Author: webrwanda

Ni abo mu mirenge ya Nyanza, Kigembe, Mugombwa, Mukindo, Muganza, Gishubi na Mamba, icyakora uwa Gishubi ukarusha indi yose mu kugira abarwayi ba Malaria.

Batanze ubusabe bwabo mu bukangurambaga bwo kurwanya Malaria, bwabaye ku wa 21 Ukuboza 2024, bubera mu Murenge wa Gishubi.

Bwateguwe n'Urugaga rw'Amadini n'Amatorero mu Kubungabunga Ubuzima (RICH),

Umwe muri abo baturage baganiriye na IGIHE yavuze ko nk'iyo hashize amezi nk'arindwi batarongera gutererwa imiti yica imibu mu nzu, bongera kurwara cyane.

Ati 'Ni byo tugomba kuryama mu nzitiramibu, ariko na mbere yo kuryama imibu ntabwo yakurya mu gihe waterewe umuti. Turasaba ko badufasha bakajya baduterera kabiri mu mwaka.''

Umukozi wa RICH, yavuze ko Akarere ka Gisagara kari ku mwanya wa mbere mu kugira abarwayi ba Malaria benshi, ibikunze kugaragara iyo umuti watewe mu nzu umaze gucogora.

Ati'' Muri uyu mwaka w'ingengo y'imari 2024/2025, Akarere ka Gisagara kaje ku mwanya wa mbere mu kugira imibare myinshi y'abarwayi ba Malaria, Umurenge wa Gishubi na wo uza ku mwanya wa mbere mu yindi mirenge ya Gisagara.''

Mu Karere ka Gisagara abarwayi ba Malaria bavuye ku bihumbi 4833 bariho muri Kamena 2024, bagera ku ku bihumbi 33 mu Ukwakira 2024, icyakora mu Ugushyingo bongera kugabanuka kubera imiti yatewe mu nzu, bagera ku bihumbi birindwi mu Ugushyingo 2024.

Kaneza yavuze ko bakomeje ubuvugizi kuri Minisiteri y'Ubuzima ngo ibe yaha umwihariko ibi bice bya Gisagara nubwo iyo miti ihenda.

Ati 'Ukurikije imiterere ya Gisagara, tubona bikwiye ko byibura bajya batera kabiri mu mwaka, ni na bwo buvugizi turi gukora, nubwo bihenze nyine, ariko icyizere kirahari ko byazarebwaho.''

Umuyobozi w'Ibitaro by'Akarere bya Gakoma, Uwamahoro Evelyne, yavuze ko bahora bakangurira abaturage gushyira imbaraga mu kubahiriza uburyo bwose buhari bwo kuyirwanya.

Ati 'Muri ibi bihe Malaria yari yarabaye nyinshi, nko muri uyu Murenge wa Gishubi, twakiraga abarwayi bari hagati ya 30 na 50 ku munsi. Dushishikariza abaturage kujya bihutira kujya kwa muganga, kugira ngo bafashwe ya Malaria itaraba igikatu ngo inabe yabahitana'

Imibare ya RBC yo mu Ukwakira 2024, yerekana ko uturere 15 twihariye 89% bya Malaria yose yari mu gihugu.

Ni ukuvuga ko mu barwayi 112.508 babaruwe mu gihugu, abarwayi 100.648 bari abo muri utwo turere 15 tuyobowe n'aka Gisagara.

---

UKO IGITARAMO KIRI KUGENDA UMUNOTA KU MUNOTA 

Saa 21: 58': Umwanya w'ubuhamya

Umwe mu baririmbyi ba Chorale de Kigali, yavuze uburyo yabayeho asenga Imana, ariko kenshi yisengera ku buzima bwe gusa. Ariko, igihe cyarageza ahura n'inshuti ye yamugiriye inama yo kujya asenga, ariko agasengera n'inshuti ze.

Yavuze ko kuzirikana abandi mu isengesho ari byiza. Ati 'Uko niko amasengesho akora, iyo uvuga Imana kandi iyihamya. Twebwe nk'Abakristu, twumva neza icyo isengesho rivuze, aho rigukura n'aho rikugeza. Reka dukomeze, gusenga, dusengera umubano wacu ni Imana.'

