiyongera.

Ati 'Uyu mwaka Leta yahize ko ishaka kuzabona miliyoni 130$ zivuye muri toni z'icyayi ibihumbi 43. Umuyobozi w'icyayi yigeze kuvuga ko muhiga kuzabona toni 2000, ubwo ni 2000 bihumbi 43. Ese dukubye kabiri, nyakubahwa muyobozi wa COTHEGA tukabona miliyari 4Frw ntibyadushimisha? ku mishahara bavuze ko byageze kuri miliyari imwe uko bizikuba kabiri na yayandi azikuba kabiri'.

Muberandinda Helson umaze imyaka irenga 10 ahinga icyayi yashimye iterambere bamaze kugeraho nk'abahinzi b'icyayi, avuga ko Uruganda rw'Icyayi rwa Gatare rutaraza icyayi bakigurishaga 70Frw ku kilo cy'amababi ariko ubu kikaba kigeze kuri 270Frw'.

Ati 'Ubu ndi umuhinzi uza hano muri SACCO nkaka miliyoni n'igice nkayishyura neza. Inzu yanjye narayivuguruye nshiramo intebe nziza z'amadive ku buryo umuyobozi w'akarere ansuye ntabura aho mwicaza'.

Umuyobozi w'Uruganda rw'Icyayi rwa Gatare, Gasarabwe Jean Damascene yavuze ko mu mezi 11 y'umwaka wa 2024, abaturage ba Nyamasheke binjije arenga miliyari 3,7Frw babikesha uru ruganda. Muri yo harimo arenga miliyari 2,4Frw yishyuwe amababi y'icyayi, miliyoni 946Frw yahembwe abakozi b'uruganda, miliyoni 163Frw yaguze ibikoresho biboneka mu karere na miliyoni 161Frw yahembwe abasoromyi b'icyayi.

Abaturiye uruganda barushimira ko rwarabubakiye ivuriro, Urugo Mbonezamikurire basigamo abana igihe bagiye mu mirimo mu cyayi ndetse rukaba rwaranabegereje amazi meza mu rwego rwo guteza imbere isuku n'isukura.

Gasarabwe yavuze ko ibi byose bitari gushoboka iyo hatabaho ubuyobozi bwiza burangajwe imbere na Perezida wa Repubulika y'u Rwanda, Paul Kagame.

Umuyobozi wa Koperative y'abahinzi b'icyayi ba Gatare, COTHEGA, Mukantagungira Jeannette yashimiye ubuyobozi bwa Rwanda Mountain Tea bwatekereje kubaka uruganda mu murenge wa Karambi ahari imisozi yambaye ibihuru.

Ati 'Icyayi cyatubereye inka idateka, ubu buri kwezi twese tujya guhembwa nk'abakozi ba Leta'.

Nubwo biri uko ariko uruganda rw'icyayi rwa Gatare rukoresha 50% by'ubushobozi bw'imashini rufite bitewe n'uko umusaruro w'amababi y'icyayi ukiri muke.

Ku mpuzandengo umusaruro w'amababi y'icyayi uri hagati ya toni enye na toni eshanu kuri hegitari, mu gihe ababisobanukiwe bavuga ko iyo cyitaweho neza umusaruro kuri hegitari ushobora kugera kuri toni 12.

Umujyanama wa Komite nyobozi y'Akarere ka Nyamasheke, Mutarugera Munanira Dieu Donne yavuze ko icyayi ari igihingwa gifitiye akamaro abaturage ba Nyamasheke, asaba abahinzi bacyo kucyongera.

Ati 'Icyo dusaba abaturage ni uko icyayi gihari kigomba kwitabwaho hagashakwa ifumbire kugira ngo bwa buryohe bwiyongere ikindi ni ukongera ubuso bw'ahahingwa icyayi kugira ngo n'umusaruro urusheho kwiyongera'.

Mu mwaka ushize w'ingengo y'imari icyayi cyinjirije u Rwanda miliyoni 114,8$. Uyu mwaka u Rwanda rwihaye intego yo kuyongera akagera kuri miliyoni 130$.

Imisozi ya Nyamasheke yahozeho ibihuru byihishamo imibu yahinzweho ikawa

Bamwe mu bakozi ba Rwanda Mountain Tea bari babukereye muri ibi birori

Abasoromyi n’abahinzi b’icyayi bizihije umunsi w’umuhinzi w’icyayi banywa ku cyayi

Umunsi w’umuhinzi w’icyayi witabiriwe n’abahinzi n’abasoromyi bacyo

Nta muhinzi w’icyayi cyangwa umusoromyi wacyo wiciwe n’inyota n’icyaka muri ibi birori

Umuyobozi wa COTHEGA, Mukantagungira Jeannette yashimangiye ko icyayi cyababereye inka idateka bakaba basigaye bahembwa buri kwezi

Umuyobozi w’Uruganda rw’icyayi rwa Gatare yavuze ko iterambere bamaze kugeraho bafatanyije n’abahinzi b’icyayi barikesha ubuyobozi bwiza bw’igihugu

Umujyanama wa Komite Nyobozi ya Nyamasheke, Mutarugera Munanira Dieu Donne yasabye abahinzi kongera ubuso buhinzeho icyayi

Eric Bugingo yasabye yasabye abahinzi b’icyayi gukuba kabiri umusaruro kugira ngo bihute mu iterambere

RMT yahaye Uruganda rw’Icyayi rwa Gatare icyemezo cy’ishimwe

Yabitangaje mu biganiro byahuje urubyiruko rwibumbiye mu muryango w'abaharanira amahoro n'urukundo, PLP rwareberaga hamwe uruhare rwagira mu kurwanya ihohoterwa rishingiye ku gitsina rikigarara.

