Author: webrwanda

Byabaye kuri uyu wa Mbere tariki 10 Werurwe 2025, ku cyicaro cya RIB giherereye i Remera. Herekanywe kandi n’abandi bakurikiranyweho kurema umutwe w'abagizi ba nabi bagurisha ubutaka butari ubwabo bakoresheje impapuro mpimbano. 

Biyitiriraga abagenzacyaha bagacucura abantu

Mukahabimana Beatrice w'imyaka 35 afatanyije n'uwitwa Siborurema Jean Claude (Ntarafatwa, aracyari gushakishawa) ndetse na Niyigena Claudine, nibo bakoranaga, aho buri umwe yari afite icyo ashinzwe, bakubakira ku makuru y'abantu bafunzwe bakurikiranyweho ibyaha bitandukanye.

Bifashishije aya makuru bahamagara abana, umugore cyangwa umugabo w'umwe muri abo bantu bafunze, bakamusaba amafaranga bamwizeza ko umuntu we arekurwa.

Murangira yavuze ko Niyigena Claudine niwe wanyuzwagaho amafaranga yaciwe abantu bafite ababo bafunze. Ati 'icya mbere bahera ku makuru y'umuntu runaka, iyo bamaze kumenya ayo makuru niyo bakoresha, amakuru bashaka ni ay'umuvandimwe uri hanze, umugore cyangwa se umugabo, ufite umuntu ufunze, ukurikiranyweho ibyaha bitandukanye.'

Yavuze ko Mukahabimana niwe wiyitaga umugenzacyaha, hanyuma agahamagara umwe mu bo mu muryango w'uwafunzwe, akamubwira ko 'Dosiye ikomeye, ariko ko hari icyakorwa'.

Dr. Murangira ati 'Ubwo rero yifashisha ya makuru, agahamagara umuvandimwe, inshuti cyangwa umugore akamubwira ko dosiye y'umuntu we ufunze ikomeye, akamwumvisha ko ikomeye pe, ati ariko gukomera cyangwa koroha kwayo biri mu biganza 'byawe', akamubaza ati 'ese ubwo icyo mvuze uracyumvise'?'

Yavuze ko mu mayeri bakoresha, harimo gusaba wa muntu ufite uwe ufunze gutanga amafaranga kugira ngo afungurwe. Muri iyi dosiye, Niyigena Claudine niwe wakiraga amafaranga nka 'Agents' hanyuma akayashyikiriza bariya babiri bakoranaga.

Dr.Murangira yavuze ko 'Ubutabera ntibugurwa. Umuntu wese ukubwira ngo tanga amafaranga, ngo bagufungurize kanaka, rwose jya umenya ko ari umutekamutwe…'

Yavuze ko abakomisiyoneri basiga icyasha inzego z'ubutabera, bityo ni uruhare rwa buri wese mu guhangana n'abiyitirira inzego zinyuranye, bagashuka abantu.

Abagabo bane biyitiriye imyirondoro y'abantu bagurisha ubutaka bwabo:

Dr.Murangira yavuze ko buri wese ugurisha ubutaka cyangwa ugura akwiye gushishoza, kandi na Noteri ubihamya akabanza kugenzura niba nta manyanga yabaye mu kugura no kugurisha ikibanza

Yavuze ko aba bagabo bafashwe tariki 3 Werurwe 2025, bafashwe bamaze kugurisha ubutaka butari ubwabo bungana na metero kare 18,000, bukasemo ibibanza 60. Buherereye mu Karere ka Bugesera.

Bafashwe kandi bamaze kwakira amafaranga angana na Miliyoni 141 Frw, ndetse n'ibihumbi 42 by'amadorali. Iki ni igiciro cy'ubutaka bari bagurishije, butari uwabo.

Umuvugizi w'Urwego rw'Igihugu rw'Ubugenzacyaha (RIB), Dr. Murangira B. Thierry yavuze ko uwari waguze ubu butaka yahombye, kuko yari yaguze n'abatekamukatwe. Ati 'Ni ukuvuga ngo uwaguze yahombye aya mafaranga yose, kuko yaguze n'amabandi, atanga amafaranga. Tekereza kudashishoza ugahita utakaza imari ingana gutya.'

Abacyekwaho kugurisha ubu butaka barimo Rubagendwa Fred uzwi ku izina rya Rusakara- Yari asanzwe azwi nk'umucuruzi unafite kompanyi zikora ibikorwa.

Tariki 20 Kanama 2024, Urukiko rw'Ibanze rwa Kicukiro rwahamije Rubagendwa Fred icyaha cyo kwihesha ikintu cy'undi hakoreshejwe uburiganya. Murangira ati 'Ubu ari mu isubiracyaha. Yakatiwe igifungo cy'imyaka ibiri n'ihazabu ya Miliyoni 3 Frw bisubitse mu myaka ibiri n'amezi atandatu, yongeye gufatwa icyaha yasubikiwe imyaka bamuhaye itararangira. Icyaha ni kimwe, kwihesha ikintu cy'undi hakoreshejwe uburiganya.'

