Author: webrwanda

Nk'abo mu Murenge wa Gishubi bagaragaza ko imitungo yabo yangijwe mu gihe hakorwaga umuyoboro w'amashanyarazi ucanira umurenge wabo.

Uwitwa Rutayisire lldephonse wo mu Kagari ka Gabiro yabwiye IGIHE ko imyaka irindwi ishize ategereje ko yishyurwa agera ku bihumbi 300 Frw yasigayewemo ariko byaranze.

Ati 'Banyangirije ibiti bya avoka, insina n'indi myaka bakandagiye bari gushinga amapoto. Byose byari bifite agaciro k'ibihumbi 534 Frw. Barabanje banyishyura ibihumbi 250 Frw bansigaramo andi na n'ubu narahebye.''

Mayira Jean de Dieu, uvugira umubyeyi we witwa Uwiringiye Verediana na we wangirijwe imyaka itandukanye n'amashyamba kayatema, ariko na n'ubu ntibarishyurwa.

Ati 'N'ubu abakozi bo muri REG baracyagaruka gutema ibiti bikuze buri mezi atandatu bavuga ko twishyuwe. Banatemye avoka nyinshi zo ntizigeze zishibuka. Batemye insina bangiza n'indi myaka mu masambu abiri. Bifite agaciro k'asaga ibihumbi 700 Frw, ariko nta faranga na rimwe turabona.''

Umunyamabanga Nshingwabikorwa w'Umurenge wa Gishubi, Tuyishime Obadia, yashimangiye ko ikibazo bakizi aho mu ntangiro za 2025 bazahabwa ingurane zabo kuko Minisiteri y'Imari n'Igenamigambi izatanga ayo mafaranga bakishyurwa bose.

Ati “Hari umurongo twahawe dufatanije n'ubuyobozi bw'akarere. Urutonde rw'abafite ibibazo bose rwaratanzwe, ndetse banatubwira ko bari kuvugana na Minisiteri y'Imari n'Igenamigambi. Intego ihari ni uko uyu mwaka w'ingengo y'imari wa 2024/2025 uzashira bose bishyuwe.''

Muri rusange abaturage batarahabwa ingurane z'ibyangijwe n'ahanyuze imiyoboro y'amashanyarazi bagera ku 1200 mu karere kose, biganje mu mirenge ya Mamba, Gishubi, Mukindo, Muganza n'indi. Baberewemo umwenda w'asaga miliyoni 56 Frw.

Mayira Jean de Dieu, umuhungu wa Uwiringire Verediana (wanditse ku cyangombwa cy’ubutaka bw’ibyangijwe) yavuze ko hashize igihe kinini batarahabwa ingurane y’imutungo yabo

Mu Karere ka Gisagara hari abatarahabwa ingurane y’imitungo yabo ibikorwa by’amashanyarazi byangije

Rutayisire lldephonse wo mu Kagari ka Gabiro, Umurenge wa Gishubi, avuga ko imyaka irindwi ishize ategereje ko yishyurwa agera ku bihumbi 300Frw

Aba bombi bamaze igihe gito bizihije isabukuru y'umwaka bamaze barushinze. Muri iyi ndirimbo, The Ben yumvikana nk'umuntu waryohewe n'urukundo.

Mu nyikirizo y'iyi ndirimbo yumvikana agira ati 'Ndakuramukije mukunzi wanjye, urabizi ko ngukunda by'ukuri? Sinzi uko nabivuga, disi uri mwiza, gumana nanjye.'

Mu buryo bw'amajwi yakozwe na RealBeat mu gihe amashusho yakozwe na John Elarts‬.

Iyi ni indirimbo ya kabiri ya The Ben igaragayemo umugore we, nyuma ya 'Ni Forever' yamukoreye nyuma yo kurushinga.

The Ben yasezeranye imbere y'amategeko na Uwicyeza Pamella ku wa 31 Ukwakira 2022, ibirori byari bikurikiye ibyabaye mu Ukwakira 2021 ubwo yamwambikaga impeta y'urukundo bakemeranya kubana.

Nyuma y'ibi birori, ku wa 15 Ukuboza 2023 nibwo The Ben yasabye anakwa umugore we, mbere y'uko bakora ubukwe ku wa 23 Ukuboza 2023.

The Ben yagaragaje ko agiye kwibaruka imfura, mu gihe akomeje imyiteguro y'igitaramo ateganya gukorera muri BK Arena ku wa 1 Mutarama 2025.

Iki gitaramo yise 'The New Year Groove' byitezwe ko azanamurika album ye nshya ikaba iya gatatu akoze kuva yatangira umuzika.

Kugeza ubu amatike yo kwinjira mu gitaramo cye yamaze kugera ku isoko, iya make ikaba iri kugura 5 000 Frw naho iya menshi ikagura miliyoni 1,5 Frw.

Bagaragaje ko iki gitaramo kizaba ku wa 25 Mutarama 2025. Umuyobozi w'iri torero, Cyogere yabwiye InyaRwanda, ko bahisemo kwita iki gitaramo 'Indirirarugamba' bashingiye ku mutwe w'ingabo wabayeho wari uw'abana bato batozwaga kuba ingabo, nyuma bagasaba kujya ku rugamba.

Ati 'U Rwanda rwaje guterwa abana bumvise inkuru ko batewe basaba kujya gutabara kandi bari bakiri mu itorero, babisabana umwete mubwira n'agahinda ko batewe, bo bagahezwa kandi baraje mu itorero ngo bazige gutsinda umwanzi.'

Yavuze ko bahisemo ririya zina mu kumvikanisha icyerekezo cyabo n'ishyaka ryabo, bityo ibyinshi mu gusobanura neza iri zina bizagaragara mu gitaramo.

Akomeza ati 'Aho bihurira n'ishyaka ry'intore n'uko tutabanje gutegereza nk'itorero rikivuka ngo tugwize uburambe n'imbaraga ahubwo tukarebera ku cyizere n'ubuhanga bw'abadutoza tugashaka gutangira umwaka tutitaye kubyabaye tukifuza gutangira umwaka dutaramira Abanyarwanda kuko tuba twifuza gukesha umwaka dutangiye dutura Abanyarwanda umuco wabo.'

