Author: webrwanda

Dr Solange Uwituze aganira n’aborozi b’ingurube

Mu nama Umuyobozi wungirije ushinzwe Ubworozi muri RAB, Dr Solange Uwituze yagiranye n’Ishyirahamwe RPFA (Rwanda Pig Farmers Association) kuri uyu wa 08 Ukwakira 2021, yabamenyesheje ko muri uku kwezi bazabona amatangazo ya Banki Itsura Amajyambere(BRD) abasobanurira uburyo bandika basaba inguzanyo.

Dr Uwituze yavuze ko Leta yageneye aborozi b’ingurube n’inkoko igishoro cy’amafaranga y’u Rwanda angana na miliyari ebyiri, kugira ngo abafashe kwivana mu gihombo batewe n’ibihe bya Covid-19 ndetse n’icyorezo cya muryamo cyibasiye ingurube.

Avuga ko hari aborozi b’ingurube bari bamaze igihe basaba Leta kubaremera, ariko ngo habayeho ikibazo cyo kutamenya gutandukanya abahombejwe na Covid-19 na muryamo, hamwe n’abagize ubwoba bakazigurisha cyangwa bakaziyicira birinda ko zakwipfusha.

Impande zombi (RAB n’aborozi b’ingurube) ntibarashobora kugaragaza igihombo cy’ingurube cyabayeho muri ibi bihe bya Covid-19, ariko imibare iheruka RAB yari isanzwe ifite igaragaza ko mu gihugu hose hari ingurube zirenga miliyoni eshatu.

Dr Solange Uwituze avuga ko nta bundi buryo abahombye bagomba gufashwamo, usibye kubaha inguzanyo bazishyura hongeweho inyungu ‘nto’ ingana na 8% ku mwaka.

Uyu muyobozi wungirije wa RAB yagize ati “N’ubwo dushobora kubihindura bitewe n’abasabye igishoro uko bangana, ariko gahunda ni uko uworora ku giti cye ashobora kuzabona amafaranga miliyoni 15, hanyuma bariya bana cyangwa abadamu borora ari koperative bakazabona miliyoni 20 ku nyungu y’umunani ku ijana(8%), mu bisabwa hazabamo kuba ufite ubushake bwo gukorana na RAB ubworozi bwa kinyamwuga”.

Umuyobozi w’Ishyirahamwe ry’Aborozi b’Ingurube mu Rwanda, Shirimpumu Jean Claude avuga ko barimo guhomba bitewe n’uburwayi bw’ayo matungo magufi, ibiryo byayo bihenze, ubuke bw’abaganga babafasha kuyitaho no kubagira inama, ndetse no kubura isoko ry’umusaruro ukomoka ku ngurube.

Shirimpumu yakomeje agira ati “Ikibazo gikomeye cyane dushaka gukemura ni ukubona icyororo, kuba twabona ibiryo byo kugaburira amatungo yacu no kongerera ubumenyi aborozi bacu, hakiyongeraho n’uburyo twavugurura isoko kugira ngo umuntu yorore, agurishe kandi atere imbere adahombye”.

Inzego zitandukanye zirimo RAB zahuye n’abahagarariye aborozi b’ingurube

Shirimpumu avuga ko hari icyuho kinini hagati y’igiciro cy’inyama z’ingurube kuva ku mworozi kugera ku muguzi wazo wa nyuma uzishaka ku isoko, kuko ikilo ku mworozi kibarirwa hagati y’amafaranga 1,500-1,800, ariko cyagera ku isoko kikaba amafaranga 4,000.

Ibigo mpuzamahanga nka Enabel y’Ababiligi, umuryango FAO ushinzwe ibiribwa ndetse n’umushinga ‘Orora Wihaze’ uterwa inkunga n’Abanyamerika, bivuga ko bizafasha aborozi b’ingurube kubona ubumenyi, kubahuza n’ibigo by’imari ndetse no kubashyira mu ikoranabuhanga ribafasha kumenyekanisha ibyo bakora no gucuruza mu buryo bworoshye.

RAB na yo yabijeje icyororo cy’ingurube za kijyambere ziherutse kuvanwa i Burayi, ikazabubakira amabagiro agera kuri 25 hirya no hino mu gihugu bitarenze umwaka utaha, ariko na bo bagasabwa kwitabira gukingiza ayo matungo no kuyafatira ubwishingizi.

RAB isaba abashinzwe kwita ku matungo(veterinaires) kuba Abanyamwuga bakirinda kuba abakomisiyoneri bo gucuruza imiti bahabwa yo kujya kwita ku matungo.

