Webrwanda Backend

Author: webrwanda

  • Amagare ya Guraride azatangira gukoreshwa mu ntangiriro za Nzeri – #rwanda #RwOT

    Aya magare azatangirira mu duce tubiri twa Kigali turimo mu Mujyi rwagati no mu bice by’i Remera, mu gihe hazaba hari sitasiyo 13 zayo zitandukanye zizajya zifashishwa n’abayakoresha kubona umuriro.

    Izi sitasiyo zizajya ziba ziri mu duce dutandukanye ziriho umukozi ushinzwe kwakira ndetse no gusobanurira abashaka gutwara aya magare, hari izifite ubushobozi bwo kwakira amagare atanu n’izakira 10.

    Umuyobozi w’agateganyo w’Ishami ry’Ibikorwaremezo mu Mujyi wa Kigali, Mazimpaka Vedaste, yasobanuye ko utu duce aritwo twahereweho kuko dufite imihanda yagenewe amagare ariko n’utundi izashyirwamo tukagerwaho.

    Yagize ati “Hariya ni ho hari inzira z’abanyamaguru n’abanyamagare zigaragara kandi zirimo ibimenyetso by’amagare hagomba gukoresha amagare.”

    Yakomeje avuga ko igishushanyombonera gishya cy’Umujyi wa Kigali giteganya kubaka imihanda ifite inzira z’amagare ibizatuma abasha kugera hirya no hino.

    Ubu hari amagare 80 azajya atwara abantu, mu rwego rwo kuyamenyereza abayakoresha, mu ntangiriro nta kiguzi abayakoresha bazajya basabwa.

    Umukozi muri Guraride, Ndayishimiye Jerry, yagize ati “Turashaka kureba uburyo izi ngendo z’amagare zitazahenda abaturarwanda nk’uko izisanzwe bimeze. Mu gihe cya mbere cyo gutangira gukoresha amagare yacu bizaba ari ubuntu mu gihe cy’amezi atandatu ashobora kongerwa.”

    Umuntu ushaka gukoresha iri gare asabwa gukoresha application ya telefoni abashe kubona sitasiyo imwegereye ashobora kujya kurahuraho umuriro, buri wese ushaka kuyakoresha azajya yiyandikisha, binyuze kuri telefoni, ahitemo bumwe mu buryo bune bwo kwiyandikisha.

    Kuri ubu aya magare agiye gutangirira mu Mujyi wa Kigali ariko azagezwa no mu yindi mijyi y’igihugu nka Huye, Bugesera, Rusizi na Rubavu.

    Umushinga wa Guraride washowemo agera kuri miliyoni 13$, hateganyijwe ko izakoresha amagare agera ku 3000 akoresha amashanyarazi, 2500 akoresha uburyo bukomatanyije (smart bikes) ndetse na “scooter” zigera ku 1500 zikoresha amashanyarazi.

    Guraride ifite gahunda yo gushyiraho sitasiyo zigera ku 1000 hirya no hino mu gihugu, zizajya zifashishwa mu kongera umuriro muri ayo magare.

    Inkuru bifitanye isano: Byinshi ku mushinga w’amagare agiye gushyirwa muri Kigali, umuntu azajya atwara akayasiga ahabugenewe

    Amagare ya Guraride azatangira gukoreshwa mu ntangiriro za Nzeri

    Mu mezi atandatu ya mbere aya magare azajya akoreshwa ku buntu

    Hashyizweho sitasiyo 13 hirya no hino mu Mujyi wa Kigali

    source : https://ift.tt/3zeEooT

  • Nyabihu: Ubuyobozi ntibuvuga rumwe n’umuturage wambuwe inka yahawe muri Girinka – #rwanda #RwOT

    Uyu mugabo w’imyaka 32 yavuze ko yahawe iyo nka muri Girinka ayorora imyaka itatu ariko ikagira ikibazo cy’uko bayimisha ntifate bityo abona nta musaruro ugaragara itanga.

    Niyitegeka yasabye ubuyobozi ko yayiguranisha ngo burabimwemerera ndetse bigeza aho abona uwo bagurana.

    Nyuma yo kugurana inka n’umuturanyi we avuga ko yatunguwe nuko ubuyobozi bw’umudugudu n’ubw’umurenge bwaje kumwambura iyo bari baguranye na mugenzi we bakayiha undi muturage.

