Webrwanda Backend

Author: webrwanda

  • Kenya: Umugabo wishe abana abana barenga 10 yishwe n'abaturage nyuma yo gutoroka gereza #rwanda #RwOT

    Umugabo wiyemereye ko yishe abana benshi hanyuma agatoroka polisi mu minsi ibiri ishize yishwe n'abaturage mu burengerazuba bwa Kenya.

    Polisi ivuga ko Masten Wanjala yabonywe n'abaturage aho yari yihishe mu nzu mu mujyi wa Bungoma baramukubita kugeza apfuye.

    Abategetsi bari batangiye igikorwa cyo guhiga uwo mugabo wiyemereye ko yishe abana b'abahungu barenga 10 mu gihe cy'imyaka itanu.

    Abapolisi batatu bari mu kazi umunsi atoroka iyo sitasiyo ya polisi ya Jogoo Road, mu gace kazwi nka Eastlands k'i Nairobi, ku wa gatatu bashinjwe kuba barafashije uyu mugabo muri iryo toroka no kudafatana ibintu uburemere.

    Polisi ya Kenya ivuga ko yatahuye ko uyu musore bivugwa ko yishe abana barenga 10, yatorotse ubwo yagenzuraga imfungwa mu gitondo izihamagara mu mazina.

    Ubwo bari bamugezeho bahamagaye baramubura niko gukora umukwabu muri kasho n'ahandi ngo barebe aho yaba ari.

    Uyu Wanjala yari afungiye muri kasho mu gihe polisi yari igikora amaperereza ku rukurikirane rw'ubwicanyi bwakorewe abana bwatumye igihugu kigwa mu kantu.

    Wanjala yari yafashwe mu kwezi kwa karindwi uyu mwaka,yemera icyaha cyo guha ibiyobyabwenge no kwica abana b'abahungu, bamwe akanywa amaraso yabo.

    Source : https://umuryango.rw/amakuru/mu-mahanga/umutekano/article/kenya-umugabo-wishe-abana-abana-barenga-10-yishwe-n-abaturage-nyuma-yo-gutoroka

  • Ikimero n'ubwiza budasanwe bwa Beyonce byazamuye amaragamutima ya benshi[AMAFOTO] #rwanda #RwOT

    Binyuze mu bitangazamakuru binyuranye n'imbuga nkoranyambaga zitandukanye, ubwiza bwa Beyonce bwongeye guhagarika ibintu ndetse bimwe mu binyamakuru byanditse bitangarira ubwiza afite n'imyaka amaze kugira igera kuri 40.

    Yari yambaye imyambaro iteye amabengeza yakozwe n'abadozi b'abahanga by'umwihariko mu byerekeranye n'imideli bafite uburambe bw'imyaka 49 bakora imirino yo gutunganya imyambaro no kwambika abantu bo mu nzu ya Alexandre Vauthier mu gihughugu cy'u Bufaransa.

    Ijipo ndende isatuye ku ruhande igaragaza ikimero niyo Beyonce yari yambaye iri mu ibara ry'icyatsi gishashagirana, hejuru yari yambaye umwenda umwegereye w'umukara ugaragaza, mu gatuza he yari yambayemo umukufe w'umulinga wa diyama, kimwe n'impeta ku ntoki ze n'inkweto ndende z'umukara zibanzirizwa ku birenge n'udukomo turabagirana twambarwa ku maguru.

    Ubwiza bwa Beyonce bukunze kuvugisha benshi

    Mu kwezi gushize kuwa 04 Nzeri 1981 ni bwo Beyonce yabonye izuba, ubu yujuje imyaka 40

    Refe:dailymail.com

    Source : https://umuryango.rw/imyidagaduro/article/ikimero-n-ubwiza-budasanwe-bwa-beyonce-byazamuye-amaragamutima-ya-benshi

  • Kenya: Umugabo ukekwaho kwica umukinnyi Agnes Tirop yafashwe ari guhunga #rwanda #RwOT

    Polisi yo muri Kenya yaraye ifashe umugabo w'umukinnyi wiruka waciye umuhigo w'isi mu kwiruka Agnes Tirop, wasanzwe mu rugo rwe yishwe atewe icyuma.

    Emmanuel Rotich, yafatiwe mu mujyi wa Mombasa uri ku nkengero z'inyanja y'Ubuhinde, ategereje kugezwa imbere y'urukiko akabazwa ibyaha akekwaho, nk'uko bivugwa n'umutegetsi.

    Madame Tirop, w'imyaka 25, yasanzwe yapfuye ku wa gatatu mu mujyi wa Iten kiri mu burengerazuba bwa Kenya, ahari ikigogikorerwamo imyitozo ku bakinnyi biruka.

