Webrwanda Backend

Author: webrwanda

  • Biryogo y’Umujyi: Uko ibikorwa remezo byacogoje akajagari kaharangwaga (Amafoto) –

    Aba bahanzi bashingiye iyi ndirimbo ku mibereho yihariye y’abantu batuye mu bice bya Nyamirambo, birimo Biryogo, Rwampala n’ibindi biri aho hafi, bakavuga ko ubuzima bwaho buhendutse, imyambarire yaho yihariye ndetse bakanagira imyitwarire yabo intandukanye n’isanzwe iba ahandi.

    Iyi Nyamirambo yavugwaga, ifite agace kitwa Biryogo kari mu duce tuzwi cyane mu Mujyi wa Kigali, dore ko kari mu twatuwe mbere y’utundi muri uyu mujyi, kakaba agace k’abasilimu, gatuwe cyane n’abayisilamu, kandi kakagira uburyo bwihariye bw’imibereho ubona ko nyine ifitanye isano no gukerebuka kw’abahatuye, banahamaze igihe.

    Ni hamwe mu hantu hazwiho gukora amasaha 24 ku yandi, hakaboneka ibyo kurya bihendutse igihe cyose, hakaba urujya n’uruza rw’abantu ariko cyane cyane rukaba rwinshi mu ijoro, ndetse hakaba abantu bakunda imyidagaduro cyane, nk’uko babigaragaje ejo bundi ubwo igitego cya Sugira cyatumaga ibyishimo bibasendera bakarenga ku mabwiriza ya Guma mu Rugo yari yashyizweho, bakajya kwishimira insinzi mu mihanda.

    Hejuru y’ibi byose ariko, Biryogo inafite isura itari nziza. Bitewe n’uko aka gace katuwe mbere ubwo imiturire yari itaranozwa, ndetse kagaturwa cyane bitewe n’uko ari ko kavukiyemo umujyi, byatumye gaturwa mu buryo bw’akajagari gakabije.

    Muri aka gace, kimwe n’utundi tuhakikije turimo na Rwampara, hari ubucucike bw’abaturage 220 batuye kuri hegitari imwe (220/ha), kandi bagatura ahantu hatari ibikorwa remezo nk’imihanda n’amatara, bityo ibikorwa birimo ubujura, kugera mu rugo byoroshye, kubona ubutabazi bw’ibanze igihe bibaye ngombwa bikagorana. Utu duce kandi turangwa n’imyubakire y’akajagari, inzu zubatse nabi ndetse zidatafa amazi y’imvura, bityo bikarushaho gutuma n’ubundi abatuye muri utwo duce bagerwaho n’ibiza, umwanda n’ibindi bitandukanye bibangamira ubuzima bwabo.

    Ni muri urwo rwego rero Umujyi wa Kigali watekereje ku buryo burambye wafasha abatuye muri utu duce kugira ubuzima bwiza, bakabona ibikorwa remezo hafi kandi bagakomeza gutura aho bari basanzwe batuye, ariko hakavugururwa inzu zubatswe muri utwo duce.

    Nguko rero uko hatekerejwe umushinga wa ‘Agatare Upgrading Project’, uri gushyirwa mu bikorwa, ukaba umaze guhindura imiturire y’abatuye mu tugari twa Biryogo, Kiyovu, Rwampara na Agatare twose turi mu murenge wa Nyarugenge, Akarere ka Nyarugenge.

    Kunoza imiturire muri utu duce, bivuze kutwegereza ibikorwaremezo by’ibanze birimo imihanda, inzira z’abanyamaguru, kubaka no gutwikira ruhurura, gushyira amatara yo ku mihanda n’amatara ku nzira z’abanyamaguru ku buryo bimwe byo kwamburwa kw’abaturage bitewe n’uko bari ahantu hatabona byagizwe amateka.

    Bimwe mu byamaze gukorwa mu guteza imbere imiturire myiza muri utu duce harimo kubaka imihanda mishya ireshya na kirometero 6.64, ifite n’inzira z’amazi.

    Harimo kandi kubaka inzira z’abanyamaguru zifite n’amatara, zigahuza abaturage ibihumbi 15.

    Uyu mushinga kandi wubatse ibirometero 2.9 bya ruhurura zegerejwe abaturage barenga ibihumbi bibiri. Ibi byafashije mu kugabanya ingaruka z’imyuzure, guteza imbere isuku no kurinda iyangirika ry’imitungo y’abaturage. Hubatswe kandi ibilometero 6.2 by’inzira z’abanyamaguru zifite ubugari bwa metero imwe n’igice kugera kuri enye, zifashishwa n’abaturage ibihumbi bitatu.

    Impinduka esheshatu zigaragara mu duce twagezwemo n’umushinga wa Agatare Upgrading Project

    1. Agaciro k’umutungo w’abahafite ibikorwa kariyongereye

    Nyuma y’iyubakwa ry’ibi bikorwa remezo, agaciro k’umutungo uri muri aka gace kamaze kwiyongera, bitewe n’uko kuhatura no kuhakorera bisigaye byoroshye. Ibi kandi bijyana n’uko muri utu duce hari kuvugururwa inzu z’abaturage, ndetse Umujyi wa Kigali ukaba warashyize imbaraga mu gutanga ibyangombwa ku baturage bifuza kuvugurura inzu zabo, bakazijyanisha n’igihe.

    2. Imodoka ntizigiparikwa kure ya ba nyirizo

    Bitewe n’imiturire itanoze, ntibyashobokaga ko umuntu yageze imodoka cyangwa moto mu duce two hagati muri utwo tujagari. Wasangaga abazifite bazisiga kure y’aho batuye ndetse bamwe bakishyira ubukode bw’aho ziparikwa, ibyatumaga n’abafite ubushobozi bahatuye binangira kugura imodoka bitewe n’uko batabona aho baziparika.

    Ubu rero ibi byabaye amateka, kuko imihanda yubatswe muri utu duce yatumye abahatuye bashobora guparika imodoka hafi y’ingo zabo.

    Kimwe n’abatarabonaga inyungu zo kugura imodoka, ubu bamaze kuzigura kuko noneho babona ibyiza byo kwegerezwa ibikorwaremezo.

    3. Ruhurura zitwikiriye zifasha mu kunoza isuku no kurinda imyuzure

    Mbere wasangaga abatuye mu duce twavuguruwe bari baturanye na ruhurura zirimo amazi mabi, anuka kandi zituranye n’ingo z’abaturage ku buryo zashoboraga no kuba intandaro y’indwara ziterwa n’umwanda.

    Izi ruhurura kandi zashobora guteza imyuzure kuko zari zubatse nabi, bigatuma amazi asenyera abaturage kuko atabaga ayobowe neza.

    Kuri ubu ibi byose byamaze kuba amateka, kuko hubatswe ruhurura zigezweho, kandi zipfundikiye ku buryo ibibazo by’umunuka n’indi myanda byakemutse.