    Yavuze ko yari yiteze ko igiye gutangira kumufasha gutera imbere kandi n’abana be bakanywa amata ariko ntibyamuhiriye.

    Ati “Inka ndwanye nayo imyaka itatu ntitwari twanywa n’amata njye n’umugore n’abana banjye. Bayimpa numvaga ko ngomba kwiteza imbere nkanakunda n’igihugu kurushaho, buriya iyo igihugu kiguhaye intangiriro nawe ugomba kugikunda kurushaho. Numvaga ko nizajya ibyara nanjye iyo ibyaye nkagura ubutaka cyane ko ndi umukene.”

    Yavuze ko icyo yifuza ari ugusubizwa inka ye yambuwe hanyuma uwo bayihaye agashyirwa ku rutonde rw’abagomba kuzihabwa nkuko bamwizeza ko azahabwa indi.

    Umuyobozi w’Umudugudu wa Muremure, Nyirambabazi Odette, yavuze ko ikibazo cye bakizi kandi ko yashyizwe ku rutonde rw’abazahabwa inka muri uyu mwaka gusa yemeza ko inka yayatswe nyuma y’uko bigaragaye ko ashatse kuyigurisha.

    Ati “Icyo kibazo ndakizi cyane. Uwo mugabo yafashe iyo nka yahawe muri Girinka ayigurisha tutabizi ngo ntibyara. Amaze kuyigurisha ubuyobozi bw’umurenge buhita bumpamagara bumbaza niba mbizi, mpamagara mutekano wanjye mubwira ko bagomba kumuhagarika. Twayifashe imaze kurenga imidugudu itatu turayigarura.” Ubwo twahise dufata iyo yari yaguranishije tuyisubiza nyirayo.”

    Yavuze ko nyuma yo kuyigarura ubuyobozi bw’Umurenge bwahise butanga amabwiriza ko iyo nka yari yagurishijwe ihabwa undi muturage kubera ko amabwiriza agenga uwahawe inka muri Girinka atamwemerera kuyigurisha.

    Ibyo kugurisha yasobanuye ko Niyitegeka yashatse abagura iyo nka yahawe na we ahita agura akandi gato kandi ibyo bitemewe kuko bigira inzira binyuramo, bikanemezwa na komite ya Girinka ku rwego rw’umudugudu ko inka yagize ikibazo.

    Umuyobozi w’Umurenge wa Karago, Muhirwa Robert, yabwiye IGIHE ko umwanzuro wo kwambura Niyitegeka inka igahabwa Twizeyimana washingiye ku kuba yarakoze amakosa yo gutanga inka atabimenyesheje ubuyobozi gusa ngo bitewe nuko ari umukene yashyizwe ku rutonde rw’abazayihabwa uyu mwaka.

    Ati “Twaricaye mu nteko y’abaturage turavuga tuti iriya nka yari ayiragiye igihe kirekire, mbese yaravunitse. Twanzura ko na we kuko ari umukene basi mu nka tuzatanga uyu mwaka azayihabwe. Twamweretse amakosa yakoze na we arayemera. Twebwe twamuha amahirwe yo kuzahabwa inka izahita ibyara. Kandi iyo inka agomba kuyibona vuba.”

    Umuyobozi w’Akarere ka Nyabihu, Mukandayisenga Antoinette, yabwiye IGIHE ko ikibazo bakizi kandi ko bari kugikurikirana kugira ngo mu gihe cya vuba kibe cyamaze gukemuka.

    Niyitegeka Jean de Dieu wo mu Karere ka Nyabihu avuga ko yambuwe inka n’ubuyobozi buvuga ko yashatse kuyigurisha

    source : https://ift.tt/3yeRxNz

  • Tube intangarugero ku bana bacu #rwanda #RwOT

    Mugirirane neza, mugirirane imbabazi, mubabarirane ibyaha nk’uko Imana yabababaririye muri Kristo. Abefeso 4:32

    Umubyeyi umwe (maman) arimo kubara iyi nkuru ababyeyi bose bagomba gusoma no gutekerezaho:

    “Umunsi umwe, habayeho intonganya hagati yanjye n’umugabo wanjye birangira mbabaye ndasakuza. Nahungiye ahantu runaka ndicara, nubika umutwe wanjye mu biganza, ndarira. Umukobwa wacu w’imyaka 2 yumvise induru maze ntiyazuyaza. Yaraje yicara iruhande rwanjye, arampobera ati: “Ndagukunda, mama!”Naramusubije nti: “Nanjye ndagukunda.” Yashyize umutwe ku rutugu rwanjye yungamo ati: “Byaba byiza iyaba nawe wakundaga papa”.