    Yari yarangije ku mwanya wa kane mu marushanwa ya Olympic y'uyu mwaka yabereye I Tokyo mu kwiruka metero 5000 mu bagore.

    George Kinoti, umuyobozi w'urwego rw'iperereza ku byaha yabwiye AFP ko umugabo we ari mu maboko y'igiporisi nyuma yo gufatwa “igihe yarimo guhunga”.

    Ubutumwa bwo gusezera Tirop no kubabazwa n'urupfu rwe bwacaracaye cyane
    ku mbuga nkoranyambaga,buturutse ku bantu batandukanye barimo abo bari basangiye umwuga wo kwiruka.

    Julius Yego, wahoze ari kapiteni w'abakinnyi b'imikino ngororamubiri muri Kenya, yabwiye ikiganiro Newsday cya BBC ati: ” Yari umukobwa w'igitangaza kuva akiri muto,yarakoraga cyane kugira ngo abe mu birukanka ba mbere bakomeye cyane kw'isi.”

    “Yashakaga kuba uwa mbere kandi nta minsi myinshi yari ishize aciye umuhigo w'isi kuri metero 10.000.

    “Urugendo rwe rwarimo ruratera imbere, ariko ku bw'amahirwe mabi, hari umuntu wavuze ati “ni ruhagararire aho ngaho”.

    Mu byo yari amaze kugeraho, Tirop yatangiye kugira amahirwe ataranageza ku myaka 18 -mu gutsindira umudari wa bronze mu gusiganwa metero 5000 mu marushanwa y'isi mu 2012 no mu 2014,hanyuma amaze gukura, atsinda irushanwa ryo kwiruka rya World Cross Country Championship mu 2015.

    Mu marushanwa y'isi yo mu 2017 na 2019, yatsindiye umudari wa bronze, mu gusiganwa metero ibihumbi 10 imbere yo kuba uwa kane mu mikino ya Olympic ya Tokyo iheruka.

    Mu kwezi gushize, yanditse amateka,aca agahigo k'isi mu kwiruka ibirometero 10 mu minota 30 n'isegonda rimwe, mu Budage.

    Ku wa kane, Athletics Kenya, urwego rw'igihugu rushinzwe imikino ngororamubiri muri Kenya, rwahagaritse amarushanwa yose mu byumweru bibiri nk'ikimenyetso cy'icyubahiro kuri Madame Tirop.

    Yego yavuze ati: “Twabuze umuntu wari ufite impano nyinshi.Yari umugore ukomeye cyane kandi wita ku cyo arimo gukora.”

    Ku wa gatatu, umuyobozi w'imikino ngororamubiri ku isi,World Athletics, Sebastian Coe, na mugenzi we uyobora komite mpuzamahanga ya Olympic, Thomas Bach, bombi bavuze ku rupfu rwa Madame Tirop.

    Coe watwaye umudari wa zahabu wa Olympic kabiri yavuze ko Tirop yari “umwe mu bakinnyi ba mbere beza b'abagore biruka intera ndende ku isi muri iyi myaka itandatu ishize”.



    Bwana Rotich ukekwaho kwica Tirop wahesheje ishema Kenya

    BBC

    Source : https://umuryango.rw/amakuru/mu-mahanga/ubuzima/article/kenya-umugabo-ukekwaho-kwica-umukinnyi-agnes-tirop-yafashwe-ari-guhunga

  • Bisabye penaliti 14 kugira ngo Gicumbi FC yegukane igikombe cya shampiyona #rwanda #RwOT

    Gicumbi FC yatsinze Etoile del’Est kuri penaliti 14-13 nyuma y’uko amakipe yari yanganyije 2-2, ihita yegukana igikombe cya shampiyona cy’icyiciro cya kabiri cya 2020-21.

    Uyu munsi nibwo hakinwaga imikino ya nyuma y’icyiciro cya kabiri(umukino wa nyuma n’umwanya wa 3).

    Umukino wa nyuma wahuje Gicumbi FC yari yasezereye muri 1/2 Heroes na Etoile del’Est yasezereye Amagaju.

    Umukino wa nyuma wabanjirijwe n’uwo gushaka umwanya wa 3 wegukanywe na Heroes FC itsinze Amagaju kuri penaliti 5-4, ni nyuma y’uko amakipe yombi yari yanganyije 0-0.

    Igice cya mbere cy’umukino wa nyuma, Etoile del’Est niyo wabonaga isatira cyane, byaje no kuyiha amahirwe y’igitego cyatsinzwe na Mudahemuka Claude ku munota wa 28.

    Gicumbi FC yashatse uko yishyura iki gitego maze ku munota wa 44 iza kukishyura gitsinzwe na Dusenge Bertin. Amakipe yombi yagiye kuruhuka ari 2-2.

