Mu mudugudu wa Heru, Akagari ka Nyakayenzi mu Murenge wa Ngeruka mu Karere ka Bugesera, haherutse gufatirwa abagabo batanu bakurikiranyweho kubaga imbwa z'abaturanyi, inyama bakazigurisha abaturage bazita ko ari iz'impongo.
Barimo abaturuka mu mirenge ya Mareba, Ruhuha na Ngeruka.Abafashwe barimo Pascal, Jimmy, Anastase, Samuel na Innocent, bose bafite hagati y'imyaka 20 na 34 y'amavuko.
Bivugwa ko amakuru y'uko bariya bagabo babaga imbwa bibye abaturanyi cyangwa basanze zizerera hafi y'ishyamba rya Gako yatanzwe n'abaturage bari bamaze iminsi babacungira hafi.
Patrick Rwasa uyobora Umurenge wa Ngeruka avuga ko bariya bafashwe ari insoresore zitagira ahantu hazwi zituye, ariko zikorana.
Rwasa yabwiye UMUSEKE dukesha iyi inkuru ko bariya basore bafashwe ku Cyumweru, uba bakaba barashyikirijwe urwego rw'ubugenzacyaha kuko ziriya mbwa babaga bazibye, kandi ngo mu muco nyarwanda kurya imbwa ntibyemewe.
Ati:Â 'Abo twafashe twabashyikirije RIB kuka bagomba gukurikiranwaho icyaha cy'ubujura bw'amatungo ndetse wibuke ko kugurisha abantu inyama z'imbwa bakazigura bazita iz'impongo ari ubushukanyi kandi no kurya imbwa si umuco w'Abanyarwanda.'
Abajijwe niba kugeza ubu mu baziriye haba hari uwo zaguye nabi, Patrick Rwasa yavuze ko ntawe baramenya.
Yagiriye abaturage inama yo kujya bagurira inyama ahantu hizewe, bakareka kuzigurira aho babonye hose.
David Maraga, umukuru w'urukiko rw'ikirenga rwa Kenya, yasabye Perezida Uhuru Kenyatta gusesa inteko ishingamategeko kuko itarimo abadepite b'abagore bagenwa n'itegeko.
Mu ibaruwa yandikiye Bwana Kenyatta, uyu mucamanza mukuru wa Kenya yavuze ko kunanirwa gushyira abandi bagore mu nteko ari ukurenga ku biteganywa n'itegekonshinga, bikaba byafatwa nk'ivangura rikorewe abagore.
Itegekonshinga rya Kenya rivuga ko nta bantu b'igitsina kimwe bashobora kwiharira imyanya irenga bibiri bya gatatu by'imyanya yose y'abagize inteko ishingamategeko.
Ariko abagore bafite imyanya iri munsi cyane y'imyanya 116 iteganywa n'itegekonshinga, muri iyi nteko ishingamategeko ya Kenya igizwe n'abantu 350.
Bwana Maraga yandikiye Perezida Kenyatta ko inteko ishingamategeko yananiwe cyangwa yirengagije gushyira mu bikorwa itegeko rituma habaho uburinganire mu nteko, nubwo hari ibyemezo bine by'inkiko byayisabye kubikora.
Uyu mucamanza mukuru wa Kenya yongeyeho ko ubu bitumye, nk'uko abyemerewe n'amategeko, asabwa kugira inama perezida yo gusesa iyi nteko ishingamategeko.
Justin Muturi, umukuru w'inteko ishingamategeko ya Kenya, yavuze ko gusesa inteko ari ibintu bidashoboka kubishyira mu bikorwa.
Itegekonshinga rishya rya Kenya ryagiyeho mu mwaka wa 2010.
Kandi iyo ngingo y'uburinganire yuko nta bantu b'igitsina kimwe bagomba kurenga bibiri bya gatatu by'abagize inteko, yagombye kuba yarakurikijwe mu myaka itanu nyuma yuko itegekonshinga rishya ritangiye.
Nubwo hamaze igihe hari impaka kuri iyo ngingo, iyi nteko ya Kenya yiganjemo abagabo ntabwo irabona uburyo bwo kongera umubare w'abagore.
