Webrwanda Backend

Author: webrwanda

  • Abana bari kunanira ababyeyi, cyangwa ni ababyeyi bari kunanira abana? #rwanda #RwOT

    Kwiyahuza ibiyobyabwenge, gusharira mu mitima, kuba abarakare, kwishora mu ngeso z’ubusambanyi, uburaya, ubujura, ubwicanyi, kwiyahura, kwigomeka, kutagirwa inama, kurya ibyo umuntu atakoreye, ubunebwe, izo ni zimwe mu ngeso mbi turi kubona zeze mu bana bacu, mbese gutandukana n’inzira yose nziza itegura umuntu kuba umugabo nyamugabo n’umugore nyamugore birimo gufata indi ntera. Ibi bituma umuntu yibaza ejo hazaza h’imiryango ari nayo igize igihugu akahabura.

    Ntabwo dukwiye kubaza abana ibyo tutabahaye

    Bibabaza ababyeyi cyane iyo babona izina ryiza bagerageje kubaka ntawuzarisigarana mubo babyaye. Mu Kinyarwanda baca umugani ngo: 'Umwana apfa mu iterura'. Ibi biratwereka ko abanyarwanda bari babizi kuva na kera ko uburere bw’umwana butangira kare, ku buryo umwana uterurwa umwe tuba twibwira ko ataragira ubwenge buhagije ari hariya hatangirira uburere bwe!

    Hari impamvu nyinshi ziri gutuma ingeso mbi ziyongera mu rubyiruko rw’uyu munsi. Inyinshi muri zo zishingiye ku babyeyi batakigira umwanya wo kwita ku rubyaro rwabo.

     Ubuzima bwarahenze

    Ubuzima burahenze ku buryo bisigaye bisaba ko akenshi ababyeyi bombi bahaguruka bakajya gukora bigatuma umwana abura umwitaho uko bikwiye. Kera abagabo bajyaga mu mirimo, abagore bagasigarana n’abana mu rugo bakababera ba mwarimu ba mbere mu rugo.

    Abagore basigaraga bumvisha abana ya mirongo migari y’uburere ngenderwaho yashyizweho na 'PAPA'. Ibi byatumaga abana bakurana uburere n’urukundo bikabaremamo ubumuntu no kuzaba nabo ababyeyi bazi agaciro ka 'papa’ n’aka 'mama’, ndetse n’agaciro k’urugo n’umuryango muri rusange.

    Umuti

    Ni byiza ko mujyana abana banyu mu marerero yabigenewe (daycare and babysitting centers). Umwana uri munsi y’imyaka itatu, utaratangira icyiciro cy’amashuri y’inshuke (Nursery section) akwiriye nawe kwitabwaho akajya asigara mu irerero rifite abantu babyigiye kandi babikunze.

    Abana bakwiriye kureka kwirirwana mu ngo n’abantu batazwi neza aho badashobora kwivugira ngo bitabarize ibibazo bahura nabyo. Ibi bizatuma ababyeyi bajya mu mirimo yabo batuje bibafashe kugira umusaruro ufatika kandi n’abana bazakurira mu bwisanzure, barinzwe kandi bitaweho bibafashe mu mikurire, mu myigire no mu ndangagaciro.

    Burya gufata umwana akirirwana n’umuntu muhuye akuze utazi iwabo, utazi uko yakuze, utazi icyatumye akugeraho ni ikibazo. Uwo si we wakwifuza ko yandika amagambo ya mbere ku bwonko bw’umwana wawe! Kereka icyakora mwe mufite abantu mwizeye ku kigero cyo hejuru. Abadafite ubushobozi nabo ni byiza ko mwigomwa amasaha y’umunsi mugataha kare mu kajya kwita ku bo mwabyaye. Aha birasaba ko mwumvikana umubyeyi umwe bikaba ngombwa ko akora cyane akaziba icyuho cy’uwatashye kare.

     Kwikunda gukabije kw’abantu b’iki gihe

    Abantu barashaka kwiyitaho ubwabo bagasa nk’abatagifite urukundo rw’ababo! Ibirangaza nabyo rero byabaye byinshi ku buryo ababyeyi nabo batakiba mu ngo zabo ndetse n’iyo baba bahari ariko mu mutwe ugasanga badahari.

    Ababyeyi bamwe bahora mu birori bidashira ( ubukwe, bridal shower, ibyo mu nsengero, kwizihiza iminsi mikuru y’amavuko, imipira, utubari n’ibindi.) Iyo batagiye muri ibyo baba bari ku mbuga nkoranyambaga umunsi wose ku buryo abana usanga agahinda karabishe.

    Ikindi ni uko burya kurera birimo imvune nyinshi zirimo kurara ijoro n’izindi ku buryo umuntu udafite kwihangana rwose aterera iyo akajugunyira umwana umukozi kandi nta kidasanzwe we ari gukora.

    Umuti: Aha nta byinshi mvuga kuko umuti uragaragara! Ababyeyi bagomba kwigomwa gahunda zimwe na zimwe bakita ku bana babo! Aha ndetse sinatinya no kuvuga ko hari abagomba no kwibaza niba bazashobora kurera koko! Kuko icyo kibazo nicyo kizatuma bamenya niba bagomba guhita babyara cyangwa bazategereza kugeza igihe bumva biteguye – kuko kurera si ibintu byoroshye muri iyi minsi.

     Kumva nabi politike y’uburinganire

    Politike y’uburinganire hari aho yagiye yakirwa mu buryo butari bwo! Abagore bamwe babifashe nk’irushanwa hagati y’umugabo n’umugore, abagabo nabo babifata nko 'kubateza abagore'. Kandi mu by’ukuri siko bimeze! Uburinganire n’iterambere ry’umugore, ni uburyo bwo kumva ko umugabo n’umugore bahabwa amahirwe angana. Nta wusumba undi hakurikijwe igitsina ahubwo baruzuzanya.

    Ntabwo uburinganire ari uguhangana.

    Hari imirimo umugore atakora igihe cyose, nyamara umugabo yakora, hari n’iyo umugore yakora umugabo atakora. Umugore ntiyasakara inzu cyangwa ngo yurire inkingi gukora amashanyarazi n’inda y’imvutsi. Umugabo nawe ntiyakonsa cyangwa ngo atwite. Hari impamvu Imana itahaye umugabo ibere rimwe ngo umwana yonke ngo irindi naryo irihe umugore bajye basimburana bibe aribyo byitwa uburinganire.

    Kuba umugore yahabwa amahirwe angana na ay’umugabo ntibizatume abantu batandukira ngo birengagize inshingano z’ibanze mu rugo. Aya makimbirane rero niyo yabyaye 'ntibindeba' aho umwe anyura aha undi akanyura hariya bakaza guhurira mu rugo bose ntawita ku bana.

