Webrwanda Backend

Author: webrwanda

  • Nawe waba Intwari bidasabye ko uhara amagara – CHENO #Rwanda #RwOT via @kigalitoday #rwanda #RwOT

    Mu Ntwari z
    Mu Ntwari z’u Rwanda bitanze bagahara amagara yabo ku nyungu z’Abanyarwanda harimo Fred Gisa Rwigema n’abandi

    Umuyobozi ushinzwe ubushakashatsi muri CHENO, Rwaka Nicolas, avuga ko hari gukorwa ubushakashatsi bwenda kugera ku musozo bugamije gushyira bamwe mu bakoze ibikorwa by’indashyikirwa mu rwego rw’Intwari z’Ingenzi, uru rukaba ruzaba rukurikiye urwego rwa kabiri rw’Intwari z’Imena.

    Uru rwego rw’Imena rugizwe n’Intwari zatabarutse n’izikiriho zigizwe n’abari abana b’i Nyange banze kwitandukanya hakurikijwe ubwoko, ubwo baterwaga n’abacengezi bakabicamo barindwi mu 1997 i Nyange mu karere ka Ngororero mu ntara y’i Burengerazuba.

    N’ubwo ibikorwa by’ubutwari bisaba ko bibaye ngombwa wanahara ubuzima bwawe nk’uko bigaragara ku Ntwari z’Imanzi, aho uri muri urwo rwego agomba kuba yarakoze ibikorwa by’indashyikirwa bikanamwambura ubuzima, kuvuga ubutwari uyu kunsi bisobanurwa mu buryo bwinshi hakurikijwe Indangagaciro za ngombwa ngo umuntu ashyirwe mu rwego runaka rw’Intwari.

    Ni ibiki wakora ngo ugirwe Intwari?

    Nyuma ya Jenoside yakorewe Abatutsi byabaye ngombwa ko umuco w’Ubutwari wongera kuvomwa mu bya kera byarangaga ubutwari bw’Abanyarwanda birimo kugira umutima ukomeye kandi ucyeye, uwo mutima ukaba udatinya, udahishira ikibi ahubwo ugishyira hanze.

    Ibindi byatumaga umuntu aba Intwari binashingirwaho mu bushakashatsi bwo gushyira umuntu mu rwego rw’Intwari, harimo gukunda Igihugu nk’ikintu cy’Ingenzi cyaranze abakurambere b’Abanyarwanda ibyo bikaza gucika nyuma y’Abakoroni ubwo bacagamo Abanyarwanda ibice bakimakaza amacakubi yagejeje u Rwanda kuri Jenoside yakorewe Abatutsi.

    Rwaka asobanura ko Intwari z’u Rwanda rwo hambere zakundaga Igihugu zigaharanira ubwenegihugu bumwe bw’Abanyarwanda kandi zikaba zanakwitangira Igihugu ku nyungu za benshi, ku buryo zanahara ubuzima bwazo, urugero ni nk’uko byagendaga ku bitwaga ‘Abacengeri’ bitangaga ngo bicwe n’ababisha, ariko barinde Umwami n’Ingabo ze.

    Kugira ukuri no kureba kure n’ubushishozi ni ikindi kintu cy’ingenzi ushaka kuba Intwari yashingiraho, kuko byagaragaye ko abantu benshi bagize uruhare muri Jenoside yakorewe Abatutsi kubera kudashishoza ku ngaruka byateza Abanyarwanda bose, uyu munsi abadashishoza bakaba barangwa no kudashyira mu bikorwa inshingano zabo.

    Hari kandi kugira ubwamamare mu butwari kubera ibikorwa bishimwa n’abantu benshi, kuba umunyakuri n’ubupfura, kugira ubumuntu no kubaha buri wese mu mibereho ye na byo biri mu bishingirwaho mu bushakashatsi bugamije kugira abantu Intwari.

    Abakora ibikorwa bihebuje bataragirwa Intwari babiherwa impeta z’ishimwe?

    Ibyiciro by’Intari uko ari bitatu kugeza ubu ni Imanzi, Imena n’Ingenzi, aba ba gatatu bo bakaba bataratangira gushyirwamo kuko bagikorwaho ubushakashatsi ariko hari n’izindi Mpeta bashobora guhabwa zigaragaza ibikorwa byabo by’indashyikirwa.

    Izo ni nk’Impeta yo kubohora Igihugu yitwa Uruti, Impeta yo kurwanya Jenoside yitwa Umurinzi, Impeta y’icyubahiro ihabwa abakuru b’Ibihugu n’abayobozi bakuru muri Guverinoma yitwa Agaciro, Impeta y’ubucuti yitwa Igihango, Impeta y’umurimo yitwa Indashyikirwa, iyi ikaba ari nshya kuko itari isanzweho.

    Hari kandi izindi Mpeta zihabwa abakoze ibikorwa by’Indashyikirwa zirimo Impeta y’Umuco yitwa Indangamirwa, hagaheruka impeta ya karindwi yitwa Ubwitange, ibyo byose ngo bikaba bigamije gushimira umuntu wakoze ibikorwa byiza atabaye Intwari.

    Abana b
    Abana b’i Nyange

    Ubutwari bufite uruhare runini mu Bumwe n’Ubwiyunge bw’Abanyarwanda.

    Urwego rw’Igihugu rw’Intwari Imidari n’Impeta by’Ishimwe, rutangaza ko Ubutwari bufite uruhare runini mu Bumwe n’Ubwiyunge kuko Igihango gihuza Abanyarwanda ari kimwe mu biranga Intwari.