    4. Inzira z’abanyamaguru zashyizweho amatara arinda umutekano

    Ivumbi, ibyondo n’ubujura ni bimwe mu byabaye amateka mu nzira z’abanyamaguru zubatswe muri utu duce, kuko zatunganyijwe ndetse zishyirwaho amatara ku mihanda, ku buryo n’abajura batakibona aho bamenera.

    5. Abashoramari batangiye kuhabenguka

    Bitewe n’ibikorwaremezo, hari abashoramari batangiye kuhabengukwa ndetse bahashyira amagorofa, ibi bikagaragaza ko hari amahirwe menshi y’iterambere ndetse hazakomeza kugezwa ibindi bikorwa bishya kubera ko havuguruwe. Ibi kandi bijyana n’iterambere ry’ubucuruzi muri aka gace, ryazamuwe cyane n’uburyo imigenderanire yorohejwe muri rusange.

    6. Abana bazashyirirwaho ibikorwaremezo bibafasha kwidagadura

    Nyuma y’uko imihanda ishyizwemo kaburimbo, abana bakiniraga mu muhanda babuze aho bazajya bakinira. Ni muri urwo rwego muri uyu mushinga hateganyijwe ahantu hazashyirwa ibikorwaremezo byagenewe imyidagaduro y’abana.

    Imikino izahajya yemejwe nyuma yo gukusanya ibitekerezo by’abana basanzwe bakinira mu muhanda, ndetse n’ababyeyi babo. Abana benshi basabye ko bahabwa aho bazakinira biye (bille), aho bazakinira ikibariko ndetse n’ikibuga cya basket.

    Ibyifuzo by’aba bana ni byo bizashyirwa mu bikorwa muri aka gace. Ibi bikorwaremezo by’imyidagaduro bizanafasha abana bafite impano mu mikino nk’umupira w’amaguru na basketball kubona aho bazitoreza, bagakuza impano zabo.

    Uyu mushinga watangiye muri 2018 ari igerageza, ukaba ukinakomeje. Nyuma yo kubona impinduka zawo nziza, uyu mushinga uzakomereza mu tundi tugari 10 mu Karere ka Nyarugenge n’Utugari dutatu muri Kicukiro n’utundi tubiri muri Gasabo.

    Ni umushinga uterwa inkunga na Banki y’Isi ku bufatanye na Leta y’u Rwanda, ukaba ufite ingengo y’imari ya miliyoni 10$ (arenga miliyari 9 Frw)

    Abaturage bimuwe mu ishyirwa mu bikorwa ry’uyu mushinga ku bw’inyungu rusange bahawe ingurane ikwiye, bityo bikabafasha ko n’aho bagiye ubuzima bwabo budasubira inyuma ahubwo bugatera imbere.

    Abaturage barabyinira ku rukoma

    Abatuye mu duce turi kugezwamo ibi bikorwa remezo, bavuze ko bishimiye impinduka bari kubona, bakavuga ko ibi ari ibigaragaza uburyo Leta y’u Rwanda yita ku baturage bayo.

    Murekatete Mariam Sidi yagize ati “Ndashimira cyane Leta y’u Rwanda kuko imiturire dufite ubu iranejeje. Nkanjye wagonzwe n’umuhanda nkimuka, serivisi zo kumbarira imitungo yanjye zagenze neza, nishimira iterambere ryahageze rwose nta kibazo nagiriyemo kuko igenagaciro ryakozwe neza kandi Leta ikomereze aho. Duture neza ku buryo uwagira ikibazo atabarwa vuba kuko inzira ziba zihari.”

    Nturubiko Aime, uhagarariye komite y’abaturage mu mushinga w’Agatare mu Kagali ka Biryogo nawe yunzemo, avuga ko uyu mushinga werekana icyerekezo cy’iterambere igihugu cyiyemeje.

    Yagize ati “Umushinga wo kuvugurura Agatare, wadufashije kuvugurura imiturire. Ubundi mu Biryogo nta mihanda twagiraga, twari utuyira tutanyuramo n’imodoka, ariko ubu nyuma yo gucishamo imihanda, habaye nyabagendwa, baduhaye amatara mbese harasa neza”.

    “Abaturage begereye umuhanda batangiye gusaba ibyangombwa byo kuvugurura inzu zabo, no mu buryo bw’isuku harasa neza, imodoka zitwara ibishingwe nazo zitugeraho neza, amazi y’imvura yubakiwe ruhurura kandi mbere yanyuraga mu mazu y’abaturage ndetse amwe yaraguye, ariko ubu inzira z’amazi zaratunganyijwe nta mwanda ukiharangwa; Biryogo turimo gutura mu buryo bw’icyerekezo.”

    Iyi mihanda yubatswe mu buryo bugezweho

    Isura y’aka gace yarahindutse

    Abahatuye ntibakigira ipfunwe

    Ibikorwa remezo byatangiye kuhashyirwa ku benshi

    Abatuye muri utu duce bahawe uburenganzira bwo kuvugurura inzu zabo

    Hubatswe ruhurura zipfundikiwe

    Abafite imitungo yegereye umuhanda yahise yiyongera agaciro kubera ibikorwaremezo

    Imihanda iracyakomeje gukorwa muri Rwampala

    Iri shuri ryeregerejwe ibikorwaremezo

    Igishushanyo cy’aho umushinga uri gukorerwa

    Ruhurura zipfundikiye zirinda impanuka n’umwanda

    Umushinga uracyakomeje

    Iyi mihanda ifite isuku ihagije

    Uduhanda dufasha abaturage begereye imihanda kuwinjiramo neza

  • Umubare w'abakoraga muri VUP bamara iminsi batariye wariyongereye muri Covid-19 – #rwanda #RwOT

    Ubu ubushakashatsi bwakozwe hagamijwe kureba uko abagenerwabikorwa ba gahunda z'iterambere nka VUP (Vision Umurenge Program) babayeho mu gihe cya Covid-19, no kureba niba inkunga bagenerwa ibageraho uko bikwiye, nta karengane kabayeho.

    Ubu bushakashatsi bwagaragaje ko 23% by'abaturage bahabwaga inkunga y'ingoboka muri VUP batigeze bakira ubutumwa bugufi bubabwira ko bahawe amafaranga.

    Umubare w'abakora muri VUP bashoboraga kumara iminsi batariye biyongereyeho 23.9%, bava kuri 3.9% mbere ya Covid-19, bagera kuri 27.8% mu bihe bya Covid-19.

    Umubare w'abantu bakora muri VUP baryaga rimwe ku munsi mbere ya Covid-19 warazamutse, uva kuri 51.9% ugera kuri 55.8% nyuma ya Covid-19. Uw'abaryaga kabiri nawo waramanutse, uva kuri 42.9% mbere ya Covid-19, ugera kuri 16.2% mu bihe bya Covid-19. Umubare w'abarya gatatu wavuye kuri 1.4% ugera kuri 0.2%.

    Umuyobozi Mukuru wa Transparency International Rwanda, Marie Immaculée Ingabire, yavuze ko Covid-19 yazahaje ubukungu bw'ibihugu byinshi ndetse n'u Rwanda rurimo, cyane ko ari cyo gihugu cya mbere giherereye munsi y'Ubutayu bwa Sahara cyashyizeho gahunda ya Guma mu Rugo, ibyatumye abaturage bakennye bahura n'ingaruka zikomeye zatewe n'ingamba zo kurinda ikwirakwira ry'icyorezo.

