Webrwanda Backend

Author: webrwanda

  • Perezida Kagame yakiriye indahiro z’abacamanza bashya, abasaba kurandura ruswa n’ibyaha bimunga ubukungu –

    Usibye Dr Muyoboke, abandi barahiye ni Perezida w’Urukiko rw’Ubujurire François Régis Rukundakuvuga wagiyeho asimbuye Dr Karimunda ndetse na Perezida w’Urukiko Rukuru rw’Ubucuruzi, Clotilde Mukamurera wari umaze igihe ari umucamanza muri uru rukiko.

    Abarahiye uko ari batatu bahawe iyi myanya kuwa 21 Mata 2021 na Perezida Paul Kagame.

    François Régis Rukundakuvuga yarahiriye kuba Perezida w’Urukiko rw’Ubujurire nyuma y’igihe kirekire ari Umugenzuzi Mukuru w’Inkiko, aho yavuye kuri uwo mwanya agirwa Umucamanza mu Rukiko rw’Ikirenga.

    Perezida Kagame mu ijambo rye, yavuze ko ubutabera bukwiriye kwizeza ko abarenze ku mategeko babihanirwa ku buryo bakwirinda kuzabisubira.

    Ati “Abaturage batakaza icyizere mu butabera, iyo babona ko kurangiza imanza bitubahwa kuko harimo ruswa n’ubundi buriganya, aho gukemura ibibazo bizamura izindi manza nyinshi.”

    Umukuru w’Igihugu yavuze ko abaturage uko baba bangana kose, bakabona ko urwego rw’ubucamanza rurimo ruswa, kandi rukoreshwa n’abafite ubushobozi cyangwa imbaraga, aba ari ibintu bikwiriye kwibazwaho, hagashakwa icyakorwa kugira ngo bihinduke.

    Yavuze ko uko u Rwanda rukomeza kwaguka mu bukungu, ari nako n’ibyifuzo by’abaturage byaguka bityo ko ubutabera bukwiriye kwita ku kurwanya ibyaha bimunga ubukungu.

    Ati “Ubukungu bw’igihugu cyacu bukomeje gukura no kwaguka, uko bukura niko ibyifuzo by’abanyarwanda bateze ku gihugu cyabo byiyongera, urwego rw’ubutabera rugomba gukurikiranira hafi iryo zamuka ry’ubukungu n’imibereho y’abanyarwanda rukabigiramo uruhare n’ah’ubundi inshingano zaba zitumvikana batagize urwo ruhare.”

    Yatanze urugero avuga ku ntego igihugu gifite zo kwimakaza ikoranabuhanga, agaragaza ko zidashobora kugerwaho mu gihe ibyaha bikoreshwa ikoranabuhanga bitarwanyijwe.

    Ati “Nabaha n’ingero, intego zacu zo mu ikoranabuhanga ntizagerwaho tudahanganye n’ibyaha bikorerwa kuri murandasi, ishoramari n’amasezerano mpuzamahanga bifasha gushyigikira ubukungu, ariko ibyo biba iyo hari icyizere cy’uko ibyasezeranyijwe bizaboneka, bigashingira kandi k’uko ubutabera bukurikirana ibyo bikorwa, n’ahakozwe amakosa agahanwa.”

    “Amabanki ntashobora kubaho, niba abayafitiye imyenda bashobora kubaho bakoresha inzego z’ubutabera mu gutinda kwishyura cyangwa se ntibanishyure na busa. Amasezerano ntacyo yaba amaze niba ubutabera budashobora kwizeza ko abagerageza kuyatesha agaciro batubahiriza amategeko bakumirwa bakabihanirwa ndetse kenshi iyo bibaye ngombwa bakabihanirwa biremereye bituma bakwirinda kuzanabisubira cyangwa se n’abandi kugana iyo nzira.”

    Umukuru w’Igihugu yavuze ko inzego z’ubutabera zigomba gushyigikira iterambere n’umuco wo kubahiriza amategeko, abacamanza bagahora ku isonga mu kubahiriza amategeko bo ubwabo bikanakomereza mu batuye u Rwanda.