Iyi mpanuka y’ubwato yabaye mu ijoro ryo ku wa Mbere rishyira kuwa Kabiri tariki 5 Ukwakira 2021, aho bikekwa ko yatewe n’ikirere kibi ndetse n’umubare munini w’abantu bwari butwaye na cyane ko bwari bukoze mu biti.

Umuvugizi w’Intara ya Mongala iherereye mu Majyaruguru ashyira uburengerazuba bw’iki gihugu, Nestor Magbado, yabwiye AFP ko hari imibiri y’abantu 51 yabonywe ku mugoroba wo kuwa Gatanu, indi 69 kugeza ubu ikaba itaraboneka ariko ku bw’amahirwe hari 39 bayirokotse.

Magbado avuga ko uyu mubare w’ababuriwe irengero ari ikigereranyo ngo kuko nta muntu uzi umubare nyawo w’abari baburimo ahubwo ko bakurikije umubare w’abantu ubu bwato bufitiye ubushobozi bwo gutwara.

Uyu muyobozi yatangaje ko bakimara kumenya iby’iyi mpanuka bahise babimenyesha ubuyobozi bukuru i Kinshasa, gusa bakirinda kubitangariza itangazamakuru bataramenya umubare w’abo yahitanye cyangwa uw’abayirokotse.

Magbado yavuze ko ibikorwa byo gushakisha ababuze bigikomeje ariko icyizere cy’uko haba hari abakiri bazima kiri kuyoyoka.

Ubuyobozi bw’intara ya Mongala bwashyizeho iminsi itatu yo kunamira abaguye muri iyo mpanuka.

Impanuka y’ubwato yahitanye abarenga 100 muri mugezi wa Congo

Ni indwara zikunze kwica inka izindi zikayibuza kurisha, aborozi ntibahite bamenya icyatumye umukamo ugabanuka kubera kutagira ubumenyi bwinshi ku ndwara zitandukanye.

Hari ababona ikirondwe ku nka ntibihutire kugikuraho nyamara ngo kimwe n’isazi ya Tsetse biri mu bizonga inka bikayigabanyiriza n’umukamo.

Mu kiganiro IGIHE yagiranye n’umukozi ushinzwe gukurikirana indwara z’amatungo muri RAB, Dr Ntegeyibizaza Samson, yavuze ko ikirondwe gitera indwara enye z’ingenzi zikunze kugaragara hano mu Rwanda, izi ndwara zikaba zituma umukamo ugabanuka kandi zikica amatungo.

Ikibagarira

Iyi ndwara iterwa n’agakoko bita Theilera, Dr Ntegeyibizaza avuga ko iyo ikirondwe kirumye inka kiyinjizamo ako gakoko bigatera inka kurwara Ikibagarira.

Ati “ Ikibagarira gituma inka igira umuriro mwinshi ikagira inturugunyu zibyimbye cyane, ikagira umuriro, ikaramburura, iyo nyir’inka atayivuje kare birangira ipfuye mu buryo bw’amayobera.”

Gasheshe

Indwara benshi bazi mu Kinyarwanda nka Gasheshe iterwa n’agakoko kitwa Anaplasma, iyo ngo ubaze inka yishwe na Gasheshe usanga kimwe mu bice bine bita Nyiraburema cyangwa bushati bigize igifu cy’inka cyarumagaye biturutse kuri ka gakoko gaterwa n’ikirondwe.

Babiziose bakunda kwita “Karaso”

Iyi ndwara ngo akenshi usanga inka iganga amaraso, ifite umuriro ndetse yanananiwe kurisha nyuma y’icyumweru ifashwe ngo ihita ipfa. Agakoko kayitera kitwa Babesia

Umusumagiro

Iyi ndwara iterwa n’agakoko kitwa Cowdria. Aka gakoko ko ngo gatera indwara izwi nka Heart water (mu ndimi z’amahanga) aho ikimenyetso cy’iyo ndwara iyo inka yapfuye bakayibaga basanga agashashi gafunitse umutima kuzuyemo amazi menshi cyane.

Mu gihe inka itarapfa ngo irazungera ikikubita hasi nta mpamvu igahita ipfa mu buryo, ibi ngo biba mu gihe gito cyane ku buryo umworozi iyo adasobanukiwe neza n’ibijyanye n’indwara z’amatungo adapfa kubimenya.

Dr Ntegeyibizaza yavuze ko ububi bw’ibisimba birya amatungo uretse kunyunyuza amaraso akenshi bushingiye ku kuyinjizamo izindi ndwara zitandukanye nk’uko ngo iyo umuntu arumwe n’umubu na wo umwinjizamo malaria.