Saa 21: 10'- 21: 38': Chorale de Kigali yinjiriye mu ndirimbo zamamaye hirya no hino ku Isi.

Mu majwi ayunguruye, baririmbye indirimbo nka La Conta, Ave Maria ndetse na La Nuit. Bakomereza ku ndirimbo 'A Whole New World', 'Vivat Bacchus','Caspar (Hohnich) Finale' ndetse na 'Non Plus Andrai' zaAmadeus Mozart.

Bongeraho indirimbo nka 'Tiritomba' ya Helmut Lotti, 'I feel Pretty' ya Arnold Bernstein, 'Merry Christmas Mozart', Nearer my God to Thee', 'Worthy is the Lamb', 'Amen', 'Battle hymn of the republic' ya William Steffe n'izindi.

Saa 20: 52- 21:03': Byatangajwe ko hafi 70% y'indirimbo zaririmbwe na Chorale de Kigali zagizwemo uruhare n'abakunzi b'iyi korali, kuko kuva muri Mutarama 2024 abakunzi ba muzika bahawe umwanya wo kwandika izo bashaka.

Perezida wa Chorale de Kigali, Hodari Jean Claude,yifurije abakunzi b'iyi korali kuzagira umwaka Mushya Muhire. Yavuze ko gutegura iki gitaramo bashingira cyane ku byifuzo by'abakunzi kandi tubikora kugirango tubashimishe. Ati 'Iyo muhageze turabyishimira. Mutuma dutegura kandi twishimye.'

Yagarutse ku mateka avuganuye ya Chorale de Kigali, avuga ko ubu bizihiza imyaka 58 ubu. Ati 'Mudufashe kwizihiza iyi myaka. Muri ubwo bukure bw'imyaka tumaze, iki gitaramo ubu ni icya 12, ndizera ko ubu muri kubona hari ikirutaho kurushaho umwaka ushize. Ni igitaramo gihuza abantu, kandi turabifuriza ibyiza'.

Hodari yavuze ko iki gitaramo gihuza abantu n'imiryango 'kandi turifuza ko cyakomeza'. Akomeza agira ati 'Ni igitaramo gihuza abemera Kristu, ntabwo tukiharira twenyine.' Yanavuze ko iki gitaramo kibafasha gutera imbere 'kubera ko iyo turi kukitegura dushyiramo imbaraga nyinshi'.

Yanavuze ko iki gitaramo 'kiduha isura nziza'. Ati 'Kubera ko hari abanyamahanga benshi basaba ibiruhuko kugirango baze hano'. Anavuga ko muri iyi korali harimo abaririmbyi benshi b'abanyamahanga.

Hodari Jean Claude yanashimye 'umuryango wa Nyakubahwa Perezida wa Repubulika twifatanyije muri iki gitaramo'.

Iyi korali yubatse ibigwi cyane binyuze mu muziki w'umwimerere (Live) ndetse na Karasira.

Mu kiganiro cyateguraga filime mbarankuru ku buzima bwa Chorale de Kigali, Gasasira winjiye muri Chorale de Kigali mu 1972 aririmba ijwi rya tenoro, yasobanuye ko iyi korali yatangiye haririmbamo abagabo gusa, kubera ko mu mashuri y'abagore batigaga umuziki n'ururimi rw'ikiratani.

Gasasira yavuze ko iyi korali yatangiranye n'umuziki wanditse, uko iminsi yicumaga bamwe mu bayishinze bagenda bayihimbira indirimbo zikomeye.

Uwimana Jean Marie Vianney yavuze ko Chorale de Kigali yavutse mu gihe hari korali yabicaga bigacika yitwa 'Abanyuramatwi' yabarizwaga mu bice byo mu cyaro.

Ibi ngo nibyo byatumye abashinze iyi korali bongeraho 'Kigali' kugira ngo bumvikanishe ko ari korali y'abanyamujyi.

Saa 20: 10: Karidinari Kambanda yashimye Madamu Jeannette Kagame

Cardinal Antoine Kambanda usanzwe ari Arikiyepiskopi wa Kigali, yavuze ko iki gitaramo ari 'umuco umaze igihe kugirango dufashe abakristu kwizihiza Noheli'. Ati 'Ni iby'agaciro rero kuba turi kumwe namwe nk'umubyeyi, ducyeza umubyeyi 'Bikiramariya (w'umucunguzi).'