Dr. Murangira yavuze ko muri ibi bihe bikunze kugaragara ko ibikorwa by'ihohoterwa byinshi bikigaragara, yemeza ko ubufatanye n'urubyiruko buzafasha mu kugira sosiyete izira ihohoterwa rishingiye ku gitsina.

Ati 'Imbaraga zabo, guhanga udushya n'ubumenyi mu by'ikoranabuhanga ni igikoresho gihambaye cyo guhindura sosiyete. Mu kurwanya ihohoterwa rishingiye ku gitsina rero ntitwakwibagirwa uruhare rw'imbuga nkoranyambaga.'

Yasabye urubyiruko kandi kuzitondera kuko ari inkota y'amugi abiri, bityo ko mu gihe zakoreshejwe nabi zishobora gutiza umurindi ibikorwa by'ihohoterwa.

Ati 'Ku rundi ruhande imbuga nkoranyambaga zigira ingaruka, ni inkota y'amugi abiri ishobora gukoreshwa nabi mu gukora ibyaha birimo kuzomerwa (Cyber bullying), guharabika umuntu ku mbuga nkoranyambaga, gukwirakwiza ibihuha, gusebya umuntu ku bw'imiterere y'umubiri we n'ibindi.'

Yarusabye kurwanya abakoresha imbuga nkoranyambaga mu buryo butari bwo bagakora ibyaha byibasira bagenzi babo birimo n'iby'ihohoterwa rishingiye ku gitsina.

Yongeye kugaragaza ko hari imvugo zidakwiriye gukoreshwa mu Rwanda zirimo 'Men are trash' imaze iminsi ikoreshwa cyane ku mbuga nkoranyambaga, hagamijwe kugaragaza ko abagabo barangwa n'ibikorwa bibi by'ihohotera rishingiye ku gitsina.

Yashimangiye ko kandi hari n'abandi usanga ijambo Feminist cyangwa se feminism, ryumvikanye nabi kuri bamwe, bakarifata nko guhangana n'abagabo.

Yavuze ko abantu bose bakwiye kumva neza ko ihohoterwa iryo ari ryo ryose rishingiye ku gitsina ridakwiriye, uwo ryaba rikorewe wese.

Ambasaderi wa Israel mu Rwanda, Einat Weiss, yagaragaje ko kuganira n'urubyiruko ku birebana n'ihohoterwa rishingiye ku gitsina bigamije kububakamo imbaraga zo kubirwanya no kurutinyura kuvuga no gutanga amakuru.

Ati 'Icya mbere ni uko umubare munini w'Abanyarwanda ari urubyiruko. Ntekereza ko ikintu gikomeye bagomba kuzirikana ari uko bafite imbaraga muri bo. Kubigisha ni ukugira ngo dufatanye kurwanya ihohoterwa rishingiye ku gitsina rikigaragara.'

Yavuze kandi ko urubyiruko rw'u Rwanda rwifitemo gukunda igihugu bityo ko icyo rwiyemeje rutabura ku kigeraho.

Yemeje ko Ambasade ya Israel mu Rwanda ikomeje kugira uruhare mu bikorwa bigamije kurwanya ihohoterwa rishingiye ku gitsina birimo gutegura ibiganiro, kubakira urubyiruko ubushobozi no guteza imbere amatsinda y'abagore.

Kabasinga Umunyana Beline, yemeje ko uruhare rw'urubyiruko mu kurwanya ihohoterwa ari ugutinyuka kuvuga mu gihe hari ihohoterwa rwakorewe ndetse no kwihagararaho.

Ati 'Uko tutabivuga ni ko byica ubuzima bwacu. Uruhare rwacu rero ni ukwitinyuka. Niba hari umuntu runaka nisanzuraho nkamuganiriza ibyambayeho kuko nintabivuga nta muntu uzamenya ibyambayeho. Nimbikubwira rero uzamenya aho uhera umfasha ndetse tukanabishyikiriza inzego zibishinzwe zikabikurikirana.'

Dan Shema yavuze ko nk'urubyiruko rwiteguye gukoresha imbuga nkoranyambaga mu nzira nziza no kwigisha urubyiruko ingaruka rushobora guhura nazo mu gihe rwaba rwishoye mu kuzikoresha nabi.

Umuyobozi Mukuru wa Peace and Love Proclaimers, Israel Nuru Mupenzi, yatanze ijambo ry’ikaze

Umuvugizi wa RIB, Dr. Murangira B. Thierry, yerekanye ko imbuga nkoranyambaga zikoreshejwe neza zishobora gutanga umusanzu mu kurwanya ihohoterwa rishingiye ku gitsina

Amb. Einat Weiss yagaragaje ko urubyiruko rwigishwa ngo rutange umusanzu mu kurwanya ihohoterwa rishingiye ku gitsina rikigaragara

Umukozi muri GIZ, Jean Jacques Iradukunda, yerekana uko urubyiruko rukwiye kubakirwa ubushobozi

Hagaragajwe ko urubyiruko rudakwiye gusigara inyuma muri ibyo bikorwa byo kurwanya ihohoterwa

Uwasangije bagenzi be umuvugo ugaruka ku kurwanya ihohoterwa rishingiye ku gitsina

