Author: webrwanda

Ibi byavuzwe na bamwe mu babyeyi basuye iri shuri ku wa 22 Werurwe 2025, biturutse ku mahirwe yari yashyizweho ku bifuza kurisura bose. Ababyeyi n'abana barisuye batemberejwe ibice bitandukanye ndetse basobanurirwa imikorere yaryo.

Umwe mu babyeyi basuye iri shuri, Nkuranga Alphonse, yabwiye IGIHE ko icyo yakunze ari uko rifite uburezi bwibanda ku munyeshuri ku giti cye (Student centered Learning).

Muri ubu buryo bwo kwigisha, umunyeshuri ahabwa umwanya w'ingenzi mu myigire.

Ni we ugaragaza uruhare runini mu kumenya, gutekereza no gukemura ibibazo, mu gihe umwarimu amufasha akamuyobora kandi akamuha ibikoresho bikenewe kugira ngo yige neza.

Nkuranga yakomeje avuga ko ikindi gishya yabonye muri iri shuri, ari uburyo abana badahabwa amasomo yo mu ishuri gusa ahubwo bagira n'ubundi bumenyi ku ruhande, nko kudoda n'ibijyanye n'imideli, ubugeni burimo gushushanya, kubaza n'ibindi.

Nkuranga yavuze ko iri shuri riri ku rwego rwo hejuru, asaba abandi babyeyi kuzaza bakihera ijisho.

Yagize ati 'Icyo nasaba ababyeyi ni ukuza kwirebera ndetse bakazana n'abana babo, buriya wahageze ugakunda ibyaho bituma utekereza ku buryo umwana wawe na we yahagera.'
Umuyobozi wa Ntare Louisenlund, Damien Paul Vassallo, yavuze ko gushyiraho umunsi nk'uyu, ababyeyi n'abana bajya gusura ishuri, bibaha amahirwe yo gushira amatsiko, bakandikisha abana bazi neza ibyo ishuri ritanga.

Yakomeje avuga ko yizeye ubushobozi bw'ishuri ayobora ndetse ko bakora ibishoboka byose kugira ngo abanyeshuri babone ubumenyi bwose bakenera.

Yagize ati 'Nizera ko abanyeshuri biga muri Ntare Louisenlund babona ubumenyi bwiza bushoboka, buzabafasha kugera ku ntego n'inzozi zabo z'ahazaza, niba hari utabyizeye azaze yirebere.'

Ntare Louisenlund, ni ishuri ryatangiye mu 2024. Kugeza ubu rifite abanyeshuri bakabakaba 140.

Ryubatswe ku gitekerezo cy'abanyeshuri bize mu ishuri ryisumbuye rya Ntare School ryo muri Uganda barimo Perezida Paul Kagame na Perezida Yoweri Kaguta Museveni uyobora Uganda.

Ni ishuri riha amahirwe impano z'abana izo ari zose haba mu bijyanye n'imyitozo ngororamubiri kuko rifite ibibuga birimo icy'umupira w'amaguru, Basketball, cricket, volleyball n'ibindi.

Si ibyo gusa kuko haba n'amashuri yigisha ibijyanye n'ubudozi no guhanga imideli, gushushanya no gukora ibintu binyuranye mu mbaho nk'imitako, imikino ya karate, kubyina ndetse n'abakunda imikino yo koga ntibasigaye.

Iri shuri ryubatswe mu Mudugudu wa Musagara, Akagari ka Kanazi mu Murenge wa Nyamata, Akarere ka Bugesera.

Niba ushaka kwiyandikisha kwiga muri iri shuri kanda hano.