Yashimye abaririmbyi ba Chorale de Kigali kuko 'hari ikintu gikomeye batwigisha binyuze mu majwi bakaririmba'. Ati 'Ni ikimenyetso cy'uko iyo abantu bunze ubumwe bishoboka'.

Karidinali Kambanda yashimye kandi Chorale de Kigali ku bwo gutoza bato 'babyiruka baririmba'. Yifurije kandi Madamu Jeannette Kagame na Perezida Paul Kagame kuzagira Umwaka Mushya Muhire. Yavuze ko Noheli ari umunsi w'umuryango'. Ati 'Turabifuza kuzagira Umwaka Mushya Muhire n'umuryango.'

Saa 19: 50': Icyiciro cya Kabiri cy'indirimbo za Chorale de Kigali, kibanze cyane ku ndirimbo za Noheli ziri mu ndirimbo zo mu mahanga, ni mu gihe mu gice cya Mbere baririmbye indirimbo za Noheli zibanze cyane ku rurimi rw'Ikinyarwanda.

Yesu/ Yezu avugwa ahantu henshi muri Bibiliya

Uhereye mu itangiriro baramuvuga. Mu bice bitatu by'itangiriro Imana iri guhana Adam na Eva niho hantu hambere Yesu agaragara. Mose yaramuhanuye, Yakobo aramuhanura, Baramu aramuhanura, Yobu aramuhanura, na Yesaya aramuhanura. Ariko urebye bibiliya yose ntakindi kivugwamo usibye Kiristu. Amahanga yose yagombaga kubonera umugisha muri Yesu.

Saa 19: 20- 19: 45': Uruhongore, Korali y'abana yahawe ikaze itaramira abakunzi

Iyi korali igizwe n'abana bari hagati y'imyaka 10 na 15 y'amavuko, kandi umubare munini ni abakobwa, bose baracyari ku ntebe y'ishuri.

Bamaze igihe bategurwa n'iyi korali kugirango bazavemo abaririmbyi b'ejo hazaza. Ku rubyiniro binjiriye mu ndirimbo ziri mu rurimi rw'Igifaransa ndetse n'Icyongereza.

Baririmbye indirimbo nka 'Il est ne', 'Glorious', 'Courage to Change', 'Do Re Mi', 'Ca duet', 'Kid Songs', 'Hooray' ndetse na 'Tago Mago'.

Iyi korali y'abana yashimishije abana mu buryo bukomeye, ku buryo byageze aho ibihumbi by'abakristu bafatanya n'abo kuririmba indirimbo umunani bari bateguye.

Uko baririmbaga ku rubyiniro, inyuma y'abo hatambutswaga amashusho ya 'Cartoons' zifasha abakiri bato kwiyumvamo iki gitaramo cyihariye.

Aba bana kandi bongeye gushimisha abantu ubwo baririmbaga indirimbo yamamaye cyane izwi nka 'Bye Bye Ingona'.

Saa 19:05':Mu gice cya mbere cy'iki gitaramo, iyi Korali yibanze cyane ku ndirimbo zigaruka ku butumwa bwa Noheli, aho bafatanyije n'abacuranzi babo baririmbye indirimbo nka 'Turakuramutse Mubyeyi'. Ati 'Hari aho bagira bagira bati 'Turakuramutsa mubyeyi mwiza, rurema yagutoranyije mu bandi ngo umubere umubyeyi.'

Noheli ni umunsi abakirisitu bizihiza ivuka rya Yesu Kirisito / Yezu Kirisitu. Buri mwaka tariki ya 25 abayoboke b'amadini n'amatorero yizera Yesu hirya no hino ku Isi yizihiza umunsi mukuru w'ivuka ry'Umwana w'Imana.

Saa 18: 54':Mu isengesho rye, Musenyeri Casimile yashimye Imana ku bwo kurema muntu 'n'ibindi byinshi yatatse abana bawe'. Yashimye Imana ku bwa Kiliziya nziza yahaye u Rwanda, kandi ashima Imana ku bw'Igihugu 'cyiza waduhaye'.

Yavuze ati 'Turagushimira kugirango utwongere ubuvandimwe n'amahoro, birusheho kuganza. Tubisabye ku bwa Yezu Kristo, umwami wacu.'

