Webrwanda Backend

Author: webrwanda

  • Itoze kugira gahunda (Discipline) #rwanda #RwOT

    Byose ndabyemererwa, nyamara ibingirira akamaro si byose. Byose ndabyemererwa ariko sinzategekwa n’ikintu cyose (Abakorinto 6:12).

    Uretse ibyo waba utekereza, gutunganirwa ntabwo bipfa kwizana gusa kandi ntabwo bibaho kubw’impanuka. Ntabwo ubasha gutunganirwa utabikoreye gahunda. Ni ukuvuga ngo gutunganirwa ntabwo bizaza ngo bikwiture ku bibero nk’ipapayii ihiye ihanuka ku giti cyayo. Ugomba kubitegura, kandi iyi ni yo mpamvu gahunda ari ngombwa.

    Imwe mu nzira yo kuzana gahunda mu buzima bwawe ni ukwishyiraho ibintu by’akamenyero keza. Akamenyero ntabwo umuntu akavukana, ni ikintu umuntu yiga mu gihe runaka. Kabyarwa n’ibikorwa umuntu akora akajya abisubiramo, maze byamara kumufata bikarema ubuzima bwe. Imiterere yawe ni igiteranyo cy’ibikorwa by’akamenyero kawe. Mu yandi magambo, utangira wimenyereza ibintu, ariko ku iherezo ibyo wimenyereje ni byo bikuyobora. Iyi ni yo mpamvu kwiremamo akamenyero keza ari ngombwa cyane.

    Kugira ngo uhagarike akamenyero kabi ufite, ugomba kugasimbuza akandi keza! Imana yaduhaye ijambo ryayo ngo riyobore ibitekerezo byacu, akamenyero kacu, imiterere yacu, ndetse n’ibitubaho mu mu buzima. N’ubwo umwuka wawe wavutse bundi bushya, uracyakeneye gukomeza guhindura ubwenge bwawe ukoresheje Ijambo ry’Imana (Abaroma 12:2). Uko urushaho kumara igihe mu Ijambo ry’Imana no mu isengesho, ugenda wiremamo akamenyero keza kandi ubuzima bwawe bugenda burushaho kwishyira ku murongo w’Ijambo.

    Mu 1Abakorinto 6:12, Pawulo intumwa avuga atabica hirya ko yanze kuba umugaragu w’ikintu icyo ari cyo cyose. Ikibabaje ku bantu bamwe, ubuzima bwabo bukurikira ibikurura ibyiyumviro byabo, maze bikarangira batwawe n’akamenyero kabarimbura. Ariko Imana Yo ishaka ko utegeka akamenyero kawe, imiterere yawe ndetse n’ibiba mu buzima bwawe.

    Ubukristo ni ubuzima burenga ibyumviro (amarangamutima), rero nta mpamvu ugomba kubohwa n’ikintu icyo ari cyo cyose muri iyi si, iyo wita ku ijambo mu buryo bwuzuye, nta yindi mbuto yabivamo uretse gutunganirwa.

    Ijambo ryo kwatura

    Ntabwo nca imanza nkurikije ibyo mbona, nta n’ubwo mfata ibyemezo ngendeye ku byo amatwi yanjye yumvise, kuko Imana, binyuze mu Ijambo ryayo no mu Mwuka wayo, yanyambitse imbaraga n’ubushobozi byo kwiremamo akamenyero keza kajyanye n’ubuzima bushya mfite muri Kristo Yesu.

    Source: 'Urusobe rw’Ibiriho' Igitabo cyanditswe na pastor Chris na Anitha

    [email protected]

    Source : https://agakiza.org/Itoze-kugira-gahunda-Discipline.html

  • Haruna Niyonzima yavuze abakinnyi 3 abaye umutoza uyu munsi yazana mu ikipe ye #rwanda #RwOT

    Kapiteni w’ikipe y’igihugu y’u Rwanda, Haruna Niyonzima aherutse gusezerwaho muri Yanga yo muri Tanzania kuko batazakomezanya, yavuze ko ahawe ikipe bakamusaba kugura abakinnyi batatu, rutahizamu Meddie Kagere yaba ari ku isonga.