Cyogere yavuze ko muri rusange, intego ya mbere y'iki gitaramo 'ni ukumurika itorero ishyaka ry'intore' bashinze' kandi, kinagamije gufasha Abanyarwanda gutangira umwaka neza. Ati 'Tubifata nko kweza umwaka dukoresheje umuco wacu mwiza.'

Yungamo ati 'Ni igitaramo kigamije kugaragaza ko intore bakunze zitaretse umuco no guhamiriza ahubwo zigeze, ndetse n'igitaramo tuzabamurikiramo noneho ko tugiye gutangira kwigisha abana b'Abanyarwanda nk'uko twabisabwe kenshi.”

Cyogere yumvikanishije ko gutandukana na bagenzi babo bari kumwe mu Itorero Ibihame by'Imana, bari bagamije 'gukomeza gukundisha umuco Abanyarwanda b'ingeri zose ndetse nanone ko abawukora nabo byabagirira umumaro urenze uwo bibafitiye ubu ngubu haba mu mikoro, ubumenyi no kumenyekanisha umuco wacu wa Kinyarwanda dushingiye ko ubu ngubu abatoza dufite gihe bigeze batoza nk'ubu'.

Cyogere yavuze ko muri iri torero ubu bafite abatoza barimo MNC (Mukuru wa Massamba Intore), Burigo Olivier n'umukondo Gatore.

Asobanura ko abantu bakwiye kwitega kubataramira bidasanzwe muri iki gitaramo badasobanya. 

Ati 'Bamenyereye ko dukina umukino wiganjemo amateka ariko ubu ngubu n'umukino wiganjemo gutarama turirimba, tubyina, twivuga, ducuranga ingoma n'ibindi'.”

Cyogere yanavuze ko ibijyanye n'aho iki gitaramo kizabera, ndetse n'amatike yo kwinjira bizatangazwa mu gihe kiri imbere.

Cyogere yatangaje ko bateguye iki gitaramo mu rwego rwo kumurika ku mugaragaro itorero Ishyaka ry'Intore batangije 

Umuhanzi mu muziki gakondo, Ruti Joel ari mu bagize igitekerezo cyo gutangiza iri torero, ndetse ari mu bayobozi bakuru

Bamwe mu babyinnyi bakomeye muri iri torero, bumvikanishije ko barajwe ishinga no guteza imbere umuco w'u Rwanda 

Ruti Joel usanzwe azwi mu bihangano binyuranye, ari mu babyinnyi bihariye muri iri torero

Ishyaka ry'Intore baherutse gutamira abarimo Perezida Paul Kagame mu birori by'ibihembo bya FIA byabereye muri BK Arena
Igitaramo kiri torero kizaba ku wa 25 Mutarama 2025, ni mu gihe amatike azashyirwa ku isoko mu gihe kiri imbere

Yageze ku kibuga cy'indege Mpuzamahanga cya Kigali, mu gitondo cyo kuri uyu wa Kane tariki 26 Ukuboza 2024, yakiwe n'umuyobozi wungirije muri 1:55 AM, Kenny Mugarura, ndetse n'abakobwa babarizwa muri Kigali Protocol, bamuha ikaze.

Mu kiganiro n'itangazamakuru, uyu mugabo yavuze ko kugera mu Rwanda zari inzozi ze, kuko yagiye aba mu bihugu bitandukanye byo ku Isi. Ati 'Ni nk'inzozi zabaye impamo kuri njye, kuba mbashije gusura u Rwanda. Navukiye muri Nigeria, kandi nabaye mu Bwongereza mu gihe cy'imyaka 20'.

Yavuze ko mu rugendo rwe rw'umuziki no guhuza n'abantu, yabashije kugera ku gitekerezo cy'abahanga atangiza iserukiramuco ryamamaye hirya no hino ku Isi rizwi nka 'Afro Nation'.

Ati 'Nabashije guhanga iserukiramuco ryiza ku isi 'Afro Nation' kandi ndacyashaka gukomeza guhuza abantu binyuze muri iki gikorwa, ku buryo abo mu bihugu bitandukanye byo ku Isi biyumvamo Afurika nko mu rugo.'

Yavuze ko ari ubwa mbere ageze mu Rwanda, ndetse birashoboka ko rwiyongereye ku bihugu birindwi byo muri Afurika agezemo.

Uyu mugabo yavuze ko mu rugendo rwe mu Rwanda, azahura n'abafite aho bahuriye n'uruganda rw'ubuhanzi mu Rwanda, ndetse azamenya birushijeho umuco w'u Rwanda. Ati 'Ndashaka kureba ibyo abandi bantu batarabona, ku buryo nzagenda mbiratira abandi bakifuza gushora imari mu Rwanda.'

Yavuze ko yaje mu Rwanda ku butumire bwa Coach Gael washinze Kigali Universe, ndetse hari ibiganiro yagiranye n'umunyarwanda Basaninyezi Tumaine uri mu buyobozi bw'urubuga rwa Youtube. Ati 'Nahuye n'abanyarwanda benshi, ku buryo numvaga nshaka kuza mu Rwanda nkagirana n'ibiganiro na Coach Gael'.

Smade yanavuze ko uruzinduko rwe rugamije kureba uko iserukiramuco yashinze rya Afro Nation ryatumirwamo abahanzi bo mu Rwanda, ndetse bakagira uruhare no mu bindi bikorwa bishamikiyeho. Ati 'Nizeye ko nyuma y'uru ruzinduko tuzabafasha gukorana nabo.'

Uyu mugabo yavuze ko mu myaka irindwi ishize atangije iri serukiramuco nta muntu wabyumvaga, ariko hahindutse byinshi. Yavuze kandi ko mu myaka 20 ishize, ari mu Bwongereza yabonye gutangiza iri serukiramuco 'riri kuri uru rwego ari kimwe mu byiza nagezeho muri ubu buzima'.

Yavuze ko gushinga iri serukiramuco yari agamije ko rifasha umubare munini atari we gusa, kandi arashaka kuzahura cyane n'abahanzi bo mu Rwanda ku buryo bagirana ubufatanye bwihariye.

Uyu mugabo aje mu Rwanda mu gihe iri serukiramuco, ryanyuzemo abarimo Asake, Nicki Minaj n'abandi. Muri Kamena 2024 ryabereye muri Portugal.

Smade avuga ko kiriya gihe muri Kamena 2024, babonye umubare munini cyane, ndetse abanya-Nigeria bigaragaje cyane muri ririya serukiramuco mu buryo bukomeye.

