Webrwanda Backend

Author: webrwanda

  • Amajyepfo: Ibishanga bya hegitari zisaga 3500 bigiye gutunganywa – #rwanda #RwOT

    Gahunda ya Guverinoma y'imyaka itanu yo kwihutisha Iterambere (NST2) iteganyijwemo ibikorwa bitandukanye byo kongera umusaruro, hibandwa ku gutunganya ibishanga no gukora amaterasi y'indinganire mu bice bitandukanye by'igihugu.

    Intara y'Amajyepfo ibarizwamo ibishanga bihingwamo umuceri, ibigori , soya, imboga ariko ibyangiritse bituma umusaruro ubivamo uba muke.

    Guverineri w'Intara y'Amajyepfo, Kayitesi Alice, yabwiye IGIHE ko mu myaka itanu iri imbere bazatunganya ibishanga 26 mu turere dutandukanye bifite ubuso busaga hegitari 3.520.

    Ibi ngo bizaherekezwa no kongera ubuso bw'amaterasi y'indinganire, kuzamura umubare w'abakoresha imbuto nziza z'indobanure, kuzamura ikigero cyo gukora ifumbire no kurwanya isuri.

    Mu Ntara y'Amajyepfo habarurwa ibishanga bingana hegitari 14.439, ibitunganyije bikaba hegitari 7.389.

    Umuceri ni wo uhingwa cyane mu bishanga byo mu Majyepfo, aho wiganje mu Karere ka Gisagara, bitabujije ariko ko hari n'utundi turere dutanu tuwuhinga ari two Nyanza, Huye, Ruhango, Muhanga na Kamonyi.

    Guverineri Kayitesi kandi yavuze ko ubworozi na bwo buzibandwaho hongerwa inka zitanga umukamo, aho hari imishinga ibiri minini izabigiramo uruhare.

    Ati “Dufite imishinga ibiri minini ya RIPPLE EFFECT na RDDP II izadufasha kongera inka zitanga umukamo no kongera ubuso bw'ubwatsi bwiza bugaburirwa amatungo. Izaba yunganira umushinga wa RAB-Songa, izakomeza gukora nk'ikigo cy'icyitegererezo mu kuzamura icyororo kandi ikacyegereza aborozi.”

    Muri iyi gahunda hateganyijwemo ibikorwa byo kongera inganda n'amakusangirizo y'umukamo w'amata no kongera amabagiro y'ingurube, inkoko n'ihene.

    Ati “Ni na gahunda yari yatangiye hari aho twari twatangiye kubaka amabagiro, nka Nyamagabe rirahari, i Huye na Ruhango, ariko tuzakomeza no kugenda tuyubaka no mu tundi turere.'

    Hari ibishanga byuzura amazi, kubihinga mu mvura ntibibe bigishobotse, abaturage bagahora batakambira Leta ngo ibibatunganyirize.

    I Gisagara, akarere ka mbere gahinga umuceri mwinshi mu Ntara y’Amajyepfo, na ho hagaragara bimwe mu bishanga bikeneye gutunganywa

    Source : http://igihe.com/amakuru/u-rwanda/article/amajyepfo-ibishanga-bisaga-hegitari-3500-bigiye-gutunganywa

  • Uwahabwaga 50.000 Frw azajya ahabwa 92.710 Frw: Amafaranga ya pansiyo yongerewe – #rwanda #RwOT

    Itangazo rya RSSB ryasohotse kuri uyu wa 24 Mutarama 2025, ryerekanye impinduka ku mafaranga agenerwa abari mu kiruhuko cy'izabukuru n'ingoboka y'ibyago bikomoka ku kazi, guhera muri Mutarama 2025.

    Mu mpera za 2024, ni bwo RSSB yatangaje izamuka ry'umusanzu w'ubwiteganyirize ku mukozi no ku mukoresha, ukava kuri 3% umukozi yatangaga, akajya atanga 6%, umukoresha na we bikaba uko, yose hamwe akaba 12% avuye kuri 6%, guhera muri Mutarama 2025.

    Uretse ibyo kandi guhera muri Mutarama 2027, igipimo cy'umusanzu w'ubwiteganyirize kizajya cyiyongeraho 2% buri mwaka kugeza mu 2030 ubwo kizaba cyageze kuri 20%.

    Icyo gihe, RSSB yatangaje ko izo mpinduka zabaye hagamijwe kongera amafaranga abari mu kiruhuko cy'izabukuru bahabwa, kuko ayo bahabwa muri iki gihe ari make ugereranyije n'izamuka ry'ibiciro biri ku isoko.

    Itangazo ryasohowe na RSSB kuri uyu wa 24 Mutarama 2025, ryerekanye impinduka mu byagenerwaga abari mu kiruhuko cy'izabukuru ndetse n'ingoboka y'ibyago bikomoka ku kazi, ivuga ko zigamije kongerera ubushobozi abanyamuryango mu byiciro byose.