    Umuti: Uburinganire si uburyo bwaje bwo gukandamiza abagabo, nta n’ubwo ari uburyo bwo gutuma umugore yibagirwa inshingano ze. Ni uburyo bwo kwibukiranya ko buri wese afite uburenganzira kandi ahabwa n’amategeko bityo ntawugomba gukandamizwa! Mwicare muganire, mugabane inshingano! Kandi burya ibi birikora igihe mukundanye.

    Ababyeyi benshi bisuzumye neza basanga abana ataribo bari kunanira ababyeyi ahubwo ari babyeyi bari kunanira abana. Nitwitwa kubo turi kubyara tuzaba turi no kwita ku gihugu.

    Urubyaro ni Imana irutanga, izanabaza buri muntu wabyaye uruhare yagize mu kurera abana be, haba mu kubagaburira no kubigisha no kubereka inzira y’ubuzima bufite indangagaciro z’umuntu nyamuntu. Ababyeyi nibo ba mwarimu ba mbere bo kwereka abana imyitwarire yiyubaha,yubaha abantu, yubaha igihugu, ndetse yubaha Imana.(Gutegeka kwa kabiri 11:18-21)

    Rosine Ingabire

    Umuyobozi w’ishuri ry’inshuke 'LA SAETA Day Care and Babysitting'

    Source: Igihe.com

    [email protected]

    Source : https://agakiza.org/Abana-bari-kunanira-ababyeyi-cyangwa-ni-ababyeyi-bari-kunanira-abana.html

  • Abanyamulenge bari kwicwa, gutwikirwa, gusenyerwa no gucucurwa utwabo, byafashe indi ntera; barazira iki? –

    Amakuru yemeza ko iby’ubu bwicanyi atari ibya vuba, kuko Abanyamulenge bahuriza ku kuba bwaratangiye muri Mata 2017, ariko bugahindura isura uko imyaka ishira kugera ejo bundi muri 2019, ubwo bwarushagaho kwaguka no gukara, bugakorwa mu buryo buteguye ndetse bukanahitana abantu benshi kurushaho, ari nacyo abenshi baheraho bemeza ko ubu bwicanyi ari ‘Jenoside’.

    Uburemere bw’iki kibazo bugaragarira mu mashusho n’amafoto amaze iminsi akwirakwizwa hirya no hino, aho byemezwa ko amwe yafatiwe mu gace ka Rurambo gaherereye muri Territoire ya Uvira iri mu Ntara ya Kivu y’Amajyepfo mu Burasirazuba bwa Repubulika Iharanira Demokarasi ya Congo.

    Amwe muri ayo mashusho yerekana abantu benshi biruka impande zose, abandi bikoreye utuntu ku mutwe basa nk’abahunze, abandi bari mu kivunge cy’abantu benshi kimeze nk’inkambi, ndetse hari n’ayerekana umugabo wambaye ikoti wafashwe akaryamishwa hasi aboshye amaboko, hejuru ye ku ruhande rw’umutwe hahagaze umugabo ufite umuhoro mu kuboko kwe kw’iburyo uba ari kumukubita imigeri ndetse anamuhonda ubuhiri ku mutwe.

    Bivugwa ko mu cyumweru gishize, Abanyamulenge barenga 4 000 bahungiye mu gace kitwa Bwegere gasanzwe gatuyemo Abanyamulenge benshi, mu gihe inka zirenga 250 000 zajyanywe bunyago, ndetse ibikorwaremezo birimo amazu yo guturamo, amashuri n’amavuriro bigatwikwa, ku buryo nk’ibyaro by’ahitwa i Mulenge byatwitswe bigakongorwa ku kigero kiri hafi ya 80% by’agace kose.

    Ni iki kihishe inyuma yo kwiyongera k’ubwicanyi bukorerwa Abanyamulenge?

    N’ubwo ubwicanyi bukorerwa Abanyamulenge bwahozeho kuva muri 2017, bisa nk’aho mu mezi atandatu ashize bwafashe indi ntera, ku buryo byagaragaye rwose ko atari ibintu bisanzwe.

    Mu kiganiro na IGIHE, Dr. Murenzi (amazina twayahinduye) umwalimu muri Kaminuza imwe mu ziri mu Rwanda, ndetse akanagira ubumenyi buhagije ku bibazo by’Abanyamulenge, yavuze ko kimwe mu byateye ubu bwicanyi kwiyongera ari ubufatanye busigaye buranga amoko arimo Abafurero, Ababembe n’Abanyembe atavuga rumwe n’Abanyamulenge, bikiyongeraho uburyo bushya bwo kwica busigaye bukoreshwa, cyane cyane nko gutwika amazu.

    Mu busanzwe intambara hagati y’Abanyamulenge b’aborozi, n’Abafurero b’abahinzi zahozeho, akenshi ugasanga bapfa ko inka z’Abanyamulenge zangije imyaka y’Abafurero n’ibindi nk’ibyo, amoko agaturana atumvikana ariko atanahemukirana bikabije.

    Ibi kandi ni ko byari bimeze ku yandi moko akikije Abanyamulenge arimo Abanyembe n’Ababembe, ndetse mu bihe bitandukanye buri bwoko muri aya bwakunze kugirana amakimbirane n’Abanyamulenge nabo bazwiho kugira abasore b’indwanyi z’akataraboneka, gusa ugasanga izi ntambara zihuza Abanyamulenge n’ubundi bwoko bumwe, akenshi bikarangira bunatsinzwe.

    Itandukaniro ry’izo ntambara n’ubwicanyi buriho magingo aya ni uko ayo moko yose atagitera Abanyamulenge atatanye, kuko yamaze kwihuza ku buryo ibitero bagaba ku Banyamulenge biba bifite imbaraga, kandi ubona biteguye neza.

    Dr. Murenzi yavuze ko mbere iyo mitwe yarwanaga n’Abanyamulenge idafite intwaro ndetse n’abarwanyi bayo ugasanga badafite ubumenyi buhagije ku by’imirwanire, gusa ngo ibi byarahindutse kuko iyi mitwe isigaye ifite intwaro.

    Yagize ati “Impamvu ubwicanyi bwiyongereye n’uburyo bwo kwica bugahinduka, nkeka ko biterwa n’uko n’iyo mitwe yindi ifite ubundi buryo bw’imikorere butandukanye n’ubwo twari tuzi. Aba-Mai-Mai (umutwe udacana uwaka n’Abanyamulenge), babaga ari abantu batunze intwaro ariko batarize igisirikare, ariko iriya mitwe yindi irimo abantu bize igisirikare”.

    Yongeyeho ko uburyo bwo kwicwa busigaye bukoreshwa budasanzwe, kuko “Nk’Abafurero batigeze bagira umuco wo gukoresha uburyo bwo gutwika” mu ntambara zindi barwanyemo n’Abanyamulenge.