Yavuze ko yagombaga kuza mu Rwanda muri Werurwe 2024, ariko ntibyakunda, ahitamo kuza mu mpera z'uyu mwaka kugirango ahakorere ibiruhuko.

Uyu mugabo yavuze ko imikoranire ye n'abahanzi Nyarwanda, izashoboka ahanini binyuze mu biganiro azagirana nabo. Abajijwe niba Bruce Melodie ashobora kuzatumirwa muri iri serukiramuco, yasubije ko hari byinshi bigomba kubanza gukorwa birimo kumufasha kubanza kwisanga ku isoko mpuzamahanga mu buryo bworoshye. Ati 'Hamwe n'ibyo noneho byadufasha kwisanga.'

Iri serukiramuco ryakunze kugaragaramo cyane umuhanzi Burna Boy uri mu bakomeye ku rwego rw'Isi. Smade yavuze ko kumutumira buri gihe, ahanini biterwa n'uko ari umuhanzi ucuruza cyane muri iki gihe, kandi ntawe utabibona.

Ati 'Abantu bagura amatike cyane kubera we. Buri wese ushaka gukora 'Business' areba ku muntu ushobora kugurisha cyane amatike, cyangwa se uzatuma ugaruza ayo winjije. Buri wese rero utegura ibitaramo, urebe neza uzafasha kugarura ibyo washoye.'

Smade yavuze ko Burna Boy ari igihangane cya Afurika, kandi yatangiye gufungura imiryango ye n'iy'abandi bahanzi ku rwego mpuzamahanga 'rero tugomba kumushyigikira', Ati 'Nishimiye aho yavuye ndetse n'aho ageze muri iki gihe.'

Hagati ya 26 Kanama na tariki 28 Kanama 2024, ibitaramo by'iri serukiramuco bitegurwa n'uyu mugabo byabereye mu Mujyi wa Lisbon muri Portugal.

Ibi bitaramo byamaze iminsi itatu, ndetse biririmbamo Ruger, BNXN, Asake, Central Cee, Tyla, Focalistic, Uncles Waffles n'abandi. 

Haririmbye kandi Nick Minaj, Omah Lay, Flavour, Musa Keys, Kelvin Momo, Rema, Diamond Platnumz , Dadju, Tayc, Seyi Vibez, Tyler ICU, Young Stunna, Mellow & Sleazy, Major League DJz n'abandi. Imibare igaragaza ko ibi bitaramo byitabiriwe n'abarenga ibihumbi 40 bavuye mu bihugu 140. 

Smade yatangaje ko u Rwanda ari igihugu cya Karindwi cyo muri Afurika agezemo 

Smade yavuze ko imyaka 20 yabaye mu Bwongereza, yagejeje ku gitekerezo cyo gutangiza iserukiramuco ‘Afro Nation’ 

Kenny Mugarura uri mu bayobozi ba 1:55 AM [Uri iburyo] yakiriye ku kibuga cy’indege Smade washinze iserukiramuco ‘Afro Nation’ 

Smade yavuze ko hari icyizere cyo gukorana n’abahanzi barimo Bruce Melodie, ariko birasaba kubanza kubaharurira inzira 

Smade yavuze ko guhora atumira Burna Boy mu bitaramo bye, ahanini bishingira mu kuba ari umuhanzi ucuruza 

Uyu mugabo yavuze ko yaje mu Rwanda ku butumire bwa Coach Gael, binyuze kuri Tuma Basa uri mu buyobozi bwa Youtube 

Smade yavuze ko yaje mu Rwanda, kuhizihiriza isabukuru y’amavuko no gusoza umwaka neza

Couple ya René Patrick na Tracy Agasaro, ni imwe mu ma couple akunzwe cyane hano mu Rwanda. Iyi couple ntisiba kugaragariza abantu ko yakundanye urw'ukuri, cyane cyane ibinyujije ku mbuga nkoranyambaga zikurikirwa n'umubare munini.

Aba bombi, bakunze gutumirwa ahantu hatandukanye bakavuga ku nkuru y'urukundo rwabo, uko bahuye n'uko babanye, bagahamya ko byose ari umugambi w'Imana.

Ku wa 29 Ukuboza 2023, René Patrick na Tracy batumiwe mu gitaramo cyitwa 'Kainos' gifatwa nk'icya mbere gikomeye mu muziki wo kuramya no guhimbaza Imana i Burundi.

Muri nzeri 2023, ni bwo René Patrick yari yinjije ku mugaragaro mu muziki umugore we, Tracy Agasaro, usanzwe ari umunyamakuru wa RBA kuri televiziyo yayo ya kabiri izwi nka KC2.

Aba bombi bari basanzwe baririmbana mu bitaramo bitandukanye ariko bari batarashyira hanze indirimbo bahuriyemo, muri Nzeri 2023 basohoye iyitwa 'Jehovah'' iba iya mbere bari bahuriyemo, irakundwa bikomeye ndetse kugeza ubu ni yo itumye izina ryabo ryambuka umupaka.

Uyu munsi, Rene na Tracy bamaze gushyira hanze indirimbo eshatu ari zo ‘Jehovah’ bahereyeho, ‘Niryubahwe,’ ndetse n’iyo baheruka gushyira hanze bise ‘Imirimo yawe (irivugira).’

Muri uyu mwaka ku ya 5 Gicurasi, Tracy Agasaro yayoboye igitaramo gikomeye umuramyi Chryso Ndasingwa yamurikiyemo Album yise ‘Wahozeho,’ na cyo cyabereye muri BK Arena. 

Kuwa 25 Ugushyingo 2022, Tracy yayoboye igitaramo gikomeye cy’itsinda Hillsong London, cyabereye i Kigali muri BK Arena. Ni igitaramo cya kabiri iri tsinda ryari rikoreye mu Rwanda, aba baramyi bakaba barafatanyije na Aime Uwimana ndetse na Benjamin Dube.

René Patrick yambitse impeta umukunzi we Agasaro tariki 17 Nyakanga 2020. Ku wa 4 Ukuboza mu mwaka wa 2021 ni bwo Tracy Agasaro yemeranije kubana akaramata na Rene Patrick umuhanzi w'indirimbo zo kuramya no guhimbaza Imana, aho bahamije isezerano ryo kuzabana akaramata imbere y'Imana n'abantu muruhame bose babireba.

