Webrwanda Backend

Author: webrwanda

  • Itangazamakuru ry'imikino mu Rwanda ritagira rutangira amaherezo rizaturoha aho tutazikura! #rwanda #RwOT

    Ubundi zimwe mu ndangagaciro z'umunyamakuru, ni ukwiyubaha, kuvuga ibyo ufitiye gihamya, kwirinda gukoreshwa no kuba icyitegererezo mu bandi baturage, kuko baba bagufata nk'uvuga rikumvikana.

    Ngicyo igituma abahanga bita itangazamakuru 'ubutegetsi bwa kane', kuko rubanda iba irifitiye icyizere.Bene iryo riba ryigisha, rigahungura, rigasusurutsa, rigatanga amakuru ya ngombwa, yemwe rikaba ryananenga ibitagenda neza hagamijwe ko bikosorwa, ariko byose bigakorwa kinyamwuga, nta gusesereza.

    Uyu munsi simvuga ku itangazamakuru ryo mu Rwanda muri rusange, ahubwo ndibanda ku ry'imikino, dore ko rinafite abarikurikira batari bake. Ni mu gihe kandi kuko itangazamakuru n'imikino ari nk'umukenyero n'umwitero, iyo byujujanyije byombi bitera imbere. Iyo binyuranyije ni nko kuvanga amata n'amaganga. Aha niho mu Rwanda twerekeza.

    Iyo usesenguye itangazamakuru ry'imikino mu Rwanda, usanga ryihariye 'ubudasa', ariko bubi, utapfa gusanga ahandi. Ntirigira rutangira, nta hamwe ry' itangazamakuru ryubaha. Kabaye akarima k'intyoza muri byose:Ubutoza, ubuyobozi bw'imikino, ubuganga, ubusifuzi, n'ubundi bumenyi bwigwa mu ishuri, waba utabufite ukabuharira bene bwo. Kugeza aha n'ubwo atari byiza, ariko ntacyo byishe cyane, kuko umuntu nyawe ashobora no kwigira ku makosa.

    Ushobora kumbwira uti 'umukobwa aba umwe agatukisha bose'. Njye nagusubiza ko ahubwo 'abakobwa babi babaye benshi batukisha umwe', kuko abubahiriza amahame y'umwuga aribo bake. Mu itangazamakuru rya siporo mu Rwanda niho honyine wemerewe gusebanya ntibikugireho ingaruka, niho urya ruswa ntihagire ubikuryoza, niho impuha zemwe, ukamara amasaha atatu uri mu buzima bwite bw'umuntu bigafatwa nk'ibisanzwe.

    Ingero zirahari zitabarika, aho umunyamakuru atukana na mugenzi we kuri mikoro bapfa uruhande buri wese ashyigikiye , kuko yakiriye 'bitanu' bya rumwe mu mpande zishyamiryanye mu ikipe cyangwa ishyirahamwe ry'umikino runaka. Ni hahandi 'umunyamakuru' yamamara muri rubanda, kuko azi gutukana by'abatagira uburere, apfa gusa kuba yahawe icupa rya byeri, ubundi akajya mu ngazo.

    Si ukuvuga uburyo umukinyi runaka ari umuswa cyangwa umuhanga kabuhariwe( bitewe n'ingano y'amacupa yaguriwe), si ugutaka cyangwa kwibasira umuyobozi cyangwa umutoza runaka (bitewe n'ayo abamurwanyacyangwa abamushyigikiye bamupfumbatije', mbese ibibera mu itangazamakuru ry'imikino mu Rwanda biteye agahinda.
    Mu myaka yashize hari ubwo abantu batekerezaga ko iyo myitwarire igayitese yaterwaga n'uko abenshi mu bakoraga uwo mwuga babaga batarawize.

    Iri sesengura nta gaciro ryahabwa ubu, kuko benshi mu bakora amahano ari abarangije kaminuza mu itangazamakuru. Urugero rwa hafi ni abadasiba muri RMC (Urwego rw'Abanyamakuru Bigenzura), baregwa gusebanya no gukwiza impuha, kandi baramaze imyaka nibura 3 bigishwa ko kizira mu itangazamakuru ry'umwuga.

    Abandi bo kugawa ni bamwe mu batega amatwi aba 'banyamakuru', usanga babogeza, ndetse bakabagira intwari muri rubanda, ngo baratinyuka. Ariko se gutinyuka kurenza nyoko akaguru bikugira intwari, cyangwa byakakugize igicibwa. Mpamya ko abaturage bamaganye bamwe mu babayobya bitwaje mikoro, abenshi mu biyita abanyamakuru bajya mu myanya ibakwiye, mu iyarara n'ahandi haba abantu batiha agaciro ngo bagahe n'abandi.