Umukozi muri UNDP, Ushinzwe Imiyoborere idaheza, Kirenga Clement, yavuze ko ihohoterwa rishingiye ku gitsina rikwiye guhagurukirwa kandi ko hari gufatwa ingamba zitandukanye zigamije kurirwanya

Umunyamabanga Nshingwabikorwa w’Inaba y’Igihugu y’Abagore, Umubyeyi Marie Mediatrice, ari mu batanze ibiganiro

Kabasinga Umunyana yagaragaje ko urubyiruko rukwiye gutinyuka kuvuga ihohoterwa ruhura naryo

Urubyiruko ruvuga ko no mu kazi hakigaragara ihohoterwa rishingiye ku gitsina

Urubyiruko rwagaragaje ko hari ibikorwa by’ihohoterwa rishingiye ku gitsina rikigaragara

Buri tsinda ryahawe ingingo riganiraho

Uru rubyiruko rwaganirijwe no mu matsinda

Urubyiruko rwasabwe gutinyuka no gutanga amakuru ku ihohoterwa rishingiye ku gitsina

Urubyiruko rwasabwe kwirinda gukoresha nabi imbuga nkoranyambaga

Ambasaderi wa Israel mu Rwanda, Einat Weiss, aganira n’urubyiruko

Amafoto: Kwizera Hervé

Hasohotse indirimbo zamaze Abanyarwanda irungu zirimo nka 'To you' ya Bwiza, 'Ntukababare' ya Clarisse Karasira ikubiyemo ubutumwa bw’ihumure, yasohotse muri Mutarama 2024. 

Ni umwaka kandi abarimo umukinnyi wa filime ‘Nzovu’ bamaze irungu benshi, binyuze mu biganiro bya Youtube agaragaramo mu bihe bitandukanye.

Ni umwaka kandi waranzwe n'ibitaramo birimo nka MTN Iwacu Muzika Festival byabereye mu turere dutandukanye tw’u Rwanda, birimo Musanze, Gicumbi, Nyagatare, Ngoma, Bugesera, Huye, Rusizi na Rubavu, byitabirwa n’abahanzi batandukanye ndetse n’abakunzi b’umuziki benshi.

Habaye kandi ibirori bya Rwanda Day 2024, aho umuhanzi Bruce Melodie yitabiriye iki gikorwa cyabereye i Washington DC, atanga ikiganiro yerekaniyemo iterambere ry’umuziki w’u Rwanda mu myaka 30 ishize.

Uyu mwaka kandi waranzwe no kugaragara kw’impano nshya mu muziki nyarwanda. Ni umwaka kandi waranzwe n'umubare munini w'indirimbo zivuga ku matora ya 2024. 

Abahanzi batandukanye basohoye indirimbo zifite ubutumwa bujyanye n’amatora, harimo nka “Contre succès” ya Riderman. Abahanzi bashyize imbaraga mu gukora amashusho y’indirimbo zifite ireme.

Umuhanzi The Ben yatangaje ko umuziki w’u Rwanda ufite ejo hazaza heza, ashingiye ku kuba hari abanyempano bashya bari kwigaragaza muri uru ruganda.

Padiri Jean François yigeze kuvuga ko kimwe mu bintu byafasha umuziki w’u Rwanda gutera imbere ukagera ku rwego mpuzamahanga, harimo kuririmba ururimi rwumvwa na benshi.

InyaRwanda yakoze urutonde rw'indirimbo 10 zakunzwe mu 2024, yifashishije abasomyi bayo ku mbuga nkoranyambaga.

1.Azabatsinda Kagame

Umuhanzikazi wahanze iyi ndirimbo nawe aracyayifiteho urwibutso rudasaza! Yamuhinduriye amateka, kugeza ubwo yanaramukanyije na Perezida Kagame.

Byarenze ibyo gusa se? Byageze n'aho umuryago FPR-Inkotanyi umwubakira inzu mu rwego rwo kumushimira.

'Azabatsinda Kagame' yabaye indirimbo idasanzwe mu rugendo rw'uyu mubyeyi utuye mu Karere ka Kamonyi mu Ntara y'Amajyepfo. Ndetse, mu gusoza ibikorwa byo kwiyamamaza, abahanzi bose baririmbye bayisubiyemo imbere y'Umukuru w'Igihugu.

Tariki 10 Ukwakira 2024, uyu mubyeyi yashyikirijwe inzu yubakiwe, ndetse abana be bose bazishyurirwa amashuri, kandi azahabwa n'inka

Bisa n'aho buri gihe cy'amatora y'Umukuru w'Igihugu mu Rwanda kigira indirimbo yihariye iba nk'isereri mu mitwe ya benshi. Nko mu 2017, indirimbo yitwa 'Ndandambara yandera ubwoba' ya Nsabimana Leonard yaciye ibintu kugeza ubwo nawe imufunguriye amarembo ntiyongera kwitwa umuhanzi wo mu Ntara.

Béata Musengamana wahimbye iyi ndirimbo yamugize icyamamare, atuye mu Mudugudu wa Rugamara, mu Kagali ka Kidaho, mu Murenge wa Nyamiyaga, mu Karere ka Kamonyi, mu Majyepfo y’u Rwanda.   

Asanzwe ari umuhanzikazi, ndetse ni umukuru w’itorero ribyina Kinyarwanda ryitwa 'Indashyikirwa za Nyamiyaga. Ni na we urihanganira indirimbo bijyanye n’insanganyamatsiko bahisemo.