    Gicumbi FC yaje kubona igitego cya kabiri ku munota wa 63 gitsinzwe na Lulu Okenge Kevin kuri kufura.

    Etoile del’Est yashatse uko yishyura iki gitego ariko bibanza kuyigora aho byasabye umunota wa 90, Gahamanyi Bonafice yatsindaga icya kabiri cya Etoile del’Est.

    Bahise bitabaza penaliti maze Gicumbi yegukana igikombe itsinze kuri penaliti 14-13.

    Source : http://isimbi.rw/siporo/article/bisabye-penaliti-14-kugira-ngo-gicumbi-fc-yegukane-igikombe-cya-shampiyona

  • Muhanga: Urubyiruko rwasobanuriwe ko ‘nta buringanire, nta terambere’ – #rwanda #RwOT

    Babigaragaje kuri uyu wa Kane tariki 14 Ukwakira, mu nama yateguwe n’Urwego rw’Igihugu rushinzwe kugenzura iyubahirizwa ry’ihame ry’Uburinganire (GMO) ku bufatanye n’Akarere ka Muhanga.

    Iyi nama yahuje urubyiruko rusanga 300 ruturutse mu mirenge itandukanye y’Akarere ka Muhanga, rukaba rwari rwiganjemo Abamotari, Abakora muri restaurants na hoteli, abiga muri kaminuza, abanyonzi, abafite ubumuga, Abakorerabushake mu kurwanya COVID-19 , abahagarariye urubyiruko mu madini n’amatorero, abakora muri serivisi zo kohererezanya amafaranga hakoreshejwe ikoranabuhanga n’abandi.

    Guverineri w’Intara y’Amajyepfo, Kayitesi Alice yavuze ko u Rwanda ari igihugu cyubahiriza ihame ry’uburinganire, aho umukobwa n’umuhungu bafite amahirwe n’uburenganzira bingana muri byose, abasaba guharanira kubyaza umusaruro ayo mahirwe kugira ngo bazagere ku nzozi zabo.

    Yagize ati “Urubyiruko muri imbaraga z’igihugu kandi zubaka, bityo mugomba guharanira kuba umusemburo w’impinduka muri byose, mukitabira imirimo yose nta kuvuga ngo umurimo uyu n’uyu ukorwa n’abahungu cyangwa abakobwa”.

    Guverineri Kayitesi kandi yasabye urubyiruko kurwanya ihohoterwa rishingiye ku gitsina, bakumira inda ziterwa abangavu, birinda ibiyobyabwenge kandi bagira amakenga ku waba ashaka kubashora mu bikorwa byose byabatesha kugera ku ntego n’inzozi zabo.

    Yagize ati “Ubuzima bwanyu buri mu biganza byanyu, nimwe ba mbere, mugomba kwifatira icyemezo mukamagana ihohoterwa rishingiye ku gitsina. Uzashaka kugushuka ukamuhakanira ntaho azahera, ubuzima bwanyu ndetse n’iterambere mwifuza kugeraho ni mwe muzabiha icyerekezo mushaka”.

    Umuyobozi w’Urwego rw’Igihugu Rushinzwe Kugenzura Iyubahirizwa ry’Ihame ry’Uburinganire (GMO), Rose Rwabuhihi, yibukije ko uburinganire ari ihame igihugu cy’u Rwanda cyiyemeje kugenderaho hagamijwe ko abakobwa n’abahungu, abagabo n’abagore bagira amahirwe angana muri byose.

    Yasabye urubyiruko guharanira ko iryo hame ryubahirizwa mu byo bakora byose kugira ngo biteze imbere, banateze imbere igihugu cyabo.

    Umuhuzabikorwa w’Inama y’Igihugu y’Urubyiruko mu Karere ka Muhanga, Musangwa Théoneste, yavuze ko we na bagenzi be bagiye kuba umusemburo w’impinduka nziza, bitabira gahunda zitandukanye zashyizweho mu kwimakaza uburinganire kandi batanga amakuru ku gihe igihe habaye ikibazo cy’ihohoterwa cyangwa aho barikeka.

    Ikiganiro n’urubyiruko, ni kimwe mu bikorwa byari biteganyijwe mu bizakorwa muri gahunda ngarukamwaka igamije kurushaho kwimakaza ihame ry’uburinganire mu nzego zegereye abaturage, gahunda itegurwa n’urwego rushinzwe kugenzura iyubahirizwa ry’ihame ry’uburinganire. Iyi gahunda yabereye mu tundi turere twa Gatsibo, Nyaruguru, Ngororero, Nyagatare na Rulindo.