    Yagize ati 'mu ntego zacu harimo gutanga umusanzu mu kurwanya ikwirakwira rya Covid-19 kimwe no kureba ko gahunda zashyizweho zo kugoboka abaturage bafite ubushobozi buke muri Covid-19 na nyuma yaho, ziri gushyirwa mu bikorwa mu buryo buciye mu mucyo.”

    “Byari iby'ingirakamaro ko tujya no kureba ishusho nyayo y'uko ibintu bimeze, tukareba ingaruka Covid-19 yateje kimwe no kureba uko twagabanya ibibazo by'ubukene yateje.'

    Ubu bushakashatsi bwagaragaje ko 79% by'abaturage bakennye ariko bahabwaga imirimo rusange binyuze muri VUP, batigeze bahabwa amafaranga yo kubafasha kubaho igihe akazi kari karahagaze.

    Umwe mu baturage babagaho babikesheje VUP yagize ati 'Nari mfite uruhinja rw'ukwezi kumwe igihe Guma mu Rugo yatangiraga. Imirimo ya VUP igihagarara umugabo wanjye yabuze akazi nk'umuryango bitugiraho ingaruka zikomeye.
    Sinashoboraga kubona ibiryo bihagije, kuko rimwe na rimwe namaraga umunsi wose ntariye. Gusa ku bw'amahirwe nari nturiye ivuriro ntibyangoraga kujya kwivuza.'

    Uretse ibibazo by'ibiryo hari n'abahuye n'ibibazo by'ubuzima, aho bamwe batabonaga ubushobozi bwo kujya kwivuza cyane ko abenshi mu bahabwa inkunga y'ingoboka ya VUP ari abageze mu zabukuru bakunze kuba bafite indwara zitandukanye.

    Umwe muri bo yagize ati 'Ndi umupfakazi ufite indwara z'umutima, mbere ya Covid-19 najyaga njya kwa muganga buri kwezi[…] ikibazo nahuye nacyo tugiye muri Guma mu Rugo, ni uko ntashoboraga kujya kwa muganga nk'ibisanzwe kubera ikibazo cy'amafaranga y'urugendo. Kubera iyo mpamvu uburwayi bw'umutima mfite bwaranzahaje.'

    TI Rwanda yasabye ko abajyanama b'ubuzima bahabwa amahugurwa na Minisiteri y'Ubuzima bakajya bafasha aba baturage bafite indwara zitandura ndetse n'abafite ubumuga, bagahabwa ubutabazi bw'ibanze mu ngo zabo igihe badashoboye kugera kwa muganga.

    Ubu bushashakashatsi kandi bwagaragaje ko abagenerwabikorwa ba VUP bahura n'ibibazo byo kuba batazi amategeko abarengera, bigatuma batamenya uburyo bwo kwaka amafaranga yabo mu gihe batayahawe.

    Uyu muryango wasabye ko abayobozi b'inzego z'ibanze n'Ikigo Gishinzwe Gutera Inkunga Ibikorwa by'Iterambere mu Nzego z'Ibanze, LODA, bajya bakora ubukangurambaga muri aba baturage bakamenya kwirengera mu gihe bahuye n'izo ngorone.

    VUP ni gahunda yashyizweho igamije kuvana abaturage mu bukene

    Source : http://igihe.com/amakuru/u-rwanda/article/umubare-w-abakora-muri-vup-bamara-iminsi-batariye-wiyongereyeho-23-9

  • Ese umukiristo akwiye gukora politike? #rwanda #RwOT

    Kimwe mu bintu bikunda kugibwaho impaka z’urudaca ni ugukora politiki uri n’umukristu, bamwe bati nta mukristo ukwiye kujya muri politiki abandi bati nyamara umukristu niwe ukwiye gukora politiki. Abavuga ko nta mukristo ukwiye gukora politike bavuga ko politiki ari umwuga wanduye, umwuga w’ikinyoma, ikibuga cyo kwica, kwiba, kugambanirana, kuriganya, kutavugisha ukuri, kuryaryana n’ibindi bibi byinshi.

    Abavuga ko abakristo bakwiye gukora politiki babishingira ko umuntu wahindutse mu mutima ariwe ushobora gukorera abandi no kubaha ubutabera bukwiye kandi bahamya ko politike ubwayo atari yo ibeshya ahubwo habeshya abayikora, ko atari yo yica ahubwo hica abayikora bitewe nakamere z’uyikora bityo ufite kamere mbi iyo akoze politiki atanga ibibi n’ufite kamere nziza akoze politiki yatanga ibyiza.

    Muri iyi nyandiko turarebera hamwe ese koko umukristo akwiye gukora politike? Ese ni izihe ndangagaciro zikwiye kuranga umunyapolitike w’umukristo? Ese ni izihe nshingano umunyapolitike w’umukristo afite kubo ayobora?

    Urubuga Wikipedia, rusobanura ko Politiki ari uruhurirane rw’ibikorwa bishingiye ku gufata ibyemezo mu itsinda runaka cyangwa uburyo bw’ubushobozi bw’imibanire hagati y’abantu n’abandi. Naho Demokarasi rigasobanurwa ko ari ubutegetsi bw’abaturage, butangwa n’abaturage bugakorera abaturage, cyangwa uburyo bw’imiyoborere aho abayoborwa bafite ububasha n’ubushobozi bwo kwihitiramo ababayobora.

    Dushingiye ku busobanuro bw’amagambo Politike na Demokarasi, biragaragara ko nta kintu na kimwe gikwiye kubuza umukiristo gukora imirimo ya politiki no kubahiriza Demokarasi, ahubwo imyumvire yo kumva ko nta mukiristo ukwiye kujya muri politike ni ikinyoma cyazanywe na Satani kandi cyagize ingaruka zikomeye mu mibereho y’abantu n’ubuzima bw’ibihugu kuko byatumye abakagombye gukora politiki bafite indangagaciro nzima zo kurengera abanyantegenke, gutanga ubutabera, kuyobora neza babihunga ahubwo politike akenshi ikagibwamo n’abantu akenshi badafite indangagaciro nziza.

    Akenshi uzumva mu gihe cy’amatora y’ubuyobozi mu nzego zitandukanye, abakristo bavuga ko badashishikajwe na politike, abandi bati 'gukora politike si ibintu byanjye'. Abandi bakanga kwiyamamariza kujya mu nzego zitandukanye ngo gusa kubera ko ari abakiristo, ngo batiyanduza kuko nta mukristo ukwiye kujya muri politike. Nyamara bakirengagiza ko ubuzima bwabo bwa buri munsi buzashingira ku byemezo bizafatwa n’abashyizwe muri ya myanya ya politike banze kujyamo. Mu yandi magambo, abakiristo banga kujya muri politike ngo batandura nyamara bakayoborwa na politike iri gukorwa n’abantu banduye.