Mu bandi bafashwe harimo Kayiranga Edouard. Uyu yari komisiyoneri, aho yahuzaga ugura n'ugurisha. Hafashwe kandi Tresor wemera ko yakiriye Miliyoni 23 Frw n'ibihumbi 6 by'amadorali, ni mu gihe 'Rusakara' yemera ko yakiriye Miliyoni 23 Frw n'ibihumbi 7 by'amadorali.

Kayiranga Edouard, ku wa 15 Kamena 2022 yakurikiranyweho icyaha nk'iki cyo kwihesha ikintu cy'undi hakoreshejwe uburiganya. Murangira ati 'Urumva rero abakomisiyoneri bamwe na bamwe, akenshi uzasanga bakurikiranywaho ibi byaha. Kuko, nibo bahuza ugura n'ugurisha, baba bazi amakuru y'ubutaka runaka.'

Muri iyi dosiye, Ndahiro Yvan niwe wateguye ibi bikorwa byose. Murangira ati '(Uyu) niwe wari uzi nyiri butaka wa nyawo, no gushaka abantu bagura. Uyu Ndahiro Yvan niwe washatse umunyamahanga wiyitirira nyirubutaka, ubutaka bwagurishijwe bwari ubw'umunyamahanga, hanyuma bashaka undi munyamahanga uza kwiyitirira ubutaka, no guhimba impapuro bisa n'ibyangombwa by'umunyamahanga.'

Yavuze ko uwari ugiye kugura ubu butaka yagerageje gushaka amakuru abona, ariko ntiyabasha guhuza izina rya nyirubutaka ndetse n'isura igaragaza ku byangombwa bye.

Muri iyi dosiye kandi, harimo Irigeneza Tresor w'imyaka 25 y'amavuko, niwe wakiraga amafaranga, ndetse niwe wabahuzaga na 'Notaire'.

Dr. Murangira yavuze ko aba bagabo bahisemo uyu mwana kugirango banyuze amafaranga kuri konti ye angana na Miliyoni 141 Frw n'ibihumbi 42 by'amadorali.

Yashimye abaturage ku bw'uruhare bagize 'kugirango aba bantu bafatwe'. Ati 'Turashima abaturage ko muri iyi minsi, batakemera, batakihanganira ibikorwa nk'ibi. Ntaho wajya ngo wihishe, ubufatanye bwabo turabushima, kandi turabasaba kubukomeza.'

Dr. Murangira yavuze ko aba bantu bamaze gufatwa, hagarujwe amafaranga angana na Miliyoni 67, 830 Frw; hagarujwe 11, 795 by'amadorali. Hafatiriwe ubutaka bufite agaciro ka Miliyoni 23 Frw, ndetse na Mercedes-Benz ifite agaciro ka Miliyoni 8 Frw.

Hafatiriwe kandi Miliyoni 9 Frw ziri kuri konti. Yose hamwe ugereranyije ni 107, 830,000 ndetse 11,790 by'amadorali [16, 919,708.86 Frw]- Aya niyo yabashije kugaruzwa. Uteranyije yose hamwe ni 124, 749, 708 Frw.

Amafaranga yasubijwe nyirayo, ni mu gihe ibyafatiriwe na byo bizagurishwa amafaranga agasubizwa uwatekewe umutwe.

RIB kandi yerekanye umugabo witwa Bimenyimana Jean Marie wemera icyaha, akavuga n'uburyo yabikoze, ndetse n'amafaranga yari amaze gukura. Uyu mugabo yakoreshaga amayeri yo kureba umuntu ugiye kubikuza amafaranga kuri Banki, cyangwa se ahandi akamusaba kumuvungishiriza amadorali.

Aba bose bakurikiranyweho ibyaha birimo gushyiraho umutwe w'abagizi ba nabi cyangwa kuwujyamo; kwihesha ikintu cy'undi hakoreshejwe uburiganya, gukoresha inyandiko mpimbano n'icyaha cy'iyezandoke. Ibi byaha babikoze mu bihe bitandukanye.

Icyaha cyo gushyiraho umutwe w'abagizi ba nabi cyangwa kuwujyamo aba bantu bakurikiranyweho giteganywa n'ingingo ya 224 y'itegeko riteganya ibyaha n'ibihano muri rusange. Ugihamijwe ahanishwa igifungo kuva ku myaka 7 ariko kitarenze imyaka 10.

Ingingo ya 276 yo mu itegeko riteganya ibyaha n’ibihano muri rusange ivuga ko, Umuntu wese uhimba cyangwa uhindura mu buryo ubwo ari bwo bwose inyandiko cyangwa ikindi kintu cyanditseho igitekerezo, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y'ingingo zayo, igitegetswe gukorwa cyangwa icyarangije kwemeranywa, aba akoze icyaha.

Umuntu wese, ku bw'uburiganya, wandika, wandikisha ibintu bidahuye n'ukuri cyangwa ukora imenyekanisha ritari ryo afatwa nk'uwakoze icyaha cyo gukora ibihimbano.