    Bimwe mu bikorwa byibandwaho harimo gusezeranya imiryango yabanaga mu buryo butemewe n’amategeko, kwandika abana batari banditse mu bitabo by’irangamimerere ndetse n’ibiganiro byimbitse ku bayobozi b’inzego zibanze kugera ku mudugudu.

    Hateganyijwe kandi ibiganiro ku ruhare rw’abafatanyabikorwa mu kwimakaza ihame ry’uburinganire no kurwanya ihohoterwa ndetse n’ibiganiro n’inzego z’abikorera ku ruhare rwabo mu kwimakaza ihame ry’uburinganire.

    Guverineri w’Intara y’Amajyepfo, Kayitesi Alice yasabye urubyiruko kwirinda ikintu cyose cyatuma batagera ku nzozi zabo

    Umuyobozi w’Urwego rw’Igihugu Rushinzwe Kugenzura Iyubahirizwa ry’Ihame ry’Uburinganire (GMO), Rose Rwabuhihi, yibukije ko uburinganire ari ihame igihugu cy’u Rwanda cyiyemeje kugenderaho

    Hatanzwe ikiganiro kigaruka ku ruhare rw’urubyiruko mu kwimakaza ihame ry’uburinganire mu iterambere

    source : https://ift.tt/3mUsgVb

  • Nyaruguru: Barindwi bafatanywe imyenda ya caguwa bayivanye i Burundi – #rwanda #RwOT

    Imyenda yafashwe ku wa Gatatu tariki ya 13 Ukwakira 2021 ni amabalo atandatu n’indi myenda irengaho yari mu mifuka itatu. Ba nyirayo bari bahaye akazi abaturage batanu ari na bo bari batwaye iyo myenda ku magare ariko bari kumwe na bo.

    Umuvugizi wa Polisi mu Ntara y’Amajyepfo, Superintendent of Police(SP) Theobald Kanamugire yavuze ko bariya bantu bafashwe mu rukerera saa kumi n’imwe, biturutse ku makuru yatanzwe n’abaturage.

    Yagize ati “Abaturage baduhaye amakuru ko hari abantu bagiye mu gihugu cy’abaturanyi gukurayo imyenda ya caguwa ya magendu. Abapolisi bahise bategura igikorwa cyo kubafata, nibwo babafatiye mu nzira barimo kwinjira mu Rwanda bafite iriya myenda bavuye mu Burundi.”

    SP Kanamugire yashimiye abaturage batanze amakuru akangurira abaturage kwirinda ubucuruzi bwa magendu ahubwo bakajya batanga amakuru igihe babonye abacuruza ibicuruzwa bya magendu.

    Yagize ati “Buri gihe tubwira abantu ko ubucuruzi bwa magendu bumunga ubukungu bw’Igihugu tukabasaba gukora ubucuruzi bwemewe n’amategeko, byongeye iyo bafashwe barafungwa ndetse bakanahomba. Abantu bishora mu bucuruzi bwa magendu usanga bitwikiriye ijoro ku buryo bashobora kwitiranywa n’abagizi ba nabi baje mu gihugu bakaba bahasiga ubuzima.”

    Umuvugizi wa Polisi mu Ntara y’Amajyepfo yasabye abaturage kwirinda abantu babashora mu bucuruzi bwa magendu babashukishije amafaranga. Yabakanguriye kandi gukura amaboko mu mifuka bagakora bakirinda kujya bafatirwa mu bintu batazi kuko hari abashukishwa amafaranga bagakoreshwa mu kwambutsa za magendu.

    Abafashwe bahise bashyikirizwa Urwego Rushinzwe Ubugenzacyaha(RIB) rukorera muri sitasiyo ya Polisi ya Munini naho ibicuruzwa bijyanwa ku biro by’ishami rya Polisi rishinzwe kurwanya ubucuruzi bwa magendu mu Karere ka Huye.

    Itegeko N° 026/2019 ryo ku wa 18/09/2019 rigena uburyo bw’isoresha ingingo ya 87 ivuga ko Umuntu wese ugambiriye kutishyura umusoro ukoze kimwe mu bikorwa bikurikira: gukoresha inyandiko mpimbano mu ibaruramari rye; kwigana no gukoresha inyandiko cyangwa ibikoresho byo mu buyobozi bw’imisoro byifashishwa mu gusoresha;guhisha ibicuruzwa bisoreshwa cyangwa imitungo ifitanye isano n’ubucuruzi; gukora imenyekanisha rigaragaza ko umusoreshwa atacuruje; guhindura izina ry’ubucuruzi bikozwe n’ukurikiranweho umusoro; kwandika ubucuruzi ku wundi muntu mu buriganya; guhisha Ubuyobozi bw’Imisoro ibitabo by’ibaruramari cyangwa kubyangiza; gukoresha ibitabo by’ibaruramari by’ibihimbano; aba akoze icyaha cyo kunyereza umusoro.

    Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarengeje imyaka itanu (5).

    source : https://ift.tt/3aGYyNR

  • Musanze:Ab’amikoro make bakora imirimo y’amaboko ibarwa nk’ingurane y’ifunguro ry’abana babo – #rwanda #RwOT

    Aba babyeyi, babisabye Akarere ka Musanze mu igenzura kakoze kuri uyu wa Kane tariki 14 Ukwakira 2021 muri gahunda yo gukurikirana ishyirwa mu bikorwa rya gahunda yo kugaburira abanyeshuri ku bigo bigaho yatangiye muri uyu mwaka w’amashuri.

    Maniraguha Mugabo ni umwe mu babyeyi barerera ku Ishuri Ribanza rya Kamwumba ufite abana bane bahiga, avuga ko kubona amafaranga yabishyurira kugira ngo bajye barya ku ishuri atabasha kuyabona, ariko ko yiteguye gukora imirimo y’amaboko yahabwa agaciro.

    Yagize ati “Nk’ubu mfite abana bane biga kuri Iki Kigo, kandi bose bagomba kujya barya ku ishuri. Amikoro mfite ntanyemerera kujya mbishyurira ibihumbi birenga 50, nasabye ubuyobozi kujya nza kwasa inkwi zo gutekesha, iyo mibyizi bakayibara mu mafaranga, nkishyurira abana bakarya nta kindi kibazo bagize.”

    Anselme Nshizirungu na we urerera kuri G.S Saint Michelle Gacaca, avuga ko bishimiye gahunda yo kugaburira abana ku mashuri ariko akavuga ko afite ubushobozi buke bityo ko yiteguye gutanga umusanzu we mu mirimo izahakorerwa.

    Yagize ati ” Iyi gahunda yo kugaburira abana ku mashuri yaziye igihe pe! Ariko mfite abana babiri biga aha, kubishyurira amafaranga yo kurya byari kungora cyane ku buryo kubahiriza iyi gahunda ntari kubishobora, ariko ndaza ngateka mfatanyije n’abandi, bakambarira imibyizi bizamfasha bitangoye n’abana bige badafite ipfunwe kuko nabuze ayo kwishyura.”

    Umuyobozi w’Akarere ka Musanze, Nuwumuremyi Jeannine, ashima uruhare rw’ababyeyi bakora ibishoboka ngo bubahirize gahunda yo kugaburira abana ku mashuri kandi ko bashima uruhare rwabo mu myigire y’abana babo kuko biteze ko bizazamura n’ireme ry’uburezi.

    Yagize ati “Turi muri gahunda yo gusura ibigo by’amashuri tureba uko gahunda yo kugaburira abana yubahirizwa, abanyeshuri barabyishimiye cyane, turashimira ababyeyi babyumvise bakanabyubahiriza, ariko hari n’abandi bagaragaje ko amikoro yabo atatuma babasha kwishyura aya mafaranga.”

    ” Hari abahisemo gukora imirimo y’amaboko izajya ivunjwamo ayo mafaranga, hari abakora isuku cyane ko hari ibigo bishya bikeneye gukorerwa isuku. Hari abarimo kwasa inkwi abandi bateka n’ibindi. Hari n’abazajya bazana ibyo kurya bitewe n’ibyo babonye, twizeye ko iyi gahunda izakomeza, kuko izatuma abana biga neza n’ireme ry’uburezi bahabwa rikazamuka.”

    Gahunda yo kugaburira abana bo mu mashuri abanza n’ayisumbuye yose yatangiranye n’umwaka w’amashuri 2021-2022 aho byitezwe ko Leta izatanga uruhare rungana na 56% urundi 44% rukazatangwa n’ababyeyi.

    Gahunda yo kugaburira abana bo mu mashuri abanza n’ayisumbuye yose yatangiranye n’umwaka w’amashuri 2021-2022

    source : https://ift.tt/3mZafFq

  • Iburengerazuba: Imirimo yo kubaka ibyumba by’amashuri 4759 igeze kuri 96% – #rwanda #RwOT

    Mu rwego rwo gukemura ikibazo cy’ubucukike mu mashuri no gufasha abanyeshuri bakoraga ingendo ndende bajya kwiga, Leta y’u Rwanda yubatse ibyumba by’amashuri bishya birenga ibihumbi 22 mu gihugu hose.

    Habitegeko yavuze ko mu Ntara y’Iburengerazuba hubatswe ibyumba 4759, imirimo ikaba iri kugana ku musozo.