Ntare Louisenlund School ni ishuri ryigwamo n’abana b'abahanga bahize abandi

Ntare Louisenlund iri mu mashuri yubatse mu buryo bugezweho mu Rwanda

Abana basuye iki kigo bahawe n’umwanya wo kwidagadura

Mu masomo atangwa muri NLS harimo ajyanye na mudasobwa n’ikoranabuhanga

Abanyeshuri bakina Volleyball nabo ntibasigaye

Ababyeyi basuye iri shuri beretswe ndetse banasobanurirwa uko abanyeshuri biga

Ababyeyi basobanuriwe imikorere y’iki kigo

Abanyeshuri bahabwa ibiryo bitekanywe isuku

Abanyeshuri bakunda Karate nabo bashyizwe igorora

Habayeho umwanya wo gusangira ibitekerezo hagati y’ababyeyi, abayobozi ndetse n’abanyeshuri

Abanyeshuri ba NLS bakora imitako inyuranye mu mbaho

Abana nabo bahawe umwanya babaza ibibazo byose bifuza kumenya kugira ngo bahabwe amahirwe yo kwiga muri iri shuri

Iki gikorwa cyitabiriwe n’ababyeyi baturutse hirya no hino bifuza kurerera muri iri shuri

Abanyeshuri basobanuriye ababyeyi uko biga

Mu masaha atari ayo kwiga amasomo asanzwe, abana bashobora kujya kwiga ibijyanye n’ubudozi kuko iri shuri rifite ibikoresho byose nkenerwa

NLS ifite uburyo bw'imyigire bugezweho

NLS ni ishuri rishyira imbere ibijyanye n'imibereho y'abanyeshuri ndetse ahafatirwa amafunguro hateguwe neza

Umwe mu babyeyi basuye iri shuri, Nkuranga Alphonse, yavuze ko icyo yarikundiye cyane ari uko rifite uburezi bwibanda ku munyeshuri ku giti cye

Umunyeshuri asobanurira ababyeyi uburyo biga NLS

Umuyobozi wa Ntare Louisenlund School, Damien Paul Vassallo, asobanurira ababyeyi uburyo ishuri ryigishamo

AYuTe Africa Challenge ni amarushanwa agamije kuzamura ibitekerezo n'imishinga byateza imbere urwego rw'ubuhinzi. Ategurwa n'Umuryango Heifer International.

Aya marushanwa ni amahirwe yashyiriweho urubyiruko rwifuza gukora ishoramari mu Rwanda, kugira ngo barusheho kunguka ubumenyi mu buryo bw'imikorere, ndetse bahabwe ibihembo nk'inkunga ibafasha kuzamura.

Mu 2023 ni bwo hatangijwe gahunda za AYuTe Africa NextGen zitegurwa na Heifer International, hagamijwe gushyigikira abashoramari bakoresha ikoranabuhanga mu buhinzi, bafite ibisubizo byafasha abahinzi bakiri ku rwego rwo hasi kuzamuka.

Mu 2025, hazatangwa ibihembo bingana na miliyoni 50 Frw, hakaziyongeraho ubujyanama n'amahugurwa ku bucuruzi, amahirwe yo guhuzwa n'abandi bahanga mu nzego z'ubukungu, bizabafasha kunguka byinshi ku buhinzi bushingiye ku ikoranabuhanga, n'iterambere ryabo rigashyigikirwa.

Abantu 10 batoranyijwe muri aya mahugurwa, bavuye mu bigo birenga 500. Biteganjijwe ko bazunguka ubumenyi buhambaye binyuze mu mahugurwa bazahabwa n'abahanga, bakanoza imishinga yabo kandi bagakorera hamwe.

Kayitare Gisa Patrick, ubarizwa muri Eco Green House akaba umwe mu batoranyijwe yagize ati “Ndi hano mu mwiherero kuko nifuza gutera imbere biruseho. Iyi gahunda izadufasha gutanga umusanzu ku gihugu no gufasha abahinzi benshi.'

Akomeza ati 'Intego yacu ni ukwaguka tukagera ku rwego ruhambaye mu bucuruzi no kuba ingirakamaro mu bikorwa by'ubuhinzi'.

Sabina Marie Rose wo muri Green Energy Technology, we yavuze ko amahugurwa barimo azamufasha kunoza neza igitekerezo cy'umushinga we.

Ati “Muri aya mahugurwa, nizeye ko nziga byinshi nkahura n'abantu nakwigiraho kunonosora ibitekerezo byanjye, no guhura n'abandi bashoramari tukaganira ibyaduteza imbere.'