    Uyu mukinnyi yaraye agiranye ikiganiro na Clouds FM muri Tanzania yagarutse ku rugendo rwe muri Tanzania.

    Umunyamakuru yamubajije nk’ubu aramutse agizwe umutoza w’ikipe runaka agasabwa kugura abakinnyi batatu muri shampiyona ya Tanzania (myugariro wo hagati, ukina hagati na rutahizamu) abo yagura.

    Haruna Niyonzima yavuze ko myugariro wo mu mutima w’ubwugarizi yagura Kelvin Patrick Yondani bakinanye muri Yanga ariko ubu akaba ari muri Dodoma FC.

    Ati “nkunda uko Kelvin Yondani akina, namuhitamo nka myugariro wo hagati.”

    Umukinnyi ukina mu kibuga hagati yavuze ko yahitamo Feisal Salum bakinanaga muri Yanga.

    Ati” nafata Feisal, ni umukinnyi mwiza ikindi aracyari muto afite umwanya munini wo gukina.”

    Kuri rutahizamu yavuze ko nta wundi yatoranya atari umunyarwanda, Meddie Kagere wa Simba SC.

    Ati “rutahizamu natwara umuvandimwe wanjye Meddie Kagere.”

    Haruna Niyonzima muri iki kiganiro kandi yavuze ko ibihe byamukomereye muri iyi shampiyona ari igihe yavaga muri Yanga ajya muri Simba SC, ngo yanyuze muri byinshi atajya gusobanura ariko ntabwo byari byoroshye kugeza n’aho abafana ba Yanga batwika umwenda we.

    Yishimira imikinire ya Kelvin Patrick Yondani

    Meddie Kagere ni umwe mu bakinnyi yagura

    Feisal ngo aracyari muto kandi azi gukina

    Source : http://isimbi.rw/siporo/article/haruna-niyonzima-yavuze-abakinnyi-3-abaye-umutoza-uyu-munsi-yazana-mu-ikipe-ye

  • Ntawe uzicwa n’inzara kubera ko ari muri Guma mu Rugo – Guverineri Kayitesi #Rwanda #RwOT via @kigalitoday #rwanda #RwOT

    Alice Kayitesi, Guverineri w
    Alice Kayitesi, Guverineri w’Intara y’Amajyepfo

    Yabitangaje mu kiganiro yagiranye na Radio Huye ku mugoroba wo ku itariki 28 Nyakanga 2021, ku mpamvu za Guma mu Rugo yatangiye kuri iyo tariki nyine, mu mirenge 25 yo mu turere dutandatu two mu Majyepfo, yiyongeraga kuri 12 igize Akarere ka Kamonyi kuko ko kari muri Guma mu Rugo kose.

    Yagize ati “Mu ntara yacu abaturage benshi batunzwe n’ubuhinzi, kandi turishimira ko bahinga bakeza. By’umwihariko n’iki gihembwe turimo ndetse n’icyo dushoje byagenze neza. Ariko ntabwo twakwirengagiza ko mu mirenge itagera kuri itanu yashyizwe muri Guma mu Rugo, hari aho ushobora gusanga bene ibyo bibazo”.

    Yakomeje avuga ko ku bufatanye n’uturere bagerageje gukora urutonde rw’abakenera gufashwa binyuze mu isibo, babanje kureba niba nta mirimo y’ubuhinzi baba bafite yiyongera ku ya buri munsi igaragara nk’aho ari yo ibatunze.

    Yunzemo ati “Twiteguye ko abaza kugaragaza ikibazo tuza kubafasha, binyuze mu bushobozi bwacu nk’abatuye mu mudugudu, ndetse aho ubushobozi bw’umudugudu bwananirana, n’ubuyobozi bw’akarere tukabasha kubafasha. Nta muturage wacu uzicwa n’inzara kubera ko ari muri gahunda ya Guma mu Rugo”.

    Ubundi mu Ntara y’Amajyepfo, uretse Akarere ka Gisagara, utundi twose dufite byibura umurenge umwe washyizwe muri Guma mu Rugo.

    Mu Karere ka Nyaruguru harimo umwe, hakaba ine muri Nyanza, itatu muri Huye, ine muri Nyamagabe, irindwi muri Muhanga n’itandatu muri Ruhango.

