Webrwanda Backend

Author: webrwanda

  • Umujyi wa Kigali ugiye gushyiraho intebe rusange zo kuruhukiraho ahantu 100 – #rwanda #RwOT

    Umuyobozi Ushinzwe Igenamigambi ry’Imiturire n’Imitunganyirize y’Umujyi, Muhirwa Solange, yatangaje ko izi ntebe zizashyirwa hafi y’imihanda ndetse ko bitewe n’umwanya uhari ahazaba hari nke hazaba hari ebyiri, zishobora kwacarwaho nibura n’abantu bane.

    Muhirwa yavuze ko ibi bizatuma abakoresha izi ntebe baryoherwa no kureba ibyiza bibakikije, aho mu bintu bya mbere bazaba bakeneye ari ukwicara ndetse no gusabana nkuko The New Times ibitangaza.

    Yakomeje agira ati “Izi ntebe zizakoreshwa n’abantu bose, ni ahantu rusange ntabwo hazaba hagenewe abantu runaka bafite inyubako cyangwa bakorera ubucuruzi hafi y’aho zashyizwe.”

    Mu byagendeweho batoranya aho zizashyirwa harimo imiterere y’imihanda n’urujya n’uruza ruhabera ku buryo bitazangamira abaje kuharuhukira, gusabana, gusoma ibitabo kimwe n’umutekano wo mu muhanda muri rusange.

    Aha hantu kandi hazakoreshwa cyane n’abanyamaguru ndetse n’abatwara amagare, Muhirwa yavuze ko mu gihe bitabangamiye umutekano w’umuhanda hazashyirwa n’aho kuyaparika.

    Umujyi wa Kigali uherutse gutangaza ko uyu mushinga watangiranye n’intebe 75 zashyizwe mu duce 33 twatoranyijwe turimo ‘Imbuga City Walk’ ahahoze ari agace katagerwamo n’imodoka ‘Car Free Zone’ ndetse n’ubusitani buherereye Kicukiro Rwandex.

    Ahandi zizashyirwa ni ku Ryanyuma i Nyamirambo, Kwa mutwe, mu Biryogo, Gatare, mu Miduha, Rugarama, Gisozi, Musezero, Gisozi Carriere, mu busitani bwo ku Kinamba, Kanyinya, Karama 1 na Karama ya 2, kuri Engen mu Kanogo, kwa Rubangura, kuri Rond Point yo mu mujyi rwagati, ku Muhima Yamaha, Kagugu, Nyakabanda kwa Gisimba, Cadillac, KBC, ku isoko rya Kimironko, i Rugende, ku Kibuga cy’Indege n’ahandi.

    Ni intebe zizakoreshwa n’abagenzi bose mu rwego rwo kuryoherwa n’ibyiza bitatse umujyi

    Umujyi wa Kigali watangaje ko ugiye gushyira intebe zo kuruhukiraho ahantu 100 hanyuranye

    source : https://ift.tt/3D5xC6K

  • APR FC ishobora kwipima na Simba SC #rwanda #RwOT

    Nta ghindutse ikipe ya APR FC izakina imikino ibiri ya gicuti na Simba SC mu cyumweru gitaha mu rwego rwo kwitegura imikino Nyafurika ya CAF Champions League aya makipe afite muri uku kwezi.

    Amakuru ISIMBI yamenye ni uko ibiganiro bigeze kure hagati ya Simba SC na APR FC kuba zakina imikino ya gicuti ibiri yose ikabera mu Rwanda.

    Nta gihindutse bivugwa ko umukino umwe uzaba tariki ya 5 Ukwakira undi ukaba tariki ya 8 Ukwakira 2021, ni imikino izakinwa n’abakinnyi batahamagawe mu ikipe y’igihugu yaba iy’u Rwanda n’abakinnyi ba Simba SC batahamagawe ma makipe y’ibihugu byabo.

    Bivuze ko nka APR FC yakina idafite abarimo Jacques Tuyisenge, Omborenga Fitina, Mugunga Yves na Manishimwe Djabel bari mu Mavubi.

    APR FC irimo iritegura Etoile Sportive du Sahel tariki ya 15 Ukwakira i Kigali ni mu gihe umukino wo kwishyura uzaba tariki ya 22 Ukwakira 2021.