    Igiteye impungenge kurushaho, aya makosa yose aba inzego zireberera itangazamakuru ryicecekeye. Hari RMC twavuze, hari Ishyirahamwe ry'Abanyamakuru b'Imikino, AJSPOR, hari na ARJ nk'Ishyirahamwe ry'Abanyamakuru muri rusange, hakaba n'inzego za Leta zagombye kurengera uburenganzira bw'abaturage itangazamakuru rihonyora.

    Abo bose babirenza ingohi, birengagije ko buhobo buhoro, abo bangizi batuganisha aho tutazabasha kwikura cyangwa tukazahava bitugoye. Dushishikazwa no kuveba urwego rw'imikino yacu, ariko twirengagije imwe mu mpamvu zikomeye ziyidindiza.

    Birababaza kuba tuzi uburyo kuyobora amakipe n'amashyirahamwe y'imikino bivuna, ariko 'abanyamakuru' bagashimishwa no guca intege abishora muri izo nshingano benshi muri twe dutinya.

    Ba nyir'ibitangazamakuru n'abayobozi babyo bakwiye kwirengera uyu mutwaro. Wasobanura ute ukuntu ufata igitangazamakuru cyawe ukagihindura umuyoboro w'ibitutsi, gusebanya, kurya ruswa n'andi marorerwa, imyaka igashira indi igataha, kugeza ubwo abagikurikira batangira kwibaza niba utari umufatanyacyaha? Amakuru dufite ni uko abo ba'boss' birinda gutanga gasopo ku 'banyamakuru' b'urukozasoni, ahanini kuko baba badahembwa cyangwa ngo bahemberewe igihe, maze 'boss' akabaha rugari ngo bishakire amaramuko.

    Kandi nibyo, ntiwaba umaze amezi 3 udahemba umuntu, ngo umujye imbere umutonganyiriza ibyo yavuze ashaka 'agatike'. Uzahititamo gukoresha utagusaba umushahara, ubundi umuhe rugari, atukane kugeza ibitutsi bimukamutsemo.

    Radiyo cyangwa Televiziyo bipfa kuba byafunguye gusa.
    IMu gusoza turisegura. Iyi nkuru ntawe igamije gutunga agatoki cyangwa gukomeretsa. Yemwe ndetse nta n'intungane ibaho mu kazi ako ariko kose. Gusa baca umugani ngo'umuryango utazimuye urazima'.

    Gukira ikibyimba bisaba kugitoneka. Twiteguye kwakira ibitekerezo by'abazasoma iyi nkuru, baba abanyamakuru, abafatanyabikorwa b'itangazamakuru n'abagenerwabikorwa baryo.

    Ikigamijwe ni ukwikubita agashyi, naho ubundi itangazamakuru ry'imikino dufite ubu aho rituganisha si heza habe na gato.

    Kayumba Xavier
    Umusomyi wa Rushyashya

    The post Itangazamakuru ry'imikino mu Rwanda ritagira rutangira amaherezo rizaturoha aho tutazikura! appeared first on RUSHYASHYA.

    Source : https://rushyashya.net/itangazamakuru-ryimikino-mu-rwanda-ritagira-rutangira-amaherezo-rizaturoha-aho-tutazikura/?utm_source=rss&utm_medium=rss&utm_campaign=itangazamakuru-ryimikino-mu-rwanda-ritagira-rutangira-amaherezo-rizaturoha-aho-tutazikura

  • Mr Kagame umunyamakuru wisanze muri Studio ari umuhanzi, umukinnyi abona w’ibihe byose muri APR FC yihebeye #rwanda #RwOT

    Mabano Eric wamamaye nka Mr Kagame muri muzika avuga ko ubundi yakuze yumva azavamo umunyamakuru ariko akaba yaraje kwisanga ari muri studio yabaye umuhanzi ubu wigaruriye imitima ya benshi.

    Mr Kagame ubusanzwe yavukiye muri Tanzania akaba avuka mu muryango w’abana 5, abakobwa 3 n’abahungu 2 akaba ari umuhungu mukuru, kuri ubu ababyeyi be asigaranye nyina ni mu gihe se yitabywe Imana.

