Author: webrwanda

The Ben yari yarezwe n’uwitwa Edman Ishimwe ku rubuga rwa X aho yanditse agira ati “U Rwanda rwacu ntawe uba hejuru y'amategeko kandi ntabwo tugira umuco wo kudahana,.. Polisi y’u Rwanda uyu yitwa Mugisha Benjamin (The Ben) atwaye ikinyabiziga atambaye umukandara ndetse ari gukora amakosa akomeye mu gihe atwaye ikinyabiziga mudufashe ahanwe.”

Nyuma, Polisi y’u Rwanda yanditse igira iti “Muraho, murakoze ku makuru mutanze, tugiye kubikurikirana.”

Mu butumwa The Ben yatangaje, yagaragaje ko ariya mashusho amugaragaza atambaye umukandara yayafashe yamamaza indirimbo “Say My Name’ yakoranye n’umuraperi Kivumbi King.

Yavuze ko azi neza ko yari atwaye atambaye umukandara ‘Ikizira mu mategeko y’u Rwanda n’amabwiriza agenga abatwaye ibinyabiziga, uko tuyahabwa na Polisi y’Igihugu”. Yavuze ko yitabye Polisi “yacu” kandi “Nabihaniwe”.

The Ben yavuze ko agiye kurushaho kwitwararika, ndetse azakora uko ashoboye ntazongere kugwa mu ikosa.

Uyu muhanzi yaboneyeho gushishikariza abantu bose kubaha amategeko n’amabwiriza bigenga abakoresha umuhanda. 

Yagize ati:”Mboneraho mbashishikarize mwese kubaha amategeko n’amabwiriza agenga abakoresha umuhanda. Twese tuyubahe, tugereyo amahoro nk’uko Polisi yacu idahwema kubidukangurira.”

Muri iki gihe, Polisi y'u Rwanda ikomeje ubukangurambaga bwa 'Gerayo Amahoro' hirya no hino mu gihugu, bugamije kwimakaza umutekano wo mu muhanda, aho abawukoresha bashishikarizwa kwirinda amakosa ateza impanuka.

IBYO ABASHOFERI  BASABWA

Irinde kuvugira kuri telefone igihe utwaye ikinyabiziga

Irinde gutwara ikinyabiziga wanyweye ibisindisha

Irinde kurenza umuvuduko wagenwe

Irinde gukubaganya akagabanyamuvuduko

Ambara umukandara w'imodoka buri gihe

Ubahiriza uburenganzira bw'abanyamaguru

Kirazira gutwara ikinyabiziga utabifitiye uruhushya

Suzumisha ikinyabiziga cyawe mu gihe cyagenwe

Kirazira gutwara ikinyabiziga kidafitiwe ubwishingizi

Kirazira gutwara abarenze/ibirenze ubushobozi bw'ikinyabiziga

Mbere yo gutwara ikinyabiziga, suzuma niba ibyangombwa bisabwa byuzuye

Irinde kugendera mu gisate cy'ibumoso bw'umuhanda

Kirazira guparika ahatabugenewe

IBYO ABANYAMAGURU BASABWA

-Umunyamaguru agomba kugendera mu gice cy’ibumoso bw’umuhanda aho ibinyabiziga biza bimuturuka imbere abireba.

-Kwambukira mu mirongo yagenewe abanyamaguru, nyuma yo kwitegereza iburyo n'ibumoso ko nta kinyabiziga kiri hafi ye, akambuka yihuta ariko atiruka. 

-Kwirinda kwambuka uvugira kuri telefone cyangwa wambaye utwumvisho two mu matwi (écouteurs).  

 

The Ben yatangaje ko yahanwe nyuma y'uko agaragaye atwaye imodoka nta mukandara yambaye

Bruce Melodie yavuze ibi ubwo yari ku rubuga rwa Instagram rwe amurika Album ye 'Colorful Generation' ari no mu kiganiro cya Kiss Fm. Yirinze kuvuga mu izina Yampano, ariko avuga ko abantu bavutse kuva mu 2000 kuzamura, bakwiye kujya bamwita 'Uncle'.

Iyo usubije inyuma mu biganiro Yampano yigeze kugirana n'umunyamakuru Ally Soudy binyuze ku rubuga rwa Instagram, hari aho Yampano avuga ko yavutse mu 2000. Agira ati 'Njyewe navutse mu 2000.'

Ubwo yari ku rubuga rwa Instagram, Bruce Melodie yabwiye abantu bose bari bamuhanze ijisho, ko abavutse mu 2000 bakwiye kujya bamwita 'Uncle'.

Yavuze ati 'Abantu muri kuri iyi 'Live' mwavutse mu 2000 kuzamura mujye munyita 'Uncle' Bruce. Ni ihame! Kubera ko nsigaye mbona abasore barakuze, tukaganira. Nkajya numva ari kuvuga inkuru zikagarukira mu nzira.'

Mu butumwa yatambukije ku rubuga rwa Instagram rwe kuri uyu wa Gatandatu tariki 18 Mutarama 2025, Yampano yabwiye Bruce Melodie ko yamenye ko amubereye 'Uncle' kandi ko amukunda.

Ati: 'My Uncle ndagukunda/ Marume wanjye ndagukunda. Gusa nyokorome akuruma akurora. #Ngo. Sinzi niba uri kumva icyo kintu.'