    Hashingiwe ku byiciro by'ibigenerwa abari mukiruhuko cy'izabukuru nk'uko biteganywa mu ngingo ya 4 y'Iteka rya Perezida, abagenerwabikorwa ba RSSB muri buri cyiciro bazahabwa inyongera ku byo bagenerwaga, hibandwa cyane ku bafata make kurusha abandi.

    RSSB yatangaje ko amafaranga fatizo ya pansiyo n'ay'ibyago bikomoka ku kazi yongerewe akava ku 13.000 Frw akagera ku 33.710 Frw. Ibi bivuze ko amafaranga atagibwa munsi mu gutanga pansiyo ari 33.710 Frw, mu gihe yari asanzwe ari 13.000 Frw.

    Ibyo bivuze ko abanyamuryango bakiraga 20.000 Frw, bazongerwa amafaranga, agere ku 47.710 Frw; abahabwaga 50.000 Frw, bazajya bahabwa 92.710 Frw; uwahabwaga 100.000 Frw, azajya ahabwa 155.210 Frw; uwahabwaga 500.000 Frw, azajya afata 580.000 Frw; ni mu gihe uwahabwaga byibura 1.000.000 Frw, azajya ahabwa 1.095.210 Frw.

    RSSB yasobanuye ko iri zamuka ry'ingano y'ibigenerwa Abanyamuryango y'abari mu kiruhuko cy' izabukuru n'abafata ingoboka y' ibyago bikomoka ku kazi rirareba gusa abari abagenerwabikorwa muri ayo mashami yombi mbere y'itangazwa ry'Iteka rya Perezida.

    Ubwo hatangazwaga icyemezo cyo kuzamura amafaranga ya pansiyo agenerwa abari mu kiruhuko cy'izabukuru, bamwe mu bahabwa ayo mafaranga bacyakiranye yombi kuko bavugaga ko ubuzima bwari bubagoye bitewe n'uko ibiciro bihagaze muri iki gihe.

    Nyiransengiyumva Immaculée wahoze ari umwarimukazi, yabwiye RBA ko 'Twabyakiriye neza cyane, twishimye, twashimiye cyane cyane umukuru w'igihugu […] umubyeyi ufite ubumuntu, ureba kure, watekereje ku bantu bageze mu zabukuru barakoreye igihugu, akabona ko batagomva gusaza bandavuye'.

    Uko pansiyo ibarwa

    RSSB ni rwo rwego rutanga pansiyo, ifatwa nk'insimburamushahara ku mukozi utagishoboye gukorera umushahara, uwamugaye atagishoboye kubeshwaho n'akazi ke cyangwa amafaranga agenewe gutunga abo umukozi yasize nyuma yo kwitaba Imana mu gihe yari yariteganyirije.

    Pansiyo y'ubusaza itangwa ku myaka 60 iyo uwiteganyirije yakoze imyaka 15 atanga umusanzu agahabwa 30% by'umushahara ngereranyo w'ukwezi mu myaka itanu ya nyuma y'akazi ariko buri mwaka hakiyongeraho 2%.

    Uwiteganyirije kandi ashobora guhabwa pansiyo y'imburagihe atarageza ku myaka 60 mu gihe ubushobozi bw'umubiri we bwagabanutse bikemezwa na muganga. Hari na pansiyo y'ubumuga budafitanye isano n'akazi n'irebana n'abasizwe n'umunyamuryango mu bwiteganyirize.

    Kuri pansiyo y'ubupfakazi, umupfakazi afata 50% by'ayo uwiteganyirije yagombaga gufata. Umwana ugifite umubyeyi umwe afata 25% mu gihe umwana usigaye ari imfubyi kuri se na nyina afata 50%.

    Uwiteganyirije iyo apfuye nta we bashakanye asize cyangwa umwana, amafaranga ye ya pansiyo afatwa n'ababyeyi bagahabwa 25% by'ayo yagombaga guhabwa buri kwezi.

    Uwagize ingorane zo kudatanga imisanzu y'ubwiteganyirize kugeza ku myaka 15, nta mahirwe agira yo guhabwa pansiyo ya buri kwezi ahubwo agira amafaranga ahabwa ingunga imwe ku yo yari yariteganyirije ariko na yo ayahabwa ari uko agejeje ku myaka 60 y'amavuko.

    RSSB itangaza ko kuri ubu mu Rwanda, abantu barenga ibihumbi 60 ni bo bahabwa pansiyo buri kwezi.

    RSSB yatangaje uko izamuka ry’amafaranga ya pansiyo agenerwa abari mu kiruhuko cy’izabukuru guhera muri Mutarama 2025.