    Mu kiganiro yagiranye n’ikinyamakuru ISIMBI kibanze ku buzima bwe bwo hanze y’umuziki, Mr Kagame uherutse gusohora indirimbo 'Igitekerezo’, yavuze ko ubundi mu bwana bwe nta makosa menshi yigeze akora ahubwo ikintu yakubitwe cyane ari ukuzerera, ngo ni ryo kosa yakundaga gukora.

    Kimwe mu bintu yakoze akiri umwana n’ubu yibuka akumva arasetse, ni ubwo yigaga mu mwaka wa kane w’amashuri abanza akaza guta inzira imucyura iwabo abishaka arimo kureba ko yavumbura indi birangira ayobye.

    Ati 'kera nkiri muto tuva aho twari dutuye tujya Kimironko, naratashye, mu gutaha ntaha nzi inzira imwe mvuga nti ni iyi ngiye ncamo nkagera mu rugo, icyo gihe nigaga mu wa kane w’amashuri abanza, ndavuga nti reka mvumbure indi nzira ndayoba, nkajya ngenda mbwira abantu amazina ya papa mbabwira ngo bandangire ahantu atuye.'

    Mr Kagame ngo yakuze yumva azaba umunyamakuru ariko na we yaje gusanga yinjiye muri studio yabaye umuhanzi iby’ubunyamakuru birangirira aho.

    Ati 'numvaga nzaba umunyamakuru pe, ni nabyo nakuze numva nzaba ariko sinzi ukuntu byaje kugenda, ariko urumva nabyirutse mu gihe cyanjye ntabwo radiyo zakinaga indirimbo cyane, zahozagamo amakuru, ubunyamakuru nabukunze niga mu mashuri abanza ariko nageze mu mashuri yisumbuye haza radiyo zikina imiziki nisanga noneho nakunze umuziki, ariko ubundi numvaga ikintu kirenze ari ugutwara indege no kuba umunyamakuru.'

    Nubwo ubu atajya abona umwanya wo gukurikirana cyane imikino, ariko ngo yakuze akunda umupira w’amaguru ndetse yari n’umufana w’ikipe ya APR FC n’ubu akunda cyane.

    Ati 'imikino ntabwo nyikurikirana cyane, umupira w’amaguru ni wo nakurikiranaga ariko ubu biba ari gake, ubu ni udukuru duke njyenda numva cyangwa mba mfite. Njye nari umufana wa APR FC niyo nkunda na Manchester United hanze y’u Rwanda. Umukinnyi mfata nk’uw’ibihe byose muri APR FC birumvikana ni Jimmy Gatete, yakoze akazi.'

    Uyu muhanzi uri mu bakunzwe cyane mu Rwanda, ngo nta kindi kintu gishobora kumutwarira umwanya atari umuziki kuko ubuzima bwe bwose ari umuziki keretse iyo asinziriye.

    Mr Kagame kandi yavuze ko ibintu bibiri yumva atabaho adafite ari umuziki ndetse n’icyo kunywa kuko ari bimwe mu bimufasha kumva ameze neza.

    Indirimbo ye nshya 'Igitekerezo’ iba igaruka k’umwana w’umukobwa wakuriye mu buzima bubi aho se na nyina bahoraga barwana bituma na we akurana umujinya n’umutima mubi, yaje gushaka umugabo ariko nabwo akajya ahora amutura uyu mujinya yakuranye, Mr Kagame aba agira inama uwo mugabo wamushatse ko akwiye kumwihanganira akamwumva kuko na we atari we.

    Mr Kagame avuga ko ari indirimbo nyuma y’iminsi 4 isohotse abona yakiriwe neza cyane n’abakunzi be. Uyu muhanzi ubarizwa muri High 5, mu buryo bw’amajwi indirimbo ye yatunganyijwe na Santana na Evy amashusho atunganywa na AB Godwin (Bad News).

    Yasabye abakunzi be kugumya kumushyigikira na we abizeza ko azakomeza kubaha ibihangano byiza ndetse ko afite n’imishinga myinshi imbere myiza bazishimira.

    Ubuzima bwe ngo ni umuziki nta kindi kimutwarira umwanya

    Ngo yakuze yumva azaba umunyamakuru

    Jimmy Gatete(10) ni we mukinnyi wakiniye APR FC afata nk’uw’ibihe byose

    Source : http://isimbi.rw/siporo/article/mr-kagame-umunyamakuru-wisanze-muri-studio-umukinnyi-abona-w-ibihe-byose-kuri-apr-fc-yihebeye

  • Ibyamamare byari bifungiwe i Rutsiro byarekuwe #rwanda #RwOT

    Abahanzi nyarwanda Ruhumuriza James uzwi nka King James, K8 Kavuyo, umunyamideli Mbabazi Shadia wamenyekanye ku mbuga nkoranyambaga nka Shaddyboo bari bafunzwe bazira kurenga ku mabwiriza yo kwirinda icyorezo cya coronavirus, barekuwe.