    U Rwanda ruri ku mwanya wa 37 ku Isi mu gipimo mpuzamahanga cy’uko ibihugu bigendera ku mategeko.

    Dr. Aimé Muyoboke Kalimunda ni umwe mu barahiye /Ifoto: Ububiko

  • Cristiano Ronaldo na Messi bahigitswe n’umukinnyi w’imikino njyarugamba mu binjije agatubutse muri 2020 #rwanda #RwOT

    Rutahizamu wa FC Barcelona na Argentine, Lionel Messi ndetse na Critsiano Ronaldo ukinira Juventus na Portugal bahigitswe na Conor McGregor mu binjije agatubutse mu mwaka wa 2020.

    Uru rutonde rukorwa buri mwaka n’ikinyamakuru Forbes, rwagaragaje ko umukinnyi w’imikino njyarugamba, Conor McGregor ari we winjije agatubutse mu mezi 12 ashize aho yinjije miliyoni 128.

    Uyu munya-Irlande, Forbes yagaraje ko yakoreye miliyoni 15,6£ mu murwano yahuyemo na Dustin Poirier, andi mafaranga yavuye mu bafatanyabikorwa yamamariza ndetse n’inzoga ya whiskey yamwitiriwe.

    McGregor yaherukaga kujya mu bakinnyi 10 ba mbere binjije menshi mu 2018 ubwo yari amaze kurwana na Floyd Mayweather.

    Uyu mugabo yakurikiwe n’abakinnyi babiri ba ruhago, Lionel Messi (£92,4m) na Cristiano Ronaldo (£85.3m).

    Urutonde rurambuye rw’abakinnyi 10 ba mbere binjije menshi mu 2020
    Conor McGregor: $180m
    Lionel Messi: $130m
    Cristiano Ronaldo: $120m
    Dak Prescott: $107,5m
    LeBron James: $96,5m
    Neymar: $95m
    Roger Federer: $90m
    Lewis Hamilton: $82m
    Tom Brady: $76m
    Kevin Durant: $75m

    Conor McGregor ni we uyoboye urutonde

    Lionel Messi ni we wa kabiri

    Cristiano ari ku mwanya wa 3

    Source : http://isimbi.rw/siporo/article/cristiano-ronaldo-na-messi-bahigitswe-n-umukinnyi-w-imikino-njyarugamba-mu-binjije-agatubutse-muri-2020

  • Umusore yibye inkoko bamutegeka igihano gikomeye #rwanda #RwOT

    Umusore utavuzwe amazina n'igihugu akomokamo yafashwe yibye inkoko y'abandi nuko ategekwa kuyirya yose akayimara ari mbisi, imbere y'imbaga y'abantu bari bamushungereye barakaye cyane.

    Nkuko byagaragaye mu mashusho yakwirakwijwe ku mbuga nkoranyambaga zo mu bihugu byo muri Afurika y'Iburengerazuba, uyu musore ukiri muto yategetswe kurya iyi nkoko yose ari mbisi  akayimara, nk'igihano cyo kugira akaboko karekare.

    Uyu musore yubashye aya mabwiriza arya iyi nkoko ari mbisi arayimara ntawe umufashije arangije baramurekura aragenda.

    Source : https://impanuro.rw/2021/05/14/umusore-yibye-inkoko-bamutegeka-igihano-gikomeye/

  • Umwanya wa 37 mu kugendera ku mategeko ku Isi ni mwiza ariko ntuhagije- Perezida Kagame #rwanda #RwOT

    Perezida Paul Kagame yabivuze kuri uyu wa Gatanu tariki 14 Gicurasi 2021 ubwo yakiraga indahiro z’Abacamanza baherutse guhabwa inshingano nshya barimo Umucamanza mu Rukiko rw’Ikirenga ndetse na Perezida w’Urukiko rw’Ubujurire.

    Perezida Kagame avuga ko ubukungu bw’u Rwanda bukomeje kuzamuka bikanatuma ibyo Abanyarwanda bategereje ku gihugu cyabo byiyongera.

    Umukuru w’Igihugu kandi avuga ko Ubutabera bugomba kugira uruhare mu izamuka ry’ubwo bukungu.