Hakorwa iki ngo izi ndwara zirwanywe?

Dr Ntegeyibizaza avuga ko mu gihe umworozi abonye ko inka ye irwaye akwiriye guhita ashaka umuvuzi w’amatungo mu buryo bwihutirwa agahita ayifasha ngo kuko iyo haciyeho iminsi ihita ipfa.

Dr Ntegeyibizaza yavuze ko Leta yashyize imbaraga nyinshi mu kwigisha aborozi uburyo bashobora gutera imiti yica uburondwe nibura kabiri mu cyumweru ndetse ngo inashyira aho inka ziterwa umuti hafi y’aborozi, ibi bikorwa byose bikaba bigamije gufasha aborozi kurwanya isazi, ibirondwe n’ibindi bikoko bikunze kwibasira inka.

Ati “ Icya mbere nka Leta turi kurwanya ibyo bisimba biruma inka dutera umuti wica ibirondwe, iyica amasazi n’izindi ndwara, aborozi barasabwa gutera iyi miti nibura kabiri mu cyumweru ku buryo umuti ugera ku nka.”

Yavuze ko kuri ubu hatangiye ubushakashatsi ku nkingo z’izi ndwara aho hamaze kuboneka urukingo rw’Ikibagarira aho ngo ruboneka muri RAB kuri nkunganire, yashishikarije aborozi kurugura ngo kuko rwabafasha mu bworozi bwabo.

Dr Ntgeyibizaza avuga ko izi ndwara zizonga cyane inka zikagira n’uruhare mu igabanuka ry’umukamo ndetse zimwe muri zo zikaba zishobora no kwica inka

Izahuka ry’umubano w’ibihugu byombi rirashoboka cyane, icyo kigomba kumvikana. Ariko ibyo bishoboka gusa mu gihe Leta ya Kampala yakwemera guhindura imyumvire mu buryo bwagutse, ikintu kimeze nko guhindura imitekerereze yose Uganda ifite ku kibazo cyayo n’u Rwanda.

Ukurikije uko ibintu bimeze ubu, aho hari itandukaniro rikomeye ku buryo ubuyobozi bwa Kigali na Kampala bubona ikibazo, hakiyongeraho ukwinangira kwa Uganda mu guhindura imitekerereze. Munsi hari ibitekerezo byanjye kuri iyi ngingo.

Mbere na mbere, biragoye kumenya umugambi wa Uganda ku Rwanda. Nta hantu wanditse kugira ngo abantu bawurebe, ndetse na Perezida Yoweri Museveni wa Uganda ntajya avuga icyo yifuza ku buyobozi bwa Kigali, kabone no mu biganiro bihoraho ageza ku baturage bibamenyesha uko igihugu gihagaze.

Ku rundi ruhande, mugenzi we Perezida Paul Kagame ntabwo ajya ahisha ibyo atishimiye ku mubano na Kampala. Nk’Umukuru w’Igihugu, arabizi ko akwiye gusobanurira Abanyarwanda impamvu umubano w’ibihugu byombi utameze neza. Kubera iyi mpamvu, buri uko abonye umwanya ukwiriye, atangaza ibyo Leta ayoboye iri gukora mu rwego rwo kugerageza kuzahura umubano w’ibihugu byombi ndetse akanatangaza impamvu nta musaruro ufatika uragaragara.

Abandi bayobozi b’u Rwanda na bo babigenza gutyo.

Kubera ubuyobozi bwa Perezida Kagame bushyira imbere guhangana n’ibibazo bihari, abayobozi bakuru b’u Rwanda ndetse n’abanyamuryango ba FPR bumva kimwe icyerekezo cy’u Rwanda kuri Uganda. Ibyo bituma ibitekerezo by’abaturage mu gihugu hose bigira umurongo bigenderaho ndetse n’ibyitezwe kuzabaho bikaba bizwi na bose. Buri gihe abayobozi basobanurira abaturage uko imibanire na Uganda ihagaze, bigatuma buri wese amenya neza uko ibibazo by’u Rwanda na Uganda bimeze.

Ibi bitandukanye n’imitekerereze y’abaturage ba Uganda ku kibazo cy’u Rwanda, aho uzakunda kumva benshi muri bo bavuga ko ikibazo kiri hagati y’abakuru b’ibihugu.

Bavuga ibi kuko ubuyobozi bukuru butajya buhishura ikintu na kimwe ku ntandaro yo kutumvikana n’u Rwanda, bigatuma bamwe mu bayobozi bakuru, kubera kutagira ibisobanuro bihagije, babwira abaturage ko Perezida Museveni ari we wenyine uzi ikibazo afitanye n’u Rwanda.