    Source : http://igihe.com/amakuru/u-rwanda/article/uwakiraga-50-000-frw-azajya-ahabwa-92-710-frw-uko-amafaranga-ya-pansiyo

  • Polisi y'u Rwanda yatangaje ko umuhanda Nyamasheke-Huye-Kigali utakiri nyabagendwa kubw'impanuka yabereye mu ishyamba rya Nyungwe #rwanda #RwOT

    Polisi y'u Rwanda yatangaje ko umuhanda Nyamasheke-Huye-Kigali utakiri nyabagendwa nyuma y'impanuka ikomeye yabereye mu ishyamba rya Nyungwe, ahitwa Gisakura mu Kagari ka Buvungira. Iyi mpanuka yabaye kuri uyu wa Gatanu ahagana ku isaha y'isaa moya za mu gitondo, ikaba yahagaritse burundu urujya n'uruza rw'ibinyabiziga muri uyu muhanda.

    Amakuru atangazwa n'inzego z'umutekano avuga ko imodoka yikoreye ibicuruzwa yagize ikibazo cya tekinike mu gihe yari iri kugendera mu nzira igororotse, bigatuma igwa mu nzira igenda ya kaburimbo maze igahagarika abagenzi bose.

    Bivugwa ko iyi mpanuka yanatumye habaho gutinda gukuraho ibisigazwa by'imodoka, kuko ikinyabiziga cyangiritse cyane.

    Umuvugizi wa Polisi y'u Rwanda mu ishami rishinzwe umutekano wo mu muhanda yavuze ko abaturage b'inyuma ya Nyungwe bakoresheje uburyo bwo gutanga amakuru ku gihe, bikaba byafashije mu gushaka uburyo bwo gukuraho imbogamizi zari zibangamiye abagenzi.

    Polisi irasaba abagenzi bose kwihangana mu gihe ibikorwa byo gutunganya umuhanda birimo gukorwa.

    Uyu muhanda wa Nyamasheke-Huye-Kigali ni umwe mu mihanda ikomeye ikoreshwa cyane n'abagenzi bava mu bice by'Uburengerazuba n'Amajyepfo bajya i Kigali cyangwa mu bindi bice by'igihugu.

    Polisi ikaba yibukije abatwara ibinyabiziga bose kwitwararika cyane mu gihe cyose bari muri uyu muhanda, cyane cyane ahantu hamanuka n'ahanyerera kubera imvura yaguye mu minsi yashize.

    Abantu bose barasabwa gukurikiza amabwiriza yatanzwe n'inzego zishinzwe umutekano, aho abagenzi bashobora gukoresha inzira zisimbura nyamukuru mu gihe umuhanda utari nyabagendwa. Inzego zishinzwe ibikorwaremezo n'abakora mu nzego za gisivile barimo gukorana na Polisi kugira ngo ibikorwaremezo bihungabanye bishobore gusanwa mu gihe gito bishoboka.

    Uyu muhanda unyura mu ishyamba rya Nyungwe ukunze kuvugwaho impanuka zikomoka ku mihanda yoroheje kandi igororotse, bikaba bisaba ko imodoka zigenda ku muvuduko muto no ku bwitwararike.

    Polisi ikomeje gukora iperereza ngo hamenyekane impamvu nyakuri y'iyi mpanuka ndetse no kwemeza niba nta handi hashobora kuba ibibazo bisa nk'ibi.

     

    Source : https://kasukumedia.com/polisi-yu-rwanda-yatangaje-ko-umuhanda-nyamasheke-huye-kigali-utakiri-nyabagendwa-kubwimpanuka-yabereye-mu-ishyamba-rya-nyungwe/

  • RDC: Imirwano ikomeje gukaza umurego i Kibumba #rwanda #RwOT

    Umutwe wa M23 n'ihuriro ry'ingabo za RDC, FARDC, n'imitwe bafatanyije, birwanye mu buryo bukaze mu gace ka Kibumba, Teritwari ya Nyiragongo, kuva mu gitondo cyo kuri uyu wa Gatanu.

    Iyi mirwano yabereye mu duce twa Kilimanyoka na Kanyamahoro, aho ingabo za FARDC zifatanyije n'umutwe w'iterabwoba wa FDLR n'abarwanyi ba Wazalendo bashyize ibirindiro.

    Perezida wa sosiyete sivili ikorera muri Nyiragongo, Jean-Claude Mambo Kawaya, yavuze ko M23 iri kurasa ibirindiro byinshi by'ingabo za Leta n'imitwe yifatanyije nazo, ikoresheje imbunda ziremereye.

    Muri Teritwari ya Masisi, mu duce twa Sake na Mubambiro, na ho habyukiye imirwano yo ku wa 24 Mutarama, nyuma y'indi yabereye i Sake ku wa 23 Mutarama, aho umutwe wa M23 wafashe uyu mujyi ukomeye mu majyaruguru ya Goma.