Agasaro iyo avuga ku rukundo rwe na René Patrick, avuga ko yamenyanye na René Patrick ubwo yari amubonye mu materaniro yo kuramya no guhimbaza Imana.

Ati 'Nari nsanzwe ndi umufana we, ntabwo yari azi ko mufana ariko igihe kiravuga, yaje kubimenya. Twakundanye ndi umufana we cyane uretse ko n'ubu nzahora mufana, icya mbere nubaha ni uko azi, anubaha uwo ari kuramya.'

Uyu munyamakuru avuga ko ikintu cyatumye aba umufana wa René Patrick kijyanye n'uburyo akoresha iyo aramya Imana.

Ati: 'Ni umuhanzi uririmba arangamiye izina ry'uwo aramya, ni cyo kintu cyankuruye ndavuga nti ‘uyu niwe muhanzi nkunda’.'

Abajijwe uko biba byifashe iyo uwari umufana abaye umukunzi w'umuhanzi yafanaga, yaragize ati: 'Byose ni imigambi y'Imana.''

Tracy Agasaro ni umwe banyamakurukazi bakunzwe by’umwihariko kuri Televiziyo akorera ya KC2 akaba n’umwe mu bashyushyarugambakazi beza bagiye bayobora ibirori binyuranye. Mu birori bya vuba harimo Bianca Fashion Hub na Rwanda Gospel Live Star mu ifungurwa ryayo ku mugaragaro.

Ni mu gihe Rene Patrick wamaze kuba umugabo we, yamamaye mu ndirimbo zo kuramya no guhimbaza Imana aho akunzwe cyane mu yitwa ‘Arankunda’ na ‘Ni Byiza’. Uretse kuririmba kandi Rene Patrick ni umwanditsi mwiza w’indirimbo.

Aba bombi bagiye kuyobora 'Joyous Celebration Live in Kigali,' mu gihe bizihiza isabukuru y'imyaka itatu bamaze barushinze. 

Imyaka itanu bamaranye, ni imyaka banatanzemo umusanzu ukomeye ku Itorero rya Kristo dore ko Rene Patrick ari mu baramyi bayobora kuramya no guhimbaza Imana muri Grace Room Ministry, mu gihe Tracy Agasaro aba ari muri Women Foundation Ministries.

Tariki 29 Ukuboza 2024, ni umunsi w’amateka mu muziki wa Gospel mu Rwanda kuko ari bwo itsinda Joyous Celebration ryo muri Afrika y’Epfo rizataramira mu Rwanda ku nshuro ya mbere mu gitaramo gikomeye cyateguwe na Sion Communications na Zaburi Nshya Events.

Iki gitaramo kizabera muri BK Arena ndetse ab’inkwakuzi bageze kure bagura amatike. Amatike ari kuboneka mu buryo bw’ikoranabuhanga kuri www.ticqet.rw ndetse ushobora no guhamagara nimero za telefone: 0787500113 bakakuzanira itike aho uherereye. Amatike kandi ari kuboneka kuri Camellia zose ndetse na Samsung 250 zose.

Kwinjira muri iki gitaramo cy’amateka biroroshye kuko itike ya macye ari 7,000 Frw, itike ya Bronze iragura 15,000 Frw, itike ya Gold iragura 25,000 Frw, itike ya Silver iragura 30,000 Frw, itike ya Platinum iragura 40,000 Frw naho muri VVIP ni ukwishyura 50,000 Frw. Ukurikije uburyo abantu banyotewe cyane, amatike ashobora gushira vuba.

Igitaramo Joyous Celebration bazakorera mu Rwanda kiri mu bitaramo bikomeye 6 bagiye gukora mu mpera za 2024. Ni ibitaramo bise “Joyous Celebration 28 Summer Tour” bizaherekeza umwaka uyu mwaka.

Joyous celebration ni itsinda ryo kuramya no guhimbaza Imana ribarizwa mu gihugu cya Afurika y'Epfo, ryatangiye umurimo wo kuramya no guhimbaza Imana mu mwaka wa 1994.

Iri tsinda ryatangijwe n’abaramyi batatu ari bo; Lindelani Mkhize, Jabu Hlongwane na Mthunzi Namba. Muri Mata 2011, ni bwo Joyous Celebration yatangiye ivugabutumwa rizenguruka mu bice bitandukanye baryita ‘My gift to you,’ ryakozwe iminsi itandatu.

Tariki 2 Werurwe 2015, Joyous Celebration bashyize hanze Album Volume ya 19 bise ‘Back to the Cross.’ Iyi album yanaje ku mwanya wa mbere muri Afrika y’Epfo mu byumweru bibiri bikurikiranye, ndetse igurisha kopi zirenga 51.271, bituma iza ku mwanya wa mbere mu bihembo byiswe South Africa Music Awards.

Tariki 29 Kamena 2018, Joyous Celebration yatangiye ivugabutumwa ry'iminsi itanu yise ‘Joyous 22 All for You Tour,’ barikorera muri Midburg, Mpumalanga, Times Square Arena i Tshwane basoreza muri Gauteng.

Joyous Celebration yahawe ibihembo byinshi bitandukanye mu myaka yatambutse. Nko mu bihembo byitwa South Africa Music Award, Joyous celebration yagiye yitabira mu myaka ya za 2002, 2003, 2004, 2005, aho hose yagiye yegukana igihembo nk’itsinda ryakoze album nziza.

Ibi byasubiriye mu 2008 na 2009, nuko muri 2013, 2014 na 2015 Joyous Celebration yongera guhembwa nk’abacuruje DVD nyinshi, ndetse mu 2018 na 2019 biharira ibikombe byinshi bya Gospel byatangiwe muri Afurika y’Epfo.

Nanone mu 2000 no mu 2001, iri tsinda na bwo ryaciye agahigo mu bihembo byiswe Metro FM Music Awards. Hari ibindi bihembo byiswe Crown Gospel Awards, Joyous yegukanye mu 2008 na 2009.

Ibindi bihembo byatanzwe bizwi nka ‘One Gospel Awards’ iri tsinda ryegukanye mu 2007 na 2008, maze mu 2013 rihita rihabwa ikindi gihembo cya ‘Africa Gospel Music Award.’