Saa 18: 45': Madamu Jeannette Kagame yageze muri BK Arena yitabiriye igitaramo cya Chorale de Kigali cya 'Christmas Carols Concert'.

Saa 18: 40': Abashyushyarugamba Nkurunziza Kate Gustave wa Radio/Tv10 ndetse na Ingabire Egidie Bibio w'Urwego rw'Igihugu rw'Itangazamakuru (RBA), bageze ku rubyiniro, maze batangira baha ikaze buri wese, witabiriye ndetse babifuriza Noheli nziza n'umwaka mushya muhire.

Akigera muri BK Arena yakiranywe amashyi menshi, aramukanya na bamwe mu bayobozi mu nzego Nkuru z'Igihugu bitabiriye iki gitaramo kibaye ku nshuro ya 11.

Iki Gitaramo cyabereye muri BK Arena mu ijoro ryo kuri iki Cyumweru tariki 22 Ukuboza 2024; ni nyuma y'amezi ane ashize iyi korali itangiye imyiteguro y'iki gitaramo.

Saa 18: 15': Mu gice cyinjiza abantu mu ndirimbo, baririmbye indirimbo ‘Carols of the Bells’ ya David Downes, ‘Vierge Marie’ ya Natacha St Pier, ‘Noheli ab’ijuru baririmba’ ya Apollo, ‘The Lord’s Prayer’ya Ha Malotte, ‘Alleluya umukiza yavutse’ ya Sezerano Arcade, Umwana yatuvukiye ya Isaac Gatashya, Christmas Mozaic Set, ‘Turakuramutsa Mubyeyi’ ya Tunerezwe Pacifique.

Saa 18:00': Igice cya Mbere cy’indirimbo kigizwe na ‘Silent Night’ yahimbwe na Joseph Mohr ndetse na ‘Away in a manger’ ya Martin Lutter. Izi ndirimbo ziririmbwa humvikana ibicurangisho gusa, ahanini bitewe n’ubuhanga buzigize.

Iki gitaramo cyatangiye ahagana saa kumi n’ebyiri z’umugoroba nk’uko byari byatangajwe, ndetse mbere y’amasaha abiri gusa, humvikanaga umuziki wihariye, ndetse n’ubutumwa bujyanye no kwamamaza ibigo binyuranye bakoranye byabateye inkunga.

'Christmas Carols Concert' ni igitaramo cyamaze kuba umuco, kuko buri mwaka bagikora mu rwego rwo gufasha Abakristo kwizihiza Umunsi wa Mukuru wa Noheli no gusoza neza umwaka uba urangiye no kuzatangira umushya mu mahoro no mu munezero.

Buri mwaka Chorale de Kigali ishaka umwihariko igenera abakunzi bayo, ugereranyije n'imyaka yabanje. Bigakorwa mu rwego rwo gukomeza gushimisha abakunzi bayo.

Kuva mu 2013, Chorale de Kigali ikora igitaramo nk'iki. Imibare igaragaza ko abantu barenga ibihumbi 20 bitabira iki gitaramo. Kandi gitegurwa mu rwego rwo gukundisha Abanyarwanda umuziki uhimbanywe kandi ukaririmbanwa ubuhanga.

Mu bihe bitandukanye igitaramo nk'iki cyabereye ahantu hatandukanye harimo na Camp Kigali, kandi ibihumbi by'abantu byagiye byitabira, bagataha banyuzwe n'ubuhanga bw'abaririmbyi bagize iyi korali.

Nko mu 2019, iki gitaramo cyabereye muri Camp Kigali, biba ngombwa ko hari abantu basubirayo kubera ko imyanya yari yateguwe yari yuzuye.

Perezida wa Chorale de Kigali, Bwana Hodari Jean Claude, yigeze kuvuga ko imyiteguro y'iki gitaramo ihambaye, kuko bongeraho n'amasengesho.

Ibyo wamenya kuri Chorale de Kigali yizihiza ku nshuro ya 11 ibitaramo bya 'Christmas Carols Concert'

Imyaka 58 irashize ibayeho. Ubu igizwe n'abanyamuryango bagera ku 150, bari mu kigero cy'imyaka iri hagati ya 18-70. Abagera kuri 60% ni urubyiruko.