    Ni nk’aho umutima wanjye unsimbutse! Ndarira, icyakora nihagararaho ndavuga nti”Ariko nkunda papa wawe, nubwo twagize ibyo tutumvikanaho. Umukobwa wanjye rero aramwenyura, arahaguruka, ariruka, atera hejuru ati: “Nzahita mbwira papa ko umukunda.”

    Niba abana bawe ari abahamya b’uburakari bwawe, menya neza ko hari byinshi ushobora gukora ugahindura imyitwarire bityo ugaragarize abantu imbabazi.

    Mubigishe gukemura amakimbirane hatabayeho kwanduranya. Ubereke ko itandukaniro ry’ibitekerezo rishobora kuganisha ku cyemezo cyiza ku bandi bantu, ko ushobora kwibeshya kandi ugakomeza kubahwa no gukundwa.

    Inshuro nyinshi, ugomba kubigisha ibyo utigeze wigishwa. Niba ari uko bimeze, wigire ku makosa y’ababyeyi bawe kandi uhe isomo abana bawe.

    Babarira igihe wababajwe cyangwa wakomerekejwe kandi ntukaryame ufite uburakari mu mutima wawe (Abefeso 4:26). Yesu adusaba kubabarira “Kugira ngo So uri mu ijuru na we akubabarire amakosa yawe” (Mariko 11:25).

    Babyeyi, mwibuke ko abana banyu ari mwe bagomba kwigiraho ingeso n’imigirire bizabaranga mugihe kizaza. Muri macye icyo mubababibamo ni cyo muzabasaruramo. Bibiliya itugira inama yo gutoza abana inzira nziza bagomba kunyuramo kuko bazarinda basaza batarayivamo (Imigani 22:6)

    Source: www.topchretien.com

    [email protected]

    Source : https://agakiza.org/Mugirirane-neza-mugirirane-imbabazi.html

  • Nguyu umuti n’ubwo bamwe bawutesha agaciro/Ibanga ryagufasha Gukira ibikomere ibikomeretsa bigihari || Pastor Hortense M. #rwanda #RwOT

    Source : https://agakiza.org/Nguyu-umuti-n-ubwo-bamwe-bawutesha-agaciro-Ibanga-ryagufasha-Gukira-ibikomere.html

  • Abantu 6 bahitanwe na Covid-19 mu Rwanda abandi 496 barayandura #rwanda #RwOT

    Kuri uyu wa Mbere,Minisiteri y'Ubuzima yatangaje ko abantu 6 bahitanwe na Covid-19 batuma umubare w'abamaze gupfa ugera kuri 1,027.Abapfuye n'abagore 5 n'umugabo 1.

    Abarwayi bashya b'icyorezo cya COVID-19 babonetse ni 496 bangana na 6% y'ibipimo byafashwe.Abantu 43,826 ni bo bahawe doze ya mbere y'urukingo rwa COVID19 mu Rwanda batumye abamaze gukingirwa bose bagera kuri 1,092,466.

    Abari mu bitaro bashya ni 15 mu gihe abarembye ari 43.Abasezerewe mu bitaro ni 11.

    Minisiteri y'ubuzima mu Rwanda ivuga ko abo mu cyiciro c'imyaka 18 ari bo bafite ibyago byinshi byo kwandura no kwanduza dore ko ari bo birirwa mu mirimo itandukanye kandi bagahura na benshi.

    Umujyi wa Kigali ni wo watangiriweho muri iyi gahunda yo gukingira Covid-19 haherewe ku bujuje imyaka 18 y'amavuko.

    Abashinzwe ubuzima mu Rwanda bavuga ko ingamba zo kwirinda zishobora kugabanywa cyane ubwo hazaba hamaze gukingirwa nibura 60% by'abaturage bose.

    Minisiteri y'ubuzima ivuga ko iki ari icyiciro cya 3 cy'ikingira igihugu cyinjiyemo nyuma y'icy'abari hejuru y'imyaka 60 bakurikiwe n'abari hejuru y'imyaka 50 na 40.

    Kuva gahunda yo gukingira yatangira mu kwezi kwa gatatu, abakiri bato bari bakomeje gusa n'abashyirwa ku ruhande bivugwa ko bo bafite ubwirinzi bukomeye.