Mperutse kuganira n’umwe mu bashakashatsi bakomeye muri Uganda ufite ubunararibonye ku ntandaro yo kutumvikana hagati y’ubuyobozi bwa Kigali na Kampala ariko naratunguwe cyane.

Ubwo namubazaga undi muntu utari Perezida Museveni, uzi impamvu ibihugu byombi bitabanye neza nk’uko byakabaye bimeze, yambwiye ko benshi mu bagize Guverinoma ya Uganda batazi umuzi w’iki kibazo.

Numvise ntanyuzwe nkomeza kumubaza kugira ngo nsobanukirwe neza. Igisubizo yampaye kiratangaje. Yambwiye ko Perezida Museveni azi neza ko aramutse azamuye ikibazo cy’u Rwanda na Uganda mu bagize Guverinoma, nta na kimwe cyakumvikana ku baminisitiri be.

Bityo kubera ko atifuza kubazwa cyane kuri iyi ngingo, ibishobora no kumusunikira mu kubura ibisobanuro atanga, akamera nk’utsinzwe ku ngingo akunze kwigaragaza nk’uyisobanukiwe cyane kurusha abandi, uyu mushakashatsi yambwiye ko igisubizo cya Museveni ari uguceceka, kugira ngo buri wese agume mu mwijima, ntihagire usobanukirwa intandaro y’ikibazo gihari bityo ntiyiteze ibibazo.

Iyi myitwarire ituma Museveni abasha guhangana n’icyahungabanya imitekerereze ye, aho amabanga ku ntandaro y’ikibazo cy’u Rwanda abitse [Nk’uko aherutse kubigarukaho, avuga ko ubutasi bushinjwa u Rwanda muri Uganda nta shingiro bufite kuko ibyo rushaka abifite mu mutwe we]. Ntabwo yifuza kuvuguruzwa ku cyemezo yafashe ku Rwanda, bityo nta mpamvu yo kubivugaho kuko bishobora kumukururira ibibazo.

Imitekerereze ya Perezida Museveni iri mu itangazamakuru.

None niba Perezida Museveni adashobora kubwira abaturage cyangwa abayobozi b’igihugu, impamvu nyakuru zatumye umubano w’u Rwanda na Uganda uzamo agatotsi, ni gute ubuyobozi bwa Kigali buzamenya ibyo atekereza kugira ngo hashakwe amahoro arambye? Ntiwirushye ubaza i Kigali, reba mu bitangazamakuru, aho ibitekerezo bya Perezida Museveni bishobora kuboneka bikanasesengurwa mu buryo bworoshye, kandi inshuro nyinshi.

Reka dufate urugero rw’umunyamakuru w’Umufaransa uherutse kumubaza ashaka kumenya neza ubwizerwe bw’ibirego by’ubutasi abayobozi ba Uganda bakunze gushinja Leta ya Kigali.

Igisubizo cye cyavugaga ko [ibyo bikorwa by’ubutasi] ari ugutakaza umwanya kuko amabanga Leta ya Kigali iri gushaka abitswe mu mutwe we. Nguko uko Perezida Museveni atabizi, yagaragaje ko na we yemera ibyo birego by’ubutasi bishinjwa u Rwanda ndetse ko yanabigize ikibazo kiremereye cyane.

Iyo aza kuba afite ibitekerezo bitandukanye n’ibyo kuri iyi ngingo, iki kiganiro yatanze cyari kuba ari amahirwe akomeye yo kwamagana ibyo bihuha. Icyakora ibiganiro nk’ibi sibwo buryo bwonyine bwo kumenya imitekerereze ya Perezida Museveni.

Ku mbuga nkoranyambaga, buri uko Abanyarwanda bagiranye ibiganiro n’abavandimwe ba Uganda ku bibazo by’ubwumvikane buke buri hagati y’impande zombi, imitekerereze y’ubuyobozi bwa Kampala irigaragaza neza.

Nk’urugero, ubwo Abanyarwanda babazaga Abanya-Uganda ku kibazo cy’uko Leta yabo itera inkunga imitwe nka RNC, FLN ndetse n’indi mitwe myinshi irwanya Leta y’u Rwanda, igisubizo twabonye ni uko ’Uganda ari igihugu gifite ubwigenge n’uburenganzira bwo guhitamo uwo kigira inshuti, hatitawe ku kureba niba ari umwanzi w’u Rwanda cyangwa atari we.’