    Guverineri Kayitesi avuga ko gushyira iyi mirenge muri Guma mu Rugo byaturutse ku gupima abantu byibura 100 muri buri kagari biherutse gukorwa, kuko bahasanze uburwayi bwa Coronavirus ku rwego rwo hejuru ya 9%, ariko ko ahenshi ari hejuru ya 15%.

    Yagize ati “Nko mu Murenge wa Shyogwe muri Muhanga ndetse n’uwa Kinazi muri Ruhango, ho Coronavirus bayisanze mu bari hejuru ya 20%”.

    Kwiyongera kw’abarwaye Coronavirus kuri uru rwego kandi ngo byavuye ahanini ku kudohoka no kwirara ku bijyanye no kubahiriza amabwiriza yo kuyirinda.

    Ibi ngo bigaragarira ku bafatwa bafunguye utubari cyangwa bimuriye utubari mu ngo, kuko ngo nta munsi n’umwe mu Majyepfo hadafatwa byibura umwe, ndetse n’abantu usanga bateraniye ahantu ari benshi mu buryo butemewe, nyamra muri bo harimo abamaze kwandura Coronavirus, banduza bagenzi babo.

    Urugero ngo ni nk’abaherutse gufatirwa ku musozi wa Kanyarira bagiye kuhasengera, babapima bagasangamo abarwaye Coronavirus.

    Kuri abo hiyongeraho n’abarwariye Coronavirus mu ngo basohoka bakajya ahateraniye abantu benshi, bakahava banduje abari bazima.


  • Nyanza: Abanyeshuri biga amategeko bafashwe bari kwica amategeko. #rwanda #RwOT

    Polisi yo mu Karere ka Nyanza ku munsi wejo yafashe abanyeshuri icyenda biga mu ishuri ry'amategeko rya ILPD barenze ku mabwiriza yo kwirinda icyorezo cya Covid-19. Ni mu gihe aba basore n'inkumi bari mu kirori cya mugenzi wabo wizihizaga isabukuru y'amavuko.

    Umuvugizi wa Polisi mu Ntara y'Amajyepfo SP Theobald Kanamugire yavuze ko bafashwe ku bufatanye n'abaturage. Ati 'Abaturanyi babo bahamagaye Polisi bavuga ko hari abantu barimo kubasakuriza cyane kubera imiziki n'urusaku rwabo barimo kubyina.

    Abapolisi bagiyeyo basanga mu nzu harimo abantu 9 bakoresheje ibirori by'umwe muri bagenzi babo wari wagize isabukuru y'amavuko, bari barenze ku mabwiriza yose yo kwirinda ikwirakwira ry'icyorezo cya COVID-19.'

    Sp Theobald Kanamugire Yavuze kandi ko ubwo abapolisi bageragayo basanze bose biteretse inzoga nyinshi, nta wambaye agapfukamunwa, badahanye intera ndetse bari barenze ku masaha yo kuba buri muntu yageze iwe aho acumbitse kuko bari baturutse ahantu hatandukanye muri Busasamana.

    Ikinyamakuru Muhabura dukesha iyi nkuru cyavuze ko aba bombi uko ari 9, bahise bafatwa baganirizwa ku mabwiriza yo kwirinda Covid-19 ndetse bacibwa n'amande 'Tumaze kubafata twabaganirije tubasobanurira gahunda u Rwanda rurimo kugenderaho muri ibi bihe by'icyorezo cya COVID-19 aho buri muntu agomba kubahiriza amabwiriza Leta itanga yo kwirinda gukwirakwiza iki cyorezo. Twasanze bari babizi neza, basabye imbabazi bavuga ko batazongera.' SP Theobald Kanamugire.

    Abafashwe bahise bishyura nikiguzi cyo kwipimisha basanga ari bazima nta wanduye Covid-19, bahita barekurwa.

    Source : https://impanuro.rw/2021/07/29/nyanza-abanyeshuri-biga-amategeko-bafashwe-bari-kwica-amategeko/

  • Nyanza : Hafashwe 77 barimo abari mu birori byo guhemba uwabyaye n’abari bagiye gusura urwaye COVID #rwanda #RwOT

    Ubuyobozi bw’Akarere ka Nyanza, butangaza ko aba bantu 77 bafatiwe mu bikorwa byo kurenga ku mabwiriza yashyizweho mu rwego rwo kwirinda ikwirakwira ry’icyorezo cya COVID-19.