Yigeze kubwira TNT ko yahimbye iyi ndirimbo ‘Azabatsinda Kagame’ bitewe n’uko Abanyarwanda biteguraga kwinjira mu bihe by’amatora y’Umukuru w’Igihugu n’ay’Abadepite.

Yavuze ko yayihimbye ‘kubera ko nashakaga indirimbo izadufasha mu gihe cy’amatora mu gihe cyo kwamamaza’. Musengamana yavuze ko yagiye mu nganzo nyuma yo ‘kureba aho u Rwanda rwavuye n’aho rugeze’. 

Akomeza ati “Buriya kugira ngo umuntu atsinde, ibikorwa bye byonyine ni byo bibanza kwivugira. Rero ni bwo narebye ibyo Kagame Paul yakoze muri uru Rwanda, aho twavuye n’aho tugeze mbona ni ngombwa y’uko intsinzi n’ubundi izongera ikaba iye mba rero nkuhantuye intsinzi mvuga ko azabatsinda Kagame.” Musengamana yavuze ko Paul Kagame yakuye u Rwanda habi ‘none rugeze aheza’.

KANDA HANO UREBE AMASHUSHO Y’INDIRIMBO ‘AZABATSINDA KAGAME’

“> 

2.Niyo Ndirimbo

Indirimbo “Niyo Ndirimbo” ni iy’umuziki nyarwanda yakozwe n’abahanzi Meddy na Adrien Misigaro. Yasohotse ku itariki ya 15 Mutarama 2024, ikaba yarakunzwe cyane mu Rwanda no mu karere.

Meddy na Adrien Misigaro, bombi bazwi mu njyana ya Gospel. Yasohotse ku itariki ya 15 Mutarama 2024.

Amashusho y’iyi ndirimbo ari kuri YouTube, aho amaze kurebwa inshuro zirenga miliyoni imwe. 

Indirimbo ifite ubutumwa bwo guhimbaza Imana, ikangurira abantu kuyiramya no kuyishima

Abakunzi b’umuziki bagaragaje ko iyi ndirimbo ibafasha mu buryo bw’iyobokamana, ikaba yarakunzwe cyane mu nsengero no mu bitaramo bya Gospel.

KANDA HANO UREBE INDIRIMBO YA MEDDY NA ADRIEN MISIGARO

“>

3.Molomita ya Nel Ngabo, Gad na Kenny Sol

Indirimbo “Molomita” ni iy’umuziki nyarwanda yakozwe na Director Gad afatanyije n’abahanzi Nel Ngabo na Kenny Sol.

Iyi ndirimbo yasohotse ku itariki ya 3 Gicurasi 2024, ikaba ari yo ndirimbo ya mbere Director Gad yashyize hanze nk’umuhanzi, nyuma yo kumenyekana cyane mu gutunganya amashusho y’indirimbo z’abandi bahanzi.

“Molomita” ni izina ry’umukobwa, rikaba ari ryo ryahawe iyi ndirimbo. Mu buryo bw’amajwi, iyi ndirimbo irangwa n’ubuhanga bwa Nel Ngabo na Kenny Sol mu miririmbire, hamwe n’ubushobozi bwa Director Gad mu kuyitunganya.

Amashusho y’iyi ndirimbo agaragaza ubuhanga bwa Director Gad mu kuyobora no gutunganya amashusho, bikaba byaratumye ikundwa cyane n’abakunzi b’umuziki nyarwanda.

Ku mbuga nkoranyambaga, iyi ndirimbo yakiriwe neza, aho yagiye ishyirwa kuri za platform zitandukanye nka YouTube, Spotify, na TikTok, ndetse ikaba yarakunzwe cyane n’abakunzi b’umuziki.

Iyi ndirimbo yagiye hanze, ku wa 3 Gicurasi 2024, aho imaze kurebwa n’abantu barenga Miliyoni 6 ku rubuga rwa Youtube. 

KANDA HANO UREBE AMASHUSHO Y’INDIRIMBO ‘MOLOMITA’

“>

4.Plent ya The Ben

Indirimbo “Plenty” ni iy’umuziki nyarwanda yakozwe n’umuhanzi The Ben. Yasohotse mu mezi abiri ashize, ikaba iri mu ndirimbo zikunzwe cyane mu Rwanda no mu karere.

Yanditswe na Niyo Bosco afatanyije na The Ben, itunganywa na Prince Kiiz.

Amashusho y’iyi ndirimbo agaragaramo umukobwa witwa Brunella, uzwiho ikimero n’ubuhanga mu mwuga wo kumurika imideli.

Ibihembo: “Plenty” yegukanye igihembo mu bihembo bya ‘Made In East Music and Media Awards (MIEMMA)’ bitangirwa muri Kenya. 

Iyi ndirimbo izaba iri kuri album nshya ya The Ben ateganya gusohora ku itariki ya 1 Mutarama 2025, mu gitaramo kizabera muri BK Arena.

KANDA HANO UREBE AMASHUSHO Y’INDIRIMBO ‘PLENTY’ IMAZE KUREBWA INSHURO MILIYONI 2.8

“> 

5.Sikosa

Iri mu ndirimbo zateje iserereri; kuko yagiye gusohoka yakomanyije imitwe y'abantu, byanatumye The Ben yiyunga na Coach Gael.