    Yagarutse ku ngero z’inzego ziri kuzamuka zirimo Ikoranabuhanga, avuga ko hagenda hasinywa amasezerano y’ishoramari ariko ko abantu baza gushora imari yabo mu gihe bazi ko muri icyo gihugu hari amategeko yubahirizwa.

    Na none kandi abaturage batakariza icyizere igihugu iyo mu butabera harimo imikorere itanoze ku buryo babona nk’abarenganywa n’Igihugu cyabo

    Iyo abaturage bafite uro baregera n’ubarenganura bituma icyizere bagirira izindi nzego ndetse n’Igihugu cyabo, kiyongera.

    U Rwanda rwaje ku mwanya wa 37 ku isi yose mu bipimo mpuzamahanga by’uko ibihugu bigendera ku mategeko.

    Ati 'Ku ruhande rumwe turabishima ugereranyije n’aho igihugu kivuye ariko urumva kugera kuri 37 hari umwanya munini, tugomba gutera intambwe tugana ku mwanya wa mbere.'

    Yakomeje agira ati 'Bivuze ko hakiri byinshi byo gukorwa byo kurinda ibyo twagezeho no gukomeza kubyubakiraho.'

    Yagarutse ku buryo bwashyizweho mu rwego rwo kwihutisha ubutabera burimo ubujyanye n’Abunzi bafasha mu kumvikanisha abantu no kubunga kandi ibibazo byabo bigakemuka mu buryo bwihuse.

    Yagarutse kuri ruswa yakunze kuvugwa mu rwego rw’Ubutabera, asaba ko hakwiye gukorwa ibishoboka byose kugira ngo bihinduke.

    Abacamanza barahiye uyu munsi ni Umucamanza mu Rukiko rw’Ikirenga, Dr Aimé Karimunda Muyoboke, François Régis Rukundakuvuga wagizwe Perezida w’Urukiko rw’Ubujurire ndetse na Clotilde Mukamurera wagizwe Perezida w’Urukiko Rukuru rw’Ubucuruzi.

    UKWEZI.RW

    Source : http://www.ukwezi.rw/mu-rwanda/3/Umwanya-wa-37-mu-kugendera-ku-mategeko-ku-Isi-ni-mwiza-ariko-ntuhagije-Perezida-Kagame

  • Zari Hassan yakodeshereje abahungu be Inzu yakatarabone nyuma yo gushwana Wema Septetu [AMAFOTO] #rwanda #RwOT

    Uyu mugore aherutse gutungura benshi ubwo yatangazaga ko yamaze gukodeshereza abahungu be babiri bakuru, Pinto Tlale na Raphael Semwanga Junior inzu ngo bajye kubamo bamenye ubuzima batari kumwe na we, ni nyuma yo kuvuga ko bakuze badakwiye kuba na we, buri umwe yamukodeshereje inzu ye.

    Inkuru zahise zivuga ko ari nko kubirukana kugira ngo ajye abona uko yisanzura n'umukunzi we mushya.

    Uyu mugore ukunze gukora imitwe y'inkuru mu binyamakuru bitandukanye, yongeye kugarukamo yifatira ku gahanga Wema Sepetu bahuriye ku kuba barakundanye n'umuhanzi w'icyamamare, Diamond Platnumz avuga ko yananutse ndetse ameze nk'uwataye umutwe.

    Ibi yabikomoje ku ifoto yashyize kuri Instagram ye(Zari) ari kumwe n'imbwa ye, maze umwe mu bakunzi be yayivuzeho amubaza niba imbwa ye itarabura nk'iya Wema.

    Uyu mukunzi we witwa The Real Cathe yavuze ati'Zari imbwa yawe ntirabura nk'iya Wema? Ariko Wema yagusubije nabi.'

    Zari yamusubije ko ari mu gisibo cy'Abayisilamu(Ramadhan) arimo gutanga ubusha rero Wema ashatse yakoresha ibyo biryo by'ubuntu akareba ko yabyibuha kuko asigaranye umutwe gusa.