    Simba SC yo iritegura Jwaneng Galaxy, umukino wayo na wo uzaba tariki ya 15 Ukwakira uwo kwishyura uzabe tariki ya 22 Ukwakira 2021.

    APR FC ishobora gukina umukino wa gicuti na Simba SC

    Source : http://isimbi.rw/siporo/article/apr-fc-ishobora-kwipima-na-simba-sc

  • Impinduka mu myiteguro y’Amavubi #rwanda #RwOT

    Perezida wa FERWAFA, Nizeyimana Olivier avuga ko igihe ikipe y’igihugu yajyaga ifata yitegura kigomba kugabanuka ahubwo hagashyirwa imbaraga muri shampiyona abakinnyi bakajya baza bameze neza.

    Ikipe y’igihugu y’u Rwanda, iyo yabaga yitegura umukino runaka, ni imwe mu makipe y’ibihugu yajyaga yitegura igihe kinini aho umutoza yamaranaga n’abakinnyi ibyumweru bigera muri 3 bitegura, ugasanga na shampiyona yahagaze kubera amakipe afitemo abakinnyi, byatumaga habaho ibirarane byinshi muri shampiyona.

    Urebye nk’ikipe y’igihugu yakinnye imikino ya Mali na Kenya tariki ya 1 na 5 Nzeri, yahamagawe tariki ya 12 Kanama aho abakinnyi bakina imbere mu gihigu bahise bajya mu mwiherero.

    Nizeyimana Olivier avuga ko iki kintu batangiye kukigaho ndetse ko no kuri iyi nshuro igihe cyagabanijwe ku ikipe y’igihugu irimo yitegura Uganda, ndetse mu minsi iri imbere kizagabanywa cyane kandi ahamya ko nta ngaruka bizagira.

    Ati “urebye ubu igihe ikipe y’igihugu yahamagariwe mu mwiherero ubona ko ari gito ugereranyije n’uko byabaga bimeze, biri mu byatumaga na shampiyona itinda cyane, ariko nidukorana n’abatoza b’ikipe y’igihugu, tugategurana nabo uko ibintu bizajya bigenda, tukagabanya iminsi yo kwitegura, tukanubaka iby’imbere mu gihugu, kuko na shampiyona itameze neza n’ibindi byatuvuna.”

    Kuri iyi nshuro abakinnyi bahamagawe tariki 27 Nzeri, ab’imbere mu gihugu batangira umwiherero tariki ya 29 Nzeri ni mu gihe umukino wa Uganda uzaba tariki ya 7 Ukwakira, bivuze ko byavuye ku byumweru 3 bijya ku minsi 9 yo kwitegura.

    Amavu igihe yajyaga amara yitegura kigomba kugabanuka

    Nizeyimana Olivier avuga ko ari kimwe mu bizatuma shampiyona itazamo ibibazo byinshi

    Source : http://isimbi.rw/siporo/article/impinduka-mu-myiteguro-y-amavubi

  • Guinea: Doumbouya wahiritse ubutegetsi ararahira nka perezida #rwanda #RwOT

    Col Mamady Doumbouya wayoboye agatsiko k'abasirikare bafashe ubutegetsi muri Guinea ararahira nka perezida w'inzibacyuho kuri uyu wa gatanu.

    Imihango irabera ku ngoro ya perezida kandi iritabirwa n'abatumiwe gusa.

    Col Doumbouya niwe wayoboye coup d'etat yahiritse Perezida Alpha Condé mu ntangiriro z'uku kwezi.

    Byitezwe ko mu byumweru biri imbere azahita ashyiraho guverinoma.

    Uyu mugabo w'imyaka 41, arahita aba perezida wa kabiri ukiri muto muri Africa, inyuma ya Col Assimi Goïta wa Mali w'imyaka 38.

    Mu kwa munani 2020 Col Goïta yahiritse ku butegetsi Perezida Ibrahim Boubacar Keïta, mu kwa gatanu 2021 yongera ahirika Perezida Bah Ndaw wari wabushyizweho, maze abujyaho.

    Muri Guinea, Col Doumbouya avuga ko abasirikare be bakoze coup d'état kuko bashakaga guhagarika ruswa yabaye karande, guhonyora uburenganzira bwa muntu, no gucunga nabi igihugu.

