Author: webrwanda

Sindayigaya Ramadhan uzwi nka Chef Rama yakuze ashaka kuzibera injeniyeri mu by'ubwubatsi ariko kuva mu 2007 ubwo yari mu mashuri yisumbuye yatangiye guteka muri za restaurants kuko abantu bamubonagamo ubwo bushobozi na we akabikunda.

Yinjiye muri Kaminuza (KIST) mu 2009 anakora akazi ko guteka. Nyuma yagiye kwiga amasomo yerekeye ibyo guteka muri Kenya, mu bihugu bitandukanye by'i Burayi no muri Florida Atlantic University muri Amerika, ahavana impamyabushobozi yanamushyize ku rwego rwisumbuye.

Uyu mugabo w'imyaka 38 yabwiye IGIHE ko yatetse amafunguro inshuro nyinshi agomba kuribwa n'Umukuru w'Igihugu cy'u Rwanda, haba igihe ari mu nama n'igihe yabaga ageze muri hoteli mu buryo bwihariye.

Ati 'Hari igihe nari chef muri restaurant imwe ya Kigali Marriott Hotel, yitwa Cucina [Perezida] araza (ntabwo aguteguza wowe). Wenda abandi baba babizi ariko wowe nka chef, uba mu gice cy'inyuma, wowe ujya kubona ukabona hari abantu b'imena (VIP), ibyo bakeneye bikaza, ukabikora ubizi neza ko ari ibye. Ntabwo ugira igihunga bitewe n'uko ibyo ukora uba usanzwe ubikora ahubwo wowe icyo wishimira ni uko noneho urabizi ko ugiye kugaburira umukuru w'igihugu.'

Mu gihe mu Rwanda haberaga inama ya Afurika Yunze Ubumwe mu 2018, Chef Sindayigaya wakoraga muri Kigali Marriott Hotel yatekeye abakuru b'ibihugu barenga batandatu, kandi bose bagenda banyuzwe.

Ati 'Ni ibintu biba bidakunze kubaho[…]kubona rero amahirwe nk'ayo yo kwakira abantu nk'abo uri 'chef' ugatekera abaperezida batandukanye kandi bose bakagenda nta kibazo bagize, bishimye, ishusho y'igihugu wayitanze[…]ni ikintu umuntu wese yakwifuza.'

Mu bakuru b'ibihugu bari aho harimo uwa Kenya n'abandi bo mu bihugu byo mu Burengerazuba bwa Afurika.

Guteka amafunguro arajya ku meza y'Umukuru w'Igihugu…

Chef Sindayigaya umaze imyaka 17 mu kazi ko guteka, amaze gukora muri hotel z'inyenyeri eshanu zitandukanye zirimo Serena Hotel, Kigali Marriott Hotel, Radisson Blue n'izindi kandi Perezida Kagame rimwe na rimwe akaba umwe mu barahabwa amafunguro yatetse.

Ati 'Nk'uko ubibona n'ahandi iyo aragera ahantu byanga bikunda ibintu bigomba guhinduka. Buriya serivise agomba gukenera, aba agomba kuba afite abantu babizobereyemo, babifitemo ubumenyi. Ubumenyi ufite ntabwo buba bukemangwa ahubwo ni ko biba biteguye, niba ari amafunguro aba agomba kuba afite umuntu ugenzura uko amafunguro ye agomba gutegurwa. Rero nk'umu-chef muri icyo gihe ntabwo wagira guhuzagurika ariko uba ugomba kuba maso mu byo ukora ugakora ibyo akeneye byose.'

Mu gihe hamurikwaga igitabo cyitwa Uruhimbi mu 2024 kivuga ku ndyo nyarwanda, Chef Sindayigaya na bagenzi be batatu batetse amafunguro agikubiyemo ndetse hari abayobozi mu nzego nkuru z'igihugu zitandukanye bayafunguraho.

Yatekeye umuyobozi wo muri Ethiopia arumirwa

Nyuma yo gukora muri Kigali Marriott Hotel bakabona hari byinshi igikoni kimaze kunguka, Chef Sindayigaya yagiye gukorera muri Guinee Conakry, no mu bindi bihugu bitandukanye bya Afurika.

Ati 'Nigeze kwakira Minisitiri w'Intebe wa Ethiopia, mu Burengerazuba bwa Afurika. Bwari ubwa mbere nakiriye itsinda ry'abanyamahanga kandi ibyo bararya ari njye wabitetse kandi bidakomoka mu muco wanjye. Icyo gihe narabiteguye, bari abantu benshi ari kumwe na Perezida Alpha Conde, ibyo kurya bariye icyo gihe ni njye wabitetse kandi mbiteka mu mwimerere w'iwabo.'

Kuva muri Ethiopia ujya muri Guinne Connakry harimo intera ya kilometero zirenga 7800. Minisitiri w'Intebe wa wa Ethiopie yatunguwe no gusanga aho hantu hari amafunguro asa neza nk'ayo yasize mu rugo.

Ati 'Kugira ngo urenge ibyo bilometero noneho unahasange bya byo kurya by'iwanyu uba ugeze mu rugo. Noneho umu-chef atari uwo muri icyo gihugu. Ibyo biri mu bintu byanshimishije. Kubona umuntu umeze nka Perezida mu gihugu cy'iwabo akubwira ati 'ni sawa' uhagaze imbere y'amafunguro akagukora mu ntoki uravuga ngo akazi kakozwe.'