 Iyo abihamijwe n'urukiko, ahanishwa igifungo kitari munsi y'imyaka itanu (5) ariko kitarenze imyaka irindwi (7) n'ihazabu y'amafaranga y'u Rwanda atari munsi ya miliyoni eshatu (3.000.000 FRW) ariko atarenga miliyoni eshanu (5.000.000 FRW) cyangwa kimwe gusa muri ibyo bihano.

Iyezandonke n'icyaha cy'ubugome gihanishwa igifungo kitari munsi y'imyaka irindwi ariko kitarenze imyaka icumi n'ihazabu y'amafaranga y'u Rwanda yikubye inshuro kuva kuri eshatu kugeza kuri eshanu z'agaciro k'amafaranga y'iyezandonke. Mu gihe cy'isubiracyaha, ibi bihano byikuba inshuro ebyiri.

RIB yerekanye abantu 7 bahuriye ku cyaha cy'ubushukanyi, aho babikoze mu bihe bitandukanye

Umuvugizi w'Urwego rw'Igihugu rw'Ubugenzacyaha, Dr Murangira B. Thierry yasabye abantu gushishoza mu gihe cyose hagize ubegera abizeza ubufasha

Yabigarutseho ku wa 8 Werurwe 2025, ubwo we na bagenzi be barimo Niwemahoro Wasira na Kanyandekwe Christine bari mu Karere ka Karongi hizihizwa Umunsi Mpuzamahanga w'Abagore.

Ni umunsi usanze abagore bo mu Karere ka Karongi bariteje imbere kubera icyizere bagiriwe n'ubuyobozi bukuru bw'igihugu hakiyongeraho inama n'ubufasha bahabwa n'abafatanyabikorwa batandukanye.

Depite Ntezimana yavuze ko hari byinshi byo kwishimira birimo kuba abagore bo mu Rwanda basigaye biga bakanakora imyuga bafataga nk'iy'abagabo no kuba Leta yarashyizeho amategeko adaheza umugore mu buzima bwose bw'igihugu.

Gusa anenga abagabo bagihohotera abagore babo, harimo n'ababakubita.

Ati 'Abagabo bagikubita abagore bakamenya ko ibyo bintu bitemewe. Nihereyeho njyewe uvuga nagambiriye kera ndavuga ngo ntabwo nzarambura ukuboko kwanjye ku mugore.'

Uyu mudepite avuga ko umugore n'umugabo babana bagira ibyo bapfa, ariko ko icyaba cyose ntawe ukwiye gukubita undi.

Ati 'Abagabo turi kumwe hano ndagira ngo mumfashe tugambirire hamwe, tujyane mu ndahiro ivuga ngo 'sinzigera ndambura ukuboko kwanjye ku mugore'…Umugore wanjye tugiye kumarana imyaka 12 ntabwo ndamukubita na rimwe.'

Depite Nizeyimana yababwiye ko iyo umugabo akubise umugore ingaruka zitabageraho bombi gusa kuko zigera no ku bana.

Ati 'Umwana wabonye nyina akubitwa, warangiza mu gitondo ukabyuka ukamubwira ngo bagukorere icyayi vuba wihute ujye ku ishuri, kandi uzazane amanota meza, uba uri guta umwanya. Umenye ko inzozi wari ufite muri uwo mwana zapfuye. Uwo mwana ukubita nyina areba nta manota yazana. Aba afite ukuntu yomatanye na nyina wamwonkeje.'

Depite Ntezimana avuga ko igihe abagabo biyemeje kutazakubita abagore, abagore na bo bakwiye kubibafashamo bakamenya uko baganira n'abo bashakanye.

Ati 'Kuba atagukubita ntabwo bivuze ko wowe umukubitisha ururimi. Ugomba kumenya ibyo uvuga, n'igihe hari ibitagenda neza ukagira ukuntu umuvugisha.'

Umunsi Mpuzamahanga w'Abagore watangiye kwizihiza mu 1972, mu Rwanda utangira kwizihizwa mu 1974. Ku rwego rw'Isi umaze kwizihizwa inshuro 52 mu gihe mu Rwanda tariki 8 Werurwe 2025 wizihijwe ku nshuro ya 50. Ku nsanganyamatsiko igira iti 'umugore ni uw'agaciro'.

Depite Ntezimana yasabye abagabo kuzibukira gukubita abagore babo

Rwibasira Alexis ukorera ubuhinzi mu Murenge wa Mwurire mu Karere ka Rwamagana yabwiye RBA ko yuhira umurima wa hegitari 13 akoresheje ingufu z'imirasire y'izuba.

Ati 'Mbere nabanje kugira ikibazo cy'izuba, imyaka ikarumba. Ariko ubu umusaruro warazamutse, imiteja yanjye nyihinga kuri hegitari enye yampaye toni 50, naho voka umwaka ushize nasaruyeho toni zirenga eshanu, ibyo byatewe n'uko nsigaye mbona amazi ahagije.'

