Author: webrwanda

Ivunika rya Fall Ngagne

Kuva Rayon Sports yavunikisha rutahizamu ukomoka mu gihugu cya Senegal Fall Ngagne ikomeje kugorwa no kubona ibitego byo kuguma guhanganira igikombe cya shampiyona iganganiye bikomeye na Mukeba wayo w'ibihe byose APR FC.

Imbaraga za Fall Ngagne ikipe ya Rayon Sports iziheruka ku mukino yanganyijemo n'Amagaju 1-1 mu mukino w'umunsi wa 18 wa shampiyona y'u Rwanda, Rwanda Premier League 2024-25, uwo mukino ukaba ari nawo warangiye Fall Ngagne avunitse nyuma yo kugwirwa n'umunyezamu w'Amagaju Kambale Kilo Dieme wari uri kugerageza gutabara ikipe ye.

Akigezwa kwa muganga, inkuru mbi yatashye muri Rayon Sports ko umukinnyi wabo agomba kubagwa imvune yagize ndetse kugira ngo ikire bikazamusaba hagati y'amezi icyenda n'atandatu, ubwo Rayon Sports iba ibwiwe mu marenga ko itazongera kumwifashisha muri uyu mwaka w'imikino.

Fall Ngagne akimara kuvunika byabaye ngombwa ko Rayon Sports yifashisha umunyarwanda Abeddy Biramahire waje muri iyi kipe y'Imana mu isoko ry'igura n'igurisha muri Mutarama, ariko kuva ku munsi wa 19 wa shampiyona kugera ku munsi wa 23 uyu rutahizamu witezweho kuzamanikira abakinnyi ba Rayon Sports igikombe cya shampiyona amaze gutsinda igitego kimwe gusa.

Kuva Fall Ngagne yavunika ikipe ya Rayon Sports n'ubwo iri ku mwanya wa kabiri biraca amarenga ko mukeba wayo APR FC ishobora kuzayishyiramo ikinyuranyo cy'amanota menshi cyane ko Rayon isigaye imanuka mu kibuga ntawuzi niba ibona igitego cy'intsinzi cyangwa ikipe bahanganye yayitanga igitego bikaba mahwane igatsindwa. Ubwo twakwibuka ukuntu yanganyije na Gasogi United n'uko yatsinzwe na Mukura VS.

Kuvunika kwa Fall Ngagne ni imwe mu mpamvu ikomeye iri gutuma Rayon Sports isigara mu rugamba rwo gushaka igikombe cya shampiyona cyane ko kubona igitego ari intambara

Mu bakinnyi habibwemo umwuka mubi

Bamwe mu bakinnyi ba Rayon Sports bari kubara ubukeye, ababonye amahirwe yo kujya mu kibuga bagakina bakaba bazi ko kongera kuyabona ari ukubikesha gusenga cyangwa ntibongere kuyabona, ibyo kandi bidatewe n'urwego rwo hasi rw'imikinire ahubwo bitewe na bimwe mu bifi binini muri Rayon Sports byajyanyemo abakinnyi ndetse ku kabi n'akeza abo bakinnyi babo bikaba ari nk'itegeko ko bagomba kubona umwanya wo gukina baba beza cyangwa abasanwe.

Iki ni kimwe mu bibazo bikomeye biri kurindimura Rayon Sports muri iyi minsi kuko bamwe mu bakinnyi ndetse bari inyenyeri mu gice cya mbere cya shampiyona, bamwe bamaze kubwirwa ko uko bakora kose batazongera kubona umwanya wo gukina mu kibuga cya Rayon Sports kuko imyanya yabo idahari nyine ubwo bayihuriraho n’aba bakinnyi bamwe baca umugani mu kinyarwanga ngo ‘Uhagarariwe n'Ingwe aravoma’.

Amakuru InyaRwanda.com ifite kandi yizeye ni uko bamwe mu bakinnyi yewe beza bari baramaze kwigarurira imitima y'abakunzi ba Rayon Sports, kugeza ubu bakaba batakibona imyanya yo gukina mu kibuga impamvu atari iyo gusubira hasi k'urwego rwabo ahubwo hari abagomba kubicaza babonetse ndetse bya byishimo batanze mu mikino ibanza ya shampiyona, hatagira igikorwa ntibyongere kugaragara ukundi cyane ko mu matwi ya bamwe bamaze guhishurirwa ko uko byagenda kose nta mwanya bafite muri Rayon Sports.

Mu gucukumbura aya makuru twibajije niba umutoza mukuru w'umunya Brazil Robeltinho atari we ufata icyemezo cya nyuma mu bakinnyi abanza mu kibuga n'abo aza gusimbuza akurikije uko umukino uri kugenda. Twabonye igisubizo gisa n'aho umutoza mukuru afite abamwivangira mu kazi akaba ari na bo bakomeje gutuma ikipe itakaza umwanya yahoranye mu mikino ibanza ya shampiyona.

'Ese Umutoza mukuru Robertinho nta bwo ariwe ufata icyemezo cya nyuma ku bakinnyi agomba gukoresha?” Igisubizo twakuye ahantu hizewe: 'Robeltinho niwe ufata icyemezo cya nyuma ariko kuva umutoza wungirije Quanane Sellami yagenda, ibintu byabaye bibi.”