    Minisiteri y'ubuzima ivuga ko abakuze ari bo bibasirwa cyane ariko benshi ngo bakaba banduzwa n'abakiri bato. Ni yo mpamvu bahawe umwihariko.

    Tharcisse Mpunga, umunyamabanga wa leta muri minisiteri y'ubuzima, agira ati: “Bariya bantu bakuze banduzwa n'aba batoya. Kuko ni bo baba bari muri ibi byose tubona, n'abo polisi ifata benshi ni urubyiruko, ni bo bagenda bakayirwara”.

    Bwana Mpunga avuga ko benshi bari mu mijyi.

    Ati: ''Kubakingira bifite ingaruka ebyiri. Iya mbere ni ukugabanya ubwandu buri muri iki cyiciro, icya kabiri ni ukugabanya n'uko bajya kuyanduza na ba bandi b'abasaza n'abakecuru bibereye mu ngo zabo.”

    Uyu muyobozi avuga ko atari umwihariko w'umujyi wa Kigali gusa, uretse ko hari abantu benshi bakora ubucuruzi n'iyindi mirimo, “ariko n'intara zose ni ko zimeze”.

    Nyuma y'umujyi wa Kigali biteganijwe ko inkingo zimanurwa no mu ntara zindi guhera ku wa kabiri.

    Abashinzwe ubuzima bavuga ko bafite inzozi z'uko ubuzima bwazongera kwegera uko bwahoze mbere y'icyorezo cya Covid-19.

    Icyo gihe ngo abagera kuri 60% bakazaba bamaze guhabwa inshinge zombi z'urukingo.

    Kuri ubu ibikorwa byo gukingira birakomeza ku buryo budahagarara mu gihugu cyose, ndetse abasaga gato miliyoni bakaba bamaze guhabwa nibura urukingo rwa mbere, mu gihe abakabakaba ibihumbi 500 bamaze guhabwa inkingo zombi.


    Source : https://umuryango.rw/amakuru/mu-rwanda/ubuzima/article/abantu-6-bahitanwe-na-covid-19-mu-rwanda-abandi-496-barayandura

  • Ikiryabarezi cyatumye umusore wiga muri Kaminuza yiyahura. – YEGOB #rwanda #RwOT

    Umusore wigaga muri Kaminuza yiyahuye nyuma yo gushora amamiliyoni mu kiryabarezi bikarangira ayahombye.

    Mu nkuru ibabaje y'ibitangazamakuru bitandukanye birimo citinewsroom , ivuga ko uyu munyeshuri wigaga muri kaminuza y'ubumenyi n'ikoranabuhanga ya Kwame (KNUST),yashatse kugera Ku butunzi bw'ibihumbi 200,000GHC,asaga Miliyoni 330 mu manyarwanda nk'ayo yari gutsindira yashoye 60,000GHC( byama Cedi),yagize amahirwe make arayabura.

    Uyu musore utatangajwe amazina, amakuru akomeza avuga ko akimara kubura ayo mafaranga ,igitutu cy'abantu nicyo cyatumye yiyahura kuko ayo mafaranga harimo ayo yari yagujije, abona ko kuzabona inyishyu bizaba ingorabahizi ahitamo kwiyahura.

    Source : https://yegob.rw/ikiryabarezi-cyatumye-umusore-wiga-muri-kaminuza-yiyahura/

  • Wabyifatamo ute ushatse guterera umukobwa ivi akagutera utwatsi? – YEGOB #rwanda #RwOT

    Muriki gihe imico itandukanye ikwira ku isi hose, umuco wo gutera ivi ku basore bashaka gusaba abakobwa ko bazabana nawo umaze gukwiragira ku isi no mu Rwanda hadasigaye nubwo ntawuzi uwabizanye mu Rwanda.
    Ariko nubwo biri uko umuntu wese uteye ivi siko bahita bamwemerera ahubwo hari nabo bakoza isoni ku karubanda bakabahakanira.

    Iyo bigenze gutyo umusore bahakaniye ahita agwa mu gahinda gakomeye ndetse abenshi bishobora kubagiraho ingaruka zikomeye, hari abahura n'ihahamuka abandi bakamera nk'abasazi. Nyamara ndashaka kubwira abasore bose biyemeje gutera ivi ko mukwiye kumenya ko nibabahakanira atariho ubuzima burangirira kuko n'ubundi abenshi muba mwaratandukanye n'abandi bakobwa.