Indirimbo “Sikosa” ni iy’umuziki nyarwanda yakozwe n’abahanzi batatu b’ibyamamare: Kevin Kade, The Ben, na Element Eleéeh 

Yasohotse ku itariki ya 23 Kanama 2024, ikaba yarakunzwe cyane mu Rwanda no mu karere. Yanditswe na Kevin Kade, The Ben, na Element Eleéeh, itunganywa na Element Eleéeh. Amashusho y’iyi ndirimbo yakozwe na Element Eleéeh, ikorerwa mu gihugu cya Tanzania.

REBA HANO AMASHUSHO Y’INDIRIMBO ‘SIKOSA’ IMAZE KUREBWA INSHURO MILIYONI 7.4

“>

6.Jugumila ya Dj Phil Peter, Chriss Eazy na Kevin Kade

Indirimbo “Jugumila” ni iy’umuziki nyarwanda yakozwe na DJ Phil Peter afatanyije na Chriss Eazy na Kevin Kade. Yasohotse ku itariki ya 14 Gashyantare 2024, ikaba yarakunzwe cyane mu Rwanda no mu karere.

Iyi ndirimbo yanditswe na DJ Phil Peter, Chriss Eazy na Kevin Kade, itunganywa na DJ Phil Peter.

Amashusho y’iyi ndirimbo yakozwe na Chriss Eazy, agaragaza ubuhanga bw’aba bahanzi mu kuyobora no gutunganya amashusho.

Ibihembo: “Jugumila” yegukanye igihembo mu bihembo bya ‘Made In East Music and Media Awards (MIEMMA)’ bitangirwa muri Kenya. 

REBA AMASHUSHO Y’INDIRIMBO ‘JUGUMILA’ AMAZE AMEZI 10 ASOHOTSE

 “>

7.Puta ya Bull Dogg na Juno Kizigenza

Indirimbo “Puta” ni iy’umuziki nyarwanda yakozwe n’umuraperi Bull Dogg afatanyije na Juno Kizigenza. Yasohotse ku itariki ya 2 Nzeri 2024, ikaba yarakunzwe cyane mu Rwanda no mu karere. Yanditswe na Bull Dogg na Juno Kizigenza, itunganywa na Prince Kiiizi. 

Amashusho y’iyi ndirimbo yakozwe na Chico Berry, agaragaza ubuhanga bw’aba bahanzi mu kuyobora no gutunganya amashusho.

KANDA HANO UREBE AMASHUSHO Y’INDIRIMBO YA JUNO NA BULL DOGG

“>

8.Wait ya Kivumbi na Axon

Indirimbo “Wait” ni iy’umuziki nyarwanda yakozwe n’umuraperi Kivumbi King afatanyije na Axon. Yasohotse ku itariki ya 10 Mutarama 2024, ikaba yarakunzwe cyane mu Rwanda no mu karere.

Yanditswe na Kivumbi King na Axon, itunganywa na Kivumbi King. Amashusho y’iyi ndirimbo yakozwe na Kivumbi King, agaragaza ubuhanga bwe mu kuyobora no gutunganya amashusho.

Ibihembo: “Wait” yegukanye igihembo mu bihembo bya ‘Rwanda Music Billboard’ muri Kamena 2024, aho yaje ku mwanya wa kabiri nyuma ya “Vole” ya Christopher. 

REBA HANO ‘WAIT’ YA KIVUMBI NA AXON IMAZE KUREBWA INSHURO MILIYONI 6.6

“>

9.Teta ya QD

Indirimbo “Teta” ni iy’umuziki nyarwanda yakozwe na Q.D, umuraperi uzwiho ubuhanga mu njyana ya Afrobeat. Yasohotse mu mwaka wa 2023, ikaba yarakunzwe cyane mu Rwanda no mu karere.

Yanditswe na Q.D, itunganywa na To the Hit Mix and Mastering: Muriro. Amashusho y’iyi ndirimbo yakozwe na Dir_Sanib.

Ibihembo: “Teta” yegukanye igihembo mu bihembo bya ‘IYRICs’ mu mwaka wa 2024. Iyi ndirimbo izaba iri kuri album nshya ya Q.D ateganya gusohora mu mwaka wa 2025.

REBA HANO AMASHUSHO Y’INDIRIMBO ‘TETA’ IMAZE AMEZI 11 ISOHOTSE

“> 

10.Ogera ya Bruce Melodie na Bwiza

Indirimbo “Ogera” ni iy’umuhanzikazi Bwiza afatanyije na Bruce Melodie, yasohotse ku itariki ya 15 Kamena 2024. Iyi ndirimbo ikubiyemo injyana ya Afrobeat, ikaba yarakunzwe cyane mu Rwanda no mu karere.

Yanditswe na Bwiza na Bruce Melodie ndetse na Danny Vumbi.  Yakozwe mu buryo bw'amajwi na Element Eleéeh afatanyije na loader

Amashusho y’iyi ndirimbo yakozwe na Bwiza, agaragaza ubuhanga bwe mu kuyobora no gutunganya amashusho.

Iyi ndirimbo yabaye idarapo ry'umuziki w'aba bahanzi, kuko yacuranzwe igihe kinini, yamamaza Perezida Paul Kagame, ubwo yahataniraga manda ya Kane yo kuyobora u Rwanda. 

Yanabaye indirimbo idasanzwe kuri Bwiza, kuko yari akoranye n'umuhanzi wamutanze mu kibuga cy'umuziki. Ariko yongeye igikundiro kuri aba bombi, kuko mu bikorwa byo kwamamaza umukandida wa FPR-Inkotanyi, yahagurutsaga n'iyonka.