Umuyobozi wa Heifer Rwanda, Verena Ruzibuka, yashimangiye ko uyu muryango ugira uruhare mu guhindura urwego rw'ubuhinzi mu Rwanda.

Ati “Muri Heifer Rwanda, twemera ko abashoramari b'urubyiruko bashobora kugira uruhare runini mu guhindura urwego rw'ubuhinzi mu Rwanda.'

Verena Ruzibuka ati “Aya mahugurwa ntabwo ari ugutegura irushanwa gusa. Ahubwo ni uburyo bwo guha urubyiruko ubumenyi, ubunararibonye, n'inkunga bikenewe kugira ngo bahangane n'impinduka mu rwego rw'ubuhinzi. Tuzishimira ibitekerezo bishya bizavamo n'uruhare bizagira mu guteza imbere ubuhinzi burambye n'ubukungu bufatika mu Rwanda.”

Ubuhinzi ni umusingi w'ubukungu mu Rwanda, kuko buha akazi abarenga 60% ariko umubare w'urubyiruko muri iyi ngeri ruracyari ruto cyane.

Iri rushanwa rigamije gushishikariza urubyiruko kumva ko ubuhinzi ari inzira y'amahirwe n'iterambere. Rigamije kandi gushishikariza abashoramari bakeneye ikoranabuhanga mu buhinzi burambye.

Urubyiruko ruri guhugurwa rwizeye ko ruzarushaho kunoza ibitekerezo byabo

Kizaba ku wa 17 Gicurasi 2025 mu Mujyi wa Kampala mu gihugu cya Uganda. Ni igitaramo cyihariye mu rugendo rw'uyu muhanzi, kuko azaba agiye kongera gutaramira mu gihugu yabayemo igihe kinini n'umubyeyi we banyuranye mu buzima. 

Ubwo ku wa 1 Mutarama 2025, The Ben yataramiraga Abanya-Kigali mu gitaramo yahuje no kumurika Album ye yise 'Plenty Love' yavuze ko afite urwibutso kuri Uganda, kuko ari igihugu cy'amavuko kuri we, kandi cyabaye inzira yo kubaho no kwigira hamwe n'umuryango we. 

Mu bihe bitandukanye yagiye ataramira muri iki gihugu, ndetse ibihumbi by'abantu bakamwereka ko bamushyigikiye. Yifashishije konti ye ya Instagram ku mugoroba wo kuri uyu wa Mbere tariki 24 Werurwe 2025, Fred uri gutegura igitaramo cya The Ben yashimye Perezidansi ya Uganda ku bw'ubufasha yabahaye mu gutegura igitaramo cya The Ben, kizaba tariki 17 Gicurasi 2025.

Uyu mugabo yagaragaje ko iki gitaramo kiri mu ruhererekane rw'ibyo The Ben ari gukora bigamije kumenyekanisha Album ye yise 'Plenty Love' iriho indirimbo 12 aherutse gushyira ku isoko.

Yavuze ko Perezida Museveni azaba ariwe mushyitsi w'icyubahiro muri iki gitaramo, kandi agisobanura nk'umwanya wo kuzishimira imico y'ibihugu byombi.

Avuga ko bafite ishimwe rikomeye kuri we, kuko yanabateye inkunga mu bifatika. Ati 'Turishimye cyane kandi tuboneyeho umwanya wo gutanga ishimwe ryimbitse kuri Perezidansi ya Uganda, by'umwihariko Nyakubahwa Perezida Yoweri Museveni, ku nkunga y'amafaranga yatanze kugira ngo tugere ku gitaramo cyacu cyiswe 'Plenty Love World Tour' cya The Ben.

Arakomeza ati 'Iki gitaramo kizabera muri Kampala Serena Hotel ku itariki ya 17 Gicurasi 2025. Twatewe ishema n'uko Perezida Museveni yemeye ubutumire bwacu ndetse akazaba umushyitsi mukuru muri iki gikorwa cy'icyubahiro.'