    Iyi ikaba ari ntambara iteye ubwoba yatumye abaturage benshi bava mu byabo bagahungira mu mujyi wa Goma, uri mu ntera y'ibilometero 23 uvuye Kibumba na Sake.

    Abaturage bahungiye i Goma bavuga ko basize imitungo yabo, kuko urusaku rw'imbunda rwatumye benshi batinya kuguma mu ngo zabo. Umwe mu baturage wahungiye mu nkambi y'agateganyo i Ndosho yagize ati, 'Twabaye mu nzu ijoro ryose dukurikiza urusaku rw'imbunda, none tugeze hano dufite ubwoba n'inzara.'

    Nyuma yo gufata umujyi wa Sake, M23 yatangaje ko ifite umugambi wo kwerekeza i Goma kugira ngo ihagarike ngo 'akababaro abaturage batewe na Leta ya RDC n'imitwe bafatanyije.' Gusa, Leta ya RDC na yo ivuga ko ikomeje gukora ibishoboka byose ngo ikumire iki gitero, ishimangira ko icyemezo cyo kugirana ibiganiro n'uyu mutwe kizaterwa n'uko imirwano izagenda.

    Amakuru akomeje kuvugwa ni uko iyi mirwano irimo guteza ibibazo bikomeye ku baturage bo muri Nyiragongo na Masisi. Imiryango mpuzamahanga itanga ubufasha iratabaza ku buzima bw'abaturage, cyane ko abarenga ibihumbi bamaze guhungira i Goma no mu nkambi zo hafi y'uyu mujyi.

    Ibi bibazo by'umutekano muke bikomeje kugaragara mu burasirazuba bwa RDC birushaho kwerekana ko hakenewe igisubizo cya politiki n'imbaraga zihuriweho mu kugarura ituze mu gihugu. Mu gihe ibi bikorwa bigikomeje, abaturage baratakamba basaba ubufasha bwihuse ku ruhande rw'imiryango mpuzamahanga ndetse n'ubutumwa bw'amahoro bwa Loni bukorera muri iki gihugu.

    Source : https://kasukumedia.com/rdc-imirwano-ikomeje-gukaza-umurego-i-kibumba/

  • Ishimwe ry'ab'i Nyaruguru begerejwe serivisi z'ubuvuzi bigizwemo uruhare n'amavuriro y'ibanze – #rwanda #RwOT

    Ni ubuhamya bagaragaje ubwo basurwaga n'abasenateri mu ngendo barimo zo gusura amavuriro y'ibanze harebwa imikorere yayo, aho bateganya gusura agera kuri 60 mu gihugu.

    Uwamahoro Jacqueline twasanze ku Ivuriro ry'Ibanze rya Mishungero, mu Murenge wa Nyabimata mu Karere ka Nyaruguru yishimira ko ivuriro ryabegereye aho n'ufashwe n'indwara mu ijoro afashwa, abakeneye gukingiza abana bakabikorera hafi n'ibindi.

    Ibyo byishimo abisangiye na Mbarushimana Pierre, wagaragaje ko mbere bakoraga urugendo rw'amasaha abiri n'igice bagiye gushaka serivisi z'ubuvuzi mu Kigo Nderabuzima cya Nyabimata, ariko ubu ntibarenza iminota 10 bajya kwivuza.

    Ati “Byaratugoraga, rimwe na rimwe hakabaho no guheka umurwayi cyangwa umubyeyi uri ku nda, akagera yo yanegekaye, byabaga ari urugamba ariko ubu ibyo byararangiye.”

    Umunyabanga Nshingwabikorwa w'Umurenge wa Nyabimata, Ntigurirwa Joseph, yabwiye IGIHE ko aya mavuriro yakoze umurimo ukomeye, haba mu kongera ubukangurambaga bwo kwirinda indwara, abantu bakagira isuku n'isukura n'ibindi.

    Yagaragaje ko byanagabanyije impfu z'abana, ayo mavuriro anazana impinduka muri rusange zo kugira isuku nko kwipimisha indwara hakiri kare ndetse no kwivuza amenyo, ibintu bitabagaho mbere.

    Ati “Wasangaga umugabo w'imyaka 40 adatekereza ibyo kwita ku menyo ye, ariko ubu byarakemutse. Ubukangurambaga bwo kwirinda indwara nyinshi bubera hano. Hano hari ubuzima.”

    Senateri Ngarambe Télésphore yavuze ko aya mavuriro Leta yayashyizeho ifite intego yo kwegereza abaturage ubuvuzi, akaba yitezweho no guca ubuvuzi bwa magendu mu gihugu.

    Ati “Ibi biradushyira mu rwego rw'imibereho myiza, bya bindi byo kwita umwana ngo 'Rwajekare' kuko utizeye ko umwana azarama bigomba gucika, kuko ubu ubuzima busigaye busigasirwa kuva umwana agisamwa.'