Benshi mu badepite b'abagabo bavuga ko bidakwiye guha indi myanya abagore gutyo gusa, bakavuga ko abagore bakwiye kuyiharanira binyuze mu matora.
Umucamanza David Maraga avuga ko abagore barimo gukorerwa ihezwa mu nteko ishingamategeko ya Kenya
Urukiko rwo mu gihugu cya Irani rwakatiye abasore 3 barimo uwitwa Hadi Rostami, Mehdi Sharafian na Mehdi Shahivand gucibwa intoki 4 buri wese ku kiganza cy'iburyo nyuma yo gufatwa bari kwiba.
Televiziyo mpuzamahanga ya Irani yatangaje ko aba basore 3 bakatiwe iki gihano nyuma yo gufatwa bari gukorakora.
Amategeko ya Sharia yemera ibihano birimo gucibwa ibice by'umubiri,gukubitwa inkoni no kwicishwa amabuye igihe cyose uhamwe na bimwe mu byaba bikomeye.
Iran International TV yavuze ko aba basore bakatiwe iki gihano gikomeye n'urukiko rw'ahitwa Urmia mu majyaruguru ya Iran hafi y'umupaka wa Turkia.
Ibi byaha byashyize aba basore mu mazi abira babikoze mu mwaka ushize kuwa 02 Ugushyingo bahita bajyanwa muri gereza bari bamazemo igihe.
Nubwo aba basore bagerageje kujurira,urukiko rw'ikirenga rwateye utwatsi ubujurire bwabo rutegeka ko bacibwa izi ntoki.
Abaharanira uburenganzira bwa muntu muri Iran bavuga ko aba bahungu batotejwe kugira ngo bemere iki cyaha cyo kwiba batakoze.
Umwe muri aba basore, amerewe nabi nyuma yo kwikata ku kuboko mu rwego kwigaragambiriza iyi myanzuro yafatiwe.
Amategeko ya Iran avuga ko iyo umuntu afashwe bwa mbere yiba,ahanishwa gucibwa intoki 4 ku kiganza cy'iburyo.
Amakuru avuga ko aba basore bashinjwa ibyaha 4 by'ubujura mu gace ka Urmia.Abayobozi benshi bashyigikiye iki gihano cyo guca intoki abajura ngo kuko nibyo byagabanya iki cyaha.
Ni mu gihe uyu muhango wari usanzwe uhuriza abantu benshi mu Kinigi mu Majyaruguru y’u Rwanda ahaherereye izo ngagi zo mu Birunga.
Uyu muhango ugiye kuba ku nshuro ya 16 ukaba uteganyijwe kuba ku wa Kane tariki 24 Nzeri 2020 ku munsi Isi yose yahariye kuzirikana ingagi.
Kuri iyi nshuro abana 24 b’ingagi ni bo bazitwa amazina bakazayahabwa n’ababungabunga Pariki n’ibinyabuzima biyibamo barimo abaveterineri, abarinda Pariki, abayobora ba mukerarugendo, abashyitsi bihariye, n’abandi.
Bamwe mu bana b’ingagi bazahabwa amazina barimo:
Umuhungu wa Aheza
Ni ingagi y’ingabo yavutse tariki 30 Nzeri 2019, nyina akaba yitwa Aheza mu muryango wa Muhoza.
Umukobwa wa Inyungu
Ni ingagi y’ingore yavutse tariki 27 Mutarama 2020 ibyarwa n’ingagi yitwa Inyungu yo mu muryango wa Agashya.
Umuhungu wa Icyeza
Iyi ni ingagi y’ingabo yavutse tariki 17 Ukuboza 2019 ibyarwa n’iyitwa Icyeza yo mu muryango wa Igisha.
Umuhungu wa Iriba
Ni ingagi y’ingabo yavutse tariki 03 Mata 2020, ibyarwa na Iriba yo mu muryango wa Muhoza.
Umukobwa wa Inyenyeri
Iyi ngagi y’ingore yavutse tariki 27 Ukwakira 2019, ibyarwa na Inyenyeri yo mu muryango wa Agashya.
Umukobwa wa Urukerereza
Iyi ngagi y’ingore yavutse tariki 04 Kanama 2019 ibyawe na Urukerereza yo mu muryango wa Igisha.