    Rwaka avuga ko ashingiye ku Ndangagaciro z’Ubutwari, ntawe waba Intwari adaharanira Ubumwe n’Ubwiyunge.

    Agira ati, “Ntawe waba Intwari atubahiriza Igihango Abanyarwanda bafitanye, utazi neza ko Abanyarwanda bakwiye kuba bafatanya, bunga ubumwe bakorana neza ntabwo yaba Intwari. Niba Intwari igomba kurangwa no gukunda Igihugu, nta muntu waba Intwari adaharanira Ubumwe bw’abenegihugu”.

    Yongeraho ati, “Nta muntu waba akunda Igihugu adaharanira iterambere ryacyo, nshingiye ku ndangagaciro yo kuba intangarugero, nta muntu waba Intwari adaharanira gushyira hamwe no gufatanya kw’Abanyarwanda. Mu gihe indangagaciro yo kugira ubupfura no kugira ubumuntu ari ikintu cy’ingenzi cyane ku isi, ibyo kandi bigirwa n’umuntu uharanira Ubumwe n’Ubwiyunge”.

    Intwari z’Imena zivuga iki ku butwari bukenewe uyu munsi

    Nyuma y’uko ibyiciro bitandukanye by’Abanyarwanda bigaragayemo umuco w’Ubutwari kandi bikagira uruhare mu kubaka Ubumwe bw’Abanyarwanda by’umwihariko ababyiruka, Intwari z’Imena zisanga ubutwari bukwiye gushingira ku gukunda umurimo no kuwuhesha agaciro kugira ngo iterambere ry’Igihugu rirusheho kwihuta.

    Umuyobozi w’Ishyirahamwe ry’Intwari z’Imena, Phanuel Sindayiheba, avuga ko urubyiruko rw’uyu munsi rukwiye kurangwa no gukura amaboko mu mifuka rugakora kuko ntawe wakunda Igihugu cye atagikorera kandi gukorera Igihugu bitari iby’umuntu ku giti cye ahubwo bisaba ubufatanye, kandi ntawe waba Intwari adakorera Igihugu.

    Ati, “Kugira ngo ejo tuzabone Intwari zibereye Igihugu koko, ni uko urubyiruko rwacu rusigaye rukura rwanga gukora rukwiye kwikosora rukisubiraho kuko bikomeje gutyo byaba binyuranyije n’umuco w’Ubutwari. Ababyeyi bakwiye kuba maso bagatoza abana umurimo bagakura bashishikajwe no gukorera Igihugu, ni wo murage mwiza urubyiruko rukwiye kandi ubwo ni ubutwari”.

    Teodette Abayisenga ni umwe mu Ntwari z’Imena uhamya ko mu 1997 ubwo abacengizi babateraga aho bigaga i Nyange, byari bikomeye kwiyemeza gushyira hamwe no kwanga kwibona mu ndorerwamo y’amoko basabwa kwitandukanya.

    Avuga ko kuba abari bato icyo gihe biga mu mashuri yisumbuye barabigezeho, byatewe no gukundana hagati yabo bagamije kubaka Umunyarwanda uzira amacakubiri, ibyo bikaba bikwiye kubera abandi bose isomo rikomeye kuko u Rwanda ruzubakwa n’amaboko y’abana barwo ntawe usigaye.

    Agira ati, “Iriya mbuto twayigezeho kuko twirinze ko umwe muri twe yashaka gukiza amagara ye kuko n’ubundi icyahungabanyije Ubumwe bw’Abanyarwanda ni amoko. Twarabishoboye kandi iyo abantu bishyize hamwe bigaragara ko byubaka kuko Jenoside ntawayungukiyemo”.

    Nyange ubu yagizwe Igicumbi cy’Intwari z’Imena imariye iki abahiga?

    I Nyange hashyizwe ikimenyetso cy
    I Nyange hashyizwe ikimenyetso cy’ubutwari bwaranze abana bahigaga kiri mu ishusho yo gufatana mu biganza nko kunga ubumwe no kwanga kwitandukanya

    Ubuyobozi bw’ishuri rya Nyange aho Intwari z’Imena zigaga bugaragaza ko kuba ikigo cyarashyizweho uburyo bwo gusigasira amateka y’ubutwari biri mu bifasha abanyeshuri bahiga gutozwa hakiri kare umuco w’ubutwari.

    Abanyeshuri kandi bashinze Ihuriro ry’Ubutwari bahuriramo bakaganira ku mateka yaranze Abanyarwanda kandi bemeza ko ibyo baganira bizatuma barushaho gutora umuco w’Ubutwari, kuko bazi neza ko guharanira Ubunyarwanda ari kimwe mu bizatuma barushaho kubaka Igihugu cyiza kibabereye.

    Bimwe mu bikorwa by’Ihuriro ry’Ubutwari bashinze harimo gufasha abatishoboye baturiye ishuri bigaho, gutanga no kungurana ibitekerezo kuri ‘Ndi Umunyarwanda’ no gufashanya mu masomo ku ishuri.

    Abanyeshuri bavuga ko ahari ubumwe abantu babasha kubana mu mahoro bityo bakubaka igihugu cyiza, kuko kubaka ubumwe bituma uwo muri kumwe wamwitangira kabone n’iyo wahasiga ubuzima.