    Yagize ati “Ubu bafite uburyo bwo gutwika, ku buryo ubona ko bafite umugambi wo kurimbura, n’abarokotse bakabura aho batura bagahunga”.

    Ibice bituyemo Abanyamulenge biri gutwikwa muri Congo

    Abanyamulenge; icyitso cya ‘Balkanisation’?

    Kuva Repubulika Iharanira Demokarasi ya Congo yabona ubwigenge mu myaka 60 ishize, abategetsi b’icyo gihugu bahorana urwikango rw’amahanga afite umugambi mubisha wo kwigarurira igice cy’Iburasirazuba bw’icyo gihugu, umugambi uzwi cyane nka ‘balkanisation’.

    Iki kinyoma cyaravomerewe kuva ku ntambara za Shikaramu na Mobutu muri za 1960, kirakomeza mu ntambara zakuye Perezida Laurent Kabila ku butegetsi ndetse gikaza umurego ubwo Joseph Kabila, mwene Laurent Kabila, yasimburaga se ku butegetsi ariko agashinjwa kuba Umunyarwanda ufite intego yo komeka ibice bya Congo ku butaka bw’u Rwanda.

    U Rwanda ni ingingo y’ingenzi cyane muri uyu mugambi wa balkanisation kuko ari rwo rushinjwa kuwutegura ndetse no kuzawushyira mu bikorwa, dore ko ari igihugu cyahoranye ibice binini byashyizwe ku ruhande rwa Congo mu gihe cyo kugabanya imipaka y’Umugabane wa Afurika, mu Nama ya Berlin yabaye hagati ya 1884 na 1885.

    Indi mpamvu ituma abenshi bakunze kugaruka ku Rwanda cyane kuri iyi ngingo ya balkanisation, ni uko mu bihe bya vuba u Rwanda rwohereje ingabo muri Congo mu bikorwa byo kurwanya imitwe y’iterabwoba nka FDLR, ku buryo hari abitiranyije ibyo bikorwa by’amahoro n’itegurwa ry’umugambi wa balkanisation, wamaganywe inshuro nyinshi na Leta y’u Rwanda yakunze kuvuga ko “Idashishikajwe no kwivanga muri politiki z’ibindi bihugu”.

    Ku rundi ruhande, ubwoko bw’Abanyamulenge, budahakana ko bufite inkomoko mu Rwanda, ndetse bukagira umuco n’ururimi bijya gusa nk’ibyo mu Rwanda, nabwo bushinjwa kuba ‘icyitso’ muri uwo mugambi wa balkanization, ndetse iyi ikaba imwe mu mpamvu bukunze kwitirirwa u Rwanda, bakanasabwa gutaha kuko ari abanyamahanga badafite uburenganzira muri Congo.

    Ibitekerezo nk’ibi si ibya rubanda gusa, kuko usanga bimaze imyaka myinshi bikongezwa na bamwe bavuga rikijyana muri Congo barimo abayobozi muri Kiliziya Gatolika ndetse n’abanyepolitiki nka Martin Fayulu bakoresha iki kinyoma mu nyungu zabo bwite.

    Dr. Murenzi yasobanuye ko abanyepolitiki bifuza gutsinda amatora mu Burasirazuba bwa Congo, bashobora kwifashisha iki kinyoma kimaze imyaka myinshi cyubakwa mu baturage, “Bagasaba ko batorwa kugira ngo bakumire ishyirwa mu bikorwa rya balkanization”.

    Kuri Fayulu bwo amata yabyaye amavuta, kuko uyu mugabo yubakiye iki kinyoma ku bushake bwa Perezida Félix Tshisekedi bwo kuzahura umubano mwiza n’ibihugu icyenda bituranye na Congo birimo n’u Rwanda, mu rwego rwo gushakira umuti ikibazo cy’intambara zimaze imyaka myinshi mu Burasirazuba bwa Congo.

    Dr. Murenzi yongeyeho ko Abanye-Congo benshi bemera icyo kinyoma kuko “Bizera cyane ibivuzwe n’abantu bo mu nzego zo hejuru nk’abapadiri ndetse n’abandi bayobozi bakomeye ariko bakomoka mu bwoko bumwe, ku buryo ibyo bavuze byose babifata nk’Ivanjiri”.

    U Rwanda rurasabwa umusanzu mu gufasha Abanyamulenge

    Mu bukangurambaga burimo ubwitwa ‘Save Mulenge’ buri gucicikana hirya no hino, bamwe mu bavuga ko ari Abanyamulenge basaba Leta y’u Rwanda kugira icyo ikora mu gakumira ubwicanyi buri kubakorerwa, “Bufite isura nk’iya Jenoside yakorewe Abatutsi mu Rwanda”.

    Dr. Murenzi asanga iki cyifuzo gifite ishingiro kuko n’ubwo Abanyamurenge bafite umutwe witwa ‘Twirwaneho’ ugamije kubarindira umutekano, udafite ubushobozi bwo kurinda ibice byose barimo kuko “Ugizwe n’abasivile batagira intwaro zihambaye.”

    Ikindi kandi ni uko na Leta ya Perezida Tshisekedi, n’ubwo yamaze kugaragaza ubushake bwo gukemura ikibazo cy’Abanyamulenge binyuze mu kuboherereza intumwa inshuro nyinshi ndetse no kwirukana abasirikare bakuru babahotera, itaragira ubushobozi bw’ingabo zabasha kurinda umutekano mu gihugu hose.

    Ati “Igisirikare cya Congo kirimo kwiyubaka, usanga kitaragira ubushobozi bwo kurinda umutekano mu gihugu hose ari nayo mpamvu amoko menshi afite imitwe y’ingabo iyarinda kandi ubusanzwe umutekano w’abaturage wakabaye inshingano za Leta”.

    Justin (amazina twayahinduye), umunyamulenge twaganiriye ariko ntiyifuze ko amazina ye akoreshwa mu nkuru, ndetse akaba agifite imiryango ituye muri mu bice bya Minembwe na Milenge birimo kuberamo ubwicanyi, yavuze ko u Rwanda rukwiye gufata iya mbere mu gukumira ko hari ahandi hantu hakorerwa icyaha cya jenoside.

    Yagize ati “Mu bo turegera bose u Rwanda nirwo rukwiye kutwumva mbere y’abandi, kuko ni rwo ruzi ububi bwa Jenoside n’uko ishyirwa mu bikorwa kurusha abandi, kandi urebye uko tumerewe, ubona ko hari umugambi wo kutumaraho niba nta gikozwe, rero Leta y’u Rwanda tuyihanze amaso kuri iki kibazo”.

    Justin kandi yavuze ko n’ubwo Abanyamulenge ari Abanye-Congo bitewe n’uko bahavukiye, ariko bafite igisekuru mu Rwanda “Ari nayo mpamvu mu Rwanda tuhafata nko mu rugo kandi tuhafite abavandimwe benshi”.