Yungamo ati 'Dushyizeho umwete, tubashimira Nyakubahwa Perezida, ku bwo gushyigikira iterambere ry'ubuhanzi n'umuco muri Uganda. Ni ikimenyetso cy'ubuyobozi bwanyu bufite icyerekezo n'ukwitangira iterambere ry'ubuhanzi. Turashimira byimazeyo, kandi dutegerezanyije amatsiko igitaramo kidasanzwe!

The Ben aherutse mu bitaramo mu Bubuligi, mu Budage ndetse n'ahandi. Anafite n'ibindi bitaramo azakorera mu bihugu birimo Leta Zunze Ubumwe za Amerika, Australia n'ahandi hose agamije kumenyekanisha iyi Album ye.

Agiye gukora ibi bitaramo anagamije kwegera abafana n'abakunzi b'umuziki we, ndetse agaragaza ko azabihuza no gukora zimwe mu ndirimbo ze nshya.

 

Ubutumwa bwa Fred bugaragaza ko bishimiye inkunga y'amafaranga bahawe na Perezida Museveni mu gutegura igitaramo cya The Ben

The Ben aherutse gutangaza ko yiteguye gutanga ibyishimo muri iki gitaramo kizabera muri Kampala Serena Hotel, ku wa 17 Gicurasi 2025

Fred yatangaje ko iki gitaramo kizaba umwanya mwiza wo guhuza abanyarwanda n'abanya-Uganda
Mu bihe bitandukanye, The Ben yumvikanishije ko Uganda ari igihugu cye cy'amavuko
Perezida Museveni yahawe ubutumire bw'icyubahiro mu gitaramo cya The Ben
 

KANDA HANO UBASHE KUMVA  ALBUM 'PLENTY LOVE' YA THE BEN

Mu itanganzo rigenewe abanyamakuru ryasohotse kuri uyu wa Mbere tariki 24 Werurwe 2025, bagaragaza ko kizaba ku wa 7 Mata 2025 mu nyubako ya Accra Arena, ku munsi u Rwanda n'Abanyarwanda bazatangiriraho icyumweru cyo kwibuka ku nshuro ya 31 Jenoside yakorewe Abatutsi mu 1994. 

Mu ntangiriro za Werurwe, abayobozi mu nzego zinyuranye z'u Rwanda bamaganye iki gitaramo cyane, kuko tariki ya 7 Mata ari itariki itangiriraho Icyumweru cyo Kwibuka Jenoside yakorewe Abatutsi. Gusa abategura iki gitaramo, barimo Gims na Youssoupha, batangaje ko bahisemo iyo tariki bidashingiye ku cyemezo cya Politiki.

Nubwo hari impaka n'ibyifuzo byo ku cyegeza imbere byatanzwe n'abayobozi b'u Rwanda ndetse n'u Bufaransa, abategura iki gitaramo bashimangiye ko kizaba tariki 7 Mata 2025. Mu itangazo ryabo bagize bati 'Solidarité Congo izaba tariki 7 Mata.'

Nubwo bagiye batekereza kugishyira inyuma, abateguye iki gitaramo bavuga ko itariki yatoranyijwe bitewe n'uko ari yo abahanzi n'aho kizabera babonaga bibashobokeye cyangwa se biboroheye.

Umuyobozi wa Sony Music Francophone Africa, Elvis Adidiema, yagize ati 'Twese twemeranyije ko bitari ubushake bwacu, kandi iki gikorwa kigamije gufasha abakene. Twiteguye kuganira n'amashyirahamwe afite impungenge ku gitaramo.”

Abategura igitaramo bavuga ko kigamije 'gutanga ubutumwa bw'amahoro'. Bagaragaje ko Perezida wa RDC n'uwa Rwanda bagiranye ibiganiro i Doha, bityo kugumana iyi tariki bifite icyo bisobanura mu buryo bwa Politiki.

Mu ntangiriro za Werurwe, Ambasaderi w'u Rwanda mu Bufaransa, François Nkulikiyimfura, yavuze ko guhitamo iyi tariki ari 'igikorwa kibabaje cyane.'