Uku guterana amagambo kwa hato na hato hagati ya Bruce Melodie na Yampano, kwavutse nyuma y'uko ku wa 5 Mutarama 2025, Yampano yanze kuvuga kuri Bruce Melodie ubwo yari mu kiganiro 'Versus' cya Televiziyo Rwanda.

Ati: 'Bruce nta kintu mfite cyo kumuvugaho. Abagabo ba 1:55 AM, ntacyo nabavugaho. Ntabwo muzi Melodie, ntabwo turahura. Nta kintu muvugaho.'

Yampano yari yatumiwe muri iki kiganiro, nyuma y'uko aciye ibintu mu gitaramo cya The Ben cyabaye tariki 1 Mutarama 2025 muri BK Arena. 

Uyu musore yavuze ko iki gitaramo cyabaye amahirwe adasanzwe kuri we, ndetse arateganya gukorana indirimbo na The Ben muri uyu mwaka.

Ati: 'Ni mukuru wanjye mu muziki no mu myumvire afite n'ijisho rya mukuru. Yumve ko agaciro yahaye ubuhanzi bwanjye nzakurikiza ibyo yanyeretse nka mukuru wanjye.' 

Yakomeje agira ati 'Muri uyu mwaka hagomba gusohoka indirimbo yanjye na The Ben, uko byagenda kose. Ni ukuri kandi ndizera ko bitazafata igihe kirekire.'

 

Bruce Melodie yabwiye abarimo Yampano bavutse kuva mu 2000 kujya bamwita 'Uncle'

Yampano yabwiye Bruce Melodie ko yamenye ko ari 'Uncle' we, ariko kandi 'Nyokorome akuruma akurora' 

KANDA HANO UBASHE KUREBA INDIRIMBO BRUCE MELODIE YAKORANYE NA JOEBOY

Umukuru w'Igihugu yari aherekejwe n'abandi bayobozi batandukanye ku Kibuga cy'Indege, ubwo yakiraga mugenzi we wa Togo.

Ibiro by'Umukuru w'Igihugu, mu butumwa bwanyujije ku rubuga rwa X, byavuze ko “Muri uyu mugoroba ku Kibuga cy'Indege cya Kigali, Perezida Kagame yakiriye Perezida Faure Essozimna Gnassingbé wa Repubulika ya Togo, ugeze mu Rwanda mu ruzinduko rw'akazi rw'iminsi ibiri.”

Perezida Faure Essozimna Gnassingbé yaherukaga mu Rwanda muri Kanama, 2024, ubwo yari yitabiriye ibirori by'Irahira rya Perezida Kagame, byabereye kuri Stade Amahoro.

Guverinoma y'u Rwanda n'iya Togo bifitanye amasezerano y'ubufatanye mu koroshya ingendo z'indege hagati y'impande zombi, aha u Rwanda uburenganzira busesuye bwo gukoresha ibibuga by'indege biri i Lomé.

Ubwo aya masezerano yashyirwagaho umukono muri Gicurasi 2018, Uwihanganye Jean de Dieu wari Umunyamabanga wa Leta muri Minisiteri y'Ibikorwaremezo, yavuze ko u Rwanda ruzajya rwohereza byoroshye umusaruro urimo uw'ibirayi n'indabo.

Yaragize ati 'Nk'ibirayi muri biriya bihugu byo mu burengerazuba, si igihingwa gihingwayo cyane ku buryo dutekereza ko dukoresheje kompanyi yacu y'indege ya RwandAir bishobora kujyanwa hanze, harimo n'ibindi bihingwa bitandukanye.'

Mu 2018, itsinda ry'abakozi b'urwego rushinzwe kurwanya ruswa muri Togo (Haplucia), ryashimiye politiki y'u Rwanda mu kuyikumira no kuyirwanya, cyane cyane iyo kwifashisha ikoranabuhanga rigamije gukumira ibihuza ushaka n'utanga serivisi.

Mu 2023, Minisitiri w'Ububanyi n'Amahanga wa Togo, Robert Dussey, yanditse ubutumwa mu Kinyarwanda ashima ubuyobozi bwiza bw'intangarugero bwa Perezida Kagame, asaba Abanyarwanda gukomeza gukunda igihugu n'ubuyobozi bwacyo.

Yaragize ati “Nyuma y'umwaka umwe, ubu ngarutse mu Rwanda. Ndashimira Abanyarwanda kubera kugaragaza kwitanga, cyane cyane uburyo baharanira ko Umujyi wa Kigali usa neza. Muri intangarugero muri Afurika, ndabanezerewe.”

Perezida Kagame ajya kwakira mugenzi we wa Togo, Faure Essozimna Gnassingbé

Perezida Paul Kagame asuhuza Perezida wa Togo, Faure Essozimna Gnassingbé

Minisitiri w’Ubuzima, Dr. Sabin Nsanzimana, mu kiganiro yagiranye n'itangazamakuru, yatangaje ko izi serivisi zizatangira gutangwa mu buryo bwa gahunda mu gihe cya vuba, ndetse serivisi zimwe muri zo, nk’iz’ubuvuzi bwa kanseri, zizatangira gukorerwa mu bitaro bihariye. Izi serivisi 14 zizatangira gukorerwa kuri mituweli mu kwezi kwa Nyakanga 2025, aho abarwayi bazajya babona ubuvuzi bwihuse kandi bunoze.