    Ku bwa Dr. Murenzi, nawe yavuze ko u Rwanda rukwiye gukoresha imbaraga za dipolomasi rufite mu kuvuganira Abanyamurenge.

    Yagize ati “Hari uruhare u Rwanda rushobora kugira nko mu biganiro bya dipolomasi na Congo, ndetse no gukora ubuvugizi mu Muryango w’Abibumbye, ikibazo cy’abantu bicwa kigakemuka”.

    Ashingiye ku buryo u Rwanda rufite ingabo zirinda ubwicanyi mu bihugu birimo Sudan y’Epfo, Centrafrique n’ibindi bitandukanye, yavuze ko “U Rwanda rufite uburambe mu guhagarika ubwicanyi ahantu henshi, niba rero rubikora ahandi, abaturage baba bumva iyo nararibonye yakoreshwa u Rwanda rugakemura ikibazo hariya [ahari kubera ubwicanyi]”.

    Abanyamulenge basabye ko ubufasha bw’u Rwanda rusanzwe rutanga umusanzu mu gukumira ko hari indi jenoside yashyirwa mu bikorwa

    Agahinda ko kwicirwa mu maso y’Umuryango w’Abibumbye

    N’ubwo Abanyamulenge bari kwicwa muri Congo, Justin yavuze ko ikibatera agahinda kurusha ibindi ari uko “Turi kwicirwa mu maso y’Umuryango w’Abibumbye kuko hari aho ubwicanyi bubera mu birometero 10 uturutse aho ingabo z’Umuryango w’Abibumbye zishinzwe kugarura amahoro muri Congo (MONUSCO) zikambitse”.

    Yavuze ko ibi bisa neza n’uburyo Umuryango w’Abibumbye watereranye u Rwanda mu 1994.

    Ati “Ibaze ko bene wacu batwikirwa bari mu birometero bicye uvuye aho Monusco iherereye, biteye agahinda kubona umuntu wakadutabaye atagira icyo akora ku kibazo cyacu, kandi niko byanagenze Jenoside yakorewe Abatutsi itangira gushyirwa mu bikorwa”.

    Itsinda ryitwa ’Gakondo’ riharanira inyungu z’Abanyamulenge riherutse kwandikira Umunyamabanga Mukuru w’Umuryango w’Abibumbye, António Guterres, rimutabaza kucyo ryise “Umugambi wo kurimbura Abanyamulenge batuye mu misozi miremire yo mu Ntara ya Kivu y’Amajyepfo muri Repubulika Iharanira Demokarasi ya Congo”.

    Mu bandi bari bagenewe kubona kopi y’iyo baruwa, harimo abayobozi b’ibihugu byose biri mu Karere ka Afurika y’Ibiyaga Bigari, ab’Imiryango y’Ubumwe bw’u Burayi na Afurika, ab’ibihugu bikomeye nka Joe Biden wa Amerika ndetse n’abandi batandukanye.

    Uretse iyi baruwa, ndetse n’ubukangurambaga bwa ‘Save Mulenge’, ku itariki ya 1 Gicurasi na bwo Abanyamulenge barateranye bifashishije ikoranabuhanga, mu bundi bukangurambaga bugamije kwerekana akababaro kabo binyuze kwigomwa ifunguro, bwari bwiswe ‘Skip a meal for Save Mulenge’.

    Abanyamulenge bababazwa no kwicirwa imbere ya Monusco yakabatabaye

    Perezida Tshisekedi afite ubushake bwo kubana n’ibihugu by’abaturanyi ndetse no gukemura ikibazo cy’Abanyamulenge

    Abanyamulenge barasa nk’abari mu nkambi, aho bahunganye utuntu tw’ibanze

  • Umufaransa Alan Boileau yegukanye agace ka kabiri ka Tour du Rwanda 2021, Byiza Renus aba umunyarwanda waje hafi, Areruya Joseph ava mu isiganwa. #rwanda #RwOT

    Kuri uyu wa mbere tariki ya 3 Gicurasi 2021, hakinwaga agace ka kabiri ka Tour du Rwanda 2021, abasiganwa bavaga i Kigali berekeza i Huye ku ntera y'ibilometero 125 na Metero 500, ni agace kegukanwe n'umufaransa Alan Boileau w'imyaka 21 ukinira B&B Hotels wari witabiriye Tour du Rwanda ku nshuro ya mbere.

    Ni isiganwa ryahagurkiye imbere y'inyubako ya MIC mu Mujyi wa Kigali, abasiganwa bakaba berekeje mu ntara y'Amajyepfo aho ubwo hari hamaze gukorwa intera y'ibilometero bitanu, abakinnyi batatu bavuye mu gikundi barimo Nsengimana Jean Bosco wa Team Rwanda uri gukina iri rushanwa ku nshuro ya 10, Tewelde wa Eritrea na Manizabayo Eric wa Benediction Ignite.

    Aba bakinnyi bakomeje kugendana basize igikundi cyari kirimo abakinnyi benshi barimo n'uwambaye umwenda w'umuhondo gusa muri batatu b'imbere baje kwivangura ubwo bari bageze ku kilometero cya 67 nibwo Tewelde ya Eritrea yasize abanyarwanda bombi akomeza kwitwara wenyine kugeza ubwo abakinnyi babiri Valentin Ferron ukinira ikipe ya Total-Direct Energie na Alan Boileau wa B&B Hotels bafashe umwanzuro wo kuva mu gikundi cya kabiri ngo begere abimbere.

    Ibi byakomeje kugenda uko gusa hamaze gukorwa ibilometero 94, Brayan Sanchez wari wambaye umwenda w'umuhondo n'igikundi bari kumwe cy'abakinnyi 32, bafashe Valentin Ferron na Alan Boileau bari basize abandi.

    Ubwo abasiganwa baburaga ibilometero 11 ngo bagere aho basoreza abakinnyi batanu, bane muribo muri bo bahise bacomoka, abo ni Teugels, Main, Quintero na Boileau bishakishagamo ugera mu mujyi wa Huye ayoboye, ibi byaje guhira umufaransa w'imyaka 21 Alan Boileau maze yegukana aka gace asize bagenzi be amasegonda umunani.

    Ku ntera y'ibilometero 125 na Metero 500, Alan Boileau yakoresheje amasaha atatu iminota irindwi ndetse n'amasegonda cumi n'ane (3h07'14'), ni mu gihe ukunnyi w'umunyarwanda waje hafio kuri uyu wa mbere yabaye Uhiriwe Byiza Renus (Team Rwanda) wakoresheje amasaha atatu, iminota irindwi n'amasegonda 22, aba uwa 20 mu gihe Mugisha Samuel wa 26, yasizwe amasegonda 36 na Alan Boileau.