Chef Rama avuga ko mu myaka iri imbere yifuza kuzashinga igikorwa kizatuma azamura ibendera ry'u Rwanda mu mahanga binyuze mu mwuga wo guteka.

Uyu mugabo ahamya ko guteka amafunguro aryoshye biva ku buryo uwayateguye yitwaye

Chef Sindayigaya Ramadhan ni umwe mu batetsi beza mu Rwanda

Afatanyije na bagenzi be banditse igitabo cyitwa Uruhimbi kirimo indyo nyarwanda

Chef Rama yatekeye abakuru b’ibihugu byinshi

---

Source : http://igihe.com/amakuru/u-rwanda/article/yatetse-amafunguro-agaburirwa-aba-perezida-barimo-kagame-chef-sindayigaya

Abagize urugaga rw'Abikorera/PSF bo mu karere ka Kamonyi, kuri uyu wa 02 Gicurasi 2025 bahuriye ku rwibutso rw'Akarere ka Kamonyi ruherereye mu Murenge wa Gacurabwenge ahazwi nko mu Kibuza bibuka bagenzi babo bishwe muri Jenoside yakorewe Abatutsi mu Rwanda mu 1994. Nyuma yo Kwibuka, bafatanije n'Umuryango SEVOTA baremera ababyeyi b'Intwaza baturutse mu mirenge yose uko ari 12 igize akarere ka Kamonyi.

Munyankumburwa Jean Marie, umuyobozi w'urugaga rw'abikorera mu karere ka Kamonyi avuga ko mu gihe bamwe muri bagenzi babo bakoresheje imbaraga bari bafite n'ubutunzi bwabo bakica Abatutsi, ko icyo bo nk'abikorera bashyize imbere uyu munsi ari ukubaka ubumwe n'urukundo bafatanya mu gukoresha imbaraga bafite ndetse n'ubutunzi bwabo mu gukora ibikorwa byiza byubaka Igihugu kuko u Rwanda rufite ubuyobozi bwiza.

Yagize kandi ati' Abatutsi bikoreraga bari mu makomine yahujwe akavamo Akarere ka Kamonyi ndetse n'abandi mu Gihugu baribasiwe cyane ndetse n'ababakomokagaho. Mu gihe bicwaga, abicanyi basahuye ibicuruzwa byabo bituma abahigwa babahiga bukware kuko abakoraga Jenoside babwirwaga ko ni hagaragara ko hari uwarokotse bashobora kuzasubiza ibyo basahuye, ibyo bikongera ubukana bw'abicanyi'.

Yakomeje ati' Ikibabaje kurusha ibindi ni uko abari inyuma y'uko guhigwa bukware byakorwaga na bagenzi babo bari basangiye umwuga, bitwa ko ari inshuti barasangiye akabisi n'agahiye. Kwibuka abikoreraga ndetse n'abandi bazize Jenoside yakorewe Abatutsi nka PSF tuzakomeza kubikora hagamijwe kugira ngo ayo mateka atazibagirana ariko kandi tunakumira, tunahangana n'Ingengabitekerezo ya Jenoside'.

Munyankumburwa, ahamya ko abikorera bo mu karere ka Kamonyi bashima, ndetse bazirikana Urukundo, Ubwitange, Ubutwari bw'Ingabo zari iza RPF-Inkotanyi zari ziyobowe na Perezida wa Repubulika, Paul Kagame mu gihe cyo guhagarika Jenoside yakorerwaga Abatutsi.

Ashimangira ko kubera Inkotanyi u Rwanda rwavuye mu mva rukaba Igihugu, aho ubu abikorera batekanye, bacuruza bizeye ko ibyo bakora ntawabibavutsa. Ati' INKOTANYI TURABASHIMA CYANE'.

Agira kandi ati' Ubugwari bw'Abacuruzi batubanjirije bagafata ubutunzi bwabo bakabukoresha mu gukora Jenoside, uruhande rumwe bitubera isomo nk'Abikorera kuko ubu twebwe abacuruzi bacu tubakangurira gukoresha ubutunzi bwabo mu kubaka Igihugu. Ibyo dukora byose dufite aho tubisarura, dufite ubuyobozi bukuru bw'Igihugu cyacu budukangurira gukora ibikorwa byubaka Igihugu aho kugisenya. Aho gukoresha ubutunzi bwacu mu gusenya Igihugu ahubwo tukabukoresha mu kucyubaka'.

Benedata Zacharie, Perezida w'Umuryango IBUKA mu Karere ka Kamonyi yabwiye abaje kwibuka ko Jenoside yakorewe Abatutsi yagize umwihariko ku bacuruzi kuko bari bafite ubushobozi ariko bimwe nu byo bacuruzaga biherwaho babica. Yaba ari imihoro, imodoka zifashishijwe n'ibindi bikoresho kugira ngo barimbure Abatutsi bahigwaga barimo abikoreraga.

Ashimangira ko bidashoboka ko hari uwakuraho ko Jenoside yakorewe Abatutsi yabaye mu 1994, ariko kandi na none ngo birashoboka ko buri munsi dusubiza agaciro abakambuwe bakabura ubuzima. Ashimira PSF kuba yarakomeje kuba hafi abarokotse Jenoside batishoboye mu myaka yose itambutse.