Dr. Nsanzimana yashimangiye ko ibi bizafasha cyane abaturage batari bafite ubushobozi bwo kwishyura izi serivisi bivanze na mituweli, bagasubira mu buzima bwiza. Iyi gahunda iteganijwe kuzagira uruhare rukomeye mu kunoza ubuzima bwa benshi, cyane ko izafasha mu guhangana n'indwara zitoroheye guhangana nazo nk'iza kanseri n’ibindi bibazo by'ubuzima bikomeye.

Izi serivisi 14 zishyizwe mu rwego rwo kunoza ubuvuzi no gutanga serivisi z’ubuzima zinoze kuri bose, harimo n'abatishoboye. Kuva muri Nyakanga 2025, mituweli izaba igaragaramo izi serivisi nshya, igatanga amahirwe menshi yo guhangana n'indwara zibasira ubuzima bw’abaturage.

Inkuru ducyesha RBA ivuga ko iyi gahunda yo kongera serivisi mu rwego rw'ubuvuzi ikaba ari ingamba nziza zo kuzamura ireme ry'ubuvuzi mu gihugu, kimwe no guha abaturage amahirwe yo kugerwaho na serivisi z'ubuzima zinoze.

Umwanditsi: Kubwayo Jean de la Croix 

Ubuyobozi bwa BK Arena mu ijoro ryo kuri uyu wa Gatanu tariki 17 Mutarama 2025, bwagaragaje ko buhishiye ibyiza abafana b'umuziki. Bavuze ko nta byinshi batangaza kuri iyi gahunda, ariko ni gahunda yihariye, ku buryo amakuru arambuye bazatangaza mu gihe kiri imbere.

Iyo ugerageje kwitegereza neza ifoto itagaragara bakoresheje kuri 'Affiche' mu gutegura iyi gahunda izabera muri BK Arena, bigaragara ko ari iyo Tems yafashwe ari mu gitaramo.

Tems yari aherutse kwemeza ko azataramira i Kigali mu 2025, ni nyuma y'igihe cyari gishize bamwe mu bategura ibitaramo bagerageza kumutumira ariko bigapfa ku munota wa nyuma.

Uyu mukobwa uherutse gushyira ku isoko indirimbo zirimo '’Burning’, Love me jeje’, yifashishije konti ye ya Instagram mu ijoro ryo ku wa Kane tariki 28 Ugushyingo 2024, yagaragaje urutonde rwa bimwe mu bitaramo afite mu 2025.

Yavuze ko ku wa 20 Werurwe 2025 azataramira mu nyubako ya The Dome-Nasrec mu Mujyi wa Johannesburg muri Afurika y’Epfo, hanyuma akazakomeza urugendo rw’ibitaramo bye mu bihugu birimo u Rwanda, Ghana, Kenya, Nigeria kandi ko ‘amatariki azatangazwa mu gihe kiri imbere’.

Ni ubwa mbere uyu mukobwa w'ikimero azaba ageze i Kigali. Yihagazeho mu bijyanye n'umuziki, kuko ni umwanditsi w'indirimbo, Producer, akaba n'umwe mu bafashe ibendera ry'umuziki ku mugabane wa Afurika.

Izina rye ryatangiye kurangamirwa cyane nyuma y'uko Wizkid amwifashishije mu ndirimbo 'Essence' yo mu mwaka wa 2020, aho yahise ijya ku mwanya wa Munani mu ndirimbo zikunzwe kuri Billboard Hot 100.

Iyi ndirimbo yabafashije guhatanira ibihembo bya Grammy Awards. Ndetse, muri uriya mwaka uyu mukobwa yakoranye indirimbo 'Fountains' n'umuraperi wo mu gihugu cya Canada, Drake. 

Tems agaragaza ko ibi bitaramo “Born in the wild” bizagera mu bihugu bitandukanye byo ku Isi mu rwego rwo kurushaho kwiyegereza abafana be n’abakunzi b’umuziki muri rusange. 

Inyandiko zimwe ziri kuri Internet, zigaragaza ko gutumira uyu mukobwa mu gitaramo bisaba kumwishyura amafaranga ari hagati y'amadolira 15,000 na 229,000.

BK Arena yagaragaje ko yitegura kwakira igitaramo cya Tems kizaba muri Werurwe 2025 

Tems aherutse gutangaza ko agiye gukorera ibitaramo mu bihugu birimo u Rwanda guhera mu 2025 

Tems amaze imyaka ine ari mu bahanzi bagezweho muri Afurika nzima  

Tems yari amaze igihe kinini atumirwa mu Rwanda ariko bikanga ku munota wa nyuma 

Ibi bitaramo Tems agiye gukora yabyitiriye Album ye 'Born in the Wirld' yasohoye muri Nyakanga 2024 

KANDA HANO UREBE AMASHUSHO Y’INDIRIMBO ‘JEJE’ YA TEMS

“>

Inkunga ya mbere ikenewe ni amasengesho kugira ngo uyu mubyeyi akire kandi vuba yongere kwita ku muryango we no gukorera Imana. Ariko kandi hanakenewe inkunga mu buryo bw’ubushobozi bw’amafaranga no kwitanga gukomeye k’umugiraneza wakwemera kumuha impyiko kuko ari cyo cyihutirwa cyane nk’uko abaganga babitangaza.  

