Author: webrwanda

Bishimiye ubumenyi bungukiye mu mahugurwa

Ni amahugurwa yiswe ‘Gender in Peace Support Operations Train the Trainer Course’, yatangiye ku itariki 20 Nzeri, akaba yasojwe ku ya 01 Ukwakira 2021, aho Abanyarwanda ari umunani muri 20 bayitabiriye.

Umuyobozi wa RPA, Col (Rtd) Jill Rutaremara, wasoje ayo mahugurwa ku mugaragaro, yashimiye Lata y’u Bwongereza yatanze inkunga y’amafaranga yose yakoreshehwe muri ayo mahugurwa, avuga ko n’ubwo arebana n’uburinganire ndetse n’ubwuzuzanye bw’ibitsina byombi, afite n’intego yo gutanga ubumenyi no guhugura abazageza ubumenyi bujyanye n’ihame ry’uburinganire ku bandi.

Col Rutaremara yavuze ko hari icyizere gikomeye ku bumenyi abahuguwe batahanye, ati “Iminsi bamaze aha bagaragaje ko bungutse byinshi, aho mu ntego zayo abantu bagomba kugira ubwo bumenyi ariko bakagira n’ubundi bubagira abarimu, babishyiraga no mu bikorwa berekana uko bazajya bigisha. Aba rero babonye aya mahugurwa turagira ngo muri Afurika bamenyekane nk’abantu bashobora guhugura muri iki gikorwa”.

Abitabiriye amahugurwa babonye amasomo anyuranye ku buringanire

Arongera ati “Ni ukuvuga ngo aho bazajya bakenera Umunyarwanda ashobora kuva aha akagenda agatanga amahugurwa, Umunyakenya akagenda agatanga amahugurwa, ni ukubaka abantu bafite ubushobozi, si ukubyumva gusa ahubwo ubwo bumenyi bakaba bashobora kubugeza ku bandi. Icyo twishimiye ni uko havuyemo abantu bashobora guhugura abandi mu bintu by’ubwuzuzanye (Gender) cyangwa bakaba abajyanama muri byo”.

Col Rutaremara yavuze ko inyungu u Rwanda rukura muri aya mahugurwa, aho yemeza ko atuma ibyo u Rwanda rufite rubasha kubisangiza abandi, hakiyongeraho n’umubare munini w’Abanyarwanda bahabwa umwanya mu kuyitabira ibyo bigafasha igihugu kongera abahanga mu ngeri zinyuranye.

Ati “Impamvu aya mahugurwa bayazanye mu Rwanda, ni uko dufite ingero zifatika, amahugurwa ntabwo ari ukwiga mu ishuri gusa, bifasha n’abandi kugira icyo bigira ku mateka yacu, bakareba uburyo tuyasigasira, bareba n’amasomo twayavanyemo kugira ngo ibibi byayabayemo, cyane cyane ibijyanye na Jenoside yakorewe Abatutsi bitazongera kugaruka. Izindi nyungu, mwabonye ko abayitabiriye abenshi ari Abanyarwanda barimo aba Ofisiye muri RDF, muri RNP n’abasivile”.

Ayo mahugurwa yateguwe na RPA ku bufatanye n’ikigo cya British Peace Support Team, Africa (BPST-A, yashimishije cyane abayitabiriye, aho bemeza ko azabafasha gutanga umusanzu wabo mu kubungabunga amahoro, bubakira ku bwuzuzanye bukwiye kuranga abantu, bakabana neza kandi badahuje ibitsina.

Cpt Alice Ayuma Indimuli wo mu ngabo za Kenya, yagize ati “Nungukiye byinshi muri aya mahugurwa bijyanye n’ubwuzuzanye hagati y’ibitsina byombi, namenye uburyo bwinshi nakoresha nigisha abantu ku bijyanye na Gender, bizamfasha cyane mu kazi kanjye, cyane cyane mu duce dufite ibibazo binyuranye. Ngiye kubwira abantu ko Gender itareba abagore gusa nk’uko abantu bakunze kubyibeshyaho, ireba abantu bose”.

Cpt Alice Ayuma Indimuli wo mu ngabo za Kenya yavuze ko ayo mahugurwa amwunguye byinshi

Rtd Major Martin Mpawenimana wahoze mu ngabo z’u Rwanda, avuga ko mu byo yungutse by’umwihariko ari uko abaye umwarimu wo kwigisha uburinganire bungana ku bagabo, ku bagore no ku bana.

Avuga kandi ko bungutse uburyo buzabafasha mu kwigisha abafite icyo kibazo aho ngo babonye ko abagore ari intumwa nziza yo kwifashisha mu gukemura ibibazo by’amakimbirane.