    Aba uko ari bane bakaba barafashwe bari kumwe n’abandi bantu 4 ku wa Kane tariki ya 29 Nyakanga 2021 mu Ntara y’Iburengerazuba mu karere ka Rutsiro mu murenge wa Boneza aho bavuze ko bari bagiye muri aka karere kugura ibibanza.

    Kuri uyu wa Kabiri, Shaddyboo yagaragaje ko barekuwe ni mu butumwa yanyujije kuri Instagram.

    Ati 'Ntuzigere unkubita mu gihe ndi hasi, kubera ko igihe nzabyuka uzahura n’ibibazo. Nagarutse.'

    Bakaba barekuwe nyuma yo kumara iminsi baganirizwa ku ngamba zo kwirinda icyorezo cya Coronavirus. Bakaba bari bafungiye kuri Sitasiyo ya Polisi ya Gihango mu Karere ka Rutsiro.

    Bari bamaze iminsi 5 bafungiye i Rutsiro

    Babasanganye n’inzoga

    Basabwe no kwipimisha iki cyorezo ku giti cyabo kugira ngo barebe niba ntawanduye

    Source : http://isimbi.rw/imyidagaduro/article/ibyamamare-byari-bifungiwe-i-rutsiro-byarekuwe

  • Dore ibiribwa byafasha umuntu umaze kubagwa agakira vuba #rwanda #RwOT

    Ibiribwa ni kimwe mu bintu by’ingenzi byafasha umuntu umaze kubagwa gukira vuba. Indyo yuzuye mbere na mbere ifasha umubiri gukira vuba nyuma yo kubagwa. Bimwe mu byo kwitaho cyane turi burebere hamwe twagaburira umuntu nyuma yo kubagwa turibanda cyane ku byubaka umubiri (Proteins), imyunyungungu na Vitamine zitandukanye.

    Mu gihe muganga akwemereye gufata ibiryo bikomeye nyuma yo kubagwa ni ngombwa gufata:

    1.Ibyubaka umubiri (Protein) ni ingenzi cyane kandi irakenewe k’umuntu wabazwe ;
    *Protein ifasha mu kwisubiranya k’uturemangingo (Tissues) twangiritse mu gihe cyo kubagwa,

    *Ifasha mu kwirema k’ubwirinzi bw’umubiri bityo bigafasha ko umubiri urwanya izindi ndwara zishobora gufata umubiri.

    * Protein ifasha mu kwikora kwa Collagen zigira uruhare mu kwisubiranya kw’igisebe bigakora inkovu(Scar).

    Ibiribwa ushobora kubonamo Ibyubaka umubiri (Protein) : inyama n’ibikomoka ku nkoko, amafi n’ibikomoka mu mazi, ibinyamisogwe, Amagi…

    Inyama zitukura zishobora kuba imbarutso ya Inflammation, umuntu umaze kubagwa asabwe kuzifata ku kigero cyo hasi, kuko inyama zitukura (red meats) ziba zifite amavuta atari meza cyane ku mubiri (Saturated fat) akaba mabi cyane iyo afashwe n’umuntu wabazwe kuko yongera inflammation.

    Ibiribwa bigabanya ububabare (Pain) and Inflammation:

    Fatty fish (Salmon, tuna, Sardine)
    Ubunyobwa (Peanuts).
    Amavuta ya Erayo(Olive Oil),
    Amavuta ya soya( Soybean Oil).
    Ibikomoka kuri Soya (Soy Products) ; nka Tofu.
    Ibitunguru, Tungurusumu n’imboga rwatsi.
    Imbuto : Blueberry, Pome itukura, imizabibu itukura (red grapes)

    2.Imyunyungugu na Vitamin

    umuntu wabazwe akeneye cyane ni:Zinc : ifasha mu kwihuta gukira k’umubiri no kuzamura ubwirinzi bw’umubiri.

    Vitamin C : Iyi Vitamine ifasha gukira vuba k’uruguma no kurukomeza ; Ifasha kandi gukorwa kwa Collagen mu magufa n’ingingo (Cartilage), inyama (Muscles) n’imitsi itwara amaraso (Blood vessels).

    Aho Vit. C iboneka : oranges, Inyanya, strawberries, broccoli, n’ ibijumba.
    Vitamin A : ifasha ubwirinzi bw’umubiri gukora neza, ikanafasha mu gukorwa k’uruhu rw’inyuma n’imbere ahabazwe.

