Webrwanda Backend

Author: webrwanda

  • Abarenga 240 bavuye mu mashyamba ya Congo basoje amasomo y’imyuga bahabwa n’ibikoresho (Amafoto) – #rwanda #RwOT

    Bose hamwe uko ari 246 barimo abagore n’abakobwa 102 bize imyuga itandukanye irimo gusudira, kubaka, kudoda, gutunganya imisatsi, guteka n’iyindi, bigira mu mashuri makuru y’ubumenyingiro aboneka mu Rwanda.

    Perezida wa Komisiyo y’Igihugu yo gusezerera no gusubiza mu buzima busanzwe abari abasirikare, Nyirahabineza Valerie, yavuze ko kwigisha abatahutse imyuga n’ubumenyingiro bigamije kubafasha kwibeshaho no kuzagira ahazaza heza.

    Ati “Ni ukugira ngo nibasubira mu miryango bajye kwihangira imirimo ndetse bajye no ku isoko ry’umurimo bashake akazi, kugira ngo babashe kwiteza imbere bo n’imiryango yabo ndetse n’igihugu muri rusange.”

    Mu bigishijwe harimo abahunze u Rwanda mu 1994 ndetse n’abana babo bavukiye mu mashyamba ya Congo.

    Nyirahabineza yavuze ko abo 246 biyongera ku bandi barenga ibihumbi 18 bavuye mu mashyamba ya Congo bigishijwe imyuga mu myaka itandukanye.

    Niyogisubizo Léandre w’imyaka 21 y’amavuko yabwiye IGIHE ko yavukiye mu mashyamba ya Congo babaho mu buzima bubi ntiyabasha no kwiga, ariko yishimira ko bageze mu Rwanda bafashwa kubaho no kwiga.

    Ati “Nize gusudira kandi ni umwuga nkunda, iyo ndebye ejo hanjye hazaza mbona ari heza kuko ndi mu gihugu gifite umutekano, bitandukanye n’uko twabagaho muri Congo twirirwa duhunga amasasu.”

    Ingabire Ernestine w’imyaka 18 y’amavuko na we yigishijwe umwuga wo kudoda.

    Ati “Umwuga nize uzamfasha kwibeshaho ntasabirije. Navukiye mu mashyamba tubaho nabi ariko ku bw’amahirwe twatashye mu Rwanda none tubayeho neza.”

    Umunyamabanga wa Leta muri Minisiteri y’Ubutegetsi bw’Igihugu ushinzwe Imibereho myiza y’Abaturage, Nyirarukundo Ignatienne, yasabye abasoje kwiga imyuga kujya gukoresha ubumenyi n’ibikoresho bahawe bakiteza imbere.

    Ati “Icyo nabasaba ni uko mwishimira kuba Abanyarwanda mugakora cyane kubera ko hari umwanya watakaye. Ubumenyi muhawe mubukoreshe mu kwiteza imbere no guteza imbere imiryango yanyu.”

    Yabasabye gushishikariza abavandimwe babo na bagenzi babo bakiri mu mashyamba gutahuka mu Rwanda kugira ngo baze gufatanya n’abandi kubaka igihugu no kugiteza imbere.

    Yijeje ko inzego z’ibanze zizakomeza kubakurikiranira hafi kugira ngo ubumenyi bahawe buzabagirire akamaro babeho neza nk’abandi Banyarwanda.

    Umuyobozi w’Amashami ya Loni mu Rwanda, Fodé Ndiaye, yavuze ko bazakomeza gufatanya n’u Rwanda mu bikorwa byiza rukora byo guteza imbere abaturage.

    Abarenga 240 bahoze mu mashyamba ya Congo basoje amasomo y’imyuga bahabwa n’ibikoresho

    Bahawe ibikoresho bizabafasha gushyira mu bikorwa imyuga bize

    Bose hamwe uko ari 246 barimo abagore n’abakobwa 102 bize imyuga itandukanye irimo gusudira, kubaka, kudoda, gutanganya imisatsi, guteka n’iyindi

    Guverineri w’Intara y’Amajyepfo, Kayitesi Alice, aha ibikoresho umwe mu basoje kwiga imyuga

    Mu bigishijwe harimo abahunze u Rwanda mu 1994 ndetse n’abana babo bavukiye mu mashyamba ya Congo

    Perezida wa Komisiyo y’Igihugu yo gusezerera no gusubiza mu buzima busanzwe abari abasirikare, Nyirahabineza Valerie, yavuze ko kwigisha abatahutse imyuga n’ubumenyingiro bigamije kubafasha kwibeshaho

    Perezida wa Komisiyo y’Igihugu yo gusezerera no gusubiza mu buzima busanzwe abari abasirikare, Valerie Nyirahabineza, ashyikiriza ibikoresho umwe mu basoje kwiga

    Umuyobozi w’Akarere ka Huye, Sebutege Ange, ashyikiriza ibikoresho umwe mu basoje kwiga imyuga