Umutoza mukuru yagize abantu bamwivangiye mu nshingano bituma gufata icyemezo cy’abakinnyi bajya mu kibuga hazamo akavuyo

Ku Isoko ry'igura n'igurisha rya Mutarama

Imyitwarire ya Rayon Sports ku isoko ry'igura n'igurisha ryo muri Mutarama ni kimwe bu biri gutuma mukeba wayo APR FC ayiha ubutumwa ko ashobora gutwara igikombe cya Gatandatu cyikurikiranya cya shampiyona ikipe ya Rayon Sports idakoramo kandi mu mikino ibanza Rayon Sports ariyo yari yaraciye amarenga ko iri mu buryo bwiza bwo kwegukana igikombe cya shampiyona.

Ubwo APR FC yitwaraga neza ku isoko ry'igura n'igurisha ryo muri Mutarama ikagura abakinnyi batatu ari bo Denis Omedi, Cheik Djbril Ouattra na Hakim Kiwanuka, ubu bakomeje kuyisunika mu guhangana na Rayon Sports ndetse ubu APR FC niyo yamaze gufata umwanya wa mbere muri shampiyona y'u Rwanda.

Mu gihe Rayon Sports irangajwe imbere na Robertinho yari yigaragaje neza mu mikino ibanza ya shampiyona, umutoza yagaragarije umuyobozi abakinnyi yifuza ariko muri bo nta n'umwe yaguriwe ngo amufashe guhagarara bwuma mu rugamba rwo gushaka igikombe cya shampiyona ahubwo abo yari afite bamwe baravunitse abandi urwego rw'imikinire rusubira hasi kubera impamvu twagarutseho haruguru.

Wenda iyo ubuyobozi bwumva ibitekerezo bya Robertinho ubu nta kibazo cyo kuvunika cya Fall Ngagne kiba kiri mu ikipe kuko umutoza yari yasabye ko hakongerwamo rutahizamu ukomoka mu gihugu cya Uganda Aziz Fahad Bayo, ariko ibyo kumuzana muri Rayon Sports byarangiriye mu biganiro.

Abakinnyi Robertinho yari yasabye ubuyobozi ko bamuzanira harimo umunya Malawi Aaron Banega, Abanya Uganda batatu aribo Vincent SSekajugo ubu wifuzwa na APR FC, Brighit Anakanu na Aziz Fahad Bayo ndetse n'umunya Ghana ukinira Muhazi United Joseph Sackey kandi 80% by'abakinnyi umutoza yari yasabye byarashobokaga ko yabahabwa kuko ntabwo bari bahenze ku isoko ry'igura n'igurisha.

Ubwo isoko ry'igura n'igurisha ryari riri kugana ku musozo, abakinnyi bashya bazanywe n’ubuyobozi bwa Rayon Sports ni Biramahire Abeddy, Aduali Jalo, Assana Nah Innocent na Souleymane Daffe. Muri abo uretse Biramahire Abeddy na Souleymane Daffe babona umwanya wo gukina ariko nabo akaba batari batanga umusaruro witezwe, uwitwa Assana Nah Innocent na Adoulai Jalo ibyo kujya mu kibuga ntubibabaze.

Abakinnyi umutoza yasabye ku isoko ry’igura n’igurisha muri Mutarama sibo ubuyobozi bwamuhaye

Gutinda kubona imishahara mu bakinnyi

Ikibazo cyo kutabonera ku gihe imishahara ku bakinnyi ba Rayon Sports ni kimwe mu bikomeza kubagabanyiriza ishyaka ryo guhatanira igikombe cya shampiyona kandi ikipe igeze aho rukomeye no kuguma kureba uko abakinnyi baguma mu mwuka mwiza kandi bishimye.

Mu gihe imikino yari yarahagaze kubera icyumweru cy'icyunamo mu kwibuka abazize Jenoside yakorewe Abatutsi mu 1994, imyitozo y'amakipe yarakomeje. Mu gihe andi makipe yitoje abakinnyi ba Rayon Sports bari barafashe umwanzuro wo guhagarika imyitozo kubera kutabona imishahara yabo muri gahunda bari barise 'We Can't until we get our Salary.

Amakuru InyaRwanda ifite ni uko ku wa Gatandatu abakinnyi ba Rayon Sports bongeye gusubukura imyitozo nyuma yo guhabwa umushahara w'ukwezi kumwe mu mezi atatu yari agiye kuzura ama konti yabo atazi impumuro y'ifaranga cyangwa idorari.

Niba bigeze ubwo abakinnyi ba Rayon Sports bafata umwanzuro wo gusubika imyitozo kubera kudahabwa ibyo bemerewe ku gihe, ni ikindi kimenyetso kigaragaza ko n'ubwo iri mu myanya myiza yo guhanganira igikombe cya shampiyona, abakinnyi batiteguye neza guhangana muri urwo rugamba. Kudahemberwa ku gihe ni kimwe mu bigabanya ubwitange w’abakinnyi ba Rayon Sports

Imyitwarire idakwiye mu bakinnyi

Aho bigeze abakinnyi ba Rayon Sports bakagombye kuba bari kuvuga rumwe ndetse bakirinda amakosa ashobora gutuma ikipe iguma gutakaza amanota ya hato na hato. Buri wese afite uko yasesenguye igitego cya kabiri ikipe ya Marine FC yatsinze Rayon Sports cya kabiri cyatsinzwe na Rugirayabo Hassan nyuma yo gushotera umupira mu kibuga cya Marines Fc ariko ukisanga mu izamu rya Rayon Sports umuzamu Khadime Ndiaye awureba ndetse na Nsabimana Aimable.

Ibi ubyitegereje neza bisa n'aho Khadime Ndiaye yasabye Nsabimana Aimable kureka gukuraho umupira ngo awufate nk'umuzamu ariko bikarangira umucitse maze ukamwidundana ukajya mu izamu. Iyo ayo makosa y'ubwumvikane ataza kubaho maze Rayon Sports ikaza kubona ibitego bibiri byayo yatsindiye mu karere ka Rubavu nta kabuza iba ikiri ku mwanya wa mbere kuko yari gukura intsinzi mu karere ka Rubavu.

