Webrwanda Backend

Author: webrwanda

  • Menya byinshi ku mukozi w’Imana Nicole Mitche… – #rwanda #RwOT

    Ni ibintu bisanzwe cyane kubona umuntu wahoze ari umunyabyaha cyangwa adakijijwe nyuma akaza kuba yakizwa akareka inzira mbi akayoboka agakiza. Biratangaje cyane kandi kubona uwahoze ari umukozi w’Imana abivamo akajya kuba umubyinnyi wo mu kabari aba bitwa ‘Abamansuzi”. Ibi ni byo byabaye kuri Nicole Mitchell watanze ubuhamya bwatangaje abantu benshi.

    Nicole Mitchell akaba akomoka muri Leta Zunze Ubumwe za Amerika mu gace ka Ohio ariho yakuriye we n’umuryango we ari naho yarafite idini abereye Pasiteri, gusa akaza kubivamo. Ubuhamya bwe butangaje yabitangiye mu kiganiro cyitwa ‘Unfiltered Podcast’ gikorwa n’umugabo kabuhariwe Holly Randall uzwiho kugirana ibiganiro n’abantu batandukanye banyuze mu buzima butoroshye.

    Iki kiganiro ni kimwe mu biganiro bikurikirwa cyane muri Amerika binyura kuri murandasi (Online Podcast). Aha akaba ariho Nicole Mitchell yatangiye ubuhamya bwe bw’ukuntu yaretse kuba Pasiteri akajya kuba umumasuzi.

    Yagize ati “Navukiye mu muryango w’abakirisitu cyane basengera mu itorero rya Baptist Church nakuze ababyeyi banjye bantoza gusenga cyane no gukunda Imana hamwe no kuyubaha. Mfite imyaka 20 ni bwo banjyanye kwigira ubu pasiteri mbimaramo imyaka 5 nitoza kuba Pasiteri, gusa ibi byose nabikoraga atari uko mbikunze ahubwo ni byo ababyeyi banjye bashakaga ko nkora nkaba umukozi w’Imana ukomeye”.

    Nicole Mitchell yakomeje agira ati ”Nyuma yo kwigira ubupasiteri nahise njya kuba Pasiteri mu iterero ryitwa LightHouse Baptist Church riri mu gace ka Ohio nkomokamo. Namaze imyaka 6 ndi Pasiteri nigisha abantu bagafashwa gusa njyewe ntago byari bimfasheho kuko sibyo nashakaga gukora. Ubuzima bwanjye bwose nibyo nakoze byose ni ababyeyi banjye babintegekaga gusa mu mutima wanjye sibyo nifuzaga”.

    Nyuma y’imyaka 6 Nicole Mitchell ari Pasiteri yiyemeje kubisezerera burundu maze ajya kwibera umubyinnyi mu kabari. Yagize ati “Nagezeho numva iby’Imana birandambiye ndabireka. Ubuse wakumva ko namaze imyaka yanjye y’ubwangavu ntazi gusomana icyo ari cyo? Iwacu bari barabwiye ko Yesu ariwe mukunzi wanjye, sinigeze mbaho neza ngo nishimire ubuzima nk’abandi bitewe n’itorero. Nafashe umwanya mbikerezaho mpitamo kureka ubupasiteri kuko numvaga ndikubeshya abantu n’Imana.”

    Akimara gusezerera itorero Nicole Mitchell avuga ko byamugoye cyane dore ko agace yari atuyemo ka Ohio kari kamaze kumwanga n’umuryango we wamuciye nk’uko yabivuze ati “Nkiva mu itorero abantu bose banzi baranyanze umuryango ungira igicibwa n’umugabo wanjye turashwana. Nabonye ko ntakazi kandi mfite kandi nkeneye amafaranga mpitamo kujya kuba umumasuzi mu kabari (Stripper) kuko ari byo byinjiza amafaranga vuba kandi n’ubusanzwe nakundaga umuziki no kuwubyina nkabura aho mbikorera”.

    Nicole Mitchell umaze imyaka 4 akora umwuga wo kumasura mu kabari nyamara yarahoze ari Pasiteri avuga ko akazi k’ubumasuzi akishimira cyane kuko agakora agakunze kurusha ubwo yari akiri umukozi w’Imana. Yakomeje agira ati ”Kubyina mu kabari mbikora mbikunze kandi mbishaka si kimwe n’uko najyaga kwigisha ijambo ry’Imana bitamvuye ku mutima. Ubu abana banjye mbaganiriza ku bintu byose bishoboka cyane nk’ibyo ababyeyi banjye banze kunyigisha bijyanye n’imibonano mpuzabitsina. Abana banjye 2 sinzigera mbahatiriza gukora ibyo badashaka”.

    Ubuhamya bwe Nicole Mitchell yabusoje abwira abari bakurikiye ikiganiro Unfiltired Podcast agira ati ”N’ubwo kugeza n’ubu abantu bakinshira urubanza gusa njyewe ntabwo nishinja ikosa na rimwe. Nashishikariza abantu bose gukora ibyo bashaka kandi bakunze kuko gukora ibyo abandi baguhitiyemo si byiza cyane cyane ku bantu bahitamo inzira y’Imana bitabavuye ku mutima”

    Nicole Mitchell ukunze kwiyita izina rya ‘Nikole’ ku mbuga nkoranyamaga uretse kuba amasura mu kabari, anacuruza amashusho ye y’urukozasoni ku rubuga rugezweho rwa OnlyFans aho amenshi akora amugaragaza yikinisha (Masturbation) akaba yishyurwa akayabo k’ibihumbi 100 by’amadolari kuri buri mashusho ashyizeho nk’uko yabibwiye Holly Randall baganiriye.

    Src:www.thejasminebrand.com,www.itsonsite.com,www.gitsmania.com

    Source : https://inyarwanda.com/inkuru/105596/menya-byinshi-ku-mukozi-wimana-nicole-mitchell-waretse-kuba-pasiteri-widini-yayoboraga-aka-105596.html

  • Urukiko rwategetse ko ba Davis D bafungurwa #rwanda #RwOT

    Iki cyemezo cy’Urukiko cyasomwe kuri uyu wa Gatanu tariki 14 Gicurasi 2021 aho urukiko rwasanze nta bimenyetso bikomeye Ubushinjacyaba bwatanze ku buryo bakurikiranwa bafunze.

    Ubushinjacyaha bwari bwabasabiye gufungwa by’agateganyo iminsi 30, bwagaragazaga ko hari raporo ya muganga igaragaza ko umukobwa bavugwaho gusambanya yatakaje ubusugi.

    Mu rukiko Ubushinjyacyaha bwavuze ko uyu mwana w’umukobwa yasambanyijwe na Kevin Kade tariki 18 Mata 2021, naho tariki 19 Mata 2021 akarara ka Habimana Thierry.

