Author: webrwanda

Ibi yabigarutseho kuri uyu wa Kane, mu Nama y'uru Rwego yabaye hifashishijwe ikoranabuhanga, aho yari igamije kwizihiza isabukuru y'imyaka 20 NEPAD imaze ishinzwe, kuko yashyizweho bwa mbere mu mwaka wa 2001.

Perezida Kagame, usanzwe anayoboye uru Rwego muri manda y'imyaka ibiri, yavuze ko uruhare rwa NEPAD mu iterambere rya Afurika rudashidikanywaho, dore ko uru Rwego rwashinzwe rufite intego yo kurandura ubukene no gufasha Umugabane wa Afurika kugira uruhare mu mikorere y'ubukungu bw'Isi, kandi byose bikanyura mu miyoborere myiza.

Kagame yavuze ko NEPAD yakomeje kugira intego yo guteza imbere Umugabane wa Afurika, ati “indangagaciro za NEPAD zigize amavugurura twabonye akorwa mu Muryango wa Afurika Yunze Ubumwe mu myaka ishize, kandi yatanze umusaruro mwiza”.

Mu mwaka wa 2018, inshingano za NEPAD zarahindutse, ihabwa inshingano nshya zo kuba umuyoboro uzafasha Umugabane wa Afurika kugera ku ntego z'iterambere zizagerwaho n'uyu Mugabane mu mwaka wa 2063.

Perezida Kagame yavuze ko imiterere n'imokorere bya NEPAD biyiha ubushobozi bwo gufasha uyu Mugabane kugera ku ntego zawo.

Yagize ati “ntabwo ari impanuka kuba NEPAD yarabaye Urwego rw'Iterambere ry'Umuryango wa Afurika Yunze Ubumwe. Ibikorwa bya NEPAD bituma iba urwego rukwiriye rwafasha mu ishyirwa mu bikorwa ry'intego z'iterambere za 2063 z'Umuryango wa Afurika Yunze Ubumwe”.

Kagame kandi yavuze ko kugira ngo uru rwego rugere ku ntego zarwo, bikwiriye ko ibihugu bya Afurika birushyigikira, ati “ndashimira abafatanyabikorwa bafashije NEPAD mu myaka 20 ishize, baba bari muri Afurika no hanze yayo. Ndahamagarira ibihugu binyamuryango by'Umuryango wa Afurika Yunze Ubumwe gukomeza gushyigikira ubufatanye butandukanye NEPAD yakoze”.

Perezida Kagame yavuze ko bimwe mu byihutirwa bigomba gushyirwa mu bikorwa, harimo gushyigikira amasezerano y'Isoko rusange rya Afurika riherutse gutangizwa mu minsi ishize.

Yagize ati “gushyira mu bikorwa ibyo twiyemeje nk'ibihugu binyamuryango
[by'Umuryango wa Afurika Yunze Ubumwe] si inshingano zacu gusa, ni ibikorwa bikwiriye”.

Kagame kandi yanashimiye Dr. Ibrahim Mayaki wayoboye NEPAD mu gihe cy'imyaka irenga 10, avuga ko yayiboranye ubwitange budasanzwe.

NEPAD ni urwego rwavutse mu myaka wa 2001, rufite intego yo gufasha Umugabane wa Afurika guhangana n'ubukene ndetse no guteza imbere imiyoborere myiza kuri uyu Mugabane. Kuri ubu, uru rwego rufite inshingano ikomeye yo kuyobora gahunda z'iterambere z'umugabane wa Afurika, zigomba kuzaba zaragezweho mu mwaka wa 2063.

Perezida Kagame yasabye ibihugu bya Afurika gushyigikira NEPAD

Ikibazo cy'abana basambanywa ni ikibazo gihangayikishije umuryango nyarwanda muri rusange, na cyane ko imibare y'abana bagirwaho ingaruka n'iki kibazo ikomeje kwiyongera. RIB ivuga ko kuva muri Nyakanga 2018 kugera muri Kamena 2019, yakiriye, ikanagenza ibyaha 3 446 bifitanye isano no gusambanya abana.

Ni mu gihe kuva muri Nyakanga 2019 kugeza muri Kamena 2020, iyi mibare yiyongereye, kuko uru Rwego rwakiriye, rukanagenza ibyaha by'abana basambanyijwe bigera ku 4 054.