Ntawuzi niba Khadime Ndiaye yararetse umupira abishaka (Umukinnyi yariye) bitewe n'ibihe ikipe yari imazemo iminsi abakinnyi badahembwa cyangwa ari uko yamucitse ariko amakosa yo kutumvikana mu kibuga ku bakinnyi nabyo bikaba bimwe mu byo kwitondera ku ikipe ya Rayon Sports mu gushaka igikombe cya shampiyona.

Uretse mu kibuga, mu gihe ikipe ya Rayon Sports iri mu rugamba rwo guhatanira igikombe cya shampiyona Inyarwanda ifite amakuru ko hari bamwe mu bakinnyi ibyo bitareba ahubwo ahubwo bamaranira ibikombe byo kunyweramo inzoga no kumyenya indaya nziza iba mu mujyi wa Kigali.

Ubwumvikane bucye mu kibuga nibwo bwatumye Rayon Sports inganya umukino wa Marines Fc maze ibura umwanya wa mbere ityo

Imyizerere ya gakondo muri Rayon Sports?

Nta makuru ahagije dufite ko Rayon Sports ikoresha imyizerere y’amarozi itubaka umupira ariko abakurikiye umukino uherutse guhuza Rayon Sports na Mukura VS kuri Stade Amahoro ku itariki ya 29 Werurwe 2025, ndagira ngo mbibutse iyi nkuru.

Igice cya mbere cy'uyu mukino cyarangiye amakipe yombi anganya 0-0. Ariko hamenyekana amakuru ko hari umukinnyi wa Mukura ufite itegeko ryo kwinjira mu kibuga nyuma y'abandi bose ariko ibyo akaba atarabyubahirije ubwo umukino wari ugiye gutangira, ikaba ari nayo mpamvu icyo gice ngo kitabonetsemo igitego ku ruhande rwa Mukura.

Igice cya kabiri kigiye gutangira abari kuri Stade Amahoro babonye ikarita y'umuhondo yahawe Jordan Nzau Ndimbumba nyuma yo kutagira rimwe mu kibuga n'abakinnyi ahubwo akigira kwicara ku ntebe y'abasimbura akaba yaragiye mu kibuga Mukura imaze umunota wose iri gukinisha abakinnyi 10 gusa.

Inkuru isekeje kandi inababaje bijyanye n’amakuru yavuzwe icyo gihe, ngo ni uko Jordan Ndimbumba Nzau yari ategereje ko abakinnyi bose bajya mu kibuga maze ngo nawe aze kwinjiramo nyuma y'abandi ngo kugira ngo umuti wo gutsinda Rayon Sports ukore. 

Abafana babiganiriyeho batebya cyane bavuze ko ngo yanze kwinjira mu kibuga kubera ko Khadime Ndiaye na Omborenga Fitina bari bavumbuye ibiri kuba maze bagahagarara mu kibuga n'ukuguru kumwe, ukundi kuri hanze y'ikibuga ubwo barindiriye ko Nzau Jordan ajya mu kibuga wese wese.

Umukino ugitangira byabaye ngombwa ko Khadime Ndiaye ajya mu izamu ngo akine cyane ko yari umunyezamu kuko iyo aguma guhagarara inyuma y'umurongo byari kuba ngombwa ko bamutunguza ishoti maze bakanatsindwa. 

Omborenga Fitina nawe nk'umukinnyi ukina yugarira umukino waratangiye ibyo kurekera ikirenge kimwe hanze y'ikibuga abivamo arakina bisanzwe ubwo abakinnyi ba Rayon Sports bose baba bageze mu kibuga nyamara Nzau Ndimbumba we yari hanze yanze kujya mu kibuga.

Omborenga Fitina na Khadime Ndiaye bakimara gukandagiza amaguru yabo mu kibuga neza, Jordan Nzau Ndimbumba ntiyababajwe no kuba ahawe ikarita y'umuhondo kubera gutinda kwinjira mu kibuga ahubwo byagaragaye ko yishimye cyane ndetse umukino warangiye Samson Oradisu atsinze igitego cyatumye Mukura VS ibona amanota atatu imbere ya Rayon Sports.

Jordan Nzau Ndimbumba ngo ni we ufite mu biganza intsinzi za Mukura VS

Dr. Murangira yabitangaje mu kiganiro 'Zinduka' yagiranye na Radio/Tv10 kuri uyu wa Kabiri tariki 15 Mata 2025 cyagarutse ku byaha by’ingengabitekerezo ya Jenoside byagaragaye mu Cyumweru cy'icyunamo. 

Yavuze ko hakiriwe dosiye ku byaha by’ingengabitekerezo ya Jenoside n’ibyaha bifitanye isano nayo ndetse n’ibyaha byivangura no gukurura amacakubiri zingana na 82.

Yavuze ariko ko amadosiye y’ingengabitekerezo ya Jenoside n’ibyaha bifitanye isano nayo yo ubwayo ni 76. Ni mu gihe amadosiye y’ibyaha by’ivangura no gukurura amacakubiri yabonetse ari 6, iyo ubiteranyije biba 82. Abakekwa bose ni 87.

Mu Cyumweru cy’Icyunamo, harimo bamwe mu bantu bazwi bagaragaye ku mbuga nkoranyambaga batambutsa ubutumwa butavuzweho, aho bamwe bagaragaje ko ari ingengabitekerezo ya Jenoside babibye.