    Davis D we ashinjwa kuba icyitso muri iki cyaha, ngo kuko Kevin Kade n’uyu mukobwa babonaniye iwe agasohoka mu rwego rwo kuba rugari.

    Tariki 12 Gidurasi 2021 ni bwo baburanye ku ifungwa n’ifungurwa by’agateganyo bahakana ibyaha byose bashinjwa.

    Kevin Kaden a Habimana Thierry batawe muri yombi tariki 21 Mata 2021 naho Davis D we afatwa mu ijoro rya tariki 24 Mata 2021 ubwo yari mu kiganiro na Ally Soudy.

    UKWEZI.RW

    Source : http://www.ukwezi.rw/Imyidagaduro/article/Urukiko-rwategetse-ko-ba-Davis-D-bafungurwa

  • Ubuhamya bwa Hakizimana Bahati ku buryo ibikorwa bya Perezida Kagame byajegeje FDLR –

    Ubwo Ingabo za FPR Inkotanyi zari zimaze guhagarika Jenoside yakorerwaga Abatutsi, bamwe mu bayiteguye bakayishyira mu bikorwa bahungiye mu bihugu birimo Repubulika Iharanira Demokarasi ya Congo, ari nabwo mu myaka yakurikiyeho umutwe wa FDLR [Forces Démocratiques de Libération du Rwanda], watangiye kugaba ibitero bizwi nk’iby’Abacengezi.

    Ni ibitero umutwe wa FDLR yahoze witwa ALIR wagabaga ugamije guhungabanya ubutegetsi no kwica abaturage banze kuyiyoboka. Abahoze muri uyu mutwe barwanira mu mashyamba ya RDC, bavuga ko ubundi ari umutwe ushingiye ku binyoma ariko nanone bigamije kubiba urwango no kongera guhekura igihugu cyababyaye.

    Hakizimana Bahati Jean Bosco ukomoka mu karere ka Nyabihu, ni umwe mu bahoze muri FDLR, aza gutahuka kuri ubu akaba ari rwiyemezamirimo ndetse akaba ari umuhanzi ukoresha amazina ya Pastor Bahati.

    Uyu mugabo w’imyaka 38 y’amavuko yatanze ubuhamya bw’ubuzima yabayemo imyaka 18 ari muri uyu mutwe wa FDLR. Yabivugiye mu kiganiro yatanze ubwo yitabiraga Ihuriro ry’Urubyiruko ryiswe ‘Igihango cy’Urungano’, ryabaye kuri uyu wa Gatanu.

    Mu gihe cya Jenoside yakorewe Abatutsi mu 1994, ubwo we n’ababyeyi be bahungiraga mu muri RDC, we yari afite imyaka umunani baba mu Nkambi za Kibumba na Kayindo, ariko mu gihe abandi bahungukaga we n’abandi bakomereje mu mashyamba ya Masisi.

    Ati “Twagezeyo dutangira gutekereza kugaruka mu Rwanda ariko bamwe bakatugira inama yo kudataha ahubwo bakatubwira ko bazatera igihugu bakongera bagafata ubutetetsi. Ubwo nibwo bamwe bagiye muri uyu mutwe wa FDLR.”

    Hakizimana Bahati ariko ngo iyo we n’abana bari mu kigero kimwe babazaga impamvu bari mu buhunguro, babwirwaga ko byaturutse ku Mututsi wabirukanye mu gihugu amaze kwica umubyeyi w’igihugu

    Yakomeje agira ati “Hari igihe higeze kuza icyorezo cy’indwara bita gapfura ahantu twari za Masisi, gapfura yishe abantu benshi, bahise babihindura ngo ni indobo 24 z’uburozi Abatutsi bohereje ngo zirimbure Abahutu, nyuma yahoo ibyari indobo z’uburozi zihinduka gapfura. Mu ntambara y’abacengezi, twagezeyo hari mukuru wanjye ari umusirikare, yakundaga gufata abantu bari hirya no hino akabagarura mu gihugu.”

    Hakizimana Bahati avuga ko uwo mukuru we yamusezeyeho amubwira ko agiye kubohoza igihugu ngo azagaruka kubatwara ariko ngo nyuma ntiyaje kugaruka ndetse amuheruka icyo gihe.

    Hakizimana Bahati avuga kandi ko inyigisho bahererwaga mu mashyamba ya Congo akenshi zabaga ari izibiba urwango zibumvisha uko bagomba kwanga Umututsi aho ava akagera.

    Ati “Icya mbere kwari ukutwereka ko Umututsi atari umunyagihugu w’u Rwanda ahubwo yavuye mu bihugu by’amahanga aza mu Rwanda akurikira umugezin wa Nil ariko bigera ubwo noneho abahutu bari basanzwe mu gihugu babujijwe uburenganzira ubuyobozi bujya mu maboko y’abatutsi. Bageze ubwo batubwira ko no gushakana n’Abatutsi ari icyaha gikomeye.”

    Ibya FDLR bishingiye ku kinyoma

    Hakizimana Bahati yavuze ko mu 2001, aribwo haheruka ibitero by’abacengezi. Kuva icyo gihe ngo urugamba rwaje kubananira bamwe bizana mu Rwanda basubizwa mu buzima busanzwe.

    Yakomeje avuga ko kuva icyo gihe urugamba rw’amasasu rusa nk’aho rwabananiye binjira mu bucuruzi abandi batangira kwiba no gusahura imitungo y’Abaturage bo muri Congo.

    Ati “Basahuraga bavuga ko amafaranga ari ayo gukoresha mu bikorwa byabo ariko icyagiye kigaragara ni uko amafaranga uwamaraga kuyashyira ku mufuka yahitaga agenda twe ba rubanda rugufi tugasigara tuyaryozwa.”

    Hakizimana Bahati yavuze ko ibikorwa by’ubumwe n’ubwiyunge byatangijwe na Perezida Kagame byashegeshe cyane FLDLR

    Hakizimana Bahati avuga ko nyuma yo gutsindwa abagize FDLR basigaye batega iminsi u Rwanda n’abanyarwanda, bavuga ko umunsi manda Perezida Kagame yemererwa n’itegeko nshinga zizarangira bazongera bagasubiranamo.

    Ati “Ndagira ngo urubyiruko rusobanukirwe intambara turwana nazo ndetse n’uburyo basigaye bakoresha, bamaze kubona ko urugamba rw’amasasu rubananiye, basigaye bateze u Rwanda kuri manda ya Perezida Kagame nirangira, ubundi bagasubiranamo natwe tukabona aho twinjirira.”

    Yakomeje agira ati “Impamvu, Perezida wa Repubulika niwe wabatsinze kuva na kera kuko iturufu y’ubumwe n’ubwiyunge yazanye mu banyarwannda, yahise ishegesha leta yakoze Jenoside.”