RIB ivuga ko ubwiyongere bw'iyi mibare bushingiye ku buryo abaturage batangiye gusobanukirwa imiterere y'ibyaha byo guhohotera abana, ku buryo iyo babimenye, bihutira kubigeza ku nzego bireba bigatangira gukurikiranwa hakiri kare. Indi mpamvu ni uko inzego zirimo iza RIB n'izindi zishinzwe guhangana n'ibi byaha zegerejwe abaturage, ku buryo n'ugize ikibazo ahita abona ubufasha hafi ye.

Umuvugizi w'Umusigire wa RIB, Dr. Murangira Thierry, yabwiye IGIHE ko abana bakunze gusambanywa bari mu cyiciro cy'imyaka iri hagati ya 14 na 17.

Yahishuye ko kimwe mu bitiza umurindi iki kibazo harimo n'abantu bahishira abasambanya abana, avuga ko abo bantu na bo bagiye gukurikiranwa by'umwihariko.

Ati 'Turarwanya abantu bose bagihishira icyo cyaha, ari ababyeyi bagihishira bafite ibyo bashingiyeho, ari abayobozi bo mu mudugudu, abayobozi b'inzego z'ibanze ndetse n'abaturage muri rusange.'

Abana b'abahungu na bo barasambanywa

Bitandukanye n'ibyo abantu benshi bibwira, Dr. Murangirwa yasobanuye ko abana basambanywa atari abakobwa gusa, kuko n'abana b'abahungu bashobora gusambanywa.

Yagize ati 'Ntabwo twagombye kumva ko abana b'abakobwa ari bo basambanywa gusa kuko n'abahungu kimwe n'abakobwa barasambanywa.”

Yasobanuye ko 'Hari igihe usanga abana b'abahungu basambanywa n'abahungu bagenzi babo cyangwa abakobwa bakuru bakabasambanya'.

Murangira yavuze ko kugira ngo iki cyaha kiranduke burundu bisaba ko buri Munyarwanda wese agiramo uruhare mu kurandura iki cyaha, ndetse anaburira abakora iki cyaha bakibwira ko bizarangirira aho, ati “abo bantu basambanya abana bakumva bitazamenyekana barye bari menge'.

Ubusanzwe icyaha cyo gusambanya umwana gita agaciro mu gihe cy'imyaka 10, gusa RIB ivuga ko iki cyaha cyagakwiye kujya mu byaha bidasaza.

Icyaha cyo gusambanya umwana giteganywa n'ingingo ya 133, aho ivuga ko ugihamijwe n'urukiko ahanishwa igifungo kitari munsi y'imyaka 20 ariko kitarenze imyaka 25.

Iyo gusambanya umwana byakorewe ku mwana uri munsi y'imyaka 14, igihano kiba igifungo cya burundu kidashobora kugabanywa kubera impamvu nyoroshyacyaha.

Iyo gusambanya umwana ufite cyangwa urengeje imyaka 14 byamuteye indwara idakira cyangwa ubumuga, igihano kiba igifungo cya burundu.

Iyo kandi byakurikiwe no kubana nk'umugabo n'umugore, igihano kiba igifungo cya burundu kidashobora kugabanywa kubera impamvu nyoroshyacyaha.

Iyo icyaha cyo gusambanya umwana cyakozwe hagati y'abana bafite imyaka 14 nta kiboko cyangwa ibikangisho byakoreshejwe, nta gihano gitangwa.

Twese tube maso duhagurukire kurwanya abasambanya abana (Pedophile). Tanga amakuru kuri iki cyaha uhamagara umurongo wa RIB utishyurwa 116.@Rwanda_Child @RwandaGender pic.twitter.com/XjowiELsX1

— Rwanda Investigation Bureau (@RIB_Rw) January 25, 2021

RIB ivuga ko itazihanganira abahohotera abana n’abahishira

Izi modoka ngo zafashwe zitwawe n'abantu badafite ibyangombwa bitangwa na Polisi y'igihugu byemerera umuntu gusohoka muri ibi bihe bya Guma mu rugo.

Mu kiganiro Umuvugizi wungirije wa Polisi y'u Rwanda, CSP Africa Sendahangarwa Apollo yagiranye na RBA yavuze ko muri rusange amabwiriza ya Guma mu rugo ari kubahirizwa neza mu Mujyi wa Kigali ngo n'ubwo hatabura abayarengaho.