    Muri bariya bantu 77 barimo 37 bashwe bateguye ibirori birimo kwizihiza isabukuru y’amavuko ndetse no guhemba umubyeyi wabyaye.

    Bariya bantu bafashwe barenze ku mabwiriza, biganjemo urubyiruko, bakaba barimo kandi abatari bamabye udupfukamunwa n’abarengeje amasaha yo kuba bageze mu rugo.

    Ubuyobozi bw’Akarere ka Nyanza kandi buvuga ko harimo n’abantu babiri (2) bafashwe bagiye gusura umuntu urwaye COVID-19 kandi ari mu kato ndetse akaba ari no mu Murenge uri muri Guma mu Rugo.

    Mu butumwa bw’Ubuyobozi bw’Akarere ka Nyanza, bwanyujijwe kuri Twitter, busoza bugira buti 'Ikibabaje ni uko abenshi muri aba ari urubyiruko.'

    Muri kariya Karere ka Nyanza kandi Polisi yanafashe abasore n’inkumi icyenda (9) biga mu ishuri rikuru ryigisha amategeko rya ILPD, bari mu birori by’isabukuru ya mugenzi wabo.

    Akarere ka Nyanza ni kamwe mu Turere two mu Ntara y’Amajyepfo twibasiwe n’icyorezo cya COVID-19 dore ko gafite Imirenge ine (4) iherutse gushyirwa muri gahunda ya Guma Mu Rugo ari yo Busoro, Mukingo, Kibirizi na Kigoma.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Nyanza-Hafashwe-77-barimo-abari-mu-birori-byo-guhemba-uwabyaye-n-abari-bagiye-gusura-urwaye-COVID

  • AMAFOTO : IGP Dan Munyuza yasuye ishuri rikuru rya Polisi ya Malawi #rwanda #RwOT

    Tariki ya 27 Nyakanga yari yasuye igice cy’Amajyepfo ashyira Iburengerazuba bw’Igihugu ahari ikicaro cya Polisi mu Ntara ya Blantyre .

    Uru ruzinduko IGP Munyuza yakoze uyu munsi rukubiye muri bimwe mu byo azakorera mu ruzinduko arimo rw’icyumweru muri iki gihugu, ni uruzinduko rugamije gushimangira ubufatanye buri hagati ya Polisi y’u Rwanda n’iya Malawi.

    Muri Werurwe 2019 izi nzego zombi zasinyanye amasezerano y’ubufatanye, amasezerano yasinyiwe mu murwa mukuru w’iki gihugu, Lilongwe.

    Aya masezerano akubiyemo ubufatanye mu bintu bitandukanye twavuga nko guhanahana amahugurwa, ibikorwa, gushaka no guhererekanya abanyabyaha, kurwanya iterabwoba, kurwanya icuruzwa ry’ibiyobyabwenge, guhanahana amakuru ajyanye n’abanyabyaha bahungira mu bihugu byombi ndetse no guhanahana amakuru ajyanye n’umutekano muri rusange.

    Mu biganiro umuyobozi wa Polisi y’u Rwanda, IGP Dan Munyuza yagiranye na mugenzi we wa Malawi, Dr George Kainja, yavuze ko Polisi z’ibihugu byombi hari intambwe zimaze gutera harimo kuba bahura bakagirana ibiganiro, guhanahana amakuru, kugira ibyo urwego rumwe rwigira ku rundi no gusangira ubunararibonye kugira ngo bahurize hamwe mu kurebera hamwe ibibazo by’umutekano bishobora kubangamira imibereho myiza y’abaturage b’ibihugu byombi n’akarere muri rusange.

    IGP Munyuza yagize ati 'Urebeye hamwe ibibazo by’umutekano byugarije isi n’akarere duherereyemo, duha agaciro ingufu Igihugu cya Malawi gishyira mu gukorana n’ibindi bihugu mu gushaka umuti urambye w’imbogagamizi ku mutekano mu karere n’ahandi. U Rwanda rwifatanyije na Malawi ndetse n’ibindi bihugu bya Africa mu gukemura ibibazo by’umutekano muke uturuka ku mitwe itemewe iri ku mugabane wa Africa by’umwihariko imitwe y’intagondwa.'