Ashimira Urugaga rw'Abikorera/PSF bafashe uyu mwanya bakawugira ngaruka mwaka, aho bifatanya mu kunamira, kuzirikana no gusubiza agaciro abikoreraga bambuwe ubuzima, bakicwa muri Jenoside yakorewe Abatutsi.

Ati' Ubumuntu bwacu bugomba kuruta urwango kandi guharanira Ubumwe bikaba ikintu dushyize imbere cyane cyane abikorera. Nubwo Igihugu cyamennye amaraso menshi ariko Abarokotse Jenoside basabwa gukomera kandi tukizera ko nta mahano ya Jenoside yasubira ukundi kubera Ubuyobozi dufite bwamagana abashaka kwimakaza amacakubiri'.

Dr Nahayo Sylvere, Umuyobozi w'Akarere ka Kamonyi yashimiye Abikorera mu Karere ka Kamonyi kuri iki gikorwa bateguye cyo Kwibuka Jenoside yakorewe Abatutsi kandi bakanakitabira. Yagarutse ku nsanganyamatsiko y'uyu mwaka yo Kwibuka igira iti' TWIBUKE TWIYUBAKA', yibutsa ko hari aho u Rwanda rwavuye n'aho rugeze, ko kandi byose bikeshwa imiyoborere myiza.

Yashimiye Inkotanyi zahagaritse Jenoside yakorerwaga Abatutsi ndetse zikabohora u Rwanda zirangajwe imbere na Nyakubahwa Perezida wa Repubulika, Paul Kagame. Yagize kandi ati' Kwibuka ni igikorwa tuzakomeza gukora imyaka yose kugira ngo tubashe gusubiza Abishwe agaciro bambuwe kandi ari nako tuboneraho umwanya wo guhumuriza abayirokotse'.

Dr Nahayo Sylvere, yibukije ko nubwo hari ingaruka zikomoka kuri Jenoside yakorewe Abatutsi, ko ntawe zikwiye gutera ubwoba, ko ahubwo buri wese akwiye guharanira kubaka Ubumwe n'Ubudaheranwa bw'Abanyarwanda kandi buri wese agaharanira gukumira icyo aricyo cyose cyabuhungabanya kuko ariwo musingi w'Iterambere ry'u Rwanda n'Abanyarwanda.

Nyuma y'igikorwa cya PSF cyo Kwibuka ku nshuro ya 31 Jenoside yakorewe Abatutsi mu Rwanda, by'umwihariko abikoreraga bazize Jenoside yakorewe Abatutsi mu 1994, hakurikiyeho igikorwa cyo kuremera Intwaza zaturutse mu Mirenge yose uko ari 12 Igize Kamonyi. Banahawe inama n'impanuro, basabwa guharanira kubaka ahazaza heza, kubaka Urukundo muribo n'abandi, ari nako bakomeza kuba mu murongo mwiza wo kubaka Igihugu no gufasha mu myumvire igamije ko buri wese agaragaza uruhare rwe mu mpinduka nziza.

Nyuma yo kunamira no gushyira indabo ku rwibutso ruri mu Kibuza ruruhukiyemo imibiri y'Abatutsi bishwe muri Jenoside yakorewe Abatutsi, hakurikiyeho kujya kuganira no kuremera Intwaza.

Munyaneza Théogène

Source : https://www.intyoza.com/2025/05/04/kamonyi-abikorera-psf-bibutse-bagenzi-babo-bishwe-muri-jenoside-yakorewe-abatutsi-banaremera-intwaza/

Yari amarushanwa yo kwandika inkuru, gukora filime n'ibindi, yahuje abo mu bihugu birindwi birimo Uganda, u Rwanda, Kenya, Ethiopia, Sénégal, Ghana na Nigeria.

Yateguwe n'umushinga witwa “We Can Work” ugaragaza ko abafite ubumuga bashobora gukora neza akazi ndetse bakagera ku musaruro ushimishije.

Ushyirwa mu bikorwa na Light For The World ku nkunga ya Mastercard Founfation.

Ni amarushanwa ahuza abantu bafite ubumuga aho basangizanya inkuru banditse zishobora guhindura ubuzima bwa benshi.

Rugemandinzi Joseph ufite ubumuga bw'ingingo n'ubwo kutabona, afite icyiciro cya gatatu cya kaminuza mu gukora inyongeramusaruro hifashishijwe ikoranabuhanga yakuye muri Maroc.

Rugemandinzi usanzwe ari n'umwanditsi wa filime yabwiye IGIHE ko amarushanwa bitabiriye ari urubuga rwo kugaragarizaho impano zitandukanye zibanda mu guhindura ubuzima cyane cyane ku bafite ubumuga.

Ati 'Asobanuye ikintu kinini cyane cyane ku muntu ufite ubumuga mu rwego rwo kwerekana ko na we ashoboye kandi ashobora kugira icyo akora mu kwiteza imbere n'igihugu muri rusange. Nkanjye nagira umusanzu ntanga ku iterambere rya filime Nyarwanda kuko narabyize.'

Muri ayo marushanwa Rugemandinzi yanditse inkuru yanditse ishingiye ku mugabo wavutse abona ariko aza kugira ikibazo cy'amaso amaze gukura.

Icyakora uwo mugabo ntiyaheranwe n'ubwo bumuga ahubwo yakomeje gutanga umusaruro nk'uko yakoraga ataragira ubumuga.