Ati “Guha uruhare abagore, bifasha cyane gukemura bimwe mu bibazo, kuko hari ibibazo bikemuka vuba kubera ko mu kubikemura hifashishijwe abantu bahuje, akaba ari we ushobora kumwegera akamwumva. Urugero nk’umugore wakorewe ihohoterwa rishingiye ku gitsina, kugira ngo uwo mugore cyangwa umukobwa umwegere, bisaba undi bahuje igitsina kuko babyumva kimwe kandi hari ibyo ashobora kumwereka, hari uburyo umugore ashobora kumukiza kurusha uko umugabo yabikora”.

Mu bandi bagize icyo bavuga kuri ayo mahugurwa, hari Dr Sally Wangamati wo mu gihugu cya Kenya, umwe mubarimu bari muri ayo mahugurwa, ubusanzwe akaba ari n’Umujyanama ku bijyanye n’ubwuzuzanye ndetse n’uburenganzira bwa muntu, aho yashimangiye ko abo bahuguwe bafitiwe icyizere mu kuziba icyuho cyagiye kigaragara mu bijyanye n’imyumvire ku bwuzuzanye.

Ashima cyane uburyo ayo mahugurwa yagenze, ati “Aya mahugurwa yagenze neza, abayitabiriye bitwaye neza kandi bagiye basangira imico inyuranye, bahuza indangagaciro z’ibihugu byabo.

Abagera kuri 11 muri bo bagiye bitabira ubutumwa bunyuranye bwo kugarura amahoro, muri aya mahugurwa asoje, abo bahawe umwanya wo gusangiza abandi ku bumenyi bafite bwagiye bubafasha gusoza neza ubutumwa boherejwemo, cyane cyane ubujyanye n’ubwuzuzanye bw’abadahuje ibitsina, umunsi rero aba bahuguwe boherejwe mu butumwa mu bihugu binyuranye bizaborohera kuko babibonyemo ubumenyi buhagije”.

Bahuguwe mu gihe cy’iminsi 10

Nk’uko aya mahugurwa yatewe inkunga na Leta y’u Bwongereza, Mr Adam Drury wari uhagarariye icyo gihugu, Unashinzwe Politiki n’imiyoborere muri Ambasade y’Abongereza, yishimiye uburyo ayo mahugurwa yagenze, ashimira RPA yayateguye, anashima uburyo u Rwanda rwateye intambwe muri Politiki y’ubwuzuzanye ku mugore n’umugabo.

Avuga ko ayo mahugurwa yatewe inkunga n’u Bwongereza hari icyo azafasha, mu guhugura abaturage mu bihugu binyuranye, ku bijyanye n’ubwuzuzanye.

Ni amahugurwa yitabiriwe n’ibihugu bitandatu byo k’Umugabane wa Afurika, aribyo u Rwanda, Kenya, Zambiya, Nigeria, Ghana na Namibia.

Igikorwa cyo gusura iyi ngoro, uru rubyiruko rwagitekereje kugira ngo rwizihize Umunsi wo Gukunda Igihugu no guha icyubahiro Ingabo zari iza RPA, zafashe iya mbere zikitangira kubohora u Rwanda.

Mu kuziha icyubahiro, uru rubyiruko rwateguye ibikorwa bitandukanye aho rwasuye Ingoro Ndangamateka y’Urugamba rwo kubohora Igihugu iri ku Kimihurura ndetse ruteganya gusura bamwe mu bamugariye ku rugamba batuye mu Murenge wa Kimihurura.

Nyuma yo gusura iyi ngoro rwavuze ko rwigiye byinshi ku bwitange bw’Inkotanyi, ruhiga kurangwa n’ubutwari mu gushyigikira ibyo igihugu cyagezeho.

Umuyobozi w’Urubyiruko rushamikiye ku Muryango wa FPR-Inkotanyi mu Murenge wa Kimihurura, Mupenzi Nuru Israel, yavuze ko muri uru rugendo bize gukotana kandi bizabafasha kubaka igihugu.

Yagize ati “Twigiye byinshi muri uru rugendo, icya mbere twabonye uko urugamba rwatangiye Perezida Paul Kagame aha ingabo icyerekezo. Natwe twahisemo gufata icyerekezo kandi kizima.”

“Ababohoye u Rwanda bari bahuriye ku ntego imwe yo kubohora igihugu no guhagarika Jenoside yakorewe Abatutsi mu 1994 ndetse no kubaka igihugu. Natwe nk’urubyiruko niba dushaka kubaka u Rwanda twifuza ni ukugira intego tukayihuriraho, ubu twize gukotana.”

Ibi abihuje na Mizero Parfine wavuze ko gusura iyi ngoro byamusigiye umuco wo kwigira kuko Inkotanyi zabohoye igihugu nta bufasha zifite.