    Vitamin A iboneka muri : carrots, imboga rwatsi, n’ibijumba.

    Vitamin D : iyi vitamine ikenewe kugira ngo habeho kwirema, kubungabunga no gusana amagufa.

    Vitamin D iboneka mu : Amata yongewemo vit. D, Umuhondo w’igi, amafi yo mu bwoko bwa Salmon na Tuna. Ikindi gishobora kuguha Vitamin D ikenewe n’umubiri n’ukujya ku zuba rya mu gitondo iminota byibura 10 ukabikora nka 2 mu cyumweru.

    Vitamin K : ni Vitamin ikenewe cyane mbere na nyuma yo kubagwa, kuko ikenewe cyane kugirango ifashe umuntu kudatakaza amaraso menshi mu gihe yaba abazwe.
    Ibiribwa wabonamo Vitamin K ni : Imboga rwatsi, Amashu, Spinach, Umuhondo w’igi, Inyanya, Cauliflower, Inyama y’umwijima, Cocomble, avoka.

    Calcium : ni ingenzi cyane mu gusana amagufa/ingingo zoroshye ziba zangiritse mu gihe cyo kubagwa, ikindi nuko Calcium ifasha kwikaya kw’inyama mu buryo bwiza (cyane cyane gutera neza k’umutima). Amata n’ibiyakomokaho hamwe n’imboga rwatsi ni bimwe mu nkomoko ya Calcium.

    Source: http://horahoclinic.rw/

    [email protected]

    Source : https://agakiza.org/Dore-ibiribwa-byafasha-umuntu-umaze-kubagwa-agakira-vuba.html

  • Bimwe mubyo umukunzi wa Anita Pendo yamukoreye mu kabyiniro – YEGOB #rwanda #RwOT

    Umunyamakuru Anita Pendo ukorera RBA yavuze bimwe mu byo umusore bahoze bakundana (Ex we) yamukoze ubwo bari bari kumwe mu kabyiniro.

    Nkuko Anita Pendo yabitangaje yavuze ko we n'uyu musore binjiranye mu kabyiniro gusa muri ako kabyiniro hari harimo umukobwa wahoze akundana n'uwo musore (Ex w'uwari umukunzi wa Anita). Ngo uwo mukobwa agikubita amaso uwo musore yahise aza kumugwamo, yaramuhobeye yanga kumurekura uko amuhobera ari nako arira cyane. Ubwo icyo gihe Anita yari yabibonye asa nk'uwitarura uwo musore asubira inyuma gahoro gusa akomeza kureba uko umukunzi we n'uwo mukobwa bahoberana ndetse umukobwa yakomeje kurira cyane. Anita byaramubabaje cyane kubona uwo mukobwa ahobera umukunzi we maze akarira cyane bituma agira amarangamutima yo kuvuga ko uwo mukobwa batagombaga kumusiga ameze uko yari ameze intimba ari yose. Byaje kurangira Anita n'umukunzi we batashye gusa bukeye bwaho Anita yahuye n'umukunzi we baraganira ndetse anamubaza ku by'uriya mukobwa bahoberanye akarira.

    Umukunzi wa Anita yamubwiye ko uriya mukobwa bigeze gukundana (ni Ex we). Anita mu kubyumva yahise atangira gusubira inyuma mu rukundo rwe n'uwo musore nyuma yo gutekereza amarira umukobwa yari yaririye imbere ye ubwo yahoberaga umukunzi we.

    Anita Pendo

    Source : https://yegob.rw/bimwe-mubyo-umukunzi-wa-anita-pendo-yamukoreye-mu-kabyiniro/

  • Umugore ari mu rukundo n'umusore arusha imyaka 29 bamenyanye akiri umwana muto [AMAFOTO] #rwanda #RwOT

    Uyu mugore ufite abana 7 ari mu rukundo rudasanzwe n'uyu muhungu ukiri muto yemeza ko bakundana urudasanzwe.

    Ubwo Marilyn yari afite imyaka 31 nibwo yamenyanye n'uyu musore bakundana cyane ko yabanaga n'abana be ahitwa Crawley muri West Sussex ni mu gihugu cy'Ubwongereza.

    Uyu musore wari ukiri muto cyane icyo gihe yemeye gufasha imirimo madamu Marilyn wari urwaye indwara yitwa ME itera umubiri umunaniro ukabije ndetse n'imitsi ikababara.