    Hakizimana Bahati avuga ko abo muri FDLR batumva uburyo Perezida Kagame yashyizeho gahunda y’Ubumwe n’Ubwiyunge na Ndi Umunyarwanda, ugasanga umwana ukomoka ku Mututsi ndetse n’ukomoka ku Muhutu babanye mu mahoro kandi imiryango yabo yarahemukiranye.

    Ati “Ariko noneho batsindwa na politiki Perezida Kagame yari yarazanye y’ubumwe bw’abanyarwanda, icyabayeho ni ukumutegera kuri izo manda, babona abanyarwanda kuko bari bazi icyo bakeneye, basabye ko itegeko nshinga rihindurwa.”

    Ugutsindwa kwa FDLR kandi kugaragarira mu mibare y’abari abarwanyi bayo bagenda bashira urusorongo abandi bagafatwa mpiri bakazanwa mu Rwanda bagashyikirizwa ubutabera.

    Nko mu 2008 FDLR yabarirwaga abarwanyi 6800, nyamara mu 2020 uwo mutwe wabarirwaga ko abasigaye bari hagati ya 500 na 1000. Uyu mutwe kandi watakaje ibice byinshi wakoreragamo ibikorwa by’ubucukuzi bw’amabuye y’agaciro ari nako ubushobozi bwo kubona intwaro ikoresha bugabanyuka.

    Ibiro bya Perezida Kagame biba mu mitima y’Abanyarwanda

    Hakizimana Bahati yavuze ko indi turufu abo muri FDLR bari bafite yari iyo guharabika u Rwanda n’ubuyobozi bwarwo babwangisha abaturage. Icyo nacyo ngo cyaje gutsindwa kuko ibikorwa bya Perezida Kagame biri mu mitima y’abanyarwanda.

    Ati “Ya turufu ya kabiri nayo iratsindwa, umusaruro bari bayitezeho nawo ntiwagenda neza. Uyu munsi rero ikintu cyabashegeshe, Ibiro bya Perezida ntabwo biri muri Village Urugwiro ahubwo iyo urebye ubona biri mu mitima y’abanyarwanda bose, icyo rero cyatumye batsindwa.”

    Hakizimana Bahati yavuze ko abavuga ko barwanya Leta y’u Rwanda uyu munsi, bakoresha urubyiruko batarufitiye urukundo ahubwo ari ugushaka kurushora mu byago.

    Ati “Umugabo undwaza umutwe, Twagiramungu yaravuze ngo bashake ibitambo, arabwira urubyiruko n’abandi b’abandi ariko abe ntabashora ahubwo arajya gushora ab’abandi [….] arabashora gutyo bidafite aho bishingiye, nabyo ntabwo byamukundiye.”

    Yakomeje agira ati “Bamaze kumenya ko Perezida Kagame ari mu mitima y’abanyarwaanda, niyo mpamvu uyu munsi bari gukoresha imbuga nkoranyambaga, aho barema imitwe y’inkuru idafite umutwe n’ikibuno ngo abanyarwanda bayisome, bange ubuyobozi n’igihugu cyabo.”

    Hakizimana Bahati yasabye urubyiruko gusigasira ibyiza byagezweho, barwanya ushaka kubiba urwango mu Banyarwanda.

    Hakizimana Bahati yasabye urubyiruko kwirinda kuyobywa n’ibyo abanzi b’u Rwanda batangaza ku mbuga nkoranyambaga.

    Ati “Njye ndibuka baratubeshyaga kugeza ubwo batubwira ko umuntu ugeze mu Rwanda atabona uko abaho. Hari n’abantu twabaga tuzi ko bapfuye nyuma tukazabumva kuri Radio Rwanda mu kiganiro ‘Isange mu Bandi’ barimo kudushishikariza gutaha.”

    Uyu mugabo avuga ko ibyo binyoma byatumye afata icyemezo cyo gutaha ndetse ageze mu gihugu yari azi ko azapfukamira abo asanze ariko ngo bamwakiranye urugwiro none ubu ni rwiyemezamirimo ndetse akaba n’umuhanzi ubayeho neza.

    Muri iri huriro hatanzwe ubutumwa butandukanye bugamije gushishikariza urubyiruko gukomera ku bumwe n’amateka by’Abanyarwanda

  • J. Cole uri muzakira Patriots BBC muri BAL yashize hanze album ye nshya #rwanda #RwOT

    Ni inkuru yakwirakwiye mu minsi mike ishize ivuga ko uyu muraperi w'Umunyamerika ubusanzwe witwa Jermaine Lamarr Cole yaje mu Rwanda yitabiriye imikino y'irushanwa rya Basketball Africa League (BAL).

    Uyu mugabo yamaze gusohora Album ye nshya yise 'The Fall off'. Igizwe n'indirimbo 12 zakozwe n'aba-producer bakomeye mu muziki 14 barimo Timberland, Jake One, DJ Dahi, Tommy Parker n'abandi. Nawe ubwe nk'umuntu usanzwe utunganya indirimbo, harimo izo yikoreye.

    Iyi album yabanjirijwe na filime mbarankuru iyivugaho yise 'Applying Pressure: The Off-Season' yagiye hanze ku wa Mbere tariki 10 Gicurasi 2021 saa moya z'umugoroba.

    Iriho indirimbo yise 'i n t e r l u d e' yasohoye mu cyumweru gishize. Igaragaraho izo yafatanyije n'abandi bahanzi barimo 21 Savage, Lil Baby na Cam'ron.

    J. Cole yatangiye kuvuga kuri iyi album mu mpera z'umwaka ushize, icyo gihe mu nshuro nke yifashisha imbuga nkoranyambaga yavuze ku mishinga ya album ze zitasohotse, aca amarenga kuri iyi.

    Mbere y'impera z'umwaka ushize, byavugwaga ko iyi album izaba yitwa 'The Fall Off' gusa iryo zina riza guhinduka.

    Umwaka ushize, J. Cole yari yasohoye indirimbo zirimo iyitwa 'The Climb Back' na'Lion King on Ice', zombi ntabwo zigaragara kuri iyi album nshya.

    Mbere yazo, yari yashyize hanze izirimo 'Snow on tha Bluff,' yavugaga ku bibazo by'ihohoterwa rikorerwa abirabura bigizwemo uruhare na Polisi aho rimwe na rimwe bicwa cyangwa bagafungwa barenganywa.

    J. Cole afite imyaka 36. Yatangiye kumenyekana mu muziki mu 2007. Yamenyekanye cyane mu ndirimbo nka Lights Please, 4 Your Eyez Only, Lost Ones, Crooked Smile yafatanyije na TLC, Before I'm Gone n'izindi.

    Yamamaye mu 2007 ubwo yashyiraga hanze mixtape yise 'The come up' mu ntangiro za 2007. Nyuma yakoze izindi zirimo 'The Warm Up' yakoze mu 2009 na 'Friday Night Lights' yo mu 2010.