    Mugenzi we wa Malawi, Dr George Kainja yavuze ko ari ingenzi cyane by’umwihariko mu bijyanye no kurwanya imitwe ya ki Islam irimo guhungabanya igihugu cya Mozambique.

    Yagize ati 'Leta ya Malawi muri rusange by’umwihariko Polisi ya Malawi tuzakora ibishoboka byose n’imbaraga zose kugira ngo dushyigikire itsindwa ry’iriya mitwe. Byongeye kandi inzego z’umutekano za hano zirakorana bya hafi kugira ngo Igihugu cyacu kitazakoreshwa mu buryo ubwo aribwo bwose mu guhungabanya umutekano wo mu Karere.'

    Inkuru duekesha RNP

    UKWEZI.RW

    Source : http://www.ukwezi.rw/mu-rwanda/2/article/AMAFOTO-IGP-Dan-Munyuza-yasuye-ishuri-rikuru-rya-Polisi-ya-Malawi

  • #COVID19: Abanduye bashya ni 915, abitabye Imana ni 5 #Rwanda #RwOT via @kigalitoday #rwanda #RwOT

  • Nyanza : Polisi yafashe urubyiruko rw’abanyamahanga bakoreye ibirori mu rugo banasakuriza abaturanyi #rwanda #RwOT

    Uru rubyiruko rwafashwe ku mugoroba wo ku wa Kabiri tariki ya 27 Nyakanga ahagana saa moya mu Mudugudu wa Kivumu, Akagari ka Nyanza mu Murenge wa Busasamana.

    Umuvugizi wa Polisi mu Ntara y’Amajyepfo, Superintendent of Police (SP) Theobald Kanamugire yavuze ko gufatwa kwa bariya bantu byaturutse ku makuru yatanzwe n’abaturage bavuga ko hari abaturanyi babo barimo gucuranga cyane bakabasakuriza .

    Yagize ati 'Abaturanyi babo bahamagaye Polisi bavuga ko hari abantu barimo kubasakuriza cyane kubera imiziki n’urusaku rwabo barimo kubyina. Abapolisi bagiyeyo basanga mu nzu harimo abantu 9 bakoresheje ibirori by’umwe muri bagenzi babo wari wagize isabukuru y’amavuko, bari barenze ku mabwiriza yose yo kwirinda ikwirakwira ry’icyorezo cya COVID-19.'

    SP Kanamugire yavuze ko ubwo abapolisi bageragayo basanze biteretse inzoga nyinshi banywa, nta wambaye agapfukamunwa, nta ntera iri hagati y’umuntu n’undi ndetse bari barenze ku masaha yo kuba buri muntu yageze iwe aho acumbitse kuko bari baturutse ahantu hatandukanye muri Busasamana.

    Umuvugizi wa Polisi mu Ntara y’Amajyepfo yavuze ko bariya bantu bamaze gufatwa baganirijwe basobanurirwa amabwiriza yo kwirinda icyorezo cya COVID-19 ndetse nabo bavuga ko bari basanzwe babizi ko ahubwo babikoze nkana.

    Yagize ati 'Tumaze kubafata twabaganirije tubasobanurira gahunda u Rwanda rurimo kugenderaho muri ibi bihe by’icyorezo cya COVID-19 aho buri muntu agomba kubahiriza amabwiriza Leta itanga yo kwirinda gukwirakwiza iki cyorezo. Twasanze bari babizi neza, basabye imbabazi bavuga ko batazongera.'

    Bariya bose uko ari 9 baciwe amande ndetse baniyishyurira ikiguzi cyo kwipimisha icyorezo cya COVID-19 nyuma yo gusanga ari bazima barekuwe barataha.