Niyonsaba Cecile uhinga imbuto za marakuja n'imyembe kuri hegitari 15 mu Karere ka Bugesera, Umurenge wa Kamabuye, yatangaje ko yari amaze iminsi ahura n'ikibazo cy'izuba ryinshi mu buhinzi bwe, akishimira ko agiye guhabwa ibikoresho byo kuhira hegitari icyenda akoresheje ingufu z'imirasire y'izuba, akaba yizeye ko bizamufasha gukemura iki ikibazo.

Yagize ati 'Amazi barayazamura bakayazana mu miyoboro iza mu murima, ku buryo buri giti kizaba gifite uko kivomerwa. Twiteze umusaruro mwiza, kuko mbere twuhiraga dukoresheje amazi make, ariko ubu tuzaba dufite uburyo bwizewe.'

Umukozi ushinzwe ibikorwa byo kuhira mu mushinga ukorera muri RAB, Eng. Munyambonera Divin agaragaza ko uburyo bwo kuhira hifashishijwe imirasire y'izuba bwafashije abahinzi guhinga no mu mpeshyi, aho usanga imboga n'imbuto biboneka mu masoko igihe cyose.

Umuyobozi w'Akarere ka Rwamagana, Mbonyumuvunyi Radjab, yashimangiye ko kuhira hakoreshejwe ingufu z'imirasire y'izuba byatumye ubuso buhingwa bwiyongera muri aka karere.

Yagize ati 'Icya mbere cyiza ni ukongera umusaruro, ha hantu umuntu atagiraga amazi ahagije ubu yarahageze, umusaruro wariyongereye, ubutaka buhingwa na bwo bwariyongereye, kuko inaha ntihahingwaga cyane kuko habaga imvura nke.'

Umushinga witwa SAIP ugamije kongera umusaruro w'ubuhinzi, kuwushakira amasoko no kwihaza mu biribwa ukorera mu Kigo Gishinzwe Ubuhinzi n'Ubworozi [RAB] ni wo utera inkunga ibikorwa byo kuhira hifashishijwe imirasire y'izuba.

Ufasha abahinzi kubona nkunganire y'abafite ubutaka bwa hegitari imwe kugera kuri enye n'igice igera kuri 50%. Naho icyiciro cy'abafite ubutaka kuva kuri hegitari eshanu kugera ku icumi bahabwa nkunganire ya 75% mu kuhira hifashishijwe imirasire y'izuba.

Abahinzi bo mu ntara y'Iburasirazuba batangiye kuhira imyaka bakoresheje imirasire y'izuba

Umuvugizi wa Polisi mu Mujyi wa Kigali, CIP Gahonzire Wellars yabwiye IGIHE ko abo bantu batawe muri yombi mu minsi ibiri itandukanye hagendewe ku makuru yatanzwe n'abaturage.

Mu bafashwe harimo Musabyeyezu Dieudonné bahimba Nyabugogo ndetse uyu abaturage bavuga ko yari umujura ruharwa yafashwe ku wa 7 Werurwe 2025.

Hanafashwe Sebanani Emmanuel wafatiwe mu kabari yasinze afata icyuma ashaka kugitera abantu ariko akaba asanzwe ari umujura.

Hari kandi Nsanzumuhire Daniel wafatiwe mu rugo rw'umuturage afite icyuma mu rucyerera rwo ku wa 9 Werurwe 2025.

CIP Gahonzire yavuze ko abo bafashwe nyuma y'uko mu bice bya Gitega hari hamaze iminsi humvikana ubujura n'urugomo aho abaturage bamburwaga bakanakomeretswa n'abajura.

Ati 'Ejo bundi hariya i Gitega abajura binjiye mu kabari bambura amatelefone abarimo banywa bagize ngo babakurikre babatera amacupa y'inzoga barabakomeretsa. Mu minsi ishize kandi muri ako gace abakobwa bambuwe amatelefone, abasore bagiye kubakiza abajura babatera ibyuma harimo n'ukiri kwivuza.'

Uyu Muvugizi yavuze ko Polisi yahagurukiye ubwo bujura n'urugomo kugira ngo abo bikekwaho bose bafatwe by'umwihariko mu duce twa Nyakabanda na Gitega kandi ko kuva batangira guhigisha uruhindu abakekwaho urwo rugomo byacogoye.

Magingo aya abarenga 30 bakekwaho urugomo bamaze gutabwa muri yombi.

Yasabye abaturage gutanga amakuru ku wo bakeka wese mu bikorwa nk'ibyo kandi ko abahungabanya umutekano n'ituze by'abaturage aho ari ho hose batazihanganirwa.

Aba basore bakekwaho ubujura bwitwaje intwaro no gukomeretsa abaturage

Uyu muhanzi ugezweho muri iki gihe binyuze mu ndirimbo “Sambolela’ yataramiye bwa mbere mu Mujyi wa Stockholm muri Suede, mu ijoro ryo ku wa Gatandatu tariki 8 Werurwe 2025 cyahuriranye no kwizihiza Umunsi Mpuzamahanga w’Umugore. 