    Umuyobozi w’Amashami ya Loni mu Rwanda, Fodé Ndiaye, ashyikiriza ibikoresho umwe mu basoje amasomo y’imyuga

    Umuyobozi w’Amashami ya Loni mu Rwanda, Fodé Ndiaye, yavuze ko bazakomeza gufatanya n’u Rwanda mu bikorwa byiza rukora byo guteza imbere abaturage

    Umuyobozi wa IPRC Huye, Maj Dr Barnabe Twabagira, aha umwe mu basoje amasomo ibikoresho azifashisha

    [email protected]

    source : https://ift.tt/3B4Nju2

  • Minisitiri Mukeshimana yagaragaje uburyo guhinga ibihingwa bike bitumbagiza igiciro cy’ibiribwa – #rwanda #RwOT

    Yabigarutseho kuri uyu wa Gatanu tariki ya 1 Ukwakira 2021 ubwo yatangizaga igihembwe cy’ihinga mu Karere ka Gatsibo mu Murenge wa Rugarama mu Gishanga cya Cyampirita gihingwa kuri hegitari 50 z’ubutaka bwahujwe.

    Ni igikorwa kandi cyitabiriwe n’abayobozi banyuranye barimo Umunyamabanga wa Leta muri Minisiteri y’Ubutabera, Amb Nyirahabimana Solina, Guverineri w’Intara y’Iburasirazuba, Gasana Emmanuel ndetse n’abayobozi bo mu nzego z’umutekano zitandukanye.

    Minisitiri Dr Mukeshimana yabwiye abahinzi ko muri iki gihe bakwiriye guhinga byinshi kandi byiza ngo kuko iyo bahinze bike bituma n’ibindi byo kurya bihenda kuko ibyinshi bishingiye ku buhinzi.

    Yagize ati “Icyo twifuza ntabwo ari ukugurisha ibintu biri ku giciro kiri hejuru cyane kuko hari bagenzi banyu bahaha, imyaka myinshi muhinga ijya mu biryo by’amatungo, ni yo mpamvu uzagira utya ukajya kugura amata ugasanga arahenze wajya kugura igi ry’umwana ugasanga rirahenze, wajya kugura inyama ugasanga zirahenze kubera ko ibyo biryo by’amatungo nabyo biba bihenze.”

    Minisitiri Mukeshimana yabwiye abahinzi ko ibyo bahinga bigenda bikajya mu bindi bintu bahaha bikabagarukira mu bundi buryo, abibutsa ko bahinze byinshi igiciro cy’ibindi bintu birimo amata n’amagi cyagabanuka cyane.

    Ati “Duhinze byinshi igiciro kikagabanuka n’igi ry’umwana ryagabanuka n’amata yagabanuka. Ibyo byose ni ngombwa ko tubirebera ku byo duhinga cyangwa se tworora kurusha uko tubirebera y’uko igiciro cyaba kiri hejuru cyane.”

    Dr Mukeshimana yasabye abahinzi kumenya uburyo bajya bafata neza umusaruro wabo ngo bibafasha kubona isoko ryiza.

    Guverineri Gasana Emmanuel we yasabye abaturage kubyaza umusaruro igishanga bahawe na Leta nibura bakongeramo inka 100 zatungwa n’ibisigazwa by’imyaka n’ibishogoshogo. Yavuze ko byabafasha kongera umusaruro biturutse ku ifumbi babona kandi n’imiryango yabo ikabona amata.

    Umuyobozi w’Akarere ka Gatsibo, Gasana Richard, yavuze ko nubwo batarabona imvura nyinshi abahinzi basabwa kwitegura guhinga ngo kuko nubwo imvura itazaboneka batangiye kwitegura kuhira imyaka.

    Muri iki gihembwe cy’ihinga cya 2021/2022 A, Intara y’Iburasirazuba irateganya guhinga ubuso burenga ibihumbi 300 bukazahingwaho ibigori, ibishyimbo, soya n’ibindi bihingwa bitandukanye.

    Minisitiri Mukeshimana yagaragaje uburyo guhinga ibihingwa bike bitumbagiza igiciro cy’ibiribwa

    Iki gikorwa cyitabiriwe n’abayobozi mu nzego zitandukanye barimo n’ab’ingabo

    Minisitiri w’Ubuhinzi n’Ubworozi, Dr Mukeshimana Gérardine, yagaragaje ko iyo abahinzi bahinze ibihingwa bike bitumbagiza ibindi biribwa ku baturarwanda

    Hatangijwe igihembwe cy’ihinga mu Karere ka Gatsibo mu Murenge wa Rugarama mu Gishanga cya Cyampirita gihingwa kuri hegitari 50 z’ubutaka bwahujwe

    source : https://ift.tt/3A0i9CP

  • Nyampinga ukunzwe kuri instagram yasubije abamushinje kwiyambika ubusa – YEGOB #rwanda #RwOT

    Nyampinga Lea, umwe mu bakobwa bakunzwe n'abantu benshi ndetse banakurikirwa cyane kuri instagram, yasubije abantu bamushinje kwiyambika ubusa kuri instagram. Ni nyuma yuko Nyapinga yari amaze igihe ashyize amafoto ye aho yari yagiye mu biruhuko i Mombasa muri Kenya maze akambara Bikini.