    Usibye kuba Alan Boileau yegukanye aka gace ka kabiri Umba Lopez Abner Santiago niwe mukinnyi uyoboye isiganwa ku rutonde rusange akaba akomezanyije umwenda w'umuhondo, Manizabayo Eric uzwi ku izina rya Karadiyo ukinira Benediction Ignite yo mu Rwanda yahembwe nk'u witwaye neza mu guterera imisozi.

    Tour du Rwanda 2021 irakomeza ku wa Kabiri tariki ya 4 Gicurasi 2021 hakinwa agace ka gatatu kazahagurukira i Nyanza kerekeza i Gicumbi ku ntera y'ibilometero 171 na metero 600, ni agace ariko katazitabirwa na Areruya Joseph ukinira ikipe ya Benediction Ignite ya hano mu Rwanda kubera ko uyu munsi atabashije gusoza ibi bivuze ko asezerewe muri Tour du Rwanda ya 2021.

    The post Umufaransa Alan Boileau yegukanye agace ka kabiri ka Tour du Rwanda 2021, Byiza Renus aba umunyarwanda waje hafi, Areruya Joseph ava mu isiganwa. appeared first on RUSHYASHYA.

    Source : https://rushyashya.net/umufaransa-alan-boileau-yegukanye-agace-ka-kabiri-ka-tour-du-rwanda-2021-byiza-renus-aba-umunyarwanda-waje-hafi-areruya-joseph-ava-mu-isiganwa/

  • Itsinda ry’Abantu 22 rigizwe na Couples zitandukanye bafashwe bagiye kwinezeza ku Gisenyi #rwanda #RwOT

    Aba bantu uko ari 22 bafashwe mu gitondo cyo kuri uyu wa Mbere tariki 03 Gicurasi 2021, bafashwe biteretse ibyo kunywa n’ibyo kurya mu buryo bugaragara ko bariho binezeza koko.

    Aba bantu 22 bagizwe n’abagabo 14 n’abagore 8, bakaba ari couples zitandukanye z’abantu bahuriye muri groupe ya Whatsapp aho biyemeje kwerecyeza muri uriya mujyi wa Gisenyi usanzwe uzwiho kuba uw’abanyabirori mu bihe bisanzwe bitari ibya COVID-19.

    Aba bantu bafashwe mu gitondo cyo kuri uyu wa Mbere batubahirije amabwiriza yo kwirinda ikwirakwira ry’icyorezo cya COVID-19, bahise bajyanwa muri kugira ngo bongeye bahugurwe ku bubi bwa COVID-19 ndetse banibutswe amabwiriza yo kwirinda iki cyorezo.

    Aba bagabo n’abagore bafashwe bari kwinezeza kandi baracibwa amande banubahirize ibitegkwa abantu bose bafatiwe muri ibi bikorwa byo kurenga ku mabwiriza yo kwirinda COVID-19 ubundi barekurwe.

    Mu Karere ka Rubavu hamaze iminsi hafatwa abantu barenze ku mabwiriza yo kwirinda COVID-19 dore ko hari n’abandi 71 barimo abageni bafashwe bareze kuri aya mabwiriza.

    Bariya bageni bari muri bariya 71, bafashwe bari kwiyakira ubwo bari bavuye gusezerana imbere y’amategeko ubundi bagahitira muri reception kandi itemewe.

    Umuvugizi wa Polisi mu Ntara y’Iburengerazuba, CIP Bonaventure Twizere Karekezi yavuze ko Polisi y’u Rwanda ku bufatanye n’Ubuyobozi bw’Inzego z’Ibanze, bazahora bari maso ku buryo uwo ari we wese uzanyuranya n’amabwiriza azafatwa kandi akabihanirwa hatitawe ku wo ari we.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Itsinda-ry-Abantu-22-rigizwe-na-Couples-zitandukanye-bafashwe-bagiye-kwinezeza-ku-Gisenyi

  • Kigali: Abatuye “Norvège” bari kwiyubakira umuhanda wa Kaburimbo –

    Umuhanda bashaka kubaka uzaba ureshya na kilometero imwe, uri kubakwa ku nkunga yatanzwe na buri muturage utuye muri uyu mudugudu wa Gakoni aho uherereye.

    Abaganiriye na IGIHE bavuga ko bahisemo kwiyubakira uyu muhanda mu kwishakira ibisubizo aho gutegereza ko leta ibakorera ibintu byose.

    Abatuye muri aka gace batishoboye bahawe akazi bavuga ko biri kubafasha gutunga imiryango yabo no kwiteza imbere cyane muri ibi bihe igihugu cyugarijwe n’icyorezo cya Covid-19.

    Kabayire Papias w’imyaka 63 yagize ati “Kuba natwe twarahawe akazi na bagenzi bacu baturusha ubushobozi byaradufashije cyane kuko nkanjye ubu mu kwezi kumwe maze nkora, naguze uduhene tubiri ikindi kandi kuko ku munsi mpembwa 2500 Frw afasha umugore mu bijyanye n’ubuhinzi ku buryo mu rugo mu gihe abandi baba bataka inzara kubera Covid-19.”

    Bikorimana Augustin yemeza ko uyu muhanda uzabafasha byinshi cyane birimo guha isura nziza agace batuyemo.

    Ati “Nkeka ko buriya nta wari ukwiye kujya ategereza ko Leta ariyo izajya imukorera ibintu byose. Ni nayo mpamvu abaturage bo muri aka gace bahisemo kwiyubakira kaburimbo kugira ngo Norvège yacu igaragare neza.”

    Umunyamabanga Nshingwabikorwa w’Umurenge wa Kigali, Niyibizi Jean Claude, yemeza ko aba batuye muri aka gace bubatse uyu muhanda nyuma y’aho babonye ko bakwiye kugira ibyo bakorera mu rwego rwo kudahora bategera amaboko leta.

    Ati “Ni umuhanda bashaka guhindura uw’umukara, ni ibikorwa ubona biteye ishema abaturage nyuma y’aho babonye ko batuye mu gace keza noneho muri uko gutura kwabo babonye ko bakwiye kugira ibyo bakora mu kudahora bategera amaboko leta ku buryo mbona ari byiza kuko bizatuma n’abandi baturage babyigiraho bajye biyubakira bimwe mu bikorwa remezo batabanje gutegereza ko leta ariyo ibikora.”

    Yasoje avuga ko n’ubwo aba baturage bari kubaka uyu muhanda mu myaka iri imbere ibilometero byawo bizagenda byiyongera.