Muri bo abagera kuri 55% ni abagore. Ubu ibarizwa kuri Katederali Saint Michel ikaba ikorera muri Centre Saint Paul.

Ibihangano byayo byinshi ubisanga kuri shene ya Youtube yayo, aho imaze kugira abayikurikira (Subscribers) barenga ibihumbi 243.

Ifite kandi ‘views’ (abamaze kureba ibihangano) bagera 33,130,366. Uretse Youtube kandi, Chorale de Kigali ifite imbuga nkoranyambaga nka Instagram, Twitter na Facebook.

Chorale de Kigali ubu ifite gahunda igenderaho y'imyaka itanu, ari yo iherwaho hakorwa gahunda y'ibikorwa byari buri mwaka.

Imyaka 58 irashize Chorale de Kigali ishikamye

U Rwanda rwagize amatsinda akomeye mu muziki yatanze ibyishimo mu bihe bitandukanye aho yiyambajwe, ariko ntiyateye kabiri yaratandukanye.

Si amatsinda y'umuziki aririmba indirimbo zisanzwe gusa zizwi nka 'Secular', kuko n'abaririmba indirimbo zihimbaza Imana bagiye batandukana.

Bose bahuriza ku kuvuga ko hari ibyo uruhande rumwe rutumvise kimwe n'urundi. Hari n'amatsinda azwi yatandukanye, kubera ko umwe muri bo yumvise cyangwa se yabwiwe n'abandi ko ari we nkingi ya mwamba ku buryo atarimo batatera kabiri.

Yarabikoze koko ava mu itsinda, none iryo tsinda ryavuye mu muziki burundu. Ni ibintu byagize ingaruka kuri bagenzi be n'abandi, uruganda rw'umuziki rurahomba!

Imyaka 58 irashize Chorale de Kigali iri mu muziki. Hari abatangiranye nayo bakiyirimo n'abandi bayivuyemo kubera impamvu z'ubuzima.

Madamu Jeannette Kagame yitabiriye igitaramo cya Chorale de Kigali kizwi nka ‘Christmas Carols Concert’ kiri kuba ku nshuro ya

Madamu Jeannette Kigali akurikirana igitaramo nk’iki gisanzwe gifasha Abakristu kwizihiza Umunsi Mukuru wa Noheli mu buryo bwihariye

Musabyimana Jean Claude, Umunyamabanga Nshingwabikorwa muri Komisiyo y’Amatora

Perezida wa Chorale de Kigali, Hodari Jean Claude yashimye Madamu Jeannette Kagame wifatanyije n’abo mu gitaramo bakoze mu ijoro ryo kuri iki Cyumweru tariki 22 Ukuboza 2024

Abashyushyarugamba, Ingabire Egidie Bibio ndetse na Kate Gustave bafatanyije kuyobora iki gitaramo

Ni uku Chorale de Kigali yaserutse muri iki gitaramo iri kumwe n’abacuranzi babo

Korali y’abana ya Chorale de Kigali yanyuze benshi binyuze mu ndirimbo zamamaye baririmbye

Karidinari Antoine Kambanda yashimye Madamu Jeannette Kagame ku bwo kwifatanya n’Abakristu mu kwinjira mu byishimo na Noheli

Umuhanzi w’indirimbo zo kuramya no guhimbaza Imana, Israel Mbonyi yitabiriye iki gitaramo; ari kumwe na Uhujimfura Jean Claude usanzwe ari umujyanama wa Bwiza

Minisitiri Ushinzwe Ibikorwa by’ubutabazi, Maj Gen (Rtd) Albert Murasira

Chorale de Kigali yageze ahabereye iki gitaramo yitwaje Buji mu rwego rwo gushimangira urumuri Yesu Kristo yazanye mu Isi

Minisitiri w’Ububanyi n’Amahanga n’Ubutwererane, Olivier Nduhungirehe yitabiriye igitaramo cya Chorale de Kigali

Ku rubyiniro, Chorale de Kigali yaserutse mu myambaro yihariye ishushanya ibyishimo bya Noheli

Imbere muri BK Arena, ahagana saa kumi n’ebyeri z’umugoroba mbere y’uko abaririmbyi ba Chorale de Kigali bagera ku rubyiniro