Ati “Kuva aho twatangiriye gahunda ya Guma mu rugo kuva tariki ya 19 Mutarama bimaze kumenyerwa serivisi z'ingenzi zafunguwe zikomeje gukora neza urebye birimo birajya ku murongo cyangwa byamaze no kujya ku murongo ariko nubwo bijya ku murongo bwose ntabwo bivuze ko abantu badakomeje kwica amabwiriza. “

CSP Africa Sendahangarwa Apollo yavuze ko kimwe mu bikorwa byahonyoye amabwiriza ya Guma mu rugo biherutse kugaragara harimo n'icyakozwe n'abakunzi b'Amavubi basohotse mu ngo zabo bakirara mu muhanda bishimira intsinzi yayo.

Uretse aba CSP Africa Sendahangarwa Apollo yavuze ko mu masaha 24 bafashe abantu 170 bavuye mu rugo nta ruhushya rubibemerera bafite.

Ati “Usibye n'ibyo gufana ariko n'ubusanzwe hari abakomeje kuyarengaho nko mu masaha 24 ashize hari imodoka zirenga 100 zabonetse abantu bazitwaye badafite impushya, hari abantu 170 nabo babonetse badafite impushya turakomeza rero gukangurira abantu kubahiriza gahunda ya Guma mu rugo neza.”

Icyemezo cyo gushyira Umujyi wa Kigali muri Guma mu rugo cyafashwe n'Inama y'Abaminisitiri yateranye ku wa 18 Mutarama 2021 iyobowe na Perezida w'u Rwanda, Paul Kagame. Iki cyemezo cyaturutse ahanini ku mubare w'abandura icyorezo cya COVID-19 wari ukomeje kwiyongera ubutitsa muri uyu mujyi.

CSP Africa Sendahangarwa Apollo yavuze ko muri rusange mu Mujyi wa Kigali amabwiriza ya Guma mu rugo ari kubahirizwa neza

Kuba Abanyarwanda bashobora gutwarwa n'intsinzi y'Amavubi bakarenga ku mabwiriza yo kwirinda COVID-19 byagaragaye ku wa 26 Mutarama ubwo yatsindaga Togo ibitego 3-2, maze abakunzi bayo bakirara mu mihanda kandi bitemewe.

Uretse gusohoka bitemewe, abakunzi b'Amavubi bagaragaye kandi barenze ku yandi mabwiriza yo kwirinda COVID-19 arimo kwambara agapfukamunwa neza no guhana intera.

Mu kiganiro Minisitiri Munyangaju Aurore Mimosa yagiranye na RBA kuri uyu wa 28 Mutarama, yavuze ko abakunzi b'umupira bakunze kurangwa n'amarangamutima iyo ikipe yabo itsinze ko ariko bitari bikwiye ko bigera ku rwego rwo kurenga ku mabwiriza yo kwirinda COVID-19.

Ati 'Mu busanzwe Abanyarwanda cyangwa umuntu wese ukunda umupira w'amaguru nk'uko byagaragaye bagira imbamutima, bagira uburyo bishima iyo ikipe yabo yatsinze, aha turi kuvuga uko Amavubi yatsinze abantu benshi rero barishimye ariko noneho barenga no ku mabwiriza yo kwirinda COVID-19.

'Nka Minisiteri ako kanya tukimara kubona ko Abanyarwanda bari hanze, basohotse bari kwica amabwiriza icya mbere twakoze ni ukubabwira no kubereka ko koko tutabishyigikiye atari ngombwa ko abantu bishima ngo basohoke mu ngo zabo bajye hanze kutubahiriza amabwiriza ya COVID-19.'

Minisitiri Munyangaju yakomeje avuga ko umukunzi wa siporo wa nyawe arangwa no kugira ikinyabupfura no kubaha amabwiriza ya Leta.

Munyangaju yavuze ko Amavubi agifite urugendo rurerure imbere kandi ko ashobora kurwitwaramo neza, asaba abakunzi bayo kutazongera kurangwa n'imyitwarire yabaranze ubwo yatsindaga uyu mukino uheruka.