    Rwaka avuga ko hari impeta zihabwa abataraba Intwari ariko bakoze ibikorwa bihebuje
    Rwaka avuga ko hari impeta zihabwa abataraba Intwari ariko bakoze ibikorwa bihebuje


    source https://www.kigalitoday.com/amakuru/amakuru-mu-rwanda/article/nawe-waba-intwari-bidasabye-ko-uhara-amagara-cheno

  • Musanze FC yabonye umuvugizi mushya #Rwanda #RwOT via @kigalitoday #rwanda #RwOT

    Uwihoreye Ibrahim yongerewe Inshingano: Ubu ni we muvugizi wa Musanze FC
    Uwihoreye Ibrahim yongerewe Inshingano: Ubu ni we muvugizi wa Musanze FC

    Ni umwanzuro wafatiwe mu nama ya Komite ya Musanze FC yateranye ku wa Gatanu tariki ya 28 Mutarama 2020 i Musanze. Urubuga rwa Internet rwa Musanze FC rwanditse ko Ibrahim Uwihoreye yongerewe inshingano zo kuba Umuvugizi wa Musanze FC umwanya yasimbuyeho usanzwe ari Umunyamabanga wa Musanze FC Rutishereka Makuza Jean.

    Mu kiganiro Kigali Today yagiranye n’Umuvugizi mushya wa Musanze FC, Beans Uwihoreye Ibrahim, yashimiye Komite y’ikipe icyizere yamugiriye. Yagize ati “Ndashima Komite y’ikipe yangiriye icyizere ndetse nkazagikoresha mu nyungu z’ikipe. Ndizeza abayobozi ba Musanze FC n’abafana ko nzakora inshingano zanjye mu rwego rwo guteza Musanze FC imbere.”

    Rutishereka Makuza Jean wari usanzwe ari umuvugizi akaba n’Umunyamabanga yagumanye inshingano zo kuba Umunyamabanga, mu gihe Uwihoreye Ibrahim azakora inshingano zo gukurikirana ubuzima bwa buri munsi bwa Musanze FC no kuba Umuvugizi wayo.

    source https://www.kigalitoday.com/imikino-11/football/article/musanze-fc-yabonye-umuvugizi-mushya

  • Ibinyomoro wabisarura imyaka itatu bitarasaza: Bifitiye umubiri akamaro gakomeye #Rwanda #RwOT via @kigalitoday #rwanda #RwOT

    Mudaheranwa Leonard ni umusaza w’imyaka 69 y’amavuko utuye mu Mudugudu wa Kamugundu, Akagari ka Musya, Umurenge wa Rurenge mu Karere ka Ngoma akaba ari umuhinzi mworozi w’intangarugero.

    Avuga ko yorora inka n’ingurube, bakamuha ifumbire y’imborera akoresha mu buhinzi bwe bw’ibigori n’ibinyomoro, nubwo ngo imvaruganda ayikura kuri Koperative y’abahinzi b’ibigori yitwa ‘Subiza’abereye umunyamuryango ndetse akaba no mu buyobozi bwayo. Mu bijyanye no kubona imbuto z’ibyo ahinga, avugo ko akorana na ‘Tubura’ ikorana n’ikigo cy’ubuhinzi n’ubworozi (RAB).

    Kigali Today yaganiriye na we ku bijyanye n’ubuhinzi bwe bw’ibinyomoro. Avuga ko ahinga ibinyomoro kuri hegitari eshatu, akaba yaratangiye guhinga ibinyomoro muri Kamena 2019. Umusaruro wa mbere yawubonye muri Kamena 2020, kuko ngo ibinyomoro bitangira kwera nyuma y’umwaka umwe biba bimaze bihinze.

    Mu gihe ibinyomoro bye byari bitangiye kwera bwa mbere, ngo yahise abona umukiriya uturuka i Kigali buri cyumweru akamugurira umusaruro we wose, kuko ubu ngo asarura imifuka cumi n’ibiri buri cyumweru kandi buri mufuka uba upima ibiro mirongo inani (80kgs), ni ukuvuga ko mu kwezi asarura ibiro magana icyenda na mirongo itandatu by’ibinyomoro (960Kgs) kandi ubu ngo ikilo kimwe akigurisha ku mafaranga magana atanu na mirongo itanu(550Frw), bivuze ko ku kwezi abona amafaranga asaga miliyoni ebyiri z’amafaranga y’u Rwanda(2M).

    Kubera ubwo buhinzi bwe, Mudaheranwa ngo yigeze guhembwa mu Karere atuyemo nk’Umuhinzi w’intangarugero, icyo gihe ngo ahembwa telefoni igezweho we yita ‘touch’. Iyo telefone ngo iramufasha mu bikorwa bye by’ubuhinzi, kuko ngo anahagarariye abandi bahinzi b’ibigori, ubu ngo iyo habaye ikibazo avugisha ushinzwe ubuhinzi(Agronome),cyangwa se n’igihe ‘Agronome’ ataraza agafotora uko ibihingwa bimeze akamwoherereza akoresheje iyo telefoni yahembwe, mbese ngo imufasha gutanga raporo atavunitse.

    Muri ubwo buhinzi bwe bw’ibinyomoro, ngo asarura mu bihembwe byose, kuko ubu mu gihembwe cy’ihinga B, arabyufirira cyangwa se kubibagara, nyuma ngo akabitera umuti kugira ngo ururabo n’imiteja biriho bidahunguka, akabisasira ubwo agakomeza gusarura ibiriho byeze gutyo gutyo. Mu gihembwe cy’ihinga ‘C’ ngo azatangira kubyuhira yifashishije imashini ikoresha mazutu.

    Muri ubwo buhinzi kandi ngo yahaye abantu babiri akazi gahoraho basimburana ku manywa na nijoro, kugira ngo babicunge ntihagire ababyangiza, hakaba n’abandi 30 bakora buri munsi bataha.Ubu ngo yiteguye kuzakomeza gusarura adahagarara kugeza imyaka itatu ishize, kuko ngo nibwo biba bishaje bikeneye gusimburwa.