    Ati'turi muri Ramadhan, ndatanga ubufasha. Yagakoresheje ibiryo by'ubuntu kuko mbona asigaranye umutwe gusa, iyo ni inzara imuvigisha ibyo mureke arye azamera neza.'

    Wema Sepetu yafashe ifoto iruhande rwe hari ibiryo byinshi avuga ko atatongana n'abantu bakuru kuri we kuko ababuha, byongeye ngo gutongana n'abantu bakuru ni umuvumo.

    Mu minsi ishize nibwo Wema yatangaje ko yabuze imbwa ye ndetse ashyiraho miliyoni 2 kuwuzayimubonera.


    Zari n'abahungu be

    Source : http://umuryango.rw/imyidagaduro/article/zari-hassan-yakodeshereje-abahungu-be-inzu-yakatarabone-nyuma-yo-gushwana-wema

  • Urubyiruko rusaga 300 rwahuriye mu nama yiga ku guhangana n’abapfobya Jenoside (Amafoto) –

    Iri huriro ryabereye ku Intare Arena kuri uyu wa Gatanu tariki 14 Gicurasi 2021. Ryateguwe n’Umuryango Imbuto Foundation ku bufatanye na Minisiteri y’Urubyiruko n’Umuco, Inama y’Igihugu y’Urubyiruko, Komisiyo y’Igihugu yo kurwanya Jenoside, CNLG; Imiryango y’Urubyiruko rw’Abanyeshuri n’abahoze ari Abanyeshuri barokotse Jenoside, GAERG na AERG, Urubyiruko rwibumbiye mu muryango w’abaharanira amahoro n’urukundo, PLP, Pan African Movement n’ izindi nzego.

    Iri huriro ryitabiriwe n’Umuyobozi w’Ikirenga wa Imbuto Foundation, Madamu Jeannette Kagame n’abandi bayobozi batandukanye.

    Biteganyijwe ko abitabiriye barahabwa ibiganiro bitandukanye bigaruka ku mateka ya Jenoside yakorewe Abatutsi mu 1994, gahunda ya Ndi Umunyarwanda ndetse n’ibyo urubyiruko rwitezweho mu rugamba rwo guhashya abagihakana bakanapfobya Jenoside yakorewe Abatutsi.

    Izi nzego zose zitangaza ko intego rusange y’iri huriro ari ukwibuka Jenoside yakorewe Abatutsi nk‘urubyiruko, kwibukiranya ingaruka za Jenoside no kwishakamo imbaraga zo gukomeza kubaka amateka mashya ari nako habungabungwa amateka ya Jenoside yakorewe Abatutsi, hanyomozwa abagerageza kuyihakana no kuyipfobya.

    Mu butumwa Perezida Paul Kagame yagejeje ku Banyarwanda n’Isi yose ubwo yatangizaga ibikorwa byo kwibuka Jenoside yakorewe Abatutsi ku nshuro ya 27, yavuze ko nta mpamvu n’imwe ikwiye kubuza Abanyarwanda kurwanya abahakana bakanapfobya Jenoside yakorewe Abatutsi.

    Ati “Niba abahakana amateka y’ibyabaye bitabateye isoni, njyewe, wowe twagirira iki ubwoba bwo guhangana nabo?”

    Ubu butumwa bwakurikiwe n’impanuro Madamu Jeannette Kagame, Umuyobozi w’ Ikirenga w’ Umuryango Imbuto Foundation yatanze.

    Yavuze ko “Muri ibi bihe twibuka ku nshuro ya 27 Jenoside yakorewe Abatutsi, ndibutsa abakuru ko umurage dukwiye gusigira abadukomokaho ari ukubigisha amateka y’ukuri y’u Rwanda.”

    Yakomeje agira ati “Dukomeze twubake Igihugu kizira ivangura iryo ariryo ryose kandi dukomeze turwanye ihakana n’ipfobya bya Jenoside yakorewe Abatutsi n’ingengabitekerezo yayo kuko tuzi ingaruka zayo.”

    Ubu butumwa bw’ abayobozi bakuru bwongeye kwibutsa igitekerezo- ngiro cy’Igihango cy’Urungano urubyiruko rwagiranye n’ igihugu muri Kamena 2013, mu biganiro bya ’Ndi Umunyarwanda.’