Ati 'Uwo mugabo yari azi gukora kuko yabohaga ibitebo akajya kubigurisha akiri umwana ariko amaze kugira ikibazo cy'ubumuga bwo kutabona arakomeza arabikora kandi neza nk'uko yabikoraga mbere.'

Mfitumukiza Patrick wiga ibijyanye n'imiyoborere mu kwihangira imirimo muri African Leadership University, we yakoze ku nkuru igaruka ku buzima bwe.

Yabwiye IGIHE uburyo yabashije kwiteza imbere agakomeza amashuri nubwo afite ubumuga bw'ingingo.

Icyakora yabanje guhura n'imbogamizi zo kudatinyuka akumva ko atashobora gukora ibintu runaka nko kumva ko atabona akazi kubera ubumuga afite.

Ati 'Ngatekereza ko bagaha utabufite kandi ibyo ni ibintu umuntu yishyira mu mutwe ugasanga bitumye aguma aho ari ndetse ntabashe gutera imbere.'

Mu bihembo Rugemandinzi na Mfitumukiza batsindiye harimo guhabwa imenyerezamwuga no kuba ambassaderi w'umushinga wa 'We Can Work'.

Uyu mushinga uteganya ko mu myaka umunani iri imbere uzatanga akazi ku rubyiruko rufite ubumuga 1,000,000 mu bihugu birindwi birimo Uganda, u Rwanda, Kenya, Ethiopia, Sénégal, Ghana na Nigeria.

Rugemandinzi Joseph ufite ubumuga bw'ingingo n'ubwo kutabona ni inzobere mu gukora inyongeramusaruro hifashishijwe ikoranabuhanga

Mfitumukiza Patrick ufite ubumuga bw’ingingo ari mu batsinze mu marushanwa yo kwandika

---

Source : http://igihe.com/amakuru/u-rwanda/article/ubumuga-ntibwababujije-gukabya-inzozi-inkuru-ya-rugemandinzi-na-mfitumukiza

Umutwe wa M23 urwanya ubutegetsi bwa Perezida Félix Tshisekedi wa Repubulika ya Demokarasi ya Congo, uherutse gukora operasiyo idasanzwe i Sake, irangira wiciyemo abarwanyi benshi ba FDLR abandi ubafata mpiri, barimo n'abakomanda babiri bo ku rwego rwo hejuru.

Iyi operasiyo yakozwe hagati muri iki cyumweru, mu gace kitwa Mukimoka, gaherereye i Sake mu Ntara ya Kivu y'Amajyaruguru, mu Burasirazuba bwa RDC.

Byari nyuma y'uko M23 ibonye amakuru ko ihuriro ry'ingabo zishyigikiye Leta ahanini rigizwe na FDLR irimo abakoze Jenoside yakorewe Abatutsi mu Rwanda ryateguragaga igitero kuri M23. Ni bwo M23 yagabye igitero cyihuse kandi gikaze.

Amakuru yizewe Kasuku MEDIA yahawe n'umwe mu barwanyi ba M23, avuga ko iyo operasiyo yarangiye hafashwe abarwanyi 83 ba FDLR, barimo Colonel umwe n'umujenerali umwe.

Hanatwarwa intwaro nyinshi, amasasu ndetse n'ibikoresho by'itumanaho byari bifite agaciro gakomeye mu bikorwa bya gisirikare.

Aka gace ka Sake, aho iyi operasiyo yabereye, kari mu ntera y'ibilometero 27 uvuye mu mujyi wa Goma, umurwa mukuru w'Intara ya Kivu y'Amajyaruguru. M23 yahigaruriye mu mpera z'umwaka ushize, mbere y'uko ifata Goma ku wa 27 Mutarama 2025.

Kuva M23 ifashe ibice byinshi bya Kivu y'Amajyaruguru n'Amajyepfo, harimo n'umujyi wa Sake, ingabo za Leta zakomeje kugaba ibitero kugira ngo zongere kubyigarurira.

Ariko M23 nayo yakomeje gukora operasiyo zidasanzwe mu rwego rwo kuzirwanya no gukomeza kugenzura ibyo bice.

Ibi byakurikiye ibitero by'ihuriro ry'ingabo za Congo byagabwe i Goma ku wa 11 Mata 2025, byatumye M23 isubiza ibintu ku murongo binyuze mu yindi operasiyo yihariye yatumye umutekano n'ituze bisubira mu mujyi wa Goma no mu nkengero zawo.

Source : https://kasukumedia.com/m23-yagabye-igitero-gikomeye-i-sake-ifata-abarwanyi-83-ba-fdlr-barimo-nabayobozi-bakuru/

Dr Denis Mukwege hamwe n'abandi baharanira uburenganzira bwa muntu n'ibidukikije muri Repubulika ya Demokarasi ya Congo basabye Perezida Félix Tshisekedi kudashyira umukono ku itangazo ry'amahame riherutse gutangazwa hagati ya RDC n'u Rwanda, bavuga ko ari igihugu cyateye RDC.

Ibi babigaragaje mu ibaruwa rusange basohoye, aho basabye ko amabuye y'agaciro y'Abanye-Congo adakomeza gutangwa, kandi ko ubutabera bw'inzibacyuho bwashyirwa imbere mu bikorwa bigamije kugarura amahoro no kubusigasira.