    Mu gihe rero uzatera ivi bakagutera utwatsi uzubahirize bimwe muribi tugiye kukubwira bizagufasha kwikomereza ubuzima nkaho ntacyabaye:

    1. Tuziko iyo utera ivi ukoresha ivi rimwe, nuramuka usabye uwo mukobwa ko mwabana akaguhakanira uzahite ukubita ivi rya kabiri hasi wambaze Imana rurema ishobora byose, maze uyisabe kugukomereza umutima, kugira ngo ubone imbaraga zo guhangana n'agahinda uwo mukobwa aguteye. Bitewe nuko wowe ku giti cyawe utakwishoboza kwihanganira agahinda waba uhuye nako ningombwa kwiyambaza Imana, bizagufasha kujya mu bindi bitekerezo bishya ndetse no kwisuzuma ngo urebe igikurikiyeho.

    2. Nuramuka uteye ivi umukobwa akaguhakanira ntuzigere wongere kumwiginga ngo ukomeze kumusaba kukugirira impuhwe. Ibi ni ukubera ko ajya kugutera utwatsi abikuye ku ndiba y'umutima ndetse harukuntu aba yarasanzwe muburyo utazi. Nukomeza kumwinginga rero uzaba uri guta igihe no kwibabariza umutima, kuko we aba yakoze ikintu yagambiriye ndetse ntanubwo yakwisubiraho burya. Niyo mpamvu rero nibaguhakanira uzahite uhaguruka ugende ntakundi kubitekerezaho ndetse niba yanabikoze ahubutse we ubwe ashobora kuzagaruka akakwisabira imbabazi nubwo bigoranye, ariko ntuzigere wiyongerera akababaro kuko kumusaba imbabazi ninko kuzisaba umushinjacyaha ntacyo yakumarira.

    3. Mu gihe baguhakaniye ntuzihutere kujya mu kabari ngo wiyahuze inzoga, mu gihe utekereza uku bizatuma ugumana igikomere ku mutima mu gihe kinini kuko za nzoga zibikwibagiza ako kanya uri kuzinywa ariko iyo bukeye nihahandi urongera ukabyibuka. Ahubwo mu gihe uteye ivi bakaguhakanira uzagerageze kujya ahantu hatuje witekerezeho, ushobora kujya mu nshuti zawe za hafi zikakuganiriza, ushobora kujya mu masengesho ugaturisha umutima, ndetse n'ibindi… ibyo bizagufasha komora bya bikomere watewe na wa mukobwa

    4. Mu gihe aguhakaniye ntuzigere umutekerezaho umugambi mubi, nko kumwica cyangwa wowe kwiyahura. Wowe uziyumvishe ko nta gikuba cyacitse ndetse wishyiremo ko atariwe ubuzima bugarukiraho. Uzahite wishyiramo ko nyine atari uwawe ndetse ko igihe nikigera uwawe azagusanga utagombye gutera ivi.

    Izi nama enye nuzikurikiza bizagufasha mubihe nk'ibi bidasanzwe byo guterwa indobo.

    Source : https://yegob.rw/wabyifatamo-ute-ushatse-guterera-umukobwa-ivi-akagutera-utwatsi/

  • FERWAFA yemereye amakipe gukora imyitozo abakinnyi bataha mu rugo #rwanda #RwOT

    Ishyirahamwe ry'Umupira w'Amaguru mu Rwanda 'FERWAFA' ryavuguruye amabwiriza ajyanye no kwirinda COVID-19, kuri ubu ryemerera amakipe gukora imyitozo n'amarushanwa abakinnyi bataha mu ngo zabo, ariko bakazakomeza gupimwa mbere ya buri mukino.

    Amabwiriza avuguruye yo kwirinda iki cyorezo, yemejwe na FERWAFA mbere y'itangira ry'umwaka w'imikino wa 2021/22, yemerera buri kipe gukora imyitozo cyangwa kwitabira amarushanwa abakinnyi bataha mu ngo zabo.

    Ingingo yayo ya 2.3 igira iti 'Gushyira ikipe mu mwiherero ikaba hamwe ntabwo ari itegeko. Icyakora, ikipe yifuza gushyira abakinnyi na 'staff' hamwe mu mwiherero izajya ibanza imenyeshe FERWAFA aho iteganya gukorera uwo mwiherero habanze hemezwe n'Akanama kabishinzwe.'