    Mudaheranwa ati “Ibinyomoro byera igihe cyose kugeza imyaka itatu ishize,icya ngombwa ni uko umuntu abyitaho uko bikwiye.Ibyo ibinyomoro bisaba byose ndabikora, ariko nanjye bikampa ibyo mbisaba.

    Nyuma yo kubona uko ubuhinzi bw’ibinyomoro bwungura ubukora kandi ku buryo buhoraho, ubu ngo hari abagore babiri baturanye na Mudaheranwa na bo batangiye guhinga ibinyomoro, kandi na byo ngo bigiye kwera.

    Ibinyomoro ntibigirira akamaro ababihinga bifasha mu kwiteza imbere gusa, ahubwo bigira n’akamaro gakomeye mu gutuma abantu babona indyo yuzuye.

    Ku rubuga https://www.lifepersona.com, bavuga ko ibinyomoro bigira akamaro gakomeye ku buzima bw’umuntu ubirya.

    Mu byiza by’ibinyomoro bivugwa kuri urwo rubuga, harimo kuba ari urubuto rwigiramo ibyitwa ‘antioxidants’ nyinshi nka ‘vitamine C’, ‘β-carotene’, ‘anthocyanins’ na ‘vitamin E’. Ubushakashatsi butandukanye harimo ubwakozwe na Kaminuza yitwa ‘Chalmers University of Technology’ y’ahitwa Gothenburg bwagaragaje ko ibinyomoro byifitemo ubushobozi bwo kurwanya ibintu byitwa ‘free radicals’ bishobora kuba intandaro yo kurwara kanseri zitandukanye.

    Ibinyomoro byongera Vitamine A, ndetse na Vitamine B6,iyo ikaba igira akamaro mu gufasha abakobwa cyangwa abagore bababara mu gihe cy’imihango, ikaringaniza urugero rw’isukari mu maraso ku bagore batwite, ikanarinda ko habaho utuntu dusa n’utubuye tujya mu mpyiko zikananirwa gukora neza.

    Ibinyomoro kandi byongera ubutare bwa ‘fer’ mu mubiri, bigatuma umuntu abona amaraso ahagije, kuko kuyabura bituma umuntu agira ikibazo cya ‘anemia’ ijyana no gucika intege kw’imikaya ndetse no guhorana umunaniro.

    Ibinyomoro kandi bikize no ku butare bwa ‘Magnesium’ bugira uruhare mu buzima bwiza bw’ubwonko n’umutima, ikarinda umuvuduko w’amaraso ukabije, ikarinda n’amaraso kwipfundika. Ikindi kandi ni uko iyi ‘magnesium’ byifitemo yongera ubudahangarwa bw’umubiri, ikanakomeza amenyo n’amagufa.

    Ibinyomoro kandi byigiramo ubutare bwa ‘Zinc’ na ‘Potassium’ iyo ikaba igira akamaro mu kugenzura urugero rw’amazi mu maraso.

    Ku rubuga https://sante.toutcomment.com, bavuga ko mu byiza by’ingenzi by’ibinyomoro, harimo kuba bigabanya ibinure bibi mu mubiri(cholesterol),kubera ko byifitemo ibyitwa ‘fibres’ bituma ibyo binure bibi bisohoka mu mwanda mu gihe umuntu yituma. Kugira ngo umuntu abone ibyiza bituruka ku binyomoro, ni uko yakirya ku mafunguro ya mu gitondo,kugira ngo gikore umunsi wose,ariko ngo ni ingirakamaro n’igihe cyose umuntu yakirira.

    Kuba ibinyomoro bikungahaye kuri Vitamine A,Vitamine C, Calcium, Fer, Phosphore, bituma ari urubuto rwiza, ku bantu bagira ikibazo cyo kubura amaraso ahagije. Vitamine A iboneka mu binyomoro kandi, ifasha umuntu kubona neza, akagira uruhu rwiza, akagira n’imisatsi myiza.

    Ibinyomoro bikize kuri ‘fibres’ zituma umuntu yituma neza, zikamurinda impatwe(constipation), ibinyomoro kandi ngo ni urubuto rwiza ku bantu bakunda kugira ikibazo cy’igogora ry’ibiryo rigenda gahoro cyane.

    Ibinyomoro kandi ngo ni urubuto rwiza ku bantu barwaye Diyabete, kuko rwigiramo isukari nkeya. Ibinyomoro kandi byigiramo ibyitwa ‘calories’ bikeya cyane, ku buryo ngo ari urubuto rwiza ku bantu, bifuza gutakaza ibiro.

    Inkuru bijyanye:

    Umusore agiye kwirihira kaminuza kubera ubuhinzi bw’ibinyomoro

    source https://www.kigalitoday.com/ubuhinzi/ubuhinzi/article/ibinyomoro-wabisarura-imyaka-itatu-bitarasaza-bifitiye-umubiri-akamaro-gakomeye

  • Wari uziko ushobora guca inyuma umukunzi wawe utabizi ?Dore uko bikorwa. – YEGOB #rwanda #RwOT

    Guca inyuma uwo mwashakanye akenshi bivugwa iyo umwe mu bashakanye akundanye cyangwa akoze imibonano mpuzabitsina n'undi mugabo cyangwa umugore. N'ubwo ibyo ari byo ariko hari n'ibindi bikorwa biba ari uguca inyuma n'ubwo hatarimo ubusambanyi.