Bagize bati: 'Turasaba kudatanga amabuye y'agaciro ya Congo, gushyira ubutabera bw'inzibacyuho mu bikorwa byose bigamije kugarura amahoro, kugira ngo byorohereze inama z'ibihugu zirimo imiryango yose mu gihugu, harimo n'abagize Inteko Ishinga Amategeko, mbere yo kubyemeza mu izina ry'abaturage ba Congo no kurengera inyungu zabo, mu ruzinduko rwanyu rutaha i Washington DC.'

Muri iyo baruwa, banibukije Perezida Tshisekedi amagambo ya Papa Fransisko, aheruka kwitaba Imana, ubwo yasabaga abateye RDC gukuramo amaboko, anamagana uburyo Afurika igifatwa nk'ahantu ho gusahura.

Papa Fransisko yagize ati: 'Nyuma y'ubukoloni bwa politiki hatangijwe ubukoloni mu bukungu. Kubera iyo mpamvu, iki gihugu cyarasahuwe cyane ntigishobora gukura bihagije inyungu mu mutungo wacyo. Twageze kuri paradox, imbuto z'ubutaka bwayo zigira abanyamahanga. Mukure amaboko yanyu muri RDC no muri Afurika! Mureke kuniga Afurika, ntabwo ari ikirombe cyangwa ubutaka bwo gusahurwa.'

Iyi baruwa yashyizweho umukono na Dr Denis Mukwege, wahawe igihembo cyitiriwe Nobel, hamwe na Bobo Kabamba, Jean Claude Katende, Jean Claude Mputu n'abandi benshi baharanira kurengera ibidukikije n'uburenganzira bwa muntu.

Iyi baruwa yasohowe mu gihe Perezida Félix Tshisekedi yerekeje i Washington DC muri Leta Zunze Ubumwe za Amerika, aho ategerejweho ibiganiro bya nyuma n'abayobozi ba Amerika ku masezerano y'ubufatanye mu bucukuzi bw'amabuye y'agaciro.

Aya masezerano agamije guhererekanya umutungo kamere wa Congo n'umutekano mu Burasirazuba, ndetse n'ishoramari rihwanye na miliyari 500 z'amadolari mu myaka 15.

Source : https://kasukumedia.com/dr-denis-mukwege-nabaharanira-ibidukikije-basabye-perezida-tshisekedi-kudashyira-umukono-ku-masezerano-nu-rwanda/

Umuvugizi wa Guverinoma y'u Rwanda, Yolande Makolo, yatangaje ko Abanyarwanda 10 muri 15 bajyanywe mu bihugu byo muri Aziya bamaze gutahuka mu gihugu, naho abandi 5 bakiriyo na bo bari mu nzira yo kugaruka, ku bufatanye na guverinoma n'abandi bafatanyabikorwa.

Mu butumwa yanyujije ku rubuga rwa X (rwahoze ari Twitter) asubiza uwari watabarije abo Banyarwanda, Makolo yagize ati: 'Leta y'u Rwanda ku bufatanye n'Ishami ry'Umuryango w'Abibumbye ryita ku Bimukira (IOM), mu cyumweru gishize yagaruye mu gihugu abantu 10 bari barajyanywe mu buryo bwa magendu bavuye muri Myanmar. Turabizi ko hari abandi 5 bakihari, kandi turi gukorana n'inzego zibishinzwe ngo nabo babashe kugaruka mu rugo.'

Aba Banyarwanda bajyanywe muri ibyo bihugu bizezwa ko bagiye kubona akazi keza kandi gahenze, ariko bagezeyo basanga ibibazo bihari bitandukanye n'uko babyumvaga.

Benshi barashukwaga n'abantu biyitirira ibigo by'ubucuruzi cyangwa amashyirahamwe y'ubuhinzi n'ubwubatsi, bababwira ko bagiye gukora akazi keza kazabafasha guteza imbere imiryango yabo.

Iyo bagezeyo, basangaga bashyizwe mu kazi kadahwitse, rimwe na rimwe gafitanye isano n'icuruzwa ry'abantu cyangwa bakahatirwa gukora imirimo ivunanye mu nyungu z'abandi bantu.

Leta y'u Rwanda yakomeje gusaba Abanyarwanda kujya bitondera ababasezeranya akazi mu mahanga, cyane cyane abakorera ku mbuga nkoranyambaga cyangwa badatanga amakuru yizewe ku bigo byabo.

Ibigo bitandukanye birimo IOM n'indi miryango mpuzamahanga bifatanya na guverinoma mu gikorwa cyo gufasha abanyarwanda batwawe mu buryo butemewe n'amategeko gutaha no kongera gusubira mu buzima busanzwe.

Ubuyobozi bw'Igihugu bushimira abafatanyabikorwa barimo IOM ku ruhare bagira mu kubungabunga uburenganzira bwa muntu no kurwanya icuruzwa ry'abantu, ndetse burakangurira Abanyarwanda kumenyesha inzego z'umutekano igihe hari amakuru bafite yerekeye abantu bashobora kuba baroherejwe cyangwa bagiye koherezwa mu buryo bunyuranyije n'amategeko.