    Senateri Ngarambe yasabye abaturage kwita ku isuku muri byose kugira ngo barusheho kwirinda indwara, bityo bakomeze kugira ubuzima bwiza.

    Ikigo cy'Igihugu Gishinzwe Ubuzima, RBC, gitangaza ko mu gihugu hose hamaze kubakwa amavuriro y'ibanze asaga 1280, intego ikaba ari uko muri buri kagari hazaba ivuriro ry'ibanze, mu rwego rwo kuzamura ibipimo by'ubuzima bwiza mu Banyarwanda.

    Abaturage bishimira ko begerejwe serivisi z’ubuvuzi bijyanye n’uko Leta y’u Rwanda yongereye umubare w’amavuriro y’ibanze

    Abasenateri bari kuzenguruka igihugu mu kugenzura imikorere y’amavuriro y’ibanze

    Source : http://igihe.com/amakuru/u-rwanda/article/ishimwe-ry-ab-i-nyaruguru-begerejwe-serivisi-z-ubuvuzi-bigizwemo-uruhare-n

  • Rwamagana: Umunyeshuri wigaga muri kaminuza y'u Rwanda yarohamye mu cyuzi – #rwanda #RwOT

    Uyu musore yarohamye ku mugoroba wo kuri uyu wa Kane tariki ya 23 Mutarama 2025, mu cyuzi gihangano cya Bugugu giherereye mu Kagari ka Nyagasenyi mu Murenge wa Kigabiro.

    Iki cyuzi cyatunganyijwe kugira ngo cyifashishwe mu kuhira imyaka yiganjemo umuceri.

    Umunyamabanga Nshingwabikorwa w'Umurenge wa Kigabiro, Rushimisha Mark, yabwiye IGIHE ko uyu munyeshuri yajyanye n'abandi bane koga, bakora urugendo rurerure birangira mugenzi wabo ananiwe akiri mu mazi ahita arohama.

    Yagize ati 'Ni umusore w'imyaka 24, bagiye ku cyuzi cya Bugugu ari batanu kandi ngo bose bari bazi koga, batubwiye ko boze ahantu harehare cyane noneho bahindukiye mugenzi wabo arananirwa.'

    'Aranabahamagara ababwira ko ananiwe, babiri basubiye inyuma umwe amufata akaboko ariko ngo yari yatangiye gusoma, aho bajyaga rero hari hakiri kure byageze aho rero ahita acubira baramubura.'

    Rushimisha yakomeje avuga ko muri iki cyuzi harimo isayo ku buryo utapfa kubona umuntu, abo banyeshuri ngo bafashe isaha yose babanza kumushakisha bamubuze mu ijoro aba ari bwo bajya kubwira Polisi n'izindi nzego kugira ngo batabare, na bo ngo bagiyeyo ntibamubona.

    Amakuru yizewe IGIHE yamenye ni uko Polisi y'u Rwanda yabonye umurambo w'uyu musore mu gitondo cyo kuri uyu wa 24 Mutarama 2025.

    Rushimisha yasabye abaturage kwirinda kogera muri iki cyuzi kuko atari byo cyagenewe.

    Uyu muyobozi yavuze ko iki cyuzi gihangano kimaze gupfiramo abantu ari na yo mpamvu bagiye gukaza umutekano mu kwirinda ko cyakomeza guteza ibibazo.

    Umunyeshuri witabye Imana yigaga muri Kaminuza y'u Rwanda ishami rya Rwamagana mu mwaka wa gatatu.

    Ubuyobozi bwatangaje ko icyuzi cya Bugugu bitemewe kucyogamo

    Source : http://igihe.com/amakuru/u-rwanda/article/rwamagana-umunyeshuri-wigaga-muri-kaminuza-y-u-rwanda-yarohamye-mu-cyuzi

  • NIRDA yatanze amabagiro y'inyama z'ingurube agezweho – #rwanda #RwOT

    Rimwe muri ayo mabagiro ryahawe uruganda rw'Ikigo gitunganya ibikomoka ku matungo rwitwa Kime Ltd, ruherereye mu Karere ka Rusizi kuri uyu wa 23 Mutarama 2024. Rifite ubushobozi bwo kubaga ingurube 200 ku munsi ndetse ni irya mbere rinini mu Rwanda.

    Irindi bagiro ryatanzwe ku wa 16 Mutarama ryahawe uruganda rwa Ntarama Pig Farming on Large Scale Ltd ruherereye mu Karere ka Bugesera, rufite ubushobozi bwo kubaga ingurube 50 ku munsi.

    Izo nganda zahawe ayo mabagiro zishyuriwe 50% by'ikiguzi cyayo atanzwe na NIRDA ifatanyije n'Ikigo cy'Ababiligi gishinzwe Iterambere, Enabel. Andi 50% azishyurwa n'abahawe ayo mabagiro nyuma kandi nta nyungu iziyongeraho.