    Umwaka ushize, Perezida Condé yari yatorewe manda ya gatatu itaravugwagaho rumwe, habaye kandi imyigaragambyo yo kuyamagana.

    Condé wahoze ku ruhande rutavuga rumwe n'ubutegetsi yatowe bwa mbere mu 2010 mu matora ya mbere ya demokarasi yari abayeho guhererekanya ubutegetsi muri Guinea.

    BBC

    Source : https://umuryango.rw/amakuru/mu-mahanga/politiki/article/guinea-doumbouya-wahiritse-ubutegetsi-ararahira-nka-perezida

  • Gahunda y’abakinnyi 13 b’Amavubi bakina hanze igihe bazagerera mu Rwanda #rwanda #RwOT

    Ikipe y’igihugu yamaze gutangaza uburyo abakinnyi bakina hanze bazahagera bitabiriye ubutumire bw’ikipe y’igihugu yitegura umukino wa Uganda ku wa Kane w’icyumweru gitaha.

    Amavubi arimo aritegura imikino 2 igomba gucakiranamo na Uganda mu gushaka itike y’igikombe cy’Isi cya 2022 kizabera muri Qatar.

    Ni imikino yo mu itsinda E, aho u Rwanda ruri kumwe na Mali, Uganda na Kenya.

    Mashami Vincent yahamagaye abakinnyi 36 azifashisha kuri iyi mikino, harimo 13 bakina hanze y’u Rwanda ni mu gihe abakina mu Rwanda bo bamaze kugera mu mwiherero.

    Uyu munsi nibwo umukinnyi wa mbere ari bugere mu Rwanda, Kalisa Jamir wa Vipers muri Uganda ni we ubimburira abandi.

    Tariki ya 4 Ukwakira abakinnyi benshi nibwo bazaza, abakinnyi 7 bose nibwo bazagera mu Rwanda harimo Emery Mvuyekure wa Tusker FC muri Kenya, Twizere Buhake Clement wa Strommen IF muri Norway, Imanishimwe Emmanuel wa FAR Rabat muri Maroc, Manzi Thierry wa Dila Gori muri Georgia, Bizimana Djihad wa KMSK Deinze mu Bubili, Yannick Mukunzi wa Sandvikens IF na Rafael York wa AFC Eskilstuna zo muri Sweden nabo nibwo bazagera mu Rwanda ariko bazaba bahagurutse tariki ya 3 Ukwakira.

    Ngwabije Bryan Clovis wa SC Lyon mu Bufaransa na Meddie Kagere wa Simba SC muri Tanzania, Nirisarke Salomon wa Urartu FC muri Armenia bazagera mu Rwanda ku Cyumweru tariki ya 3 Ukwakira 2021.

    Rwatubaye Abdul wa FC Shkupi muri Macedonia azahagurukayo tariki ya 3 Ukwakira agere mu Rwanda tariki ya 5 Ukwakira na Mutsinzi Ange Jimmy wa CD Trofense muri Portugal na we azahagera ku wa 5 Ukwakira 2021.

    Gahunda y’abakinnyi bakina hanze yamaze kumenyekana

    Source : http://isimbi.rw/siporo/article/gahunda-y-abakinnyi-13-b-amavubi-bakina-hanze-igihe-bazagerera-mu-rwanda

  • Abikorera barashishikarizwa kwimakaza ihame ry’uburinganire mu itangwa ry’akazi #Rwanda #RwOT via @kigalitoday #rwanda #RwOT

    Abagore barasabwa gutinyuka bakumva ko na bo bashoboye
    Abagore barasabwa gutinyuka bakumva ko na bo bashoboye

    N’ubwo umubare mwinshi w’abakozi ugaragara mu nzego z’abikorera kuko muri izo nzego habarirwa abagera kuri 90%, usanga ihame ry’uburinganire mu itangwa ry’akazi ritarimakazwa ku rwego rushimishije, kuko hari aho bagifite imyumvire y’uko abagore badashoboye.

    Imibare igaragaza ko mu mirimo y’ubucukuzi bw’amabuye y’agaciro (Mining and quarrying) ikorwamo n’abagore 9% gusa, mu bwubatsi (Construction) bageze kuri 17%, mu bijyanye no gutwara abantu n’ubwikorezi (Transport and Storage) ni 3%, na ho mu ikoranabuhanga (ICT) ni 31%.