Ku wa 7 Mata 2025, Teta Sandra yanditse ubutumwa bugira buti 'Turibuka umubare munini w'Abatutsi bishwe ariko n'Abahutu n'abandi batemeranyaga na Jenoside.'

Nyuma y'amasaha make yanditse ubundi  butumwa asaba imbaazi, ati 'Ndasaba imbabazi ku butumwa bwabanje bujyanye no Kwibuka Jenoside yakorewe Abatutsi mu 1994 mu Rwanda. Nabukuye ku rubuga (website) runaka. Icyakora nifatanyije n'Abanyarwanda bose. Jenoside yakorewe Abatutsi mu 1994 ntizongere ukundi.'

Ni mu gihe Nyaxo nawe ku wa 12 Mata 2025, yasohoye ibaruwa asaba imbabazi nyuma y’uko agaragaye ku rubuga rwa Tik Tok atera urwenya kandi mu gihe cy’Icyunamo.

Yagize ati'Aka kanya nje hano gusaba imbabazi abantu mwese mwari munkurikiye kuri live nakoze ku wa 11 Mata 2025 Saa Tatu z'ijoro, kuri Tik Tok aho njye na bagenzi banjye twari kumwe tuvuga ibintu bitajyanye n'ibi bihe turimo byo Kwibuka ku nshuro ya 31 Jenoside yakorewe Abatutsi.'

Uyu munyarwenya yakomeje asaba imbabazi ati 'Nsabye imbabazi Abanyarwanda mwese muri rusange cyane cyane abo byakomerekeje, ndashishikariza urubyiruko n'ibyamamare gukoresha imbuga nkoranyambaga neza kugira ngo duhashye abapfobya Jenoside.'

Muri iki kiganiro, Dr. Murangira yavuze ko Teta Sandra yakwirakwije buriya butumwa ahantu hose. Anavuga ko ashingiye ku mbabazi Teta Sandra yasabye zitavuye ku mutima.

Ati “Urumva izo mbabazi zivuye ku mutima cyangwa ni urwiyerurutso? Ibyo byose ni isesengura rikorwa urebe icyo umuntu yabikoranye. Wabishyize kuri uru rubuga, ubishyira no kuri uru, noneho ugasanga no ku mbuga z’umugabo we (Weasel) ni ‘same posts’ (Ni ubutumwa bumwe).”

Dr. Murangira yavuze ko iyo batanga ubutumwa baba bafite icyo bahereyeho. Yavuze ko mbere y’icyunamo yari yatanze ubutumwa busaba ibyamamare kugira uruhare mu guhangana n’ingengabitekerezo ya Jenoside ‘kuko uru rugamba ari urwa buri wese’.

Ati “Iyo dutanga ubutumwa, ntabwo dutanga ubutumwa tudafite icyo duhereyeho. Muribuka dutanga ubutumwa tubwira abasitari ko mucecetse, mugire icyo mukora murwanye ingengabitekerezo ya Jenoside. Ni ukuvuga ngo tuzi ko uru rugamba ni urwa twese”.

Yavuze ko Kwibuka nta muntu ubihatirwa ‘ariko ni inshingano za buri wese’. Dr.Murangira yanavuze ko hari abantu bagerageje guhamagara Teta Sandra bamugira inama, bamubwira ko ibintu yakoze atari byo ‘yihagararaho’. Ati ‘Niko mbyumva’. Niko abyumva’, akomeza ati “Ni ukuvuga ngo ibyo ni ibyaha.”

Abajijwe ku byo Nyaxo yakoze ku rubuga rwe rwa Tik Tok n’imbabazi yasabye, Dr. Murangira yavuze ko baganirije Nyaxo ariko kandi hari “ibikorwa bitareberwa mu mategeko bidashobora n’uko wabihuza n’itegeko ariko nakwita (ibikorwa by’ububwa).

Ati “Usanga umuntu utekereza atagakwiye kuba abikora’. Akomeza ati “Twarabiganiriye, avuga ko yahubutse. Ni ukuvuga ngo ni ugukora ikintu mu mwanya utari wo. Kutamenya ko tutagomba gutera urwenya.”

Dr Murangira yatangaje ko abantu baganirije Teta Sandra bamubwira ko ibyo yakoze atari byo, asubiza ko ariko abyumva

Dr Murangira wa RIB yavuze ko Nyaxo yaganirijwe, ababwira ko yahubutse 

Ubwo Umuvugizi w’Urwego rw’Igihugu rw’Ubugenzacyaha (RIB), Dr. Murangira yari mu kiganiro kuri Radio/Tv10

Yabigarutseho mu kiganiro yagiranye na Radio/Tv10 kuri uyu wa Kabiri tariki 15 Mata 2025, agaruka mu buryo burambuye ku byaha by’ingengabitekerezo ya Jenoside byagaragaye mu Cyumweru cy’Icyunamo kuva tariki 7 Mata kugeza tariki 13 Mata 2025.

Dr. Murangira yavuze ko Kwibuka ari inshingano za buri munyarwanda ariko 'ntawe ubihatirwa'. Avuga ko mu gihe cyo kwibuka hari Dj w’umunyarwanda wagiye muri Uganda acurangirayo, nyuma asakaza ku mbuga nkoranyambaga ze agaragaza ko yahagiriye ibihe byiza.

Ati “Iyo ugenda ugacuranga ntakibazo. Ariko gufata (amashusho) werekana ko warimo ucuranga wishimisha (usepera) kwa kundi kwabo akabishyira ku mbuga azi ko akurikirwaho n’abanyarwanda, hari abo yakomerekeje. Nacyo ni igikorwa cy’ububwa.”