    Mu mateka y’abana b’Imana, Bibiliya itwereka abantu benshi bagiye baba mu mirimo ya Politike bagakoramo iby’ubutwari kandi bagakomeza kubaha Imana. Aha twavuga nka Yozefu na Daniyeli bagaragaye mu buyobozi bw’inzego bwite za leta, bakubaha Imana kandi igihugu cyose kikagira umugisha ku bwabo.

    Yesu mu buzima bwe bwa buri munsi, mu murimo we yibanze ku bikorwa by’umwuka n’imibereho myiza. Aha twavuga nka kugaburira abashonje, gukiza abarwayi, gutanga ubutumwa bwiza bw’ubumwe n’ubwiyunge, gusaba imbabazi no kubabarira, ibikorwa by’ubworoherane n’ibindi. Ibi byose nibyo byubakirwaho imirongo migari ya politike hirya no hino ku isi.

    Pawulo yandikira itorero ry’Igalatiya, yashishikarije abakiristo kugira umwete wo kubana n’abantu bose amahoro ( Abaroma 12:18).

    Ati:”Niba bishoboka, mu rwanyu ruhande mubane amahoro n’abantu bose.” (Abaroma 12:18) kandi arongera ashishikariza abakiristo b’itorero ryo muri Efeso ko bagomba kwibuka ko baremewe gukora imirimo myiza. Ati”kuko turi abo yaremye ituremeye imirimo myiza muri Kristo Yesu, iyo Imana yiteguriye kera kugira ngo tuyigenderemo.” (Abefeso 2:10)

    Umukiristo ukora imirimo ya politike, Imana imuhamagarira inshingano zikurikira: Inshingano ya mbere ni ukurengera abanyantege nke. “Kuko azakiza umukene ubwo azataka, N’umunyamubabaro utagira gitabara. Azababarira uworoheje n’umukene, Ubugingo bw’abakene azabukiza. Azacungura ubugingo bwabo, Abukize agahato n’urugomo, Kandi amaraso yabo azaba ay’igiciro cyinshi imbere ye.” (Zaburi 72:12;14).

    Inshingano ya kabiri ni ugutanga ubutabera. “Azanezezwa no kubaha Uwiteka, ntace imanza z’ibyo yeretswe gusa, kandi ntazumva urw’umwe. Ahubwo azacira abakene imanza zitabera, n’abagwaneza bo mu isi azabategekesha ukuri, kandi isi azayikubitisha inkoni yo mu kanwa ke, n’abanyabyaha azabicisha umwuka unyura mu minwa ye.” (Yesaya 11:3; 4).

    Inshingano ya gatatu ni ukugira imiyoborere myiza. “Kandi imukura ku gukurikira intama zonsa, kugira ngo aragire Abayakobo ubwoko bwayo, Abisirayeli umwandu wayo. Nuko abaragirisha umutima utunganye, Abayoboza ubwenge bw’amaboko ye” (Zaburi 78:71;72).

    Uretse indangagaciro z’umuco na kirazira zigomba kugirwa n’umwenegihugu uwo ariwe wese nk’uko zigishwa mu burere mboneragihugu, by’umwihariko kimwe n’undi mwenegihugu wese w’umukiristo. Umunyapolitike w’umukiristo agomba kurangwa n’indangagaciro ebyiri z’umwihariko. Indagagaciro ya mbere ni ukubaha.

    Kubaha abayobozi bakuru b’igihugu, kubavuga amagambo arimo icyubahiro, kubabwiza ubugwaneza, kubagandukira mu byiza byose ni indangagaciro igomba kuranga umunyapolitike w’umukiristo. Pawulo yavuze kuri iyi ndangagaciro agira ati:”Umuntu wese agandukire abatware bamutwara, kuko ari nta butware butava ku Mana, n’abatware bariho bashyizweho n’Imana. Ni cyo gituma ukwiriye kuganduka utabiterwa no gutinya umujinya gusa, ahubwo ubyemejwe n’umutima uhana.” (Abaroma 13:1;5)

    Indangagaciro ya kabiri ni ugusenga. Gusenga ni indangagaciro ikwiye kuranga umukiristo wese ariko igomba no kuba intwaro ikomeye igomba gukoreshwa n’umunyapolitike w’umukiristo. Uku gusenga ntikugomba kuba gushingiye ku marangamutima y’usenga, cyangwa gushyira imbere imirongo migari y’ishyaka cyangwa ibyiyumviro bye muri politike, ahubwo kugomba kuba ari ugusenga gushingiye ku gusaba ngo ubushake bw’Imana abe aribwo bukorwa mu mirimo ye ya buri munsi.

    Ni ugusenga gushyira imbere abayobozi bakuru b’igihugu kugira ngo bamurikishirizwe n’umucyo w’Imana, bayoborwe n’ubushake bwayo kandi abe ariyo ibashoboza mu buzima bwabo bwa buri munsi mu byemezo bagiye gufata. “Irya mbere ya byose ndaguhugurira kwingingira abantu bose, no kubasengera no kubasabira no kubashimira, ariko cyane cyane Abami n’abatware bose kugira ngo duhore mu mahoro tutabona ibyago, twubaha Imana kandi twitonda rwose.” (1 Timoteyo 2:1;2)

    Nsoza, abakiristo bagomba kumenya ko gukora politike ari inshingano zabo kandi ari n’umugambi w’Imana wo kubakoresha kugira ngo basohoze ugushaka kwayo ku buzima bw’abanyagihugu. Kandi umukiristo wese uri cyangwa ushaka gukora imirimo ya politiki agomba kumenya ko afite inshingano yo kurengera abanyantegenke, gutanga ubutabera, no kwimakaza imiyoborere myiza kandi ibyo byose akabyubakira ku ndangagaziro zo: kubaha no gusengera abayobozi bakuru b’igihugu n’abenegihugu.

    Iyi nyandiko ishingiye ku bitekerezo bwite by’umwanditsi, Urinzwenimana Mike

    Source: Igihe.com

    [email protected]

    Source : https://agakiza.org/Ese-umukiristo-akwiye-gukora-politike.html

  • Ingendo mu Ntara zirabujijwe! Amashuri, resit… – #rwanda #RwOT

    Iyi nama yemeje ko mu kwirinda ikwirakwira ry’icyorezo cya Covid-19 gihangayikishije Isi n’u Rwanda rurimo, hari ibikorwa bimwe na bimwe bikomeza gufungwa ariko hakaba n’ibindi byakomorewe, gusa nabyo bigakorwa mu buryo bwibahirije amabwiriza yo kwirinda iki cyorezo. Ingamba zafashwe zizatangira gushyirwa mu bikorwa tariki 23/02/2021 mu gihe zizongera kuvugururwa ku wa 15/03/2021.