    Source : http://www.ukwezi.rw/mu-rwanda/Amakuru-anyuranye/article/Nyanza-Polisi-yafashe-urubyiruko-rw-abanyamahanga-bakoreye-ibirori-mu-rugo-banasakuriza-abaturanyi

  • Menya impamvu 7 ugomba kurwanya Satani wivuye inyuma- Ev. Adda Darlene Kiyange #rwanda #RwOT

    “Nuko rero mugandukire Imana ariko murwanye Satani, na we azabahunga.” Yakobo 4:7 Iri ni isezerano, ntabwo ari ibyo duhimba. Imana yatwemereye ko mu gihe tuzaba tugkiranukiye, tuyumvira, niturwanya Satani azahunga! Ibi kandi bigomba kuba umurimo wa buri munsi, si ibintu ukora rimwe gusa kuko Satani nawe atajya arambirwa.

    Mu minsi 10 yo gusenga “Tuyoboza Imana inzira” ku munsi wa 9, duhagaze mu kwizera kw’ijambo ry’Imana turirukana Satani!

    Ibintu 7 umubi Satani akora, ari nazo mpamvu ukwiye gushingiraho umurwanya buri kanya kuko nawe atagucira akarurutega! Ntugasoze isengesho ryawe utirukanye Satani n’abadayimoni, kuko nutabikora bo nihahandi bahora bakundwanya.

    Satani aroshya

    “Bukeye Satani ahagurukira Abisirayeli, yoshya Dawidi kubara Abisirayeli.”1 Ingoma 21:1

    Murumva ko Satani ashobora guhagurukira abantu benshi, birashoboka! Yahagurukiye Abisiraheli ngo yoshya Dawidi. Yari umwami ajya kubara abantu kandi icyo gihe barabizize kuko Uwiteka yari yaramwihananvirije. Imana yabihoye Dawidi kuko yari amaze kwirata amaboko ye, aho gushima Imana aho yari imaze kugeza abantu bayo.

    “Bakirya ibyokurya bya nijoro, Satani yari yamaze koshya umutima wa Yuda Isikariyota mwene Simoni ngo amugambanire.”Yohana 13:2

    Rero ni ukuvuga ko Satani aroshya, nitujya kumwirukana ujye ubizirikana koshya ari kimwe mu byo akora bizajya bigutera imbaraga zo kumwirukana.

    Satani ashobora gusaba umuntu

    Mujya mubyumva bavuga ngo”Satani yamusabye”. “Umunsi umwe abana b’Imana baje bashengereye Uwiteka, kandi na Satani yazanye na bo. Maze Satani asubiza Uwiteka ati”Ariko se ugira ngo Yobu yubahira Imana ubusa? Ariko rambura ukuboko kwawe ukore ku byo atunze byose, na we azakwihakana ari imbere yawe.” Uwiteka asubiza Satani ati”Dore ibyo atunze byose biri mu maboko yawe, keretse we ubwe we kumuramburaho ukuboko kwawe.” Nuko Satani aherako ava imbere y’Uwiteka.”Yobu 1:9-11

    Urumva ko Satani ashobora Kuba yatambuka nk’ahantu Imana iri, ni ko nbisobanura. Aha rero Yobu we Imana yaramwirase! Yabonye Satani aje Imana iramubaza iti wabonye umugaragu wanjye Yobu. Satani rero niko ku musaba ati ‘Ni uko afite biriya…’ Ati mupe” Satani rero ajya asaba umuntu.

    Satani ashobora kurega Umuntu

    “Maze anyereka Yosuwa umutambyi mukuru ahagaze imbere ya marayika w’Uwiteka, na Satani ahagaze iburyo bwe ngo amurege.” Zekariya 3:1

    Ahangaha murabizi Yosuwa yari umukozi w’Imana cyane, ariko ngo hari igihe yagaragaye ngo ikanzu ye iriho ibizinga. Hanyuma Satani ajya kumurega! Ati”Warebye ibintu akora, warebye ukuntu yambaye!”

    Satani agaragara ari kumurega, ariko Imana ntabwo yigeze yakira ikirego cya Satani, ntabwo byigeze byemerwa. Ahubwo Imana yategetse ko bambika Yosuwa indi myenda. Imana ishimwe! Ibyo Satani yakurega byose, menya ko dufite Yesu uduhagararira, Yesu ni we ushobora kudutsindishiriza nubwo ikanzu yaba iriho ibizinga. Iyo uhagaze imbere y’Imana ishobora kukubabarira, ibishimirwe!