    Ayo mabagiro agezweho (Modern Pig Slaughtering Machines) yatanzwe binyuze muri gahunda ya NIRDA y'ipiganwa yitwa 'NIRDA Open Calls Program' igamije kongera ubwiza n'ubwinshi bw'ibikomoka ku matungo.

    Yitezweho gukemura ikibazo cy'ibura ry'ahatunganyirizwa inyama z'ingurube mu gihugu no gufasha abacuruzi n'aborozi kubona aho batunganyiriza inyama mu buryo bworoshye.

    Azafasha kandi abakunda inyama z'ingurube zizwi nk'akabenzi batinyaga kuzirya kubera impungenge z'uko zateguwe.

    Umuyobozi Mukuru wa NIRDA, Dr. Sekomo Birame Christian yabwiye IGIHE ko ayo mabagiro azongerera agaciro inyama z'ingurube kuko zizaba zitunganyijwe mu buryo bwujuje ubuziranenge.

    Yagize ati 'Gutunganya umusaruro w'ingurube wujujie ubuziranenge byari ikibazo kuko nta mabagiro agezweho yari mu gihugu mu gihe bigaragara ko ubworozi bwazo buteye imbere ndetse n'inyama zazo zikunzwe cyane. Aya mabagiro rero aje gufasha abatunganya izo nyama kubikora mu buryo bwujuje ubuziranenge kandi azafasha n'abazirya kutishisha isuku n'ubuziranenge bwazo.'

    Dr. Sekomo kandi yasabye izo nganda kwagura ibikorwa, ayo mabagiro agafasha n'abandi badafite amabagiro agezweho.

    Ati 'Icyo dusaba izi nganda ni ugukora neza kandi zigatanga umusaruro mwiza tuzitezeho zinafasha abandi bikorera kubona serivisi nziza. Abanyarwanda bagomba kubona inyama z'ingurube zitunganyije neza ndetse tubashe no kohereza mu mahanga inyama kuko zujuje ubuziranenge.'

    Umuyobozi Mukuru wa Kime Ltd, Mugambira Jean Baptiste yashimiye NIRDA yabafashije kubona aho batunganyiriza inyama z'ingurube zujuje ubuziranenge.

    Yagize ati 'NIRDA yadufashije kubona imashini zifite ikoranabuhanga rigezweho. Izi mashini zibaga ingurube ni umwihariko tugiye kugira kurusha abandi bose. Hari icyo bizahindura ku bakiliya duha inyama zacu kandi n'abacuruzi bazabyungukiramo.'

    Mugambira yongeyeho ko n'aborozi b'ingurube n'abacuruza inyama bazabyungukiramo.

    Uruganda rwa Kime Ltd ruzajya rutanga inyama i Rusizi no mu tundi turere byegeranye, no muri Repubulika Iharanira Demokarasi ya Congo binyuze ku mupaka wa Bukavu.

    Uretse ayo mabagiro yatashywe, NIRDA ibinyujije muri iyi gahunda ya Open Calls Program yafashije n'izindi nganda ziri mu rwego rw'ubworozi harimo izongerera agaciro ibikomoka ku nkoko n'izikora ibiryo by'amatungo.

    Uruganda rwo mu Bugesera ruzajya rutunganyirizwamo ingurube 50 ku munsi

    Umuyobozi Mukuru wa Kime Ltd, Mugambira Jean Baptiste yashimye NIRDA yabafashije kubona aho batunganyiriza inyama z'ingurube zujuje ubuziranenge

    Umuyobozi Mukuru wa NIRDA Dr. Sekomo Birame Christian yavuze ko ayo mabagiro azongerera agaciro inyama z'ingurube kuko zizaba zujuje ubuziranenge

    Iri bagiro ryahawe uruganda rwa Kime Ltd rifite ubushobozi bwo gutunganya ingurube 200 ku munsi

    Ingurube itunganywa mu buryo bw’ikoranabuhanga

    Source : http://igihe.com/amakuru/u-rwanda/article/nirda-yatanze-amabagiro-y-inyama-z-ingurube-agezweho

  • Kayonza: Babiri bapfiriye mu mpanuka y'imodoka, abandi 16 barakomereka – #rwanda #RwOT

    Iyi mpanuka yabaye kuri uyu wa Kane ahagana saa Tanu z'amanywa, mu Karere ka Kayonza mu Murenge wa Rukara mu Kagari ka Karambo.

    Umuvugizi wa Polisi y'u Rwanda, Ishami rishinzwe Umutekano wo mu Muhanda, SP Kayigi Emmanuel, yabwiye IGIHE ko iyi mpanuka yaguyemo abaturage babiri mu gihe abandi 16 bakomeretse harimo n'abakomeretse mu buryo bukomeye.