    Nibwo urubyiruko rwiyemeje ko Jenoside itazongera kubaho kandi ko ruzahora ku ruhembe mu kuyikumira, kurwanya ingengabitekerezo yayo, kurwanya abayihakana n’abayipfobya ndetse no guhuranira kubaka u Rwanda rubereye buri Munyarwanda.

    Biteganyijwe ko uru rubyiruko rusaga 300 ruri buganire ku ngingo zitandukanye zirimo no kurebera hamwe uko rwahangana n’abagipfobya Jenoside yakorewe Abatutsi

    Ibi biganiro byanitabiriwe na Minisitiri w’Ubutegetsi bw’Igihugu, Gatabazi Jean Marie Vianney

    Minisitiri w’Uburezi, Dr Uwamariya Valentine ni umwe mu bayobozi bakuru bari muri ibi biganiro

    Pasiteri Antoine Rutayisire umenyerewe mu nyigisho zifasha urubyiruko nawe ari muri ibi biganiro

    Amafoto: Niyonzima Moise

  • Minisitiri Busingye yasabye Abanya-Gisenyi kwirinda abagoreka amateka bavuga ko habayeho Jenoside ebyiri –

    Ibi Minisitiri Busingye yabigarutseho ku wa 13 Gicurasi 2021, ubwo habaga igikorwa cyo gushyingura imibiri 142 y’Abatutsi bazize Jenoside mu 1994 yabonetse mu Kibuga cy’Indege cya Gisenyi no kwimurira indi 448 mu rwibutso rwa Komine Rouge.

    Iki gikorwa cyahuriranye na gahunda ngarukamwaka ya ‘Ibuka Gisenyi’ aho hibukwa Abatutsi biciwe mu yahoze ari Perefegitura ya Gisenyi cyane cyane kuri Komine Rouge.

    Minisitiri Busingye Johnston akaba n’Intumwa Nkuru ya Leta yasabye abaturage kwirinda abapfobya Jenoside yakorewe Abatutsi bashaka kwerekana ko habaye n’indi yakorewe Abahutu.

    Ati “Hari abashaka kugoreka amateka bakumva ko batayemera uko bigomba, bamwe bayisesekaho Jenoside ya kabiri babeshya ko haba harabaye Jenoside yakorewe Abatutsi na Jenoside yakorewe Abahutu.”

    “Twibukiranye neza ko muri iki gice cyahoze ari Perefegitura ya Gisenyi habaye intambara y’abacengezi hakaba haraguyemo abantu ariko usanga abashaka kugoreka amateka, izo mpfu bazigereka ku Ngabo z’u Rwanda nyamara abari hano murabizi. Ubukana bw’intambara y’abacengezi n’intego yabo yo gusoza umugambi wa Jenoside ntawe utabizi, ahubwo Ingabo z’u Rwanda zikaba zarabatsinze zikagarura umutekano.’’

    Umunyamabanga Nshingwabikorwa wa Komisiyo y’Igihugu ishinzwe kurwanya Jenoside, CNLG, Dr Bizimana Jean Damascène yahumurije abarokotse bari bafite ababo bashyinguwe mu rwibutso rwa Rugerero, abizeza ko ibimenyetso by’amateka aribwo bizabungwabungwa neza.

    Ati ’’Iteka rya Perezida wa Repubulika rigena guhuza inzibutso, rigena ko nubundi ahavuye imibiri hasigwa ikimenyetso. Kirahasigwa ariko hari igihe bidashoboka bitewe n’uko hari ibindi bikorwa bihateganyirijwe, aho bidashoboka n’ubundi amateka ajyanwa aho imibiri yimuriwe. Hashyirwa amateka yose aranga abahashyinguye, aho bakomoka, aho biciwe, uko Jenoside yagenze ubuhamya n’ibindi bimenyetso hakajya n’igice kiranga ababishe.”

    Urwibutso rwa Komine Rouge kuri ubu rukaba rushyinguwemo imibiri 5 203 y’Abatutsi bazize Jenoside baguye mu bice bitandukanye mu cyahoze ari Perefegitura ya Gisenyi.