    Muri ibyo bintu bikorwa n'abashakanye bagacana inyuma mu buryo nabo batabizi harimo ibi bikurikira:

    1.Kwandikira umuntu mudahuje igitsina ikarita imwifuriza ibyiza, imwihanganisha cyangwa se kumuha intwererano ukabikora wenyine udashyizeho ko mubikoze hamwe n'uwo mwashakanye nabyo uba uri kumuca inyuma.

    2.Kubwira ibibazo by'urugo rwawe, umuntu mudahuje igitsina. Ibibazo niba utabasha kubiganira n'uwo mwashakanye bibwire inshuti cyangwa undi muntu wo mu muryango muhuje igitsina. Akenshi ababibwira abo badahuje birangira havuyemo ubusambanyi nubwo biba byaratangiye atari byo bagamije.

    3.Kugira inshuti itari uwo mwashakanye bitari iby'urukundo rweruye ariko na none bitari ubucuti busanzwe. Ugasanga mukoranaho birenze ibisanzwe, amagambo mubwirana ntabwo ari ayo wabwira undi uwo ariwe wese. Abashakanye bakwiye kwirinda izo nshuti.

    4.Gusohokana n'undi muntu utari uwo mwashakanye. Kujya gusangira n'undi muntu mudahuje igitsina, gutembera hamwe cyangwa kumusura bigamije kugirana ibihe byiza gusa nabyo ni nko guca inyuma, wagombye kumara uwo mwanya uri kumwe n'uwo mwashakanye.

    5.Kwandikirana n'undi muntu mudahuje igitsina, muvugana ibintu by'amabanga utabwira uwo mwashakanye, hazamo no kwandikirana kuri whatsapp, kohererezanya amashusho udashaka ko uwo mwashakanye abona nabyo wabyirinda.

    6.Kuvuga nabi uwo mwashakanye; Kuvuga nabi uwo mwashakanye ubibwira uwo mudahuje igitsina cyangwa utari uwo mu muryango, nabyo wabyirinda cyeretse mu gihe hajemo ihohoterwa nibwo wabibwira ababishinzwe nubwo baba badahuje igitsina nawe.

    7.Kwambara ukarimba ubikorera undi muntu: Niba uri kwambara imyenda myiza, cyangwa yihariye ushaka kugira umuntu wemeza utari uwo mwashakanye tangira witekerezeho umenye impamvu uri kubikora.

    8.Gutwarwa umutima n'ikindi gikorwa kurenza uko uwuha uwo mwashakanye urugero gukunda umupira cyane, akabari, ama filime, akazi ka nyuma y'akazi n'ibindi bitwara umutima. Buri wese wubatse yakwisuzuma akareba ko adafite aho aca inyuma uwo bashakanye mu buryo bumwe cyangwa ubundi akabireka.

    9.Kwanga gukora imibonano mpuzabitsina n'uwo mwashakanye nabyo ni bibi. Bitera ibibazo bikaba ari no kwanga ibyo uba wariyemeje mugiye kubana .

    10.Gushyira abana cyangwa ababyeyi bawe mbere y'uwo mwashakanye: Nubwo abana n'ababyeyi ari ingenzi mu buzima ntibagomba gufata umwanya wa mbere ngo bajye bamenya gahunda zawe mbere y'uwo mwashakanye cyangwa abe aribo bakugira inama ukurikiza.

     

    Niba ushaka umukunzi kanda kuri iyi link ukurikize ibisabwa:http://yegob.rw/dating

    Like this:

    Like Loading…

    Source : https://yegob.rw/wari-uziko-ushobora-guca-inyuma-umukunzi-wawe-utabizi-dore-uko-bikorwa/

  • Amafaranga ya Desire Mbonabucya yemereye Amavubi yaheze he? Yaba yarabeshye? #rwanda #RwOT

    Nyuma y’uko uwahoze ari kapiteni w’ikipe y’iguhugu Amavubi, Desire Mbonabucya yemereye abakinnyi b’Amavubi barimo gukina CHAN 2020 muri Cameroun miliyoni 5 mu gihe baba bageze muri 1/4, bisa nk’aho amaso yaheze mu kirere.

    Desire Mbonabucya yemereye Amavubi ko mu gihe yagera muri 1/4 cya CHAN 2020 irimo kubera muri Cameroun azaba miliyoni 5 ndetse azarara abagezeho.

    Tariki ya 26 Mutarama 2021 Amavubi yatsinze Togo ahita azamuka muri 1/4 cya CHAN 2020.

    Iminsi ibaye ine ariko ntabwo aya mafaranga aroherezwa.

    Desire Mbonabucya aherutse kumvikana avuga ko impamvu ataratanga aya mafaranga ari uko hari ibigomba gukurikizwa kugira ngo atangwe ndetse akaba yaratangiye kuvugana na FERWAFA ndetse na perezida wa FERWAFA.

    Yagize ati“Njyewe navuganye na perezida wa federasiyo, navuganye na kapiteni, umutoza twarandikiranye nta kibazo gihari kuko federasiyo… nako ntabwo nshobora kwisobanura kuko twamaze kumvikana na federasiyo uko amafaranga azatangwa.”

    Nyuma y’uko FERWAFA isohoye itangazo risaba abantu bifuza gutanga ishimwe mu ikipe y’iguhugu agomba kwandikira Minisitiri wa Siporo abisaba, umunyamabanga wa FERWAFA yabwiye ISIMBI ko babikoze bitewe n’uko hari ababegereye babasaba uburyo batanga iri shimwe, gusa kugeza uyu munsi nta muntu urandika.

    Yakomeje abwira ISIMBI ko ku ruhande rwa Desire Mbonabucya ntacyo baravugana ndetse no ku giti cye nta kintu bigeze babivuganaho nta n’ibaruwa ye barakira.