    Hari kandi mu bigo by’ubucuruzi (Business enterprises ownership) habarirwa 32%, mu gihe mu nzego zifata ibyemezo (Decision making in the private sector) ari 32%.

    Umugenzuzi Mukuru wungirije wa GMO, Caritas Mukandasira, avuga ko icyuho nta handi kiri cyane uretse mu myumvire ya bamwe mu bikorera.

    Ati “Iyo tuvuga uburinganire, ni uburenganzira bugenda bukagera no kuri nyiri kompanyi, kuko burya iyo umuntu akora yumva atekanye, uburenganzira bwe bwubahirijwe 100%, na we ibyo akora abikora neza. Uzi ko hari n’abakoresha bashobora kuvuga bati uyu n’umukobwa, simuha akazi kubera ko ari umukobwa gusa, icyo rero ni cyo tubashishikariza kugira ngo babahe amahirwe na bo, niba ari n’ipiganwa amwemerere apiganwe nka musaza we, kuko na bo barashoboye kandi baba barize bimwe, baranize hamwe”.

    Inzego z
    Inzego z’abikorera zirashishikarizwa kwimakaza ihame ry’uburinganire mu itangwa ry’akazi

    Umuhuzabikorwa wa Gifurwe Mining Company, Noel Minani, avuga ko kuva cyera abagore batigeze biyumva mu mirimo y’ubucukuzi bw’amabuye y’agaciro, ahanini bakabiterwa n’imiterere y’ako kazi, gusa ngo mu myaka isaga 10 bamaze batangiye kwimakaza ihame ry’uburinganire, hari aho bamaze kugera.

    Ati “Kugeza ubu dufite abagore 145 mu bakozi 945, bangana na 22.9%, gusa dufite intego yo kuzagera ku bagore 300, icyo turimo gukora n’ukubakangurira aho bari kugira ngo baze bifatanye natwe dukorane, ikindi ni uko tugerageza kubafasha tuborohereza muri iyo mirimo batamenyereye. Ikindi ni uko bimaze gutanga umusaruro kuko kuba yatwita, yanakonsa ntabwo ari imbogamizi kuri twebwe, wenda urugero nabaha, mu mwaka wa 2019 muri kompanyi yacu umukozi w’umwaka yabaye umugore, iyo rero ni gihamya y’uko bashoboye, ahubwo igisabwa ni uko batinyuka bakaza bagafatanya na basaza babo”.

    Pelagie Uwanyirigira, umukozi wa Sorwathe ushinzwe imibereho myiza y’abakozi, avuga ko mbere bari bazi ko mu nzego z’ubuyobozi bukuru nta mugore wajyamo.

    Ati “Mu muco wa Sorwathe twari tuzi ko mu nzego z’ubuyobozi bukuru (senior management) nta mugore wageramo, ni ko twari tubizi, ariko uyu munsi mu bantu bagize management 9, harimo abagore 2, murumva ko hatewe intambwe kandi ikomeye”.

    Ati “Ikindi gikomeye muri sorwathe bashishikarije abagore kwitinyuka no gutinyuka imyanya imwe n’imwe twibwiraga ko ari iy’abagabo gusa, nyuma hazamutse abantu 57, ariko 24.6% muri bo ni abagore, ikindi n’uko hari bagenzi bacu baba batwite kandi bakaza mu kazi, murabizi gukora mu mashini, yagera hagati akazengererwa. Uyu munsi barakora byagera saa yine, bakajya gufata igikoma bagafata n’umugati, bagakomeza gukora nta kibazo bafite”.

    Mukandasira avuga ko icyuho nta handi kiri uretse mu myumvire ya bamwe mu bikorera.
    Mukandasira avuga ko icyuho nta handi kiri uretse mu myumvire ya bamwe mu bikorera.

    Iyi gahunda ngo ntabwo igamije ko abagore binjira mu mirimo abagabo basohoke, ahubwo ni uko bikigaragara ko ku ruhande rw’abagore hakirimo icyuho kinini ugereranyije n’abagabo.

    source : https://ift.tt/2ZMPuVv

  • Dore ibintu udakwiye kwibeshya ngo wereke umukunzi wawe – YEGOB #rwanda #RwOT

    Hari ibintu byinshi bituma umubano w'abakundana ukendera bitwe n'uko ubimuganirijeho ugashiduka byamuciye intege kandi wari uzi ko aribwo uri kugaragaza ukuri ku bijyanye n'ubuzima bwawe.