Dr. Murangira yavuze ko buri munyarwanda wese akwiye kugira uruhare mu kubaka u Rwanda ruzira ingengabitekerezo ya Jenoside, imvugo zikurura amacakubiri n’ibindi. Ati “Ni twebwe bifitiye inyungu kurusha undi wese uri hanze.”

Akomeza ati “Niba rero wumva ngo mu kwa Kane (Mata) kuko ngo mu Rwanda nta hantu bari gucuranga ugasimbuka hariya, wakumva hano ngo ibitaramo biraje ukongera ukagaruka, biragayitse.”

Murangira ntiyavuze mu izina rya Dj wakoze ibi, ariko yamusabye kuzafata umwanya agasaba imbabazi Abanyarwanda.

Ati “Nubwo utabona itegeko ryamuhaka ariko biragayitse, yumve ko tumugaye. Ntabwo umuntu nk’uriya w’icyitegererezo ariwe wagakoze biriya. Bikorere iyo ng’iyo ntawe ukeneye no kubimenya. Ariko reka kubigarura ngo ubipositinge (ubishyire ku mbuga zawe) abandi bari kwibuka, barababaye, wowe uragaragaza ko uri gusepera (kwishimisha) muri ariya mafuti. Ni ibintu bigayitse. Nawe azafate umwanya asabe Abanyarwanda imbabazi.”

Yavuze ko ari ubugwari kuba umuntu yakwishimana n’Abanyarwanda akabacurangira mu bihe bisanzwe, hanyuma byagera mu gihe cyo Kwibuka akabatera umugongo.

Ati “Niba ushobora kuza hano ukishima ukavanga imiziki kuko iki gihugu kimeze neza, igihe cyo Kwibuka ntiwifatanye n'abantu wirukanke, ni ubugwari.'

  

Umuvugizi w’Urwego rw’Igihugu rw’Ubugenzacyaha RIB Dr. Murangira B. Thierry yagaye Dj wagiye gucurangira muri Uganda akanasakaza ibihe yahagiriye, mu gihe abandi bari mu bikorwa byo Kwibuka ku nshuro ya 31 Jenoside yakorewe Abatutsi

Field Marshal Birhanu Jula ari mu Rwanda mu ruzinduko rw'akazi rwatangiye ku wa 13-16 Mata 2025.

Ku wa 14 Mata 2025, yasuye Urwibutso rwa Jenoside rwa Kigali ruri ku Gisozi yunamira inzirakarengane zihashyinguye, ndetse asobanurirwa amateka arambuye ya Jenoside yakorewe Abatutsi.

Yanasuye Ingoro y'Amateka y'Urugamba rwo Guhagarika Jenoside iri mu Ngoro y'Inteko Ishinga Amategeko, asobanurirwa byinshi mu bikorwa by'Ingabo zari iza RPA zahagaritse Jenoside yakorewe Abatutsi mu 1994.

Mbere kandi yari yabanje guhura n'Umugaba Mukuru w'Ingabo z'u Rwanda, Gen Mubarakh Muganga, anaganira na Minisitiri w'Ingabo, Juvenal Marizamunda.

Itangazo rya RDF ryo ku wa 14 Mata 2025 rigaragaza ko uruzinduko rwa Field Marshal Birhanu Jula ari amahirwe yo kurushaho gushimangira ubufatanye bumaze igihe kirekire hagati y'ingabo z'impande zombi no kuganira ku mahirwe mashya y'ubufatanye ashobora kubonekamo.

Uyu muyobozi yasuye u Rwanda nyuma y'uko ku wa 13 Werurwe 2025, Umugaba Mukuru w'Ingabo z'u Rwanda Gen Mubarakh Muganga yari muri Ethiopie, mu ruzinduko rwasize hasinywe amasezerano y'ubufatanye mu bya gisirikare.

Field Marshal Birhanu Jula yageze mu Rwanda mu ruzinduko rw’iminsi ine

Yabanje kuganira na Minisitiri w’Ingabo, Marizamunda Juvenal, ku bufatanye bw’Ingabo mu bihugu byombi

Field Marshal Birhanu Jula yaganiriye n’Umugaba Mukuru w’Ingabo z’u Rwanda ku bufatanye bushya impande zombi zishobora kugirana

Field Marshal Birhanu Jula yunamiye inzirakarengane zirenga ibihumbi 250 zishyinguye mu Rwibutso rwa Jenoside rwa Kigali

Yanasobanuriwe ubutwari bw’Inkotanyi zahagaritse Jenoside

Ibi byatangajwe n'Umuyobozi ushinzwe itumanaho mu Mujyi wa Kigali, Emma Claudine Ntirenganya, nyuma y'uko Meteo Rwanda iburiye abaturage ku mvura nyinshi yitezwe.

Meteo Rwanda yatangaje ko ingaruka ziteganyijwe guterwa n'iyo mvura nyinshi, zirimo imyuzure mu bishanga no mu bibaya, inkangu, isuri n'iriduka ry'imikingo ahahanamye hatarwanyije isuri, ingaruka ziterwa n'inkuba, bityo 'ishishikariza abaturarwanda muri rusange gufata ingamba zijyanye no kwirinda ingaruka zituruka ku mvura nyinshi.”

Mu guhangana n'izi ngaruka z'ibiza bikunze kugaragara muri uku kwezi kwa Mata na Gicurasi, Umujyi wa Kigali wagiye ufata ingamba zitandukanye mu kurinda abaturage, zirimo no kwimura abaturage bagatuzwa ahantu hadashyira ubuzima bwawo mu kaga.