    Amafaranga ya Desire Mbonabucya aracyategerejwe

    Miliyoni 5 ni zo Desire Mbonabucya yashyiriyeho Amavubi

    Source : http://isimbi.rw/siporo/article/amafaranga-ya-desire-mbonabucya-yemereye-amavubi-yaheze-he-yaba-yarabeshye

  • Perezida Museveni yafatanywe igihanga kigaragaza uburyo yibye amatora aho mu biro by'itora bigera kuri 348 yagize 100% nta mfabusa nta nuwasibye #rwanda #RwOT

    Perezida Museveni yagize amajwi 100% mu biro byitora bigera kuri 348 bibarizwa mu turere dutatu aritwo Kiruhura, Kazo na Isingiro nkuko byagaragajwe n'impapuro zigaragaza uko amatora yagenze muri Uganda zishyizwe hanze na Komisiyo ishinzwe amatora. Muri ibyo biro by'itora, Museveni yagize amajwi 100% mu karere ka Kiruhura kari gafite ibiro by'itora bingana na 143, 100% muri Kazo gafite ibiro by'itora 113 akagira kandi 100% mu karere ka Isingiro gafite ibiro by'itora 92.

    Twibutse ko mu matora y'ubushize muri 2016 mu karere ka Isingiro, Museveni yagize 100% ku biro bimwe by'itora ariko ubu agira 100% mu biro by'itora 92. Mu matora y'ubushize kandi akagaragaza ko mu biro by'itora bimwe muri ako karere aribyo ubwitabire bw'amatora bwageze ku 100%

    Kuri iyi si dutuyemo, ubwitabire bw'amatora ku gipimo 100% mu karere kose gafite ibiro by'itora bisaga 100, bishoboka byonyine muri Uganda. Ariko ibi bigaragaza ko hatabazwe amajwi abaturage batoye ahubwo ari uburiganya nkuko byagiye bigaragazwa na videwo zafashwe zigaragaza abasirikari n'abayoboke ba NRM batora ku bwinshi Museveni. Hari kandi nabibiye Museveni amajwi Ikindi ni uko bakoresheje urutonde rwo mu matora ya 2016 bigaragaza ko muri utwo turere dutatu nta wapfuye, nta nuwimutse ndetse nta nuwarwaye ku munsi w'amatora. Si muri utwo turere dutatu gusa Museveni yagize 100%, kuko hari ibiro by'itora mu turere twa Ssembabule, Nakaseke, Ibanda na Ntungamo. Bobi Wine ubwo imibare yajyaga hanze yagize ati 'Hagire umuntu ubwira General Museveni ko niyo ujya kwiba amatora ushyiramo ubwenge.

    Dukurikije imibare yatanzwe na Komisiyo y'Amatora yagize 100% muri bimwe mu biro by'itora, ndetse na 95-99 % ahandi henshi. Ibi bivuga ko abiyandikishije bose bitabiriye amatora, nta wapfuye, ngo yimuke cyangwa ajye hanze y'igihugu, ndetse ngo haboneke imfabusa'

    Mu cyumweru gishize umwe mu batoreye Isingiro (aho Museveni yagize amajwi 100%) wahawe izina rya Nyakato, yabwiye ikinyamakuru The Observer ko Museveni atari gutorwa mu Burengerazuba bwa Uganda, ko nawe yagiye gutora ku biro by'itora byari biherereye ku rusengero rwa pantekositi rwa Busingye ahagana saa tanu z'amanywa nyuma akabwirwa ko yatoye kandi agifite ikarita ye y'itora n'indangamuntu bikoreshwa mu matora. Yakomeje agira ati 'Naketse ko arinjye njyenyine, nyuma haza umuntu utwara Boda boda (Moto zitwara abagenzi) atubwira ko nawe byamubayeho.

    Bigeze mu masaha ya ni mugoroba dusanga abantu benshi aribyo byababayeho, nabo batorewe' Kuva ku munsi w'amatora ya Perezida muri Uganda yaba, hagiye hacicikana amavidewo menshi agaragaza uburyo abantu biba amatora, bari kumwe n'inzego z'umutekano. Bobi Wine yagize amajwi 38,43% naho Perezida Museveni agira 58% nkuko byemejwe na Komisiyo ishinzwe amatora. Abanyamategeko ba Bobi Wine batangaje ko bazatanga ikirego mu rukiko rw'ikirenga kuri uyu wa mbere tariki ya 1 Mutarama 2021 bamagana ibyatangajwe na Komisiyo y'amatora.

    The post Perezida Museveni yafatanywe igihanga kigaragaza uburyo yibye amatora aho mu biro by'itora bigera kuri 348 yagize 100% nta mfabusa nta nuwasibye appeared first on RUSHYASHYA.

    Source : https://rushyashya.net/perezida-museveni-yafatanywe-igihanga-kigaragaza-uburyo-yibye-amatora-aho-mu-biro-byitora-bigera-kuri-348-yagize-100-nta-mfabusa-nta-nuwasibye/

  • Kamonyi-Ngamba: Wa mugabo bivugwa ko yakuwemo imyenda na Gitifu, umugore we ati 'Sibyo!' #rwanda #RwOT

    Kuri uyu wa 28 Mutarama 2021, abagize inama y'umutekano itaguye y'Akarere ka kamonyi bagiye kuganira n'abaturage bo mu Kagari ka Kabuga, by'umwihariko mu Mudugudu wa Musenyi, ahavuzwe Umunyamabanga nshingwabikorwa w'Akagari wagiranye ikibazo n'abaturage barimo n'uwavuzwe ko yamwambuye ubusa. Umugore we avuga ko nta muyobozi wambuye umugabo we ubusa nubwo ngo mu kuza kumufata batitwaye neza, ibyo ahurizaho n'umuyobozi w'Akarere.