Ati 'Amavubi aracyafite urugendo, agiye muri kimwe cya kane biranashoboka ko dushobora kugera ku mukino wa nyuma wenda tukazanatahana n'iki gikombe ariko se noneho uko twitwaye niko dushaka gukomeza kwitwara kugeza ku munsi wa nyuma? Abenshi barasohotse mwarabibonye, mwabonye amashusho uko babaga banambaye, bakibagirwa no kwambara kubera amarangamutima yabo […] Usohotse hanze ariko wibagiwe ko ushobora gutahana icyorezo.'

Minisitiri Munyangaje yasabye Abanyarwanda kwitwararika ku buryo intsinzi y'Amavubi itababera icyuho cyo kwandura COVID-19.

Ati 'Niyo mpamvu twavuze ko uyu ari umwanya mwiza wo kongera kwinenga no kwibutsa Abanyarwanda ko turi mu bihe bidasanzwe, turi mu bihe by'icyorezo niba tugiye muri kimwe cya kabiri ntabwo ari umwanya wo kugira ngo tujye gukwirakwiza iki cyorezo.'

'Tubigiremo uruhare, tubishyiremo imbaraga nyinshi nk'abakunzi ba siporo twubahe amabwiriza badushyiriraho gutsinda kw'Amavubi ntibibe icyuho cy'uko dukwirakwiza COVID-19 cyangwa se bibe icyuho cyo kutubahiriza amabwiriza.'

Yavuze ko byaba bibabaje mu gihe Abakinnyi b'Amavubi bakwitwara neza ariko bazataha bagasanya umwe mu bagize imuryango yabo n'inshuti yaranduye iki cyorezo biturutse ku kwitwara neza kwabo.

Ikipe y'Igihugu Amavubi niyo yonyine yo mu karere yabashije kugera muri kimwe cya kane mu mikino Nyafurika ihuza abakinnyi bakina imbere mu bihugu byabo (CHAN 2020). Ku Cyumweru biteganyijwe ko izahura n'iya Guinea.

Minisitiri wa Siporo, Munyangaju Aurore Mimosa yasabye Abanyarwanda kutirara ngo Amavubi ababere intandaro yo kwandura COVID-19

Mu gitondo cyo kuri uyu wa Kane tariki 28 Mutarama, nibwo uyu mugabo yagiye kuri polisi yo ku Murenge wa Kimisagara, ajya kwirega ko umugore we witwaga Uwamariya Jacqueline, yamwishe.

Inzego zishinzwe umutekano zahise zimuzana mu rugo iwe, zihageze zisanga umugore yamaze gushiramo umwuka, gusa zasanze n'umwana w'imyaka umunani w'uyu muryango yamaje guhamagaza abaturanyi.

Amakuru IGIHE yamenye ni uko uyu muryango wari umaze amezi abiri uje gutura muri aka gace, gusa ngo ibijyanye n'amakimbirane adakabije wari ufitanye ubuyobozi bwari bwarayamenye.

Umunyamabanga Nshingwabikorwa w'Umurenge wa Gatsata, Munyaneza Aimable yabwiye IGIHE ko ubuyobozi bw'umudugudu bwari bumaze igihe gito bumenye ko muri urwo rugo harimo amakimbirane adakabije.

Ati 'Bari bamaze nk'amezi abiri baje gutura mu Gatsata, bari babanye nabi ariko bidakabije, ni intonganya zo mu muryango bisanzwe. Abayobozi bari bakibikurikirana ngo barebe uko bashaka umuti.'

Munyaneza yasabye abaturage kujya bihutira gutanga amakuru mu gihe babonye hari imiryango ifitanye ikibazo icyo aricyo cyose aho kugira ngo bigere aho kuba umwe yakwambura undi ubuzima.

Yagize ati 'Abaturage bite ku mibanire ya bagenzi babo, ingo babona zirimo amakimbirane bakabimenyesha ubuyobozi bukaba bwabikemura mu maguru mashya.'

Kugeza ubu Hategekimana yahise atabwa muri yombi mu gihe iperereza ryatangiye gukorwa n'Urwego rw'Ubugenzacyaha, RIB naho umurambo wa nyakwigendera wo wahise ujyanwa mu bitaro gukorerwa isuzuma.

Uhamijwe n'Urukiko icyaha cyo kwicwa ahanishwa igifungo cya burundu.