Ibihembo Joyous Celebration yatwaye ni byinshi kuko ni itsinda ry'ibigwi mu ivugabutumwa ku Isi, bijyanye n’uko ari rimwe mu matsinda macye abarizwa ku mugabane wa Afurika yasinyanye amasezerano na Studio ya Universal Motown Records y'Abanyamerika.

Joyous Celebration ni itsinda ry'abanyamuziki ryakoranye na Sony Music mbere y'uko mu 2021 batangira gukorana na Universal Music hamwe na Motown Gospel.

Iri tsinda rikunzwe bikomeye mu muziki wa Gospel muri Afrika, rimaze gukorera muri studio album umunani zisanga izindi icyenda bakoze mu buryo bwa Live, ndetse uyu munsi rigizwe n'abaririmbyi barenga 45.

Mu ndirimbo zabo zikunzwe cyane, harimo iyitwa ‘Bekani Ithemba,’ ‘Alikho Lelifana,’ ‘Awesome is your name,’ ”I Am the winner,’ ‘Who Am I,’ ‘Wenzile,’ ‘Wakhazimula,’ ‘Tambira Jehova,’ ‘Iyo Calvari’ n’izindi nyinshi zagiye zirebwa na za miliyoni kuri YouTube.

Tracy Agasaro na Rene Patrick nibo bazayobora igitaramo Joyous Celebration bagiye gukorera muri BK Arena

Ni abaramyi bakomeye bamaze gukorana indirimbo 3

Basanzwe batumirwa mu bitaramo binturanye bagahembura imitima ya benshi

Tracy Agasaro aherutse kuyobora igitaramo Chryso Ndasingwa yamurikiyemo Album

Tracy Agasaro afatwa nk’umushyushyarugamba wa mbere mu bikorwa bya Gospel, hano yari ariyoboye igitaramo cya Hillsong London

Bagiye kuyobora iki gitaramo mu gihe bishimira imyaka itatu ishize barushinze

Ni igitaramo kitezweho gufasha abakristo gusoza neza umwaka wa 2024 

Yabibwiye itangazamakuru saa Saba z’ijoro ryo kuri uyu wa Kane tariki 26 Ukuboza 2024, ni nyuma yo gukora igitaramo yise “Icyambu 3”. 

Cyabereye muri BK Arena, kandi cyitabiriwe n’abantu barenga ibihumbi 10 barimo abayobozi mu nzego Nkuru z’igihugu, ndetse n’ababyeyi be.

Yakoze iki gitaramo ari ko mu gihe ku mbuga nkoranyambaga, hari hamaze iminsi hacicikana amakuru avuga ko afite umukobwa yateye inda, ndetse ko babyaranye.

Ni inkuru zavuzwe cyane mu minsi itanu ishize, ku buryo byavugwaga ko yahuriye n’uyu mukobwa i Kigali muri Rebero.

Ariko nta jwi cyangwa se amashusho yigeze ajya hanze, y’uyu mukobwa yemeza ko yabyaranye na Israel Mbonyi.

Israel yumvikanishije ko imyaka 10 ishize ari mu muziki, yanyuze muri byinshi kandi ashima ko Imana yabaye mu ruhande rwe.

Ahera aha avuga ko amaze kubona byinshi, ku buryo ibivugwa muri iki gihe bitatuma umutima uhagarara.

Yavuze ati “Maze gukura! Njyewe ntabwo nkiri umwana wo kurizwa n’akantu kose gatambutse. Icyaba ari cyo cyose. Nkunda Imana… Igihe ni cyiza kuko gisobanura ibintu byose. Uko igihe kigenda ibintu birisobanura. Ibintu nka biriya ni ibintu by’abana.”

Hejuru y’ibi, Israel Mbonyi yavuze ko ashima Imana kuko ibitaramo ategura byitabirwa.

Yavuze ko yifata nk’umuhanzi ukizamuka, ari nayo mpamvu ahora ashyira imbaraga mu bikorwa bye, ndetse yifuza ko na nyuma y’ubu buzima haba hari ibihangano bizakomeza gusohoka.

Mu 2022 ni bwo Israel Mbonyi yatangije ibi bitaramo ngaruka mwaka yise 'Icyambu'. Icyo gihe yanditse amateka avuguruye aba umuhanzi wa mbere w'umunyarwanda wabashije kuzuza inyubako ya BK Arena.

Amateka yongeye kwisubiramo mu 2023 ubwo yataramiraga abasaga ibihumbi 10 mu gitaramo yakoreye muri BK Arena, ku wa 25 Ukuboza-Yongera kuzuza iyi nyubako.

Ni kimwe mu bitaramo biba bitegerejwe buri mwaka, ahanini hashingiwe ku rukumbuzi baba bafitiye uyu muhanzi buri mwaka, binyuze mu bikorwa bye.

Muri uyu mwaka, Israel Mbonyicyambu [Israel Mbonyi] yashyize imbere gukorera ibitaramo mu bihugu byo mu mahanga, kandi hose yahavuye yaciye agahigo bitewe n'ibihumbi by'abantu bamushyigikiraga.

Yakoreye ibitaramo muri Uganda no muri Kenya. Ndetse, ari kwitegura gukorera gusoreza umwaka muri Kenya.

Ushingiye ku mibare y'abakurikira ibihangano bye, ubu ni we nimero ya mbere mu bahanzi bo mu Rwanda ukurikirwa cyane (Cyangwa se ufite Subscribers benshi) ku rubuga rwa Youtube, aho yageze ku bantu Miliyoni 1.44.

Ni umwanya yakuyeho Meddy ubarizwa muri Leta Zunze Ubumwe za Amerika. Ikindi, ni uko Israel Mbonyi muri iki gihe ashyize imbere gukora ibihangano bye mu rurimi rw'Igiswahili, byatumye umubare munini w'abakunzi be ukomeza kwiyongera cyane cyane muri Kenya. 

Ibi bituma ibitaramo bye akorera muri BK Arena bititabirwa n'Abanyarwanda gusa, kuko haba harimo n'umubare munini w'abo mu Burundi, muri Uganda, Kenya, Tanzania n'ahandi banyuzwe n'inganzo ye mu bihe bitandukanye.

Ubwo yakoraga igitaramo nk'iki mu 2022 yagihuje no kumurika Album ye 'Nk'umusirikare' iriho indirimbo zabiciye muri icyo gihe, ndetse yanahisemo kujya kuyimurikira Abanyarwanda batuye mu Bubiligi mu gitaramo cyabaye ku wa Nyakanga 2024.