    Nubwo ntawabihakana kuko bigira uruhare runini mu gutuma umubano w'abakundana urushaho gushinga imizi kuko uba wubakiye ku kuri n'icyizere, urubuga Elcrema rugaragaza ko hari ibyo wavuga bikagusenyera.

    Reka turebe kuribyo bintu bitandukanye udakwiye kwereka umukunzi wawe :

    1.Ibyerekeranye n'uwo mwatandukanye

    Igihe winjiye mu rukundo rushya, ni byiza ko wibagirwa ibintu byose byabaye hagati y'abo mwigeze gukundana. Rekera uwo mwatandukanye mu mwanya we uhe ugaciro uwo ufite uyu munsi.

    Uko waba wizeye umukunzi wawe, urwo agukunda rwose nta na rimwe azigera yishimira kumva amateka yawe n'uwo mwari kumwe mbere ye kuko mu matwi ye bizaba ari nko kumugereranya.

    2.Kumubwira ko winjiye mu mabanga ye

    Twese iteka duhorana amatsiko yo kumenya ibiri muri telefoni, mu cyumba cyangwa ahandi abakunzi bacu babika iby'agaciro. Ibi ahanini tubikora tugamije kumenya niba ntacyo badukinga, cyangwa se igihe twumva hari ibyo dushidikanyaho.

    Igihe ibi ubikoze irinde kugira icyo ubimubwiraho kabone n'ubwo wasangamo ibimenyetso bigaragaza amakosa agukorera, kuko ashobora kubyuririraho akakwereka ko utamwizera bikaba byakurura ubwumvikane buke hagati yanyu.

    3.Abantu wumva ufitiye urukundo

    Iyo ufite umukunzi kandi urukundo rwanyu rufite icyerekezo biba bisobanuye ko nta wundi muntu muba mugomba gukundana, ibi ariko ntibyabuza ko ushobora kubona undi muntu ukumva uramwishimiye cyangwa uramukunze.

    Kirazira kubwira umukunzi wawe abandi bakobwa cyangwa abahungu wumva ufitiye urukundo keretse niba wumva witeguye gutandukana nawe.

    4.Abantu bagusaba urukundo

    Ni kenshi uzumva wifuje kubwira umukunzi wawe abasore cyangwa abakobwa bakubwira ko bagukunda. Nubwo nta kibi uba ugamije, we ashobora kutabyakira uko wabimubwiye akaba yanakeka ko uteganya ku mwanga cyangwa kumuca inyuma.

    Burya iyo umubwira ko hari abandi bantu bagukunda, ndetse ukanarengera ukamubwira abo aribo bituma atangira kwigereranya nabo ndetse akitakariza icyizere.

    Source : https://yegob.rw/dore-ibintu-udakwiye-kwibeshya-ngo-wereke-umukunzi-wawe-2/

  • Clarisse Karasira yamuritse indirimbo yahimbye akomoye ku gutandukana kwa hato na hato kw'abakundana #rwanda #RwOT

    Umuhanzikazi Clarisse Karasira wamenyekanye mu ndirimbo z'umuco nyarwanda ndetse nizubaka sosiyete yashyize hanze indirimbo yise Nimukongeze, ikaba irimo ubutumwa bw'ibanze kubakundana bakunze gutandukana batarambanye.

    Mu kiganiro yagiranye na RUSHYASHYA NEWS, Karasira yatangiye asobanura inkomoko y'iyi ndirimbo, yagize ati 'Iyi ndirimbo nshya Nimukongeze, nayihimbye nshaka guha ubutumwa abantu bakundana ariko bageze aho babona ibyabo byananiranye,bigana ku iherezo. Yaba abatarashakana (aba Fiancee, cyangwa abashakanye)'.

    Yakomeje agira ari 'Igitekerezo cy'iyi ndirimbo nakigize mu mwaka ushize ubwo nari ndi kureba raporo y'ikigo cy'igihugu cy'ibarurishamibare kuri gatanya, cyagaragajeko mu mwaka umwe gusa gatanya inkiko zatanze zikubye inshuro 8!'.