    Muri iyi ngingo havuga ko abipimishije bakabona ibisubizo biboneka mu gihe gito (bya rapid test) bigaragaza ko ari bazima ni bo bazahita bajya mu mwiherero ariko buri wese abanze kwishyira mu kato kugeza igihe ibisubizo bya PCR bizabonekera.

    Havuga kandi ko ibipimo bya Rapid Test na PCR byose bizajya bifatirwa igihe kimwe kandi byishyurwe n'ikipe.

    Muri aya mabwiriza avuguruye ya FERWAFA, amakipe afite inshingano zo gupimisha abakinnyi n'abandi bakozi bayo mu buryo bwa 'rapid test' mu gihe cy'iminsi itatu mbere yo gutangira imyitozo.

    Source : https://umuryango.rw/imyidagaduro/imikino/article/ferwafa-yemereye-amakipe-gukora-imyitozo-abakinnyi-bataha-mu-rugo

  • Kanyarira: Uko abahaturiye bateye ibuye rimwe rikica inyoni ebyiri! #rwanda #RwOT

    Umusozi wa kanyarira ni umusozi uherereye mu karere ka Ruhango, umurenge wa Byimana, akagari ka Mpanda. Ukunze kuvugwa cyane ko habera imirimo n’ibitangaza by’Imana ndetse bakavuga ko abafite ibibazo byananiranye byose ariho bijyanwa gusengerwa bikarangira, ndetse abava impande zose, abakomeye n’aboroheje bajya gusengera yo. Si ibyo gusa ngo kuko abaturiye aho kuba hari abaza kuri uwo musozi byabateje imbere abandi bibavana mu bukene, abubakiwe amazu, abacuruzi ngo barunguka!

    Ibi bivugwa byatumye ikinyamakuru Urugero.rw dukesha iyi nkuru kigira amatsiko yo kumenya niba koko ibyo abantu bavuga kuri uwo musozi ari byo, gisura abaturage baturiye uyu musozi wa Kanyarira.

    Abaturage batuye kumpande z’uyu musozi bahamya ko ibivugwa kuri uyu musozi ari byo, kubera ko bo batabyumva ahubwo babyiboneye.

    Bamwe mu baganiriye n’iki kinyamakuru bavuga ko uyu musozi uberaho ibitangaza, ko nabo bajya gusengera yo Imana igasubiza ibyifuzo byabo kandi ko nk’abantu bahatuye, uyu musozi ubafatiye runini kubera ko byabazaniye iterambere.

    Bamwe muri bo, bavuga ko bahaboneye imirimo y’Imana harimo kuba barakize indwara zikomeye bari bafite, kuba hari abari barabuze ubwishyu bakabubona,…..,

    Bavuga ko kandi abantu baza kuhasengera bagirira akamaro abahatuye kuko hari abo bubakiye amazu yo kubamo, abo bahaye imyambaro, abo bahaye amafaranga,n’ ibindi bitandukanye.

    Nitegeka Losette ni umwe mubaturage batuye muri uyu mudugudu wa Kanyarira avuga ko nawe yahaboneye ibitangaza.

    Ati” Nanjye njya njyayo gusengerayo hari icyifuzo najyanyeyo umwana wanjye ashaka perime ariko narasubijwe yarayibonye, hari abaza bafite ibyifuzo bitandukanye bakabona ubwishyu bwo kwishyura, n’abarundi barahaje. Kanyarira ni bitangaza birakoreka, abize n’abakomeye baraza. Nuko muri iyi Covid-19 batakiza kuhasengera kubera iki cyorezo, ariko ahubwo nk’igihe iki cyorezo cyaba cyarangiye leta yahashyira abashinzwe umutekano benshi, umusozi ugakomeza ugasengerwaho.”

    Nitegeka akomeza avuga ko uretse no kuba uyu musozi usubirizwaho ibyifuzo, abaza kuhasengera nabo bafite umumaro munini ku baturage bahatuye, ndetse avuga ko abantu basenga bagomba kujya bubaha leta igihe gusengera ahantu bitemewe ntibabikore.

    Ati” kubantu tuhatuye, hari abaza bakadufasha, nanjye nagiye yo mpura n’abaje gusenga bampa amafaranga kubera babonaga meze nabi, hari n’abandi bagiye bafasha. Inama naha abantu baza gusengera hano nukujya babanza kubaza niba kuhasengera byemewe byaba bitemewe ntibaze kubera icyambere bagomba kubaha leta cyane cyane muri iki gihe icyorezo gikomeye.”