    Satani agerageza guhangana n’imbaraga z’Imana

    “Yesu aramubwira ati”Genda Satani, kuko handitswe ngo ‘Uramye Uwiteka Imana yawe, abe ari yo ukorera yonyine.’ “Matayo 4:10

    Satani nyine afite ukuntu adatinya cyane, nta bwoba bwinshi agira! Akumva yahangana n’imbaraga z’Imana pe! Ariko iyo dusenga tumanura umuriro, dutwika, tumwirukana, hari abadayimoni bashobora kugenda ariko hari n’abandi badashobora kugenda.

    Aho tubona ko Satani adatinya imbaraga z’Imana, ni aho yabwiye Yesu ngo namupfukamire, nta bwoba afite! Ntacyo atinya, none uwegereye Yesu amaze gusenga iminsi 40, ubwo azatinya wowe usenga rimwe na rimwe?

    Yesu we, yaramwirukanye akoresheje ibyanditswe byera, ati’ Jyenda! Ibyo uvuga siko handitse’. Aha Yesu atwereka ko igihe twishingikirije ijambo ry’Imana muri Bibiliya, dushobora kwirukana Satani. Iyo umwirukanye n’intege nke, arakomeza agahangana kuko tubona ko na Yesu yakomeje kumugerageza, ibi rero biradusaba kumwirukana tudacitse intege mpaka aduhunze.

    Satani ashobora kwiyoberanyiriza mu muntu

    “Arahindukira abwira Petero ati”Subira inyuma yanjye Satani, umbereye igisitaza kuko ibyo utekereza atari iby’Imana, ahubwo utekereza iby’abantu.” Matayo 16:23

    Aha Yesu yari ari kubwira intumwa yuko azapfa rwose, ariko haboneka Petero aramuhakanira ati ‘Reka reka, ibyo ntabwo byashobora kukubaho’ Ni nk’aho yavugaga ko Yesu ibyo gucungura umuntu akwiye kubivamo!

    Yesu abirebye abona si we urimo kubivuga, Bibiliya iravuga ngo “Arahindukira abwira Petero” nubwo yabwiraga umuntu ariko amagambo yavuze yayerekezaga kuri Satani. Aho Yesu yabonaga Satani hose yaramwirukanaga, ntabwo bakorana! Iyo Satani ajyiye imbere, Yesu ahita amusubiza inyuma. Kandi natwe bitubaho mubyibuke, iyo dushaka gukora ibyiza Satani ashaka kudusubiza inyuma muri bya bindi twaretse.

    Ariko tugomba kumwirukana, ukamubwira ngo “Mva inyuma”, ashobora gukorera mu muntu mugenzi wawe, akaba yakubwira ijambo rikakugeza kure. Uba ugomba gutandukanya umuntu na Satani, kumenya ijambo Satani avuze n’iryo umuntu avuze, ukwiye kubitandukanya, iyi na yo ni impano ukwiye gusaba Imana. Ukirukana Satani ukoreye muri uwo muntu, nk’uko Yesu yabikoze kandi ntagire icyo atwara Petero, nawe ukwiye kureka uwo muntu amahoro ukarwanya Satani

    Satani ashobora guteza indwara

    “Kandi uyu ko ari umukobwa wa Aburahamu, akaba amaze iyi myaka cumi n’umunani aboshywe na Satani, ntiyari akwiye kubohorwa iyi ngoyi ku munsi w’isabato?” Luka 13:16

    Yesu yakijije umuntu, hanyuma Abafarisayo n’abanditsi bararakara ngo ni kumunsi w’isabato! Ariko icyo twareba hano, ni uyu yakijie ngo wari umaze imyaka 18 aboshywe na Satani. Bisobanura ngo hari igihe umuntu aba afite uburwayi buturuka kuri Satani, aboshywe rwose! Aha rero haba hakeneye Kristo Yesu, kuko ari we wenyine ushobora kumukiza ubu burwayi.