UNICEF, Ishami ry'Umuryango w'Abibumbye rishinzwe uburenganzira bw'abana, ryari ryaremeye gufatanya n'abategura iki gitaramo, ryatangaje ko ryisubiyeho rivamo.

Icyo gihe, UNICEF yatangaje ko itacyifatanyije n'igitaramo cyateguwe na Gims, umuhanzi uzwiho amagambo ashishikariza urwango, cyane cyane ubwo yavugaga ngo 'Ntabwo ushobora guhosha umutsi w'Umututsi ukoresheje umutobe w''icunga.'

Abategura iki gitaramo bo bavuze ko amafaranga azakusanywa azahabwa imiryango ifasha abatishoboye i Goma, ndetse n'ishyirahamwe 'Give Back Charity' ry'umuhanzi Dadju- Uyu yageragejwe igihe kinini gutaramira mu Rwanda arabyanga.

Nubwo bimeze gutya ariko, muryango 'Rwandans in France', wasabye ko iki gitaramo gihagarikwa, uvuga ko Gims ari umuntu 'uzwiho amagambo ashishikariza urwango.'

RFI yanditse ko kubera impamvu z'umutekano, uyu muryango wasabye Polisi ya Paris ko yahagarika iki gitaramo. 

Umwunganizi mu mategeko Me Gisagara, uhagarariye umuryango w'Abanyarwanda baba mu Bufaransa, yagize ati 'Gushyigikira abagizweho ingaruka n'iyi ntambara ni igikorwa cyiza twese dushyigikiye. Ariko ntitwemerera ko gikoreshejwe mu gukwirakwiza urwango n'ubugizi bwa nabi ku Batutsi. Ntituzabyemera na rimwe.'

Gandhi Alimasi Djuna uzwi nka Maître Gims yumvikanisha ko bateguye iki gitaramo bidashingiye kuri Politiki- Uyu muhanzi ariko azwiho kwanga Abatutsi, ndetse mu bihe bitandukanye yumvikanye abiba amacukubiri

Youssoupha ari mu bahanzi bifatanyije na Maître Gims mu gutegura iki gitaramo bahuje n'umunsi mpuzamahanga wo Kwibuka Jenoside yakorewe Abatutsi mu 1994

 Ku wa 13 Werurwe 2025, Ishami ry'Umuryango w'Abibumbye ryita ku bana, UNICEF, riherutse gusaba ko iki gitaramo Maître Gims ari gutegura gisubikwa

Abo baturage basanzwe bakora ubuhinzi mu nkengero za Pariki ya Nyungwe bavuga ko guhindura bakahahinga icyayi babibona nk'igisubizo kuko gitanga umusaruro kandi kikaba kitonwa n'inyamaswa.

Ntahobatangejeje Francine utuye mu Murenge wa Bweyeye, yavuze ko imyaka yose bahinga inyamaswa zidasiba kuyona bigatuma nta musaruro ufatika babona.

Ati 'Turahinga inyamaswa zikatwonera. Zigera mu murima zigasarura tukabura icyo dukuramo. Zigera mu mirima y'ibijumba n'imyumbati byose zigakura, twahinga ibigori n'ibishyimbo na byo zikabyona tukabura ikintu dusarura.'

Undi muturage yagize ati 'Twabonye baramutse badushyiriyeho icyayi kuko inyamaswa zitacyona, byatuma ziguma muri pariki aho kugira ngo zize kurya imyaka y'abaturage.'

Abo baturage bavuga ko imyaka ibaye itatu bagaragaje icyifuzo cyo guhinga icyayi ndetse babyemererwa n'ubuyobozi ariko kugeza ubu nta kirakorwa.

Umuyobozi w'ishami ry'imiyoborere mu Karere ka Rusizi, Munyurwa Innocent Patrick, yabwiye RBA ko ako Karere gafite gahunda yo kubashakira umushoramari ubafasha guhinga icyo cyayi.

Ati 'Akarere gafite gahunda yo kubashakira umushoramari ushobora kuza agahinga icyayi ku mukandara wa Pariki ya Nyungwe kubera ko inyamaswa zitacyona kandi kibaka ari igihingwa ngengabukungu gishobora kubabyarira amafaranga kurushaho.'