    Minisitiri Busingye yasabye abanya-Gisenyi kwirinda abagoreka amateka bavuga ko habayeho Jenoside ebyiri

    Imibiri 142 y’Abatutsi bazize Jenoside mu 1994 yabonetse mu Kibuga cy’Indege cya Gisenyi igezwa aho yagombaga gushyingurwa mu cyubahiro

    Byari agahinda gakomeye ku babuze ababo

    Umunyamabanga Nshingwabikorwa wa CNLG, Dr Bizimana Jean Damascène, yavuze ko amateka y’iyi mibiri yimuwe azakomeza kubungabungwa

    Minisitiri Busingye yunamiye abazize Jenoside yakorewe Abatutsi mu 1994

  • Kenya: Urukiko rwahagaritse umushinga wo guhindura itegeko nshinga uzwi nka BBI #rwanda #RwOT

    Urukiko rukuru rwa Kenya rwatangaje ko umushinga wa guverinoma wo kuvugurura itegekonshinga uzwi nka BBI udakwiye, udakurikije amategeko kandi unyuranyije n'itegekonshinga.

    Rwavuze kandi ko Perezida Uhuru Kenyatta yahonyoye itegekonshinga atangiza ikintu ubundi cyagombaga kuva mu gushaka kwa rubanda.

    Umushinga w'itegeko ryo kuvugurura itegekonshinga, uzwi cyane nka Building Bridges Initiative (BBI) warimo ibijyanye no kongera abagize guverinoma n'inteko ishingamategeko.

    Uyu mwanzuro biravugwa ko ari umwe mu ikomeye cyane itambamiye guverinoma ufashwe n'urukiko kuva intsinzi ya Kenyatta mu matora ya 2017 yateshwa agaciro n'urukiko.

    Kenya yari yiteguye kujya mu matora ya kamarampaka kuri BBI, ashyigikiwe na leta, perezida n'ukuriye uruhande rutavugarumwe na leta, Raila Odinga, ikaba mbere y'amatora ya perezida yo mu mwaka utaha.

    Ariko inteko y'abacamanza batanu yafashe icyemezo ko ibyo guhindura itegekonshinga binyuranyije n'amategeko, banzura ko perezida yananiwe ubutegetsi n'ubunyangamugayo.

    Aba bacamanza bavuze ko mu gutangiza ibyo guhindura itegekonshinga, Perezida Kenyatta yigabije ububasha bw'abaturage.

    Mu mategeko ya Kenya uyu mwanzuro w'urukiko utuma hashobora kubaho kweguza perezida.

    Ariko ibi bisa n'ibidashobora gukorwa n'inteko ishingamategeko yo yari yamaze kwemeza BBI  ko yahirahira yeguza perezida.

    Impinduka zivugwa na BBI zirimo gushyiraho ibiro bya minisitiri w'intebe, gushyiraho uturere (constituencies) dushya 70, no guha imyanya abibagiranye byashoboraga gushyiraho imyanya mishya 300 y'abadepite.

    Uhuru Kenyatta na Raila Odinga bari inyuma y'izi mpinduka, bavuga ko zari kurangiza iby'uko uwatsinze atwara byose biri muri politiki ya none ya Kenya, kenshi bikurikirwa n'amakimbirane agwamo abantu.

    Ariko abadashyigikiye BBI bavugaga ko igamije guha imyanya abasanzwe bakomeye muri politiki, igatuma abagize guverinoma n'inteko baba benshi cyane kandi Kenya,  igihugu kizahajwe n'imyenda, kitabasha kubishyura.

    The post Kenya: Urukiko rwahagaritse umushinga wo guhindura itegeko nshinga uzwi nka BBI appeared first on Flash Radio TV.