    Mu bikorwa byakomorewe harimo amashuri yari amaze ukwezi kurenga afunzwe. Harimo kandi insengero na za Resitora ariko bikaba byasabwe kwakira abantu batarenze 30% y’abo bari basanzwe bakira. Ingendo hagati y'Umujyi wa Kigali n'Intara ndetse n'Uturere dutandukanye tw'igihugu zirabujijwe kereka ku mpamvu za serivisi z'ingenzi, iz'ubuvuzi n'iz'ubukerarugendo. Ubukwe bwakomorewe ariko bukitabirwa n’abantu batarenze 20 kandi nabo bakubahiriza amabwiriza yo kwirinda Covid-19.

    Ingamba zizubahirizwa mu gihugu hose ni izi zikurikira:

    a. Ingendo zirabujijwe guhera saa Mbili z'ijoro (8:00Pm) kugeza saa Kumi za mu gitondo (4:00Am). Ibikorwa byose byemerewe gukomeza bizajya bifunga saa Kumi n'Ebyiri za nimugoroba (6:00Pm).

    b. Ibikorwa by'inzego za Leta bizakomeza ariko buri rwego rurasabwa gukoresha abakozi batarenze 30% by'abakozi bose, abandi bakozi bagakorera mu rugo ariko bakagenda basimburana.

    c. Ibikorwa by'inzego z'abikorera bizakomeza ariko buri rwego rurasabwa gukoresha abakozi batarenze 30% by'abakozi bose, abandi bagakorera mu rugo ariko bakagenda basimburana. Amasoko n'amaduka (markets and malls) azakomeza gukora ariko hajye hasimburana umubare utarenze 50% by'abacuruzi b'ingenzi bemerewe kuyakoreramo. Ibikorwa byose bizajya bifunga saa Kumi n'Ebyiri za nimugoroba (6:00Pm).

    d. Amashuri yose (yaba aya Leta n'ayigenga) harimo na za kaminuza yemerewe gufungura.

    e. Ingendo hagati y'Umujyi wa Kigali n'Intara ndetse n'Uturere dutandukanye tw'igihugu zirabujijwe kereka ku mpamvu za serivisi z'ingenzi, iz'ubuvuzi n'iz'ubukerarugendo. Ba mukerarugendo bose baba abo mu gihugu no mu mahanga bagomba kubanza kwipimisha COVID-19. Icyakora imodoka zitwaye ibicuruzwa zizakomeza gukora mu gihugu hose, ariko ntizitware abantu barenze babiri.

    f. Imodoka zitwara abantu mu buryo bwa rusange (za bisi) zemerewe gutwara abantu batarenze 75% by'umubare w'abantu zagenewe gutwara. Abatwara za bisi barasabwa kugenzura ko abagenzi bahana intera kandi bagatwara gusa abambaye agapfukamunwa.

    g. Moto n'amagare byemerewe gukomeza gutwara abagenzi. Abatwara moto n'amagare barasabwa kubahiriza amabwiriza y'isuku buri gihe.

    h. Resitora na Café zemerewe kongera gukora ariko ntizirenze 30% y'ubushobobozi bwazo bwo kwakira abantu. Zemerewe kwakira abakiliya kugeza saa Kumi n'Ebyiri (6:00Pm) ariko serivisi zo kugeza ku bantu ibyo bakeneye batahana (takeaways or food delivery services) zo zemerewe gukomeza gukora kugeza saa Mbili z'ijoro (8:00Pm).

    i. Utubari twose tuzakomeza gufunga.

    j. Insengero zahawe uburenganzira bwo gukora kuko zujuje ibisabwa mu kwirinda COVID-19, zemerewe kwakira 30% by'ubushobozi bwo kwakira abantu.

    k. Ikibuga Mpuzamahanga cya Kigali kizakomeza gukora. Abagenzi bose baza mu Rwanda bagomba kuba bafite icyemezo cy'uko bipimishije COVID-19 (PCR test) amasaha 72 mbere y'uko bahaguruka. Abagenzi bose baje mu Rwanda bazahamara igihe kirenze icyumweru bagomba guhita bipimisha COVID-19 (PCR test) bakigera mu gihugu, bakishyira mu kato mu gihe cy'iminsi 7, nyuma y'icyo gihe bakongera kwipimisha COVID-19. Abagenzi bava mu Rwanda na bo bagomba kubanza kwipimisha COVID-19.

    l. Ibikorwa by'Ubukerarugendo bizakomeza hubahirizwa amabwiriza yo kwirinda COVID-19. Muri ibyo bikorwa harimo amahoteli, abashinzwe kuyobora ba mukerarugendo (tour operators) na serivisi zo gutwara ba mukerarugendo. Ba mukerarugendo n'ababafasha bagomba kumenyesha RDB gahunda y'ingendo zabo.

    m. Inama zihuza abantu imbonankubone (physical meetings), ibirori n'amateraniro rusange birabujijwe.

    n. Ibikorwa bya siporo y'umuntu ku giti cye n'izikorerwa hanze abantu bategeranye biremewe. Amabwiriza arambuye kuri iyi ngingo azatangwa na Minisiteri ya Siporo.

    o. Ahantu ho gukorera siporo, imyitozo ngororamubiri n'imyidagaduro hazakomeza gufunga. Pisine (swimming pool) na spas zizakomeza gufunga. Icyakora abantu bacumbitse muri hoteli bemerewe kogera muri pisine ya hoteli bacumbitsemo ariko berekanye ko bipimishije COVID-19.

    p. Umubare w'abitabira ikiriyo ntugomba kurenza abantu 10 icyarimwe. Imihango yo gushyingura ntigomba kurenza abantu 20.

    q. Ishyingirwa rikorewe imbere y'ubuyobozi no mu nsengero riremewe ariko bikitabirwa n'abantu batarenze 20 kandi hakubahirizwa ingamba zo kwirinda COVID-19. Ibirori byo kwiyakira birabujijwe.

    r. Ibikorwa by'imikino y'amahirwe bizakomeza gufunga.

    Inama y'Abaminisitiri yibukije abaturage ko ari ngombwa kubahiria amabwiriza yo kwirinda COVID-19 harimo gusiga intera hagati y'umuntu n'undi, kwambara agapfukamunwa no gukaraba intoki.

    Itangazo ry’Ibyemezo by’Inama y’Abaminisitiri

    Source : https://inyarwanda.com/inkuru/103234/ingendo-mu-ntara-ziracyafunze-resitora-insengero-amashuri-nubukwe-byakomorewe-menya-indi-m-103234.html

  • Sem-G Dile ukorera umuziki muri Amerika yashy… – #rwanda #RwOT

    “>Iyi ndirimbo yarambitsweho ibiganza na MadeBeat irangizwa na Bob Pro, ubu iri shene ya YouTube ya Sem-G Dile, ushobora kuyumva ukaba wanayisangiza abandi. Aganira na Inyarwanda.com yagize ati:''Umuziki kuri njye ni urufunguzo rw'ubuzima, ibyishimo, amahoro y'umutima, imbaraga n'ibindi''. 


    Yakomeje ati:''Kuri njye, ni igikoresho gifite imbaraga zikomeye zo gukora byinshi birimo kugira ubuzima bw'abantu bwiza kurushaho ndetse ukanadufasha kugira isi nziza uko tubyifuza''. 