    Nyirantegerejimana Pascasie, umugore wa Iyakaremye Jean Bosco bakunda kwita Mapengu avuga ko abavuze ko ubuyobozi bwambuye umugabowe ubusa atari byo, ko ahubwo icyabaye ari uko mu gihe bagundaguranaga bashaka kumwambika amapingu yari akenyeye igitenge yasohokanye ava mu nzu hanyuma kiragwa.

    Abagize inama y'umutekano itaguye y'Akarere ka kamonyi bari kumwe n'abaturage mu gushaka umuti w'ikibazo.

    Avuga ko umugabo yabyutse agiye kwihagarika akenyeye igitenge, muri uko gusohoka ngo yakuyeho urugi bahita bamwinjirana mu masaha ya mugitondo ahagana i saa kumi n'imwe n'igice. Muri uko kurwana bamusohora ngo nibwo igitenge yari akenyeye cyaguye. Avuga ko nawe ubwe biba yasohotse yambaye isujipe, aho ababyeyi batabaye ngo aribo bamukenyeje igitenge.

    Akomeza ati' Byarakomeje abaturage barahurura, babonye ko bikomeye(abayobozi) ipingu bari bamwambitse akaboko kamwe bahita barimukuramo ariko ntawamwambitse ubusa. Ubwo rero abonye abayobozi barimo bavugana, sinzi ibyo bapangaga nawe yahise yiruka yambaye ubusa asohoka hanze y'urugo, abaturage barahari rwose bamubonye yambaye ubusa'.

    Tuyizere Thaddee, umuyobozi w'agateganyo w'Akarere ka Kamonyi avuga ko nubwo uwari ugiye gufatwa byari ngombwa, ariko ngo n'uburyo abagiye kumufata bitwaye bigaragara ko bidahwitse. Avuga ko nubwo umuntu yaba ari mu makosa hari uko ugiye kumufata aba asabwa kwitwara.

    Abaturage batari bake bitabiriye iyi nama.

    Avuga ati' Nubwo hari abanyamakosa nabo babyemera, n'abaturage bavuga bati uyu yaratuzambije, n'abantu bavuga umwe babiri batatu bati uyu nguyu atubujije umutekano, ariko iyo ugiye kumufata witwara ute, ugisha inama ute?, abayobozi burya ikibaye kiba n'inyigisho'.

    Ati' Ubuyobozi hari uburyo bugomba kubana n'abaturage, abanyamakosa hari uburyo bagomba gufatwa, ibyo byose bisaba ubwitonzi bw'umuyobozi no kubara ngo aha ibyo ngiyemo biragaragara bite mu maso y'abandi. Abayobozi hari uburyo batitwaye neza mu kujya gufata aba bantu ari nayo mpamvu yenda babagerekeraho. Burya iyo umuntu akubonye urwaho n'ibyo atari ku kuvuga arabivuga, nibyo atari guhimba arabihimba kubera ko watanze icyo cyuho'.

    Umugore wa Iyakaremye Jean Bosco, avuga ko umugabo we nta wamwambitse ubusa.

    Iyakaremye Jean Bosco bakunda kwita Mapengu, kuva ikibazo cyaba kugera inama iterana ntawe uzi aho aherereye. Mu mpamvu zo ku mufata, harimo kuba yari yaranze kwitaba urwego rw'ubugenzacyaha-RIB ku kibazo umugore wa mukuru we yari yararegeye ko yamwangirije Moto ndetse amuhozaho iterabwoba. Gusa na none muri iyi nama, hari abagore bamushinje kubahohotera, bavuga ko batanze ibirego kenshi ku kagari ariko yatumizwa ntiyitabe.

    Munyaneza Theogene / intyoza.com

    Source : http://www.intyoza.com/kamonyi-ngamba-wa-mugabo-bivugwa-ko-yakuwemo-imyenda-na-gitifu-umugore-we-ati-sibyo/

  • Christopher yagaragaje amarangamutima n'agahinda kenshi yatewe no kubura Mama we witabye Imana mu minsi ishize – YEGOB #rwanda #RwOT

    Ku gicamunsi cyo ku wa kane w'icyumweru gishize, tariki ya 21 Mutarama 2021 nibwo inkuru yasakaye ivuga ko Gahongayire Marie Mativitas, Mama w'umuhanzi Muneza Christopher, yitabye Imana. Iyi ni inkuru y'incamugongo yababaje benshi by'umwihariko abo Christopher, abo mu muryango wa Christopher, inshuti za hafi za Christopher ndetse n'abafana ba Christopher muri rusange. Mu masaha make ashize, Christopher abinyujije ku rukuta rwe rwa instagram yatangaje amagambo yuzuyemo amarangamutima ndetse n'agahinda kenshi yatewe no kubura umubyeyi we.