    Mu kiganiro Nyampinga Lea yagiranye na ChiTa Magic Tv yavuze ko ahantu yarari atari kwambara ipantalo cyangwa ikabutura, uriya mwambaro wa Bikini yahisemo kuwambara kuko ahantu yarari ariwo ukwiriye kuhambarwa. Nyampinga yongeyeho ko abantu badakwiye gushaka kumwumvisha ibintu uko babyumva kugirango nawe abe ariko abyumva ahubwo avuga ko abantu bakwiye kugumana imyumvire yabo nawe akagumana imyumvire ye.

    Amwe muri ayo mafoto ya Nyampinga Lea yavugishije benshi ni aya akurikira:

    Source : https://yegob.rw/nyampinga-ukunzwe-kuri-instagram-yasubije-abamushinje-kwiyambika-ubusa/

  • Polisi yerekanye abantu 13 bafashwe bakorana n’Umutwe ukorana na IslamicState bateganyaga gutera ibiturika muri Kigali #rwanda #RwOT

    Aba bantu 13 beretswe Itangazamakuru kuri uyu wa Gatanu tariki 01 Ukwakira 2021 bikozwe ku bufatanye bwa Polisi y’u Rwanda n’Urwego rw’Igihugu rw’Ubugenzacyaha RIB.

    Polisi y’u Rwanda itangaza ko aba bantu 13 bafashwe ku matariki atandukanye ubwo biteguraga gukora ibikorwa by’iterabwoba mu bice bitandukanye by’Umujyi wa Kigali.

    Polisi ivuga ko ubwo inzego z’umutekano zafataga kariya gatsiko k’iterabwoba k’abantu 13 bagasanganye ibikoresho bitandukanye bendaga gukoresha muri uyu mugambi mubisha.

    Itangaza ko bamwe bafatiwe mu Mujyi wa Kigali abandi bafatirwa mu Karere ka Rusizi na Nyabihu.

    Polisi y’u Rwanda ivuga ko Iperereza ryakozwe ku bufatanye na RIB riragaragaza ko aka gatsiko gakorana n’umutwe w’iterabwoba wa Allied Democratic Forces (ADF) ukorana n’umutwe wiyise Leta ya Kisilamu ISIS aho bakorana mu icengezamatwara, ubuhezanguni n’uburyo bwo guturitsa ibisasu.

    Uyu mutwe wa ADF ukorera mu Burasirazuba bwa Repubulika iharanira Demokarasi ya Congo (DRC), muri Kivu y’Amajyaruguru.

    Mu bikoresho bitandukanye aka gatsiko kafatanywe harimo ; insinga, imisumari, amatelefone, ibintu biturika na videwo bigishirizwagaho.

    Polisi y’u Rwanda yaboneyeho gushimira 'abantu bagiye bakorana n’inzego z’umutekano kugira ngo haburizwemo ibi bitero. Polisi izakomeza gukorana n’izindi nzego mu gukurikirana, gukumira, kurwanya, no guhashya ibikorwa nk’ibi by’iterabwoba ndetse n’ikindi icyo aricyo cyose cyahungabanya umutekano w’Igihugu.'

    UKWEZI.RW

    Source : http://www.ukwezi.rw/mu-rwanda/2/Polisi-yerekanye-abantu-13-bafashwe-bakorana-n-Umutwe-ukorana-na-IslamicState-bateganyaga-gutera-ibiturika-muri-Kigali

  • Urukundo ntirupimirwa mu mafoto dushyira kuri Instagram- Yverry asubiza abibaza niba yaratandukanye n’umukunzi #rwanda #RwOT

    Yverry n’umukunzi we Vanessa baherutse gukora ibyatunguye benshi ubwo buri umwe yasibaga amafoto ari kumwe n’undi.

    Ibi byabaye mu ijoro ryo ku ya 28 Nzeri 2021 ubwo Yverry yahanaguye amafoto yose ari kumwe n’umukunzi we Vanessa bukeye Vanessa na we akabigenza atyo.

    Benshi mu bakurikirana imyidagaduro n’abazi iby’urukundo rwabo bahise batangira kwibaza niba aba bombi bataba bamaze gutandukana.

    Umuhanzi Yverry yagize icyo avuga kuri kiriya gikorwa cyatumye bamwe batekereza ko we n’umukunzi we batandukanye.

    Yabaye nk’uwibaza ati 'Ese ubundi urukundo rupimirwa ku ngano y’amafoto ari kuri Instagram ? Mwebwe ibyacu mube mubiretse kuko murabizi ko njyewe itangazamakuru twuzura amakuru nyayo nzayabihera nk’uko n’ayandi nyabaha.'