Abacuranzi ba Chorale de Kigali bafite ibicurangisho binyuranye birimo ‘Saxophone’, ‘Piano’ babanje gususurutsa abantu binyuze mu kuvuza ibyuma binyuranye

Chorale de Kigali yateguye iki gitaramo iguhuza n’imitako inyuranye ifasha Abakristu kwiyumvamo Noheli

Ibihumbi by’Abakristu buri mwaka baba biteguye gutaramirwa na Chorale de Kigali binyuze mu ndirimbo zisingiza Nyagasani

Noheli, ni umunsi udasanzwe ku bana! Chorale de Kigali yateguye Korali y’abana ibataramira

Kuva saa cyenda z’amanywa, abantu bari batangiye kwinjira muri BK Arena bitegura iki gitaramo

Ababyeyi ntibacikwa n’iki gitaramo kiba buri mwaka, abenshi bagura amatike mbere y’umunsi w’igitaramo

Ku munsi nk’uyu buri wese akora ku mwambaro wihariye! Ni igitaramo kidasanzwe ku bakristu

Bamwe batangiye kwinjira muri iki gitaramo hakiri kare, ndetse abenshi bo mu miryango bazanye

Imiryango inyuranye yabucyereye kuri uyu munsi udasanzwe ku bakristu mu kwizihiza Noheli

Inshuti, abavandimwe n’abandi bahuje imbaraga bitabira iki gitaramo kidasanzwe mu rugendo rwa Chorale de Kigali

Iki gitaramo gihuza abantu bo mu bihugu bitandukanye buri mwaka- Abenshi bakorera ibiruhuko mu Rwanda

Kanda hano urebe amafoto menshi yaranze igitaramo cyaa Chorale de Kigali cyabereye muri BK Arena

AMAFOTO: Ngabo Serge- InyaRwanda.com

Hategekimana Philippe, wamenyekanye nka Biguma amaze iminsi mike akatiwe bidasubirwaho igifungo cya burundu n'inkiko zo mu Bufaransa kubera uruhare rukomeye yagize muri Jenoside yakorewe Abatutsi i Nyanza, Ntyazo, Nyabubare, muri ISAR Songa n'ahandi.

Minisitiri Dr Bizimana ubwo yari mu kiganiro na RBA yatangaje ko benshi mu bakurikiranyweho ibyaha bya Jenoside yakorewe Abatutsi kandi bikabahama biganjemo abavutse mbere ya 1959 bakuze babona mu miryango yabo urwango n'urugomo rukorerwa Abatutsi.

Ati 'Bigaragara ko benshi mu babyeyi ntabwo bareze abana babo mu rukundo, mu wubahane ahubwo abana bakuze babona urwango ku b]Batutsi ari rwo rwigishwa.'

Minisitiri Dr. Bizimana yahamije ko Hategekimana Philippe avuka mu yahoze ari komine Rukondo ku Gikongoro, aba ari ho yiga.

Ati 'N'iyo urebye mu muryango we usanga hari abantu bagize uruhare mu bwicanyi bwo mu 1959, mu 1960, mu 1963, ari muto, akura abibona, nubwo imanza zibera mu mahanga zitagaruka kuri iyo myaka ya kera ariko n'ubuhamya ubu butangwa n'abantu biganye kuko Hategekimana yize muri Collèges des'Humanités Moderne i Nyanza, bagaragaza ko mu 1973 aho kugira ngo yitangire amasomo yari mu rwango rw'Abatutsi, hari abo yakubise arabakomeretsa, dufite ubuhamya bwabo buhagije.'

'Bikugaragariza ko n'abiga ibyo kugenza ibyaha barabibona, umwana iyo akuze akurira mu rwango agakurira mu muryango abona nta rukundo ufite ahubwo umwigisha urwango, rwa rwango ruramukurikira aho ari hose kugeza aho ashobora kujya mu cyaha kiremereye nk'icya Jenoside yumva ari nk'igikorwa gisanzwe kuko urwango bari bafitiye Abatutsi n'uburyo bakoresheje mu kubatoteza byerekana ko ari ikintu bemeraga gituruka mu buto bwabo.'