Iki kibazo kigaragaza uburyo icuruzwa ry'abantu rikomeje kuba ikibazo mpuzamahanga, kandi u Rwanda rugasabwa gukaza ingamba zo kurinda abaturage barwo no gukumira abacuruzi b'abantu bakomeje guhenda abaturarwanda cyane cyane urubyiruko, babizeza ubuzima bwiza mu mahanga ariko bagamije inyungu zabo bwite.

Source : https://kasukumedia.com/abanyarwanda-10-bagaruwe-mu-gihugu-nyuma-yo-kujyanwa-muri-asia-mu-buryo-butemewe/

Umuzamu wa mbere wa FC Barcelona, Marc-André ter Stegen, yongeye kugaragara mu izamu ry'iyi kipe nyuma yo kuruhuka mu mikino iheruka, mu gihe abandi bakinnyi 10 basanzwe babanza mu kibuga bahawe ikiruhuko ku mukino wa shampiyona barimo gukinamo na Real Valladolid.

Iki cyemezo cyafashwe n'umutoza Xavi Hernández, gifite intego yo kurinda abakinnyi bakomeye kugira ngo babe bameze neza ku mukino ukomeye uteganyijwe ku wa kabiri w'icyumweru gitaha, aho FC Barcelona izasura ikipe ya Inter Milan yo mu Butaliyani mu mukino wo kwishyura wa 1/2 cy'irangiza cya UEFA Champions League.

Uyu mukino ubanza warangiye amakipe yombi anganyije igitego 1-1, bityo bikaba bisaba FC Barcelona gukina umukino ukomeye cyane kugira ngo ibashe gukomeza ku mukino wa nyuma w'irushanwa rihuza amakipe yabaye aya mbere iwayo i Burayi.

Mu gihe umukino wo muri shampiyona ya Espagne (La Liga) usanzwe ari ingenzi, Xavi yahisemo guha amahirwe abakinnyi bakiri bato n'abasanzwe badakina kenshi kugira ngo aruhure intwaro ze z'ingenzi mbere y'urugamba rukomeye.

Abakunzi ba FC Barcelona bari bafite amatsiko yo kureba uko ikipe yabo izitwara idafite intwaro zayo zikomeye, ndetse banategereje kureba uko abakinnyi bakiri bato bazitwara ku mukino wa UEFA Champions League.

Kugaruka kwa Ter Stegen mu izamu ni inkuru nziza ku bafana ba Barça, dore ko ari umwe mu bakinnyi bayifasha cyane mu mikino ikomeye.

Kugeza ubu, FC Barcelona iracyari mu rugamba rwo gushaka igikombe cya La Liga, nubwo yatsinzwe amanota amwe mu mikino iheruka.

Ariko ubu intekerezo zose ziyerekeje ku mukino wo ku wa Gatatu, aho izaba igamije kwihimura no kugaragaza ko ishoboye kongera kwegukana Champions League nyuma y'imyaka myinshi.

Source : https://kasukumedia.com/ter-stegen-yagarutse-mu-izamu-mu-gihe-abakinnyi-10-ba-fc-barcelona-baruhukijwe-kubwurugamba-rwa-uefa/

Irangajwe imbere n'ubuyobozi bwimitse amacakubiri, imiryango itari iya leta yagize uruhare runini mu gushyira mu bikorwa Jenoside yakorewe Abatutsi, Abatutsi bicirwa mu nsengero nyamara ari zo bari bitezeho ubuhungiro.

Ubwo iyo miryango yibukaga ku nshuro ya 31 Jenoside yakorewe Abatutsi, igikorwa cyateguwe ku bufatanye n'Urwego rw'Igihugu rw'Imiyoborere (RGB), yiyemeje ko itazongera kugwa muri urwo rwobo ukundi.

Mufti w'u Rwanda, Sheikh Sindayigaya Musa, yavuze ko kwibuka bibaha umukoro wo gukomeza kwigisha indangagaciro zihuza Abanyarwanda, by'umwihariko urubyiruko.

Yemeje ko ari uruhare rwa buri wese kurwanya, kwamagana no gukumira icyo ari cyo cyose cyasubiza u Rwanda mu macakubiri.

Ati 'Natwe ubwacu mu banyamadini tugomba gushyira imbere Ubunyarwanda, indangagaciro z'urukundo, za ntege nke twagize ntituzongere kugwa muri urwo rwobo, ingengabitekerezo tukayirwanya, Jenoside ntizongere ukundi.'

Yavuze ko nk'ihuriro ry'amadini n'amatorero bashyize hamwe mu kurwanya inyigisho z'ubuyobe, kwamagana ivangura n'ingengabiterezo ya Jenoside n'icyazana amacakubiri cyose mu Banyarwanda no gukumira uwashaka kugoreka amateka.

Umuyobozi Ihuriro rya Sosiyete Sivile mu Rwanda, Theoneste Murangira, yavuze ko kuba hari imiryango itari iya Leta yagize uruhare muri Jenoside ari igisebo, ariko byasize isomo rikomeye ryatumye biyemeza ko 'Ntibizongere Ukundi' itaba amagambo gusa ahubwo izakomeza gushyirwa mu ngiro.

Ati 'Imvugo zipfobya Jenoside yakorewe Abatutsi turacyazibona. Nyuma y'imyaka 31 abahakana Jenoside bongereye umurego, imvugo zibiba ingengabiterezo ya Jenoside ziracyahari cyane nko mu Karere, ariko twe nk'imiryango itari iya Leta, tugomba gukora ibishoboka byose tukabarwanya twivuye inyuma.'