Yanifashishije indirimbo zigize iyi Album mu gitaramo yakoreye i London mu Bwongereza ubwo yaririmba mu bitarane by'iminsi ibiri byari byateguwe na Women Foundation Ministries, icyo gihe yahuriye ku rubyiniro n'abarimo Aime Uwimana.

Israel Mbonyi yatangaje ko yizera mu gihe cy’Imana, ku buryo n’ibivugwa bizagera aho bigasobanuka, buri wese akamenya ukuri 

Israel Mbonyi yumvikanishije ko ibyavuzwe y’uko yabyaranye n’umukobwa nta kuri kurimo, kandi ko atakiri umwana ku buryo arizwa n'ibivuzwe kuri we 

Israel Mbonyi yakoreye igitaramo gikomeye muri BK Arena kuri uyu wa Gatatu tariki 25 Ukuboza 2024, mu rwego rwo gufasha Abakristu kwizihiza Noheli   

Kanda hano ubashe kureba Amafoto yaranze igitaramo cya Israel Mbonyi

AMAFOTO: Ngabo Serge- InyaRwanda.com

Soeur Uwamariya usanzwe ari Umuyobozi w'Ishuri ry'Abakobwa rya College St. Bernard Kansi riherereye mu Karere ka Gisagara, ni umubikira w'Umu-Bernardine wanashinze 'Famille Esperence', umuryango wagize uruhare runini mu kubaka umuryango uhamye.

Yabigarutseho ku wa 25 Ukuboza 2024 ubwo yari mu kiganiro kuri RBA.

Uretse kuba ari n'umurezi, akora n'ubutumwa busanzwe bujyanye n'Iyobokamana no gufasha abantu, umuhamagaro amazemo imyaka 27.

Yavukiye i Jali mu Karere ka Gasabo, nyuma iwabo baza kwimukira mu Karere ka Nyarugenge hafi ya Nyabugogo.

Yinjiye muri 'Couvent' ku wa 25 Ukwakira 1994. Icyo gihe yasengeraga muri Saint Famille mu Mujyi wa Kigali.

Yasezeranye kwiha Imana bwa mbere ku wa 15 Kanama 1997 nyuma y'imyaka itatu ahabwa amahugurwa atandukanye. Yinjiriye mu yahoze ari Butare muri Huye y'ubu nyuma mu 2000 asezerana amasezerano ya burundu.

Icyakora mu mutima we yiyeguriye Imana burundu ubwo yari afite imyaka 22 mu 1992. Icyo gihe yari arangije amashuri yisumbuye ndetse afite n'akazi muri Minisiteri y'Abakozi ba Leta n'Umurimo.

Abajijwe icyatumye afata icyo cyemezo kitumvikanaga mu bo mu muryango we, Sœur Uwamariya yagize ati 'Imana ni yo idutora ikaduhamagara. Iyo itubwiye ko idukunda ishimishwa ko natwe tuyiha igisubizo cya Yego. Numvise ijwi ry'Imana mu mutima wanjye ngerageza gusenga, kugisha inama, umunsi ugeze mfata icyemezo.'

Ni ibintu bitari byoroshye kuko ubwo yatekerezaga kwiha Imana hari mu bihe u Rwanda rwari mu mateka mabi ya Jenoside yakorewe Abatutsi na we kandi afite abe benshi bishwe muri Jenoside, asabwa gushaka umugabo akagura umuryango.

Ati 'Hari mu bihe bya Jenoside yakorewe Abatutsi maze gupfusha abantu benshi nsigaranye bake cyane, na bo bafite ibibazo byinshi. Nubwo hari abamfashije muri urwo rugendo nka murumuna wanjye, ariko hari abatarabyumvaga bashakaga ko nshyingirwa nkabyara, nkagira umuryango. Byarumvikanaga cyane nk'umukobwa muto usigaye mu muryango muri bake basigaye, Urumva abantu baba bakwitezeho byinshi.'

Uretse abo mu muryango we n'umukunzi we ntabwo yabyumvise, kuko yatekerezaga ko we na Uwamariya w'icyo gihe bagombaga gushinga urugo ariko byose abitera umugongo.

Ati 'Icyo gihe nari mfite n'inshuti [z'abahungu] zansabaga ko twaba inshuti (fiancé) nk'umuntu muto ariko mbivamo, bose mbasezeraho njya kwiha Imana, kandi numva nishimiye umuhamagaro wanjye. Nta n'ubwo nari mfite umwe wandambagizaga bari benshi ariko abo bose nababwiye ko mfite igitekerezo cyo kwiha Imana.'

Agaragaza ko umuryango ari wo shingiro kuri sosiyete n'umuryango mugari, akabishimangiza na Bibiliya, aho iki gitabo gitagatifu kigaragaza uburyo Imana yaremye umugabo n'umugore ikabaha umugisha, ikabasaba kororoka bakagenga Isi.

Ati 'Ishingiro ry'umuryango ni Imana ubwayo kuko ni yo yawuremye. Ni yo mpamvu urugo rutagira Imana rudashobora kuramba kuko yawuremye mbere. Kuri njye umuryango ni ho byose bitangirira. Iyo umuryango ari mwiza, abana, igihugu, sosiyete n'ibindi byose biba byiza.'

Agaragaza ko iyo yitegereje umuryango w'ubu, ababazwa cyane no kubona harimo ibibazo byinshi, ariko akagira icyizere ko bizagenda neza kuko hari n'imiryango ibayeho neza.

Ku bijyanye n'abababaye bafite ibibazo byinshi, nk'uburwayi n'ibindi, agaragaza ko bakwiriye gukomera kuko na Yezu yavukiye mu bibazo ariko agahangana na byo.

Ati 'Yezu ntiyavukiye mu bitaro. Ntiyavukiye aheza ahubwo yavukiye mu kirugu, mu bukene, mu mbeho. Ntabwo byari bimworoheye. Nubwo waba ubabaye Imana izi mu mateka yawe komera muri kumwe.'

Umuyobozi w'Ishuri ry'Abakobwa rya College St. Bernard Kansi riherereye mu Karere ka Gisagara yagaragaje ko yari afite abasore benshi bamurambagiza ariko byose abitera umugongo yiha Imana

Aha hose ni hamwe mu hantu hagezweho Abanyakigali bashobora kugirira ibihe byiza bitewe n'amafunguro ahategurirwa, agategurwa na kabuhariwe Billy McCormick, Umunyamerika umaze imyaka 35 mu kazi ko gutegura amafunguro, ndetse n'itsinda bafatanya.