Dr. Bizimana ahamya ko nk'ababyeyi 'biraduha isomo ryo kwigisha abana kubana, kwirinda ingengabitekerezo ya Jenoside, kwigisha abana urukundo, gukunda igihugu n'izindi ndangagaciro zifitiye umuntu akamaro kuko ari byo bimwubaka.'

Hategekimana w'imyaka 67 y'amavuko yahawe ubwenegihugu bw'u Bufaransa mu 2005, atabwa muri yombi ubwo yari muri Cameroun mu 2018, yoherezwa i Paris. Icyemezo cyo kumuburanisha cyafashwe muri Nzeri 2021.

---

Ikoreshwa ry'ibinyabiziga by'amashanyarazi riri kwitabirwa cyane nk'imwe muri politiki Leta y'u Rwanda ishyizemo ingufu mu kubungabunga ibidukikije.

Kuva mu 2020 ubwo mu Rwanda hatangiraga kwinjira cyane imodoka zikoresha amashanyarazi, ubu habarurwa izirenga 7000 ubariyemo izikoresha amashanyarazi yonyine n'iziyakoresha hamwe na lisansi (Hybrid), mu gihe moto zo zimaze kurenga 6000.

Nubwo ubwo bwitabire buzatuma hakenerwa amashanyarazi yisumbuye, REG yavuze ko ayo itunganya ubu n'imishinga ifite mu bihe biri imbere yo kuyongera bizafasha u Rwanda guhora rwihagije.

Umuyobozi muri REG, Geoffrey Zawadi, yavuze ko ubu amashanyarazi u Rwanda rutunganya ahagije ariko agaragaza ko mu bihe biri imbere ubwiyongere bw'amashanyarazi akenerwa buzajya buba buri kuri 12% buri mwaka.

Inzego biteganywa ko zizawukenera cyane zirimo ibijyanyibiziga bikoresha amashanyarazi, inganda, ubuhinzi, na gahunda yo kwimakaza ingufu zitangiza.

Zawadi ati 'U Rwanda rwamaze kwitegura neza ku bijyanye n'ubwo bwiyongere bw'imirimo ikenera amashanyarazi, harimo n'iy'ubwikorezi cyane cyane ku binyabiziga bikoresha amashanyarazi. Byagizwemo uruhare n'umuriro dutunganya ubu, uwazigamwa n'imishinga itandukanye dufite nk'uw'Urugomero rwa Nyabarongo ya II ruzaba rufite ubushobozi bwo gutunganya megawatt 43 n'indi.'

Icyakora nubwo uwo muriro uhari, abakoresha ibyo binyabiziga n'abateganya kubikoresha basaba ko hakongerwa sitasiyo zifashishwa mu gushyira umuriro muri batiri z'ibyo binyabiziga, kugira ngo bagere mu bice byose by'igihugu nk'uko umumotari witwa Dusengimana Jean Pierre yabibwiye The New Times.

Ati 'Tuzi neza ko gukoresha ibinyabiziga bikoresha amashanyarazi bihendutse ugereranyije n'ibikoresha ibikomoka kuri peteroli. Icyakora nk'umuntu uba cyangwa ushaka kujya hanze ya Kigali afite moto y'amashanyarazi kubona aho ashyiriramo umuriro mu gihe umushiranye biragoye. Turasaba ko sitasiyo zakongerwa no mu byaro.'

Mu guhangana n'icyo kibazo, Zawadi yavuze ko u Rwanda ruri gukora inyigo y'ibyo bikorwaremezo hatekerezwa ku bice byo mu cyaro ku buryo muri buri bilometero 50 byibuze hazajya haba hari sitasiyo y'amashanyarazi.

Imibare ya REG igaragaza ko mu 2024 ingo zifite amashanyarazi zigeze kuri 82% n'inshuro umuriro ubura zageze kuri 15,4 mu 2023/2024 zivuye kuri 21,7 mu mwaka wabanje.

Mu guteza imbere ibinyabiziga by'amashanyarzi, mu 2019, leta yigomwe imisoro ya miliyoni 26,7 Frw mu 2020 iba miliyoni 101,6 Frw, mu 2021 igera kuri kuri miliyoni 498,7 Frw mu gihe mu 2022/23, Leta yigomwe imisoro ingana na miliyari 4,6 Frw kubera izi modoka.

---