    Ifoto y'urwibutso ya Christopher na Mama we

    Nkuko byagaragaye mu magambo Christopher yatangaje abinyujije ku rukuta rwe rwa instagram Christopher yavuzemo ibyiza yibukira kuri Mama we birimo nk'ukuntu yamufashaga gukora imikoro yo mu rugo (homeworks), ukuntu bakundaga gutera urwenya (jokes) bari kumwe ndetse anavuga ukuntu Mama we yari umuhanga cyane (genius). Christopher kandi yashimye Imana yamumuhayeho Umubyeyi we. Mu magambo ye bwite, Christopher yagize ati: 'Mom! I'm confused! And my life is empty without you. I haven't posted anything yet because i didn't know what to say. But on my birthday☝🏾 the day we met for the first time☺️ I think this is the right time to tell you how I am feeling now. I'm writing this with tears in my eyes and a smile on my face and this feeling makes sense because that's how you used to be, very funny and very serious! Mom no matter where I am or what I'm doing your memories will keep me smiling. I'll never forget the way you used to make homeworks funny for me to focus. Mom I miss you already and I'm tempting to call you! I miss your jokes, our debates, your very deferent point of views. Mom you were a genius and I hope I inherited it. I'll forever thank GOD for choosing you to me my mother🙏🏾. I promise to look after my father and my siblings, I'll make you proud and that's my goal number 1 now. May god that you have been working so hard for receive your soul and rewards you with happiness for eternity. I love you Mom'.

     

    View this post on Instagram

     

    A post shared by Christopher Muneza 🇷🇼 (@tophermuneza)

     

    Like this:

    Like Loading…

    Source : https://yegob.rw/christopher-yagaragaje-amarangamutima-nagahinda-kenshi-yatewe-no-kubura-mama-we-witabye-imana-mu-minsi-ishize/

  • Amavubi : Buri mukinnyi ubu amaze kugira 5000$ y’agahimbazamusyi #rwanda #RwOT

    Aya mafaranga, arimo 500 USD bahawe ku mukino banganyijemo na Uganda n’andi 500 USD yo ku wo banganyijemo na Maroc n’andi 1000 USD batsinzemo Togo hakaza n’andi 3000 USD y’uko binjiye muri 1/4 cya ririya rushanwa.

    Ubusanzwe ikipe y’Igihugu iyo itsinze umukino, muri mukinnyi ahabwa agahibazamusyi ka 1000 USD yaba anganyije bagahabwa 500 USD.

    Ibi bituma buri mukinnyi nibura azahabwa 5000 USD mu gihe bivugwa ko bagenewe akandi gashimwe ka 3000 USD mu gihe batsinda Guinea bakinjira muri 1/2 .

    Bivuze ko nibura baramutse bageze muri 1/2 bazahabwa 8000 USD ni ukuvuga buri mukinnyi yazahabwa agera muri miliyoni 8 Frw.

    Ubusanzwe Ikipe y’Igihugu itanga 1000$ kuri buri mukinnyi nk’agahimbazamusyi ko gutsinda umukino mu gihe iyo bavuye mu cyiciro kimwe bajya mu kindi, buri umwe ahabwa miliyoni 3 Frw (3000$).

    Kuva ikipe y’Igihugu yajya muri ririya rushanwa, hari abantu ku giti cyabo bagiye batangaza ko mu gihe yatsinda umukino bazabagenera ishimwe runaka.

    Ishyirahamwe ry’Umupira w’Amaguru mu Rwanda (FERWAFA) ryatangaje ko umuntu wese wifuza guha ishimwe ikipe y’Igihugu, agomba kubanza kwandikira Minisitiri wa Siporo asaba uburenganzira.

    Itangazo rya FERWAFA ryavugaga ko uzajya yemererwa gutanga atazajya arenza iminsi itanu y’akazi ataratanga iryo shimwe yemeye.

    UKWEZI.RW

    Source : http://www.ukwezi.rw/Imikino/article/Amavubi-Buri-mukinnyi-ubu-amaze-kugira-5000-y-agahimbazamusyi

  • DRC : Minisitiri w’Intebe watakarijwe icyizere yeguranye na Guverinoma ye #rwanda #RwOT

    Sylvestre Ilunga Ilunkamba yatangaje ubwegure bwe ku mugoroba wo kuri uyu wa Gatanu Tariki 29 Mutarama 2021.

    Sylvestre Ilunga utifuje kugaruka kuri politiki ya kiriya gihugu, yashimiye Perezida Félix Tshisekedi wari wabagiriye icyizere na Guverinoma ye akaba yemeye kwegura nk’uko biteganywa n’Itegeko Nshinga kandi ko abamaze kuyoboka inzira yo guhererekanya ubuyobozi mu nzira z’amahoro.

    Yeguye nyuma y’uko Inteko Ishinga Amategeko ya kirya gihugu imutakarije icyizere ku buryo mu gihe cy’amasaha 24 yagombaga gushyikiriza Perezida wa Repubulika ubwegure bwe.

    Iki cyemezo cyafashwe ku wa 27 Mutarama 2021, Abadepite 367 bari bagitoye bagishyigikira mu gihe hari barindwi batoye bakirwanya.

    Abasesengura ibya Politiki ya kiriya gihugu bavuga ko kweguza Sylvestre Ilunga Ilukamba ari amahirwe kuri Perezida Prezida Felix Tshisekedi nyuma yo kutajya imbizi n’impuzamashyaka FCC ya Kabila Joseph.

    Prezida Felix Tshisekedi wagiye ashimwa gutsura umubano n’ibihugu by’ibituranyi kuva yatorwa no guhashya imitwe yitwaje intwaro iri muri kiriya gihugu, yagiye ananizwa n’iyi Guverinoma yatakarijwe icyizere yari yiganjemo abashyigikiye Joseph Kabila.

    Bariya basesenguzi bavuga ko Prezida Felix Tshisekedi namara gushyiraho Minisitiri w’Intebe yihitiyemo ibintu bishobora kujya mu buryo ubundi akabasha gukorana n’abo bahuza.

    UKWEZI.RW

    Source : http://www.ukwezi.rw/Mu-mahanga/Politiki/article/DRC-Minisitiri-w-Intebe-watakarijwe-icyizere-yeguranye-na-Guverinoma-ye