    Zimwe mu ndirimbo ziri kuri iyi Albm ye harimo niyo yikoreye , izindi zikorwa n'ibyamamare bikomeye muri muzika ku isi

    Ubusanzwe ni umuririmbyi, umwanditsi w'indirimbo akaba n'utunganya indirimbo. Abarirwa umutungo wa miliyoni 60 z'amadolari. Uyu muhanzi afite abana babiri. Ni umugabo wa Melissa Heholt barushinze mu ibanga mu mpera za 2015 bikaza kumenyekana mu 2016.

    Afite ibihembo umunani bya BET Hip Hop Awards, mu 2020 abikesheje indirimbo yitwa “A Lot” yakoranye na 21 Savage yatwaye Grammy Award mu cyiciro cya 'Best Rap Song'.

    Yatwaye igihembo cya Top Rap Album Muri Billboard Music Award ndetse abitse ibikombe bitatu bya Soul Train Music Awards.

    Urutonde rw'indirimbo J. Cole yasohoye kuri Album ye ya Gatandatu

    J.cole arikumwe na Jay-Z

    Source : http://umuryango.rw/imyidagaduro/article/j-cole-uri-muzakira-patriots-bbc-muri-bal-yashize-hanze-album-ye-nshya

  • Rayon Sports yaguye miswi na Kiyovu Sports(AMAFOTO) #rwanda #RwOT

    Igitego cya Sugira Ernest gifashije Rayon Sports kunganya na Kiyovu Sports 1-1 mu mukino wa shampiyona.

    Rayon Sports yari yakiriye Kiyovu Sports mu mukino w’umunsi wa 5 w’itsinda B rya shampiyona, uyu mukino ukaba wabereye ku kibuga cya Bugesera ni nyuma y’uko Stade Amahoro ihagaritswe kubera kwangirika.

    Uyu mukino wabaye ku isaha ya saa 12:30′, Rayon Sports nyuma yo gutsindwa na Kiyovu Sports mu mukino ubanza, yari yahigiye gutsinda uyu mukino.

    Mu minota ya mbere y’umukino wabonaga amakipe yombi agerageza gusatira arema uburyo bw’ibitego ariko nta mahirwe mesnhi yabonye.

    Abasore barimo Heritier Luvumbu watsindiye Rayon Sports mu mikino 2 iheruka ni umwe wari witezwe kuri uyu mukino ariko abasore ba Kiyovu Sports ntibamworohereye.

    Kiyovu Sports itari yageze cyane imbere y’izamu rya rayon Sports, yaje kubona igitego cya mbere ku munota wa 29 gitsinzwe na Mbogo Ally n’umutwe ku mupira wari uvuye muri koruneri yari itewe na Nyirinkindi Saleh.

    Rayon Sports yashatse uko yishyura iki gitego ariko n’ubundi Kiyovu Spots ntiyayorohera kuko wabonaga iyirusha cyane mu kibuga hagati. Igice cya mbere cyarangiye ari 1-0.

    Ku munota wa 50, Kiyovu Sports n’ubundi yatangiye igice cya kabiri iri hejuru, yakoze impunduka za mbere havamo Nyirinkindi Saleh hinjiramo Nsengiyumva Moustapha.

    Ku munota wa 57, Rayon Sports yakoze impinduka 3, Sugira Ernest, Mudacumura Jackson[Rambo] na Sekamana Maxime binjiyemo havamo Drissa Dagnogo, Nshimiyimana Amran na Niyonkuru Sadjati.

    Rayon Sports yakangutse itangira gusatira ndetse n’abasore bayo batangira kugerageza amashoti ya kure nk’ishoti ryo ku munota wa 59 ryatewe na Luvumbu ariko rinyura hanze gato y’izamu.

    Ku munota wa 60 Sugira Ernest yacitse ubwugarizi bwa Kiyovu Sports ndetse yari afite n’amwanya wo gushota ariko barinda bawumwaka.

    Ku munota wa 61, Kiyovu Sports yakoze izindi mpinduka, Saba Robert yahaye umwanya Ishimwe Kevin.

    Sugira Ernest yaje kwishyurira Rayon Sports ku munota wa 68 kuri poenaliti, ni nyuma y’uko myugariro Mbogo Ally akoreye umupira mu rubuga rw’amahina.

    Iki gitego cyagaruye Rayon Sports mu mukino, ku munota wa 74 Luvumbu aba yatsindiye Rayon Sports igitego cya kabiri ariko umupira wagaruwe n’igiti cy’izamu.

    Iyi minota Rayon Sports yihariye umukino, Kiyovu Sports nta kindi yakoraga uretse gukora amakosa, yakoraga amakosa menshi. Ku munota wa 90, Luvumbu yacomekeye umupira mwiza Sugira Ernest ariko uyu rutahizamu umupira awushyira mu ntoki z’umunyezamu Kimenyi Yves.

    Uyu rutahizamu yaje kongera gukubita igiti cy’izamu, ni ku mupira yateresheje umutwe wari uvuye kuri koruneri yari itewe na Luvumbu ku munota wa 92. Umukino waje kurangira ari 1-1.

    Kugeza ubu muri iri tsinda Rayon Sports ifite amanota 8, Kiyovu Sports 7, Rutsiro ifite 5 mu gihe Gasogi United ifite amanota 4(Hagiye kuba umukino uhuza Rutsiro FC na Gasogi United).

    11 impande zombi zitabaje

    Rayon Sports: Kwizera Olivier, Ndizeye Samuel, Niyigena Clement, Habimana Hussein, Mujyanama Fidele, Luvumbu Heritier, Nishimwe Blaise, Drissa Dagnogo, Niyonkuru Sadjati na Manace Mutatu

    Kiyovu Sports: Kimenyi Yves, Serumogo Yves, Dusingizimana Gilbert, Mbogo Ally, Ngandu Omar, Habamahoro Vincent, Nyirinkindi Saleh, Bigirimana Abedi, Saba Robert, Bonane Janvier na Ghislain Armel

    Amran ni we wari kapiteni wa Rayon Sports kuri uyu mukino

    Ba kapieni mbere y’umukino bari kumwe n’abasifuzi

    11 ba Kiyovu Sports babanjemo

    11 ba Rayon Sports babanjemo

    Abatoza ba Rayon Sports

    Abatoza ba Kiyovu Sports, uhereye iburyo ni Ndayiragije Etienne, Banamwana Camarade na Kalisa

    Myugariro wa Rayon Sports Ndizye Samuel agerageza gucikana umupira abarimo Ngandu Omar

    Niyonkuru Sadjati wa Rayon Sports agenzura umupira

    Source : http://isimbi.rw/siporo/article/rayon-sports-yaguye-miswi-na-kiyovu-sports-amafoto

  • Umwuka uri mu batuye ’Bannyahe’ n’ubuyobozi bwa Kigali nyuma y’uko batangiye guhuzwa –

    Ibiganiro by’ubuhuza byitabajwe bitanzwemo igitekerezo n’Urukiko rwisumbuye rwa Nyarugenge aba baturage bari bararegeye nyuma yo kwanga ingurane bahawe ngo bimuke, aho bahise barega Umujyi wa Kigali ko wabaha ingurane ikwiriye hisunzwe amategeko.