Mu Murenge wa Gatsata haravugwa umugabo wishe umugore we agahita ajya kwirega kuri polisi

Yabitangaje kuri uyu wa Gatatu tariki 27 Mutarama 2020, ubwo yasubizaga bimwe mu bibazo yabajijwe na Komisiyo ya Politiki, Uburinganire n'Ubwuzuzanye bw'Abagabo n'Abagore mu Iterambere ry'Igihugu mu Nteko Ishinga Amategeko, Umutwe w'Abadepite, ku bibazo byagaragaye muri raporo y'ibikorwa by'Urwego rw'Umuvunyi by'umwaka wa 2019-2020.

Nirere yabwiye Abadepite ko muri rusange, hari intambwe nini igihugu kimaze gutera mu kurwanya ruswa n'akarengane, kandi bigizwemo uruhare n'Urwego rw'Umuvunyi n'izindi nzego zitandukanye, yaba iza Leta, abikorera n'imiryango y'iterambere, yaba iyo mu Rwanda na mpuzamahanga, ndetse n'abaturage.

Abadepite babajije impamvu mu isesengura rya raporo z'Urwego rw'Umuvunyi mu myaka itatu ishize, kuva muri 2017 kugera muri 2020, igaragaza ko mu bibazo byerekeranye no kwimura abaturage ku mpamvu z'inyungu rusange, imanza zitarangizwa ndetse n'ibibazo by'ubutaka bihora biza ku isonga mu bibazo bigaruka buri mwaka.

Nirere yabwiye Abadepite ko ibibazo bikigaragara mu kwimura abaturage ku mpamvu z'inyungu rusange bituruka ku kudakora neza inyigo y'imishinga bityo ntihateganywe amafaranga ahagije yo kwishyura ibikorwa biba byangijwe.

Ikindi kibazo yagaragaje ni inzira ndende bifata kugira ngo umuturage yishyurwe kuva abaruriwe umutungo kugeza yishyuwe ndetse n'ikibazo cya ba rwiyemezamirimo batoroka batarangije amasoko batsindiye, bagasiga bambuye abaturage.

Yagize ati 'Haracyagaragara kandi abaturage bakorera ba rwiyemezamirimo ntibahabwe amasezeramo y'umurimo, ntibanagire nibura n'ibipande byerekana iminsi baba bakoze cyangwa ikindi cyangombwa cyanditse, cyagaragaza ko bakoreye uwo rwiyemezamirimo.'

Yasobanuye ko kubera iyo mikorere, 'Igihe havutse ibibazo, usanga biragoranye gukurikirana uwo rwiyemezamirimo, cyangwa igihe ibibazo bigiye mu nkiko hakabura inyandiko yatangwa nk'ikimenyetso cyanditse .'

Uretse ibyo bibazo hari nanone ibirebana n'imanza zitarangizwa, aho ngo abahesha b'inkiko batari ab'umwuga bataziha ubwihutirwe bukwiye, bigatuma zitinda kurangizwa.

Ibibazo by'ubutaka biracyari ingorabahizi

Ibibazo by'ubutaka ni bimwe mu bibazo bikomereye umuryango nyarwanda muri rusange, aho bigize igice kinini cy'ibibazo bigana inkiko ndetse n'ibigana Urwego rw'Umuvunyi.

Muri rusange, Abanyarwanda benshi bashingiye imibereho yabo ku butaka, bityo hakaba ubwo usanga imiryango cyangwa abafitanye amasano rimwe na rimwe bananiwe kumvikana ku micungire y'ubutaka. Ibi kandi byiyongera ku byuho biri mu itegeko ry'ubutaka bigomba gukemurwa binyuze mu ivugururwa ry'ayo mategeko.

Mu bindi bibazo byagaragajwe, hari iby'ibigo by'ubucuruzi byatsinzwe imanza ariko ntizirangizwe kuko ibyo bigo byahombye cyangwa bitakibaho.

Icyakora Urwego rw'Umuvunyi rwasabye inzego zirebwa n'ibi bibazo kwihutira kubikemura, ndetse n'imishinga yo kwimura abantu ku mpamvu z'inyungu rusange ikagenerwa ingengo y'imari ihagije mbere yo gutangira.

Nirere yagize ati 'Ibi bibazo bikigaragara birakwiye ko bikemuka vuba. Ubuvugizi burakomeza gukorwa mu nzego bireba cyane cyane ibyerekeye kwimura abaturage ku mpamvu z'inyungu rusange.”