    Yverry uvuga ko ari mu bikorwa byo kwitegura gushyira hanze indirimbo nshya, yatangaje ko ari nabwo azatangaza ibyerekeye urukundo rwe na Vanessa bikomeje kwibazwaho na benshi.

    Uyu muhanzi umenyerewe mu ndirimbo z’urukundo, yakunze kugaragaza ko we na Vanessa bimariranyemo bitewe n’amafoto yabo yagaragaraga bari kumwe bari mu bihe byiza.

    UKWEZI.RW

    Source : http://www.ukwezi.rw/Imyidagaduro/Urukundo-ntirupimirwa-mu-mafoto-dushyira-kuri-Instagram-Yverry-asubiza-abibaza-niba-yaratandukanye-n-umukunzi

  • MINEDUC igiye gutangaza amanota y'abakoze ibizamini bya leta mu mashuri abanza n'icyiciro rusange #rwanda #RwOT

    Minisiteri y'Uburezi (Mineduc), yatangaje ko igiye gushyira ahagaragara amanota y'abanyeshuri bakoze ibizamini bya leta bisoza icyiciro cy'amashuri abanza n'icy'umwaka wa gatatu w'amashuri yisumbuye.

    Mu butumwa yanyujije kuri Twitter yagize iti “Minisiteri y'Uburezi iramenyesha abanyeshuri, ababyeyi n'Abaturarwanda muri rusange ko izatangaza amanota y'abanyeshuri bakoze ibizamini bya Leta bisoza umwaka wa 6 w'amashuri abanza n'uwa 3 w'icyiciro rusange cy'amashuri yisumbuye tariki 4/10/2021 saa yine za mugitondo (10:00am).

    Abanyeshuri bashoje icyiciro cy'amashuri abanza batangiye ibizamini bya leta ku wa mbere tariki ya 12 Nyakanga 2021, bageraga ku 254 678, nkuko byatangajwe na ministeri y'uburezi.

    Muri rusange, abanyeshuri bagombaga gukora ibizamini bya Leta ni 122,320 mu cyiciro rusange,barimo abahungu 67.685 n'abakobwa 54.635.

    Mu bizamini bisoza amashuri yisumbuye bari 52.145 barimo abahungu 22.894 n'abakobwa 26.892.

    50,888 biga mu mashuri yisumbuye n'amashuri nderabarezi, ndetse na 22, 779 bo mu mashuri y'ubumenyingiro.

    Biteganyijwe ko umwaka w'amashuri wa 2021/2022 uzatangira ku wa 11 Ukwakira 2021, ukazarangira tariki ya 15 Nyakanga 2022 nk'uko bigaragara ku ngengabihe yatangajwe na Minisiteri y'Uburezi mu ntangiriro za Nzeri.

    Source : https://umuryango.rw/amakuru/mu-rwanda/uburezi/article/mineduc-igiye-gutangaza-amanota-y-abakoze-ibizamini-bya-leta-mu-mashuri-abanza

  • Kuva mu Ruhango kugera i Kigali! Urugendo rw… – #rwanda #RwOT

    Butera Knowless yavutse tariki 1 Ukwakira 1990, avukira mu Karere ka Ruhango ku babyeyi bakijijwe, ariko nyuma y'imyaka ine, Jenoside yakorewe Abatutsi imwambura ababyeyi, asigara ari impfubyi cyane ko yari yaravutse ari ikinege.

    Yize amashuri abanza ku Kacyiru muri ESCAF, akomeza mu cyiciro cya mbere cy'amashuri yisumbuye muri APARUDE (Ruhango). Abamuzi bavuga ko ku ishuri yari umukobwa ucecetse utavuga menshi, ariko ugerageza gusabana.

    Yatangiye gushabuka cyane ageze muri APACE aho yize icyiciro cya kabiri cy'amashuri yisumbuye, ari naho yatangiriye kuvumbura ko afite impano yo kuririmba.

    APARUDE aho yize icyiciro rusange, ni ishuri ry'Abadivantisiti ndetse no muri APACE, yari mu muryango mugari w'abanyeshuri b'Abadivantisiti b'umunsi wa karindwi, akaba no muri Korali Maranata kimwe n'abandi bahanzi bazwi hano mu Rwanda barimo Tonzi n'abandi.

    Iki gihe cyose cy'amashuri yisumbuye, nta muntu wari uzi izina Knowless Butera, kuko izina rye ryari Jeanne d'Arc Ingabire, umukobwa utari ufite umwihariko na muto mu buhanzi uretse gusa kuba hari ababonaga ari mwiza ku isura.

    Inzira ye y'umuziki yatangiye muri 2009 ubwo yari arangije amashuri yisumbuye, iki gihe akaba ari umwe mu binjiye mu kiragano cy'umuziki ugezweho ubu, kirimo Kamichi, King James, Dream Boys, Oda Paccy n'abandi benshi.