    Ku wa Kane tariki ya 13 Gicurasi 2021 nibwo hatangijwe ku mugaragaro ibi biganiro byabereye mu cyumba cy’Urukiko Rukuru.

    Muri ibi biganiro aba baturage bari bahagarariwe n’abanyamategeko batanu aribo Buhuru Pierre Célestin, Songa Jean Claude, Shema Gerard, Ndihokubwayo Innocent na Umumararungu Priscilla, mu gihe Umujyi wa Kigali wari uhagarariwe na Safari Vianney.

    Amakuru IGIHE ifite ni uko muri ubu buhuza umuturage wifuza amafaranga make, yifuza 9 700 000 Frw mu gihe ushaka menshi ari 136 000 000 Frw.

    Me Ndihokubwayo Innocent yabwiye IGIHE mu biganiro byabaye, basabye ko Umujyi wa Kigali ushatse wasubira ku kubarira abaturage bundi bushya, hagendewe ku giciro cy’ubutaka uko gihagaze uyu munsi.

    Umujyi wa Kigali warabyishimiye

    Umuyobozi w’Umujyi wa Kigali, Pudence Rubingisa, yabwiye IGIHE ko bishimiye ibi biganiro by’ubuhuza n’aba baturage babareze ngo kuko asanga bishobora gutuma ibibazo bagiranye birangira mu mahoro.

    Ati “Kuba harahisemo kurega bariya 27 nyuma bagasaba ko habanza inzira y’ibiganiro twe nk’Umujyi wa Kigali twarabyishimiye icya mbere ni uko ari ibintu byiza. Iyo habaye amakimbirane hagati y’inzego n’abaturage nyuma bikarangira mu bwumvikane, murumva ko ari byiza cyane ni nayo gahunda Leta ifite.”

    Rubingisa yakomeje avuga ko Umujyi wa Kigali wifuza ko ibi biganiro by’ubuhuza byarangira mu mahoro hatitabajwe inkiko, buri muturage kugiti cye agahabwa igisubizo kimunyuze.

    Ati “Rwose natwe twumva bitajya mu rukiko niyo mpamvu mubona hatangiye ibiganiro by’imapande zombi kandi nibikemuka kizaba ari ikintu cyiza.”

    Me Songa Jean Claude uri mu banyamategeko bunganira bamwe mu baturage ba Kangondo na Kibiraro yabwiye IGIHE ko ibiganiro byagenze neza ko kandi Umujyi wa Kigali ufite ubushake bwo kumvikana nabo yunganira Me Songa. Ati ” Nubwo ibiganiro byabereye mu muhezo ariko urabona ko bizagenda neza turabyizeye.”

    Ubuhuza ni imwe mu nzira yemewe n’amatageko abantu bashobora kunyuzamo bagakemura ibibazo byabo cyane cyane ibijyanye n’imanza mbonezamubano.

    Umuvugizi w’Inkiko mu Rwanda, Mutabazi Harrison, yabwiye IGIHE ko ikibazo gikemuriwe mu buhuza kiba gikemutse burundu ku buryo kidasubira mu nkiko bitewe n’uko impande zombi ziba zahujwe.

    Yavuze ko intego y’ubuhuza ari ukugarura ubumwe ku bari bafitanye ibibazo byamaze kugera mu nkiko

    Ikibazo cy’abaturage ba Bannyahe cyatangiye kumvikana cyane mu 2017 ubwo Umujyi wa Kigali wavugaga ko ufite gahunda yo kubimurira mu Murenge wa Kanombe mu Karere ka Kicukiro ahazwi nko mu Busanza, hari bamwe bagaragaje ko batanyuzwe n’iki cyemezo cy’Umujyi banga kujya muri ayo mazu bubakiwe baka ingurane y’amafranga kugira ngo bo bishakira aho bajya kuba. Abemeye kwimuka bo bimuwe mu mwaka ushize wa 2020.

    Ibi biganiro by’ubuhuza byitabiriwe n’abaturage batandukanye bo muri aka gace

    Me Buhuru Pierre uri mu bunganira aba baturage ba Kangondo na Kibiraro

    Umujyi wa Kigali uri kunganirwa na Me Safari Vianney

  • Urukiko rw’Ikirenga rwateye utwatsi icyifuzo cya Perezida Kenyatta cyo guhindura Itegeko Nshinga –

    Mu mezi ashize nibwo Perezida Kenyatta yasabye ko uburyo busanzweho bugena uwatowe bukwiye kuvugurwa, hakajyaho uburyo butuma Perezida watsinze atari we uhabwa ububasha bwose, ahubwo n’abamukurikiye bitwaye neza bakaba bagira imyanya bagenerwa muri Guverinoma. Uyu mugambi wari wiswe ‘Build Bridges Initiatives’, BBI.

    Ni umugambi Kenyatta na Raila Odinga bahanganye muri 2017, bemeranyijeho mu mwaka wa 2018, nyuma y’uko kutumvikana kwabo kwari kwateye imyivumbagatanyo yakurikiye amatora ya 2018, igahitana abantu 90.

    Kenyatta wari watangiye gutegura amatora ya kamparampaka yo gutorera kuri uyu mushinga, yaje guterwa utwatsi n’umwanzuro w’abacamanza batanu bo mu Rukiko rw’Ikirenga, bavuze ko icyifuzo cye kitubahirije amategeko.

    Icyemezo cy’uru Rukiko cyemeje ko Perezida adafite uburenganzira bwo gutangiza uwo mushinga.

    Uyu mwanzuro wagize uti “Ubusabe bwo guhindura Itegeko Nshinga ni umugambi watangijwe na Perezida kandi itegeko risobanura neza ko Perezida adafite uburenganzira bwo gutangiza ibikorwa byo guhindura Itegeko Nshinga”.

    Bongeyeho ko Perezida ashobora kuba kugezwa imbere y’ubutabera kubera kwirengagiza Itegeko Nshinga.

    Perezida Kenyatta yangiwe umugambi wo gusaranganya ubutegetsi yari afite

  • Tanzania mu nzira yo koroshya ibiciro byo guhamagara no kwitaba muri EAC #rwanda #RwOT

    Biteganyijwe ko kugera mu kwezi kwa karindwi uyu mwaka Tanzania nayo izaba yemeje amasezrano ya One Network Area yo koroshya ikiguzi cyo guhamagara no kwitaba kuri telephone muri Africa y'Iburasirazuba.