Umubyeyi uri gutabarizwa ni Mushimyimana Marie Chantal bakunze kwita Mama Eric. Ni umugore wa Uwiringiyimana Thèogene [Theo Bosebabireba] umaze imyaka irenga 20 akorera Imana binyuze mu kuyiririmbira. Mama Eric na Papa Eric bafitanye abana 7, bakaba batuye ku Gisozi mu Mujyi wa Kigali. Basengera kuri ADEPR Kicukiro Shel. 

Theo Bosebabireba uri gutabariza umugore we uzahajwe n’uburwayi, yahembuye imitima y’abantu babarirwa muri za Miliyoni mu Rwanda, mu Karere na Afrika muri rusange, binyuze mu mpano Imana yamuhaye yo kuririmba. Yamamaye mu ndirimbo zitandukanye zirimo “Icyifuzo”, “Ikiza urubwa”, “Ibigeragezo si karande”, “Ingoma” na “Kubita Utababarira”.

Hashize amezi ane (4) Theo Bosebabireba arwaje umugore we urembeye mu bitaro bya Rwamagana. Theo aragira ati “Amaze amezi 4 arwaye, yagiye ananuka, atangira kujya ambwira ngo yumva isereri, bucyeye nkumva arambwiye ngo umwuka uri kuba muke, tujya kwa muganga, bamufata ibizamini basanga ngo arwaye umuvuduko w’amaraso n’igifu.”

Yakomeje avuga ko umugore we yafashe imiti bamuhaye irarangira ntibyagira icyo bitanga, asubirayo barongera bamufata ibizamini na none bamuha indi miti. Igihe uburwayi bwakomereye ni ukuva mu mpera z’Ugushyingo 2024 “kuko twinjiye mu Ukuboza yarageze mu bitaro bya Rwinkwavu, yavuyeyo agiye kumara ukwezi bamuzana i Rwamagana”.

Yavuze ko umugore we yimuriwe mu bitaro bya Rwamagana “kuko mu bitaro bya Rwinkwavu bari bamaze kuvumbura ko arwaye impyiko,..bazibona rero zaramurenze ari ukumuzana i Rwamagana bakamushyira kuri ‘Dialyse’ [imashini ifasha umuntu wangiritse impyiko zose mu iyungururwa ry’amaraso ye] kuko yari asigaye avuga ibintu biterekeranye [guteshaguzwa]”.

Thèo Bosebabireba yabwiye inyaRwanda ko kugeza ubu umugore we ari kuri iyi mashini yunganira impyiko izwi nka 'Dialyse', aho asabwa kuyijyaho nibura inshuro 3 mu cyumweru. Avuga ko nta bushobozi afite bwo gukomeza kwishyurira umugore we amafaranga yo kumujyana kuri iyo mashini yunganira impyiko, kuko bihenze cyane.

Aragira ati “Ubu bamushyize kuri Dialyse ni ukuvuga ngo idahari yahita apfa, kuko babivumbuye yatangiye kubyimba cyane amaso, inda, ibirenge, intoki,..njyewe nabonye ifoto ye ngira ubwoba [ubwo yayimwohererezaga]”. Yavuze ko bari gushaka umugiraneza wakwemera guha uyu mubyeyi impyiko isimbura ize zangiritse. 

Ati: “Turimo gutabaza ngo haboneke umuntu umuha impyiko, ni cyo cyihutirwa, ni byo abaganga bambwira, kuko bambwira ko amafaranga ya Dilayse ntayabona kuko ntibishoboka. Mu cyumweru hagomba kuba hasabwa arenga ibihumbi 300 Frw [300,000 Frw] hatarimo imiti n’ibyo kurya asabwa na muganga”.

Yavuze ko kuba umugore we ajya kuri iyo mashini gatatu mu cyumweru, ariyo mpamvu asaba ubufasha abagiraneza kuko bimukomereye dore ko uretse kwita ku mugore we urembye, n’abana babo bakeneye amafaranga y’ishuri kuko bose bariga ndetse bamwe biga no mu mashuri yisumbuye.

Ati: “Ni ibintu rero ntashobora, abantu babishobora ni bake ariko nabwo byabasiga iheruheru. Turi kubwira abantu ngo badufashe tubone umuntu umuha impyiko, hanyuma abagwe bamuguranire turebe ko hari icyo bizatanga”.

Uyu muhanzi yashimiye “abantu bacye” bakomeje kumwereka urukundo muri ibi bihe bikakaye arimo we n’umuryango we. Arasaba inkunga yawe na cyane ko nta kintu agikora kubera kwita ku mugore we. Ati “Ntabwo nkijya mu bitaramo narabihagaritse, ni nk’aho ari njye umurwaje kuko njyayo buri munsi i Rwamagana ngenda ngaruka.”

Mu mwaka wa 2022, Theo Bosebabireba yari arwaje se mu bitaro bya Rwinkwavu biherereye mu Karere ka Kayonza mu Ntara y’Iburasirazuba. Icyo gihe uyu muhanzi ukunzwe mu ndirimbo “Kubita Utababarira” yasabye inshuti n’abavandimwe inkunga y’amasengesho kugira ngo umubyeyi we akire, kandi Imana yaramwumvise. 