Umukobwa wa Urwunguko
Yavutse ku itariki ya 27 Gashyantare 2020. Nyina yitwa Urwunguko ikaba ari iyo mu muryango wa Kwitonda.
Umukobwa wa Igihembo
Iyi ngagi y’ingore yavutse tariki 11 Ukwakira 2019 ibyawe na Igihembo na yo yo mu muryango wa Kwitonda.
Umwana wa Ishyaka
Iyi ngagi yavutse tariki 21 Kamena 2020 ibyawe na Ishyaka yo mu muryango wa Mutobo.
Umuhungu wa Akaramata
Yavutse ku itariki ya 12 Nzeri 2019 ibyawe n’iyitwa Akaramata na yo yo mu muryango wa Mutobo.
Umwana wa Isangano
Yavutse ku itariki 27 Gicurasi 2020 abyawe na Karamata yo mu muryango wa Pablo.
Umuhungu wa Mudakama
Iyi ngagi y’ingabo yabyawe na Mudakama tariki 11 Gicurasi 2020 ivukira mu muryango wa Urugwiro.
Umuhungu wa Pasika
Yavutse tariki 05 Nyakanga 2019 ibyarwa n’iyitwa Pasika yo mu muryango wa Mafunzo.
Umwana wa Kanama
Iyi ngagi yavutse tariki 21 Ukwakira 2019 ibyawe na Kanama yo mu muryango wa Kuryama.
Umwana wa Ubufatanye
Iyi ngagi yavutse tariki 11Gicurasi 2020 ibyawe n’iyitwa Ubufatanye yo mu muryango wa Musilikale.
Umukobwa wa Isaro
Yavutse tariki 08 Kanama 2019 ibyawe na Isaro yo mu muryango w’iyitwa Musilikale.
Umwana wa Faida
Yavutse tariki 21 Kanama 2019 ibyawe n’iyitwa Faida yo mu muryango wa Kuryama.
Umwana wa Mahirwe
Iyi ngagi iri mu zihabwa izina kuri uyu wa Kane yavutse tariki 21 Nzeri 2019 ibyawe n’iyitwa Mahirwe yo mu muryango wa Kuryama.
Mu gihugu cy' u Buhinde, umugabo uzwi nka Pannalal , yakase inda y'umugore we utwite kugira ngo arebe niba atwite umuhungu.
Umubyeyi wahohotewe muri ubu buryo afite imyaka 35 y'amavuko.
Ababyeyi b'uyu mugore wahohotewe bavuga ko umugabo we yamukase inda kubera ko yifuzaga cyane kubyara umuhungu bigatuma ashyira mu kaga ubuzima bw'umugore we.
Uyu mugabo yatawe muri yombi nyuma y'igikorwa yakoze bivugwa ko cyasigiye ibikomere bikomeye uwahohotewe nk'uko byatangajwe n'umupolisi mukuru
Iperereza kuri iri hohotera ryabaye ku wa Gatandatu tariki 19 Nzeri 2020 mu gace ka Nekpur muri Leta ya Uttar Pradesh yo mu Majyaruguru y'u Buhinde riracyakomeje nk'uko Superintendent Pravin Singh Chauhan yabitangarije ibitangazamakuru byaho.
Polisi ikomeje gushakisha byimbitse impamvu yaba yateye uyu mugabo gukora iki cyaha. Kuri ubu ntabwo hataramenyekana icyakoreshejwe mu gukata inda y'uwahohotewe.
Ababyeyi b'uwahohotewe bavuga ko uyu mugabo yageze aho kuvusha amaraso umugore we kubera ko yari amaze kwiheba akaba yifuzaga umwana w'umuhungu cyane kuko yabonaga amaze kubyara abakobwa benshi.
Uyu mubyeyi wahohotewe umerewe nabi cyane ari kwitabwaho mu bitaro bya Bareilly, bivugwa ko yari atwite inda y'amezi arindwi.
Kugeza ubu uko umwana ameze ntibiramenyekana, gusa ibyabaye bigaragaza agasuzuguro ndetse n'ihohoterwa rikomeje gukorerwa abana b'abakobwa mu bice bimwe na bimwe by'u Buhinde.