Uyu mugabo wageze mu Rwanda mu bihe bya Covid-19, ni umwe mu babonye amahirwe mu kwaguka k'Umujyi wa Kigali, agira igitekerezo cyo gufungura restaurant zigezweho, zakira Abanyamahanga n'Abanyamahanga muri rusange.

Mbere yo kwisanga i Kigali mu Rwanda, igihugu atigeze arota ko yabayemo, McCormick, yabanje gutura no gukorera muri Leta Zunze Ubumwe za Amerika igihe kinini, ahereye muri Leta ya Connecticut ari naho yakuriye.

Nyuma yaje gukomereza mu bindi bice by'icyo gihugu birimo Philadelphia, mu Mujyi wa Atlanta, i Miami na Washington D.C

Aha hose, ni ko yarushagaho kugenda ahakura ubumenyi bwisumbuye mu bijyanye no gutegura amafunguro, umwuga yakundishijwe n'ababyeyi be.

Mu kiganiro The Long Form, uyu mugabo yavuze ko atigeze atekereza gutura muri Afurika, nubwo umugore we akomoka muri Ethiopia.

Ati 'Ntabwo nigeze ntekereza ko nzaba ku Mugabane wa Afurika, nkiri umusore muto ntabwo nigeze ntekereza ko ibyo bishoboka.'

Uyu mugabo yavuze ko yakundishijwe gutegura amafunguro n'ababyeyi be.

Ati 'Umubyeyi wanjye yari azi gutegura amafunguro, yavutse ahagana mu 1940. Yabyigiye ku babyeyi be. Icyo gihe abantu bateguraga amafunguro bifashishije amaboko yabo, ntabwo hariho ibintu byinshi bifasha abantu mu gutegura amafunguro. Umubyeyi wanjye yize ubwo bumenyi, aza kubutwigisha njye na mushiki wanjye.'

Ku myaka itanu gusa, McCormick yari yaratangiye kugira amatsiko yo kumenya ibyo guteka, ndetse hari n'ibyo atangiye kwiyigisha kwitegurira.

Gusa mu mabyiruka ye, yakuze yifuza kuzaba umuganga ufasha abafite ibibazo byo mu mutwe, kandi ibi nibyo ababyeyi be bamwifurizaga.

Ku myaka 16, yatangiye kujya gufasha akazi, ahera ku kazi ko koza ibyombo muri restaurant. Ati 'Nabonye akazi muri restaurant, nari nshinzwe koza ibyombo. Naje gutangira gukora imirimo yo guteka, mpita nkunda uwo mwuga cyane.'

Nta gihe byatwaye mbere y'uko McCormick abona ko uyu ari wo mwuga umukwiriye, afata icyemezo cyo kubwira ababyeyi be ko ibyo kwiga ubuganga yabihagaritse, umwuga agiye kwiyegurira ari uwo gutegura amafunguro. Gusa, iki cyifuzo ntabwo cyakiriwe neza n'ababyeyi.

Ati 'Ababyeyi banjye ntabwo bari bishimiye ubwo nababwiraga ko ngiye kuba umutetsi aho kuba umuganga. Kuva ubwo ntabwo nigeze mbindura ibitekerezo.'

Kugira ngo abashe kubaka izina rifatika, uyu mugabo yagombaga gushyira imbaraga nyinshi mu kazi ke, ati 'Ndi umuntu ukora cyane, ndashima Imana yampaye ubwo bushobozi ndetse n'umubyeyi wanjye wanyigishije gukora cyane.'

Urugendo rwamugejeje i Kigali

Mu mpera za 2019, icyorezo cya Covid-19 cyatangiye kuvugwa hirya no hino ku Isi, biba akarusho mu 2020 kuko cyakwiriye hose, kigera no muri Leta Zunze Ubumwe za Amerika.

Nyuma y'aho gato, Amerika yaje kwisanga mu bibazo bishingiye ku myigaragambyo ikomeye cyane yakozwe mu rwego rwo kwamagana akarengane gakorerwa Abirabura batuye muri icyo gihugu, yamenyekanye nka 'Black Lives Matter.'

Ku rundi ruhande, amatora muri icyo gihugu yemeje ko Donald Trump yatsinzwe na Joe Biden gusa arabihakana, Abanyamerika bamushyigikiye batera Inteko Ishinga Amategeko abantu batanu bahasiga ubuzima, byose bikarushaho gutanga ishusho mbi y'ahazaza h'icyo gihugu.

Ibi byatumye McCormick atangira gutekereza kwimurira umuryango we mu kindi gihugu gitekanye, kugira ngo abana be bazakurire ahantu hatuje, hatari umwuka mubi nk'uwari muri Amerika.

Ibi byatumye yifuza kwimurira umuryango we ahandi hantu, ati 'Byari bishingiye ku bana banjye, hari ibintu byinshi ntakunda mu gihugu cyanjye [Amerika]. Ibintu nahabonye mu myaka itanu cyangwa itandatu ishize, nabonye ko byaba byiza ko nabajyana ahandi hantu, bakiga ibindi bintu bitandukanye. [n'ibyo bakuriyemo]'

U Rwanda ruri mu bihugu uyu mugabo yabonyemo amahirwe cyane cyane bishingiye ku miyoborere myiza ihari n'iterambere rugeraho mu bukungu.

Ati 'Mu ntangiriro, muri Amerika hari imyigaragambyo myinshi [Black Lives Matters] urwango n'ibindi. Naribabije nti 'ahazaza [abana banjye] hazaba hameze gute?' Byanteye ubwoba kuko imijyi nabayemo nka Philadelphia, nkifuza ko abana banjye bazakura bitandukanye n'uko nakuze. Nifuza kubona abana banjye bakuze bazi Isi muri rusange, bagakurira ahantu hari ubuyobozi buhamye, nk'ubwa Perezida Kagame.'

Nyuma yo gufata iki cyemezo, icyari gikurikiyeho ni ukubimenyesha umugore we nawe wabishyigikiye cyane, dore ko afite inkomoko ku Mugabane wa Afurika.