    Sem-G Dile avuka i Burera avuga ko yavutse akunda umuziki ndetse ahantu hose yagiye yiga harimo mu Rwanda, mu Buhinde no muri Amerika yagiye akora umuziki. Ati: ''Iki ni cyo gihe ngo noneho nsangize iyi mpano isi yose''.

    KANDA HANO WUMVE ‘ONLINE’ YA SEM-G DILE

    Source : https://inyarwanda.com/inkuru/103206/sem-g-dile-ukorera-umuziki-muri-amerika-yashyize-hanze-indirimbo-ya-mbere-yumve-103206.html

  • Uwahoze ari umuyobozi wa APR FC, Lt. Gen. Jacques Musemakweli yashyinguwe(AMAFOTO) #rwanda #RwOT

    Lt. Gen. Jacques Musemakweli wahoze ari umuyobozi wa APR FC, yashyinguwe ku munsi w’ejo hashize ku wa Gatanu.

    Mu rukerera rwo ku wa 12 Gashyantare 2021 ni bwo inkuru y’akababaro ka Lt. Gen. Jacques Musemakweli yamenyekanye.

    Ni inkuru yashegeshe benshi yaba abo mu muryango wa gisirikare yabarizwagamo, abakunzi b’umupira w’amaguru bitewe n’uburyo atahwemaga kuwushyigikira, umuryango mugari wa APR FC yabereye umuyobozi imyaka 8 irenga, by’umwihariko abo mu muryango we.

    Ku munsi w’ejo hashize ku wa Gatanu tariki ya 19 Gashyantare 2021, nibwo Lt. Gen. Jacques Musemakweli yashyinguwe.

    Yashyinguwe mu irimbi rya Gisirikare i Kanombe ari n’aho habereye umuhango wo kumusezeraho bwa nyuma, abitabiriye uyu muhango bari biganjemo abo mu muryango wa nyakwigendera ndetse n’ abasirikare bakuru mu Ngabo z’u Rwanda.

    Mu Gushyingo 2019 nibwo Lt. Jacques Musemakweli yagizwe Umugenzunzi Mukuru w’Ingabo z’u Rwanda, hari nyuma y’imyaka 3 ari Umugaba Mukuru w’Ingabo zirwanira ku butaka, inshangano yahawe nyuma yo kuba Umuyobozi w’ingabo zishinzwe kurinda Umukuru w’Igihugu(Republican Guard).

    Lt. gen. Jacques Musemakweli yabaye perezida wa APR FC kuva 2013 aho yari asimbuye Maj Gen Alex Kagame, akaba yaraje gusimburwa Maj. Gen. Mubaraka Muganga mu ntangiriro z’uyu mwaka muri Mutarama 2021.

    Ari perezida w’iyi kipe yayihesheje ibikombe 2 by’Amahoro(2014 na 2017) n’ibikombe 5 bya shampiyona(2013-14, 2014-15, 2015-16, 2017-18 na 2019-20).

    Lt. Gen. Jacques Musemakweli yashyinguwe ku munsi w’ejo hashize, yaherekejwe mu cyubahiro

    Ni umuhango witabiriwe n’abo mu muryango we

    Yasezeweho mu cyubahiro n’abasirikare bagenzi be

    Umuyobozi wa APR FC, Maj. Gen. Mubarakh Muganga ni umwe mu bari mu muhango wo gushyingura Lt. Gen. Jacques Musemakweli

    Source : http://isimbi.rw/siporo/article/uwahoze-ari-umuyobozi-wa-apr-fc-lt-gen-jacques-musemakweli-yashyinguwe-amafoto

  • Yateye benshi intimba nyuma yaho yakoze ubukwe abura amasaha abarirwa ku ntoki ngo yitabe Imana _AMAFOTO #rwanda #RwOT

    Uyu mugore witwa Heather Moser n'umugabo we David bakomeje gutangaza benshi ariko banatera amarira kuri benshi. Moser waburaga amasaha 18 ngo apfe kubera uburwayi bukomeye bwa kanseri, yashyingiranywe na David ndetse benshi batemba amarira kumaso yabo.


    David yamenye ko Heather arwaye kanseri y'ibere mbere cyane y'uko amusaba ko bazabana.

    Gusa kuba uyu mugore yari arwaye cancer ntibyabujije uyu mugabo gukomeza kumukunda ndetse akamukomeza, kugeza naho amusabye ko bazabana. aba bahuriye mu birori byo kubyina mu mwaka wa 2015 bari biteguye kubana ubuziraherezo ndetse bakazakora umuryango mwiza kugeza mukwa 12, 2016 ubwo bombi bamenyaga ko uwo mugore heather arwaye kanseri y'ibere.

    Ibyo byose ntibyabujije David gukomeza gukunda heather kugeza naho amwambitse impeta y'urukundo, icyakora ibyishimo byaje kuzamo kidobya ubwo umuganga wavuraga Heather yavuzeko kanseri imugeze kure kuko yemeje ko uburozi bwiyo kanseri bwari bugeze mu bwonko, bityo ko atashoboraga kuzayirokoka.

    Nyuma yo kumenya aya makuru aba bahisemo gushyiranwa umugore ari mu bitaro ndetse nyuma y'amasaha macye ubuzima bwe buhita bumererwa nabi araremba cyane, ntibyarangiriye aho kuko uwo mugore yaje no gupfa mu masaha yakurikiye.

    Ajya gupfa yabwiye David ati: 'mu buzima bwawe uzahore urwana urugamba' mu by'ukuri abumvise inkuru y'urukundo rw'aba babiri bashimiye David ku kuba byibuze yarasezeye ku mukunzi we neza ndetse akamuha n'imperekeza y'urukundo rutavangiye.

    Source : https://impanuro.rw/2021/02/20/yateye-benshi-intimba-nyuma-yaho-yakoze-ubukwe-abura-amasaha-abarirwa-ku-ntoki-ngo-yitabe-imana-_amafoto/

  • Perezida Kagame yavuze ubutwari bwa Lt Gen Musemakweli asaba abandi kumwigana #rwanda #RwOT

    Perezida wa Repubulika Paul Kagame, akaba n'Umugaba w'Ikirenga w'Ingabo z'u Rwanda,yashimye uburyo Lt General Jacques Musemakweli wari Umugenzuzi Mukuru mu Ngabo z'u Rwanda,yaranzwe n'ubwitange bukomeye, ukutizigama ndetse n'indangagaciro zibereye Ingabo z'u Rwanda.

    Kuri uyu wa Gatanu ni bwo habaye umuhango wo gushyingura Lt General Musemakweli witabye Imana tariki 11 Gashyantare 20121 afite imyaka 59.

    Ni umuhango wabereye ku Ikirimbi rya Gisirikare i Kanombe, aho abawitabiriye bari biganjemo abo mu muryango wa nyakwigendera ndetse n' abasirikare mu Ngabo z'u Rwanda.