Umuyobozi ushinzwe itumanaho mu Mujyi wa Kigali, Emma Claudine Ntirenganya yabwiye RBA ko nyuma yo kubona amakuru yatangajwe na Meteo Rwanda avuga ko muri iyi minsi hagiye kugwa imvura nyinshi bari gukora ibishoboka byose kugira ubuzima b'abaturage bari mu manegeka butabarwe.

Yagize ati 'Meteo Rwanda yamaze gutangaza ko muri iyi minsi hagiye kugwa imvura nyinshi kandi ishobora gukomeza kwiyongera muri iyi minsi, bityo rero abantu batuye mu manegeka kuri twebwe nicyo kintu cyihutirwa kurusha ibindi kugira ngo dukize ubuzima bwabo.'

Kugeza ubu imirenge irimo uwa Kimisagara, Kigali n'uwa Gitega yo mu Karere ka Nyarugenge ni yo yibasiwe n'ibiza kurusha indi mu Mujyi wa Kigali.

Minisiteri y'Ibikorwa by'Ubutabazi, MINEMA, igaragaza ko mu 2024 mu bantu 191 bahitanywe n'ibiza.

Abaturarwanda by'umwihariko abatuye mu Mujyi wa Kigali, mu Ntara y'Amajyaruguru n'iy'Iburengerazuba ndetse no mu turere twa Nyamagabe na Nyaruguru two mu Ntara y'Amajyepfo, basabwe kwitwararika muri iyi minsi iteganyijwemo imvura nyinshi.

Benshi bahise babihuza no kuba abahabwa imirimo inyuranye mu bukwe bazajya batanga umusoro bituma bibaza byinshi, binajyanye no kuba byari biherutse kugarukwaho n'umudepite mu Nteko Ishinga Amategeko.

Iyo nyandiko ya RRA yahererekanyijwe cyane ku mbuga nkoranyambaga igaragaza ahagomba gushyirwa amakuru ajyanye n'umuntu wahawe akazi ko gutaka, abahawe akazi ko gutunganya ibyuma by'itumanaho, abahawe akazi ko gutanga ibyo kurya n'ibyo kunywa, Itorero ryasusurukije abantu ndetse n'amazina y'abageni.

Amakuru asabwa ni amazina y'uwahawe akazi, nimero za telefoni, Tin number ndetse n'izina ry'ikigo mu gihe gihari.

Umuvugizi wa RRA akaba na Komiseri Ushinzwe Abasora bato, Uwitonze Jean Paulin, yabwiye IGIHE ko nubwo iyo nyandiko iri guhererekanywa cyane ari ibintu byari bisanzwe.

Ati 'Icya mbere ni amakuru ari gusabwa, uriya ntabwo ari umusoro mushya, ni amakuru ari gusabwa abantu bo muri iki cyiciro kandi ntabwo ari amakuru mashya, ahubwo dusanzwe tuyabasaba. Kugira ngo tumenye ko abantu bakora imirimo ibyara inyungu muri kiriya cyiciro cy'ubucuruzi no gutegura ibirori bose banditswe ku musoro icyo ni icya mbere. Icya kabiri niba bishyura umusoro, bishyura umusoro ukwiriye? Ibyo ni ibintu bya mbere by'ingenzi.'

Yakomeje ashimangira ko ayo makuru yari asanzwe asabwa, atari ibintu bishya nk'uko abantu bakomeje kubigaragaza ku mbuga nkoranyambaga.

Ati 'Ikindi ni uko ariya makuru babonye asanzwe asabwa hagati y'umukozi n'umuntu ukora muri kiriya cyiciro cy'ubucuruzi. Bivuze ngo ntabwo ari ibintu bishya bije uyu munsi cyangwa ejo, kuko twagiranye inama nabo twumvikana ku makuru twajya dusangira yadufasha kuzuza inshingano zacu zo gusoresha.'

Yongeyeho ati 'Icyo tuvuga ni uko atari ibintu bishya, basanzwe baduha aya makuru. Noneho uburyo tuyakoreshamo, tuyabyaza umusaruro ni akazi kacu kandi umusaruro wo ugenda ugaragara, uko iminsi igenda ishira.'

Yavuze ko itegeko rigena uburyo bw'imisoreshereze riteganya ko umuntu wese ukora ibikorwa bibyara inyungu aba agomba gutanga umusoro nk'uko amategeko abiteganya.

Yakomeje avuga ko nk'ahandi hose, RRA iba ikeneye kubona amakuru agaragaza niba umusoro utangwa kuri ubwo bucuruzi ari wo wakabaye uboneka.

Ati 'Ni gute twakwegera abo bantu tukabaganiriza, tukabagira inama, cyangwa se niba hari n'abawunyereje tukabasaba gukosora tukawugaruza. Impamvu tugiye gukusanya amakuru ni uko dukeneye gukora ubwo busesenguzi bwose kuko hari nk'abari kuvuga ku mbuga nkoranyambaga bati ese ubwo na MC azaba arimo, kandi wajya kureba ugasanga arahembwa ibihumbi 100 Frw ushobora gusanga mu kwezi afite ibikorwa 10, ubwo urumva se atari miliyoni 1Frw. Harimo abatari banditswe, hakabamo n'abari banditswe ariko badatanga umusoro wabo neza.'

Yavuze ko amakuru ari gukusanywa ari agamije kureba abari banditse n'abatanditse, uburyo bamenyekanisha umusoro ku buryo byanozwa kurushaho.

Ati 'Niba utari wanditswe urasabwa kwiyandikisha birumvikana, niba wari wanditswe watangaga umusoro mu buryo budakwiriye urasabwa gukosora cyangwa se kujya utanga umusoro mu buryo bukwiriye.'