Pariki y'Igihugu ya Nyungwe ikora ku turere twa Rusizi na Nyamasheke mu Ntara y'Iburengerazuba no ku turere twa Nyamagabe na Nyaruguru mu Ntara y'Amajyepfo.

Abaturiye Pariki ya Nyungwe i Rusizi barifuza guhinga icyayi kuko ari cyo kitonwa n'inyamaswa ziyibamo

Dian Fossey yavukiye i San Francisco muri California mu 1932. Yaje gukura ari umuhanga ndetse akunda inyamaswa, kugeza ubwo ava mu ishuri ry'ibijyanye n'ubucuruzi yari yahitiwemo na se, agakomereza mu bijyanye n'inyamaswa maze abona impamyabushobozi mu buvuzi bw'amatungo.

Mu 1963 Dian Fossey yatangiye urugendo muri Afurika, aho yafashe amafaranga yabitse, asaba n'inguzanyo mu mabanki, atangira kuzenguruka muri pariki nyinshi zo muri Afurika, harimo n'iy'ibirunga.

Mu 1966 ni bwo yavuye muri Kenya yerekeza mu birunga gukora ubushakashatsi ku ngagi, agendeye ku bwari bwakozwe n'abashakashatsi b'Abanyamerika. Yahise yubaka inzu mu birunga ngo abane n'izi ngagi yakundaga. Yaje kuvumbura byinshi bikigenderwaho uyu munsi, birimo ibyo zikunda kurya, uko zibana mu miryango ndetse n'ibijyanye n'amarangamutima yazo.

Mu gitondo cya tariki 27 Ukuboza 1985 ni bwo Dian Fossey yasanzwe mu nzu ye yitabye Imana azize urupfu benshi bakibazaho na magingo aya.

Reba iyi video umenye byinshi ku rupfu rwa Dian Fossey n'impamvu rukiri urujijo

Ibyo bituma hari abibaza uburyo ibyo bikorwa ngo ifu iboneke n'igihe bifata dore ko kwinika imyumbati mu buryo busanzwe bitwara iminsi kuva kuri itatu utabariyemo ibyo kuyanika no kuyisekura cyangwa kuyishesha kugira ngo ivemo ifu.

Imirimo yo gutunganya imyumbati mu ruganda rwa Kinazi yahaye akazi abarenga 100 bakora imbere mu ruganda, ifasha abahinzi b'imyumbati kubona isoko rifatika ry'umusaruro wabo.

Uruganda rufite ubushobozi bwo gutunganya toni 120 z'imyumbati ku munsi zikavamo toni 30 z'ifu y'ubugari. Rufite abakozi 125 barimo abakora buri munsi n'abandi bakora basimburana bitewe n'imiterere y'akazi.

Rwahaye akazi koperative irimo abakozi 200 barufasha gutonora imyumbati mu gihe bitakozwe n'imashini.

Ubuyobozi bwarwo busobanura uburyo imyumbati itunganywa kuva ari mibisi kugeza ibaye ifu itekwamo ubugari n'uburyo ibyo byose bikorwa mu kanya nk'ako guhumbya.

Umuyobozi ushinzwe umusaruro, Niyigena Félix, aherutse kubwira IGIHE ko urugendo rwo gutunganya ifu y'ubugari rutangirira mu kwakira imyumbati abahinzi baba bazanye.

Hakurikiraho kuyitoranya, harebwa niba nta myumbati iboze irimo, niba yeze koko, niba nta bindi bivanzemo nk'ibiti cyangwa amabuye.

Ibyo iyo bamaze kubireba bapima uburemere bwayo n'andi makuru ayerekeye bakabyandika ubundi igatangira gutunganywa

Urugendo rwo kuyitunganya ngo ivemo ifu y'ubugari rutangirira mu kuyitonora aho hakoreshwa imashini cyangwa igatonozwa intoki ikanasukurwa.