    Marilyn urusha imyaka 29 William yavuze ko icyo gihe bahise batangira kwiyumvanamo ndetse uyu mugore niwe wakoresheje imbaraga nyinshi kugira ngo akundane n'uyu mwana abyaye gusa ngo imiryango yabo yarabarwanyije cyane.

    Uyu mugore yagize ati 'Umuryango wanjye wahise utangira kudukeka ko turi inshuti nubwo bitari byakaba bitewe n'ukuntu William yamfashaga.'

    Uyu mugore ufite kompanyi ikora isuku,avuga ukuntu yagowe n'iki cyemezo yagize ati 'Sinifuzaga kwangiza ubuzima bwa William.Sinashaka kubyara abandi bana kandi sinashakaga kumubuza kugira umuryango igihe abishaka.

    William utunganya amafilimi yagize ati 'ndabizi ko dufite ikintu twihariye ariko niwe mugore w'inzozi zanjye.Byasabye imbaraga mu kumvikana.Yambajije ibibazo byinshi kugira ngo yumve ko aribyo nshaka koko.Nari niyizeye 100%.'

    Aba bombi bamaze kwemeranya ubushuti bahise bajya kubana mu nzu imwe ndetse uyu mugore yavuze ko umwana we umwe ariwe wamwihakanye mu gihe William yahagaritse kongera kuvugana n'umuryango we.

    Muri Gashyantare 2009,William yambitse impeta uyu mukunzi we hanyuma mu mezi 2 barashyingiranwa ndetse bajya kurya ukwa buki muri Gibraltar aho Marilyn avuka.

    Mu minsi ishize nibwo aba bombi bizihije isabukuru y'imyaka 12 bamaze barushinze aho uyu mugore yahamije ko bagikundana cyane.

    Ati 'Njye na William turacyakundana cyane.Ntitwigeze dutandukana ndetse duhora dukumburanye.Niwe dusangiye ubuzima.'



    Source : https://umuryango.rw/ubuzima-115/udushya/article/umugore-ari-mu-rukundo-n-umusore-arusha-imyaka-29-bamenyanye-akiri-umwana-muto

  • Ntiwakunda udatanga icyakora watanga udakunda-Pst Desire Habyarimana #rwanda #RwOT

    “Iki ni cyo kitumenyesha urukundo icyo ari cyo, ni uko Yesu yatanze ubugingo bwe ku bwacu, natwe ikidukwiriye ni uko twatanga ubugingo bwacu ku bwa bene Data.”1 Yohana 3:16

    Umuntu nakubwira ngo aragukunda akaba nta buryo na bumwe aritanga ngo akugaragarize urukundo, azaba akubesha. Ntiwakunda udatanga icyakora watanga udakunda.

    Wareba hano n’iyi nyigisho: Umugisha ni iki?

    [email protected]

    Source : https://agakiza.org/Ntiwakunda-udatanga-icyakora-watanga-udakunda-Pst-Desire-Habyarimana.html

  • Umuyobozi w'abamotari yavuze ko utazikingiza atazongera gutwara abagenzi_ inkuru irambuye #rwanda #RwOT

    Kuri uyu wa Kabiri tariki ya 3 Kanama 2021, mu Mujyi wa Kigali hatangiye igikorwa cyo guha urukingo rwa Covid-19 Abamotari bose aho umuyobozi wabo Ngarambe Daniel yababwiye ko utazikingiza atazemererwa gutwara abagenzi.

    Ngarambe Daniel uyobora FERWACOTAMO yabitangarije Radio Rwanda kuri uyu wa Kabiri ubwo yahamagariraga buri mumotari kwitabira iyi gahunda yo gukingirwa.

    Yavuze ko aya mahirwe bahawe yo gukingirwa badakwiye kuyapfusha ubusa ndetse ko ubuyobozi bw'amakoperative na bwo bwabihagurukiye.

    Yagize ati 'Mu makoperative yacu twafashe ingamba ko umumotari udakingiwe atongera gutwara abagenzi mu gihe inkingo zihari kuko ashobora kuzana akaga ko kwanduza bagenzi be aho bahagaze, aho baba bicaye urabizi ko akenshi bakunda kuba begeranye ugasanga noneho tugiye kongera gusubira inyuma.'

    Yavuze ko muri za Koperative z'aba bakora umwuga wo gutwara abantu kuri moto, bafite imbuga bahuriraho ku buryo bose bamenyeshejwe iby'iki gikorwa ndetse na bo ubwabo biyemeje ko utazakingiza azaba atakiri uwabo.