Cyabaye igitaramo kidasanzwe mu rugendo rw’uyu musore, kuko yahuriye ku rubyiniro n’abahanzi barimo Spice Diana wo muri Uganda. 

Iki gitaramo cyari cyateguwe na DJ Mozze usanzwe ubarizwa muri kiriya gihugu, ndetse afasha umubare munini w’abahanzi gukorerayo ibitaramo.

Ni igitaramo cyitabiriwe n’abarimo Ambasaderi w’u Rwanda muri Suède, Diane Gashumba, Eric Kabera wamenyekanye mu gutunganya Filime n’abandi.

Cyabaye intangiriro y’ibindi bitaramo, uyu muhanzi ari gutegura gukorera mu bihugu bitandukanye byo ku Mugabane w’u Burayi.

Mu kiganiro na InyaRwanda, Chriss Eazy yavuze ko kuba Ambasaderi Gashumba yitabiriye igitaramo cye abifata nk’umugisha ugeretse ku wundi, kandi ni igisobanuro cyo gushyigikirwa bya nyabyo.

Ati “Ndashima Imana. Ndetse ndishimye cyane. Ndashimira abakunzi b’umuziki wanjye byumwihariko abaherereye muri Suede, kuko batweretse urukundo rwinshi. Kuba Ambasaderi Gashumba yitabiriye igitaramo cyanjye, byo ni undi mugisha kuko bivuze byinshi kuri Chriss Eazy ndetse n’umuziki Nyarwanda.”

Chriss Eazy yasobanuye iki gitaramo nk’ishusho y’uko ibikorwa by’abahanzi birenga imipaka.

Ati “Navuga ko cyari igitaramo gikomeza kumpamiriza ko imirimo dukora igera ku bantu bacu kandi tugomba gukomerezaho gukora ibyiza byisumbuyeho.”

Chriss Eazy yavuze ko iki gitaramo cyamuhaye ishusho y'uko n'ibindi ari gutegura mu bihugu byo mu Burayi bizagenda neza, anashingiye ku ishusho y'igitaramo yakuye mu cyo yakoreye mu gihugu cy'u Bubiligi mu minsi ishize.

Ati 'Naherukaga gutaramira mu Bubiligi. Rero, iki gitaramo twakoreye muri Suede cyampamirije ko bizagenza neza cyane n'ibindi bitewe n'ubwitabire ndetse n'ibyishimo abakunzi banjye banyeretse kandi ndabyizeye cyane.'

Uruhererekane rw'ibitaramo bya Chriss Eazy bizatangira ku wa 26 Mata 2025 ataramira muri Poland aho azahurira ku rubyiniro na Joeboy, akomereza mu Mujyi wa Paris tariki 3 Gicurasi 2025, ni mu gihe tariki 10 Gicurasi 2025 azataramira i Brussels mu Bubiligi.

Anafite igitaramo azakora tariki 17 Gicurasi 2025 mu gihugu ataratangaza, cyo kimwe n'igitaramo kizaba tariki 24 Gicurasi, icya tariki 31 Gicurasi, tariki 7 Kamena ndetse na 14 Gicurasi 2025.

Ibi bitaramo byateguwe na Sosiyete ya Team Production isanzwe ifasha abahanzi gukorera ibitaramo cyane cyane mu Bubiligi.

Chriss Eazy uri kwitegura gukora ibi bitaramo, ni umuhanzi w’umunyarwanda ukora injyana ya Afrobeat, akaba n’umwanditsi w’indirimbo ndetse n’umuyobozi wa Ewuana Brand.

Uyu musore yatangiye umuziki mu 2016 ubwo yitabiraga amarushanwa y’impano yiswe “Talent”. Mu 2020, yashyize hanze indirimbo ye ya mbere yise “Ese Urabizi?”, akurikiraho “Tegereza”.

Indirimbo ze zamenyekanye cyane mu Rwanda no mu karere, harimo “Inana”, “Amashu”, “Sambolela”na “Edeni”. Mu Kwakira 2023, yashyize hanze indirimbo yise “Bana”.

Uretse umuziki, Chriss Eazy ni umuyobozi wa Ewuana Brand, inzu y’imideli igamije guteza imbere imideli n’ubuhanzi mu Rwanda. Zimwe mu ndirimbo ze zamenyekanye zirimo nka “Inana”, “Amashu”, “Sambolela”, “Edeni”, “Bana” n'izindi.

Chriss Eazy ni umwe mu bahanzi bakiri bato bafite impano ikomeye mu muziki nyarwanda, akaba akomeje kwagura umuziki we no kugera ku rwego mpuzamahanga.

Joeboy uzataramana na Chriss Eazy, amazina ye nyakuri ni Joseph Akinwale Akinfenwa-Donus, ni umuhanzi w’umunya-Nigeria wamenyekanye cyane mu njyana ya Afro-pop na R&B. Yatangiye kumenyekana mu 2019 ubwo yashyiraga hanze indirimbo ye yise “Baby”, yakunzwe cyane muri Afurika no ku isi hose.