    Abatuye muri aka gace bahisemo kwiyubakira umuhanda batarinze gutegereza ubufasha bwa leta

    Ni umuhanda bemeza ko uzuzura utwaye agera kuri miliyoni 50 Frw

    Umunyamabanga Nshingwabikorwa w’Umurenge wa Kigali, Niyibizi Jean Claude

    Kabayire Papias w’imyaka 63 yemeza ko kubaka uyu muhanda biri kumufasha kwiteza imbere

  • Amajyepfo: Imirenge yashyizwe muri Guma mu Rugo irasaba gukurwamo –

    Tariki ya 6 Mata 2021 ni bwo Minisiteri y’Ubutegetsi bw’Igihugu (MINALOC) yasohoye urutonde rw’imirenge yo muri tumwe mu turere tw’Intara y’Amajyepfo ijya muri Gahunda ya Guma mu rugo, guhera ku wa Gatatu tariki 7 Mata 2021.

    Iyo mirenge ni uwa Ruhashya na Rwaniro mu Karere ka Huye, Umurenge wa Gikonko, Kansi na Mamba mu Karere ka Gisagara n’uwa Ruramba mu Karere ka Nyaruguru.

    Ikindi abashyizwe muri guma mu rugo bagenderaho basaba kuvanwamo ni uko ibyumweru bitatu bari bahawe byamaze kurangira.

    Ibyumweru bitatu iyo mirenge yari yahawe yo kuguma mu rugo mu rwego rwo kwirinda ikwirakwizwa ry’icyorezo cya Covid 19 byarangiye tariki ya 28 Mata 2021.

    Karemera Anatole ati “Twebwe twategereje ko batuvana muri guma mu rugo ariko twarahebye, kandi ibyumweru bitatu baduhaye byararangiye. Icyifuzo ni uko badukura muri guma mu rugo kuko nta bantu benshi bakigaragara banduye inaha iwacu.”

    Bamwe mu bari barwaye Covid-19 bo mu mirenge imaze igihe muri guma mu rugo, bavuga ko bakoze ibishoboka byose bashyira mu ngiro amabwiriza yose kugira ngo birinde gukwirakwiza mu bandi Covid-19.

    Umwe ati “Nagumye mu cyumba cyanjye, umuryango wanjye wakomeje kunyitaho kandi twirinda guhura kugira ngo ntagira abo nanduza.”

    Icyifuzo bahurizaho bose ni ugusaba inzego zibishinzwe kubakura muri guma mu rugo, bakongera gusubira mu mirimo yabo kuko igihe bamaze badakora byabateye ubukene.

    By’umwihariko abakorera ubucuruzi mu isoko rya kijyambere rya Huye barasaba ko bakongera gukomorerwa bagacuruza.

    Muhire Innocent ucuruza imyenda ati “Bakwiye kutureka tukongera gucuruza kuko imibare ya Minisiteri y’Ubuzima imaze igihe yerekana ko nta bwandu bwinshi bukiri muri Huye. Badufashe badufungurire kuko ubukene butumereye nabi.”

    Ukuriye ishami rishinzwe kurwanya ibyorezo mu Kigo cy’Igihugu cy’Ubuzima, RBC, Dr Edson Rwagasore, yabwiye RBA ko mu bipimo bikomeje gufatwa mu bice by’Intara y’Amajyepfo, bigaragaza ko hari igabanuka ry’ubwandu bw’icyorezo cya Covid 19.

    Ibi ngo biratanga icyizere ko isaha n’isaha imirenge iri muri guma mu rugo yakurwamo.

    Ati “Ibipimo byafashwe byose nyuma y’iminsi 14 birimo kugenda bigaragaza y’uko nta murenge n’umwe uri hejuru ya 10% kuko imirenge yose iri munsi ya 3%; urumva rero ko biri kuduha icyizere ko n’imyanzuro izafatwa yabakura muri guma mu rugo.”

    Hashize iminsi mu Ntara y’Amajyepfo hafatwa ibipimo byibuze bigera kuri 50 muri buri kagari mu rwego rwo kureba agace kugarijwe kurusha ahandi. Kuva iyo gahunda yatangira hafashwe ibipimo bisaga ibihumbi 20.

    Umurenge wa Kansi muri Gisagara ni umwe mu yashyizwe muri Guma mu rugo

    [email protected]

  • Rumaga, umusore w’impano itangaje ukataje mu busizi –

    Umwumvise kuri radiyo cyangwa ahandi utamubonye wagira ngo ni umugabo w’igikwerere cyangwa undi ufite imyaka myinshi ugereranyije n’iyo afite. Ni umusore uganira asa nk’uvuga make ariko iyo mutindanye utangira kumva ubuhanga bwe bitewe n’amagambo yuje ubwenge ye.

    Iyo yivuga igihe yavukiye avuga ko yavutse ari ku wa 6 tariki 03 Nyakanga 1999. Ariko yajya kubara imyaka ye akongeraho n’amezi icyenda yamaze mu nda umubyeyi we amutwite! Avuka mu muryango w’abana batatu akaba ubuheta muri bo.

    Yabwiye IGIHE ko izina Rumaga yaryiswe na sekuru akiri muto yakwinjira mu busizi nk’umwuga rero agahitamo kuryubura, kuko mu buto bwe abenshi bari bamuzi nka Junior.

    Uyu musore yatangiye ubusizi akiri muto, ariko atangira kubwinjiramo ku mugaragaro ku wa 3 Kamena 2019.

    Ati “Nta kintu runaka nshingiraho mpimba, igikuru nitaho ni ukubahiriza indangagaciro na kirazira by’umuhanzi n’umunyarwanda muri rusange naho aho nkomora impano ni ku Mana. Maze guhimba ibisigo byinshi gusa ibiri hanze ni umunani. Guhanga igisigo ntabwo namenya nyir’izina igihe bimfata biterwa n’uko inganzo ije gusa kuko nitonda nkabanza nkanonosora igihangano cyanjye mbere yo kugisohora nibura nk’iminsi mirongo 42 mba nkinogeje.”

    Avuga ko umusizi afatiraho urugero harimo Bahati Innocent Mussa wamamaye nka Rubebe; mu batakiriho uwo afatiraho barimo Alex Kagame.

    Kuri we ngo ubusizi biragoranye ko bwatunga ababukora cyane ko bukorwa na bake mu Rwanda bigatuma abashaka kubushoramo imari bacika intege.

    Avuga ko hari igihe yigeze guhurira na Danny Vumbi kuri Radiyo Rwanda mu Kiganiro Amahumbezi, akamwihererana akamubwira ko ari umuhanga ariko ibintu akora bizamutunga akuze undi agahita agira umuhigo ukomeye wo kubibyaza umusaruro akiri muto.

    Ati “Nahuriye na Danny Vumbi mu kiganiro ‘Amahumbezi’ yumvise ubuhanga bwanjye arambwira ati ibi bintu urabizi uri umuhanga ariko bizagutunga. Yarananyeruriye ambwira ko yabikoze ariko akabona gutunga umuntu bigoye. Nanjye nahise niha intego ikomeye yo kubibyaza umusaruro no kubishyiramo imbaraga kandi biri kuza.”