    Sebera Theoneste nawe ni umugabo utuye muri uyu mudugudu wa kanyarira, avuga ko yavukiye muri uyu mudugudu wa kanyarira ndetse watumye abatuye muri ako gace babona iterambere.

    Ati” uyu musozi watumye abacuruzi b’inaha batera imbere kubera abaza kuhasengera babagurira, aha mbere ntihagendwaga ariko hamaze kuba nyabagendwa. Iyo abantu baje mu modoka, baha abana bacu ikiraka cyo kuzirinda bakabaha amafaranga, ndetse nanjye nagiye gusengera yo ikibazo nari mfite kirakemuka! Kandi twabigiriyemo n’amahirwe iyo abamotari bazanye abaje gusenga natwe tubona ari iterambere natwe hari igihe uba ukeneye kujya i Muhanga iyo moto igahita ikujyana kuri make.” Akomeza avuga ko abaza kuhasengera babagirira akamaro, baza bakabafasha.

    Ati “Hari umugabo waha hirya baje gusenga babonye uko ababaye baramusura bamuha amafaranga, abaturage b’inaha uwashaka kubafasha yabaha nk’ubufasha bwo kubasukurira amazu, kubera inzu zaho zimeze nabi.”

    Niragire Alexia nawe avuga ko ari umusozi ukomeye w’ Imana ndetse ko nawe yahakiriye uburwayi bwari bwarananiranye, ndetse ko abaza kuhasengera nabo bajya bafasha abahatuye.

    Ati ” Nagiye yo mfite ikibazo cy’uburwayi abaganga bari barananiwe, ariko ubwo burwayi bwarakize! Nigeze no kurwara impyiko njya gusengera yo nabwo zirakira, ubu igihe cyose ngize ikibazo njya yo ibibazo bigasubizwa, umusozi wa Kanyarira ni umusozi Imana yiteganyirije. Kubantu bahatuye bidufitiye akamaro kuko abantu baza kuhasengera baradufasha, dore aha ruguru hari umukecuru bubakiye inzu yo kubamo bari babayeho nabi yari afite inzu igiye kumugwaho.”

    Byukusenge Aliane ni umucuruzi hafi y’umusozi wa Kanyarira, avuga ko uyu musozi ubafatiye runini.

    Ati” Iyo abantu bagiye gusengera i Kanyarira, baraduhahira, kuruhande rw’abacuruzi baduteza imbere muri byinshi.”

    Aba bantu twaganiriye nabo bose ni abaturiye uyu musozi wa Kanyarira bahuriza ku kuba uyu musozi ari umusozi ukomeye cyane mu buryo bwo kuhasengera ndetse ko ubafasha mu iterambere ryaho binyuze mu bajya kuhasengera.

    Aba bantu bose bakomeza bavuga ko n’ubwo bababajwe no kuba covid-19 yaratumye gusengera kuri uyu musozi bidashoboka, ariko bibutsa abantu ko mu igihe gusengera ku misozi biba bitemewe nta mpamvu yo kurenga ku mategeko kuko icyambere ari ukubaha ubuyobozi bwa leta, ahubwo ko bajya baza mu gihe leta ibibemerera gusa.

    Source: Urugero. rw

    [email protected]

    Source : https://agakiza.org/Kanyarira-Uko-abahaturiye-bateye-ibuye-rimwe-rikica-inyoni-ebyiri.html

  • Israel Mbonyi na Serge Iyamuremye baciye amar… – #rwanda #RwOT

    Muri aya mashusho hagaragaramo Mbonyi na Serge bonyine bicaye muri studio. Mbonyi agaragara ari kuri mudasobwa itunganya indirimbo maze agakina amajwi ari muri iyo mudasobwa – bishoboke ko ari indirimbo bakoranye – ariko hakumvikana gusa umudiho wayo (Beat). Ahita yegama ku ntebe yicayeho agakora ikimenyetso n’intoki agaragaza ko ayo majwi ari kumva ameze neza cyane. Serge nawe aba arimo gufata amashusho mu buryo bwa Selfie y’ibyo Mbonyi arimo gukora. Amashusho y’aba bombi yasamiwe hejuru n’abakunzi b’umuziki wa Gospel bayishimiye cyane bayasangiza abandi ku mbuga nkoranyambaga cyane cyane amatsinda ya WhatsApp.