    Source : https://flash.rw/2021/05/14/kenya-urukiko-rwahagaritse-umushinga-wo-guhindura-itegeko-nshinga-uzwi-nka-bbi/?utm_source=rss&utm_medium=rss&utm_campaign=kenya-urukiko-rwahagaritse-umushinga-wo-guhindura-itegeko-nshinga-uzwi-nka-bbi

  • Gicumbi : Irondo ryahagaritse abantu 5 bari bavanye Kanyanga muri Uganda bararisuzugura hitabazwa polisi #rwanda #RwOT

    Aba bantu batanu bafashwe mu ijoro ryo ku wa Gatatu tariki 12 Gicurasi 2021, bakaba barafatanywe litiro 22 za Kanyanga.

    Aba bantu bafatiwe mu Mudugudu wa Karambo, mu Kagari ka Gishambashayo, Umurenge wa Rubaya, ni bamwe mu bagize itsinda ry’abarembetsi bajya kuzana Kanyanga muri Uganda.

    Abafashwe ni Nsanzamahoro Jean Baptiste bakunze kwita Dunda w’imyaka 20, Sankara Thomas w’imyaka 33, Mbonigaba Jean d’Amour w’imyaka 33 , Dusingizimana Jean Pierre w’imyaka 25 na Karahanyuze Sandrine ufite imyaka 25.

    Umuyobozi wa Polisi mu Karere ka Gicumbi Superintendent of Police (SP) Minani Jean Bosco yavuze ko gufatwa kwa bariya bantu byaturutse ku makuru yatanzwe n’abaturage.

    Ati “Twari dufite amakuru twahawe n’abaturage ko bariya bantu 5 bajya bajya mu gihugu cya Uganda bakavanayo Kanyanga bavuye mu Rwanda bakaza kuyikwirakwiza mu bandi bacuruzi. Mu ijoro rya tariki ya 11 Gicurasi nibwo twitabye telefoni y’umwe mu banyerondo bari mu kazi k’irondo yaduhamagaye atubwira ko babonye abantu bikoreye ibintu ku mutwe nijoro babahagaritse banga guhagarara.”

    SP Minani akomeza avuga ko abapolisi bamaze kumva ayo makuru bahise bakurikirana abo bantu babafata mu rukerera saa kumi n’imwe bafatanwa litiro 22 za kanyanga.

    SP Minani yashimiye abaturage batanze amakuru anakangurira n’abandi kujya bihutita gutanga amakuru. Yagiriye inama abakishora mu bikorwa byo gukwirakwiza ibiyobyabwenge no gukora ibindi byaha kubireka kuko barimo kwikururira ibyago byo kujyanwa mu butabera bakaba bafungwa. Yabibukije ko biriya bikorwa bashobora kubiburiramo ubuzima bitiranijwe n’abagizi ba nabi kuko babikora nijoro kandi bambukiranya imipaka mu buryo butemewe.

    Aba bose uko ari 5 n’ibyo bari bafite bahise bashyikirizwa Urwego rw’Igihgu rushinzwe ubugenzacyaha (RIB) rukorera muri sitasiyo ya Polisi ya Cyumba kugira ngo hatangire iperereza.

    AMATEGEKO AVUGA IKI ?

    Ingingo ya 5 y’Iteka rya Minisitiri Nº001/MoH/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira inzoga zikozwe mu buryo budakurikije ibisabwa n’amabwiriza y’ubuziranenge n’andi mategeko mu biyobyabwenge byoroheje.

    Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu Gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

    Iyo abihamijwe n’urukiko ahanishwa igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda atari munsi ya miliyoni eshanu (5.000.000 FRW) ariko atageze kuri miliyoni icumi (10.000.000 FRW) ku byerekeye ibiyobyabwenge byoroheje.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Gicumbi-Irondo-ryahagaritse-abantu-5-bari-bavanye-Kanyanga-muri-Uganda-bararisuzugura-hitabazwa-polisi

  • RDB yasinyanye amasezerano yimyaka itatu na… – #rwanda #RwOT

    Kuri uyu wa Kane tariki ya 13 Gicurasi 2021 nibwo hamuritswe ku mugaragaro amasezerano y'ubufatanye hagati ya RDB na BAL igiye kuba ku nshuro ya mbere kandi ikazabera mu Rwanda guhera tariki ya 16 Gicurasi kugeza tariki ya 30 Gicurasi 2021.