Ati 'Hakurikiraho kuyironga tugakuraho imyanda ariko dukoresha amazi na yo atunganyije. Hakurikiraho kuyitoranya tugakuramo ubundi busembwa tutari twabonye mbere idatonoye nk'iboze cyangwa iriho igiti tukabikuramo'.

Imyumbati imaze gusukurwa inyuzwa ahari abakozi bashinzwe gukuramo iminini bakayicamo uduce ku buryo ibasha kwinjira mu mashini na yo iba igiye kuyicamo uduto nibura kamwe gafite santimetero eshanu.

Hahita hakurikiraho igice cyo kwinjira mu rusyo aho ya myumbati iva yabaye igikoma kigiye gukomeza urundi rugendo.

Ati 'Twa duce ni two duhita tujya mu rusyo ruba rufite amenyo, imyumbati igenda yikubaho hejuru hamanuka amazi bikivanga noneho hakaba harimo akayunguruzo gatuma hagenda icyo gikoma hagasigara imizi hejuru'.

Yakomeje avuga ko icyo gikoma kiba gifite ubuhehere ku kigero cya 80% by'amazi ku buryo kiba kidafashe noneho kigahita gishyirwa mu kigega cyo kwinikamo kimaramo amasaha 12.

Niyigena yakomeje asobanura icyo ayo masaha 12 afasha mu rugendo rwo gutegura ifu y'ubugari.

Ati 'Kiba ari ikigega gipfundikiye nta mwuka winjiramo kugira ngo bwa burozi buba mu myumbati buvemo kuko imyumbati iba isanzwe irimo amazi ya 70% ikiva mu murima ariko tuba twongeyemo 10% bikaba 80% kugira ngo ibidakenewe byose bivemo. Ikindi ayo masaha adufasha ni ubwiza bw'ubugari kugira ngo buzabe budakweduka cyane, budacika bigoranye, buryoshye kandi budasharira'.

Nyuma y'ayo masaha cya gikoma gitandukanywa na ya mazi akagendamo bwa burozi noneho hagasigara ikivuge gifite ubuhehere bwa 40% by'amazi nyuma hagakurikiraho urugendo rwo kumisha.

Iyo ayo mazi amaze kuvamo biba byabaye ibinonko by'ifu bifatanye noneho bigacishwa mu mashini ibimanyagura bigasa nk'ibibaye ifu ariko ikirimo ubuhehere itarumuka.

Iyo fu ihita ijyanwa mu yindi mashini ikoherezwamo umwuka ushyushyushye kuri dogere 140 wumisha noneho hakaboneka ifu yumutse neza ifite ubuhehere bwa 15% by'amazi.

Iyo fu yumutse yamaze kuboneka, hakurikiraho kuyinyuza ku mashini zireba niba nta kavungukira ako ari ko kose k'icyuma kaba katarukiyemo, noneho ifu igahita ikomereza mu mashini iyipakira mu mapaki mu ngano zitandukanye.

Iyi mashini ironga imyumbati mbere yo kujya mu yindi iyicamo uduce duto

Mbere yo gusya imyumbati habanza gukurwamo ubundi busembwa

Iyi mashini ifasha mu kumanyagura imyumbati

Uru ni rwo rusyo imyumbati icamo rukayisya ikanivanga n’amazi igakora igikoma

Ibi bigega ni byo byinikwamo igikoma cy’imyumbati amasaha 12 kugira ngo ivemo acide hanyuma izagire ubugari bwiza

Aho ni ho hanyura ifu igiye ku mashini iyipakira mu mapaki atandukanye

Aho habanza ni ho imyumbati ica iyo mashini ikayikuraho imizi mbere yo kwinjira mu rusyo

Aha ni ho imyumbati ibanza igahita ijya mu mashini iyironga

Imyumbati ica aha imaze kurongwa noneho abakozi bagakata iyo babona ari minini kugira ngo ikwirwe mu mashini

Aha ni ho hagenzurirwa ibipimo imyumbati yinitse igezeho

Aha hafasha mu kuyungurura ifu mu gihe itarumuka neza

Aha ni ho ifu y’ubugari ipakirirwa yamaze gutunganywa