Umugore wa Theo Bosebabireba [Mama Eric] arembeye mu bitaro bya Rwamagana

Theo Bosebabireba aratabariza umugore we umaze amezi ane arembye cyane

Perezida wa Sena, François-Xavier Kalinda, yatangaje ko guhera ku wa 20 Mutarama 2025, Abasenateri bazatangira kuzenguruka mu turere twose tw'igihugu bagenzura ibibazo n'imikorere by'amavuriro y'ibanze azwi nka Pôste de Santé.

Ati 'Sena yateguye igikorwa yo gusura abaturage harebwa ibikorwa kugira ngo amavuriro y'ibanze abashe kuba ahagaze neza. Ni igikorwa kizagirwamo uruhare n'Abasenateri bose.'

Mbere y'uko Abasenateri bajya mu baturage bahisemo gutumira Minisitiri w'Ubuzima, Dr. Sabin Nsanzimana, ngo abagezeho uburyo urwego rw'ubuzima ruhagaze muri rusange n'ishusho y'ibigo by'ubuvuzi by'ibanze muri rusange.

Dr. Kalinda yagaragaje ko amakuru bahawe ahagije ku birebana n'ibikorwa n'ingamba zihari kugira ngo izo nzego z'ubuvuzi bw'ibanze zitere imbere.

Ati 'Birumvikana ko abaturage bafite ubuzima bwiza ari bo bakorera icyo gihugu bakagiteza imbere. Ibyo bigo by'ibanze by'ubuzima bikora neza, bigatanga serivisi zegereye abaturage kandi bakeneye.'

Yakomeje ati 'Ingorane zihari bazitubwiye cyane cyane izigendanye n'abakozi bakiri bake no kuba zimwe muri zo zikoreshwa n'abikorera, hakaba hagiye hari ibibazo nabyo bizarebwa. Turibwira ko Abasenateri bazaza bafite uburyo bashaka kujyamo inama kugira ngo amavuriro y'ibanze arusheho gukora neza.'

Yavuze hari ibintu nka Sena y'u Rwanda ibona bikwiye kwitabwaho mu guharanira ko urwego rw'ubuzima rutera imbere birimo kongera umubare w'abaganga kuva ku rwego rwo hasi kugera ku bitaro bya Kaminuza no gutera intambwe mu kubaka ubushobozi bwo guhangana n'indwara z'ibyorezo zigenda zaduka.

Minisitiri w'Ubuzima, Dr. Sabin Nsanzimana, yavuze ko u Rwanda rufite intego ko nibura 95% by'abagana ibigo by'ubuvuzi bajya bivuriza mu mavuriro y'ibanze n'ibigo Nderabuzima.

ati 'Ni yo gahunda ndetse biranajyana no kugenda tumanura ubushobozi, ahari inzobere bakagenda, zikajya ku bitaro by'uturere ndetse n'ibigo Nderabuzima bigatangira kujya bikorwamo n'abaganga(abadogiteri) ku buryo bidasaba ko buri gihe habaho kohereza abarwayi [transfer] mu bitaro.'

Yavuze ko bijyanye na gahunda y'urwego rw'ubuvuzi mu gihe cy'imyaka itanu iri imbere, umuganga ashobora kujya mu Kigo Nderabuzima akaba yaba nk'Umuyobozi ushinzwe ubuvuzi cyangwa umukozi uhakora kandi agatanga na serivisi nk'izo yatangiraga ku bitaro.

Yabwiye Abasenateri ko nubwo amavuriro yo hasi akunze kugira ikibazo cyo kubura abaforomo n'ababyaza, umwaka ushize u Rwanda rwungutse abarenga 200 barangije amashuri yisumbuye kandi bashyizwe mu mavuriro y'ibanze n'ibigo Nderabuzima.

Yavuze kandi ko muri uyu mwaka, igihugu cyiteze abandi barenga 200 nabo bazashyirwa muri ayo mavuriro.

Imibare y'abashaka serivisi muri ayo mavuriro y'ibanze yagiye yiyongera kuko yavuye ku 71.212 mu mwaka wa 2016-17 igera kuri 3.963.545 mu 2023-24.

U Rwanda rufite amavuriro y'ibanze 1280 bingana na 57% by'ibigo by'ubuvuzi igihugu gifite rukanagira ibigo Nderabuzima 510.

Biteganyijwe ko mu myaka itanu iri imbere hazubakwa amavuriro y'ibanze kandi agezweho 100 mu gihe 420 azavugururwa.

Abasenateri bose bazagira uruhare muri icyo gikorwa

Perezida wa Sena, Dr. Xavier Kalinda, yavuze ko ibyo Abasenateri bazabona bizafasha mu kujya inama ku guteza imbere ayo mavuriro

Minisitiri w'Ubuzima, Dr. Sabin Nsanzimana, yavuze ku cyerekezo cyo guteza imbere amavuriro y’ibanze

U Rwanda rufite amavuriro y’ibanze 1280 hirya no hino mu gihugu

Bafashwe muri gahunda Polisi y'Igihugu imaze iminsi iri gukora yo gushaka ibinyabiziga byibwa bikaburirwa irengero.

Umuvugizi wa Polisi y'u Rwanda, ACP. Boniface Rutikanga, yavuze ko abakora ubwo bujura biba moto bakazihindurira ibyangombwa bakazambika ibiziranga bitari ibyazo.

Ati 'Mu iperereza twakoze twasanze moto 136 zose zagiye zihindurirwa 'plaque' ndetse 16 muri zo zifite ibyangomwa by'izindi.'