    Iki gikorwa cya Tanzania kizasiga u Burundi aricyo gihugu kiri muri uyu muryango wa East African Community (EAC) gisigaye kitarashyira mu ngiro ayo masezerano ku biciro.

    Ni nyuma y'igihe gito Perezida Samia Suluhu wa Tanzania avugiye mu ruzinduko muri Kenya ko igihugu cye kizongera imbaraga mu bikorwa byose byo gushyira hamwe nk'umuryango w'ibihugu.

    Ibiciro bihanitse bya 'roaming', hamwe n'ikiguzi cyo guhamagara/guhamagarwa byambukiranya imipaka kizwi nka Surcharges on Incoming International Traffic (SIIT), biba inzitizi ku itumanaho rya telephone ryambukiranya imipaka.

    One Network Area (ONA) yatangijwe mu kwa mbere 2015, kugeza ubu Kenya, u Rwanda, South Sudan na Uganda nibyo bihugu bishyira mu bikorwa ibiciro bya 'roaming' bivugwa n'ayo masezerano.

    One Network Area ivuze iki?

    Ivuze ko, ikiguzi cyo guhamagarana hagati y'ibi bihugu cyakuweho, ibiciro bya roaming biragabanywa, kandi SIIT zivanwaho.

    Urugero rw'uko byagenze; muri Uganda, kimwe mu bihugu bya Africa bisoresha cyane urwego rw'itumanaho (telecommunications), ibiciro bya 'roaming' mu guhamagara no kwitaba byambukiranya umupaka byavuye kuri $0.93 bigera kuri $0.10 ku munota umwe.

    Nkuko BBC ibitangaza, Kenneth Bagamuhunda ukuriye ishami rishinzwe imipaka n'ubucuruzi muri EAC avuga ko gushyiraho One Network Area byazamuye urugero rw'ubuhahirane mu karere bigabanya igiciro ku bushabitsi, byongera ibyinjizwa na kompanyi z'itumanaho ndetse ubwo na za leta z'ibihugu.

    Munyaneza Theogene / intyoza.com

    Source : https://www.intyoza.com/tanzania-mu-nzira-yo-koroshya-ibiciro-byo-guhamagara-no-kwitaba-muri-eac/

  • Umunyamakuru Assouman yagize icyo asaba Perezida Kagame ku by’abaturage basenyewe Bannyahe #rwanda #RwOT

    Niyonambaza Assouman usanzwe ari Umunyamakuru w’Ikinyamakuru Rugali akaba ari n’umuyobozi wacyo, yakurikiranye ikibazo cya bariya baturage bo mu Midugudu ya Kangondo I, Kangondo II na Kibiraro ahakunze kwitwa Bannyahe.

    Avuga ko ibibazo nka biriya bitazabura kubaho kuko ariko ko atumva impamvu ikibazo nka kiriya gikomeza kubaho kikamara igihe kingana kuriya kitarabonerwa umuti.

    Kiriya kibazo cyatangiye kubaho mbere y’uko imiyoborere y’Umujyi wa Kigali itarahinduka ubwo Uturere twawo twari tugifite ubuzima gatozi.

    Assouman avuga ko ibi ubwabyo atari ikibazo kuko hari n’ibibazo byabayeho ubwo hari hakiriho ibya za Komini ariko ubu inzego za Leta ziba zigomba kubikemura, akavuga ko na kiriya cya Bannyahe kigomba gushakirwa umuti na Leta.

    Ati 'Amakuru mfite ni uko agaciro k’imitungo ya bariya baturage igomba kwishyurwa kagera kuri miliyari 13 z’amafaranga y’u Rwanda. Ntabwo ntekereza ko Leta y’u Rwanda ayo mafaranga ishobora kuyabura.'

    Akavuga ko nubwo atakwemeza uwagize ikosa kugira ngo ariya makosa abeho ariko ko habayeho amakosa mu nzira zagombaga gutuma bariya baturage batarengana arimo kuba hatarabayeho inyigo neza.

    Ati 'Rimwe na rimwe hari ubwo ibibazo bivuka kubera imikorere ya bamwe. Hari abantu ku giti cyabo mu izina cyangwa mu mwambaro wa Leta baba iki kibazo kigera aho kigeze ubu.'

    Assoman wagarutse cyane ku buryo inzego zakomeje kwiruka mu gukemura iki kibazo, avuga ko amahirwe u Rwanda rugira ari ukuba rufite umukuru w’Igihugu ushishoza ku buryo n’iki kibazo ari we wakagikemuye.

    Ati 'Naravuze ngo ashobora kuba atarakimenye cyangwa niba yaranakimenye akakibwirwa uko kitari.'

    Icyakoza akavuga ko ibibazo byose bidakwiye kujya bikemurwa na Perezida wa Repubulika ahubwo ko n’abayobozi bamufasha bakwiye guhindura imikorere.

    REBA IKIGANIRO CYOSE

    UKWEZI.RW

    Source : http://www.ukwezi.rw/mu-rwanda/3/article/Umunyamakuru-Assouman-yagize-icyo-asaba-Perezida-Kagame-ku-by-abaturage-basenyewe-Bannyahe

  • Mu rubanza rwa Rusesabagina havuzwe uburyo FLN yashoje intambara ishaka ibindi “biganiro bya Arusha” –

    Kuri uyu wa 14 Gicurasi 2021 humviswe abarimo Munyaneza Anastase alias Job Kuramba, Iyamuremye Emmanuel alias Engambe Iyamusumba, Niyirora Marcel alias Bama Nicholas, Nshimiyimana Emmanuel, Kwitonda André, Hakizimana Théogène, Ndagijimana Jean Chrétien, Mukandutiye Angelina na Nsabimana Jean Damascène alias Motard.

    Rusesabagina Paul we yikuye mu rubanza ku wa 12 Werurwe 2021, abwira Urukiko ko “nta butabera yiteze” kuko “uburenganzira bwe butubahirijwe” .

    Uretse uwo mugabo w’imyaka 66, abandi bose bareganwa uko ari 20 bari mu cyumba cy’iburanisha.

    Urukiko rwatangiye iburanisha rwumva ubwiregure bwa Munyaneza Anastase, ukurikiranyweho icyaha cyo kwinjira mu mutwe w’ingabo utemewe no kuba mu ishyirahamwe ry’iterabwoba.

    Mbere yo kwiregura yavuze ko afite ikibazo cyo kuba atabasha guhagarara umwanya munini.

    Icyaha cyo kwinjira mu mutwe w’ingabo utemewe ashinjwa yaburanye acyemera. Yavuze ko yinjiye mu gisirikare mu 1990, maze intambara itangira ari mu ishuri rya gisirikare yarangirijemo mu 1991 ahita ajya muri EX-FAR.