    KANDA HANO UREBE AMASHUSHO YA MBONYI NA SERGE BACA AMARENGA Y’INDIRIMBO BARI GUKORANA

    Ubwo Serge Iyamuremye yashyiraga aya mashusho kuri Story ye ya Instagram nta kintu yigeze yandikaho usibye ko yamenyesheje (yakoze Tag) Mbonyi ndetse na we ubwe. Israel Mbonyi nawe akoresheje kuri Story ye ya Instagram, nta magambo yigeze yandikaho, gusa yayiherekesheje udushushanyo dutatu; gitari, ubwonko ndetse n’umutima. Ni nk’aho yashatse kuvuga ko ashyize umutima we n’ubwonko bwe ndetse na gitari ye kuri uyu mushinga ashobora kuba afitanye na Serge n’ubwo nta n’umwe wigeze agira icyo atangaza mu buryo bweruye ngo ahamye ko baba bafitanye indirimbo.

    Israel Mbonyi akunzwe cyane muri iyi minsi mu ndirimbo ‘Baho’

    Ntibyadukundiye kugira amakuru dukura kuri aba bombi y’umushinga baba bafitanye, gusa InyaRwanda.com ifite amakuru avuga ko bari gukorana indirimbo ndetse ikaba izajya hanze mu minsi ya vuba. Amakuru yizewe twahawe avuga ko ari indirimbo bari gukorana, ikazajya hanze mu kwa Cyenda cyangwa nyuma yaho gato. Serge na Mbonyi baramutse bakoranye indirimbo, yaba ari amateka avuguruye kuko bitamenyerewe muri Gospel muri iyi minsi kubona abahanzi bakunzwe cyane muri Gospel bakorana indirimbo. Ikindi ni uko Serge yaba abaye umuhanzi wa kabiri ukoranye indirimbo na Mbonyi nyuma ya Aime Uwimana bakoranye ‘Indahiro’ mu 2018.

    Aba bahanzi bombi Serge na Mbonyi muri iyi minsi bari ku gasongero k’abahanzi bakunzwe cyane mu muziki wa Gospel bityo baramutse bakoranye indirimbo yaba ari iy’amateka. Ni indirimbo izakundwa cyane bitewe n’uburyo aba bahanzi bombi bahagaze neza muri iyi minsi aho bari muri bacye baticishije irungu abakunzi babo muri ibi bihe bya Covid-19. Uwaduhaye amakuru yashimangiye ko gukorana indirimbo kw’aba bahanzi ari ibintu bishoboka rwose na cyane ko basanzwe ari n’inshuti. Mu ntangiriro za 2020 banahuriye mu gitaramo cyasize amateka akomeye i Huye muri Kaminuza y’u Rwanda, akaba ari igitaramo cyari cyateguwe na Israel Mbonyi agitumiramo Serge Iyamuremye ndetse na Prosper Nkomezi.

    Serge Iyamuremye arambye mu muziki wa Gospel dore ko awumazemo imyaka irenga 10, akaba yaramenyekanye cyane mu ndirimbo ‘Arampangige’, ‘Biramvura’, n’izindi yakoze mu bihe bitadukanye zigehembura imitima ya benshi. Afite umwihariko wo gukora indirimbo zituje n’izihuta zigasamirwa hejuru n’abiganjemo urubyiruko. Muri iyi minsi akunzwe cyane mu ndirimbo ivuguruye ‘Yesu agarutse’ yaririmbanye na James & Daniella bamamaye muri ‘Mpa amavuta’. Israel Mbonyi afatwa nka nimero ya mbere mu bahanzi bakunzwe mu muziki wa Gospel hano mu Rwanda. Kuri ubu akunzwe mu ndirimbo zitandukanye zirimo izo aherutse gushyira hanze nka: ‘Baho’, ‘Urwandiko’ n’izindi.

    Serge Iyamuremye akunzwe cyane muri iyi minsi mu ndirimbo ‘Yesu agarutse’

    REBA HANO INDIRIMBO ‘YESU AGARUTSE’ YA SERGE FT JAMES & DANIELLA

    REBA HANO INDIRIMBO ‘BAHO’ YA ISRAEL MBONYI

    Source : https://inyarwanda.com/inkuru/108866/israel-mbonyi-na-serge-iyamuremye-baciye-amarenga-ko-bari-gukorana-indirimbo-yaba-ari-amat-108866.html