Yavuze ko izo 'plaque' abajura baziba mu magaraje cyangwa bakazigura n'abari bafite ibinyabiziga byashaje ntibasubize ibyangombwa.

Yashimangiye ko abafite izo moto ari bo usanga mu bindi byaha birimo kwambura abakiliya amafaranga n'ibindi.

ACP Rutikanga yavuze ko hari moto nyinshi zafashwe ariko zabuze ba nyirazo kuko hari abazibura bagaterera iyo ntibakurikirane, ugasanga zigiye gutezwa cyamunara.

Nakate Josephine ni umwe mu bari baribwe moto. Yavuze ko hari hashize imyaka itanu ayibuze kuko bayibye mu mpera za 2019, bayibiye i Mageragere.

Ati 'Nahaye umuntu ngo ajye atwara moto yanjye hanyuma abajura baramutega baramuniga barayijyana. Nyuma mu mpera za 2024 nibwo kuri Polisi bampamagaye bambwira ko yabonetse gusa bari barayihinduriye ibirango.'

Muhashyi Jean d'Amour na we yari yarabuze moto ye. Yavuze ko ikinyabiziga cye yakibuze muri Gashyantare 2024.

Ati 'Moto yanjye yatwarwaga n'umuhungu wanjye. Yambwiye ko baje ari abantu babiri bigize abagenzi umwe aramutwara undi umumotari ntiyamenya aho arengeye. Bageze mu Gakenke wa wundi bari kumwe na we yahise aza baramuniga batwara n'ibyangombwa byayo byose. Nyuma nayibonye barayinduriye 'plaque'.

Polisi y’Igihugu yataye muri yombi abibaga moto bakazihindurira ibyangombwa

Bamwe mu bibwe moto bazisubijwe

Ubwo abibye moto bari basubijwe aho bafungiwe

Muhashyi Jean d'Amour yasubijwe moto ye yibwe

Umuvugizi wa Pplisi y’Igihugu, ACP. Boniface Rutikanga, yatangaje ko mu iperereza ryakozwe, babonye moto zirenga 130 zahinduriwe ‘plaque’

Rudakubana w'imyaka 39 yakuriye mu Burundi ku bw'amateka ashaririye yaranze u Rwanda, ajya muri Kenya, Uganda, Zambia, Afurika y'Epfo n'ahandi ashaka ikizaba umwuga w'ubuzima bwe.

Muri Uganda ni ho yatangiriye amashuri abanza mbere ya 1994, Jenoside yakorewe Abatutsi ihagaritswe aza mu Rwanda ahiga imyaka ibiri, nyuma ajya kwiga muri Zambia ari na ho yize igihe kinini amashuri abanza.

Ayisumbuye yayakomereje muri Afurika y'Epfo mu bijyanye n'Ibinyabuzima, Ubumenyi bw'Isi, Imibare, Icyongereza, Ubugeni n'Igifaransa, aya kaminuza ayiga muri Kenya muri Jomo Kenyatta University mu bijyanye na 'Architecture'.

Kugeza icyo gihe ibyo gutwara indege nubwo yabikundaga anabyifuza ariko ntaho yagombaga kubihingukiriza umubyeyi we kuko byasaga nko kwigerezaho kuko byasabaga akayabo.

Yakomeje kwiga, amaze umwaka umwe n'igice abona ko bitazakunda yimukira mu masomo ya 'Graphic Design', ayiga muri Kenya nyuma aza gukomereza i Kuala Lumpur muri Malaysia.

Yahamaze imyaka itatu, agira amahirwe yo kujya muri Afurika y'Epfo na bwo akora imyaka ibiri muri ibyo bya 'graphic design', ariko ka kayihayiho ko kuzatwara indege kagihari.

Ati 'Numvaga nshaka kuba umupilote uko byagenda kose. Nakoze ubushakashatsi nsanga ikibazo cya mbere kibangamira umuntu kutamuba ari amafaranga. Ibindi abantu baba batekereza ntabwo ari byo. Ufite amafaranga waba umupilote.'

Rudakubana ubu atwara indege itwara abagenzi barenga 300 ya Airbus A 330

Ibitekerezo byamubanye byinshi agiye kurangiza amasomo, areba amahirwe ahari yose abona ntibikunda. Rudakubana yari afite nyirarume uba muri Canada, aramuhamagara amubaza icyo byasaba kuba umupilote, undi amubwira ko yamusanga muri Canada niba bishoboka.

Undi na we ntiyazuyaje yagiye muri Canada. Icyo gihe yari afite imyaka 29.

Feri ya mbere yari i Edmonton mu Ntara ya Alberta, bidatinze ahita yinjira mu ishuri, make yari afite arayatanga, atazi ibizakurikira uko bizagenda.

Yatangiriye ku ruhushya ruzwi nka 'Private Pilot Licence: PPL', mu ishuri ryitwaga 'Centennial Flight Center.' Ni uruhushya rwamwemeraga gutwara indege z'abantu ku giti cyabo.

Ni urugendo rwamugoye cyane kuko isaha imwe yari nka 200$ kugira ngo ahabwe umwanya mu ndege, ariko yiyemeza gukora n'imirimo yafatwaga nk'iciriritse kugira ngo abone ishuri.