    Urugendo rwe rwa Muzika rwatangijwe na Safi Madiba na Kamichi

    Muri 2016, Knowless Butera yavuze ko ajya gukora indirimbo bwa mbere yagiye muri studio ya Unlimited Records yari I Nyamirambo yakorwagamo na Junior na Lick Lick, ariko icyo gihe ajyayo, Junior ni we wari uhari.

    Ubusanzwe ngo Safi wari waramaze kumenyekana mu itsinda rya Urban Boys, ngo yajyaga abwira Knowless ko abona yashobora kuririmba, ariko akitinya gusa ngo yumvaga umunsi umwe azabikora.

    Iki gihe, ngo Kamichi na Safi basanze arimo aririmba muri Studio hamwe na Junior, bamutera imbaraga bamubwira ko akwiye gukora indirimbo, aribwo yashyiraga hanze 'Nyumva' ijya ku maradio iranacurangwa, amenya ko ashobora kuba umunyamuziki.

    Kamichi wari umuhanzi akaba n'umunyamakuru kuri Voice of Africa, ndetse na Safi wari umaze kugira ubunararibonye bw'umwaka urenga mu muziki, bahetse ibihangano bya Knowless bamugeza mu itangazamakuru, Knowless atangira kumenyekana bitamuvunnye cyane.

    Urukundo rwe na Safi ruri mu byatumye abanyarwanda barushaho kumumenya, kuko aba bombi barandikwaga kenshi bakanavugwa mu itangazamakuru ry'imyidagaduro, bamwe bamwumva bagashaka kumenya indirimbo ze.

    Ibihembo bya SALAX, irembo ryinjira mu bwiza bw'umuziki kuri Knowless

    Ku nshuro ya kabiri y'ibihembo bya Salax Awards muri 2010, Butera Knowless wari umaze umwaka umwe atangiye umuziki, yashyizwe ku rutonde rw'abahanzi bakizamuka bashobora guhabwa igihembo cya 'Upcoming Artist.'

    Mu bo bahanganaga cyane uwo mwaka, harimo Naason wari warakoze indirimbo 'AMATSIKO' yari umwe mu bahabwaga amahirwe yo kwegukana iki gikombe, abategura Salax bemeza ko iki gihembo ari icya Knowless ari na cyo gihembo rukumbi yari abonye kuva yatangira umuziki.

    Iki gihembo cyabaye irembo rikomeye mu kwinjira mu bwiza bw'umuziki, kuko umwaka wakurikiyeho muri 2011 Knowless wari umaze gusohora indirimbo nyinshi yashyize hanze umuzingo we wa mbere (Album) yise 'Komeza', igitaramo cyo kumurika iyo Album kiritabirwa cyane, ndetse umukobwa wari muto atangira kujya ku byapa byamamaza by'ibigo bikomeye.

    Umwaka wakurikiyeho, yagiye gukorera mu nzu ya Kina Music iyobowe na Ishimwe Clement bari baratangiye no gukundana mu buryo bw'ibanga.

    Kina Music yahinduye umuziki n'isura bya Butera Knowless

    Kuva yamenyekana, Knowless yari umuhanzi muto wari warasanze abandi bakobwa mu muziki w'u Rwanda barimo Priscillah wari waramutanze mu muziki, Miss Jojo wari izina riyoboye abandi mu muziki w'abagore ugezweho, yasanzemo kandi abahanzi nka Miss Shanel, Liza Kamikazi, asangamo Oda Paccy, Queen Ally n'abandi.

    Kugira impano no kwinjira muri Studio ntibyari bihagije ngo Knowless abashe kwireshyeshya n'aya mazina, ndetse byamusabaga imbaraga z'umurengera.

    Gukundana na Safi byaramufashije ku ruhande rumwe kuko byamuhuzaga n'isi ya muzika, ariko ku rundi ruhande byatumaga abanyarwanda bamufata nk'umukobwa ukangisha urukundo agakora umuziki.

    Knowless amaze gushohora umuzingo wa Gatanu witwa Inzora

    Benshi mu banyamakuru n'abafana batiyumvagamo Urban Boys ya Safi, bananiwe kwiyumvamo Knowless. Ibi byiyongeraho kuba yarakoreraga mu nzu zitandukanye akora umuziki, akanakorana n'abatunganya imiziki batandukanye ku buryo kumenya umwimerere we byari bigoye.

    Muri iki gihe, umuntu wese yashoboraga guha isura ashaka Knowless, ku buryo hari n'abavugaga ko ari umuhanzikazi unywa inzoga nyinshi, hakaba n'abavugaga ko yanywaga ibiyobyabwenge, gusa nyiri ubwite yakomeje kubihakana.

    Ubwo yari amaze gushyira hanze Album ya mbere muri 2011 yise 'Komeza', yari yaramaze gutandukana na Safi wari umukunzi we, ndetse iki gihe bivugwa ko yari yaratangiye gukundana na Clement Ishimwe ubu wabaye umugabo we.

    Mu ntangiriro za 2012, nibwo byemejwe ko Butera Knowless yinjiye muri Kina Music, Ishimwe Clement ahita amufasha gutunganya Album ye ya 2 yashyize hanze muri 2012, muri uwo mwaka akaba ari nabwo yitabiriye irushanwa rya Primus Guma Guma Super Star.