Mu bwana bwe, Joeboy yahuye n’ibibazo by’ubukene byatumaga atabasha kwishyura amafaranga y’ishuri, bikamuviramo kwirukanwa kenshi. Ibi byamuteye ishyaka ryo gufasha abatishoboye, bituma afungura umuryango ugamije kwishyurira abana bari mu buzima nk’ubwo yanyuzemo.

Mu 2023, Joeboy yashyize hanze album ye ya kabiri yise ‘Body & Soul’, yakiriwe neza n’abakunzi b’umuziki. Yakoze indirimbo zakunzwe nka “Sip (Alcohol)”, “Beginning”, na “Don’t Call Me Back”.

Joeboy yatangije inzu ifasha abahanzi yise ‘Young Legend’, ifite intego yo guteza imbere impano nshya mu muziki. Yanasinyanye amasezerano y’imikoranire na Warner Music, imwe mu nzu zikomeye mu gutunganya umuziki ku isi.

Joeboy yataramiye mu Rwanda inshuro nyinshi, harimo igitaramo cya Kigali Jazz Junction mu 2020, aho yafatanyije n’abahanzi b’Abanyarwanda mu gususurutsa abitabiriye.

 

Chriss Eazy yatangaje ko ari umugisha yagize kuba Ambasaderi w'u Rwanda muri Suède, Diane Gashumba yitabiriye igitaramo cye, cyabaye tariki 8 Werurwe 2025

  

Junior Giti ureberera inyungu za Chriss Eazy ari kumwe na Ambasaderi w'u Rwanda muri Suède, Diane Gashumba

Eric Kabera wamamaye muri Cinema Nyarwanda (Uwa kabiri uturutse iburyo) yitabiriye igitaramo cya Chriss Eazy cya mbere yakoreye muri Suède

KANDA HANO UREBE AMASHUSHO Y'INDIRIMBO 'SAMBOLELA'YA CHRISS EAZY

“>

Ashingira mu kuba bafitanye indirimbo ebyiri zirimo 'Igikomere' yasohotse ku wa 7 Kanama 2017, ndetse na 'Cinema' yasohotse ku wa 3 Werurwe 2025. Hejuru y'ibi ariko, anibuka ko hari ibindi bikorwa binyuranye bagiye bahuriramo byatanze umusaruro ku mpande zombi.

Mu kiganiro cyihariye na InyaRwanda, Bull Dogg asobanura Tom Close nk'umuvandimwe Mukuru we kandi uri hejuru 'yanjye mu byo kuba ari mukuru wanjye'.

Ati 'Hari ukuntu umuntu ashobora ku kwitwaraho nubwo mwaba muri kintu kimwe ukavuga uti uyu ni Mukuru wanjye reka ntware ibintu gacye ntabwo ndibwisanzure cyane.'

Yavuze ko yahuye bwa mbere na Tom Close mu 2009 bahuriye mu Karere ha Huye, kandi ko kuva icyo gihe yamubereye inshuti y'akadasohoka, kuko mu bihe bitandukanye yakunze kwakira Telefone ye amuganiriza, akamubaza uko ameze, rimwe na rimwe bakajya inama.

Ati 'Yari umuntu uhora ampamagara akambaza ati umeze neza, akangira inama, yewe bitari no muri gahunda z'umuziki. Kuko ndumva indirimbo ya mbere twakoranye, twayikoze nko mu 2017 yitwa 'Igikomere' kandi twarahuye mu 2009.'

Nyuma y'uko duhuye, twahuriraga mu bitaramo, yajyaga akoresha ibitaramo byinshi akantumira, hari ibitaramo nibuka twigeze gukorana yari yateguye, icyo gihe nari muri Kaminuza i Huye niba atari nyuma yabwo, akantumira, nkitabira.'

Bull Dogg yashimangiye ko ubushuti bwe na Tom Close bwakomeje n'uko yamutekerezagaho buri gihe. Ati 'Buriya iyo umuntu agutekerezaho, aba yubaha akazi kawe, impano yawe cyangwa se n'urugendo rwawe rw'umuziki. Niba umuhanzi Mukuru nkawe avuze ati reka uyu muhanzi muto mwifashishije muri ibi bitaramo ngiye gukora, ni uko aba ashima ibyo ukora n'uburyo ukoramo ibintu byawe.'

Bull Dogg asobanura kandi Tom Close nk'umuvandimwe 'wabashije kwakira uruhande rwanjye rw'imikorere n'ubuzima'. Yavuze ko kuba buri gihe Tom Close yaragiye amutekerezaho, abifata nk'amahirwe adasanzwe yagize mu buzima bwe, ari nayo mpamvu 'nagombaga kuyafatisha amaboko yombi'.

Ati 'Mba mvuga nti umuhanzi Mukuru wantanze mu kibuga, hari aho ashobora kunkurura akaba yangeza, haba mu muziki na nyuma y'ubu buzima bw'umuziki.'