    Yavuze ko mu 1994 yahungiye muri RDC, ahaba igihe maze mu 1997 ajya muri Centrafrique. Yavuze ko mu 1999 yasubiye muri RDC bigizwemo uruhare n’Ishami rya Loni ryita ku Mpunzi (UNHCR), agezeyo ajya mu gisirikare cya RDC.

    Mu 2002 Leta ya RDC ngo yavuze ko nta munyamahanga ugomba kuba mu ngabo zayo, maze mu 2003 ajya muri Kivu y’Amajyaruguru, aho yavuye yerekeza muri Kivu y’Amajyepfo mu 2005. Icyo gihe cyose Munyaneza yabaga muri FDLR kugeza mu 2016.

    Muri uwo mwaka, FDLR yabayemo ubwumvikane buke hagati y’abayobozi bakuru bayo, bituma icikamo ibice bibiri.

    Wilson Irategeka wari umwe muri abo bayobozi yatangije umutwe we ku ruhande ari wo CNRD-Ubwiyunge, maze na Munyaneza aba ari wo ajyamo kugeza ubwo yafatwaga mu 2017 agafungwa.

    Munyaneza Anastase yabwiye Urukiko ko yabaye muri FDLR na CNRD ariko ko atabaye muri FLN kuko yashinzwe yarafashwe.

    Yasabye urukiko kumurekura kuko ngo nubwo yabaye muri FDLR, amasezerano mpuzamahanga avuga ko abakurikiranwa bahoze muri uwo mutwe ari abakoze ibyaha bya Jenoside, ibyaha by’intambara n’ibyibasiye inyokomuntu.

    Ati “Rero kunkurikiranaho iki cyaha kwaba ari nko kuvuguruzanya kw’amategeko.”

    Ku kindi cyaha akurikiranyweho cyo kuba mu ishyirahamwe ry’iterabwoba, Munyaneza yabwiye Urukiko ko icyo cyaha atacyemera, kuko ubwo yafatwaga yari yaravuye muri FDLR kandi umuntu ukurikiranywaho icyo cyaha ari uwafashwe akiri mu mutwe.

    Yabwiye Urukiko ko mu gihe yawumazemo cyose atigeze akora igikorwa cy’iterabwoba bityo ko icyo cyaha atacyemera.

    Umucamanza yamwibukije ko adakurikiranyweho gukora ibikorwa by’iterabwoba ahubwo ko ari ukuba mu mutwe w’iterabwoba, asubiza ko atabyemera kuko yafashwe atakiwubamo.

    Umwunganizi wa Munyaneza, Me Twajamahoro Herman, yahawe umwanya ngo agire icyo abivugaho, ashimangira ko imyiregurire y’umukiliya we n’iya mugenzi we wundi yunganiye Nsanzubukire Félicien “irimo ubwenge”.

    Uwo munyamategeko yabwiye Urukiko ko amasezerano Munyaneza yavuze yakozwe hagati y’u Rwanda na RDC mu buryo bwo gushakira ibisubizo ababaga muri iyo mitwe. Kuba Munyaneza nta na kimwe mu byaha bitatu birimo ibya Jenoside, iby’intambara n’iby’ibasiye inyokomuntu ashinjwa, Me Twajamahoro yavuze ko atagomba gukurikiranwa.

    Me Twajamahoro yasubiyemo ko itegeko rireba “uri” mu ishyirahamwe ry’iterabwoba kandi “wemera” atari “wemeye” kuwubamo, kandi Munyaneza “yafashwe atakiwubamo”.

    Hakurikyeho ubwiregure bwa Iyamuremye Emmanuel ukurikiranyweho icyaha cyo kwinjira mu mutwe utemewe no kuba mu mutwe w’iterabwoba. Yemereye urukiko ko yinjiye mu mutwe w’iterabwoba ari wo FLN.

    Iyamuremye yavuze ko mu 1998 abahoze ari abayobozi ba EX-FAR bakoze ubukangurambaga bashaka abasirikire bo kwinjiza mu ngabo za RDC kandi bakabahemba amadolari 100. Nibwo nawe yinjiye mu ngabo.

    Bahise bajyana n’abo bayobozi babakoresha imyitozo ya gisirikare, mu bihe bitandukanye yisanga yageze i Katanga, i Lubumbashi, Kasimba n’ahandi.

    Mu 2001 kugeza mu 2002 yinjiye mu ishuri rya gisirikari i Kamina. Nyuma yo kurangiza amasomo ngo barashweho n’ingabo za RDC, bahungiye mu Burengerazuba bahura n’abasirikari bahoze muri EX-FAR, babasaba kwinjira muri FDLR.

    Iyamuremye yavuze ko yabaye muri uwo mutwe kugeza mu 2016. Ubwo FDLR yacikagamo ibice na we yagiye ku ruhande rwa CNRD-Ubwiyunge, ndetse ni “umwe mu bayishinze”.

    Ageze muri CNRD yagizwe Umusirikare (commander) Mukuru kugeza mu 2019. Iyamuremye yemeye ko yari mu basirikare ba Wilson Irategeka bagombaga kuza gutera mu Burengerazuba bw’u Rwanda, ariko arabyanga.

    Yavuze ko kutemeranya na bagenzi be gutera u Rwanda byavuye ku kuba yarabajije ibibazo abamuhaga amategeko, ibisubizo bamuhaye ntibyamunyura.

    Ngo yahise asaba umugore we kubwira abayobozi ko afite uburwayi, atangaira gushaka uko yava mu mutwe w’iterabwoba.

    Muri Nyakanga 2019 ni bwo yagiye gushaka ibyangombwa bizamufasha kwambuka umupaka, muri iyo minsi afatwa n’abashinzwe umutekano.

    Iyamuremye yabajijwe n’umucamanza niba yaragize uruhare mu gutoranya abasirikare baza gutera mu Rwanda muri Werurwe 2019, ahakana ko nta ruhare yabigizemo.

    FLN yashakaga imirwano hakaba ibindi biganiro bya Arusha

    Abayobozi bakuru bungirije ba FDLR bagize ubwumvikane buke ubakuriye adahari, maze Wilson Irategeka abwira Iyamuremye kuyobora ingabo zari zishyigikiye ibitekerezo bye, abaha amategeko ndetse aba umwe mu bayobozi bakuru kugeza mu 2019.

    CNRD yaje kwihuza n’Impuzamashyaka ya MRCD ya Paul Rusesabagina, Iyamuremye agera muri FLN gutyo.

    Ku cyaha cyo kuba mu mutwe w’iterabwoba, Iyamuremye yaburanye yemera ko yabaye muri FLN ariko azi ko ari umutwe utavuga rumwe na Leta aho kuba uw’iterabwoba.

    Ati “Nari nzi ko FLN izarwana n’ingabo za Leta y’u Rwanda igafasha Abanyarwanda bari bari muri RDC bakagaruka mu gihugu mu mahoro cyangwa bakagirana ibiganiro nk’ibyabereye Arusha.”