KANDA HANO UREBE AMASHUSHO Y’INDIRIMBO ‘OGERA’ YA BWIZA NA BRUCE

“> 

Bonus Track

-Sowe ya Bruce Melodie

-Abahungu ya Juno Kizigenza

-Bwe Bwe Remix

-Amanota ya Danny Nanone

-Yanitosha ya Israel Mbonyi 

-Birashoboka ko izatoranyijwe atari zo wacyekaga, nawe watanga inyunganizi.

Hashize iminsi mike hagaragaye ubwicanyi bwibasiye abarokotse Jenoside yakorewe Abatutsi mu bice bimwe by'igihugu, abandi baterwa ubwoba binyuze mu nyandiko zidasinyweho zizwi nka 'Tracts', abandi bangirizwa imitungo itandukanye.

Ubu bugizi bwa nabi bwagarutsweho n'inzego nkuru z'igihugu zigaragaza ko ababigizemo uruhare bagomba kubiryozwa mu nzira zose byasaba.

Perezida w'Ihuriro ry'Abagize Inteko Ishinga Amategeko Rikumira Jenoside, Ipfobya n'Ihakana rya Jenoside yakorewe Abatutsi (AGPF), Prof. Dusingizemungu Jean Pierre yabwiye IGIHE ko mu makuru bagenda babona hari ibigirwamo uruhare n'abarangije ibihano bakatiwe n'inkiko kubera uruhare bagize muri Jenoside yakorewe Abatutsi batahindutse.

Ati 'Hari igikorwa cy'uko hari abari barahaniwe icyaha cya Jenoside yakorewe Abatutsi ariko barangije igihano cyabo barimo gusubira mu muryango nyarwanda, hari aho ugenda usanga na bo mu maperereza agenda akorwa cyangwa se mu bimenyetso bimwe na bimwe bigenda bigaragara ko n'abo bantu babiftemo uruhare bikaba bigaragara ko hari ingufu zikwiye kongera gushyirwa mu bikorwa byo gutegura bariya barangije igihano.'

U Rwanda ruteganya ko muri Gashyantare 2025 hazafungurwa ikigo kizajya kinyuzwamo abahaniwe ibyaha bya Jenoside benda kurangiza ibihano bakatiwe kugira ngo bazashobore kwisanga mu muryango nyarwanda.

Prof. Dusingizemungu yahamije ko abafungiwe icyaha cya Jenoside benda kurangiza ibihano baremeye icyaha bakanasaba imbabazi nta kibazo bateza, ibibazo byinshi bivuka ku batarigeze bemera icyaha.

Ati 'Abagorana ni babandi batigeze bemera icyaha n'ubu usanga bagifite iyo ngengabitekerezo hakabaho ko usanga abo ari bo bari mu bikorwa turimo kubona byo guhohotera abacitse ku icumu rya Jenoside yakorewe Abatutsi.'

'Icyo ni igice cyihariye rero gikwiye kwitabwaho mu buryo bw'umwihariko ari na byo tuvuga ko hagomba kubaho ibikorwa byo kubegera ku buryo bw'umwihariko n'ibikorwa byo kubategura bikoze ku buryo bw'umwihariko.'

Yagaragaje ko uburyo igihugu cyakiramo abahungutse n'abavuye mu mitwe y'iterabwoba bakabanza kwigishwa no gusobanurirwa gahunda za Leta bikwiye no gukorwa ku bafungurwa barahamwe n'icyaha cya Jenoside.

Ati 'N'ubundi barabasobanurira ariko twumva ko hashyirwamo izindi ngufu ku buryo bategurwa bagatangira kujya banakora n'ibikorwa bimwe na bimwe, nk'umuganda wabereye ahantu habegereye, bagahuzwa n'imiryango yabo ariko ntibahite bitura mu muryango mugari ahantu bazajya iwabo gutyo gusa batagize ikindi kibategura.'

'Mbere y'uko bamanuka bataha mu mirege yabo bakirwe n'inama z'abaturage z'aho hantu bamenye ko baje, babahe ayo akuru ko baje na bo babahe ijambo babasobanurire uko mu kagari bigenda, bategurwe aho kugira ngo abaturage bazajye bahura n'abo bantu mu nzira gutyo batazi n'uko banaje abantu bamaze imyaka mirongo.'

Imibare igaragaza ko abafungiye ibyaha bya Jenoside barenga ibihumbi 21, biganjemo abataremeye icyaha bagakatirwa gufungwa imyaka 25, 30 no gufungwa ubuzima bwose.

Abato banduriye he?

Senateri Prof. Dusingizemungu yagaragaje ko kuba hari n'urubyiruko rugenda rugaragara mu bikorwa byo guhohotera abarokotse Jenoside yakorewe Abatutsi no kubavutsa ubuzima bivuze ko no mu babyeyi babo igihari.

Ati 'Bituma abantu batekereza ko hari ingengabitekerezo ituruka mu babyeyi ijya mu rubyiruko ukabona ko ingamba zikwiye gukazwa muri urwo rwego rwo gusobanurira urubyiruko ku birebana no kwigisha amateka ku buryo burushijeho, kwita ku bikorwa byo kwibuka n'ibindi bikorwa byose, no kwitabira ibikorwa bitandukanye kuko ibikorwa by'amajyambere duhuriramo nk'urugero muri Nyaruguru ahantu twagiye, abo usanga bari muri ibyo byaha n'ibindi bikorwa bisanzwe by'umuganda, byo gufatanya n'abandi aturage batabyitabira.'