    Icyo gihe nibwo abanyarwanda batangiye kubona isura yindi ya Butera Knowless, isura yarimo gukora umuziki mwinshi no guhisha ubuzima bwite bw'uyu mwari, wari usigaye akundana na Clement mu ibanga.

    Muri icyo gihe, umuvuduko wari mwinshi cyane kuri Knowless, ndetse muri 2014 yashyize hanze undi muzingo wa gatatu, aba ashyize hanze imizingo itatu mu myaka itatu, naho muri 2015 yatwaye igikombe cya Primus Guma Guma, aba umukobwa uciye aka gahigo mu mateka y'iri rushanwa, umwaka ukurikiyeho wa 2016 ashyira hanze undi muzingo wa kane.

    Ubwo Knowless yigaga mu Ruhango

    Mu ruhando mpuzamahanga, Knowless yateye intambwe iruta iya benshi hano mu Rwanda

    Muri 2015, Butera Knowless yasohoye indirimbo nyinshi ziri mu rurimi rw'igiswahili, bituma ahabwa igihembo cyitwa 'Bingwa Award' gitangirwa muri Kenya.

    Mu mwaka wa 2019 yongeye gutumirwa muri Kenya ahabwa ikindi gihembo cyitwa DIVA, anahabwa ibihembo bibiri bya HIPIPO Award 2018 bitangirwa muri Uganda, mu bihembo yahawe harimo icyahembwe indirimbo ye 'Mbaye wowe'.

    Muri 2015 yashyize hanze indirimbo 'Te Amo' yakoranye na Roberto wo muri Zambia, muri 2016 asohora indirimbo 'Ujumbe' zose zakunzwe muri ibi bihugu byo mu Burasirazuba bwa Afurika, muri 2017 ashyira hanze indirimbo yo mu rurimi rw'igiswahili yise 'Peke Yangu' naho mu ntangiriro za 2018 ashyira hanze Darling yakoranye na Ben Pol ukunzwe muri Tanzania.

    Ku myaka 31 y'amavuko, Butera Knowless akunda kumvikana cyane avuga ko ashimira Imana kubera ibyo amaze kugeraho, kuko avuga ko Imana yamufashije kugera ku bintu byinshi agereranyije n'aho yavuye.

    Mu gihe cy'imyaka irenga 10 Butera Knowless amaze mu muziki nyarwanda, Butera Knowless ari mu bahanzi nyarwanda bafite ibihembo byinshi by'umuziki ndetse ni we mukobwa wa mbere ufite uduhigo n'ibihembo bya muzika mu mateka y'umuziki wa hano imbere mu gihugu.

    Mu kiganiro gito yagiranye n'umunyamakuru wa Kigali Today mu mwaka wa 2019 akomoza kubyo amaze kugeraho, Butera Knowless yagize ati 'Achievements (ibyagezweho) ni nyinshi zitandukanye, kandi zo kwishimirwa, kuko aho navuye n'aho njyeze ubu muri uyu mwaka harashimishije n'ubwo wenda atari ho nshaka kugera. Uyu mwaka by'umwihariko, uzajya kurangira hari bimwe muri byinshi nifuje kugeraho nsohoje kandi nishimira.'

    Ibyo Butera Knowless yavugaga mu mwaka wa 2019 ibyinshi yarabikoze ndetse akomeza kuba umuhanzi uri kugasongero k'umuziki nyarwanda, aba n'umuhanzikazi mwiza wo gufatiraho urugero urebeye ku buryo afatanya umuziki we n'ubuzima busanzwe burimo kurera abana kandi byose akabikora neza.

    Source : https://inyarwanda.com/inkuru/110023/kuva-mu-ruhango-kugera-i-kigali-urugendo-rwumuziki-wa-butera-knowless-wizihiza-isabukuru-y-110023.html

  • Kalimba Julius wanga urunuka ‘Playback’ yashy… – #rwanda #RwOT

    Kalimba Julius ni umuramyi wanga urunuka umuziki wa ‘Playback’ (kuririmbira kuri CD/Flash) akaba umukunzi w’umuziki w’umwimerere ucurangiweho ako kanya ‘Live’. Amakuru avuga ko hari igitaramo uyu muhanzi yigeze gutumirwamo mu myaka yashize, akigezemo asanga abahanzi bose bari kuririmba ‘Playback’, ahita yitahira ataririmbye kubera uburyo umuziki wa ‘Playback’ umurya mu matwi.

    Kalimba, umunyabigwi mu muziki wa Gospel akomeje kugaragara mu isura nshya y’umuziki utuje mu gihe amenyerewe mu ndirimbo zibyinitse. Ubu afite indirimbo nshya yakoranye na Prosper Nkomezi ivuga ku ntsinzi yabonekeye i Gorogota. Amashusho y’iyi ndirimbo yafashwe mu buryo bugezweho bwa ‘Live Recording’. Amajwi yayo yakozwe na Boris Pro naho amashusho atunganywa na DH Entertainment. Iyi ndirimbo ‘Intsinzi’ ije ikurikira ‘Nyiringabo’ imaze iminsi micye iri hanze.