    Ibiganiro bya Arusha bizwi mu mateka y’u Rwanda byabaye hagati ya 1991 na 1994 mu Rwanda ubwo ingabo za FPR Inkotanyi zatangizaga urugamba rwo kubohora igihugu.

    Umucamanza yamubajije impamvu atafashe umwanzuro wo kuva muri FLN kandi abizi ko ari umutwe ugamije guhungabanya umutekano, undi asubiza ko yatinye ko byamenyekana akicwa.

    Umucamanza yabajije Iyamuremye impamvu yemera ko yabaye muri FLN kandi atemera ko yabaye muri FDLR na CNRD, asobanura ko muri FLN yari azi ko ari umusirikare mu gihe ahandi atabishakaga.

    Yagize ati “FLN nayibayemo ntazi ko ari umutwe w’iterabwoba.”

    Umwunganizi wa Iyamuremye, Me Uramije James, yavuze ko umukiliya we atabazwa icyaha cyo kwinjira mu mutwe w’iterabwoba, kuko ubwo yinjiraga muri FDLR itegeko riyigira umutwe w’iterabwoba ritari ryagasohotse.

    Yakomeje avuga ko kuba Iyamuremye yaranze kumvira abayobozi be bamusabaga kugaba ibitero, yamara kumenya ko umutwe arimo ari uw’iterabwoba akitandukanya nawo agafatirwa ku biro by’abinjira n’abasohoka ashaka kuwusohokamo “ari impamvu nyoroshyacyaha”.

    Yavuze ko Iyamuremye yakurikiranywa harebwa uko yitwaye nyuma yo kumenya ko FLN ari umutwe w’iterabwoba, kandi yasobanuye ko akimara kubimenya yashatse uburyo bwo kuwuvamo.

    Iyamuremye yasabye imbabazi Abanyarwanda ndetse avuga ko yicuza igihe cyose yamaze muri iyo mitwe.

    Niyirora Marcel niwe wakurikiyeho yiregura ku kuba mu mutwe w’ingabo utemewe.

    Yavuze ko yahungiye muri RDC 1994, mu 1996 yerekeza muri Congo Brazzaville inkambi zimaze gusenywa. Mu 1998 yagarutse muri RDC gufasha ingabo z’icyo gihugu kurwana intambara.

    Mu 2001 nawe yagiye mu ishuri rya gisirikare i Kamina, aho yabanaga na Iyamuremye na Munyaneza. Hashize iminsi ingabo za RDC zirabahindukirana zirabirukana. Yahise yinjira muri FDLR.

    Aho ngo niho babaye kugeza mu 2016 ubwo FDLR yacikagamo ibice, Niyirora nawe ajya muri CNRD Ubwiyunge. Yemereye Urukiko ko yabaye muri FDLR azi ko ari umutwe utemewe.

    Niyirora yavuze ko ibiganiro bigamije gutaha mu mahoro byagiye bibaho mu bihe bitandukanye yari abishyigikiye, maze yumvise ko hatangijwe CNRD Ubwiyunge arabyishyimira ahita anayijyamo.

    Yabwiye Urukiko ko nyuma y’aho umuyobozi wabo yababwiye ko bagiye kwihuza na MRCD ya Rusesabagina na RRM ya Sankara.

    Ibyo kwihuza ngo yabimenye ku wa 1 Nyakanga 2017. Bababwiye ko umuyobozi ari Paul Rusesabagina, ariko ko azajya asimburana na Wilson Irategeka, mu 2018 haza kwiyungaho n’ishyaka rya Nsabimana Calixte “Sankara” ubwo nawe yinjira mu bayobozi.

    Niyirora yavuze ko ibitero byagabwe muri Nyaruguru yabimenyeye mu itangazamakuru no ku mbuga nkoranyambaga kuko aho babaga bitavugwaga.

    Ngo amaze kumva iby’ibyo bitero yumvise binyuranyije na bwa bumwe bavugaga, ahitamo kwitandukanya na FLN ariko afatwa n’ingabo za RDC mu 2019. Yafatiwe i Masisi muri Nyakanga 2019.

    Yemereye Urukiko ko yabaye muri FDRL-FOCA na CNRD, aboneraho gusaba imbabazi Perezida wa Repubulika n’Abanyarwanda muri rusange, ndetse n’Urukiko yari ahagaze imbere.

    Yasabye Urukiko kumubabarira icyo cyaha kuko hari n’abandi bagenzi be babanye muri iyo mitwe ariko bakaba baranyujijwe i Mutobo bagasubuzwa mu buzima busanzwe. Yasabye Urukiko ko hasuzumwa niba nta zindi mpamvu zihariye zatuma akurikiranwa.

    Ku cyaha cyo kuba mu mutwe w’iterabwoba, yavuze ko atacyemera kuko nta bushake cyangwa uruhare yagize mu gukora ibikorwa by’iterabwoba.

    Umucamanza yavuze ko icyo cyaha gishinjwa umuntu kuko yabaye mu mutwe w’iterabwoba abizi ko ari wo, ko bidasaba uruhare mu bikorwa by’iterabwoba.

    Niyirora yavuze ko yabaye muri FDLR atazi ko ari umutwe w’iterabwoba.

    Ku cyo kuba muri MRCD/FLN, Niyirora yavuze ko yemera ko yayibayemo ndetse abisabira imbabazi, ariko ko nyuma yo kumenya ko yagabye ibitero by’iterabwoba yahise yitandukanya nayo.

    Uru rubanza ruregwamo abantu 21 barimo Nsabimana Callixte alias Sankara, Nsengimana Herman, Rusesabagina Paul, Nizeyimana Marc, Bizimana Cassien, alias Bizimana Patience, alias Passy, alias Selemani, Matakamba Jean Berchmans, Shabani Emmanuel, Ntibiramira Innocent, Byukusenge Jean Claude, Nikuzwe Simeon, Ntabanganyimana Joseph alias Combe Barume Matata, Nsanzubukire Félicien alias Irakiza Fred, Munyaneza Anastase alias Job Kuramba, Iyamuremye Emmanuel alias Engambe Iyamusumba, Niyirora Marcel alias BAMA Nicholas, Nshimiyimana Emmanuel, Kwitonda André, Hakizimana Théogène, Ndagijimana Jean Chrétien, Mukandutiye Angelina na Nsabimana Jean Damascène alias Motard.

    Munyaneza Anastase mbere yo kwiregura yavuze ko afite ikibazo cyo kuba atabasha guhagarara umwanya munini, yemererwa kwicara

    Inteko Iburanisha yungurana ibitekerezo mu gihe urubanza rwari rukomeje

    Iyamuremye Emmanuel yasabye ko yasubizwa mu buzima busanzwe kuko ngo amaze kubona ko ari mu mutwe w’iterabwoba yahise awuvamo

    Amafoto: Igirubuntu Darcy