    Yavuze ko byoroshye kumenya abikingije n'abatarikingije kuko 'abayobozi b'abamotari barahari, ari kuva gukingirwa bakamwandika bakagira n'akantu bamuha kagaragaza ko yakingiwe ako bamuhaye rero ni ko tuzajya tugenda tureba niba agafite.'

    Avuga ko buri mumotari afite nimero ye ikaba ari yo izajya ku gapapuro aza guhabwa nyuma yo gukingirwa.

    Ati 'Ibyo tuzajya tugenda tubikurikirana mu muhanda turebe ko icyo gikorwa bakitabiriye.'

    Abamotari ni bamwe mu bakunze kugarukwaho ko bashobora kuba ikiraro cy'izamuka ry'ubwandu bwa COVID-19 kuko bahura n'abantu benshi, baba abo batwara ndetse n'ababahagarika bashaka ko babatwara ariko bakananiranwa ariko babanje kuvugana.

    Source : https://impanuro.rw/2021/08/03/umuyobozi-wabamotari-yavuze-ko-utazikingiza-atazongera-gutwara-abagenzi_-inkuru-irambuye/

  • Perezida Kagame na Suluhu biteguye gukorana mu kongera kuzamura EAC #Rwanda #RwOT via @kigalitoday #rwanda #RwOT

    Ibyo ni bimwe mu byo abo bakuru b’ibihugu bagarutseho mu kiganiro n’abanyamakuru, cyo ku itariki 2 Kanama 2021, uwo akaba ari na wo munsi wa mbere w’uruzinduko Perezida Samia Suluhu agirira mu Rwanda.

    Nyuma y’isinywa ry’amasezerano atandukanye ahuriweho n’ibihugu byombi yabereye imbere y’abo Bayobozi, Perezida Kagame yavuze ko u Rwanda rusangiye byinshi na Tanzania birenze guhuza umupaka gusa, kandi ko intego yo guteza imbere abaturage b’ibihugu byombi, ari kimwe mu byakunze kuranga ubufatanye bw’ibihugu byombi.

    Perezida Kagame yavuze ko u Rwanda rwiteguye gukorana na Tanzania mu kongera kuzamura ubukungu bw’Umuryango wa Afurika y’Iburasirazuba nyuma ya Covid-19.

    Yagize ati “U Rwanda rwiteguye gukorana bya hafi n’abavandimwe bo muri Tanzania, mu rwego rwo kuzamura Umuryango wa Afurika y’Iburasirazuba no mu kwihutisha iterambere ry’ibihugu byacu nyuma y’icyorezo cya Covid-19 ndetse n’Akarere muri rusange”.

    Ati “Ibibazo Akarere kacu karimo guhura na byo, byakemurwa gusa n’ubufatanye bw’ibihugu no gufata amahirwe ahari akabyazwa umusaruro binyuze mu bufatanye n’inyungu zihuriweho. Mfite icyizere cyo kubona Umuryango wa Afurika y’Iburasirazuba ukomeye, kandi uteye imbere”.

    U Rwanda na Tanzania ni bimwe mu bihugu bitandatu bigize umuryango wa Afurika y’Iburasirazuba.

    Mbere yo kujya mu kiganiro n’ abanyamakuru, abo bakuru b’ibihugu babanje kuganira ubwabo muri Village Urugwiro, Perezida Samia Suluhu akaba yavuze ko mu byo baganiriyeho na Perezida Kagame, harimo ibijyanye no kongera ubufatanye mu kuzamura ubukungu bw’ibihugu byombi, ibyerekeye Umuryango w’Afurika y’Iburasirazuba, ubufatanye mu bijyanye n’ikoranabuhanga, ubufatanye mu guhangana n’icyorezo cya Covid-19 n’ibindi.

    Perezida Samia Suluhu yongeyeho ko ibihugu byombi bifite amahirwe yo kwagura imikoranire myiza n’ubufatanye mu nzego zitandukanye, bihereye ku byo bisanzwe bifatanyamo.

    Biteganyijwe ko uyu munsi tariki 3 Kanama 2021, abo bakuru b’ibihugu basura ibikorwa bitandukanye birimo igice cyahariwe inganda (SEZ), ahakorera ibigo n’inganda bisaga 120, harimo inganda zitunganya umusaruro w’ibikomoka ku buhinzi n’ubworozi n’ibindi.