    Yagize ati “Muri uyu mwaka dusoje w’imihigo, Nyakubahwa Perezida wa Repubulika yaduhaye ubushobozi bwo kubaka ibyumba by’amashuri 4759 muri iyi ntara. Amashuri atangiye tugeze ku ntambwe ishimishije nubwo atari 100%, kuko amashuri yuzuye ku kigero cya 96,3%, ni ukuvuga ngo 3,7% ntabwo aruzura ariko mu minsi mike nayo araba yuzuye.”

    Guverineri Habitegeko yavuze ko kimwe mu byakereje imirimo yo kubaka ibyumba by’amashuri harimo ibura ry’ibirahure.

    Ati “Hamwe na hamwe usanga ari nk’ibirahure twagiye tubura, hari igihe ibirahure bya milimetero enye byabuze, hari ibirahure bifite umubyimba muto ku buryo utabikoresha ku byumba by’abana bato kubera baba bakubagana byahita bimeneka, ariko mu minsi mike na byo biraba byuzuye.”

    Aho ibyumba by’amashuri byuzuye biri gutanga umusaruro byari byitezweho wo kugabanya ubucukike mu mashuri no korohereza abanyeshuri bakoraga ingendo ndende.

    Padiri Mushimiyimana Paulin uyobora Urwunge rw’Amashuri rwa Mutagatifu Petero mu Murenge wa Kivumu, yavuze ko kuri iri shuri hubatswe ibyumba umunani by’amashuri bikaba byarabafashije kugabanya ubucukike bwari muri iki kigo.

    Ati “Ibi byumba by’amashuri byagize akamaro kuko byafashije mu kugabanya ubucukike bw’abana, cyane cyane muri uyu murenge wa Kivumu no muri iri shuri mpagarariye wasangaga abana biga bacucitse cyane ku buryo wasangaga nko mu cyumba cy’ishuri harimo abana 70 ariko ubu mu cyumba cy’ishuri usanga harimo abana 45, ahakabije ugasangamo 50 ukabona ko ibi byumba byaje bikenewe kuko nta bucukike bugihari.”

    Muri uyu mwaka w’amashuri biteganyijwe ko abanyeshuri bose batangira gufatira amafunguro ku ishuri. Bitewe n’uko hari aho ibikoni bitaruzura hari aho iyi gahunda yo kugaburira abana ku ishuri itaratangira.

    Guverineri Habitegeko yasabye abo bireba ko bakwihutisha iyi mirimo isigaye kugira ngo abana bose batangire bafatire amafunguro ku ishuri, cyane ko aho iyi gahunda yatangiye abana bavuga ko yabagiriye akamaro.

    Imirimo yo kubaka ibyumba by’amashuri 4759 mu Ntara y’Iburengerazuba igeze kuri 96%

    source : https://ift.tt/3vdPPw5

  • Abarenga 900 basoje amasomo muri UNILAK, bibutswa ko barangije mu bihe bigoye (Amafoto) – #rwanda #RwOT

    Umuhango wo gutanga impamabumenyi kuri abo banyeshuri wabaye kuri uyu wa Kane tariki 14 Ukwakira 2021. Ubaye ku nshuro ya 15 kuva iri shuri ryashingwa.

    Umuyobozi Mukuru wa UNILAK, Dr Ngamije Jean, yavuze ko ashingiye ku masomo bahawe n’uburyo bigishijwe kwihangira imirimo, hari icyizere ko bagiye kuzitwara neza muri sosiyete no kugira uruhare mu gukemura ibibazo bihari, ariko abibutsa ko basoje amasomo mu bihe bigoye.

    Ati “Abo bose dushingiye ku byo twagiye tubona no mu bihe byashize n’abagiye barangiza, barimo baratanga umusanzu wabo mu gihugu. Barangije mu gihe kigoye aho imirimo iba mike kandi abarangiza ari benshi, ariko bose babonye isomo ribatoza guhanga imirimo.”

    “Kugira ngo babone imirimo bose igihugu nticyabibasha cyonyine, ariko abanyeshuri b’iki gihe barabikora neza [kwihangira umurimo] ni na cyo dushimira Imana, benshi barangiza bamaze kumenya icyo bagiye gukora.”

    Abahawe impamyabumenyi ni abigiye mu mashami yose y’iyi Kaminuza yaba irya Kigali, Nyanza ndetse na Rwamagana.

    Abarangije icyiciro cya Kabiri ni 856 mu gihe abarangije Masters ari 135. Muri aba harimo ab’igitsina gore barenga 600 n’ab’igitsina gabo barenga 380.

    Abanyeshuri 57 bahize abandi (abagize hejuru ya 80%), nibo bitabiriye imbonankubone uyu muhango wabereye ku ishami rya UNILAK rya Nyanza, aho abasigaye bawitabiriye bifashishije ikoranabuhanga.