Umuyobozi Mukuru RGB, Dr. Doris Uwicyeza Picard, yibukije abahagarariye iyi miryango ko ifite uruhare rukomeye mu rugamba rwo kurwanya ingengabitekerezo ya Jenoside aho yaba iri hose.

Ati 'Muri ijwi ry'abaturage ku rwego rw'Akarere n'Isi yose. Muri hafi yabo, mufite ubushobozi bwo kubigisha no kubakangurira kurwanya ihakana n'ipfobya rya Jenoside yakorewe Abatutsi mu 1994. Ku rwego mpuzamahanga, mukwiye gukoresha ubushakashatsi n'imiyoboro mufite mukarwanya ihakana ryayo aho ryaba riri hose.'

Yakomeje avuga ko gukomeza kurwanya abahakana n'abapfobya Jenoside yakorewe Abatutsi ari ugusigasira ukuri, guha agaciro abazize Jenoside no kurinda ibyabaye kutazongera ukundi.

Mufti w'u Rwanda, Sheikh Musa Sindayigaya, yavuze ko nk’amadini n’amatorero bitashoboka ko bongera kugwa mu rwobo baguyemo muri Jenoside yakorewe Abatutsi

Abo mu nzego za Leta, imiryango atari iya Leta n’abandi bari bitabiriye igikorwa cyo kwibuka ku nshuro ya 31 Jenoside yakorewe Abatutsi

Mufti w'u Rwanda, Sheikh Musa Sindayigaya, ashyira indabo ku mva ishyinguwemo Abatutsi bishwe muri Jenoside

Umuyobozi Mukuru wa RGB, Dr. Doris Uwicyeza Picard atanga ubutumwa bw’ihumure mu gitabo cyagenewe abashyitsi mu Rwibutso rwa Jenoside rwa Kigali

Mbere yo gutangira ibiganiro babanje gufata umunota wo kwibuka Abazize Jenoside yakorewe Abatutsi mu 1994

Umuyobozi Mukuru wa RGB, Dr. Doris Uwicyeza Picard yunamira abazize Jenoside yakorewe Abatutsi bashyinguwe mu Rwibutso rwa Jenoside rwa Kigali

Umuyobozi wa RCSP, Theoneste Murangira yavuze ko nk’imiryango itari iya Leta bashyizeho ingamba zo guhangana n’ingengabiterezo ya Jenoside aho yaba iri hose

Umuyobozi wa RCSP, Theoneste Murangira, yunamiye Abatutsi bishwe muri Jenoside mu 1994

---

Source : http://igihe.com/amakuru/u-rwanda/article/imiryango-itari-iya-leta-yarahiriye-kudasubira-mu-mutego-yaguyemo-muri-jenoside

Ni umuhango wabereye i Libreville kuri Stade de l'Amitié witabirwa n'abakuru b'ibihugu bitandukanye bya Afurika harimo uw'u Rwanda, Paul Kagame; Umaro Sissoco Embalo wa Guinée Bissau, Mamadi Doumbouya wa Guinée, Adama Barrow wa Gambie, Ismaïl Omar Guelleh wa Djibouti, Bassirou Diomaye Faye wa Sénégal, Teodoro Obiang Nguema Mbasogo wa Guinée équatoriale n'abandi,

Perezida Tshisekedi wa RDC na Ndayishimiye w'u Burundi nabo bari mu bitabiriye.

Brice Oligui Nguema yatsinze amatora yabaye ku wa 12 Mata nyuma y'amezi 19 ari Perezida w'Inzibacyuho nyuma yo kujya ku butegetsi ahiritse Ali Bongo.

Abaturage barenga ibihumbi 40 bari bitabiriye ibi birori.

Brice Clotaire Oligui Nguema aheruka mu Rwanda tariki ya 10 Kanama 2024 yitabiriye Irahira rya Perezida Paul Kagame.

Mbere yaho mu Ukwakira 2023 nabwo yari yakoreye uruzinduko mu Rwanda, ahura na Perezida Kagame. Icyo gihe ibiganiro byabo byibanze ku nzira y'inzibacyuho muri Gabon, umutekano ku mugabane wa Afurika no mu bihugu bigize Umuryango w'Ubukungu byo muri Afurika yo Hagati (ECCAS) ndetse no kurebera hamwe uburyo u Rwanda na Gabon byagirana ubufatanye mu nzego zitandukanye.

Gabon ni igihugu gikungahaye ku bucukuzi bwa peteroli, ubucuruzi bw'imbaho n'amabuye y'agaciro.

U Rwanda na Gabon bisanzwe bifitanye imikoranire n'ubuhahirane binyuze mu bwikorezi bwo mu kirere, Sosiyete Nyarwanda ya RwandAir ikorera ingendo i Libreville mu Murwa Mukuru wa Gabon.

Ibihugu byombi byasinyanye amasezerano y'imikoranire mu 1976, aza kuvugururwa mu 2010.