Ati 'Narize bigera aho birahagarara kubera amafaranga yabuze. Nshaka akazi gaciriritse ku ishuri, nkajya noza indege nk'icyumweru cyose, bakanyemerera kwinjira mu ishuri, nkajya gukora imirimo yo gukura urubura mu muhanda, byose ngambiriye kubona udufaranga natanga ariko bakampa isaha yo kwiga. Nozaga ibyombo mu gikoni byose kugira ngo ngere ku cyo nshaka.'

Yarakobotse ariko uruhushya rwa PPL ararwegukana, ikibazo kiba icy'uko azabona urwo gutwara indege nini z'ubucuruzi ruzwi nka 'Commercial Pilot Licence: CPL'.

Kuko mu Ntara ya Alberta ibintu byari bikomeje kugorana, bikajyana n'ikirere cyakundaga kuba kimeze nabi, Rudakubana yigiriye inama yo kwimuka ajya mu Burengerazuba bwa Canada ahabaga undi muntu wo mu muryango we.

Yagiye mu ishuri ryo kwigamo rizwi nka Coastal Pacific Aviation ryo mu gace ka Abbotsford mu Ntara ya British Columbia.

Nubwo yaribonye byasabaga undi musozi wo kurira kugira ngo abone amafaranga yo kwigira CPL kuko byasabaga arenga ibihumbi 100$.

Ati 'Twa dufaranga nakoreraga mu muhanda ntaho twagombaga kungeza. Mama n'abandi bo mu muryango barifatanyije baka inguzanyo. Yarabonetse ariko nkomeza kubaho nabi. Icyakora byaramfashije, kuko byanyigishije kwiyemeza.'

Rudakubana yagize amahirwe ahura n'umwarimu wo muri Nigeria nk'abanyafurika barahuza, afata uyu Munyarwanda ku buryo mu mezi 18 yari abonye CPL, icyo gihe yigiraga ku ndege itarenza abantu nk'umunani.

Rudakubana amaze gukora urugendo rw’amasaha 5000 mu kirere

Kuva ku ndege y'abantu umunani kugera ku itwara abarenga 300

Yafashe umwanya ajya muri RwandAir, bamwakirana yombi, ku ikubitiro ahita ahabwa indege ya Boeing 737 NG itwara abarenga 150, avuye ku yatwaraga abantu batarenze umunani.

Ni ibintu yafashe nk'igitangaza, ariko kuko yari afite intego ubwoba buba buke, atangirira ku ngendo nto. Urugendo rwa mbere yarukoreye mu bihugu byo mu Karere.

Ati 'Hari muri Kenya niba atari Uganda. Turabikora batwongerera intera, nko kujya za Cotonou muri Bénin. Akazi ndagakora kugeza uyu munsi maze imyaka umunani muri RwandAir.'

Kuko mu bijyanye n'ubwikorezi abantu bahora biga, RwandAir ikaba na yo yumva iyo ngingo vuba, Rudakubana na bagenzi be bakomeje kwiga kugira ngo bajyanye n'ikoranabuhanga rigezweho.

Nyuma yo kugera muri RwandAir amaze guhaha ubumenyi mu bihugu nka Ethiopia, u Bwongereza, Kenya, Afurika y'Epfo, Leta Zunze Ubumwe z'Abarabu n'ahandi, yavuye kuri Boeing 737 NG, ubu atwara indege nini mu zo RwandAir ifite ya Airbus A 330 itwara abarenga 330.

Ati 'Ni ubundi buzima. Ni urundi rwego, ni indege ifite ikoranabuhanga rigezweho mbese buri kintu cyose kiba gitandukanye.'

Rudakubana avuga Igifaransa, Ikinyarwanda, Icyongereza n'Igiswahili adategwa, ndetse n'izindi bijyanye n'ibihugu yabayemo nk'Igi- Xhosa cyo muri Afurika y'Epfo n'ibindi.

Iyo bamubwiye ko ari butware abagenzi, aba agomba kwiyitaho, yaruhutse bihagije, akita ku kirere nka kimwe mu bikunze kugora abapilote, akumvikana na Captain nk'umuyobozi w'urugendo bakareba ko indege imeze neza, ubundi akiragiza Imana agatangira urugendo.

Urugendo rurerure yakoze ni urujya i Mumbai mu Buhinde. Ni urugendo rungana n'ibilometero 5248 rutwara amasaha agera kuri 11.

Nk'akandi kazi kose no gutwara indege habamo imbogamizi nyinshi. Kimwe mu bikomeye byamubayeho ari mu kirere ni igihe yari ari mu rugendo rujya i Abidjan muri Côte d'Ivoire indege ikagwa butosho.

Icyo gihe Rudakubana ni we wari ugezweho mu gutwara ari kumwe na Captain we, bagera ku kibuga cy'indege bagombaga kugwaho hari imvura nyinshi cyane.

Wa muyobozi w'urugendo (Captain) yasabye Rudakubana kumuha umwanya akaba ari we utwara, ibintu byari bigiye guteza impanuka.

Ati 'Indege twarimo yari ifite ikibazo aho ikirahuri kimwe cyari giherereye kuri Captain kitari gifite 'essuie glace' ifasha guhanagura amazi. Ikindi ntabwo yari amenyereye icyo cyerekezo uretse ko njye nari nkizi. Arambwira ati 'hameze nabi, reka nyimanurire' kuko yari umuyobozi, ndemera.'