    Bamwe muri bo babwiye IGIHE ko bashingiye ku masomo bahawe ndetse n’uburyo bigishijwe kwihangira umurimo, bagiye gushyira mu bikorwa ibyo bize.

    Dusabimana Gad ati “Muri iyi minsi biragorana iyo umuntu yiteze ko azabona akazi, ariko UNILAK ntabwo iturera ngo tuzashake akazi gusa, ahubwo twigishwa no kwihangira akazi. Njyewe natangiye gutekereza uko nakora ubucuruzi.”

    Uwambayinema Bélise we yavuze ko bitewe n’ubumenyi yahawe na UNILAK, yamaze kubona icyo akora.

    Ati “Aha nahakuye ubumenyi kandi ni bwo bwatumye mbona akazi muri kampani ikomeye ku Isi, aho nkora ibijyanye no gutanga ubufasha ku bakiriya baba baraguze software dukora bagahura n’ibibazo.”

    UNILAK yashinzwe mu 1997 n’ishyirahamwe ry’ababyeyi b’Abalayiki b’Abadventiste, FAPADER. Imaze gushyira ku isoko ry’umurimo abanyeshuri barangije icyiciro cya kabiri cya kaminuza barenga 13.800 ndetse n’abarangije Masters basaga 600.

    Usibye Abanyarwanda iyi Kaminuza yigamo n’Abanyamahanga bagera kuri 200 baturuka mu bihugu bitandukanye byo muri Afurika.

    Abarangije icyiciro cya Bachelors ni 856 mu gihe abarangije Masters ari 135

    Bamwe muri bo bavuze ko bashingiye ku masomo bahawe ndetse n’uburyo bigishijwe kwihangira umurimo bagiye gushyira mu bikorwa ibyo bize

    Bamwe mu barimu bigisha muri UNILAK bitabiriye ibi birori

    Gutanga impamyabumenyi muri UNILAK bibaye ku nshuro ya 15 kuva iri shuri ryashingwa

    Abahagarariye bagenzi babo biga muri UNILAK baturuka mu bihugu 15

    Iyi kaminuza iganwa n’abaturuka mu bihugu bitandukanye

    Kaminuza y’Abalayiki b’Abadivantisiti b’umunsi wa Karindwi UNILAK yatanze impambumenyi ku banyeshuri barangije icyiciro cya kabiri n’icya gatatu cya kaminuza bagera kuri 983

    Mubarangije bose harimo ab’igitsina gore barenga 600 n’ab’igitsina gabo barenga 380

    Muri aba banyeshuri bashyizwe ku isoko ry’umurimo abarenga 600 ni ab’igitsina gore

    UNILAK ishyira n’ingufu mu bufashamyumvire kugira ngo abanyeshuri bafashwe kumva icyo bashaka

    UNILAK ifite amashami atatu ari i Nyanza Kigali na Rwamagana

    UNILAK yashyize ku isoko ry umurimo abarenga 900 ibibutsa ko barangije mu gihe kigoye

    UNILAK yashinzwe mu 1997 n’ishyirahamwe ry’ababyeyi b’Abalayiki b’Abadventiste, FAPADER

    Byari ibirori bibereye ijisho

    Ni ku nshuro ya 15 iyi kaminuza itanze impamyabumenyi

    Pasiteri Ezra Mpyisi na we yari yitabiriye umuhango wo gutanga impamyabumenyi mu barangije muri UNILAK

    Abatsinze neza kurusha abandi bahawe ibihembo

    Uwambayinema Bélise we yavuze ko bitewe n’ubumenyi yahawe na UNILAK yamaze kubona icyo akora

    Umuyobozi Mukuru wa UNILAK, Dr Ngamije Jean yavuze ko ashingiye ku masomo abarangije bahawe n’uburyo bigishijwe kwihangira imirimo hari icyizere ko bazitwara neza muri sosiyete

    [email protected]

    source : https://ift.tt/3AKC74X

  • Dr. Habumuremyi Pierre Damien yashimiye Perezida Kagame wamuhaye imbabazi #rwanda #RwOT

    Mu butumwa yashyize kuri Twitter,mu gicuku gishyira kuri uyu wa Gatanu tariki 15 Ukwakira nyuma y'amasaha macye asohotse muri Gereza ya Nyarugenge,Dr Habumuremyi yashimiye Perezida Paul Kagame n'Umuryango wa FPR-Inkotanyi, yizeza ko amakosa yakoze atazongera kuyakora.