    Yagize ati 'Impanuka yabaye ni iy'imodoka ya minibus, Toyota Hiace yavaga mu cyerekezo cya Karubamba igana kuri kaburimbo. Yageze muri Rukara ahantu hamanuka kandi yihuta, gukata ikorosi rihari biramunanira imodoka igonga ibiti irakomeza igwa munsi y'umuhanda. Hapfuyemo abantu babiri, abandi 16 barakomereka barimo batanu bakomeretse cyane.'

    SP Kayigi yakomeje avuga ko abantu bose bakomeretse n'abaguye muri iyi mpanuka bajyanywe ku bitaro bya Gahini.

    Uyu Muvugizi yasabye abakoresha umuhanda kwirinda kwirara no kwitwararika mu gihe batwaye imodoka, kuko impanuka yabera ahantu aho ari ho hose.

    Ati 'Abatwara imodoka baributswa ko impanuka ishobora kubera mu mihanda y'igitaka cyangwa kaburimbo igihe utubahirije ibisabwa ngo ugende neza. Turabasaba kutirara, uburangare no kwirinda umuvuduko ni ingenzi mu gihe batwaye imodoka kandi n'abagenzi bakabigiramo uruhare.'

    Kugeza ubu abakomeretse bari kwitabwaho n'ibitaro bya Gahini mu gihe hari n'undi wahise ajyanwa ku bitaro bya Kanombe.

    Imodoka yerekezaga ku muhanda wa kaburimbo ibura uko ikata ikorosi ihita igonga ibiti

    Source : http://igihe.com/amakuru/u-rwanda/article/kayonza-babiri-bapfiriye-mu-mpanuka-y-imodoka-abandi-16-barakomereka

  • Perezida wa Turikiya Erdoğan ashimangira ko u Rwanda ari icyitegererezo ku mugabane wa Afurika #rwanda #RwOT

    Perezida wa Turikiya, Recep Tayyip Erdoğan, yashimangiye ko u Rwanda ari icyitegererezo ku mugabane wa Afurika kubera politiki ihamye n'iterambere ry'ubukungu rwagezeho. Ibi yabitangaje tariki 23 Mutarama 2025 mu kiganiro n'abanyamakuru yahuriyemo na Perezida Paul Kagame w'u Rwanda, wari wagiriye uruzinduko rw'akazi muri Turikiya.

    Muri uru ruzinduko, hasinywe amasezerano akomeye y'ubufatanye hagati y'ibi bihugu mu nzego zirimo itangazamakuru n'itumanaho, iperereza ku mpanuka n'ibibazo by'indege za gisivili, radiyo na televiziyo, ndetse n'ikoranabuhanga rikoreshwa mu gisirikare.

    Aya masezerano mashya yiyongereye ku yandi arenga 10 asanzwe ari hagati y'ibi bihugu, harimo ajyanye no guteza imbere ubucuruzi, uburezi, umuco, korohereza abinjira n'abasohoka, ikoranabuhanga, ndetse no guhanga udushya.

    Perezida Erdoğan yasobanuye ko kuva u Rwanda rwafungura Ambasade i Ankara mu 2013, na Turikiya igafungura Ambasade yayo i Kigali mu 2014, umubano w'ibi bihugu wagiye urushaho gukomera. Yashimye cyane uruhare rwa Perezida Kagame mu guteza imbere iyi myanya y'ubufatanye.

    Yagize ati: 'Ibigo byacu byashoye imari hafi miliyoni 500 z'amadolari mu Rwanda, mu gihe ubucuruzi bwacu bwavuye kuri miliyoni imwe gusa y'amadolari mu ntangiriro z'imyaka ya 2000 bukagera ku rwego rushimishije.'

    Yongeyeho ko uru ruzinduko rwagaragaje ko intambwe nshya yo kwagura umubano w'ibi bihugu izatanga umusaruro ushimishije ku mpande zombi. 'Dufata uruzinduko rw'uyu munsi nk'intambwe nshya yo kongerera imbaraga ubufatanye bwacu. U Rwanda ni igihugu cya Afurika cy'icyitegererezo kubera politiki yarwo ihamye, amahoro rufite n'iterambere ry'ubukungu ry'intangarugero. Birumvikana, ubuyobozi bufite icyerekezo bw'inshuti yanjye Kagame bwagize uruhare rukomeye muri iri terambere,' yavuze Perezida Erdoğan.

    Perezida Kagame na we yashimangiye ko Turikiya ari umufatanyabikorwa ukomeye ku Rwanda, ashimira uburyo ibihugu byombi byubatse umubano ushingiye ku buhahirane n'inyungu rusange. Yanagaragaje ko amasezerano yashyizweho umukono azafasha mu guteza imbere ubuhahirane bw'ibihugu byombi no kuzamura imibereho y'abaturage babyo.