    Iyo abajijwe aho akura amagambo akoresha akomeye ndetse niba hari umuntu ujya umufasha kwandika, yavuze ko ntawe. Ati “Oya nta muntu umfasha akenshi kereka nk’ikinyisobye mbaza abantu nkeka ko bakindusha ariko abo ushobora no gusanga batari mu banduta gusa.”

    Uyu musore yavukiye Umutakara na Nyamagana kwa Nangingare mu Ruhango. Nyuma umuryango uza kwimukira mu Marangara i Muhanga ari naho uyu munsi uba. Gusa uyu musore akaba aba i Kigali kubera impamvu zibyo akora.

    Amashuri abanza yayize mu Rwunge Rwisunze Mutagatifu Dominiko i Mbuye (URG) mu Ruhango, icyiciro cya mbere cy’ayisumbuye akiga mu iseminari nto y’i Kansi , icya kabiri cy’ayisumbuye akiga mu Rwunge rw’abisunze Mutagatifu Yozefu mu Birambo bya Gashari aho yize Ubugenge , Ubutabire n’Ibinyabuzima (PCB) . yasoje amashuri yisumbuye mu 2017.

    Ubu yiga muri Kaminuza y’u Rwanda, mu Kigo Nderabarezi aho yiga Ubumenyamuntu n’Ubugororangingo. Ari mu mwaka wa nyuma wa kaminuza.

    Amaze kwamamara mu bisigo birimo ‘Wumva ute?’, ‘Unbreakable promise’, ‘Nzoga’, ‘Ivanjiri’, ‘Umugore si umuntu’, ‘Bikwiye kwigwaho’, ‘Tugane iwacu’ aheruka gushyira hanze n’ibindi byinshi.

    Rumaga afite ubuhanga buhambaye

    Rumaga afite ubuhanga buhambaye mu busizi

    Rumaga afite imyaka 22 y’amavuko

  • Kigali: Abatuye 'Norvège' bari kwiyubakira umuhanda wa Kaburimbo – #rwanda #RwOT

    Umuhanda bashaka kubaka uzaba ureshya na kilometero imwe, uri kubakwa ku nkunga yatanzwe na buri muturage utuye muri uyu mudugudu wa Gakoni aho uherereye.

    Abaganiriye na IGIHE bavuga ko bahisemo kwiyubakira uyu muhanda mu kwishakira ibisubizo aho gutegereza ko leta ibakorera ibintu byose.

    Abatuye muri aka gace batishoboye bahawe akazi bavuga ko biri kubafasha gutunga imiryango yabo no kwiteza imbere cyane muri ibi bihe igihugu cyugarijwe n'icyorezo cya Covid-19.

    Kabayire Papias w'imyaka 63 yagize ati 'Kuba natwe twarahawe akazi na bagenzi bacu baturusha ubushobozi byaradufashije cyane kuko nkanjye ubu mu kwezi kumwe maze nkora, naguze uduhene tubiri ikindi kandi kuko ku munsi mpembwa 2500 Frw afasha umugore mu bijyanye n'ubuhinzi ku buryo mu rugo mu gihe abandi baba bataka inzara kubera Covid-19.'

    Bikorimana Augustin yemeza ko uyu muhanda uzabafasha byinshi cyane birimo guha isura nziza agace batuyemo.

    Ati 'Nkeka ko buriya nta wari ukwiye kujya ategereza ko Leta ariyo izajya imukorera ibintu byose. Ni nayo mpamvu abaturage bo muri aka gace bahisemo kwiyubakira kaburimbo kugira ngo Norvège yacu igaragare neza.'

    Umunyamabanga Nshingwabikorwa w'Umurenge wa Kigali, Niyibizi Jean Claude, yemeza ko aba batuye muri aka gace bubatse uyu muhanda nyuma y'aho babonye ko bakwiye kugira ibyo bakorera mu rwego rwo kudahora bategera amaboko leta.

    Ati 'Ni umuhanda bashaka guhindura uw'umukara, ni ibikorwa ubona biteye ishema abaturage nyuma y'aho babonye ko batuye mu gace keza noneho muri uko gutura kwabo babonye ko bakwiye kugira ibyo bakora mu kudahora bategera amaboko leta ku buryo mbona ari byiza kuko bizatuma n'abandi baturage babyigiraho bajye biyubakira bimwe mu bikorwa remezo batabanje gutegereza ko leta ariyo ibikora.'

    Yasoje avuga ko n'ubwo aba baturage bari kubaka uyu muhanda mu myaka iri imbere ibilometero byawo bizagenda byiyongera.

    Abatuye muri aka gace bahisemo kwiyubakira umuhanda batarinze gutegereza ubufasha bwa leta

    Ni umuhanda bemeza ko uzuzura utwaye agera kuri miliyoni 50 Frw

    Umunyamabanga Nshingwabikorwa w'Umurenge wa Kigali, Niyibizi Jean Claude

    Kabayire Papias w'imyaka 63 yemeza ko kubaka uyu muhanda biri kumufasha kwiteza imbere

    Source : http://igihe.com/amakuru/u-rwanda/article/kigali-abatuye-norvege-bari-kwiyubakira-umuhanda-wa-kaburimbo

  • Ese ubwisanzure  bw'itangazamakuru butagira rutangira, butaniye he n'ubwigomeke. Ikaramu cyangwa mikoro bidatinya'kirazira', ntaho bitaniye n'uburozi. #rwanda #RwOT

    Tariki 03 Gicurasi buri mwaka, u Rwanda rwifatanya n'isi yose mu kwizihiza Umunsi Mpuzamahanga w'Ubwisanzure bw'Itangazamakuru. Uyu uba ari umwanya wo kwibukiranya ko itangazamakuru ryubaha kirazira, ari umusemburo w'iterambere, kuko aho rikorwa kinyamwuga riba ijwi rya rubanda, ikiraro hagati y'abayobozi n'abayoborwa. Uba ari n'umunsi wo kwibutsa ubuyobozi bw'ibihugu ko kubahiriza ubwisanzure bw'itangazamakuru ari inshingano zabwo. Ni igihe cyo kuzirikana ko kwisanzura atari ukuba igisare.

    Nyamara iyo usesenguye amateka y'itangazamakuru mu Rwanda rwo hambere, usanga ryaracuritse ibintu. Aho kuba umusingi w'amajyambere, ryakoreshejwe igihe kirekire mu gusenya Igihugu, kugeza n'aho ryifashishwa muri Jenoside yakorewe Abatutsi.

    Itangazamakuru rya nyuma ya Jenoside ryari ritegerejweho kubaka ikinyuranyo, abantu nka Kantano, Ngeze Hassan, Bemeriki, Ferdinand Nahimana n'abandi biyitaga abanyamakuru kandi ari abajenosideri , bagasigara mu mateka. Nibyo,  hari abanyamakuru bagerageje gukora umwuga utarimo umwanda. Abo ni abagize uruhare mu iterambere uRwanda rwagezeho mu ngeri nyinshi muri iyi myaka 27 ishize, zirimo ubumwe n'ubwiyunge, imibereho myiza y'abaturage, umutekano n'izindi.