Yagize ati “Gusura iyi ngoro icyo nigiyemo ni uko nk’urubyiruko tugomba kwigira. Nk’Inkotanyi ntabwo zarinze gutegereza ko zihabwa ubufasha n’amahanga barigize bumva ko babishoboye kandi babigeraho.”

Muri uru rugendo uru rubyiruko rwari rwaherekejwe na bamwe mu bayobozi bo mu murenge wa Kimihurura, bakaba barusabye kwigira ku byo Inkotanyi zakoze mu kugira umusanzu rutanga mu iterambere ry’igihugu.

Ambasaderi Sheikh Habimana Saleh yavuze ko yashimishijwe no kujyana n’uru rubyiruko kandi ko abona rufite imbaraga zizatanga umusaruro ku gihugu.

Yagize ati “Ubusanzwe urubyiruko rwibumbiye mu Muryango wa FPR-Inkotanyi mu Murenge wa Kimihurura ngendana narwo cyane, iya 1 Ukwakira rero byari ngombwa kugira ngo nemere ko Inkotanyi imwe irenga igihumbi zihinguka.”

“Byanshimishije kugendana na bo, mfite icyizere ko twe turimo gutambuka, abaza ari benshi kandi bafite imbaraga nyinshi, bazakora byinshi kurusha ibyo twakoze.’’

Umuyobozi w’Umuryango wa FPR-Inkotanyi mu Murenge wa Kimihurura, Rwamasirabo Emile, yavuze ko ari byiza kuba uru rubyiruko rufite inyota yo kumenya amateka bisobanuye ko ruzagira imbaraga mu kubaka igihugu.

Yagize ati “Ni byiza kuba urubyiruko ubona rufite inyota yo kumenya ibyabaye muri iki gihugu ukabona bose barashaka kumenya, urubyiruko rwose rugize amahirwe yo kureba iyi ngoro byabaha amahirwe, byabaha ingufu zo gufata iya mbere mu kubungabunga ibyagezweho.”

Yakomeje asaba urubyiruko kuba ku isonga mu rugamba rwo kubaka igihugu kugira ngo ruzabashe gusigasira ibyagezweho.

Uru rubyiruko rwatemberejwe ibice bitandukanye by’Ingoro Ndangamateka y’Urugamba rwo kubohora igihugu, rusobanurirwa amateka y’uburyo igihugu cyabohowe.

Amasomo uru rubyiruko rwahawe rwavuze ko azarugirira akamaro mu buzima

Iki gikorwa cyakozwe mu kwizihiza Umunsi wo Gukunda Igihugu no gushima abitangiye kukibohora

Uru rubyiruko rwafashe umwanya rukomera amashyi Inkotanyi mu kuziha icyubahiro cy’ibikorwa byiza zakoze

Uru rubyiruko rwatambagijwe ibice bitandukanye bigize ngoro Ndangamateka y’Urugamba rwo kubohora Igihugu

Uru rubyiruko rwavuze ko rwigiye isomo rikomeye muri uru rugendo

Uru rubyiruko rwazengurukijwe ibice by’indake Inkotanyi zakoreragamo akazi

Zimwe mu ndake Inkotanyi zihishemo, ziracyakomeje kubungwabungwa

Ambasaderi Sheikh Habimana Saleh yavuze ko yashimishijwe no kujyana n’uru rubyiruko gusura Ingoro Ndangamateka y’Urugamba rwo kubohora igihugu kandi ko abona rufite imbaraga zizatanga umusaruro ku gihugu

Mizero Parfine yavuze ko gusura iyi ngoro byamusigiye umuco wo kwigira kuko Inkotanyi zabashije kubohora igihugu nta bufasha bundi zifite kandi zigera ku ntego

Umuyobozi w’Urubyiruko rushamikiye ku Muryango wa FPR-Inkotanyi mu Murenge wa Kimihurura, Mupenzi Nuru Israel, yavuze ko muri uru rugendo bungukiyemo ibizabafasha kubaka igihugu

Amafoto: Igiribuntu Darcy

Babigaragaje ku wa Kane, tariki ya 30 Nzeri 2021, ubwo habaga Inteko rusange ya 20 y’Inama y’Igihugu y’Abagore, ku nsanganyamatsiko igira iti “Uruhare rw’umugore mu kubaka umuryango utekanye kandi uteye imbere”.

Bamwe mu bagore b’abayobozi bavuze ko bitewe n’uko bifitiye icyizere kandi batinyutse, bibafasha kuzuza inshingano zabo kandi bakita no ku muryango.

Mukakarangwa Cartas uyobora Akagari ka Gatoki ati “Tuba dufite inshingano zo mu rugo n’umuryango no kurera abana ariko tugakora n’akazi twahawe. Ntabwo ushobora kuyobora abaturage utayoboye urugo rwawe ngo rube intangarugero.”