    Kalimba Julius hamwe na Prosper Nkomezi bakoranye indirimbo

    Kalimba Julius ukunzwe mu ndirimbo zinyuranye zirimo ‘Ntabeshya’ yamwubakiye izina, yabwiye InyaRwanda.com iyi ndirimbo ye nshya ‘Intsinzi’ yakoranye na Prosper Nkomezi yibutsa abantu “Intsinzi twaboneye i Gorogota ku bw’amaraso ya Yesu Kristo wasize ubwiza n’icyubahiro yari afite mu Ijuru akaza gucungura abatuye Isi “. Yavuze ko na n’ubu amaraso ya Yesu agitsindishiriza abizera Yesu Kristo muri byinshi biruhije bahura nabyo mu Isi.

    Muri iyi ndirimbo ‘Intsinzi’, Kalimba Julius na Prosper Nkomezi baterura bagira bati “Waratsinze, wanesheje urupfu, intsinzi ni iyawe, i Gorogota watsinze wa mwanzi, intsizi ni iyawe. Ni wowe utegeka iyi si, Ijuru rirakubaha. N’ibyaremwe byose bipfukama imbere yawe”. Ni indirimbo ifite amashusho meza aryoheye ijisho dore ko aba baramyi n’abaririmbyi babo bose baba bambaye imyenda y’umweru, bigasemburwa n’uburyohe bw’amajwi y’aba baramyi n’ubutumwa baririmba.

    Kalimba ari mu bahanzi ba Gospel bari gukora cyane muri iyi minsi

    Prosper Nkomezi nawe ari mu bahanzi ba Gospel bari gukora cyane muri iyi minsi

    REBA HANO INDIRIMBO ‘INTSINZI’ YA KALIMBA JULIUS FT PROSPER NKOMEZI

    Source : https://inyarwanda.com/inkuru/110031/kalimba-julius-wanga-urunuka-playback-yashyize-hanze-indirimbo-intsinzi-yakoranye-na-prosp-110031.html

  • Col Mamady Doumbouya yarahiriye kuba Perezida wa Gineya w'inzibacyuho #rwanda #RwOT

    Muri Guinea, umukuru w'abasirikare bakoze kudeta, Lieutenant-colonel Mamady Doumbouya, yimitswe uyu munsi nk'umukuru w'igihugu w'inzibacyuho. Yarahiriye imbere y'Urukiko rw'Ikirenga rwa Gineya saa sita ku isaha ya Conakry.

    Kwimikwa kwe ni umuhango kuko yari amaze hafi ukwezi mu by'ukuri ari we uyobora igihugu, ku isonga ry'agatsiko kitwa CNRD k'abasirikare bafatanyije guhirika ubutegetsi bwa Perezida Alpha Conde, ku italiki ya 5 y'ukwezi kwa cyenda.

    Kuwa mbere w'iki cyumweru, CNRD yashyizeho itegeko shingiro ry'inzibacyuho, rijya mu kigwi cy'itegeko nshinga, rivuga ko inzibacyuho izayoborwa na Comité National du Rassemblement pour le Développement-CNRD ubwayo, Colonel Doumbouya, ari we mukuru wa CNRD, Perezida wa Repubulika n'umukuru w'igihugu, ari nawe mukuru w'ikirenga w'ingabo z'igihugu.

    Iri tegeko rivuga kandi ko Colonel Doumbouya agomba gushyiraho minisitiri w'intebe w'umusivili, n'inama y'igihugu y'inzibacyuho izaba nk'Inteko Ishinga Amategeko, kandi ko izi nzego zigomba kuzashyiraho Itegeko Nshinga rishya, no kuzakoresha amatora yizewe.

    Igihe cy'inzibacyuho atangiye nticyagenwe. Ntibizwi igihe izamara mbere y'amatora azagarura abasivili ku butegetsi. Abakuru b'ihugu bya CEDEAO, umuryango w'ubukungu w'Afrika y'uburengerazuba na Gineya irimo, bo barotsa igitutu CNRD kugirango ikoreshe amatora ya perezida wa Repubulika n'inteko ishinga amategeko mu mezi atandatu ari imbere. Bavuga ko bashobora gufatira ibihano abasilikare ba CNRD nibaramuka batabikoze.

    CEDEAO ifite impungenge z'imidugararo muri Afurika y'uburengerazuba nyuma ya kudeta ebyiri mu mwaka umwe muri aka karere nyuma y'iyo muri Mali yabaye mu kwezi kwa gatanu gushize.