Yahamije ko abantu bose bakwiye gushishikarizwa kwitabira ibikorwa byose bihuza abaturage bagafatanya kubaka igihugu.

Senateri Dusingizemungu yatangaje ko mu bagira uruhare mu bwicanyi bukorerwa Abarokotse Jenoside yakorewe Abatutsi harimo n’abari bafungiwe ibyo byaha batahindutse

Yabitangaje kuri uyu wa 19 Ukuboza 2024, mu nama ya 33 Y'Umutwe w'Ingabo za Afurika y'Iburasirazuba zihora ziteguye gutabara aho rukomeye (East African Standby Force) izwi nka 'Policy Organs Meeting', iri kubera i Kigali.

Minisitiri Marizamunda yagaragaje ko EASF yatanze umusanzu ukomeye mu kugarura amahoro aho yitabajwe hose mu bihe byashize.

Yashimangiye ko aho amahoro ari, ari ngombwa kuyasigasirwa.

Ati 'Dukeneye gusigasira amahoro aho yamaze kugerwaho, umurimo ukomeye udasaba kuvugwa cyane. Imbogamizi zikomeza kugaragara mu karere kacu no ku mugabane wose muri rusange. Intambara na zo zigenda zihindura isura, zinjiramo n'abandi banyamaboko aho bahuriye n'ubuyobozi bw'ibihugu,'

'Guhagarika intambara n'ibibangamiye ubuzima bwa muntu ni intego duhuriyeho. Ni yo mpamvu mbasaba gukoresha imbaraga zashyizweho mu guharanira amahoro n'umutekano mu karere no muri Afurika.'

Yasabye impande zose gukorera hamwe hagamijwe iterambere, muri politike n'ibindi bigize ubuzima bw'igihugu.

Minisitiri Marizamunda yagaragaje ko nubwo hakiri ibibazo by'intambara n'amakimbirane ariko hari intambwe nziza igenda iterwa mu gukemura ibibazo.

Ati 'Ndashaka gushima intambwe nziza yatewe mu karere kacu igamije guhosha umwuka mubi no gukemura amakimbirane nk'uko twabibonye mu masezerano aheruka gusinywa hagati ya Ethiopia na Somalia.'

Umugaba Mukuru w'Ingabo z'u Rwanda akaba na n'Umuyobozi Mukuru wa Komite y'abagaba bakuru b'ingabo bahuriye muri EASF, yagaragaje ko nyuma y'imyaka 20 uru rwego rubayeho hakozwe ibikorwa byinshi mu kubungabunga amahoro n'umutekano mu karere kandi bikwiye gukomeza kuko ari yo nshingano yarwo.

Ati 'Muri iyi myaka Abagaba Bakuru b'Ingabo babonye impinduka mu bintu bitandukanye, kandi ibyakozwe byose byari bifite intego yo gukemura ibibazo by'amahoro n'umutekano mu karere no ku mugabane. Nk'uko mubizi akarere kacu kazahajwe n'ibikorwa byinshi bibangamiye amahoro n'umutekano. EASF yagaragaje umuhate mu gutanga umusanzu wayo mu guharanira amahoro rusange no kubaka ubushobozi mu buryo butandukanye.'

Mu 2014 ni bwo EASF yabonye ubushobozi bwose butuma ijya gutanga umusanzu wose usabwa aho ikenewe mu buryo bwa nyabwo.

EASF igira inzego zitandukanye, aho Inteko Rusange ari rwo rwego rukuru rugizwe n'abakuru b'ibihugu na za Guverinoma. Iyo Nteko Rusange igira Umuyobozi Mukuru uba ari Umukuru w'Igihugu kinyamuryango. Mu 2025 uwo muyobozi azaba ari Perezida Kagame.

Inteko Rusange ikurikirwa n'Inama y'Abaminisitiri b'ingabo muri ibyo bihugu, na yo igakurikirwa na komite y'abagaba b'ingabo b'ibyo bihugu, urwego rwa kane rukaba ubunyamabanga bugira uruhare mu ishyirwa mu bikorwa ry'ibikorwa bya EASF.

Ibihugu binyamuryango bya EASF birimo u Rwanda u Burundi, Ibirwa bya Comores, Djibouti, Ethiopia, Kenya, Rwanda, Seychelles, Somalia, Sudani na Uganda.

Inama y’ingabo za EASF iri kubera mu Rwanda ari na rwo rugiye guhabwa ubuyobozi

Minisitiri Marizamunda yasabye ko ahari amahoro asigasirwa

Abagaba bakuru b’ingabo mu bihugu bihuriye muri EASF bari kuganira ku ngingo zitandukanye

Lt Col Sinom Kabera, umuvugizi wungirije w’ingabo z’u Rwanda

Amafoto : Habyarimana Raoul

Yabigarutseho mu kiganiro yagiranye na Glamour Magazine, aho yavuze ko aba ashaka kubaho mu buzima bw'ibihe arimo aho kubaho ahugiye muri telefone.

Ati '”Ntabwo nkunda telefone yanjye uko byagenda kose. Mpitamo kwibera mu Isi nigiramo ibintu bitandukanye. lyo mbonye urwitwazo rwo kuba nayisiga mu kabati, mpita mbifatirana. Navuga ko mba hafi y'umuryango wanjye ndetse n'abandeberera mu muziki. Cyane cyane, mama na musaza wanjye.'