  • Rulindo: Njyanama yasabye ko Gitifu w’Akarere ahagarikwa by’agateganyo #Rwanda #RwOT via @kigalitoday #rwanda #RwOT

    Rulindo ni kamwe mu turere tw
    Rulindo ni kamwe mu turere tw’Intara y’Amajyaruguru

    Ku wa Gatandatu tariki 30 Nyakanga 2021, Inama Njyanama y’Akarere ka Rulindo yateranye hifashishijwe uburyo bw’ikoranabuhanga, igamije gusuzuma ingingo zitandukanye harimo n’irebana no kumva ibisobanuro ku makosa yagaragajwe muri Raporo y’ubugenzuzi bwakozwe, bukagaragaza amakosa mu micungire n’imitangire y’amasoko, muri imwe mu mishinga.

    Muri yo hari nk’ujyanye n’ikorwa ry’umuhanda wa laterite Rwintare-Gitanda ureshya n’ibirometero 17,3 wadindiye bitewe n’ibibazo bishingiye ku itangwa ry’amasoko, ibibazo bishingiye ku iyubakwa ry’agakiriro k’Akarere, n’ibagiro rya kijyambere.

    Mu yandi makosa yagaragajwe mu bugenzuzi, Umunyamabanga Nshingwabikorwa w’Akarere yatanzeho ibisobanuro, ni arebana na bamwe mu barimu, byagaragaye ko bagiye bahembwa imishahara y’umurengera, abagiye bahemberwa urwego rw’amashuri badafite n’ibindi.

    Ibisobanuro Gitifu w’Akarere ka Rulindo, Bizumuremyi Ali Bashir yatanze ntibyanyuze Inama Njyanama y’Akarere, bituma ifata umwanzuro ku cyifuzo cyo kuba yaba ahagaritswe by’agateganyo mu gihe cy’amezi atatu.

    Guverineri w’Intara y’Amajyaruguru, Nyirarugero Dancille, yemereye Kigali Today ko hari imishinga imwe n’imwe yo muri aka Karere, itigeze ikorwa mu buryo bwubahirije amategeko cyangwa ibisabwa; kandi ko Umunyamabanga Nshingwabikorwa w’Akarere ari we wari ufite inshingano zikomeye zo gukurikirana uko imishinga yose y’iterambere ishyirwa mu bikorwa, ikaba ari yo mpamvu yasabwe kubitangaho ibisobanuro.

    Yagize ati: “Ni yo mpamvu Inama Njyanama y’Akarere yashingiye kuri Raporo y’ubugenzuzi, igaragaza amakosa yagiye abaho, isaba Umunyamabanga Nshingwabikorwa w’Akarere kuyatangaho ibisobanuro, kuko ari we wari ufite inshingano zo gukurikirana umunsi ku wundi ibikubiye muri iyo mishinga, yaba mu mitegurire yayo n’uko yagiye ishyirwa mu bikorwa”.

    Nyirarugero Dancille akomeza avuga ko ubwo Intara izashyikirizwa raporo ku mwanzuro w’Inama Njyanama, wo guhagarika by’agateganyo Bizumuremyi Ali Bashir, izasuzuma niba icyo cyifuzo cyahabwa ishingiro, cyangwa kigakorerwa ubugororangingo nk’uko biteganywa n’amategeko.

    Guverineri Nyirarugero aboneraho kwibutsa abakozi b’Uturere twose tw’Intara ayobora n’abayobozi mu nzego zitandukanye, ko bafite inshingano zo kwitwararika mu kazi kabo ka buri munsi, no gusuzuma ko bakorera mu mucyo, baharanira ihame ryo gushyira imbere ibiri mu nyungu z’abaturage.

    Yagize ati: “Buri mukozi wese cyangwa Umuyobozi, akwiye kuzirikana ko kuzuza inshingano igihugu cyamushinze ari ihame. Kubigeraho, bisaba ko buri wese ahora yisuzuma niba azihagazemo neza, kandi ko igihe cyose yazitandukira, agomba kubibazwa. Nkaba mpamagarira buri mukozi wese, kuguma mu murongo wo kudatandukira inshingano bahawe, kugira ngo turangwe n’imikorere n’imyitwarire bigeza umuturage ku iterambere ryihuse kandi rirambye”.

    N’ubwo Inama Njyanama y’Akarere ka Rulindo yafashe umwanzuro ku cyifuzo cyo kuba Gitifu Bizumuremyi yahagarikwa by’agateganyo, kugeza ubu aracyari mu kazi, kuko ubwo twandikaga iyi nkuru, imyanzuro y’Inama Njyanama y’Akarere ka Rulindo, yari itarashyikirizwa ubuyobozi bw’Intara y’Amajyaruguru ari nabwo bugomba kuyitangaho umurongo.