    Yagize ati: 'Turikiya yahaye agaciro gakomeye umubano ifitanye n'u Rwanda, ikawufata nk'umusingi w'ubuhahirane n'ubwumvikane hagati y'ibihugu byacu. Aya masezerano dushyizeho umukono uyu munsi azatuma dutera intambwe nshya mu rugendo rwo kwiyubaka no guteza imbere abaturage bacu.'

    U Rwanda na Turikiya bifitanye amateka y'ubufatanye bwagaragaje inyungu mu nzego zitandukanye, harimo n'uburezi, aho abanyeshuri b'Abanyarwanda benshi bamaze kurangiza amasomo muri za kaminuza zo muri Turikiya, kimwe no mu bikorwa remezo aho ibigo byo muri Turikiya bikomeje gushora imari mu gihugu.

    Perezida Erdoğan yasoje ashimangira icyerekezo cy'igihugu cye cyo kwagura umubano n'ibihugu bya Afurika binyuze mu bufatanye bwubaka, yongeraho ko Turikiya izakomeza gushyigikira iterambere ry'u Rwanda nk'igihugu cy'inshuti.

     

    Source : https://kasukumedia.com/perezida-wa-turikiya-erdogan-ashimangira-ko-u-rwanda-ari-icyitegererezo-ku-mugabane-wa-afurika/

  • Edman Ishimwe yareze indirimbo 'Tunywe' avuga ko iyobya abantu, ikurwa kuri YouTube #rwanda #RwOT

    Uwitwa Edman Ishimwe, uzwi cyane ku mbuga nkoranyambaga kubera ibirego bitandukanye yagiye atanga ku bantu b'ibyamamare, yongeye gukora agashya arega indirimbo 'Tunywe' ya Phil Peter, Ish Kevin, na Aime Bluestone. Uyu mugabo avuga ko iyi ndirimbo ifite ubutumwa buyobya abantu, bityo ikaba idakwiye kumvikana mu ruhando rwa muzika Nyarwanda.

    Ibi byatumye iyi ndirimbo, kimwe na EP ya Phil Peter yitwa Fili Piano, bikurwa ku rubuga rwa YouTube.

    Iki kirego gikurikiye ibindi byinshi Edman Ishimwe yagiye ashinja abandi, harimo ikirego giherutse yagejeje kuri Polisi, avuga ko umuhanzi The Ben atwaye imodoka atambaye umukandara, bikamuviramo guhanwa.

    Phil Peter yatangaje ko we n'itsinda rye bari gukora ibishoboka byose kugira ngo indirimbo 'Tunywe' hamwe na EP Fili Piano bigaruke kuri YouTube. Mu itangazo yashyize hanze, yavuze ko nubwo bacyakiriye iki kibazo n'umutima utuje, bidaciye intege itsinda rihuriye kuri iyo ndirimbo, kandi bizeye ko ubutabera buzagaragaza ukuri.

    Indirimbo 'Tunywe' ni imwe mu zigize EP nshya ya Phil Peter, ikaba yarakiriye abakunzi ba muzika neza ubwo yari ikiri kuri YouTube.

    Ku rundi ruhande, bamwe mu bakunzi ba muzika Nyarwanda bavuze ko iki kirego cya Edman Ishimwe gisa n'icyaba gifite inyungu zihariye zinyuranye n'ukuri kw'ibyo avuga.

    Ni gake mu muziki Nyarwanda habaho inkubiri nk'iyi yo gukura indirimbo kuri YouTube kubera ibirego by'abaturage basanzwe, ariko iki kirego cya Edman cyongeye guha benshi impamvu yo kuganira ku buryo bw'imikorere ya za platform n'ukuntu umuhanzi ashobora kwirwanaho mu gihe ahuye n'ikibazo nk'iki.

    Phil Peter yasabye abakunzi b'indirimbo ye gukomeza kumushyigikira mu buryo bwose bushoboka, anashimira abagaragaje ko badashyigikiye icyemezo cyo gukura 'Tunywe' kuri YouTube. Mu gihe hategerejwe uko ibintu bizagenda, hari icyizere ko EP Fili Piano izasubira ku rubuga vuba bishoboka, kugira ngo abakunzi bayo bakomeze kuyisangiza abandi no kuyumva nta nkomyi.

    Phil Peter yasabye abakunzi b'indirimbo ye gukomeza kumushyigikira mu buryo bwose bushoboka.
    Edman Ishimwe yareze indirimbo 'Tunywe' avuga ko iyobya abantu, ikurwa kuri YouTube.

    Source : https://kasukumedia.com/edman-ishimwe-yareze-indirimbo-tunywe-avuga-ko-iyobya-abantu-ikurwa-kuri-youtube/