Yavuze ko ari byiza kuba ahantu uhari bya nyabyo ndetse ukiyitaho. Ati 'Ni bwo buryo bwo kwiyubaka mu buryo buhoraho no kumenya uko ubuzima buteye. Nta kintu nshaka guhindura ku buzima bwanjye.'

Tems aheruka kwemeza ko azataramira i Kigali mu 2025. Ni amakuru Tems yemeje mu minsi ishize abinyujije ku mbuga nkoranyambaga, nyuma yo gutangaza igitaramo afite muri Afurika y'Epfo ku wa 20 Werurwe 2025.

Nyuma yo gutangaza iki gitaramo, Tems yahise avuga ko mu minsi ya vuba azatangaza amatariki y'ibitaramo ateganya gukorera mu Rwanda, Nigeria, Ghana na Kenya.

Ibi Tems abigarutseho nyuma y'igihe bivuzwe ko yagombaga gutaramira i Kigali mu Ukwakira 2024, gusa biza kurangira bidakunze kubera urutonde rw'ibitaramo yari afite.

Uyu muhanzikazi amaze igihe akora ibitaramo bizenguruka Isi amurika album ye nshya yise 'Born in the wild Tems' yakoreye i Burayi.

Tems w'imyaka 29 yamenyekanye mu ndirimbo zitandukanye zirimo 'Crazy things', 'ME & U', You and me', 'Damages', 'Try me', 'Fountains' yahuriyemo na Drake n'izindi zitandukanye.

Uyu mukobwa yatangiye kuba ikimenyabose mu 2020, yiharira ikibuga cy'umuziki muri Nigeria kuva mu 2021.

Tems yahishuye icyatuma ibyamamare bibaho mu buzima bwite

Reba 'Get it Right', indirimbo Tems aheruka guhuriramo na Asake

Ni ibiganiro byahuriranye n'uko tariki 9 Ukuboza buri mwaka hizihizwa isabukuru Amasezerano mpuzamahanga yo gukumira no guhana icyaha cya jenoside yemejwe n'Inteko Rusange y'Umuryango w'Abibumbye mu 1948.

Perezida w'Ihuriro AGPF, Senateri Prof Dusingizemungu Jean Pierre, yabwiye IGIHE ko basuye imirenge itandatu yo mu turere twa Nyaruguru, Ngoma, Karongi, Rusizi na Ruhango kugira ngo bungurane ibitekerezo ku ngamba zikwiye kongerwamo imbaraga ngo ingengabitekerezo ya Jenoside n'ibikorwa by'ubugome bikorerwa abarokotse Jenoside birandurwe.

Ati 'Dushaka no gukangurira abaturage ku buryo bw'umwihariko ahantu hagiye hagaragara ihohoterwa ry'Abacitse ku icumu rya Jenoside tukabashyira ubutumwa bukubiyemo kubahumuriza ariko no kubakangurira kwita ku mahame remezo adusaba kubaka ubumwe bw'Abanyarwanda no kwita ku guharanira ko ntacyacamo ibice Abanyarwanda kandi ko ihame rirebana no gukumira no guhana ingengabitekerezo ya Jenoside na ryo abantu bose barikomeraho kandi bakabikora mu bufatanye ku buryo intambwe twari tumaze kugeraho mu Rwanda yo kubaka ubumwe n'ubwiyunge bikaduha inzira yo kujya mu majyambere agaragarira buri wese.'

Mu bihe bishize humvikanye abarokotse Jenoside yakorewe Abatutsi mu 1994 bishwe bazizwa uko bavutse.

Senateri Prof Dusingizemungu yashimangiye ko mu byo basobanurira abaturage kandi bakemeranyaho harimo no gufata ingamba zigamije kurandura burundu iyo migambi mibisha.

Ati 'Tubasobanurira kandi tunabyumvikanaho twese na bo bafata ingamba ko nta hakwiye kuboneka igitotsi, mu buryo bwo kumva ko hari ibimenyetso byatugaragariza ko ubumwe bw'abanyarwanda bugenda bwototerwa na bamwe mu badashaka ko ubwo bumwe bwasagamba cangwa bwakomera.'

Mu biganiro byateguwe kuva ku wa 19-20 Ukuboza 2024 harimo ibihuza abagize ihuriro AGPF n'abayobozi b'inzego zitandukanye, iz'Akarere, umurenge, utugari, urubyiruko, abagore, n'abarokotse Jenoside yakorewe Abatutsi tukabanza bakarebera hamwe 'ingamba bafite zo kurandura ibyo byagaragaza amacakubiri no kurandura burundu icyatuma hari abantu baba bahari bakivutsa abandi ubuzima kubera ingengabitekerezo ya Jenoside.'

Prof Dusingizemungu yahamije ko 'aho twahisemo kujya ku ikubitiro ni ahantu hagiye hagaragara ibyo bibazo byo guhohotera abacitse ku icumu.'

Mu ntangiriro za 2025 AGPF izakora ingendo mu turere twose two mu Rwanda kugira ngo ibi biganiro bikomeze ndetse bakazanakomereza ku rubyiruko ruri mu byiciro bitandukanye na rwo rukigishwa ububi bw'Ingengabitekerezo ya Jenoside.

Abagize AGPF-Rwanda baganirije abayobozi n’abaturage bo mu turere dutanu twagaragayemo guhohotera abarokotse Jenoside yakorewe Abatutsi