“Ku byerekeye ibibazo by'ubutaka n'imanza zitarangizwa, amategeko abigenga arimo kunozwa, akazasohoka hari ibibazo byinshi akemura.'

Kurwanya ruswa bikwiye kuba umuco

Ku birebana no gukumira ruswa, abadepite babajije impamvu hari amatsinda yo kurwanya ruswa (Anti-corruption clubs) akunze kumvikana mu mashuri makuru na kaminuza ariko ugasanga ari make.

Abadepite babajije icyakorwa kugira ngo no mu byiciro by'amashuri yo hasi, ayo matsinda ahagezwe kandi akurikiranywe uko bikwiye kugira ngo atange umusaruro.

Urwego rw'Umuvunyi rugaragaza ko rwasuye abanyeshuri bo mashuri yisumbuye ari mu turere 12 muri uyu mwaka w'ingengo y'Imari wa 2019-2020, aho bigishijwe ku bubi bwa ruswa n'uruhare rwabo mu kuyirwanya ndetse banashishikarizwa gushinga amatsinda arwanya ruswa aho biga.

Umuvunyi Mukuru yavuze ko ari byiza ko urubyiruko rutangira gutozwa indangagaciro zo kwanga ruswa hakiri kare, ndetse ko ari na ngombwa ko mu masomo bigishwa hakwiye kongerwamo ubumenyi ku bijyanye no gukumira ruswa. Ati 'Kwanga no kutihanganira ruswa bikwiye kuba umuco.'

Uru rwego kandi ruvuga ko rukomeje gushyira imbaraga nyinshi mu kwigisha umuturage uruhare rwe mu kurwanya ruswa, ndetse no kumwigisha uburenganzura n'amategeko amurengera kugira ngo agire uruhare mu kwanga akarengane na ruswa.

Yakomeje agira ati 'Mu bijyanye no gukumira no kurwanya ruswa, turasanga guhera mu mashuri abanza, mu nteganyanyigisho zabo hakwiye kujyamo inyigisho zijyanye no gukumira no kurwanya ruswa kugira ngo gahunda yo kurandura ruswa burundu ibe umuco.'

Ikibazo cy'abashoferi batwara abakozi ba Leta cyagarutsweho

Urwego rw'Umuvunyi rwanasubije ku kibazo kireba abashoferi basabye kurenganurwa kubera ibirarane baberewemo n'ibigo byatsindiye amasoko yo gutwara abakozi ba Leta mu kazi hirya no hino mu gihugu.

Urwego rw'Umuvunyi ruvuga ko rumaze kubona ko ibi bibazo bihuriweho n'abantu benshi kandi bishyuza amafaranga menshi, rwakoze igenzura muri ibyo bigo (RTTA, PTS, GORILLAND SAFARIS Ltd) kuva muri Kamena kugeza muri Nzeri 2019 ndetse na SGES/ATT yasabwe imibare y'imyenda iberewemo kuko igenzura ryakozwe yarahagaze.

Muri iryo genzura, ibyo bigo byagaragarije Urwego rw'Umuvunyi intonde z'Inzego za Leta n'imyenda baberewemo ndetse basobanurira Urwego rw'Umuvunyi ko ari yo ntandaro yo kuba nabo batishyura abo bahaye akazi.

Nyuma yo kwegeranya iyi mibare, Urwego rw'Umuvunyi rwandikiye Minisiteri y'Ibikorwaremezo ruyigezaho raporo y'igenzura ikubiyemo n'inama zitandukanye iyo Minisiteri igomba gushyira mu bikorwa hagamijwe kunoza imikorere n'imikoranire n'ibyo bigo.

Perezida wa Komisiyo ya Politiki, Uburinganire n'Ubwuzuzanye bw'Abagabo n'Abagore mu Iterambere ry'Igihugu, Depite Rubagumya Furaha Emma, mu izina rya Komisiyo ayoboye, yashimye raporo bagejejweho n'Urwego rw'Umuvunyi ndetse avuga ko banyuzwe n'ibisobanuro bahawe.

Ibi biganiro hagati y'Urwego rw'Umuvunyi na Komisiyo ya Politiki, Uburinganire n'Ubwuzuzanye bw'Abagabo n'Abagore mu Iterambere ry'Igihugu mu Nteko Ishingamategeko byabaye hifashishijwe ikoranabuhanga mu rwego rwo kwirinda ikwirakwira ry'icyorezo cya Coronavirus.