Ibi ntabwo bihagije, kuko abakozi ba Leta ya Uganda ku mbuga nkoranyambaga bakunze kugaruka ku ngingo imeze nk’ubusazi, ivuga ko iyo “Abanyarwanda bahunze ikandamizwa bakorerwa mu gihugu cyabo, bityo mu rwego rwo kwitandukanya n’ibyo bikorwa, Uganda igomba kubaha inzira, cyangwa se ikabaha ubuhungiro.”

Ibi kandi nibyo ubuyobozi bwa Uganda bwakomeje gukora ku bakekwaho ibyaha bahungira muri Uganda, aho bakunze kubonera ubuhungiro badakwiriye. Ibaze uburyo abanyabyaha mu Rwanda bashobora gushimagizwa muri Uganda mu ishusho yo kuvuga ko igihugu gifunguye amarembo ku mpunzi. Bamwe mu bakurikiranira ibintu hafi bakunze kuvuga ko kwakira abanyabyaha bifitanye isano no kugira uruhare mu byaha bakoze.

Uwasoma ibi, mu gihe waba usanzwe ukurikirana ibiganiro bya buri gihe ku mbuga nkoranyambaga z’abakozi ba Uganda, wakabaye witeze ibindi byinshi, kuko waba warasomye, mu mvugo z’uburakari [zivugwa n’abo ku ruhande rwa Uganda], ko u Rwanda ari intashima ku “mfashanyo Uganda yahaye FPR mu rugamba rwo kubohora igihugu hagati ya 1990 na 1994.”

Ngurwo urwego rwabo mu mitekerereze, aho bagisiragira mu mateka, bisa nk’aho ibyo kuyarenga batabyigishijwe mu ishuri. Ntibikenewe ko bibutswa uruhare rukomeye abasirikare b’Abanyarwanda bagize mu mirwano ikomeye [mu rugamba rwo kubohora Uganda hagati ya 1981 na 1986]. Ndetse ntibinakenewe ko hagira ubabwira uburyo Perezida Museveni yababeshye, kuko kuva mu rugamba rwo kubohora igihugu ndetse n’ibihe by’umutekano byakurikiyeho ahagana mu 1990, Uganda yungukiye cyane mu byuya n’amaraso y’Abanyarwanda.

Iyo Uganda ishyira ku ruhande ibyo gushaka kwiturwa n’u Rwanda, ikarebera umubano w’ibihugu byombi mu ndorerwamo y’ubucuruzi n’izindi nyungu, yari kwishimira kuba ikura miliyoni 600$ mu bicuruzwa yohereza mu Rwanda. Ibyo kandi ntibikubiyemo amafaranga Abanya-Uganda bari mu Rwanda bohereza muri icyo gihugu, cyangwa abakerarugendo n’abanyeshuri b’Abanyarwanda bajyaga muri icyo gihugu. Ni ibintu Uganda itapfa kubona ahandi.

Gusa ariko Perezida Museveni n’abantu be bemeye guhara izi nyungu zose kubera kwanga kwitandukanya n’imitwe irwanya u Rwanda ndetse no kureka ibindi birego byose bazi neza kuko u Rwanda rwakomeje kubibugira ku mugaragaro inshuro nyinshi.

Mu buryo busanzwe, iyi mibare ya politiki ntabwo izapfa kumvikana ku baturage ba Uganda, kuko ntabwo bumva uburyo ubuyobozi bwabo bwananiwe gukora amahitamo hagati y’’umweru n’umukara, mu bijyanye no kwita ku nyungu y’ubucuruzi cyangwa igihombo. Nibyo bituma bakunze kwanzura ko hashobora kuba hari ikintu kidasanzwe hagati ya Perezida Kagame na Museveni, gituma Leta zombi zidakorana.

Ariko mu buryo busanzwe, ku ruhande rw’u Rwanda nta kintu cyo guhisha gihari. Perezida Kagame ahora agaragaza iki kibazo uko bwije n’uko bucyeye. Gusa unarebye neza, ku ruhande rwa Uganda na bwo nta kintu gihishe gihari, uretse gusa imigambi migari idasobanutse [ya Perezida Museveni], kandi ubwo akomeje kugana mu za bukuru, kwizera ko ashobora guhinduka muri iki gihe ni ibintu biri hafi yo kudashoboka. Imana ni yo izadutabara.

Perezida Museveni akomeje kugira ibanga intandaro y’ikibazo hagati y’igihugu cye n’u Rwanda, atinya ko abagize Let ye bashobora kudasobanukirwa impamvu z’iki kibazo, akagaragara nk’itsinzwe