Ati 'Yiyumvaga nk'uko niyumvaga, yahoraga yifuza kuza muri Afurika kuko uyu Mugabane ni iwabo. Mubwiye kuri ayo mahirwe [yo kuza muri Afurika] yarabyumvise 100%. Ikindi ni uko muri ibyo bihe, ibintu byinshi muri Amerika bitari ku murongo mu bihe bya Covid-19 na nyuma yaho.'

Yasobanuye ko umugore we yishimiye imiyoborere y'u Rwanda, bityo bikamworohera gufata iki cyemezo, ati 'Umugore wanjye yakunze kuba mu gihugu kiyobowe na Perezida Kagame. Yari yarabaye mu miryango itegamiye kuri Leta ikora muri Afurika. Kuba hano mu gihugu kikiri kwiyubaka ni ibintu byamuteye imbaraga. Byari amahirwe ku muryango wanjye wo kubona uburyo abandi bantu babaho. Ntabwo yigeze aterwa ikibazo cyo kuba mu Rwanda aho kuba muri Ethiopia.'

Amahirwe yo gutegura amafunguro ya Perezida Kagame

Nyuma yo gutangira ibikorwa bye mu Rwanda, uyu mugabo ufite ubuhanga budasanzwe yatangiye kumenyekana, rimwe aza kwakira ubutumwa bumumenyesha ko ari bwakire umushyitsi w'imena muri restaurant ye.

Ati 'Bimaze kubaho nk'inshuro eshanu, ku nshuro ya mbere nari mfite igitutu cyinshi. Uwo munsi ntabwo numvaga meze neza, menya ko bagiye kuza, mva mu rugo numva ntameze neza ariko ndagenda. Urutonde rw'ibyo kurya bashakaga rwari ruto, kandi baje ari umuryango wose n'inshuti zabo.'

Mu gutegura aya mafunguro, McCormick yakoranye n'abasanzwe bategura amafunguro ya Perezida Kagame, ibyatumye barushaho kugenda bamenya uburyo ateguramo amafunguro.

Icyakora icyamushimishije kurushaho, ni ibiganiro yumvise Perezida Kagame yarimo kugirana n'abo mu muryango we, akavuga ko yagize amahirwe yo kuba mu mwanya nk'uwo w'ibiganiro by'ingenzi.

Yasobanuye ko mu miterere ya Perezida Kagame, ari umuntu wita cyane ku mafunguro afata, akita cyane ku ntungamubiri ziyagize, buri kimwe cyose kikaba kiri ku murongo.

Yasobanuye ko abana ba Perezida Kagame bafite ubumenyi ku bijyanye n'imiterere y'amafunguro atandukanye, ibifitanye isano n'uko babaye mu mico itandukanye igatuma bashobora gusobanukirwa byinshi ku mafunguro.

Ku yindi nshuro, Perezida Kagame yagiye gusura umwe mu nshuti ze, iyo nshuti ye isaba McCormick kuza kumufasha gutegura amafunguro.

Muri icyo gihe, McCormick yagize amahirwe yo kubona Perezida 'nk'umuntu usanzwe' aho yari yicaye wenyine ari kureba umupira kuri televiziyo, 'akoresha telefoni nk'umuntu usanzwe.'

Ibyo kwitaho mu rugendo rwo gufungura restaurant

McCormick amaze kwiga byinshi ku isoko ry'u Rwanda cyane cyane ku bijyanye na restaurant, akavuga ari ikintu kitoroshye kuyifungura cyane ko nibura 60% by'izifungurwa zitarangizwa umwaka wa mbere.

Yashimangiye ko imwe mu mpamvu zibitera ari uko abantu batekereza ko gufungura restaurant ari ikintu cyoroshye kandi ari umwuga urimo akazi kenshi cyane.

Ati 'Abantu benshi binjira mu bya restaurant batekereza ko ari ibintu bizaba byoroshye ariko bagatungurwa no kubona ko atari ibintu byoroshye. Ugomba kuba ufite ubumenyi buhagije, ufite ubushake buhagije. Ikindi ni akazi kenshi, hari igihe mba ndi hano amasaha 14 cyangwa 15 buri munsi mu gihe cy'amezi abiri. Ni amasaha menshi.'

Yavuze ko bamwe mu batangiza restaurant babiterwa no gukunda guteka, ari ko bakwiriye no kubitekereza mu buryo bw'ubucuruzi.

Ati 'Abantu benshi batangire restaurant batekereza ko byoroshye, rimwe na rimwe babitewe no gukunda guteka. Kubikora gusa kuko ubikunda ntabwo bihagije, [ugomba gutekereza ku ruhande rw'ubucuruzi].'

Yashimiye cyane abakozi bakorana, avuga ko harimo abagaragaza umurava ndetse bazavamo abatetsi beza mu gihe kiri imbere.

Yagaragaje ko yafashe igihe kinini abatoza, ati 'Nakoresheje igihe kinini n'imbaraga mu gutoza ikipe dukorana, ariko ntabwo watoza abantu kugira indangagaciro nziza, wakwigisha umuntu ufite indangagaciro nziza uko bakora ibintu, ibyo ni byo mfite.'

Uyu mugabo yavuze ko yishimira kuba igice kinini cy'abasura ibikorwa bye ari Abanyarwanda, ati 'Abanyarwanda basura restaurant bagize nka 75%. Hari Abanyamerika benshi badusura, nubwo bakanzwe na Marburg, nkunda kubona abakiliya benshi baturutse muri Ambasade ya Amerika. Ariko dukunze kwakira Abanyarwanda benshi.'

Yagarutse ku bijyanye n'inteko y'u Rwanda yihariye, avuga ko ihari ariko ugasanga igizwe n'uruvange rw'izindi nteko cyane cyane izo mu Karere u Rwanda ruherereyemo, n'izo mu bindi bihugu Abanyarwanda babayemo.

Uyu mugabo usanzwe urema indyo, yashimangiye ko bimutwara nibura iminsi ibiri mu kuyihanga, ubundi akayigerageza, akayigisha abakozi be mbere yo gutangira kuyitanga mu buryo bwuzuye.

Yanavuze ko akibona amahirwe yo gufungura izindi restaurant, ati 'Ndi gutekereza gufungura izindi restaurant eshatu zitandukanye. Ndifuza kuzashyira imwe hafi y'ikibuga cy'indege kiri kubakwa. Ndifuza gufungura ahacururizwa ikawa, hagati ya Kigali na Musanze.'