    'Nanakomeje gutekereza ku buryo abantu bakundana batarashakana kimwe n'abashakanye,nabo bagirana ibibazo byinshi ugasanga hari ubwo bashwanye kandi wenda hari uburyo byari gushoboka ko urukundo rushibuka. Ndeba uburyo bitangira bishyushye bimeze neza nyuma bikagenda bigabanyuka kuri benshi,indirimbo Nimukongeze inzamo.'

    Muri iki kiganiro, uyu muhanzikazi yavuze ko iyi ndirimbo yumva yafasha abantu kujya bwibuka ko uko byamera kose haba hakiri amahirwe yo kubyutsa no gukongeza igicaniro cy'umubano.

    Reba hano amashusho y'indirimbo 'NIMUKONGEZE':

    The post Clarisse Karasira yamuritse indirimbo yahimbye akomoye ku gutandukana kwa hato na hato kw'abakundana appeared first on RUSHYASHYA.

    Source : https://rushyashya.net/clarisse-karasira-yamuritse-indirimbo-yahimbye-akomoye-ku-gutandukana-kwa-hato-na-hato-kwabakundana/?utm_source=rss&utm_medium=rss&utm_campaign=clarisse-karasira-yamuritse-indirimbo-yahimbye-akomoye-ku-gutandukana-kwa-hato-na-hato-kwabakundana

  • V/Mayor wa Burera uregwa ibyaha bimunga ubukungu bw’Igihugu yasabiwe gufungwa imyaka 7 #rwanda #RwOT

    Ubushinjacyaha buburana na bariya bayobozi batanu, bwasabiye abaregwa iki gihano nyuma y’uko Urukiko rwumvise ubuhamya bw’Umuyobozi w’Akarere ka Burera ndetse n’Umunyamabanga Nshingwabikorwa wa kariya Karere.

    Ubushinjacyaha bwahawe umwanya ngo busabire ibihano abaregwa, bubasabira gufungwa imyaka irindwi n’ihazabu ya Miliyoni 5 Frw kuri buri muntu ku cyaha cyo gutanga amasoko ya Leta mu buryo bunyuranyije n’amategeko.

    Naho Visi Meya Manirafasha Jean de la Paix we hakiyongeraho ibyaha byo gufata icyemezo cy’itonesha, ubucuti, icyenewabo na ruswa n’icyaha cyo gukoresha umutungo wa Leta icyo utateganyirijwe gukoreshwa asabirwa guhanwa n’ingingo ya 62 y’igitabo cy’amategeko No 68/08/2018 ryo kuwa 30 Kanama 2018 cy’amategeko agena ibyaha n’ibihano mu Rwanda kubera impurirane z’ibyo byaha.

    Visi Meya Manirafasha aregwa hamwe na Habimana Fidèle, Dusengemungu Emmanuel, Mbatezimana Anastase na Kwizera Emmanuel bafite inshingano zitandukanye mu buyobozi bw’Akarere ka Burera.

    Mu iburanisha riheruka, Umuyobozi w’Akarere ka Burera n’Umunyamabanga Nshingwabikorwa b’aka Karere bari baje mu rukiko gutanga ubuhamya ariko babwira Urukiko ko amakuru rwari rubakeneyeho batayafitiye ibimenyetso basaba ko urubanza rwakwimurwa.

    Mu iburanisha ryo kuri uyu wa 30 Nzeri 2021, aba batangabuhamya bagaragaje ko amasoko avugwa yatanzwe mu buryo bunyuranyije n’amategeko yari yarizwe n’Akarere ariko kuyashyira mu bikorwa batazi niba koko abaregwa barabisabwe nako cyangwa ngo babitegekwe kuko icyo gihe bo batari mu nshingano z’ubuyobozi bityo ko kubitangaho ibisobanuro byabagora kuko batabizi.

    Ubushinjacyaha kuri iyi ngingo, bwerekanye inyandiko yo ku wa 18 Ukwakira 2018 yandikiwe abayobozi b’imirenge n’abashinzwe amasoko mu mirenge ibereka ko bohererejwe amafaranga yagombaga kubafasha mu ishyirwa mu bikorwa by’imirimo yari ikenewe ariko ko byose bigomba gukorwa hubahirizwa amategeko asanzwe agenga itangwa ry’amasoko ya Leta.