Akomeza avuga ko mbere na mbere abanza kugirana umubano mwiza n’umugabo we bakabana mu mahoro kugira ngo bimworohere kuyobora neza abaturage no kuzuza inshingano z’akazi.

Ati “Icyo numva cyadufasha nk’abagore bari mu nzego z’ubuyobozi ni ukoroherezwa umuntu ntakore kure, agakorera hafi aho abasha no kwita ku rugo.”

Abo bagore bavuze ko gahunda Akarere kashyizeho zirimo gutanga gaz mu buryo bwa Nkunganire, inka kuri buri rugo no kwegerezwa amazi meza ziri mu bituma babasha kuzuza inshingano zabo mu kazi kandi bakita no ku ngo zabo.

Mukamurigo Chantal ati “Nk’ubu baduhaye gaz ituma duteka vuba kandi uko abayobozi batwunganira bagashyiraho gahunda ngo buri rugo rubone inka biradufasha tukajya ku kazi dufite ingo ziteye imbere. Ikindi ni uko batwegereje amazi hafi ku buryo tutagorwa no kuyabona.”

Mu byifuzo byabo bagaragaje ko izi gahunda ziborohereza imirimo yo mu rugo zagezwa hose kuko zituma abagore bakora akazi batekanye bakuzuza inshingano neza.

Imiryango irenga 978 yo mu Karere ka Gisagara ni yo imaze guhabwa gaz mu buryo bwa Nkunganire aho Leta ibatangira ikiguzi cya 50% na bo bakitangira asigaye, igikorwa cyatangiye muri Mata 2020.

Umuyobozi w’Akarere ka Gisagara, Rutaburingoga Jérome, yavuze ko bashyizeho iyo gahunda yo kunganira abaturage mu kubona gaz mu rwego rwo kubungabunga ibidukikije hakumirwa imyuka ihumanya ikirere.

Yakomeje avuga ko bihaye umuhigo udasanzwe w’uko buri rugo rugomba kugira inka, kandi mu gihe cy’umwaka umwe imiryango 14.794 imaze kugira inka kandi itari isanzwe izifite.

Yashimye uruhare rw’umugore mu kubaka umuryango utekanye kandi uteye imbere, by’umwihariko imikorere n’imikoranire myiza ya ba Mutima w’urugo bo mu Karere ka Gisagara byatumye baba aba mbere mu ntara no ku rwego rw’igihugu mu myaka ibiri ikurikiranye.

Umuyobozi Nshingwabikorwa w’Impuzamiryango Pro-Femmes/Twese Hamwe, Bugingo Emma Marie, yasabye abagore ko mu byo bakora byose bagomba guteganyamo gahunda y’urugo kugira ngo bagire umuryango mwiza utekanye kandi uteye imbere.

Ati “Buriya nusanga uri kuyobora itsinda ry’abantu ariko ugasanga nta ntego mufite ntacyo mushaka guhindura, burya uzamenye ko ubuyobozi bugiye kukunanira.”

Muri iyo nteko rusange hishimiwe ibyagezweho hatangwa ibihembo n’amashimwe ku mirenge yahize indi mu mihigo ya mutima w’urugo 2020-2021, igihembo cya mbere cyegukanwa n’Umurenge wa Save, hahembwa n’indi mirenge ine ya Mugombwa, Kibilizi, Kansi na Mukindo.

Abagore baboneyeho n’umwanya wo gusinya Imihigo ya Mutima w’Urugo y’umwaka 2021-2022.

Abagore bari mu buyobozi mu Karere ka Gisagara bagaragaje ibibafasha kuzuza inshingano no kwita ku miryango

Abagore basabye ko gahunda zibafasha kuzuza inshingano zagezwa n’ahandi

Abagore basinye imihigo ya mutima w’urugo bazesa muri uyu mwaka

Baboneyeho n’umwanya wo gusinya imihigo y’umwaka utaha

Habayeho n’umwanya wo kungurana ibitekerezo

Iyi Nteko rusange ya 20 y’Inama y’Igihugu y’Abagore yari ifite insanganyamatsiko ishimnangira Uruhare rw’umugore mu kubaka umuryango utekanye kandi uteye imbere

Umurenge wa Mugombwa na wo washimiwe ko wesheje imihigo ya mutima w’urugo

Umuyobozi Nshingwabikorwa w’Impuzamiryango Pro-Femmes/Twese Hamwe, Bugingo Emma Marie, yasabye abagore ko mu byo bakora byose bagomba guteganyamo gahunda y’urugo

Umuyobozi w’Akarere ka Gisagara, Rutaburingoga Jérome, yavuze ko bihaye umuhigo udasanzwe w’uko buri rugo rugomba kugira inka

Hatanzwe ibihembo ku mirenge yahize indi mu mihigo ya Mutima w’urugo mu 2020/2021; igihembo cya mbere cyegukanwe n’Umurenge wa Save

[email protected]