🎥𝐀𝐌𝐀𝐒𝐇𝐔𝐒𝐇𝐎🎥

Perezida Kagame yitabiriye umuhango w'irahira rya mugenzi we wa Gabon, Brice Oligui Nguema, i Libreville kuri Stade de l’Amitié. Ni nyuma y'uko Nguema atsinze amatora n'amajwi 94,85 %. pic.twitter.com/d7GpSkTEuS

— IGIHE (@IGIHE) May 3, 2025

---

Source : http://igihe.com/amakuru/u-rwanda/article/perezida-kagame-yitabiriye-irahira-rya-oligui-nguema-wa-gabon

Ku muntu udaheruka mu Mujyi wa Nyagatare kuri ubu ni kamwe mu turere turimo imihanda myinshi ya kaburimbo ireshya na kilometero 25,5.

Nyuma y'uko aka karere gashyizwe mu turere umunani twunganira Umujyi wa Kigali, Guverinoma y'u Rwanda yashoye amafaranga menshi mu kubaka ibikorwaremezo muri utu turere.

Akarere ka Nyagatare mu cyiciro cya mbere hubatswemo ibilometero 3,9 mu cyiciro cya kabiri hubakwa imihanda ireshya na kilometero 14,2, mu gihe mu cyiciro cya gatatu hubatswemo imihanda ya kilometero 6,7.

Yiyongeraho ruhurura zagiye zikorwa n'indi mihanda yagiye yubakwa ihuza utu turere n'ibindi bice nk'uwa kilometero 38 uva mu Mujyi wa Nyagatare ukagera ku mupaka wa Kagitumba.

Ntabwo twakwibagirwa kandi Umuhanda Nyagatare-Ryabega wa kilometero 11 n'uhuza Akarere ka Nyagatare n'Akarere ka Gicumbi.

Akanyamuneza ni kose mu baturage ba Nyagatare

Nikuze Jennifer umaze igihe kinini atuye mu Mujyi wa Nyagatare, yavuze ko imihanda mishya yubatswe yatumye ubutaka bwabo bwongera agaciro.

Yatanze urugero agaragaza ko nk'ikibanza cyaguraga ibihumbi 500 Frw mu myaka icumi ishize, kuri ubu basigaye bakigurisha arenze miliyoni 10 Frw.

Uretse abafite ubutaka iyo mihanda kandi yahesheje icyashara n'abarimo abatwara abagenzi, binabafasha kuramira ibinyabiziga byabo kuko bitacyangirika nk'uko byari bimeze mbere.

Bishimangirwa na Munyemana Cyprien utwara moto mu Mujyi wa Nyagatare, wavuze ko imihanda mishya yatumye Akarere ka Nyagatare kagendwa cyane na bo bagahaha.

Ati 'Ahantu hose habaye umujyi nta binogo bitwicira moto bigihari, nta mumotari ugihura n'ibyondo, utwara umugenzi ukamugeza aho agiye mu mahoro. Nubwo ndi umumotari mpinga n'umuceri ubu imodoka ziza gupakira zisigaye zigera ku murima wanjye.''

Twagira Innocent na we ati 'Iyo mihanda yatumye inzu zikodeshwa zigira agaciro, inzu zavuye ku bihumbi 20 Frw zigera ku bihumbi 300 Frw, 400 Frw na 500 Frw. Ikindi ubuhahirane n'utundi turere bwaroroshye nk'umuhanda uduhuza na Gicumbi watumye guhahirana byoroha cyane.''

Umuyobozi w'Akarere ka Nyagatare, Gasana Stephen, yavuze ko iyi mihanda yatumye abaturage benshi bubaka inzu zigezweho, inabafasha mu kongera urujya n'uruza rw'abagana ako karere.

Ati 'Hari ahantu twari dufite hadatuwe. Uyu munsi hari kuzamurwa inzu zigeretse rimwe, kabiri, inzu zo guturamo ku baturage, ku buryo ubona ko iyi mihanda n'ibindi bikorwaremezo byakuruye abantu benshi. Hari n'abo mu tundi turere baje kuhatura.''

Meya Gasana yavuze ko kandi muri uyu mujyi hari kongerwamo ibikorwaremezo byinshi nka Sitade, imihanda myiza, ikigo cy'urubyiruko n'ibindi byitezweho kuzamura uyu mujyi nk'umwe mu yunganira Umujyi wa Kigali.

Imihanda yuzuye mu Mujyi wa Nyagatare yatumye abatwara abagenzi babona icyashara cyisumbuye

Mu Mujyi wa Nyagatare hamaze kuzura imihanda ya kilometero 25,5

Imihanda ya kaburimbo iri mu Mujyi wa Nyagatare yoroheje ubuhahirane

Inzu zigeretse ziri kuzamurwa ubutitsa mu Mujyi wa Nyagatare kubera ibikorwaremezo Guverinoma y’u Rwanda yashoyemo akayabo

Imihanda ya kaburimbo yubatswe mu Mujyi wa Nyagatare yatumye hanavugururwa insengero ku buryo bugezweho

Munyemana Cyprien avuga ko imihanda mishya yatumye babona abakiliya benshi

Nyagatare iri kubakwamo inzu zigeretse z’ubucuruzi nyinshi ziri guhindura isura y’umujyi

Umuhanda Nyagatare-Ryabega wubatswe bundi bushya ugirwa munini

Umuhanda wa kaburimbo yoroheje uva i Nyagatare ukagera i Kagitumba ni umwe mu yafashije mu gutwara umukamo

---

Source : http://igihe.com/amakuru/u-rwanda/article/nyagatare-yababye-nshya-umusaruro-w-imihanda-ya-kaburimbo-imaze-kuzura-amafoto