Umuvunyi Mukuru, Nirere Madeleine, yavuze hari intambwe nini yatewe mu kurandura ruswa n’akarengane mu Rwanda

Bamwe mu batishoboye barokotse Jenoside bo mu murenge wa Gacurabwenge mu Karere ka Kamonyi, baherutse kubwira IGIHE ko basabwa ibibanza mbere yo kubakirwa inzu nk'abatishoboye, bakavuga ko ari amananiza kuko badasanganywe ubutaka, kandi byabagora kubona ubundi kuko batishoboye.

Hari uwavuze ko adafite aho gutura kuva mu mwaka 1994. Yagiye ashyirwa ku rutonde rw'abagomba kubakirwa guhera mu mwaka wa 2014 ariko bikarangira atubakiwe, akemeza ko iyo aza kuba afite amafaranga yagura ikibanza aba yariyubakiye atarindiriye gufashwa na Leta.

Yaragize ati 'Baratubwiye ngo tugomba kubakirwa gusa hadaciyemo iminsi badusaba ko tugomba kwishakira ikibanza mu mudugudu w'icyitegererezo, ariko amafaranga y'ikibanza angana na miliyoni 1 Frw. Ubuse iyo mba mfite iyo miliyoni sinari kwiyubakira akazu ko guturamo koko?'

Hari abandi bavuze ko bemeye ko bafite ibibanza ngo badakurwa ku rutonde ariko mu by'ukuri ntabyo bafite.

Icyo gihe, Umunyamabanga Nshingwabikorwa w'Umurenge wa Gacurabwenge, Nyirandayisabye Christine, yavuze ko nta muntu wigeze agaragaza ikibazo cyo kubura ikibanza kandi ko imirimo yo kubakira abatishoboye igeze kure.

Ati 'Twebwe ayo makuru ntayo dufite rwose, ntayo nzi, icyo nzi ni uko batangiye gusiza aho bazubakirwa, kandi nta wigeze atugezaho ikibazo cy'uko yabuze ikibanza. Mu Murenge wa Gacurabwenge abantu bose bazubakirwa bafite ibibanza.'

Umuyobozi w'Akarere ka Kamonyi Wungirije Ushinzwe Imibereho myiza y'Abaturage, Uwamahoro Prisca, yabwiye IGIHE ko bagiye gukurikirana iki kibazo, byagaragara ko abaturage badafite uburyo bwo kubona ibibanza bagafashwa.

Amakuru IGIHE yamenye nuko umwanzuro wakomeje gufatwa ari uko udafite ikibanza akurwa ku rutonde, hakubakirwa ababifite kuri site zagenewe imidugudu.

Umuyobozi Mukuru wa FARG Madamu UWACU Julienne, yabwiye IGIHE ko ari ibisanzwe gusaba ibibanza abaturage mu gihe babifite.

Ati 'Ni ibisanzwe ariko ntabwo ari bishya. Ubusanzwe abatishoboye twubakira iyo bafite ibibanza ahasanzwe hagenewe guturwa niho tububakira.'

Gusa yavuze ko atumva ukuntu umuturage udafite ikibanza, cyangwa wabuze ubushobozi bwo kukigura, atubakirwa kandi bigaragara ko ari uwo gufashwa.

Ati 'iyo ugomba kubakirwa adafite ikibanza kandi adashobora kukibonera, dufatanya n'Akarere kumubonera ikibanza, akubakirwa kuri site yemewe yo guturaho hubahirijwe amategeko y'imikoreshereze y'ubutaka. Kamonyi rero nta mwihariko ifite.'

Uyu muyobozi yavuze ko atari yamenye aya makuru yo muri Kamonyi gusa ati'Tugiye kubikurikirana tubimenye neza, njyewe nta makuru ya Kamonyi yihariye mfite, birasaba ko mvugana na Kamonyi tukamenya ikibazo bafite.'

Mu mwaka wa 2019, FARG yatangaje ko yari imaze kubaka inzu 28,558 no gusana izindi 4,714. Kugira ngo ibi bikorwa bikomeze neza, hari hakenewe nibura miliyari 30 Frw yo gukoresha mu bikorwa byo kubakira abatishoboye inzu nshya no gusana izubatswe kera zishaje.

FARG yubakira amazu abatishoboye barokotse Jenoside mu rwego rwo guteza imbere imibereho yabo