Arakomeza ati 'Yatangiye kumanura indege, imvura ikomeza kuba nyinshi atabona, kubera ubwoba n'igihunga, akora ku muriro, indege ihita imanuka butosho yitura hasi. Icyiza ni uko twari muri metero nke hafi y'umuhanda w'indege. Ku bw'amahirwe ihita igwa mu muhanda neza. Byarihutaga ku buryo nta cyo nari gukora. Yahise ayihagarika ako kanya, kuko tutabonaga aho tugiye, dusaba ubufasha baradufasha.'

Rudakubana agaragaza ko ibyo biri mu masomo umuntu yigira ku murimo, kenshi abantu batabona mu ishuri, akagaragaza ko umuhanga amenya uko akorana n'abandi kabone n'iyo yaba umuyobozi ukoze ikosa, bumvikana ntihagire igipfa.

Kuba amaze kugera ku ntambwe yo gutwara Airbus ni imwe mu ntambwe ikomeye yishimira, icyakora agaragaza ko mu bihe bya vuba azaba yarabonye uruhushya ruzwi nka 'Airline Transport Pilot License' rumwemerera kuba Captain.

Ati 'Ndashaka kuba mwarimu, nkigisha ibyo nize. Nshaka gufasha abakiri bato bakumva ko atari ibintu bikomeye nk'uko abantu babikabiriza. Ushaka kuba umupilote yabishobora, icya mbere ni ubushake. Nta kintu utageraho, abakigezeho ntacyo bakurusha. Ni akazi keza gahemba neza, ndetse gatanga amahirwe atandukanye'

Ubwanditsi: Ubuhamya bwa Rudakubana buri muri gahunda y'ubukangurambaga bw'Ikigo gicuruza imodoka cya Carcarbaba, bugamije kwereka urubyiruko ko rushobora kugera ku ntsinzi mu buryo bushoboka bwose.

Rizaba ku wa 23-26 Mutarama rirangwe n'ibikorwa birimo amahugurwa, imikino gakondo, imideli, kumurika ibihangano, imbyino, umuziki n’ibindi. 

Muri iyo minsi ibikorwa bimwe bizabera kuri Goethe Institut mu Kiyovu ariko igitaramo kinini kizaba ku wa 26 Mutarama 2025 kuri Mundi Center.

Kuri iyi nshuro ya Gatatu hatumiwe abahanzi n'amatsinda atandukanye arimo Itorero Intayoberana, Himbaza Club, Abiru Band, Ababyinyi b'umuryango MindLeaps, Abeza B'Akaranga, itsinda Yoruba ryo muri Nigeria, Siboyintore, ibigo by'amashuri bitandukanye n'abandi.

Yannick Niyonzima wateguye iri serukiramuco, yabwiye InyaRwanda, ko abahanzi bose bazakorana babahisemo bashingiye ku mwanya n'ubushobozi bwa buri umwe.

Ati 'Abahanzi twabahisemo tugendeye ku nshingano zacu zo kwimakaza umuco, kurengera ibiranga umurage w'ibihugu byacu, no gushyigikira impano z'abahanzi banyuranye. Twashakaga kandi kuzana ubudasa binyuze mu guhura ku muco w'Afrika n'indi mico itandukanye.'

Yannick yavuze ko mu gihe bagiye gukora iri serukiramuco ku nshuro ya Gatatu, bishimira ko baguye igihe cy'iminsi rizamara riba, no kuba bagenda babona abafatanyabikorwa.

Avuga ati 'Turishimira intambwe iri serukiramuco rirri gutegura, kuko rimara iminsi 4 mu bikorwa bitandukanye rimaze gutera kuva ryatangira. Uyu mwaka, turi ku nsanganyamatsiko ivuga iti 'Echoes of Motherland Heritage: Tradition, Innovation, and Social Transformation', ikaba ihuza gakondo n'iterambere ry’iki gihe.'

'Umubare w'abafatanyabikorwa, abahanzi, n’abitabira wagiye wiyongera buri mwaka, kandi turabona umwanya uhambaye iri serukiramuco rifite mu guhuriza hamwe abantu bo mu moko atandukanye no guteza imbere ubufatanye mu guteza imbere umuco.'

Kwinjira muri iri serukiramuco ni ukwishyura 5,000 Frw, 10,000 Frw ndetse na 30,000 Frw. Iserukiramuco Iteka African Cultural Festival ritegurwa n'umuryango Iteka Youth Organization ukorera mu Rwanda ku nsanganyamatsiko igira iti 'Art, a Tool for Humanity'.

Iri serukiramuco rya 'African Cultural Festival' rihuza imico y'u Rwanda n'u Burundi. Mu 2024, abategura iri serukiramuco bibashije abarimo Michael Makembe, Josh Ishimwe, Himbaza Club, Intayoberana, Club Intwari, Chorale Regina Pacis, Abeza B'Akaranga, Umuti Arts n'abandi mu gitaramo cyabereye muri Camp Kigali, ku wa 27 Mutarama 2024.

Kanda hano ubashe kugura itike yo kwinjira muri iri serukiramuco

 

Itorero Intayoberana rigiye kongera kugaragara muri iri serukiramuco rizasorezwa kuri Mundi Center 

Himbaza Club yamamaye mu bitaramo ndetse no mu birori bikomeye bagiye kongera gutaramira abantu binyuze muri iri serukiramuco

 

Iri serukiramuco rigiye kuba ku nshuro ya Gatatu, mu gihe cy'iminsi ine