    Singambiriye gusiga icyasha itangazamakuru muri rusange, kuko hari abamenye gukoresha neza ubwisanzure aho kubwitiranya n'ubwigomeke. Icyakora mu Rwanda rwa none kuri bamwe(bagenda barushaho kuba benshi), urwishe ya nka ruracyayirimo. Inda nini yasumbye indagu, agari kujya ubwonko hajya igifu. Bihisha inyuma y'ubwisanzure, mikoro cyangwa ikaramu yabo bigahinduka  umuhoro wica.Abo ni abitiranya ubwisanzure n'ubwigomeke.

    Biratangaje kubona uyu munsi ,umunyamakuru w'Umunyarwanda yifatanya n' abahakana bakanapfobya Jenoside yakorewe Abatutsi, akambura agaciro  miliyoni isaga y'inzirakarengane zatikiriye muri iyo Jenoside, agakomeretsa abigambiriye abayirokotse. Ingero ntizibarika: GATANAZI Etienne yifatanyije n'abigaragambya ngo IDAMANGE Iryamugwiza ararengana, kandi yarapfobeje ku mugaragaro Jenoside yakorewe Abatutsi, akanavugira mu ruhame amagambo agamije koreka uRwanda. Si ibyo gusa, Real Talk, televiziyo ya Gatanazi ubu yabaye umuyoborow'abatifuriza ineza uru Rwanda, nka INGABIRE Victoire,  Bernard NTAGANDA n'abandi bangizi, byose bikiririrwa 'ubwisanzure mu gutanga ibitekerezo'.  Televiziyo Ishema ya Padiri Thomas NAHIMANA n'umukozi we NIYONSENGA Dieudonné, iya KARASIRA Vénuste, ikinyamakuru Umurabyo cya Agnès Nkusi UWIMANA, n'ibindi bikorera kuri murandasi, nta kindi bitangaza uretse guhakana no gupfobya Jenoside yakorewe Abatutsi, n' ibindi bigamje guhindanya isura y'uRwanda.

    Igitangaje bose barabikora bagakomeza kwidegembya, ukaba wakeka ko inzego zishinzwe kugarura mu murongo  abatannye zitabona cyangwa zibishima.Wasobanura ute ukuntu uwo Agnès UWIMANA ashinjwa mu rukiko kwakira amafaranga y'imitwe y'iterabwoba agakomeza kwidegembya. Wasobanura ute ukuntu yandagaza ubuyobozi bw'Ishyirahamwe Nyarwanda  ry'Abanyamakuru, bitoreye ubwabo, abwita 'agatsiko k'amabandi', ntakurikiranweho icyaha gusebanya mu ruhame. Iri jambo'agatsiko k'amabandi', riswanzwe rizwi ku bigarasha n'interahamwe, barikoresha batuka ubuyobozi bw'uRwanda.

    Mu by'ukuri rero, umunsi nk'uyu w'ubwisanzure bw'itangazamakuru, wagombye kuba umwanya wo gushima abakora neza, ahakiri intege nke hagakubitwa umwoto, abangiza nkana bagakubitwa intahe mu gahanga. Abanyamakuru bakwiye kwibuka ko uburenganzira bwabo burangirira aho ubw'abandi baturage butangirira. Gusebanya, gukwiza ibihuha, kurya ruswa no kuba ibikoresho by'abagizi ba nabi, bigahanwa by'intangarugero, kuko ubwisanzure butandukanye n'ubwigomeke.

    Ikoranabuhanga mu itumanaho ni ingenzi, ariko gushinga imbuga za Youtube zikora nk'izo tubona hanze aha, ni ukwimika Kangura na RTLM bishya. Inzego zibishinzwe cyane cyane iz'umutekano, nimuhaguruke, kuko kurebera abatoba amazi twese tunywaho, ni nko guha icyuho umurozi ejo akakumara ku rubyaro.

    RUKUNDO Peace

    Umusomyi wa Rushyashya

     

    The post Ese ubwisanzure  bw'itangazamakuru butagira rutangira, butaniye he n'ubwigomeke. Ikaramu cyangwa mikoro bidatinya'kirazira', ntaho bitaniye n'uburozi. appeared first on RUSHYASHYA.

    Source : https://rushyashya.net/ese-ubwisanzure-bwitangazamakuru-butagira-rutangira-butaniye-he-nubwigomeke-ikaramu-cyangwa-mikoro-bidatinyakirazira-ntaho-bitaniye-nuburozi/

  • Abafana ba Manchester United bakomerekeje umupolisi mu myigaragambyo yo kwamagana Glazers #rwanda #RwOT

    Aba bafana benshi bari buzuye hanze n'imbere mu kibuga,bacanye ibyotsi,bavuza induru ndetse banakomeretsa abapolisi 2 mu kwigaragambya basaba umuryango wa Glazer kubavira mu ikipe nkuko amakuru abitangaza.

    Polisi ya Greater Manchester yatangaje ko aba bafana bateye icupa mu maso umupolisi baramukomeretsa cyane byatumye ajyanwa kwa muganga.

    Umwe mu bafana yuriye izamu kuri Stretford End abandi batera ibyotsi mu bapolisi bakomeretsa uyu wavuzwe.

    Abafana benshi bahise bajya kuri hoteli Lowry babuza abakinnyi ba United gusohoka hanze ngo bajye ku mupira.

    Polisi yahanganye n'aba bafana ibakubita inkoni cyane ko hari bamwe bari basaze bashaka ko umuryango wa Glazer wagurisha ikipe yabo.

    Abapolisi bari ku mafarashi bagerageje gusunika aba bafana babakura mu gace kugira ngo abakinnyi binjire bakine ariko ntibyakunze.

    Polisi yasohoye itangazo rigira riti 'ibyotsi n'amacupa byatewe abapolisi.Abigaragambya ku kibuga cya Old Trafford bari basaze cyane bigira intagondwa kuri polisi byatumye abasaga 100 binjira mu kibuga,abakozi b'ikipe bifungirana mu byumba.

    Abapolisi 2 bakomeretse harimo umwe wakorekejwe n'icupa akomereka cyane mu isura byatumye ajyanwa kwa muganga igitaraganya.'

    Nyuma y'ibiganiro hagati ya The Premier League,abayobozi ba United n'aba Liverpool ndetse n'abayobozi mu nzego za Leta bemeje ko uyu mukino wagombaga gukinwa kuri iki cyumweru saa 17:30 usubikwa.

    Source : http://umuryango.rw/imyidagaduro/imikino/article/abafana-ba-manchester-united-bakomerekeje-umupolisi-mu-myigaragambyo-yo