Mu bikorwa bishobora gusora bijyanye n'ubukwe harimo nk'ahantu ubukwe bubera, abagemura ibyo kunywa cyangwa ibyo kurya, abayobora ibirori babigize umwuga, abakora muri serivisi no kwakira abashyitsi babigize umwuga, itorero ryasusurukije abitabiriye ubukwe n'ibindi bikorwa bitandukanye.

Hazajya habaho uburyo bwo gusesengura amakuru mu rwego rwo kumenya ko abantu bakoreshejwe atari abo mu miryango y'abakoze ubukwe biturutse ku makuru bakusanyije.

RRA ifite ishami rishinzwe ubutasi n'iperereza, ku buryo ishobora kubona amakuru yose akenewe yaba ashingiye ku makuru yakusanyijwe mu buryo butandukanye.

Ubwo yari mu Nteko Ishinga Ametegeko y'u Rwanda muri Werurwe 2025, Komiseri Mukuru w'Ikigo cy'Igihugu cy'Imisoro n'Amahoro, Niwenshuti Ronald, yasobanuye ko hari ubwo bigora gukurikiranwa ariko ko hatangiye ubukangurambaga kandi butanga umusaruro.

Ati 'Turi mu bukangurambaga tubona ko buzatanga umusaruro. Tugitangira twajyaga mu bukwe bw'abantu tugashyiraho abantu bacu ukabona ko atari byiza, ariko twaje gusanga hari uburyo bwiza twabikoramo. Turabanza tukabigisha tukaganira n'abataka aho ubukwe bubera.'

Yunzemo ati 'Abinangiye turabatungura mu bukwe, n'uyu munsi birakorwa ariko tubyitwaramo neza tugashyira ku ruhande ababishizwe, kugira ngo tumenye ngo ni bande barimo kubikora. Bigenda bigaragaza ko abantu bari kubyumva bagasora.'

Hari abakora ubucuruzi bushingiye ku gutegura ubukwe batishyura imisoro

Inyandiko ya RRA igaragaza amakuru asabwa

Mu 2020 muri kimwe cya kane cya UEFA Champions League, Bayern Munich yafashe FC Barcelona ya Lionel Messi iyitsinda ibitego 8-2, nk'ibyo Manchester United ya Sir Alex Ferguson yigeze gukorera Arsenal ya Arsene Wenger mu 2011.

Ariko iyi mikino ibiri y’amateka izwi ko yabonetsemo ibitego byinshi nta nubwo yegereye habe na gato umukino w'umupira w'amaguru ufite agahigo ko kubonekamo ibitego byinshi, dore ko Guinness Book of Records yabyemeje.

Tariki 31 Ukwakira mu 2002, muri Madagascar habereye isanganya mu mupira w'amaguru, ikipe yitwa SO l'Emyrne itsindwa na AS Adema ibitego 149 ku busa, kuva icyo gihe kugeza uyu munsi aya makipe aba aciye agahigo.

Byagenze bite? Ubwo barimo bakina imikino ya Playoffs cyangwa se kamarampaka, SO l'Emryne yanganyije n’iyitwa DSA Antananarivo ibitego 3-3, ariko byatewe na penariti yo ku munota wa nyuma yahawe DSA Antananarivo byatumye SO l'Emryne ihita iva no ku gikombe.

Iyi kipe itarigeze yemera uko imisifurire yagenze kuri uwo mukino, yagiye gukina na AS Adema yafashe umwanzuro wo kugaragaza ko itishimiye imisifurire, mbese ihitamo kwigaragambya.

Umusifuzi agihuha mu ifirimbi, abakinnyi ba SO l'Emyrne bahitaga bahererekanya umupira mpaka bitsinze igitego. Ibyo babikoraga buri uko umusifuzi yabaga asifuye ngo batangize umupira, birangira bitsinze ibitego 149 ku busa.

Nyuma y'uyu mukino, ishyirahamwe ry'umupira w'amaguru muri Madagascar ryahagaritse umutoza w'iyi kipe, ndetse n'abandi bakinnyi batatu bari bayoboye iyi myigaragambyo.

Mbere y’uyu mukino, umukino wari ufite agahigo ko kubonekamo ibitego byinshi wari uwo muri Scotland aho Arbroath FC yatsinze Bon Accord ibitego 36-0 mu mukino wabaye tariki 12 Nzeri 1885.

Ubusanzwe, yitwa Tyla Laura Seethal ariko yamamaye mu muziki nka Tyla. Yamenyekanye cyane mu njyana ya Afrobeats, aho ibikorwa bye byagiye bigira ingaruka zikomeye mu kugaragaza ubuhanga bwa muzika ya Afurika ku rwego mpuzamahanga. Uyu mukobwa yabonye izuba ku ya 30 Mutarama mu 2002, avukira i Johannesburg muri Afurika y’Epfo.

1. Afite inkomoko muri Afurika y'Epfo

Tyla yavukiye muri Afurika y'Epfo, igihugu kizwi cyane ku rwego rw'isi kubera kugira impano nyinshi mu muziki. Afurika y'Epfo ni igihugu cyagize uruhare runini mu kugaragaza umuziki wa Afrobeats ku isoko mpuzamahanga. Abahanzi bakomoka muri iki gihugu nka Black Coffee, Sho Madjozi, na Master KG bamaze kugera kure, kandi Tyla akomeje gutera intambwe mu yabo.

2. Yatangiye umuziki akiri muto

Tyla yatangiye kwandika indirimbo no kuziririmba akiri umwana muto. Ababyeyi be baramushyigikiye cyane bamufasha gukurana icyizere cyo kuzavamo umuhanzi w’umwuga, ndetse kugeza n’ubu umuryango we uracyakomeje kumutera ingabo mu bitugu.