    VOA Afrique / AFP

    Source : https://umuryango.rw/amakuru/mu-mahanga/politiki/article/mamady-doumbouya-yarahiriye-kuba-perezida-wa-gineya-w-inzibacyuho

  • Phil Peter yakoranye indirimbo na Marina, avu… – #rwanda #RwOT

    Aya mashusho ntari mu ndirimbo aba bahanzi bombi bakoranye yasohotse kuri uyu wa Gatanu tariki 1 Ukwakira 2021, ku mbuga zitandukanye zicururizwaho umuziki za Dj Phil Peter.

    Iyi ndirimbo isohotse mu gihe Phil Peter yari aherutse kuyiteguza abantu, akanabwira Davis D ko natinda gusohora indirimbo ye yise 'Eva' azamutanga, kandi azamuhiga.

    Iyi ndirimbo “Bimpame” ya Phil Peter na Marina, ivuga ku bantu babiri bakundana, aho umwe aba abwira mugenzi we ko hari abamubaza impamvu yamuhisemo, ariko akabima amatwi.

    Uyu mushinga w'iyi ndirimbo wari umaze imyaka ibiri. Phil Peter avuga ko we na Marina batinze kuyikora, ahanini bitewe na gahunda zitandukanye za buri umwe.

    KANDA HANO WUMVE INDIRIMBO ‘BIMPAME’ YA PHIL PETER NA MARINA

    Uyu munyamakuru wa Isibo Tv, yabwiye INYARWANDA ko Marina ari inshuti ye y'igihe kirekire, ku buryo baziranyi na mbere y'uko uyu mukobwa yinjira mu muziki, akiri ku ntebe y'ishuri.

    Yavuze ko Marina ari no mu bigeze kwitabira irushanwa 'Special Vacance' yakoreraga kuri Isango Star, ryashakishaga impano mu rubyiruko rushaka kwinjira mu muziki.

    Ati 'Marina hari ibintu byinshi by'amabanga tuziranyeho. Ni umuntu wanjye, gukorana nawe ni byiza.'

    Akomeza ati '…Ni umuhanzi w'umuhanga ukeneye amaboko mazima. Imana ishimwe ko yavuye muri The Mane akagarukamo. Nkubwije ukuri afite ibintu byinshi byo kwereka Isi, ahubwo birasaba umuntu ubasha kubivumbura akamenya n'ibyo ari byo.”

    Mbere y'uko iyi ndirimbo isohoka, ku mugoroba w’uyu wa kane tariki 30 Nzeri 2021, hasohotse amashusho agaragaza Phil Peter ari mu buriri bumwe na Marina, bameze nk'aho bari gushwana, umwe atemera ibyo undi yamusabaga.

    Aya mashusho yahererekanyijwe n'abantu batandukanye, buri wese yibaza icyo bakoraga. Murungi Sabin yanditse kuri ‘post’ ya Irene Murindahabi agira ati “Agatwiko kari aha. Phil Peter buriya waviriyemo aho sha?”

    Phil Peter yabwiye INYARWANDA, ko nta byinshi yavuga kuri aya mashusho kuko yasohotse mu gihe atari yiteze, kandi ko umuntu wayasohoye batari babivuganye.

    Ati 'Ntabwo ari njyewe wayasohoye. Hariya habayeho akabazo ntashobora kuvugira mu itangazamakuru. Ariko nta kundi.'

    'Kuko iyo nshaka kuyasohora ntabwo yari gusohokera kwa Irene [Umunyamakuru M. Irene bakorana kuri Isibo Tv], yari gusohokera ku muntu tutaziranye, umuntu abantu batacyeka, ariko nyine habayemo akantu nzasobanura mu gihe kiri imbere.'

    Ni amashusho avuga ko atashyizwe muri iyi ndirimbo 'kuko Producer wayakoze yahisemo ay'ingenzi'.

    Phil Peter asohoye iyi ndirimbo mu gihe aherutse gusohora indirimbo 'Amata' yakoranye na Social Mula, ihatanye mu bihembo bya Kiss Summer Awards.

    Ni indirimbo avuga ko ikwiye gutwara igihembo mu cyiciro cy'indirimbo y'impeshyi, ashingiye ku gihe imaze itava ku ntonde z'indirimbo zikunzwe. Ariko ngo 'kuko umuntu wese uba uhatanye aba agomba kukijyana, ndategereje'.

    Iyi ndirimbo mu buryo bw'amajwi, yakozwe na Producer Element inononsorwa na Producer Bob, naho amashusho yakozwe na Oskados Oscar, afatirwa ku Kivu.

    Phil Peter yasohoye amashusho y'indirimbo yise 'Bimpame' yakoranye na Marina

    Phil Peter yavuze ko amashusho amugaragaza ari mu gitanda kimwe na Marina yasohotse mu buryo atazi

    KANDA HANO UREBE AMASHUSHO Y'INDIRIMBO 'BIMPAME' YA PHIL PETER NA MARINA

    “>

    Source : https://inyarwanda.com/inkuru/110032/phil-peter-yakoranye-indirimbo-na-marina-avuga-ku-mashusho-yasakaye-abagaragaza-mu-gitanda-110032.html