    Yagize ati 'Paul Kagame Nyakubahwa Perezida wa Repubulika ukaba na Chairman wa FPR Inkotanyi, ndabashimira mbikuye ku mutima njye n'Umuryango wanjye imbabazi mwampaye za kibyeyi. Imbabazi mwampaye nazihaye agaciro gakomeye cyane, ndabizeza ko amakosa nakoze atazongera. Ndashimira n'ubutabera bw'u Rwanda.'

    Ku mugoroba wo kuri uyu wa Kane tariki 14 Ukwakira 2021, nyuma y'amasaha macye ahawe imbabazi na Perezida Kagame, Dr Pierre Damien yarekuwe n'ubuyobozi bwa Gereza ya Nyarugenge yari afungiyemo.

    Itangazo ry'Ibyemezo by'Inama y'Abaminisitiri ryasohotse ku wa 13 Ukwakira 2021, ni ryo ryemeje ko uyu mugabo wari warakatiwe igifungo cy'imyaka itatu, ababariwe na Perezida wa Repubulika.

    Rigira riti 'Ashingiye ku bubasha ahabwa n'amategeko, Perezida wa Repubulika yahaye imbabazi Pierre Damien Habumuremyi.'

    Imbabazi Habumuremyi yahawe zikuraho igifungo cy'imyaka itatu yari yarakatiwe n'Urukiko Rwisumbuye rwa Nyarugenge hamwe n'ihazabu yari yaraciwe ya miliyoni 892 Frw.

    Mu kiganiro yahaye Abanyamakuru, Dr Damien yavuze ibyishimo atewe no guhabwa imbabazi ndetse ashimira Perezida Paul Kagame wazimuhaye kuko yari yarazimusabye abikuye ku mutima.

    Ati 'Ndamushimira kuko ntabwo nari mbyiteze, icyo nari nzi ni uko namusabye imbabazi mbikuye ku mutima. Nagize amahirwe ko nk'umubyeyi w'Igihugu, imbabazi namusabye yazimpaye. Nabyakiranye umutima mwiza.'

    Dr Habumuremyi yavuze ko usibye gusaba imbabazi Umukuru w'Igihugu, yanazisabye Abanyarwanda bose muri rusange.

    Mu mwaka yari amaze muri gereza, yavuze ko yakuyeyo amasomo ku buryo amakosa yakoze akavamo ibyaha byatumye afungwa atazigera ayasubira ahubwo agiye gukorera igihugu kuko agifite imbaraga.

    Gusa nubwo yababariwe, azasabwa kwishyura amafaranga abereyemo abari bamureze mu nkiko. Imitungo ye yarafatiriwe kugeza igihe azishyurira abo bantu abereyemo imyenda.

    Dr Habumuremyi wigeze kuba Minisitiri w'Intebe, yahamijwe icyaha cyo gutanga sheki itazigamiwe. Cyakozwe bishingiye kuri Kaminuza ye ya Christian University of Rwanda yari abereye Perezida ndetse akagiramo n'imigabane ingana na 60%, mu gihe umuhungu we afitemo 30% naho Umuyobozi wayo [Vice Chancellor] akagiramo 10%.

    Mu maburanisha ye, yemeye ko hari abantu bagiye baha serivisi Kaminuza ye ntibishyurwe, abandi na bo bakamuguriza amafaranga ntabishyure, gusa akemeza ko bose hari uburyo yateganyaga kuzayabaha.

    Dr Habumuremyi yavukiye i Ruhondo mu Karere ka Musanze tariki ya 20 Gashyantare 1961. Yize mu bihugu bitandukanye birimo Repubulika Iharanira Demokarasi ya Congo, u Bufaransa na Burkina Faso.

    Yagizwe Minisitiri w'Intebe tariki ya 7 Ukwakira 2011, umwanya yavuyeho tariki ya 23 Nyakanga 2014 awumazeho imyaka ibiri, amezi icyenda n'iminsi 16, asimburwa na Murekezi Anastase. Yabaye kandi Minisitiri w'Intebe wa kane nyuma ya Jenoside yakorewe Abatutsi mu 1994 asimbuye Bernard Makuza, umwanya wabanjeho Pierre Célestin Rwigema na Faustin Twagiramungu.

    Muri Gashyantare 2015, Inama y'Abaminisitiri idasanzwe iyobowe na Perezida wa Repubulika, Paul Kagame yagize Dr. Habumuremyi, Perezida w'Urwego rw'Igihugu Rushinzwe Intwari z'Igihugu, Imidali n'Impeta y'Ishimwe, umwanya yariho kugeza atawe muri yombi muri Nyakanga 2020.


    Source : https://umuryango.rw/amakuru/mu-rwanda/ubuzima/article/dr-habumuremyi-pierre-damien-yashimiye-perezida-kagame-wamuhaye-imbabazi