    Ubutumwa bwa Perezida Paul Kagame yageneye uyu munsi bwasomwe n'Umujyanama we wihariye mu bya gisirikare n'Umutekano, General James Kabarebe, bwagarutse ku bigwi byaranze Lt General Musemakweli haba ku ruhare rwe rukomeye mu rugamba rwo kubohora Igihugu ndetse no mu gukomeza kubaka u Rwanda.

    Yagize ati ' Iki ni igihe cy'akababaro gakomeye cyane cyane ku muryango wa General Musemakweli, ni igihe kandi cy'akababaro kenshi ku muryango mugari w'Ingabo z'Ingabo z'u Rwanda no ku Gihugu muri rusange. Iyo twibutse ibihe bitandukanye twabanyemo na General Musemakweli, imirimo myiza n'ibigwi bye haba ku rugamba rwo kubohora Igihugu cyacu ndetse n'urwo kugiteza imbere yari agikomeje kugeza aho atabarukiye. General Musemakweli yakoreye igihugu mu bwitange bukomeye, atizigama, atanga umusanzu, ibitekerezo n'imbaraga ze mu mirimo itandukanye no mu bihe bitandukanye kugeza aho atabarukiye.'

    Umukuru w'Igihugu yagaragaje ko General Musemakweli yagiye ashingwa imirimo itandukanye mu Ngabo z'u Rwanda, hakaba harashingirwaga cyane ku bushobozi bwe ndetse n'indangagaciro yo gukunda Igihugu. Asaba ko uwo murage wakomeza kuranga buri wese.

    Ati 'General Musemakweli yakoreye Ingabo z'u Rwanda mu nzego zazo nyinshi cyane zitandukanye, izi nshingano yazihabwaga kubera ubushobozi no kuzuza indangagaciro zibereye Ingabo z'u Rwanda, yaharaniraga iteka ko n'abandi basirikare bubahiriza izo ndangagaciro. Atabarutse Igihugu n'umuryango twese tukimukeneye. Icyo twazirikana ku munsi nk'uyu rero ni ugukomeza umurage mwiza wo gukunda Igihugu no kugikorera byaranze General Musemakweli.'

    Perezida Kagame yijeje umuryango wa nyakwigendera ko Igihugu kizakomeza kuwuba hafi nk'uko bisanzwe biri mu muco wacyo. Ati 'Na none mu bihe nk'ibi turizeza umuryango we ko ubuyobozi bw'Igihugu binyuze muri Minisiteri y'Ingabo na RDF buzakomeza kubaba hafi nk'uko amategeko abiteganya kandi bisanzwe biri mu muco wacu.”

    Bimwe mu byaranze ubuzima bwa Lt General Musemakweli

    Nk'Umugenzuzi Mukuru mu Ngabo z'u Rwanda, Lt. Gen. Jacques Musemakweli yari ashinzwe kugenzura no gukurikirana ibirebana n'imicungire y'umutungo by'ingabo amahugurwa n'ibikorwa bya gisirikare.

    Yagiraga inama Ubuyobozi Bukuru bw'Ingabo z'u Rwanda mu kugena politiki zihamye n'amabwiriza aboneye bigamije guteza imbere imicungire inoze y'umutungo n'ibikorwa by'Ingabo z'u Rwanda. Mu zindi nshingano ze yari ashinzwe gukurikirana no gutangira iperereza ku ihohoterwa rikorewe umusirikare cyangwa rikozwe na we.

    Ku wa 12 Mutarama 2018 ni bwo Jacques Musemakweli wari ufite ipeti rya rya Jenerali Majoro yazamuwe mu ntera na Perezida wa Repubulika, Paul Kagame, akaba n'Umugaba w'Ikirenga w'Ingabo z'u Rwanda, amugira Lieutenant Jenerali.

    Mu zindi nshingano yashinzwe harimo kuba yarabaye Umuyobozi wari ushinzwe Ingabo zirinda Umukuru w'Igihugu (Republican Guard), [yari agifite ipeti rya Gen Maj] umwanya yavuyeho mu 2016 akagirwa Umugaba Mukuru w'Ingabo zirwanira ku Butaka.

    Tariki 9 Mata 2019, Lt. Gen. Jacques Musemakweli, yagizwe Umugaba Mukuru w'Inkeragutabara mbere y'uko ku wa 4 Ugushyingo 2020 agirwa Umugenzuzi Mukuru w'Ingabo z'u Rwanda.

    Lt General Musemakweli kandi ni umwe mu ngabo zabohoye Igihugu zihagarika Jenoside yakorewe Abatutsi mu 1994.

    Izina rya Lt Gen Jacques Musemakweli ryanamenyekanye cyane mu mupira w'u Rwanda kuko yabaye mu buyobozi bwa APR FC mu gihe cy'imyaka isaga irindwi.

    RBA

    Source : http://umuryango.rw/amakuru/mu-rwanda/ubuzima/article/perezida-kagame-yavuze-ubutwari-bwa-lt-gen-musemakweli-asaba-abandi-kumwigana

  • Nyamasheke:Umuturage yafatanywe ibilo 80 by'urumogi – #rwanda #RwOT

    Umuvugizi wa Polisi mu Ntara y'Iburengerazuba, Chief Inspector of Police (CIP) Bonaventure Twizere Karekezi yavuze ko urwo rumogi rwafashwe biturutse ku makuru yatanzwe n'abaturage.

    Yagize ati 'Abaturage batanze amakuru kuri Polisi ko hari urumogi rwinjiye mu gihugu ruturutse muri Repubulika iharanira Demokarasi ya Congo hakoreshejwe inzira yo mu mazi mu kiyaga cya Kivu, hahise hategurwa igikorwa cyo gufata urwo rumogi n'abarwinjizaga mu gihugu,rwafatiwe mu rugo ruhereye mu Murenge wa Kirimbi,Akagari ka Nyarusange.'

    CIP Karekezi yongeyeho ko ibyinshi mu biyobyabwenge bifatirwa mu Ntara y'Iburengerazuba bituruka mu gihugu cya Repubulika iharanira Demokarasi ya Congo.

    Yagaragaje ko Polisi yari imaranye iminsi amakuru ko Nyirahabimana asanzwe acuruza urumogi nubwo yari atarafatwa.

    Yagize ati 'Twari dufite amakuru ko afite abaturage bo muri kiriya gihugu cya Repubulika iharanira Demokorasi ya Congo bakorana na we, afatwa yavuze ko aribo bari bamuzaniye urwo rumogi, bafata ubwato ahurira nabo mu kiyaga cya Kivu abaha ibihumbi 200 abasigaramo andi nk'ayo bigaragara ko bari basanzwe bafitanye imikoranire ya hafi.'

    Umuvugizi wa Polisi mu Ntara y'Iburengerazuba yibukije abaturage ko urugamba rwo kurwanya ibiyobyabwenge barufitemo uruhare rukomeye,abasaba gutanga amakuru y'ababicuruza n'ababikwirakwiza aboneraho gushimira abaturage bakomeje gufatanya na Polisi mu kurwanya ibiyobyabwenge.

    Uwafashwe yashyikirijwe Urwego rw'Igihugu rw'Ubugenzacyaha(RIB)rukorera muri sitasiyo ya Gihombo kugira ngo hakorwe iperereza.