3. Indirimbo “Water” yamuhesheje izina rikomeye

Mu mwaka wa 2023, Tyla yasohoye indirimbo “Water,” ihita imenyekana mu gihe gito ku mbuga nkoranyambaga, ku maradiyo, ndetse no ku mbuga zose zinyuzwaho umuziki nka Spotify n’izindi nyinshi. 

Iyi ndirimbo niyo yamuhesheje izina rikomeye, kuko yamenyekanye cyane mu bihugu bitandukanye. Yamugejeje mu myanya ya mbere ku rutonde rwa Billboard Hot 100. Ibi byatumye Tyla aba umuhanzikazi wa mbere wo muri Afurika y’Epfo ugezweho kuri Billboard kuva kuri Miriam Makena. Iyi ndirimbo yagize uruhare rukomeye mu kugaragaza ko Tyla ari umwe mu bahanzi bakiri bato bafite ubushobozi bwo guhatana ku isoko ry'umuziki mpuzamahanga.

4. Yasinyanye amasezerano n’inzu itunganya umuziki ya Epic Records

Tyla uri mu bahanzi b'imena mu njyana ya Afrobeats, mu 2021 yasinyanye na Epic Records, imwe mu nzu zikomeye zitunganya umuziki ku Isi. Ni yo iri inyuma bye byinshi byamenyekanye cyane.

5. Umuziki we uhuriza hamwe injyana zinyuranye zirimo Amapiano, Pop na R&B

Tyla ni umwe mu bahanzi bashya bafite umwihariko wo guhuza injyana zitandukanye nyafurika nk’Amapiano na Afroabeats n’izindi zikomeye ku ruhando mpuzamahanga nka Pop, R&B n’izindi. Ibi byose ni ibituma ibihangano bye byumvikanamo uburyohe bwihariye bw’umuziki wa Afurika.

6. Afite umubare munini w'abafana ku mbuga nkoranyambaga ndetse yatangiriye umuziki we kuri TikTok

Tyla amaze kwigarurira imitima y’abantu benshi cyane ku mbuga nkoranyambaga, aho afite abafana batabarika. Uyu mukobwa akoresha neza imbuga nkoranyambaga nka Instagram, Twitter na TikTok, aho aganira n’abafana be, akabereka ibihangano bye bishya, kandi akabasangiza ibindi bikorwa bye mu rugendo rwe rwa muzika. 

Ibi byose, bikomoka ku kuba yarabanje kwamamara cyane binyuze kuri TikTok, aho yashyiraga amashusho y’iminota mike aririmba inzirimbo ze. Ni hamwe mu hantu hahinduye ubuzima bwe, bituma amenyekana cyane ku rwego mpuzamahanga.

7. Afite igikundiro gihambaye mu Isi y’imyambarire n’uburyo yitwara ku rubyiniro

Tyla azwiho kwambara kinyamwuga no kwitwara neza ku rubyiniro, bikaba ari bimwe mu bimwongerera igikundiro no kumenyekana mu ruhando rw’abahanzi bishimirwa cyane iyo bageze ku rubyiniro.

8. Si umuhanzi gusa ahubwo ni n’umunyamideli ukomeye

Tyla amaze kugaragara cyane mu birori bikomeye by’imideli nka Met Gala, Paris Fashion Week n’ibindi, aho aserukana amakanzu n’indi myaambaro y’ibigo bikomeye mu ruganda rw’imideli. Yamamariza ibigo binyuranye nka Pandora, aho yagaragaye kenshi mu bikorwa byayo byo kwamamaza ibikoresho byinshi by’imideli.

9. Ahamya ko umuziki ukiza imitima

Mu kiganiro Tyla yagiranye n'abanyamakuru mu 2022, yavuze ko umuziki ari uburyo bwo gutanga ubutumwa, ndetse akaba awufata nk'uburyo bwo gukiza imitima. Avuga ko umuziki utuma abantu babasha gusobanukirwa n'ibibazo bahura na byo, kandi ubafasha kugerageza kwisubiraho no kubaho neza. Tyla kandi avuga ko umuziki ushobora kuba igikoresho gishobora guhindura abantu, kikabafasha kwiyubaka no kugera ku nzozi zabo.

10. Aho ahagaze ku rwego mpuzamahanga

Tyla amaze kugera ku rwego mpuzamahanga mu muziki, aho ibikorwa bye byagiye bigira ingaruka zigaragara ku isoko ry'umuziki. Abafana bakomoka mu bihugu bitandukanye bakomeje kumukurikira, kandi ibikorwa bye bikomeje kubaka izina rye ku rwego rw'isi.

Aherutse kugaragara ku gifuniko cya British Vogue, aho yahishuye byinshi ku buzima bwe, umwuga we, n’icyerekezo cye mu muziki. Icyo gihe, yagaragaje ko yifuza gukomeza guteza imbere umuziki wa Afurika ku rwego mpuzamahanga.

Mu mpera z’icyumweru gishize, Tyla yanditse amateka avuguruye mu iserukamuco rya Coachella 2025, aho yagaragaje ubuhanga n’umuhate bidasanzwe ku rubyiniro imbere y’abakunzi b’umuziki baturutse imihanda yose ku Isi yose.

Amaze kwegukana ibihembo bikomeye nk’icya ‘Best International Act’ mu bihembo bya BET Awards, ndetse n’icya Grammy mu cyiciro cya ‘Best African Music Perfomance’ abikesha indirimbo ye ‘Water.’