Yavuze ko Tom Close yubatse ibigwi mu muziki w'u Rwanda, kandi hamwe n'imirimo ya Leta akora muri iki gihe, ni umwe 'mu bagucira inzira ugasanga hari icyo bigufashije, cyangwa akaguhuza n'umuntu uzakugirira akamaro nanone mu buzima bwawe'. 

Ati 'Ni umuntu nubaha cyane kandi ngenderaho n'impanuro ze, nkarebera no ku mikorere ye nkavuga nti uyu musaza yarabikoze.'

Bull Dogg yatangaje ko imyaka 16 ishize ari kumwe na Tom Close yabaye iy'umuvandimwe byatumye bakomeza gukorana
Bull Dogg yashimangiye ko Tom Close yamubereye inshuti n'umuvandimwe kuva bamenyana

Bull Dogg yavuze ko yahuye bwa mbere na Tom Close bahuriye i Huye mu 2009
Bull Dogg yavuze ko hari ibitaramo Tom Close yateguraga akamutumiramo

KANDA HANO UBASHE KUREBA IKIGANIRO CYIHARIYE TWAGIRANYE NA BULL DOGG

“>

KANDA HANO UREBE INDIRIMBO ‘CINEMA’ YA BULL DOGG NA TOM CLOSE

“>

Tariki 03 Werurwe 2025, Urwego rushinzwe abinjira n'abasohoka muri Leta Zunze Ubumwe za Amerika (ICE) rwatangaje ko rwafashe Ishimwe Dieudonné w'imyaka 38, wari warahunze ubutabera bw'u Rwanda nyuma yo gukatirwa imyaka Itanu ahamwe ibyaha bibiri birimo icyo gukoresha undi imibonano muzabitsina ku gahato.

Hari hashize imyaka irenga itatu nta muntu uca iryera Prince Kid wari warakatiwe imyaka itanu ndetse mu kiganiro n’abanyamakuru mu Ugushyingo 2023, umuvugizi wungirije wa guverinoma, Alain Mukuralinda, yatangaje ko nibaramuka batamubonye mu gihugu, bazitabaza inzego mpuzamahanga zirimo na Interpol kugira ngo afatwe.

Byagenze gute ngo Prince Kid yisange aha hantu?

Prince Kid (Ishimwe Dieudonné) yatangiye gutegura irushanwa rya Miss Rwanda mu mwaka wa 2014 binyuze muri Rwanda Inspiration Backup, sosiyete ye yari ishinzwe gutegura iri rushanwa.

Mu mwaka wa 2022 Mu kwezi kwa Mata, Ishimwe Dieudone yatawe muri yombi akurikiranyweho ibyaha bijyanye n'ihohotera rishingiye ku gitsina, bityo Rwanda Inspiration Backup ihagarikwa gutegura Miss Rwanda.

Uyu Prince Kid yaregwaga ibyaha bitatu aribyo;

Gukoresha undi imibonano mpuzabitsina ku gahato.

Gusaba cyangwa gukora ishimishamubiri rishingiye ku gitsina.

Guhoza undi ku nkeke bifitanye isano n'imibonano mpuzabitsina.

Ku wa Gatatu tariki 11 Gicurasi 2022, yitabye Urukiko rw'ibanze rwa Kicukiro kugira ngo atangire kuburana ku ifungwa n'ifungurwa ry'agateganyo, gusa urubanza rusubikwa bitewe n'ubusabe bw'uwamwunganiraga mu mategeko wasabye ko bahabwa umwanya wo gutegura urubanza neza.

Tariki ya 13 Gicurasi 2022, Prince Kid yongeye kwitaba urukiko hanyuma aburana ku ifungurwa ry'agateganyo mu rubanza rwabereye mu muhezo hanyuma ku wa 03 Kamena 2022 urukiko ruvuga ko akomeza gufungwa by'agateganyo.

Mu ntangiriro za Kamena 2022, Ishimwe yajuririye icyemezo cyo gufungwa by'agateganyo mu rukiko rwisumbuye rwa Nyarugenge gusa biza guterwa utwatsi akomeza gufungwa by'agatenyanyo.

Tariki ya 05 Ukwakira 2022, urukiko rwisumbuye rwa Nyarugenge rwaburanishije Prince Kid ku byaha yaregwaga ariko n'ubundi bikomeza kubera mu muhezo ku bwo kurinda umutekano w'abatangabuhamya dore ko hakoreshwaga 'codes'.

Ku wa 02 Ukuboza 2022, Urukiko Rwisumbuye rwa Nyarugenge rwagize umwere Ishimwe Dieudonné waregwaga ibyaha byo gukoresha undi imibonano mpuzabitsina ku gahato, gusaba no gukora imibonano mpuzabitsina ku gahato no guhoza undi ku nkeke bifitanye isano n'imibonano mpuzabitsina ndetse rutegeka ko ahita afungurwa.