    Iteka rya minisitiri nº 001/moh/2019 ryo ku wa 04/03/2019 rigena urutonde rw'ibiyobyabwenge n'ibyiciro byabyo rishyira ikiyobyabwenge cy'urumogi mu biyobyabwenge bihambaye.

    Itegeko nº68/2018 ryo ku wa 30/08/2018 riteganya ibyaha n'ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw'imiti ikoreshwa nka byo mu buryo bunyuranije n'amategeko, aba akoze icyaha. Iyo abihamijwe n'urukiko ahanishwa igifungo cya burundu n'ihazabu y'amafaranga y'u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

    Mu minsi ishize Polisi iri kumwe n'urwego rw'ubushinjacyaha ndetse n'urw'Ubugenzacyaha bakoze igikorwa cyo gutwika ibiyobyabwenge byafatiwe mu gihugu harimo n'ibyafatiwe mu Ntara y'Iburengerazuba.

    Urumogi rwafashwe rwaturutse ruvuye muri RDC

    Source : http://igihe.com/amakuru/u-rwanda/article/nyamasheke-umuturage-yafatanywe-ibilo-80-by-urumogi

  • Perezida Kagame yagaragaje ubutwari no kwitangira igihugu byaranze Lt Gen Musemakweli – #rwanda #RwOT

    Yabigarutseho mu butumwa yatanze ku munsi wo guherekeza mu cyubahiro Lt General Jacques Musemakweli wari Umugenzuzi Mukuru mu Ngabo z'u Rwanda, witabye Imana tariki 11 Gashyantare 2021, afite imyaka 59.

    Umuhango wo gusezera bwa nyuma no gushyingura Lt Gen Musemakweli wabereye ku Ikirimbi rya Gisirikare i Kanombe, aho abawitabiriye bari biganjemo abo mu muryango wa nyakwigendera ndetse n' abasirikare mu Ngabo z'u Rwanda.

    Lt Gen Jacques Musemakweli ni umusirikare ufite amateka akomeye mu Rwanda kuko ari umwe mu barwanye urugamba rwo kubohora igihugu, anagira uruhare mu guhagarika Jenoside yakorewe Abatutsi.

    Ubutumwa bwa Perezida Kagame yageneye uyu munsi bwasomwe n'Umujyanama we wihariye mu bya gisirikare n'Umutekano, General James Kabarebe.

    Ni ubutumwa bwagarutse ku bigwi byaranze Lt General Musemakweli haba ku ruhare rwe rukomeye mu rugamba rwo kubohora Igihugu ndetse no mu gukomeza kubaka u Rwanda.

    Yagize ati ' Iki ni igihe cy'akababaro gakomeye cyane cyane ku muryango wa General Musemakweli, ni igihe kandi cy'akababaro kenshi ku muryango mugari w'Ingabo z'u Rwanda no ku Gihugu muri rusange.'

    Yakomeje agira ati 'Iyo twibutse ibihe bitandukanye twabanyemo na General Musemakweli, imirimo myiza n'ibigwi bye haba ku rugamba rwo kubohora Igihugu cyacu ndetse n'urwo kugiteza imbere yari agikomeje kugeza aho atabarukiye.'

    'General Musemakweli yakoreye igihugu mu bwitange bukomeye, atizigama, atanga umusanzu, ibitekerezo n'imbaraga ze mu mirimo itandukanye no mu bihe bitandukanye kugeza aho atabarukiye.'

    Perezida Kagame yagaragaje ko General Musemakweli yagiye ashingwa imirimo itandukanye mu Ngabo z'u Rwanda, hakaba harashingirwaga cyane ku bushobozi bwe ndetse n'indangagaciro yo gukunda Igihugu. Asaba ko uwo murage wakomeza kuranga buri wese.

    Yagize ati 'General Musemakweli yakoreye Ingabo z'u Rwanda mu nzego zazo nyinshi cyane zitandukanye, izi nshingano yazihabwaga kubera ubushobozi no kuzuza indangagaciro zibereye Ingabo z'u Rwanda, yaharaniraga iteka ko n'abandi basirikare bubahiriza izo ndangagaciro.”

    “Atabarutse Igihugu n'umuryango twese tukimukeneye. Icyo twazirikana ku munsi nk'uyu rero ni ugukomeza umurage mwiza wo gukunda Igihugu no kugikorera byaranze General Musemakweli.'

    Perezida Kagame yijeje umuryango wa nyakwigendera ko Igihugu kizakomeza kuwuba hafi nk'uko bisanzwe biri mu muco wacyo.

    Ati 'Na none mu bihe nk'ibi turizeza umuryango we ko ubuyobozi bw'Igihugu binyuze muri Minisiteri y'Ingabo na RDF buzakomeza kubaba hafi nk'uko amategeko abiteganya kandi bisanzwe biri mu muco wacu.'

    Lt Gen Jacques Musemakweli ari mu basirikare bakomeye igihugu cyari gifite ndetse yagiye ahabwa inshingano mu myanya itandukanye. Yatabarutse ari Umugenzuzi Mukuru mu Ngabo z'u Rwanda.

    Mu zindi nshingano yashinzwe harimo kuba yarabaye Umuyobozi wari ushinzwe Ingabo zirinda Umukuru w'Igihugu (Republican Guard), [yari agifite ipeti rya Gen Maj] umwanya yavuyeho mu 2016 akagirwa Umugaba Mukuru w'Ingabo zirwanira ku Butaka.

    Ku wa 12 Mutarama 2018 nibwo Jacques Musemakweli wari ufite ipeti rya Gen Maj yazamuwe mu ntera na Perezida wa Repubulika, Paul Kagame, akaba n'Umugaba w'Ikirenga w'Ingabo z'u Rwanda, amugira Lt Gen.

    Muri Mata 2019, Lt Gen Jacques Musemakweli, yagizwe Umugaba Mukuru w'Inkeragutabara mbere y'uko ku wa 3 Gashyantare 2020 agirwa Umugenzuzi Mukuru w'Ingabo z'u Rwanda.

    Izina rya Lt Gen Jacques Musemakweli rinazwi mu mupira w'u Rwanda kuko yabaye mu buyobozi bwa APR FC mu bihe bitandukanye ndetse mu myaka isaga irindwi [2013-2020] yari Chairman wayo.

    Lt Gen Musemakweli yashyinguwe mu irimbi rya gisirikare rya Kanombe, mu cyubahiro cya gisirikare

    Umuryango wa Lt Gen Musemakweli wamusezeyeho nk’umubyeyi w’intwari wawitangiye

    Umujyanama wa Perezida wa Repubulika mu by’Umutekano, Gen James Kabarebe, yunamira Lt Gen Musemakweli

    Uyu muhango wabaye hubahirizwa amabwiriza yo kwirinda Coronavirus nko gukaraba intoki neza no kwambara udupfukamunwa

    Source : http://igihe.com/amakuru/u-rwanda/article/perezida-kagame-yagaragaje-ubutwari-no-kwitangira-igihugu-byaranze-lt-gen