    Umuyobozi Mukuru wa RDB, Clare Akamanzi, yavuze ko iki kigo cyishimiye kuba umufatanyabikorwa wa BAL ku nshuro ya mbere igiye kubera mu Rwanda kuko bizateza imbere ubukerarugendo mu gihugu.

    Yagize ati 'Dutewe ishema no kuba umufatanyabikorwa wa BAL ku nshuro yayo ya mbere igiye kubera mu rugo nka Visit Rwanda. Impamvu twahisemo ko Visit Rwanda iba umufatanyabikorwa wa BAL ni uko mbere ya byose, mu myaka 10 ishize Guverinoma y'u Rwanda yafashe icyemezo cyo guteza imbere ibikorwa n'amarushanwa atandukanye hagamijwe guteza imbere ubukerarugendo.

    'Uyu munsi ku bufatanye na Minisiteri ya Siporo, tugamije guteza imbere siporo n'ubukerarugendo bushingiye kuri siporo. Siporo ni bumwe mu buryo bw'ingenzi bwo kuzana ba mukerarugendo mu gihugu, atari abakinnyi gusa baje gukina, ahubwo abafana n'abandi bagize amakipe. Uyu munsi twiteze abasaga 1000 bazaza mu Rwanda muri BAL'.

    Akamanzi yavuze kandi ko abanyabugeni n'abanyabukorikori b'Abanyarwanda bazahabwa umwanya wo kwerekana ibikorwa byabo ku bazitabira irushanwa rya BAL.

    Minisitiri wa Siporo, Munyangaju Aurore Mimosa, yavuze ko nubwo byari bigoye gutegura iri rushanwa muri ibi bihe bya COVID-19, ariko ku bufatanye bw'inzego zitandukanye byashobotse.

    Yagize ati 'Ntabwo byari byoroshye ariko byasabye imbaraga n'ubwitange kuri buri muntu wese wabigizemo uruhare, byaba ku ruhande rwa BAL, byaba ku ruhande rwa Guverinoma y'u Rwanda no ku ruhande rwa za federasiyo'.

    Binyuze ku rukuta rwayo rwa Twitter, Minisitiri Munyangaju yagize ati”Kwakira BAL mu Rwanda bisobanuye iki? Kwakira iri rushanwa biratanga ubutumwa ko u Rwanda rushoboye kwakira bene iyi mikino iri ku rwego rwo hejuru”.

    Perezida wa BAL, Amadou Gallo Fall, yavuze ko ari ingenzi cyane kuba habayeho ubu bufatanye mbere yuko iri rushanwa ritangira.

    Yagize ati 'Twafashe umwanya munini twitabira kandi tuza hano mu Rwanda inshuro nyinshi, kandi kuba hano uyu munsi twiteguye gutangiza iri rushanwa ry'amateka rya Basketball Africa League, mu buryo bwinshi, birihariye.

    'Ibi bihuye n'ibyo twari tumaze imyaka myinshi turimo, twahereye mu bakiri bato tugamije kuzamura umukino kandi duha amahirwe abakinnyi ngo bigaragaze'.

    Iri rushanwa rizabera muri Kigali Arena guhera ku Cymweru tariki ya 16 Gicurasi, rizitabirwa n'amakipe 12 yo muri Afurika yabiharaniye, akaba agabanyijwe mu matsinda atatu y'amakipe ane. Muri iri rushanwa u Rwanda ruhagarariwe na Patriots BBC.

    Tariki ya 30 Gicurasi nibwo hazamenyekana uwegukanye iki gikombe ku nshuro ya mbere.

    U Rwanda rwari rusanzwe rufitanye amasezerano y'imikoranire n'ikipe ya Arsenal yo mu Bwongereza ndetse na Paris Saint Germain yo mu Bufaransa.

    RDB yasinyanye amasezerano y’ubufatanye y’imyaka itatu na BAL

    Ku Cyumweru mu Rwanda haratangira gukinwa irushanwa rya BAL ku nshuro ya mbere

    Source : https://inyarwanda.com/inkuru/105589/rdb-yasinyanye-amasezerano-yimyaka-itatu-na-basketball-africa-league-105589.html