Nyuma y'igihe gito afunguwe, ku wa 02 Werurwe 2023 Prince Kid yagiye gusezerana imbere y'amategeko naho ku wa 01 Nzeri 2023, Prince Kid yahise akora ubukwe na Miss Elsa wamurwaniye ishyaka mu gihe yari mu gihome dore ko nawe yigeze gutabwa muri yombi kubera gushaka guhisha ibimenyetso bishinja Prince Kid.

Hagati aho, Ku wa 05 Mutarama 2023 nibwo hamenyekanye amakuru y'uko ubushinjacyaha bwajuririye umwanzuro w'urukiko wari warasomye ku wa 02 Ukuboza 2022 ku rukiko rukuru rwa Nyarugenge.

Tariki 13 Ukwakira 2023, Prince Kid yahamijwe n'urukiko ibyaha bibiri hanyuma akatirwa gufungwa imyaka itanu ndetse n'ihazabu ya miliyoni ebyiri z'amafaranga y'u Rwanda.

Icyo gihe yari ahamwe n'ibyaha bibiri aribyo; gukoresha undi imibonano mpuzabitsina ku gahato no gusaba cyangwa gukora ishimishamubiri rishingiye ku gitsina.

Mu gihe abantu benshi bavugaga ko agiye gufungwa, Prince Kid yahise abura ari nabwo mu kiganiro n’abanyamakuru mu Ugushyingo 2023, umuvugizi wungirije wa guverinoma, Alain Mukuralinda, yatangaje ko nibaramuka batamubonye mu gihugu, bazitabaza inzego mpuzamahanga zirimo na Interpol kugira ngo afatwe.

Kuri ubu, Ishimwe afungiye muri ICE, ategereje ko hafatwa icyemezo cyo kumwohereza mu Rwanda nk’uko bigaragara ku rubuga rwayo ndetse bikaba byagarutsweho n’ibitangamakuru bitandukanye birimo wfaa.com.

Prince Kid yafatiwe muri Leta Zunze Ubumwe za Amerika mu mujyi wa Texas 

Prince Kid yavuye mu Rwanda yarakatiwe imyaka itanu

Prince Kid yakatiwe igifungo cy’imyaka itanu nyuma y’igihe gito akoze ubukwe na Miss Elsa

Mu kiganiro n’abanyamakuru mu mpera za 2023, Umuvugizi wungirije wa Guverinoma yatangaje ko guhunga igihugu bitavuze guhunga ubutabera 

Iyi camera yakoreshejwe muri uyu mukino wakinwe ejo ukarangira ari 0-0, yakozwe n’Uruganda rwo muri Canada rusanzwe rukora ibikoresho bifata amashusho rwa Ross Video Ltd.

Iyi camera ifata amashusho iri kugendera ku migozi iyifasha gutembera impande zose z’ikibuga igurwa amafaranga ari hagati y’ibihumbi 600 na miliyoni 1.2 y’Amadorali y’Amerika.

Ishobora kugendera ku muvuduko wa metero icyenda mu isegonda ku ntera ya metero 250 kuri 250.

Uburemere bwayo, ipima ibilo 340, ifite uburebure bwa santimetero 87, ubugari bwa santimetero 88 n'ubuhagarike bwa santimetero 87.

Yifitemo ubushobozi bwo gukumira ivumbi cyangwa ubushyuhe bwinshi bwayigeraho kuko yahawe umubiri w'inyuma ukozwe muri aluminum. Ikigero fatizo cy'ubushyuhe kigomba kuba dogere Celsius ziri hagati ya -10 na 40.

Batiri zayo zibika umuriro ikoresha itembera mu kirere. Imwe ifite ubushobozi bwo kuba yawubika mu gihe cy'amasaha ane, iri gukora itahagaze.

Ubwoko bwa camera ziterekwamo harimo izo gufata amashusho mu birori cyangwa imikino birimo kuba ako kanya ari zo Sony (P1, P43 na P50), Grass Valley (LDX 80 na LDX 86), Panasonic AK-UB300 na Hitachi DH-H200.

Izifashishwa mu gufata amashusho bisanzwe harimo RED Epic (Dragon, Helium na Monstro), ARRI Alexa Mini, Sony (F55 na Venice) ndetse na Panasonic Varicam.

Ubwoko bwa 'Lens' buzajyana n'izi camera ni Fujinon HA13x4.5, Canon HJ14ex4.3, Angénieux Optimo Rouge na 14-40mm.

‘Spider Camera’ isanzwe ikoreshwa muri shampiyona zikomeye zo ku mugabane w’Iburayi zirimo English Premier League na Bundesliga.

Muri shampiyona y’u Bwongereza yakoreshejwe bwa mbere muri 2018 ku mukino Manchester United yanganyijemo na Liverpool 0-0.

Ikoreshwa no mu yandi marushanwa arimo UEFA Champions League, igikombe cy’Isi ndetse no mu yindi mikino nka Rugby, Tennis n’iteramakofe.

Iyi Camera kandi ikoreshwa no mu bikorwa by’imyidagaduro nk’aho yigeze gukoreshwa mu birori bya MTV Video Music Awards.

Spider Camera yakoreshejwe ku mukino wa APR FC na Rayon Sports