    Abaregwa bo bakomeje kugaragariza Urukiko ko ibyo baregwa babikoze babisabwe n’Akarere kandi ko ibyo bakoze badakwiye kuba babibazwa kuko Akarere ariko katangaga amafaranga agacishwa kuri konti z’imirenge basaba ko bakurwaho ibyaha bakurikiranyweho bakagirwa abere.

    Source : http://www.ukwezi.rw/mu-rwanda/Amakuru-anyuranye/article/V-Mayor-wa-Burera-uregwa-ibyaha-bimunga-ubukungu-bw-Igihugu-yasabiwe-gufungwa-imyaka-7

  • Huye : ibiyobyabwenge birimo Litiro 247.700 za Kanyanga na Mugo byatwikiwe imbere y’abaturage #rwanda #RwOT

    Iki gikorwa cyabaye kuri uyu wa 29 Nzeri 2021, cyabreye mu Mudugudu wa Bukinanyana mu Kagari ka Butare Umurenge wa Ngoma.

    Ni ibiyobyabwenge byafashwe mu bihe bitandukanye bifatirwa mu Mirenge ya Tumba, Ngoma na Gishamvu, hari hashize umwaka bifashwe.

    Ubwo hatwikwaga ibi biyobyabwenge, umuyobozi w’Akarere ka Huye Sebutege Ange yagarutse ku ngaruka z’ibiyobyabwenge haba ku buzima ndetse no ku bukungu.

    Yagize ati “Ababicuruza batakaza amafaranga menshi cyane bakagombye gushora mu bundi bucuruzi bwemewe n’amategeko bikabateza imbere bakanateza imbere imiryango yabo n’Igihugu. Ariko ubu barimo gufatwa bakajya gufungwa.”

    Yakomeje avuga ko gucuruza ibiyobyabwenge bidateza igihombo ubicuruza ahubwo binagira ingaruka ku muryango Nyarwanda muri rusange kuko bigira ingaruka zikomeye mu kwangiza urubyiruko yo maboko y’Igihugu. Yasabye abaturage kugaragaza uruhare rwabo mu kubirwanya ,bagatanga amakuru hakiri kare ku nzego z’umutekano.

    Umuyobozi wa Polisi mu Karere ka Huye, Senior Superintendent of Police (SSP) Jean Bosco Kagenza yavuze ko ibikorwa byo kurwanya ibiyobyabwenge byabaye ku bufatanye n’abaturage aboneraho umwanya wo kubashimira.

    Ati “Ibyinshi muri ibi biyobyabwenge byafatiwe mu Murenge wa Tumba,Ngoma na Gishamvu ndetse na bamwe mu babicuruzaga barafashwe.Byose ni ku bufatanye bwanyu binyuze mu gutanga amakuru no kugaragaza abacyekwaho kubicuruza.’

    SSP Kagenza yasabye abaturage gukomeza gutanga amakuru yo kurwanya ibiyobyabwenge byo ntandaro y’umutekano mucye.

    Umushinjacyaha, Mukamirwa Oscar yavuze ko ibihano bikarishye bihari ku bantu bafatiwe mu bikorwa by’ibiyibyabwenge.

    Ati”Ibihano ku byaha by’ibiyobyabwenge byarazamuwe ndetse kugera ku gihano cya burundu. Niyo mpamvu buri muntu uri hano agomba kwirinda ndetse akarinda n’abandi kwishora mu biyobyabwenge.”

    AMATEGEKO AVUGA IKI ?

    Iteka rya minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cy’urumogi na Heroyine mu biyobyabwenge bihambaye.

    Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

    Ingingo ya 5 y’Iteka rya Minisitiri Nº001/MoH/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira inzoga zikozwe mu buryo budakurikije ibisabwa n’amabwiriza y’ubuziranenge n’andi mategeko mu biyobyabwenge byoroheje.

    Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu Gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda atari munsi ya miliyoni eshanu (5.000.000 FRW) ariko atageze kuri miliyoni icumi (10.000.000 FRW) ku byerekeye ibiyobyabwenge byoroheje.

    Source : http://www.ukwezi.rw/mu-rwanda/Amakuru-anyuranye/article/Huye-ibiyobyabwenge-birimo-Litiro-247-700-za-Kanyanga-na-Mugo-byatwikiwe-imbere-y-abaturage