    Satani ateza abantu gukora ibyaha

    “Petero aramubaza ati’Ananiya, ni iki gitumye Satani yuzuza umutima wawe kubeshya Umwuka Wera, ukisigariza igice cy’ibiguzi by’isambu?” Ibyakozwe n’Intumwa 5:3

    Aya ni amakuru ya Ananiya na Safira. Igihe Yesu yari amaze kugenda, ngo bagurishaga ibyabo byose amafaranga bakayahuriza hamwe. Intumwa zikayabagabanya, Ananiya na Safira rero ngo nyuma yo kugurisha ibyabo bazanye igice. Ariko ngo Satani ni we watumye babeshya. Bose rero nk’uko Bibiliya ivuga, barahapfiriye. Kirazira kubeshya Umwuka Wera! Kandi ujye umenya ko amoshya yose ava kuri Satani, niwumva ugambiriye gukora icyaha, uzamenye ko Satani yarangije kwinjira mu mutima wawe, hanyuma umenye uko umwirukana. Twahawe ubutware bwo kumwirukana, Imana ishimwe!

    Ibidufasha kwirukana Satani, ni ijambo ry’ubutumwa bwiza

    “Nirya Yesu w’i Nazareti, uko Imana yamusutseho Umwuka Wera n’imbaraga, akagenda agirira abantu neza, agakiza abo Satani atwaza igitugu, kuko Imana yari iri kumwe na we.” Ibyakozwe n’Intumwa 10:38

    Ijambo rya Kristo ryabashije kubohora, ni ukuvuga ko niba umuntu ari mu buretwa bwa Satani, ijambo rya Kristo niryo ribasha kumubohora, Imana ishimwe!

    “Nuko rero mugandukire Imana ariko murwanye Satani, na we azabahunga.” Yakobo 4:7 Iri ni isezerano, ntabwo ari ibyo duhimba. Imana yatwemereye ko niturwanya Satani azahunga! ibi kandi bigomba gukorwa buri munsi kuko abadayimoni bo ntibacika intege cyangwa ngo baruhuke!

    Uyu ni umunsi wa 9, mu minsi 10 yo gusenga, “Kuyobiza Imana inzira “Kurikira hano ibyiza byose byaranze uyu munsi.

    https://youtu.be/VuGqjDlOmlE

    [email protected]

    Source : https://agakiza.org/Menya-impamvu-7-ugomba-kurwanya-Satani-wivuye-inyuma-Ev-Adda-Darlene-Kiyange.html

  • Covid-19 yahitanye ubuzima bw’abantu 5, abage… – #rwanda #RwOT

    MINISANTE yanditse kuri Twitter iti “Twihanganishije imiryango y’abagore 2 n’abagabo 3 bitabye Imana”. Raporo y’iyi Minisiteri igaragaza ko mu masaha 24 ashize hafashwe ibipimo 9,628 mu gihugu hose, mu minsi 7 hakaba harafashwe ibipimo 129,807. Ibipimo bimaze gufatwa kuva Covid-19 yagera mu Rwanda birarenga Miliyoni ebyiri (2,046,754).

    Kuri uyu wa Gatatu kandi, abantu bagera kuri 915 basanzwemo Covid-19 mu gihugu hose, aba akaba ari 9.5% y’ibipimo byafashwe, ibisobanuye ko mu bantu 100 bapimwe Covid-19, muri bo abagera ku 9 basanzwemo iki cyorezo. Abantu 5 nibo bishwe na Covid-19 mu masaha 24 ashize, abahitanywe nayo mu minsi 7 ni abantu 84,  abamaze guhitanwa n’iki cyorezo kuva cyagera mu Rwanda kugeza uyu munsi ni 776. 

    Iyi Raporo ya Minisiteri y’Ubuzima igaragaza kandi ko kuri uyu wa Gatatu abantu 37 ari bo bakiriwe mu bitaro barwaye Covid-19, abasezerewe akaba ari 22. Abarembeye mu bitaro kubera iyi ndwara ni 61. Abahawe Doze ya mbere y’urukingo rwa Covid-19 ni 7,565 naho abaturarwanda bamaze gukigirwa byuzuye ni 439,568.

    Abantu 5 bishwe na Covid-19 kuri uyu wa Gatatu

    Source : https://inyarwanda.com/inkuru/108074/covid-19-yahitanye-ubuzima-bwabantu-5-abagera-kuri-915-barandura-naho-7565-barakingirwa-108074.html